੧੮. ਕੁਮੁਦਵਗ੍ਗੋ
੧. ਕੁਮੁਦਮਾਲਿਯਤ੍ਥੇਰਅਪਦਾਨਵਣ੍ਣਨਾ
ਪਬ੍ਬਤੇ ਹਿਮਵਨ੍ਤਮ੍ਹੀਤਿਆਦਿਕਂ ਆਯਸ੍ਮਤੋ ਕੁਮੁਦਮਾਲਿਯਤ੍ਥੇਰਸ੍ਸ ਅਪਦਾਨਂ. ਅਯਮ੍ਪਿ ਥੇਰੋ ਪੁਰਿਮਬੁਦ੍ਧੇਸੁ ਕਤਾਧਿਕਾਰੋ ਤਤ੍ਥ ਤਤ੍ਥ ਭਵੇ ਵਿਵਟ੍ਟੂਪਨਿਸ੍ਸਯਾਨਿ ਪੁਞ੍ਞਾਨਿ ਉਪਚਿਨਨ੍ਤੋ ਅਤ੍ਥਦਸ੍ਸਿਸ੍ਸ ਭਗਵਤੋ ਕਾਲੇ ਹਿਮਵਨ੍ਤਪਬ੍ਬਤਸਮੀਪੇ ਜਾਤਸ੍ਸਰਸ੍ਸ ਆਸਨ੍ਨੇ ਰਕ੍ਖਸੋ ਹੁਤ੍ਵਾ ਨਿਬ੍ਬਤ੍ਤੋ ਅਤ੍ਥਦਸ੍ਸਿਂ ਭਗਵਨ੍ਤਂ ਤਤ੍ਥ ਉਪਗਤਂ ਦਿਸ੍ਵਾ ਪਸਨ੍ਨਮਾਨਸੋ ਕੁਮੁਦਪੁਪ੍ਫਾਨਿ ਓਚਿਨਿਤ੍ਵਾ ਭਗਵਨ੍ਤਂ ਪੂਜੇਸਿ. ਭਗਵਾ ਅਨੁਮੋਦਨਂ ਕਤ੍ਵਾ ਪਕ੍ਕਾਮਿ.
੧. ਸੋ ਤੇਨ ਪੁਞ੍ਞੇਨ ਤਤੋ ਚਵਿਤ੍ਵਾ ਦੇਵਲੋਕਂ ਉਪਪਨ੍ਨੋ ਛ ਕਾਮਾਵਚਰਸਮ੍ਪਤ੍ਤਿਯੋ ਅਨੁਭਵਿਤ੍ਵਾ ਮਨੁਸ੍ਸੇਸੁ ਚ ਚਕ੍ਕਵਤ੍ਤਿਆਦਿਸਮ੍ਪਤ੍ਤਿਯੋ ਅਨੁਭਵਿਤ੍ਵਾ ਇਮਸ੍ਮਿਂ ਬੁਦ੍ਧੁਪ੍ਪਾਦੇ ਕੁਲਗੇਹੇ ਨਿਬ੍ਬਤ੍ਤੋ ਵੁਦ੍ਧਿਪ੍ਪਤ੍ਤੋ ਰਤਨਤ੍ਤਯੇ ਪਸਨ੍ਨੋ ਪਬ੍ਬਜਿਤ੍ਵਾ ਵਾਯਮਨ੍ਤੋ ਬ੍ਰਹ੍ਮਚਰਿਯਪਰਿਯੋਸਾਨਂ ਅਰਹਤ੍ਤਂ ਪਤ੍ਵਾ ਅਤ੍ਤਨੋ ਪੁਬ੍ਬਕਮ੍ਮਂ ਸਰਿਤ੍ਵਾ ਸੋਮਨਸ੍ਸਜਾਤੋ ਪੁਬ੍ਬਚਰਿਤਾਪਦਾਨਂ ਪਕਾਸੇਨ੍ਤੋ ਪਬ੍ਬਤੇ ਹਿਮਵਨ੍ਤਮ੍ਹੀਤਿਆਦਿਮਾਹ. ਤਤ੍ਥ ਤਤ੍ਥਜੋ ਰਕ੍ਖਸੋ ਆਸਿਨ੍ਤਿ ਤਸ੍ਮਿਂ ਜਾਤਸ੍ਸਰਸਮੀਪੇ ਜਾਤੋ ਨਿਬ੍ਬਤ੍ਤੋ ਰਕ੍ਖਸੋ ਪਰਰੁਧਿਰਮਂਸਖਾਦਕੋ ਨਿਦ੍ਦਯੋ ਘੋਰਰੂਪੋ ਭਯਾਨਕਸਭਾਵੋ ਮਹਾਬਲੋ ਮਹਾਥਾਮੋ ਕਕ੍ਖਲ਼ੋ ਯਕ੍ਖੋ ਆਸਿਂ ਅਹੋਸਿਨ੍ਤਿ ਅਤ੍ਥੋ.
ਕੁਮੁਦਂ ਪੁਪ੍ਫਤੇ ਤਤ੍ਥਾਤਿ ਤਸ੍ਮਿਂ ਮਹਾਸਰੇ ਸੂਰਿਯਰਂਸਿਯਾ ਅਭਾਵੇ ਸਤਿ ਸਾਯਨ੍ਹੇ ਮਕੁਲ਼ਿਤਂ ਕੁਞ੍ਚਿਤਾਕਾਰੇਨ ਨਿਪ੍ਪਭਂ ਅਵਣ੍ਣਂ ਹੋਤੀਤਿ ‘‘ਕੁਮੁਦ’’ਨ੍ਤਿ ਲਦ੍ਧਨਾਮਂ ਪੁਪ੍ਫਂ ਪੁਪ੍ਫਤੇ ਵਿਕਸਤੀਤਿ ਅਤ੍ਥੋ. ਚਕ੍ਕਮਤ੍ਤਾਨਿ ਜਾਯਰੇਤਿ ਤਾਨਿ ਪੁਪ੍ਫਾਨਿ ਰਥਚਕ੍ਕਪਮਾਣਾਨਿ ਹੁਤ੍ਵਾ ਜਾਯਨ੍ਤੀਤਿ ਅਤ੍ਥੋ. ਸੇਸਂ ਸੁਵਿਞ੍ਞੇਯ੍ਯਮੇਵਾਤਿ.
ਕੁਮੁਦਮਾਲਿਯਤ੍ਥੇਰਅਪਦਾਨਵਣ੍ਣਨਾ ਸਮਤ੍ਤਾ.
੨. ਨਿਸ੍ਸੇਣਿਦਾਯਕਤ੍ਥੇਰਅਪਦਾਨਵਣ੍ਣਨਾ
ਕੋਣ੍ਡਞ੍ਞਸ੍ਸ ਭਗਵਤੋਤਿਆਦਿਕਂ ਆਯਸ੍ਮਤੋ ਨਿਸ੍ਸੇਣਿਦਾਯਕਤ੍ਥੇਰਸ੍ਸ ਅਪਦਾਨਂ. ਅਯਮ੍ਪਿ ਪੁਰਿਮਜਿਨਵਰੇਸੁ ਕਤਾਧਿਕਾਰੋ ਅਨੇਕਾਸੁ ਜਾਤੀਸੁ ਵਿਵਟ੍ਟੂਪਨਿਸ੍ਸਯਾਨਿ ਪੁਞ੍ਞਾਨਿ ਉਪਚਿਨਨ੍ਤੋ ਕੋਣ੍ਡਞ੍ਞਸ੍ਸ ਭਗਵਤੋ ਕਾਲੇ ਵਡ੍ਢਕਿਕੁਲੇ ਨਿਬ੍ਬਤ੍ਤੋ ਸਦ੍ਧੋ ਪਸਨ੍ਨੋ ਭਗਵਤੋ ਧਮ੍ਮਦੇਸਨਂ ਸੁਤ੍ਵਾ ਪਸਨ੍ਨਮਾਨਸੋ ਭਗਵਤੋ ਵਸਨਪਾਸਾਦਸ੍ਸਾਰੋਹਨਤ੍ਥਾਯ ਸਾਰਕਟ੍ਠਮਯਂ ਨਿਸ੍ਸੇਣਿਂ ਕਤ੍ਵਾ ਉਸ੍ਸਾਪੇਤ੍ਵਾ ਠਪੇਸਿ. ਭਗਵਾ ਤਸ੍ਸ ਪਸਾਦਸਂਵਡ੍ਢਨਤ੍ਥਾਯ ਪਸ੍ਸਨ੍ਤਸ੍ਸੇਵ ਉਪਰਿਪਾਸਾਦਂ ਆਰੁਹਿ. ਸੋ ਅਤੀਵ ਪਸਨ੍ਨੋ ਤੇਨੇਵ ਪੀਤਿਸੋਮਨਸ੍ਸੇਨ ਕਾਲਂ ਕਤ੍ਵਾ ਦੇਵਲੋਕੇ ਨਿਬ੍ਬਤ੍ਤੋ ਤਤ੍ਥ ਦਿਬ੍ਬਸਮ੍ਪਤ੍ਤਿਂ ਅਨੁਭਵਿਤ੍ਵਾ ਮਨੁਸ੍ਸੇਸੁ ਜਾਯਮਾਨੋ ਨਿਸ੍ਸੇਣਿਦਾਨਨਿਸ੍ਸਨ੍ਦੇਨ ਉਚ੍ਚਕੁਲੇ ਨਿਬ੍ਬਤ੍ਤੋ ਮਨੁਸ੍ਸਸੁਖਂ ਅਨੁਭਵਿਤ੍ਵਾ ਇਮਸ੍ਮਿਂ ਬੁਦ੍ਧੁਪ੍ਪਾਦੇ ਏਕਸ੍ਮਿਂ ਕੁਲੇ ਨਿਬ੍ਬਤ੍ਤੋ ਸਤ੍ਥੁ ਧਮ੍ਮਦੇਸਨਂ ਸੁਤ੍ਵਾ ਸਦ੍ਧਾਜਾਤੋ ਪਬ੍ਬਜਿਤੋ ਨਚਿਰਸ੍ਸੇਵ ਅਰਹਾ ਅਹੋਸਿ.
੯. ਸੋ ਅਤ੍ਤਨੋ ਪੁਬ੍ਬਕਮ੍ਮਂ ਸਰਿਤ੍ਵਾ ਸੋਮਨਸ੍ਸਜਾਤੋ ਪੁਬ੍ਬਚਰਿਤਾਪਦਾਨਂ ਪਕਾਸੇਨ੍ਤੋ ਕੋਣ੍ਡਞ੍ਞਸ੍ਸ ਭਗਵਤੋਤਿਆਦਿਮਾਹ. ਤਤ੍ਥ ਕੋਣ੍ਡਞ੍ਞਸ੍ਸਾਤਿ ਕੁਚ੍ਛਿਤੋ ਹੁਤ੍ਵਾ ਡੇਤਿ ਪਵਤ੍ਤਤੀਤਿ ਕੋਣ੍ਡੋ, ਲਾਮਕਸਤ੍ਤੋ, ਕੋਣ੍ਡਤੋ ਅਞ੍ਞੋਤਿ ਕੋਣ੍ਡਞ੍ਞੋ, ਅਲਾਮਕੋ ਉਤ੍ਤਮਪੁਰਿਸੋਤਿ ਅਤ੍ਥੋ. ਅਥ ਵਾ ਬ੍ਰਾਹ੍ਮਣਗੋਤ੍ਤੇਸੁ ਕੋਣ੍ਡਞ੍ਞਗੋਤ੍ਤੇ ਉਪ੍ਪਨ੍ਨਤ੍ਤਾ ‘‘ਕੋਣ੍ਡਞ੍ਞੋ’’ਤਿ ਗੋਤ੍ਤਵਸੇਨ ਤਸ੍ਸ ਨਾਮਂ, ਤਸ੍ਸ ਕੋਣ੍ਡਞ੍ਞਸ੍ਸ. ਸੇਸਂ ਪਾਕਟਮੇਵਾਤਿ.
ਨਿਸ੍ਸੇਣਿਦਾਯਕਤ੍ਥੇਰਅਪਦਾਨਵਣ੍ਣਨਾ ਸਮਤ੍ਤਾ.
੩. ਰਤ੍ਤਿਪੁਪ੍ਫਿਯਤ੍ਥੇਰਅਪਦਾਨਵਣ੍ਣਨਾ
ਮਿਗਲੁਦ੍ਦੋ ਪੁਰੇ ਆਸਿਨ੍ਤਿਆਦਿਕਂ ਆਯਸ੍ਮਤੋ ਰਤ੍ਤਿਪੁਪ੍ਫਿਯਤ੍ਥੇਰਸ੍ਸ ਅਪਦਾਨਂ. ਅਯਮ੍ਪਿ ਪੁਰਿਮਬੁਦ੍ਧੇਸੁ ਕਤਾਧਿਕਾਰੋ ਤਤ੍ਥ ਤਤ੍ਥ ਭਵੇ ਵਿਵਟ੍ਟੂਪਨਿਸ੍ਸਯਾਨਿ ਪੁਞ੍ਞਾਨਿ ਉਪਚਿਨਨ੍ਤੋ ਵਿਪਸ੍ਸਿਸ੍ਸ ਭਗਵਤੋ ਕਾਲੇ ਨੇਸਾਦਕੁਲੇ ਉਪ੍ਪਨ੍ਨੋ ਮਿਗਵਧਾਯ ਅਰਞ੍ਞੇ ਵਿਚਰਮਾਨੋ ਤਸ੍ਸ ਕਾਰੁਞ੍ਞੇਨ ਅਰਞ੍ਞੇ ਚਰਮਾਨਂ ਵਿਪਸ੍ਸਿਂ ਭਗਵਨ੍ਤਂ ਦਿਸ੍ਵਾ ਪਸਨ੍ਨਮਾਨਸੋ ਪੁਪ੍ਫਿਤਂ ਰਤ੍ਤਿਕਂ ਨਾਮ ਪੁਪ੍ਫਂ ਕੁਟਜਪੁਪ੍ਫਞ੍ਚ ਸਹ ਵਣ੍ਟੇਨ ਓਚਿਨਿਤ੍ਵਾ ਸੋਮਨਸ੍ਸਚਿਤ੍ਤੇਨ ਪੂਜੇਸਿ. ਭਗਵਾ ਅਨੁਮੋਦਨਂ ਕਤ੍ਵਾ ਪਕ੍ਕਾਮਿ.
੧੩. ਸੋ ਤੇਨੇਵ ਪੁਞ੍ਞੇਨ ਦੇਵਮਨੁਸ੍ਸੇਸੁ ਸਂਸਰਨ੍ਤੋ ਉਭਯਸਮ੍ਪਤ੍ਤਿਯੋ ਅਨੁਭਵਿਤ੍ਵਾ ਇਮਸ੍ਮਿਂ ਬੁਦ੍ਧੁਪ੍ਪਾਦੇ ਕੁਲਗੇਹੇ ਨਿਬ੍ਬਤ੍ਤੋ ਵਿਞ੍ਞੁਤਂ ਪਤ੍ਤੋ ਰਤਨਤ੍ਤਯੇ ਪਸਨ੍ਨੋ ਸਤ੍ਥੁ ਧਮ੍ਮਦੇਸਨਂ ਸੁਤ੍ਵਾ ਕਾਮੇਸੁ ਆਦੀਨਵਂ ਦਿਸ੍ਵਾ ਪਬ੍ਬਜਿਤ੍ਵਾ ਨਚਿਰਸ੍ਸੇਵ ਅਰਹਤ੍ਤਂ ਪਤ੍ਤੋ ਅਤ੍ਤਨੋ ਪੁਬ੍ਬਕਮ੍ਮਂ ਸਰਿਤ੍ਵਾ ‘‘ਨੇਸਾਦਭੂਤੇਨ ਮਯਾ ਕਤਕੁਸਲਂ ਸੁਨ੍ਦਰ’’ਨ੍ਤਿ ਸੋਮਨਸ੍ਸਜਾਤੋ ਪੁਬ੍ਬਚਰਿਤਾਪਦਾਨਂ ਪਕਾਸੇਨ੍ਤੋ ਮਿਗਲੁਦ੍ਦੋ ਪੁਰੇ ਆਸਿਨ੍ਤਿਆਦਿਮਾਹ. ਤਤ੍ਥ ਮਿਗਾਨਂ ਲੁਦ੍ਦੋ ਸਾਹਸਿਕੋ ਮਾਰਕੋਤਿ ਮਿਗਲੁਦ੍ਦੋ, ਮਿਗੇਸੁ ਵਾ ਲੁਦ੍ਦੋ ਲੋਭੀਤਿ ਮਿਗਲੁਦ੍ਦੋ, ਨੇਸਾਦੋ ਆਸਿਂ ਪੁਰੇਤਿ ਅਤ੍ਥੋ.
੧੪. ਰਤ੍ਤਿਕਂ ਪੁਪ੍ਫਿਤਂ ਦਿਸ੍ਵਾਤਿ ਪਦੁਮਪੁਪ੍ਫਾਦੀਨਿ ਅਨੇਕਾਨਿ ਪੁਪ੍ਫਾਨਿ ਸੂਰਿਯਰਂਸਿਸਮ੍ਫਸ੍ਸੇਨ ਦਿਵਾ ਪੁਪ੍ਫਨ੍ਤਿ ਰਤ੍ਤਿਯਂ ਮਕੁਲ਼ਿਤਾਨਿ ਹੋਨ੍ਤਿ. ਜਾਤਿਸੁਮਨਮਲ੍ਲਿਕਾਦੀਨਿ ਅਨੇਕਾਨਿ ਪੁਪ੍ਫਾਨਿ ਪਨ ਰਤ੍ਤਿਯਂ ਪੁਪ੍ਫਨ੍ਤਿ ਨੋ ਦਿਵਾ. ਤਸ੍ਮਾ ਰਤ੍ਤਿਯਂ ਪੁਪ੍ਫਨਤੋ ਰਤ੍ਤਿਪੁਪ੍ਫਨਾਮਕਾਨਿ ਅਨੇਕਾਨਿ ਸੁਗਨ੍ਧਪੁਪ੍ਫਾਨਿ ਚ ਕੁਟਜਪੁਪ੍ਫਾਨਿ ਚ ਗਹੇਤ੍ਵਾ ਪੂਜੇਸਿਨ੍ਤਿ ਅਤ੍ਥੋ. ਸੇਸਂ ਉਤ੍ਤਾਨਤ੍ਥਮੇਵਾਤਿ.
ਰਤ੍ਤਿਪੁਪ੍ਫਿਯਤ੍ਥੇਰਅਪਦਾਨਵਣ੍ਣਨਾ ਸਮਤ੍ਤਾ.
੪. ਉਦਪਾਨਦਾਯਕਤ੍ਥੇਰਅਪਦਾਨਵਣ੍ਣਨਾ
ਵਿਪਸ੍ਸਿਨੋ ਭਗਵਤੋਤਿਆਦਿਕਂ ਆਯਸ੍ਮਤੋ ਉਦਪਾਨਦਾਯਕਤ੍ਥੇਰਸ੍ਸ ਅਪਦਾਨਂ. ਅਯਮ੍ਪਿ ਥੇਰੋ ਪੁਰਿਮਮੁਨਿਵਰੇਸੁ ਕਤਾਧਿਕਾਰੋ ਅਨੇਕੇਸੁ ਭਵੇਸੁ ਕਤਪੁਞ੍ਞਸਞ੍ਚਯੋ ਵਿਪਸ੍ਸਿਸ੍ਸ ਭਗਵਤੋ ਕਾਲੇ ਕੁਲਗੇਹੇ ਨਿਬ੍ਬਤ੍ਤੋ ਵੁਦ੍ਧਿਪ੍ਪਤ੍ਤੋ ‘‘ਪਾਨੀਯਦਾਨਂ ਮਯਾ ਦਾਤਬ੍ਬਂ, ਤਞ੍ਚ ਨਿਰਨ੍ਤਰਂ ਕਤ੍ਵਾ ਪਵਤ੍ਤੇਤੁਂ ਵਟ੍ਟਤੀ’’ਤਿ ਚਿਨ੍ਤੇਤ੍ਵਾ ਏਕਂ ਕੂਪਂ ਖਨਾਪੇਤ੍ਵਾ ਉਦਕਸਮ੍ਪਤ੍ਤਕਾਲੇ ਇਟ੍ਠਕਾਹਿ ਚਿਨਾਪੇਤ੍ਵਾ ਥਿਰਂ ਕਤ੍ਵਾ ਤਤ੍ਥ ਉਟ੍ਠਿਤੇਨ ਉਦਕੇਨ ਪੁਣ੍ਣਂ ਤਂ ਉਦਪਾਨਂ ਵਿਪਸ੍ਸਿਸ੍ਸ ਭਗਵਤੋ ਨਿਯ੍ਯਾਦੇਸਿ. ਭਗਵਾ ਪਾਨੀਯਦਾਨਾਨਿਸਂਸਦੀਪਕਂ ਅਨੁਮੋਦਨਂ ਅਕਾਸਿ. ਸੋ ਤੇਨ ਪੁਞ੍ਞੇਨ ਦੇਵਮਨੁਸ੍ਸੇਸੁ ਸਂਸਰਨ੍ਤੋ ਨਿਬ੍ਬਤ੍ਤਨਿਬ੍ਬਤ੍ਤਟ੍ਠਾਨੇ ਪੋਕ੍ਖਰਣੀਉਦਪਾਨਪਾਨੀਯਾਦਿਸਮ੍ਪਨ੍ਨੋ ਸੁਖਮਨੁਭਵਿਤ੍ਵਾ ਇਮਸ੍ਮਿਂ ਬੁਦ੍ਧੁਪ੍ਪਾਦੇ ਏਕਸ੍ਮਿਂ ਕੁਲੇ ਨਿਬ੍ਬਤ੍ਤੋ ਵੁਦ੍ਧਿਮਨ੍ਵਾਯ ਸਦ੍ਧੋ ਪਸਨ੍ਨੋ ਪਬ੍ਬਜਿਤ੍ਵਾ ਨਚਿਰਸ੍ਸੇਵ ਅਰਹਾ ਅਹੋਸਿ.
੧੮. ਸੋ ਅਪਰਭਾਗੇ ਅਤ੍ਤਨੋ ਪੁਬ੍ਬਕਮ੍ਮਂ ਸਰਿਤ੍ਵਾ ਸੋਮਨਸ੍ਸਜਾਤੋ ਪੁਬ੍ਬਚਰਿਤਾਪਦਾਨਂ ਪਕਾਸੇਨ੍ਤੋ ਵਿਪਸ੍ਸਿਨੋ ਭਗਵਤੋਤਿਆਦਿਮਾਹ. ਤਤ੍ਥ ਉਦਪਾਨੋ ਕਤੋ ਮਯਾਤਿ ਉਦਕਂ ਪਿਵਨ੍ਤਿ ਏਤ੍ਥਾਤਿ ਉਦਪਾਨੋ, ਕੂਪਪੋਕ੍ਖਰਣੀਤਲ਼ਾਕਾਨਮੇਤਂ ਅਧਿਵਚਨਂ. ਸੋ ਉਦਪਾਨੋ ਕੂਪੋ ਵਿਪਸ੍ਸਿਸ੍ਸ ਭਗਵਤੋ ਅਤ੍ਥਾਯ ਕਤੋ ਖਨਿਤੋਤਿ ਅਤ੍ਥੋ. ਸੇਸਂ ਉਤ੍ਤਾਨਤ੍ਥਮੇਵਾਤਿ.
ਉਦਪਾਨਦਾਯਕਤ੍ਥੇਰਅਪਦਾਨਵਣ੍ਣਨਾ ਸਮਤ੍ਤਾ.
੫. ਸੀਹਾਸਨਦਾਯਕਤ੍ਥੇਰਅਪਦਾਨਵਣ੍ਣਨਾ
ਨਿਬ੍ਬੁਤੇ ਲੋਕਨਾਥਮ੍ਹੀਤਿਆਦਿਕਂ ਆਯਸ੍ਮਤੋ ਸੀਹਾਸਨਦਾਯਕਤ੍ਥੇਰਸ੍ਸ ਅਪਦਾਨਂ. ਅਯਮ੍ਪਿ ਪੁਰਿਮਬੁਦ੍ਧੇਸੁ ਕਤਾਧਿਕਾਰੋ ਤਤ੍ਥ ਤਤ੍ਥ ਭਵੇ ਨਿਬ੍ਬਾਨਾਧਿਗਮਤ੍ਥਾਯ ਕਤਪੁਞ੍ਞੂਪਚਯੋ ਪਦੁਮੁਤ੍ਤਰਸ੍ਸ ਭਗਵਤੋ ਕਾਲੇ ਗਹਪਤਿਕੁਲੇ ਨਿਬ੍ਬਤ੍ਤੋ ਵਿਞ੍ਞੁਤਂ ਪਤ੍ਤੋ ਸਤ੍ਥੁ ਧਮ੍ਮਦੇਸਨਂ ਸੁਤ੍ਵਾ ਰਤਨਤ੍ਤਯੇ ਪਸਨ੍ਨੋ ਤਸ੍ਮਿਂ ਭਗਵਤਿ ਪਰਿਨਿਬ੍ਬੁਤੇ ਸਤ੍ਤਹਿ ਰਤਨੇਹਿ ਖਚਿਤਂ ਸੀਹਾਸਨਂ ਕਾਰਾਪੇਤ੍ਵਾ ਬੋਧਿਰੁਕ੍ਖਂ ਪੂਜੇਸਿ, ਬਹੂਹਿ ਮਾਲਾਗਨ੍ਧਧੂਪੇਹਿ ਚ ਪੂਜੇਸਿ.
੨੧. ਸੋ ਤੇਨ ਪੁਞ੍ਞੇਨ ਦੇਵਮਨੁਸ੍ਸੇਸੁ ਸਂਸਰਨ੍ਤੋ ਉਭਯਸਮ੍ਪਤ੍ਤਿਯੋ ਅਨੁਭਵਿਤ੍ਵਾ ਸਬ੍ਬਤ੍ਥ ਪੂਜਿਤੋ ਇਮਸ੍ਮਿਂ ਬੁਦ੍ਧੁਪ੍ਪਾਦੇ ਸਾਵਤ੍ਥਿਯਂ ਕੁਲਗੇਹੇ ਨਿਬ੍ਬਤ੍ਤੋ ਵੁਦ੍ਧਿਪ੍ਪਤ੍ਤੋ ਘਰਾਵਾਸਂ ਵਸਨ੍ਤੋ ਸਤ੍ਥੁ ਧਮ੍ਮਦੇਸਨਂ ਸੁਤ੍ਵਾ ਪਸਨ੍ਨਮਾਨਸੋ ਞਾਤਿਵਗ੍ਗਂ ਪਹਾਯ ਪਬ੍ਬਜਿਤੋ ਨਚਿਰਸ੍ਸੇਵ ਅਰਹਾ ਹੁਤ੍ਵਾ ਪੁਬ੍ਬੂਪਚਿਤਕੁਸਲਸਮ੍ਭਾਰਂ ਸਰਿਤ੍ਵਾ ਸਞ੍ਜਾਤਸੋਮਨਸ੍ਸੋ ਪੁਬ੍ਬਚਰਿਤਾਪਦਾਨਂ ਪਕਾਸੇਨ੍ਤੋ ਨਿਬ੍ਬੁਤੇ ਲੋਕਨਾਥਮ੍ਹੀਤਿਆਦਿਮਾਹ. ਤਤ੍ਥ ਸੀਹਾਸਨਮਦਾਸਹਨ੍ਤਿ ਸੀਹਰੂਪਹਿਰਞ੍ਞਸੁਵਣ੍ਣਰਤਨੇਹਿ ਖਚਿਤਂ ਆਸਨਂ ਸੀਹਾਸਨਂ, ਸੀਹਸ੍ਸ ਵਾ ਅਭੀਤਸ੍ਸ ਭਗਵਤੋ ਨਿਸਿਨ੍ਨਾਰਹਂ, ਸੀਹਂ ਵਾ ਸੇਟ੍ਠਂ ਉਤ੍ਤਮਂ ਆਸਨਨ੍ਤਿ ਸੀਹਾਸਨਂ, ਤਂ ਅਹਂ ਅਦਾਸਿਂ, ਬੋਧਿਰੁਕ੍ਖਂ ਪੂਜੇਸਿਨ੍ਤਿ ਅਤ੍ਥੋ. ਸੇਸਂ ਸੁਵਿਞ੍ਞੇਯ੍ਯਮੇਵਾਤਿ.
ਸੀਹਾਸਨਦਾਯਕਤ੍ਥੇਰਅਪਦਾਨਵਣ੍ਣਨਾ ਸਮਤ੍ਤਾ.
੬. ਮਗ੍ਗਦਤ੍ਤਿਕਤ੍ਥੇਰਅਪਦਾਨਵਣ੍ਣਨਾ
ਅਨੋਮਦਸ੍ਸੀ ਭਗਵਾਤਿਆਦਿਕਂ ਆਯਸ੍ਮਤੋ ਮਗ੍ਗਦਤ੍ਤਿਕਤ੍ਥੇਰਸ੍ਸ ਅਪਦਾਨਂ. ਅਯਮ੍ਪਾਯਸ੍ਮਾ ਪੁਰਿਮਬੁਦ੍ਧੇਸੁ ਕਤਾਧਿਕਾਰੋ ਤਤ੍ਥ ਤਤ੍ਥ ਭਵੇ ਵਿਵਟ੍ਟੂਪਨਿਸ੍ਸਯਾਨਿ ਪੁਞ੍ਞਾਨਿ ਉਪਚਿਨਨ੍ਤੋ ਅਨੋਮਦਸ੍ਸਿਸ੍ਸ ਭਗਵਤੋ ਕਾਲੇ ਕੁਲਗੇਹੇ ਨਿਬ੍ਬਤ੍ਤੋ ਵੁਦ੍ਧਿਮਨ੍ਵਾਯ ਘਰਾਵਾਸਂ ਸਣ੍ਠਪੇਤ੍ਵਾ ਵਸਨ੍ਤੋ ਅਨੋਮਦਸ੍ਸਿਂ ਭਗਵਨ੍ਤਂ ਆਕਾਸੇ ਚਙ੍ਕਮਨ੍ਤਂ ਪਾਦੁਦ੍ਧਾਰੇ ਪਾਦੁਦ੍ਧਾਰਚਙ੍ਕਮਨਟ੍ਠਾਨੇ ਪੁਪ੍ਫਾਨਂ ਵਿਕਿਰਣਂ ਅਚ੍ਛਰਿਯਞ੍ਚ ਦਿਸ੍ਵਾ ਪਸਨ੍ਨਮਾਨਸੋ ਪੁਪ੍ਫਾਨਿ ਆਕਾਸੇ ਉਕ੍ਖਿਪਿ, ਤਾਨਿ ਵਿਤਾਨਂ ਹੁਤ੍ਵਾ ਅਟ੍ਠਂਸੁ.
੨੬. ਸੋ ਤੇਨ ਪੁਞ੍ਞੇਨ ਸੁਗਤੀਸੁਯੇਵ ਸਂਸਰਨ੍ਤੋ ਸਬ੍ਬਤ੍ਥ ਪੂਜਿਤੋ ਸੁਖਂ ਅਨੁਭਵਿਤ੍ਵਾ ਇਮਸ੍ਮਿਂ ਬੁਦ੍ਧੁਪ੍ਪਾਦੇ ਏਕਸ੍ਮਿਂ ਕੁਲੇ ਨਿਬ੍ਬਤ੍ਤੋ ਕਮੇਨ ਯੋਬ੍ਬਞ੍ਞਂ ਪਾਪੁਣਿਤ੍ਵਾ ਸਦ੍ਧਾਜਾਤੋ ਪਬ੍ਬਜਿਤ੍ਵਾ ਵਤ੍ਤਸਮ੍ਪਨ੍ਨੋ ਨਚਿਰਸ੍ਸੇਵ ਅਰਹਤ੍ਤਂ ਪਤ੍ਤੋ ਚਙ੍ਕਮਨਸ੍ਸ ਪੂਜਿਤਤ੍ਤਾ ਮਗ੍ਗਦਤ੍ਤਿਕਤ੍ਥੇਰੋਤਿ ਪਾਕਟੋ. ਸੋ ਪੁਬ੍ਬਕਮ੍ਮਂ ਸਰਿਤ੍ਵਾ ਸੋਮਨਸ੍ਸਜਾਤੋ ਪੁਬ੍ਬਚਰਿਤਾਪਦਾਨਂ ਪਕਾਸੇਨ੍ਤੋ ਅਨੋਮਦਸ੍ਸੀ ਭਗਵਾਤਿਆਦਿਮਾਹ. ਦਿਟ੍ਠਧਮ੍ਮਸੁਖਤ੍ਥਾਯਾਤਿ ਇਮਸ੍ਮਿਂ ਅਤ੍ਤਭਾਵੇ ਚਙ੍ਕਮਨੇਨ ਸਰੀਰਸਲ੍ਲਹੁਕਾਦਿਸੁਖਂ ਪਟਿਚ੍ਚਾਤਿ ਅਤ੍ਥੋ. ਅਬ੍ਭੋਕਾਸਮ੍ਹਿ ਚਙ੍ਕਮੀਤਿ ਅਬ੍ਭੋਕਾਸੇ ਅਙ੍ਗਣਟ੍ਠਾਨੇ ਚਙ੍ਕਮਿ, ਪਦਵਿਕ੍ਖੇਪਂ ਪਦਸਞ੍ਚਾਰਂ ਅਕਾਸੀਤਿ ਅਤ੍ਥੋ.
ਉਦ੍ਧਤੇ ਪਾਦੇ ਪੁਪ੍ਫਾਨੀਤਿ ਚਙ੍ਕਮਨ੍ਤੇਨ ਪਾਦੇ ਉਦ੍ਧਤੇ ਪਦੁਮੁਪ੍ਪਲਾਦੀਨਿ ਪੁਪ੍ਫਾਨਿ ਪਥਵਿਤੋ ਉਗ੍ਗਨ੍ਤ੍ਵਾ ਚਙ੍ਕਮੇ ਵਿਕਿਰਿਂਸੂਤਿ ਅਤ੍ਥੋ. ਸੋਭਂ ਮੁਦ੍ਧਨਿ ਤਿਟ੍ਠਰੇਤਿ ਬੁਦ੍ਧਸ੍ਸ ਮੁਦ੍ਧਨਿ ਸੀਸੇ ਸੋਭਯਮਾਨਾ ਤਾਨਿ ਤਿਟ੍ਠਨ੍ਤੀਤਿ ਅਤ੍ਥੋ. ਸੇਸਂ ਸੁਵਿਞ੍ਞੇਯ੍ਯਮੇਵਾਤਿ.
ਮਗ੍ਗਦਤ੍ਤਿਕਤ੍ਥੇਰਅਪਦਾਨਵਣ੍ਣਨਾ ਸਮਤ੍ਤਾ.
੭. ਏਕਦੀਪਿਯਤ੍ਥੇਰਅਪਦਾਨਵਣ੍ਣਨਾ
ਪਦੁਮੁਤ੍ਤਰਸ੍ਸ ਮੁਨਿਨੋਤਿਆਦਿਕਂ ਆਯਸ੍ਮਤੋ ਏਕਦੀਪਿਯਤ੍ਥੇਰਸ੍ਸ ਅਪਦਾਨਂ. ਅਯਮ੍ਪਾਯਸ੍ਮਾ ਪੁਰਿਮਜਿਨਸੇਟ੍ਠੇਸੁ ਕਤਕੁਸਲਸਮ੍ਭਾਰੋ ਤਤ੍ਥ ਤਤ੍ਥ ਭਵੇ ਵਿਵਟ੍ਟੂਪਨਿਸ੍ਸਯਾਨਿ ਪੁਞ੍ਞਾਨਿ ਉਪਚਿਨਨ੍ਤੋ ਪਦੁਮੁਤ੍ਤਰਸ੍ਸ ਭਗਵਤੋ ਕਾਲੇ ਗਹਪਤਿਕੁਲੇ ਨਿਬ੍ਬਤ੍ਤੋ ਵੁਦ੍ਧਿਪ੍ਪਤ੍ਤੋ ਸਦ੍ਧੋ ਪਸਨ੍ਨੋ ਭਗਵਤੋ ਸਲਲਮਹਾਬੋਧਿਮ੍ਹਿ ਏਕਪਦੀਪਂ ਪੂਜੇਸਿ, ਥਾਵਰਂ ਕਤ੍ਵਾ ਨਿਚ੍ਚਮੇਕਪਦੀਪਪੂਜਨਤ੍ਥਾਯ ਤੇਲਵਟ੍ਟਂ ਪਟ੍ਠਪੇਸਿ. ਸੋ ਤੇਨ ਪੁਞ੍ਞੇਨ ਦੇਵਮਨੁਸ੍ਸੇਸੁ ਸਂਸਰਨ੍ਤੋ ਸਬ੍ਬਤ੍ਥ ਜਲਮਾਨੋ ਪਸਨ੍ਨਚਕ੍ਖੁਕੋ ਉਭਯਸੁਖਮਨੁਭਵਿਤ੍ਵਾ ਇਮਸ੍ਮਿਂ ਬੁਦ੍ਧੁਪ੍ਪਾਦੇ ਸਾਵਤ੍ਥਿਯਂ ਵਿਭਵਸਮ੍ਪਨ੍ਨੇ ਏਕਸ੍ਮਿਂ ਕੁਲੇ ਨਿਬ੍ਬਤ੍ਤੋ ਵਿਞ੍ਞੁਤਂ ਪਤ੍ਤੋ ਰਤਨਤ੍ਤਯੇ ਪਸਨ੍ਨੋ ਪਬ੍ਬਜਿਤ੍ਵਾ ਨਚਿਰਸ੍ਸੇਵ ਅਰਹਤ੍ਤਂ ਪਤ੍ਤੋ ਦੀਪਪੂਜਾਯ ਲਦ੍ਧਵਿਸੇਸਾਧਿਗਮਤ੍ਤਾ ਏਕਦੀਪਿਯਤ੍ਥੇਰੋਤਿ ਪਾਕਟੋ.
੩੦. ਸੋ ਅਪਰਭਾਗੇ ਅਤ੍ਤਨੋ ਪੁਬ੍ਬਕਮ੍ਮਂ ਸਰਿਤ੍ਵਾ ਸੋਮਨਸ੍ਸਜਾਤੋ ਪੁਬ੍ਬਚਰਿਤਾਪਦਾਨਂ ਪਕਾਸੇਨ੍ਤੋ ਪਦੁਮੁਤ੍ਤਰਸ੍ਸ ਮੁਨਿਨੋਤਿਆਦਿਮਾਹ. ਤਂ ਸਬ੍ਬਂ ਉਤ੍ਤਾਨਤ੍ਥਮੇਵਾਤਿ.
ਏਕਦੀਪਿਯਤ੍ਥੇਰਅਪਦਾਨਵਣ੍ਣਨਾ ਸਮਤ੍ਤਾ.
੮. ਮਣਿਪੂਜਕਤ੍ਥੇਰਅਪਦਾਨਵਣ੍ਣਨਾ
ਓਰੇਨ ਹਿਮਵਨ੍ਤਸ੍ਸਾਤਿਆਦਿਕਂ ਆਯਸ੍ਮਤੋ ਮਣਿਪੂਜਕਤ੍ਥੇਰਸ੍ਸ ਅਪਦਾਨਂ. ਅਯਮ੍ਪਿ ਥੇਰੋ ਪੁਰਿਮਬੁਦ੍ਧੇਸੁ ਕਤਾਧਿਕਾਰੋ ਤਤ੍ਥ ਤਤ੍ਥ ਭਵੇ ਵਿਵਟ੍ਟੂਪਨਿਸ੍ਸਯਾਨਿ ਪੁਞ੍ਞਾਨਿ ਉਪਚਿਨਨ੍ਤੋ ਪਦੁਮੁਤ੍ਤਰਸ੍ਸ ਭਗਵਤੋ ਕਾਲੇ ਏਕਸ੍ਮਿਂ ਕੁਲੇ ਨਿਬ੍ਬਤ੍ਤੋ ਘਰਾਵਾਸਂ ਸਣ੍ਠਪੇਤ੍ਵਾ ਤਤ੍ਥਾਦੀਨਵਂ ਦਿਸ੍ਵਾ ਘਰਾਵਾਸਂ ਪਹਾਯ ਤਾਪਸਪਬ੍ਬਜ੍ਜਂ ਪਬ੍ਬਜਿਤ੍ਵਾ ਹਿਮਵਨ੍ਤਓਰਭਾਗੇ ਏਕਿਸ੍ਸਾ ਨਦਿਯਾ ਸਮੀਪੇ ਪਣ੍ਣਸਾਲਂ ਕਾਰੇਤ੍ਵਾ ਵਸਨ੍ਤੋ ਵਿਵੇਕਕਾਮਤਾਯ ਤਸ੍ਸਾਨੁਕਮ੍ਪਾਯ ਚ ਤਤ੍ਥ ਉਪਗਤਂ ਪਦੁਮੁਤ੍ਤਰਂ ਭਗਵਨ੍ਤਂ ਦਿਸ੍ਵਾ ਪਸਨ੍ਨਮਾਨਸੋ ਮਣਿਪਲ੍ਲਙ੍ਕਂ ਭਗਵਤੋ ਪੂਜੇਸਿ. ਭਗਵਾ ਤਸ੍ਸ ਪਸਾਦਵਡ੍ਢਨਤ੍ਥਾਯ ਤਤ੍ਥ ਨਿਸੀਦਿ. ਸੋ ਭਿਯ੍ਯੋਸੋਮਤ੍ਤਾਯ ਪਸਨ੍ਨੋ ਨਿਬ੍ਬਾਨਾਧਿਗਮਤ੍ਥਾਯ ਪਤ੍ਥਨਂ ਅਕਾਸਿ. ਭਗਵਾ ਅਨੁਮੋਦਨਂ ਵਤ੍ਵਾ ਪਕ੍ਕਾਮਿ. ਸੋ ਤੇਨ ਪੁਞ੍ਞੇਨ ਦੇਵਮਨੁਸ੍ਸੇਸੁ ਸਂਸਰਨ੍ਤੋ ਸਬ੍ਬਤ੍ਥ ਪੂਜਿਤੋ ਸੁਖਂ ਅਨੁਭਵਿਤ੍ਵਾ ਇਮਸ੍ਮਿਂ ਬੁਦ੍ਧੁਪ੍ਪਾਦੇ ਸਾਵਤ੍ਥਿਯਂ ਵਿਭਵਸਮ੍ਪਨ੍ਨੇ ਕੁਲੇ ਨਿਬ੍ਬਤ੍ਤੋ ਘਰਾਵਾਸਂ ਵਸਨ੍ਤੋ ਏਕਦਿਵਸਂ ਸਤ੍ਥੁ ਧਮ੍ਮਦੇਸਨਂ ਸੁਤ੍ਵਾ ਪਟਿਲਦ੍ਧਸਦ੍ਧੋ ਪਬ੍ਬਜਿਤ੍ਵਾ ਨਚਿਰਸ੍ਸੇਵ ਅਰਹਾ ਅਹੋਸਿ.
੩੪. ਸੋ ਏਕਦਿਵਸਂ ਅਤ੍ਤਨਾ ਕਤਕੁਸਲਂ ਸਰਿਤ੍ਵਾ ਸਞ੍ਜਾਤਸੋਮਨਸ੍ਸੋ ਪੁਬ੍ਬਚਰਿਤਾਪਦਾਨਂ ਪਕਾਸੇਨ੍ਤੋ ਓਰੇਨ ਹਿਮਵਨ੍ਤਸ੍ਸਾਤਿਆਦਿਮਾਹ. ਤਤ੍ਥ ਓਰੇਨਾਤਿ ਹਿਮਵਨ੍ਤਸ੍ਸ ਅਪਰਂ ਭਾਗਂ ਵਿਹਾਯ ਓਰੇਨ, ਭੁਮ੍ਮਤ੍ਥੇ ਕਰਣਵਚਨਂ, ਓਰਸ੍ਮਿਂ ਦਿਸਾਭਾਗੇਤਿ ਅਤ੍ਥੋ. ਨਦਿਕਾ ਸਮ੍ਪਵਤ੍ਤਥਾਤਿ ਅਪਾਕਟਨਾਮਧੇਯ੍ਯਾ ਏਕਾ ਨਦੀ ਸਂਸੁਟ੍ਠੁ ਪਵਤ੍ਤਾਨੀ ਵਹਾਨੀ ਸਨ੍ਦਮਾਨਾ ਅਹੋਸੀਤਿ ਅਤ੍ਥੋ. ਤਸ੍ਸਾ ਚਾਨੁਪਖੇਤ੍ਤਮ੍ਹੀਤਿ ਤਸ੍ਸਾ ਨਦਿਯਾ ਅਨੁਪਖੇਤ੍ਤਮ੍ਹਿ ਤੀਰਸਮੀਪੇਤਿ ਅਤ੍ਥੋ. ਸਯਮ੍ਭੂ ਵਸਤੇ ਤਦਾਤਿ ਯਦਾ ਅਹਂ ਮਣਿਪਲ੍ਲਙ੍ਕਂ ਪੂਜੇਸਿਂ, ਤਦਾ ਅਨਾਚਰਿਯਕੋ ਹੁਤ੍ਵਾ ਸਯਮੇਵ ਬੁਦ੍ਧਭੂਤੋ ਭਗਵਾ ਵਸਤੇ ਵਿਹਰਤੀਤਿ ਅਤ੍ਥੋ.
੩੫. ਮਣਿਂ ਪਗ੍ਗਯ੍ਹ ਪਲ੍ਲਙ੍ਕਨ੍ਤਿ ਮਣਿਨ੍ਤਿ ਚਿਤ੍ਤਂ ਆਰਾਧੇਤਿ ਸੋਮਨਸ੍ਸਂ ਕਰੋਤੀਤਿ ਮਣਿ, ਅਥ ਵਾ ਮਾਤਿ ਪਮਾਣਂ ਕਰੋਤਿ ਆਭਰਣਨ੍ਤਿ ਮਣਿ, ਅਥ ਵਾ ਮਰਨ੍ਤਾਪਿ ਰਾਜਯੁਵਰਾਜਾਦਯੋ ਤਂ ਨ ਪਰਿਚ੍ਚਜਨ੍ਤਿ ਤਦਤ੍ਥਾਯ ਸਙ੍ਗਾਮਂ ਕਰੋਨ੍ਤੀਤਿ ਮਣਿ, ਤਂ ਮਣਿਂ ਮਣਿਮਯਂ ਪਲ੍ਲਙ੍ਕਂ ਮਨੋਰਮਂ ਸਾਧੁ ਚਿਤ੍ਤਂ ਸੁਟ੍ਠੁ ਵਿਚਿਤ੍ਤਂ ਪਗ੍ਗਯ੍ਹ ਗਹੇਤ੍ਵਾ ਬੁਦ੍ਧਸੇਟ੍ਠਸ੍ਸ ਅਭਿਰੋਪਯਿਂ ਪੂਜੇਸਿਨ੍ਤਿ ਅਤ੍ਥੋ. ਸੇਸਂ ਸਬ੍ਬਂ ਉਤ੍ਤਾਨਤ੍ਥਮੇਵਾਤਿ.
ਮਣਿਪੂਜਕਤ੍ਥੇਰਅਪਦਾਨਵਣ੍ਣਨਾ ਸਮਤ੍ਤਾ.
੯. ਤਿਕਿਚ੍ਛਕਤ੍ਥੇਰਅਪਦਾਨਵਣ੍ਣਨਾ
ਨਗਰੇ ਬਨ੍ਧੁਮਤਿਯਾਤਿਆਦਿਕਂ ਆਯਸ੍ਮਤੋ ਤਿਕਿਚ੍ਛਕਤ੍ਥੇਰਸ੍ਸ ਅਪਦਾਨਂ. ਅਯਮ੍ਪਾਯਸ੍ਮਾ ਪੁਰਿਮਜਿਨਵਰੇਸੁ ਕਤਾਧਿਕਾਰੋ ਤਤ੍ਥ ਤਤ੍ਥ ਭਵੇ ਵਿਵਟ੍ਟੂਪਨਿਸ੍ਸਯਾਨਿ ਪੁਞ੍ਞਾਨਿ ਉਪਚਿਨਨ੍ਤੋ ਵਿਪਸ੍ਸਿਸ੍ਸ ਭਗਵਤੋ ਕਾਲੇ ਬਨ੍ਧੁਮਤੀਨਗਰੇ ਵੇਜ੍ਜਕੁਲੇ ਨਿਬ੍ਬਤ੍ਤੋ ਬਹੁਸ੍ਸੁਤੋ ਸੁਸਿਕ੍ਖਿਤੋ ਵੇਜ੍ਜਕਮ੍ਮੇ ਛੇਕੋ ਬਹੂ ਰੋਗਿਨੋ ਤਿਕਿਚ੍ਛਨ੍ਤੋ ਵਿਪਸ੍ਸਿਸ੍ਸ ਭਗਵਤੋ ਉਪਟ੍ਠਾਕਸ੍ਸ ਅਸੋਕਨਾਮਤ੍ਥੇਰਸ੍ਸ ਰੋਗਂ ਤਿਕਿਚ੍ਛਿ. ਸੋ ਤੇਨ ਪੁਞ੍ਞੇਨ ਦੇਵਮਨੁਸ੍ਸੇਸੁ ਅਪਰਾਪਰਂ ਸੁਖਂ ਅਨੁਭਵਨ੍ਤੋ ਨਿਬ੍ਬਤ੍ਤਨਿਬ੍ਬਤ੍ਤਭਵੇ ਅਰੋਗੋ ਦੀਘਾਯੁਕੋ ਸੁਵਣ੍ਣਵਣ੍ਣਸਰੀਰੋ ਅਹੋਸਿ.
੩੯. ਸੋ ਇਮਸ੍ਮਿਂ ਬੁਦ੍ਧੁਪ੍ਪਾਦੇ ਸਾਵਤ੍ਥਿਯਂ ਗਹਪਤਿਕੁਲੇ ਨਿਬ੍ਬਤ੍ਤੋ ਵੁਦ੍ਧਿਮਨ੍ਵਾਯ ਸਬ੍ਬਸਿਪ੍ਪੇਸੁ ਨਿਪ੍ਫਤ੍ਤਿਂ ਪਤ੍ਤੋ ਅਰੋਗੋ ਸੁਖਿਤੋ ਵਿਭਵਸਮ੍ਪਨ੍ਨੋ ਰਤਨਤ੍ਤਯੇ ਪਸਨ੍ਨੋ ਸਤ੍ਥੁ ਧਮ੍ਮਦੇਸਨਂ ਸੁਤ੍ਵਾ ਪਟਿਲਦ੍ਧਸਦ੍ਧੋ ਘਰਾਵਾਸਂ ਪਹਾਯ ਪਬ੍ਬਜਿਤ੍ਵਾ ਨਚਿਰਸ੍ਸੇਵ ਅਰਹਾ ਹੁਤ੍ਵਾ ਪੁਬ੍ਬਕਮ੍ਮਂ ਸਰਿਤ੍ਵਾ ਸੋਮਨਸ੍ਸਜਾਤੋ ਪੁਬ੍ਬਚਰਿਤਾਪਦਾਨਂ ਪਕਾਸੇਨ੍ਤੋ ਨਗਰੇ ਬਨ੍ਧੁਮਤਿਯਾਤਿਆਦਿਮਾਹ. ਤਂ ਸਬ੍ਬਂ ਹੇਟ੍ਠਾ ਵੁਤ੍ਤਨਯਤ੍ਤਾ ਉਤ੍ਤਾਨਤ੍ਥਮੇਵਾਤਿ.
ਤਿਕਿਚ੍ਛਕਤ੍ਥੇਰਅਪਦਾਨਵਣ੍ਣਨਾ ਸਮਤ੍ਤਾ.
੧੦. ਸਙ੍ਘੁਪਟ੍ਠਾਕਤ੍ਥੇਰਅਪਦਾਨਵਣ੍ਣਨਾ
ਵੇਸ੍ਸਭੁਮ੍ਹਿ ਭਗਵਤੀਤਿਆਦਿਕਂ ਆਯਸ੍ਮਤੋ ਸਙ੍ਘੁਪਟ੍ਠਾਕਤ੍ਥੇਰਸ੍ਸ ਅਪਦਾਨਂ. ਅਯਮ੍ਪਿ ਥੇਰੋ ਪੁਰਿਮਬੁਦ੍ਧੇਸੁ ਕਤਕੁਸਲਸਮ੍ਭਾਰੋ ਅਨੇਕੇਸੁ ਭਵੇਸੁ ਵਿਵਟ੍ਟੂਪਨਿਸ੍ਸਯਾਨਿ ਪੁਞ੍ਞਾਨਿ ਉਪਚਿਨਨ੍ਤੋ ਵੇਸ੍ਸਭੁਸ੍ਸ ਭਗਵਤੋ ਕਾਲੇ ਤਸ੍ਸਾਰਾਮਿਕਸ੍ਸ ਪੁਤ੍ਤੋ ਹੁਤ੍ਵਾ ਨਿਬ੍ਬਤ੍ਤੋ ਵਿਞ੍ਞੁਤਂ ਪਤ੍ਵਾ ਸਦ੍ਧੋ ਪਸਨ੍ਨੋ ਵਿਹਾਰੇਸੁ ਆਰਾਮਿਕਕਮ੍ਮਂ ਕਰੋਨ੍ਤੋ ਸਕ੍ਕਚ੍ਚਂ ਸਙ੍ਘਂ ਉਪਟ੍ਠਾਸਿ. ਸੋ ਤੇਨੇਵ ਕੁਸਲਕਮ੍ਮੇਨ ਦੇਵਮਨੁਸ੍ਸੇਸੁ ਸਂਸਰਨ੍ਤੋ ਉਭਯਸਮ੍ਪਤ੍ਤਿਯੋ ਅਨੁਭਵਿਤ੍ਵਾ ਇਮਸ੍ਮਿਂ ਬੁਦ੍ਧੁਪ੍ਪਾਦੇ ਸਾਵਤ੍ਥਿਯਂ ਗਹਪਤਿਕੁਲੇ ਨਿਬ੍ਬਤ੍ਤੋ ਵੁਦ੍ਧਿਪ੍ਪਤ੍ਤੋ ਵਿਭਵਸਮ੍ਪਨ੍ਨੋ ਸੁਖਪ੍ਪਤ੍ਤੋ ਪਾਕਟੋ ਸਤ੍ਥੁ ਧਮ੍ਮਦੇਸਨਂ ਸੁਤ੍ਵਾ ਸਾਸਨੇ ਪਸਨ੍ਨੋ ਪਬ੍ਬਜਿਤ੍ਵਾ ਵਤ੍ਤਸਮ੍ਪਨ੍ਨੋ ਸਾਸਨਂ ਸੋਭਯਮਾਨੋ ਵਿਪਸ੍ਸਨਂ ਵਡ੍ਢੇਨ੍ਤੋ ਨਚਿਰਸ੍ਸੇਵ ਸਹ ਪਟਿਸਮ੍ਭਿਦਾਹਿ ਅਰਹਤ੍ਤਂ ਪਤ੍ਤੋ ਛਲ਼ਭਿਞ੍ਞੋ ਪੁਬ੍ਬੇ ਕਤਕੁਸਲਕਮ੍ਮਵਸੇਨ ਸਙ੍ਘੁਪਟ੍ਠਾਕਤ੍ਥੇਰੋਤਿ ਪਾਕਟੋ ਅਹੋਸਿ.
੪੫. ਸੋ ਏਕਦਿਵਸਂ ‘‘ਪੁਬ੍ਬੇ ਮਯਾ ਕਿਂ ਨਾਮ ਕਮ੍ਮਂ ਕਤ੍ਵਾ ਅਯਂ ਲੋਕੁਤ੍ਤਰਸਮ੍ਪਤ੍ਤਿ ਲਦ੍ਧਾ’’ਤਿ ਅਤ੍ਤਨੋ ਪੁਬ੍ਬਕਮ੍ਮਂ ਸਰਿਤ੍ਵਾ ਪਚ੍ਚਕ੍ਖਤੋ ਜਾਨਿਤ੍ਵਾ ਸੋਮਨਸ੍ਸਜਾਤੋ ਪੁਬ੍ਬਚਰਿਤਾਪਦਾਨਂ ਪਾਕਟਂ ਕਰੋਨ੍ਤੋ ਵੇਸ੍ਸਭੁਮ੍ਹਿ ਭਗਵਤੀਤਿਆਦਿਮਾਹ. ਤਤ੍ਥ ਅਹੋਸਾਰਾਮਿਕੋ ਅਹਨ੍ਤਿ ਅਹਂ ਵੇਸ੍ਸਭੁਸ੍ਸ ਭਗਵਤੋ ਸਾਸਨੇ ਆਰਾਮਿਕੋ ਅਹੋਸਿਨ੍ਤਿ ਅਤ੍ਥੋ. ਸੇਸਂ ਹੇਟ੍ਠਾ ਵੁਤ੍ਤਨਯਤ੍ਤਾ ਉਤ੍ਤਾਨਤ੍ਥਤ੍ਤਾ ਚ ਸੁਵਿਞ੍ਞੇਯ੍ਯਮੇਵਾਤਿ.
ਸਙ੍ਘੁਪਟ੍ਠਾਕਤ੍ਥੇਰਅਪਦਾਨਵਣ੍ਣਨਾ ਸਮਤ੍ਤਾ.
ਅਟ੍ਠਾਰਸਮਵਗ੍ਗਵਣ੍ਣਨਾ ਸਮਤ੍ਤਾ.