ਅਪਦਾਨ-ਅਟ੍ਠਕਥਾ
(ਦੁਤਿਯੋ ਭਾਗੋ)
ਥੇਰਾਪਦਾਨਂ
੨. ਸੀਹਾਸਨਿਯਵਗ੍ਗੋ
੧. ਸੀਹਾਸਨਦਾਯਕਤ੍ਥੇਰਅਪਦਾਨਵਣ੍ਣਨਾ
ਨਿਬ੍ਬੁਤੇ ਲੋਕਨਾਥਮ੍ਹੀਤਿਆਦਿਕਂ ਆਯਸ੍ਮਤੋ ਸੀਹਾਸਨਦਾਯਕਤ੍ਥੇਰਸ੍ਸ ਅਪਦਾਨਂ. ਅਯਮ੍ਪਿ ਪੁਰਿਮਬੁਦ੍ਧੇਸੁ ਕਤਾਧਿਕਾਰੋ ਤਤ੍ਥ ਤਤ੍ਥ ਭਵੇ ਪੁਞ੍ਞਾਨਿ ਉਪਚਿਨਨ੍ਤੋ ਸਿਦ੍ਧਤ੍ਥਸ੍ਸ ਭਗਵਤੋ ਕਾਲੇ ਵਿਭਵਸਮ੍ਪਨ੍ਨੇ ਸਦ੍ਧਾਸਮ੍ਪਨ੍ਨੇ ਏਕਸ੍ਮਿਂ ਕੁਲੇ ਨਿਬ੍ਬਤ੍ਤੋ, ਧਰਮਾਨੇ ਭਗਵਤਿ ਦੇਵਲੋਕੇ ਵਸਿਤ੍ਵਾ ਨਿਬ੍ਬੁਤੇ ਭਗਵਤਿ ਉਪ੍ਪਨ੍ਨਤ੍ਤਾ ਵਿਞ੍ਞੁਤਂ ਪਤ੍ਤੋ ਭਗਵਤੋ ਸਾਰੀਰਿਕਚੇਤਿਯਂ ਦਿਸ੍ਵਾ ‘‘ਅਹੋ ਮੇ ਅਲਾਭਾ, ਭਗਵਤੋ ਧਰਮਾਨੇ ਕਾਲੇ ਅਸਮ੍ਪਤ੍ਤੋ’’ਤਿ ਚਿਨ੍ਤੇਤ੍ਵਾ ਚੇਤਿਯੇ ਚਿਤ੍ਤਂ ਪਸਾਦੇਤ੍ਵਾ ਸੋਮਨਸ੍ਸਜਾਤੋ ਸਬ੍ਬਰਤਨਮਯਂ ਦੇਵਤਾਨਿਮ੍ਮਿਤਸਦਿਸਂ ਧਮ੍ਮਾਸਨੇ ਸੀਹਾਸਨਂ ਕਾਰੇਤ੍ਵਾ ਜੀਵਮਾਨਕਬੁਦ੍ਧਸ੍ਸ ਵਿਯ ਪੂਜੇਸਿ. ਤਸ੍ਸੁਪਰਿ ਗੇਹਮ੍ਪਿ ਦਿਬ੍ਬਵਿਮਾਨਮਿਵ ਕਾਰੇਸਿ, ਪਾਦਟ੍ਠਪਨਪਾਦਪੀਠਮ੍ਪਿ ਕਾਰੇਸਿ. ਏਵਂ ਯਾਵਜੀਵਂ ਦੀਪਧੂਪਪੁਪ੍ਫਗਨ੍ਧਾਦੀਹਿ ਅਨੇਕਵਿਧਂ ਪੂਜਂ ਕਤ੍ਵਾ ਤਤੋ ਚੁਤੋ ਦੇਵਲੋਕੇ ਨਿਬ੍ਬਤ੍ਤੋ ਛ ਕਾਮਸਗ੍ਗੇ ਅਪਰਾਪਰਂ ਦਿਬ੍ਬਸਮ੍ਪਤ੍ਤਿਂ ਅਨੁਭਵਿਤ੍ਵਾ ਮਨੁਸ੍ਸੇਸੁ ਚਕ੍ਕਵਤ੍ਤਿਸਮ੍ਪਤ੍ਤਿਂ ਅਨੇਕਕ੍ਖਤ੍ਤੁਂ ਅਨੁਭਵਿਤ੍ਵਾ ਸਙ੍ਖ੍ਯਾਤਿਕ੍ਕਨ੍ਤਂ ਪਦੇਸਰਜ੍ਜਸਮ੍ਪਤ੍ਤਿਞ੍ਚ ਅਨੁਭਵਿਤ੍ਵਾ ਕਸ੍ਸਪਸ੍ਸ ਭਗਵਤੋ ਸਾਸਨੇ ਪਬ੍ਬਜਿਤ੍ਵਾ ਸਮਣਧਮ੍ਮਂ ਕਤ੍ਵਾ ਏਤ੍ਥਨ੍ਤਰੇ ਦੇਵਮਨੁਸ੍ਸੇਸੁ ਸਂਸਰਨ੍ਤੋ ਇਮਸ੍ਮਿਂ ਬੁਦ੍ਧੁਪ੍ਪਾਦੇ ਏਕਸ੍ਮਿਂ ਵਿਭਵਸਮ੍ਪਨ੍ਨੇ ਕੁਲੇ ਨਿਬ੍ਬਤ੍ਤਿਤ੍ਵਾ ਵਿਞ੍ਞੁਤਂ ਪਤ੍ਤੋ ਸਤ੍ਥੁ ਧਮ੍ਮਦੇਸਨਂ ਸੁਤ੍ਵਾ ਪਟਿਲਦ੍ਧਸਦ੍ਧੋ ਪਬ੍ਬਜਿਤ੍ਵਾ ਲਦ੍ਧੂਪਸਮ੍ਪਦੋ ਕਮ੍ਮਟ੍ਠਾਨਂ ਗਹੇਤ੍ਵਾ ਘਟੇਨ੍ਤੋ ਵਾਯਮਨ੍ਤੋ ਨਚਿਰਸ੍ਸੇਵ ਅਰਹਤ੍ਤਂ ਪਾਪੁਣਿ.
੧. ਏਵਂ ਪਤ੍ਤਅਰਹਤ੍ਤਫਲੋ ਅਤ੍ਤਨੋ ਪੁਬ੍ਬਕਮ੍ਮਂ ਸਰਿਤ੍ਵਾ ਸੋਮਨਸ੍ਸਂ ਉਪ੍ਪਾਦੇਤ੍ਵਾ ਪੁਬ੍ਬਚਰਿਤਾਪਦਾਨਂ ਪਕਾਸੇਨ੍ਤੋ ਨਿਬ੍ਬੁਤੇ ਲੋਕਨਾਥਮ੍ਹੀਤਿਆਦਿਮਾਹ. ਤਤ੍ਥ ਲੋਕਸ੍ਸ ਨਾਥੋ ਪਧਾਨੋਤਿ ਲੋਕਨਾਥੋ, ਲੋਕਤ੍ਤਯਸਾਮੀਤਿ ਅਤ੍ਥੋ. ਲੋਕਨਾਥੇ ਸਿਦ੍ਧਤ੍ਥਮ੍ਹਿ ਨਿਬ੍ਬੁਤੇਤਿ ਸਮ੍ਬਨ੍ਧੋ. ਵਿਤ੍ਥਾਰਿਤੇ ਪਾਵਚਨੇਤਿ ਪਾਵਚਨੇ ਪਿਟਕਤ੍ਤਯੇ ਵਿਤ੍ਥਾਰਿਤੇ ਪਤ੍ਥਟੇ ਪਾਕਟੇਤਿ ਅਤ੍ਥੋ. ਬਾਹੁਜਞ੍ਞਮ੍ਹਿ ਸਾਸਨੇਤਿ ਸਿਕ੍ਖਤ੍ਤਯਸਙ੍ਗਹਿਤੇ ਬੁਦ੍ਧਸਾਸਨੇ ਅਨੇਕਸਤਸਹਸ੍ਸਕੋਟਿਖੀਣਾਸਵਸਙ੍ਖਾਤੇਹਿ ਬਹੁਜਨੇਹਿ ਞਾਤੇ ਅਧਿਗਤੇਤਿ ਅਤ੍ਥੋ.
੨-੩. ਪਸਨ੍ਨਚਿਤ੍ਤੋ ਸੁਮਨੋਤਿ ਤਦਾ ਅਹਂ ਬੁਦ੍ਧਸ੍ਸ ਧਰਮਾਨਕਾਲੇ ਅਸਮ੍ਪਤ੍ਤੋ ਨਿਬ੍ਬੁਤੇ ਤਸ੍ਮਿਂ ਦੇਵਲੋਕਾ ਚਵਿਤ੍ਵਾ ਮਨੁਸ੍ਸਲੋਕਂ ਉਪਪਨ੍ਨੋ ਤਸ੍ਸ ਭਗਵਤੋ ਸਾਰੀਰਿਕਧਾਤੁਚੇਤਿਯਂ ਦਿਸ੍ਵਾ ਪਸਨ੍ਨਚਿਤ੍ਤੋ ਸਦ੍ਧਾਸਮ੍ਪਯੁਤ੍ਤਮਨੋ ਸੁਨ੍ਦਰਮਨੋ ‘‘ਅਹੋ ਮਮਾਗਮਨਂ ਸ੍ਵਾਗਮਨ’’ਨ੍ਤਿ ਸਞ੍ਜਾਤਪਸਾਦਬਹੁਮਾਨੋ ‘‘ਮਯਾ ਨਿਬ੍ਬਾਨਾਧਿਗਮਾਯ ਏਕਂ ਪੁਞ੍ਞਂ ਕਾਤੁਂ ਵਟ੍ਟਤੀ’’ਤਿ ਚਿਨ੍ਤੇਤ੍ਵਾ ਭਗਵਤੋ ਚੇਤਿਯਸਮੀਪੇ ਭਗਵਨ੍ਤਂ ਉਦ੍ਦਿਸ੍ਸ ਹਿਰਞ੍ਞਸੁਵਣ੍ਣਰਤਨਾਦੀਹਿ ਅਲਙ੍ਕਰਿਤ੍ਵਾਵ ਸੀਹਾਸਨਂ ਅਕਾਸਿ. ਤਤ੍ਰ ਨਿਸਿਨ੍ਨਸ੍ਸ ਪਾਦਟ੍ਠਪਨਤ੍ਥਾਯ ਪਾਦਪੀਠਞ੍ਚ ਕਾਰੇਸਿ. ਸੀਹਾਸਨਸ੍ਸ ਅਤੇਮਨਤ੍ਥਾਯ ਤਸ੍ਸੁਪਰਿ ਘਰਞ੍ਚ ਕਾਰੇਸਿ. ਤੇਨ ਵੁਤ੍ਤਂ – ‘‘ਸੀਹਾਸਨਮਕਾਸਹਂ…ਪੇ… ਘਰਂ ਤਤ੍ਥ ਅਕਾਸਹ’’ਨ੍ਤਿ. ਤੇਨ ਚਿਤ੍ਤਪ੍ਪਸਾਦੇਨਾਤਿ ਧਰਮਾਨਸ੍ਸ ਵਿਯ ਭਗਵਤੋ ਸੀਹਾਸਨਂ ਮਯਾ ਕਤਂ, ਤੇਨ ਚਿਤ੍ਤਪ੍ਪਸਾਦੇਨ. ਤੁਸਿਤਂ ਉਪਪਜ੍ਜਹਨ੍ਤਿ ਤੁਸਿਤਭਵਨੇ ਉਪਪਜ੍ਜਿਨ੍ਤਿ ਅਤ੍ਥੋ.
੪. ਆਯਾਮੇਨ ਚਤੁਬ੍ਬੀਸਾਤਿ ਤਤ੍ਰੁਪਪਨ੍ਨਸ੍ਸ ਦੇਵਭੂਤਸ੍ਸ ਸਤੋ ਮਯ੍ਹਂ ਸੁਕਤਂ ਪੁਞ੍ਞੇਨ ਨਿਬ੍ਬਤ੍ਤਿਤਂ ਪਾਤੁਭੂਤਂ ਆਯਾਮੇਨ ਉਚ੍ਚਤੋ ਚਤੁਬ੍ਬੀਸਯੋਜਨਂ ਵਿਤ੍ਥਾਰੇਨ ਤਿਰਿਯਤੋ ਚਤੁਦ੍ਦਸਯੋਜਨਂ ਤਾਵਦੇਵ ਨਿਬ੍ਬਤ੍ਤਿਕ੍ਖਣੇਯੇਵ ਆਸਿ ਅਹੋਸੀਤਿ ਅਤ੍ਥੋ. ਸੇਸਂ ਸੁਵਿਞ੍ਞੇਯ੍ਯਮੇਵ.
੯. ਚਤੁਨ੍ਨਵੁਤੇ ਇਤੋ ਕਪ੍ਪੇਤਿ ਇਤੋ ਕਪ੍ਪਤੋ ਚਤੁਨਵੁਤੇ ਕਪ੍ਪੇ ਯਂ ਕਮ੍ਮਂ ਅਕਰਿਂ ਅਕਾਸਿਂ, ਤਦਾ ਤਤੋ ਪਟ੍ਠਾਯ ਪੁਞ੍ਞਬਲੇਨ ਕਞ੍ਚਿ ਦੁਗ੍ਗਤਿਂ ਨਾਭਿਜਾਨਾਮਿ, ਨ ਅਨੁਭੂਤਪੁਬ੍ਬਾ ਕਾਚਿ ਦੁਗ੍ਗਤੀਤਿ ਅਤ੍ਥੋ.
੧੦. ਤੇਸਤ੍ਤਤਿਮ੍ਹਿਤੋ ਕਪ੍ਪੇਤਿ ਇਤੋ ਕਪ੍ਪਤੋ ਤੇਸਤ੍ਤਤਿਕਪ੍ਪੇ. ਇਨ੍ਦਨਾਮਾ ਤਯੋ ਜਨਾਤਿ ਇਨ੍ਦਨਾਮਕਾ ਤਯੋ ਚਕ੍ਕਵਤ੍ਤਿਰਾਜਾਨੋ ਏਕਸ੍ਮਿਂ ਕਪ੍ਪੇ ਤੀਸੁ ਜਾਤੀਸੁ ਇਨ੍ਦੋ ਨਾਮ ਚਕ੍ਕਵਤ੍ਤੀ ਰਾਜਾ ਅਹੋਸਿਨ੍ਤਿ ਅਤ੍ਥੋ. ਦ੍ਵੇਸਤ੍ਤਤਿਮ੍ਹਿਤੋ ਕਪ੍ਪੇਤਿ ਇਤੋ ਦ੍ਵੇਸਤ੍ਤਤਿਕਪ੍ਪੇ. ਸੁਮਨਨਾਮਕਾ ਤਯੋ ਜਨਾ ਤਿਕ੍ਖਤ੍ਤੁਂ ਚਕ੍ਕਵਤ੍ਤਿਰਾਜਾਨੋ ਅਹੇਸੁਂ.
੧੧. ਸਮਸਤ੍ਤਤਿਤੋ ਕਪ੍ਪੇਤਿ ਇਤੋ ਕਪ੍ਪਤੋ ਅਨੂਨਾਧਿਕੇ ਸਤ੍ਤਤਿਮੇ ਕਪ੍ਪੇ ਵਰੁਣਨਾਮਕਾ ਵਰੁਣੋ ਚਕ੍ਕਵਤ੍ਤੀਤਿ ਏਵਂਨਾਮਕਾ ਤਯੋ ਚਕ੍ਕਵਤ੍ਤਿਰਾਜਾਨੋ ਚਕ੍ਕਰਤਨਸਮ੍ਪਨ੍ਨਾ ਚਤੁਦੀਪਮ੍ਹਿ ਇਸ੍ਸਰਾ ਅਹੇਸੁਨ੍ਤਿ ਅਤ੍ਥੋ. ਸੇਸਂ ਸੁਵਿਞ੍ਞੇਯ੍ਯਮੇਵਾਤਿ.
ਸੀਹਾਸਨਦਾਯਕਤ੍ਥੇਰਅਪਦਾਨਵਣ੍ਣਨਾ ਸਮਤ੍ਤਾ.
੨. ਏਕਤ੍ਥਮ੍ਭਿਕਤ੍ਥੇਰਅਪਦਾਨਵਣ੍ਣਨਾ
ਸਿਦ੍ਧਤ੍ਥਸ੍ਸ ਭਗਵਤੋਤਿਆਦਿਕਂ ਆਯਸ੍ਮਤੋ ਏਕਤ੍ਥਮ੍ਭਦਾਯਕਥੇਰਸ੍ਸ ਅਪਦਾਨਂ. ਅਯਮ੍ਪਿ ਪੁਰਿਮਬੁਦ੍ਧੇਸੁ ਕਤਾਧਿਕਾਰੋ ਤਤ੍ਥ ਤਤ੍ਥ ਭਵੇ ਵਿਵਟ੍ਟੂਪਨਿਸ੍ਸਯਾਨਿ ਪੁਞ੍ਞਾਨਿ ਉਪਚਿਨਨ੍ਤੋ ਸਿਦ੍ਧਤ੍ਥਸ੍ਸ ਭਗਵਤੋ ਕਾਲੇ ਵਨਕਮ੍ਮਿਕੋ ਹੁਤ੍ਵਾ ਏਕਸ੍ਮਿਂ ਵਿਭਵਸਮ੍ਪਨ੍ਨੇ ਕੁਲੇ ਨਿਬ੍ਬਤ੍ਤੋ. ਤਸ੍ਮਿਂ ਸਮਯੇ ਸਬ੍ਬੇ ਸਦ੍ਧਾ ਪਸਨ੍ਨਾ ਉਪਾਸਕਾ ਏਕਚ੍ਛਨ੍ਦਾ ‘‘ਭਗਵਤੋ ਉਪਟ੍ਠਾਨਸਾਲਂ ਕਰੋਮਾ’’ਤਿ ਦਬ੍ਬਸਮ੍ਭਾਰਤ੍ਥਾਯ ਵਨਂ ਪਵਿਸਿਤ੍ਵਾ ਤਂ ਉਪਾਸਕਂ ਦਿਸ੍ਵਾ ‘‘ਅਮ੍ਹਾਕਂ ਏਕਂ ਥਮ੍ਭਂ ਦੇਥਾ’’ਤਿ ਯਾਚਿਂਸੁ. ਸੋ ਤਂ ਪਵਤ੍ਤਿਂ ਸੁਤ੍ਵਾ ‘‘ਤੁਮ੍ਹੇ ਮਾ ਚਿਨ੍ਤਯਿਤ੍ਥਾ’’ਤਿ ਤੇ ਸਬ੍ਬੇ ਉਯ੍ਯੋਜੇਤ੍ਵਾ ਏਕਂ ਸਾਰਮਯਂ ਥਮ੍ਭਂ ਗਹੇਤ੍ਵਾ ਸਤ੍ਥੁ ਦਸ੍ਸੇਤ੍ਵਾ ਤੇਸਂਯੇਵ ਅਦਾਸਿ. ਸੋ ਤੇਨੇਵ ਸੋਮਨਸ੍ਸਜਾਤੋ ਤਦੇਵ ਮੂਲਂ ਕਤ੍ਵਾ ਅਞ੍ਞਾਨਿ ਦਾਨਾਦੀਨਿ ਪੁਞ੍ਞਾਨਿ ਕਤ੍ਵਾ ਤਤੋ ਚੁਤੋ ਦੇਵਲੋਕੇ ਨਿਬ੍ਬਤ੍ਤੋ ਅਪਰਾਪਰਂ ਛਸੁ ਕਾਮਾਵਚਰੇਸੁ ਦਿਬ੍ਬਸਮ੍ਪਤ੍ਤਿਯੋ ਅਨੁਭਵਿਤ੍ਵਾ ਮਨੁਸ੍ਸੇਸੁ ਚ ਅਗ੍ਗਚਕ੍ਕਵਤ੍ਤਿਸਮ੍ਪਤ੍ਤਿਂ ਅਨੇਕਵਾਰਂ ਅਨੁਭਵਿਤ੍ਵਾ ਅਸਙ੍ਖ੍ਯੇਯ੍ਯਂ ਪਦੇਸਰਜ੍ਜਸਮ੍ਪਤ੍ਤਿਞ੍ਚ ਅਨੁਭਵਿਤ੍ਵਾ ਇਮਸ੍ਮਿਂ ਬੁਦ੍ਧੁਪ੍ਪਾਦੇ ਸਦ੍ਧਾਸਮ੍ਪਨ੍ਨੇ ਏਕਸ੍ਮਿਂ ਕੁਲੇ ਨਿਬ੍ਬਤ੍ਤੋ ਮਾਤਾਪਿਤੂਹਿ ਸਦ੍ਧਿਂ ਭਗਵਤੋ ਸਨ੍ਤਿਕੇ ਧਮ੍ਮਂ ਸੁਤ੍ਵਾ ਪਟਿਲਦ੍ਧਸਦ੍ਧੋ ਪਬ੍ਬਜਿਤ੍ਵਾ ਲਦ੍ਧੂਪਸਮ੍ਪਦੋ ਕਮ੍ਮਟ੍ਠਾਨਂ ਗਹੇਤ੍ਵਾ ਮਨਸਿਕਰੋਨ੍ਤੋ ਨਚਿਰਸ੍ਸੇਵ ਅਰਹਾ ਅਹੋਸਿ.
੧੩. ਸੋ ਏਵਂ ਪਤ੍ਤਅਰਹਤ੍ਤੋ ਅਤ੍ਤਨੋ ਪੁਬ੍ਬਕਮ੍ਮਂ ਸਰਿਤ੍ਵਾ ਸੋਮਨਸ੍ਸਜਾਤੋ ਪੁਬ੍ਬਚਰਿਤਾਪਦਾਨਂ ਪਕਾਸੇਨ੍ਤੋ ਸਿਦ੍ਧਤ੍ਥਸ੍ਸਾਤਿਆਦਿਮਾਹ. ਤਤ੍ਥ ਸਿਦ੍ਧਤ੍ਥਸ੍ਸ ਭਗਵਤੋ ਭਗ੍ਯਸਮ੍ਪਨ੍ਨਸ੍ਸ ਸਮ੍ਮਾਸਮ੍ਬੁਦ੍ਧਸ੍ਸ. ਮਹਾਪੂਗਗਣੋਤਿ ਮਹਾਉਪਾਸਕਸਮੂਹੋ ਅਹੁ ਅਹੋਸੀਤਿ ਅਤ੍ਥੋ. ਸਰਣਂ ਗਤਾ ਚ ਤੇ ਬੁਦ੍ਧਨ੍ਤਿ ‘‘ਬੁਦ੍ਧਂ ਸਰਣ’’ਨ੍ਤਿ ਗਤਾ ਭਜਿਂਸੁ ਜਾਨਿਂਸੁ ਵਾ ਤੇ ਉਪਾਸਕਾ. ਤਥਾਗਤਂ ਸਦ੍ਦਹਨ੍ਤਿ ਬੁਦ੍ਧਗੁਣਂ ਅਤ੍ਤਨੋ ਚਿਤ੍ਤਸਨ੍ਤਾਨੇ ਠਪੇਨ੍ਤੀਤਿ ਅਤ੍ਥੋ.
੧੪. ਸਬ੍ਬੇ ਸਙ੍ਗਮ੍ਮ ਮਨ੍ਤੇਤ੍ਵਾਤਿ ਸਬ੍ਬੇ ਸਮਾਗਮ੍ਮ ਸਨ੍ਨਿਪਤਿਤ੍ਵਾ ਮਨ੍ਤੇਤ੍ਵਾ ਅਞ੍ਞਮਞ੍ਞਂ ਸਞ੍ਞਾਪੇਤ੍ਵਾ ਏਕਚ੍ਛਨ੍ਦਾ ਹੁਤ੍ਵਾ ਮਾਲ਼ਂ ਉਪਟ੍ਠਾਨਸਾਲਂ ਸਤ੍ਥੁਨੋ ਅਤ੍ਥਾਯ ਕੁਬ੍ਬਨ੍ਤਿ ਕਰੋਨ੍ਤੀਤਿ ਅਤ੍ਥੋ. ਦਬ੍ਬਸਮ੍ਭਾਰੇਸੁ ਏਕਤ੍ਥਮ੍ਭਂ ਅਲਭਨ੍ਤਾ ਬ੍ਰਹਾਵਨੇ ਮਹਾਵਨੇ ਵਿਚਿਨਨ੍ਤੀਤਿ ਸਮ੍ਬਨ੍ਧੋ.
੧੫. ਤੇਹਂ ਅਰਞ੍ਞੇ ਦਿਸ੍ਵਾਨਾਤਿ ਅਹਂ ਤੇ ਉਪਾਸਕੇ ਅਰਞ੍ਞੇ ਦਿਸ੍ਵਾਨ ਗਣਂ ਸਮੂਹਂ ਉਪਗਮ੍ਮ ਸਮੀਪਂ ਗਨ੍ਤ੍ਵਾ ਅਞ੍ਜਲਿਂ ਪਗ੍ਗਹੇਤ੍ਵਾਨ ਦਸਙ੍ਗੁਲਿਸਮੋਧਾਨਂ ਅਞ੍ਜਲਿਂ ਸਿਰਸਿ ਕਤ੍ਵਾ ਅਹਂ ਗਣਂ ਉਪਾਸਕਸਮੂਹਂ ‘‘ਤੁਮ੍ਹੇ ਇਮਂ ਵਨਂ ਕਿਮਤ੍ਥਂ ਆਗਤਤ੍ਥਾ’’ਤਿ ਤਦਾ ਤਸ੍ਮਿਂ ਕਾਲੇ ਪਰਿਪੁਚ੍ਛਿਨ੍ਤਿ ਸਮ੍ਬਨ੍ਧੋ.
੧੬. ਤੇ ਸੀਲਵਨ੍ਤੋ ਉਪਾਸਕਾ ਮੇ ਮਯਾ ਪੁਟ੍ਠਾ ‘‘ਮਾਲ਼ਂ ਮਯਂ ਕਤ੍ਤੁਕਾਮਾ ਹੁਤ੍ਵਾ ਏਕਤ੍ਥਮ੍ਭੋ ਅਮ੍ਹੇਹਿ ਨ ਲਬ੍ਭਤੀ’’ਤਿ ਵਿਯਾਕਂਸੁ ਵਿਸੇਸੇਨ ਕਥਯਿਂਸੂਤਿ ਸਮ੍ਬਨ੍ਧੋ.
੧੭. ਮਮਂ ਮਯ੍ਹਂ ਏਕਤ੍ਥਮ੍ਭਂ ਦੇਥ, ਅਹਂ ਤਂ ਦਸ੍ਸਾਮਿ ਸਤ੍ਥੁਨੋ ਸਨ੍ਤਿਕਂ ਅਹਂ ਥਮ੍ਭਂ ਆਹਰਿਸ੍ਸਾਮਿ, ਤੇ ਭਵਨ੍ਤੋ ਥਮ੍ਭਹਰਣੇ ਅਪ੍ਪੋਸ੍ਸੁਕ੍ਕਾ ਉਸ੍ਸਾਹਰਹਿਤਾ ਭਵਨ੍ਤੂਤਿ ਸਮ੍ਬਨ੍ਧੋ.
੨੪. ਯਂ ਯਂ ਯੋਨੁਪਪਜ੍ਜਾਮੀਤਿ ਯਂ ਯਂ ਯੋਨਿਂ ਦੇਵਤ੍ਤਂ ਅਥ ਮਾਨੁਸਂ ਉਪਗਚ੍ਛਾਮੀਤਿ ਅਤ੍ਥੋ. ਭੁਮ੍ਮਤ੍ਥੇ ਵਾ ਉਪਯੋਗਵਚਨਂ, ਯਸ੍ਮਿਂ ਯਸ੍ਮਿਂ ਦੇਵਲੋਕੇ ਵਾ ਮਨੁਸ੍ਸਲੋਕੇ ਵਾਤਿ ਅਤ੍ਥੋ. ਸੇਸਂ ਉਤ੍ਤਾਨਤ੍ਥਮੇਵਾਤਿ.
ਏਕਤ੍ਥਮ੍ਭਿਕਤ੍ਥੇਰਅਪਦਾਨਵਣ੍ਣਨਾ ਸਮਤ੍ਤਾ.
੩. ਨਨ੍ਦਤ੍ਥੇਰਅਪਦਾਨਵਣ੍ਣਨਾ
ਪਦੁਮੁਤ੍ਤਰਸ੍ਸ ਭਗਵਤੋਤਿਆਦਿਕਂ ਆਯਸ੍ਮਤੋ ਨਨ੍ਦਤ੍ਥੇਰਸ੍ਸ ਅਪਦਾਨਂ. ਅਯਮ੍ਪਿ ਪੁਰਿਮਬੁਦ੍ਧੇਸੁ ਕਤਾਧਿਕਾਰੋ ਤਤ੍ਥ ਤਤ੍ਥ ਭਵੇ ਵਿਵਟ੍ਟੂਪਨਿਸ੍ਸਯਾਨਿ ਪੁਞ੍ਞਾਨਿ ਉਪਚਿਨਨ੍ਤੋ ਪਦੁਮੁਤ੍ਤਰਸ੍ਸ ਭਗਵਤੋ ਕਾਲੇ ਹਂਸਵਤੀਨਗਰੇ ਏਕਸ੍ਮਿਂ ਕੁਲੇ ਨਿਬ੍ਬਤ੍ਤਿਤ੍ਵਾ ਵਿਞ੍ਞੁਤਂ ਪਤ੍ਤੋ ਭਗਵਤੋ ਸਨ੍ਤਿਕੇ ਧਮ੍ਮਂ ਸੁਣਨ੍ਤੋ ਸਤ੍ਥਾਰਂ ਏਕਂ ਭਿਕ੍ਖੁਂ ਇਨ੍ਦ੍ਰਿਯੇਸੁ ਗੁਤ੍ਤਦ੍ਵਾਰਾਨਂ ਅਗ੍ਗਟ੍ਠਾਨੇ ਠਪੇਨ੍ਤਂ ਦਿਸ੍ਵਾ ਸਯਂ ਤਂ ਠਾਨਨ੍ਤਰਂ ਪਤ੍ਥੇਨ੍ਤੋ ਭਗਵਤੋ ਭਿਕ੍ਖੁਸਙ੍ਘਸ੍ਸ ਚ ਪੂਜਾਸਕ੍ਕਾਰਬਹੁਲਂ ਮਹਾਦਾਨਂ ਪਵਤ੍ਤੇਤ੍ਵਾ ‘‘ਅਹਂ, ਭਨ੍ਤੇ, ਅਨਾਗਤੇ ਤੁਮ੍ਹਾਦਿਸਸ੍ਸ ਬੁਦ੍ਧਸ੍ਸ ਏਵਰੂਪੋ ਸਾਵਕੋ ਭਵੇਯ੍ਯ’’ਨ੍ਤਿ ਪਣਿਧਾਨਂ ਅਕਾਸਿ.
ਸੋ ਤਤੋ ਪਟ੍ਠਾਯ ਦੇਵਮਨੁਸ੍ਸੇਸੁ ਸਂਸਰਨ੍ਤੋ ਅਤ੍ਥਦਸ੍ਸਿਸ੍ਸ ਭਗਵਤੋ ਕਾਲੇ ਧਮ੍ਮਤਾਯ ਨਾਮ ਨਦਿਯਾ ਮਹਨ੍ਤੋ ਕਚ੍ਛਪੋ ਹੁਤ੍ਵਾ ਨਿਬ੍ਬਤ੍ਤੋ ਏਕਦਿਵਸਂ ਸਤ੍ਥਾਰਂ ਨਦਿਂ ਤਰਿਤੁਂ ਤੀਰੇ ਠਿਤਂ ਦਿਸ੍ਵਾ ਸਯਂ ਭਗਵਨ੍ਤਂ ਤਾਰੇਤੁਕਾਮੋ ਸਤ੍ਥੁ ਪਾਦਮੂਲੇ ਨਿਪਜ੍ਜਿ. ਸਤ੍ਥਾ ਤਸ੍ਸ ਅਜ੍ਝਾਸਯਂ ਞਤ੍ਵਾ ਪਿਟ੍ਠਿਂ ਅਭਿਰੁਹਿ. ਸੋ ਹਟ੍ਠਤੁਟ੍ਠੋ ਵੇਗੇਨ ਸੋਤਂ ਛਿਨ੍ਦਨ੍ਤੋ ਸੀਘਤਰਂ ਪਰਤੀਰਂ ਪਾਪੇਸਿ. ਭਗਵਾ ਤਸ੍ਸ ਅਨੁਮੋਦਨਂ ਵਦਨ੍ਤੋ ਭਾਵਿਨਿਂ ਸਮ੍ਪਤ੍ਤਿਂ ਕਥੇਤ੍ਵਾ ਪਕ੍ਕਾਮਿ.
ਸੋ ਤੇਨ ਪੁਞ੍ਞਕਮ੍ਮੇਨ ਸੁਗਤੀਸੁਯੇਵ ਸਂਸਰਨ੍ਤੋ ਇਮਸ੍ਮਿਂ ਬੁਦ੍ਧੁਪ੍ਪਾਦੇ ਕਪਿਲਵਤ੍ਥੁਸ੍ਮਿਂ ਸੁਦ੍ਧੋਦਨਮਹਾਰਾਜਸ੍ਸ ਅਗ੍ਗਮਹੇਸਿਯਾ ਮਹਾਪਜਾਪਤਿਗੋਤਮਿਯਾ ਕੁਚ੍ਛਿਮ੍ਹਿ ਨਿਬ੍ਬਤ੍ਤੋ, ਤਸ੍ਸ ਨਾਮਗ੍ਗਹਣਦਿਵਸੇ ਞਾਤਿਸਙ੍ਘਂ ਨਨ੍ਦਯਨ੍ਤੋ ਜਾਤੋਤਿ ‘‘ਨਨ੍ਦੋ’’ਤ੍ਵੇਵ ਨਾਮਂ ਅਕਂਸੁ. ਤਸ੍ਸ ਵਯਪ੍ਪਤ੍ਤਕਾਲੇ ਭਗਵਾ ਪਵਤ੍ਤਿਤਵਰਧਮ੍ਮਚਕ੍ਕੋ ਲੋਕਾਨੁਗ੍ਗਹਂ ਕਰੋਨ੍ਤੋ ਅਨੁਕ੍ਕਮੇਨ ਕਪਿਲਵਤ੍ਥੁਂ ਗਨ੍ਤ੍ਵਾ ਞਾਤਿਸਮਾਗਮੇ ਪੋਕ੍ਖਰਵਸ੍ਸਂ ਅਟ੍ਠੁਪ੍ਪਤ੍ਤਿਂ ਕਤ੍ਵਾ ਵੇਸ੍ਸਨ੍ਤਰਜਾਤਕਂ (ਜਾ. ੨.੨੨.੧੬੫੫ ਆਦਯੋ) ਕਥੇਤ੍ਵਾ ਦੁਤਿਯਦਿਵਸੇ ਪਿਣ੍ਡਾਯ ਪਵਿਟ੍ਠੋ ‘‘ਉਤ੍ਤਿਟ੍ਠੇ ਨਪ੍ਪਮਜ੍ਜੇਯ੍ਯਾ’’ਤਿ (ਧ. ਪ. ੧੬੮) ਗਾਥਾਯ ਪਿਤਰਂ ਸੋਤਾਪਤ੍ਤਿਫਲੇ ਪਤਿਟ੍ਠਾਪੇਤ੍ਵਾ ਨਿਵੇਸਨਂ ਗਨ੍ਤ੍ਵਾ ‘‘ਧਮ੍ਮਞ੍ਚਰੇ ਸੁਚਰਿਤ’’ਨ੍ਤਿ (ਧ. ਪ. ੧੬੯) ਗਾਥਾਯ ਮਹਾਪਜਾਪਤਿਂ ਸੋਤਾਪਤ੍ਤਿਫਲੇ ਰਾਜਾਨਂ ਸਕਦਾਗਾਮਿਫਲੇ ਪਤਿਟ੍ਠਾਪੇਤ੍ਵਾ ਤਤਿਯਦਿਵਸੇ ਨਨ੍ਦਕੁਮਾਰਸ੍ਸ ਅਭਿਸੇਕਗੇਹਪਵੇਸਨਆਵਾਹਮਙ੍ਗਲੇਸੁ ਵਤ੍ਤਮਾਨੇਸੁ ਪਿਣ੍ਡਾਯ ਪਾਵਿਸਿ. ਸਤ੍ਥਾ ਨਨ੍ਦਕੁਮਾਰਸ੍ਸ ਹਤ੍ਥੇ ਪਤ੍ਤਂ ਦਤ੍ਵਾ ਮਙ੍ਗਲਂ ਵਤ੍ਵਾ ਤਸ੍ਸ ਹਤ੍ਥਤੋ ਪਤ੍ਤਂ ਅਗ੍ਗਹੇਤ੍ਵਾਵ ਵਿਹਾਰਂ ਗਤੋ, ਤਂ ਪਤ੍ਤਹਤ੍ਥਂ ਵਿਹਾਰਂ ਆਗਤਂ ਅਨਿਚ੍ਛਮਾਨਂਯੇਵ ਪਬ੍ਬਾਜੇਤ੍ਵਾ ਤਥਾਪਬ੍ਬਾਜਿਤਤ੍ਤਾਯੇਵ ਅਨਭਿਰਤਿਯਾ ਪੀਲ਼ਿਤਂ ਞਤ੍ਵਾ ਉਪਾਯੇਨ ਤਸ੍ਸ ਤਂ ਅਨਭਿਰਤਿਂ ਵਿਨੋਦੇਸਿ. ਸੋ ਯੋਨਿਸੋ ਪਟਿਸਙ੍ਖਾਯ ਵਿਪਸ੍ਸਨਂ ਪਟ੍ਠਪੇਤ੍ਵਾ ਨਚਿਰਸ੍ਸੇਵ ਅਰਹਤ੍ਤਂ ਪਾਪੁਣਿ. ਥੇਰੋ ਪੁਨ ਦਿਵਸੇ ਭਗਵਨ੍ਤਂ ਉਪਸਙ੍ਕਮਿਤ੍ਵਾ ਏਵਮਾਹ – ‘‘ਯਂ ਮੇ, ਭਨ੍ਤੇ, ਭਗਵਾ ਪਾਟਿਭੋਗੋ ਪਞ੍ਚਨ੍ਨਂ ਅਚ੍ਛਰਾਸਤਾਨਂ ਪਟਿਲਾਭਾਯ ਕਕੁਟਪਾਦਾਨਂ, ਮੁਞ੍ਚਾਮਹਂ, ਭਨ੍ਤੇ, ਭਗਵਨ੍ਤਂ ਏਤਸ੍ਮਾ ਪਟਿਸ੍ਸਵਾ’’ਤਿ. ਭਗਵਾਪਿ ‘‘ਯਦੇਵ ਤੇ, ਨਨ੍ਦ, ਅਨੁਪਾਦਾਯ ਆਸਵੇਹਿ ਚਿਤ੍ਤਂ ਵਿਮੁਤ੍ਤਂ, ਤਦਾਹਂ ਮੁਤ੍ਤੋ ਏਤਸ੍ਮਾ ਪਟਿਸ੍ਸਵਾ’’ਤਿ ਆਹ. ਅਥਸ੍ਸ ਭਗਵਾ ਸਵਿਸੇਸਂ ਇਨ੍ਦ੍ਰਿਯੇਸੁ ਗੁਤ੍ਤਦ੍ਵਾਰਤਂ ਞਤ੍ਵਾ ਤਂ ਗੁਣਂ ਵਿਭਾਵੇਨ੍ਤੋ ‘‘ਏਤਦਗ੍ਗਂ, ਭਿਕ੍ਖਵੇ, ਮਮ ਸਾਵਕਾਨਂ ਭਿਕ੍ਖੂਨਂ ਇਨ੍ਦ੍ਰਿਯੇਸੁ ਗੁਤ੍ਤਦ੍ਵਾਰਾਨਂ ਯਦਿਦਂ ਨਨ੍ਦੋ’’ਤਿ (ਅ. ਨਿ. ੧.੨੧੯, ੨੩੦) ਇਨ੍ਦ੍ਰਿਯੇਸੁ ਗੁਤ੍ਤਦ੍ਵਾਰਭਾਵੇਨ ਨਂ ਏਤਦਗ੍ਗੇ ਠਪੇਸਿ. ਥੇਰੋ ਹਿ ‘‘ਇਨ੍ਦ੍ਰਿਯਾਸਂਵਰਂ ਨਿਸ੍ਸਾਯ ਇਮਂ ਵਿਪ੍ਪਕਾਰਂ ਪਤ੍ਤੋ, ਤਮਹਂ ਸੁਟ੍ਠੁ ਨਿਗ੍ਗਣ੍ਹਿਸ੍ਸਾਮੀ’’ਤਿ ਉਸ੍ਸਾਹਜਾਤੋ ਬਲਵਹਿਰੋਤ੍ਤਪ੍ਪੋ ਤਤ੍ਥ ਚ ਕਤਾਧਿਕਾਰਤ੍ਤਾ ਇਨ੍ਦ੍ਰਿਯਸਂਵਰੇ ਉਕ੍ਕਂਸਪਾਰਮਿਂ ਅਗਮਾਸਿ.
੨੭. ਏਵਂ ਸੋ ਏਤਦਗ੍ਗਟ੍ਠਾਨਂ ਪਤ੍ਵਾ ਅਤ੍ਤਨੋ ਪੁਬ੍ਬਕਮ੍ਮਂ ਸਰਿਤ੍ਵਾ ਸੋਮਨਸ੍ਸਪ੍ਪਤ੍ਤੋ ਪੁਬ੍ਬਚਰਿਤਾਪਦਾਨਂ ਪਕਾਸੇਨ੍ਤੋ ਪਦੁਮੁਤ੍ਤਰਸ੍ਸ ਭਗਵਤੋਤਿਆਦਿਮਾਹ. ਵਤ੍ਥਂ ਖੋਮਂ ਮਯਾ ਦਿਨ੍ਨਨ੍ਤਿ ਖੋਮਰਟ੍ਠੇ ਜਾਤਂ ਵਤ੍ਥਂ ਭਗਵਤਿ ਚਿਤ੍ਤਪ੍ਪਸਾਦੇਨ ਗਾਰਵਬਹੁਮਾਨੇਨ ਮਯਾ ਪਰਮਸੁਖੁਮਂ ਖੋਮਵਤ੍ਥਂ ਦਿਨ੍ਨਨ੍ਤਿ ਅਤ੍ਥੋ. ਸਯਮ੍ਭੁਸ੍ਸਾਤਿ ਸਯਮੇਵ ਭੂਤਸ੍ਸ ਜਾਤਸ੍ਸ ਅਰਿਯਾਯ ਜਾਤਿਯਾ ਨਿਬ੍ਬਤ੍ਤਸ੍ਸ. ਮਹੇਸਿਨੋਤਿ ਮਹਨ੍ਤੇ ਸੀਲਸਮਾਧਿਪਞ੍ਞਾਵਿਮੁਤ੍ਤਿਵਿਮੁਤ੍ਤਿਞਾਣਦਸ੍ਸਨਕ੍ਖਨ੍ਧੇ ਏਸਿ ਗਵੇਸੀਤਿ ਮਹੇਸਿ, ਤਸ੍ਸ ਮਹੇਸਿਨੋ ਸਯਮ੍ਭੁਸ੍ਸ ਚੀਵਰਤ੍ਥਾਯ ਖੋਮਵਤ੍ਥਂ ਮਯਾ ਦਿਨ੍ਨਨ੍ਤਿ ਸਮ੍ਬਨ੍ਧੋ.
੨੮. ਤਂ ਮੇ ਬੁਦ੍ਧੋ ਵਿਯਾਕਾਸੀਤਿ ਏਤ੍ਥ ਤਨ੍ਤਿ ਸਾਮ੍ਯਤ੍ਥੇ ਉਪਯੋਗਵਚਨਂ, ਤਸ੍ਸ ਵਤ੍ਥਦਾਯਕਸ੍ਸ ਮੇ ਦਾਨਫਲਂ ਵਿਸੇਸੇਨ ਅਕਾਸਿ ਕਥੇਸਿ ਬੁਦ੍ਧੋਤਿ ਅਤ੍ਥੋ. ਜਲਜੁਤ੍ਤਮਨਾਮਕੋਤਿ ਪਦੁਮੁਤ੍ਤਰਨਾਮਕੋ. ‘‘ਜਲਰੁਤ੍ਤਮਨਾਯਕੋ’’ਤਿਪਿ ਪਾਠੋ, ਤਸ੍ਸ ਜਲਮਾਨਾਨਂ ਦੇਵਬ੍ਰਹ੍ਮਾਨਂ ਉਤ੍ਤਮਨਾਯਕੋ ਪਧਾਨੋਤਿ ਅਤ੍ਥੋ. ਇਮਿਨਾ ਵਤ੍ਥਦਾਨੇਨਾਤਿ ਇਮਿਨਾ ਵਤ੍ਥਦਾਨਸ੍ਸ ਨਿਸ੍ਸਨ੍ਦੇਨ ਤ੍ਵਂ ਅਨਾਗਤੇ ਹੇਮਵਣ੍ਣੋ ਸੁਵਣ੍ਣਵਣ੍ਣੋ ਭਵਿਸ੍ਸਸਿ.
੨੯. ਦ੍ਵੇ ਸਮ੍ਪਤ੍ਤਿਂ ਅਨੁਭੋਤ੍ਵਾਤਿ ਦਿਬ੍ਬਮਨੁਸ੍ਸਸਙ੍ਖਾਤਾ ਦ੍ਵੇ ਸਮ੍ਪਤ੍ਤਿਯੋ ਅਨੁਭਵਿਤ੍ਵਾ. ਕੁਸਲਮੂਲੇਹਿ ਚੋਦਿਤੋਤਿ ਕੁਸਲਾਵਯਵੇਹਿ ਕੁਸਲਕੋਟ੍ਠਾਸੇਹਿ ਚੋਦਿਤੋ ਪੇਸਿਤੋ, ‘‘ਤ੍ਵਂ ਇਮਿਨਾ ਪੁਞ੍ਞੇਨ ਸਤ੍ਥੁ ਕੁਲਂ ਪਸਵਾਹੀ’’ਤਿ ਪੇਸਿਤੋ ਵਿਯਾਤਿ ਅਤ੍ਥੋ. ‘‘ਗੋਤਮਸ੍ਸ ਭਗਵਤੋ ਕਨਿਟ੍ਠੋ ਤ੍ਵਂ ਭਵਿਸ੍ਸਸੀ’’ਤਿ ਬ੍ਯਾਕਾਸੀਤਿ ਸਮ੍ਬਨ੍ਧੋ.
੩੦. ਰਾਗਰਤ੍ਤੋ ਸੁਖਸੀਲੋਤਿ ਕਿਲੇਸਕਾਮੇਹਿ ਰਤ੍ਤੋ ਅਲ੍ਲੀਨੋ ਕਾਯਸੁਖਚਿਤ੍ਤਸੁਖਾਨੁਭਵਨਸਭਾਵੋ. ਕਾਮੇਸੁ ਗੇਧਮਾਯੁਤੋਤਿ ਵਤ੍ਥੁਕਾਮੇਸੁ ਗੇਧਸਙ੍ਖਾਤਾਯ ਤਣ੍ਹਾਯ ਆਯੁਤੋ ਯੋਜਿਤੋਤਿ ਅਤ੍ਥੋ. ਬੁਦ੍ਧੇਨ ਚੋਦਿਤੋ ਸਨ੍ਤੋ, ਤਦਾ ਤ੍ਵਨ੍ਤਿ ਯਸ੍ਮਾ ਕਾਮੇਸੁ ਗੇਧਿਤੋ, ਤਦਾ ਤਸ੍ਮਾ ਤ੍ਵਂ ਅਤ੍ਤਨੋ ਭਾਤੁਕੇਨ ਗੋਤਮਬੁਦ੍ਧੇਨ ਚੋਦਿਤੋ ਪਬ੍ਬਜ੍ਜਾਯ ਉਯ੍ਯੋਜਿਤੋ ਤਸ੍ਸ ਸਨ੍ਤਿਕੇ ਪਬ੍ਬਜਿਸ੍ਸਸੀਤਿ ਸਮ੍ਬਨ੍ਧੋ.
੩੧. ਪਬ੍ਬਜਿਤ੍ਵਾਨ ਤ੍ਵਂ ਤਤ੍ਥਾਤਿ ਤਸ੍ਮਿਂ ਗੋਤਮਸ੍ਸ ਭਗਵਤੋ ਸਾਸਨੇ ਤ੍ਵਂ ਪਬ੍ਬਜਿਤ੍ਵਾ ਕੁਸਲਮੂਲੇਨ ਮੂਲਭੂਤੇਨ ਪੁਞ੍ਞਸਮ੍ਭਾਰੇਨ ਚੋਦਿਤੋ ਭਾਵਨਾਯਂ ਨਿਯੋਜਿਤੋ ਸਬ੍ਬਾਸਵੇ ਸਕਲਾਸਵੇ ਪਰਿਞ੍ਞਾਯ ਜਾਨਿਤ੍ਵਾ ਪਜਹਿਤ੍ਵਾ ਅਨਾਮਯੋ ਨਿਦ੍ਦੁਕ੍ਖੋ ਨਿਬ੍ਬਾਯਿਸ੍ਸਸਿ ਅਦਸ੍ਸਨਂ ਪਾਪੇਸ੍ਸਸਿ, ਅਪਣ੍ਣਤ੍ਤਿਕਭਾਵਂ ਗਮਿਸ੍ਸਸੀਤਿ ਅਤ੍ਥੋ.
੩੨. ਸਤਕਪ੍ਪਸਹਸ੍ਸਮ੍ਹੀਤਿ ਇਤੋ ਕਪ੍ਪਤੋ ਪੁਬ੍ਬੇ ਸਤਕਪ੍ਪਾਧਿਕੇ ਸਹਸ੍ਸਮੇ ਕਪ੍ਪਮ੍ਹਿ ਚੇਲ਼ਨਾਮਕਾ ਚਤ੍ਤਾਰੋ ਚਕ੍ਕਵਤ੍ਤਿਰਾਜਾਨੋ ਅਹੇਸੁਨ੍ਤਿ ਅਤ੍ਥੋ. ਸਟ੍ਠਿ ਕਪ੍ਪਸਹਸ੍ਸਾਨੀਤਿ ਕਪ੍ਪਸਹਸ੍ਸਾਨਿ ਸਟ੍ਠਿ ਚ ਅਤਿਕ੍ਕਮਿਤ੍ਵਾ ਹੇਟ੍ਠਾ ਏਕਸ੍ਮਿਂ ਕਪ੍ਪੇ ਚਤ੍ਤਾਰੋ ਜਨਾ ਉਪਚੇਲ਼ਾ ਨਾਮ ਚਕ੍ਕਵਤ੍ਤਿਰਾਜਾਨੋ ਚਤੂਸੁ ਜਾਤੀਸੁ ਅਹੇਸੁਨ੍ਤਿ ਅਤ੍ਥੋ.
੩੩. ਪਞ੍ਚਕਪ੍ਪਸਹਸ੍ਸਮ੍ਹੀਤਿ ਪਞ੍ਚਕਪ੍ਪਾਧਿਕੇ ਸਹਸ੍ਸਮੇ ਕਪ੍ਪਮ੍ਹਿ ਚੇਲ਼ਾ ਨਾਮ ਚਤ੍ਤਾਰੋ ਜਨਾ ਚਕ੍ਕਵਤ੍ਤਿਰਾਜਾਨੋ ਸਤ੍ਤਹਿ ਰਤਨੇਹਿ ਸਮ੍ਪਨ੍ਨਾ ਸਮਙ੍ਗੀਭੂਤਾ ਜਮ੍ਬੁਦੀਪਅਪਰਗੋਯਾਨਉਤ੍ਤਰਕੁਰੁਪੁਬ੍ਬਵਿਦੇਹਦੀਪਸਙ੍ਖਾਤੇ ਚਤੁਦੀਪਮ੍ਹਿ ਇਸ੍ਸਰਾ ਪਧਾਨਾ ਵਿਸੁਂ ਅਹੇਸੁਨ੍ਤਿ ਅਤ੍ਥੋ. ਸੇਸਂ ਵੁਤ੍ਤਨਯਮੇਵਾਤਿ.
ਨਨ੍ਦਤ੍ਥੇਰਅਪਦਾਨਵਣ੍ਣਨਾ ਸਮਤ੍ਤਾ.
੪. ਚੂਲ਼ਪਨ੍ਥਕਤ੍ਥੇਰਅਪਦਾਨਵਣ੍ਣਨਾ
ਪਦੁਮੁਤ੍ਤਰੋ ਨਾਮ ਜਿਨੋਤਿਆਦਿਕਂ ਆਯਸ੍ਮਤੋ ਚੂਲ਼ਪਨ੍ਥਕਤ੍ਥੇਰਸ੍ਸ ਅਪਦਾਨਂ. ਅਯਮ੍ਪਿ ਪੁਰਿਮਬੁਦ੍ਧੇਸੁ ਕਤਾਧਿਕਾਰੋ ਤਤ੍ਥ ਤਤ੍ਥ ਭਵੇ ਵਿਵਟ੍ਟੂਪਨਿਸ੍ਸਯਾਨਿ ਪੁਞ੍ਞਾਨਿ ਉਪਚਿਨਨ੍ਤੋ ਪਦੁਮੁਤ੍ਤਰਸ੍ਸ ਭਗਵਤੋ ਕਾਲੇ ਯਦੇਤ੍ਥ ਅਟ੍ਠੁਪ੍ਪਤ੍ਤਿਵਸੇਨ ਵਤ੍ਤਬ੍ਬਂ, ਤਂ ਅਟ੍ਠਕਨਿਪਾਤੇ ਮਹਾਪਨ੍ਥਕਵਤ੍ਥੁਸ੍ਮਿਂ (ਥੇਰਗਾ. ੫੧੦ ਆਦਯੋ) ਵੁਤ੍ਤਮੇਵ. ਅਯਂ ਪਨ ਵਿਸੇਸੋ – ਮਹਾਪਨ੍ਥਕਤ੍ਥੇਰੋ ਅਰਹਤ੍ਤਂ ਪਤ੍ਵਾ ਫਲਸਮਾਪਤ੍ਤਿਸੁਖੇਨ ਵੀਤਿਨਾਮੇਨ੍ਤੋ ਚਿਨ੍ਤੇਸਿ – ‘‘ਕਥਂ ਨੁ ਖੋ ਸਕ੍ਕਾ ਚੂਲ਼ਪਨ੍ਥਕਮ੍ਪਿ ਇਮਸ੍ਮਿਂ ਸੁਖੇ ਪਤਿਟ੍ਠਾਪੇਤੁ’’ਨ੍ਤਿ. ਸੋ ਅਤ੍ਤਨੋ ਅਯ੍ਯਕਂ ਧਨਸੇਟ੍ਠਿਂ ਉਪਸਙ੍ਕਮਿਤ੍ਵਾ ਆਹ – ‘‘ਸਚੇ, ਮਹਾਸੇਟ੍ਠਿ, ਅਨੁਜਾਨਾਥ, ਅਹਂ ਚੂਲ਼ਪਨ੍ਥਕਂ ਪਬ੍ਬਾਜੇਯ੍ਯ’’ਨ੍ਤਿ. ‘‘ਪਬ੍ਬਾਜੇਥ, ਭਨ੍ਤੇ’’ਤਿ. ਥੇਰੋ ਤਂ ਪਬ੍ਬਾਜੇਸਿ. ਸੋ ਦਸਸੁ ਸੀਲੇਸੁ ਪਤਿਟ੍ਠਿਤੋ ਭਾਤੁ ਸਨ੍ਤਿਕੇ –
‘‘ਪਦੁਮਂ ਯਥਾ ਕੋਕਨਦਂ ਸੁਗਨ੍ਧਂ, ਪਾਤੋ ਸਿਯਾ ਫੁਲ੍ਲਮਵੀਤਗਨ੍ਧਂ;
ਅਙ੍ਗੀਰਸਂ ਪਸ੍ਸ ਵਿਰੋਚਮਾਨਂ, ਤਪਨ੍ਤਮਾਦਿਚ੍ਚਮਿਵਨ੍ਤਲਿਕ੍ਖੇ’’ਤਿ. (ਸਂ. ਨਿ. ੧.੧੨੩; ਅ. ਨਿ. ੫.੧੯੫) –
ਗਾਥਂ ਉਗ੍ਗਣ੍ਹਨ੍ਤੋ ਚਤੂਹਿ ਮਾਸੇਹਿ ਉਗ੍ਗਹੇਤੁਂ ਨਾਸਕ੍ਖਿ, ਗਹਿਤਮ੍ਪਿ ਹਦਯੇ ਨ ਤਿਟ੍ਠਤਿ. ਅਥ ਨਂ ਮਹਾਪਨ੍ਥਕੋ, ‘‘ਚੂਲ਼ਪਨ੍ਥਕ, ਤ੍ਵਂ ਇਮਸ੍ਮਿਂ ਸਾਸਨੇ ਅਭਬ੍ਬੋ, ਚਤੂਹਿ ਮਾਸੇਹਿ ਏਕਂ ਗਾਥਮ੍ਪਿ ਗਹੇਤੁਂ ਨ ਸਕ੍ਕੋਸਿ, ਪਬ੍ਬਜਿਤਕਿਚ੍ਚਂ ਪਨ ਤ੍ਵਂ ਕਥਂ ਮਤ੍ਥਕਂ ਪਾਪੇਸ੍ਸਸਿ, ਨਿਕ੍ਖਮ ਇਤੋ’’ਤਿ ਸੋ ਥੇਰੇਨ ਪਣਾਮਿਕੋ ਦ੍ਵਾਰਕੋਟ੍ਠਕਸਮੀਪੇ ਰੋਦਮਾਨੋ ਅਟ੍ਠਾਸਿ.
ਤੇਨ ਚ ਸਮਯੇਨ ਸਤ੍ਥਾ ਜੀਵਕਮ੍ਬਵਨੇ ਵਿਹਰਤਿ. ਅਥ ਜੀਵਕੋ ਪੁਰਿਸਂ ਪੇਸੇਸਿ – ‘‘ਗਚ੍ਛ, ਪਞ੍ਚਹਿ ਭਿਕ੍ਖੁਸਤੇਹਿ ਸਦ੍ਧਿਂ ਸਤ੍ਥਾਰਂ ਨਿਮਨ੍ਤੇਹੀ’’ਤਿ. ਤੇਨ ਚ ਸਮਯੇਨ ਆਯਸ੍ਮਾ ਮਹਾਪਨ੍ਥਕੋ ਭਤ੍ਤੁਦ੍ਦੇਸਕੋ ਹੋਤਿ. ਸੋ ‘‘ਪਞ੍ਚਨ੍ਨਂ ਭਿਕ੍ਖੁਸਤਾਨਂ ਭਿਕ੍ਖਂ ਪਟਿਚ੍ਛਥਾ’’ਤਿ ਵੁਤ੍ਤੋ ‘‘ਚੂਲ਼ਪਨ੍ਥਕਂ ਠਪੇਤ੍ਵਾ ਸੇਸਾਨਂ ਪਟਿਚ੍ਛਾਮੀ’’ਤਿ ਆਹ. ਤਂ ਸੁਤ੍ਵਾ ਚੂਲ਼ਪਨ੍ਥਕੋ ਭਿਯ੍ਯੋਸੋਮਤ੍ਤਾਯ ਦੋਮਨਸ੍ਸਪ੍ਪਤ੍ਤੋ ਅਹੋਸਿ. ਸਤ੍ਥਾ ਤਸ੍ਸ ਚਿਤ੍ਤਕ੍ਖੇਦਂ ਞਤ੍ਵਾ ‘‘ਚੂਲ਼ਪਨ੍ਥਕੋ ਮਯਾ ਕਤੇਨ ਉਪਾਯੇਨ ਬੁਜ੍ਝਿਸ੍ਸਤੀ’’ਤਿ ਤਸ੍ਸ ਅਵਿਦੂਰਟ੍ਠਾਨੇ ਅਤ੍ਤਾਨਂ ਦਸ੍ਸੇਤ੍ਵਾ ‘‘ਕਿਂ, ਪਨ੍ਥਕ, ਰੋਦਸੀ’’ਤਿ ਪੁਚ੍ਛਿ. ‘‘ਭਾਤਾ ਮਂ, ਭਨ੍ਤੇ, ਪਣਾਮੇਤੀ’’ਤਿ ਆਹ. ‘‘ਪਨ੍ਥਕ, ਮਾ ਚਿਨ੍ਤਯਿ, ਮਮ ਸਾਸਨੇ ਤੁਯ੍ਹਂ ਪਬ੍ਬਜ੍ਜਾ, ਏਹਿ ਇਮਂ ਗਹੇਤ੍ਵਾ ‘ਰਜੋਹਰਣਂ, ਰਜੋਹਰਣ’ਨ੍ਤਿ ਮਨਸਿ ਕਰੋਹੀ’’ਤਿ ਇਦ੍ਧਿਯਾ ਸੁਦ੍ਧਂ ਚੋਲ਼ਕ੍ਖਣ੍ਡਂ ਅਭਿਸਙ੍ਖਰਿਤ੍ਵਾ ਅਦਾਸਿ. ਸੋ ਸਤ੍ਥਾਰਾ ਦਿਨ੍ਨਂ ਚੋਲ਼ਕ੍ਖਣ੍ਡਂ ‘‘ਰਜੋਹਰਣਂ, ਰਜੋਹਰਣ’’ਨ੍ਤਿ ਹਤ੍ਥੇਨ ਪਰਿਮਜ੍ਜਨ੍ਤੋ ਨਿਸੀਦਿ. ਤਸ੍ਸ ਤਂ ਪਰਿਮਜ੍ਜਨ੍ਤਸ੍ਸ ਕਿਲਿਟ੍ਠਧਾਤੁਕਂ ਜਾਤਂ, ਪੁਨ ਪਰਿਮਜ੍ਜਨ੍ਤਸ੍ਸ ਉਕ੍ਖਲਿਪਰਿਪੁਞ੍ਛਨਸਦਿਸਂ ਜਾਤਂ. ਸੋ ਞਾਣਪਰਿਪਾਕਤ੍ਤਾ ਏਵਂ ਚਿਨ੍ਤੇਸਿ – ‘‘ਇਦਂ ਚੋਲ਼ਕ੍ਖਣ੍ਡਂ ਪਕਤਿਯਾ ਪਰਿਸੁਦ੍ਧਂ, ਇਮਂ ਉਪਾਦਿਣ੍ਣਕਸਰੀਰਂ ਨਿਸ੍ਸਾਯ ਕਿਲਿਟ੍ਠਂ ਅਞ੍ਞਥਾ ਜਾਤਂ, ਤਸ੍ਮਾ ਅਨਿਚ੍ਚਂ ਯਥਾਪੇਤਂ, ਏਵਂ ਚਿਤ੍ਤਮ੍ਪੀ’’ਤਿ ਖਯਵਯਂ ਪਟ੍ਠਪੇਤ੍ਵਾ ਤਸ੍ਮਿਂਯੇਵ ਨਿਮਿਤ੍ਤੇ ਝਾਨਾਨਿ ਨਿਬ੍ਬਤ੍ਤੇਤ੍ਵਾ ਝਾਨਪਾਦਕਂ ਕਤ੍ਵਾ ਵਿਪਸ੍ਸਨਂ ਪਟ੍ਠਪੇਤ੍ਵਾ ਸਹ ਪਟਿਸਮ੍ਭਿਦਾਹਿ ਅਰਹਤ੍ਤਂ ਪਾਪੁਣਿ. ਅਰਹਤ੍ਤਪਤ੍ਤਸ੍ਸੇਵਸ੍ਸ ਤੇਪਿਟਕਂ ਪਞ੍ਚਾਭਿਞ੍ਞਾ ਚ ਆਗਮਿਂਸੁ.
ਸਤ੍ਥਾ ਏਕੂਨੇਹਿ ਪਞ੍ਚਭਿਕ੍ਖੁਸਤੇਹਿ ਸਦ੍ਧਿਂ ਗਨ੍ਤ੍ਵਾ ਜੀਵਕਸ੍ਸ ਨਿਵੇਸਨੇ ਪਞ੍ਞਤ੍ਤੇ ਆਸਨੇ ਨਿਸੀਦਿ. ਚੂਲ਼ਪਨ੍ਥਕੋ ਪਨ ਅਤ੍ਤਨੋ ਭਿਕ੍ਖਾਯ ਅਪ੍ਪਟਿਚ੍ਛਿਤਤ੍ਤਾ ਏਵ ਨ ਗਤੋ. ਜੀਵਕੋ ਯਾਗੁਂ ਦਾਤੁਂ ਆਰਭਿ. ਸਤ੍ਥਾ ਹਤ੍ਥੇਨ ਪਤ੍ਤਂ ਪਿਦਹਿ. ‘‘ਕਸ੍ਮਾ, ਭਨ੍ਤੇ, ਨ ਗਣ੍ਹਥਾ’’ਤਿ ਵੁਤ੍ਤੇ ‘‘ਵਿਹਾਰੇ ਏਕੋ ਭਿਕ੍ਖੁ ਅਤ੍ਥਿ, ਜੀਵਕਾ’’ਤਿ. ਸੋ ਪੁਰਿਸਂ ਪੇਸੇਸਿ – ‘‘ਗਚ੍ਛ, ਭਣੇ, ਵਿਹਾਰੇ ਨਿਸਿਨ੍ਨਂ ਅਯ੍ਯਂ ਗਹੇਤ੍ਵਾ ਏਹੀ’’ਤਿ. ਚੂਲ਼ਪਨ੍ਥਕਤ੍ਥੇਰੋਪਿ ਰੂਪੇਨ ਕਿਰਿਯਾਯ ਚ ਏਕਮ੍ਪਿ ਏਕੇਨ ਅਸਦਿਸਂ ਭਿਕ੍ਖੁਸਹਸ੍ਸਂ ਨਿਮ੍ਮਿਨਿਤ੍ਵਾ ਨਿਸੀਦਿ. ਸੋ ਪੁਰਿਸੋ ਵਿਹਾਰੇ ਭਿਕ੍ਖੂਨਂ ਬਹੁਭਾਵਂ ਦਿਸ੍ਵਾ ਗਨ੍ਤ੍ਵਾ ਜੀਵਕਸ੍ਸ ਕਥੇਸਿ – ‘‘ਇਮਸ੍ਮਾ ਭਿਕ੍ਖੁਸਙ੍ਘਾ ਵਿਹਾਰੇ ਭਿਕ੍ਖੁਸਙ੍ਘੋ ਬਹੁਤਰੋ, ਪਕ੍ਕੋਸਿਤਬ੍ਬਂ ਅਯ੍ਯਂ ਨ ਜਾਨਾਮੀ’’ਤਿ. ਜੀਵਕੋ ਸਤ੍ਥਾਰਂ ਪੁਚ੍ਛਿ – ‘‘ਕੋ ਨਾਮੋ, ਭਨ੍ਤੇ, ਵਿਹਾਰੇ ਨਿਸਿਨ੍ਨੋ ਭਿਕ੍ਖੂ’’ਤਿ? ‘‘ਚੂਲ਼ਪਨ੍ਥਕੋ ਨਾਮ, ਜੀਵਕਾ’’ਤਿ. ‘‘ਗਚ੍ਛ, ਭਣੇ, ‘ਚੂਲ਼ਪਨ੍ਥਕੋ ਨਾਮ ਕਤਰੋ’ਤਿ ਪੁਚ੍ਛਿਤ੍ਵਾ ਤਂ ਆਨੇਹੀ’’ਤਿ. ਸੋ ਵਿਹਾਰਂ ਗਨ੍ਤ੍ਵਾ ‘‘ਚੂਲ਼ਪਨ੍ਥਕੋ ਨਾਮ ਕਤਰੋ, ਭਨ੍ਤੇ’’ਤਿ ਪੁਚ੍ਛਿ. ‘‘ਅਹਂ ਚੂਲ਼ਪਨ੍ਥਕੋ, ਅਹਂ ਚੂਲ਼ਪਨ੍ਥਕੋ’’ਤਿ ਏਕਪ੍ਪਹਾਰੇਨ ਭਿਕ੍ਖੁਸਹਸ੍ਸਮ੍ਪਿ ਕਥੇਸਿ. ਸੋ ਪੁਨਾਗਨ੍ਤ੍ਵਾ ਤਂ ਪਵਤ੍ਤਿਂ ਜੀਵਕਸ੍ਸ ਆਰੋਚੇਸਿ ਜੀਵਕੋ ਪਟਿਵਿਦ੍ਧਸਚ੍ਚਤ੍ਤਾ ‘‘ਇਦ੍ਧਿਮਾ ਮਞ੍ਞੇ, ਅਯ੍ਯੋ’’ਤਿ ਨਯਤੋ ਞਤ੍ਵਾ ‘‘ਗਚ੍ਛ, ਭਣੇ, ਪਠਮਂ ਕਥੇਨ੍ਤਂ ਅਯ੍ਯਮੇਵ ‘ਤੁਮ੍ਹੇ ਸਤ੍ਥਾ ਪਕ੍ਕੋਸਤੀ’ਤਿ ਵਤ੍ਵਾ ਚੀਵਰਕਣ੍ਣੇ ਗਣ੍ਹਾਹੀ’’ਤਿ ਆਹ. ਸੋ ਵਿਹਾਰਂ ਗਨ੍ਤ੍ਵਾ ਤਥਾ ਅਕਾਸਿ. ਤਾਵਦੇਵ ਨਿਮ੍ਮਿਤਭਿਕ੍ਖੂ ਅਨ੍ਤਰਧਾਯਿਂਸੁ. ਸੋ ਥੇਰਂ ਗਹੇਤ੍ਵਾ ਅਗਮਾਸਿ.
ਸਤ੍ਥਾ ਤਸ੍ਮਿਂ ਖਣੇ ਯਾਗੁਞ੍ਚ ਖਜ੍ਜਕਾਦਿਭੇਦਞ੍ਚ ਪਟਿਗ੍ਗਣ੍ਹਿ. ਕਤਭਤ੍ਤਕਿਚ੍ਚੋ ਭਗਵਾ ਆਯਸ੍ਮਨ੍ਤਂ ਚੂਲ਼ਪਨ੍ਥਕਂ ਆਣਾਪੇਸਿ ‘‘ਅਨੁਮੋਦਨਂ ਕਰੋਹੀ’’ਤਿ. ਸੋ ਪਭਿਨ੍ਨਪਟਿਸਮ੍ਭਿਦੋ ਸਿਨੇਰੁਂ ਗਹੇਤ੍ਵਾ ਮਹਾਸਮੁਦ੍ਦਂ ਮਨ੍ਥੇਨ੍ਤੋ ਵਿਯ ਤੇਪਿਟਕਂ ਬੁਦ੍ਧਵਚਨਂ ਸਙ੍ਖੋਭੇਨ੍ਤੋ ਸਤ੍ਥੁ ਅਜ੍ਝਾਸਯਂ ਗਣ੍ਹਨ੍ਤੋ ਅਨੁਮੋਦਨਂ ਅਕਾਸਿ. ਦਸਬਲੇ ਭਤ੍ਤਕਿਚ੍ਚਂ ਕਤ੍ਵਾ ਵਿਹਾਰਂ ਗਤੇ ਧਮ੍ਮਸਭਾਯਂ ਕਥਾ ਉਦਪਾਦਿ ‘ਅਹੋ ਬੁਦ੍ਧਾਨਂ ਆਨੁਭਾਵੋ, ਯਤ੍ਰ ਹਿ ਨਾਮ ਚਤ੍ਤਾਰੋ ਮਾਸੇ ਏਕਗਾਥਂ ਗਹੇਤੁਂ ਅਸਕ੍ਕੋਨ੍ਤਮ੍ਪਿ ਲਹੁਕੇਨ ਖਣੇਨੇਵ ਏਵਂ ਮਹਿਦ੍ਧਿਕਂ ਅਕਂਸੂ’ਤਿ, ਤਥਾ ਹਿ ਜੀਵਕਸ੍ਸ ਨਿਵੇਸਨੇ ਨਿਸਿਨ੍ਨੋ ਭਗਵਾ ‘ਏਵਂ ਚੂਲ਼ਪਨ੍ਥਕਸ੍ਸ ਚਿਤ੍ਤਂ ਸਮਾਹਿਤਂ, ਵੀਥਿਪਟਿਪਨ੍ਨਾ ਵਿਪਸ੍ਸਨਾ’ਤਿ ਞਤ੍ਵਾ ਯਥਾਨਿਸਿਨ੍ਨੋਯੇਵ ਅਤ੍ਤਾਨਂ ਦਸ੍ਸੇਤ੍ਵਾ, ‘ਪਨ੍ਥਕ, ਨੇਵਾਯਂ ਪਿਲੋਤਿਕਾ ਕਿਲਿਟ੍ਠਾ ਰਜਾਨੁਕਿਣ੍ਣਾ, ਇਤੋ ਪਨ ਅਞ੍ਞੋਪਿ ਅਰਿਯਸ੍ਸ ਵਿਨਯੇ ਸਂਕਿਲੇਸੋ ਰਜੋ’ਤਿ ਦਸ੍ਸੇਨ੍ਤੋ –
‘‘ਰਾਗੋ ਰਜੋ ਨ ਚ ਪਨ ਰੇਣੁ ਵੁਚ੍ਚਤਿ, ਰਾਗਸ੍ਸੇਤਂ ਅਧਿਵਚਨਂ ਰਜੋਤਿ;
ਏਤਂ ਰਜਂ ਵਿਪ੍ਪਜਹਿਤ੍ਵਾ ਭਿਕ੍ਖਵੋ, ਵਿਹਰਨ੍ਤਿ ਤੇ ਵਿਗਤਰਜਸ੍ਸ ਸਾਸਨੇ.
‘‘ਦੋਸੋ ਰਜੋ…ਪੇ… ਵਿਗਤਰਜਸ੍ਸ ਸਾਸਨੇ.
‘‘ਮੋਹੋ ਰਜੋ…ਪੇ… ਵਿਗਤਰਜਸ੍ਸ ਸਾਸਨੇ’’ਤਿ. (ਮਹਾਨਿ. ੨੦੯; ਚੂਲ਼ਨਿ. ਉਦਯਮਾਣਵਪੁਚ੍ਛਾਨਿਦ੍ਦੇਸ ੭੪) –
ਇਮਾ ਤਿਸ੍ਸੋ ਗਾਥਾਯੋ ਅਭਾਸਿ. ਗਾਥਾਪਰਿਯੋਸਾਨੇ ਚੂਲ਼ਪਨ੍ਥਕੋ ਸਹਪਟਿਸਮ੍ਭਿਦਾਹਿ ਅਰਹਤ੍ਤਂ ਪਾਪੁਣੀਤਿ. ਸਤ੍ਥਾ ਤੇਸਂ ਭਿਕ੍ਖੂਨਂ ਕਥਾਸਲ੍ਲਾਪਂ ਸੁਤ੍ਵਾ ਆਗਨ੍ਤ੍ਵਾ ਬੁਦ੍ਧਾਸਨੇ ਨਿਸੀਦਿਤ੍ਵਾ ‘‘ਕਿਂ ਵਦੇਥ, ਭਿਕ੍ਖਵੇ’’ਤਿ ਪੁਚ੍ਛਿਤ੍ਵਾ ‘‘ਇਮਂ ਨਾਮ, ਭਨ੍ਤੇ’’ਤਿ ਵੁਤ੍ਤੇ ‘‘ਭਿਕ੍ਖਵੇ, ਚੂਲ਼ਪਨ੍ਥਕੇਨ ਇਦਾਨਿ ਮਯ੍ਹਂ ਓਵਾਦੇ ਠਤ੍ਵਾ ਲੋਕੁਤ੍ਥਰਦਾਯਜ੍ਜਂ ਲਦ੍ਧਂ, ਪੁਬ੍ਬੇ ਪਨ ਲੋਕਿਯਦਾਯਜ੍ਜਂ ਲਦ੍ਧ’’ਨ੍ਤਿ ਵਤ੍ਵਾ ਤੇਹਿ ਯਾਚਿਤੋ ਚੂਲ਼ਸੇਟ੍ਠਿਜਾਤਕਂ (ਜਾ. ੧.੧.੪) ਕਥੇਸਿ. ਅਪਰਭਾਗੇ ਨਂ ਸਤ੍ਥਾ ਅਰਿਯਗਣਪਰਿਵੁਤੋ ਧਮ੍ਮਾਸਨੇ ਨਿਸਿਨ੍ਨੋ ਮਨੋਮਯਂ ਕਾਯਂ ਅਭਿਨਿਮ੍ਮਿਨਨ੍ਤਾਨਂ ਭਿਕ੍ਖੂਨਂ ਚੇਤੋਵਿਵਟ੍ਟਕੁਸਲਾਨਞ੍ਚ ਅਗ੍ਗਟ੍ਠਾਨੇ ਠਪੇਸਿ.
੩੫. ਏਵਂ ਸੋ ਪਤ੍ਤਏਤਦਗ੍ਗਟ੍ਠਾਨੋ ਅਤ੍ਤਨੋ ਪੁਬ੍ਬਕਮ੍ਮਂ ਸਰਿਤ੍ਵਾ ਪੀਤਿਸੋਮਨਸ੍ਸਵਸੇਨ ਪੁਬ੍ਬਚਰਿਤਾਪਦਾਨਂ ਪਕਾਸੇਨ੍ਤੋ ਪਦੁਮੁਤ੍ਤਰੋ ਨਾਮ ਜਿਨੋਤਿਆਦਿਮਾਹ. ਤਤ੍ਥ ਪੁਰਿਮਪਦਦ੍ਵਯਂ ਵੁਤ੍ਤਤ੍ਥਮੇਵ. ਗਣਮ੍ਹਾ ਵੂਪਕਟ੍ਠੋ ਸੋਤਿ ਸੋ ਪਦੁਮੁਤ੍ਤਰੋ ਨਾਮ ਸਤ੍ਥਾ ਗਣਮ੍ਹਾ ਮਹਤਾ ਭਿਕ੍ਖੁਸਮੂਹਤੋ ਵੂਪਕਟ੍ਠੋ ਵਿਸੁਂ ਭੂਤੋ ਵਿਵੇਕਂ ਉਪਗਤੋ. ਤਦਾ ਮਮ ਤਾਪਸਕਾਲੇ ਹਿਮਵਨ੍ਤੇ ਹਿਮਾਲਯਪਬ੍ਬਤਸਮੀਪੇ ਵਸਿ ਵਾਸਂ ਕਪ੍ਪੇਸਿ, ਚਤੂਹਿ ਇਰਿਯਾਪਥੇਹਿ ਵਿਹਾਸੀਤਿ ਅਤ੍ਥੋ.
੩੬. ਅਹਮ੍ਪਿ…ਪੇ… ਤਦਾਤਿ ਯਦਾ ਸੋ ਭਗਵਾ ਹਿਮਵਨ੍ਤਂ ਉਪਗਨ੍ਤ੍ਵਾ ਵਸਿ, ਤਦਾ ਅਹਮ੍ਪਿ ਹਿਮਵਨ੍ਤਸਮੀਪੇ ਕਤਅਸ੍ਸਮੇ ਆ ਸਮਨ੍ਤਤੋ ਕਾਯਚਿਤ੍ਤਪੀਲ਼ਾਸਙ੍ਖਾਤਾ ਪਰਿਸ੍ਸਯਾ ਸਮਨ੍ਤਿ ਏਤ੍ਥਾਤਿ ਅਸ੍ਸਮੋਤਿ ਲਦ੍ਧਨਾਮੇ ਅਰਞ੍ਞਾਵਾਸੇ ਵਸਾਮੀਤਿ ਸਮ੍ਬਨ੍ਧੋ. ਅਚਿਰਾਗਤਂ ਮਹਾਵੀਰਨ੍ਤਿ ਅਚਿਰਂ ਆਗਤਂ ਮਹਾਵੀਰਿਯਵਨ੍ਤਂ ਲੋਕਨਾਯਕਂ ਪਧਾਨਂ ਤਂ ਭਗਵਨ੍ਤਂ ਉਪੇਸਿਨ੍ਤਿ ਸਮ੍ਬਨ੍ਧੋ, ਆਗਤਕ੍ਖਣੇਯੇਵ ਉਪਾਗਮਿਨ੍ਤਿ ਅਤ੍ਥੋ.
੩੭. ਪੁਪ੍ਫਚ੍ਛਤ੍ਤਂ ਗਹੇਤ੍ਵਾਨਾਤਿ ਏਵਂ ਉਪਗਚ੍ਛਨ੍ਤੋ ਚ ਪਦੁਮੁਪ੍ਪਲਪੁਪ੍ਫਾਦੀਹਿ ਛਾਦਿਤਂ ਪੁਪ੍ਫਮਯਂ ਛਤ੍ਤਂ ਗਹੇਤ੍ਵਾ ਨਰਾਸਭਂ ਨਰਾਨਂ ਸੇਟ੍ਠਂ ਭਗਵਨ੍ਤਂ ਛਾਦੇਨ੍ਤੋ ਉਪਗਚ੍ਛਿਂ ਸਮੀਪਂ ਗਤੋਸ੍ਮੀਤਿ ਅਤ੍ਥੋ. ਸਮਾਧਿਂ ਸਮਾਪਜ੍ਜਨ੍ਤਨ੍ਤਿ ਰੂਪਾਵਚਰਸਮਾਧਿਜ੍ਝਾਨਂ ਸਮਾਪਜ੍ਜਨ੍ਤਂ ਅਪ੍ਪੇਤ੍ਵਾ ਨਿਸਿਨ੍ਨਸ੍ਸ ਅਨ੍ਤਰਾਯਂ ਅਹਂ ਅਕਾਸਿਨ੍ਤਿ ਸਮ੍ਬਨ੍ਧੋ.
੩੮. ਉਭੋ ਹਤ੍ਥੇਹਿ ਪਗ੍ਗਯ੍ਹਾਤਿ ਤਂ ਸੁਸਜ੍ਜਿਤਂ ਪੁਪ੍ਫਚ੍ਛਤ੍ਤਂ ਦ੍ਵੀਹਿ ਹਤ੍ਥੇਹਿ ਉਕ੍ਖਿਪਿਤ੍ਵਾ ਅਹਂ ਭਗਵਤੋ ਅਦਾਸਿਨ੍ਤਿ ਸਮ੍ਬਨ੍ਧੋ. ਪਟਿਗ੍ਗਹੇਸੀਤਿ ਤਂ ਮਯਾ ਦਿਨ੍ਨਂ ਪੁਪ੍ਫਚ੍ਛਤ੍ਤਂ ਪਦੁਮੁਤ੍ਤਰੋ ਭਗਵਾ ਸਮ੍ਪਟਿਚ੍ਛਿ, ਸਾਦਰਂ ਸਾਦਿਯੀਤਿ ਅਤ੍ਥੋ.
੪੧. ਸਤਪਤ੍ਤਛਤ੍ਤਂ ਪਗ੍ਗਯ੍ਹਾਤਿ ਏਕੇਕਸ੍ਮਿਂ ਪਦੁਮਪੁਪ੍ਫੇ ਸਤਸਤਪਤ੍ਤਾਨਂ ਵਸੇਨ ਸਤਪਤ੍ਤੇਹਿ ਪਦੁਮਪੁਪ੍ਫੇਹਿ ਛਾਦਿਤਂ ਪੁਪ੍ਫਚ੍ਛਤ੍ਤਂ ਪਕਾਰੇਨ ਆਦਰੇਨ ਗਹੇਤ੍ਵਾ ਤਾਪਸੋ ਮਮ ਅਦਾਸੀਤਿ ਅਤ੍ਥੋ. ਤਮਹਂ ਕਿਤ੍ਤਯਿਸ੍ਸਾਮੀਤਿ ਤਂ ਤਾਪਸਂ ਅਹਂ ਕਿਤ੍ਤਯਿਸ੍ਸਾਮਿ ਪਾਕਟਂ ਕਰਿਸ੍ਸਾਮੀਤਿ ਅਤ੍ਥੋ. ਮਮ ਭਾਸਤੋ ਭਾਸਮਾਨਸ੍ਸ ਵਚਨਂ ਸੁਣੋਥ ਮਨਸਿ ਕਰੋਥ.
੪੨. ਪਞ੍ਚਵੀਸਤਿਕਪ੍ਪਾਨੀਤਿ ਇਮਿਨਾ ਪੁਪ੍ਫਚ੍ਛਤ੍ਤਦਾਨੇਨ ਪਞ੍ਚਵੀਸਤਿਵਾਰੇ ਤਾਵਤਿਂਸਭਵਨੇ ਸਕ੍ਕੋ ਹੁਤ੍ਵਾ ਦੇਵਰਜ੍ਜਂ ਕਰਿਸ੍ਸਤੀਤਿ ਸਮ੍ਬਨ੍ਧੋ. ਚਤੁਤ੍ਤਿਂਸਤਿਕ੍ਖਤ੍ਤੁਞ੍ਚਾਤਿ ਚਤੁਤ੍ਤਿਂਸਤਿਵਾਰੇ ਮਨੁਸ੍ਸਲੋਕੇ ਚਕ੍ਕਵਤ੍ਤੀ ਰਾਜਾ ਭਵਿਸ੍ਸਤਿ.
੪੩. ਯਂ ਯਂ ਯੋਨਿਨ੍ਤਿ ਮਨੁਸ੍ਸਯੋਨਿਆਦੀਸੁ ਯਂ ਯਂ ਜਾਤਿਂ ਸਂਸਰਤਿ ਗਚ੍ਛਤਿ ਉਪਪਜ੍ਜਤਿ. ਤਤ੍ਥ ਤਤ੍ਥ ਯੋਨਿਯਂ ਅਬ੍ਭੋਕਾਸੇ ਸੁਞ੍ਞਟ੍ਠਾਨੇ ਪਤਿਟ੍ਠਨ੍ਤਂ ਨਿਸਿਨ੍ਨਂ ਠਿਤਂ ਵਾ ਪਦੁਮਂ ਧਾਰਯਿਸ੍ਸਤਿ ਉਪਰਿ ਛਾਦਯਿਸ੍ਸਤੀਤਿ ਅਤ੍ਥੋ.
੪੫. ਪਕਾਸਿਤੇ ਪਾਵਚਨੇਤਿ ਤੇਨ ਭਗਵਤੋ ਸਕਲਪਿਟਕਤ੍ਤਯੇ ਪਕਾਸਿਤੇ ਦੀਪਿਤੇ ਮਨੁਸ੍ਸਤ੍ਤਂ ਮਨੁਸ੍ਸਜਾਤਿਂ ਲਭਿਸ੍ਸਤਿ ਉਪਪਜ੍ਜਿਸ੍ਸਤਿ. ਮਨੋਮਯਮ੍ਹਿ ਕਾਯਮ੍ਹੀਤਿ ਮਨੇਨ ਝਾਨਚਿਤ੍ਤੇਨ ਨਿਬ੍ਬਤ੍ਤੋਤਿ ਮਨੋਮਯੋ, ਯਥਾ ਚਿਤ੍ਤਂ ਪਵਤ੍ਤਤਿ, ਤਥਾ ਕਾਯਂ ਪਵਤ੍ਤੇਤਿ ਚਿਤ੍ਤਗਤਿਕਂ ਕਰੋਤੀਤਿ ਅਤ੍ਥੋ. ਤਮ੍ਹਿ ਮਨੋਮਯੇ ਕਾਯਮ੍ਹਿ ਸੋ ਤਾਪਸੋ ਚੂਲ਼ਪਨ੍ਥਕੋ ਨਾਮ ਹੁਤ੍ਵਾ ਉਤ੍ਤਮੋ ਅਗ੍ਗੋ ਭਵਿਸ੍ਸਤੀਤਿ ਅਤ੍ਥੋ. ਸੇਸਂ ਹੇਟ੍ਠਾ ਵੁਤ੍ਤਤ੍ਤਾ ਉਤ੍ਤਾਨਤ੍ਤਾ ਚ ਸੁਵਿਞ੍ਞੇਯ੍ਯਮੇਵ.
੫੨. ਸਰਿਂ ਕੋਕਨਦਂ ਅਹਨ੍ਤਿ ਅਹਂ ਭਗਵਤੋ ਨਿਮ੍ਮਿਤਚੋਲ਼ਕਂ ਪਰਿਮਜ੍ਜਨ੍ਤੋ ਕੋਕਨਦਂ ਪਦੁਮਂ ਸਰਿਨ੍ਤਿ ਅਤ੍ਥੋ. ਤਤ੍ਥ ਚਿਤ੍ਤਂ ਵਿਮੁਚ੍ਚਿ ਮੇਤਿ ਤਸ੍ਮਿਂ ਕੋਕਨਦੇ ਪਦੁਮੇ ਮਯ੍ਹਂ ਚਿਤ੍ਤਂ ਅਧਿਮੁਚ੍ਚਿ ਅਲ੍ਲੀਨੋ, ਤਤੋ ਅਹਂ ਅਰਹਤ੍ਤਂ ਪਾਪੁਣਿਨ੍ਤਿ ਸਮ੍ਬਨ੍ਧੋ.
੫੩. ਅਹਂ ਮਨੋਮਯੇਸੁ ਚਿਤ੍ਤਗਤਿਕੇਸੁ ਕਾਯੇਸੁ ਸਬ੍ਬਤ੍ਥ ਸਬ੍ਬੇਸੁ ਪਾਰਮਿਂ ਪਰਿਯੋਸਾਨਂ ਗਤੋ ਪਤ੍ਤੋਤਿ ਸਮ੍ਬਨ੍ਧੋ. ਸੇਸਂ ਵੁਤ੍ਤਨਯਮੇਵਾਤਿ.
ਚੂਲ਼ਪਨ੍ਥਕਤ੍ਥੇਰਅਪਦਾਨਵਣ੍ਣਨਾ ਸਮਤ੍ਤਾ.
੫. ਪਿਲਿਨ੍ਦਵਚ੍ਛਤ੍ਥੇਰਅਪਦਾਨਵਣ੍ਣਨਾ
ਨਿਬ੍ਬੁਤੇ ਲੋਕਨਾਥਮ੍ਹੀਤਿਆਦਿਕਂ ਆਯਸ੍ਮਤੋ ਪਿਲਿਨ੍ਦਵਚ੍ਛਤ੍ਥੇਰਸ੍ਸ ਅਪਦਾਨਂ. ਅਯਮ੍ਪਿ ਪੁਰਿਮਬੁਦ੍ਧੇਸੁ ਕਤਾਧਿਕਾਰੋ ਤਤ੍ਥ ਤਤ੍ਥ ਭਵੇ ਵਿਵਟ੍ਟੂਪਨਿਸ੍ਸਯਾਨਿ ਪੁਞ੍ਞਾਨਿ ਉਪਚਿਨਨ੍ਤੋ ਪਦੁਮੁਤ੍ਤਰਸ੍ਸ ਭਗਵਤੋ ਕਾਲੇ ਹਂਸਵਤੀਨਗਰੇ ਮਹਾਭੋਗਕੁਲੇ ਨਿਬ੍ਬਤ੍ਤੋ ਹੇਟ੍ਠਾ ਵੁਤ੍ਤਨਯੇਨ ਸਤ੍ਥੁ ਸਨ੍ਤਿਕੇ ਧਮ੍ਮਂ ਸੁਣਨ੍ਤੋ ਸਤ੍ਥਾਰਂ ਏਕਂ ਭਿਕ੍ਖੁਂ ਦੇਵਤਾਨਂ ਪਿਯਮਨਾਪਭਾਵੇਨ ਅਗ੍ਗਟ੍ਠਾਨੇ ਠਪੇਨ੍ਤਂ ਦਿਸ੍ਵਾ ਤਂ ਠਾਨਨ੍ਤਰਂ ਪਤ੍ਥੇਤ੍ਵਾ ਯਾਵਜੀਵਂ ਕੁਸਲਂ ਕਤ੍ਵਾ ਤਤੋ ਚੁਤੋ ਦੇਵਮਨੁਸ੍ਸੇਸੁ ਸਂਸਰਨ੍ਤੋ ਸੁਮੇਧਸ੍ਸ ਭਗਵਤੋ ਕਾਲੇ ਕੁਲਗੇਹੇ ਨਿਬ੍ਬਤ੍ਤੋ. ਪਰਿਨਿਬ੍ਬੁਤੇ ਭਗਵਤਿ ਤਸ੍ਸ ਥੂਪਂ ਪੂਜੇਤ੍ਵਾ ਸਙ੍ਘਸ੍ਸ ਮਹਾਦਾਨਂ ਪਵਤ੍ਤੇਤ੍ਵਾ ਤਤੋ ਚਵਿਤ੍ਵਾ ਦੇਵਮਨੁਸ੍ਸੇਸੁ ਉਭਯਸਮ੍ਪਤ੍ਤਿਯੋ ਅਨੁਭਵਿਤ੍ਵਾ ਅਨੁਪ੍ਪਨ੍ਨੇ ਬੁਦ੍ਧੇ ਚਕ੍ਕਵਤ੍ਤੀ ਰਾਜਾ ਹੁਤ੍ਵਾ ਮਹਾਜਨਂ ਪਞ੍ਚਸੀਲੇਸੁ ਪਤਿਟ੍ਠਾਪੇਤ੍ਵਾ ਸਗ੍ਗਪਰਾਯਨਂ ਅਕਾਸਿ. ਸੋ ਅਨੁਪ੍ਪਨ੍ਨੇਯੇਵ ਅਮ੍ਹਾਕਂ ਭਗਵਤਿ ਸਾਵਤ੍ਥਿਯਂ ਬ੍ਰਾਹ੍ਮਣਕੁਲੇ ਨਿਬ੍ਬਤ੍ਤਿ, ਪਿਲਿਨ੍ਦੋਤਿਸ੍ਸ ਨਾਮਂ ਅਕਂਸੁ. ਵਚ੍ਛੋਤਿ ਗੋਤ੍ਤਂ. ਸੋ ਅਪਰਭਾਗੇ ਪਿਲਿਨ੍ਦਵਚ੍ਛੋਤਿ ਪਞ੍ਞਾਯਿਤ੍ਥ. ਸਂਸਾਰੇ ਪਨ ਸਂਵੇਗਬਹੁਲਤਾਯ ਪਰਿਬ੍ਬਾਜਕਪਬ੍ਬਜ੍ਜਂ ਪਬ੍ਬਜਿਤ੍ਵਾ ਚੂਲ਼ਗਨ੍ਧਾਰਂ ਨਾਮ ਵਿਜ੍ਜਂ ਸਾਧੇਤ੍ਵਾ ਤਾਯ ਵਿਜ੍ਜਾਯ ਆਕਾਸਚਾਰੀ ਪਰਚਿਤ੍ਤਵਿਦੂ ਚ ਹੁਤ੍ਵਾ ਰਾਜਗਹੇ ਲਾਭਗ੍ਗਯਸਗ੍ਗਪਤ੍ਤੋ ਪਟਿਵਸਤਿ.
ਅਥ ਅਮ੍ਹਾਕਂ ਭਗਵਾ ਅਭਿਸਮ੍ਬੁਦ੍ਧੋ ਹੁਤ੍ਵਾ ਅਨੁਕ੍ਕਮੇਨ ਰਾਜਗਹਂ ਉਪਗਤੋ. ਤਤੋ ਪਟ੍ਠਾਯ ਬੁਦ੍ਧਾਨੁਭਾਵੇਨ ਤਸ੍ਸ ਸਾ ਵਿਜ੍ਜਾ ਨ ਸਮ੍ਪਜ੍ਜਤਿ, ਅਤ੍ਤਨੋ ਕਿਚ੍ਚਂ ਨ ਸਾਧੇਤਿ. ਸੋ ਚਿਨ੍ਤੇਸਿ – ‘‘ਸੁਤਂ ਖੋ ਪਨੇਤਂ ਆਚਰਿਯਪਾਚਰਿਯਾਨਂ ਭਾਸਮਾਨਾਨਂ ‘ਯਤ੍ਥ ਮਹਾਗਨ੍ਧਾਰਵਿਜ੍ਜਾ ਧਰਤਿ, ਤਤ੍ਥ ਚੂਲ਼ਗਨ੍ਧਾਰਵਿਜ੍ਜਾ ਨ ਸਮ੍ਪਜ੍ਜਤੀ’ਤਿ ਸਮਣਸ੍ਸ ਪਨ ਗੋਤਮਸ੍ਸ ਆਗਤਕਾਲਤੋ ਪਟ੍ਠਾਯ ਨਾਯਂ ਮਮ ਵਿਜ੍ਜਾ ਸਮ੍ਪਜ੍ਜਤਿ, ਨਿਸ੍ਸਂਸਯਂ ਸਮਣੋ ਗੋਤਮੋ ਮਹਾਗਨ੍ਧਾਰਵਿਜ੍ਜਂ ਜਾਨਾਤਿ, ਯਂਨੂਨਾਹਂ ਤਂ ਪਯਿਰੁਪਾਸਿਤ੍ਵਾ ਤਸ੍ਸ ਸਨ੍ਤਿਕੇ ਤਂ ਵਿਜ੍ਜਂ ਪਰਿਯਾਪੁਣੇਯ੍ਯ’’ਨ੍ਤਿ. ਸੋ ਭਗਵਨ੍ਤਂ ਉਪਸਙ੍ਕਮਿਤ੍ਵਾ ਏਤਦਵੋਚ – ‘‘ਅਹਂ, ਮਹਾਸਮਣ, ਤਵ ਸਨ੍ਤਿਕੇ ਏਕਂ ਵਿਜ੍ਜਂ ਪਰਿਯਾਪੁਣਿਤੁਕਾਮੋ, ਓਕਾਸਂ ਮੇ ਕਰੋਹੀ’’ਤਿ. ‘‘ਤੇਨ ਹਿ ਮਮ ਸਨ੍ਤਿਕੇ ਪਬ੍ਬਜਾਹੀ’’ਤਿ ਆਹ. ਸੋ ‘‘ਵਿਜ੍ਜਾਯ ਪਰਿਕਮ੍ਮਂ ਪਬ੍ਬਜ੍ਜਾ’’ਤਿ ਮਞ੍ਞਮਾਨੋ ਪਬ੍ਬਜਿ. ਤਸ੍ਸ ਭਗਵਾ ਧਮ੍ਮਂ ਕਥੇਤ੍ਵਾ ਚਰਿਤਾਨੁਕੂਲਂ ਕਮ੍ਮਟ੍ਠਾਨਂ ਅਦਾਸਿ. ਸੋ ਉਪਨਿਸ੍ਸਯਸਮ੍ਪਨ੍ਨਤਾਯ ਨਚਿਰਸ੍ਸੇਵ ਵਿਪਸ੍ਸਨਂ ਪਟ੍ਠਪੇਤ੍ਵਾ ਅਰਹਤ੍ਤਂ ਪਾਪੁਣਿ.
੫੫. ਯਾ ਪਨ ਪੁਰਿਮਜਾਤਿਯਂ ਤਸ੍ਸੋਵਾਦੇ ਠਤ੍ਵਾ ਸਗ੍ਗੇ ਨਿਬ੍ਬਤ੍ਤਾ ਦੇਵਤਾ, ਤਾ ਕਤਞ੍ਞੁਤਂ ਨਿਸ੍ਸਾਯ ਤਸ੍ਮਿਂ ਸਞ੍ਜਾਤਬਹੁਮਾਨਾ ਸਾਯਂ ਪਾਤਂ ਥੇਰਂ ਪਯਿਰੁਪਾਸਿਤ੍ਵਾ ਗਚ੍ਛਨ੍ਤਿ. ਤਸ੍ਮਾ ਨਂ ਭਗਵਾ ਦੇਵਤਾਨਂ ਅਤਿਵਿਯ ਪਿਯਮਨਾਪਭਾਵੇਨ ਅਗ੍ਗਭਾਵੇ ਠਪੇਸਿ ‘‘ਏਤਦਗ੍ਗਂ, ਭਿਕ੍ਖਵੇ, ਮਮ ਸਾਵਕਾਨਂ ਭਿਕ੍ਖੂਨਂ ਦੇਵਤਾਨਂ ਪਿਯਮਨਾਪਾਨਂ ਯਦਿਦਂ ਪਿਲਿਨ੍ਦਵਚ੍ਛੋ’’ਤਿ (ਅ. ਨਿ. ੧.੨੦੯, ੨੧੫). ਏਵਂ ਸੋ ਪਤ੍ਤਅਗ੍ਗਟ੍ਠਾਨੋ ਅਤ੍ਤਨੋ ਪੁਬ੍ਬਕਮ੍ਮਂ ਅਨੁਸ੍ਸਰਿਤ੍ਵਾ ਪੀਤਿਸੋਮਨਸ੍ਸਵਸੇਨ ਪੁਬ੍ਬਚਰਿਤਾਪਦਾਨਂ ਪਕਾਸੇਨ੍ਤੋ ਨਿਬ੍ਬੁਤੇ ਲੋਕਨਾਥਮ੍ਹੀਤਿਆਦਿਮਾਹ.
ਤਤ੍ਥ ਕਾਮਰੂਪਾਰੂਪਲੋਕਸ੍ਸ ਨਾਥੋ ਪਧਾਨੋਤਿ ਲੋਕਨਾਥੋ. ਮੇਧਾ ਵੁਚ੍ਚਨ੍ਤਿ ਸਬ੍ਬਞ੍ਞੁਤਞ੍ਞਾਣਅਨਾਵਰਣਞਾਣਾਦਯੋ, ਸੁਨ੍ਦਰਾ, ਪਸਟ੍ਠਾ ਵਾ ਮੇਧਾ ਯਸ੍ਸ ਸੋ ਸੁਮੇਧੋ, ਅਗ੍ਗੋ ਚ ਸੋ ਪੁਗ੍ਗਲੋ ਚਾਤਿ ਅਗ੍ਗਪੁਗ੍ਗਲੋ, ਤਸ੍ਮਿਂ ਸੁਮੇਧੇ ਲੋਕਨਾਯਕੇ ਅਗ੍ਗਪੁਗ੍ਗਲੇ ਖਨ੍ਧਪਰਿਨਿਬ੍ਬਾਨੇਨ ਨਿਬ੍ਬੁਤੇ ਸਤੀਤਿ ਸਮ੍ਬਨ੍ਧੋ. ਪਸਨ੍ਨਚਿਤ੍ਤੋ ਸੁਮਨੋਤਿ ਸਦ੍ਧਾਯ ਪਸਾਦਿਤਚਿਤ੍ਤੋ ਸੋਮਨਸ੍ਸੇਨ ਸੁਨ੍ਦਰਮਨੋ ਅਹਂ ਤਸ੍ਸ ਸੁਮੇਧਸ੍ਸ ਭਗਵਤੋ ਥੂਪਪੂਜਂ ਚੇਤਿਯਪੂਜਂ ਅਕਾਸਿਨ੍ਤਿ ਅਤ੍ਥੋ.
੫੬. ਯੇ ਚ ਖੀਣਾਸਵਾ ਤਤ੍ਥਾਤਿ ਤਸ੍ਮਿਂ ਸਮਾਗਮੇ ਯੇ ਚ ਖੀਣਾਸਵਾ ਪਹੀਨਕਿਲੇਸਾ ਛਲ਼ਭਿਞ੍ਞਾ ਛਹਿ ਅਭਿਞ੍ਞਾਹਿ ਸਮਨ੍ਨਾਗਤਾ ਮਹਿਦ੍ਧਿਕਾ ਮਹਨ੍ਤੇਹਿ ਇਦ੍ਧੀਹਿ ਸਮਨ੍ਨਾਗਤਾ ਸਨ੍ਤਿ, ਤੇ ਸਬ੍ਬੇ ਖੀਣਾਸਵੇ ਅਹਂ ਤਤ੍ਥ ਸਮਾਨੇਤ੍ਵਾ ਸੁਟ੍ਠੁ ਆਦਰੇਨ ਆਨੇਤ੍ਵਾ ਸਙ੍ਘਭਤ੍ਤਂ ਸਕਲਸਙ੍ਘਸ੍ਸ ਦਾਤਬ੍ਬਭਤ੍ਤਂ ਅਕਾਸਿਂ ਤੇਸਂ ਭੋਜੇਸਿਨ੍ਤਿ ਅਤ੍ਥੋ.
੫੭. ਉਪਟ੍ਠਾਕੋ ਤਦਾ ਅਹੂਤਿ ਤਦਾ ਮਮ ਸਙ੍ਘਭਤ੍ਤਦਾਨਕਾਲੇ ਸੁਮੇਧਸ੍ਸ ਭਗਵਤੋ ਨਾਮੇਨ ਸੁਮੇਧੋ ਨਾਮ ਉਪਟ੍ਠਾਕਸਾਵਕੋ ਅਹੁ ਅਹੋਸੀਤਿ ਅਤ੍ਥੋ. ਸੋ ਸਾਵਕੋ ਮਯ੍ਹਂ ਪੂਜਾਸਕ੍ਕਾਰਂ ਅਨੁਮੋਦਿਤ੍ਥ ਅਨੁਮੋਦਿਤੋ ਆਨਿਸਂਸਂ ਕਥੇਸੀਤਿ ਅਤ੍ਥੋ.
੫੮. ਤੇਨ ਚਿਤ੍ਤਪ੍ਪਸਾਦੇਨਾਤਿ ਤੇਨ ਥੂਪਪੂਜਾਕਰਣਵਸੇਨ ਉਪ੍ਪਨ੍ਨੇਨ ਚਿਤ੍ਤਪ੍ਪਸਾਦੇਨ ਦੇਵਲੋਕੇ ਦਿਬ੍ਬਵਿਮਾਨਂ ਉਪਪਜ੍ਜਿਂ ਉਪਗਤੋ ਅਸ੍ਮੀਤਿ ਅਤ੍ਥੋ, ਤਤ੍ਥ ਨਿਬ੍ਬਤ੍ਤੋਮ੍ਹੀਤਿ ਵੁਤ੍ਤਂ ਹੋਤਿ. ਛਲ਼ਾਸੀਤਿਸਹਸ੍ਸਾਨੀਤਿ ਤਸ੍ਮਿਂ ਵਿਮਾਨੇ ਛ ਅਸੀਤਿਸਹਸ੍ਸਾਨਿ ਦੇਵਚ੍ਛਰਾਯੋ ਮੇ ਮਯ੍ਹਂ ਚਿਤ੍ਤਂ ਰਮਿਂਸੁ ਰਮਾਪੇਸੁਨ੍ਤਿ ਸਮ੍ਬਨ੍ਧੋ.
੫੯. ਮਮੇਵ ਅਨੁਵਤ੍ਤਨ੍ਤੀਤਿ ਤਾ ਅਚ੍ਛਰਾਯੋ ਸਬ੍ਬਕਾਮੇਹਿ ਦਿਬ੍ਬੇਹਿ ਰੂਪਾਦਿਵਤ੍ਥੁਕਾਮੇਹਿ ਉਪਟ੍ਠਹਨ੍ਤਿਯੋ ਮਮਂ ਏਵ ਅਨੁਵਤ੍ਤਨ੍ਤਿ ਮਮ ਵਚਨਂ ਅਨੁਕਰੋਨ੍ਤਿ ਸਦਾ ਨਿਚ੍ਚਕਾਲਨ੍ਤਿ ਅਤ੍ਥੋ. ਸੇਸਂ ਸੁਵਿਞ੍ਞੇਯ੍ਯਮੇਵਾਤਿ.
ਪਿਲਿਨ੍ਦਵਚ੍ਛਤ੍ਥੇਰਅਪਦਾਨਵਣ੍ਣਨਾ ਸਮਤ੍ਤਾ.
੬. ਰਾਹੁਲਤ੍ਥੇਰਅਪਦਾਨਵਣ੍ਣਨਾ
ਪਦੁਮੁਤ੍ਤਰਸ੍ਸ ਭਗਵਤੋਤਿਆਦਿਕਂ ਆਯਸ੍ਮਤੋ ਰਾਹੁਲਤ੍ਥੇਰਸ੍ਸ ਅਪਦਾਨਂ. ਅਯਮ੍ਪਿ ਆਯਸ੍ਮਾ ਪੁਰਿਮਜਿਨਵਰੇਸੁ ਕਤਾਧਿਕਾਰੋ ਤਤ੍ਥ ਤਤ੍ਥ ਭਵੇ ਵਿਵਟ੍ਟੂਪਨਿਸ੍ਸਯਾਨਿ ਪੁਞ੍ਞਾਨਿ ਉਪਚਿਨਨ੍ਤੋ ਪਦੁਮੁਤ੍ਤਰਸ੍ਸ ਭਗਵਤੋ ਕਾਲੇ ਕੁਲਗੇਹੇ ਨਿਬ੍ਬਤ੍ਤੋ ਵਿਞ੍ਞੁਤਂ ਪਤ੍ਵਾ ਸਤ੍ਥੁ ਧਮ੍ਮਦੇਸਨਂ ਸੁਣਨ੍ਤੋ ਸਤ੍ਥਾਰਂ ਏਕਂ ਭਿਕ੍ਖੁਂ ਸਿਕ੍ਖਾਕਾਮਾਨਂ ਅਗ੍ਗਟ੍ਠਾਨੇ ਠਪੇਨ੍ਤਂ ਦਿਸ੍ਵਾ ਸਯਮ੍ਪਿ ਤਂ ਠਾਨਨ੍ਤਰਂ ਪਤ੍ਥੇਨ੍ਤੋ ਸੇਨਾਸਨਵਿਸੋਧਨਵਿਜ੍ਜੋਤਨਾਦਿਕਂ ਉਲ਼ਾਰਂ ਪੁਞ੍ਞਂ ਕਤ੍ਵਾ ਪਣਿਧਾਨਂ ਅਕਾਸਿ. ਸੋ ਤਤੋ ਚਵਿਤ੍ਵਾ ਦੇਵਮਨੁਸ੍ਸੇਸੁ ਸਂਸਰਨ੍ਤੋ ਉਭਯਸਮ੍ਪਤ੍ਤਿਯੋ ਅਨੁਭਵਿਤ੍ਵਾ ਇਮਸ੍ਮਿਂ ਬੁਦ੍ਧੁਪ੍ਪਾਦੇ ਅਮ੍ਹਾਕਂ ਬੋਧਿਸਤ੍ਤਂ ਪਟਿਚ੍ਚ ਯਸੋਧਰਾਯ ਦੇਵਿਯਾ ਕੁਚ੍ਛਿਮ੍ਹਿ ਨਿਬ੍ਬਤ੍ਤਿਤ੍ਵਾ ਰਾਹੁਲੋਤਿ ਲਦ੍ਧਨਾਮੋ ਮਹਤਾ ਖਤ੍ਤਿਯਪਰਿਵਾਰੇਨ ਵਡ੍ਢਿ. ਤਸ੍ਸ ਪਬ੍ਬਜ੍ਜਾਵਿਧਾਨਂ ਖਨ੍ਧਕੇ (ਮਹਾਵ. ੧੦੫) ਆਗਤਮੇਵ. ਸੋ ਪਬ੍ਬਜਿਤ੍ਵਾ ਸਤ੍ਥੁ ਸਨ੍ਤਿਕੇ ਅਨੇਕੇਹਿ ਸੁਤ੍ਤਪਦੇਹਿ ਸੁਲਦ੍ਧੋਵਾਦੋ ਪਰਿਪਕ੍ਕਞਾਣੋ ਵਿਪਸ੍ਸਨਂ ਉਸ੍ਸੁਕ੍ਕਾਪੇਤ੍ਵਾ ਅਰਹਤ੍ਤਂ ਪਾਪੁਣਿ. ਅਰਹਾ ਪਨ ਹੁਤ੍ਵਾ ਅਤ੍ਤਨੋ ਪਟਿਪਤ੍ਤਿਂ ਪਚ੍ਚਵੇਕ੍ਖਿਤ੍ਵਾ ਅਞ੍ਞਂ ਬ੍ਯਾਕਰੋਨ੍ਤੋ –
‘‘ਉਭਯੇਨੇਵ ਸਮ੍ਪਨ੍ਨੋ, ਰਾਹੁਲਭਦ੍ਦੋਤਿ ਮਂ ਵਿਦੂ;
ਯਞ੍ਚਮ੍ਹਿ ਪੁਤ੍ਤੋ ਬੁਦ੍ਧਸ੍ਸ, ਯਞ੍ਚ ਧਮ੍ਮੇਸੁ ਚਕ੍ਖੁਮਾ.
‘‘ਯਞ੍ਚ ਮੇ ਆਸਵਾ ਖੀਣਾ, ਯਞ੍ਚ ਨਤ੍ਥਿ ਪੁਨਬ੍ਭਵੋ;
ਅਰਹਾ ਦਕ੍ਖਿਣੇਯ੍ਯੋਮ੍ਹਿ, ਤੇਵਿਜ੍ਜੋ ਅਮਤਦ੍ਦਸੋ.
‘‘ਕਾਮਨ੍ਧਾ ਜਾਲਪਚ੍ਛਨ੍ਨਾ, ਤਣ੍ਹਾਛਦਨਛਾਦਿਤਾ;
ਪਮਤ੍ਤਬਨ੍ਧੁਨਾ ਬਨ੍ਧਾ, ਮਚ੍ਛਾਵ ਕੁਮਿਨਾ ਮੁਖੇ.
‘‘ਤਂ ਕਾਮਂ ਅਹਮੁਜ੍ਝਿਤ੍ਵਾ, ਛੇਤ੍ਵਾ ਮਾਰਸ੍ਸ ਬਨ੍ਧਨਂ;
ਸਮੂਲਂ ਤਣ੍ਹਮਬ੍ਬੁਯ੍ਹ, ਸੀਤਿਭੂਤੋਸ੍ਮਿ ਨਿਬ੍ਬੁਤੋ’’ਤਿ. (ਥੇਰਗਾ. ੨੯੫-੨੯੮);
ਚਤਸ੍ਸੋ ਗਾਥਾ ਅਭਾਸਿ. ਤਤ੍ਥ ਉਭਯੇਨੇਵ ਸਮ੍ਪਨ੍ਨੋਤਿ ਜਾਤਿਸਮ੍ਪਦਾ ਪਟਿਪਤ੍ਤਿਸਮ੍ਪਦਾਤਿ ਉਭਯਸਮ੍ਪਤ੍ਤਿਯਾਪਿ ਸਮ੍ਪਨ੍ਨੋ ਸਮਨ੍ਨਾਗਤੋ. ਰਾਹੁਲਭਦ੍ਦੋਤਿ ਮਂ ਵਿਦੂਤਿ ‘‘ਰਾਹੁਲਭਦ੍ਦੋ’’ਤਿ ਮਂ ਸਬ੍ਰਹ੍ਮਚਾਰਿਨੋ ਸਞ੍ਜਾਨਨ੍ਤਿ. ਤਸ੍ਸ ਹਿ ਜਾਤਸਾਸਨਂ ਸੁਤ੍ਵਾ ਬੋਧਿਸਤ੍ਤੇਨ, ‘‘ਰਾਹੁ, ਜਾਤੋ, ਬਨ੍ਧਨਂ ਜਾਤ’’ਨ੍ਤਿ ਵੁਤ੍ਤਵਚਨਂ ਉਪਾਦਾਯ ਸੁਦ੍ਧੋਦਨਮਹਾਰਾਜਾ ‘‘ਰਾਹੁਲੋ’’ਤਿ ਨਾਮਂ ਗਣ੍ਹਿ. ਤਤ੍ਥ ਆਦਿਤੋ ਪਿਤਰਾ ਵੁਤ੍ਤਪਰਿਯਾਯਮੇਵ ਗਹੇਤ੍ਵਾ ਆਹ – ‘‘ਰਾਹੁਲਭਦ੍ਦੋਤਿ ਮਂ ਵਿਦੂ’’ਤਿ. ਭਦ੍ਦੋਤਿ ਪਸਂਸਾਵਚਨਮੇਵ. ਅਪਰਭਾਗੇ ਸਤ੍ਥਾ ਤਂ ਸਿਕ੍ਖਾਕਾਮਭਾਵੇਨ ਅਗ੍ਗਟ੍ਠਾਨੇ ਠਪੇਸਿ ‘‘ਏਤਦਗ੍ਗਂ, ਭਿਕ੍ਖਵੇ, ਮਮ ਸਾਵਕਾਨਂ ਭਿਕ੍ਖੂਨਂ ਸਿਕ੍ਖਾਕਾਮਾਨਂ ਯਦਿਦਂ ਰਾਹੁਲੋ’’ਤਿ (ਅ. ਨਿ. ੧.੨੦੯).
੬੮. ਏਵਂ ਸੋ ਪਤ੍ਤਏਤਦਗ੍ਗਟ੍ਠਾਨੋ ਅਤ੍ਤਨੋ ਪੁਬ੍ਬਕਮ੍ਮਂ ਸਰਿਤ੍ਵਾ ਸੋਮਨਸ੍ਸਜਾਤੋ ਪੁਬ੍ਬਚਰਿਤਾਪਦਾਨਂ ਪਕਾਸੇਨ੍ਤੋ ਪਦੁਮੁਤ੍ਤਰਸ੍ਸ ਭਗਵਤੋਤਿਆਦਿਮਾਹ. ਸਤ੍ਤਭੂਮਿਮ੍ਹਿ ਪਾਸਾਦੇਤਿ ਪਸਾਦਂ ਸੋਮਨਸ੍ਸਂ ਜਨੇਤੀਤਿ ਪਾਸਾਦੋ. ਉਪਰੂਪਰਿ ਠਿਤਾ ਸਤ੍ਤ ਭੂਮਿਯੋ ਯਸ੍ਮਿਂ ਪਾਸਾਦੇ ਸੋਯਂ ਸਤ੍ਤਭੂਮਿ, ਤਸ੍ਮਿਂ ਸਤ੍ਤਭੂਮਿਮ੍ਹਿ ਪਾਸਾਦੇ. ਆਦਾਸਂ ਸਨ੍ਥਰਿਂ ਅਹਨ੍ਤਿ ਆਦਾਸਤਲਂ ਨਿਪ੍ਫਾਦੇਤ੍ਵਾ ਲੋਕਜੇਟ੍ਠਸ੍ਸ ਭਗਵਤੋ ਤਾਦਿਨੋ ਅਹਂ ਸਨ੍ਥਰਂ ਅਦਾਸਿਂ, ਸਨ੍ਥਰਿਤ੍ਵਾ ਪੂਜੇਸਿਨ੍ਤਿ ਅਤ੍ਥੋ.
੬੯. ਖੀਣਾਸਵਸਹਸ੍ਸੇਹੀਤਿ ਅਰਹਨ੍ਤਸਹਸ੍ਸੇਹਿ ਪਰਿਕਿਣ੍ਣੋ ਪਰਿਵੁਤੋ. ਦ੍ਵਿਪਦਿਨ੍ਦੋ ਦ੍ਵਿਪਦਾਨਂ ਇਨ੍ਦੋ ਸਾਮਿ ਨਰਾਸਭੋ ਮਹਾਮੁਨਿ ਗਨ੍ਧਕੁਟਿਂ ਤੇਹਿ ਸਹ ਉਪਾਗਮਿ ਪਾਵਿਸੀਤਿ ਅਤ੍ਥੋ.
੭੦. ਵਿਰੋਚੇਨ੍ਤੋ ਗਨ੍ਧਕੁਟਿਨ੍ਤਿ ਤਂ ਗਨ੍ਧਕੁਟਿਂ ਸੋਭਯਮਾਨੋ ਦੇਵਾਨਂ ਦੇਵੋ ਦੇਵਦੇਵੋ ਨਰਾਨਂ ਆਸਭੋ ਨਰਾਸਭੋ ਜੇਟ੍ਠੋ ਸਤ੍ਥਾ ਭਿਕ੍ਖੁਸਙ੍ਘਮਜ੍ਝੇ ਨਿਸੀਦਿਤ੍ਵਾ ਇਮਾ ਬ੍ਯਾਕਰਣਗਾਥਾਯੋ ਅਭਾਸਥ ਕਥੇਸੀਤਿ ਸਮ੍ਬਨ੍ਧੋ.
੭੧. ਯੇਨਾਯਂ ਜੋਤਿਤਾ ਸੇਯ੍ਯਾਤਿ ਯੇਨ ਉਪਾਸਕੇਨ ਅਯਂ ਪਾਸਾਦਸਙ੍ਖਾਤਾ ਸੇਯ੍ਯਾ ਜੋਤਿਤਾ ਪਭਾਸਿਤਾ ਪਜ੍ਜਲਿਤਾ. ਆਦਾਸੋਵ ਕਂਸਲੋਹਮਯਂ ਆਦਾਸਤਲਂ ਇਵ ਸੁਟ੍ਠੁ ਸਮਂ ਕਤ੍ਵਾ ਸਨ੍ਥਤਾ. ਤਂ ਉਪਾਸਕਂ ਕਿਤ੍ਤਯਿਸ੍ਸਾਮਿ ਪਾਕਟਂ ਕਰਿਸ੍ਸਾਮੀਤਿ ਅਤ੍ਥੋ. ਸੇਸਂ ਸੁਵਿਞ੍ਞੇਯ੍ਯਮੇਵ.
੮੧. ਅਟ੍ਠਾਨਮੇਤਂ ਯਂ ਤਾਦੀਤਿ ਯਂ ਯੇਨ ਕਾਰਣੇਨ ਤਾਦੀ ਇਟ੍ਠਾਨਿਟ੍ਠੇਸੁ ਅਕਮ੍ਪਿਯਸਭਾਵਤ੍ਤਾ ਤਾਦੀ ਅਗਾਰੇ ਘਰਾਵਾਸੇ ਰਤਿਂ ਅਲ੍ਲੀਨਭਾਵਂ ਅਜ੍ਝਗਾ ਪਾਪੁਣਿ, ਏਤਂ ਕਾਰਣਂ ਅਟ੍ਠਾਨਂ ਅਕਾਰਣਨ੍ਤਿ ਅਤ੍ਥੋ.
੮੨. ਨਿਕ੍ਖਮਿਤ੍ਵਾ ਅਗਾਰਸ੍ਮਾਤਿ ਘਰਾਵਾਸਤੋ ਨਿਕ੍ਖਮਿਤ੍ਵਾ ਤਂ ਤਿਣਦਲਮਿਵ ਪਰਿਚ੍ਚਜਿਤ੍ਵਾ ਸੁਬ੍ਬਤੋ ਸੁਸਿਕ੍ਖਿਤੋ ਪਬ੍ਬਜਿਸ੍ਸਤਿ. ਰਾਹੁਲੋ ਨਾਮ ਨਾਮੇਨਾਤਿ ਸੁਦ੍ਧੋਦਨਮਹਾਰਾਜੇਨ ਪੇਸਿਤਂ ਕੁਮਾਰਸ੍ਸ ਜਾਤਸਾਸਨਂ ਸੁਤ੍ਵਾ ਪਿਤਰਾ ਸਿਦ੍ਧਤ੍ਥੇਨ, ‘‘ਰਾਹੁ ਜਾਤੋ, ਬਨ੍ਧਨਂ ਜਾਤ’’ਨ੍ਤਿ ਵੁਤ੍ਤਨਾਮਤ੍ਤਾ ਰਾਹੁਲੋ ਨਾਮਾਤਿ ਅਤ੍ਥੋ. ‘‘ਯਥਾ ਚਨ੍ਦਸੂਰਿਯਾਨਂ ਵਿਮਾਨਪਭਾਯ ਕਿਲਿਟ੍ਠਕਰਣੇਨ ਰਾਹੁ ਅਸੁਰਿਨ੍ਦੋ ਉਪੇਤਿ ਗਚ੍ਛਤਿ, ਏਵਮੇਵਾਯਂ ਮਮ ਅਭਿਨਿਕ੍ਖਮਨਪਬ੍ਬਜ੍ਜਾਦੀਨਂ ਅਨ੍ਤਰਾਯਂ ਕਰੋਨ੍ਤੋਰਿਵ ਜਾਤੋ’’ਤਿ ਅਧਿਪ੍ਪਾਯੇਨ, ‘‘ਰਾਹੁ ਜਾਤੋਤਿ ਆਹਾ’’ਤਿ ਦਟ੍ਠਬ੍ਬਂ. ਅਰਹਾ ਸੋ ਭਵਿਸ੍ਸਤੀਤਿ ਸੋ ਤਾਦਿਸੋ ਉਪਨਿਸ੍ਸਯਸਮ੍ਪਨ੍ਨੋ ਵਿਪਸ੍ਸਨਾਯਂ ਯੁਤ੍ਤਪ੍ਪਯੁਤ੍ਤੋ ਅਰਹਾ ਖੀਣਾਸਵੋ ਭਵਿਸ੍ਸਤੀਤਿ ਅਤ੍ਥੋ.
੮੩. ਕਿਕੀਵ ਅਣ੍ਡਂ ਰਕ੍ਖੇਯ੍ਯਾਤਿ ਅਣ੍ਡਂ ਬੀਜਂ ਰਕ੍ਖਮਾਨਾ ਕਿਕੀ ਸਕੁਣੀ ਇਵ ਅਪ੍ਪਮਤ੍ਤੋ ਸੀਲਂ ਰਕ੍ਖੇਯ੍ਯ, ਚਾਮਰੀ ਵਿਯ ਵਾਲਧਿਨ੍ਤਿ ਵਾਲਂ ਰਕ੍ਖਮਾਨਾ ਕਣ੍ਡਕੇਸੁ ਵਾਲੇ ਲਗ੍ਗਨ੍ਤੇ ਭਿਨ੍ਦਨਭਯੇਨ ਅਨਾਕਡ੍ਢਿਤ੍ਵਾ ਮਰਮਾਨਾ ਚਾਮਰੀ ਵਿਯ ਜੀਵਿਤਮ੍ਪਿ ਪਰਿਚ੍ਚਜਿਤ੍ਵਾ ਸੀਲਂ ਅਭਿਨ੍ਦਿਤ੍ਵਾ ਰਕ੍ਖੇਯ੍ਯ. ਨਿਪਕੋ ਸੀਲਸਮ੍ਪਨ੍ਨੋਤਿ ਨੇਪਕ੍ਕਂ ਵੁਚ੍ਚਤਿ ਪਞ੍ਞਾ, ਤੇਨ ਨੇਪਕ੍ਕੇਨ ਸਮਨ੍ਨਾਗਤੋ ਨਿਪਕੋ ਖਣ੍ਡਛਿਦ੍ਦਾਦਿਭਾਵਂ ਅਪਾਪੇਤ੍ਵਾ ਰਕ੍ਖਣਤੋ ਸੀਲਸਮ੍ਪਨ੍ਨੋ ਭਵਿਸ੍ਸਤੀਤਿ ਏਵਂ ਸੋ ਭਗਵਾ ਬ੍ਯਾਕਰਣਮਕਾਸਿ. ਸੋ ਏਵਂ ਪਤ੍ਤਅਰਹਤ੍ਤਫਲੋ ਏਕਦਿਵਸਂ ਵਿਵੇਕਟ੍ਠਾਨੇ ਨਿਸਿਨ੍ਨੋ ਸੋਮਨਸ੍ਸਵਸੇਨ ਏਵਂ ਰਕ੍ਖਿਂ ਮਹਾਮੁਨੀਤਿਆਦਿਮਾਹ. ਤਂ ਸੁਵਿਞ੍ਞੇਯ੍ਯਮੇਵਾਤਿ.
ਰਾਹੁਲਤ੍ਥੇਰਅਪਦਾਨਵਣ੍ਣਨਾ ਸਮਤ੍ਤਾ.
੭. ਉਪਸੇਨਵਙ੍ਗਨ੍ਤਪੁਤ੍ਤਤ੍ਥੇਰਅਪਦਾਨਵਣ੍ਣਨਾ
ਪਦੁਮੁਤ੍ਤਰਂ ਭਗਵਨ੍ਤਨ੍ਤਿਆਦਿਕਂ ਆਯਸ੍ਮਤੋ ਉਪਸੇਨਵਙ੍ਗਨ੍ਤਪੁਤ੍ਤਤ੍ਥੇਰਸ੍ਸ ਅਪਦਾਨਂ. ਅਯਮ੍ਪਿ ਪੁਰਿਮਬੁਦ੍ਧੇਸੁ ਕਤਾਧਿਕਾਰੋ ਤਤ੍ਥ ਤਤ੍ਥ ਭਵੇ ਵਿਵਟ੍ਟੂਪਨਿਸ੍ਸਯਾਨਿ ਪੁਞ੍ਞਾਨਿ ਉਪਚਿਨਨ੍ਤੋ ਪਦੁਮੁਤ੍ਤਰਸ੍ਸ ਭਗਵਤੋ ਕਾਲੇ ਹਂਸਵਤੀਨਗਰੇ ਕੁਲਗੇਹੇ ਨਿਬ੍ਬਤ੍ਤਿਤ੍ਵਾ ਵਯਪ੍ਪਤ੍ਤੋ ਸਤ੍ਥੁ ਸਨ੍ਤਿਕਂ ਗਨ੍ਤ੍ਵਾ ਧਮ੍ਮਂ ਸੁਣਨ੍ਤੋ ਸਤ੍ਥਾਰਂ ਏਕਂ ਭਿਕ੍ਖੁਂ ਸਮਨ੍ਤਪਾਸਾਦਿਕਾਨਂ ਅਗ੍ਗਟ੍ਠਾਨੇ ਠਪੇਨ੍ਤਂ ਦਿਸ੍ਵਾ ਸਤ੍ਥੁ ਅਧਿਕਾਰਕਮ੍ਮਂ ਕਤ੍ਵਾ ਤਂ ਠਾਨਨ੍ਤਰਂ ਪਤ੍ਥੇਤ੍ਵਾ ਯਾਵਜੀਵਂ ਕੁਸਲਂ ਕਤ੍ਵਾ ਦੇਵਮਨੁਸ੍ਸੇਸੁ ਸਂਸਰਨ੍ਤੋ ਇਮਸ੍ਮਿਂ ਬੁਦ੍ਧੁਪ੍ਪਾਦੇ ਨਾਲਕਗਾਮੇ ਰੂਪਸਾਰੀ ਬ੍ਰਾਹ੍ਮਣਿਯਾ ਕੁਚ੍ਛਿਮ੍ਹਿ ਨਿਬ੍ਬਤ੍ਤਿ, ਉਪਸੇਨੋਤਿਸ੍ਸ ਨਾਮਂ ਅਹੋਸਿ. ਸੋ ਵਯਪ੍ਪਤ੍ਤੋ ਤਯੋ ਵੇਦੇ ਉਗ੍ਗਣ੍ਹਿਤ੍ਵਾ ਸਤ੍ਥੁ ਸਨ੍ਤਿਕੇ ਧਮ੍ਮਂ ਸੁਤ੍ਵਾ ਪਟਿਲਦ੍ਧਸਦ੍ਧੋ ਪਬ੍ਬਜਿਤ੍ਵਾ ਉਪਸਮ੍ਪਦਾਯ ਏਕਵਸ੍ਸਿਕੋ ‘‘ਅਰਿਯਗਬ੍ਭਂ ਵਡ੍ਢੇਮੀ’’ਤਿ ਏਕਂ ਕੁਲਪੁਤ੍ਤਂ ਅਤ੍ਤਨੋ ਸਨ੍ਤਿਕੇ ਉਪਸਮ੍ਪਾਦੇਤ੍ਵਾ ਤੇਨ ਸਦ੍ਧਿਂ ਸਤ੍ਥੁ ਸਨ੍ਤਿਕਂ ਗਤੋ. ਸਤ੍ਥਾਰਾ ਚਸ੍ਸ ਤਸ੍ਸ ਅਵਸ੍ਸਿਕਸ੍ਸ ਭਿਕ੍ਖੁਨੋ ਸਦ੍ਧਿਵਿਹਾਰਿਕਭਾਵਂ ਸੁਤ੍ਵਾ ‘‘ਅਤਿਲਹੁਂ ਖੋ ਤ੍ਵਂ, ਮੋਘਪੁਰਿਸ, ਬਾਹੁਲ੍ਲਾਯ ਆਵਤ੍ਤੋ’’ਤਿ (ਮਹਾਵ. ੭੫) ਗਰਹਿਤੋ ‘‘ਇਦਾਨਾਹਂ ਯਦਿ ਪਰਿਸਂ ਨਿਸ੍ਸਾਯ ਸਤ੍ਥਾਰਾ ਗਰਹਿਤੋ, ਪਰਿਸਂਯੇਵ ਪਨ ਨਿਸ੍ਸਾਯ ਸਤ੍ਥੁ ਪਸਾਦਂ ਕਰਿਸ੍ਸਾਮੀ’’ਤਿ ਵਿਪਸ੍ਸਨਾਯ ਕਮ੍ਮਂ ਕਰੋਨ੍ਤੋ ਨਚਿਰਸ੍ਸੇਵ ਅਰਹਤ੍ਤਂ ਪਾਪੁਣਿ. ਅਰਹਾ ਪਨ ਹੁਤ੍ਵਾ ਸਯਮ੍ਪਿ ਸਬ੍ਬੇ ਧੁਤਙ੍ਗਧਮ੍ਮੇ ਸਮਾਦਾਯ ਵਤ੍ਤਤਿ, ਅਞ੍ਞੇਪਿ ਤਦਤ੍ਥਾਯ ਸਮਾਦਪੇਸਿ, ਤੇਨ ਨਂ ਭਗਵਾ ਸਮਨ੍ਤਪਾਸਾਦਿਕਾਨਂ ਅਗ੍ਗਟ੍ਠਾਨੇ ਠਪੇਸਿ. ਸੋ ਅਪਰੇਨ ਸਮਯੇਨ ਕੋਸਮ੍ਬਿਯਂ ਕਲਹੇ ਉਪ੍ਪਨ੍ਨੇ ਭਿਕ੍ਖੁਸਙ੍ਘੇ ਚ ਦ੍ਵਿਧਾਭੂਤੇ ਏਕੇਨ ਭਿਕ੍ਖੁਨਾ ਤਂ ਕਲਹਂ ਪਰਿਵਜ੍ਜਿਤੁਕਾਮੇਨ ‘‘ਏਤਰਹਿ ਖੋ ਕਲਹੋ ਉਪ੍ਪਨ੍ਨੋ, ਭਿਕ੍ਖੁਸਙ੍ਘੋ ਚ ਦ੍ਵਿਧਾਭੂਤੋ, ਕਥਂ ਨੁ ਖੋ ਮਯਾ ਪਟਿਪਜ੍ਜਿਤਬ੍ਬ’’ਨ੍ਤਿ ਪੁਟ੍ਠੋ ਵਿਵੇਕਵਾਸਤੋ ਪਟ੍ਠਾਯ ਤਸ੍ਸ ਪਟਿਪਤ੍ਤਿਂ ਕਥੇਸਿ. ਏਵਂ ਥੇਰੋ ਤਸ੍ਸ ਭਿਕ੍ਖੁਨੋ ਓਵਾਦਦਾਨਾਪਦੇਸੇਨ ਅਤ੍ਤਨੋ ਤਥਾ ਪਟਿਪਨ੍ਨਭਾਵਂ ਦੀਪੇਨ੍ਤੋ ਅਞ੍ਞਂ ਬ੍ਯਾਕਾਸਿ.
੮੬. ਸੋ ਏਵਂ ਪਤ੍ਤਏਤਦਗ੍ਗਟ੍ਠਾਨੋ ਅਤ੍ਤਨੋ ਪੁਬ੍ਬਕਮ੍ਮਂ ਸਰਿਤ੍ਵਾ ਸੋਮਨਸ੍ਸਵਸੇਨ ਪੁਬ੍ਬਚਰਿਤਾਪਦਾਨਂ ਪਕਾਸੇਨ੍ਤੋ ਪਦੁਮੁਤ੍ਤਰਂ ਭਗਵਨ੍ਤਨ੍ਤਿਆਦਿਮਾਹ. ਪਬ੍ਭਾਰਮ੍ਹਿ ਨਿਸੀਦਨ੍ਤਨ੍ਤਿ ਪੁਰਤੋ ਭਾਰਂ ਨਮਿਤਂ ਓਨਮਿਤਨ੍ਤਿ ਪਬ੍ਭਾਰਂ ਵਿਵੇਕਕਾਮਂ ਵਨਮਜ੍ਝੇ ਸਯਂਜਾਤਪਬ੍ਬਤਪਬ੍ਭਾਰੇ ਨਿਸਿਨ੍ਨਂ ਨਰੁਤ੍ਤਮਂ ਭਗਵਨ੍ਤਂ ਅਹਂ ਉਪਗਚ੍ਛਿਂ ਸਮੀਪਂ ਗਤੋਤਿ ਅਤ੍ਥੋ.
੮੭. ਕਣਿਕਾਰਪੁਪ੍ਫ ਦਿਸ੍ਵਾਤਿ ਤਥਾ ਉਪਗਚ੍ਛਨ੍ਤੋ ਤਸ੍ਮਿਂ ਪਦੇਸੇ ਸੁਪੁਪ੍ਫਿਤਂ ਕਣਿਕਾਰਂ ਦਿਸ੍ਵਾ. ਵਣ੍ਟੇ ਛੇਤ੍ਵਾਨਹਂ ਤਦਾਤਿ ਤਸ੍ਮਿਂ ਤਥਾਗਤਸ੍ਸ ਦਿਟ੍ਠਕਾਲੇ ਤਂ ਪੁਪ੍ਫਂ ਵਣ੍ਟੇ ਵਣ੍ਟਸ੍ਮਿਂ ਛੇਤ੍ਵਾਨ ਛਿਨ੍ਦਿਤ੍ਵਾਨ. ਅਲਙ੍ਕਰਿਤ੍ਵਾ ਛਤ੍ਤਮ੍ਹੀਤਿ ਤੇਨ ਪੁਪ੍ਫੇਨ ਛਤ੍ਤਂ ਛਾਦੇਤ੍ਵਾ. ਬੁਦ੍ਧਸ੍ਸ ਅਭਿਰੋਪਯਿਨ੍ਤਿ ਪਬ੍ਭਾਰੇ ਨਿਸਿਨ੍ਨਸ੍ਸ ਬੁਦ੍ਧਸ੍ਸ ਮੁਦ੍ਧਨਿ ਅਕਾਸਿਨ੍ਤਿ ਅਤ੍ਥੋ.
੮੮. ਪਿਣ੍ਡਪਾਤਞ੍ਚ ਪਾਦਾਸਿਨ੍ਤਿ ਤਸ੍ਮਿਂਯੇਵ ਨਿਸਿਨ੍ਨਸ੍ਸ ਭਗਵਤੋ ਪਿਣ੍ਡਪਾਤਂ ਪਕਾਰੇਨ ਅਦਾਸਿਂ ਭੋਜੇਸਿਨ੍ਤਿ ਅਤ੍ਥੋ. ਪਰਮਨ੍ਨਂ ਸੁਭੋਜਨਨ੍ਤਿ ਸੁਨ੍ਦਰਭੋਜਨਸਙ੍ਖਾਤਂ ਪਰਮਨ੍ਨਂ ਉਤ੍ਤਮਾਹਾਰਂ. ਬੁਦ੍ਧੇਨ ਨਵਮੇ ਤਤ੍ਥਾਤਿ ਤਸ੍ਮਿਂ ਵਿਵੇਕਟ੍ਠਾਨੇ ਬੁਦ੍ਧੇਨ ਸਹ ਨਵਮੇ ਅਟ੍ਠ ਸਮਣੇ ਸਮਿਤਪਾਪੇ ਖੀਣਾਸਵਭਿਕ੍ਖੂ ਭੋਜੇਸਿਨ੍ਤਿ ਅਤ੍ਥੋ.
ਯਂ ਵਦਨ੍ਤਿ ਸੁਮੇਧੋਤਿ ਯਂ ਗੋਤਮਸਮ੍ਮਾਸਮ੍ਬੁਦ੍ਧਂ ਭੂਰਿਪਞ੍ਞਂ ਪਥਵਿਸਮਾਨਂ ਪਞ੍ਞਂ ਸੁਮੇਧਂ ਸੁਨ੍ਦਰਂ ਸਬ੍ਬਞ੍ਞੁਤਾਦਿਪਞ੍ਞਵਨ੍ਤਂ. ਸੁਮੇਧੋ ਇਤਿ ਸੁਨ੍ਦਰਪਞ੍ਞੋ ਇਤਿ ਵਦਨ੍ਤਿ ਪਣ੍ਡਿਤਾ ਇਤੋ ਕਪ੍ਪਤੋ ਸਤਸਹਸ੍ਸੇ ਕਪ੍ਪੇ ਏਸੋ ਗੋਤਮੋ ਸਮ੍ਮਾਸਮ੍ਬੁਦ੍ਧੋ ਭਵਿਸ੍ਸਤੀਤਿ ਸਮ੍ਬਨ੍ਧੋ. ਸੇਸਂ ਸੁਵਿਞ੍ਞੇਯ੍ਯਮੇਵਾਤਿ.
ਉਪਸੇਨਵਙ੍ਗਨ੍ਤਪੁਤ੍ਤਤ੍ਥੇਰਅਪਦਾਨਵਣ੍ਣਨਾ ਸਮਤ੍ਤਾ.
੮. ਰਟ੍ਠਪਾਲਤ੍ਥੇਰਅਪਦਾਨਵਣ੍ਣਨਾ
ਪਦੁਮੁਤ੍ਤਰਸ੍ਸ ਭਗਵਤੋਤਿਆਦਿਕਂ ਆਯਸ੍ਮਤੋ ਰਟ੍ਠਪਾਲਤ੍ਥੇਰਸ੍ਸ ਅਪਦਾਨਂ. ਅਯਮ੍ਪਾਯਸ੍ਮਾ ਪੁਰਿਮਬੁਦ੍ਧੇਸੁ ਕਤਾਧਿਕਾਰੋ ਤਤ੍ਥ ਤਤ੍ਥ ਭਵੇ ਵਿਵਟ੍ਟੂਪਨਿਸ੍ਸਯਾਨਿ ਪੁਞ੍ਞਾਨਿ ਉਪਚਿਨਨ੍ਤੋ ਪਦੁਮੁਤ੍ਤਰਸ੍ਸ ਭਗਵਤੋ ਉਪ੍ਪਤ੍ਤਿਤੋ ਪੁਰੇਤਰਮੇਵ ਹਂਸਵਤੀਨਗਰੇ ਗਹਪਤਿਮਹਾਸਾਲਕੁਲੇ ਨਿਬ੍ਬਤ੍ਤਿਤ੍ਵਾ ਵਯਪ੍ਪਤ੍ਤੋ ਪਿਤੁ ਅਚ੍ਚਯੇਨ ਘਰਾਵਾਸੇ ਪਤਿਟ੍ਠਿਤੋ ਰਤਨਕੋਟ੍ਠਾਗਾਰਕਮ੍ਮਿਕੇਨ ਦਸ੍ਸਿਤਂ ਅਪਰਿਮਾਣਂ ਵਂਸਾਨੁਗਤਂ ਧਨਂ ਦਿਸ੍ਵਾ ‘‘ਇਮਂ ਏਤ੍ਤਕਂ ਧਨਰਾਸਿਂ ਮਯ੍ਹਂ ਪਿਤੁਅਯ੍ਯਕਪਯ੍ਯਕਾਦਯੋ ਅਤ੍ਤਨਾ ਸਦ੍ਧਿਂ ਗਹੇਤ੍ਵਾ ਗਨ੍ਤੁਂ ਨਾਸਕ੍ਖਿਂਸੁ, ਮਯਾ ਪਨ ਗਹੇਤ੍ਵਾ ਗਨ੍ਤੁਂ ਵਟ੍ਟਤੀ’’ਤਿ ਚਿਨ੍ਤੇਤ੍ਵਾ ਕਪਣਦ੍ਧਿਕਾਦੀਨਂ ਮਹਾਦਾਨਂ ਅਦਾਸਿ. ਸੋ ਅਭਿਞ੍ਞਾਲਾਭਿਂ ਏਕਂ ਤਾਪਸਂ ਉਪਸਙ੍ਕਮਿਤ੍ਵਾ ਤੇਨ ਦੇਵਲੋਕਾਧਿਪਚ੍ਚੇ ਨਿਯੋਜਿਤੋ ਯਾਵਜੀਵਂ ਪੁਞ੍ਞਾਨਿ ਕਤ੍ਵਾ ਤਤੋ ਚੁਤੋ ਦੇਵਲੋਕੇ ਨਿਬ੍ਬਤ੍ਤਿਤ੍ਵਾ ਦਿਬ੍ਬਸਮ੍ਪਤ੍ਤਿਂ ਅਨੁਭਵਨ੍ਤੋ ਤਤ੍ਥ ਯਾਵਤਾਯੁਕਂ ਠਤ੍ਵਾ ਤਤੋ ਚੁਤੋ ਮਨੁਸ੍ਸਲੋਕੇ ਭਿਨ੍ਨਂ ਰਟ੍ਠਂ ਸਨ੍ਧਾਰੇਤੁਂ ਸਮਤ੍ਥਸ੍ਸ ਕੁਲਸ੍ਸ ਏਕਪੁਤ੍ਤਕੋ ਹੁਤ੍ਵਾ ਨਿਬ੍ਬਤ੍ਤਿ. ਤੇਨ ਸਮਯੇਨ ਪਦੁਮੁਤ੍ਤਰੋ ਭਗਵਾ ਲੋਕੇ ਉਪ੍ਪਜ੍ਜਿਤ੍ਵਾ ਪਵਤ੍ਤਿਤਵਰਧਮ੍ਮਚਕ੍ਕੋ ਵੇਨੇਯ੍ਯਸਤ੍ਤੇ ਨਿਬ੍ਬਾਨਮਹਾਨਗਰਸਙ੍ਖਾਤਂ ਖੇਮਨ੍ਤਭੂਮਿਂ ਸਮ੍ਪਾਪੇਸਿ. ਅਥ ਸੋ ਕੁਲਪੁਤ੍ਤੋ ਅਨੁਕ੍ਕਮੇਨ ਵਿਞ੍ਞੁਤਂ ਪਤ੍ਤੋ ਏਕਦਿਵਸਂ ਉਪਾਸਕੇਹਿ ਸਦ੍ਧਿਂ ਵਿਹਾਰਂ ਗਨ੍ਤ੍ਵਾ ਸਤ੍ਥਾਰਂ ਧਮ੍ਮਂ ਦੇਸੇਨ੍ਤਂ ਦਿਸ੍ਵਾ ਪਸਨ੍ਨਚਿਤ੍ਤੋ ਪਰਿਸਪਰਿਯਨ੍ਤੇ ਨਿਸੀਦਿ.
ਤੇਨ ਖੋ ਪਨ ਸਮਯੇਨ ਸਤ੍ਥਾ ਏਕਂ ਭਿਕ੍ਖੁਂ ਸਦ੍ਧਾਪਬ੍ਬਜਿਤਾਨਂ ਅਗ੍ਗਟ੍ਠਾਨੇ ਠਪੇਸਿ. ਸੋ ਤਂ ਦਿਸ੍ਵਾ ਪਸਨ੍ਨਮਾਨਸੋ ਸਤਸਹਸ੍ਸਭਿਕ੍ਖੁਪਰਿਵੁਤਸ੍ਸ ਭਗਵਤੋ ਸਤ੍ਤਾਹਂ ਮਹਾਦਾਨਂ ਦਤ੍ਵਾ ਤਂ ਠਾਨਂ ਪਤ੍ਥੇਸਿ. ਸਤ੍ਥਾ ਅਨਨ੍ਤਰਾਯੇਨ ਸਮਿਜ੍ਝਨਭਾਵਂ ਦਿਸ੍ਵਾ ‘‘ਅਯਂ ਅਨਾਗਤੇ ਗੋਤਮਸ੍ਸ ਨਾਮ ਸਮ੍ਮਾਸਮ੍ਬੁਦ੍ਧਸ੍ਸ ਸਾਸਨੇ ਸਦ੍ਧਾਪਬ੍ਬਜਿਤਾਨਂ ਅਗ੍ਗੋ ਭਵਿਸ੍ਸਤੀ’’ਤਿ ਬ੍ਯਾਕਾਸਿ. ਸੋ ਸਤ੍ਥਾਰਂ ਭਿਕ੍ਖੁਸਙ੍ਘਞ੍ਚ ਵਨ੍ਦਿਤ੍ਵਾ ਉਟ੍ਠਾਯਾਸਨਾ ਪਕ੍ਕਾਮਿ. ਸੋ ਯਾਵਤਾਯੁਕਂ ਪੁਞ੍ਞਾਨਿ ਕਤ੍ਵਾ ਤਤੋ ਚਵਿਤ੍ਵਾ ਦੇਵਮਨੁਸ੍ਸੇਸੁ ਸਂਸਰਨ੍ਤੋ ਇਤੋ ਦ੍ਵੇਨਵੁਤੇ ਕਪ੍ਪੇ ਫੁਸ੍ਸਸ੍ਸ ਭਗਵਤੋ ਕਾਲੇ ਸਤ੍ਥੁ ਵੇਮਾਤਿਕੇਸੁ ਤੀਸੁ ਰਾਜਪੁਤ੍ਤੇਸੁ ਸਤ੍ਥਾਰਂ ਉਪਟ੍ਠਹਨ੍ਤੇਸੁ ਤੇਸਂ ਪੁਞ੍ਞਕਿਰਿਯਾਸੁ ਸਹਾਯਕਿਚ੍ਚਂ ਅਕਾਸਿ. ਏਵਂ ਤਤ੍ਥ ਤਤ੍ਥ ਭਵੇ ਬਹੁਂ ਕੁਸਲਂ ਉਪਚਿਨਿਤ੍ਵਾ ਸੁਗਤੀਸੁਯੇਵ ਸਂਸਰਨ੍ਤੋ ਇਮਸ੍ਮਿਂ ਬੁਦ੍ਧੁਪ੍ਪਾਦੇ ਕੁਰੁਰਟ੍ਠੇ ਥੁਲ੍ਲਕੋਟ੍ਠਿਕਨਿਗਮੇ ਰਟ੍ਠਪਾਲਸੇਟ੍ਠਿਨੋ ਗੇਹੇ ਨਿਬ੍ਬਤ੍ਤਿ, ਤਸ੍ਸ ਭਿਨ੍ਨਂ ਰਟ੍ਠਂ ਸਨ੍ਧਾਰੇਤੁਂ ਸਮਤ੍ਥਕੁਲੇ ਨਿਬ੍ਬਤ੍ਤਤ੍ਤਾ ਰਟ੍ਠਪਾਲੋਤਿ ਵਂਸਾਨੁਗਤਮੇਵ ਨਾਮਂ ਅਹੋਸਿ. ਸੋ ਮਹਤਾ ਪਰਿਵਾਰੇਨ ਵਡ੍ਢਨ੍ਤੋ ਅਨੁਕ੍ਕਮੇਨ ਯੋਬ੍ਬਨਪ੍ਪਤ੍ਤੋ ਮਾਤਾਪਿਤੂਹਿ ਪਤਿਰੂਪੇਨ ਦਾਰੇਨ ਸਂਯੋਜਿਤੋ ਮਹਨ੍ਤੇ ਚ ਯਸੇ ਪਤਿਟ੍ਠਾਪਿਤੋ ਦਿਬ੍ਬਸਮ੍ਪਤ੍ਤਿਸਦਿਸਸਮ੍ਪਤ੍ਤਿਂ ਪਚ੍ਚਨੁਭੋਤਿ.
ਅਥ ਭਗਵਾ ਕੁਰੁਰਟ੍ਠੇ ਜਨਪਦਚਾਰਿਕਂ ਚਰਨ੍ਤੋ ਥੁਲ੍ਲਕੋਟ੍ਠਿਕਂ ਅਨੁਪਾਪੁਣਿ. ਤਂ ਸੁਤ੍ਵਾ ਰਟ੍ਠਪਾਲੋ ਕੁਲਪੁਤ੍ਤੋ ਸਤ੍ਥਾਰਂ ਉਪਸਙ੍ਕਮਿਤ੍ਵਾ ਸਤ੍ਥੁ ਸਨ੍ਤਿਕੇ ਧਮ੍ਮਂ ਸੁਤ੍ਵਾ ਪਟਿਲਦ੍ਧਸਦ੍ਧੋ ਪਬ੍ਬਜਿਤੁਕਾਮੋ ਸਤ੍ਤਾਹਂ ਭਤ੍ਤਚ੍ਛੇਦਂ ਕਤ੍ਵਾ ਕਿਚ੍ਛੇਨ ਕਸਿਰੇਨ ਮਾਤਾਪਿਤਰੋ ਅਨੁਜਾਨਾਪੇਤ੍ਵਾ ਸਤ੍ਥਾਰਂ ਉਪਸਙ੍ਕਮਿਤ੍ਵਾ ਪਬ੍ਬਜ੍ਜਂ ਯਾਚਿਤ੍ਵਾ ਸਤ੍ਥੁ ਆਣਤ੍ਤਿਯਾ ਅਞ੍ਞਤਰਸ੍ਸ ਸਨ੍ਤਿਕੇ ਪਬ੍ਬਜਿਤ੍ਵਾ ਯੋਨਿਸੋਮਨਸਿਕਾਰੇਨ ਕਮ੍ਮਂ ਕਰੋਨ੍ਤੋ ਵਿਪਸ੍ਸਨਂ ਵਡ੍ਢੇਤ੍ਵਾ ਅਰਹਤ੍ਤਂ ਪਾਪੁਣਿ. ਅਰਹਤ੍ਤਂ ਪਨ ਪਤ੍ਵਾ ਸਤ੍ਥਾਰਂ ਅਨੁਜਾਨਾਪੇਤ੍ਵਾ ਮਾਤਾਪਿਤਰੋ ਪਸ੍ਸਿਤੁਂ ਥੁਲ੍ਲਕੋਟ੍ਠਿਕਂ ਗਨ੍ਤ੍ਵਾ ਤਤ੍ਥ ਸਪਦਾਨਂ ਪਿਣ੍ਡਾਯ ਚਰਨ੍ਤੋ ਪਿਤੁ ਨਿਵੇਸਨੇ ਆਭਿਦੋਸਿਕਂ ਕੁਮ੍ਮਾਸਂ ਲਭਿਤ੍ਵਾ ਤਂ ਅਮਤਂ ਵਿਯ ਪਰਿਭੁਞ੍ਜਨ੍ਤੋ ਪਿਤਰਾ ਨਿਮਨ੍ਤਿਤੋ ਸ੍ਵਾਤਨਾਯ ਅਧਿਵਾਸੇਤ੍ਵਾ ਦੁਤਿਯਦਿਵਸੇ ਪਿਤੁ ਨਿਵੇਸਨੇ ਪਿਣ੍ਡਪਾਤਂ ਪਰਿਭੁਞ੍ਜਿਤ੍ਵਾ ਅਲਙ੍ਕਤਪਟਿਯਤ੍ਤੇ ਇਤ੍ਥਾਗਾਰਜਨੇ ਉਪਗਨ੍ਤ੍ਵਾ ‘‘ਕੀਦਿਸਾ ਨਾਮ ਤਾ, ਅਯ੍ਯਪੁਤ੍ਤ, ਅਚ੍ਛਰਾਯੋ, ਯਾਸਂ ਤ੍ਵਂ ਹੇਤੁ ਬ੍ਰਹ੍ਮਚਰਿਯਂ ਚਰਸੀ’’ਤਿਆਦੀਨਿ (ਮ. ਨਿ. ੨.੩੦੧) ਵਤ੍ਵਾ ਪਲੋਭਨਕਮ੍ਮਂ ਕਾਤੁਂ ਆਰਦ੍ਧੇ ਤਸ੍ਸਾਧਿਪ੍ਪਾਯਂ ਵਿਪਰਿਵਤ੍ਤੇਤ੍ਵਾ ਅਨਿਚ੍ਚਤਾਦਿਪਟਿਸਂਯੁਤ੍ਤਂ ਧਮ੍ਮਂ ਕਥੇਨ੍ਤੋ –
‘‘ਪਸ੍ਸ ਚਿਤ੍ਤਕਤਂ ਬਿਮ੍ਬਂ, ਅਰੁਕਾਯਂ ਸਮੁਸ੍ਸਿਤਂ;
ਆਤੁਰਂ ਬਹੁਸਙ੍ਕਪ੍ਪਂ, ਯਸ੍ਸ ਨਤ੍ਥਿ ਧੁਵਂ ਠਿਤਿ.
‘‘ਪਸ੍ਸ ਚਿਤ੍ਤਕਤਂ ਰੂਪਂ, ਮਣਿਨਾ ਕੁਣ੍ਡਲੇਨ ਚ;
ਅਟ੍ਠਿਂ ਤਚੇਨ ਓਨਦ੍ਧਂ, ਸਹ ਵਤ੍ਥੇਹਿ ਸੋਭਤਿ.
‘‘ਅਲਤ੍ਤਕਕਤਾ ਪਾਦਾ, ਮੁਖਂ ਚੁਣ੍ਣਕਮਕ੍ਖਿਤਂ;
ਅਲਂ ਬਾਲਸ੍ਸ ਮੋਹਾਯ, ਨੋ ਚ ਪਾਰਗਵੇਸਿਨੋ.
‘‘ਅਟ੍ਠਾਪਦਕਤਾ ਕੇਸਾ, ਨੇਤ੍ਤਾ ਅਞ੍ਜਨਮਕ੍ਖਿਤਾ;
ਅਲਂ ਬਾਲਸ੍ਸ ਮੋਹਾਯ, ਨੋ ਚ ਪਾਰਗਵੇਸਿਨੋ.
‘‘ਅਞ੍ਜਨੀਵ ਨਵਾ ਚਿਤ੍ਤਾ, ਪੂਤਿਕਾਯੋ ਅਲਙ੍ਕਤੋ;
ਅਲਂ ਬਾਲਸ੍ਸ ਮੋਹਾਯ, ਨੋ ਚ ਪਾਰਗਵੇਸਿਨੋ.
‘‘ਓਦਹਿ ਮਿਗਵੋ ਪਾਸਂ, ਨਾਸਦਾ ਵਾਗੁਰਂ ਮਿਗੋ;
ਭੁਤ੍ਵਾ ਨਿਵਾਪਂ ਗਚ੍ਛਾਮ, ਕਨ੍ਦਨ੍ਤੇ ਮਿਗਬਨ੍ਧਕੇ.
‘‘ਛਿਨ੍ਨੋ ਪਾਸੋ ਮਿਗਵਸ੍ਸ, ਨਾਸਦਾ ਵਾਗੁਰਂ ਮਿਗੋ;
ਭੁਤ੍ਵਾ ਨਿਵਾਪਂ ਗਚ੍ਛਾਮ, ਸੋਚਨ੍ਤੇ ਮਿਗਲੁਦ੍ਦਕੇ’’ਤਿ. (ਮ. ਨਿ. ੨.੩੦੨; ਥੇਰਗਾ. ੭੬੯-੭੭੫);
ਇਮਾ ਗਾਥਾਯੋ ਅਭਾਸਿ. ਇਮਾ ਗਾਥਾ ਵਤ੍ਵਾ ਵੇਹਾਸਂ ਅਬ੍ਭੁਗ੍ਗਨ੍ਤ੍ਵਾ ਰਞ੍ਞੋ ਕੋਰਬ੍ਯਸ੍ਸ ਮਿਗਾਜਿਨਵਨੁਯ੍ਯਾਨੇ ਮਙ੍ਗਲਸਿਲਾਪਟ੍ਟੇ ਨਿਸੀਦਿ. ਥੇਰਸ੍ਸ ਕਿਰ ਪਿਤਾ ਸਤ੍ਤਸੁ ਦ੍ਵਾਰਕੋਟ੍ਠਕੇਸੁ ਅਗ੍ਗਲ਼ਂ ਦਾਪੇਤ੍ਵਾ ਮਲ੍ਲੇ ਆਣਾਪੇਸਿ ‘‘ਨਿਕ੍ਖਮਿਤੁਂ ਮਾ ਦੇਥ, ਕਾਸਾਯਾਨਿ ਅਪਨੇਤ੍ਵਾ ਸੇਤਕਾਨਿ ਨਿਵਾਸਾਪੇਥਾ’’ਤਿ. ਤਸ੍ਮਾ ਥੇਰੋ ਆਕਾਸੇਨ ਅਗਮਾਸਿ. ਅਥ ਰਾਜਾ ਕੋਰਬ੍ਯੋ ਥੇਰਸ੍ਸ ਤਤ੍ਥ ਨਿਸਿਨ੍ਨਭਾਵਂ ਸੁਤ੍ਵਾ ਤਂ ਉਪਸਙ੍ਕਮਿਤ੍ਵਾ ਸਮ੍ਮੋਦਨੀਯਂ ਕਥਂ ਸਾਰਣੀਯਂ ਵੀਤਿਸਾਰੇਤ੍ਵਾ ‘‘ਇਧ, ਭੋ ਰਟ੍ਠਪਾਲ, ਪਬ੍ਬਜਨ੍ਤੋ ਬ੍ਯਾਧਿਪਾਰਿਜੁਞ੍ਞਂ ਵਾ ਜਰਾਭੋਗਞਾਤਿਪਾਰਿਜੁਞ੍ਞਂ ਵਾ ਪਤ੍ਤੋ ਪਬ੍ਬਜਤਿ, ਤ੍ਵਂ ਪਨ ਕਿਞ੍ਚਿਪਿ ਪਾਰਿਜੁਞ੍ਞਂ ਅਨੁਪਗਤੋ ਏਵ ਕਸ੍ਮਾ ਪਬ੍ਬਜਸੀ’’ਤਿ ਪੁਚ੍ਛਿ. ਅਥਸ੍ਸ ਥੇਰੋ ‘‘ਉਪਨਿਯ੍ਯਤਿ ਲੋਕੋ ਅਦ੍ਧੁਵੋ, ਅਤਾਣੋ ਲੋਕੋ ਅਨਭਿਸ੍ਸਰੋ, ਅਸਰਣੋ ਲੋਕੋ ਸਬ੍ਬਂ ਪਹਾਯ ਗਮਨੀਯਂ, ਊਨੋ ਲੋਕੋ ਅਤਿਤ੍ਤੋ ਤਣ੍ਹਾਦਾਸੋ’’ਤਿ (ਮ. ਨਿ. ੨.੩੦੫) ਇਮੇਸਂ ਚਤੁਨ੍ਨਂ ਧਮ੍ਮੁਦ੍ਦੇਸਾਨਂ ਅਤ੍ਤਨਾ ਵਿਦਿਤਭਾਵਂ ਕਥੇਤ੍ਵਾ ਤਸ੍ਸਾ ਦੇਸਨਾਯ ਅਨੁਗੀਤਿਂ ਕਥੇਨ੍ਤੋ –
‘‘ਪਸ੍ਸਾਮਿ ਲੋਕੇ ਸਧਨੇ ਮਨੁਸ੍ਸੇ, ਲਦ੍ਧਾਨ ਵਿਤ੍ਤਂ ਨ ਦਦਨ੍ਤਿ ਮੋਹਾ;
ਲੁਦ੍ਧਾ ਧਨਂ ਸਨ੍ਨਿਚਯਂ ਕਰੋਨ੍ਤਿ, ਭਿਯ੍ਯੋਵ ਕਾਮੇ ਅਭਿਪਤ੍ਥਯਨ੍ਤਿ.
‘‘ਰਾਜਾ ਪਸਯ੍ਹਪ੍ਪਥਵਿਂ ਵਿਜੇਤ੍ਵਾ, ਸਸਾਗਰਨ੍ਤਂ ਮਹਿਮਾਵਸਨ੍ਤੋ;
ਓਰਂ ਸਮੁਦ੍ਦਸ੍ਸ ਅਤਿਤ੍ਤਰੂਪੋ, ਪਾਰਂ ਸਮੁਦ੍ਦਸ੍ਸਪਿ ਪਤ੍ਥਯੇਥ.
‘‘ਰਾਜਾ ਚ ਅਞ੍ਞੇ ਚ ਬਹੂ ਮਨੁਸ੍ਸਾ, ਅਵੀਤਤਣ੍ਹਾ ਮਰਣਂ ਉਪੇਨ੍ਤਿ;
ਊਨਾਵ ਹੁਤ੍ਵਾਨ ਜਹਨ੍ਤਿ ਦੇਹਂ, ਕਾਮੇਹਿ ਲੋਕਮ੍ਹਿ ਨ ਹਤ੍ਥਿ ਤਿਤ੍ਤਿ.
‘‘ਕਨ੍ਦਨ੍ਤਿ ਨਂ ਞਾਤੀ ਪਕਿਰਿਯ ਕੇਸੇ, ‘ਅਹੋ ਵਤਾ ਨੋ ਅਮਰਾ’ਤਿ ਚਾਹੁ;
ਵਤ੍ਥੇਨ ਨਂ ਪਾਰੁਤਂ ਨੀਹਰਿਤ੍ਵਾ, ਚਿਤਂ ਸਮੋਧਾਯ ਤਤੋ ਡਹਨ੍ਤਿ.
‘‘ਸੋ ਡਯ੍ਹਤਿ ਸੂਲੇਹਿ ਤੁਜ੍ਜਮਾਨੋ, ਏਕੇਨ ਵਤ੍ਥੇਨ ਪਹਾਯ ਭੋਗੇ;
ਨ ਮੀਯਮਾਨਸ੍ਸ ਭਵਨ੍ਤਿ ਤਾਣਾ, ਞਾਤੀ ਚ ਮਿਤ੍ਤਾ ਅਥ ਵਾ ਸਹਾਯਾ.
‘‘ਦਾਯਾਦਕਾ ਤਸ੍ਸ ਧਨਂ ਹਰਨ੍ਤਿ, ਸਤ੍ਤੋ ਪਨ ਗਚ੍ਛਤਿ ਯੇਨ ਕਮ੍ਮਂ;
ਨ ਮੀਯਮਾਨਂ ਧਨਮਨ੍ਵੇਤਿ ਕਿਞ੍ਚਿ, ਪੁਤ੍ਤਾ ਚ ਦਾਰਾ ਚ ਧਨਞ੍ਚ ਰਟ੍ਠਂ.
‘‘ਨ ਦੀਘਮਾਯੁਂ ਲਭਤੇ ਧਨੇਨ, ਨ ਚਾਪਿ ਵਿਤ੍ਤੇਨ ਜਰਂ ਵਿਹਨ੍ਤਿ;
ਅਪ੍ਪਂ ਹਿਦਂ ਜੀਵਿਤਮਾਹੁ ਧੀਰਾ, ਅਸਸ੍ਸਤਂ ਵਿਪ੍ਪਰਿਣਾਮਧਮ੍ਮਂ.
‘‘ਅਡ੍ਢਾ ਦਲਿਦ੍ਦਾ ਚ ਫੁਸਨ੍ਤਿ ਫਸ੍ਸਂ, ਬਾਲੋ ਚ ਧੀਰੋ ਚ ਤਥੇਵ ਫੁਟ੍ਠੋ;
ਬਾਲੋ ਹਿ ਬਾਲ੍ਯਾ ਵਧਿਤੋਵ ਸੇਤਿ, ਧੀਰੋ ਚ ਨੋ ਵੇਧਤਿ ਫਸ੍ਸਫੁਟ੍ਠੋ.
‘‘ਤਸ੍ਮਾ ਹਿ ਪਞ੍ਞਾਵ ਧਨੇਨ ਸੇਯ੍ਯਾ, ਯਾਯ ਵੋਸਾਨਮਿਧਾਧਿਗਚ੍ਛਤਿ;
ਅਬ੍ਯੋਸਿਤਤ੍ਤਾ ਹਿ ਭਵਾਭਵੇਸੁ, ਪਾਪਾਨਿ ਕਮ੍ਮਾਨਿ ਕਰੋਤਿ ਮੋਹਾ.
‘‘ਉਪੇਤਿ ਗਬ੍ਭਞ੍ਚ ਪਰਞ੍ਚ ਲੋਕਂ, ਸਂਸਾਰਮਾਪਜ੍ਜਪਰਮ੍ਪਰਾਯ;
ਤਸ੍ਸਪ੍ਪਪਞ੍ਞੋ ਅਭਿਸਦ੍ਦਹਨ੍ਤੋ, ਉਪੇਤਿ ਗਬ੍ਭਞ੍ਚ ਪਰਞ੍ਚ ਲੋਕਂ.
‘‘ਚੋਰੋ ਯਥਾ ਸਨ੍ਧਿਮੁਖੇ ਗਹੀਤੋ, ਸਕਮ੍ਮੁਨਾ ਹਞ੍ਞਤਿ ਪਾਪਧਮ੍ਮੋ;
ਏਵਂ ਪਜਾ ਪੇਚ੍ਚ ਪਰਮ੍ਹਿ ਲੋਕੇ, ਸਕਮ੍ਮੁਨਾ ਹਞ੍ਞਤਿ ਪਾਪਧਮ੍ਮੋ.
‘‘ਕਾਮਾ ਹਿ ਚਿਤ੍ਰਾ ਮਧੁਰਾ ਮਨੋਰਮਾ, ਵਿਰੂਪਰੂਪੇਨ ਮਥੇਨ੍ਤਿ ਚਿਤ੍ਤਂ;
ਆਦੀਨਵਂ ਕਾਮਗੁਣੇਸੁ ਦਿਸ੍ਵਾ, ਤਸ੍ਮਾ ਅਹਂ ਪਬ੍ਬਜਿਤੋਮ੍ਹਿ ਰਾਜ.
‘‘ਦੁਮਪ੍ਫਲਾਨੀਵ ਪਤਨ੍ਤਿ ਮਾਣਵਾ, ਦਹਰਾ ਚ ਵੁਡ੍ਢਾ ਚ ਸਰੀਰਭੇਦਾ;
ਏਤਮ੍ਪਿ ਦਿਸ੍ਵਾਨ ਪਬ੍ਬਜਿਤੋਮ੍ਹਿ ਰਾਜ, ਅਪਣ੍ਣਕਂ ਸਾਮਞ੍ਞਮੇਵ ਸੇਯ੍ਯੋ.
‘‘ਸਦ੍ਧਾਯਾਹਂ ਪਬ੍ਬਜਿਤੋ, ਉਪੇਤੋ ਜਿਨਸਾਸਨੇ;
ਅਵਞ੍ਝਾ ਮਯ੍ਹਂ ਪਬ੍ਬਜ੍ਜਾ, ਅਨਣੋ ਭੁਞ੍ਜਾਮਿ ਭੋਜਨਂ.
‘‘ਕਾਮੇ ਆਦਿਤ੍ਤਤੋ ਦਿਸ੍ਵਾ, ਜਾਤਰੂਪਾਨਿ ਸਤ੍ਥਤੋ;
ਗਬ੍ਭਾਵੋਕ੍ਕਨ੍ਤਿਤੋ ਦੁਕ੍ਖਂ, ਨਿਰਯੇਸੁ ਮਹਬ੍ਭਯਂ.
‘‘ਏਤਮਾਦੀਨਵਂ ਞਤ੍ਵਾ, ਸਂਵੇਗਂ ਅਲਭਿਂ ਤਦਾ;
ਸੋਹਂ ਵਿਦ੍ਧੋ ਤਦਾ ਸਨ੍ਤੋ, ਸਮ੍ਪਤ੍ਤੋ ਆਸਵਕ੍ਖਯਂ.
‘‘ਪਰਿਚਿਣ੍ਣੋ ਮਯਾ ਸਤ੍ਥਾ, ਕਤਂ ਬੁਦ੍ਧਸ੍ਸ ਸਾਸਨਂ;
ਓਹਿਤੋ ਗਰੁਕੋ ਭਾਰੋ, ਭਵਨੇਤ੍ਤਿ ਸਮੂਹਤਾ.
‘‘ਯਸ੍ਸਤ੍ਥਾਯ ਪਬ੍ਬਜਿਤੋ, ਅਗਾਰਸ੍ਮਾਨਗਾਰਿਯਂ;
ਸੋ ਮੇ ਅਤ੍ਥੋ ਅਨੁਪ੍ਪਤ੍ਤੋ, ਸਬ੍ਬਸਂਯੋਜਨਕ੍ਖਯੋ’’ਤਿ. (ਥੇਰਗਾ. ੭੭੬-੭੯੩) –
ਇਮਾ ਗਾਥਾ ਅਵੋਚ. ਏਵਂ ਥੇਰੋ ਰਞ੍ਞੋ ਕੋਰਬ੍ਯਸ੍ਸ ਧਮ੍ਮਂ ਦੇਸੇਤ੍ਵਾ ਸਤ੍ਥੁ ਸਨ੍ਤਿਕਮੇਵ ਗਤੋ. ਸਤ੍ਥਾ ਚ ਅਪਰਭਾਗੇ ਅਰਿਯਗਣਮਜ੍ਝੇ ਨਿਸਿਨ੍ਨੋ ਥੇਰਂ ਸਦ੍ਧਾਪਬ੍ਬਜਿਤਾਨਂ ਅਗ੍ਗਟ੍ਠਾਨੇ ਠਪੇਸਿ.