੩. ਅਨੁਲੋਮਪਚ੍ਚਨੀਯਵਣ੍ਣਨਾ

੪੫-੪੮. ਇਦਾਨਿ ਅਨੁਲੋਮਪਚ੍ਚਨੀਯਂ ਹੋਤਿ. ਤਂ ਦਸ੍ਸੇਤੁਂ ਸਿਯਾ ਕੁਸਲਂ ਧਮ੍ਮਂ ਪਟਿਚ੍ਚ ਕੁਸਲੋ ਧਮ੍ਮੋ ਉਪ੍ਪਜ੍ਜੇਯ੍ਯ ਹੇਤੁਪਚ੍ਚਯਾ ਨਆਰਮ੍ਮਣਪਚ੍ਚਯਾਤਿਆਦਿ ਆਰਦ੍ਧਂ. ਤਤ੍ਥ ‘‘ਹੇਤੁਪਚ੍ਚਯਾ ਨਆਰਮ੍ਮਣਪਚ੍ਚਯਾ…ਪੇ… ਹੇਤੁਪਚ੍ਚਯਾ ਨਅਵਿਗਤਪਚ੍ਚਯਾ’’ਤਿ ਹੇਤੁਪਦਸ੍ਸ ਸੇਸੇਸੁ ਤੇਵੀਸਤਿਯਾ ਪਚ੍ਚਯੇਸੁ ਏਕੇਕੇਨ ਸਦ੍ਧਿਂ ਯੋਜਨਾਵਸੇਨ ਹੇਤੁਪਦਾਦਿਕੇ ਏਕਮੂਲਕੇ ਤੇਵੀਸਤਿ ਅਨੁਲੋਮਪਚ੍ਚਨੀਯਾਨਿ. ਤੇਸੁ ਏਕੇਕਸ੍ਮਿਂ ਏਕੂਨਪਞ੍ਞਾਸਂ ਕਤ੍ਵਾ ਸਤ੍ਤਵੀਸਾਧਿਕਾਨਿ ਏਕਾਦਸ ਪੁਚ੍ਛਾਸਤਾਨਿ ਹੋਨ੍ਤਿ. ਦੁਮੂਲਕੇ ਪਨ ਹੇਤਾਰਮ੍ਮਣਪਦਾਨਂ ਸੇਸੇਸੁ ਦ੍ਵਾਵੀਸਤਿਯਾ ਪਚ੍ਚਯੇਸੁ ਏਕੇਕੇਨ ਸਦ੍ਧਿਂ ਯੋਜਨਾਵਸੇਨ ਦ੍ਵਾਵੀਸਤਿ ਅਨੁਲੋਮਪਚ੍ਚਨੀਯਾਨੀਤਿ ਏਵਂ ਅਨੁਲੋਮੇ ਵੁਤ੍ਤੇਸੁ ਸਬ੍ਬੇਸੁ ਏਕਮੂਲਕਾਦੀਸੁ ਏਕੇਕਂ ਪਦਂ ਪਰਿਹਾਪੇਤ੍ਵਾ ਅਵਸੇਸਾਨਂ ਵਸੇਨ ਪੁਚ੍ਛਾਗਣਨਾ ਵੇਦਿਤਬ੍ਬਾ. ਏਕਮੂਲਕਾਦੀਸੁ ਚੇਤ੍ਥ ਯਾ ਪੁਚ੍ਛਾ ਪਾਲ਼ਿਯਂ ਆਗਤਾ, ਯਾ ਚ ਨ ਆਗਤਾ, ਤਾ ਸਬ੍ਬਾ ਹੇਟ੍ਠਾ ਵੁਤ੍ਤਨਯਾਨੁਸਾਰੇਨੇਵ ਵੇਦਿਤਬ੍ਬਾ.

ਤਿਕਞ੍ਚ ਪਟ੍ਠਾਨਵਰਂ…ਪੇ… ਛ ਅਨੁਲੋਮਪਚ੍ਚਨੀਯਮ੍ਹਿ ਨਯਾ ਸੁਗਮ੍ਭੀਰਾਤਿ ਏਤ੍ਥ ਪਨ ਹੇਟ੍ਠਾ ਵੁਤ੍ਤਨਯੇਨੇਵ ਦ੍ਵੇ ਅਨੁਲੋਮਪਚ੍ਚਨੀਯਾਨਿ – ਧਮ੍ਮਾਨੁਲੋਮਪਚ੍ਚਨੀਯਂ ਪਚ੍ਚਯਾਨੁਲੋਮਪਚ੍ਚਨੀਯਞ੍ਚ. ਤਤ੍ਥ ‘‘ਕੁਸਲਾ ਧਮ੍ਮਾ’’ਤਿ ਏਵਂ ਅਭਿਧਮ੍ਮਮਾਤਿਕਾਪਦੇਹਿ ਸਙ੍ਗਹਿਤਾਨਂ ਧਮ੍ਮਾਨਂ ‘‘ਕੁਸਲਂ ਧਮ੍ਮਂ ਪਟਿਚ੍ਚ ਨ ਕੁਸਲੋ ਧਮ੍ਮੋ’’ਤਿ ਅਨੁਲੋਮਪਚ੍ਚਨੀਯਦੇਸਨਾਵਸੇਨ ਪਵਤ੍ਤਂ ਧਮ੍ਮਾਨੁਲੋਮਪਚ੍ਚਨੀਯਂ ਨਾਮ. ‘‘ਹੇਤੁਪਚ੍ਚਯਾ ਨਆਰਮ੍ਮਣਪਚ੍ਚਯਾ’’ਤਿ ਏਵਂ ਚਤੁਵੀਸਤਿਯਾ ਪਚ੍ਚਯੇਸੁ ਲਬ੍ਭਮਾਨਪਦਾਨਂ ਅਨੁਲੋਮਪਚ੍ਚਨੀਯਦੇਸਨਾਵਸੇਨ ਪਵਤ੍ਤਂ ਪਚ੍ਚਯਾਨੁਲੋਮਪਚ੍ਚਨੀਯਂ ਨਾਮ. ਤਤ੍ਥ ਹੇਟ੍ਠਾ ਅਟ੍ਠਕਥਾਯਂ ‘‘ਤਿਕਞ੍ਚ ਪਟ੍ਠਾਨਵਰਂ…ਪੇ… ਛ ਅਨੁਲੋਮਪਚ੍ਚਨੀਯਮ੍ਹਿ ਨਯਾ ਸੁਗਮ੍ਭੀਰਾ’’ਤਿ ਅਯਂ ਗਾਥਾ ਧਮ੍ਮਾਨੁਲੋਮਪਚ੍ਚਨੀਯਂ ਸਨ੍ਧਾਯ ਵੁਤ੍ਤਾ. ਇਧ ਪਨ ਅਯਂ ਗਾਥਾ ਧਮ੍ਮਾਨੁਲੋਮੇਯੇਵ ਪਚ੍ਚਯਾਨੁਲੋਮਪਚ੍ਚਨੀਯਂ ਸਨ੍ਧਾਯ ਵੁਤ੍ਤਾ. ਤਸ੍ਮਾ ‘‘ਛ ਅਨੁਲੋਮਪਚ੍ਚਨੀਯਮ੍ਹਿ ਨਯਾ ਸੁਗਮ੍ਭੀਰਾ’’ਤਿ ਅਟ੍ਠਕਥਾਗਾਥਾਯ ਧਮ੍ਮਾਨੁਲੋਮਪਚ੍ਚਨੀਯੇ ਤਿਕਪਟ੍ਠਾਨਾਦਯੋ ਛ ਨਯਾ ਸੁਗਮ੍ਭੀਰਾਤਿ ਏਵਮਤ੍ਥੋ ਵੇਦਿਤਬ੍ਬੋ. ਇਮਸ੍ਮਿਂ ਪਨੋਕਾਸੇ ਹੇਤੁਪਚ੍ਚਯਾ ਨਾਰਮ੍ਮਣਪਚ੍ਚਯਾਤਿ ਏਵਂ ਪਵਤ੍ਤੇ ਪਚ੍ਚਯਾਨੁਲੋਮਪਚ੍ਚਨੀਯੇ ਏਤੇ ਧਮ੍ਮਾਨੁਲੋਮੇਯੇਵ ਤਿਕਪਟ੍ਠਾਨਾਦਯੋ ਛ ਨਯਾ ਸੁਗਮ੍ਭੀਰਾਤਿ ਏਵਮਤ੍ਥੋ ਵੇਦਿਤਬ੍ਬੋ.

ਤੇਸੁ ਅਨੁਲੋਮੇ ਤਿਕਪਟ੍ਠਾਨੇਯੇਵ ਕੁਸਲਤ੍ਤਿਕਮਤ੍ਤਸ੍ਸ ਵਸੇਨ ਅਯਂ ਇਮਸ੍ਮਿਂ ਪਟਿਚ੍ਚਵਾਰਸ੍ਸ ਪਣ੍ਣਤ੍ਤਿਵਾਰੇ ਸਙ੍ਖਿਪਿਤ੍ਵਾ ਪੁਚ੍ਛਾਪਭੇਦੋ ਦਸ੍ਸਿਤੋ. ਸੇਸੇਸੁ ਪਨ ਤਿਕੇਸੁ ਸੇਸਪਟ੍ਠਾਨੇਸੁ ਚ ਏਕਾਪਿ ਪੁਚ੍ਛਾ ਨ ਦਸ੍ਸਿਤਾ. ਤਤੋ ਪਰੇਸੁ ਪਨ ਸਹਜਾਤਵਾਰਾਦੀਸੁ ਕੁਸਲਤ੍ਤਿਕਸ੍ਸਾਪਿ ਵਸੇਨ ਪੁਚ੍ਛਂ ਅਨੁਦ੍ਧਰਿਤ੍ਵਾ ਲਬ੍ਭਮਾਨਕਵਸੇਨ ਵਿਸ੍ਸਜ੍ਜਨਮੇਵ ਦਸ੍ਸਿਤਂ. ‘‘ਛ ਅਨੁਲੋਮਪਚ੍ਚਨੀਯਮ੍ਹਿ ਨਯਾ ਸੁਗਮ੍ਭੀਰਾ’’ਤਿ ਵਚਨਤੋ ਪਨ ਇਮਸ੍ਮਿਂ ਪਚ੍ਚਯਾਨੁਲੋਮਪਚ੍ਚਨੀਯੇ ਛਪਿ ਏਤੇ ਪਟ੍ਠਾਨਨਯਾ ਪੁਚ੍ਛਾਵਸੇਨ ਉਦ੍ਧਰਿਤ੍ਵਾ ਦਸ੍ਸੇਤਬ੍ਬਾ. ਪਟ੍ਠਾਨਂ ਵਣ੍ਣਯਨ੍ਤਾਨਞ੍ਹਿ ਆਚਰਿਯਾਨਂ ਭਾਰੋ ਏਸੋਤਿ.