੧. ਪਚ੍ਚਯਾਨੁਲੋਮਵਣ੍ਣਨਾ

ਏਵਂ ਅਨੁਲੋਮਪਟ੍ਠਾਨਾਦੀਸੁ ਤਿਕਪਟ੍ਠਾਨਾਦਿਵਸੇਨ ਚਤੁਵੀਸਤਿਸਮਨ੍ਤਪਟ੍ਠਾਨਸਮੋਧਾਨੇ ਪਟ੍ਠਾਨਮਹਾਪਕਰਣੇ ਯੇ ਤਿਕਾਦਯੋ ਨਿਸ੍ਸਾਯ ਨਿਦ੍ਦਿਟ੍ਠਤ੍ਤਾ ਏਤਂ ਤਿਕਪਟ੍ਠਾਨਂ, ਦੁਕਪਟ੍ਠਾਨਂ…ਪੇ… ਦੁਕਦੁਕਪਟ੍ਠਾਨਨ੍ਤਿ ਵੁਤ੍ਤਂ. ਤੇ ਅਨਾਮਸਿਤ੍ਵਾ ਯੇਸਂ ਪਚ੍ਚਯਾਨਂ ਵਸੇਨ ਤੇ ਤਿਕਾਦਯੋ ਵਿਭਤ੍ਤਾ, ਤੇ ਪਚ੍ਚਯੇ ਏਵ ਤਾਵ ਇਮਿਨਾ ਮਾਤਿਕਾਨਿਕ੍ਖੇਪਪਚ੍ਚਯਵਿਭਙ੍ਗਸਙ੍ਖਾਤੇਨ ਵਾਰੇਨ ਉਦ੍ਦੇਸਤੋ ਚ ਨਿਦ੍ਦੇਸਤੋ ਚ ਦਸ੍ਸੇਤ੍ਵਾ, ਇਦਾਨਿ ਯੇ ਤਿਕਾਦਯੋ ਨਿਸ੍ਸਾਯ ਨਿਦ੍ਦਿਟ੍ਠਤ੍ਤਾ ਏਤਂ ਤਿਕਪਟ੍ਠਾਨਂ, ਦੁਕਪਟ੍ਠਾਨਂ…ਪੇ… ਦੁਕਦੁਕਪਟ੍ਠਾਨਨ੍ਤਿ ਵੁਤ੍ਤਂ. ਤੇ ਤਿਕਾਦਯੋ ਇਮੇਸਂ ਪਚ੍ਚਯਾਨਂ ਵਸੇਨ ਵਿਤ੍ਥਾਰੇਤ੍ਵਾ ਦਸ੍ਸੇਤੁਂ ਏਕੇਕਂ ਤਿਕਦੁਕਂ ਨਿਸ੍ਸਾਯ ਸਤ੍ਤਹਿ ਮਹਾਵਾਰੇਹਿ ਦੇਸਨਾ ਕਤਾ. ਤੇਸਂ ਇਮਾਨਿ ਨਾਮਾਨਿ – ਪਟਿਚ੍ਚਵਾਰੋ, ਸਹਜਾਤਵਾਰੋ, ਪਚ੍ਚਯਵਾਰੋ, ਨਿਸ੍ਸਯਵਾਰੋ, ਸਂਸਟ੍ਠਵਾਰੋ, ਸਮ੍ਪਯੁਤ੍ਤਵਾਰੋ, ਪਞ੍ਹਾਵਾਰੋਤਿ.

ਤਤ੍ਥ ‘‘ਕੁਸਲਂ ਧਮ੍ਮਂ ਪਟਿਚ੍ਚ ਕੁਸਲੋ ਧਮ੍ਮੋ’’ਤਿ ਏਵਂ ਪਟਿਚ੍ਚਾਭਿਧਾਨਵਸੇਨ ਵੁਤ੍ਤੋ ਪਟਿਚ੍ਚਵਾਰੋ ਨਾਮ. ਕੁਸਲਂ ਧਮ੍ਮਂ ਸਹਜਾਤੋ ਕੁਸਲੋ ਧਮ੍ਮੋ’’ਤਿ ਏਵਂ ਸਹਜਾਤਾਭਿਧਾਨਵਸੇਨ ਵੁਤ੍ਤੋ ਸਹਜਾਤਵਾਰੋ ਨਾਮ. ਸੋ ਪੁਰਿਮੇਨ ਪਟਿਚ੍ਚਵਾਰੇਨ ਅਤ੍ਥਤੋ ਨਿਨ੍ਨਾਨਾਕਰਣੋ. ਪਟਿਚ੍ਚਾਭਿਧਾਨਵਸੇਨ ਬੁਜ੍ਝਨਕਾਨਂ ਵਸੇਨ ਪਨ ਪਠਮੋ ਵੁਤ੍ਤੋ, ਸਹਜਾਤਾਭਿਧਾਨਵਸੇਨ ਬੁਜ੍ਝਨਕਾਨਂ ਵਸੇਨ ਦੁਤਿਯੋ. ਦ੍ਵੀਸੁਪਿ ਚੇਤੇਸੁ ਰੂਪਾਰੂਪਧਮ੍ਮਵਸੇਨ ਪਚ੍ਚਯਾ ਚੇਵ ਪਚ੍ਚਯੁਪ੍ਪਨ੍ਨਧਮ੍ਮਾ ਚ ਵੇਦਿਤਬ੍ਬਾ. ਤੇ ਚ ਖੋ ਸਹਜਾਤਾਵ, ਨ ਪੁਰੇਜਾਤਪਚ੍ਛਾਜਾਤਾ ਲਬ੍ਭਨ੍ਤਿ. ‘‘ਕੁਸਲਂ ਧਮ੍ਮਂ ਪਚ੍ਚਯਾ ਕੁਸਲੋ ਧਮ੍ਮੋ’’ਤਿ ਏਵਂ ਪਚ੍ਚਯਾਭਿਧਾਨਵਸੇਨ ਵੁਤ੍ਤੋ ਪਨ ਪਚ੍ਚਯਵਾਰੋ ਨਾਮ. ਸੋਪਿ ਪੁਰਿਮਵਾਰਦ੍ਵਯਂ ਵਿਯ ਰੂਪਾਰੂਪਧਮ੍ਮਵਸੇਨੇਵ ਵੇਦਿਤਬ੍ਬੋ. ਪਚ੍ਚਯੋ ਪਨੇਤ੍ਥ ਪੁਰੇਜਾਤੋਪਿ ਲਬ੍ਭਤਿ. ਅਯਮਸ੍ਸ ਪੁਰਿਮਵਾਰਦ੍ਵਯਤੋ ਵਿਸੇਸੋ. ਤਦਨਨ੍ਤਰੋ ‘‘ਕੁਸਲਂ ਧਮ੍ਮਂ ਨਿਸ੍ਸਾਯ ਕੁਸਲੋ ਧਮ੍ਮੋ’’ਤਿ ਏਵਂ ਨਿਸ੍ਸਯਾਭਿਧਾਨਵਸੇਨ ਵੁਤ੍ਤੋ ਨਿਸ੍ਸਯਵਾਰੋ ਨਾਮ. ਸੋ ਪੁਰਿਮੇਨ ਪਚ੍ਚਯਵਾਰੇਨ ਅਤ੍ਥਤੋ ਨਿਨ੍ਨਾਨਾਕਰਣੋ. ਪਚ੍ਚਯਾਭਿਧਾਨਵਸੇਨ ਬੁਜ੍ਝਨਕਾਨਂ ਵਸੇਨ ਪਨ ਪਠਮੋ ਵੁਤ੍ਤੋ, ਨਿਸ੍ਸਯਾਭਿਧਾਨਵਸੇਨ ਬੁਜ੍ਝਨਕਾਨਂ ਵਸੇਨ ਦੁਤਿਯੋ. ਤਤੋ ਪਰਂ ‘‘ਕੁਸਲਂ ਧਮ੍ਮਂ ਸਂਸਟ੍ਠੋ ਕੁਸਲੋ ਧਮ੍ਮੋ’’ਤਿ ਏਵਂ ਸਂਸਟ੍ਠਾਭਿਧਾਨਵਸੇਨ ਵੁਤ੍ਤੋ ਸਂਸਟ੍ਠਵਾਰੋ ਨਾਮ. ‘‘ਕੁਸਲਂ ਧਮ੍ਮਂ ਸਮ੍ਪਯੁਤ੍ਤੋ ਕੁਸਲੋ ਧਮ੍ਮੋ’’ਤਿ ਏਵਂ ਸਮ੍ਪਯੁਤ੍ਤਾਭਿਧਾਨਵਸੇਨ ਵੁਤ੍ਤੋ ਸਮ੍ਪਯੁਤ੍ਤਵਾਰੋ ਨਾਮ. ਸੋ ਪੁਰਿਮੇਨ ਸਂਸਟ੍ਠਵਾਰੇਨ ਅਤ੍ਥਤੋ ਨਿਨ੍ਨਾਨਾਕਰਣੋ. ਸਂਸਟ੍ਠਾਭਿਧਾਨਵਸੇਨ ਬੁਜ੍ਝਨਕਾਨਂ ਵਸੇਨ ਪਨ ਪਠਮੋ ਵੁਤ੍ਤੋ, ਸਮ੍ਪਯੁਤ੍ਤਾਭਿਧਾਨਵਸੇਨ ਦੁਤਿਯੋ. ਦ੍ਵੀਸੁਪਿ ਚੇਤੇਸੁ ਅਰੂਪਧਮ੍ਮਵਸੇਨੇਵ ਪਚ੍ਚਯਾ ਪਚ੍ਚਯੁਪ੍ਪਨ੍ਨਾ ਚ ਵੇਦਿਤਬ੍ਬਾ. ਸਤ੍ਤਮਵਾਰੇ ਪਨ ਯਸ੍ਮਾ ‘‘ਕੁਸਲੋ ਧਮ੍ਮੋ ਕੁਸਲਸ੍ਸ ਧਮ੍ਮਸ੍ਸ ਹੇਤੁਪਚ੍ਚਯੇਨ ਪਚ੍ਚਯੋ’’ਤਿਆਦਿਨਾ ਨਯੇਨ ਤੇ ਤੇ ਪਞ੍ਹੇ ਉਦ੍ਧਰਿਤ੍ਵਾ ਪੁਨ ‘‘ਕੁਸਲਾ ਹੇਤੂ ਸਮ੍ਪਯੁਤ੍ਤਕਾਨਂ ਖਨ੍ਧਾਨ’’ਨ੍ਤਿਆਦਿਨਾ ਨਯੇਨ ਸਬ੍ਬੇਪਿ ਤੇ ਪਞ੍ਹਾ ਨਿਜ੍ਜਟਾ ਨਿਗ੍ਗੁਮ੍ਬਾ ਚ ਕਤ੍ਵਾ ਵਿਭਤ੍ਤਾ, ਤਸ੍ਮਾ ਸੋ ਵਾਰੋ ਪਞ੍ਹਾਨਂ ਸਾਧੁਕਂ ਵਿਭਤ੍ਤਤ੍ਤਾ ਪਞ੍ਹਾਵਾਰੋਤ੍ਵੇਵ ਸਙ੍ਖ੍ਯਂ ਗਤੋ. ਰੂਪਾਰੂਪਧਮ੍ਮਵਸੇਨੇਵ ਪਨੇਤ੍ਥ ਪਚ੍ਚਯਾਪਿ ਪਚ੍ਚਯੁਪ੍ਪਨ੍ਨਾਪਿ ਵੇਦਿਤਬ੍ਬਾ.

ਤਤ੍ਥ ਯੋ ਤਾਵ ਏਸ ਸਬ੍ਬਪਠਮੋ ਪਟਿਚ੍ਚਵਾਰੋ ਨਾਮ, ਸੋ ਉਦ੍ਦੇਸਤੋ ਨਿਦ੍ਦੇਸਤੋ ਚ ਦੁਵਿਧੋ ਹੋਤਿ. ਤਤ੍ਥ ਉਦ੍ਦੇਸਵਾਰੋ ਪਠਮੋ, ਪੁਚ੍ਛਾਵਾਰੋਤਿਪਿ ਵੁਚ੍ਚਤਿ. ਪਣ੍ਣਤ੍ਤਿਵਾਰੋਤਿਪਿ ਤਸ੍ਸੇਵ ਨਾਮਂ. ਸੋ ਹਿ ਕੁਸਲਾਦਯੋ ਪਟਿਚ੍ਚ ਕੁਸਲਾਦੀਨਂ ਹੇਤੁਪਚ੍ਚਯਾਦੀਨਂ ਵਸੇਨ ਉਦ੍ਦਿਟ੍ਠਤ੍ਤਾ ਉਦ੍ਦੇਸਵਾਰੋ, ਕੁਸਲਾਦਯੋ ਪਟਿਚ੍ਚ ਹੇਤੁਪਚ੍ਚਯਾਦਿਵਸੇਨ ਕੁਸਲਾਦੀਨਂ ਉਪ੍ਪਤ੍ਤਿਯਾ ਪੁਚ੍ਛਿਤਤ੍ਤਾ ਪੁਚ੍ਛਾਵਾਰੋ, ਕੁਸਲਾਦਯੋ ਪਟਿਚ੍ਚ ਹੇਤੁਪਚ੍ਚਯਾਦਿਵਸੇਨ ਕੁਸਲਾਦੀਨਂ ਉਪ੍ਪਤ੍ਤਿਯਾ ਪਞ੍ਞਾਪਿਤਤ੍ਤਾ ਪਣ੍ਣਤ੍ਤਿਵਾਰੋਤਿਪਿ ਵੁਤ੍ਤੋ.

੨੫-੩੪. ਤਤ੍ਥ ਸਿਯਾ ਕੁਸਲਂ ਧਮ੍ਮਂ ਪਟਿਚ੍ਚ ਕੁਸਲੋ ਧਮ੍ਮੋ ਉਪ੍ਪਜ੍ਜੇਯ੍ਯ ਹੇਤੁਪਚ੍ਚਯਾਤਿ ਪਰਿਕਪ੍ਪਪੁਚ੍ਛਾ. ਅਯਞ੍ਹੇਤ੍ਥ ਅਤ੍ਥੋ – ਯੋ ਕੁਸਲੋ ਧਮ੍ਮੋ ਉਪ੍ਪਜ੍ਜੇਯ੍ਯ ਹੇਤੁਪਚ੍ਚਯਾ, ਕਿਂ ਸੋ ਕੁਸਲਂ ਧਮ੍ਮਂ ਪਟਿਚ੍ਚ ਸਿਯਾਤਿ ਅਥ ਵਾ ਕੁਸਲਂ ਧਮ੍ਮਂ ਪਟਿਚ੍ਚ ਯੋ ਕੁਸਲੋ ਧਮ੍ਮੋ ਉਪ੍ਪਜ੍ਜੇਯ੍ਯ, ਸੋ ਹੇਤੁਪਚ੍ਚਯਾ ਸਿਯਾਤਿ ਅਯਮੇਤ੍ਥ ਅਤ੍ਥੋ. ਤਤ੍ਥ ਪਟੀਤਿ ਸਦਿਸਤ੍ਥੇ ਵਤ੍ਤਤਿ. ਸਦਿਸਪੁਗ੍ਗਲੋ ਹਿ ਪਟਿਪੁਗ੍ਗਲੋ, ਸਦਿਸਭਾਗੋ ਚ ਪਟਿਭਾਗੋਤਿ ਵੁਚ੍ਚਤਿ. ਇਚ੍ਚਾਤਿ ਗਮਨੁਸ੍ਸੁਕ੍ਕਵਚਨਮੇਤਂ. ਉਭਯਂ ਏਕਤੋ ਕਤ੍ਵਾ ਪਟਿਚ੍ਚਾਤਿ ਪਟਿਗਨ੍ਤ੍ਵਾ ਸਹੁਪ੍ਪਤ੍ਤਿਸਙ੍ਖਾਤੇਨ ਸਦਿਸਭਾਵੇਨ ਪਤ੍ਵਾ, ਤੇਨ ਸਦ੍ਧਿਂ ਏਕਤੋ ਉਪ੍ਪਤ੍ਤਿਭਾਵਂ ਉਪਗਨ੍ਤ੍ਵਾਤਿ ਵੁਤ੍ਤਂ ਹੋਤਿ. ਕੁਸਲੋ ਧਮ੍ਮੋਤਿ ਏਵਂ ਸਹੁਪ੍ਪਤ੍ਤਿਭਾਵੇਨ ਕੁਸਲਂ ਧਮ੍ਮਂ ਪਟਿਚ੍ਚ ਕੁਸਲੋ ਧਮ੍ਮੋ ਉਪ੍ਪਜ੍ਜੇਯ੍ਯ ਹੇਤੁਪਚ੍ਚਯਾਤਿ ਪੁਚ੍ਛਤਿ. ਅਥ ਵਾ ਪਟਿਚ੍ਚਾਤਿ ਪਚ੍ਚਯਂ ਕਤ੍ਵਾ. ਤਂ ਪਨ ਪਚ੍ਚਯਕਰਣਂ ਪੁਰੇਜਾਤੇਪਿ ਪਚ੍ਚਯੇ ਲਬ੍ਭਤਿ ਸਹਜਾਤੇਪਿ. ਇਧ ਸਹਜਾਤਂ ਅਧਿਪ੍ਪੇਤਂ. ਸਿਯਾ ਕੁਸਲਂ ਧਮ੍ਮਂ ਪਟਿਚ੍ਚ ਅਕੁਸਲੋਤਿਆਦੀਸੁਪਿ ਏਸੇਵ ਨਯੋ. ਤਤ੍ਥ ਕਿਞ੍ਚਾਪਿ ਸਹਜਾਤਵਸੇਨ ਕੁਸਲਂ ਧਮ੍ਮਂ ਪਟਿਚ੍ਚ ਅਕੁਸਲੋ ਨਤ੍ਥਿ, ਇਮਸ੍ਮਿਂ ਪਨ ਪੁਚ੍ਛਾਵਾਰੇ ਯਮ੍ਪਿ ਵਿਸ੍ਸਜ੍ਜਿਯਮਾਨਂ ਅਤ੍ਥਤੋ ਲਬ੍ਭਤਿ, ਯਮ੍ਪਿ ਨ ਲਬ੍ਭਤਿ, ਤਂ ਸਬ੍ਬਂ ਪੁਚ੍ਛਾਵਸੇਨ ਉਦ੍ਧਟਂ. ਪਰਤੋ ਪਨ ਵਿਸ੍ਸਜ੍ਜਨੇ ਯਂ ਨ ਲਬ੍ਭਤਿ, ਤਂ ਪਹਾਯ ਯਂ ਲਬ੍ਭਤਿ, ਤਦੇਵ ਵਿਸ੍ਸਜ੍ਜਿਤਂ.

ਏਵਮੇਤ੍ਥ ਪੁਚ੍ਛਾਨਂ ਅਤ੍ਥਞ੍ਚੇਵ ਪੁਚ੍ਛਾਗਤਿਞ੍ਚ ਞਤ੍ਵਾ ਇਦਾਨਿ ਗਣਨਵਸੇਨ ਪੁਚ੍ਛਾਪਰਿਚ੍ਛੇਦੋ ਵੇਦਿਤਬ੍ਬੋ. ਏਤ੍ਥ ਹਿ ‘‘ਕੁਸਲਂ ਧਮ੍ਮਂ ਪਟਿਚ੍ਚਾ’’ਤਿ ਕੁਸਲਪਦਂ ਆਦਿਂ ਕਤ੍ਵਾ ਕੁਸਲਾਕੁਸਲਾਬ੍ਯਾਕਤਨ੍ਤਾ ਤਿਸ੍ਸੋ ਪੁਚ੍ਛਾ, ਪੁਨ ਤਦੇਵਾਦਿਂ ਕਤ੍ਵਾ ਕੁਸਲਾਬ੍ਯਾਕਤਾਦਿਵਸੇਨ ਦੁਕਪ੍ਪਭੇਦਨ੍ਤਾ ਤਿਸ੍ਸੋ, ਪੁਨ ਤਦੇਵਾਦਿਂ ਕਤ੍ਵਾ ਤਿਕਨ੍ਤਾ ਚ ਏਕਾ, ਏਵਂ ਕੁਸਲਂ ਧਮ੍ਮਂ ਪਟਿਚ੍ਚਾਤਿ ਕੁਸਲਾਦਿਕਾ ਸਤ੍ਤ ਪੁਚ੍ਛਾ, ਤਥਾ ਅਕੁਸਲਾਦਿਕਾ, ਤਥਾ ਅਬ੍ਯਾਕਤਾਦਿਕਾ, ਤਥਾ ਕੁਸਲਾਬ੍ਯਾਕਤਾਦਿਕਾ, ਅਕੁਸਲਾਬ੍ਯਾਕਤਾਦਿਕਾ, ਕੁਸਲਾਕੁਸਲਾਦਿਕਾ, ਕੁਸਲਾਕੁਸਲਾਬ੍ਯਾਕਤਾਦਿਕਾਤਿ ਸਬ੍ਬਾਪਿ ਸਤ੍ਤਨ੍ਨਂ ਸਤ੍ਤਕਾਨਂ ਵਸੇਨ ਕੁਸਲਤ੍ਤਿਕਂ ਨਿਸ੍ਸਾਯ ਹੇਤੁਪਚ੍ਚਯੇ ਏਕੂਨਪਞ੍ਞਾਸਂ ਪੁਚ੍ਛਾ.

ਤਤ੍ਥ ਏਕਮੂਲਕਾਵਸਾਨਾ ਨਵ, ਏਕਮੂਲਦੁਕਾਵਸਾਨਾ ਨਵ, ਏਕਮੂਲਤਿਕਾਵਸਾਨਾ ਤਿਸ੍ਸੋ, ਦੁਕਮੂਲਏਕਾਵਸਾਨਾ ਨਵ, ਦੁਕਮੂਲਦੁਕਾਵਸਾਨਾ ਨਵ, ਦੁਕਮੂਲਤਿਕਾਵਸਾਨਾ ਤਿਸ੍ਸੋ, ਤਿਕਮੂਲਏਕਾਵਸਾਨਾ ਤਿਸ੍ਸੋ, ਤਿਕਮੂਲਦੁਕਾਵਸਾਨਾ ਤਿਸ੍ਸੋ, ਤਿਕਮੂਲਤਿਕਾਵਸਾਨਾ ਏਕਾਤਿ ਏਵਮੇਤਾ ਮੂਲਵਸੇਨਾਪਿ ਵੇਦਿਤਬ੍ਬਾ. ਯਥਾ ਚ ਹੇਤੁਪਚ੍ਚਯੇ ਏਕੂਨਪਞ੍ਞਾਸਂ, ਆਰਮ੍ਮਣਪਚ੍ਚਯਾਦੀਸੁਪਿ ਤਥੇਵਾਤਿ ਸਬ੍ਬੇਸੁਪਿ ਚਤੁਵੀਸਤਿਯਾ ਪਚ੍ਚਯੇਸੁ –

ਸਹਸ੍ਸਮੇਕਞ੍ਚ ਸਤਂ, ਛਸਤ੍ਤਤਿ ਪੁਨਾਪਰਾ;

ਪੁਚ੍ਛਾ ਸਮ੍ਪਿਣ੍ਡਿਤਾ ਹੋਨ੍ਤਿ, ਨਯਮ੍ਹਿ ਏਕਮੂਲਕੇ.

੩੫-੩੬. ਤਤੋ ਪਰਂ ਹੇਤੁਪਚ੍ਚਯਾ ਆਰਮ੍ਮਣਪਚ੍ਚਯਾਤਿ ਦੁਮੂਲਕਨਯੋ ਆਰਦ੍ਧੋ. ਤਤ੍ਥ ਹੇਤਾਰਮ੍ਮਣਦੁਕੋ…ਪੇ… ਹੇਤੁਅਵਿਗਤਦੁਕੋਤਿ ਹੇਤੁਪਚ੍ਚਯੇਨ ਸਦ੍ਧਿਂ ਤੇਵੀਸਤਿ ਦੁਕਾ ਹੋਨ੍ਤਿ. ਤੇਸੁ ਹੇਤੁਪਚ੍ਚਯੇ ਵਿਯ ਹੇਤਾਰਮ੍ਮਣਦੁਕੇਪਿ ਏਕੂਨਪਞ੍ਞਾਸਂ ਪੁਚ੍ਛਾ, ਤਾਸੁ ਪਾਲ਼ਿਯਂ ਦ੍ਵੇਯੇਵ ਦਸ੍ਸਿਤਾ. ਯਥਾ ਚ ਹੇਤਾਰਮ੍ਮਣਦੁਕੇ ਏਕੂਨਪਞ੍ਞਾਸਂ ਤਥਾ ਹੇਤਾਧਿਪਤਿਦੁਕਾਦੀਸੁਪਿ. ਤਤ੍ਥ ਪਠਮਪੁਚ੍ਛਾਵਸੇਨ ਹੇਤਾਧਿਪਤਿਦੁਕੋ, ਹੇਤਾਨਨ੍ਤਰਦੁਕੋ, ਹੇਤੁਸਮਨਨ੍ਤਰਦੁਕੋਤਿ ਪਟਿਪਾਟਿਯਾ ਤਯੋ ਦੁਕੇ ਦਸ੍ਸੇਤ੍ਵਾ ਪਰਿਯੋਸਾਨੇ ਹੇਤੁਅਵਿਗਤਦੁਕੋ ਦਸ੍ਸਿਤੋ, ਸੇਸਂ ਸਙ੍ਖਿਤ੍ਤਂ. ਪੁਚ੍ਛਾਪਰਿਚ੍ਛੇਦੋ ਪਨੇਤ੍ਥ ਏਵਂ ਵੇਦਿਤਬ੍ਬੋ.

ਸਹਸ੍ਸਮੇਕਞ੍ਚ ਸਤਂ, ਸਤ੍ਤਵੀਸਤਿਮੇਵ ਚ;

ਦੁਕੇਸੁ ਤੇਵੀਸਤਿਯਾ, ਪੁਚ੍ਛਾ ਹੋਨ੍ਤਿ ਦੁਮੂਲਕੇ.

੩੭. ਤਤੋ ਪਰਂ ਹੇਤੁਪਚ੍ਚਯਾ ਆਰਮ੍ਮਣਪਚ੍ਚਯਾ ਅਧਿਪਤਿਪਚ੍ਚਯਾਤਿ ਤਿਮੂਲਕਨਯੋ ਆਰਦ੍ਧੋ. ਤਤ੍ਥ ਹੇਤਾਰਮ੍ਮਣਦੁਕੇਨ ਸਦ੍ਧਿਂ ਅਧਿਪਤਿਪਚ੍ਚਯਾਦੀਸੁ ਬਾਵੀਸਤਿਯਾ ਪਚ੍ਚਯੇਸੁ ਏਕਮੇਕਸ੍ਸ ਯੋਜਨਾਵਸੇਨ ਬਾਵੀਸਤਿ ਤਿਕਾ ਹੋਨ੍ਤਿ. ਤੇਸੁ ਪਠਮਪੁਚ੍ਛਾਵਸੇਨ ਪਠਮਤ੍ਤਿਕਞ੍ਚ ਦੁਤਿਯਤ੍ਤਿਕਞ੍ਚ ਦਸ੍ਸੇਤ੍ਵਾ ਪਰਿਯੋਸਾਨਤਿਕੋ ਦਸ੍ਸਿਤੋ, ਸੇਸਂ ਸਙ੍ਖਿਤ੍ਤਂ. ਯਥਾ ਪਨ ਦੁਕੇਸੁ, ਏਵਂ ਤਿਕੇਸੁਪਿ ਏਕਮੇਕਸ੍ਮਿਂ ਤਿਕੇ ਏਕੂਨਪਞ੍ਞਾਸਂ ਕਤ੍ਵਾ ਸਬ੍ਬੇਸੁਪਿ ਬਾਵੀਸਤਿਯਾ ਤਿਕੇਸੁ –

ਸਹਸ੍ਸਮੇਕਂ ਪੁਚ੍ਛਾਨਂ, ਅਟ੍ਠਸਤ੍ਤਤਿਮੇਵ ਚ;

ਪੁਚ੍ਛਾ ਗਣਨਤੋ ਹੋਨ੍ਤਿ, ਨਯਮ੍ਹਿ ਤਿਕਮੂਲਕੇ.

੩੮. ਤਤੋ ਪਰਂ ਹੇਤੁਪਚ੍ਚਯਾ ਆਰਮ੍ਮਣਪਚ੍ਚਯਾ ਅਧਿਪਤਿਪਚ੍ਚਯਾ ਅਨਨ੍ਤਰਪਚ੍ਚਯਾਤਿ ਚਤੁਮੂਲਕਨਯੋ ਆਰਦ੍ਧੋ. ਤਤ੍ਥ ਪਠਮਤ੍ਤਿਕੇਨ ਸਦ੍ਧਿਂ ਅਨਨ੍ਤਰਪਚ੍ਚਯਾਦੀਸੁ ਏਕਵੀਸਤਿਯਾ ਪਚ੍ਚਯੇਸੁ ਏਕਮੇਕਸ੍ਸ ਯੋਜਨਾਵਸੇਨ ਏਕਵੀਸਤਿ ਚਤੁਕ੍ਕਾ ਹੋਨ੍ਤਿ. ਤੇਸੁ ਦ੍ਵੇ ਚਤੁਕ੍ਕੇ ਦਸ੍ਸੇਤ੍ਵਾ ਸੇਸਂ ਸਙ੍ਖਿਤ੍ਤਂ. ਇਧਾਪਿ ਏਕਮੇਕਸ੍ਮਿਂ ਚਤੁਕ੍ਕੇ ਏਕੂਨਪਞ੍ਞਾਸਂ ਕਤ੍ਵਾ ਸਬ੍ਬੇਸੁਪਿ ਏਕਵੀਸਤਿਯਾ ਚਤੁਕ੍ਕੇਸੁ –

ਸਹਸ੍ਸਮੇਕਂ ਪੁਚ੍ਛਾਨਂ, ਏਕੂਨਤਿਂਸ ਪੁਨਾਪਰਾ;

ਪੁਚ੍ਛਾ ਗਣਨਤੋ ਹੋਨ੍ਤਿ, ਨਯਮ੍ਹਿ ਚਤੁਮੂਲਕੇ.

ਤਤੋ ਪਰਂ ਪਞ੍ਚਮੂਲਕਂ ਆਦਿਂ ਕਤ੍ਵਾ ਯਾਵ ਸਬ੍ਬਮੂਲਕਾ ਦੇਸਨਾ ਕਤਾ, ਤਂ ਸਬ੍ਬਂ ਸਙ੍ਖਿਪਿਤ੍ਵਾ ਹੇਟ੍ਠਾ ਵੁਤ੍ਤਞ੍ਚ ਉਪਰਿ ਵਤ੍ਤਬ੍ਬਞ੍ਚ ਏਕਤੋ ਕਤ੍ਵਾ ਪਾਲ਼ਿਯਂ ‘‘ਏਕਮੂਲਕਂ, ਦੁਮੂਲਕਂ, ਤਿਮੂਲਕਂ, ਚਤੁਮੂਲਕਂ, ਪਞ੍ਚਮੂਲਕਂ, ਸਬ੍ਬਮੂਲਕਂ ਅਸਮ੍ਮੁਯ੍ਹਨ੍ਤੇਨ ਵਿਤ੍ਥਾਰੇਤਬ੍ਬ’’ਨ੍ਤਿ ਨਯੋ ਦਸ੍ਸਿਤੋ. ਤਤ੍ਥ ਏਕਮੂਲਕਾਦੀਸੁ ਯਂ ਵਤ੍ਤਬ੍ਬਂ, ਤਂ ਵੁਤ੍ਤਮੇਵ. ਪਞ੍ਚਮੂਲਕੇ ਪਨ ਪਠਮਚਤੁਕ੍ਕੇਨ ਸਦ੍ਧਿਂ ਸਮਨਨ੍ਤਰਪਚ੍ਚਯਾਦੀਸੁ ਸਮਵੀਸਤਿਯਾ ਪਚ੍ਚਯੇਸੁ ਏਕਮੇਕਸ੍ਸ ਯੋਜਨਾਵਸੇਨ ਸਮਵੀਸਤਿ ਪਞ੍ਚਕਾ ਹੋਨ੍ਤਿ. ਤੇਸੁ ਏਕਮੇਕਸ੍ਮਿਂ ਏਕੂਨਪਞ੍ਞਾਸਂ ਕਤ੍ਵਾ –

ਸਤਾਨਿ ਨਵ ਪੁਚ੍ਛਾਨਂ, ਅਸੀਤਿ ਚ ਪੁਨਾਪਰਾ;

ਪੁਚ੍ਛਾ ਗਣਨਤੋ ਹੋਨ੍ਤਿ, ਨਯਮ੍ਹਿ ਪਞ੍ਚਮੂਲਕੇ.

ਛਮੂਲਕੇ ਪਠਮਪਞ੍ਚਕੇਨ ਸਦ੍ਧਿਂ ਸਹਜਾਤਪਚ੍ਚਯਾਦੀਸੁ ਏਕੂਨਵੀਸਤਿਯਾ ਪਚ੍ਚਯੇਸੁ ਏਕਮੇਕਸ੍ਸ ਯੋਜਨਾਵਸੇਨ ਏਕੂਨਵੀਸਤਿ ਛਕ੍ਕਾ ਹੋਨ੍ਤਿ. ਤੇਸੁ ਏਕਮੇਕਸ੍ਮਿਂ ਏਕੂਨਪਞ੍ਞਾਸਂ ਕਤ੍ਵਾ –

ਸਤਾਨਿ ਨਵ ਪੁਚ੍ਛਾਨਂ, ਏਕਤਿਂਸ ਤਤੋਪਰਾ;

ਪੁਚ੍ਛਾ ਗਣਨਤੋ ਹੋਨ੍ਤਿ, ਨਯਮ੍ਹਿ ਛਕ੍ਕਮੂਲਕੇ.

ਸਤ੍ਤਮੂਲਕੇ ਪਠਮਛਕ੍ਕੇਨ ਸਦ੍ਧਿਂ ਅਞ੍ਞਮਞ੍ਞਪਚ੍ਚਯਾਦੀਸੁ ਅਟ੍ਠਾਰਸਸੁ ਪਚ੍ਚਯੇਸੁ ਏਕਮੇਕਸ੍ਸ ਯੋਜਨਾਵਸੇਨ ਅਟ੍ਠਾਰਸ ਸਤ੍ਤਕਾ ਹੋਨ੍ਤਿ. ਤੇਸੁ ਏਕਮੇਕਸ੍ਮਿਂ ਏਕੂਨਪਞ੍ਞਾਸਂ ਕਤ੍ਵਾ –

ਸਤਾਨਿ ਅਟ੍ਠ ਪੁਚ੍ਛਾਨਂ, ਦ੍ਵਾਸੀਤਿ ਚ ਤਤੋਪਰਾ;

ਪੁਚ੍ਛਾ ਗਣਨਤੋ ਹੋਨ੍ਤਿ, ਨਯਮ੍ਹਿ ਸਤ੍ਤਮੂਲਕੇ.

ਅਟ੍ਠਮੂਲਕੇ ਪਠਮਸਤ੍ਤਕੇਨ ਸਦ੍ਧਿਂ ਨਿਸ੍ਸਯਪਚ੍ਚਯਾਦੀਸੁ ਸਤ੍ਤਰਸਸੁ ਪਚ੍ਚਯੇਸੁ ਏਕਮੇਕਸ੍ਸ ਯੋਜਨਾਵਸੇਨ ਸਤ੍ਤਰਸ ਅਟ੍ਠਕਾ ਹੋਨ੍ਤਿ. ਤੇਸੁ ਏਕਮੇਕਸ੍ਮਿਂ ਏਕੂਨਪਞ੍ਞਾਸਂ ਕਤ੍ਵਾ –

ਸਤਾਨਿ ਅਟ੍ਠ ਪੁਚ੍ਛਾਨਂ, ਤੇਤ੍ਤਿਂਸਾ ਚ ਤਤੋਪਰਾ;

ਪੁਚ੍ਛਾ ਗਣਨਤੋ ਹੋਨ੍ਤਿ, ਨਯਮ੍ਹਿ ਅਟ੍ਠਮੂਲਕੇ.

ਨਵਮੂਲਕੇ ਪਠਮਅਟ੍ਠਕੇਨ ਸਦ੍ਧਿਂ ਉਪਨਿਸ੍ਸਯਪਚ੍ਚਯਾਦੀਸੁ ਸੋਲ਼ਸਸੁ ਪਚ੍ਚਯੇਸੁ ਏਕਮੇਕਸ੍ਸ ਯੋਜਨਾਵਸੇਨ ਸੋਲ਼ਸ ਨਵਕਾ ਹੋਨ੍ਤਿ. ਤੇਸੁ ਏਕਮੇਕਸ੍ਮਿਂ ਏਕੂਨਪਞ੍ਞਾਸਂ ਕਤ੍ਵਾ –

ਸਤਾਨਿ ਸਤ੍ਤ ਪੁਚ੍ਛਾਨਂ, ਚਤੁਰਾਸੀਤਿ ਤਤੋਪਰਾ;

ਪੁਚ੍ਛਾ ਗਣਨਤੋ ਹੋਨ੍ਤਿ, ਨਯਮ੍ਹਿ ਨਵਮੂਲਕੇ.

ਦਸਮੂਲਕੇ ਪਠਮਨਵਕੇਨ ਸਦ੍ਧਿਂ ਪੁਰੇਜਾਤਪਚ੍ਚਯਾਦੀਸੁ ਪਨ੍ਨਰਸਸੁ ਪਚ੍ਚਯੇਸੁ ਏਕਮੇਕਸ੍ਸ ਯੋਜਨਾਵਸੇਨ ਪਨ੍ਨਰਸ ਦਸਕਾ ਹੋਨ੍ਤਿ. ਤੇਸੁ ਏਕਮੇਕਸ੍ਮਿਂ ਏਕੂਨਪਞ੍ਞਾਸਂ ਕਤ੍ਵਾ –

ਸਤਾਨਿ ਸਤ੍ਤ ਪੁਚ੍ਛਾਨਂ, ਪਞ੍ਚਤਿਂਸ ਤਤੋਪਰਾ;

ਪੁਚ੍ਛਾ ਗਣਨਤੋ ਹੋਨ੍ਤਿ, ਨਯਮ੍ਹਿ ਦਸਮੂਲਕੇ.

ਏਕਾਦਸਮੂਲਕੇ ਪਠਮਦਸਕੇਨ ਸਦ੍ਧਿਂ ਪਚ੍ਛਾਜਾਤਪਚ੍ਚਯਾਦੀਸੁ ਚੁਦ੍ਦਸਸੁ ਪਚ੍ਚਯੇਸੁ ਏਕਮੇਕਸ੍ਸ ਯੋਜਨਾਵਸੇਨ ਚੁਦ੍ਦਸ ਏਕਾਦਸਕਾ ਹੋਨ੍ਤਿ. ਤੇਸੁ ਏਕਮੇਕਸ੍ਮਿਂ ਏਕੂਨਪਞ੍ਞਾਸਂ ਕਤ੍ਵਾ –

ਛ ਸਤਾਨਿ ਚ ਪੁਚ੍ਛਾਨਂ, ਛਲ਼ਾਸੀਤਿ ਤਤੋਪਰਾ;

ਨਯਮ੍ਹਿ ਪੁਚ੍ਛਾ ਗਣਿਤਾ, ਏਕਾਦਸਕਮੂਲਕੇ.

ਦ੍ਵਾਦਸਮੂਲਕੇ ਪਠਮਏਕਾਦਸਕੇਨ ਸਦ੍ਧਿਂ ਆਸੇਵਨਪਚ੍ਚਯਾਦੀਸੁ ਤੇਰਸਸੁ ਪਚ੍ਚਯੇਸੁ ਏਕਮੇਕਸ੍ਸ ਯੋਜਨਾਵਸੇਨ ਤੇਰਸ ਦ੍ਵਾਦਸਕਾ ਹੋਨ੍ਤਿ. ਤੇਸੁ ਏਕਮੇਕਸ੍ਮਿਂ ਏਕੂਨਪਞ੍ਞਾਸਂ ਕਤ੍ਵਾ –

ਛ ਸਤਾਨਿ ਚ ਪੁਚ੍ਛਾਨਂ, ਸਤ੍ਤਤਿਂਸ ਤਤੋਪਰਾ;

ਪੁਚ੍ਛਾ ਗਣਨਤੋ ਹੋਨ੍ਤਿ, ਨਯੇ ਦ੍ਵਾਦਸਮੂਲਕੇ.

ਤੇਰਸਮੂਲਕੇ ਪਠਮਦ੍ਵਾਦਸਕੇਨ ਸਦ੍ਧਿਂ ਕਮ੍ਮਪਚ੍ਚਯਾਦੀਸੁ ਦ੍ਵਾਦਸਸੁ ਪਚ੍ਚਯੇਸੁ ਏਕਮੇਕਸ੍ਸ ਯੋਜਨਾਵਸੇਨ ਦ੍ਵਾਦਸ ਤੇਰਸਕਾ ਹੋਨ੍ਤਿ. ਤੇਸੁ ਏਕਮੇਕਸ੍ਮਿਂ ਏਕੂਨਪਞ੍ਞਾਸਂ ਕਤ੍ਵਾ –

ਸਤਾਨਿ ਪਞ੍ਚ ਪੁਚ੍ਛਾਨਂ, ਅਟ੍ਠਾਸੀਤਿ ਪੁਨਾਪਰਾ;

ਪੁਚ੍ਛਾ ਗਣਨਤੋ ਹੋਨ੍ਤਿ, ਨਯੇ ਤੇਰਸਮੂਲਕੇ.

ਚੁਦ੍ਦਸਮੂਲਕੇ ਪਠਮਤੇਰਸਕੇਨ ਸਦ੍ਧਿਂ ਵਿਪਾਕਪਚ੍ਚਯਾਦੀਸੁ ਏਕਾਦਸਸੁ ਪਚ੍ਚਯੇਸੁ ਏਕਮੇਕਸ੍ਸ ਯੋਜਨਾਵਸੇਨ ਏਕਾਦਸ ਚੁਦ੍ਦਸਕਾ ਹੋਨ੍ਤਿ. ਤੇਸੁ ਏਕਮੇਕਸ੍ਮਿਂ ਏਕੂਨਪਞ੍ਞਾਸਂ ਕਤ੍ਵਾ –

ਸਤਾਨਿ ਪਞ੍ਚ ਪੁਚ੍ਛਾਨਂ, ਤਿਂਸ ਚਾਥ ਨਵਾਪਰਾ;

ਪੁਚ੍ਛਾ ਗਣਨਤੋ ਹੋਨ੍ਤਿ, ਨਯੇ ਚੁਦ੍ਦਸਮੂਲਕੇ.

ਪਨ੍ਨਰਸਮੂਲਕੇ ਪਠਮਚੁਦ੍ਦਸਕੇਨ ਸਦ੍ਧਿਂ ਆਹਾਰਪਚ੍ਚਯਾਦੀਸੁ ਦਸਸੁ ਪਚ੍ਚਯੇਸੁ ਏਕਮੇਕਸ੍ਸ ਯੋਜਨਾਵਸੇਨ ਦਸ ਪਨ੍ਨਰਸਕਾ ਹੋਨ੍ਤਿ. ਤੇਸੁ ਏਕਮੇਕਸ੍ਮਿਂ ਏਕੂਨਪਞ੍ਞਾਸਂ ਕਤ੍ਵਾ –

ਸਤਾਨਿ ਚਤ੍ਤਾਰਿ ਪੁਚ੍ਛਾਨਂ, ਨਵੁਤਿ ਚ ਤਤੋਪਰਾ;

ਪੁਚ੍ਛਾ ਗਣਨਤੋ ਹੋਨ੍ਤਿ, ਨਯੇ ਪਨ੍ਨਰਸਮੂਲਕੇ.

ਸੋਲ਼ਸਮੂਲਕੇ ਪਠਮਪਨ੍ਨਰਸਕੇਨ ਸਦ੍ਧਿਂ ਇਨ੍ਦ੍ਰਿਯਪਚ੍ਚਯਾਦੀਸੁ ਨਵਸੁ ਪਚ੍ਚਯੇਸੁ ਏਕਮੇਕਸ੍ਸ ਯੋਜਨਾਵਸੇਨ ਨਵ ਸੋਲ਼ਸਕਾ ਹੋਨ੍ਤਿ. ਤੇਸੁ ਏਕਮੇਕਸ੍ਮਿਂ ਏਕੂਨਪਞ੍ਞਾਸਂ ਕਤ੍ਵਾ –

ਸਤਾਨਿ ਚਤ੍ਤਾਰਿ ਚਤ੍ਤਾ-ਲੀਸੇਕਾ ਚੇਵ ਪੁਨਾਪਰਾ;

ਪੁਚ੍ਛਾ ਗਣਨਤੋ ਹੋਨ੍ਤਿ, ਨਯੇ ਸੋਲ਼ਸਮੂਲਕੇ.

ਸਤ੍ਤਰਸਮੂਲਕੇ ਪਠਮਸੋਲ਼ਸਕੇਨ ਸਦ੍ਧਿਂ ਝਾਨਪਚ੍ਚਯਾਦੀਸੁ ਅਟ੍ਠਸੁ ਪਚ੍ਚਯੇਸੁ ਏਕਮੇਕਸ੍ਸ ਯੋਜਨਾਵਸੇਨ ਅਟ੍ਠ ਸਤ੍ਤਰਸਕਾ ਹੋਨ੍ਤਿ. ਤੇਸੁ ਏਕਮੇਕਸ੍ਮਿਂ ਏਕੂਨਪਞ੍ਞਾਸਂ ਕਤ੍ਵਾ –

ਸਤਾਨਿ ਤੀਣਿ ਪੁਚ੍ਛਾਨਂ, ਨਵੁਤਿ ਦ੍ਵੇ ਪੁਨਾਪਰਾ;

ਪੁਚ੍ਛਾ ਗਣਨਤੋ ਹੋਨ੍ਤਿ, ਨਯੇ ਸਤ੍ਤਰਸਮੂਲਕੇ.

ਅਟ੍ਠਾਰਸਮੂਲਕੇ ਪਠਮਸਤ੍ਤਰਸਕੇਨ ਸਦ੍ਧਿਂ ਮਗ੍ਗਪਚ੍ਚਯਾਦੀਸੁ ਸਤ੍ਤਸੁ ਪਚ੍ਚਯੇਸੁ ਏਕਮੇਕਸ੍ਸ ਯੋਜਨਾਵਸੇਨ ਸਤ੍ਤ ਅਟ੍ਠਾਰਸਕਾ ਹੋਨ੍ਤਿ. ਤੇਸੁ ਏਕਮੇਕਸ੍ਮਿਂ ਏਕੂਨਪਞ੍ਞਾਸਂ ਕਤ੍ਵਾ –

ਸਤਾਨਿ ਤੀਣਿ ਪੁਚ੍ਛਾਨਂ, ਤੇਚਤ੍ਤਾਰੀਸਮੇਵ ਚ;

ਪੁਚ੍ਛਾ ਗਣਨਤੋ ਹੋਨ੍ਤਿ, ਨਯੇ ਅਟ੍ਠਾਰਸਮੂਲਕੇ.

ਏਕੂਨਵੀਸਤਿਮੂਲਕੇ ਪਠਮਅਟ੍ਠਾਰਸਕੇਨ ਸਦ੍ਧਿਂ ਸਮ੍ਪਯੁਤ੍ਤਪਚ੍ਚਯਾਦੀਸੁ ਛਸੁ ਪਚ੍ਚਯੇਸੁ ਏਕਮੇਕਸ੍ਸ ਯੋਜਨਾਵਸੇਨ ਛ ਏਕੂਨਵੀਸਤਿਕਾ ਹੋਨ੍ਤਿ. ਤੇਸੁ ਏਕਮੇਕਸ੍ਮਿਂ ਏਕੂਨਪਞ੍ਞਾਸਂ ਕਤ੍ਵਾ –

ਦ੍ਵੇ ਸਤਾ ਨਵੁਤਿ ਚੇਵ, ਚਤਸ੍ਸੋ ਚ ਪੁਨਾਪਰਾ;

ਪੁਚ੍ਛਾ ਗਣਨਤੋ ਹੋਨ੍ਤਿ, ਨਯੇ ਏਕੂਨਵੀਸਤਿਕੇ.

ਵੀਸਤਿਮੂਲਕੇ ਪਠਮਏਕੂਨਵੀਸਤਿਕੇਨ ਸਦ੍ਧਿਂ ਵਿਪ੍ਪਯੁਤ੍ਤਪਚ੍ਚਯਾਦੀਸੁ ਪਞ੍ਚਸੁ ਪਚ੍ਚਯੇਸੁ ਏਕਮੇਕਸ੍ਸ ਯੋਜਨਾਵਸੇਨ ਪਞ੍ਚਵੀਸਤਿਕਾ ਹੋਨ੍ਤਿ. ਤੇਸੁ ਏਕਮੇਕਸ੍ਮਿਂ ਏਕੂਨਪਞ੍ਞਾਸਂ ਕਤ੍ਵਾ –

ਦ੍ਵੇ ਸਤਾ ਹੋਨ੍ਤਿ ਪੁਚ੍ਛਾਨਂ, ਚਤ੍ਤਾਲੀਸਾ ਚ ਪਞ੍ਚ ਚ;

ਪੁਚ੍ਛਾ ਗਣਨਤੋ ਹੋਨ੍ਤਿ, ਨਯੇ ਵੀਸਤਿਮੂਲਕੇ.

ਏਕਵੀਸਤਿਮੂਲਕੇ ਪਠਮਵੀਸਤਿਕੇਨ ਸਦ੍ਧਿਂ ਅਤ੍ਥਿਪਚ੍ਚਯਾਦੀਸੁ ਚਤੂਸੁ ਪਚ੍ਚਯੇਸੁ ਏਕਮੇਕਸ੍ਸ ਯੋਜਨਾਵਸੇਨ ਚਤ੍ਤਾਰੋ ਏਕਵੀਸਤਿਕਾ ਹੋਨ੍ਤਿ. ਤੇਸੁ ਏਕਮੇਕਸ੍ਮਿਂ ਏਕੂਨਪਞ੍ਞਾਸਂ ਕਤ੍ਵਾ –

ਸਤਂ ਛਨਵੁਤਿ ਚੇਵ, ਪੁਚ੍ਛਾ ਹੋਨ੍ਤਿ ਸਮ੍ਪਿਣ੍ਡਿਤਾ;

ਗਣਿਤਾ ਲਕ੍ਖਣਞ੍ਞੂਹਿ, ਏਕਵੀਸਤਿਕੇ ਨਯੇ.

ਦ੍ਵਾਵੀਸਤਿਮੂਲਕੇ ਪਠਮਏਕਵੀਸਤਿਕੇਨ ਸਦ੍ਧਿਂ ਨਤ੍ਥਿਪਚ੍ਚਯਾਦੀਸੁ ਤੀਸੁ ਪਚ੍ਚਯੇਸੁ ਏਕਮੇਕਸ੍ਸ ਯੋਜਨਾਵਸੇਨ ਤਯੋ ਦ੍ਵਾਵੀਸਤਿਕਾ ਹੋਨ੍ਤਿ. ਤੇਸੁ ਏਕਮੇਕਸ੍ਮਿਂ ਏਕੂਨਪਞ੍ਞਾਸਂ ਕਤ੍ਵਾ –

ਚਤ੍ਤਾਲੀਸਾਧਿਕਂ ਸਤਂ, ਸਤ੍ਤ ਚੇਵ ਪੁਨਾਪਰਾ;

ਪੁਚ੍ਛਾ ਗਣਨਤੋ ਹੋਨ੍ਤਿ, ਨਯੇ ਦ੍ਵਾਵੀਸਤਿਮੂਲਕੇ.

ਤੇਵੀਸਤਿਮੂਲਕੇ ਪਠਮਦ੍ਵਾਵੀਸਤਿਕੇਨ ਸਦ੍ਧਿਂ ਦ੍ਵੀਸੁ ਵਿਗਤਾਵਿਗਤਪਚ੍ਚਯੇਸੁ ਏਕਮੇਕਸ੍ਸ ਯੋਜਨਾਵਸੇਨ ਦ੍ਵੇ ਤੇਵੀਸਤਿਕਾ ਹੋਨ੍ਤਿ. ਤੇਸੁ ਏਕਮੇਕਸ੍ਮਿਂ ਏਕੂਨਪਞ੍ਞਾਸਂ ਕਤ੍ਵਾ –

ਅਟ੍ਠਨਵੁਤਿਮੇਵਿਧ, ਪੁਚ੍ਛਾ ਗਣਨਤੋ ਮਤਾ;

ਨਯਮ੍ਹਿ ਤੇਵੀਸਤਿਮੇ, ਤੇਵੀਸਤਿਕਮੂਲਕੇ.

ਚਤੁਵੀਸਤਿਮੂਲਕੋ ਪਨ ਸਬ੍ਬਪਚ੍ਚਯਾਨਂ ਸਮੋਧਾਨਵਸੇਨ ਵੇਦਿਤਬ੍ਬੋ, ਤੇਨੇਵ ਸਬ੍ਬਮੂਲਕੋਤਿ ਵੁਤ੍ਤੋ. ਤਤ੍ਥ ਏਕੂਨਪਞ੍ਞਾਸਮੇਵ ਪੁਚ੍ਛਾ ਹੋਨ੍ਤੀਤਿ ਸਬ੍ਬਾਪੇਤਾ ਹੇਤੁਪਚ੍ਚਯਪਦਮੇਵ ਗਹੇਤ੍ਵਾ ਏਕਮੂਲਕਾਦੀਨਂ ਸਬ੍ਬਮੂਲਕਪਰਿਯੋਸਾਨਾਨਂ ਵਸੇਨ ਸਤ੍ਥਾਰਾ ਦੇਵਪਰਿਸਤਿ ਵਿਤ੍ਥਾਰਤੋ ਵਿਭਤ੍ਤਾ ਪੁਚ੍ਛਾ ਇਧ ਸਙ੍ਖੇਪੇਨ ਦਸ੍ਸਿਤਾ.

ਤਾਸਂ ਪਨ ਸਬ੍ਬਾਸਮ੍ਪਿ ਅਯਂ ਗਣਨਪਿਣ੍ਡੋ – ਏਕਮੂਲਕਨਯਸ੍ਮਿਞ੍ਹਿ ਏਕਾਦਸ ਸਤਾਨਿ ਛਸਤ੍ਤਤਿ ਚ ਪੁਚ੍ਛਾ ਆਗਤਾ. ਹੇਤੁਪਚ੍ਚਯਨਯੇ ਤੇਨੇਵ ਮੂਲਕੇਨ ਏਕੂਨਪਞ੍ਞਾਸਂ ਕਤ੍ਵਾ ਇਮਸ੍ਮਿਂ ਹੇਤੁਪਚ੍ਚਯਮੂਲਕੇ ਗਹੇਤਬ੍ਬਾ, ਸੇਸਾ ਸੇਸਪਚ੍ਚਯਮੂਲਕੇਸੁ ਪਕ੍ਖਿਪਿਤਬ੍ਬਾ. ਦੁਮੂਲਕੇ ਸਤ੍ਤਵੀਸਾਨਿ ਏਕਾਦਸ ਸਤਾਨਿ, ਤਿਮੂਲਕੇ ਸਹਸ੍ਸਂ ਅਟ੍ਠਸਤ੍ਤਤਿ ਚ, ਚਤੁਮੂਲਕੇ ਸਹਸ੍ਸਂ ਏਕੂਨਤਿਂਸਞ੍ਚ, ਪਞ੍ਚਮੂਲਕੇ ਅਸੀਤਾਧਿਕਾਨਿ ਨਵ ਸਤਾਨਿ, ਛਮੂਲਕੇ ਏਕਤਿਂਸਾਨਿ ਨਵ ਸਤਾਨਿ, ਸਤ੍ਤਮੂਲਕੇ ਦ੍ਵਾਸੀਤਾਨਿ ਅਟ੍ਠ ਸਤਾਨਿ, ਅਟ੍ਠਮੂਲਕੇ ਤੇਤ੍ਤਿਂਸਾਨਿ ਅਟ੍ਠ ਸਤਾਨਿ, ਨਵਮੂਲਕੇ ਚਤੁਰਾਸੀਤਾਨਿ ਸਤ੍ਤ ਸਤਾਨਿ, ਦਸਮੂਲਕੇ ਪਞ੍ਚਤਿਂਸਾਨਿ ਸਤ੍ਤ ਸਤਾਨਿ, ਏਕਾਦਸਮੂਲਕੇ ਛਾਸੀਤਾਨਿ ਛ ਸਤਾਨਿ, ਦ੍ਵਾਦਸਮੂਲਕੇ ਸਤ੍ਤਤਿਂਸਾਨਿ ਛ ਸਤਾਨਿ, ਤੇਰਸਮੂਲਕੇ ਅਟ੍ਠਾਸੀਤਾਨਿ ਪਞ੍ਚ ਸਤਾਨਿ, ਚੁਦ੍ਦਸਮੂਲਕੇ ਏਕੂਨਚਤ੍ਤਾਲੀਸਾਨਿ ਪਞ੍ਚ ਸਤਾਨਿ, ਪਨ੍ਨਰਸਮੂਲਕੇ ਨਵੁਤਾਨਿ ਚਤ੍ਤਾਰਿ ਸਤਾਨਿ, ਸੋਲ਼ਸਮੂਲਕੇ ਏਕਚਤ੍ਤਾਲੀਸਾਨਿ ਚਤ੍ਤਾਰਿ ਸਤ੍ਤਾਨਿ, ਸਤ੍ਤਰਸਮੂਲਕੇ ਦ੍ਵਾਨਵੁਤਾਨਿ ਤੀਣਿ ਸਤਾਨਿ, ਅਟ੍ਠਾਰਸਮੂਲਕੇ ਤੇਚਤ੍ਤਾਲੀਸਾਨਿ ਤੀਣਿ ਸਤਾਨਿ, ਏਕੂਨਵੀਸਤਿਮੂਲਕੇ ਚਤੁਨਵੁਤਾਨਿ ਦ੍ਵੇ ਸਤਾਨਿ, ਵੀਸਤਿਮੂਲਕੇ ਪਞ੍ਚਚਤ੍ਤਾਲੀਸਾਨਿ ਦ੍ਵੇ ਸਤਾਨਿ, ਏਕਵੀਸਤਿਮੂਲਕੇ ਛਨਵੁਤਿਸਤਂ, ਦ੍ਵਾਵੀਸਤਿਮੂਲਕੇ ਸਤ੍ਤਚਤ੍ਤਾਲੀਸਸਤਂ, ਤੇਵੀਸਤਿਮੂਲਕੇ ਅਟ੍ਠਨਵੁਤਿ, ਸਬ੍ਬਮੂਲਕੇ ਏਕੂਨਪਞ੍ਞਾਸਾਤਿ ਏਵਂ ਹੇਤੁਪਦਂ ਆਦਿਂ ਕਤ੍ਵਾ ਵਿਭਤ੍ਤੇਸੁ ਏਕਮੂਲਕਾਦੀਸੁ –

ਚੁਦ੍ਦਸੇਵ ਸਹਸ੍ਸਾਨਿ, ਪੁਨ ਸਤ੍ਤ ਸਤਾਨਿ ਚ;

ਪੁਚ੍ਛਾ ਹੇਤੁਪਦਸ੍ਸੇਵ, ਏਕਮੂਲਾਦਿਭੇਦਤੋਤਿ.

੩੯-੪੦. ਏਵਂ ਹੇਤੁਪਚ੍ਚਯਂ ਆਦਿਂ ਕਤ੍ਵਾ ਏਕਮੂਲਕਤੋ ਪਟ੍ਠਾਯ ਯਾਵ ਸਬ੍ਬਮੂਲਕਨਯਾ ਪੁਚ੍ਛਾਭੇਦਂ ਦਸ੍ਸੇਤ੍ਵਾ ਇਦਾਨਿ ਆਰਮ੍ਮਣਪਚ੍ਚਯਂ ਆਦਿਂ ਕਤ੍ਵਾ ਦਸ੍ਸੇਤੁਂ ਸਿਯਾ ਕੁਸਲਂ ਧਮ੍ਮਂ ਪਟਿਚ੍ਚ ਕੁਸਲੋ ਧਮ੍ਮੋ ਉਪ੍ਪਜ੍ਜੇਯ੍ਯ ਆਰਮ੍ਮਣਪਚ੍ਚਯਾ ਹੇਤੁਪਚ੍ਚਯਾਤਿਆਦਿਮਾਹ. ਤਤ੍ਥ ਆਰਮ੍ਮਣਪਚ੍ਚਯਾ ਹੇਤੁਪਚ੍ਚਯਾਤਿ ਏਤ੍ਤਾਵਤਾ ਆਰਮ੍ਮਣਪਚ੍ਚਯਂ ਆਦਿਂ ਕਤ੍ਵਾ ਹੇਤੁਪਚ੍ਚਯਪਰਿਯੋਸਾਨੋ ਏਕਮੂਲਕਨਯੋ ਦਸ੍ਸਿਤੋ. ਤਤੋ ਪਰਂ ਆਰਮ੍ਮਣਪਚ੍ਚਯਾ ਅਧਿਪਤਿਪਚ੍ਚਯਾਤਿ ਦੁਕਮੂਲਕਂ ਆਰਦ੍ਧਂ. ਤਤ੍ਥ ਇਮਂ ਪਠਮਦੁਕਞ੍ਚੇਵ ਆਰਮ੍ਮਣਾਵਿਗਤਦੁਕਞ੍ਚ ਦਸ੍ਸੇਤ੍ਵਾ ਸੇਸਂ ਸਙ੍ਖਿਤ੍ਤਂ. ਆਰਮ੍ਮਣਪਚ੍ਚਯਾ ਹੇਤੁਪਚ੍ਚਯਾਤਿ ਅਯਂ ਓਸਾਨਦੁਕੋਪਿ ਨ ਦਸ੍ਸਿਤੋ. ਸਚੇ ਪਨ ਕਤ੍ਥਚਿ ਵਾਚਨਾਮਗ੍ਗੇ ਸਨ੍ਦਿਸ੍ਸਤਿ, ਸ੍ਵੇਵ ਵਾਚਨਾਮਗ੍ਗੋ ਗਹੇਤਬ੍ਬੋ. ਤਤੋ ਪਰਂ ਆਰਮ੍ਮਣਪਚ੍ਚਯਵਸੇਨ ਤਿਕਮੂਲਕਾਦਯੋ ਅਦਸ੍ਸੇਤ੍ਵਾਵ ਅਧਿਪਤਿਪਚ੍ਚਯਂ ਆਦਿਂ ਕਤ੍ਵਾ ਏਕਕਾਦਯੋ ਦਸ੍ਸੇਤੁਂ ਅਧਿਪਤਿਪਚ੍ਚਯਾ, ਅਨਨ੍ਤਰਪਚ੍ਚਯਾ, ਸਮਨਨ੍ਤਰਪਚ੍ਚਯਾ, ਸਹਜਾਤਪਚ੍ਚਯਾ, ਅਞ੍ਞਮਞ੍ਞਪਚ੍ਚਯਾਤਿ ਏਤ੍ਤਕਮੇਵ ਵੁਤ੍ਤਂ, ਤਂ ਏਕਮੂਲਕਵਸੇਨ ਵਾ ਸਬ੍ਬਮੂਲਕਵਸੇਨ ਵਾ ਵੇਦਿਤਬ੍ਬਂ.

੪੧. ਤਤੋ ਪਰਂ ਅਵਿਗਤਪਚ੍ਚਯਂ ਆਦਿਂ ਕਤ੍ਵਾ ਦੁਮੂਲਕਮੇਵ ਦਸ੍ਸੇਤੁਂ – ਅਵਿਗਤਪਚ੍ਚਯਾ ਹੇਤੁਪਚ੍ਚਯਾਤਿਆਦਿ ਆਰਦ੍ਧਂ. ਤਤ੍ਥ ਅਵਿਗਤਹੇਤੁਦੁਕੋ, ਅਵਿਗਤਾਰਮ੍ਮਣਦੁਕੋ, ਅਵਿਗਤਾਧਿਪਤਿਦੁਕੋਤਿ ਪਟਿਪਾਟਿਯਾ ਤਯੋ ਦੁਕੇ ਵਤ੍ਵਾ ਪਰਿਯੋਸਾਨੇ ਚ ਅਵਿਗਤਵਿਗਤਦੁਕੋ ਏਕੋ ਦੁਕੋ ਦਸ੍ਸਿਤੋ. ਤਤੋ ਅਵਿਗਤਪਚ੍ਚਯਵਸੇਨੇਵ ਤਿਮੂਲਕਂ ਦਸ੍ਸੇਤੁਂ – ‘‘ਅਵਿਗਤਪਚ੍ਚਯਾ ਹੇਤੁਪਚ੍ਚਯਾ ਆਰਮ੍ਮਣਪਚ੍ਚਯਾ, ਅਵਿਗਤਪਚ੍ਚਯਾ ਹੇਤੁਪਚ੍ਚਯਾ ਅਧਿਪਤਿਪਚ੍ਚਯਾ, ਅਵਿਗਤਪਚ੍ਚਯਾ ਹੇਤੁਪਚ੍ਚਯਾ ਅਨਨ੍ਤਰਪਚ੍ਚਯਾ’’ਤਿ ਏਵਂ ਪਟਿਪਾਟਿਯਾ ਤਯੋ ਤਿਕੇ ਵਤ੍ਵਾ ‘‘ਅਵਿਗਤਪਚ੍ਚਯਾ ਹੇਤੁਪਚ੍ਚਯਾ ਵਿਗਤਪਚ੍ਚਯਾ’’ਤਿ ਪਰਿਯੋਸਾਨਤ੍ਤਿਕੋ ਵੁਤ੍ਤੋ. ਤਤੋ ਅਵਿਗਤਪਚ੍ਚਯਵਸੇਨੇਵ ਚਤੁਮੂਲਕਂ ਦਸ੍ਸੇਤੁਂ ‘‘ਅਵਿਗਤਪਚ੍ਚਯਾ ਹੇਤੁਪਚ੍ਚਯਾ ਆਰਮ੍ਮਣਪਚ੍ਚਯਾ ਅਧਿਪਤਿਪਚ੍ਚਯਾ, ਅਵਿਗਤਪਚ੍ਚਯਾ ਹੇਤੁਪਚ੍ਚਯਾ ਆਰਮ੍ਮਣਪਚ੍ਚਯਾ ਅਨਨ੍ਤਰਪਚ੍ਚਯਾ’’ਤਿ ਦ੍ਵੇ ਚਤੁਕ੍ਕੇ ਵਤ੍ਵਾ ‘‘ਵਿਗਤਪਚ੍ਚਯਾ’’ਤਿ ਪਦਂ ਉਦ੍ਧਰਿਤ੍ਵਾ ਠਪਿਤਂ, ਸੇਸਂ ਸਬ੍ਬਂ ਸਙ੍ਖਿਤ੍ਤਂ. ਤਸ੍ਸ ਸਙ੍ਖਿਤ੍ਤਭਾਵਂ ਦਸ੍ਸੇਤੁਂ ‘‘ਏਕੇਕਸ੍ਸ ਪਦਸ੍ਸ ਏਕਮੂਲਕਂ, ਦੁਮੂਲਕਂ, ਤਿਮੂਲਕਂ, ਸਬ੍ਬਮੂਲਕਂ ਅਸਮ੍ਮੁਯ੍ਹਨ੍ਤੇਨ ਵਿਤ੍ਥਾਰੇਤਬ੍ਬ’’ਨ੍ਤਿ ਵੁਤ੍ਤਂ. ਤਸ੍ਮਾ ਯਥਾ ਹੇਤੁਪਚ੍ਚਯਂ ਆਦਿਂ ਕਤ੍ਵਾ ਹੇਤੁਆਦਿਪਦਵਸੇਨ ਏਕਮੂਲਕੇ ਏਕਾਦਸ ਪੁਚ੍ਛਾਸਤਾਨਿ ਛਸਤ੍ਤਤਿ ਚ ਪੁਚ੍ਛਾ…ਪੇ… ਸਬ੍ਬਮੂਲਕੇ ਏਕੂਨਪਞ੍ਞਾਸਂ, ਏਵਂ ਆਰਮ੍ਮਣਪਚ੍ਚਯਾਦੀਸੁਪਿ ਏਕਮੇਕਂ ਆਦਿਂ ਕਤ੍ਵਾ ਆਰਮ੍ਮਣਾਦਿਪਦਵਸੇਨ ਏਕਮੇਕਸ੍ਸ ਪਦਸ੍ਸ ਏਕਮੂਲਕੇ ਏਕਾਦਸ ਪੁਚ੍ਛਾਸਤਾਨਿ ਛਸਤ੍ਤਤਿ ਚ ਪੁਚ੍ਛਾ…ਪੇ… ਸਬ੍ਬਮੂਲਕੇ ਏਕੂਨਪਞ੍ਞਾਸਾਤਿ ਏਕੇਕਸ੍ਸ ਪਦਸ੍ਸ ਏਕਮੂਲਕਾਦਿਭੇਦੇ ਸਤ੍ਤਸਤਾਧਿਕਾਨਿ ਚੁਦ੍ਦਸ ਪੁਚ੍ਛਾ ਸਹਸ੍ਸਾਨਿ ਹੋਨ੍ਤਿ. ਤਾਸਂ ਸਬ੍ਬੇਸੁਪਿ ਚਤੁਵੀਸਤਿਯਾ ਪਚ੍ਚਯੇਸੁ ਅਯਂ ਗਣਨਪਰਿਚ੍ਛੇਦੋ –

ਦ੍ਵਾਪਞ੍ਞਾਸਸਹਸ੍ਸਾਨ-ਟ੍ਠਸਤਾਨਿ ਤੀਣਿ ਸਤਸਹਸ੍ਸਾਨਿ;

ਕੁਸਲਤ੍ਤਿਕਸ੍ਸ ਪੁਚ੍ਛਾ, ਅਨੁਲੋਮਨਯਮ੍ਹਿ ਸੁਵਿਭਤ੍ਤਾ.

ਯਥਾ ਚ ਕੁਸਲਤ੍ਤਿਕਸ੍ਸ, ਏਵਂ ਵੇਦਨਾਤ੍ਤਿਕਾਦੀਨਮ੍ਪੀਤਿ ਸਬ੍ਬੇਸੁਪਿ ਦ੍ਵਾਵੀਸਤਿਯਾ ਤਿਕੇਸੁ –

ਏਕਸਟ੍ਠਿਸਹਸ੍ਸਾਨਿ, ਛ ਸਤਾਨਿ ਸਤ੍ਤਸਤ੍ਤਤਿ;

ਸਤਸਹਸ੍ਸਾਨਿ ਪੁਚ੍ਛਾਨਂ, ਤਿਕਭੇਦੇ ਪਭੇਦਤੋ.

ਸਙ੍ਖਿਤ੍ਤਾ ਵਾਚਨਾਮਗ੍ਗੇ.

ਦੁਕੇਸੁ ਪਨ ‘‘ਸਿਯਾ ਹੇਤੁਂ ਧਮ੍ਮਂ ਪਟਿਚ੍ਚ ਹੇਤੁਧਮ੍ਮੋ ਉਪ੍ਪਜ੍ਜੇਯ੍ਯ ਹੇਤੁਪਚ੍ਚਯਾ’’ਤਿ ਏਵਂ ਹੇਤੁਂ ਪਟਿਚ੍ਚ ਹੇਤੁ, ਹੇਤੁਂ ਪਟਿਚ੍ਚ ਨਹੇਤੁ, ਹੇਤੁਂ ਪਟਿਚ੍ਚ ਹੇਤੁ ਚ ਨਹੇਤੁ ਚ, ਨਹੇਤੁਂ ਪਟਿਚ੍ਚ ਨਹੇਤੁ, ਨਹੇਤੁਂ ਪਟਿਚ੍ਚ ਹੇਤੁ, ਨਹੇਤੁਂ ਪਟਿਚ੍ਚ ਹੇਤੁ ਚ ਨਹੇਤੁ ਚ, ਹੇਤੁਞ੍ਚ ਨਹੇਤੁਞ੍ਚ ਪਟਿਚ੍ਚ ਹੇਤੁ, ਹੇਤੁਞ੍ਚ ਨਹੇਤੁਞ੍ਚ ਪਟਿਚ੍ਚ ਨਹੇਤੁ, ਹੇਤੁਞ੍ਚ ਨਹੇਤੁਞ੍ਚ ਪਟਿਚ੍ਚ ਹੇਤੁ ਚ ਨਹੇਤੁ ਚਾਤਿ ਏਕਮੇਕਸ੍ਮਿਂ ਦੁਕੇ ਹੇਤੁਪਚ੍ਚਯਾਦੀਸੁ ਏਕਮੇਕਸ੍ਮਿਂ ਪਚ੍ਚਯੇ ਨਵ ਪੁਚ੍ਛਾ ਹੋਨ੍ਤਿ. ਤਾਸੁ ਹੇਤੁਪਚ੍ਚਯਂ ਆਦਿਂ ਕਤ੍ਵਾ ਏਕਮੂਲਕੇ ਦ੍ਵੇਸਤਾਨਿ ਸੋਲ਼ਸ ਚ ਪੁਚ੍ਛਾ ਹੋਨ੍ਤਿ. ਤਾਸੁ ਹੇਤੁਪਚ੍ਚਯਸ੍ਸੇਵ ਅਞ੍ਞੇਨ ਅਸਮ੍ਮਿਸ੍ਸਾ ਨਵ ਪੁਚ੍ਛਾ ਗਹੇਤਬ੍ਬਾ, ਸੇਸਾ ਅਟ੍ਠ ਵਾਰੇਨ ਗਹਿਤਾ.

ਤਾਸਂ ਦੁਕਮੂਲਕਾਦੀਸੁ ਤੇਵੀਸਤਿਯਾ ਵਾਰੇਸੁ ਏਕੇਕਂ ਨਵਕਂ ਅਪਨੇਤ੍ਵਾ ਯਾਵ ਸਬ੍ਬਮੂਲਕਾ ਅਯਂ ਗਣਨਪਰਿਚ੍ਛੇਦੋ – ਦੁਕਮੂਲਕੇ ਤਾਵ ਏਕਮੂਲਕੇ ਦਸ੍ਸਿਤੇਸੁ ਦ੍ਵੀਸੁ ਸੋਲ਼ਸਾਧਿਕੇਸੁ ਪੁਚ੍ਛਾਸਤੇਸੁ ਨਵ ਅਪਨੇਤ੍ਵਾ ਦ੍ਵੇਸਤਾਨਿ ਸਤ੍ਤ ਚ ਪੁਚ੍ਛਾ ਹੋਨ੍ਤਿ, ਤਤੋ ਨਵ ਅਪਨੇਤ੍ਵਾ ਤਿਮੂਲਕੇ ਅਟ੍ਠਨਵੁਤਿਸਤਂ. ਏਵਂ ਪੁਰਿਮਪੁਰਿਮਤੋ ਨਵ ਨਵ ਅਪਨੇਤ੍ਵਾ ਚਤੁਮੂਲਕੇ ਏਕੂਨਨਵੁਤਿਸਤਂ, ਪਞ੍ਚਮੂਲਕੇ ਅਸੀਤਿਸਤਂ, ਛਮੂਲਕੇ ਏਕਸਤ੍ਤਤਿਸਤਂ, ਸਤ੍ਤਮੂਲਕੇ ਦ੍ਵਾਸਟ੍ਠਿਸਤਂ, ਅਟ੍ਠਮੂਲਕੇ ਤੇਪਣ੍ਣਾਸਸਤਂ, ਨਵਮੂਲਕੇ ਚਤੁਚਤ੍ਤਾਲੀਸਸਤਂ, ਦਸਮੂਲਕੇ ਪਞ੍ਚਤਿਂਸਸਤਂ, ਏਕਾਦਸਮੂਲਕੇ ਛਬ੍ਬੀਸਸਤਂ, ਦ੍ਵਾਦਸਮੂਲਕੇ ਸਤ੍ਤਰਸਾਧਿਕਸਤਂ, ਤੇਰਸਮੂਲਕੇ ਅਟ੍ਠਾਧਿਕਸਤਂ, ਚੁਦ੍ਦਸਮੂਲਕੇ ਨਵਨਵੁਤਿ, ਪਨ੍ਨਰਸਮੂਲਕੇ ਨਵੁਤਿ, ਸੋਲ਼ਸਮੂਲਕੇ ਏਕਾਸੀਤਿ, ਸਤ੍ਤਰਸਮੂਲਕੇ ਦ੍ਵਾਸਤ੍ਤਤਿ, ਅਟ੍ਠਾਰਸਮੂਲਕੇ ਤੇਸਟ੍ਠਿ, ਏਕੂਨਵੀਸਤਿਮੂਲਕੇ ਚਤੁਪਞ੍ਞਾਸਂ, ਵੀਸਤਿਮੂਲਕੇ ਪਞ੍ਚਚਤ੍ਤਾਲੀਸਂ, ਏਕਵੀਸਤਿਮੂਲਕੇ ਛਤ੍ਤਿਂਸਂ, ਦ੍ਵਾਵੀਸਤਿਮੂਲਕੇ ਸਤ੍ਤਵੀਸ, ਤੇਵੀਸਤਿਮੂਲਕੇ ਅਟ੍ਠਾਰਸ, ਸਬ੍ਬਮੂਲਕੇ ਨਵਾਤਿ. ਯਥਾ ਪਨੇਤਾਨਿ ਹੇਤੁਪਚ੍ਚਯਵਸੇਨ ਏਕਮੂਲਕੇ ਸੋਲ਼ਸਾਧਿਕਾਨਿ ਦ੍ਵੇ ਪੁਚ੍ਛਾਸਤਾਨਿ…ਪੇ… ਸਬ੍ਬਮੂਲਕੇ ਨਵ, ਏਵਂ ਆਰਮ੍ਮਣਪਚ੍ਚਯਾਦੀਸੁਪਿ ਏਕਮੇਕਂ ਆਦਿਂ ਕਤ੍ਵਾ ਆਰਮ੍ਮਣਾਦਿਪਦਵਸੇਨ ਏਕੇਕਸ੍ਸ ਪਦਸ੍ਸ ਏਕਮੂਲਕੇ ਸੋਲ਼ਸਾਧਿਕਾਨਿ ਦ੍ਵੇ ਪੁਚ੍ਛਾਸਤਾਨਿ…ਪੇ… ਸਬ੍ਬਮੂਲਕੇ ਨਵਾਤਿ ਏਕੇਕਸ੍ਸ ਪਦਸ੍ਸ ਏਕਮੂਲਕਾਦਿਭੇਦੇ ਦ੍ਵੇ ਪੁਚ੍ਛਾ ਸਹਸ੍ਸਾਨਿ ਸਤ੍ਤਸਤਾਨਿ ਚ ਪੁਚ੍ਛਾ ਹੋਨ੍ਤਿ. ਤਾਸਂ ਸਬ੍ਬੇਸੁਪਿ ਚਤੁਵੀਸਤਿਯਾ ਪਚ੍ਚਯੇਸੁ ਅਯਂ ਗਣਨਪਰਿਚ੍ਛੇਦੋ –

ਚਤੁਸਟ੍ਠਿਸਹਸ੍ਸਾਨਿ, ਪੁਨ ਅਟ੍ਠਸਤਾਨਿ ਚ;

ਪੁਚ੍ਛਾ ਹੇਤੁਦੁਕਸ੍ਸੇਵ, ਅਨੁਲੋਮਨਯੇ ਮਤਾ.

ਯਥਾ ਚ ਹੇਤੁਦੁਕਸ੍ਸ, ਏਵਂ ਸਹੇਤੁਕਦੁਕਾਦੀਨਮ੍ਪੀਤਿ ਸਬ੍ਬਸ੍ਮਿਮ੍ਪਿ ਦੁਕਸਤੇ –

ਸਟ੍ਠਿ ਸਤਸਹਸ੍ਸਾਨਿ, ਚਤ੍ਤਾਰਿ ਚ ਤਤੋਪਰਂ;

ਅਸੀਤਿ ਚ ਸਹਸ੍ਸਾਨਿ, ਪੁਚ੍ਛਾ ਦੁਕਸਤੇ ਵਿਦੂ.

ਅਯਂ ਤਾਵ ਸੁਦ੍ਧਿਕੇ ਤਿਕਪਟ੍ਠਾਨੇ ਚੇਵ ਦੁਕਪਟ੍ਠਾਨੇ ਚ ਪੁਚ੍ਛਾਨਂ ਗਣਨਪਰਿਚ੍ਛੇਦੋ.

ਯਂ ਪਨ ਤਤੋ ਪਰਂ ਦ੍ਵਾਵੀਸਤਿ ਤਿਕੇ ਗਹੇਤ੍ਵਾ ਦੁਕਸਤੇ ਪਕ੍ਖਿਪਿਤ੍ਵਾ ਦੁਕਤਿਕਪਟ੍ਠਾਨਂ ਨਾਮ ਦੇਸਿਤਂ, ਤਤ੍ਥ ‘‘ਸਿਯਾ ਹੇਤੁਂ ਕੁਸਲਂ ਧਮ੍ਮਂ ਪਟਿਚ੍ਚ ਹੇਤੁ ਕੁਸਲੋ ਧਮ੍ਮੋ ਉਪ੍ਪਜ੍ਜੇਯ੍ਯ ਹੇਤੁਪਚ੍ਚਯਾ’’ਤਿ ਏਵਂ ਦ੍ਵਾਵੀਸਤਿਯਾ ਤਿਕੇਸੁ ਏਕੇਕਂ ਤਿਕਂ ਦੁਕਾਨਂ ਸਤੇਨ ਸਤੇਨ ਸਦ੍ਧਿਂ ਯੋਜੇਤ੍ਵਾ ਦਸ੍ਸੇਤਬ੍ਬਾਨਂ ਪੁਚ੍ਛਾਨਂ ਹੇਟ੍ਠਾ ਵੁਤ੍ਤਨਯੇਨ ਸਬ੍ਬੇਸਂ ਏਕਮੂਲਕਾਦੀਨਂ ਵਸੇਨ ਗਹੇਤ੍ਵਾ ਪਰਿਚ੍ਛੇਦੋ ਵੇਦਿਤਬ੍ਬੋ.

ਯਮ੍ਪਿ ਤਤੋ ਪਰਂ ਦੁਕਸਤਂ ਗਹੇਤ੍ਵਾ ਦ੍ਵਾਵੀਸਤਿਯਾ ਤਿਕੇਸੁ ਪਕ੍ਖਿਪਿਤ੍ਵਾ ਤਿਕਦੁਕਪਟ੍ਠਾਨਂ ਨਾਮ ਦੇਸਿਤਂ, ਤਤ੍ਥਾਪਿ ‘‘ਸਿਯਾ ਕੁਸਲਂ ਹੇਤੁਂ ਧਮ੍ਮਂ ਪਟਿਚ੍ਚ ਕੁਸਲੋ ਹੇਤੁਧਮ੍ਮੋ ਉਪ੍ਪਜ੍ਜੇਯ੍ਯ ਹੇਤੁਪਚ੍ਚਯਾ’’ਤਿ ਏਵਂ ਦੁਕਸਤੇ ਏਕੇਕਂ ਦੁਕਂ ਦ੍ਵਾਵੀਸਤਿਯਾ ਤਿਕੇਹਿ ਸਦ੍ਧਿਂ ਯੋਜੇਤ੍ਵਾ ਦਸ੍ਸੇਤਬ੍ਬਾਨਂ ਪੁਚ੍ਛਾਨਂ ਹੇਟ੍ਠਾ ਵੁਤ੍ਤਨਯੇਨ ਸਬ੍ਬੇਸਂ ਏਕਮੂਲਕਾਦੀਨਂ ਵਸੇਨ ਗਹੇਤ੍ਵਾ ਪਰਿਚ੍ਛੇਦੋ ਵੇਦਿਤਬ੍ਬੋ.

ਯਮ੍ਪਿ ਤਤੋ ਪਰਂ ਤਿਕੇ ਤਿਕੇਸੁਯੇਵ ਪਕ੍ਖਿਪਿਤ੍ਵਾ ਤਿਕਤਿਕਪਟ੍ਠਾਨਂ ਨਾਮ ਦੇਸਿਤਂ, ਤਤ੍ਥਾਪਿ ‘‘ਸਿਯਾ ਕੁਸਲਂ ਸੁਖਾਯ ਵੇਦਨਾਯ ਸਮ੍ਪਯੁਤ੍ਤਂ ਧਮ੍ਮਂ ਪਟਿਚ੍ਚ ਕੁਸਲੋ ਸੁਖਾਯ ਵੇਦਨਾਯ ਸਮ੍ਪਯੁਤ੍ਤੋ ਧਮ੍ਮੋ ਉਪ੍ਪਜ੍ਜੇਯ੍ਯ ਹੇਤੁਪਚ੍ਚਯਾ’’ਤਿ ਏਵਂ ਦ੍ਵਾਵੀਸਤਿਯਾ ਤਿਕੇਸੁ ਏਕੇਕਂ ਤਿਕਂ ਸੇਸੇਹਿ ਏਕਵੀਸਤਿਯਾ ਤਿਕੇਹਿ ਸਦ੍ਧਿਂ ਯੋਜੇਤ੍ਵਾ ਦਸ੍ਸੇਤਬ੍ਬਾਨਂ ਪੁਚ੍ਛਾਨਂ ਹੇਟ੍ਠਾ ਵੁਤ੍ਤਨਯੇਨ ਸਬ੍ਬੇਸਂ ਏਕਮੂਲਕਾਦੀਨਂ ਵਸੇਨ ਗਹੇਤ੍ਵਾ ਪਰਿਚ੍ਛੇਦੋ ਵੇਦਿਤਬ੍ਬੋ.

ਯਮ੍ਪਿ ਤਤੋ ਪਰਂ ਦੁਕੇ ਦੁਕੇਸੁਯੇਵ ਪਕ੍ਖਿਪਿਤ੍ਵਾ ਦੁਕਦੁਕਪਟ੍ਠਾਨਂ ਨਾਮ ਦੇਸਿਤਂ, ਤਤ੍ਥਾਪਿ ‘‘ਸਿਯਾ ਹੇਤੁਂ ਸਹੇਤੁਕਂ ਧਮ੍ਮਂ ਪਟਿਚ੍ਚ ਹੇਤੁ ਸਹੇਤੁਕੋ ਧਮ੍ਮੋ ਉਪ੍ਪਜ੍ਜੇਯ੍ਯ ਹੇਤੁਪਚ੍ਚਯਾ’’ਤਿ ਏਵਂ ਦੁਕਸਤੇ ਏਕੇਕਂ ਦੁਕਂ ਸੇਸੇਹਿ ਨਵਨਵੁਤਿਯਾ ਦੁਕੇਹਿ ਸਦ੍ਧਿਂ ਯੋਜੇਤ੍ਵਾ ਦਸ੍ਸੇਤਬ੍ਬਾਨਂ ਪੁਚ੍ਛਾਨਂ ਹੇਟ੍ਠਾ ਵੁਤ੍ਤਨਯੇਨ ਸਬ੍ਬੇਸਂ ਏਕਮੂਲਕਾਦੀਨਂ ਵਸੇਨ ਗਹੇਤ੍ਵਾ ਪਰਿਚ੍ਛੇਦੋ ਵੇਦਿਤਬ੍ਬੋ. ਤਥਾਗਤੇਨ ਹਿ ਸਬ੍ਬਮ੍ਪੇਤਂ ਪਭੇਦਂ ਦਸ੍ਸੇਤ੍ਵਾਵ ਦੇਵਪਰਿਸਾਯ ਧਮ੍ਮੋ ਦੇਸਿਤੋ, ਧਮ੍ਮਸੇਨਾਪਤਿਸ੍ਸ ਪਨ ਤੇਨ ‘‘ਅਜ੍ਜ ਇਦਞ੍ਚਿਦਞ੍ਚ ਦੇਸਿਤ’’ਨ੍ਤਿ ਸਙ੍ਖਿਪਿਤ੍ਵਾ ਨਯਦਸ੍ਸਨਮਤ੍ਤੇਨੇਵ ਦੇਸਨਾ ਅਕ੍ਖਾਤਾ. ਥੇਰੇਨਾਪਿ ਸਙ੍ਖਿਪਿਤ੍ਵਾਵ ਵਾਚਨਾਮਗ੍ਗੋ ਪਵਤ੍ਤਿਤੋ, ਸੋ ਥੇਰੇਨ ਪਵਤ੍ਤਿਤਨਯੇਨੇਵ ਸਙ੍ਗੀਤਿਕਾਲੇ ਸਙ੍ਗਹਂ ਆਰੋਪਿਤੋ.

ਤਂ ਪਨਸ੍ਸ ਸਙ੍ਖੇਪਨਯਂ ਦਸ੍ਸੇਤੁਂ ਤਿਕਞ੍ਚ ਪਟ੍ਠਾਨਵਰਨ੍ਤਿ ਅਯਂ ਗਾਥਾ ਠਪਿਤਾ. ਤਸ੍ਸਤ੍ਥੋ – ਤਿਕਞ੍ਚ ਪਟ੍ਠਾਨਵਰਨ੍ਤਿ ਪਵਰਂ ਤਿਕਪਟ੍ਠਾਨਞ੍ਚ. ਦੁਕੁਤ੍ਤਮਨ੍ਤਿ ਉਤ੍ਤਮਂ ਸੇਟ੍ਠਂ ਦੁਕਪਟ੍ਠਾਨਞ੍ਚ. ਦੁਕਤਿਕਞ੍ਚੇਵਾਤਿ ਦੁਕਤਿਕਪਟ੍ਠਾਨਞ੍ਚ. ਤਿਕਦੁਕਞ੍ਚਾਤਿ ਤਿਕਦੁਕਪਟ੍ਠਾਨਞ੍ਚ. ਤਿਕਤਿਕਞ੍ਚੇਵਾਤਿ ਤਿਕਤਿਕਪਟ੍ਠਾਨਞ੍ਚ. ਦੁਕਦੁਕਞ੍ਚਾਤਿ ਦੁਕਦੁਕਪਟ੍ਠਾਨਞ੍ਚ. ਛ ਅਨੁਲੋਮਮ੍ਹਿ ਨਯਾ ਸੁਗਮ੍ਭੀਰਾਤਿ ਏਤੇ ਤਿਕਪਟ੍ਠਾਨਾਦਯੋ ਸੁਟ੍ਠੁ ਗਮ੍ਭੀਰਾ ਛ ਨਯਾ ਅਨੁਲੋਮਮ੍ਹਿ ਵੇਦਿਤਬ੍ਬਾਤਿ. ਤਤ੍ਥ ਦ੍ਵੇ ਅਨੁਲੋਮਾਨਿ – ਧਮ੍ਮਾਨੁਲੋਮਞ੍ਚ ਪਚ੍ਚਯਾਨੁਲੋਮਞ੍ਚ. ਤਤ੍ਥ ‘‘ਕੁਸਲਂ ਧਮ੍ਮਂ ਪਟਿਚ੍ਚ ਕੁਸਲੋ ਧਮ੍ਮੋ’’ਤਿ ਏਵਂ ਅਭਿਧਮ੍ਮਮਾਤਿਕਾਪਦੇਹਿ ਸਙ੍ਗਹਿਤਾਨਂ ਧਮ੍ਮਾਨਂ ਅਨੁਲੋਮਦੇਸਨਾਵਸੇਨ ਪਵਤ੍ਤਂ ਧਮ੍ਮਾਨੁਲੋਮਂ ਨਾਮ. ‘‘ਹੇਤੁਪਚ੍ਚਯਾ ਆਰਮ੍ਮਣਪਚ੍ਚਯਾ’’ਤਿ ਏਵਂ ਚਤੁਵੀਸਤਿਯਾ ਪਚ੍ਚਯਾਨਂ ਅਨੁਲੋਮਦੇਸਨਾਵਸੇਨ ਪਵਤ੍ਤਂ ਪਚ੍ਚਯਾਨੁਲੋਮਂ ਨਾਮ.

ਤਤ੍ਥ ਹੇਟ੍ਠਾ ਅਟ੍ਠਕਥਾਯਂ ‘‘ਤਿਕਞ੍ਚ ਪਟ੍ਠਾਨਵਰਂ…ਪੇ… ਛ ਅਨੁਲੋਮਮ੍ਹਿ ਨਯਾ ਸੁਗਮ੍ਭੀਰਾ’’ਤਿ ਅਯਂ ਗਾਥਾ ਧਮ੍ਮਾਨੁਲੋਮਂ ਸਨ੍ਧਾਯ ਵੁਤ੍ਤਾ. ਇਧ ਪਨ ਅਯਂ ਗਾਥਾ ਤਸ੍ਮਿਂ ਧਮ੍ਮਾਨੁਲੋਮੇ ਪਚ੍ਚਯਾਨੁਲੋਮਂ ਸਨ੍ਧਾਯ ਵੁਤ੍ਤਾ. ਤਸ੍ਮਾ ‘‘ਛ ਅਨੁਲੋਮਮ੍ਹਿ ਨਯਾ ਸੁਗਮ੍ਭੀਰਾ’’ਤਿ ਅਟ੍ਠਕਥਾਗਾਥਾਯ ਧਮ੍ਮਾਨੁਲੋਮੇ ਤਿਕਪਟ੍ਠਾਨਾਦਯੋ ਛ ਨਯਾ ਸੁਗਮ੍ਭੀਰਾਤਿ ਏਵਮਤ੍ਥੋ ਵੇਦਿਤਬ੍ਬੋ. ਇਮਸ੍ਮਿਂ ਪਨੋਕਾਸੇ ‘‘ਹੇਤੁਪਚ੍ਚਯਾ ਆਰਮ੍ਮਣਪਚ੍ਚਯਾ’’ਤਿ ਏਵਂ ਪਵਤ੍ਤੇ ਪਚ੍ਚਯਾਨੁਲੋਮੇ ਏਤੇ ਧਮ੍ਮਾਨੁਲੋਮੇ ਤਿਕਪਟ੍ਠਾਨਾਦਯੋ ‘‘ਛ ਨਯਾ ਸੁਗਮ੍ਭੀਰਾ’’ਤਿ ਏਵਮਤ੍ਥੋ ਵੇਦਿਤਬ੍ਬੋ. ਤੇਸੁ ਅਨੁਲੋਮੇ ਤਿਕਪਟ੍ਠਾਨੇ ਕੁਸਲਤ੍ਤਿਕਮਤ੍ਤਸ੍ਸੇਵ ਵਸੇਨ ਅਯਂ ਇਮਸ੍ਮਿਂ ਪਟਿਚ੍ਚਵਾਰਸ੍ਸ ਪਣ੍ਣਤ੍ਤਿਵਾਰੇ ਸਙ੍ਖਿਪਿਤ੍ਵਾ ਪੁਚ੍ਛਾਪਭੇਦੋ ਦਸ੍ਸਿਤੋ. ਸੇਸੇਸੁ ਪਨ ਤਿਕੇਸੁ ਸੇਸਪਟ੍ਠਾਨੇਸੁ ਚ ਏਕਾਪਿ ਪੁਚ੍ਛਾ ਨ ਦਸ੍ਸਿਤਾ. ਤਤੋ ਪਰੇਸੁ ਪਨ ਸਹਜਾਤਵਾਰਾਦੀਸੁ ਕੁਸਲਤ੍ਤਿਕਸ੍ਸਾਪਿ ਵਸੇਨ ਪੁਚ੍ਛਂ ਅਨੁਦ੍ਧਰਿਤ੍ਵਾ ਲਬ੍ਭਮਾਨਕਵਸੇਨ ਵਿਸ੍ਸਜ੍ਜਨਮੇਵ ਦਸ੍ਸਿਤਂ. ‘‘ਛ ਅਨੁਲੋਮਮ੍ਹਿ ਨਯਾ ਸੁਗਮ੍ਭੀਰਾ’’ਤਿ ਵਚਨਤੋ ਪਨ ਇਮਸ੍ਮਿਂ ਪਚ੍ਚਯਾਨੁਲੋਮੇ ਛਪਿ ਏਤੇ ਪਟ੍ਠਾਨਨਯਾ ਪੁਚ੍ਛਾਵਸੇਨ ਉਦ੍ਧਰਿਤ੍ਵਾ ਦਸ੍ਸੇਤਬ੍ਬਾ. ਪਟ੍ਠਾਨਂ ਵਣ੍ਣਯਨ੍ਤਾਨਞ੍ਹਿ ਆਚਰਿਯਾਨਂ ਭਾਰੋ ਏਸੋਤਿ.