੧੨. ਆਸੇਵਨਪਚ੍ਚਯਨਿਦ੍ਦੇਸਵਣ੍ਣਨਾ

੧੨. ਆਸੇਵਨਪਚ੍ਚਯਨਿਦ੍ਦੇਸੇ ਪੁਰਿਮਾ ਪੁਰਿਮਾਤਿ ਸਬ੍ਬਨਯੇਸੁ ਸਮਨਨ੍ਤਰਾਤੀਤਾਵ ਦਟ੍ਠਬ੍ਬਾ. ਕਸ੍ਮਾ ਪਨੇਤ੍ਥ ਅਨਨ੍ਤਰਪਚ੍ਚਯੇ ਵਿਯ ‘‘ਪੁਰਿਮਾ ਪੁਰਿਮਾ ਕੁਸਲਾ ਧਮ੍ਮਾ ਪਚ੍ਛਿਮਾਨਂ ਪਚ੍ਛਿਮਾਨਂ ਅਬ੍ਯਾਕਤਾਨਂ ਧਮ੍ਮਾਨ’’ਨ੍ਤਿਆਦਿਨਾ ਨਯੇਨ ਭਿਨ੍ਨਜਾਤਿਕੇਹਿ ਸਦ੍ਧਿਂ ਨਿਦ੍ਦੇਸੋ ਨ ਕਤੋਤਿ? ਅਤ੍ਤਨੋ ਗਤਿਂ ਗਾਹਾਪੇਤੁਂ ਅਸਮਤ੍ਥਤਾਯ. ਭਿਨ੍ਨਜਾਤਿਕਾ ਹਿ ਭਿਨ੍ਨਜਾਤਿਕਾਨਂ ਅਰੂਪਧਮ੍ਮਾਨਂ ਆਸੇਵਨਗੁਣੇਨ ਪਗੁਣਬਲਵਭਾਵਂ ਸਾਧਯਮਾਨਾ ਅਤ੍ਤਨੋ ਕੁਸਲਾਦਿਭਾਵਸਙ੍ਖਾਤਂ ਗਤਿਂ ਗਾਹਾਪੇਤੁਂ ਨ ਸਕ੍ਕੋਨ੍ਤਿ. ਤਸ੍ਮਾ ਤੇਹਿ ਸਦ੍ਧਿਂ ਨਿਦ੍ਦੇਸਂ ਅਕਤ੍ਵਾ ਯੇ ਯੇਸਂ ਵਾਸਨਾਸਙ੍ਖਾਤੇਨ ਆਸੇਵਨੇਨ ਪਗੁਣਤਰਬਲਵਤਰਭਾਵਵਿਸਿਟ੍ਠਂ ਅਤ੍ਤਨੋ ਕੁਸਲਾਦਿਭਾਵਸਙ੍ਖਾਤਂ ਗਤਿਂ ਗਾਹਾਪੇਤੁਂ ਸਕ੍ਕੋਨ੍ਤਿ, ਤੇਸਂ ਤੇਹਿ ਸਮਾਨਜਾਤਿਕੇਹੇਵ ਸਦ੍ਧਿਂ ਨਿਦ੍ਦੇਸੋ ਕਤੋਤਿ ਵੇਦਿਤਬ੍ਬੋ. ਅਥ ਵਿਪਾਕਾਬ੍ਯਾਕਤਂ ਕਸ੍ਮਾ ਨ ਗਹਿਤਨ੍ਤਿ? ਆਸੇਵਨਾਭਾਵੇਨ. ਵਿਪਾਕਞ੍ਹਿ ਕਮ੍ਮਵਸੇਨ ਵਿਪਾਕਭਾਵਪ੍ਪਤ੍ਤਂ ਕਮ੍ਮਪਰਿਣਾਮਿਤਂ ਹੁਤ੍ਵਾ ਵਤ੍ਤਤਿ ਨਿਰੁਸ੍ਸਾਹਂ ਦੁਬ੍ਬਲਨ੍ਤਿ ਤਂ ਆਸੇਵਨਗੁਣੇਨ ਅਤ੍ਤਨੋ ਸਭਾਵਂ ਗਾਹਾਪੇਤ੍ਵਾ ਪਰਿਭਾਵੇਤ੍ਵਾ ਨੇਵ ਅਞ੍ਞਂ ਵਿਪਾਕਂ ਉਪ੍ਪਾਦੇਤੁਂ ਸਕ੍ਕੋਤਿ, ਨ ਪੁਰਿਮਵਿਪਾਕਾਨੁਭਾਵਂ ਗਹੇਤ੍ਵਾ ਉਪ੍ਪਜ੍ਜਿਤੁਨ੍ਤਿ. ਕਮ੍ਮਵੇਗਕ੍ਖਿਤ੍ਤਂ ਪਨ ਪਤਿਤਂ ਵਿਯ ਹੁਤ੍ਵਾ ਉਪ੍ਪਜ੍ਜਤੀਤਿ ਸਬ੍ਬਥਾਪਿ ਵਿਪਾਕੇ ਆਸੇਵਨਂ ਨਤ੍ਥੀਤਿ ਆਸੇਵਨਾਭਾਵੇਨ ਵਿਪਾਕਂ ਨ ਗਹਿਤਂ. ਕੁਸਲਾਕੁਸਲਕਿਰਿਯਾਨਨ੍ਤਰਂ ਉਪ੍ਪਜ੍ਜਮਾਨਮ੍ਪਿ ਚੇਤਂ ਕਮ੍ਮਪਟਿਬਦ੍ਧਵੁਤ੍ਤਿਤਾਯ ਆਸੇਵਨਗੁਣਂ ਨ ਗਣ੍ਹਾਤੀਤਿ ਕੁਸਲਾਦਯੋਪਿਸ੍ਸ ਆਸੇਵਨਪਚ੍ਚਯਾ ਨ ਹੋਨ੍ਤਿ. ਅਪਿਚ ਨਾਨਾਜਾਤਿਕਤ੍ਤਾਪੇਤੇ ਨ ਹੋਨ੍ਤਿਯੇਵ. ਭੂਮਿਤੋ ਪਨ ਆਰਮ੍ਮਣਤੋ ਵਾ ਨਾਨਾਜਾਤਿਕਤ੍ਤਂ ਨਾਮ ਨਤ੍ਥਿ. ਤਸ੍ਮਾ ਕਾਮਾਵਚਰਕੁਸਲਕਿਰਿਯਾਮਹਗ੍ਗਤਕੁਸਲਕਿਰਿਯਾਨਮ੍ਪਿ, ਸਙ੍ਖਾਰਾਰਮ੍ਮਣਞ੍ਚ ਅਨੁਲੋਮਕੁਸਲਂ ਨਿਬ੍ਬਾਨਾਰਮ੍ਮਣਸ੍ਸ ਗੋਤ੍ਰਭੁਕੁਸਲਸ੍ਸ ਆਸੇਵਨਪਚ੍ਚਯੋ ਹੋਤਿਯੇਵਾਤਿ ਅਯਂ ਤਾਵੇਤ੍ਥ ਪਾਲ਼ਿਵਣ੍ਣਨਾ. ਅਯਂ ਪਨ ਆਸੇਵਨਪਚ੍ਚਯੋ ਜਾਤਿਤੋ ਤਾਵ ਕੁਸਲੋ ਅਕੁਸਲੋ ਕਿਰਿਯਾਬ੍ਯਾਕਤੋਤਿ ਤਿਧਾ ਠਿਤੋ. ਤਤ੍ਥ ਕੁਸਲੋ ਭੂਮਿਤੋ ਕਾਮਾਵਚਰੋ ਰੂਪਾਵਚਰੋ ਅਰੂਪਾਵਚਰੋਤਿ ਤਿਵਿਧੋ ਹੋਤਿ, ਅਕੁਸਲੋ ਕਾਮਾਵਚਰੋਵ ਕਿਰਿਯਾਬ੍ਯਾਕਤੋ ਕਾਮਾਵਚਰੋ ਰੂਪਾਵਚਰੋ ਅਰੂਪਾਵਚਰੋਤਿ ਤਿਵਿਧੋਵ, ਲੋਕੁਤ੍ਤਰੋ ਆਸੇਵਨਪਚ੍ਚਯੋ ਨਾਮ ਨਤ੍ਥੀਤਿ ਏਵਮੇਤ੍ਥ ਨਾਨਪ੍ਪਕਾਰਭੇਦਤੋ ਵਿਞ੍ਞਾਤਬ੍ਬੋ ਵਿਨਿਚ੍ਛਯੋ.

ਏਵਂ ਭਿਨ੍ਨੇ ਪਨੇਤ੍ਥ ਕਾਮਾਵਚਰਕੁਸਲਂ ਅਤ੍ਤਨੋ ਅਨਨ੍ਤਰਸ੍ਸ ਕਾਮਾਵਚਰਕੁਸਲਸ੍ਸੇਵ. ਯਂ ਪਨੇਤ੍ਥ ਞਾਣਸਮ੍ਪਯੁਤ੍ਤਂ, ਤਂ ਅਤ੍ਤਨਾ ਸਦਿਸਵੇਦਨਸ੍ਸ ਰੂਪਾਵਚਰਕੁਸਲਸ੍ਸ ਅਰੂਪਾਵਚਰਕੁਸਲਸ੍ਸ ਲੋਕੁਤ੍ਤਰਕੁਸਲਸ੍ਸਾਤਿ ਇਮੇਸਂ ਰਾਸੀਨਂ ਆਸੇਵਨਪਚ੍ਚਯੋ ਹੋਤਿ. ਰੂਪਾਵਚਰਕੁਸਲਂ ਪਨ ਰੂਪਾਵਚਰਕੁਸਲਸ੍ਸੇਵ. ਅਰੂਪਾਵਚਰਕੁਸਲਂ ਅਰੂਪਾਵਚਰਕੁਸਲਸ੍ਸੇਵ. ਅਕੁਸਲਂ ਪਨ ਅਕੁਸਲਸ੍ਸੇਵ ਆਸੇਵਨਪਚ੍ਚਯੋ ਹੋਤਿ. ਕਿਰਿਯਤੋ ਪਨ ਕਾਮਾਵਚਰਕਿਰਿਯਸਙ੍ਖਾਤੋ ਤਾਵ ਕਾਮਾਵਚਰਕਿਰਿਯਸ੍ਸੇਵ. ਯੋ ਪਨੇਤ੍ਥ ਞਾਣਸਮ੍ਪਯੁਤ੍ਤੋ, ਸੋ ਅਤ੍ਤਨਾ ਸਦਿਸਵੇਦਨਸ੍ਸ ਰੂਪਾਵਚਰਕਿਰਿਯਸ੍ਸ ਅਰੂਪਾਵਚਰਕਿਰਿਯਸ੍ਸਾਤਿ ਇਮੇਸਂ ਰਾਸੀਨਂ ਆਸੇਵਨਪਚ੍ਚਯੋ ਹੋਤਿ. ਰੂਪਾਵਚਰਕਿਰਿਯਸਙ੍ਖਾਤੋ ਪਨ ਰੂਪਾਵਚਰਕਿਰਿਯਸ੍ਸੇਵ, ਅਰੂਪਾਵਚਰਕਿਰਿਯਸਙ੍ਖਾਤੋ ਅਰੂਪਾਵਚਰਕਿਰਿਯਸ੍ਸੇਵ ਆਸੇਵਨਪਚ੍ਚਯੋ ਹੋਤਿ. ਵਿਪਾਕੋ ਪਨ ਏਕਧਮ੍ਮਸ੍ਸਾਪਿ ਏਕਧਮ੍ਮੋਪਿ ਵਾ ਕੋਚਿ ਵਿਪਾਕਸ੍ਸ ਆਸੇਵਨਪਚ੍ਚਯੋ ਨਤ੍ਥੀਤਿ ਏਵਮੇਤ੍ਥ ਪਚ੍ਚਯੁਪ੍ਪਨ੍ਨਤੋਪਿ ਵਿਞ੍ਞਾਤਬ੍ਬੋ ਵਿਨਿਚ੍ਛਯੋਤਿ.

ਆਸੇਵਨਪਚ੍ਚਯਨਿਦ੍ਦੇਸਵਣ੍ਣਨਾ.