੧੦. ਪੁਰੇਜਾਤਪਚ੍ਚਯਨਿਦ੍ਦੇਸਵਣ੍ਣਨਾ

੧੦. ਪੁਰੇਜਾਤਪਚ੍ਚਯਨਿਦ੍ਦੇਸੇ ਪੁਰੇਜਾਤਪਚ੍ਚਯੇਨ ਪਚ੍ਚਯੋਤਿ ਏਤ੍ਥ ਪੁਰੇਜਾਤਂ ਨਾਮ ਯਸ੍ਸ ਪਚ੍ਚਯੋ ਹੋਤਿ, ਤਤੋ ਪੁਰਿਮਤਰਂ ਜਾਤਂ ਜਾਤਿਕ੍ਖਣਂ ਅਤਿਕ੍ਕਮਿਤ੍ਵਾ ਠਿਤਿਕ੍ਖਣਪ੍ਪਤ੍ਤਂ. ਚਕ੍ਖਾਯਤਨਨ੍ਤਿਆਦਿ ਵਤ੍ਥੁਪੁਰੇਜਾਤਵਸੇਨ ਵੁਤ੍ਤਂ. ਰੂਪਾਯਤਨਨ੍ਤਿਆਦਿ ਆਰਮ੍ਮਣਪੁਰੇਜਾਤਵਸੇਨ. ਕਿਞ੍ਚਿਕਾਲੇ ਪੁਰੇਜਾਤਪਚ੍ਚਯੇਨਾਤਿ ਪਵਤ੍ਤਿਂ ਸਨ੍ਧਾਯ ਵੁਤ੍ਤਂ. ਕਿਞ੍ਚਿਕਾਲੇ ਨ ਪੁਰੇਜਾਤਪਚ੍ਚਯੇਨਾਤਿ ਪਟਿਸਨ੍ਧਿਂ ਸਨ੍ਧਾਯ ਵੁਤ੍ਤਂ. ਏਵਂ ਸਬ੍ਬਥਾਪਿ ਪਞ੍ਚਦ੍ਵਾਰੇ ਵਤ੍ਥਾਰਮ੍ਮਣਵਸੇਨ, ਮਨੋਦ੍ਵਾਰੇ ਵਤ੍ਥੁਵਸੇਨੇਵਾਯਂ ਪਾਲ਼ਿ ਆਗਤਾ, ਪਞ੍ਹਾਵਾਰੇ ਪਨ ‘‘ਆਰਮ੍ਮਣਪੁਰੇਜਾਤਂ – ਸੇਕ੍ਖਾ ਵਾ ਪੁਥੁਜ੍ਜਨਾ ਵਾ ਚਕ੍ਖੁਂ ਅਨਿਚ੍ਚਤੋ ਦੁਕ੍ਖਤੋ ਅਨਤ੍ਤਤੋ ਵਿਪਸ੍ਸਨ੍ਤੀ’’ਤਿ ਆਗਤਤ੍ਤਾ ਮਨੋਦ੍ਵਾਰੇਪਿ ਆਰਮ੍ਮਣਪੁਰੇਜਾਤਂ ਲਬ੍ਭਤੇਵ. ਇਧ ਪਨ ਸਾਵਸੇਸਵਸੇਨ ਦੇਸਨਾ ਕਤਾਤਿ ਅਯਂ ਤਾਵੇਤ੍ਥ ਪਾਲ਼ਿਵਣ੍ਣਨਾ.

ਅਯਂ ਪਨ ਪੁਰੇਜਾਤਪਚ੍ਚਯੋ ਸੁਦ੍ਧਰੂਪਮੇਵ ਹੋਤਿ. ਤਞ੍ਚ ਖੋ ਉਪ੍ਪਾਦਕ੍ਖਣਂ ਅਤਿਕ੍ਕਮਿਤ੍ਵਾ ਠਿਤਿਪ੍ਪਤ੍ਤਂ ਅਟ੍ਠਾਰਸਵਿਧਂ ਰੂਪਰੂਪਮੇਵ. ਤਂ ਸਬ੍ਬਮ੍ਪਿ ਵਤ੍ਥੁਪੁਰੇਜਾਤਂ ਆਰਮ੍ਮਣਪੁਰੇਜਾਤਨ੍ਤਿ ਦ੍ਵਿਧਾ ਠਿਤਂ. ਤਤ੍ਥ ਚਕ੍ਖਾਯਤਨਂ…ਪੇ… ਕਾਯਾਯਤਨਂ ਵਤ੍ਥੁਰੂਪਨ੍ਤਿ ਇਦਂ ਵਤ੍ਥੁਪੁਰੇਜਾਤਂ ਨਾਮ. ਸੇਸਂ ਇਮਾਯ ਪਾਲ਼ਿਯਾ ਆਗਤਞ੍ਚ ਅਨਾਗਤਞ੍ਚ ਵਣ੍ਣੋ ਸਦ੍ਦੋ ਗਨ੍ਧੋ ਰਸੋ ਚਤਸ੍ਸੋ ਧਾਤੁਯੋ ਤੀਣਿ ਇਨ੍ਦ੍ਰਿਯਾਨਿ ਕਬਲ਼ੀਕਾਰੋ ਆਹਾਰੋਤਿ ਦ੍ਵਾਦਸਵਿਧਂ ਰੂਪਂ ਆਰਮ੍ਮਣਪੁਰੇਜਾਤਪਚ੍ਚਯੋ ਨਾਮਾਤਿ ਏਵਮੇਤ੍ਥ ਨਾਨਪ੍ਪਕਾਰਭੇਦਤੋ ਵਿਞ੍ਞਾਤਬ੍ਬੋ ਵਿਨਿਚ੍ਛਯੋ.

ਏਵਂ ਭਿਨ੍ਨੇ ਪਨੇਤ੍ਥ ਚਕ੍ਖਾਯਤਨਂ ਦ੍ਵਿਨ੍ਨਂ ਚਕ੍ਖੁਵਿਞ੍ਞਾਣਾਨਂ ਪੁਰੇਜਾਤਪਚ੍ਚਯੇਨ ਪਚ੍ਚਯੋ, ਤਥਾ ਇਤਰਾਨਿ ਚਤ੍ਤਾਰਿ ਸੋਤਵਿਞ੍ਞਾਣਾਦੀਨਂ. ਵਤ੍ਥੁਰੂਪਂ ਪਨ ਠਪੇਤ੍ਵਾ ਦ੍ਵਿਪਞ੍ਚਵਿਞ੍ਞਾਣਾਨਿ ਚਤ੍ਤਾਰੋ ਚ ਆਰੁਪ੍ਪਵਿਪਾਕੇ ਸੇਸਾਨਂ ਸਬ੍ਬੇਸਮ੍ਪਿ ਚਤੁਭੂਮਕਾਨਂ ਕੁਸਲਾਕੁਸਲਾਬ੍ਯਾਕਤਾਨਂ ਚਿਤ੍ਤਚੇਤਸਿਕਾਨਂ ਪੁਰੇਜਾਤਪਚ੍ਚਯੋ ਹੋਤਿ. ਰੂਪਾਦੀਨਿ ਪਨ ਪਞ੍ਚਾਰਮ੍ਮਣਾਨਿ ਦ੍ਵਿਪਞ੍ਚਵਿਞ੍ਞਾਣਾਨਞ੍ਚੇਵ ਮਨੋਧਾਤੂਨਞ੍ਚ ਏਕਨ੍ਤੇਨੇਵ ਪੁਰੇਜਾਤਪਚ੍ਚਯਾ ਹੋਨ੍ਤਿ. ਅਟ੍ਠਾਰਸਵਿਧਮ੍ਪਿ ਪਨੇਤਂ ਰੂਪਰੂਪਂ ਕਾਮਾਵਚਰਕੁਸਲਸ੍ਸ ਰੂਪਾਵਚਰਤੋ ਅਭਿਞ੍ਞਾਕੁਸਲਸ੍ਸ ਅਕੁਸਲਸ੍ਸ ਤਦਾਰਮ੍ਮਣਭਾਵਿਨੋ ਕਾਮਾਵਚਰਵਿਪਾਕਸ੍ਸ ਕਾਮਾਵਚਰਕਿਰਿਯਸ੍ਸ ਰੂਪਾਵਚਰਤੋ ਅਭਿਞ੍ਞਾਕਿਰਿਯਸ੍ਸਾਤਿ ਇਮੇਸਂ ਛਨ੍ਨਂ ਰਾਸੀਨਂ ਪੁਰੇਜਾਤਪਚ੍ਚਯੋ ਹੋਤੀਤਿ ਏਵਮੇਤ੍ਥ ਪਚ੍ਚਯੁਪ੍ਪਨ੍ਨਤੋਪਿ ਵਿਞ੍ਞਾਤਬ੍ਬੋ ਵਿਨਿਚ੍ਛਯੋਤਿ.

ਪੁਰੇਜਾਤਪਚ੍ਚਯਨਿਦ੍ਦੇਸਵਣ੍ਣਨਾ.