੫. ਸਚ੍ਚਯਮਕਂ

੧. ਪਣ੍ਣਤ੍ਤਿਵਾਰਵਣ੍ਣਨਾ

੧-੯. ਇਦਾਨਿ ਤੇਯੇਵ ਮੂਲਯਮਕੇ ਦੇਸਿਤੇ ਕੁਸਲਾਦਿਧਮ੍ਮੇ ਸਚ੍ਚਵਸੇਨ ਸਙ੍ਗਣ੍ਹਿਤ੍ਵਾ ਧਾਤੁਯਮਕਾਨਨ੍ਤਰਂ ਦੇਸਿਤਸ੍ਸ ਸਚ੍ਚਯਮਕਸ੍ਸ ਵਣ੍ਣਨਾ ਹੋਤਿ. ਤਤ੍ਥਾਪਿ ਹੇਟ੍ਠਾ ਵੁਤ੍ਤਨਯੇਨੇਵ ਪਣ੍ਣਤ੍ਤਿਵਾਰਾਦਯੋ ਤਯੋ ਮਹਾਵਾਰਾ ਅਨ੍ਤਰਵਾਰਾਦਯੋ ਚ ਅਵਸੇਸਪ੍ਪਭੇਦਾ ਵੇਦਿਤਬ੍ਬਾ. ਪਣ੍ਣਤ੍ਤਿਵਾਰੇ ਪਨੇਤ੍ਥ ਚਤੁਨ੍ਨਂ ਸਚ੍ਚਾਨਂ ਵਸੇਨ ਪਦਸੋਧਨਵਾਰੋ, ਪਦਸੋਧਨਮੂਲਚਕ੍ਕਵਾਰੋ, ਸੁਦ੍ਧਸਚ੍ਚਵਾਰੋ, ਸੁਦ੍ਧਸਚ੍ਚਮੂਲਚਕ੍ਕਵਾਰੋਤਿ ਇਮੇਸੁ ਚਤੂਸੁ ਵਾਰੇਸੁ ਯਮਕਗਣਨਾ ਵੇਦਿਤਬ੍ਬਾ.

੧੦-੨੬. ਪਣ੍ਣਤ੍ਤਿਵਾਰਨਿਦ੍ਦੇਸੇ ਪਨ ਅਵਸੇਸਂ ਦੁਕ੍ਖਸਚ੍ਚਨ੍ਤਿ ਦੁਕ੍ਖਵੇਦਨਾਯ ਚੇਵ ਤਣ੍ਹਾਯ ਚ ਵਿਨਿਮੁਤ੍ਤਾ ਤੇਭੂਮਕਧਮ੍ਮਾ ਵੇਦਿਤਬ੍ਬਾ. ਅਵਸੇਸੋ ਸਮੁਦਯੋਤਿ ਸਚ੍ਚਵਿਭਙ੍ਗੇ ਨਿਦ੍ਦਿਟ੍ਠਕਾਮਾਵਚਰਕੁਸਲਾਦਿਭੇਦੋ ਦੁਕ੍ਖਸਚ੍ਚਸ੍ਸ ਪਚ੍ਚਯੋ. ਅਵਸੇਸੋ ਨਿਰੋਧੋਤਿ ਤਦਙ੍ਗਵਿਕ੍ਖਮ੍ਭਨਸਮੁਚ੍ਛੇਦਪਟਿਪਸ੍ਸਦ੍ਧਿਨਿਰੋਧੋ ਚੇਵ ਖਣਭਙ੍ਗਨਿਰੋਧੋ ਚ. ਅਵਸੇਸੋ ਮਗ੍ਗੋਤਿ ‘‘ਤਸ੍ਮਿਂ ਖੋ ਪਨ ਸਮਯੇ ਪਞ੍ਚਙ੍ਗਿਕੋ ਮਗ੍ਗੋ ਹੋਤਿ, ਅਟ੍ਠਙ੍ਗਿਕੋ ਮਗ੍ਗੋ, ਮਿਚ੍ਛਾਮਗ੍ਗੋ, ਜਙ੍ਘਮਗ੍ਗੋ, ਸਕਟਮਗ੍ਗੋ’’ਤਿ ਏਵਮਾਦਿਕੋ.

ਪਣ੍ਣਤ੍ਤਿਵਾਰਵਣ੍ਣਨਾ.

੨. ਪਵਤ੍ਤਿਵਾਰਵਣ੍ਣਨਾ

੨੭-੧੬੪. ਪਵਤ੍ਤਿਵਾਰੇ ਪਨੇਤ੍ਥ ਪਚ੍ਚੁਪ੍ਪਨ੍ਨਕਾਲੇ ਪੁਗ੍ਗਲਵਾਰਸ੍ਸ ਅਨੁਲੋਮਨਯੇ ‘‘ਯਸ੍ਸ ਦੁਕ੍ਖਸਚ੍ਚਂ ਉਪ੍ਪਜ੍ਜਤਿ, ਤਸ੍ਸ ਸਮੁਦਯਸਚ੍ਚਂ ਉਪ੍ਪਜ੍ਜਤਿ; ਯਸ੍ਸ ਵਾ ਪਨ ਸਮੁਦਯਸਚ੍ਚਂ ਉਪ੍ਪਜ੍ਜਤਿ, ਤਸ੍ਸ ਦੁਕ੍ਖਸਚ੍ਚਂ ਉਪ੍ਪਜ੍ਜਤੀ’’ਤਿ ਦੁਕ੍ਖਸਚ੍ਚਮੂਲਕੇਹਿ ਤੀਹਿ, ਸਮੁਦਯਸਚ੍ਚਮੂਲਕੇਹਿ ਦ੍ਵੀਹਿ, ਨਿਰੋਧਸਚ੍ਚਮੂਲਕੇਨ ਏਕੇਨਾਤਿ ਲਬ੍ਭਮਾਨਞ੍ਚ ਅਲਬ੍ਭਮਾਨਞ੍ਚ ਗਹੇਤ੍ਵਾ ਪਾਲ਼ਿਵਸੇਨ ਛਹਿ ਯਮਕੇਹਿ ਭਵਿਤਬ੍ਬਂ. ਤੇਸੁ ਯਸ੍ਮਾ ਨਿਰੋਧਸ੍ਸ ਨੇਵ ਉਪ੍ਪਾਦੋ, ਨ ਨਿਰੋਧੋ ਯੁਜ੍ਜਤਿ, ਤਸ੍ਮਾ ਦੁਕ੍ਖਸਚ੍ਚਮੂਲਕਾਨਿ ਸਮੁਦਯਸਚ੍ਚਮਗ੍ਗਸਚ੍ਚੇਹਿ ਸਦ੍ਧਿਂ ਦ੍ਵੇ, ਸਮੁਦਯਸਚ੍ਚਮੂਲਕਂ ਮਗ੍ਗਸਚ੍ਚੇਨ ਸਦ੍ਧਿਂ ਏਕਨ੍ਤਿ ਤੀਣਿ ਯਮਕਾਨਿ ਆਗਤਾਨਿ. ਤਸ੍ਸ ਪਟਿਲੋਮਨਯੇਪਿ ਓਕਾਸਵਾਰਾਦੀਸੁਪਿ ਏਸੇਵ ਨਯੋ. ਏਵਮੇਤ੍ਥ ਸਬ੍ਬਵਾਰੇਸੁ ਤਿਣ੍ਣਂ ਤਿਣ੍ਣਂ ਯਮਕਾਨਂ ਵਸੇਨ ਯਮਕਗਣਨਾ ਵੇਦਿਤਬ੍ਬਾ. ਅਤ੍ਥਵਿਨਿਚ੍ਛਯੇ ਪਨੇਤ੍ਥ ਇਦਂ ਲਕ੍ਖਣਂ – ਇਮਸ੍ਸ ਹਿ ਸਚ੍ਚਯਮਕਸ੍ਸ ਪਵਤ੍ਤਿਵਾਰੇ ਨਿਰੋਧਸਚ੍ਚਂ ਤਾਵ ਨ ਲਬ੍ਭਤੇਵ. ਸੇਸੇਸੁ ਪਨ ਤੀਸੁ ਸਮੁਦਯਸਚ੍ਚਮਗ੍ਗਸਚ੍ਚਾਨਿ ਏਕਨ੍ਤੇਨ ਪਵਤ੍ਤਿਯਂਯੇਵ ਲਬ੍ਭਨ੍ਤਿ. ਦੁਕ੍ਖਸਚ੍ਚਂ ਚੁਤਿਪਟਿਸਨ੍ਧੀਸੁਪਿ ਪਵਤ੍ਤੇਪਿ ਲਬ੍ਭਤਿ. ਪਚ੍ਚੁਪ੍ਪਨ੍ਨਾਦਯੋ ਪਨ ਤਯੋ ਕਾਲਾ ਚੁਤਿਪਟਿਸਨ੍ਧੀਨਮ੍ਪਿ ਪਵਤ੍ਤਿਯਾਪਿ ਵਸੇਨ ਲਬ੍ਭਨ੍ਤਿ. ਏਵਮੇਤ੍ਥ ਯਂ ਯਂ ਲਬ੍ਭਤਿ, ਤਸ੍ਸ ਤਸ੍ਸ ਵਸੇਨ ਅਤ੍ਥਵਿਨਿਚ੍ਛਯੋ ਵੇਦਿਤਬ੍ਬੋ.

ਤਤ੍ਰਿਦਂ ਨਯਮੁਖਂ – ਸਬ੍ਬੇਸਂ ਉਪਪਜ੍ਜਨ੍ਤਾਨਨ੍ਤਿ ਅਨ੍ਤਮਸੋ ਸੁਦ੍ਧਾਵਾਸਾਨਮ੍ਪਿ. ਤੇਪਿ ਹਿ ਦੁਕ੍ਖਸਚ੍ਚੇਨੇਵ ਉਪਪਜ੍ਜਨ੍ਤਿ. ਤਣ੍ਹਾਵਿਪ੍ਪਯੁਤ੍ਤਚਿਤ੍ਤਸ੍ਸਾਤਿ ਇਦਂ ਦੁਕ੍ਖਸਚ੍ਚਸਮੁਦਯਸਚ੍ਚੇਸੁ ਏਕਕੋਟ੍ਠਾਸਸ੍ਸ ਉਪ੍ਪਤ੍ਤਿਦਸ੍ਸਨਤ੍ਥਂ ਵੁਤ੍ਤਂ. ਤਸ੍ਮਾ ਪਞ੍ਚਵੋਕਾਰਵਸੇਨੇਵ ਗਹੇਤਬ੍ਬਂ. ਚਤੁਵੋਕਾਰੇ ਪਨ ਤਣ੍ਹਾਵਿਪ੍ਪਯੁਤ੍ਤਸ੍ਸ ਫਲਸਮਾਪਤ੍ਤਿਚਿਤ੍ਤਸ੍ਸ ਉਪ੍ਪਾਦਕ੍ਖਣੇ ਏਕਮ੍ਪਿ ਸਚ੍ਚਂ ਨੁਪ੍ਪਜ੍ਜਤਿ. ਇਦਂ ਇਧ ਨ ਗਹੇਤਬ੍ਬਂ. ਤੇਸਂ ਦੁਕ੍ਖਸਚ੍ਚਞ੍ਚਾਤਿ ਤਸ੍ਮਿਞ੍ਹਿ ਖਣੇ ਤਣ੍ਹਂ ਠਪੇਤ੍ਵਾ ਸੇਸਂ ਦੁਕ੍ਖਸਚ੍ਚਂ ਨਾਮ ਹੋਤੀਤਿ ਸਨ੍ਧਾਯੇਤਂ ਵੁਤ੍ਤਂ. ਮਗ੍ਗਸ੍ਸ ਉਪ੍ਪਾਦਕ੍ਖਣੇਪਿ ਏਸੇਵ ਨਯੋ. ਤਤ੍ਥ ਪਨ ਰੂਪਮੇਵ ਦੁਕ੍ਖਸਚ੍ਚਂ ਨਾਮ. ਸੇਸਾ ਮਗ੍ਗਸਮ੍ਪਯੁਤ੍ਤਕਾ ਧਮ੍ਮਾ ਸਚ੍ਚਵਿਨਿਮੁਤ੍ਤਾ. ਤੇਨੇਵ ਕਾਰਣੇਨ ‘‘ਅਰੂਪੇ ਮਗ੍ਗਸ੍ਸ ਉਪ੍ਪਾਦਕ੍ਖਣੇ ਤੇਸਂ ਮਗ੍ਗਸਚ੍ਚਂ ਉਪ੍ਪਜ੍ਜਤਿ, ਨੋ ਚ ਤੇਸਂ ਦੁਕ੍ਖਸਚ੍ਚਂ ਉਪ੍ਪਜ੍ਜਤੀ’’ਤਿ ਵੁਤ੍ਤਂ. ਸਬ੍ਬੇਸਂ ਉਪਪਜ੍ਜਨ੍ਤਾਨਂ ਪਵਤ੍ਤੇ ਤਣ੍ਹਾਵਿਪ੍ਪਯੁਤ੍ਤਚਿਤ੍ਤਸ੍ਸ ਉਪ੍ਪਾਦਕ੍ਖਣੇ ਤੇਸਂ ਤਤ੍ਥਾਤਿ ਤੇਸਂ ਤਸ੍ਮਿਂ ਉਪਪਤ੍ਤਿਕ੍ਖਣੇ ਤਣ੍ਹਾਵਿਪ੍ਪਯੁਤ੍ਤਚਿਤ੍ਤੁਪ੍ਪਤ੍ਤਿਕ੍ਖਣੇ ਚਾਤਿ ਏਵਮੇਤ੍ਥ ਖਣਵਸੇਨ ਓਕਾਸੋ ਵੇਦਿਤਬ੍ਬੋ. ਅਞ੍ਞੇਸੁਪਿ ਏਵਰੂਪੇਸੁ ਏਸੇਵ ਨਯੋ. ਅਨਭਿਸਮੇਤਾਵੀਨਨ੍ਤਿ ਚਤੁਸਚ੍ਚਪਟਿਵੇਧਸਙ੍ਖਾਤਂ ਅਭਿਸਮਯਂ ਅਪ੍ਪਤ੍ਤਸਤ੍ਤਾਨਂ. ਅਭਿਸਮੇਤਾਵੀਨਨ੍ਤਿ ਅਭਿਸਮਿਤਸਚ੍ਚਾਨਨ੍ਤਿ. ਇਮਿਨਾ ਨਯਮੁਖੇਨ ਸਬ੍ਬਤ੍ਥ ਅਤ੍ਥਵਿਨਿਚ੍ਛਯੋ ਵੇਦਿਤਬ੍ਬੋ.

ਪਵਤ੍ਤਿਵਾਰਵਣ੍ਣਨਾ.

੩. ਪਰਿਞ੍ਞਾਵਾਰਵਣ੍ਣਨਾ

੧੬੫-੧੭੦. ਪਰਿਞ੍ਞਾਵਾਰੇ ਪਨ ਞਾਤਪਰਿਞ੍ਞਾ, ਤੀਰਣਪਰਿਞ੍ਞਾ, ਪਹਾਨਪਰਿਞ੍ਞਾਤਿ ਤਿਸ੍ਸੋਪੇਤ੍ਥ ਪਰਿਞ੍ਞਾਯੋ ਲਬ੍ਭਨ੍ਤਿ. ਯਸ੍ਮਾ ਚ ਲੋਕੁਤ੍ਤਰਧਮ੍ਮੇਸੁ ਪਰਿਞ੍ਞਾ ਨਾਮ ਨਤ੍ਥਿ; ਤਸ੍ਮਾ ਇਧ ਦ੍ਵੇ ਸਚ੍ਚਾਨਿ ਗਹਿਤਾਨਿ. ਤਤ੍ਥ ਦੁਕ੍ਖਸਚ੍ਚਂ ਪਰਿਜਾਨਾਤੀਤਿ ਞਾਤਤੀਰਣਪਰਿਞ੍ਞਾਵਸੇਨੇਵ ਵੁਤ੍ਤਂ. ਸਮੁਦਯਸਚ੍ਚਂ ਪਜਹਤੀਤਿ ਞਾਤਪਹਾਨਪਰਿਞ੍ਞਾਵਸੇਨ. ਇਤਿ ਇਮਾਸਂ ਪਰਿਞ੍ਞਾਨਂ ਵਸੇਨ ਸਬ੍ਬਪਦੇਸੁ ਅਤ੍ਥੋ ਵੇਦਿਤਬ੍ਬੋਤਿ.

ਪਰਿਞ੍ਞਾਵਾਰਵਣ੍ਣਨਾ.

ਸਚ੍ਚਯਮਕਵਣ੍ਣਨਾ ਨਿਟ੍ਠਿਤਾ.