੨. ਕੁਸਲਚਿਤ੍ਤਕਥਾਵਣ੍ਣਨਾ

੮੯੪-੮੯੫. ਇਦਾਨਿ ਕੁਸਲਚਿਤ੍ਤਕਥਾ ਨਾਮ ਹੋਤਿ. ਤਤ੍ਥ ਯਸ੍ਮਾ ਅਰਹਾ ਸਤਿਵੇਪੁਲ੍ਲਪ੍ਪਤ੍ਤੋ ਪਰਿਨਿਬ੍ਬਾਯਨ੍ਤੋਪਿ ਸਤੋ ਸਮ੍ਪਜਾਨੋਵ ਪਰਿਨਿਬ੍ਬਾਤਿ, ਤਸ੍ਮਾ ਕੁਸਲਚਿਤ੍ਤੋ ਪਰਿਨਿਬ੍ਬਾਯਤੀਤਿ ਯੇਸਂ ਲਦ੍ਧਿ, ਸੇਯ੍ਯਥਾਪਿ ਅਨ੍ਧਕਾਨਂ; ਤੇ ਸਨ੍ਧਾਯ ਪੁਚ੍ਛਾ ਸਕਵਾਦਿਸ੍ਸ, ਪਟਿਞ੍ਞਾ ਇਤਰਸ੍ਸ. ਅਥ ਨਂ ਯਸ੍ਮਾ ਕੁਸਲਚਿਤ੍ਤੋ ਨਾਮ ਪੁਞ੍ਞਾਭਿਸਙ੍ਖਾਰਾਭਿਸਙ੍ਖਰਣਾਦਿਵਸੇਨ ਹੋਤਿ, ਤਸ੍ਮਾ ਤੇਨਤ੍ਥੇਨ ਚੋਦੇਤੁਂ ਅਰਹਾ ਪੁਞ੍ਞਾਭਿਸਙ੍ਖਾਰਨ੍ਤਿਆਦਿਮਾਹ. ਸੇਸਮੇਤ੍ਥ ਯਥਾਪਾਲ਼ਿਮੇਵ ਨਿਯ੍ਯਾਤਿ. ਸਤੋ ਸਮ੍ਪਜਾਨੋਤਿ ਇਦਂ ਜਵਨਕ੍ਖਣੇ ਕਿਰਿਯਸਤਿਸਮ੍ਪਜਞ੍ਞਾਨਂ ਵਸੇਨ ਅਸਮ੍ਮੋਹਮਰਣਦੀਪਨਤ੍ਥਂ ਵੁਤ੍ਤਂ, ਨ ਕੁਸਲਚਿਤ੍ਤਦੀਪਨਤ੍ਥਂ. ਤਸ੍ਮਾ ਅਸਾਧਕਨ੍ਤਿ.

ਕੁਸਲਚਿਤ੍ਤਕਥਾਵਣ੍ਣਨਾ.