੭. ਧਮ੍ਮਕਥਾਵਣ੍ਣਨਾ

੮੮੭-੮੮੮. ਇਦਾਨਿ ਧਮ੍ਮਕਥਾ ਨਾਮ ਹੋਤਿ. ਤਤ੍ਥ ਯਸ੍ਮਾ ਰੂਪਾਦਯੋ ਰੂਪਾਦਿਸਭਾਵੇਨ ਨਿਯਤਾ ਨ ਤਂ ਸਭਾਵਂ ਵਿਜਹਨ੍ਤਿ, ਤਸ੍ਮਾ ਸਬ੍ਬਧਮ੍ਮਾ ਨਿਯਤਾਤਿ ਯੇਸਂ ਲਦ੍ਧਿ, ਸੇਯ੍ਯਥਾਪਿ ਅਨ੍ਧਕਾਨਞ੍ਚੇਵ ਏਕਚ੍ਚਾਨਞ੍ਚ ਉਤ੍ਤਰਾਪਥਕਾਨਂ; ਤੇ ਸਨ੍ਧਾਯ ਸਬ੍ਬੇ ਧਮ੍ਮਾਤਿ ਪੁਚ੍ਛਾ ਸਕਵਾਦਿਸ੍ਸ, ਪਟਿਞ੍ਞਾ ਇਤਰਸ੍ਸ. ਅਥ ਨਂ ‘‘ਸਚੇ ਤੇ ਨਿਯਤਾ, ਮਿਚ੍ਛਤ੍ਤਨਿਯਤਾ ਵਾ ਸਿਯੁਂ ਸਮ੍ਮਤ੍ਤਨਿਯਤਾ ਵਾ, ਇਤੋ ਅਞ੍ਞੋ ਨਿਯਾਮੋ ਨਾਮ ਨਤ੍ਥੀ’’ਤਿ ਚੋਦੇਤੁਂ ਮਿਚ੍ਛਤ੍ਤਨਿਯਤਾਤਿਆਦਿਮਾਹ. ਤਤ੍ਥ ਪਟਿਕ੍ਖੇਪੋ ਚ ਪਟਿਞ੍ਞਾ ਚ ਪਰਵਾਦਿਸ੍ਸ. ਰੂਪਂ ਰੂਪਟ੍ਠੇਨਾਤਿਆਦਿ ਯੇਨਤ੍ਥੇਨ ਨਿਯਤਾਤਿ ਵਦਤਿ, ਤਸ੍ਸ ਵਸੇਨ ਚੋਦੇਤੁਂ ਵੁਤ੍ਤਂ. ਤਤ੍ਰਾਯਂ ਅਧਿਪ੍ਪਾਯੋ – ਰੂਪਞ੍ਹਿ ਰੂਪਟ੍ਠੇਨ ਨਿਯਤਨ੍ਤਿ ਰੂਪਂ ਰੂਪਮੇਵ, ਨ ਵੇਦਨਾਦਿਸਭਾਵਨ੍ਤਿ ਅਧਿਪ੍ਪਾਯੇਨ ਵਤ੍ਤਬ੍ਬਂ, ਇਤੋ ਅਞ੍ਞਥਾ ਨ ਵਤ੍ਤਬ੍ਬਂ. ਕਸ੍ਮਾ? ਰੂਪਟ੍ਠਤੋ ਅਞ੍ਞਸ੍ਸ ਰੂਪਸ੍ਸ ਅਭਾਵਾ. ਰੂਪਸਭਾਵੋ ਹਿ ਰੂਪਟ੍ਠੋ, ਰੂਪਸਭਾਵੋ ਚ ਰੂਪਮੇਵ, ਨ ਰੂਪਤੋ ਅਞ੍ਞੋ. ਵੇਦਨਾਦੀਹਿ ਪਨਸ੍ਸ ਨਾਨਤ੍ਤਪਞ੍ਞਾਪਨਤ੍ਥਂ ਏਸ ਵੋਹਾਰੋ ਹੋਤੀਤਿ. ਤਸ੍ਮਾ ‘‘ਰੂਪਂ ਰੂਪਟ੍ਠੇਨ ਨਿਯਤ’’ਨ੍ਤਿ ਵਦਨ੍ਤੇਨ ਰੂਪਂ ਨਿਯਤਨ੍ਤਿ ਵੁਤ੍ਤਂ ਹੋਤਿ. ਨਿਯਤਞ੍ਚ ਨਾਮ ਮਿਚ੍ਛਤ੍ਤਨਿਯਤਂ ਵਾ ਸਿਯਾ ਸਮ੍ਮਤ੍ਤਨਿਯਤਂ ਵਾ, ਇਤੋ ਅਞ੍ਞੋ ਨਿਯਾਮੋ ਨਾਮ ਨਤ੍ਥੀਤਿ. ਅਥ ਕਸ੍ਮਾ ਪਟਿਜਾਨਾਤੀਤਿ? ਅਤ੍ਥਨ੍ਤਰਵਸੇਨ. ਰੂਪਂ ਰੂਪਟ੍ਠੇਨ ਨਿਯਤਨ੍ਤਿ ਏਤ੍ਥ ਹਿ ਰੂਪਂ ਰੂਪਮੇਵ, ਨ ਵੇਦਨਾਦਿਸਭਾਵਨ੍ਤਿ ਅਯਮਤ੍ਥੋ. ਤਸ੍ਮਾ ਪਟਿਜਾਨਾਤਿ. ਇਤੋ ਅਞ੍ਞਥਾ ਪਨਸ੍ਸ ਨਿਯਤਤ੍ਤਂ ਨਤ੍ਥੀਤਿ ਪੁਨ ਤੇਨੇਵ ਨਯੇਨ ਚੋਦੇਤੁਂ ਮਿਚ੍ਛਤ੍ਤਨਿਯਤਨ੍ਤਿਆਦਿਮਾਹ. ਤਂ ਸਬ੍ਬਂ ਉਤ੍ਤਾਨਤ੍ਥਮੇਵ. ਤੇਨ ਹਿ ਰੂਪਨ੍ਤਿ ਲਦ੍ਧਿਪਿ ਅਯੋਨਿਸੋ ਪਤਿਟ੍ਠਾਪਿਤਤ੍ਤਾ ਅਪ੍ਪਤਿਟ੍ਠਿਤਾਵ ਹੋਤੀਤਿ.

ਧਮ੍ਮਕਥਾਵਣ੍ਣਨਾ.