੮. ਕਮ੍ਮਕਥਾਵਣ੍ਣਨਾ

੮੮੯-੮੯੧. ਇਦਾਨਿ ਕਮ੍ਮਕਥਾ ਨਾਮ ਹੋਤਿ. ਤਤ੍ਥ ‘‘ਯਸ੍ਮਾ ਦਿਟ੍ਠਧਮ੍ਮਵੇਦਨੀਯਾਦੀਨਿ ਦਿਟ੍ਠਧਮ੍ਮਵੇਦਨੀਯਟ੍ਠਾਦੀਹਿ ਨਿਯਤਾਨਿ, ਤਸ੍ਮਾ ਸਬ੍ਬੇ ਕਮ੍ਮਾ ਨਿਯਤਾ’’ਤਿ ਯੇਸਂ ਲਦ੍ਧਿ, ਸੇਯ੍ਯਥਾਪਿ ਤੇਸਞ੍ਞੇਵ; ਤੇ ਸਨ੍ਧਾਯ ਪੁਚ੍ਛਾ ਸਕਵਾਦਿਸ੍ਸ, ਪਟਿਞ੍ਞਾ ਇਤਰਸ੍ਸ. ਦਿਟ੍ਠਧਮ੍ਮਵੇਦਨੀਯਟ੍ਠੇਨ ਨਿਯਤਨ੍ਤਿ ਏਤ੍ਥ ਦਿਟ੍ਠਧਮ੍ਮਵੇਦਨੀਯਂ ਦਿਟ੍ਠਧਮ੍ਮਵੇਦਨੀਯਟ੍ਠਮੇਵ. ਸਚੇ ਦਿਟ੍ਠੇਵ ਧਮ੍ਮੇ ਵਿਪਾਕਂ ਦਾਤੁਂ ਸਕ੍ਕੋਤਿ ਦੇਤਿ, ਨੋ ਚੇ ਅਹੋਸਿਕਮ੍ਮਂ ਨਾਮ ਹੋਤੀਤਿ ਇਮਮਤ੍ਥਂ ਸਨ੍ਧਾਯ ਪਟਿਞ੍ਞਾ ਸਕਵਾਦਿਸ੍ਸ. ਮਿਚ੍ਛਤ੍ਤਸਮ੍ਮਤ੍ਤਨਿਯਾਮਵਸੇਨ ਪਨੇਤਂ ਅਨਿਯਤਮੇਵਾਤਿ ਸਬ੍ਬਂ ਹੇਟ੍ਠਾ ਵੁਤ੍ਤਨਯੇਨੇਵ ਵੇਦਿਤਬ੍ਬਨ੍ਤਿ.

ਕਮ੍ਮਕਥਾਵਣ੍ਣਨਾ.

ਏਕਵੀਸਤਿਮੋ ਵਗ੍ਗੋ.