੫. ਮਗ੍ਗਕਥਾਵਣ੍ਣਨਾ

੮੭੨-੮੭੫. ਇਦਾਨਿ ਮਗ੍ਗਕਥਾ ਨਾਮ ਹੋਤਿ. ਤਤ੍ਥ ਯੇਸਂ ‘‘ਪੁਬ੍ਬੇਵ ਖੋ ਪਨਸ੍ਸ ਕਾਯਕਮ੍ਮਂ ਵਚੀਕਮ੍ਮਂ ਆਜੀਵੋ ਸੁਪਰਿਸੁਦ੍ਧੋ ਹੋਤੀ’’ਤਿ (ਅ. ਨਿ. ੩.੪੩੧) ਇਦਞ੍ਚੇਵ ਸੁਤ੍ਤਂ ਸਮ੍ਮਾਵਾਚਾਕਮ੍ਮਨ੍ਤਾਜੀਵਾਨਞ੍ਚ ਚਿਤ੍ਤਵਿਪ੍ਪਯੁਤ੍ਤਤਂ ਨਿਸ੍ਸਾਯ ‘‘ਨਿਪ੍ਪਰਿਯਾਯੇਨ ਪਞ੍ਚਙ੍ਗਿਕੋਵ ਮਗ੍ਗੋ’’ਤਿ ਲਦ੍ਧਿ, ਸੇਯ੍ਯਥਾਪਿ ਮਹਿਸਾਸਕਾਨਂ, ਤੇ ਸਨ੍ਧਾਯ ਪਞ੍ਚਙ੍ਗਿਕੋਤਿ ਪੁਚ੍ਛਾ ਸਕਵਾਦਿਸ੍ਸ, ਪਟਿਞ੍ਞਾ ਇਤਰਸ੍ਸ. ਸਮ੍ਮਾਵਾਚਾ ਮਗ੍ਗਙ੍ਗਂ, ਸਾ ਚ ਨ ਮਗ੍ਗੋਤਿਆਦਿ ਪਰਸਮਯਵਸੇਨ ਵੁਤ੍ਤਂ. ਪਰਸਮਯਸ੍ਮਿਞ੍ਹਿ ਸਮ੍ਮਾਵਾਚਾਦਯੋ ਮਗ੍ਗਙ੍ਗਨ੍ਤਿ ਆਗਤਾ. ਰੂਪਤ੍ਤਾ ਪਨ ਮਗ੍ਗੋ ਨ ਹੋਤੀਤਿ ਵਣ੍ਣਿਤਾ. ਸਮ੍ਮਾਦਿਟ੍ਠਿ ਮਗ੍ਗਙ੍ਗਨ੍ਤਿਆਦਿ ਮਗ੍ਗਙ੍ਗਸ੍ਸ ਅਮਗ੍ਗਤਾ ਨਾਮ ਨਤ੍ਥੀਤਿ ਦਸ੍ਸਨਤ੍ਥਂ ਵੁਤ੍ਤਂ. ਪੁਬ੍ਬੇਵ ਖੋ ਪਨਸ੍ਸਾਤਿ ਸੁਤ੍ਤੇ ਪਰਿਸੁਦ੍ਧਸੀਲਸ੍ਸ ਮਗ੍ਗਭਾਵਨਾ ਨਾਮ ਹੋਤਿ, ਨ ਇਤਰਸ੍ਸਾਤਿ ਆਗਮਨਿਯਪਟਿਪਦਾਯ ਵਿਸੁਦ੍ਧਿਭਾਵਦਸ੍ਸਨਤ੍ਥਂ ‘‘ਕਾਯਕਮ੍ਮਂ ਵਚੀਕਮ੍ਮਂ ਆਜੀਵੋ ਸੁਪਰਿਸੁਦ੍ਧੋ ਹੋਤੀ’’ਤਿ ਵੁਤ੍ਤਂ, ਨ ਇਮੇਹਿ ਵਿਨਾ ਪਞ੍ਚਙ੍ਗਿਕਭਾਵਦਸ੍ਸਨਤ੍ਥਂ. ਤੇਨੇਵਾਹ ‘‘ਏਵਮਸ੍ਸਾਯਂ ਅਰਿਯੋ ਅਟ੍ਠਙ੍ਗਿਕੋ ਮਗ੍ਗੋ ਭਾਵਨਾਪਾਰਿਪੂਰਿਂ ਗਚ੍ਛਤੀ’’ਤਿ. ਸਕਵਾਦਿਨਾ ਆਭਤਸੁਤ੍ਤਂ ਨੀਤਤ੍ਥਮੇਵਾਤਿ.

ਮਗ੍ਗਕਥਾਵਣ੍ਣਨਾ.