੨੦. ਵੀਸਤਿਮਵਗ੍ਗੋ

੧. ਅਸਞ੍ਚਿਚ੍ਚਕਥਾਵਣ੍ਣਨਾ

੮੫੭-੮੬੨. ਇਦਾਨਿ ਅਸਞ੍ਚਿਚ੍ਚਕਥਾ ਨਾਮ ਹੋਤਿ. ਤਤ੍ਥ ‘‘ਆਨਨ੍ਤਰਿਯਵਤ੍ਥੂਨਿ ਨਾਮ ਗਰੂਨਿ ਭਾਰਿਯਾਨਿ, ਤਸ੍ਮਾ ਅਸਞ੍ਚਿਚ੍ਚਾਪਿ ਤੇਸੁ ਵਤ੍ਥੂਸੁ ਵਿਕੋਪਿਤੇਸੁ ਆਨਨ੍ਤਰਿਕੋ ਹੋਤੀ’’ਤਿ ਯੇਸਂ ਲਦ੍ਧਿ, ਸੇਯ੍ਯਥਾਪਿ ਏਕਚ੍ਚਾਨਂ ਉਤ੍ਤਰਾਪਥਕਾਨਂ; ਤੇ ਸਨ੍ਧਾਯ ਅਸਞ੍ਚਿਚ੍ਚਾਤਿ ਪੁਚ੍ਛਾ ਸਕਵਾਦਿਸ੍ਸ, ਲਦ੍ਧਿਵਸੇਨ ਪਟਿਞ੍ਞਾ ਇਤਰਸ੍ਸ. ਅਥ ਨਂ ‘‘ਯਸ੍ਮਾ ਆਨਨ੍ਤਰਿਯਕਮ੍ਮਂ ਨਾਮ ਕਮ੍ਮਪਥਪ੍ਪਤ੍ਤਂ. ਯਦਿ ਚ ਅਸਞ੍ਚਿਚ੍ਚ ਕਮ੍ਮਪਥਭੇਦੋ ਸਿਯਾ, ਅਵਸੇਸਾ ਪਾਣਾਤਿਪਾਤਾਦਯੋਪਿ ਅਸਞ੍ਚਿਚ੍ਚ ਭਵੇਯ੍ਯੁ’’ਨ੍ਤਿ ਚੋਦਨਤ੍ਥਂ ਅਸਞ੍ਚਿਚ੍ਚਪਾਣਂ ਹਨ੍ਤ੍ਵਾਤਿਆਦਿਮਾਹ. ਇਤਰੋ ਤਥਾਰੂਪਾਯ ਲਦ੍ਧਿਯਾ ਅਭਾਵੇਨ ਪਟਿਕ੍ਖਿਪਤਿ. ਸੇਸਂ ਯਥਾਪਾਲ਼ਿਮੇਵ ਨਿਯ੍ਯਾਤਿ. ਨ ਵਤ੍ਤਬ੍ਬਂ ਮਾਤੁਘਾਤਕੋਤਿ ਪੁਚ੍ਛਾ ਪਰਵਾਦਿਸ੍ਸ, ਰੋਗਪਟਿਕਾਰਾਦਿਕਾਲੇ ਅਸਞ੍ਚਿਚ੍ਚ ਘਾਤਂ ਸਨ੍ਧਾਯ ਪਟਿਞ੍ਞਾ ਸਕਵਾਦਿਸ੍ਸ. ਨਨੁ ਮਾਤਾ ਜੀਵਿਤਾ ਵੋਰੋਪਿਤਾਤਿ ਪਞ੍ਹੇਪਿ ਅਸਞ੍ਚਿਚ੍ਚ ਵੋਰੋਪਿਤਂ ਸਨ੍ਧਾਯ ਪਟਿਞ੍ਞਾ ਸਕਵਾਦਿਸ੍ਸੇਵ. ਏਵਂ ਅਧਿਪ੍ਪਾਯਂ ਪਨ ਅਗ੍ਗਹੇਤ੍ਵਾ ਹਞ੍ਚੀਤਿ ਲਦ੍ਧਿਪਤਿਟ੍ਠਾਪਨਂ ਇਤਰਸ੍ਸ. ਤਂ ਅਯੋਨਿਸੋ ਪਤਿਟ੍ਠਾਪਿਤਤ੍ਤਾ ਅਪ੍ਪਤਿਟ੍ਠਿਤਮੇਵ. ਪਿਤੁਘਾਤਕਾਦੀਸੁਪਿ ਏਸੇਵ ਨਯੋ. ਸਙ੍ਘਭੇਦਕੇ ਪਨ ਧਮ੍ਮਸਞ੍ਞਿਂ ਸਨ੍ਧਾਯ ਸਙ੍ਘਭੇਦੋ ਆਨਨ੍ਤਰਿਕੋਤਿ ਪੁਚ੍ਛਾ ਸਕਵਾਦਿਸ੍ਸ, ‘‘ਸਙ੍ਘਂ ਸਮਗ੍ਗਂ ਭੇਤ੍ਵਾਨ, ਕਪ੍ਪਂ ਨਿਰਯਮ੍ਹਿ ਪਚ੍ਚਤੀ’’ਤਿ ਵਚਨਂ ਅਯੋਨਿਸੋ ਗਹੇਤ੍ਵਾ ਪਟਿਞ੍ਞਾ ਪਰਵਾਦਿਸ੍ਸ. ਪੁਨ ਸਬ੍ਬੇਤਿ ਪੁਟ੍ਠੋ ਸਕਪਕ੍ਖੇ ਧਮ੍ਮਸਞ੍ਞਿਂ ਸਨ੍ਧਾਯ ਪਟਿਕ੍ਖਿਪਤਿ, ਪਰਪਕ੍ਖੇ ਧਮ੍ਮਸਞ੍ਞਿਂ ਸਨ੍ਧਾਯ ਪਟਿਜਾਨਾਤਿ. ਧਮ੍ਮਸਞ੍ਞੀਤਿ ਪਞ੍ਹਦ੍ਵਯੇਪਿ ਏਸੇਵ ਨਯੋ. ਨਨੁ ਵੁਤ੍ਤਂ ਭਗਵਤਾਤਿ ਸੁਤ੍ਤਂ ਏਕਨ੍ਤੇਨੇਵ ਧਮ੍ਮਵਾਦਿਸ੍ਸ ਆਨਨ੍ਤਰਿਕਭਾਵਦਸ੍ਸਨਤ੍ਥਂ ਵੁਤ੍ਤਂ. ਆਪਾਯਿਕੋ ਨੇਰਯਿਕੋਤਿ ਗਾਥਾਯਪਿ ਅਧਮ੍ਮਵਾਦੀਯੇਵ ਅਧਿਪ੍ਪੇਤੋ. ਇਤਰੋ ਪਨ ਅਧਿਪ੍ਪਾਯਂ ਅਗ੍ਗਹੇਤ੍ਵਾ ਲਦ੍ਧਿਂ ਪਤਿਟ੍ਠਪੇਤਿ. ਸਾ ਅਯੋਨਿਸੋ ਪਤਿਟ੍ਠਾਪਿਤਤ੍ਤਾ ਅਪ੍ਪਤਿਟ੍ਠਿਤਾਯੇਵਾਤਿ.

ਅਸਞ੍ਚਿਚ੍ਚਕਥਾਵਣ੍ਣਨਾ.

੨. ਞਾਣਕਥਾਵਣ੍ਣਨਾ

੮੬੩-੮੬੫. ਇਦਾਨਿ ਞਾਣਕਥਾ ਨਾਮ ਹੋਤਿ. ਤਤ੍ਥ ਦੁਵਿਧਂ ਞਾਣਂ – ਲੋਕਿਯਞ੍ਚ ਲੋਕੁਤ੍ਤਰਞ੍ਚ. ਲੋਕਿਯਂ ਸਮਾਪਤ੍ਤਿਞਾਣਮ੍ਪਿ ਹੋਤਿ ਦਾਨਾਦਿਵਸੇਨ ਪਵਤ੍ਤਂ ਕਮ੍ਮਸ੍ਸਕਤਞਾਣਮ੍ਪਿ; ਲੋਕੁਤ੍ਤਰਂ ਸਚ੍ਚਪਰਿਚ੍ਛੇਦਕਂ ਮਗ੍ਗਞਾਣਮ੍ਪਿ ਫਲਞਾਣਮ੍ਪਿ. ਇਮਂ ਪਨ ਵਿਭਾਗਂ ਅਕਤ੍ਵਾ ‘‘ਸਚ੍ਚਪਰਿਚ੍ਛੇਦਕਮੇਵ ਞਾਣਂ ਨ ਇਤਰਂ, ਤਸ੍ਮਾ ਨਤ੍ਥਿ ਪੁਥੁਜ੍ਜਨਸ੍ਸ ਞਾਣ’’ਨ੍ਤਿ ਯੇਸਂ ਲਦ੍ਧਿ, ਸੇਯ੍ਯਥਾਪਿ ਹੇਤੁਵਾਦਾਨਂ, ਤੇ ਸਨ੍ਧਾਯ ਪੁਚ੍ਛਾ ਸਕਵਾਦਿਸ੍ਸ, ਪਟਿਞ੍ਞਾ ਇਤਰਸ੍ਸ. ਪਞ੍ਞਾਤਿਆਦਿ ਞਾਣਵੇਵਚਨਦਸ੍ਸਨਤ੍ਥਂ ਵੁਤ੍ਤਂ. ਤੇਨੇਤਂ ਦੀਪੇਤਿ – ਯਦਿ ਤਸ੍ਸ ਞਾਣਂ ਨਤ੍ਥਿ, ਪਞ੍ਞਾਦਯੋਪਿ ਨਤ੍ਥਿ. ਅਥ ਪਞ੍ਞਾਦਯੋ ਅਤ੍ਥਿ, ਞਾਣਮ੍ਪਿ ਅਤ੍ਥਿ. ਕਸ੍ਮਾ? ਪਞ੍ਞਾਦੀਨਂ ਞਾਣਤੋ ਅਨਞ੍ਞਤ੍ਤਾਤਿ. ਪਠਮਂ ਝਾਨਨ੍ਤਿਆਦਿ ਸਮਾਪਤ੍ਤਿਞਾਣਸ੍ਸ ਦਸ੍ਸਨਤ੍ਥਂ ਵੁਤ੍ਤਂ. ਦਾਨਂ ਦਦੇਯ੍ਯਾਤਿਆਦਿ ਕਮ੍ਮਸ੍ਸਕਤਞਾਣਸ੍ਸ. ਦੁਕ੍ਖਂ ਪਰਿਜਾਨਾਤੀਤਿ ਲੋਕੁਤ੍ਤਰਮਗ੍ਗਞਾਣਮੇਵ ਦੀਪੇਤਿ, ਨ ਚ ਲੋਕੁਤ੍ਤਰਮੇਵ ਞਾਣਨ੍ਤਿ.

ਞਾਣਕਥਾਵਣ੍ਣਨਾ.

੩. ਨਿਰਯਪਾਲਕਥਾਵਣ੍ਣਨਾ

੮੬੬. ਇਦਾਨਿ ਨਿਰਯਪਾਲਕਥਾ ਨਾਮ ਹੋਤਿ. ਤਤ੍ਥ ‘‘ਨਿਰਯੇ ਨੇਰਯਿਕਕਮ੍ਮਾਨੇਵ ਨਿਰਯਪਾਲਰੂਪਵਸੇਨ ਵਧੇਨ੍ਤਿ, ਨਤ੍ਥਿ ਨਿਰਯਪਾਲਾ ਨਾਮ ਸਤ੍ਤਾ’’ਤਿ ਯੇਸਂ ਲਦ੍ਧਿ, ਸੇਯ੍ਯਥਾਪਿ ਅਨ੍ਧਕਾਨਂ; ਤੇ ਸਨ੍ਧਾਯ ਪੁਚ੍ਛਾ ਸਕਵਾਦਿਸ੍ਸ, ਪਟਿਞ੍ਞਾ ਇਤਰਸ੍ਸ. ਅਥ ਨਂ ‘‘ਯਦਿ ਤਤ੍ਥ ਨਿਰਯਪਾਲਾ ਨ ਸਿਯੁਂ, ਕਮ੍ਮਕਾਰਣਾਪਿ ਨ ਭਵੇਯ੍ਯੁਂ. ਕਾਰਣਿਕੇਸੁ ਹਿ ਸਤਿ ਕਾਰਣਾ’’ਤਿ ਚੋਦੇਤੁਂ ਨਤ੍ਥਿ ਨਿਰਯੇਸੂਤਿਆਦਿਮਾਹ.

੮੬੭-੮੬੮. ਅਤ੍ਥਿ ਮਨੁਸ੍ਸੇਸੂਤਿ ਪਚ੍ਚਕ੍ਖੇਨ ਞਾਪਨਤ੍ਥਂ. ਯਥਾ ਹਿ ਮਨੁਸ੍ਸੇਸੁ ਸਤਿ ਕਾਰਣਿਕੇਸੁ ਕਾਰਣਾ, ਏਵਂ ਤਤ੍ਥਾਪੀਤਿ ਅਯਮੇਤ੍ਥ ਅਧਿਪ੍ਪਾਯੋ. ਅਤ੍ਥਿ ਨਿਰਯੇਸੂਤਿ ਪੁਚ੍ਛਾ ਪਰਵਾਦਿਸ੍ਸ, ਪਟਿਞ੍ਞਾ ਇਤਰਸ੍ਸ. ਨ ਵੇਸ੍ਸਭੂ ਨੋਪਿ ਚ ਪੇਤ੍ਤਿਰਾਜਾਤਿ ਪਰਵਾਦਿਨਾ ਸਕਸਮਯਤੋ ਸੁਤ੍ਤਂ ਆਭਤਂ. ਤਂ ਪਨ ਸਾਸਨਾਵਚਰਿਕਨ੍ਤਿ ਸਕਵਾਦਿਨਾ ਅਨੁਞ੍ਞਾਤਂ. ਤਤ੍ਥ ਵੇਸ੍ਸਭੂਤਿ ਏਕੋ ਦੇਵੋ. ਪੇਤ੍ਤਿਰਾਜਾਤਿ ਪੇਤ੍ਤਿਵਿਸਯੇ ਪੇਤਮਹਿਦ੍ਧਿਕੋ. ਸੋਮਾਦਯੋ ਪਾਕਟਾ ਏਵ. ਇਦਂ ਵੁਤ੍ਤਂ ਹੋਤਿ – ਅਤ੍ਤਨੋ ਕਮ੍ਮੇਹਿ ਇਤੋ ਪਣੁਨ੍ਨਂ ਪਰਲੋਕਂ ਪਤ੍ਤਂ ਪੁਰਿਸਂ ਨ ਏਤੇ ਵੇਸ੍ਸਭੂਆਦਯੋ ਹਨਨ੍ਤਿ. ਯੇਹਿ ਪਨ ਸੋ ਕਮ੍ਮੇਹਿ ਤਤ੍ਥ ਪਣੁਨ੍ਨੋ, ਤਾਨਿ ਸਕਾਨਿ ਕਮ੍ਮਾਨਿਯੇਵ ਨਂ ਤਤ੍ਥ ਹਨਨ੍ਤੀਤਿ ਕਮ੍ਮਸ੍ਸਕਤਂ ਦੀਪੇਤਿ, ਨ ਨਿਰਯਪਾਲਾਨਂ ਅਭਾਵਂ. ਸਕਵਾਦਿਨਾ ਪਨ ਤਮੇਨਂ, ਭਿਕ੍ਖਵੇਤਿ ਆਭਤਾਨਿ ਸੁਤ੍ਤਪਦਾਨਿ ਨੀਤਤ੍ਥਾਨੇਵਾਤਿ.

ਨਿਰਯਪਾਲਕਥਾਵਣ੍ਣਨਾ.

੪. ਤਿਰਚ੍ਛਾਨਕਥਾਵਣ੍ਣਨਾ

੮੬੯-੮੭੧. ਇਦਾਨਿ ਤਿਰਚ੍ਛਾਨਕਥਾ ਨਾਮ ਹੋਤਿ. ਤਤ੍ਥ ਦੇਵੇਸੁ ਏਰਾਵਣਾਦਯੋ ਦੇਵਪੁਤ੍ਤਾ ਹਤ੍ਥਿਵਣ੍ਣਂ ਅਸ੍ਸਵਣ੍ਣਂ ਵਿਕੁਬ੍ਬਨ੍ਤਿ, ਨਤ੍ਥਿ ਤਤ੍ਥ ਤਿਰਚ੍ਛਾਨਗਤਾ. ਯੇਸਂ ਪਨ ਤਿਰਚ੍ਛਾਨਵਣ੍ਣਿਨੋ ਦੇਵਪੁਤ੍ਤੇ ਦਿਸ੍ਵਾ ‘‘ਅਤ੍ਥਿ ਦੇਵੇਸੁ ਤਿਰਚ੍ਛਾਨਗਤਾ’’ਤਿ ਲਦ੍ਧਿ, ਸੇਯ੍ਯਥਾਪਿ ਅਨ੍ਧਕਾਨਂ; ਤੇ ਸਨ੍ਧਾਯ ਪੁਚ੍ਛਾ ਸਕਵਾਦਿਸ੍ਸ, ਪਟਿਞ੍ਞਾ ਇਤਰਸ੍ਸ. ਅਥ ਨਂ ‘‘ਯਦਿ ਦੇਵਯੋਨਿਯਂ ਤਿਰਚ੍ਛਾਨਗਤਾ ਸਿਯੁਂ, ਤਿਰਚ੍ਛਾਨਯੋਨਿਯਮ੍ਪਿ ਦੇਵਾ ਸਿਯੁ’’ਨ੍ਤਿ ਚੋਦੇਤੁਂ ਅਤ੍ਥਿ ਤਿਰਚ੍ਛਾਨਗਤੇਸੂਤਿਆਦਿਮਾਹ. ਕੀਟਾਤਿਆਦਿ ਯੇਸਂ ਸੋ ਅਭਾਵਂ ਇਚ੍ਛਤਿ, ਤੇ ਦਸ੍ਸੇਤੁਂ ਵੁਤ੍ਤਂ. ਏਰਾਵਣੋਤਿ ਪਞ੍ਹੇ ਤਸ੍ਸ ਅਤ੍ਥਿਤਾਯ ਪਟਿਞ੍ਞਾ ਸਕਵਾਦਿਸ੍ਸ, ਨ ਤਿਰਚ੍ਛਾਨਗਤਸ੍ਸ. ਹਤ੍ਥਿਬਨ੍ਧਾਤਿਆਦਿ ‘‘ਯਦਿ ਤਤ੍ਥ ਹਤ੍ਥਿਆਦਯੋ ਸਿਯੁਂ, ਹਤ੍ਥਿਬਨ੍ਧਾਦਯੋਪਿ ਸਿਯੁ’’ਨ੍ਤਿ ਚੋਦਨਤ੍ਥਂ ਵੁਤ੍ਤਂ. ਤਤ੍ਥ ਯਾਵਸਿਕਾਤਿ ਯਵਸ੍ਸ ਦਾਯਕਾ. ਕਾਰਣਿਕਾਤਿ ਹਤ੍ਥਾਚਰਿਯਾਦਯੋ, ਯੇਹਿ ਤੇ ਨਾਨਾਵਿਧਂ ਕਾਰਣਂ ਕਰੇਯ੍ਯੁਂ. ਭਤ੍ਤਕਾਰਕਾਤਿ ਹਤ੍ਥਿਆਦੀਨਂ ਭਤ੍ਤਰਨ੍ਧਕਾ. ਨ ਹੇਵਨ੍ਤਿ ਤਥਾ ਅਨਿਚ੍ਛਨ੍ਤੋ ਪਟਿਕ੍ਖਿਪਤੀਤਿ.

ਤਿਰਚ੍ਛਾਨਕਥਾਵਣ੍ਣਨਾ.

੫. ਮਗ੍ਗਕਥਾਵਣ੍ਣਨਾ

੮੭੨-੮੭੫. ਇਦਾਨਿ ਮਗ੍ਗਕਥਾ ਨਾਮ ਹੋਤਿ. ਤਤ੍ਥ ਯੇਸਂ ‘‘ਪੁਬ੍ਬੇਵ ਖੋ ਪਨਸ੍ਸ ਕਾਯਕਮ੍ਮਂ ਵਚੀਕਮ੍ਮਂ ਆਜੀਵੋ ਸੁਪਰਿਸੁਦ੍ਧੋ ਹੋਤੀ’’ਤਿ (ਅ. ਨਿ. ੩.੪੩੧) ਇਦਞ੍ਚੇਵ ਸੁਤ੍ਤਂ ਸਮ੍ਮਾਵਾਚਾਕਮ੍ਮਨ੍ਤਾਜੀਵਾਨਞ੍ਚ ਚਿਤ੍ਤਵਿਪ੍ਪਯੁਤ੍ਤਤਂ ਨਿਸ੍ਸਾਯ ‘‘ਨਿਪ੍ਪਰਿਯਾਯੇਨ ਪਞ੍ਚਙ੍ਗਿਕੋਵ ਮਗ੍ਗੋ’’ਤਿ ਲਦ੍ਧਿ, ਸੇਯ੍ਯਥਾਪਿ ਮਹਿਸਾਸਕਾਨਂ, ਤੇ ਸਨ੍ਧਾਯ ਪਞ੍ਚਙ੍ਗਿਕੋਤਿ ਪੁਚ੍ਛਾ ਸਕਵਾਦਿਸ੍ਸ, ਪਟਿਞ੍ਞਾ ਇਤਰਸ੍ਸ. ਸਮ੍ਮਾਵਾਚਾ ਮਗ੍ਗਙ੍ਗਂ, ਸਾ ਚ ਨ ਮਗ੍ਗੋਤਿਆਦਿ ਪਰਸਮਯਵਸੇਨ ਵੁਤ੍ਤਂ. ਪਰਸਮਯਸ੍ਮਿਞ੍ਹਿ ਸਮ੍ਮਾਵਾਚਾਦਯੋ ਮਗ੍ਗਙ੍ਗਨ੍ਤਿ ਆਗਤਾ. ਰੂਪਤ੍ਤਾ ਪਨ ਮਗ੍ਗੋ ਨ ਹੋਤੀਤਿ ਵਣ੍ਣਿਤਾ. ਸਮ੍ਮਾਦਿਟ੍ਠਿ ਮਗ੍ਗਙ੍ਗਨ੍ਤਿਆਦਿ ਮਗ੍ਗਙ੍ਗਸ੍ਸ ਅਮਗ੍ਗਤਾ ਨਾਮ ਨਤ੍ਥੀਤਿ ਦਸ੍ਸਨਤ੍ਥਂ ਵੁਤ੍ਤਂ. ਪੁਬ੍ਬੇਵ ਖੋ ਪਨਸ੍ਸਾਤਿ ਸੁਤ੍ਤੇ ਪਰਿਸੁਦ੍ਧਸੀਲਸ੍ਸ ਮਗ੍ਗਭਾਵਨਾ ਨਾਮ ਹੋਤਿ, ਨ ਇਤਰਸ੍ਸਾਤਿ ਆਗਮਨਿਯਪਟਿਪਦਾਯ ਵਿਸੁਦ੍ਧਿਭਾਵਦਸ੍ਸਨਤ੍ਥਂ ‘‘ਕਾਯਕਮ੍ਮਂ ਵਚੀਕਮ੍ਮਂ ਆਜੀਵੋ ਸੁਪਰਿਸੁਦ੍ਧੋ ਹੋਤੀ’’ਤਿ ਵੁਤ੍ਤਂ, ਨ ਇਮੇਹਿ ਵਿਨਾ ਪਞ੍ਚਙ੍ਗਿਕਭਾਵਦਸ੍ਸਨਤ੍ਥਂ. ਤੇਨੇਵਾਹ ‘‘ਏਵਮਸ੍ਸਾਯਂ ਅਰਿਯੋ ਅਟ੍ਠਙ੍ਗਿਕੋ ਮਗ੍ਗੋ ਭਾਵਨਾਪਾਰਿਪੂਰਿਂ ਗਚ੍ਛਤੀ’’ਤਿ. ਸਕਵਾਦਿਨਾ ਆਭਤਸੁਤ੍ਤਂ ਨੀਤਤ੍ਥਮੇਵਾਤਿ.

ਮਗ੍ਗਕਥਾਵਣ੍ਣਨਾ.

੬. ਞਾਣਕਥਾਵਣ੍ਣਨਾ

੮੭੬-੮੭੭. ਇਦਾਨਿ ਞਾਣਕਥਾ ਨਾਮ ਹੋਤਿ. ਤਤ੍ਥ ਧਮ੍ਮਚਕ੍ਕਪ੍ਪਵਤ੍ਤਨੇ ਦ੍ਵਾਦਸਾਕਾਰਞਾਣਂ ਸਨ੍ਧਾਯ ‘‘ਦ੍ਵਾਦਸਵਤ੍ਥੁਕਂ ਞਾਣਂ ਲੋਕੁਤ੍ਤਰ’’ਨ੍ਤਿ ਯੇਸਂ ਲਦ੍ਧਿ, ਸੇਯ੍ਯਥਾਪਿ ਪੁਬ੍ਬਸੇਲਿਯਾਨਂ, ਤੇ ਸਨ੍ਧਾਯ ਪੁਚ੍ਛਾ ਸਕਵਾਦਿਸ੍ਸ, ਪਟਿਞ੍ਞਾ ਇਤਰਸ੍ਸ. ਅਥ ਨਂ ‘‘ਸਚੇ ਤਂ ਦ੍ਵਾਦਸਵਤ੍ਥੁਕਂ, ਦ੍ਵਾਦਸਹਿ ਮਗ੍ਗਞਾਣੇਹਿ ਭਵਿਤਬ੍ਬ’’ਨ੍ਤਿ ਚੋਦੇਤੁਂ ਦ੍ਵਾਦਸਾਤਿਆਦਿਮਾਹ. ਇਤਰੋ ਮਗ੍ਗਸ੍ਸ ਏਕਤ੍ਤਂ ਸਨ੍ਧਾਯ ਪਟਿਕ੍ਖਿਪਤਿ, ਏਕੇਕਸ੍ਮਿਂ ਸਚ੍ਚੇ ਸਚ੍ਚਞਾਣਕਿਚ੍ਚਞਾਣਕਤਞਾਣਾਨਂ ਵਸੇਨ ਞਾਣਨਾਨਤ੍ਤਂ ਸਨ੍ਧਾਯ ਪਟਿਜਾਨਾਤਿ. ਦ੍ਵਾਦਸ ਸੋਤਾਪਤ੍ਤਿਮਗ੍ਗਾਤਿਆਦੀਸੁਪਿ ਏਸੇਵ ਨਯੋ. ਨਨੁ ਵੁਤ੍ਤਂ ਭਗਵਤਾਤਿ ਸੁਤ੍ਤਂ ਸਦ੍ਧਿਂ ਪੁਬ੍ਬਭਾਗਪਰਭਾਗੇਹਿ ਞਾਣਨਾਨਤ੍ਤਂ ਦੀਪੇਤਿ, ਨ ਅਰਿਯਮਗ੍ਗਸ੍ਸ ਦ੍ਵਾਦਸ ਞਾਣਤਂ. ਤਸ੍ਮਾ ਅਸਾਧਕਨ੍ਤਿ.

ਞਾਣਕਥਾਵਣ੍ਣਨਾ.

ਵੀਸਤਿਮੋ ਵਗ੍ਗੋ.

ਚਤੁਤ੍ਥਪਣ੍ਣਾਸਕੋ ਸਮਤ੍ਤੋ.