੧੯. ਏਕੂਨਵੀਸਤਿਮਵਗ੍ਗੋ

੧. ਕਿਲੇਸਪਜਹਨਕਥਾਵਣ੍ਣਨਾ

੮੨੮-੮੩੧. ਇਦਾਨਿ ਕਿਲੇਸਪਜਹਨਕਥਾ ਨਾਮ ਹੋਤਿ. ਤਤ੍ਥ ‘‘ਯਸ੍ਮਾ ਕਿਲੇਸਪਹਾਨਂ ਨਾਮ ਅਤ੍ਥਿ, ਪਹੀਨਕਿਲੇਸਸ੍ਸ ਚ ਅਤੀਤਾਪਿ ਕਿਲੇਸਾ ਪਹੀਨਾਵ ਹੋਨ੍ਤਿ, ਅਨਾਗਤਾਪਿ, ਪਚ੍ਚੁਪ੍ਪਨ੍ਨਾਪਿ, ਤਸ੍ਮਾ ਅਤੀਤੇਪਿ ਕਿਲੇਸੇ ਪਜਹਤਿ, ਅਨਾਗਤੇਪਿ, ਪਚ੍ਚੁਪ੍ਪਨ੍ਨੇਪੀ’’ਤਿ ਯੇਸਂ ਲਦ੍ਧਿ, ਸੇਯ੍ਯਥਾਪਿ ਏਕਚ੍ਚਾਨਂ ਉਤ੍ਤਰਾਪਥਕਾਨਂ; ਤੇ ਸਨ੍ਧਾਯ ਅਤੀਤੇਤਿਆਦਿਪੁਚ੍ਛਾ ਸਕਵਾਦਿਸ੍ਸ, ਪਟਿਞ੍ਞਾ ਇਤਰਸ੍ਸ. ਸੇਸਂ ਯਥਾਪਾਲ਼ਿਮੇਵ ਨਿਯ੍ਯਾਤਿ. ਨਤ੍ਥਿ ਕਿਲੇਸੇ ਜਹਤੀਤਿ ਇਮਸ੍ਮਿਂ ਪਨ ਪਰਵਾਦਿਸ੍ਸ ਪਞ੍ਹੇ ਯਸ੍ਮਾ ਕਚਵਰਂ ਪਜਹਨ੍ਤਸ੍ਸ ਕਚਵਰੇ ਛਡ੍ਡਨਵਾਯਾਮੋ ਵਿਯ ਕਿਲੇਸੇ ਪਜਹਨ੍ਤਸ੍ਸ ਨ ਅਤੀਤਾਦਿਭੇਦੇਸੁ ਕਿਲੇਸੇਸੁ ਵਾਯਾਮੋ ਅਤ੍ਥਿ, ਨਿਬ੍ਬਾਨਾਰਮ੍ਮਣੇ ਪਨ ਅਰਿਯਮਗ੍ਗੇ ਪਵਤ੍ਤਿਤੇ ਕਿਲੇਸਾ ਅਨੁਪ੍ਪਨ੍ਨਾਯੇਵ ਨੁਪ੍ਪਜ੍ਜਨ੍ਤੀਤਿ ਪਹੀਨਾ ਨਾਮ ਹੋਨ੍ਤਿ, ਤਸ੍ਮਾ ਨ ਹੇਵਨ੍ਤਿ ਪਟਿਕ੍ਖਿਪਤਿ. ਤੇਨ ਹਿ ਅਤੀਤੇ ਕਿਲੇਸੇ ਪਜਹਤੀਤਿਆਦਿ ਪਨ ਯਸ੍ਮਾ ‘‘ਨਤ੍ਥਿ ਕਿਲੇਸਪਜਹਨਾ’’ਤਿ ਨ ਵਤ੍ਤਬ੍ਬਂ, ਤਸ੍ਮਾ ਅਤੀਤਾਦਿਭੇਦੇ ਪਜਹਤੀਤਿ ਛਲੇਨ ਵੁਤ੍ਤਂ.

ਕਿਲੇਸਪਜਹਨਕਥਾਵਣ੍ਣਨਾ.

੨. ਸੁਞ੍ਞਤਕਥਾਵਣ੍ਣਨਾ

੮੩੨. ਇਦਾਨਿ ਸੁਞ੍ਞਤਕਥਾ ਨਾਮ ਹੋਤਿ. ਤਤ੍ਥ ਸੁਞ੍ਞਤਾਤਿ ਦ੍ਵੇ ਸੁਞ੍ਞਤਾ ਖਨ੍ਧਾਨਞ੍ਚ ਅਨਤ੍ਤਲਕ੍ਖਣਂ ਨਿਬ੍ਬਾਨਞ੍ਚ. ਤੇਸੁ ਅਨਤ੍ਤਲਕ੍ਖਣਂ ਤਾਵ ਏਕਚ੍ਚਂ ਏਕੇਨ ਪਰਿਯਾਯੇਨ ਸਿਯਾ ਸਙ੍ਖਾਰਕ੍ਖਨ੍ਧਪਰਿਯਾਪਨ੍ਨਂ, ਨਿਬ੍ਬਾਨਂ, ਅਪਰਿਯਾਪਨ੍ਨਮੇਵ. ਇਮਂ ਪਨ ਵਿਭਾਗਂ ਅਗ੍ਗਹੇਤ੍ਵਾ ‘‘ਸੁਞ੍ਞਤਾ ਸਙ੍ਖਾਰਕ੍ਖਨ੍ਧਪਰਿਯਾਪਨ੍ਨਾ’’ਤਿ ਯੇਸਂ ਲਦ੍ਧਿ, ਸੇਯ੍ਯਥਾਪਿ ਅਨ੍ਧਕਾਨਂ, ਤੇ ਸਨ੍ਧਾਯ ਪੁਚ੍ਛਾ ਸਕਵਾਦਿਸ੍ਸ, ਪਟਿਞ੍ਞਾ ਇਤਰਸ੍ਸ. ਅਨਿਮਿਤ੍ਤਨ੍ਤਿ ਸਬ੍ਬਨਿਮਿਤ੍ਤਰਹਿਤਂ ਨਿਬ੍ਬਾਨਂ. ‘‘ਅਪ੍ਪਣਿਹਿਤੋ’’ਤਿਪਿ ਤਸ੍ਸੇਵ ਨਾਮਂ. ਕਸ੍ਮਾ ਪਨੇਤਂ ਆਭਤਨ੍ਤਿ? ਅਵਿਭਜ੍ਜਵਾਦੀਵਾਦੇ ਦੋਸਾਰੋਪਨਤ੍ਥਂ. ਯਸ੍ਸ ਹਿ ਅਵਿਭਜਿਤ੍ਵਾ ‘‘ਏਕਦੇਸੇਨੇਵ ਸੁਞ੍ਞਤਾ ਸਙ੍ਖਾਰਕ੍ਖਨ੍ਧਪਰਿਯਾਪਨ੍ਨਾ’’ਤਿ ਲਦ੍ਧਿ, ਤਸ੍ਸ ਨਿਬ੍ਬਾਨਮ੍ਪਿ ਸਙ੍ਖਾਰਕ੍ਖਨ੍ਧਪਰਿਯਾਪਨ੍ਨਨ੍ਤਿ ਆਪਜ੍ਜਤਿ. ਇਮਸ੍ਸ ਦੋਸਸ੍ਸਾਰੋਪਨਤ੍ਥਂ ‘‘ਅਨਿਮਿਤ੍ਤਂ ਅਪ੍ਪਣਿਹਿਤ’’ਨ੍ਤਿ ਆਭਤਂ. ਇਤਰੋ ਤਸ੍ਸ ਪਰਿਯਾਪਨ੍ਨਭਾਵਂ ਅਨਿਚ੍ਛਨ੍ਤੋ ਪਟਿਕ੍ਖਿਪਤਿ. ਸਙ੍ਖਾਰਕ੍ਖਨ੍ਧੋ ਨ ਅਨਿਚ੍ਚੋਤਿਆਦਿ ਨਿਬ੍ਬਾਨਸਙ੍ਖਾਤਾਯ ਸੁਞ੍ਞਤਾਯ ਅਨਿਚ੍ਚਭਾਵਾਪਤ੍ਤਿਦੋਸਦਸ੍ਸਨਤ੍ਥਂ ਵੁਤ੍ਤਂ.

੮੩੩. ਸਙ੍ਖਾਰਕ੍ਖਨ੍ਧਸ੍ਸ ਸੁਞ੍ਞਤਾਤਿ ‘‘ਯਦਿ ਅਞ੍ਞਸ੍ਸ ਖਨ੍ਧਸ੍ਸ ਸੁਞ੍ਞਤਾ ਅਞ੍ਞਕ੍ਖਨ੍ਧਪਰਿਯਾਪਨ੍ਨਾ, ਸਙ੍ਖਾਰਕ੍ਖਨ੍ਧਸੁਞ੍ਞਤਾਯਪਿ ਸੇਸਕ੍ਖਨ੍ਧਪਰਿਯਾਪਨ੍ਨਾਯ ਭਵਿਤਬ੍ਬ’’ਨ੍ਤਿ ਚੋਦਨਤ੍ਥਂ ਵੁਤ੍ਤਂ. ਸਙ੍ਖਾਰਕ੍ਖਨ੍ਧਸ੍ਸ ਸੁਞ੍ਞਤਾ ਨ ਵਤ੍ਤਬ੍ਬਾਤਿਆਦਿ ‘‘ਯਦਿ ਸਙ੍ਖਾਰਕ੍ਖਨ੍ਧਸੁਞ੍ਞਤਾ ਸੇਸਕ੍ਖਨ੍ਧਪਰਿਯਾਪਨ੍ਨਾ ਨ ਹੋਤਿ, ਸੇਸਕ੍ਖਨ੍ਧਸੁਞ੍ਞਤਾਪਿ ਸਙ੍ਖਾਰਕ੍ਖਨ੍ਧਪਰਿਯਾਪਨ੍ਨਾ ਨ ਹੋਤੀ’’ਤਿ ਪਟਿਲੋਮਦਸ੍ਸਨਤ੍ਥਂ ਵੁਤ੍ਤਂ.

੮੩੪. ਸੁਞ੍ਞਮਿਦਂ, ਭਿਕ੍ਖਵੇ, ਸਙ੍ਖਾਰਾਤਿ ਸੁਤ੍ਤਂ ਪਰਸਮਯਤੋ ਆਭਤਂ. ਤਤ੍ਥ ਸਙ੍ਖਾਰਾਤਿ ‘‘ਸਬ੍ਬੇ ਸਙ੍ਖਾਰਾ ਅਨਿਚ੍ਚਾ’’ਤਿ ਆਗਤਟ੍ਠਾਨੇ ਵਿਯ ਪਞ੍ਚਕ੍ਖਨ੍ਧਾ, ਤੇ ਚ ਅਤ੍ਤਤ੍ਤਨਿਯਸੁਞ੍ਞਤ੍ਤਾ ਸੁਞ੍ਞਤਾਤਿ ਸਾਸਨਾਵਚਰਂ ਹੋਤਿ, ਨ ਵਿਰੁਜ੍ਝਤਿ, ਤਸ੍ਮਾ ਅਨੁਞ੍ਞਾਤਂ. ਯਸ੍ਮਾ ਪਨੇਤਂ ਨ ਸੁਞ੍ਞਤਾਯ ਸਙ੍ਖਾਰਕ੍ਖਨ੍ਧਪਰਿਯਾਪਨ੍ਨਭਾਵਂ ਦੀਪੇਤਿ, ਤਸ੍ਮਾ ਅਸਾਧਕਨ੍ਤਿ.

ਸੁਞ੍ਞਤਕਥਾਵਣ੍ਣਨਾ.

੩. ਸਾਮਞ੍ਞਫਲਕਥਾਵਣ੍ਣਨਾ

੮੩੫-੮੩੬. ਇਦਾਨਿ ਸਾਮਞ੍ਞਫਲਕਥਾ ਨਾਮ ਹੋਤਿ. ਤਤ੍ਥ ਮਗ੍ਗਵੀਥਿਯਮ੍ਪਿ ਫਲਸਮਾਪਤ੍ਤਿਵੀਥਿਯਮ੍ਪਿ ਅਰਿਯਮਗ੍ਗਸ੍ਸ ਵਿਪਾਕਚਿਤ੍ਤਂ ਸਾਮਞ੍ਞਫਲਂ ਨਾਮਾਤਿ ਸਕਸਮਯੇ ਸਨ੍ਨਿਟ੍ਠਾਨਂ. ਯੇਸਂ ਪਨ ਤਥਾ ਅਗ੍ਗਹੇਤ੍ਵਾ ‘‘ਕਿਲੇਸਪਹਾਨਞ੍ਚੇਵ ਫਲੁਪ੍ਪਤ੍ਤਿ ਚ ਸਾਮਞ੍ਞਫਲਂ, ਤਸ੍ਮਾ ਅਸਙ੍ਖਤ’’ਨ੍ਤਿ ਲਦ੍ਧਿ, ਸੇਯ੍ਯਥਾਪਿ ਪੁਬ੍ਬਸੇਲਿਯਾਨਂ; ਤੇ ਸਨ੍ਧਾਯ ਪੁਚ੍ਛਾ ਸਕਵਾਦਿਸ੍ਸ, ਪਟਿਞ੍ਞਾ ਇਤਰਸ੍ਸ. ਸੇਸਮੇਤ੍ਥ ਹੇਟ੍ਠਾ ਵੁਤ੍ਤਨਯਤ੍ਤਾ ਯਥਾ ਪਾਲ਼ਿਮੇਵ ਨਿਯ੍ਯਾਤੀਤਿ.

ਸਾਮਞ੍ਞਫਲਕਥਾਵਣ੍ਣਨਾ.

੪. ਪਤ੍ਤਿਕਥਾਵਣ੍ਣਨਾ

੮੩੭-੮੪੦. ਇਦਾਨਿ ਪਤ੍ਤਿਕਥਾ ਨਾਮ ਹੋਤਿ. ਤਤ੍ਥ ‘‘ਯਂ ਯਂ ਪਟਿਲਬ੍ਭਤਿ, ਤਸ੍ਸ ਤਸ੍ਸ ਪਟਿਲਾਭੋ ਪਤ੍ਤਿ ਨਾਮ. ਸਾ ਚ ਅਸਙ੍ਖਤਾ’’ਤਿ ਯੇਸਂ ਲਦ੍ਧਿ, ਸੇਯ੍ਯਥਾਪਿ ਪੁਬ੍ਬਸੇਲਿਯਾਨਞ੍ਞੇਵ; ਤੇ ਸਨ੍ਧਾਯ ਪੁਚ੍ਛਾ ਸਕਵਾਦਿਸ੍ਸ, ਪਟਿਞ੍ਞਾ ਇਤਰਸ੍ਸ. ਸੇਸਮਿਧਾਪਿ ਹੇਟ੍ਠਾ ਵੁਤ੍ਤਨਯਤ੍ਤਾ ਯਥਾਪਾਲ਼ਿਮੇਵ ਨਿਯ੍ਯਾਤੀਤਿ. ਨ ਵਤ੍ਤਬ੍ਬਨ੍ਤਿਆਦਿ ਯਾਯ ਲਦ੍ਧਿਯਾ ਪਤ੍ਤਿ ਅਸਙ੍ਖਤਾਤਿ ਮਞ੍ਞਤਿ, ਤਂ ਪਕਾਸੇਤੁਂ ਵੁਤ੍ਤਂ. ਤਤ੍ਥ ਸਕਵਾਦੀ ‘‘ਨ ਹੇਵਂ ਵਤ੍ਤਬ੍ਬੇ’’ਤਿ ਪਟਿਕ੍ਖਿਪਨ੍ਤੋ ਕੇਵਲਂ ਪਤ੍ਤਿਯਾ ਰੂਪਾਦਿਭਾਵਂ ਨ ਸਮ੍ਪਟਿਚ੍ਛਤਿ. ਨ ਹਿ ਪਤ੍ਤਿ ਨਾਮ ਕੋਚਿ ਧਮ੍ਮੋ ਅਤ੍ਥਿ, ਨ ਪਨ ਅਸਙ੍ਖਤਭਾਵਂ ਅਨੁਜਾਨਾਤਿ. ਇਤਰੋ ਪਨ ਪਟਿਕ੍ਖੇਪਮਤ੍ਤੇਨੇਵ ਅਸਙ੍ਖਤਾਤਿ ਲਦ੍ਧਿਂ ਪਤਿਟ੍ਠਪੇਤਿ, ਸਾ ਅਯੋਨਿਸੋ ਪਤਿਟ੍ਠਾਪਿਤਤ੍ਤਾ ਅਪ੍ਪਤਿਟ੍ਠਿਤਾਯੇਵਾਤਿ.

ਪਤ੍ਤਿਕਥਾਵਣ੍ਣਨਾ.

੫. ਤਥਤਾਕਥਾਵਣ੍ਣਨਾ

੮੪੧-੮੪੩. ਇਦਾਨਿ ਤਥਤਾਕਥਾ ਨਾਮ ਹੋਤਿ. ਤਤ੍ਥ ਯੇਸਂ ‘‘ਰੂਪਾਦੀਨਂ ਸਬ੍ਬਧਮ੍ਮਾਨਂ ਰੂਪਾਦਿਸਭਾਵਤਾਸਙ੍ਖਾਤਾ ਤਥਤਾ ਨਾਮ ਅਤ੍ਥਿ, ਸਾ ਚ ਸਙ੍ਖਤੇਸੁ ਰੂਪਾਦੀਸੁ ਅਪਰਿਯਾਪਨ੍ਨਤ੍ਤਾ ਅਸਙ੍ਖਤਾ’’ਤਿ ਲਦ੍ਧਿ, ਸੇਯ੍ਯਥਾਪਿ ਏਕਚ੍ਚਾਨਂ ਉਤ੍ਤਰਾਪਥਕਾਨਂ, ਤੇ ਸਨ੍ਧਾਯ ਪੁਚ੍ਛਾ ਸਕਵਾਦਿਸ੍ਸ, ਪਟਿਞ੍ਞਾ ਇਤਰਸ੍ਸ. ਸੇਸਮਿਧਾਪਿ ਹੇਟ੍ਠਾ ਵੁਤ੍ਤਨਯਤ੍ਤਾ ਪਾਕਟਮੇਵਾਤਿ.

ਤਥਤਾਕਥਾਵਣ੍ਣਨਾ.

੬. ਕੁਸਲਕਥਾਵਣ੍ਣਨਾ

੮੪੪-੮੪੬. ਇਦਾਨਿ ਕੁਸਲਕਥਾ ਨਾਮ ਹੋਤਿ. ਤਤ੍ਥ ਅਨਵਜ੍ਜਮ੍ਪਿ ਕੁਸਲਂ ਇਟ੍ਠਪਾਕਮ੍ਪਿ. ਅਨਵਜ੍ਜਂ ਨਾਮ ਕਿਲੇਸਵਿਪ੍ਪਯੁਤ੍ਤਂ. ਅਯਂ ਨਯੋ ਠਪੇਤ੍ਵਾ ਅਕੁਸਲਂ ਸਬ੍ਬਧਮ੍ਮੇ ਭਜਤਿ. ਇਟ੍ਠਵਿਪਾਕਂ ਨਾਮ ਆਯਤਿਂ ਉਪਪਤ੍ਤਿਪਵਤ੍ਤੇਸੁ ਇਟ੍ਠਫਲਨਿਪ੍ਫਾਦਕਂ ਪੁਞ੍ਞਂ. ਅਯਂ ਨਯੋ ਕੁਸਲਤ੍ਤਿਕੇ ਆਦਿਪਦਮੇਵ ਭਜਤਿ. ਯੇਸਂ ਪਨ ਇਮਂ ਵਿਭਾਗਂ ਅਗ੍ਗਹੇਤ੍ਵਾ ਅਨਵਜ੍ਜਭਾਵਮਤ੍ਤੇਨੇਵ ਨਿਬ੍ਬਾਨਂ ਕੁਸਲਨ੍ਤਿ ਲਦ੍ਧਿ, ਸੇਯ੍ਯਥਾਪਿ ਅਨ੍ਧਕਾਨਂ, ਤੇਸਂ ਇਟ੍ਠਵਿਪਾਕਟ੍ਠੇਨ ਨਿਬ੍ਬਾਨਸ੍ਸ ਕੁਸਲਤਾਭਾਵਂ ਦੀਪੇਤੁਂ ਪੁਚ੍ਛਾ ਸਕਵਾਦਿਸ੍ਸ, ਅਤ੍ਤਨੋ ਲਦ੍ਧਿਵਸੇਨ ਪਟਿਞ੍ਞਾ ਇਤਰਸ੍ਸ. ਸੇਸਮਿਧਾਪਿ ਹੇਟ੍ਠਾ ਵੁਤ੍ਤਨਯਤ੍ਤਾ ਉਤ੍ਤਾਨਤ੍ਥਮੇਵਾਤਿ.

ਕੁਸਲਕਥਾਵਣ੍ਣਨਾ.

੭. ਅਚ੍ਚਨ੍ਤਨਿਯਾਮਕਥਾਵਣ੍ਣਨਾ

੮੪੭. ਇਦਾਨਿ ਅਚ੍ਚਨ੍ਤਨਿਯਾਮਕਥਾ ਨਾਮ ਹੋਤਿ. ਤਤ੍ਥ ਯੇਸਂ ‘‘ਸਕਿਂ ਨਿਮੁਗ੍ਗੋ ਨਿਮੁਗ੍ਗੋਵ ਹੋਤੀ’’ਤਿ (ਅ. ਨਿ. ੭.੧੫) ਸੁਤ੍ਤਂ ਨਿਸ੍ਸਾਯ ‘‘ਅਤ੍ਥਿ ਪੁਥੁਜ੍ਜਨਸ੍ਸ ਅਚ੍ਚਨ੍ਤਨਿਯਾਮਤਾ’’ਤਿ ਲਦ੍ਧਿ, ਸੇਯ੍ਯਥਾਪਿ ਏਕਚ੍ਚਾਨਂ ਉਤ੍ਤਰਾਪਥਕਾਨਂ, ਤੇ ਸਨ੍ਧਾਯ ਪੁਚ੍ਛਾ ਸਕਵਾਦਿਸ੍ਸ, ਪਟਿਞ੍ਞਾ ਇਤਰਸ੍ਸ. ਮਾਤੁਘਾਤਕੋਤਿਆਦਿ ‘‘ਨਿਯਤਮਿਚ੍ਛਾਦਿਟ੍ਠਿਕਸ੍ਸ ਚ ਮਾਤੁਘਾਤਕਾਦੀਨਞ੍ਚ ਸਮਾਨੇ ਮਿਚ੍ਛਤ੍ਤਨਿਯਾਮੇ ਮਾਤੁਘਾਤਕਾਦੀਹਿਪਿ ਤੇ ਅਚ੍ਚਨ੍ਤਨਿਯਤੇਹਿ ਭਵਿਤਬ੍ਬ’’ਨ੍ਤਿ ਚੋਦਨਤ੍ਥਂ ਵੁਤ੍ਤਂ. ਇਤਰੋ ‘‘ਨਿਯਤਮਿਚ੍ਛਾਦਿਟ੍ਠਿਕੋ ਸਂਸਾਰਖਾਣੁਕੋ ਭਵਨ੍ਤਰੇਪਿ ਨਿਯਤੋਵ ਇਮੇ ਪਨ ਏਕਸ੍ਮਿਞ੍ਞੇਵ ਅਤ੍ਤਭਾਵੇ’’ਤਿ ਲਦ੍ਧਿਯਾ ਨ ਹੇਵਨ੍ਤਿ ਪਟਿਕ੍ਖਿਪਤਿ.

੮੪੮. ਵਿਚਿਕਿਚ੍ਛਾ ਉਪ੍ਪਜ੍ਜੇਯ੍ਯਾਤਿ ‘‘ਅਯਂ ਨਿਯਤੋ ਵਾ ਨੋ ਵਾ’’ਤਿ ਏਵਂ ਉਪ੍ਪਜ੍ਜੇਯ੍ਯਾਤਿ ਪੁਚ੍ਛਤਿ. ਇਤਰੋ ਅਨੁਪ੍ਪਤ੍ਤਿਕਾਰਣਂ ਅਪਸ੍ਸਨ੍ਤੋ ਪਟਿਜਾਨਾਤਿ. ਨੁਪ੍ਪਜ੍ਜੇਯ੍ਯਾਤਿ ਪੁਟ੍ਠੋ ਪਨ ਯਂ ਦਿਟ੍ਠਿਂ ਆਸੇਵਨ੍ਤੋ ਨਿਯਾਮਂ ਓਕ੍ਕਨ੍ਤੋ, ਤਤ੍ਥ ਅਨੁਪ੍ਪਤ੍ਤਿਂ ਸਨ੍ਧਾਯ ਪਟਿਜਾਨਾਤਿ. ਤਤੋ ਪਹੀਨਾਤਿ ਪੁਟ੍ਠੋ ਮਗ੍ਗੇਨ ਅਪ੍ਪਹੀਨਤ੍ਤਾ ਪਟਿਕ੍ਖਿਪਤਿ, ਤਂ ਦਿਟ੍ਠਿਂ ਆਰਬ੍ਭ ਅਸਮੁਦਾਚਾਰਤੋ ਪਟਿਜਾਨਾਤਿ. ਅਥ ਨਂ ਯਸ੍ਮਾ ਪਹਾਨਂ ਨਾਮ ਵਿਨਾ ਅਰਿਯਮਗ੍ਗੇਨ ਨਤ੍ਥਿ, ਤਸ੍ਮਾ ਤਸ੍ਸ ਵਸੇਨ ਚੋਦੇਤੁਂ ਸੋਤਾਪਤ੍ਤਿਮਗ੍ਗੇਨਾਤਿਆਦਿਮਾਹ. ਸੋ ਏਕਮਗ੍ਗੇਨਾਪਿ ਅਪ੍ਪਹੀਨਤ੍ਤਾ ਪਟਿਕ੍ਖਿਪਤਿ. ਪੁਨ ਕਤਮੇਨਾਤਿ ਪੁਟ੍ਠੋ ਮਿਚ੍ਛਾਮਗ੍ਗਂ ਸਨ੍ਧਾਯ ਅਕੁਸਲੇਨਾਤਿਆਦਿਮਾਹ.

੮੪੯. ਉਚ੍ਛੇਦਦਿਟ੍ਠਿ ਉਪ੍ਪਜ੍ਜੇਯ੍ਯਾਤਿ ਦੁਤਿਯਨਿਯਾਮੁਪ੍ਪਤ੍ਤਿਂ ਪੁਚ੍ਛਤਿ. ਇਤਰੋ ਯਸ੍ਮਾ ‘‘ਯੇਪਿ ਤੇ ਓਕ੍ਕਲਾ ਵਯਭਿਞ੍ਞਾ ਨਤ੍ਥਿਕਵਾਦਾ ਅਕਿਰਿਯਵਾਦਾ ਅਹੇਤੁਕਵਾਦਾ’’ਤਿ (ਮ. ਨਿ. ੩.੧੪੩) ਵਚਨਤੋ ਤਿਸ੍ਸੋਪਿ ਨਿਯਤਮਿਚ੍ਛਾਦਿਟ੍ਠਿਯੋ ਏਕਸ੍ਸ ਉਪ੍ਪਜ੍ਜਨ੍ਤਿ, ਤਸ੍ਮਾ ਪਟਿਜਾਨਾਤਿ.

੮੫੦. ਅਥ ਨਂ ‘‘ਨ ਚ ਨਾਮ ਸੋ ਅਚ੍ਚਨ੍ਤਨਿਯਾਮੋ’’ਤਿ ਚੋਦੇਤੁਂ ਹਞ੍ਚੀਤਿਆਦਿਮਾਹ. ਅਚ੍ਚਨ੍ਤਨਿਯਤਸ੍ਸ ਹਿ ਦੁਤਿਯਨਿਯਾਮੋ ਨਿਰਤ੍ਥਕੋ. ਨੁਪ੍ਪਜ੍ਜੇਯ੍ਯਾਤਿ ਪਞ੍ਹੇ ਯਂ ਸਸ੍ਸਤਦਿਟ੍ਠਿਯਾ ਸਸ੍ਸਤਨ੍ਤਿ ਗਹਿਤਂ, ਤਦੇਵ ਉਚ੍ਛਿਜ੍ਜਿਸ੍ਸਤੀਤਿ ਗਹੇਤ੍ਵਾ ਅਨੁਪ੍ਪਤ੍ਤਿਂ ਸਨ੍ਧਾਯ ਪਟਿਜਾਨਾਤਿ. ਪਹੀਨਾਤਿ ਪੁਟ੍ਠੋ ਮਗ੍ਗੇਨ ਅਪ੍ਪਹੀਨਤ੍ਤਾ ਪਟਿਕ੍ਖਿਪਤਿ, ਵੁਤ੍ਤਨਯੇਨ ਅਨੁਪ੍ਪਜ੍ਜਨਤੋ ਪਟਿਜਾਨਾਤਿ. ਸਸ੍ਸਤਦਿਟ੍ਠਿ ਉਪ੍ਪਜ੍ਜੇਯ੍ਯਾਤਿਆਦੀਸੁਪਿ ਏਸੇਵ ਨਯੋ. ਸੇਸਂ ਵਿਚਿਕਿਚ੍ਛਾਵਾਰੇ ਵੁਤ੍ਤਨਯਮੇਵ.

੮੫੧-੮੫੨. ਨ ਵਤ੍ਤਬ੍ਬਨ੍ਤਿ ਪੁਚ੍ਛਾ ਪਰਵਾਦਿਸ੍ਸ, ਸੁਤ੍ਤਸ੍ਸ ਅਤ੍ਥਿਤਾਯ ਪਟਿਞ੍ਞਾ ਸਕਵਾਦਿਸ੍ਸ. ਨ ਪਨ ਸੋ ਭਵਨ੍ਤਰੇਪਿ ਨਿਮੁਗ੍ਗੋਵ. ਇਮਸ੍ਮਿਞ੍ਞੇਵ ਹਿ ਭਵੇ ਅਭਬ੍ਬੋ ਸੋ ਤਂ ਦਿਟ੍ਠਿਂ ਪਜਹਿਤੁਨ੍ਤਿ ਅਯਮੇਤ੍ਥ ਅਧਿਪ੍ਪਾਯੋ, ਤਸ੍ਮਾ ਅਸਾਧਕਮੇਤਨ੍ਤਿ. ਸਬ੍ਬਕਾਲਂ ਉਮ੍ਮੁਜ੍ਜਿਤ੍ਵਾ ਨਿਮੁਜ੍ਜਤੀਤਿਆਦਿ ਵਚਨਮਤ੍ਤੇ ਅਭਿਨਿਵੇਸਂ ਅਕਤ੍ਵਾ ਅਤ੍ਥੋ ਪਰਿਯੇਸਿਤਬ੍ਬੋਤਿ ਦਸ੍ਸਨਤ੍ਥਂ ਵੁਤ੍ਤਨ੍ਤਿ.

ਅਚ੍ਚਨ੍ਤਨਿਯਾਮਕਥਾਵਣ੍ਣਨਾ.

੮. ਇਨ੍ਦ੍ਰਿਯਕਥਾਵਣ੍ਣਨਾ

੮੫੩-੮੫੬. ਇਦਾਨਿ ਇਨ੍ਦ੍ਰਿਯਕਥਾ ਨਾਮ ਹੋਤਿ. ਤਤ੍ਥ ਲੋਕਿਯਾ ਸਦ੍ਧਾ ਸਦ੍ਧਾ ਏਵ ਨਾਮ, ਨ ਸਦ੍ਧਿਨ੍ਦ੍ਰਿਯਂ. ਤਥਾ ਲੋਕਿਯਂ ਵੀਰਿਯਂ…ਪੇ… ਸਤਿ… ਸਮਾਧਿ… ਪਞ੍ਞਾ ਪਞ੍ਞਾਯੇਵ ਨਾਮ, ਨ ਪਞ੍ਞਿਨ੍ਦ੍ਰਿਯਨ੍ਤਿ ਯੇਸਂ ਲਦ੍ਧਿ, ਸੇਯ੍ਯਥਾਪਿ ਹੇਤੁਵਾਦਾਨਞ੍ਚੇਵ ਮਹਿਸਾਸਕਾਨਞ੍ਚ; ਤੇ ਸਨ੍ਧਾਯ ਪੁਚ੍ਛਾ ਸਕਵਾਦਿਸ੍ਸ, ਪਟਿਞ੍ਞਾ ਇਤਰਸ੍ਸ. ਨਤ੍ਥਿ ਲੋਕਿਯਾ ਸਦ੍ਧਾਤਿਆਦਿ ਯਸ੍ਮਾ ਲੋਕਿਯਾਪਿ ਸਦ੍ਧਾਦਯੋਵ ਧਮ੍ਮਾ ਅਧਿਪਤਿਯਟ੍ਠੇਨ ਇਨ੍ਦ੍ਰਿਯਂ, ਨ ਸਦ੍ਧਾਦੀਹਿ ਅਞ੍ਞਂ ਸਦ੍ਧਿਨ੍ਦ੍ਰਿਯਾਦਿ ਨਾਮ ਅਤ੍ਥਿ, ਤਸ੍ਮਾ ਲੋਕਿਯਾਨਮ੍ਪਿ ਸਦ੍ਧਾਦੀਨਞ੍ਞੇਵ ਸਦ੍ਧਿਨ੍ਦ੍ਰਿਯਾਦਿਭਾਵਦਸ੍ਸਨਤ੍ਥਂ ਵੁਤ੍ਤਂ. ਅਤ੍ਥਿ ਲੋਕਿਯੋ ਮਨੋਤਿਆਦਿ ਯਥਾ ਤੇ ਲੋਕਿਯਾਪਿ ਮਨਾਦਯੋ ਧਮ੍ਮਾ ਮਨਿਨ੍ਦ੍ਰਿਯਾਦੀਨਿ, ਏਵਂ ਲੋਕਿਯਾ ਸਦ੍ਧਾਦਯੋਪਿ ਸਦ੍ਧਿਨ੍ਦ੍ਰਿਯਾਨੀਤਿ ਉਪਮਾਯ ਤਸ੍ਸਤ੍ਥਸ੍ਸ ਵਿਭਾਵਨਤ੍ਥਂ ਵੁਤ੍ਤਂ. ਸੇਸਮੇਤ੍ਥ ਯਥਾਪਾਲ਼ਿਮੇਵ ਨਿਯ੍ਯਾਤੀਤਿ.

ਇਨ੍ਦ੍ਰਿਯਕਥਾਵਣ੍ਣਨਾ.

ਏਕੂਨਵੀਸਤਿਮੋ ਵਗ੍ਗੋ.