੧੮. ਅਟ੍ਠਾਰਸਮਵਗ੍ਗੋ

੧. ਮਨੁਸ੍ਸਲੋਕਕਥਾਵਣ੍ਣਨਾ

੮੦੨-੮੦੩. ਇਦਾਨਿ ਮਨੁਸ੍ਸਲੋਕਕਥਾ ਨਾਮ ਹੋਤਿ. ਤਤ੍ਥ ‘‘ਤਥਾਗਤੋ ਲੋਕੇ, ਜਾਤੋ ਲੋਕੇ ਸਂਵਡ੍ਢੋ, ਲੋਕਂ ਅਭਿਭੁਯ੍ਯ ਵਿਹਰਤਿ ਅਨੁਪਲਿਤ੍ਤੋ ਲੋਕੇਨਾ’’ਤਿ (ਸਂ. ਨਿ. ੩.੯੪) ਸੁਤ੍ਤਂ ਅਯੋਨਿਸੋ ਗਹੇਤ੍ਵਾ ‘‘ਭਗਵਾ ਤੁਸਿਤਭਵਨੇ ਨਿਬ੍ਬਤ੍ਤੋ ਤਤ੍ਥੇਵ ਵਸਤਿ, ਨ ਮਨੁਸ੍ਸਲੋਕਂ ਆਗਚ੍ਛਤਿ, ਨਿਮ੍ਮਿਤਰੂਪਮਤ੍ਤਕਂ ਪਨੇਤ੍ਥ ਦਸ੍ਸੇਤੀ’’ਤਿ ਯੇਸਂ ਲਦ੍ਧਿ, ਸੇਯ੍ਯਥਾਪਿ ਏਤਰਹਿ ਵੇਤੁਲ੍ਲਕਾਨਂਯੇਵ, ਤੇ ਸਨ੍ਧਾਯ ਪੁਚ੍ਛਾ ਸਕਵਾਦਿਸ੍ਸ, ਪਟਿਞ੍ਞਾ ਇਤਰਸ੍ਸ. ਅਥ ਨਂ ਪੁਟ੍ਠੋਕਾਸੇਨ ਚੇਵ ਸੁਤ੍ਤਸਾਧਨੇਨ ਚ ਸਞ੍ਞਾਪੇਤੁਂ ਨਨੁ ਅਤ੍ਥੀਤਿਆਦਿਮਾਹ. ਲੋਕੇ ਜਾਤੋਤਿ ਪਰਵਾਦੀ ਤੁਸਿਤਪੁਰਂ ਸਨ੍ਧਾਯ ਵਦਤਿ. ਸਤ੍ਥਾਰਾ ਪਨੇਤਂ ਮਨੁਸ੍ਸਲੋਕਞ੍ਞੇਵ ਸਨ੍ਧਾਯ ਲੋਕਂ ਵੁਤ੍ਤਂ. ਲੋਕਂ ਅਭਿਭੁਯ੍ਯਾਤਿ ਪਰਵਾਦੀ ਮਨੁਸ੍ਸਲੋਕਂ ਅਭਿਭਵਿਤ੍ਵਾਤਿ ਦਿਟ੍ਠਿਯਾ ਵਦਤਿ, ਸਤ੍ਥਾ ਪਨ ਆਰਮ੍ਮਣਲੋਕਂ ਅਭਿਭਵਿਤ੍ਵਾ ਵਿਹਾਸਿ. ਅਨੁਪਲਿਤ੍ਤੋ ਲੋਕੇਨਾਤਿ ਪਰਵਾਦੀ ਮਨੁਸ੍ਸਲੋਕੇਨ ਅਨੁਪਲਿਤ੍ਤਤਂਵ ਸਨ੍ਧਾਯ ਵਦਤਿ, ਸਤ੍ਥਾ ਪਨ ਲੋਕਧਮ੍ਮੇਸੁ ਕਿਲੇਸੇਹਿ ਅਨੁਪਲਿਤ੍ਤੋ ਵਿਹਾਸਿ. ਤਸ੍ਮਾ ਅਸਾਧਕਮੇਤਨ੍ਤਿ.

ਮਨੁਸ੍ਸਲੋਕਕਥਾਵਣ੍ਣਨਾ.

੨. ਧਮ੍ਮਦੇਸਨਾਕਥਾਵਣ੍ਣਨਾ

੮੦੪-੮੦੬. ਇਦਾਨਿ ਧਮ੍ਮਦੇਸਨਾਕਥਾ ਨਾਮ ਹੋਤਿ. ਤਤ੍ਥ ‘‘ਤੁਸਿਤਪੁਰੇ ਠਿਤੋ ਭਗਵਾ ਧਮ੍ਮਦੇਸਨਤ੍ਥਾਯ ਅਭਿਨਿਮ੍ਮਿਤਂ ਪੇਸੇਸਿ, ਤੇਨ ਚੇਵ ਤਸ੍ਸ ਚ ਦੇਸਨਂ ਸਮ੍ਪਟਿਚ੍ਛਿਤ੍ਵਾ ਆਯਸ੍ਮਤਾ ਆਨਨ੍ਦੇਨ ਧਮ੍ਮੋ ਦੇਸਿਤੋ, ਨ ਬੁਦ੍ਧੇਨ ਭਗਵਤਾ’’ਤਿ ਯੇਸਂ ਲਦ੍ਧਿ, ਸੇਯ੍ਯਥਾਪਿ ਵੇਤੁਲ੍ਲਕਾਨਞ੍ਞੇਵ; ਤੇ ਸਨ੍ਧਾਯ ਪੁਚ੍ਛਾ ਸਕਵਾਦਿਸ੍ਸ, ਪਟਿਞ੍ਞਾ ਇਤਰਸ੍ਸ. ਅਥ ਨਂ ‘‘ਯਦਿ ਤੇਨ ਧਮ੍ਮੋ ਦੇਸਿਤੋ, ਸ੍ਵੇਵ ਸਤ੍ਥਾ ਭਵੇਯ੍ਯਾ’’ਤਿ ਚੋਦੇਤੁਂ ਅਭਿਨਿਮ੍ਮਿਤੋ ਜਿਨੋਤਿਆਦਿਮਾਹ. ਇਤਰੋ ਤਥਾ ਅਸਮ੍ਪਟਿਚ੍ਛਨ੍ਤੋ ਪਟਿਕ੍ਖਿਪਤਿ. ਸੇਸਮੇਤ੍ਥ ਉਤ੍ਤਾਨਤ੍ਥਮੇਵਾਤਿ.

ਧਮ੍ਮਦੇਸਨਾਕਥਾਵਣ੍ਣਨਾ.

੩. ਕਰੁਣਾਕਥਾਵਣ੍ਣਨਾ

੮੦੭-੮੦੮. ਇਦਾਨਿ ਕਰੁਣਾਕਥਾ ਨਾਮ ਹੋਤਿ. ਤਤ੍ਥ ਪਿਯਾਯਿਤਾਨਂ ਵਤ੍ਥੂਨਂ ਵਿਪਤ੍ਤਿਯਾ ਸਰਾਗਾਨਂ ਰਾਗਵਸੇਨ ਕਰੁਣਾਪਤਿਰੂਪਿਕਂ ਪਵਤ੍ਤਿਂ ਦਿਸ੍ਵਾ ‘‘ਰਾਗੋਵ ਕਰੁਣਾ ਨਾਮ, ਸੋ ਚ ਭਗਵਤੋ ਨਤ੍ਥਿ, ਤਸ੍ਮਾ ਨਤ੍ਥਿ ਬੁਦ੍ਧਸ੍ਸ ਭਗਵਤੋ ਕਰੁਣਾ’’ਤਿ ਯੇਸਂ ਲਦ੍ਧਿ, ਸੇਯ੍ਯਥਾਪਿ ਉਤ੍ਤਰਾਪਥਕਾਨਂ; ਤੇ ਸਨ੍ਧਾਯ ਪੁਚ੍ਛਾ ਸਕਵਾਦਿਸ੍ਸ, ਪਟਿਞ੍ਞਾ ਇਤਰਸ੍ਸ. ਅਥ ਨਂ ‘‘ਕਰੁਣਾ ਨਾਮੇਸਾ ਨਿਕ੍ਕਿਲੇਸਤਾਯ ਚੇਵ ਸਤ੍ਤਾਰਮ੍ਮਣਤਾਯ ਚ ਚੇਤੋਵਿਮੁਤ੍ਤਿਤਾਯ ਚ ਏਕਾਦਸਾਨਿਸਂਸਤਾਯ ਚ ਮੇਤ੍ਤਾਦੀਹਿ ਸਮਾਨਜਾਤਿਕਾ, ਤਸ੍ਮਾ ਯਦਿ ਭਗਵਤੋ ਕਰੁਣਾ ਨਤ੍ਥਿ, ਮੇਤ੍ਤਾਦਯੋਪਿਸ੍ਸ ਨ ਸਿਯੁ’’ਨ੍ਤਿ ਚੋਦਨਤ੍ਥਂ ਨਤ੍ਥਿ ਬੁਦ੍ਧਸ੍ਸ ਭਗਵਤੋ ਮੇਤ੍ਤਾਤਿਆਦਿਮਾਹ. ਆਕਾਰੁਣਿਕੋਤਿ ਪਞ੍ਹੇ ਤਥਾਰੂਪਂ ਵੋਹਾਰਂ ਅਪਸ੍ਸਨ੍ਤੋ ਪਟਿਕ੍ਖਿਪਤਿ. ਸੇਸਮੇਤ੍ਥ ਉਤ੍ਤਾਨਤ੍ਥਮੇਵਾਤਿ.

ਕਰੁਣਾਕਥਾਵਣ੍ਣਨਾ.

੪. ਗਨ੍ਧਜਾਤਕਥਾਵਣ੍ਣਨਾ

੮੦੯. ਇਦਾਨਿ ਗਨ੍ਧਜਾਤਕਥਾ ਨਾਮ ਹੋਤਿ. ਤਤ੍ਥ ਯੇਸਂ ਬੁਦ੍ਧੇ ਭਗਵਤਿ ਅਯੋਨਿਸੋ ਪੇਮਵਸੇਨ ‘‘ਭਗਵਤੋ ਉਚ੍ਚਾਰਪਸ੍ਸਾਵੋ ਅਞ੍ਞੇ ਗਨ੍ਧਜਾਤੇ ਅਤਿਵਿਯ ਅਧਿਗਣ੍ਹਾਤਿ, ਨਤ੍ਥਿ ਤਤੋ ਚ ਸੁਗਨ੍ਧਤਰਂ ਗਨ੍ਧਜਾਤ’’ਨ੍ਤਿ ਲਦ੍ਧਿ, ਸੇਯ੍ਯਥਾਪਿ ਏਕਚ੍ਚਾਨਂ ਅਨ੍ਧਕਾਨਞ੍ਚੇਵ ਉਤ੍ਤਰਾਪਥਕਾਨਞ੍ਚ; ਤੇ ਸਨ੍ਧਾਯ ਪੁਚ੍ਛਾ ਸਕਵਾਦਿਸ੍ਸ, ਪਟਿਞ੍ਞਾ ਇਤਰਸ੍ਸ. ਸੇਸਮੇਤ੍ਥ ਯਥਾਪਾਲ਼ਿਮੇਵ ਨਿਯ੍ਯਾਤੀਤਿ.

ਗਨ੍ਧਜਾਤਕਥਾਵਣ੍ਣਨਾ.

੫. ਏਕਮਗ੍ਗਕਥਾਵਣ੍ਣਨਾ

੮੧੦-੮੧੧. ਇਦਾਨਿ ਏਕਮਗ੍ਗਕਥਾ ਨਾਮ ਹੋਤਿ. ਤਤ੍ਥ ਯੇਸਂ ਬੁਦ੍ਧੇ ਭਗਵਤਿ ਅਯੋਨਿਸੋ ਪੇਮਵਸੇਨੇਵ ‘‘ਭਗਵਾ ਸੋਤਾਪਨ੍ਨੋ ਹੁਤ੍ਵਾ ਸਕਦਾਗਾਮੀ, ਸਕਦਾਗਾਮੀ ਹੁਤ੍ਵਾ ਅਨਾਗਾਮੀ, ਅਨਾਗਾਮੀ ਹੁਤ੍ਵਾ ਅਰਹਤ੍ਤਂ ਸਚ੍ਛਾਕਾਸਿ, ਏਕੇਨੇਵ ਪਨ ਅਰਿਯਮਗ੍ਗੇਨ ਚਤ੍ਤਾਰਿ ਫਲਾਨਿ ਸਚ੍ਛਾਕਾਸੀ’’ਤਿ ਲਦ੍ਧਿ, ਸੇਯ੍ਯਥਾਪਿ ਤੇਸਞ੍ਞੇਵ; ਤੇ ਸਨ੍ਧਾਯ ਪੁਚ੍ਛਾ ਸਕਵਾਦਿਸ੍ਸ, ਪਟਿਞ੍ਞਾ ਇਤਰਸ੍ਸ. ਅਥ ਨਂ ਚਤੂਹਿ ਫਲੇਹਿ ਸਦ੍ਧਿਂ ਉਪ੍ਪਨ੍ਨਾਨਂ ਚਤੁਨ੍ਨਂ ਫਸ੍ਸਾਦੀਨਂ ਏਕਤੋ ਸਮੋਧਾਨਵਸੇਨ ਚੋਦੇਤੁਂ ਚਤੁਨ੍ਨਂ ਫਸ੍ਸਾਨਨ੍ਤਿਆਦਿਮਾਹ. ਸੋਤਾਪਤ੍ਤਿਮਗ੍ਗੇਨਾਤਿਆਦਿ ‘‘ਕਤਰਮਗ੍ਗੇਨ ਸਚ੍ਛਿਕਰੋਤੀ’’ਤਿ ਪੁਚ੍ਛਨਤ੍ਥਂ ਵੁਤ੍ਤਂ. ਅਰਹਤ੍ਤਮਗ੍ਗੇਨਾਤਿ ਚ ਵੁਤ੍ਤੇ ਤੇਨ ਸਕ੍ਕਾਯਦਿਟ੍ਠਿਆਦੀਨਂ ਪਹਾਨਾਭਾਵਵਸੇਨ ਚੋਦੇਤਿ. ਭਗਵਾ ਸੋਤਾਪਨ੍ਨੋਤਿ ਬੁਦ੍ਧਭੂਤਸ੍ਸ ਸੋਤਾਪਨ੍ਨਭਾਵੋ ਨਤ੍ਥੀਤਿ ਪਟਿਕ੍ਖਿਪਤਿ. ਪਰਤੋ ਪਞ੍ਹਦ੍ਵਯੇਪਿ ਏਸੇਵ ਨਯੋ. ਸੇਸਮੇਤ੍ਥ ਯਥਾਪਾਲ਼ਿਮੇਵ ਨਿਯ੍ਯਾਤੀਤਿ.

ਏਕਮਗ੍ਗਕਥਾਵਣ੍ਣਨਾ.

੬. ਝਾਨਸਙ੍ਕਨ੍ਤਿਕਥਾਵਣ੍ਣਨਾ

੮੧੩-੮੧੬. ਇਦਾਨਿ ਝਾਨਸਙ੍ਕਨ੍ਤਿਕਥਾ ਨਾਮ ਹੋਤਿ. ਤਤ੍ਥ ਯੇਸਂ ‘‘ਇਧ, ਭਿਕ੍ਖਵੇ, ਭਿਕ੍ਖੁ ਵਿਵਿਚ੍ਚੇਵ ਕਾਮੇਹਿ ਪਠਮਂ ਝਾਨਂ ਉਪਸਮ੍ਪਜ੍ਜ ਵਿਹਰਤਿ, ਵਿਤਕ੍ਕਵਿਚਾਰਾਨਂ ਵੂਪਸਮਾ ਦੁਤਿਯਂ ਝਾਨਂ, ਤਤਿਯਂ ਝਾਨਂ, ਚਤੁਤ੍ਥਂ ਝਾਨਂ ਉਪਸਮ੍ਪਜ੍ਜ ਵਿਹਰਤੀ’’ਤਿ (ਸਂ. ਨਿ. ੫.੯੨੩-੯੩੪) ਇਮਂ ਪਟਿਪਾਟਿਦੇਸਨਂ ਨਿਸ੍ਸਾਯ ‘‘ਤਸ੍ਸ ਤਸ੍ਸ ਝਾਨਸ੍ਸ ਉਪਚਾਰਪ੍ਪਵਤ੍ਤਿਂ ਵਿਨਾਵ ਝਾਨਾ ਝਾਨਂ ਸਙ੍ਕਮਤੀ’’ਤਿ ਲਦ੍ਧਿ, ਸੇਯ੍ਯਥਾਪਿ ਮਹਿਸਾਸਕਾਨਞ੍ਚੇਵ ਏਕਚ੍ਚਾਨਞ੍ਚ ਅਨ੍ਧਕਾਨਂ; ਤੇ ਸਨ੍ਧਾਯ ਪੁਚ੍ਛਾ ਸਕਵਾਦਿਸ੍ਸ, ਪਟਿਞ੍ਞਾ ਇਤਰਸ੍ਸ. ਅਥ ਨਂ ‘‘ਯਦਿ ਤੇ ਦੁਤਿਯਜ੍ਝਾਨੂਪਚਾਰਂ ਅਪ੍ਪਤ੍ਵਾ ਉਪ੍ਪਟਿਪਾਟਿਯਾ ਪਠਮਜ੍ਝਾਨਾ ਦੁਤਿਯਜ੍ਝਾਨਮੇਵ ਸਙ੍ਕਮਤਿ, ਪਠਮਤੋ ਤਤਿਯਂ, ਦੁਤਿਯਤੋ ਚਤੁਤ੍ਥਮ੍ਪਿ ਸਙ੍ਕਮੇਯ੍ਯਾ’’ਤਿ ਚੋਦੇਤੁਂ ਪਠਮਾ ਝਾਨਾਤਿਆਦਿਮਾਹ. ਯਾ ਪਠਮਸ੍ਸਾਤਿਆਦਿ ‘‘ਯਦਿ ਪਠਮਤੋ ਅਨਨ੍ਤਰਂ ਦੁਤਿਯਂ, ਦੁਤਿਯਾਦੀਹਿ ਵਾ ਤਤਿਯਾਦੀਨਿ ਸਮਾਪਜ੍ਜਤਿ, ਏਕਾਵਜ੍ਜਨੇਨ ਸਮਾਪਜ੍ਜੇਯ੍ਯਾ’’ਤਿ ਚੋਦਨਤ੍ਥਂ ਵੁਤ੍ਤਂ. ਕਾਮੇ ਆਦੀਨਵਤੋਤਿ ਪਠਮਂ ਕਾਮੇ ਆਦੀਨਵਤੋ ਮਨਸਿ ਕਰੋਤੋ ਪਚ੍ਛਾ ਉਪ੍ਪਜ੍ਜਤਿ. ਝਾਨਕ੍ਖਣੇ ਪਨੇਸ ਨਿਮਿਤ੍ਤਮੇਵ ਮਨਸਿ ਕਰੋਤਿ. ਤਞ੍ਞੇਵ ਪਠਮਨ੍ਤਿ ‘‘ਯਦਿ ਪੁਰਿਮਜਵਨਤੋ ਪਚ੍ਛਿਮਜਵਨਂ ਵਿਯ ਅਨਨ੍ਤਰਂ ਉਪ੍ਪਜ੍ਜੇਯ੍ਯ, ਠਪੇਤ੍ਵਾ ਪੁਰਿਮਪਚ੍ਛਿਮਭਾਵਂ ਲਕ੍ਖਣਤੋ ਤਞ੍ਞੇਵ ਤਂ ਭਵੇਯ੍ਯਾ’’ਤਿ ਚੋਦੇਤੁਂ ਪੁਚ੍ਛਤਿ. ਇਮਿਨਾ ਉਪਾਯੇਨ ਸਬ੍ਬਤ੍ਥ ਅਤ੍ਥੋ ਵੇਦਿਤਬ੍ਬੋ. ਵਿਵਿਚ੍ਚੇਵ ਕਾਮੇਹੀਤਿਆਦੀਹਿ ਪਟਿਪਾਟਿਯਾ ਝਾਨਾਨਂ ਦੇਸਿਤਭਾਵਂ ਦੀਪੇਤਿ, ਨ ਅਨਨ੍ਤਰੁਪ੍ਪਤ੍ਤਿਂ, ਤਸ੍ਮਾ ਅਸਾਧਕਨ੍ਤਿ.

ਝਾਨਸਙ੍ਕਨ੍ਤਿਕਥਾਵਣ੍ਣਨਾ.

੭. ਝਾਨਨ੍ਤਰਿਕਕਥਾਵਣ੍ਣਨਾ

੮੧੭-੮੧੮. ਇਦਾਨਿ ਝਾਨਨ੍ਤਰਿਕਕਥਾ ਨਾਮ ਹੋਤਿ. ਤਤ੍ਥ ਯੇਸਂ ਸਮਯੇ ‘‘ਪਞ੍ਚਕਨਯੇ ਪਞ੍ਚ ਝਾਨਾਨਿ ਵਿਭਤ੍ਤਾਨਿ, ਕੇਵਲਂ ਤਯੋ ਸਮਾਧੀ ਉਦ੍ਦਿਟ੍ਠਾ’’ਤਿ ਅਵਿਤਕ੍ਕਵਿਚਾਰਮਤ੍ਤਸ੍ਸ ਸਮਾਧਿਨੋ ਓਕਾਸਂ ਅਜਾਨਨ੍ਤਾਨਂ ‘‘ਪਠਮਸ੍ਸ ਚ ਦੁਤਿਯਸ੍ਸ ਚ ਝਾਨਸ੍ਸ ਅਨ੍ਤਰੇ ਝਾਨਨ੍ਤਰਿਕਾ ਨਾਮ ਏਸਾ’’ਤਿ ਲਦ੍ਧਿ, ਸੇਯ੍ਯਥਾਪਿ ਸਮ੍ਮਿਤਿਯਾਨਞ੍ਚੇਵ ਏਕਚ੍ਚਾਨਞ੍ਚ ਅਨ੍ਧਕਾਨਂ; ਤੇ ਸਨ੍ਧਾਯ ਪੁਚ੍ਛਾ ਸਕਵਾਦਿਸ੍ਸ, ਪਟਿਞ੍ਞਾ ਇਤਰਸ੍ਸ. ਅਥ ਨਂ ‘‘ਝਾਨਮ੍ਪਿ ਚੇਤਸਿਕਾ ਧਮ੍ਮਾ, ਫਸ੍ਸਾਦਯੋਪਿ, ਤਸ੍ਮਾ ਯਦਿ ਝਾਨਨ੍ਤਰਿਕਾ ਨਾਮ ਭਵੇਯ੍ਯ, ਫਸ੍ਸਨ੍ਤਰਿਕਾਦੀਹਿਪਿ ਭਵਿਤਬ੍ਬ’’ਨ੍ਤਿ ਚੋਦਨਤ੍ਥਂ ਅਤ੍ਥਿ ਫਸ੍ਸਨ੍ਤਰਿਕਾਤਿਆਦਿਮਾਹ.

ਦੁਤਿਯਸ੍ਸ ਚ ਝਾਨਸ੍ਸਾਤਿ ‘‘ਯਦਿ ਝਾਨਨ੍ਤਰਿਕਾ ਨਾਮ ਭਵੇਯ੍ਯ, ਦੁਤਿਯਤਤਿਯਾਦੀਨਿਪਿ ਝਾਨਾਨੇਵ, ਤੇਸਮ੍ਪਿ ਅਨ੍ਤਰਿਕਾਯ ਭਵਿਤਬ੍ਬ’’ਨ੍ਤਿ ਚੋਦਨਤ੍ਥਂ ਵੁਤ੍ਤਂ. ਸੋ ਕੇਵਲਂ ਲਦ੍ਧਿਯਾ ਅਭਾਵੇਨ ਪਟਿਕ੍ਖਿਪਤਿ ਚੇਵ ਪਟਿਜਾਨਾਤਿ ਚ. ਪਠਮਸ੍ਸ ਚਾਤਿ ਪੁਟ੍ਠੋ ਲਦ੍ਧਿਵਸੇਨ ਪਟਿਜਾਨਾਤਿ.

੮੧੯. ਸਵਿਤਕ੍ਕੋ ਸਵਿਚਾਰੋਤਿਆਦਿ ‘‘ਤਿਣ੍ਣਮ੍ਪਿ ਸਮਾਧੀਨਂ ਸਮਾਧਿਭਾਵੇ ਸਮਾਨੇ ਅਵਿਤਕ੍ਕੋ ਵਿਚਾਰਮਤ੍ਤੋਵ ਸਮਾਧਿ ਝਾਨਨ੍ਤਰਿਕੋ, ਨ ਇਤਰੋਤਿ ਕੋ ਏਤ੍ਥ ਵਿਸੇਸਹੇਤੂ’’ਤਿ ਚੋਦਨਤ੍ਥਂ ਵੁਤ੍ਤਂ.

੮੨੦-੮੨੨. ਦ੍ਵਿਨ੍ਨਂ ਝਾਨਾਨਂ ਪਟੁਪ੍ਪਨ੍ਨਾਨਨ੍ਤਿ ਪਠਮਦੁਤਿਯਾਨਿ ਸਨ੍ਧਾਯ ਪੁਚ੍ਛਤਿ. ਇਤਰੋ ‘‘ਤੇਸਂ ਪਚ੍ਚੁਪ੍ਪਨ੍ਨਾਨਂਯੇਵ ਅਨ੍ਤਰੇ ਅਵਿਤਕ੍ਕੋ ਵਿਚਾਰਮਤ੍ਤੋ ਸਮਾਧਿ ਝਾਨਨ੍ਤਰਿਕੋ ਨਾਮ ਹੋਤੀ’’ਤਿ ਲਦ੍ਧਿਯਾ ਪਟਿਜਾਨਾਤਿ. ਪਠਮਂ ਝਾਨਂ ਨਿਰੁਦ੍ਧਨ੍ਤਿ ਪੁਟ੍ਠੋ ਤਿਣ੍ਣਂ ਏਕਕ੍ਖਣੇ ਪਵਤ੍ਤਿ ਨ ਯੁਤ੍ਤਾਤਿ ਪਟਿਜਾਨਾਤਿ. ਅਵਿਤਕ੍ਕੋ ਵਿਚਾਰਮਤ੍ਤੋ ਸਮਾਧਿ ਪਠਮਂ ਝਾਨਨ੍ਤਿ ਚਤੁਕ੍ਕਨਯਵਸੇਨ ਪੁਚ੍ਛਤਿ. ਸਕਵਾਦੀ ਤਸ੍ਮਿਂ ਨਯੇ ਤਸ੍ਸ ਅਭਾਵਾ ਪਟਿਕ੍ਖਿਪਤਿ. ਨਨੁ ਤਯੋ ਸਮਾਧੀਤਿ ਏਤ੍ਥਾਯਮਧਿਪ੍ਪਾਯੋ – ਯਥਾ ਤੇਸੁ ਤੀਸੁ ਸਮਾਧੀਸੁ ਦ੍ਵੇ ਸਮਾਧੀ ਝਾਨਾਨੇਵ, ਨ ਝਾਨਨ੍ਤਰਿਕਾ, ਏਵਂ ਇਤਰੇਨਪਿ ਝਾਨੇਨੇਵ ਭਵਿਤਬ੍ਬਂ, ਨ ਝਾਨਨ੍ਤਰਿਕਾਯਾਤਿ.

ਝਾਨਨ੍ਤਰਿਕਕਥਾਵਣ੍ਣਨਾ.

੮. ਸਮਾਪਨ੍ਨੋ ਸਦ੍ਦਂ ਸੁਣਾਤੀਤਿਕਥਾਵਣ੍ਣਨਾ

੮੨੩-੮੨੫. ਇਦਾਨਿ ਸਮਾਪਨ੍ਨੋ ਸਦ੍ਦਂ ਸੁਣਾਤੀਤਿਕਥਾ ਨਾਮ ਹੋਤਿ. ਤਤ੍ਥ ‘‘ਯਸ੍ਮਾ ਪਠਮਸ੍ਸ ਝਾਨਸ੍ਸ ਸਦ੍ਦੋ ਕਣ੍ਡਕੋ ਵੁਤ੍ਤੋ ਭਗਵਤਾ, ਯਦਿ ਚ ਸਮਾਪਨ੍ਨੋ ਤਂ ਨ ਸੁਣੇਯ੍ਯ, ਕਥਂ ਕਣ੍ਡਕੋ ਸਿਯਾ. ਤਸ੍ਮਾ ਸਮਾਪਨ੍ਨੋ ਸਦ੍ਦਂ, ਸੁਣਾਤੀ’’ਤਿ ਯੇਸਂ ਲਦ੍ਧਿ, ਸੇਯ੍ਯਥਾਪਿ ਪੁਬ੍ਬਸੇਲਿਯਾਨਂ; ਤੇ ਸਨ੍ਧਾਯ ਪੁਚ੍ਛਾ ਸਕਵਾਦਿਸ੍ਸ, ਪਟਿਞ੍ਞਾ ਇਤਰਸ੍ਸ. ਚਕ੍ਖੁਨਾ ਰੂਪਂ ਪਸ੍ਸਤੀਤਿਆਦਿ ‘‘ਸਮਾਪਨ੍ਨਸ੍ਸ ਤਾਵ ਪਞ੍ਚਦ੍ਵਾਰਪ੍ਪਵਤ੍ਤਂ ਨਤ੍ਥਿ, ਤਸ੍ਮਿਂ ਅਸਤਿ ਯਦਿ ਸੋ ਸਦ੍ਦਂ ਸੁਣੇਯ੍ਯ, ਰੂਪਮ੍ਪਿ ਪਸ੍ਸੇਯ੍ਯਾ’’ਤਿ ਚੋਦਨਤ੍ਥਂ ਵੁਤ੍ਤਂ. ਸਦ੍ਦੋ ਕਣ੍ਡਕੋਤਿ ਵਿਕ੍ਖੇਪਕਰਤ੍ਤਾ ਵੁਤ੍ਤਂ. ਓਲ਼ਾਰਿਕੇਨ ਹਿ ਸਦ੍ਦੇਨ ਸੋਤੇ ਘਟ੍ਟਿਤੇ ਪਠਮਜ੍ਝਾਨਤੋ ਵੁਟ੍ਠਾਨਂ ਹੋਤਿ, ਤੇਨੇਤਂ ਵੁਤ੍ਤਂ, ਤਸ੍ਮਾ ਅਸਾਧਕਂ. ਦੁਤਿਯਸ੍ਸ ਝਾਨਸ੍ਸਾਤਿਆਦਿ ‘‘ਯਥਾ ਅਞ੍ਞੋਪਿ ਕਣ੍ਡਕੋ ਅਨ੍ਤੋਸਮਾਪਤ੍ਤਿਯਂ ਨਤ੍ਥਿ, ਏਵਂ ਸਦ੍ਦਸ੍ਸਵਨਮ੍ਪੀ’’ਤਿ ਬੋਧਨਤ੍ਥਂ ਵੁਤ੍ਤਂ, ਤਂ ਸਬ੍ਬਂ ਉਤ੍ਤਾਨਤ੍ਥਮੇਵਾਤਿ.

ਸਮਾਪਨ੍ਨੋ ਸਦ੍ਦਂ ਸੁਣਾਤੀਤਿਕਥਾਵਣ੍ਣਨਾ.

੯. ਚਕ੍ਖੁਨਾਰੂਪਂਪਸ੍ਸਤੀਤਿਕਥਾਵਣ੍ਣਨਾ

੮੨੬-੮੨੭. ਇਦਾਨਿ ਚਕ੍ਖੁਨਾ ਰੂਪਂ ਪਸ੍ਸਤੀਤਿਕਥਾ ਨਾਮ ਹੋਤਿ. ਤਤ੍ਥ ‘‘ਚਕ੍ਖੁਨਾ ਰੂਪਂ ਦਿਸ੍ਵਾ’’ਤਿ ਵਚਨਂ ਨਿਸ੍ਸਾਯ ‘‘ਪਸਾਦਚਕ੍ਖੁਮੇਵ ਰੂਪਂ ਪਸ੍ਸਤੀ’’ਤਿ ਯੇਸਂ ਲਦ੍ਧਿ, ਸੇਯ੍ਯਥਾਪਿ ਮਹਾਸਙ੍ਘਿਕਾਨਂ, ਤੇ ਸਨ੍ਧਾਯ ਪੁਚ੍ਛਾ ਸਕਵਾਦਿਸ੍ਸ, ਪਟਿਞ੍ਞਾ ਇਤਰਸ੍ਸ. ਅਥ ਨਂ ‘‘ਯਦਿ ਚਕ੍ਖੁਨਾ ਰੂਪਂ ਪਸ੍ਸੇਯ੍ਯ, ਰੂਪੇਨ ਰੂਪਂ ਪਸ੍ਸੇਯ੍ਯਾਤੀ’’ਤਿ ਚੋਦੇਤੁਂ ਰੂਪੇਨ ਰੂਪਂ ਪਸ੍ਸਤੀਤਿ ਆਹ. ਇਤਰੋ ਰੂਪਾਯਤਨਂ ਸਨ੍ਧਾਯ ਪਟਿਕ੍ਖਿਪਿਤ੍ਵਾ ਪੁਨ ਪੁਟ੍ਠੋ ਚਕ੍ਖੁਮੇਵ ਸਨ੍ਧਾਯ ਪਟਿਜਾਨਾਤਿ. ਪਟਿਵਿਜਾਨਾਤੀਤਿ ਏਤ੍ਥ ਅਯਮਧਿਪ੍ਪਾਯੋ – ਪਸ੍ਸਤੀਤਿ ਹਿ ਮਯਂ ਪਟਿਜਾਨਨਂ ਸਨ੍ਧਾਯ ਪੁਚ੍ਛਾਮ, ਨ ਚਕ੍ਖੂਪਸਂਹਾਰਮਤ੍ਤਂ. ਤਸ੍ਮਾ ਵਦੇਹਿ ਤਾਵ ‘‘ਕਿਂ ਤੇ ਚਕ੍ਖੁਮਾ ਰੂਪੇਨ ਰੂਪਂ ਪਟਿਵਿਜਾਨਾਤੀ’’ਤਿ. ਇਤਰੋ ਪੁਰਿਮਨਯੇਨੇਵ ਪਟਿਕ੍ਖਿਪਤਿ ਚੇਵ ਪਟਿਜਾਨਾਤਿ ਚ. ਅਥ ਨਂ ‘‘ਏਵਂ ਸਨ੍ਤੇ ਰੂਪਂ ਮਨੋਵਿਞ੍ਞਾਣਂ ਆਪਜ੍ਜਤਿ, ਤਞ੍ਹਿ ਪਟਿਵਿਜਾਨਾਤਿ ਨਾਮਾ’’ਤਿ ਚੋਦੇਤੁਂ ਰੂਪਂ ਮਨੋਵਿਞ੍ਞਾਣਨ੍ਤਿ ਆਹ. ਇਤਰੋ ਲੇਸਂ ਅਲਭਨ੍ਤੋ ਪਟਿਕ੍ਖਿਪਤੇਵ. ਅਤ੍ਥਿ ਚਕ੍ਖੁਸ੍ਸ ਆਵਟ੍ਟਨਾਤਿਆਦਿ ‘‘ਯਦਿ ਚਕ੍ਖੁ ਪਟਿਵਿਜਾਨਨਟ੍ਠੇਨ ਪਸ੍ਸਤਿ, ਚਕ੍ਖੁਵਿਞ੍ਞਾਣਸ੍ਸ ਵਿਯ ਤਸ੍ਸਾਪਿ ਆਵਜ੍ਜਨਾਯ ਭਵਿਤਬ੍ਬ’’ਨ੍ਤਿ ਚੋਦੇਤੁਂ ਪੁਚ੍ਛਤਿ. ਇਤਰੋ ਯਸ੍ਮਾ ਨ ਆਵਜ੍ਜਨਪਟਿਬਦ੍ਧਂ ਚਕ੍ਖੁ, ਨ ਤਂ ਆਵਜ੍ਜਨਾਨਨ੍ਤਰਂ ਉਪ੍ਪਜ੍ਜਤਿ, ਤਸ੍ਮਾ ਨ ਹੇਵਨ੍ਤਿ ਪਟਿਕ੍ਖਿਪਤਿ. ਸੋਤੇਨ ਸਦ੍ਦਨ੍ਤਿਆਦੀਸੁਪਿ ਏਸੇਵ ਨਯੋ. ਇਧ, ਭਿਕ੍ਖਵੇ, ਭਿਕ੍ਖੁ ਚਕ੍ਖੁਨਾ ਰੂਪਂ ਪਸ੍ਸਤੀਤਿ ਸਸਮ੍ਭਾਰਕਥਾਨਯੇਨ ਵੁਤ੍ਤਂ. ਯਥਾ ਹਿ ਉਸੁਨਾ ਵਿਜ੍ਝਨ੍ਤੋਪਿ ‘‘ਧਨੁਨਾ ਵਿਜ੍ਝਤੀ’’ਤਿ ਵੁਚ੍ਚਤਿ, ਏਵਂ ਚਕ੍ਖੁਵਿਞ੍ਞਾਣੇਨ ਪਸ੍ਸਨ੍ਤੋਪਿ ‘‘ਚਕ੍ਖੁਨਾ ਪਸ੍ਸਤੀ’’ਤਿ ਵੁਤ੍ਤੋ, ਤਸ੍ਮਾ ਅਸਾਧਕਮੇਤਂ. ਸੇਸੇਸੁਪਿ ਏਸੇਵ ਨਯੋਪਿ.

ਚਕ੍ਖੁਨਾ ਰੂਪਂ ਪਸ੍ਸਤੀਤਿਕਥਾਵਣ੍ਣਨਾ.

ਅਟ੍ਠਾਰਸਮੋ ਵਗ੍ਗੋ.