੬. ਨ ਵਤ੍ਤਬ੍ਬਂ ਸਙ੍ਘੋ ਦਕ੍ਖਿਣਂ ਪਟਿਗ੍ਗਣ੍ਹਾਤੀਤਿਕਥਾਵਣ੍ਣਨਾ

੭੯੧-੭੯੨. ਇਦਾਨਿ ਨ ਵਤ੍ਤਬ੍ਬਂ ਸਙ੍ਘੋ ਦਕ੍ਖਿਣਂ ਪਟਿਗ੍ਗਣ੍ਹਾਤੀਤਿਕਥਾ ਨਾਮ ਹੋਤਿ. ਤਤ੍ਥ ‘‘ਪਰਮਤ੍ਥਤੋ ਮਗ੍ਗਫਲਾਨੇਵ ਸਙ੍ਘੋ, ਮਗ੍ਗਫਲੇਹਿ ਅਞ੍ਞੋ ਸਙ੍ਘੋ ਨਾਮ ਨਤ੍ਥਿ, ਮਗ੍ਗਫਲਾਨਿ ਚ ਨ ਕਿਞ੍ਚਿ ਪਟਿਗ੍ਗਣ੍ਹਨ੍ਤਿ, ਤਸ੍ਮਾ ਨ ਵਤ੍ਤਬ੍ਬਂ ਸਙ੍ਘੋ ਦਕ੍ਖਿਣਂ ਪਟਿਗ੍ਗਣ੍ਹਾਤੀ’’ਤਿ ਯੇਸਂ ਲਦ੍ਧਿ, ਸੇਯ੍ਯਥਾਪਿ ਏਤਰਹਿ ਮਹਾਪੁਞ੍ਞਵਾਦੀਸਙ੍ਖਾਤਾਨਂ ਵੇਤੁਲ੍ਲਕਾਨਂ; ਤੇ ਸਨ੍ਧਾਯ ਨ ਵਤ੍ਤਬ੍ਬਨ੍ਤਿ ਪੁਚ੍ਛਾ ਸਕਵਾਦਿਸ੍ਸ, ਪਟਿਞ੍ਞਾ ਇਤਰਸ੍ਸ. ਅਥ ਨਂ ‘‘ਯਦਿ ਸਙ੍ਘੋ ਨ ਪਟਿਗ੍ਗਣ੍ਹੇਯ੍ਯ, ਨ ਨਂ ਸਤ੍ਥਾ ਆਹੁਨੇਯ੍ਯਾਤਿਆਦੀਹਿ ਥੋਮੇਯ੍ਯਾ’’ਤਿ ਚੋਦੇਤੁਂ ਨਨੁ ਸਙ੍ਘੋ ਆਹੁਨੇਯ੍ਯੋਤਿਆਦਿਮਾਹ. ਸਙ੍ਘਸ੍ਸ ਦਾਨਂ ਦੇਨ੍ਤੀਤਿ ‘‘ਯੇ ਤੇ ਸਙ੍ਘਸ੍ਸ ਦੇਨ੍ਤਿ, ਤੇ ਪਟਿਗ੍ਗਾਹਕੇਸੁ ਅਸਤਿ ਕਸ੍ਸ ਦਦੇਯ੍ਯੁ’’ਨ੍ਤਿ ਚੋਦਨਤ੍ਥਂ ਵੁਤ੍ਤਂ. ਆਹੁਤਿਂ ਜਾਤਵੇਦੋ ਵਾਤਿ ਸੁਤ੍ਤਂ ਪਰਸਮਯਤੋ ਆਗਤਂ. ਤਤ੍ਥ ਮਹਾਮੇਘਨ੍ਤਿ ਮੇਘਵੁਟ੍ਠਿਂ ਸਨ੍ਧਾਯ ਵੁਤ੍ਤਂ. ਵੁਟ੍ਠਿਞ੍ਹਿ ਮੇਦਨੀ ਪਟਿਗ੍ਗਣ੍ਹਾਤਿ, ਨ ਮੇਘਮੇਵ. ਮਗ੍ਗੋ ਪਟਿਗ੍ਗਣ੍ਹਾਤੀਤਿ ‘‘ਮਗ੍ਗਫਲਾਨਿ ਸਙ੍ਘੋ’’ਤਿ ਲਦ੍ਧਿਯਾ ਵਦਤਿ, ਨ ਚ ਮਗ੍ਗਫਲਾਨੇਵ ਸਙ੍ਘੋ. ਮਗ੍ਗਫਲਪਾਤੁਭਾਵਪਰਿਸੁਦ੍ਧੇ ਪਨ ਖਨ੍ਧੇ ਉਪਾਦਾਯ ਪਞ੍ਞਤ੍ਤਾ ਅਟ੍ਠ ਪੁਗ੍ਗਲਾ ਸਙ੍ਘੋ, ਤਸ੍ਮਾ ਅਸਾਧਕਮੇਤਨ੍ਤਿ.

ਨ ਵਤ੍ਤਬ੍ਬਂ ਸਙ੍ਘੋ ਦਕ੍ਖਿਣਂ ਪਟਿਗ੍ਗਣ੍ਹਾਤੀਤਿਕਥਾਵਣ੍ਣਨਾ.