੭. ਨ ਵਤ੍ਤਬ੍ਬਂ ਸਙ੍ਘੋ ਦਕ੍ਖਿਣਂ ਵਿਸੋਧੇਤੀਤਿਕਥਾਵਣ੍ਣਨਾ

੭੯੩-੭੯੪. ਇਦਾਨਿ ਨ ਵਤ੍ਤਬ੍ਬਂ ਸਙ੍ਘੋ ਦਕ੍ਖਿਣਂ ਵਿਸੋਧੇਤੀਤਿਕਥਾ ਨਾਮ ਹੋਤਿ. ਤਤ੍ਥ ‘‘ਮਗ੍ਗਫਲਾਨੇਵ ਸਙ੍ਘੋ ਨਾਮ, ਨ ਚ ਤਾਨਿ ਦਕ੍ਖਿਣਂ ਵਿਸੋਧੇਤੁਂ ਸਕ੍ਕੋਨ੍ਤਿ, ਤਸ੍ਮਾ ਨ ਵਤ੍ਤਬ੍ਬਂ ਸਙ੍ਘੋ ਦਕ੍ਖਿਣਂ ਵਿਸੋਧੇਤੀ’’ਤਿ ਯੇਸਂ ਲਦ੍ਧਿ, ਸੇਯ੍ਯਥਾਪਿ ਤੇਸਞ੍ਞੇਵ; ਤੇ ਸਨ੍ਧਾਯ ਪੁਚ੍ਛਾ ਸਕਵਾਦਿਸ੍ਸ, ਪਟਿਞ੍ਞਾ ਇਤਰਸ੍ਸ. ਆਹੁਨੇਯ੍ਯੋਤਿਆਦਿ ‘‘ਯਦਿ ਸਙ੍ਘੋ ਦਕ੍ਖਿਣਂ ਵਿਸੋਧੇਤੁਂ ਨ ਸਕ੍ਕੁਣੇਯ੍ਯ, ਨ ਨਂ ਸਤ੍ਥਾ ਏਵਂ ਥੋਮੇਯ੍ਯਾ’’ਤਿ ਦਸ੍ਸਨਤ੍ਥਂ ਵੁਤ੍ਤਂ. ਵਿਸੋਧੇਤੀਤਿ ਮਹਪ੍ਫਲਂ ਕਰੋਤਿ. ਸਙ੍ਘਸ੍ਮਿਞ੍ਹਿ ਅਪ੍ਪਂ ਦਿਨ੍ਨਂ ਬਹੁ ਹੋਤਿ, ਬਹੁ ਦਿਨ੍ਨਂ ਬਹੁਤਰਂ. ਦਕ੍ਖਿਣੇਯ੍ਯਾਤਿ ਦਕ੍ਖਿਣਾਰਹਾ ਦਕ੍ਖਿਣਾਯ ਅਨੁਚ੍ਛਵਿਕਾ, ਦਕ੍ਖਿਣਂ ਵਿਸੋਧੇਤੁਂ ਸਮਤ੍ਥਾਤਿ ਅਤ੍ਥੋ. ਦਕ੍ਖਿਣਂ ਆਰਾਧੇਨ੍ਤੀਤਿ ਸਮ੍ਪਾਦੇਨ੍ਤਿ, ਅਪ੍ਪਮਤ੍ਤਿਕਾਯਪਿ ਦਕ੍ਖਿਣਾਯ ਮਹਨ੍ਤਂ ਫਲਂ ਪਾਪੁਣਨ੍ਤੀਤਿ ਅਤ੍ਥੋ. ਸੇਸਂ ਹੇਟ੍ਠਾ ਵੁਤ੍ਤਨਯਮੇਵਾਤਿ.

ਨ ਵਤ੍ਤਬ੍ਬਂ ਸਙ੍ਘੋ ਦਕ੍ਖਿਣਂ ਵਿਸੋਧੇਤੀਤਿਕਥਾਵਣ੍ਣਨਾ.