੫. ਠਪੇਤ੍ਵਾ ਅਰਿਯਮਗ੍ਗਨ੍ਤਿਕਥਾਵਣ੍ਣਨਾ

੭੮੯-੭੯੦. ਇਦਾਨਿ ਠਪੇਤ੍ਵਾ ਅਰਿਯਮਗ੍ਗਨ੍ਤਿਕਥਾ ਨਾਮ ਹੋਤਿ. ਤਤ੍ਥ ‘‘ਯਸ੍ਮਾ ਅਰਿਯਮਗ੍ਗੋ ‘ਦੁਕ੍ਖਨਿਰੋਧਗਾਮਿਨਿਪਟਿਪਦਾ’ਤਿ ਵੁਤ੍ਤੋ, ਤਸ੍ਮਾ ਠਪੇਤ੍ਵਾ ਅਰਿਯਮਗ੍ਗਂ ਅਵਸੇਸਾ ਸਙ੍ਖਾਰਾ ਦੁਕ੍ਖਾ’’ਤਿ ਯੇਸਂ ਲਦ੍ਧਿ, ਸੇਯ੍ਯਥਾਪਿ ਹੇਤੁਵਾਦਾਨਂ; ਤੇ ਸਨ੍ਧਾਯ ਪੁਚ੍ਛਾ ਸਕਵਾਦਿਸ੍ਸ, ਪਟਿਞ੍ਞਾ ਇਤਰਸ੍ਸ. ਅਥ ਨਂ ‘‘ਯਦਿ ਏਵਂ ਸਮੁਦਯਸ੍ਸਾਪਿ ਦੁਕ੍ਖਭਾਵੋ ਆਪਜ੍ਜਤੀ’’ਤਿ ਚੋਦੇਤੁਂ ਦੁਕ੍ਖਸਮੁਦਯੋਪੀਤਿ ਆਹ. ਇਤਰੋ ਹੇਤੁਲਕ੍ਖਣਂ ਸਨ੍ਧਾਯ ਪਟਿਕ੍ਖਿਪਤਿ. ਪੁਨ ਪੁਟ੍ਠੋ ਪਵਤ੍ਤਪਰਿਯਾਪਨ੍ਨਭਾਵਂ ਸਨ੍ਧਾਯ ਪਟਿਜਾਨਾਤਿ. ਤੀਣੇਵਾਤਿ ਪਞ੍ਹੇਸੁ ਸੁਤ੍ਤਵਿਰੋਧਭਯੇਨ ਪਟਿਕ੍ਖਿਪਤਿ, ਲਦ੍ਧਿਵਸੇਨ ਪਟਿਜਾਨਾਤਿ. ਸੇਸਮੇਤ੍ਥ ਉਤ੍ਤਾਨਤ੍ਥਮੇਵਾਤਿ.

ਠਪੇਤ੍ਵਾ ਅਰਿਯਮਗ੍ਗਨ੍ਤਿਕਥਾਵਣ੍ਣਨਾ.