੫. ਰੂਪਂ ਹੇਤੂਤਿਕਥਾਵਣ੍ਣਨਾ

੭੫੪-੭੫੬. ਇਦਾਨਿ ਰੂਪਂ ਹੇਤੂਤਿ ਕਥਾਨਾਮ ਹੋਤਿ. ਤਤ੍ਥ ਹੇਤੂਤਿ ਕੁਸਲਮੂਲਾਦਿਨੋ ਹੇਤੁਹੇਤੁਸ੍ਸਾਪਿ ਨਾਮਂ, ਯਸ੍ਸ ਕਸ੍ਸਚਿ ਪਚ੍ਚਯਸ੍ਸਾਪਿ. ਇਮਂ ਪਨ ਵਿਭਾਗਂ ਅਕਤ੍ਵਾ ‘‘ਚਤ੍ਤਾਰੋ ਮਹਾਭੂਤਾ ਹੇਤੂ’’ਤਿ ਵਚਨਮਤ੍ਤਂ ਨਿਸ੍ਸਾਯ ਅਵਿਸੇਸੇਨੇਵ ਰੂਪਂ ਹੇਤੂਤਿ ਯੇਸਂ ਲਦ੍ਧਿ, ਸੇਯ੍ਯਥਾਪਿ ਉਤ੍ਤਰਾਪਥਕਾਨਂ; ਤੇ ਸਨ੍ਧਾਯ ਪੁਚ੍ਛਾ ਸਕਵਾਦਿਸ੍ਸ, ਪਟਿਞ੍ਞਾ ਇਤਰਸ੍ਸ. ਅਲੋਭੋ ਹੇਤੂਤਿ ਕਿਂ ਤੇ ਰੂਪਂ ਅਲੋਭਸਙ੍ਖਾਤੋ ਹੇਤੂਤਿ ਪੁਚ੍ਛਤਿ, ਇਤਰੋ ਪਟਿਕ੍ਖਿਪਤਿ. ਸੇਸੇਸੁਪਿ ਏਸੇਵ ਨਯੋ. ਮਹਾਭੂਤਾ ਉਪਾਦਾਯਰੂਪਾਨਂ ਉਪਾਦਾਯਹੇਤੂਤਿ ਏਤ੍ਥ ਪਚ੍ਚਯਟ੍ਠੇਨ ਹੇਤੁਭਾਵੋ ਵੁਤ੍ਤੋ, ਨ ਮੂਲਟ੍ਠੇਨ, ਤਸ੍ਮਾ ਅਸਾਧਕਨ੍ਤਿ.

ਰੂਪਂ ਹੇਤੂਤਿਕਥਾਵਣ੍ਣਨਾ.

੭੫੭-੭੫੯. ਸਹੇਤੁਕਕਥਾਯਮ੍ਪਿ ਇਮਿਨਾਵ ਨਯੇਨ ਅਤ੍ਥੋ ਵੇਦਿਤਬ੍ਬੋਤਿ.

ਰੂਪਂ ਸਹੇਤੁਕਨ੍ਤਿਕਥਾਵਣ੍ਣਨਾ.