੭. ਰੂਪਂ ਕੁਸਲਾਕੁਸਲਨ੍ਤਿਕਥਾਵਣ੍ਣਨਾ

੭੬੦-੭੬੪. ਇਦਾਨਿ ਰੂਪਂ ਕੁਸਲਾਕੁਸਲਨ੍ਤਿਕਥਾ ਨਾਮ ਹੋਤਿ. ਤਤ੍ਥ ‘‘ਕਾਯਕਮ੍ਮਂ ਵਚੀਕਮ੍ਮਂ ਕੁਸਲਮ੍ਪਿ ਅਕੁਸਲਮ੍ਪੀ’’ਤਿਵਚਨਂ ਨਿਸ੍ਸਾਯ ਕਾਯਵਚੀਕਮ੍ਮਸਙ੍ਖਾਤਂ ਕਾਯਵਿਞ੍ਞਤ੍ਤਿਵਚੀਵਿਞ੍ਞਤ੍ਤਿਰੂਪਂ ਕੁਸਲਮ੍ਪਿ ਅਕੁਸਲਮ੍ਪੀਤਿ ਯੇਸਂ ਲਦ੍ਧਿ, ਸੇਯ੍ਯਥਾਪਿ ਮਹਿਸਾਸਕਾਨਞ੍ਚੇਵ ਸਮ੍ਮਿਤਿਯਾਨਞ੍ਚ; ਤੇ ਸਨ੍ਧਾਯ ਰੂਪਂ ਕੁਸਲਨ੍ਤਿ ਪੁਚ੍ਛਾ ਸਕਵਾਦਿਸ੍ਸ ਪਟਿਞ੍ਞਾ ਇਤਰਸ੍ਸ. ਅਥ ਨਂ ‘‘ਯਦਿ ਤੇ ਰੂਪਂ ਕੁਸਲਂ, ਏਵਂਵਿਧੇਨ ਅਨੇਨ ਭਵਿਤਬ੍ਬ’’ਨ੍ਤਿ ਚੋਦੇਤੁਂ ਸਾਰਮ੍ਮਣਨ੍ਤਿ ਆਦਿਮਾਹ. ਪਰਤੋ ਅਕੁਸਲਪਞ੍ਹੇਪਿ ਏਸੇਵ ਨਯੋ. ਸੇਸਮੇਤ੍ਥ ਉਤ੍ਤਾਨਤ੍ਥਮੇਵਾਤਿ.

ਰੂਪਂ ਕੁਸਲਾਕੁਸਲਨ੍ਤਿਕਥਾਵਣ੍ਣਨਾ.