੪. ਅਧਿਗਯ੍ਹਮਨਸਿਕਾਰਕਥਾਵਣ੍ਣਨਾ

੭੪੯-੭੫੩. ਇਦਾਨਿ ਅਧਿਗਯ੍ਹ ਮਨਸਿਕਾਰਕਥਾ ਨਾਮ ਹੋਤਿ. ਤਤ੍ਥ ਦੁਵਿਧੋ ਮਨਸਿਕਾਰੋ ਨਯਤੋ ਚ ਆਰਮ੍ਮਣਤੋ ਚ. ਤਤ੍ਥ ਏਕਸਙ੍ਖਾਰਸ੍ਸਾਪਿ ਅਨਿਚ੍ਚਤਾਯ ਦਿਟ੍ਠਾਯ ਸਬ੍ਬੇ ਸਙ੍ਖਾਰਾ ਅਨਿਚ੍ਚਾਤਿ ਅਵਸੇਸੇਸੁ ਨਯਤੋ ਮਨਸਿਕਾਰੋ ਹੋਤਿ. ਅਤੀਤੇ ਪਨ ਸਙ੍ਖਾਰੇ ਮਨਸਿਕਰੋਨ੍ਤੋ ਨ ਅਨਾਗਤੇ ਮਨਸਿਕਾਤੁਂ ਸਕ੍ਕੋਤਿ. ਅਤੀਤਾਦੀਸੁ ਅਞ੍ਞਤਰਂ ਮਨਸਿਕਰੋਤੋ ਆਰਮ੍ਮਣਤੋ ਮਨਸਿਕਾਰੋ ਹੋਤਿ. ਤਤ੍ਥ ਪਚ੍ਚੁਪ੍ਪਨ੍ਨੇ ਮਨਸਿਕਰੋਨ੍ਤੋ ਯੇਨ ਚਿਤ੍ਤੇਨ ਤੇ ਮਨਸਿਕਰੋਤਿ, ਤਂ ਪਚ੍ਚੁਪ੍ਪਨ੍ਨਕ੍ਖਣੇ ਮਨਸਿਕਾਤੁਂ ਨ ਸਕ੍ਕੋਤਿ. ਤਤ੍ਥ ਯੇਸਂ ‘‘ਸਬ੍ਬੇ ਸਙ੍ਖਾਰਾ ਅਨਿਚ੍ਚਾ’’ਤਿਆਦਿਵਚਨਂ ਨਿਸ੍ਸਾਯ ‘‘ਮਨਸਿਕਰੋਨ੍ਤੋ ਨਾਮ ਅਧਿਗਯ੍ਹ ਅਧਿਗਣ੍ਹਿਤ੍ਵਾ ਸਙ੍ਗਣ੍ਹਿਤ੍ਵਾ ਸਬ੍ਬੇ ਸਙ੍ਖਾਰੇ ਏਕਤੋ ਮਨਸਿਕਰੋਤੀ’’ਤਿ ਲਦ੍ਧਿ, ਸੇਯ੍ਯਥਾਪਿ ਪੁਬ੍ਬਸੇਲਿਯਾਪਰਸੇਲਿਯਾਨਂ; ਤੇ ਸਨ੍ਧਾਯ ਪੁਚ੍ਛਾ ਸਕਵਾਦਿਸ੍ਸ, ਪਟਿਞ੍ਞਾ ਇਤਰਸ੍ਸ.

ਅਥ ਨਂ ਯਸ੍ਮਾ ਸਬ੍ਬੇ ਏਕਤੋ ਮਨਸਿਕਰੋਨ੍ਤੇਨ ਯੇਨ ਚਿਤ੍ਤੇਨ ਤੇ ਮਨਸਿਕਰੋਤਿ, ਤਮ੍ਪਿ ਮਨਸਿਕਾਤਬ੍ਬਂ ਹੋਤਿ. ਤਸ੍ਮਾ ਤਂਚਿਤ੍ਤਤਾਯ ਚੋਦੇਤੁਂ ਤੇਨ ਚਿਤ੍ਤੇਨਾਤਿ ਆਹ. ਇਤਰੋ ਆਰਮ੍ਮਣਂ ਕਤ੍ਵਾ ਨ ਸਕ੍ਕਾ ਜਾਨਿਤੁਨ੍ਤਿ ਸਨ੍ਧਾਯ ਪਟਿਕ੍ਖਿਪਤਿ. ਏਵਂਲਕ੍ਖਣਂ ਚਿਤ੍ਤਨ੍ਤਿ ਞਾਤਤ੍ਤਾ ਪਨ ਤਮ੍ਪਿ ਚਿਤ੍ਤਂ ਞਾਤਮੇਵ ਹੋਤੀਤਿ ਸਨ੍ਧਾਯ ਪਟਿਜਾਨਾਤਿ. ਅਥ ਵਾ ਤਞ੍ਞੇਵ ਤਸ੍ਸ ਆਰਮ੍ਮਣਂ ਨ ਹੋਤੀਤਿ ਪਟਿਕ੍ਖਿਪਤਿ. ‘‘ਸਬ੍ਬੇ ਸਙ੍ਖਾਰਾ ਅਨਿਚ੍ਚਾ, ਯਦਾ ਪਞ੍ਞਾਯ ਪਸ੍ਸਤੀ’’ਤਿਆਦੀਨਿ ਨਿਸ੍ਸਾਯ ਉਪ੍ਪਨ੍ਨਲਦ੍ਧਿਵਸੇਨ ਪਟਿਜਾਨਾਤਿ. ਸੇਸਪਞ੍ਹਦ੍ਵਯੇਪਿ ਏਸੇਵ ਨਯੋ. ਤੇਨ ਫਸ੍ਸੇਨਾਤਿਆਦੀਸੁ ਪਨ ਤਥਾਰੂਪਂ ਸੁਤ੍ਤਂ ਅਪਸ੍ਸਨ੍ਤੋ ਪਟਿਕ੍ਖਿਪਤੇਵ. ਅਤੀਤਾਦਿਪਞ੍ਹੇਸੁ ਹੇਟ੍ਠਾ ਵੁਤ੍ਤਨਯੇਨੇਵ ਪਟਿਕ੍ਖੇਪਪਟਿਞ੍ਞਾ ਵੇਦਿਤਬ੍ਬਾ. ਸੇਸਂ ਯਥਾਪਾਲ਼ਿਮੇਵ ਨਿਯ੍ਯਾਤੀਤਿ. ਸਬ੍ਬੇ ਸਙ੍ਖਾਰਾਤਿਆਦਿਵਚਨਂ ਨਯਤੋ ਦਸ੍ਸਨਂ ਸਨ੍ਧਾਯ ਵੁਤ੍ਤਂ, ਨ ਏਕਕ੍ਖਣੇ ਆਰਮ੍ਮਣਤੋ, ਤਸ੍ਮਾ ਅਸਾਧਕਨ੍ਤਿ.

ਅਧਿਗਯ੍ਹਮਨਸਿਕਾਰਕਥਾਵਣ੍ਣਨਾ.