੭. ਪਰਿਯਾਪਨ੍ਨਕਥਾਵਣ੍ਣਨਾ

੭੦੩-੭੦੫. ਇਦਾਨਿ ਪਰਿਯਾਪਨ੍ਨਕਥਾ ਨਾਮ ਹੋਤਿ. ਤਤ੍ਥ ਯਸ੍ਮਾ ਕਾਮਰਾਗੋ ਕਾਮਧਾਤੁਂ ਅਨੁਸੇਤਿ, ਕਾਮਧਾਤੁਪਰਿਯਾਪਨ੍ਨੋਤਿ ਚ ਵੁਚ੍ਚਤਿ, ਤਸ੍ਮਾ ਰੂਪਰਾਗਾਰੂਪਰਾਗਾਪਿ ਰੂਪਧਾਤੁਅਰੂਪਧਾਤੁਯੋ ਅਨੁਸੇਨ੍ਤਿ. ਰੂਪਧਾਤੁਅਰੂਪਧਾਤੁਪਰਿਯਾਪਨ੍ਨਾਯੇਵ ਚ ਨਾਮ ਹੋਨ੍ਤੀਤਿ ਯੇਸਂ ਲਦ੍ਧਿ, ਸੇਯ੍ਯਥਾਪਿ ਅਨ੍ਧਕਾਨਞ੍ਚੇਵ ਸਮ੍ਮਿਤਿਯਾਨਞ੍ਚ; ਤੇ ਸਨ੍ਧਾਯ ਰੂਪਰਾਗੋਤਿ ਪੁਚ੍ਛਾ ਸਕਵਾਦਿਸ੍ਸ, ਪਟਿਞ੍ਞਾ ਇਤਰਸ੍ਸ. ਤਤ੍ਥ ਅਨੁਸੇਤੀਤਿ ਯਥਾ ਕਾਮਰਾਗੋ ਕਾਮਵਿਤਕ੍ਕਸਙ੍ਖਾਤਂ ਕਾਮਧਾਤੁਂ ਸਹਜਾਤਵਸੇਨ ਅਨੁਸੇਤਿ, ਕਿਂ ਤੇ ਏਵਂ ਰੂਪਰਾਗੋ ਰੂਪਧਾਤੁਨ੍ਤਿ ਪੁਚ੍ਛਤਿ. ਪਰਿਯਾਪਨ੍ਨੋਤਿ ਯਥਾ ਚ ਸੋ ਤਿਵਿਧਾਯ ਕਾਮਧਾਤੁਯਾ ਕਿਲੇਸਕਾਮਵਸੇਨ ਪਰਿਯਾਪਨ੍ਨਤ੍ਤਾ ਕਾਮਧਾਤੁਪਰਿਯਾਪਨ੍ਨੋ, ਕਿਂ ਤੇ ਏਵਂ ਰੂਪਰਾਗੋਪਿ ਰੂਪਧਾਤੁਪਰਿਯਾਪਨ੍ਨੋਤਿ ਪੁਚ੍ਛਤਿ. ਇਤਰੋ ਪਨਸ੍ਸ ਅਧਿਪ੍ਪਾਯਂ ਅਸਲ੍ਲਕ੍ਖੇਨ੍ਤੋ ਕੇਵਲਂ ਲਦ੍ਧਿਵਸੇਨ ਆਮਨ੍ਤਾਤਿ ਪਟਿਜਾਨਾਤਿ. ਅਥ ਨਂ ਤਮਤ੍ਥਂ ਸਲ੍ਲਕ੍ਖਾਪੇਤੁਂ ਕੁਸਲਵਿਪਾਕਕਿਰਿਯਸਙ੍ਖਾਤੇਹਿ ਸਮਾਪਤ੍ਤੇਸਿਯਾਦੀਹਿ ਸਂਸਨ੍ਦਿਤ੍ਵਾ ਪੁਚ੍ਛਿਤੁਂ ਸਮਾਪਤ੍ਤੇਸਿਯੋਤਿਆਦਿਮਾਹ. ਸੇਸਮੇਤ੍ਥ ਯਥਾਪਾਲ਼ਿਮੇਵ ਨਿਯ੍ਯਾਤਿ. ਨਨੁ ਕਾਮਰਾਗੋਤਿਆਦਿਵਚਨਮ੍ਪਿ ਕਾਮਰਾਗਸ੍ਸੇਵ ਕਾਮਧਾਤੁਯਂ ਅਨੁਸਯਭਾਵਂ ਪਰਿਯਾਪਨ੍ਨਤਞ੍ਚ ਦੀਪੇਤਿ, ਨ ਇਤਰੇਸਂ ਇਤਰਧਾਤੂਸੂਤਿ.

ਪਰਿਯਾਪਨ੍ਨਕਥਾਵਣ੍ਣਨਾ.