੧੪. ਚੁਦ੍ਦਸਮਵਗ੍ਗੋ
੧. ਕੁਸਲਾਕੁਸਲਪਟਿਸਨ੍ਦਹਨਕਥਾਵਣ੍ਣਨਾ
੬੮੬-੬੯੦. ਇਦਾਨਿ ਕੁਸਲਾਕੁਸਲਪਟਿਸਨ੍ਦਹਨਕਥਾ ਨਾਮ ਹੋਤਿ. ਤਤ੍ਥ ਕੁਸਲਂ ਵਾ ਅਕੁਸਲਸ੍ਸ, ਅਕੁਸਲਂ ਵਾ ਕੁਸਲਸ੍ਸ ਅਨਨ੍ਤਰਾ ਉਪ੍ਪਜ੍ਜਨਕਂ ਨਾਮ ਨਤ੍ਥੀਤਿ ਤੇਸਂ ਅਞ੍ਞਮਞ੍ਞਂ ਪਟਿਸਨ੍ਧਾਨਂ ਨ ਯੁਜ੍ਜਤਿ. ਯੇ ਪਨ ਯਸ੍ਮਾ ਏਕਵਤ੍ਥੁਸ੍ਮਿਞ੍ਞੇਵ ਰਜ੍ਜਤਿ ਵਿਰਜ੍ਜਤਿ ਚ, ਤਸ੍ਮਾ ਤਂ ਅਞ੍ਞਮਞ੍ਞਂ ਪਟਿਸਨ੍ਦਹਤੀਤਿ ਲਦ੍ਧਿਂ ਗਹੇਤ੍ਵਾ ਠਿਤਾ, ਸੇਯ੍ਯਥਾਪਿ ਮਹਾਸਙ੍ਘਿਕਾ; ਤੇ ਸਨ੍ਧਾਯ ਪੁਚ੍ਛਾ ਸਕਵਾਦਿਸ੍ਸ; ਪਟਿਞ੍ਞਾ ਇਤਰਸ੍ਸ. ਆਵਟ੍ਟਨਾ ਪਣਿਧੀਤਿ ਉਭਯਂ ਆਵਜ੍ਜਨਸ੍ਸੇਵ ਨਾਮਂ. ਤਞ੍ਹਿ ਭਵਙ੍ਗਂ ਆਵਟ੍ਟੇਤੀਤਿ ਆਵਟ੍ਟਨਾ. ਭਵਙ੍ਗਾਰਮ੍ਮਣਤੋ ਅਞ੍ਞਸ੍ਮਿਂ ਆਰਮ੍ਮਣੇ ਚਿਤ੍ਤਂ ਪਣਿਦਹਤਿ ਠਪੇਤੀਤਿ ਪਣਿਧਿ. ਕੁਸਲਂ ਅਨਾਵਟ੍ਟੇਨ੍ਤਸ੍ਸਾਤਿ ਯਂ ਤਂ ਅਕੁਸਲਾਨਨ੍ਤਰਂ ਪਟਿਸਨ੍ਦਹਨ੍ਤਂ ਕੁਸਲਂ ਉਪ੍ਪਜ੍ਜਤਿ, ਤਂ ਅਨਾਵਟ੍ਟੇਨ੍ਤਸ੍ਸ ਉਪ੍ਪਜ੍ਜਤੀਤਿ ਪੁਚ੍ਛਤਿ. ਇਤਰੋ ਪਨ ਵਿਨਾ ਆਵਜ੍ਜਨੇਨ ਕੁਸਲਸ੍ਸ ਉਪ੍ਪਤ੍ਤਿਂ ਅਪਸ੍ਸਨ੍ਤੋ ਪਟਿਕ੍ਖਿਪਤਿ. ਕੁਸਲਂ ਅਯੋਨਿਸੋ ਮਨਸਿਕਰੋਤੋਤਿ ਇਦਂ ਯਦਿ ਅਕੁਸਲਾਨਨ੍ਤਰਂ ਕੁਸਲਂ ਉਪ੍ਪਜ੍ਜੇਯ੍ਯ, ਅਕੁਸਲਸ੍ਸੇਵ ਆਵਜ੍ਜਨੇਨ ਅਯੋਨਿਸੋ ਮਨਸਿਕਰੋਤੋ ਉਪ੍ਪਜ੍ਜੇਯ੍ਯਾਤਿ ਚੋਦਨਤ੍ਥਂ ਵੁਤ੍ਤਂ. ਸੇਸਂ ਯਥਾਪਾਲ਼ਿਮੇਵ ਨਿਯ੍ਯਾਤਿ. ਨਨੁ ਯਸ੍ਮਿਂਯੇਵ ਵਤ੍ਥੁਸ੍ਮਿਨ੍ਤਿ ਵਚਨਂ ਏਕਾਰਮ੍ਮਣੇ ਸਰਾਗਵਿਰਾਗੁਪ੍ਪਤ੍ਤਿਂ ਦੀਪੇਤਿ, ਨ ਕੁਸਲਾਕੁਸਲਾਨਂ ਅਨਨ੍ਤਰਤਂ, ਤਸ੍ਮਾ ਅਸਾਧਕਨ੍ਤਿ.
ਕੁਸਲਾਕੁਸਲਪਟਿਸਨ੍ਦਹਨਕਥਾਵਣ੍ਣਨਾ.
੨. ਸਲ਼ਾਯਤਨੁਪ੍ਪਤ੍ਤਿਕਥਾਵਣ੍ਣਨਾ
੬੯੧-੬੯੨. ਇਦਾਨਿ ਸਲ਼ਾਯਤਨੁਪ੍ਪਤ੍ਤਿਕਥਾ ਨਾਮ ਹੋਤਿ. ਤਤ੍ਥ ਉਪਪਤ੍ਤੇਸਿਯੇਨ ਪਟਿਸਨ੍ਧਿਚਿਤ੍ਤੇਨ ਸਹੇਵ ਓਪਪਾਤਿਕਾਨਂ ਸਲ਼ਾਯਤਨਂ ਉਪ੍ਪਜ੍ਜਤਿ. ਗਬ੍ਭਸੇਯ੍ਯਕਾਨਂ ਅਜ੍ਝਤ੍ਤਿਕਾਯਤਨੇਸੁ ਮਨਾਯਤਨਕਾਯਾਯਤਨਾਨੇਵ ਪਟਿਸਨ੍ਧਿਕ੍ਖਣੇ ਉਪ੍ਪਜ੍ਜਨ੍ਤਿ. ਸੇਸਾਨਿ ਚਤ੍ਤਾਰਿ ਸਤ੍ਤਸਤ੍ਤਤਿਰਤ੍ਤਿਮ੍ਹਿ. ਤਾਨਿ ਚ ਖੋ ਯੇਨ ਕਮ੍ਮੁਨਾ ਪਟਿਸਨ੍ਧਿ ਗਹਿਤਾ, ਤਸ੍ਸੇਵ ਅਞ੍ਞਸ੍ਸ ਵਾ ਕਤਤ੍ਤਾਤਿ ਅਯਂ ਸਕਸਮਯੇ ਵਾਦੋ. ਯੇਸਂ ਪਨ ਏਕਕਮ੍ਮਸਮ੍ਭਵਤ੍ਤਾ ਸਮ੍ਪਨ੍ਨਸਾਖਾਵਿਟਪਾਨਂ ਰੁਕ੍ਖਾਦੀਨਂ ਅਂਕੁਰੋ ਵਿਯ ਬੀਜਮਤ੍ਤਂ ਸਲ਼ਾਯਤਨਂ ਮਾਤੁਕੁਚ੍ਛਿਸ੍ਮਿਂ ਪਟਿਸਨ੍ਧਿਕ੍ਖਣੇਯੇਵ ਉਪ੍ਪਜ੍ਜਤੀਤਿ ਲਦ੍ਧਿ, ਸੇਯ੍ਯਥਾਪਿ ਪੁਬ੍ਬਸੇਲਿਯਾਨਂ; ਤੇ ਸਨ੍ਧਾਯ ਸਲ਼ਾਯਤਨਨ੍ਤਿ ਪੁਚ੍ਛਾ ਸਕਵਾਦਿਸ੍ਸ, ਪਟਿਞ੍ਞਾ ਇਤਰਸ੍ਸ. ਸਬ੍ਬਙ੍ਗਪਚ੍ਚਙ੍ਗੀਤਿਆਦਿ ਸਲ਼ਾਯਤਨੇ ਸਤਿ ਏਵਰੂਪੋ ਹੁਤ੍ਵਾ ਓਕ੍ਕਮੇਯ੍ਯਾਤਿ ਚੋਦਨਤ੍ਥਂ ਵੁਤ੍ਤਂ. ਮਾਤੁਕੁਚ੍ਛਿਗਤਸ੍ਸਾਤਿ ਪੁਚ੍ਛਾ ਪਰਵਾਦਿਸ੍ਸ. ਪਰਤੋ ਮਾਤੁਕੁਚ੍ਛਿਗਤਸ੍ਸ ਪਚ੍ਛਾ ਕੇਸਾਤਿ ਪੁਚ੍ਛਾ ਸਕਵਾਦਿਸ੍ਸ. ਸੇਸਮੇਤ੍ਥ ਉਤ੍ਤਾਨਤ੍ਥਮੇਵਾਤਿ.
ਸਲ਼ਾਯਤਨੁਪ੍ਪਤ੍ਤਿਕਥਾਵਣ੍ਣਨਾ.
੩. ਅਨਨ੍ਤਰਪਚ੍ਚਯਕਥਾਵਣ੍ਣਨਾ
੬੯੩-੬੯੭. ਇਦਾਨਿ ਅਨਨ੍ਤਰਪਚ੍ਚਯਕਥਾ ਨਾਮ ਹੋਤਿ. ਤਤ੍ਥ ਨਚ੍ਚਗੀਤਾਦੀਸੁ ਰੂਪਦਸ੍ਸਨਸਦ੍ਦਸਵਨਾਦੀਨਂ ਲਹੁਪਰਿਵਤ੍ਤਿਤਂ ਦਿਸ੍ਵਾ ‘‘ਇਮਾਨਿ ਵਿਞ੍ਞਾਣਾਨਿ ਅਞ੍ਞਮਞ੍ਞਸ੍ਸ ਅਨਨ੍ਤਰਾ ਉਪ੍ਪਜ੍ਜਨ੍ਤੀ’’ਤਿ ਯੇਸਂ ਲਦ੍ਧਿ, ਸੇਯ੍ਯਥਾਪਿ ਉਤ੍ਤਰਾਪਥਕਾਨਂ; ਤੇ ਸਨ੍ਧਾਯ ਚਕ੍ਖੁਵਿਞ੍ਞਾਣਸ੍ਸਾਤਿ ਪੁਚ੍ਛਾ ਸਕਵਾਦਿਸ੍ਸ, ਪਟਿਞ੍ਞਾ ਇਤਰਸ੍ਸ. ਸੋਤਵਿਞ੍ਞਾਣਂ ਰੂਪਾਰਮ੍ਮਣਂਯੇਵਾਤਿ ਯਦਿ ਚਕ੍ਖੁਵਿਞ੍ਞਾਣਸ੍ਸ ਅਨਨ੍ਤਰਾ ਉਪ੍ਪਜ੍ਜੇਯ੍ਯ, ਵਿਪਾਕਮਨੋਧਾਤੁ ਵਿਯ ਰੂਪਾਰਮ੍ਮਣਂ ਸਿਯਾਤਿ ਚੋਦੇਤੁਂ ਵੁਤ੍ਤਂ. ਚਕ੍ਖੁਞ੍ਚ ਪਟਿਚ੍ਚ ਰੂਪੇ ਚ ਉਪ੍ਪਜ੍ਜਤਿ ਸੋਤਵਿਞ੍ਞਾਣਨ੍ਤਿ ਪਞ੍ਹੇਸੁ ਸੁਤ੍ਤਾਭਾਵੇਨ ਪਟਿਕ੍ਖਿਪਿਤ੍ਵਾ ਅਨਨ੍ਤਰੁਪ੍ਪਤ੍ਤਿਂ ਸਲ੍ਲਕ੍ਖੇਨ੍ਤੋ ਲਦ੍ਧਿਵਸੇਨ ਪਟਿਜਾਨਾਤਿ. ਤਞ੍ਞੇਵ ਚਕ੍ਖੁਵਿਞ੍ਞਾਣਂ ਤਂ ਸੋਤਵਿਞ੍ਞਾਣਨ੍ਤਿ ਯਥਾ ਪਠਮਜਵਨਾਨਨ੍ਤਰਂ ਦੁਤਿਯਜਵਨਂ ਮਨੋਵਿਞ੍ਞਾਣਭਾਵੇਨ ਤਞ੍ਞੇਵ ਹੋਤਿ, ਕਿਂ ਤੇ ਤਥਾ ਏਤਮ੍ਪਿ ਦ੍ਵਯਂ ਏਕਮੇਵਾਤਿ ਪੁਚ੍ਛਤਿ. ਇਮਿਨਾ ਨਯੇਨ ਸਬ੍ਬਵਾਰੇਸੁ ਅਤ੍ਥੋ ਵੇਦਿਤਬ੍ਬੋ. ਨਚ੍ਚਤਿ ਗਾਯਤੀਤਿਆਦਿਵਚਨਂ ਆਰਮ੍ਮਣਸਮੋਧਾਨੇ ਲਹੁਪਰਿਵਤ੍ਤਿਤਾਯ ਵੋਕਿਣ੍ਣਭਾਵਂ ਦੀਪੇਤਿ, ਨ ਅਨਨ੍ਤਰਪਚ੍ਚਯਤਂ, ਤਸ੍ਮਾ ਅਸਾਧਕਨ੍ਤਿ.
ਅਨਨ੍ਤਰਪਚ੍ਚਯਕਥਾਵਣ੍ਣਨਾ.
੪. ਅਰਿਯਰੂਪਕਥਾਵਣ੍ਣਨਾ
੬੯੮-੬੯੯. ਇਦਾਨਿ ਅਰਿਯਰੂਪਕਥਾ ਨਾਮ ਹੋਤਿ. ਤਤ੍ਥ ਸਮ੍ਮਾਵਾਚਾਕਮ੍ਮਨ੍ਤਾ ਰੂਪਂ, ਤਞ੍ਚ ਖੋ ‘‘ਸਬ੍ਬਂ ਰੂਪਂ ਚਤ੍ਤਾਰਿ ਚ ਮਹਾਭੂਤਾਨਿ ਚਤੁਨ੍ਨਞ੍ਚ ਮਹਾਭੂਤਾਨਂ ਉਪਾਦਾਯਰੂਪ’’ਨ੍ਤਿ (ਮ. ਨਿ. ੩.੬੭) ਵਚਨਤੋ ਉਪਾਦਾਯਰੂਪਨ੍ਤਿ ਯੇਸਂ ਲਦ੍ਧਿ, ਸੇਯ੍ਯਥਾਪਿ ਉਤ੍ਤਰਾਪਥਕਾਨਂ; ਤੇ ਸਨ੍ਧਾਯ ਅਰਿਯਰੂਪਂ ਮਹਾਭੂਤਾਨਂ ਉਪਾਦਾਯਾਤਿ ਪੁਚ੍ਛਾ ਸਕਵਾਦਿਸ੍ਸ. ਤਤ੍ਥ ਅਰਿਯਾਨਂ ਰੂਪਂ, ਅਰਿਯਂ ਵਾ ਰੂਪਨ੍ਤਿ ਅਰਿਯਰੂਪਂ. ਆਮਨ੍ਤਾਤਿ ਲਦ੍ਧਿਯਂ ਠਤ੍ਵਾ ਪਟਿਞ੍ਞਾ ਇਤਰਸ੍ਸ. ਕੁਸਲਨ੍ਤਿ ਪੁਟ੍ਠੋ ਲਦ੍ਧਿਵਸੇਨੇਵ ਪਟਿਜਾਨਾਤਿ. ਅਨਾਸਵਪੁਚ੍ਛਾਦੀਸੁਪਿ ਏਸੇਵ ਨਯੋ. ਯਂ ਕਿਞ੍ਚਿ ਰੂਪਨ੍ਤਿ ਸੁਤ੍ਤਂ ਠਪੇਤ੍ਵਾ ਭੂਤਾਨਿ ਸੇਸਰੂਪਸ੍ਸ ਉਪਾਦਾਭਾਵਂ ਦੀਪੇਤਿ, ਨ ਸਮ੍ਮਾਵਾਚਾਕਮ੍ਮਨ੍ਤਾਨਂ. ਤੇਸਞ੍ਹਿ ਰੂਪਮਤ੍ਤਞ੍ਞੇਵ ਅਸਿਦ੍ਧਂ, ਕੁਤੋ ਉਪਾਦਾਰੂਪਤਾ; ਤਸ੍ਮਾ ਅਸਾਧਕਨ੍ਤਿ.
ਅਰਿਯਰੂਪਕਥਾਵਣ੍ਣਨਾ.
੫. ਅਞ੍ਞੋ ਅਨੁਸਯੋਤਿਕਥਾਵਣ੍ਣਨਾ
੭੦੦-੭੦੧. ਇਦਾਨਿ ਅਞ੍ਞੋ ਅਨੁਸਯੋਤਿਕਥਾ ਨਾਮ ਹੋਤਿ. ਤਤ੍ਥ ਯਸ੍ਮਾ ਪੁਥੁਜ੍ਜਨੋ ਕੁਸਲਾਬ੍ਯਾਕਤੇ ਚਿਤ੍ਤੇ ਵਤ੍ਤਮਾਨੇ ਸਾਨੁਸਯੋਤਿ ਵਤ੍ਤਬ੍ਬੋ, ਨ ਪਰਿਯੁਟ੍ਠਿਤੋਤਿ ਤਸ੍ਮਾ ਅਞ੍ਞੋ ਅਨੁਸਯੋ, ਅਞ੍ਞਂ ਪਰਿਯੁਟ੍ਠਾਨਨ੍ਤਿ ਯੇਸਂ ਲਦ੍ਧਿ, ਸੇਯ੍ਯਥਾਪਿ ਅਨ੍ਧਕਾਨਂ; ਤੇ ਸਨ੍ਧਾਯ ਅਞ੍ਞੋ ਕਾਮਰਾਗਾਨੁਸਯੋਤਿ ਪੁਚ੍ਛਾ ਸਕਵਾਦਿਸ੍ਸ ਪਟਿਞ੍ਞਾ ਇਤਰਸ੍ਸ. ਸੇਸਂ ਹੇਟ੍ਠਾ ਅਨੁਸਯਕਥਾਯਂ ਵੁਤ੍ਤਨਯੇਨੇਵ ਵੇਦਿਤਬ੍ਬਂ. ਸਾਨੁਸਯੋਤਿਆਦਿ ਪਨ ਤਸ੍ਮਿਂ ਸਮਯੇ ਅਨੁਸਯਸ੍ਸ ਅਪ੍ਪਹੀਨਤ੍ਤਾ ਸਾਨੁਸਯੋਤਿ ਵਤ੍ਤਬ੍ਬਤਂ, ਅਨੁਪ੍ਪਨ੍ਨਤ੍ਤਾ ਚ ਪਰਿਯੁਟ੍ਠਿਤੋਤਿ ਅਵਤ੍ਤਬ੍ਬਤਂ ਦੀਪੇਤਿ, ਨ ਅਨੁਸਯਪਰਿਯੁਟ੍ਠਾਨਾਨਂ ਅਞ੍ਞਤ੍ਤਂ, ਤਸ੍ਮਾ ਅਸਾਧਕਨ੍ਤਿ.
ਅਞ੍ਞੋ ਅਨੁਸਯੋਤਿਕਥਾਵਣ੍ਣਨਾ.
੬. ਪਰਿਯੁਟ੍ਠਾਨਂ ਚਿਤ੍ਤਵਿਪ੍ਪਯੁਤ੍ਤਨ੍ਤਿਕਥਾਵਣ੍ਣਨਾ
੭੦੨. ਇਦਾਨਿ ਪਰਿਯੁਟ੍ਠਾਨਂ ਚਿਤ੍ਤਵਿਪ੍ਪਯੁਤ੍ਤਨ੍ਤਿਕਥਾ ਨਾਮ ਹੋਤਿ. ਤਤ੍ਥ ਯਸ੍ਮਾ ਅਨਿਚ੍ਚਾਦਿਤੋ ਮਨਸਿਕਰੋਤੋਪਿ ਰਾਗਾਦਯੋ ਉਪ੍ਪਜ੍ਜਨ੍ਤਿ. ਵੁਤ੍ਤਮ੍ਪਿ ਚੇਤਂ – ‘‘ਅਪ੍ਪੇਕਦਾ, ਭੋ ਭਾਰਦ੍ਵਾਜ, ਅਸੁਭਤੋ ਮਨਸਿਕਰਿਸ੍ਸਾਮੀਤਿ ਸੁਭਤੋਵ ਮਨਸਿਕਰੋਤੀ’’ਤਿ (ਸਂ. ਨਿ. ੪.੧੨੭). ਤਸ੍ਮਾ ਪਰਿਯੁਟ੍ਠਾਨਂ ਚਿਤ੍ਤਵਿਪ੍ਪਯੁਤ੍ਤਨ੍ਤਿ ਯੇਸਂ ਲਦ੍ਧਿ, ਸੇਯ੍ਯਥਾਪਿ ਅਨ੍ਧਕਾਨਂਯੇਵ; ਤੇ ਸਨ੍ਧਾਯ ਪੁਚ੍ਛਾ ਸਕਵਾਦਿਸ੍ਸ, ਪਟਿਞ੍ਞਾ ਇਤਰਸ੍ਸ. ਸੇਸਮੇਤ੍ਥ ਉਤ੍ਤਾਨਤ੍ਥਮੇਵਾਤਿ.
ਪਰਿਯੁਟ੍ਠਾਨਂ ਚਿਤ੍ਤਵਿਪ੍ਪਯੁਤ੍ਤਨ੍ਤਿਕਥਾਵਣ੍ਣਨਾ.
੭. ਪਰਿਯਾਪਨ੍ਨਕਥਾਵਣ੍ਣਨਾ
੭੦੩-੭੦੫. ਇਦਾਨਿ ਪਰਿਯਾਪਨ੍ਨਕਥਾ ਨਾਮ ਹੋਤਿ. ਤਤ੍ਥ ਯਸ੍ਮਾ ਕਾਮਰਾਗੋ ਕਾਮਧਾਤੁਂ ਅਨੁਸੇਤਿ, ਕਾਮਧਾਤੁਪਰਿਯਾਪਨ੍ਨੋਤਿ ਚ ਵੁਚ੍ਚਤਿ, ਤਸ੍ਮਾ ਰੂਪਰਾਗਾਰੂਪਰਾਗਾਪਿ ਰੂਪਧਾਤੁਅਰੂਪਧਾਤੁਯੋ ਅਨੁਸੇਨ੍ਤਿ. ਰੂਪਧਾਤੁਅਰੂਪਧਾਤੁਪਰਿਯਾਪਨ੍ਨਾਯੇਵ ਚ ਨਾਮ ਹੋਨ੍ਤੀਤਿ ਯੇਸਂ ਲਦ੍ਧਿ, ਸੇਯ੍ਯਥਾਪਿ ਅਨ੍ਧਕਾਨਞ੍ਚੇਵ ਸਮ੍ਮਿਤਿਯਾਨਞ੍ਚ; ਤੇ ਸਨ੍ਧਾਯ ਰੂਪਰਾਗੋਤਿ ਪੁਚ੍ਛਾ ਸਕਵਾਦਿਸ੍ਸ, ਪਟਿਞ੍ਞਾ ਇਤਰਸ੍ਸ. ਤਤ੍ਥ ਅਨੁਸੇਤੀਤਿ ਯਥਾ ਕਾਮਰਾਗੋ ਕਾਮਵਿਤਕ੍ਕਸਙ੍ਖਾਤਂ ਕਾਮਧਾਤੁਂ ਸਹਜਾਤਵਸੇਨ ਅਨੁਸੇਤਿ, ਕਿਂ ਤੇ ਏਵਂ ਰੂਪਰਾਗੋ ਰੂਪਧਾਤੁਨ੍ਤਿ ਪੁਚ੍ਛਤਿ. ਪਰਿਯਾਪਨ੍ਨੋਤਿ ਯਥਾ ਚ ਸੋ ਤਿਵਿਧਾਯ ਕਾਮਧਾਤੁਯਾ ਕਿਲੇਸਕਾਮਵਸੇਨ ਪਰਿਯਾਪਨ੍ਨਤ੍ਤਾ ਕਾਮਧਾਤੁਪਰਿਯਾਪਨ੍ਨੋ, ਕਿਂ ਤੇ ਏਵਂ ਰੂਪਰਾਗੋਪਿ ਰੂਪਧਾਤੁਪਰਿਯਾਪਨ੍ਨੋਤਿ ਪੁਚ੍ਛਤਿ. ਇਤਰੋ ਪਨਸ੍ਸ ਅਧਿਪ੍ਪਾਯਂ ਅਸਲ੍ਲਕ੍ਖੇਨ੍ਤੋ ਕੇਵਲਂ ਲਦ੍ਧਿਵਸੇਨ ਆਮਨ੍ਤਾਤਿ ਪਟਿਜਾਨਾਤਿ. ਅਥ ਨਂ ਤਮਤ੍ਥਂ ਸਲ੍ਲਕ੍ਖਾਪੇਤੁਂ ਕੁਸਲਵਿਪਾਕਕਿਰਿਯਸਙ੍ਖਾਤੇਹਿ ਸਮਾਪਤ੍ਤੇਸਿਯਾਦੀਹਿ ਸਂਸਨ੍ਦਿਤ੍ਵਾ ਪੁਚ੍ਛਿਤੁਂ ਸਮਾਪਤ੍ਤੇਸਿਯੋਤਿਆਦਿਮਾਹ. ਸੇਸਮੇਤ੍ਥ ਯਥਾਪਾਲ਼ਿਮੇਵ ਨਿਯ੍ਯਾਤਿ. ਨਨੁ ਕਾਮਰਾਗੋਤਿਆਦਿਵਚਨਮ੍ਪਿ ਕਾਮਰਾਗਸ੍ਸੇਵ ਕਾਮਧਾਤੁਯਂ ਅਨੁਸਯਭਾਵਂ ਪਰਿਯਾਪਨ੍ਨਤਞ੍ਚ ਦੀਪੇਤਿ, ਨ ਇਤਰੇਸਂ ਇਤਰਧਾਤੂਸੂਤਿ.
ਪਰਿਯਾਪਨ੍ਨਕਥਾਵਣ੍ਣਨਾ.
੮. ਅਬ੍ਯਾਕਤਕਥਾਵਣ੍ਣਨਾ
੭੦੬-੭੦੮. ਇਦਾਨਿ ਅਬ੍ਯਾਕਤਕਥਾ ਨਾਮ ਹੋਤਿ. ਤਤ੍ਥ ਵਿਪਾਕਕਿਰਿਯਰੂਪਨਿਬ੍ਬਾਨਸਙ੍ਖਾਤਂ ਚਤੁਬ੍ਬਿਧਂ ਅਬ੍ਯਾਕਤਂ ਅਵਿਪਾਕਤ੍ਤਾ ਅਬ੍ਯਾਕਤਨ੍ਤਿ ਵੁਤ੍ਤਂ. ਦਿਟ੍ਠਿਗਤਂ ‘‘ਸਸ੍ਸਤੋ ਲੋਕੋਤਿ ਖੋ, ਵਚ੍ਛ, ਅਬ੍ਯਾਕਤਮੇਤ’’ਨ੍ਤਿ (ਸਂ. ਨਿ. ੪.੪੧੬ ਥੋਕਂ ਵਿਸਦਿਸਂ) ਸਸ੍ਸਤਾਦਿਭਾਵੇਨ ਅਕਥਿਤਤ੍ਤਾ. ਯੇਸਂ ਪਨ ਇਮਂ ਵਿਭਾਗਂ ਅਗ੍ਗਹੇਤ੍ਵਾ ਪੁਰਿਮਾਬ੍ਯਾਕਤਂ ਵਿਯ ਦਿਟ੍ਠਿਗਤਮ੍ਪਿ ਅਬ੍ਯਾਕਤਨ੍ਤਿ ਲਦ੍ਧਿ, ਸੇਯ੍ਯਥਾਪਿ ਅਨ੍ਧਕਾਨਞ੍ਚੇਵ ਉਤ੍ਤਰਾਪਥਕਾਨਞ੍ਚ; ਤੇਸਂ ਤਂ ਵਿਭਾਗਂ ਦਸ੍ਸੇਤੁਂ ਦਿਟ੍ਠਿਗਤਂ ਅਬ੍ਯਾਕਤਨ੍ਤਿ ਪੁਚ੍ਛਾ ਸਕਵਾਦਿਸ੍ਸ, ਪਟਿਞ੍ਞਾ ਇਤਰਸ੍ਸ. ਸੇਸਮੇਤ੍ਥ ਯਥਾਪਾਲ਼ਿਮੇਵ ਨਿਯ੍ਯਾਤੀਤਿ.
ਅਬ੍ਯਾਕਤਕਥਾਵਣ੍ਣਨਾ.
੯. ਅਪਰਿਯਾਪਨ੍ਨਕਥਾਵਣ੍ਣਨਾ
੭੦੯-੭੧੦. ਇਦਾਨਿ ਅਪਰਿਯਾਪਨ੍ਨਕਥਾ ਨਾਮ ਹੋਤਿ. ਤਤ੍ਥ ਯਸ੍ਮਾ ਪੁਥੁਜ੍ਜਨੋ ਝਾਨਲਾਭੀ ਕਾਮੇਸੁ ਵੀਤਰਾਗੋਤਿ ਵਤ੍ਤਬ੍ਬੋ ਹੋਤਿ, ਨ ਪਨ ਵਿਗਤਦਿਟ੍ਠਿਕੋਤਿ, ਤਸ੍ਮਾ ਦਿਟ੍ਠਿਗਤਂ ਅਪਰਿਯਾਪਨ੍ਨਨ੍ਤਿ ਯੇਸਂ ਲਦ੍ਧਿ, ਸੇਯ੍ਯਥਾਪਿ ਪੁਬ੍ਬਸੇਲਿਯਾਨਂ; ਤੇ ਸਨ੍ਧਾਯ ਪੁਚ੍ਛਾ ਸਕਵਾਦਿਸ੍ਸ, ਪਟਿਞ੍ਞਾ ਇਤਰਸ੍ਸ. ਸੇਸਮੇਤ੍ਥ ਯਥਾਪਾਲ਼ਿਮੇਵ ਨਿਯ੍ਯਾਤੀਤਿ.
ਅਪਰਿਯਾਪਨ੍ਨਕਥਾਵਣ੍ਣਨਾ.
ਚੁਦ੍ਦਸਮੋ ਵਗ੍ਗੋ.