੧੫. ਪਨ੍ਨਰਸਮਵਗ੍ਗੋ

੧. ਪਚ੍ਚਯਤਾਕਥਾਵਣ੍ਣਨਾ

੭੧੧-੭੧੭. ਇਦਾਨਿ ਪਚ੍ਚਯਤਾਕਥਾ ਨਾਮ ਹੋਤਿ. ਤਤ੍ਥ ਯੋ ਧਮ੍ਮੋ ਹੇਤੁਪਚ੍ਚਯੇਨ ਪਚ੍ਚਯੋ, ਸੋ ਯੇਸਂ ਹੇਤੁਪਚ੍ਚਯੇਨ ਪਚ੍ਚਯੋ, ਤੇਸਞ੍ਞੇਵ ਯਸ੍ਮਾ ਆਰਮ੍ਮਣਾਨਨ੍ਤਰਸਮਨਨ੍ਤਰਪਚ੍ਚਯੇਨ ਪਚ੍ਚਯੋ ਨ ਹੋਤਿ, ਯੋ ਵਾ ਆਰਮ੍ਮਣਪਚ੍ਚਯੇਨ ਪਚ੍ਚਯੋ, ਸੋ ਯਸ੍ਮਾ ਤੇਸਂਯੇਵ ਅਨਨ੍ਤਰਸਮਨਨ੍ਤਰਪਚ੍ਚਯੇਨ ਪਚ੍ਚਯੋ ਨ ਹੋਤਿ, ਤਸ੍ਮਾ ਪਚ੍ਚਯਤਾ ਵਵਤ੍ਥਿਤਾਤਿ ਯੇਸਂ ਲਦ੍ਧਿ, ਸੇਯ੍ਯਥਾਪਿ ਮਹਾਸਙ੍ਘਿਕਾਨਂ; ਤੇ ਸਨ੍ਧਾਯ ਪੁਚ੍ਛਾ ਸਕਵਾਦਿਸ੍ਸ, ਪਟਿਞ੍ਞਾ ਇਤਰਸ੍ਸ. ਸੇਸਮੇਤ੍ਥ ਯਥਾਪਾਲ਼ਿਮੇਵ ਨਿਯ੍ਯਾਤੀਤਿ.

ਪਚ੍ਚਯਤਾਕਥਾਵਣ੍ਣਨਾ.

੨. ਅਞ੍ਞਮਞ੍ਞਪਚ੍ਚਯਕਥਾਵਣ੍ਣਨਾ

੭੧੮-੭੧੯. ਇਦਾਨਿ ਅਞ੍ਞਮਞ੍ਞਪਚ੍ਚਯਕਥਾ ਨਾਮ ਹੋਤਿ. ਤਤ੍ਥ ਯੇਸਂ ਸਮਯੇ ‘‘ਅਵਿਜ੍ਜਾਪਚ੍ਚਯਾ ਸਙ੍ਖਾਰਾ’’ਤਿ ਅਯਮੇਵ ਤਨ੍ਤਿ, ‘‘ਸਙ੍ਖਾਰਪਚ੍ਚਯਾਪਿ ਅਵਿਜ੍ਜਾ’’ਤਿ ਅਯਂ ਨਤ੍ਥਿ, ਤਸ੍ਮਾ ਅਵਿਜ੍ਜਾਵ ਸਙ੍ਖਾਰਾਨਂ ਪਚ੍ਚਯੋ, ਨ ਪਨ ਸਙ੍ਖਾਰਾ ਅਵਿਜ੍ਜਾਯਾਤਿ ਲਦ੍ਧਿ, ਸੇਯ੍ਯਥਾਪਿ ਮਹਾਸਙ੍ਘਿਕਾਨਂ; ਤੇ ਸਨ੍ਧਾਯ ਅਵਿਜ੍ਜਾਸਙ੍ਖਾਰਾਦੀਨਂ ਅਞ੍ਞਮਞ੍ਞਪਚ੍ਚਯਤਾਪਿ ਅਤ੍ਥੀਤਿ ਦਸ੍ਸੇਤੁਂ ਪੁਚ੍ਛਾ ਸਕਵਾਦਿਸ੍ਸ, ਪਟਿਞ੍ਞਾ ਇਤਰਸ੍ਸ. ਅਵਿਜ੍ਜਾ ਸਙ੍ਖਾਰੇਨਾਤਿ ਏਤ੍ਥ ਅਪੁਞ੍ਞਾਭਿਸਙ੍ਖਾਰੋਵ ਗਹਿਤੋ. ਤਸ੍ਮਾ ਸਙ੍ਖਾਰਪਚ੍ਚਯਾਪਿ ਅਵਿਜ੍ਜਾਤਿ ਏਤ੍ਥ ਸਹਜਾਤਅਞ੍ਞਮਞ੍ਞਅਤ੍ਥਿਅਵਿਗਤਸਮ੍ਪਯੁਤ੍ਤਵਸੇਨ ਪਚ੍ਚਯਤਾ ਵੇਦਿਤਬ੍ਬਾ. ਉਪਾਦਾਨਪਚ੍ਚਯਾਪਿ ਤਣ੍ਹਾਤਿ ਏਤ੍ਥ ਠਪੇਤ੍ਵਾ ਕਾਮੁਪਾਦਾਨਂ ਸੇਸਾਨਿ ਤੀਣਿ ਉਪਾਦਾਨਾਨਿ ਅਵਿਜ੍ਜਾਯ ਸਙ੍ਖਾਰਾ ਵਿਯ ਤਣ੍ਹਾਯ ਪਚ੍ਚਯਾ ਹੋਨ੍ਤੀਤਿ ਵੇਦਿਤਬ੍ਬਾਨਿ. ਸੇਸਂ ਯਥਾਪਾਲ਼ਿਮੇਵ ਨਿਯ੍ਯਾਤਿ. ਜਰਾਮਰਣਪਚ੍ਚਯਾਤਿ ਪੁਚ੍ਛਾ ਪਰਵਾਦਿਸ੍ਸ, ਨਾਮਰੂਪਂ ਵਿਞ੍ਞਾਣਪਚ੍ਚਯਾਤਿ ਸਕਵਾਦਿਸ੍ਸਾਤਿ.

ਅਞ੍ਞਮਞ੍ਞਪਚ੍ਚਯਕਥਾਵਣ੍ਣਨਾ.

੩. ਅਦ੍ਧਾਕਥਾਵਣ੍ਣਨਾ

੭੨੦-੭੨੧. ਇਦਾਨਿ ਅਦ੍ਧਾਕਥਾ ਨਾਮ ਹੋਤਿ. ਤਤ੍ਥ ‘‘ਤੀਣਿਮਾਨਿ, ਭਿਕ੍ਖਵੇ, ਕਥਾਵਤ੍ਥੂਨੀ’’ਤਿ (ਅ. ਨਿ. ੩.੬੮) ਸੁਤ੍ਤਂ ਨਿਸ੍ਸਾਯ ਕਾਲਸਙ੍ਖਾਤੋ ਅਦ੍ਧਾ ਨਾਮ ਪਰਿਨਿਪ੍ਫਨ੍ਨੋ ਅਤ੍ਥੀਤਿ ਯੇਸਂ ਲਦ੍ਧਿ; ਤੇਸਂ ‘‘ਅਦ੍ਧਾ ਨਾਮ ਕੋਚਿ ਪਰਿਨਿਪ੍ਫਨ੍ਨੋ ਨਤ੍ਥਿ ਅਞ੍ਞਤ੍ਰ ਕਾਲਪਞ੍ਞਤ੍ਤਿਮਤ੍ਤਾ. ਰੂਪਾਦਯੋ ਪਨ ਖਨ੍ਧਾਵ ਪਰਿਨਿਪ੍ਫਨ੍ਨਾ’’ਤਿ ਵਿਭਾਗਂ ਦਸ੍ਸੇਤੁਂ ਅਦ੍ਧਾ ਪਰਿਨਿਪ੍ਫਨ੍ਨੋਤਿ ਪੁਚ੍ਛਾ ਸਕਵਾਦਿਸ੍ਸ, ਪਟਿਞ੍ਞਾ ਇਤਰਸ੍ਸ. ਅਥ ਨਂ ‘‘ਸਚੇ ਸੋ ਪਰਿਨਿਪ੍ਫਨ੍ਨੋ, ਰੂਪਾਦੀਸੁ ਅਨੇਨ ਅਞ੍ਞਤਰੇਨ ਭਵਿਤਬ੍ਬ’’ਨ੍ਤਿ ਚੋਦੇਤੁਂ ਰੂਪਨ੍ਤਿਆਦਿਮਾਹ. ਇਤਰੋ ਪਟਿਕ੍ਖਿਪਤਿ. ਸੇਸਂ ਯਥਾਪਾਲ਼ਿਮੇਵ ਨਿਯ੍ਯਾਤੀਤਿ.

ਅਦ੍ਧਾਕਥਾਵਣ੍ਣਨਾ.

੪. ਖਣਲਯਮੁਹੁਤ੍ਤਕਥਾਵਣ੍ਣਨਾ

੭੨੨-੭੨੩. ਖਣਲਯਮੁਹੁਤ੍ਤਕਥਾਸੁਪਿ ਏਸੇਵ ਨਯੋ. ਸਬ੍ਬੇਪਿ ਹੇਤੇ ਖਣਾਦਯੋ ਅਦ੍ਧਾਪਰਿਯਾਯਾ ਏਵਾਤਿ.

ਖਣਲਯਮੁਹੁਤ੍ਤਕਥਾਵਣ੍ਣਨਾ.

੫. ਆਸਵਕਥਾਵਣ੍ਣਨਾ

੭੨੪-੭੨੫. ਇਦਾਨਿ ਆਸਵਕਥਾ ਨਾਮ ਹੋਤਿ. ਤਤ੍ਥ ਯਸ੍ਮਾ ਚਤੂਹਿ ਆਸਵੇਹਿ ਉਤ੍ਤਰਿ ਅਞ੍ਞੋ ਆਸਵੋ ਨਾਮ ਨਤ੍ਥਿ, ਯੇਨ ਚਤ੍ਤਾਰੋ ਆਸਵਾ ਸਾਸਵਾ ਸਿਯੁਂ, ਤਸ੍ਮਾ ਚਤ੍ਤਾਰੋ ਆਸਵਾ ਅਨਾਸਵਾਤਿ ਯੇਸਂ ਲਦ੍ਧਿ, ਸੇਯ੍ਯਥਾਪਿ ਹੇਤੁਵਾਦਾਨਂ; ਤੇ ਸਨ੍ਧਾਯ ਪੁਚ੍ਛਾ ਸਕਵਾਦਿਸ੍ਸ, ਪਟਿਞ੍ਞਾ ਇਤਰਸ੍ਸ. ਅਥ ਨਂ ‘‘ਯਦਿ ਤੇ ਆਸਵਾ ਅਨਾਸਵਾ, ਏਵਂ ਸਨ੍ਤੇ ਤੇਹਿ ਮਗ੍ਗਾਦਿਲਕ੍ਖਣਪ੍ਪਤ੍ਤੇਹਿ ਭਵਿਤਬ੍ਬ’’ਨ੍ਤਿ ਚੋਦੇਤੁਂ ਮਗ੍ਗੋਤਿਆਦਿਮਾਹ. ਸੇਸਮੇਤ੍ਥ ਉਤ੍ਤਾਨਤ੍ਥਮੇਵਾਤਿ.

ਆਸਵਕਥਾਵਣ੍ਣਨਾ.

੬. ਜਰਾਮਰਣਕਥਾਵਣ੍ਣਨਾ

੭੨੬-੭੨੭. ਇਦਾਨਿ ਜਰਾਮਰਣਕਥਾ ਨਾਮ ਹੋਤਿ. ਤਤ੍ਥ ਜਰਾਮਰਣਂ ਨਾਮ ਅਪਰਿਨਿਪ੍ਫਨ੍ਨਤ੍ਤਾ ਲੋਕਿਯਨ੍ਤਿ ਵਾ ਲੋਕੁਤ੍ਤਰਨ੍ਤਿ ਵਾ ਨ ਵਤ੍ਤਬ੍ਬਂ. ‘‘ਲੋਕਿਯਾ ਧਮ੍ਮਾ ਲੋਕੁਤ੍ਤਰਾ ਧਮ੍ਮਾ’’ਤਿ ਹਿ ਦੁਕੇ ਜਰਾਮਰਣਂ ਨੇਵ ਲੋਕਿਯਪਦੇ, ਨ ਲੋਕੁਤ੍ਤਰਪਦੇ ਨਿਦ੍ਦਿਟ੍ਠਂ. ਤਤ੍ਥ ਯੇਸਂ ਇਮਂ ਲਕ੍ਖਣਂ ਅਨਾਦਿਯਿਤ੍ਵਾ ਲੋਕੁਤ੍ਤਰਾਨਂ ਧਮ੍ਮਾਨਂ ਜਰਾਮਰਣਂ ਲੋਕੁਤ੍ਤਰਨ੍ਤਿ ਲਦ੍ਧਿ, ਸੇਯ੍ਯਥਾਪਿ ਮਹਾਸਙ੍ਘਿਕਾਨਂ, ਤੇ ਸਨ੍ਧਾਯ ਪੁਚ੍ਛਾ ਸਕਵਾਦਿਸ੍ਸ, ਪਟਿਞ੍ਞਾ ਇਤਰਸ੍ਸ. ਸੇਸਮੇਤ੍ਥ ਯਥਾਪਾਲ਼ਿਮੇਵ ਨਿਯ੍ਯਾਤੀਤਿ.

ਜਰਾਮਰਣਕਥਾਵਣ੍ਣਨਾ.

੭. ਸਞ੍ਞਾਵੇਦਯਿਤਕਥਾਵਣ੍ਣਨਾ

੭੨੮-੭੨੯. ਇਦਾਨਿ ਸਞ੍ਞਾਵੇਦਯਿਤਕਥਾ ਨਾਮ ਹੋਤਿ. ਤਤ੍ਥ ਸਞ੍ਞਾਵੇਦਯਿਤਨਿਰੋਧਸਮਾਪਤ੍ਤਿ ਨਾਮ ਨ ਕੋਚਿ ਧਮ੍ਮੋ, ਚਤੁਨ੍ਨਂ ਪਨ ਖਨ੍ਧਾਨਂ ਨਿਰੋਧੋ. ਇਤਿ ਸਾ ਨੇਵ ਲੋਕਿਯਾ ਨ ਲੋਕੁਤ੍ਤਰਾ. ਯਸ੍ਮਾ ਪਨ ਲੋਕਿਯਾ ਨ ਹੋਤਿ, ਤਸ੍ਮਾ ਲੋਕੁਤ੍ਤਰਾਤਿ ਯੇਸਂ ਲਦ੍ਧਿ, ਸੇਯ੍ਯਥਾਪਿ ਹੇਤੁਵਾਦਾਨਂਯੇਵ; ਤੇ ਸਨ੍ਧਾਯ ਪੁਚ੍ਛਾ ਸਕਵਾਦਿਸ੍ਸ, ਪਟਿਞ੍ਞਾ ਇਤਰਸ੍ਸ. ਸੇਸਂ ਪੁਰਿਮਕਥਾਸਦਿਸਮੇਵਾਤਿ.

ਸਞ੍ਞਾਵੇਦਯਿਤਕਥਾਵਣ੍ਣਨਾ.

੮. ਦੁਤਿਯਸਞ੍ਞਾਵੇਦਯਿਤਕਥਾਵਣ੍ਣਨਾ

੭੩੦-੭੩੧. ਇਦਾਨਿ ਯਸ੍ਮਾ ਸਾ ਲੋਕੁਤ੍ਤਰਾ ਨ ਹੋਤਿ, ਤਸ੍ਮਾ ਲੋਕਿਯਾਤਿ ਯੇਸਂ ਲਦ੍ਧਿ, ਸੇਯ੍ਯਥਾਪਿ ਹੇਤੁਵਾਦਾਨਂ, ਤੇ ਸਨ੍ਧਾਯ ਪੁਚ੍ਛਾ ਸਕਵਾਦਿਸ੍ਸ, ਪਟਿਞ੍ਞਾ ਇਤਰਸ੍ਸ. ਸੇਸਂ ਪੁਰਿਮਸਦਿਸਮੇਵਾਤਿ.

ਦੁਤਿਯਸਞ੍ਞਾਵੇਦਯਿਤਕਥਾਵਣ੍ਣਨਾ.

੯. ਤਤਿਯਸਞ੍ਞਾਵੇਦਯਿਤਕਥਾਵਣ੍ਣਨਾ

੭੩੨. ਇਦਾਨਿ ਯਸ੍ਮਾ ‘‘ਅਸੁਕੋ ਮਰਣਧਮ੍ਮੋ, ਅਸੁਕੋ ਨ ਮਰਣਧਮ੍ਮੋ’’ਤਿ ਸਤ੍ਤਾਨਂ ਮਰਣਧਮ੍ਮਤਾਯ ਨਿਯਾਮੋ ਨਤ੍ਥੀਤਿ ਸਞ੍ਞਾਵੇਦਯਿਤਨਿਰੋਧਂ ਸਮਾਪਨ੍ਨੋਪਿ ਕਾਲਂ ਕਰੇਯ੍ਯਾਤਿ ਯੇਸਂ ਲਦ੍ਧਿ, ਸੇਯ੍ਯਥਾਪਿ ਰਾਜਗਿਰਿਕਾਨਂ; ਤੇਸਂ ਸਮਾਪਨ੍ਨਾਯਪਿ ਮਰਣਧਮ੍ਮਤਾਯ ਮਰਣਸਮਯਞ੍ਚ ਅਮਰਣਸਮਯਞ੍ਚ ਦਸ੍ਸੇਤੁਂ ਪੁਚ੍ਛਾ ਸਕਵਾਦਿਸ੍ਸ, ਪਟਿਞ੍ਞਾ ਇਤਰਸ੍ਸ. ਅਥ ਨਂ ਯਸ੍ਮਾ ਕਾਲਂ ਕਰੋਨ੍ਤਸ੍ਸ ਨਾਮ ਮਰਣਨ੍ਤਿਕੇਹਿ ਫਸ੍ਸਾਦੀਹਿ ਭਵਿਤਬ੍ਬਂ, ਤਸ੍ਮਾ ਤੇਨਾਕਾਰੇਨ ਚੋਦੇਤੁਂ ਅਤ੍ਥੀਤਿਆਦਿਮਾਹ.

ਅਫਸ੍ਸਕਸ੍ਸ ਕਾਲਕਿਰਿਯਾਤਿਆਦੀਨਿ ਪੁਟ੍ਠੋ ਸੇਸਸਤ੍ਤੇ ਸਨ੍ਧਾਯ ਪਟਿਕ੍ਖਿਪਤਿ ਵਿਸਂ ਕਮੇਯ੍ਯਾਤਿਆਦੀਨਿ ਪੁਟ੍ਠੋ ਸਮਾਪਤ੍ਤਿਆਨੁਭਾਵਂ ਸਨ੍ਧਾਯ ਪਟਿਕ੍ਖਿਪਤਿ. ਦੁਤਿਯਵਾਰੇ ਸਰੀਰਪਕਤਿਂ ਸਨ੍ਧਾਯ ਪਟਿਜਾਨਾਤਿ. ਏਵਂ ਸਨ੍ਤੇ ਪਨ ਸਮਾਪਤ੍ਤਿਆਨੁਭਾਵੋ ਨਾਮ ਨ ਹੋਤਿ, ਤੇਨੇਵ ਨ ਨਿਰੋਧਸਮਾਪਨ੍ਨੋਤਿ ਅਨੁਯੁਞ੍ਜਤਿ.

੭੩੩-੭੩੪. ਨ ਕਾਲਂ ਕਰੇਯ੍ਯਾਤਿ ਪੁਚ੍ਛਾ ਪਰਵਾਦਿਸ੍ਸ. ਅਤ੍ਥਿ ਸੋ ਨਿਯਾਮੋਤਿ ਪਰਵਾਦਿਸ੍ਸ ਪਞ੍ਹੇ ਪਨ ਯਸ੍ਮਾ ਏਵਰੂਪੋ ਨਿਯਾਮੋ ਨਾਮ ਨਤ੍ਥਿ, ਤਸ੍ਮਾ ਪਟਿਕ੍ਖਿਪਤਿ. ਚਕ੍ਖੁਵਿਞ੍ਞਾਣਸਮਙ੍ਗੀਤਿਆਦਿ ਸਕਵਾਦਿਨਾ ‘‘ਨਿਯਾਮੇ ਅਸਨ੍ਤੇਪਿ ਮਰਣਸਮਯੇਨੇਵ ਮਰਤਿ, ਨਾਸਮਯੇਨਾ’’ਤਿ ਦਸ੍ਸੇਤੁਂ ਵੁਤ੍ਤਂ. ਤਤ੍ਰਾਯਮਧਿਪ੍ਪਾਯੋ – ਯਦਿ ਨਿਯਾਮਾਭਾਵੇਨ ਕਾਲਕਿਰਿਯਾ ਭਵੇਯ੍ਯ, ਚਕ੍ਖੁਵਿਞ੍ਞਾਣਸਮਙ੍ਗਿਨੋਪਿ ਭਵੇਯ੍ਯ. ਤਤੋ ‘‘ਪਞ੍ਚਹਿ ਵਿਞ੍ਞਾਣੇਹਿ ਨ ਚਵਤਿ, ਨ ਉਪਪਜ੍ਜਤੀ’’ਤਿ ਸੁਤ੍ਤਵਿਰੋਧੋ ਸਿਯਾ. ਯਥਾ ਪਨ ਚਕ੍ਖੁਵਿਞ੍ਞਾਣਸਮਙ੍ਗਿਸ੍ਸ ਕਾਲਕਿਰਿਯਾ ਨ ਹੋਤਿ, ਤਥਾ ਨਿਰੋਧਸਮਾਪਨ੍ਨਸ੍ਸਾਪੀਤਿ.

ਤਤਿਯਸਞ੍ਞਾਵੇਦਯਿਤਕਥਾਵਣ੍ਣਨਾ.

੧੦. ਅਸਞ੍ਞਸਤ੍ਤੁਪਿਕਾਕਥਾਵਣ੍ਣਨਾ

੭੩੫. ਇਦਾਨਿ ਅਸਞ੍ਞਸਤ੍ਤੁਪਿਕਾਕਥਾ ਨਾਮ ਹੋਤਿ. ਤਤ੍ਥ ਸਞ੍ਞਾਵਿਰਾਗਵਸੇਨ ਪਵਤ੍ਤਭਾਵਨਾ ਅਸਞ੍ਞਸਮਾਪਤ੍ਤਿਪਿ ਨਿਰੋਧਸਮਾਪਤ੍ਤਿਪਿ ਸਞ੍ਞਾਵੇਦਯਿਤਨਿਰੋਧਸਮਾਪਤ੍ਤਿ ਨਾਮ. ਇਤਿ ਦ੍ਵੇ ਸਞ੍ਞਾਵੇਦਯਿਤਨਿਰੋਧਸਮਾਪਤ੍ਤਿਯੋ ਲੋਕਿਯਾ ਚ ਲੋਕੁਤ੍ਤਰਾ ਚ. ਤਤ੍ਥ ਲੋਕਿਯਾ ਪੁਥੁਜ੍ਜਨਸ੍ਸ ਅਸਞ੍ਞਸਤ੍ਤੁਪਿਕਾ ਹੋਤਿ, ਲੋਕੁਤ੍ਤਰਾ ਅਰਿਯਾਨਂ, ਸਾ ਚ ਨਾਸਞ੍ਞਸਤ੍ਤੁਪਿਕਾ. ਇਮਂ ਪਨ ਵਿਭਾਗਂ ਅਕਤ੍ਵਾ ਅਵਿਸੇਸੇਨ ਸਞ੍ਞਾਵੇਦਯਿਤਨਿਰੋਧਸਮਾਪਤ੍ਤਿ ਅਸਞ੍ਞਸਤ੍ਤੁਪਿਕਾਤਿ ਯੇਸਂ ਲਦ੍ਧਿ, ਸੇਯ੍ਯਥਾਪਿ ਹੇਤੁਵਾਦਾਨਂ; ਤੇ ਸਨ੍ਧਾਯ ਪੁਚ੍ਛਾ ਸਕਵਾਦਿਸ੍ਸ, ਪਟਿਞ੍ਞਾ ਇਤਰਸ੍ਸ. ਅਥ ਨਂ ਯਸ੍ਮਾ ਅਸਞ੍ਞਸਮਾਪਤ੍ਤਿਂ ਸਮਾਪਨ੍ਨਸ੍ਸ ਅਲੋਭਾਦਯੋ ਅਤ੍ਥਿ, ਨ ਨਿਰੋਧਸਮਾਪਤ੍ਤਿਂ, ਤਸ੍ਮਾ ਤੇਸਂ ਵਸੇਨ ਚੋਦੇਤੁਂ ਅਤ੍ਥੀਤਿਆਦਿਮਾਹ.

੭੩੬. ਇਧਾਪਿ ਅਸਞ੍ਞੀਤਿ ਪਞ੍ਹੇ ਇਧ ਸਞ੍ਞਾਵਿਰਾਗਵਸੇਨ ਸਮਾਪਨ੍ਨਤ੍ਤਾ ਅਸਞ੍ਞਿਤਾ ਅਨੁਞ੍ਞਾਤਾ, ਤਤ੍ਰਾਪਿ ਅਸਞ੍ਞਸਤ੍ਤੇਨੇਵ. ਤਸ੍ਮਾ ਇਮਂ ਪਟਿਞ੍ਞਂ ਗਹੇਤ੍ਵਾ ਲਦ੍ਧਿਂ ਪਤਿਟ੍ਠਪੇਨ੍ਤੇਨ ਛਲੇਨ ਪਤਿਟ੍ਠਾਪਿਤਾ ਹੋਤਿ. ਇਧ ਵਾ ਨਿਰੋਧਸਮਾਪਤ੍ਤਿਂ ਸਨ੍ਧਾਯ ਅਸਞ੍ਞਿਤਾ ਅਨੁਞ੍ਞਾਤਾ. ਤਤ੍ਰਾਪਿ ਇਤੋ ਚੁਤਸ੍ਸ ਅਨਾਗਾਮਿਨੋ ਨਿਰੋਧਸਮਾਪਤ੍ਤਿਮੇਵ ਤਸ੍ਮਾਪਿ ਇਮਾਯ ਪਟਿਞ੍ਞਾਯ ਪਤਿਟ੍ਠਾਪਿਤਾ ਲਦ੍ਧਿ ਅਪ੍ਪਤਿਟ੍ਠਿਤਾਯੇਵਾਤਿ.

ਅਸਞ੍ਞਸਤ੍ਤੁਪਿਕਾਕਥਾਵਣ੍ਣਨਾ.

੧੧. ਕਮ੍ਮੂਪਚਯਕਥਾਵਣ੍ਣਨਾ

੭੩੭. ਇਦਾਨਿ ਕਮ੍ਮੂਪਚਯਕਥਾ ਨਾਮ ਹੋਤਿ. ਤਤ੍ਥ ਯੇਸਂ ਕਮ੍ਮੂਪਚਯੋ ਨਾਮ ਕਮ੍ਮਤੋ ਅਞ੍ਞੋ ਚਿਤ੍ਤਵਿਪ੍ਪਯੁਤ੍ਤੋ ਅਬ੍ਯਾਕਤੋ ਅਨਾਰਮ੍ਮਣੋਤਿ ਲਦ੍ਧਿ, ਸੇਯ੍ਯਥਾਪਿ ਅਨ੍ਧਕਾਨਞ੍ਚੇਵ ਸਮ੍ਮਿਤਿਯਾਨਞ੍ਚ; ਤੇ ਸਨ੍ਧਾਯ ਅਞ੍ਞਂ ਕਮ੍ਮਨ੍ਤਿ ਪੁਚ੍ਛਾ ਸਕਵਾਦਿਸ੍ਸ, ਪਟਿਞ੍ਞਾ ਇਤਰਸ੍ਸ. ਅਥ ਨਂ ‘‘ਯਦਿ ਕਮ੍ਮਤੋ ਅਞ੍ਞੋ ਕਮ੍ਮੂਪਚਯੋ, ਫਸ੍ਸਾਦਿਤੋਪਿ ਅਞ੍ਞੇਨ ਫਸ੍ਸੂਪਚਯਾਦਿਨਾ ਭਵਿਤਬ੍ਬ’’ਨ੍ਤਿ ਚੋਦੇਤੁਂ ਅਞ੍ਞੋ ਫਸ੍ਸੋਤਿਆਦਿਮਾਹ. ਇਤਰੋ ਲਦ੍ਧਿਯਾ ਅਭਾਵੇਨ ਪਟਿਕ੍ਖਿਪਤਿ.

੭੩੮-੭੩੯. ਕਮ੍ਮੇਨ ਸਹਜਾਤੋਤਿ ਪਞ੍ਹੇਸੁ ਚਿਤ੍ਤਵਿਪ੍ਪਯੁਤ੍ਤਂ ਸਨ੍ਧਾਯ ਪਟਿਕ੍ਖਿਪਤਿ, ਚਿਤ੍ਤਸਮ੍ਪਯੁਤ੍ਤਂ ਸਨ੍ਧਾਯ ਪਟਿਜਾਨਾਤਿ. ਕੁਸਲੋਤਿ ਪਞ੍ਹੇਸੁਪਿ ਚਿਤ੍ਤਵਿਪ੍ਪਯੁਤ੍ਤਂ ਸਨ੍ਧਾਯ ਪਟਿਜਾਨਾਤਿ. ਪਰਤੋ ਅਕੁਸਲੋਤਿਪਞ੍ਹੇਸੁਪਿ ਏਸੇਵ ਨਯੋ.

੭੪੦. ਸਾਰਮ੍ਮਣੋਤਿ ਪੁਟ੍ਠੋ ਪਨ ਏਕਨ੍ਤਂ ਅਨਾਰਮ੍ਮਣਮੇਵ ਇਚ੍ਛਤਿ, ਤਸ੍ਮਾ ਪਟਿਕ੍ਖਿਪਤਿ. ਚਿਤ੍ਤਂ ਭਿਜ੍ਜਮਾਨਨ੍ਤਿ ਯਦਾ ਚਿਤ੍ਤਂ ਭਿਜ੍ਜਮਾਨਂ ਹੋਤਿ, ਤਦਾ ਕਮ੍ਮਂ ਭਿਜ੍ਜਤੀਤਿ ਅਤ੍ਥੋ. ਭੁਮ੍ਮਤ੍ਥੇ ਵਾ ਪਚ੍ਚਤ੍ਤਂ, ਚਿਤ੍ਤੇ ਭਿਜ੍ਜਮਾਨੇਤਿ ਅਤ੍ਥੋ. ਅਯਮੇਵ ਵਾ ਪਾਠੋ. ਤਤ੍ਥ ਯਸ੍ਮਾ ਸਮ੍ਪਯੁਤ੍ਤੋ ਭਿਜ੍ਜਤਿ, ਵਿਪ੍ਪਯੁਤ੍ਤੋ ਨ ਭਿਜ੍ਜਤਿ, ਤਸ੍ਮਾ ਪਟਿਜਾਨਾਤਿ ਚੇਵ ਪਟਿਕ੍ਖਿਪਤਿ ਚ.

੭੪੧. ਕਮ੍ਮਮ੍ਹਿ ਕਮ੍ਮੂਪਚਯੋਤਿ ਕਮ੍ਮੇ ਸਤਿ ਕਮ੍ਮੂਪਚਯੋ, ਕਮ੍ਮੇ ਵਾ ਪਤਿਟ੍ਠਿਤੇ ਕਮ੍ਮੂਪਚਯੋ, ਕਮ੍ਮੂਪਚਯਤੋਵ ਵਿਪਾਕੋ ਨਿਬ੍ਬਤ੍ਤਤਿ. ਤਸ੍ਮਿਂ ਪਨ ਕਮ੍ਮੇ ਨਿਰੁਦ੍ਧੇ ਯਾਵ ਅਂਕੁਰੁਪ੍ਪਾਦਾ ਬੀਜਂ ਵਿਯ ਯਾਵ ਵਿਪਾਕੁਪ੍ਪਾਦਾ ਕਮ੍ਮੂਪਚਯੋ ਤਿਟ੍ਠਤੀਤਿਸ੍ਸ ਲਦ੍ਧਿ, ਤਸ੍ਮਾ ਪਟਿਜਾਨਾਤਿ. ਤਞ੍ਞੇਵ ਕਮ੍ਮਂ, ਸੋ ਕਮ੍ਮੂਪਚਯੋ, ਸੋ ਕਮ੍ਮਵਿਪਾਕੋਤਿ ਯਸ੍ਮਾ ਕਮ੍ਮਮ੍ਹਿ ਕਮ੍ਮੂਪਚਯੋ, ਸੋ ਚ ਯਾਵ ਵਿਪਾਕੁਪ੍ਪਾਦਾ ਤਿਟ੍ਠਤੀਤਿਸ੍ਸ ਲਦ੍ਧਿ, ਤਸ੍ਮਾ ਨਂ ਤੇਸਂ ਤਿਣ੍ਣਮ੍ਪਿ ਏਕਤ੍ਤਂ ਪੁਚ੍ਛਤਿ ਵਿਪਾਕੋ ਸਾਰਮ੍ਮਣੋਤਿ ਇਦਂ ਵਿਪਾਕੋ ਵਿਯ ਵਿਪਾਕਧਮ੍ਮਧਮ੍ਮੋਪਿ ਆਰਮ੍ਮਣਪਟਿਬਦ੍ਧੋਯੇਵਾਤਿ ਚੋਦਨਤ੍ਥਂ ਪੁਚ੍ਛਤਿ. ਇਤਰੋ ਪਨ ਲਦ੍ਧਿਵਸੇਨੇਕਂ ਪਟਿਜਾਨਾਤਿ, ਏਕਂ ਪਟਿਕ੍ਖਿਪਤਿ. ਪਟਿਲੋਮੇਪਿ ਏਸੇਵ ਨਯੋ. ਸੇਸਮੇਤ੍ਥ ਯਥਾਪਾਲ਼ਿਮੇਵ ਨਿਯ੍ਯਾਤੀਤਿ.

ਕਮ੍ਮੂਪਚਯਕਥਾਵਣ੍ਣਨਾ.

ਪਨ੍ਨਰਸਮੋ ਵਗ੍ਗੋ.

ਤਤਿਯਪਣ੍ਣਾਸਕੋ ਸਮਤ੍ਤੋ.