੯. ਧਮ੍ਮਤਣ੍ਹਾਅਬ੍ਯਾਕਤਾਤਿਕਥਾਵਣ੍ਣਨਾ

੬੭੬-੬੮੦. ਇਦਾਨਿ ਧਮ੍ਮਤਣ੍ਹਾ ਅਬ੍ਯਾਕਤਾਤਿਕਥਾ ਨਾਮ ਹੋਤਿ. ਤਤ੍ਥ ਰੂਪਤਣ੍ਹਾ…ਪੇ… ਧਮ੍ਮਤਣ੍ਹਾਤਿ ਇਮਾਸੁ ਛਸੁ ਤਣ੍ਹਾਸੁ ਯਸ੍ਮਾ ਸਬ੍ਬਪਚ੍ਛਿਮਾ ਤਣ੍ਹਾ ਧਮ੍ਮਤਣ੍ਹਾਤਿ ਵੁਤ੍ਤਾ, ਤਸ੍ਮਾ ਸਾ ਅਬ੍ਯਾਕਤਾਤਿ ਯੇਸਂ ਲਦ੍ਧਿ, ਸੇਯ੍ਯਥਾਪਿ ਪੁਬ੍ਬਸੇਲਿਯਾਨਂ; ਤੇ ਸਨ੍ਧਾਯ ਪੁਚ੍ਛਾ ਸਕਵਾਦਿਸ੍ਸ, ਪਟਿਞ੍ਞਾ ਇਤਰਸ੍ਸ. ਸੇਸਪਞ੍ਹਾਨਂ ਪਾਲ਼ਿਯਾ ਅਤ੍ਥੋ ਨਿਯ੍ਯਾਤਿ. ਕਾਮਤਣ੍ਹਾਤਿਆਦੀਹਿ ਤੀਹਿ ਕੋਟ੍ਠਾਸੇਹਿ ਛਪਿ ਤਣ੍ਹਾ ਸਙ੍ਖਿਪਿਤ੍ਵਾ ਦਸ੍ਸਿਤਾ. ਰੂਪਾਦੀਸੁ ਹਿ ਛਸੁ ਆਰਮ੍ਮਣੇਸੁ ਕਾਮਸ੍ਸਾਦਵਸੇਨ ਪਵਤ੍ਤਾ ਤਣ੍ਹਾ ਕਾਮਤਣ੍ਹਾ. ‘‘ਭਵਿਸ੍ਸਤਿ ਅਤ੍ਤਾ ਚ ਲੋਕੋ ਚਾ’’ਤਿ ਸਸ੍ਸਤਦਿਟ੍ਠਿਸਹਗਤਾ ਤਣ੍ਹਾ ਭਵਤਣ੍ਹਾ. ‘‘ਨ ਭਵਿਸ੍ਸਤੀ’’ਤਿ ਉਚ੍ਛੇਦਦਿਟ੍ਠਿਸਹਗਤਾ ਤਣ੍ਹਾ ਵਿਭਵਤਣ੍ਹਾਤਿ. ਨਨੁ ਸਾ ਧਮ੍ਮਤਣ੍ਹਾਤਿ ਪਦਂ ਤਣ੍ਹਾਯ ਧਮ੍ਮਾਰਮ੍ਮਣਂ ਆਰਬ੍ਭ ਪਵਤ੍ਤਿਂ ਦੀਪੇਤਿ, ਨ ਅਬ੍ਯਾਕਤਭਾਵਂ ਤਸ੍ਮਾ ਅਸਾਧਕਨ੍ਤਿ.

ਧਮ੍ਮਤਣ੍ਹਾ ਅਬ੍ਯਾਕਤਾਤਿਕਥਾਵਣ੍ਣਨਾ.