੧੩. ਤੇਰਸਮਵਗ੍ਗੋ

੧. ਕਪ੍ਪਟ੍ਠਕਥਾਵਣ੍ਣਨਾ

੬੫੪-੬੫੭. ਇਦਾਨਿ ਕਪ੍ਪਟ੍ਠਕਥਾ ਨਾਮ ਹੋਤਿ. ਤਤ੍ਥ ਯੇਸਂ ‘‘ਸਙ੍ਘਂ ਸਮਗ੍ਗਂ ਭੇਤ੍ਵਾਨ, ਕਪ੍ਪਂ ਨਿਰਯਮ੍ਹਿ ਪਚ੍ਚਤੀ’’ਤਿ ‘‘ਸਕਲਮ੍ਪਿ ਕਪ੍ਪਂ ਸਙ੍ਘਭੇਦਕੋ ਨਿਰਯੇ ਤਿਟ੍ਠਤੀ’’ਤਿ ਲਦ੍ਧਿ, ਸੇਯ੍ਯਥਾਪਿ ਰਾਜਗਿਰਿਕਾਨਂ; ਤੇ ਸਨ੍ਧਾਯ ਕਪ੍ਪਟ੍ਠੋਤਿ ਪੁਚ੍ਛਾ ਸਕਵਾਦਿਸ੍ਸ, ਪਟਿਞ੍ਞਾ ਇਤਰਸ੍ਸ. ਬੁਦ੍ਧੋ ਚ ਲੋਕੇਤਿ ਇਦਂ ਵਿਨਾ ਬੁਦ੍ਧੁਪ੍ਪਾਦੇਨ ਸਙ੍ਘਭੇਦਸ੍ਸ ਅਭਾਵਦਸ੍ਸਨਤ੍ਥਂ ਵੁਤ੍ਤਂ. ਕਪ੍ਪੋ ਚ ਸਣ੍ਠਾਤਿ ਸਙ੍ਘੋ ਚ ਭਿਜ੍ਜਤੀਤਿਆਦਿ ‘‘ਯਦਿ ਸੋ ਸਕਲਂ ਕਪ੍ਪਂ ਤਿਟ੍ਠਤਿ, ਸਣ੍ਠਹਨਤੋ ਪਟ੍ਠਾਯ ਤਂ ਕਮ੍ਮਂ ਕਤ੍ਵਾ ਤਤ੍ਥ ਉਪ੍ਪਜ੍ਜਿਤ੍ਵਾ ਤਿਟ੍ਠੇਯ੍ਯਾ’’ਤਿ ਦਸ੍ਸੇਤੁਂ ਵੁਤ੍ਤਂ. ਅਤੀਤਨ੍ਤਿਆਦਿ ਹੇਟ੍ਠਾ ਵੁਤ੍ਤਾਧਿਪ੍ਪਾਯਮੇਵ. ਕਪ੍ਪਟ੍ਠੋ ਇਦ੍ਧਿਮਾਤਿ ਪਞ੍ਹੇ ਭਾਵਨਾਮਯਂ ਸਨ੍ਧਾਯ ਪਟਿਕ੍ਖਿਪਤਿ, ਪਰਸਮਯੇ ਪਨਸ੍ਸ ਜਾਤਿਮਯਂ ਇਦ੍ਧਿਂ ਇਚ੍ਛਨ੍ਤਿ, ਤਂ ਸਨ੍ਧਾਯ ਪਟਿਜਾਨਾਤਿ. ਛਨ੍ਦਿਦ੍ਧਿਪਾਦੋਤਿਆਦਿ ‘‘ਜਾਤਿਮਯਾਯ ਇਦ੍ਧਿਯਾ ਇਦ੍ਧਿਮਾਤਿ ਲਦ੍ਧਿਮਤ੍ਤਮੇਤਂ, ਕਿਂ ਤੇਨ, ਯਦਿ ਪਨਸ੍ਸ ਇਦ੍ਧਿ ਅਤ੍ਥਿ, ਇਮਿਨਾ ਨਯੇਨ ਇਦ੍ਧਿਪਾਦਾ ਭਾਵਿਤਾ ਭਵੇਯ੍ਯੁ’’ਨ੍ਤਿ ਚੋਦਨਤ੍ਥਂ ਵੁਤ੍ਤਂ. ਆਪਾਯਿਕੋ ਨੇਰਯਿਕੋਤਿ ਸੁਤ੍ਤਂ ਯਂ ਸੋ ਏਕਂ ਕਪ੍ਪਂ ਅਸੀਤਿਭਾਗੇ ਕਤ੍ਵਾ ਤਤੋ ਏਕਭਾਗਮਤ੍ਤਂ ਕਾਲਂ ਤਿਟ੍ਠੇਯ੍ਯ, ਤਂ ਆਯੁਕਪ੍ਪਂ ਸਨ੍ਧਾਯ ਵੁਤ੍ਤਂ, ਤਸ੍ਮਾ ਅਸਾਧਕਨ੍ਤਿ.

ਕਪ੍ਪਟ੍ਠਕਥਾਵਣ੍ਣਨਾ.

੨. ਕੁਸਲਪਟਿਲਾਭਕਥਾਵਣ੍ਣਨਾ

੬੫੮-੬੫੯. ਇਦਾਨਿ ਕੁਸਲਪਟਿਲਾਭਕਥਾ ਨਾਮ ਹੋਤਿ. ਤਤ੍ਥ ਕਪ੍ਪਟ੍ਠੋ ਸਕਸਮਯੇ ਕਾਮਾਵਚਰਕੁਸਲਮੇਵ ਪਟਿਲਭਤਿ. ਯੇਨ ਪਨ ਤਂ ਉਪਪਤ੍ਤਿਂ ਪਟਿਬਾਹੇਯ੍ਯ, ਤਂ ਮਹਗ੍ਗਤਂ ਲੋਕੁਤ੍ਤਰਂ ਵਾ ਨ ਪਟਿਲਭਤਿ. ਯੇਸਂ ਪਨ ਇਮਂ ਵਿਭਾਗਂ ਅਕਤ੍ਵਾ ਅਵਿਸੇਸੇਨੇਵ ‘‘ਸੋ ਕੁਸਲਚਿਤ੍ਤਂ ਨ ਪਟਿਲਭਤੀ’’ਤਿ ਲਦ੍ਧਿ, ਸੇਯ੍ਯਥਾਪਿ ਉਤ੍ਤਰਾਪਥਕਾਨਂ; ਤੇਸਂ ਵਿਭਾਗਦਸ੍ਸਨੇਨ ਤਂ ਲਦ੍ਧਿਂ ਭਿਨ੍ਦਿਤੁਂ ਪੁਚ੍ਛਾ ਸਕਵਾਦਿਸ੍ਸ, ਪਟਿਞ੍ਞਾ ਇਤਰਸ੍ਸ. ਸੇਸਮੇਤ੍ਥ ਉਤ੍ਤਾਨਤ੍ਥਮੇਵਾਤਿ.

ਕੁਸਲਪਟਿਲਾਭਕਥਾਵਣ੍ਣਨਾ.

੩. ਅਨਨ੍ਤਰਾਪਯੁਤ੍ਤਕਥਾਵਣ੍ਣਨਾ

੬੬੦-੬੬੨. ਇਦਾਨਿ ਅਨਨ੍ਤਰਾਪਯੁਤ੍ਤਕਥਾ ਨਾਮ ਹੋਤਿ. ਤਤ੍ਥ ਅਨਨ੍ਤਰਾਪਯੁਤ੍ਤੋ ਨਾਮ ਯੇਨ ਖਨ੍ਧਭੇਦਤੋ ਅਨਨ੍ਤਰਾ ਵਿਪਾਕਦਾਯਕਂ ਮਾਤੁਘਾਤਾਦਿ ਆਨਨ੍ਤਰਿਯਕਮ੍ਮਂ ਆਣਤ੍ਤਂ. ਤਤ੍ਥ ਯਸ੍ਸ ਨਿਯਤਾਯ ਆਣਤ੍ਤਿਯਾ ਆਣਤ੍ਤੋ ਤਂ ਕਮ੍ਮਂ ਕਰਿਸ੍ਸਤਿ, ਸੋ ਅਤ੍ਥਸਾਧਿਕਾਯ ਚੇਤਨਾਯ ਉਪ੍ਪਾਦਿਤਤ੍ਤਾ ਮਿਚ੍ਛਤ੍ਤਨਿਯਤੋ ਹੋਤਿ, ਅਭਬ੍ਬੋ ਸਮ੍ਮਤ੍ਤਨਿਯਾਮਂ ਓਕ੍ਕਮਿਤੁਂ. ਯਸ੍ਸ ਅਨਿਯਤਾਯ ਆਣਤ੍ਤਿਯਾ ਆਣਤ੍ਤੋ ਤਂ ਕਮ੍ਮਂ ਕਰਿਸ੍ਸਤਿ, ਸੋ ਅਤ੍ਥਸਾਧਿਕਾਯ ਚੇਤਨਾਯ ਅਨੁਪ੍ਪਾਦਿਤਤ੍ਤਾ ਨ ਮਿਚ੍ਛਤ੍ਤਨਿਯਤੋ, ਭਬ੍ਬੋ ਸਮ੍ਮਤ੍ਤਨਿਯਾਮਂ ਓਕ੍ਕਮਿਤੁਨ੍ਤਿ ਇਦਂ ਸਕਸਮਯੇ ਸਨ੍ਨਿਟ੍ਠਾਨਂ. ਯੇਸਂ ਪਨ ‘‘ਅਨਿਯਤਾਯਪਿ ਆਣਤ੍ਤਿਯਾ ਅਭਬ੍ਬੋਯੇਵ ਸਮ੍ਮਤ੍ਤਨਿਯਾਮਂ ਓਕ੍ਕਮਿਤੁ’’ਨ੍ਤਿ ਲਦ੍ਧਿ, ਸੇਯ੍ਯਥਾਪਿ ਉਤ੍ਤਰਾਪਥਕਾਨਂ; ਤੇਸਂ ਤਂ ਲਦ੍ਧਿਂ ਭਿਨ੍ਦਿਤੁਂ ਸਕਵਾਦੀ ਪੁਬ੍ਬਪਕ੍ਖਂ ਦਤ੍ਵਾ ਅਨਨ੍ਤਰਾਪਯੁਤ੍ਤੋਤਿ ਪਰਵਾਦਿਨਾ ਅਤ੍ਤਾਨਂ ਪੁਚ੍ਛਾਪੇਤਿ. ਤੇਨੇਤ੍ਥ ਪਠਮਪੁਚ੍ਛਾ ਪਰਵਾਦਿਸ੍ਸ, ਅਤ੍ਥਸਾਧਿਕਚੇਤਨਾਯ ਅਭਾਵਂ ਸਨ੍ਧਾਯ ਪਟਿਞ੍ਞਾ ਸਕਵਾਦਿਸ੍ਸ. ਤਤੋ ਪਰਵਾਦੀ ਮਾਤੁਘਾਤਾਦਿਕਮ੍ਮਸ੍ਸ ਆਣਤ੍ਤਤ੍ਤਾਵ ‘‘ਸੋ ਮਿਚ੍ਛਤ੍ਤਨਿਯਤੋ’’ਤਿ ਮਞ੍ਞਤਿ. ਤਸ੍ਮਾ ਮਿਚ੍ਛਤ੍ਤਨਿਯਾਮਞ੍ਚਾਤਿ ਪਞ੍ਹਂ ਪੁਚ੍ਛਤਿ. ਸਕਵਾਦੀ ਪਨ ਏਕਸ੍ਸ ਪੁਗ੍ਗਲਸ੍ਸ ਦ੍ਵਿਨ੍ਨਂ ਨਿਯਾਮਾਨਂ ਅਨੋਕ੍ਕਨ੍ਤਿਮਤ੍ਤਮੇਵ ਸਨ੍ਧਾਯ ਨ ਹੇਵਨ੍ਤਿ ਪਟਿਕ੍ਖਿਪਤਿ.

ਨਨੁ ਤਂ ਕਮ੍ਮਨ੍ਤਿ ਮਾਤੁਘਾਤਾਦਿਕਮ੍ਮਂ. ਤਤ੍ਥ ਅਨਿਯਤਾਣਤ੍ਤਿਂ ਸਨ੍ਧਾਯ ‘‘ਆਮਨ੍ਤਾ’’ਤਿ ਪਟਿਞ੍ਞਾ ਸਕਵਾਦਿਸ੍ਸ. ਅਨਿਯਤਮ੍ਪਿ ਹਿ ਆਣਤ੍ਤਿਂ ਪਯੋਜੇਤ੍ਵਾ ਠਿਤਸ੍ਸ ‘‘ਅਨਨੁਚ੍ਛਵਿਕਂ ਮਯਾ ਕਤ’’ਨ੍ਤਿ ਕੁਕ੍ਕੁਚ੍ਚਂ ਉਪ੍ਪਜ੍ਜਤੇਵ, ਵਿਪ੍ਪਟਿਸਾਰੋ ਜਾਯਤੇਵ. ਹਞ੍ਚੀਤਿਆਦਿ ਕੁਕ੍ਕੁਚ੍ਚੁਪ੍ਪਤ੍ਤਿਮਤ੍ਤਂ ਗਹੇਤ੍ਵਾ ਪਰਵਾਦਿਨਾ ਲਦ੍ਧਿਪਤਿਟ੍ਠਾਪਨਤ੍ਥਂ ਵੁਤ੍ਤਂ.

੬੬੧. ਇਦਾਨਿ ਯਸ੍ਸ ਅਨਿਯਤਾਣਤ੍ਤਿਕਸ੍ਸਾਪਿ ਅਨਨ੍ਤਰਾਪਯੁਤ੍ਤਸ੍ਸ ਪਰਵਾਦਿਨਾ ਸਮ੍ਮਤ੍ਤਨਿਯਾਮੋਕ੍ਕਮਨਂ ਪਟਿਸਿਦ੍ਧਂ, ਤਮੇਵ ਪੁਗ੍ਗਲਂ ਗਹੇਤ੍ਵਾ ਅਨਨ੍ਤਰਾਪਯੁਤ੍ਤੋ ਪੁਗ੍ਗਲੋ ਅਭਬ੍ਬੋਤਿ ਪੁਚ੍ਛਾ ਸਕਵਾਦਿਸ੍ਸ, ਅਤ੍ਤਨੋ ਲਦ੍ਧਿਵਸੇਨ ਪਟਿਞ੍ਞਾ ਇਤਰਸ੍ਸ. ਅਥ ਨਂ ਸਕਵਾਦੀ ‘‘ਅਭਬ੍ਬੋ ਨਾਮ ਮਾਤੁਘਾਤਾਦਿਕਮ੍ਮਾਨਂ ਕਾਰਕੋ, ਕਿਂ ਤੇ ਤੇਨ ਤਾਨਿ ਕਮ੍ਮਾਨਿ ਕਤਾਨੀ’’ਤਿ ਚੋਦੇਤੁਂ ਮਾਤਾ ਜੀਵਿਤਾ ਵੋਰੋਪਿਤਾਤਿਆਦਿਮਾਹ. ਇਤਰੋ ਤੇਸਂ ਵਤ੍ਥੂਨਂ ਅਰੋਗਤਾਯ ਤਥਾਰੂਪਂ ਕਿਰਿਯਂ ਅਪਸ੍ਸਨ੍ਤੋ ‘‘ਨ ਹੇਵ’’ਨ੍ਤਿ ਪਟਿਕ੍ਖਿਪਤਿ.

ਤਂ ਕਮ੍ਮਂ ਪਟਿਸਂਹਰਿਤ੍ਵਾਤਿ ਅਨਿਯਤਾਣਤ੍ਤਿਕਮ੍ਮਂ ਸਨ੍ਧਾਯ ਵੁਤ੍ਤਂ. ਤਞ੍ਹਿ ‘‘ਮਾ ਖੋ ਮਯਾ ਆਣਤ੍ਤਂ ਆਕਾਸੀ’’ਤਿ ਆਣਤ੍ਤਂ ਨਿਵਾਰੇਨ੍ਤੇਨ ਪਟਿਸਂਹਟਂ ਨਾਮ ਹੋਤਿ. ਪਟਿਸਂਹਟਤ੍ਤਾਯੇਵ ਚੇਤ੍ਥ ਕੁਕ੍ਕੁਚ੍ਚਂ ਪਟਿਵਿਨੋਦਿਤਂ, ਵਿਪ੍ਪਟਿਸਾਰੋ ਪਟਿਵਿਨੀਤੋ ਨਾਮ ਹੋਤਿ. ਏਵਂ ਸਨ੍ਤੇਪਿ ਪਨੇਤ੍ਥ ਪੁਰਿਮਾਣਤ੍ਤਿਯਾਯੇਵ ਨਿਯਤਭਾਵਂ ਮਞ੍ਞਮਾਨੋ ਪਰਵਾਦੀ ‘‘ਆਮਨ੍ਤਾ’’ਤਿ ਪਟਿਜਾਨਾਤਿ. ਅਥ ਨਂ ਸਕਵਾਦੀ ਤਸ੍ਸ ਕਮ੍ਮਸ੍ਸ ਪਟਿਸਂਹਟਭਾਵਂ ਸਮ੍ਪਟਿਚ੍ਛਾਪੇਤ੍ਵਾ ਅਤ੍ਤਨੋ ਲਦ੍ਧਿਂ ਪਤਿਟ੍ਠਾਪੇਤ੍ਵਾ ਹਞ੍ਚੀਤਿਆਦਿਮਾਹ.

੬੬੨. ਪੁਨ ਅਨਨ੍ਤਰਾਪਯੁਤ੍ਤੋਤਿ ਪਰਿਯੋਸਾਨਪਞ੍ਹੇ ਪਠਮਪਞ੍ਹੇ ਵਿਯ ਪੁਚ੍ਛਾ ਪਰਵਾਦਿਸ੍ਸ, ਪਟਿਞ੍ਞਾ ਸਕਵਾਦਿਸ੍ਸ. ਨਨੁ ਤਂ ਕਮ੍ਮਨ੍ਤਿ ਅਨੁਯੋਗੋ ਪਰਵਾਦਿਸ੍ਸ, ਪਟਿਸਂਹਟਕਾਲਤੋ ਪੁਬ੍ਬੇ ਪਯੁਤ੍ਤਕਾਲਂ ਸਨ੍ਧਾਯ ਪਟਿਞ੍ਞਾ ਸਕਵਾਦਿਸ੍ਸ. ਪਯੁਤ੍ਤਪੁਬ੍ਬਤਾਮਤ੍ਤਂ ਗਹੇਤ੍ਵਾ ਅਨਿਯਤਾਣਤ੍ਤਿਵਸੇਨ ਹਞ੍ਚੀਤਿ ਲਦ੍ਧਿਪਤਿਟ੍ਠਾਪਨਂ ਪਰਵਾਦਿਸ੍ਸ. ਅਯਂ ਪਨ ਲਦ੍ਧਿ ਅਯੋਨਿਸੋ ਪਤਿਟ੍ਠਿਤਤ੍ਤਾ ਅਪ੍ਪਤਿਟ੍ਠਿਤਾਵ ਹੋਤੀਤਿ.

ਅਨਨ੍ਤਰਾਪਯੁਤ੍ਤਕਥਾਵਣ੍ਣਨਾ.

੪. ਨਿਯਤਸ੍ਸ ਨਿਯਾਮਕਥਾਵਣ੍ਣਨਾ

੬੬੩-੬੬੪. ਇਦਾਨਿ ਨਿਯਤਸ੍ਸ ਨਿਯਾਮਕਥਾ ਨਾਮ ਹੋਤਿ. ਤਤ੍ਥ ਦੁਵਿਧੋ ਨਿਯਾਮੋ – ਮਿਚ੍ਛਤ੍ਤਨਿਯਾਮੋ ਚ ਆਨਨ੍ਤਰਿਯਕਮ੍ਮਂ, ਸਮ੍ਮਤ੍ਤਨਿਯਾਮੋ ਚ ਅਰਿਯਮਗ੍ਗੋ. ਇਮੇ ਦ੍ਵੇ ਨਿਯਾਮੇ ਠਪੇਤ੍ਵਾ ਅਞ੍ਞੋ ਨਿਯਾਮੋ ਨਾਮ ਨਤ੍ਥਿ. ਸਬ੍ਬੇਪਿ ਹਿ ਸੇਸਾ ਤੇਭੂਮਕਧਮ੍ਮਾ ਅਨਿਯਤਾ ਨਾਮ. ਤੇਹਿ ਸਮਨ੍ਨਾਗਤੋਪਿ ਅਨਿਯਤੋਯੇਵ. ਬੁਦ੍ਧੇਹਿ ਪਨ ਅਤ੍ਤਨੋ ਞਾਣਬਲੇਨ ‘‘ਅਯਂ ਸਤ੍ਤੋ ਅਨਾਗਤੇ ਬੋਧਿਂ ਪਾਪੁਣਿਸ੍ਸਤੀ’’ਤਿ ਬ੍ਯਾਕਤੋ ਬੋਧਿਸਤ੍ਤੋ ਪੁਞ੍ਞੁਸ੍ਸਦਤ੍ਤਾ ਨਿਯਤੋਤਿ ਵੁਚ੍ਚਤਿ. ਇਤਿ ਇਮਂ ਵੋਹਾਰਮਤ੍ਤਂ ਗਹੇਤ੍ਵਾ ‘‘ਪਚ੍ਛਿਮਭਵਿਕੋ ਬੋਧਿਸਤ੍ਤੋ ਤਾਯ ਜਾਤਿਯਾ ਭਬ੍ਬੋ ਧਮ੍ਮਂ ਅਭਿਸਮੇਤੁ’’ਨ੍ਤਿ ਅਧਿਪ੍ਪਾਯੇਨ ‘‘ਨਿਯਤੋ ਨਿਯਾਮਂ ਓਕ੍ਕਮਤੀ’’ਤਿ ਯੇਸਂ ਲਦ੍ਧਿ, ਸੇਯ੍ਯਥਾਪਿ ਪੁਬ੍ਬਸੇਲਿਯਾਪਰਸੇਲਿਯਾਨਂ; ਤੇ ਸਨ੍ਧਾਯ ਪੁਚ੍ਛਾ ਸਕਵਾਦਿਸ੍ਸ, ਪਟਿਞ੍ਞਾ ਇਤਰਸ੍ਸ. ਮਿਚ੍ਛਤ੍ਤਨਿਯਤੋਤਿਆਦਿ ਅਞ੍ਞੇਨ ਨਿਯਾਮੇਨ ਨਿਯਤਸ੍ਸ ਅਞ੍ਞਨਿਯਾਮਾਭਾਵਦਸ੍ਸਨਤ੍ਥਂ ਵੁਤ੍ਤਂ. ਪੁਬ੍ਬੇ ਮਗ੍ਗਂ ਭਾਵੇਤ੍ਵਾਤਿਆਦਿ ਨਿਯਾਮਪ੍ਪਭੇਦਦਸ੍ਸਨਤ੍ਥਂ ਵੁਤ੍ਤਂ. ਸਤਿਪਟ੍ਠਾਨਨ੍ਤਿਆਦਿ ਏਕਸ੍ਮਿਮ੍ਪਿ ਨਿਯਾਮੇ ਧਮ੍ਮਪ੍ਪਭੇਦਦਸ੍ਸਨਤ੍ਥਂ ਵੁਤ੍ਤਂ. ਭਬ੍ਬੋ ਬੋਧਿਸਤ੍ਤੋਤਿ ਵਚਨਂ ਕੇਵਲਂ ਬੋਧਿਸਤ੍ਤਸ੍ਸ ਭਬ੍ਬਤਂ ਦੀਪੇਤਿ, ਨ ਨਿਯਤਸ੍ਸ ਨਿਯਾਮੋਕ੍ਕਮਨਂ, ਤਸ੍ਮਾ ਅਸਾਧਕਂ. ਸੋ ਹਿ ਪੁਬ੍ਬੇ ਏਕੇਨਪਿ ਨਿਯਤਧਮ੍ਮੇਨ ਅਨਿਯਤੋ ਬੋਧਿਮੂਲੇ ਸਚ੍ਚਦਸ੍ਸਨੇਨ ਨਿਯਾਮਂ ਓਕ੍ਕਨ੍ਤੋਤਿ.

ਨਿਯਤਸ੍ਸ ਨਿਯਾਮਕਥਾਵਣ੍ਣਨਾ.

੫. ਨਿਵੁਤਕਥਾਵਣ੍ਣਨਾ

੬੬੫-੬੬੭. ਇਦਾਨਿ ਨਿਵੁਤਕਥਾ ਨਾਮ ਹੋਤਿ. ਤਤ੍ਥ ਸੁਦ੍ਧਸ੍ਸ ਸੁਦ੍ਧਕਿਚ੍ਚਾਭਾਵਤੋ ਨੀਵਰਣੇਹਿ ਨਿਵੁਤੋ ਓਫੁਟੋ ਪਰਿਯੋਨਦ੍ਧੋ ਚ ਨੀਵਰਣਂ ਜਹਤੀਤਿ ਯੇਸਂ ਲਦ੍ਧਿ, ਸੇਯ੍ਯਥਾਪਿ ਉਤ੍ਤਰਾਪਥਕਾਨਂ; ਤੇ ਸਨ੍ਧਾਯ ਨਿਵੁਤੋਤਿਪੁਚ੍ਛਾ ਸਕਵਾਦਿਸ੍ਸ, ਪਟਿਞ੍ਞਾ ਇਤਰਸ੍ਸ. ਰਤ੍ਤੋ ਰਾਗਨ੍ਤਿਆਦਿ ਨਿਵੁਤਸ੍ਸ ਨੀਵਰਣਜਹਨੇ ਦੋਸਦਸ੍ਸਨਤ੍ਥਂ ਵੁਤ੍ਤਂ. ਪਰਿਸੁਦ੍ਧੇ ਪਰਿਯੋਦਾਤੇਤਿਆਦਿ ਵਿਕ੍ਖਮ੍ਭਨਵਿਸੁਦ੍ਧਿਯਾ ਵਿਸੁਦ੍ਧਸ੍ਸ ਸਮੁਚ੍ਛੇਦਵਿਸੁਦ੍ਧਿਦਸ੍ਸਨਤ੍ਥਂ ਵੁਤ੍ਤਂ. ਤਸ੍ਸ ਏਵਂ ਜਾਨਤੋਤਿਆਦਿ ਜਾਨਤੋ ਪਸ੍ਸਤੋ ਆਸਵਕ੍ਖਯਂ ਦੀਪੇਤਿ, ਨ ਨਿਵੁਤਸ੍ਸ ਨੀਵਰਣਜਹਨਂ, ਤਸ੍ਮਾ ਅਸਾਧਕਨ੍ਤਿ.

ਨਿਵੁਤਕਥਾਵਣ੍ਣਨਾ.

੬. ਸਮ੍ਮੁਖੀਭੂਤਕਥਾਵਣ੍ਣਨਾ

੬੬੮-੬੭੦. ਇਦਾਨਿ ਸਮ੍ਮੁਖੀਭੂਤਕਥਾ ਨਾਮ ਹੋਤਿ. ਤਤ੍ਥ ਸਮ੍ਮੁਖੀਭੂਤੋਤਿ ਸਂਯੋਜਨਾਨਂ ਸਮ੍ਮੁਖੀਭਾਵਂ ਤੇਹਿ ਸਮਙ੍ਗੀਭਾਵਂ ਉਪਗਤੋ. ਸੇਸਮੇਤ੍ਥ ਨਿਵੁਤਕਥਾਸਦਿਸਮੇਵਾਤਿ.

ਸਮ੍ਮੁਖੀਭੂਤਕਥਾਵਣ੍ਣਨਾ.

੭. ਸਮਾਪਨ੍ਨੋ ਅਸ੍ਸਾਦੇਤੀਤਿਕਥਾਵਣ੍ਣਨਾ

੬੭੧-੬੭੩. ਇਦਾਨਿ ਸਮਾਪਨ੍ਨੋ ਅਸ੍ਸਾਦੇਤੀਤਿਕਥਾ ਨਾਮ ਹੋਤਿ. ਤਤ੍ਥ ‘‘ਪਠਮਂ ਝਾਨਂ ਉਪਸਮ੍ਪਜ੍ਜ ਵਿਹਰਤਿ, ਸੋ ਤਦਸ੍ਸਾਦੇਤੀ’’ਤਿਆਦਿਵਚਨਂ (ਅ. ਨਿ. ੪.੧੨੩) ਨਿਸ੍ਸਾਯ ‘‘ਸਮਾਪਨ੍ਨੋ ਅਸ੍ਸਾਦੇਤਿ, ਸਾ ਚਸ੍ਸ ਝਾਨਨਿਕਨ੍ਤਿ ਝਾਨਾਰਮ੍ਮਣਾ ਹੋਤੀ’’ਤਿ ਯੇਸਂ ਲਦ੍ਧਿ, ਸੇਯ੍ਯਥਾਪਿ ਅਨ੍ਧਕਾਨਂ, ਤੇ ਸਨ੍ਧਾਯ ਸਮਾਪਨ੍ਨੋਤਿ ਪੁਚ੍ਛਾ ਸਕਵਾਦਿਸ੍ਸ, ਪਟਿਞ੍ਞਾ ਇਤਰਸ੍ਸ. ਤਂ ਝਾਨਂ ਤਸ੍ਸ ਝਾਨਸ੍ਸ ਆਰਮ੍ਮਣਨ੍ਤਿ ਪਞ੍ਹੇਸੁ ਤਸ੍ਸੇਵ ਤਦਾਰਮ੍ਮਣਤਂ ਅਪਸ੍ਸਨ੍ਤੋ ਸੁਤ੍ਤਵਿਰੋਧਭਯੇਨ ਪਟਿਕ੍ਖਿਪਤਿ, ‘‘ਤਦਸ੍ਸਾਦੇਤੀ’’ਤਿਵਚਨਮਤ੍ਤੇਨ ਪਟਿਜਾਨਾਤਿ. ਸੋ ਤਦਸ੍ਸਾਦੇਤੀਤਿ ਸੁਤ੍ਤਂ ਝਾਨਲਾਭਿਨੋ ਝਾਨਾ ਵੁਟ੍ਠਾਯ ਝਾਨਸ੍ਸਾਦਂ ਸਾਧੇਤਿ, ਨ ਅਨ੍ਤੋਸਮਾਪਤ੍ਤਿਯਂਯੇਵ ਝਾਨਨਿਕਨ੍ਤਿਯਾ ਝਾਨਾਰਮ੍ਮਣਤਂ, ਤਸ੍ਮਾ ਅਸਾਧਕਨ੍ਤਿ.

ਸਮਾਪਨ੍ਨੋ ਅਸ੍ਸਾਦੇਤੀਤਿਕਥਾਵਣ੍ਣਨਾ.

੮. ਅਸਾਤਰਾਗਕਥਾਵਣ੍ਣਨਾ

੬੭੪. ਇਦਾਨਿ ਅਸਾਤਰਾਗਕਥਾ ਨਾਮ ਹੋਤਿ. ਤਤ੍ਥ ‘‘ਯਂਕਿਞ੍ਚਿ ਵੇਦਨਂ ਵੇਦੇਤਿ ਸੁਖਂ ਵਾ ਦੁਕ੍ਖਂ ਵਾ ਅਦੁਕ੍ਖਮਸੁਖਂ ਵਾ, ਸੋ ਤਂ ਵੇਦਨਂ ਅਭਿਨਨ੍ਦਤਿ ਅਭਿਵਦਤੀ’’ਤਿ (ਮ. ਨਿ. ੧.੪੦੯) ਸੁਤ੍ਤੇ ਦਿਟ੍ਠਾਭਿਨਨ੍ਦਨਵਸੇਨ ਵੁਤ੍ਤਂ. ‘‘ਅਭਿਨਨ੍ਦਤੀ’’ਤਿਵਚਨਂ ਨਿਸ੍ਸਾਯ ‘‘ਦੁਕ੍ਖਵੇਦਨਾਯਪਿ ਰਾਗਸ੍ਸਾਦਵਸੇਨ ਅਭਿਨਨ੍ਦਨਾ ਹੋਤਿ. ਤਸ੍ਮਾ ਅਤ੍ਥਿ ਅਸਾਤਰਾਗੋ’’ਤਿ ਯੇਸਂ ਲਦ੍ਧਿ, ਸੇਯ੍ਯਥਾਪਿ ਉਤ੍ਤਰਾਪਥਕਾਨਂ; ਤੇ ਸਨ੍ਧਾਯ ਅਤ੍ਥਿ ਅਸਾਤਰਾਗੋਤਿ ਪੁਚ੍ਛਾ ਸਕਵਾਦਿਸ੍ਸ. ਤਤ੍ਥ ਅਸਾਤਰਾਗੋਤਿ ਅਸਾਤੇ ਦੁਕ੍ਖਵੇਦਯਿਤੇ ‘‘ਅਹੋ ਵਤ ਮੇ ਏਤਦੇਵ ਭਵੇਯ੍ਯਾ’’ਤਿ ਰਜ੍ਜਨਾ. ਆਮਨ੍ਤਾਤਿ ਲਦ੍ਧਿਵਸੇਨ ਪਟਿਞ੍ਞਾ ਇਤਰਸ੍ਸ. ਸੇਸਮੇਤ੍ਥ ਉਤ੍ਤਾਨਤ੍ਥਮੇਵ.

੬੭੫. ਸੋ ਤਂ ਵੇਦਨਂ ਅਭਿਨਨ੍ਦਤੀਤਿ ਸੁਤ੍ਤੇ ਪਨ ਵਿਨਿਵਟ੍ਟੇਤ੍ਵਾ ਦੁਕ੍ਖਵੇਦਨਮੇਵ ਆਰਬ੍ਭ ਰਾਗੁਪ੍ਪਤ੍ਤਿ ਨਾਮ ਨਤ੍ਥਿ, ਸਮੂਹਗ੍ਗਹਣੇਨ ਪਨ ਵੇਦਯਿਤਲਕ੍ਖਣਂ ਧਮ੍ਮਂ ਦੁਕ੍ਖਵੇਦਨਮੇਵ ਵਾ ਅਤ੍ਤਤੋ ਸਮਨੁਪਸ੍ਸਨ੍ਤੋ ਦਿਟ੍ਠਿਮਞ੍ਞਨਾਸਙ੍ਖਾਤਾਯ ਦਿਟ੍ਠਾਭਿਨਨ੍ਦਨਾਯ ਵੇਦਨਂ ਅਭਿਨਨ੍ਦਤਿ, ਦੁਕ੍ਖਾਯ ਵੇਦਨਾਯ ਵਿਪਰਿਣਾਮਂ ਅਭਿਨਨ੍ਦਤਿ, ਦੁਕ੍ਖਾਯ ਵੇਦਨਾਯ ਅਭਿਭੂਤੋ ਤਸ੍ਸਾ ਪਟਿਪਕ੍ਖਂ ਕਾਮਸੁਖਂ ਪਤ੍ਥਯਨ੍ਤੋਪਿ ਦੁਕ੍ਖਵੇਦਨਂ ਅਭਿਨਨ੍ਦਤਿ ਨਾਮ. ਏਵਂ ਦੁਕ੍ਖਵੇਦਨਾਯ ਅਭਿਨਨ੍ਦਨਾ ਹੋਤੀਤਿ ਅਧਿਪ੍ਪਾਯੋ. ਤਸ੍ਮਾ ਅਸਾਧਕਮੇਤਂ ਅਸਾਤਰਾਗਸ੍ਸਾਤਿ.

ਅਸਾਤਰਾਗਕਥਾਵਣ੍ਣਨਾ.

੯. ਧਮ੍ਮਤਣ੍ਹਾਅਬ੍ਯਾਕਤਾਤਿਕਥਾਵਣ੍ਣਨਾ

੬੭੬-੬੮੦. ਇਦਾਨਿ ਧਮ੍ਮਤਣ੍ਹਾ ਅਬ੍ਯਾਕਤਾਤਿਕਥਾ ਨਾਮ ਹੋਤਿ. ਤਤ੍ਥ ਰੂਪਤਣ੍ਹਾ…ਪੇ… ਧਮ੍ਮਤਣ੍ਹਾਤਿ ਇਮਾਸੁ ਛਸੁ ਤਣ੍ਹਾਸੁ ਯਸ੍ਮਾ ਸਬ੍ਬਪਚ੍ਛਿਮਾ ਤਣ੍ਹਾ ਧਮ੍ਮਤਣ੍ਹਾਤਿ ਵੁਤ੍ਤਾ, ਤਸ੍ਮਾ ਸਾ ਅਬ੍ਯਾਕਤਾਤਿ ਯੇਸਂ ਲਦ੍ਧਿ, ਸੇਯ੍ਯਥਾਪਿ ਪੁਬ੍ਬਸੇਲਿਯਾਨਂ; ਤੇ ਸਨ੍ਧਾਯ ਪੁਚ੍ਛਾ ਸਕਵਾਦਿਸ੍ਸ, ਪਟਿਞ੍ਞਾ ਇਤਰਸ੍ਸ. ਸੇਸਪਞ੍ਹਾਨਂ ਪਾਲ਼ਿਯਾ ਅਤ੍ਥੋ ਨਿਯ੍ਯਾਤਿ. ਕਾਮਤਣ੍ਹਾਤਿਆਦੀਹਿ ਤੀਹਿ ਕੋਟ੍ਠਾਸੇਹਿ ਛਪਿ ਤਣ੍ਹਾ ਸਙ੍ਖਿਪਿਤ੍ਵਾ ਦਸ੍ਸਿਤਾ. ਰੂਪਾਦੀਸੁ ਹਿ ਛਸੁ ਆਰਮ੍ਮਣੇਸੁ ਕਾਮਸ੍ਸਾਦਵਸੇਨ ਪਵਤ੍ਤਾ ਤਣ੍ਹਾ ਕਾਮਤਣ੍ਹਾ. ‘‘ਭਵਿਸ੍ਸਤਿ ਅਤ੍ਤਾ ਚ ਲੋਕੋ ਚਾ’’ਤਿ ਸਸ੍ਸਤਦਿਟ੍ਠਿਸਹਗਤਾ ਤਣ੍ਹਾ ਭਵਤਣ੍ਹਾ. ‘‘ਨ ਭਵਿਸ੍ਸਤੀ’’ਤਿ ਉਚ੍ਛੇਦਦਿਟ੍ਠਿਸਹਗਤਾ ਤਣ੍ਹਾ ਵਿਭਵਤਣ੍ਹਾਤਿ. ਨਨੁ ਸਾ ਧਮ੍ਮਤਣ੍ਹਾਤਿ ਪਦਂ ਤਣ੍ਹਾਯ ਧਮ੍ਮਾਰਮ੍ਮਣਂ ਆਰਬ੍ਭ ਪਵਤ੍ਤਿਂ ਦੀਪੇਤਿ, ਨ ਅਬ੍ਯਾਕਤਭਾਵਂ ਤਸ੍ਮਾ ਅਸਾਧਕਨ੍ਤਿ.

ਧਮ੍ਮਤਣ੍ਹਾ ਅਬ੍ਯਾਕਤਾਤਿਕਥਾਵਣ੍ਣਨਾ.

੧੦. ਧਮ੍ਮਤਣ੍ਹਾਨਦੁਕ੍ਖਸਮੁਦਯੋਤਿਕਥਾਵਣ੍ਣਨਾ

੬੮੧-੬੮੫. ਇਦਾਨਿ ਧਮ੍ਮਤਣ੍ਹਾ ਨਦੁਕ੍ਖਸਮੁਦਯੋਤਿਕਥਾ ਨਾਮ ਹੋਤਿ. ਤਤ੍ਰਾਪਿ ਯਸ੍ਮਾ ਸਾ ਧਮ੍ਮਤਣ੍ਹਾਤਿ ਵੁਤ੍ਤਾ, ਤਸ੍ਮਾ ਨ ਦੁਕ੍ਖਸਮੁਦਯੋਤਿ ਯੇਸਂ ਲਦ੍ਧਿ, ਸੇਯ੍ਯਥਾਪਿ ਪੁਬ੍ਬਸੇਲਿਯਾਨਂਯੇਵ; ਤੇ ਸਨ੍ਧਾਯ ਪੁਚ੍ਛਾ ਸਕਵਾਦਿਸ੍ਸ, ਪਟਿਞ੍ਞਾ ਇਤਰਸ੍ਸ. ਸੇਸਂ ਪੁਰਿਮਕਥਾਸਦਿਸਮੇਵਾਤਿ.

ਧਮ੍ਮਤਣ੍ਹਾ ਨਦੁਕ੍ਖਸਮੁਦਯੋਤਿਕਥਾਵਣ੍ਣਨਾ.

ਤੇਰਸਮੋ ਵਗ੍ਗੋ.