੯. ਧਮ੍ਮਟ੍ਠਿਤਤਾਕਥਾਵਣ੍ਣਨਾ

੬੨੭. ਇਦਾਨਿ ਧਮ੍ਮਟ੍ਠਿਤਤਾਕਥਾ ਨਾਮ ਹੋਤਿ. ਤਤ੍ਥ ‘‘ਠਿਤਾਵ ਸਾ ਧਾਤੂ’’ਤਿ ਵਚਨਂ ਨਿਸ੍ਸਾਯ ‘‘ਪਟਿਚ੍ਚਸਮੁਪ੍ਪਾਦਸਙ੍ਖਾਤਾ ਧਮ੍ਮਟ੍ਠਿਤਤਾ ਨਾਮ ਏਕਾ ਅਤ੍ਥਿ, ਸਾ ਚ ਪਰਿਨਿਪ੍ਫਨ੍ਨਾ’’ਤਿ ਯੇਸਂ ਲਦ੍ਧਿ, ਸੇਯ੍ਯਥਾਪਿ ਅਨ੍ਧਕਾਨਂ; ਤੇ ਸਨ੍ਧਾਯ ਪੁਚ੍ਛਾ ਸਕਵਾਦਿਸ੍ਸ, ਪਟਿਞ੍ਞਾ ਇਤਰਸ੍ਸ. ਅਥ ਨਂ ‘‘ਯਦਿ ਪਰਿਨਿਪ੍ਫਨ੍ਨਾਨਂ ਅਵਿਜ੍ਜਾਦੀਨਂ ਅਞ੍ਞਾ ਧਮ੍ਮਟ੍ਠਿਤਤਾ ਨਾਮ ਪਰਿਨਿਪ੍ਫਨ੍ਨਾ ਅਤ੍ਥਿ, ਤਾਯਪਿ ਚ ਤੇ ਧਮ੍ਮਟ੍ਠਿਤਤਾਯ ਅਞ੍ਞਾ ਠਿਤਤਾ ਪਰਿਨਿਪ੍ਫਨ੍ਨਾ ਆਪਜ੍ਜਤੀ’’ਤਿ ਚੋਦੇਤੁਂ ਤਾਯ ਠਿਤਤਾਤਿਆਦਿਮਾਹ. ਪਰਵਾਦੀ ਏਵਰੂਪਾਯ ਲਦ੍ਧਿਯਾ ਅਭਾਵੇਨ ਪਟਿਕ੍ਖਿਪਤਿ. ਦੁਤਿਯਂ ਪੁਟ੍ਠੋ ਅਨਨ੍ਤਰਪਚ੍ਚਯਤਞ੍ਚੇਵ ਅਞ੍ਞਮਞ੍ਞਪਚ੍ਚਯਤਞ੍ਚ ਸਨ੍ਧਾਯ ਪਟਿਜਾਨਾਤਿ. ਸੇਸਂ ਹੇਟ੍ਠਾ ਵੁਤ੍ਤਨਯਤ੍ਤਾ ਉਤ੍ਤਾਨਤ੍ਥਮੇਵਾਤਿ.

ਧਮ੍ਮਟ੍ਠਿਤਤਾਕਥਾਵਣ੍ਣਨਾ.