੧੦. ਅਨਿਚ੍ਚਤਾਕਥਾਵਣ੍ਣਨਾ

੬੨੮. ਇਦਾਨਿ ਅਨਿਚ੍ਚਤਾਕਥਾ ਨਾਮ ਹੋਤਿ. ਤਤ੍ਥ ‘‘ਅਨਿਚ੍ਚਾਨਂ ਰੂਪਾਦੀਨਂ ਅਨਿਚ੍ਚਤਾਪਿ ਰੂਪਾਦਯੋ ਵਿਯ ਪਰਿਨਿਪ੍ਫਨ੍ਨਾ’’ਤਿ ਯੇਸਂ ਲਦ੍ਧਿ, ਸੇਯ੍ਯਥਾਪਿ ਅਨ੍ਧਕਾਨਂ; ਤੇ ਸਨ੍ਧਾਯ ਪੁਚ੍ਛਾ ਸਕਵਾਦਿਸ੍ਸ, ਪਟਿਞ੍ਞਾ ਇਤਰਸ੍ਸ. ਅਥ ਨਂ ‘‘ਯਦਿ ਤੇ ਰੂਪਾਦਯੋ ਵਿਯ ਅਨਿਚ੍ਚਤਾ ਪਰਿਨਿਪ੍ਫਨ੍ਨਾ, ਤਸ੍ਸਾਪਿ ਅਞ੍ਞਾਯ ਪਰਿਨਿਪ੍ਫਨ੍ਨਾਯ ਅਨਿਚ੍ਚਤਾਯ ਭਵਿਤਬ੍ਬ’’ਨ੍ਤਿ ਚੋਦੇਤੁਂ ਤਾਯ ਅਨਿਚ੍ਚਤਾਯਾਤਿਆਦਿਮਾਹ. ਇਤਰੋ ਦ੍ਵਿਨ੍ਨਂ ਅਨਿਚ੍ਚਤਾਯ ਏਕਤੋ ਅਭਾਵੇਨ ਪਟਿਕ੍ਖਿਪਿਤ੍ਵਾ ਪੁਨ ਯਸ੍ਮਾ ਸਾ ਅਨਿਚ੍ਚਤਾ ਨਿਚ੍ਚਾ ਨ ਹੋਤਿ, ਤੇਨੇਵ ਅਨਿਚ੍ਚੇਨ ਸਦ੍ਧਿਂ ਅਨ੍ਤਰਧਾਯਤਿ, ਤਸ੍ਮਾ ਪਟਿਜਾਨਾਤਿ. ਅਥਸ੍ਸ ਸਕਵਾਦੀ ਲੇਸੋਕਾਸਂ ਅਦਤ੍ਵਾ ਯਾ ਤੇਨ ਦੁਤਿਯਾ ਅਨਿਚ੍ਚਤਾ ਪਟਿਞ੍ਞਾਤਾ, ਤਾਯਪਿ ਤਤੋ ਪਰਾਯਪੀਤਿ ਪਰਮ੍ਪਰਵਸੇਨ ਅਨੁਪਚ੍ਛੇਦਦੋਸਂ ਆਰੋਪੇਨ੍ਤੋ ਤਾਯ ਤਾਯੇਵਾਤਿਆਦਿਮਾਹ. ਜਰਾ ਪਰਿਨਿਪ੍ਫਨ੍ਨਾਤਿਆਦਿ ਯਸ੍ਮਾ ਉਪ੍ਪਨ੍ਨਸ੍ਸ ਜਰਾਮਰਣਤੋ ਅਞ੍ਞਾ ਅਨਿਚ੍ਚਤਾ ਨਾਮ ਨਤ੍ਥਿ, ਤਸ੍ਮਾ ਅਨਿਚ੍ਚਤਾਵਿਭਾਗਾਨੁਯੁਞ੍ਜਨਵਸੇਨ ਵੁਤ੍ਤਂ. ਤਤ੍ਰਾਪਿ ਪਰਵਾਦਿਨੋ ਪੁਰਿਮਨਯੇਨੇਵ ਪਟਿਞ੍ਞਾ ਚ ਪਟਿਕ੍ਖੇਪੋ ਚ ਵੇਦਿਤਬ੍ਬੋ.

੬੨੯. ਰੂਪਂ ਪਰਿਨਿਪ੍ਫਨ੍ਨਨ੍ਤਿਆਦਿ ਯੇਸਂ ਸਾ ਅਨਿਚ੍ਚਤਾ, ਤੇਹਿ ਸਦ੍ਧਿਂ ਸਂਸਨ੍ਦਨਤ੍ਥਂ ਵੁਤ੍ਤਂ. ਤਤ੍ਥ ‘‘ਯਥਾ ਪਰਿਨਿਪ੍ਫਨ੍ਨਾਨਂ ਰੂਪਾਦੀਨਂ ਅਨਿਚ੍ਚਤਾਜਰਾਮਰਣਾਨਿ ਅਤ੍ਥਿ, ਏਵਂ ਪਰਿਨਿਪ੍ਫਨ੍ਨਾਨਂ ਅਨਿਚ੍ਚਤਾਦੀਨਂ ਤਾਨਿ ਨਤ੍ਥੀ’’ਤਿ ਮਞ੍ਞਮਾਨੋ ਏਕਨ੍ਤੇਨ ਪਟਿਕ੍ਖਿਪਤਿਯੇਵਾਤਿ.

ਅਨਿਚ੍ਚਤਾਕਥਾਵਣ੍ਣਨਾ.

ਏਕਾਦਸਮੋ ਵਗ੍ਗੋ.