੪. ਞਾਣਕਥਾਵਣ੍ਣਨਾ

੬੧੪-੬੧੫. ਇਦਾਨਿ ਞਾਣਕਥਾ ਨਾਮ ਹੋਤਿ. ਤਤ੍ਥ ਮਗ੍ਗਞਾਣੇਨ ਅਞ੍ਞਾਣੇ ਵਿਗਤੇਪਿ ਪੁਨ ਚਕ੍ਖੁਵਿਞ੍ਞਾਣਾਦਿਵਸੇਨ ਞਾਣਵਿਪ੍ਪਯੁਤ੍ਤਚਿਤ੍ਤੇ ਵਤ੍ਤਮਾਨੇ ਯਸ੍ਮਾ ਤਂ ਮਗ੍ਗਚਿਤ੍ਤਂ ਨ ਪਵਤ੍ਤਤਿ, ਤਸ੍ਮਾ ‘‘ਨ ਵਤ੍ਤਬ੍ਬਂ ਞਾਣੀ’’ਤਿ ਯੇਸਂ ਲਦ੍ਧਿ, ਸੇਯ੍ਯਥਾਪਿ ਮਹਾਸਂਘਿਕਾਨਂ; ਤੇ ਸਨ੍ਧਾਯ ਪੁਚ੍ਛਾ ਸਕਵਾਦਿਸ੍ਸ, ਪਟਿਞ੍ਞਾ ਇਤਰਸ੍ਸ. ਅਥ ਨਂ ‘‘ਯਦਿ ਅਞ੍ਞਾਣੇ ਵਿਗਤੇ ‘ਞਾਣੀ’ਤਿ ਪਞ੍ਞਤ੍ਤਿ ਨ ਸਿਯਾ, ਰਾਗਾਦੀਸੁ ਵਿਗਤੇਸੁ ਵੀਤਰਾਗਾਦਿਪਞ੍ਞਤ੍ਤਿਪਿ ਨ ਸਿਯਾਤਿ ਪੁਗ੍ਗਲਪਞ੍ਞਤ੍ਤਿਯਂ ਅਕੋਵਿਦੋਸੀ’’ਤਿ ਚੋਦੇਤੁਂ ਰਾਗੇ ਵਿਗਤੇਤਿਆਦਿਮਾਹ. ਇਤਰੋ ਤੇਸੁ ਵਿਗਤੇਸੁ ਸਰਾਗਾਦਿਭਾਵੇ ਯੁਤ੍ਤਿਂ ਅਪਸ੍ਸਨ੍ਤੋ ਪਟਿਕ੍ਖਿਪਤਿ. ਪਰਿਯੋਸਾਨੇ ਯਸ੍ਮਾ ਞਾਣਪਟਿਲਾਭੇਨ ਸੋ ਞਾਣੀਤਿ ਵਤ੍ਤਬ੍ਬਤਂ ਅਰਹਤਿ, ਤਸ੍ਮਾ ਨ ਹੇਵਨ੍ਤਿ ਪਟਿਕ੍ਖੇਪੋ ਸਕਵਾਦਿਸ੍ਸਾਤਿ.

ਞਾਣਕਥਾਵਣ੍ਣਨਾ.