੫. ਞਾਣਂ ਚਿਤ੍ਤਵਿਪ੍ਪਯੁਤ੍ਤਨ੍ਤਿਕਥਾਵਣ੍ਣਨਾ

੬੧੬-੬੧੭. ਇਦਾਨਿ ਞਾਣਂ ਚਿਤ੍ਤਵਿਪ੍ਪਯੁਤ੍ਤਨ੍ਤਿਕਥਾ ਨਾਮ ਹੋਤਿ. ਤਤ੍ਥ ਯਸ੍ਮਾ ਅਰਹਾ ਚਕ੍ਖੁਵਿਞ੍ਞਾਣਾਦਿਸਮਙ੍ਗੀ ਪਟਿਲਦ੍ਧਂ ਮਗ੍ਗਞਾਣਂ ਸਨ੍ਧਾਯ ‘‘ਞਾਣੀ’’ਤਿ ਵੁਚ੍ਚਤਿ, ਨ ਚਸ੍ਸ ਤਂ ਤੇਨ ਚਿਤ੍ਤੇਨ ਸਮ੍ਪਯੁਤ੍ਤਂ, ਤਸ੍ਮਾ ‘‘ਞਾਣਂ ਚਿਤ੍ਤਵਿਪ੍ਪਯੁਤ੍ਤ’’ਨ੍ਤਿ ਯੇਸਂ ਲਦ੍ਧਿ, ਸੇਯ੍ਯਥਾਪਿ ਪੁਬ੍ਬਸੇਲਿਯਾਨਂ; ਤੇ ਸਨ੍ਧਾਯ ਪੁਚ੍ਛਾ ਸਕਵਾਦਿਸ੍ਸ, ਪਟਿਞ੍ਞਾ ਇਤਰਸ੍ਸ. ਅਥ ਨਂ ‘‘ਯਦਿ ਤੇ ਞਾਣਂ ਚਿਤ੍ਤਵਿਪ੍ਪਯੁਤ੍ਤਂ ਚਿਤ੍ਤਵਿਪ੍ਪਯੁਤ੍ਤੇਸੁ ਰੂਪਾਦੀਸੁ ਅਞ੍ਞਤਰਂ ਸਿਯਾ’’ਤਿ ਚੋਦੇਤੁਂ ਰੂਪਨ੍ਤਿਆਦਿਮਾਹ. ਇਤਰੋ ਪਟਿਕ੍ਖਿਪਤਿ. ਸੇਸਂ ਹੇਟ੍ਠਾ ਵੁਤ੍ਤਨਯਮੇਵ. ਪਰਿਯੋਸਾਨੇ ਪਨ ਪਞ੍ਞਵਾਤਿ ਪੁਟ੍ਠੋ ਪਟਿਲਾਭਵਸੇਨ ਤਂ ਪਵਤ੍ਤਿਂ ਇਚ੍ਛਤਿ, ਤਸ੍ਮਾ ਪਟਿਜਾਨਾਤੀਤਿ.

ਞਾਣਂ ਚਿਤ੍ਤਵਿਪ੍ਪਯੁਤ੍ਤਨ੍ਤਿਕਥਾਵਣ੍ਣਨਾ.