੫. ਰੂਪਧਾਤੁਕਥਾਵਣ੍ਣਨਾ

੫੧੫-੫੧੬. ਇਦਾਨਿ ਰੂਪਧਾਤੁਕਥਾ ਨਾਮ ਹੋਤਿ. ਤਤ੍ਥ ‘‘ਰੂਪਿਨੋ ਧਮ੍ਮਾ ਰੂਪਧਾਤੁ ਨਾਮਾ’’ਤਿ ਯੇਸਂ ਲਦ੍ਧਿ, ਸੇਯ੍ਯਥਾਪਿ ਅਨ੍ਧਕਾਨਂ; ਤੇ ਸਨ੍ਧਾਯ ਰੂਪਿਨੋਤਿ ਪੁਚ੍ਛਾ ਸਕਵਾਦਿਸ੍ਸ, ਪਟਿਞ੍ਞਾ ਇਤਰਸ੍ਸ. ਅਥ ਨਂ ਸਕਵਾਦੀ ਯਸ੍ਮਾ ਰੂਪਧਾਤੁ ਨਾਮ ਰੂਪਭਵੋ, ਨ ਰੂਪਮਤ੍ਤਮੇਵ, ਤਸ੍ਮਾ ਤੇਨਤ੍ਥੇਨ ਚੋਦੇਤੁਂ ਰੂਪਧਾਤੂਤਿਆਦਿਮਾਹ. ਤਂ ਸਬ੍ਬਂ ਕਾਮਗੁਣਕਥਾਯਂ ਵੁਤ੍ਤਨਯੇਨੇਵ ਵੇਦਿਤਬ੍ਬਂ. ਸਾਵ ਕਾਮਧਾਤੂਤਿ ਪੁਟ੍ਠੋ ਭੂਮਿਪਰਿਚ੍ਛੇਦੇਨ ਵਿਰੋਧਂ ਪਸ੍ਸਮਾਨੋ ਪਟਿਕ੍ਖਿਪਤਿ. ਪੁਨ ਦਲ਼੍ਹਂ ਕਤ੍ਵਾ ਪੁਟ੍ਠੋ ਅਤ੍ਤਨੋ ਲਦ੍ਧਿਵਸੇਨ ਪਟਿਜਾਨਾਤਿ. ਏਵਂ ਸਨ੍ਤੇ ਪਨ ਦ੍ਵੀਹਿ ਭਵੇਹਿ ਸਮਨ੍ਨਾਗਤਤਾ ਆਪਜ੍ਜਤਿ, ਤੇਨ ਤਂ ਸਕਵਾਦੀ ਕਾਮਭਵੇਨ ਚਾਤਿ ਆਦਿਮਾਹ. ਇਤਰੋ ਏਕਸ੍ਸ ਦ੍ਵੀਹਿ ਸਮਨ੍ਨਾਗਤਾਭਾਵਤੋ ਪਟਿਕ੍ਖਿਪਤੀਤਿ.

ਰੂਪਧਾਤੁਕਥਾਵਣ੍ਣਨਾ.