੮. ਅਟ੍ਠਮਵਗ੍ਗੋ

੧. ਛਗਤਿਕਥਾਵਣ੍ਣਨਾ

੫੦੩-੫੦੪. ਇਦਾਨਿ ਛਗਤਿਕਥਾ ਨਾਮ ਹੋਤਿ. ਤਤ੍ਥ ਅਸੁਰਕਾਯੇਨ ਸਦ੍ਧਿਂ ਛਗਤਿਯੋਤਿ ਯੇਸਂ ਲਦ੍ਧਿ, ਸੇਯ੍ਯਥਾਪਿ ਅਨ੍ਧਕਾਨਞ੍ਚੇਵ ਉਤ੍ਤਰਾਪਥਕਾਨਞ੍ਚ; ਤੇ ਸਨ੍ਧਾਯ ਪੁਚ੍ਛਾ ਸਕਵਾਦਿਸ੍ਸ, ਪਟਿਞ੍ਞਾ ਇਤਰਸ੍ਸ. ਅਥ ਨਂ ਸਕਵਾਦੀ ‘‘ਪਞ੍ਚ ਖੋ ਪਨਿਮਾ, ਸਾਰਿਪੁਤ੍ਤ, ਗਤਿਯੋ’’ਤਿ (ਮ. ਨਿ. ੧.੧੫੩) ਲੋਮਹਂਸਨਪਰਿਯਾਯੇ ਪਰਿਚ੍ਛਿਨ੍ਨਾਨਂ ਗਤੀਨਂ ਵਸੇਨ ਚੋਦੇਤੁਂ ਨਨੁ ਪਞ੍ਚ ਗਤਿਯੋਤਿਆਦਿਮਾਹ. ਇਤਰੋ ਸੁਤ੍ਤਵਿਰੋਧਭਯੇਨ ਪਟਿਜਾਨਾਤਿ. ਕਸ੍ਮਾ ਪਨ ਸਕਵਾਦੀ ਛ ਗਤਿਯੋ ਨ ਸਮ੍ਪਟਿਚ੍ਛਤਿ, ਨਨੁ ‘‘ਚਤੂਹਾਪਾਯੇਹਿ ਚ ਵਿਪ੍ਪਮੁਤ੍ਤੋ’’ਤਿ ਏਤ੍ਥ ਅਸੁਰਕਾਯੋਪਿ ਗਹਿਤੋਤਿ. ਸਚ੍ਚਂ ਗਹਿਤੋ, ਨ ਪਨੇਸਾ ਗਤਿ. ਕਸ੍ਮਾ? ਵਿਸੁਂ ਅਭਾਵਤੋ. ਅਸੁਰਕਾਯਸ੍ਮਿਞ੍ਹਿ ਕਾਲਕਞ੍ਚਿਕਾ ਅਸੁਰਾ ਪੇਤਗਤਿਯਾ ਸਙ੍ਗਹਿਤਾ, ਵੇਪਚਿਤ੍ਤਿਪਰਿਸਾ ਦੇਵਗਤਿਯਾ, ਅਸੁਰਕਾਯੋਤਿ ਵਿਸੁਂ ਏਕਾ ਗਤਿ ਨਾਮ ਨਤ੍ਥਿ.

ਇਦਾਨਿ ਏਤਮੇਵ ਅਤ੍ਥਂ ਦਸ੍ਸੇਤੁਂ ਨਨੁ ਕਾਲਕਞ੍ਚਿਕਾਤਿਆਦਿ ਆਰਦ੍ਧਂ. ਤਤ੍ਥ ਸਮਾਨਵਣ੍ਣਾਤਿ ਸਦਿਸਰੂਪਸਣ੍ਠਾਨਾ ਬੀਭਚ੍ਛਾ ਵਿਰੂਪਾ ਦੁਦ੍ਦਸ੍ਸਿਕਾ. ਸਮਾਨਭੋਗਾਤਿ ਸਦਿਸਮੇਥੁਨਸਮਾਚਾਰਾ. ਸਮਾਨਾਹਾਰਾਤਿ ਸਦਿਸਖੇਲ਼ਸਿਙ੍ਘਾਣਿਕਪੁਬ੍ਬਲੋਹਿਤਾਦਿਆਹਾਰਾ. ਸਮਾਨਾਯੁਕਾਤਿ ਸਦਿਸਆਯੁਪਰਿਚ੍ਛੇਦਾ. ਆਵਾਹਵਿਵਾਹਨ੍ਤਿ ਕਞ੍ਞਾਗਹਣਞ੍ਚੇਵ ਕਞ੍ਞਾਦਾਨਞ੍ਚ. ਸੁਕ੍ਕਪਕ੍ਖੇ ਸਮਾਨਵਣ੍ਣਾਤਿ ਸਦਿਸਰੂਪਸਣ੍ਠਾਨਾ ਅਭਿਰੂਪਾ ਪਾਸਾਦਿਕਾ ਦਸ੍ਸਨੀਯਾ ਪਭਾਸਮ੍ਪਨ੍ਨਾ. ਸਮਾਨਭੋਗਾਤਿ ਸਦਿਸਪਞ੍ਚਕਆਮਗੁਣਭੋਗਾ. ਸਮਾਨਾਹਾਰਾਤਿ ਸਦਿਸਸੁਧਾਭੋਜਨਾਦਿਆਹਾਰਾ. ਸੇਸਂ ਵੁਤ੍ਤਨਯਮੇਵ. ਨਨੁ ਅਤ੍ਥਿ ਅਸੁਰਕਾਯੋਤਿ ਇਦਂ ਅਸੁਰਕਾਯਸ੍ਸੇਵ ਸਾਧਕਂ. ਤਸ੍ਸ ਪਨ ਵਿਸੁਂ ਗਤਿਪਰਿਚ੍ਛੇਦਾਭਾਵੇਨ ਨ ਗਤਿਸਾਧਕਨ੍ਤਿ.

ਛਗਤਿਕਥਾਵਣ੍ਣਨਾ.

੨. ਅਨ੍ਤਰਾਭਵਕਥਾਵਣ੍ਣਨਾ

੫੦੫. ਇਦਾਨਿ ਅਨ੍ਤਰਾਭਵਕਥਾ ਨਾਮ ਹੋਤਿ. ਤਤ੍ਥ ਯੇਸਂ ‘‘ਅਨ੍ਤਰਾ ਪਰਿਨਿਬ੍ਬਾਯੀ’’ਤਿ ਸੁਤ੍ਤਪਦਂ ਅਯੋਨਿਸੋ ਗਹੇਤ੍ਵਾ ‘‘ਅਨ੍ਤਰਾਭਵੋ ਨਾਮ ਅਤ੍ਥਿ, ਯਤ੍ਥ ਸਤ੍ਤੋ ਦਿਬ੍ਬਚਕ੍ਖੁਕੋ ਵਿਯ ਅਦਿਬ੍ਬਚਕ੍ਖੁਕੋ, ਇਦ੍ਧਿਮਾ ਵਿਯ ਅਨਿਦ੍ਧਿਮਾ ਮਾਤਾਪਿਤਿਸਮਾਗਮਞ੍ਚੇਵ ਉਤੁਸਮਯਞ੍ਚ ਓਲੋਕਯਮਾਨੋ ਸਤ੍ਤਾਹਂ ਵਾ ਅਤਿਰੇਕਸਤ੍ਤਾਹਂ ਵਾ ਤਿਟ੍ਠਤੀ’’ਤਿ ਲਦ੍ਧਿ, ਸੇਯ੍ਯਥਾਪਿ ਪੁਬ੍ਬਸੇਲਿਯਾਨਞ੍ਚੇਵ ਸਮ੍ਮਿਤਿਯਾਨਞ੍ਚ; ਤੇ ਸਨ੍ਧਾਯ ਅਤ੍ਥੀਤਿ ਪੁਚ੍ਛਾ ਸਕਵਾਦਿਸ੍ਸ, ਲਦ੍ਧਿਯਂ ਠਤ੍ਵਾ ਪਟਿਞ੍ਞਾ ਇਤਰਸ੍ਸ. ਅਥ ਨਂ ਯੇ ਚ ਭਗਵਤਾ ਤਯੋ ਭਵਾ ਵੁਤ੍ਤਾ, ਤੇਸਂ ਵਸੇਨ ਚੋਦੇਤੁਂ ਕਾਮਭਵੋਤਿਆਦਿਮਾਹ. ਤਤ੍ਰਾਯਂ ਅਧਿਪ੍ਪਾਯੋ – ਯਦਿ ਤੇ ਅਨ੍ਤਰਾਭਵੋ ਨਾਮ ਕੋਚਿ ਭਵੋ ਅਤ੍ਥਿ, ਤੇਨ ਕਾਮਭਵਾਦੀਨਂਯੇਵ ਅਞ੍ਞਤਰੇਨ ਭਵਿਤਬ੍ਬਂ ਪਞ੍ਚਵੋਕਾਰਭਵਾਦਿਨਾ ਵਿਯ, ਤੇਨ ਤਂ ਪੁਚ੍ਛਾਮਿ – ‘‘ਕਿਂ ਤੇ ਅਯਂ ਅਨ੍ਤਰਾਭਵੋ ਨਾਮ ਕਾਮਭਵੋ, ਉਦਾਹੁ ਰੂਪਭਵੋ ਅਰੂਪਭਵੋ ਵਾ’’ਤਿ? ਇਤਰੋ ਤਥਾ ਅਨਿਚ੍ਛਨ੍ਤੋ ਸਬ੍ਬਂ ਪਟਿਕ੍ਖਿਪਤਿ. ਕਾਮਭਵਸ੍ਸ ਚਾਤਿਆਦਿ ਯਦਿ ਅਨ੍ਤਰਾਭਵੋ ਨਾਮ ਅਤ੍ਥਿ, ਇਮੇਸਂ ਭਵਾਨਂ ਅਨ੍ਤਰਾ ਦ੍ਵਿਨ੍ਨਂ ਸੀਮਾਨਂ ਸੀਮਨ੍ਤਰਿਕਾ ਵਿਯ ਭਵੇਯ੍ਯਾਤਿ ਚੋਦੇਤੁਂ ਆਰਦ੍ਧਂ. ਪਰਵਾਦੀ ਪਨ ਤਥਾ ਅਨਿਚ੍ਛਨ੍ਤੋ ਸਬ੍ਬਪਞ੍ਹੇ ਪਟਿਕ੍ਖਿਪਤਿ ਕੇਵਲਂ ਲਦ੍ਧਿਯਾ, ਨ ਸਹਧਮ੍ਮੇਨ. ਤੇਨੇਵ ਨਂ ਸਕਵਾਦੀ ‘ਨੋ ਵਤ ਰੇ’ਤਿ ਪਟਿਸੇਧੇਤਿ.

੫੦੬. ਪਞ੍ਚਮੀ ਸਾ ਯੋਨੀਤਿਆਦੀਨਿਪਿ ਯਥਾਪਰਿਚ੍ਛਿਨ੍ਨਯੋਨਿਆਦੀਸੁ ਸੋ ਸਮੋਧਾਨਂ ਨ ਗਚ੍ਛਤਿ, ਅਥ ਤੇਨ ਤਤੋ ਤਤੋ ਅਤਿਰੇਕੇਨ ਭਵਿਤਬ੍ਬਨ੍ਤਿ ਚੋਦੇਤੁਂ ਵੁਤ੍ਤਾਨਿ. ਅਨ੍ਤਰਾਭਵੂਪਗਂ ਕਮ੍ਮਨ੍ਤਿ ਯਦਿ ਸੋਪਿ ਏਕੋ ਭਵੋ, ਯਥਾ ਕਾਮਭਵੂਪਗਾਦੀਨਿ ਕਮ੍ਮਾਨਿ ਅਤ੍ਥੀਤਿ ਸਤ੍ਥਾਰਾ ਵਿਭਜਿਤ੍ਵਾ ਦਸ੍ਸਿਤਾਨਿ, ਏਵਂ ਤਦੁਪਗੇਨਾਪਿ ਕਮ੍ਮੇਨ ਭਵਿਤਬ੍ਬਨ੍ਤਿ ਚੋਦਨਤ੍ਥਂ ਵੁਤ੍ਤਂ. ਯਸ੍ਮਾ ਪਨ ਪਰਸਮਯੇ ਅਨ੍ਤਰਾਭਵੂਪਗਂ ਨਾਮ ਪਾਟਿਯੇਕ੍ਕਂ ਕਮ੍ਮਂ ਨਤ੍ਥਿ, ਯਂ ਯਂ ਭਵਂ ਉਪਪਜ੍ਜਿਸ੍ਸਤਿ, ਤਦੁਪਗੇਨੇਵ ਕਮ੍ਮੇਨ ਅਨ੍ਤਰਾਭਵੇ ਨਿਬ੍ਬਤ੍ਤਤੀਤਿ ਤੇਸਂ ਲਦ੍ਧਿ, ਤਸ੍ਮਾ ‘ਨਹੇਵ’ਨ੍ਤਿ ਪਟਿਕ੍ਖਿਤ੍ਤਂ. ਅਤ੍ਥਿ ਅਨ੍ਤਰਾਭਵੂਪਗਾ ਸਤ੍ਤਾਤਿ ਪੁਟ੍ਠੋਪਿ ਕਾਮਭਵੂਪਗਾਯੇਵ ਨਾਮ ਤੇਤਿ ਲਦ੍ਧਿਯਾ ਪਟਿਕ੍ਖਿਪਤਿ. ਜਾਯਨ੍ਤੀਤਿਆਦੀਨਿ ਪੁਟ੍ਠੋਪਿ ਤਤ੍ਥ ਜਾਤਿਜਰਾਮਰਣਾਨਿ ਚੇਵ ਚੁਤਿਪਟਿਸਨ੍ਧਿਪਰਮ੍ਪਰਞ੍ਚ ਅਨਿਚ੍ਛਨ੍ਤੋ ਪਟਿਕ੍ਖਿਪਤਿ. ਰੂਪਾਦਿਵਸੇਨ ਪੁਟ੍ਠੋਪਿ ਯਸ੍ਮਾ ਅਨ੍ਤਰਾਭਵਸਤ੍ਤਸ੍ਸ ਅਨਿਦਸ੍ਸਨਂ ਰੂਪਂ, ਵੇਦਨਾਦਯੋਪਿ ਅਞ੍ਞੇਸਂ ਵਿਯ ਨ ਓਲ਼ਾਰਿਕਾਤਿ ਤਸ੍ਸ ਲਦ੍ਧਿ, ਤਸ੍ਮਾ ਪਟਿਕ੍ਖਿਪਤਿ. ਇਮਿਨਾਵ ਕਾਰਣੇਨ ਪਞ੍ਚਵੋਕਾਰਭਵਭਾਵੇਪਿ ਪਟਿਕ੍ਖੇਪੋ ਵੇਦਿਤਬ੍ਬੋ.

੫੦੭. ਇਦਾਨਿ ਕਾਮਭਵੋ ਭਵੋ ਗਤੀਤਿਆਦਿ ਭਵਸਂਸਨ੍ਦਨਂ ਨਾਮ ਹੋਤਿ. ਤਤ੍ਰਾਯਂ ਅਧਿਪ੍ਪਾਯੋ – ਯਦਿ ਤੇ ਅਨ੍ਤਰਾਭਵੋ ਨਾਮ ਕੋਚਿ ਭਵੋ ਭਵੇਯ੍ਯ, ਯਥਾ ਕਾਮਭਵਾਦੀਸੁ ਭਵਗਤਿਆਦਿਭੇਦੋ ਲਬ੍ਭਤਿ, ਤਥਾ ਤਤ੍ਰਾਪਿ ਲਬ੍ਭੇਥ. ਯਥਾ ਵਾ ਤਤ੍ਥ ਨ ਲਬ੍ਭਤਿ, ਤਥਾ ਇਮੇਸੁਪਿ ਨ ਲਬ੍ਭੇਥ. ਸਮਾਨਸ੍ਮਿਞ੍ਹਿ ਭਵਭਾਵੇ ਏਤੇਸ੍ਵੇਵੇਸ ਵਿਭਾਗੋ ਅਤ੍ਥਿ, ਨ ਇਤਰਸ੍ਮਿਨ੍ਤਿ ਕੋ ਏਤ੍ਥ ਵਿਸੇਸਹੇਤੂਤਿ. ਇਤਰੋ ਪੁਨ ਲਦ੍ਧਿਮਤ੍ਤਵਸੇਨ ਤਂ ਤਂ ਪਟਿਜਾਨਾਤਿ ਚੇਵ ਪਟਿਕ੍ਖਿਪਤਿ ਚ.

੫੦੮. ਸਬ੍ਬੇਸਞ੍ਞੇਵ ਸਤ੍ਤਾਨਂ ਅਤ੍ਥਿ ਅਨ੍ਤਰਾਭਵੋਤਿ ਪੁਟ੍ਠੋ ਯਸ੍ਮਾ ਨਿਰਯੂਪਗਅਸਞ੍ਞਸਤ੍ਤੂਪਗਅਰੂਪੂਪਗਾਨਂ ਅਨ੍ਤਰਾਭਵਂ ਨ ਇਚ੍ਛਤਿ, ਤਸ੍ਮਾ ਪਟਿਕ੍ਖਿਪਤਿ. ਤੇਨੇਵ ਕਾਰਣੇਨ ਪਟਿਲੋਮੇ ਪਟਿਜਾਨਾਤਿ. ਆਨਨ੍ਤਰਿਯਸ੍ਸਾਤਿਆਦਿ ਯੇਸਂ ਸੋ ਅਨ੍ਤਰਾਭਵਂ ਨ ਇਚ੍ਛਤਿ, ਤੇ ਤਾਵ ਵਿਭਜਿਤ੍ਵਾ ਦਸ੍ਸੇਤੁਂ ਵੁਤ੍ਤਂ. ਤਂ ਸਬ੍ਬਂ ਪਾਲ਼ਿਅਨੁਸਾਰੇਨੇਵ ਵੇਦਿਤਬ੍ਬਂ ਸਦ੍ਧਿਂ ਸੁਤ੍ਤਸਾਧਨੇਨਾਤਿ.

ਅਨ੍ਤਰਾਭਵਕਥਾਵਣ੍ਣਨਾ.

੩. ਕਾਮਗੁਣਕਥਾਵਣ੍ਣਨਾ

੫੧੦. ਇਦਾਨਿ ਕਾਮਗੁਣਕਥਾ ਨਾਮ ਹੋਤਿ. ਤਤ੍ਥ ਸਕਸਮਯੇ ਤਾਵ ਕਾਮਧਾਤੂਤਿ ਵਤ੍ਥੁਕਾਮਾਪਿ ਵੁਚ੍ਚਨ੍ਤਿ – ਕਿਲੇਸਕਾਮਾਪਿ ਕਾਮਭਵੋਪਿ. ਏਤੇਸੁ ਹਿ ਵਤ੍ਥੁਕਾਮਾ ਕਮਨੀਯਟ੍ਠੇਨ ਕਾਮਾ, ਸਭਾਵਨਿਸ੍ਸਤ੍ਤਸੁਞ੍ਞਤਟ੍ਠੇਨ ਧਾਤੂਤਿ ਕਾਮਧਾਤੁ. ਕਿਲੇਸਕਾਮਾ ਕਮਨੀਯਟ੍ਠੇਨ ਚੇਵ ਕਮਨਟ੍ਠੇਨ ਚ ਕਾਮਾ, ਯਥਾਵੁਤ੍ਤੇਨੇਵਤ੍ਥੇਨ ਧਾਤੂਤਿ ਕਾਮਧਾਤੁ. ਕਾਮਭਵੋ ਕਮਨੀਯਟ੍ਠੇਨ ਕਮਨਟ੍ਠੇਨ ਵਤ੍ਥੁਕਾਮਪਵਤ੍ਤਿਦੇਸਟ੍ਠੇਨਾਤਿ ਤੀਹਿ ਕਾਰਣੇਹਿ ਕਾਮੋ, ਯਥਾਵੁਤ੍ਤੇਨੇਵਤ੍ਥੇਨ ਧਾਤੂਤਿ ਕਾਮਧਾਤੁ. ਪਰਸਮਯੇ ਪਨ – ‘‘ਪਞ੍ਚਿਮੇ, ਭਿਕ੍ਖਵੇ, ਕਾਮਗੁਣਾ’’ਤਿ ਵਚਨਮਤ੍ਤਂ ਨਿਸ੍ਸਾਯ ਪਞ੍ਚੇਵ ਕਾਮਗੁਣਾ ਕਾਮਧਾਤੂਤਿ ਗਹਿਤਂ. ਤਸ੍ਮਾ ਯੇਸਂ ਅਯਂ ਲਦ੍ਧਿ, ਸੇਯ੍ਯਥਾਪਿ ਏਤਰਹਿ ਪੁਬ੍ਬਸੇਲਿਯਾਨਂ; ਤੇ ਸਨ੍ਧਾਯ ਕਾਮਧਾਤੁਨਾਨਤ੍ਤਂ ਬੋਧੇਤੁਂ ਪਞ੍ਚੇਵਾਤਿ ਪੁਚ੍ਛਾ ਸਕਵਾਦਿਸ੍ਸ, ਲਦ੍ਧਿਵਸੇਨ ਪਟਿਞ੍ਞਾ ਇਤਰਸ੍ਸ. ਨਨੁ ਅਤ੍ਥੀਤਿਆਦਿ ਕਿਲੇਸਕਾਮਦਸ੍ਸਨਤ੍ਥਂ ਵੁਤ੍ਤਂ. ਤਤ੍ਥ ਤਪ੍ਪਟਿਸਂਯੁਤ੍ਤੋਤਿ ਕਾਮਗੁਣਪਟਿਸਂਯੁਤ੍ਤੋ, ਕਾਮਗੁਣਾਰਮ੍ਮਣੋਤਿ ਅਤ੍ਥੋ. ਨੋ ਚ ਵਤ ਰੇ ਵਤ੍ਤਬ੍ਬੇ ਪਞ੍ਚੇਵਾਤਿ ਇਮੇਸੁ ਤਪ੍ਪਟਿਸਂਯੁਤ੍ਤਛਨ੍ਦਾਦੀਸੁ ਸਤਿ ਪਞ੍ਚੇਵ ਕਾਮਗੁਣਾ ਕਾਮਧਾਤੂਤਿ ਨ ਵਤ੍ਤਬ੍ਬਂ. ਏਤੇਪਿ ਹਿ ਛਨ੍ਦਾਦਯੋ ਕਮਨੀਯਟ੍ਠੇਨ ਕਾਮਾ ਚ ਧਾਤੁ ਚਾਤਿਪਿ ਕਾਮਧਾਤੁ. ਕਮਨਟ੍ਠੇਨ ਕਾਮਸਙ੍ਖਾਤਾ ਧਾਤੂਤਿਪਿ ਕਾਮਧਾਤੂਤਿ ਅਤ੍ਥੋ.

ਮਨੁਸ੍ਸਾਨਂ ਚਕ੍ਖੁਨ੍ਤਿਆਦਿ ਵਤ੍ਥੁਕਾਮਦਸ੍ਸਨਤ੍ਥਂ ਵੁਤ੍ਤਂ. ਤਤ੍ਥ ਪਰਵਾਦੀ ਛਨ੍ਨਮ੍ਪਿ ਆਯਤਨਾਨਂ ਵਤ੍ਥੁਕਾਮਭਾਵੇਨ ਨਕਾਮਧਾਤੁਭਾਵਂ ਪਟਿਕ੍ਖਿਪਿਤ੍ਵਾ ਪੁਨ ਮਨੋਤਿ ਪੁਟ੍ਠੋ ਮਹਗ੍ਗਤਲੋਕੁਤ੍ਤਰਂ ਸਨ੍ਧਾਯ ਨਕਾਮਧਾਤੁਭਾਵਂ ਪਟਿਜਾਨਾਤਿ. ਯਸ੍ਮਾ ਪਨ ਸਬ੍ਬੋਪਿ ਤੇਭੂਮਕਮਨੋ ਕਾਮਧਾਤੁਯੇਵ, ਤਸ੍ਮਾ ਨਂ ਸਕਵਾਦੀ ਸੁਤ੍ਤੇਨ ਨਿਗ੍ਗਣ੍ਹਾਤਿ.

੫੧੧. ਕਾਮਗੁਣਾ ਭਵੋਤਿਆਦਿ ਭਵਸ੍ਸ ਕਾਮਧਾਤੁਭਾਵਦਸ੍ਸਨਤ੍ਥਂ ਵੁਤ੍ਤਂ. ਯਸ੍ਮਾ ਪਨ ਕਾਮਗੁਣਮਤ੍ਤੇ ਭਵੋਤਿ ਵੋਹਾਰੋ ਨਤ੍ਥਿ, ਤਸ੍ਮਾ ਪਰਵਾਦੀ ਨਹੇਵਾਤਿ ਪਟਿਕ੍ਖਿਪਤਿ. ਕਾਮਗੁਣੂਪਗਂ ਕਮ੍ਮਨ੍ਤਿਆਦਿ ਸਬ੍ਬਂ ਕਾਮਗੁਣਮਤ੍ਤਸ੍ਸ ਨਕਾਮਧਾਤੁਭਾਵਦਸ੍ਸਨਤ੍ਥਂ ਵੁਤ੍ਤਂ. ਕਾਮਧਾਤੁਸਙ੍ਖਾਤਕਾਮਭਵੂਪਗਮੇਵ ਹਿ ਕਮ੍ਮਂ ਅਤ੍ਥਿ, ਕਾਮਭਵੂਪਗਾ ਏਵ ਚ ਸਤ੍ਤਾ ਹੋਨ੍ਤਿ. ਤਤ੍ਥ ਜਾਯਨ੍ਤਿ ਜਿਯਨ੍ਤਿ ਮਿਯਨ੍ਤਿ ਚਵਨ੍ਤਿ ਉਪਪਜ੍ਜਨ੍ਤਿ, ਨ ਕਾਮਗੁਣੇਸੂਤਿ ਇਮਿਨਾ ਉਪਾਯੇਨ ਸਬ੍ਬਤ੍ਥ ਅਤ੍ਥੋ ਵੇਦਿਤਬ੍ਬੋਤਿ.

ਕਾਮਗੁਣਕਥਾਵਣ੍ਣਨਾ.

੪. ਕਾਮਕਥਾਵਣ੍ਣਨਾ

੫੧੩-੫੧੪. ਇਦਾਨਿ ਕਾਮਕਥਾ ਨਾਮ ਹੋਤਿ. ਤਤ੍ਥ ਯੇਸਂ ‘‘ਪਞ੍ਚਿਮੇ, ਭਿਕ੍ਖਵੇ, ਕਾਮਗੁਣਾ’’ਤਿ ਵਚਨਮਤ੍ਤਂ ਨਿਸ੍ਸਾਯ ਰੂਪਾਯਤਨਾਦੀਨਿ ਪਞ੍ਚੇਵਾਯਤਨਾਨਿ ਕਾਮਾਤਿ ਲਦ੍ਧਿ, ਸੇਯ੍ਯਥਾਪਿ ਪੁਬ੍ਬਸੇਲਿਯਾਨਂ; ਤੇਸਂ ਕਿਲੇਸਕਾਮਸ੍ਸੇਵ ਨਿਪ੍ਪਰਿਯਾਯੇਨ ਕਾਮਭਾਵਂ ਦਸ੍ਸੇਤੁਂ ਪਞ੍ਚੇਵਾਤਿ ਪੁਚ੍ਛਾ ਸਕਵਾਦਿਸ੍ਸ, ਪਟਿਞ੍ਞਾ ਇਤਰਸ੍ਸ. ਸੇਸਮੇਤ੍ਥ ਉਤ੍ਤਾਨਤ੍ਥਮੇਵਾਤਿ.

ਕਾਮਕਥਾਵਣ੍ਣਨਾ.

੫. ਰੂਪਧਾਤੁਕਥਾਵਣ੍ਣਨਾ

੫੧੫-੫੧੬. ਇਦਾਨਿ ਰੂਪਧਾਤੁਕਥਾ ਨਾਮ ਹੋਤਿ. ਤਤ੍ਥ ‘‘ਰੂਪਿਨੋ ਧਮ੍ਮਾ ਰੂਪਧਾਤੁ ਨਾਮਾ’’ਤਿ ਯੇਸਂ ਲਦ੍ਧਿ, ਸੇਯ੍ਯਥਾਪਿ ਅਨ੍ਧਕਾਨਂ; ਤੇ ਸਨ੍ਧਾਯ ਰੂਪਿਨੋਤਿ ਪੁਚ੍ਛਾ ਸਕਵਾਦਿਸ੍ਸ, ਪਟਿਞ੍ਞਾ ਇਤਰਸ੍ਸ. ਅਥ ਨਂ ਸਕਵਾਦੀ ਯਸ੍ਮਾ ਰੂਪਧਾਤੁ ਨਾਮ ਰੂਪਭਵੋ, ਨ ਰੂਪਮਤ੍ਤਮੇਵ, ਤਸ੍ਮਾ ਤੇਨਤ੍ਥੇਨ ਚੋਦੇਤੁਂ ਰੂਪਧਾਤੂਤਿਆਦਿਮਾਹ. ਤਂ ਸਬ੍ਬਂ ਕਾਮਗੁਣਕਥਾਯਂ ਵੁਤ੍ਤਨਯੇਨੇਵ ਵੇਦਿਤਬ੍ਬਂ. ਸਾਵ ਕਾਮਧਾਤੂਤਿ ਪੁਟ੍ਠੋ ਭੂਮਿਪਰਿਚ੍ਛੇਦੇਨ ਵਿਰੋਧਂ ਪਸ੍ਸਮਾਨੋ ਪਟਿਕ੍ਖਿਪਤਿ. ਪੁਨ ਦਲ਼੍ਹਂ ਕਤ੍ਵਾ ਪੁਟ੍ਠੋ ਅਤ੍ਤਨੋ ਲਦ੍ਧਿਵਸੇਨ ਪਟਿਜਾਨਾਤਿ. ਏਵਂ ਸਨ੍ਤੇ ਪਨ ਦ੍ਵੀਹਿ ਭਵੇਹਿ ਸਮਨ੍ਨਾਗਤਤਾ ਆਪਜ੍ਜਤਿ, ਤੇਨ ਤਂ ਸਕਵਾਦੀ ਕਾਮਭਵੇਨ ਚਾਤਿ ਆਦਿਮਾਹ. ਇਤਰੋ ਏਕਸ੍ਸ ਦ੍ਵੀਹਿ ਸਮਨ੍ਨਾਗਤਾਭਾਵਤੋ ਪਟਿਕ੍ਖਿਪਤੀਤਿ.

ਰੂਪਧਾਤੁਕਥਾਵਣ੍ਣਨਾ.

੬. ਅਰੂਪਧਾਤੁਕਥਾਵਣ੍ਣਨਾ

੫੧੭-੫੧੮. ਅਰੂਪਧਾਤੁਕਥਾਯਪਿ ਇਮਿਨਾਵੁਪਾਯੇਨ ਅਤ੍ਥੋ ਵੇਦਿਤਬ੍ਬੋ. ਅਰੂਪਧਮ੍ਮੇਸੁ ਪਨ ਵੇਦਨਾਕ੍ਖਨ੍ਧਮੇਵ ਗਹੇਤ੍ਵਾ ਵੇਦਨਾ ਭਵੋਤਿਆਦਿਨਾ ਨਯੇਨੇਤ੍ਥ ਦੇਸਨਾ ਕਤਾ. ਤਤ੍ਥ ਕਿਂ ਤੇ ਅਰੂਪਿਨੋ ਧਮ੍ਮਾਤਿ ਸਙ੍ਖਂ ਗਤਾ ਵੇਦਨਾਦੀਸੁ ਅਞ੍ਞਤਰਾ ਹੋਤੀਤਿ ਏਵਮਤ੍ਥੋ ਦਟ੍ਠਬ੍ਬੋ. ਸੇਸਂ ਹੇਟ੍ਠਾ ਵੁਤ੍ਤਨਯੇਨੇਵ ਵੇਦਿਤਬ੍ਬਨ੍ਤਿ.

ਅਰੂਪਧਾਤੁਕਥਾਵਣ੍ਣਨਾ.

੭. ਰੂਪਧਾਤੁਯਾ ਆਯਤਨਕਥਾਵਣ੍ਣਨਾ

੫੧੯. ਇਦਾਨਿ ਰੂਪਧਾਤੁਯਾ ਆਯਤਨਕਥਾ ਨਾਮ ਹੋਤਿ. ਤਤ੍ਥ ਯੇਸਂ ‘‘ਰੂਪੀ ਮਨੋਮਯੋ ਸਬ੍ਬਙ੍ਗਪਚ੍ਚਙ੍ਗੀ ਅਹੀਨਿਨ੍ਦ੍ਰਿਯੋ’’ਤਿ (ਦੀ. ਨਿ. ੧.੮੭) ਸੁਤ੍ਤਂ ਨਿਸ੍ਸਾਯ ਬ੍ਰਹ੍ਮਕਾਯਿਕਾਨਂ ਘਾਨਾਦਿਨਿਮਿਤ੍ਤਾਨਿਪਿ ਆਯਤਨਾਨੇਵਾਤਿ ਕਪ੍ਪੇਤ੍ਵਾ ਸਲ਼ਾਯਤਨਿਕੋ ਤੇਸਂ ਅਤ੍ਤਭਾਵੋਤਿ ਲਦ੍ਧਿ, ਸੇਯ੍ਯਥਾਪਿ ਅਨ੍ਧਕਾਨਞ੍ਚੇਵ ਸਮ੍ਮਿਤਿਯਾਨਞ੍ਚ; ਤੇ ਸਨ੍ਧਾਯ ਸਲ਼ਾਯਤਨਿਕੋਤਿ ਪੁਚ੍ਛਾ ਸਕਵਾਦਿਸ੍ਸ, ਲਦ੍ਧਿਵਸੇਨ ਪਟਿਞ੍ਞਾ ਇਤਰਸ੍ਸ. ਅਥ ਨਂ ਯਂ ਤਤ੍ਥ ਆਯਤਨਂ ਨਤ੍ਥਿ, ਤਸ੍ਸ ਵਸੇਨ ਚੋਦੇਤੁਂ ਅਤ੍ਥਿ ਤਤ੍ਥ ਘਾਨਾਯਤਨਨ੍ਤਿਆਦਿ ਆਰਦ੍ਧਂ. ਤਤੋ ਪਰਵਾਦੀ ਯਂ ਤਤ੍ਥ ਅਜ੍ਝਤ੍ਤਿਕਾਨਂ ਤਿਣ੍ਣਂ ਆਯਤਨਾਨਂ ਘਾਨਾਦਿਕਂ ਸਣ੍ਠਾਨਨਿਮਿਤ੍ਤਂ ਤਦੇਵ ਆਯਤਨਨ੍ਤਿ ਲਦ੍ਧਿਯਾ ਪਟਿਜਾਨਾਤਿ. ਬਾਹਿਰਾਨਂ ਗਨ੍ਧਾਯਤਨਾਦੀਨਂ ਵਸੇਨ ਪੁਟ੍ਠੋ ਘਾਨਪ੍ਪਸਾਦਾਦਯੋ ਤਤ੍ਥ ਨ ਇਚ੍ਛਤਿ, ਤਸ੍ਮਾ ਤੇਸਂ ਗੋਚਰਂ ਪਟਿਸੇਧੇਨ੍ਤੋ ਪਟਿਕ੍ਖਿਪਤਿ. ਪਟਿਲੋਮਪਞ੍ਹਸਂਸਨ੍ਦਨਪਞ੍ਹੇਸੁਪਿ ਇਮਿਨਾਵੁਪਾਯੇਨ ਅਤ੍ਥੋ ਵੇਦਿਤਬ੍ਬੋ.

੫੨੧. ਅਤ੍ਥਿ ਤਤ੍ਥ ਘਾਨਾਯਤਨਂ ਅਤ੍ਥਿ ਗਨ੍ਧਾਯਤਨਂ ਤੇਨ ਘਾਨੇਨ ਤਂ ਗਨ੍ਧਂ ਘਾਯਤੀਤਿ ਤਸ੍ਮਿਂਯੇਵ ਪਰਸਮਯੇ ਏਕਚ੍ਚੇ ਆਚਰਿਯੇ ਸਨ੍ਧਾਯ ਵੁਤ੍ਤਂ. ਤੇ ਕਿਰ ਤਤ੍ਥ ਛ ਅਜ੍ਝਤ੍ਤਿਕਾਨਿ ਆਯਤਨਾਨਿ ਪਰਿਪੁਣ੍ਣਾਨਿ ਇਚ੍ਛਨ੍ਤਿ, ਆਯਤਨੇਨ ਚ ਨਾਮ ਸਕਿਚ੍ਚਕੇਨ ਭਵਿਤਬ੍ਬਨ੍ਤਿ ਤੇਹਿ ਘਾਨਾਦੀਹਿ ਤੇ ਗਨ੍ਧਾਦਯੋ ਘਾਯਨ੍ਤਿ ਸਾਯਨ੍ਤਿ ਫੁਸਨ੍ਤੀਤਿਪਿ ਇਚ੍ਛਨ੍ਤਿ. ਤਂ ਲਦ੍ਧਿਂ ਸਨ੍ਧਾਯ ਪਰਵਾਦੀ ਆਮਨ੍ਤਾਤਿ ਪਟਿਜਾਨਾਤਿ.

੫੨੨. ਅਤ੍ਥਿ ਤਤ੍ਥ ਮੂਲਗਨ੍ਧੋਤਿਆਦੀਨਿ ਪਨ ਪੁਟ੍ਠੋ ਅਤ੍ਥਿਭਾਵਂ ਸਾਧੇਤੁਂ ਅਸਕ੍ਕੋਨ੍ਤੋ ਪਟਿਕ੍ਖਿਪਤਿ. ਨਨੁ ਅਤ੍ਥਿ ਤਤ੍ਥ ਘਾਨਨਿਮਿਤ੍ਤਨ੍ਤਿਆਦਿ ਸਣ੍ਠਾਨਮਤ੍ਤਸ੍ਸੇਵ ਸਾਧਕਂ, ਨ ਆਯਤਨਸ੍ਸ, ਤਸ੍ਮਾ ਉਦਾਹਟਮ੍ਪਿ ਅਨੁਦਾਹਟਸਦਿਸਮੇਵਾਤਿ.

ਰੂਪਧਾਤੁਯਾ ਆਯਤਨਕਥਾਵਣ੍ਣਨਾ.

੮. ਅਰੂਪੇ ਰੂਪਕਥਾਵਣ੍ਣਨਾ

੫੨੪-੫੨੬. ਇਦਾਨਿ ਅਰੂਪੇ ਰੂਪਕਥਾ ਨਾਮ ਹੋਤਿ. ਤਤ੍ਥ ਯੇਸਂ ‘‘ਵਿਞ੍ਞਾਣਪਚ੍ਚਯਾ ਨਾਮਰੂਪ’’ਨ੍ਤਿ ਵਚਨਤੋ ਆਰੁਪ੍ਪਭਵੇਪਿ ਓਲ਼ਾਰਿਕਰੂਪਾ ਨਿਸ੍ਸਟਂ ਸੁਖੁਮਰੂਪਂ ਅਤ੍ਥੀਤਿ ਲਦ੍ਧਿ, ਸੇਯ੍ਯਥਾਪਿ ਅਨ੍ਧਕਾਨਂ; ਤੇ ਸਨ੍ਧਾਯ ਅਤ੍ਥਿ ਰੂਪਨ੍ਤਿ ਪੁਚ੍ਛਾ ਸਕਵਾਦਿਸ੍ਸ, ਪਟਿਞ੍ਞਾ ਇਤਰਸ੍ਸ. ਸੇਸਮੇਤ੍ਥ ਉਤ੍ਤਾਨਤ੍ਥਮੇਵਾਤਿ.

ਅਰੂਪੇ ਰੂਪਕਥਾਵਣ੍ਣਨਾ.

੯. ਰੂਪਂ ਕਮ੍ਮਨ੍ਤਿਕਥਾਵਣ੍ਣਨਾ

੫੨੭-੫੩੭. ਇਦਾਨਿ ਰੂਪਂ ਕਮ੍ਮਨ੍ਤਿਕਥਾ ਨਾਮ ਹੋਤਿ. ਤਤ੍ਥ ਯੇਸਂ ਕਾਯਵਚੀਵਿਞ੍ਞਤ੍ਤਿਸਙ੍ਖਾਤਂ ਰੂਪਮੇਵ ਕਾਯਕਮ੍ਮਂ ਵਚੀਕਮ੍ਮਂ ਨਾਮ, ਤਞ੍ਚ ਕੁਸਲਸਮੁਟ੍ਠਾਨਂ ਕੁਸਲਂ, ਅਕੁਸਲਸਮੁਟ੍ਠਾਨਂ ਅਕੁਸਲਨ੍ਤਿ ਲਦ੍ਧਿ, ਸੇਯ੍ਯਥਾਪਿ ਮਹਿਸਾਸਕਾਨਞ੍ਚੇਵ ਸਮ੍ਮਿਤਿਯਾਨਞ੍ਚ; ਤੇ ਸਨ੍ਧਾਯ ਕੁਸਲੇਨ ਚਿਤ੍ਤੇਨ ਸਮੁਟ੍ਠਿਤਨ੍ਤਿ ਪੁਚ੍ਛਾ ਸਕਵਾਦਿਸ੍ਸ, ਪਟਿਞ੍ਞਾ ਇਤਰਸ੍ਸ. ਅਥ ਨਂ ਸਚੇ ਤਂ ਕੁਸਲਂ, ਯ੍ਵਾਯਂ ਸਾਰਮ੍ਮਣਾਦਿਭੇਦੋ ਕੁਸਲਸ੍ਸ ਲਬ੍ਭਤਿ, ਅਤ੍ਥਿ ਤੇ ਸੋ ਤਸ੍ਸਾਤਿ ਚੋਦੇਤੁਂ ਸਾਰਮ੍ਮਣਨ੍ਤਿਆਦਿ ਆਰਦ੍ਧਂ. ਤਤ੍ਥ ਪਤ੍ਥਨਾ ਪਣਿਧੀਤਿ ਚੇਤਨਾਯੇਵੇਤਂ ਵੇਵਚਨਂ. ਕੁਸਲਚੇਤਨਾਯੇਵ ਹਿ ਪਕਪ੍ਪਯਮਾਨਾ ਪਤ੍ਥਨਾਤਿ. ਪਕਪ੍ਪਨਵਸੇਨ ਠਿਤਤ੍ਤਾ ਪਣਿਧੀਤਿ ਚ ਵੁਚ੍ਚਤਿ. ਪਰਤੋ ਪਨ ਕੁਸਲੇਨ ਚਿਤ੍ਤੇਨ ਸਮੁਟ੍ਠਿਤਾ ਵੇਦਨਾ ਸਞ੍ਞਾ ਚੇਤਨਾ ਸਦ੍ਧਾਤਿਆਦੀਸੁ ਵੇਦਨਾਦੀਨਞ੍ਞੇਵ ਚੇਤ੍ਥ ਪਤ੍ਥਨਾ ਪਣਿਧੀਤਿ ਲਬ੍ਭਤਿ, ਨ ਚੇਤਨਾਯ. ਕਸ੍ਮਾ? ਦ੍ਵਿਨ੍ਨਂ ਚੇਤਨਾਨਂ ਏਕਤੋ ਅਭਾਵਾ, ਸੋਤਪਤਿਤਤ੍ਤਾ ਪਨ ਏਵਂ ਤਨ੍ਤਿ ਗਤਾਤਿ ਵੇਦਿਤਬ੍ਬਾ. ਰੂਪਾਯਤਨਨ੍ਤਿਆਦਿ ਪੁਰਿਮਵਾਰੇ ‘‘ਸਬ੍ਬਨ੍ਤਂ ਕੁਸਲ’’ਨ੍ਤਿ ਸਂਖਿਤ੍ਤਸ੍ਸ ਪਭੇਦਦਸ੍ਸਨਤ੍ਥਂ ਵੁਤ੍ਤਂ. ਸੇਸਾ ਸਂਸਨ੍ਦਨਨਯਾ, ਵਚੀਕਮ੍ਮਕਥਾ ‘‘ਅਕੁਸਲੇਨ ਚਿਤ੍ਤੇਨ ਸਮੁਟ੍ਠਿਤ’’ਨ੍ਤਿਆਦਿਵਿਧਾਨਞ੍ਚ ਸਬ੍ਬਂ ਪਾਲ਼ਿਅਨੁਸਾਰੇਨੇਵ ਵੇਦਿਤਬ੍ਬਂ. ਅਸੁਚੀਤਿ ਪਨੇਤ੍ਥ ਸੁਕ੍ਕਂ ਅਧਿਪ੍ਪੇਤਂ. ਸੁਤ੍ਤਸਾਧਨਂ ਉਤ੍ਤਾਨਤ੍ਥਮੇਵ.

ਰੂਪਂ ਕਮ੍ਮਨ੍ਤਿਕਥਾਵਣ੍ਣਨਾ.

੧੦. ਜੀਵਿਤਿਨ੍ਦ੍ਰਿਯਕਥਾਵਣ੍ਣਨਾ

੫੪੦. ਇਦਾਨਿ ਜੀਵਿਤਿਨ੍ਦ੍ਰਿਯਕਥਾ ਨਾਮ ਹੋਤਿ. ਤਤ੍ਥ ਯੇਸਂ ਜੀਵਿਤਿਨ੍ਦ੍ਰਿਯਂ ਨਾਮ ਚਿਤ੍ਤਵਿਪ੍ਪਯੁਤ੍ਤੋ ਅਰੂਪਧਮ੍ਮੋ, ਤਸ੍ਮਾ ਰੂਪਜੀਵਿਤਿਨ੍ਦ੍ਰਿਯਂ ਨਤ੍ਥੀਤਿ ਲਦ੍ਧਿ, ਸੇਯ੍ਯਥਾਪਿ ਪੁਬ੍ਬਸੇਲਿਯਾਨਞ੍ਚੇਵ ਸਮ੍ਮਿਤਿਯਾਨਞ੍ਚ; ਤੇ ਸਨ੍ਧਾਯ ਪੁਚ੍ਛਾ ਸਕਵਾਦਿਸ੍ਸ, ਪਟਿਞ੍ਞਾ ਇਤਰਸ੍ਸ. ਨਤ੍ਥਿ ਰੂਪੀਨਂ ਧਮ੍ਮਾਨਂ ਆਯੂਤਿ ਪਞ੍ਹੇ ਉਪਾਦਿਨ੍ਨਰੂਪਾਨਮ੍ਪਿ ਤਿਣਕਟ੍ਠਾਦੀਨਮ੍ਪਿ ਸਨ੍ਤਾਨਵਸੇਨ ਪਵਤ੍ਤਿਮੇਵ ਆਯੁ ਠਿਤਿ ਯਪਨਾ ਯਾਪਨਾ ਇਰਿਯਨਾ ਵਤ੍ਤਨਾ ਪਾਲਨਾਤਿ ਇਚ੍ਛਤਿ, ਤਸ੍ਮਾ ਪਟਿਕ੍ਖਿਪਤਿ. ਅਤ੍ਥੀਤਿ ਪਞ੍ਹੇਪਿ ਇਮਿਨਾ ਕਾਰਣੇਨ ਪਟਿਜਾਨਾਤਿ. ਅਤ੍ਥਿ ਅਰੂਪਜੀਵਿਤਿਨ੍ਦ੍ਰਿਯਨ੍ਤਿ ਪਞ੍ਹੇ ਅਰੂਪਧਮ੍ਮਾਨਂ ਚਿਤ੍ਤਵਿਪ੍ਪਯੁਤ੍ਤਂ ਜੀਵਿਤਿਨ੍ਦ੍ਰਿਯਸਨ੍ਤਾਨਂ ਨਾਮ ਅਤ੍ਥੀਤਿ ਇਚ੍ਛਤਿ, ਤਸ੍ਮਾ ਪਟਿਜਾਨਾਤਿ.

੫੪੧. ਰੂਪੀਨਂ ਧਮ੍ਮਾਨਂ ਆਯੁ ਅਰੂਪਜੀਵਿਤਿਨ੍ਦ੍ਰਿਯਨ੍ਤਿ ਪਞ੍ਹੇ ਸਤ੍ਤਸਨ੍ਤਾਨੇ ਰੂਪਿਨੋ ਵਾ ਹੋਨ੍ਤੁ ਅਰੂਪਿਨੋ ਵਾ, ਸਬ੍ਬੇਸਂ ਚਿਤ੍ਤਵਿਪ੍ਪਯੁਤ੍ਤਂ ਅਰੂਪਜੀਵਿਤਿਨ੍ਦ੍ਰਿਯਮੇਵ ਇਚ੍ਛਤਿ, ਤਸ੍ਮਾ ਪਟਿਜਾਨਾਤਿ.

੫੪੨. ਨਿਰੋਧਸਮਾਪਨ੍ਨਪਞ੍ਹੇਸੁਪਿ ਚਿਤ੍ਤਵਿਪ੍ਪਯੁਤ੍ਤਂ ਅਰੂਪਜੀਵਿਤਮੇਵ ਸਨ੍ਧਾਯ ਪਟਿਕ੍ਖਿਪਤਿ ਚ ਪਟਿਜਾਨਾਤਿ ਚ. ਸਕਵਾਦੀ ਪਨ ਤਂ ਅਸਮ੍ਪਟਿਚ੍ਛਨ੍ਤੋ ਯਂ ਅਰੂਪਪਵਤ੍ਤੇ ਅਸਤਿ ਅਤ੍ਥਿ, ਰੂਪੇਨ ਤੇਨ ਭਵਿਤਬ੍ਬਨ੍ਤਿ ਚੋਦੇਤੁਂ ਹਞ੍ਚੀਤਿਆਦਿਮਾਹ. ਸਙ੍ਖਾਰਕ੍ਖਨ੍ਧਪਞ੍ਹੇ ਫਸ੍ਸਾਦਿਸਙ੍ਖਾਰਕ੍ਖਨ੍ਧਂ ਸਨ੍ਧਾਯ ਪਟਿਕ੍ਖਿਪਤਿ, ਕਾਯਕਮ੍ਮਾਦਿਸਙ੍ਖਾਰਕ੍ਖਨ੍ਧਂ ਸਨ੍ਧਾਯ ਪਟਿਜਾਨਾਤਿ. ਕਾਯਵਿਞ੍ਞਤ੍ਤਿ ਵਚੀਵਿਞ੍ਞਤ੍ਤਿ ਸਮ੍ਮਾਵਾਚਾ ਸਮ੍ਮਾਕਮ੍ਮਨ੍ਤੋ ਜੀਵਿਤਿਨ੍ਦ੍ਰਿਯਨ੍ਤਿ ਏਵਮਾਦਯੋਪਿ ਧਮ੍ਮਾ ਸਙ੍ਖਾਰਕ੍ਖਨ੍ਧਪਰਿਯਾਪਨ੍ਨਾਤਿਸ੍ਸ ਲਦ੍ਧਿ. ਸਕਵਾਦੀ ਪਨ ਤਂ ਅਸਮ੍ਪਟਿਚ੍ਛਨ੍ਤੋ ਯਦਿ ਨਿਰੁਦ੍ਧੇਪਿ ਅਰੂਪਪਵਤ੍ਤੇ ਸਙ੍ਖਾਰਕ੍ਖਨ੍ਧੋ ਅਤ੍ਥਿ, ਚਤੁਨ੍ਨਮ੍ਪਿ ਖਨ੍ਧਾਨਂ ਅਤ੍ਥਿਤਾ ਹੋਤੂਤਿ ਚੋਦੇਤੁਂ ਅਤ੍ਥਿ ਵੇਦਨਾਕ੍ਖਨ੍ਧੋਤਿ ਆਦਿਮਾਹ. ਇਤਰੋ ਅਨ੍ਤੋਸਮਾਪਤ੍ਤਿਂ ਸਨ੍ਧਾਯ ਪਟਿਕ੍ਖਿਪਤਿ, ਸਮਾਪਜ੍ਜਨ੍ਤਸ੍ਸ ਚ ਵੁਟ੍ਠਹਨ੍ਤਸ੍ਸ ਚ ਪੁਬ੍ਬਾਪਰਭਾਗਂ ਸਨ੍ਧਾਯ ਪਟਿਜਾਨਾਤਿ.

੫੪੩. ਅਸਞ੍ਞਸਤ੍ਤਵਾਰੇਪਿ ਏਸੇਵ ਨਯੋ. ਤਸ੍ਸ ਹਿ ਲਦ੍ਧਿਯਾ ਅਸਞ੍ਞਸਤ੍ਤਾਨਂ ਪਟਿਸਨ੍ਧਿਕਾਲੇ ਚਿਤ੍ਤਂ ਉਪ੍ਪਜ੍ਜਿਤ੍ਵਾ ਨਿਰੁਜ੍ਝਤਿ, ਤੇਨ ਸਹ ਚਿਤ੍ਤਵਿਪ੍ਪਯੁਤ੍ਤਅਰੂਪਜੀਵਿਤਿਨ੍ਦ੍ਰਿਯਂ ਉਪ੍ਪਜ੍ਜਿਤ੍ਵਾ ਯਾਵਤਾਯੁਕਂ ਪਵਤ੍ਤਤਿ. ਤਸ੍ਮਾ ਤੇਸਂ ਜੀਵਿਤਿਨ੍ਦ੍ਰਿਯਂ ਨਤ੍ਥੀਤਿ ਪੁਟ੍ਠੋ ਪਟਿਕ੍ਖਿਪਤਿ, ਅਤ੍ਥੀਤਿ ਪੁਟ੍ਠੋ ਪਟਿਜਾਨਾਤਿ. ਵੇਦਨਾਕ੍ਖਨ੍ਧਾਦਯੋਪਿ ਤੇਸਂ ਪਵਤ੍ਤਿਵਸੇਨ ਪਟਿਕ੍ਖਿਪਤਿ, ਚੁਤਿਪਟਿਸਨ੍ਧਿਵਸੇਨ ਪਟਿਜਾਨਾਤਿ. ਸਕਵਾਦੀ ਪਨ ਤਂ ਅਨਿਚ੍ਛਨ੍ਤੋ ‘‘ਸਚੇ ਤਤ੍ਥ ਏਕਕ੍ਖਣੇਪਿ ਵੇਦਨਾਦਯੋ ਅਤ੍ਥਿ, ਪਞ੍ਚਵੋਕਾਰਭਵਤ੍ਤਂ ਪਾਪੁਣਾਤੀ’’ਤਿ ਚੋਦੇਤੁਂ ਪਞ੍ਚਵੋਕਾਰਭਵੋਤਿ ਆਹ. ਇਤਰੋ ਸੁਤ੍ਤਵਿਰੋਧਭਯਾ ਪਟਿਕ੍ਖਿਪਤਿ.

੫੪੪-੫੪੫. ਏਕਦੇਸਂ ਭਿਜ੍ਜਤੀਤਿ ਪਞ੍ਹੇ ਸਮ੍ਪਯੁਤ੍ਤਂ ਭਿਜ੍ਜਤਿ, ਵਿਪ੍ਪਯੁਤ੍ਤਂ ਤਿਟ੍ਠਤੀਤਿ ਤਸ੍ਸ ਲਦ੍ਧਿ, ਤਸ੍ਮਾ ਪਟਿਜਾਨਾਤਿ. ਦ੍ਵੇ ਜੀਵਿਤਿਨ੍ਦ੍ਰਿਯਾਨੀਤਿ ਪੁਚ੍ਛਾ ਪਰਵਾਦਿਸ੍ਸ, ਪਟਿਞ੍ਞਾ ਸਕਵਾਦਿਸ੍ਸ. ਰੂਪਾਰੂਪਵਸੇਨ ਹਿ ਦ੍ਵੇ ਜੀਵਿਤਿਨ੍ਦ੍ਰਿਯਾਨਿ, ਤੇਹਿਯੇਵ ਸਤ੍ਤੋ ਜੀਵਤਿ, ਤੇਸਂ ਭਙ੍ਗੇਨ ਮਰਤੀਤਿ ਵੁਚ੍ਚਤਿ. ਚੁਤਿਕ੍ਖਣਸ੍ਮਿਞ੍ਹਿ ਦ੍ਵੇਪਿ ਜੀਵਿਤਾਨਿ ਸਹੇਵ ਭਿਜ੍ਜਨ੍ਤਿ.

ਜੀਵਿਤਿਨ੍ਦ੍ਰਿਯਕਥਾਵਣ੍ਣਨਾ.

੧੧. ਕਮ੍ਮਹੇਤੁਕਥਾਵਣ੍ਣਨਾ

੫੪੬. ਇਦਾਨਿ ਕਮ੍ਮਹੇਤੁਕਥਾ ਨਾਮ ਹੋਤਿ. ਤਤ੍ਥ ਯੇਨ ਅਰਹਤਾ ਪੁਰਿਮਭਵੇ ਅਰਹਾ ਅਬ੍ਭਾਚਿਕ੍ਖਿਤਪੁਬ੍ਬੋ, ਸੋ ਤਸ੍ਸ ਕਮ੍ਮਸ੍ਸ ਹੇਤੁ ਅਰਹਤ੍ਤਾ ਪਰਿਹਾਯਤੀਤਿ ਯੇਸਂ ਲਦ੍ਧਿ, ਸੇਯ੍ਯਥਾਪਿ ਪੁਬ੍ਬਸੇਲਿਯਾਨਞ੍ਚੇਵ ਸਮ੍ਮਿਤਿਯਾਨਞ੍ਚ; ਤੇ ਸਨ੍ਧਾਯ ਕਮ੍ਮਹੇਤੂਤਿ ਪੁਚ੍ਛਾ ਸਕਵਾਦਿਸ੍ਸ, ਪਟਿਞ੍ਞਾ ਇਤਰਸ੍ਸ. ਸੇਸਂ ਪਰਿਹਾਨਿਕਥਾਯਂ ਵੁਤ੍ਤਨਯਮੇਵ.

ਹਨ੍ਦ ਹਿ ਅਰਹਨ੍ਤਾਨਂ ਅਬ੍ਭਾਚਿਕ੍ਖਤੀਤਿ ਇਦਂ ਯਸ੍ਸ ਕਮ੍ਮਸ੍ਸ ਹੇਤੁ ਪਰਿਹਾਯਤਿ, ਤਂ ਸਮ੍ਪਟਿਚ੍ਛਾਪੇਤੁਂ ਵਦਤਿ. ਅਥ ਨਂ ਸਕਵਾਦੀ ਤਂ ਪਕ੍ਖਂ ਪਟਿਜਾਨਾਪੇਤ੍ਵਾ ‘‘ਯਦਿ ਏਵਂ ਯੇਹਿ ਅਰਹਨ੍ਤੋ ਨ ਅਬ੍ਭਾਚਿਕ੍ਖਿਤਪੁਬ੍ਬਾ, ਤੇ ਸਬ੍ਬੇ ਅਰਹਤ੍ਤਂ ਪਾਪੁਣੇਯ੍ਯੁ’’ਨ੍ਤਿ ਚੋਦੇਤੁਂ ਯੇ ਕੇਚੀਤਿਆਦਿਮਾਹ. ਇਤਰੋ ਤਸ੍ਸ ਕਮ੍ਮਸ੍ਸ ਅਰਹਤ੍ਤਂ ਸਮ੍ਪਾਪੁਣਨੇ ਨਿਯਾਮਂ ਅਪਸ੍ਸਨ੍ਤੋ ਪਟਿਕ੍ਖਿਪਤਿ.

ਕਮ੍ਮਹੇਤੁਕਥਾਵਣ੍ਣਨਾ.

ਅਟ੍ਠਮੋ ਵਗ੍ਗੋ.