੯. ਅਰਿਯਧਮ੍ਮਵਿਪਾਕਕਥਾਵਣ੍ਣਨਾ

੪੯੮. ਇਦਾਨਿ ਅਰਿਯਧਮ੍ਮਵਿਪਾਕਕਥਾ ਨਾਮ ਹੋਤਿ. ਤਤ੍ਥ ਯੇਸਂ ਕਿਲੇਸਪ੍ਪਹਾਨਮਤ੍ਤਮੇਵ ਸਾਮਞ੍ਞਫਲਂ, ਨ ਚਿਤ੍ਤਚੇਤਸਿਕਾ ਧਮ੍ਮਾਤਿ ਲਦ੍ਧਿ, ਸੇਯ੍ਯਥਾਪਿ ਅਨ੍ਧਕਾਨਂ; ਤੇ ਸਨ੍ਧਾਯ ਨਤ੍ਥਿ ਅਰਿਯਧਮ੍ਮਵਿਪਾਕੋਤਿ ਪੁਚ੍ਛਾ ਸਕਵਾਦਿਸ੍ਸ. ਤਤ੍ਥ ਅਰਿਯਧਮ੍ਮਵਿਪਾਕੋਤਿ ਮਗ੍ਗਸਙ੍ਖਾਤਸ੍ਸ ਅਰਿਯਧਮ੍ਮਸ੍ਸ ਵਿਪਾਕੋ. ਕਿਲੇਸਕ੍ਖਯਮਤ੍ਤਂ ਅਰਿਯਫਲਨ੍ਤਿ ਲਦ੍ਧਿਯਾ ਪਟਿਞ੍ਞਾ ਇਤਰਸ੍ਸ. ਸਾਮਞ੍ਞਨ੍ਤਿ ਸਮਣਭਾਵੋ, ਮਗ੍ਗਸ੍ਸੇਤਂ ਨਾਮਂ. ‘‘ਸਾਮਞ੍ਞਞ੍ਚ ਵੋ, ਭਿਕ੍ਖਵੇ, ਦੇਸੇਸ੍ਸਾਮਿ ਸਾਮਞ੍ਞਫਲਞ੍ਚਾ’’ਤਿ ਹਿ ਵੁਤ੍ਤਂ. ਬ੍ਰਹ੍ਮਞ੍ਞੇਪਿ ਏਸੇਵ ਨਯੋ.

ਸੋਤਾਪਤ੍ਤਿਫਲਂ ਨ ਵਿਪਾਕੋਤਿਆਦੀਸੁ ਸੋਤਾਪਤ੍ਤਿਮਗ੍ਗਾਦੀਨਂ ਅਪਚਯਗਾਮਿਤਂ ਸਨ੍ਧਾਯ ਅਰਿਯਫਲਾਨਂ ਨਵਿਪਾਕਭਾਵਂ ਪਟਿਜਾਨਾਤਿ, ਦਾਨਫਲਾਦੀਨਂ ਪਟਿਕ੍ਖਿਪਤਿ. ਸੋ ਹਿ ਆਚਯਗਾਮਿਤ੍ਤਿਕਸ੍ਸ ਏਵਂ ਅਤ੍ਥਂ ਧਾਰੇਤਿ – ਵਿਪਾਕਸਙ੍ਖਾਤਂ ਆਚਯਂ ਗਚ੍ਛਨ੍ਤਿ, ਤਂ ਵਾ ਆਚਿਨਨ੍ਤਾ ਗਚ੍ਛਨ੍ਤੀਤਿ ਆਚਯਗਾਮਿਨੋ, ਵਿਪਾਕਂ ਅਪਚਿਨਨ੍ਤਾ ਗਚ੍ਛਨ੍ਤੀਤਿ ਅਪਚਯਗਾਮਿਨੋਤਿ. ਤਸ੍ਮਾ ਏਵਂ ਪਟਿਜਾਨਾਤਿ ਚ ਪਟਿਕ੍ਖਿਪਤਿ ਚ.

੫੦੦. ਕਾਮਾਵਚਰਂ ਕੁਸਲਂ ਸਵਿਪਾਕਂ ਆਚਯਗਾਮੀਤਿਆਦਿਕਾ ਪੁਚ੍ਛਾ ਪਰਵਾਦਿਸ੍ਸ, ਪਟਿਞ੍ਞਾ ਚ ਪਟਿਕ੍ਖੇਪੋ ਚ ਸਕਵਾਦਿਸ੍ਸ. ਲੋਕਿਯਞ੍ਹਿ ਕੁਸਲਂ ਵਿਪਾਕਚੁਤਿਪਟਿਸਨ੍ਧਿਯੋ ਚੇਵ ਵਟ੍ਟਞ੍ਚ ਆਚਿਨਨ੍ਤਂ ਗਚ੍ਛਤੀਤਿ ਆਚਯਗਾਮਿ. ਲੋਕੁਤ੍ਤਰਕੁਸਲਂ ਚੁਤਿਪਟਿਸਨ੍ਧਿਯੋ ਚੇਵ ਵਟ੍ਟਞ੍ਚ ਅਪਚਿਨਨ੍ਤਂ ਗਚ੍ਛਤੀਤਿ ਅਪਚਯਗਾਮਿ. ਏਵਮੇਤਂ ਸਵਿਪਾਕਮੇਵ ਹੋਤਿ, ਨ ਅਪਚਯਗਾਮਿਵਚਨਮਤ੍ਤੇਨ ਅਵਿਪਾਕਂ. ਇਮਮਤ੍ਥਂ ਸਨ੍ਧਾਯੇਤ੍ਥ ਸਕਵਾਦਿਨੋ ਪਟਿਞ੍ਞਾ ਚ ਪਟਿਕ੍ਖੇਪੋ ਚ ਵੇਦਿਤਬ੍ਬਾਤਿ.

ਅਰਿਯਧਮ੍ਮਵਿਪਾਕਕਥਾਵਣ੍ਣਨਾ.