੧੦. ਵਿਪਾਕੋ ਵਿਪਾਕਧਮ੍ਮਧਮ੍ਮੋਤਿਕਥਾਵਣ੍ਣਨਾ

੫੦੧. ਇਦਾਨਿ ਵਿਪਾਕੋ ਵਿਪਾਕਧਮ੍ਮਧਮ੍ਮੋਤਿਕਥਾ ਨਾਮ ਹੋਤਿ. ਤਤ੍ਥ ਯਸ੍ਮਾ ਵਿਪਾਕੋ ਵਿਪਾਕਸ੍ਸ ਅਞ੍ਞਮਞ੍ਞਾਦਿਪਚ੍ਚਯਵਸੇਨ ਪਚ੍ਚਯੋ ਹੋਤਿ, ਤਸ੍ਮਾ ਵਿਪਾਕੋਪਿ ਵਿਪਾਕਧਮ੍ਮਧਮ੍ਮੋਤਿ ਯੇਸਂ ਲਦ੍ਧਿ, ਸੇਯ੍ਯਥਾਪਿ ਅਨ੍ਧਕਾਨਂ; ਤੇ ਸਨ੍ਧਾਯ ਪੁਚ੍ਛਾ ਸਕਵਾਦਿਸ੍ਸ, ਪਟਿਞ੍ਞਾ ਇਤਰਸ੍ਸ. ਤਸ੍ਸ ਵਿਪਾਕੋਤਿ ਤਸ੍ਸ ਵਿਪਾਕਧਮ੍ਮਧਮ੍ਮਸ੍ਸ ਵਿਪਾਕਸ੍ਸ ਯੋ ਵਿਪਾਕੋ, ਸੋਪਿ ਤੇ ਵਿਪਾਕਧਮ੍ਮਧਮ੍ਮੋ ਹੋਤੀਤਿ ਪੁਚ੍ਛਤਿ. ਇਤਰੋ ਆਯਤਿਂ ਵਿਪਾਕਦਾਨਾਭਾਵਂ ਸਨ੍ਧਾਯ ਪਟਿਕ੍ਖਿਪਤਿ. ਦੁਤਿਯਂ ਪੁਟ੍ਠੋ ਤਪ੍ਪਚ੍ਚਯਾਪਿ ਅਞ੍ਞਸ੍ਸ ਵਿਪਾਕਸ੍ਸ ਉਪ੍ਪਤ੍ਤਿਂ ਸਨ੍ਧਾਯ ਪਟਿਜਾਨਾਤਿ. ਏਵਂ ਸਨ੍ਤੇ ਪਨਸ੍ਸ ਕੁਸਲਾਕੁਸਲਸ੍ਸ ਵਿਯ ਤਸ੍ਸਾਪਿ ਵਿਪਾਕਸ੍ਸ ਵਿਪਾਕੋ, ਤਸ੍ਸਾਪਿ ਵਿਪਾਕੋਤਿ ਵਟ੍ਟਾਨੁਪਚ੍ਛੇਦੋ ਆਪਜ੍ਜਤੀਤਿ ਪੁਟ੍ਠੋ ਸਮਯਵਿਰੋਧਭਯੇਨ ਪਟਿਕ੍ਖਿਪਤਿ.

ਵਿਪਾਕੋਤਿ ਵਾਤਿਆਦਿਮ੍ਹਿ ਵਚਨਸਾਧਨੇ ਪਨ ਯਦਿ ਵਿਪਾਕਸ੍ਸ ਵਿਪਾਕਧਮ੍ਮਧਮ੍ਮੇਨ ਏਕਤ੍ਥਤਾ ਭਵੇਯ੍ਯ, ਕੁਸਲਾਕੁਸਲਬ੍ਯਾਕਤਾਨਂ ਏਕਤ੍ਥਤਂ ਆਪਜ੍ਜੇਯ੍ਯਾਤਿ ਪਟਿਕ੍ਖਿਪਤਿ. ਵਿਪਾਕੋ ਚ ਵਿਪਾਕਧਮ੍ਮਧਮ੍ਮੋ ਚਾਤਿ ਏਤ੍ਥ ਅਯਂ ਅਧਿਪ੍ਪਾਯੋ – ਸੋ ਹਿ ਚਤੂਸੁ ਵਿਪਾਕਕ੍ਖਨ੍ਧੇਸੁ ਏਕੇਕਂ ਅਞ੍ਞਮਞ੍ਞਪਚ੍ਚਯਾਦੀਸੁ ਪਚ੍ਚਯਟ੍ਠੇਨ ਵਿਪਾਕਧਮ੍ਮਧਮ੍ਮਤਂ ਪਚ੍ਚਯੁਪ੍ਪਨ੍ਨਟ੍ਠੇਨ ਚ ਵਿਪਾਕਂ ਮਞ੍ਞਮਾਨੋ ‘‘ਵਿਪਾਕੋ ਵਿਪਾਕਧਮ੍ਮਧਮ੍ਮੋ’’ਤਿ ਪੁਟ੍ਠੋ ਆਮਨ੍ਤਾਤਿ ਪਟਿਜਾਨਾਤਿ. ਅਥ ਨਂ ਸਕਵਾਦੀ ‘‘ਯਸ੍ਮਾ ਤਯਾ ਏਕਕ੍ਖਣੇ ਚਤੂਸੁ ਖਨ੍ਧੇਸੁ ਵਿਪਾਕੋ ਵਿਪਾਕਧਮ੍ਮਧਮ੍ਮੋਪਿ ਅਨੁਞ੍ਞਾਤੋ, ਤਸ੍ਮਾ ਤੇਸਂ ਸਹਗਤਾਦਿਭਾਵੋ ਆਪਜ੍ਜਤੀ’’ਤਿ ਚੋਦੇਤੁਂ ਏਵਮਾਹ. ਇਤਰੋ ਕੁਸਲਾਕੁਸਲਸਙ੍ਖਾਤਂ ਵਿਪਾਕਧਮ੍ਮਧਮ੍ਮਂ ਸਨ੍ਧਾਯ ਪਟਿਕ੍ਖਿਪਤਿ. ਤਞ੍ਞੇਵ ਅਕੁਸਲਨ੍ਤਿ ਯਦਿ ਤੇ ਵਿਪਾਕੋ ਵਿਪਾਕਧਮ੍ਮਧਮ੍ਮੋ, ਯੋ ਅਕੁਸਲਵਿਪਾਕੋ, ਸੋ ਅਕੁਸਲਂ ਆਪਜ੍ਜਤਿ. ਕਸ੍ਮਾ? ਵਿਪਾਕਧਮ੍ਮਧਮ੍ਮੇਨ ਏਕਤ੍ਤਾ. ਤਞ੍ਞੇਵ ਕੁਸਲਨ੍ਤਿਆਦੀਸੁਪਿ ਏਸੇਵ ਨਯੋ.

੫੦੨. ਅਞ੍ਞਮਞ੍ਞਪਚ੍ਚਯਾਤਿ ਇਦਂ ਸਹਜਾਤਾਨਂ ਪਚ੍ਚਯਮਤ੍ਤਵਸੇਨ ਵੁਤ੍ਤਂ, ਤਸ੍ਮਾ ਅਸਾਧਕਂ. ਮਹਾਭੂਤਾਨਮ੍ਪਿ ਚ ਅਞ੍ਞਮਞ੍ਞਪਚ੍ਚਯਤਾ ਵੁਤ੍ਤਾ, ਨ ਚ ਤਾਨਿ ਵਿਪਾਕਾਨਿ, ਨ ਚ ਵਿਪਾਕਧਮ੍ਮਧਮ੍ਮਾਨੀਤਿ.

ਵਿਪਾਕੋ ਵਿਪਾਕਧਮ੍ਮਧਮ੍ਮੋਤਿਕਥਾਵਣ੍ਣਨਾ.

ਸਤ੍ਤਮੋ ਵਗ੍ਗੋ.