੮. ਜਰਾਮਰਣਂ ਵਿਪਾਕੋਤਿਕਥਾਵਣ੍ਣਨਾ

੪੯੫. ਇਦਾਨਿ ਜਰਾਮਰਣਂ ਵਿਪਾਕੋਤਿਕਥਾ ਨਾਮ ਹੋਤਿ. ਤਤ੍ਥ ਯੇਸਂ ‘‘ਅਤ੍ਥਿ ਦੁਬ੍ਬਣ੍ਣਸਂਵਤ੍ਤਨਿਯਂ ਕਮ੍ਮਂ ਅਪ੍ਪਾਯੁਕਸਂਵਤ੍ਤਨਿਯਂ ਕਮ੍ਮ’’ਨ੍ਤਿ ਏਤ੍ਥ ਦੁਬ੍ਬਣ੍ਣਤਾ ਨਾਮ ਜਰਾ. ਅਪ੍ਪਾਯੁਕਤਾ ਨਾਮ ਮਰਣਂ. ਤਂਸਂਵਤ੍ਤਨਿਯਞ੍ਚ ਕਮ੍ਮਂ ਅਤ੍ਥਿ. ਤਸ੍ਮਾ ਜਰਾਮਰਣਂ ਵਿਪਾਕੋਤਿ ਲਦ੍ਧਿ, ਸੇਯ੍ਯਥਾਪਿ ਅਨ੍ਧਕਾਨਂ; ਤੇ ਸਨ੍ਧਾਯ ਪੁਚ੍ਛਾ ਸਕਵਾਦਿਸ੍ਸ, ਪਟਿਞ੍ਞਾ ਇਤਰਸ੍ਸ. ਪਟਿਲੋਮਪਞ੍ਹੇ ਅਨਾਰਮ੍ਮਣਨ੍ਤਿ ਰੂਪਧਮ੍ਮਾਨਂ ਤਾਵ ਅਨਾਰਮ੍ਮਣਮੇਵ, ਅਰੂਪਾਨਂ ਪਨ ਜਰਾਮਰਣਂ ਸਮ੍ਪਯੋਗਲਕ੍ਖਣਾਭਾਵਾ ਅਨਾਰਮ੍ਮਣਮੇਵ.

੪੯੬. ਅਕੁਸਲਾਨਂ ਧਮ੍ਮਾਨਂ ਜਰਾਮਰਣਂ ਅਕੁਸਲਾਨਂ ਧਮ੍ਮਾਨਂ ਵਿਪਾਕੋਤਿ ਪਞ੍ਹੇ ਜਰਾਮਰਣੇਨ ਨਾਮ ਅਨਿਟ੍ਠਵਿਪਾਕੇਨ ਭਵਿਤਬ੍ਬਨ੍ਤਿ ਲਦ੍ਧਿਯਾ ਪਟਿਜਾਨਾਤਿ. ਤੇਨੇਵ ਕਾਰਣੇਨ ਕੁਸਲਾਨਂ ਧਮ੍ਮਾਨਂ ਜਰਾਮਰਣਸ੍ਸ ਕੁਸਲਵਿਪਾਕਤਂ ਪਟਿਕ੍ਖਿਪਤਿ. ਪਰਤੋ ਚਸ੍ਸ ਅਕੁਸਲਵਿਪਾਕਤਞ੍ਞੇਵ ਪਟਿਜਾਨਾਤਿ.

ਕੁਸਲਾਨਞ੍ਚ ਅਕੁਸਲਾਨਞ੍ਚਾਤਿ ਪੁਚ੍ਛਾਵਸੇਨ ਏਕਤੋ ਕਤਂ, ਏਕਕ੍ਖਣੇ ਪਨ ਤਂ ਨਤ੍ਥਿ. ਅਬ੍ਯਾਕਤਾਨਂ ਅਵਿਪਾਕਾਨਂ ਜਰਾਮਰਣਂ ਵਿਪਾਕੋਤਿ ਵਤ੍ਤਬ੍ਬਤਾਯ ਪਰਿਯਾਯੋ ਨਤ੍ਥਿ, ਤਸ੍ਮਾ ਅਬ੍ਯਾਕਤਵਸੇਨ ਪੁਚ੍ਛਾ ਨ ਕਤਾ.

੪੯੭. ਦੁਬ੍ਬਣ੍ਣਸਂਵਤ੍ਤਨਿਯਨ੍ਤਿ ਏਤ੍ਥ ਦੁਬ੍ਬਣ੍ਣਿਯਂ ਨਾਮ ਅਪਰਿਸੁਦ੍ਧਵਣ੍ਣਤਾ. ਅਪ੍ਪਾਯੁਕਤਾ ਨਾਮ ਆਯੁਨੋ ਚਿਰਂ ਪਵਤ੍ਤਿਤੁਂ ਅਸਮਤ੍ਥਤਾ. ਤਤ੍ਥ ਅਕੁਸਲਕਮ੍ਮਂ ਕਮ੍ਮਸਮੁਟ੍ਠਾਨਸ੍ਸ ਦੁਬ੍ਬਣ੍ਣਰੂਪਸ੍ਸ ਕਮ੍ਮਪਚ੍ਚਯੋ ਹੋਤਿ, ਅਸਦਿਸਤ੍ਤਾ ਪਨਸ੍ਸ ਤਂਵਿਪਾਕੋ ਨ ਹੋਤਿ. ਉਤੁਸਮੁਟ੍ਠਾਨਾਦਿਨੋ ਪਨ ਤਂਪਟਿਲਾਭਵਸੇਨ ਆਯੁਨੋ ਚ ਉਪਚ੍ਛੇਦਕਵਸੇਨ ਪਚ੍ਚਯੋ ਹੋਤਿ. ਏਵਮੇਤਂ ਪਰਿਯਾਯੇਨ ਤਂਸਂਵਤ੍ਤਨਿਕਂ ਨਾਮ ਹੋਤਿ, ਨ ਵਿਪਾਕਫਸ੍ਸਾਦੀਨਂ ਵਿਯ ਜਨਕਵਸੇਨ, ਤਸ੍ਮਾ ਵਿਪਾਕਭਾਵੇ ਅਸਾਧਕਂ. ਸੇਸਮੇਤ੍ਥ ਹੇਟ੍ਠਾ ਵੁਤ੍ਤਸਦਿਸਮੇਵਾਤਿ.

ਜਰਾਮਰਣਂ ਵਿਪਾਕੋਤਿਕਥਾਵਣ੍ਣਨਾ.