੭. ਪਥਵੀਕਮ੍ਮਵਿਪਾਕੋਤਿਕਥਾਵਣ੍ਣਨਾ

੪੯੨. ਇਦਾਨਿ ਪਥਵੀ ਕਮ੍ਮਵਿਪਾਕੋਤਿਕਥਾ ਨਾਮ ਹੋਤਿ. ਤਤ੍ਥ ਯਸ੍ਮਾ ‘‘ਅਤ੍ਥਿ ਇਸ੍ਸਰਿਯਸਂਵਤ੍ਤਨਿਯਂ ਕਮ੍ਮਂ, ਆਧਿਪਚ੍ਚਸਂਵਤ੍ਤਨਿਯਂ ਕਮ੍ਮ’’ਨ੍ਤਿ ਏਤ੍ਥ ਇਸ੍ਸਰਾਨਂ ਭਾਵੋ ਇਸ੍ਸਰਿਯਂ ਨਾਮ, ਅਧਿਪਤੀਨਞ੍ਚ ਭਾਵੋ ਆਧਿਪਚ੍ਚਂ ਨਾਮ, ਪਥਵਿਸ੍ਸਰਿਯਆਧਿਪਚ੍ਚਸਂਵਤ੍ਤਨਿਕਞ੍ਚ ਕਮ੍ਮਂ ਅਤ੍ਥੀਤਿ ਵੁਤ੍ਤਂ. ਤਸ੍ਮਾ ਯੇਸਂ ‘‘ਪਥਵੀ ਕਮ੍ਮਵਿਪਾਕੋ’’ਤਿ ਲਦ੍ਧਿ, ਸੇਯ੍ਯਥਾਪਿ ਅਨ੍ਧਕਾਨਂ; ਤੇ ਸਨ੍ਧਾਯ ਪਥਵੀਤਿ ਪੁਚ੍ਛਾ ਸਕਵਾਦਿਸ੍ਸ, ਪਟਿਞ੍ਞਾ ਇਤਰਸ੍ਸ. ਸੁਖਵੇਦਨੀਯਾਤਿਆਦਿ ਕਮ੍ਮਵਿਪਾਕਸਭਾਵਦਸ੍ਸਨਵਸੇਨ ਵੁਤ੍ਤਂ. ‘‘ਫਸ੍ਸੋ ਹੋਤੀ’’ਤਿਆਦਿਨਾ ਨਯੇਨ ਨਿਦ੍ਦਿਟ੍ਠੇਸੁ ਵਿਪਾਕੇਸੁ ਫਸ੍ਸੋ ਸੁਖਵੇਦਨੀਯਾਦਿਭੇਦੋ ਹੋਤਿ. ਸੋ ਚ ਸਞ੍ਞਾਦਯੋ ਚ ਸੁਖਵੇਦਨਾਦੀਹਿ ਸਮ੍ਪਯੁਤ੍ਤਾ, ਵੇਦਨਾਦਯੋ ਸਞ੍ਞਾਦੀਹਿ, ਸਬ੍ਬੇਪਿ ਸਾਰਮ੍ਮਣਾ, ਅਤ੍ਥਿ ਚ ਨੇਸਂ ਪੁਰੇਚਾਰਿਕਆਵਟ੍ਟਨਾਦਿਸਙ੍ਖਾਤਂ ਆਵਜ੍ਜਨਂ, ਕਮ੍ਮਪਚ੍ਚਯਭੂਤਾ ਚੇਤਨਾ, ਯੋ ਤਤ੍ਥ ਇਟ੍ਠਵਿਪਾਕੋ, ਤਸ੍ਸ ਪਤ੍ਥਨਾ, ਪਣਿਧਾਨਵਸੇਨ ਪਵਤ੍ਤਾ ਮੂਲਤਣ੍ਹਾ, ਕਿਂ ਤੇ ਏਵਰੂਪਾ ਪਥਵੀਤਿ ਪੁਚ੍ਛਤਿ. ਇਤਰੋ ਪਟਿਕ੍ਖਿਪਤਿ. ਪਟਿਲੋਮਪੁਚ੍ਛਾਦੀਨਿ ਉਤ੍ਤਾਨਤ੍ਥਾਨੇਵ.

੪੯੩. ਕਮ੍ਮਵਿਪਾਕੋ ਪਰੇਸਂ ਸਾਧਾਰਣੋਤਿ ਪਞ੍ਹੇ ਫਸ੍ਸਾਦਯੋ ਸਨ੍ਧਾਯ ਪਟਿਕ੍ਖਿਪਤਿ, ਕਮ੍ਮਸਮੁਟ੍ਠਾਨਂ ਰੂਪਞ੍ਚ ਪਥਵੀਆਦੀਨਂਯੇਵ ਚ ਸਾਧਾਰਣਭਾਵਂ ਸਨ੍ਧਾਯ ਪਟਿਜਾਨਾਤਿ. ਅਸਾਧਾਰਣਮਞ੍ਞੇਸਨ੍ਤਿ ਸੁਤ੍ਤਂ ਪਰਸਮਯਤੋ ਆਹਰਿਤ੍ਵਾ ਦਸ੍ਸਿਤਂ. ਸਬ੍ਬੇ ਸਤ੍ਤਾ ਪਥਵਿਂ ਪਰਿਭੁਞ੍ਜਨ੍ਤੀਤਿ ਪਞ੍ਹੇ ਪਥਵਿਂ ਅਨਿਸ੍ਸਿਤੇ ਸਨ੍ਧਾਯ ਪਟਿਕ੍ਖਿਪਤਿ, ਨਿਸ੍ਸਿਤੇ ਸਨ੍ਧਾਯ ਪਟਿਜਾਨਾਤਿ. ਪਥਵਿਂ ਅਪਰਿਭੁਞ੍ਜਿਤ੍ਵਾ ਪਰਿਨਿਬ੍ਬਾਯਨ੍ਤੀਤਿ ਪਞ੍ਹੇ ਆਰੁਪ੍ਪੇ ਪਰਿਨਿਬ੍ਬਾਯਨ੍ਤਾਨਂ ਵਸੇਨ ਪਟਿਜਾਨਾਤਿ. ਕਮ੍ਮਵਿਪਾਕਂ ਅਖੇਪੇਤ੍ਵਾਤਿ ਇਦਂ ਪਰਸਮਯਵਸੇਨ ਵੁਤ੍ਤਂ. ਕਮ੍ਮਵਿਪਾਕਞ੍ਹਿ ਖੇਪੇਤ੍ਵਾਵ ਪਰਿਨਿਬ੍ਬਾਯਨ੍ਤੀਤਿ ਤੇਸਂ ਲਦ੍ਧਿ. ਸਕਸਮਯੇ ਪਨ ਕਤੋਕਾਸਸ੍ਸ ਕਮ੍ਮਸ੍ਸ ਉਪ੍ਪਨ੍ਨਂ ਵਿਪਾਕਂ ਅਖੇਪੇਤ੍ਵਾ ਪਰਿਨਿਬ੍ਬਾਨਂ ਨਤ੍ਥਿ. ਤੇਸਞ੍ਚ ਲਦ੍ਧਿਯਾ ਪਥਵੀ ਸਾਧਾਰਣਵਿਪਾਕਤ੍ਤਾ ਉਪ੍ਪਨ੍ਨਵਿਪਾਕੋਯੇਵ ਹੋਤਿ. ਤਂ ਵਿਪਾਕਭਾਵੇਨ ਠਿਤਂ ਅਖੇਪੇਤ੍ਵਾ ਪਰਿਨਿਬ੍ਬਾਨਂ ਨ ਯੁਜ੍ਜਤੀਤਿ ਚੋਦੇਤੁਂ ਵਟ੍ਟਤਿ. ਇਤਰੋ ਲਦ੍ਧਿਵਸੇਨ ਪਟਿਕ੍ਖਿਪਤਿ. ਚਕ੍ਕਵਤ੍ਤਿਸਤ੍ਤਸ੍ਸ ਕਮ੍ਮਵਿਪਾਕਨ੍ਤਿ ਪਞ੍ਹੇ ਅਸਾਧਾਰਣਂ ਫਸ੍ਸਾਦਿਂ ਸਨ੍ਧਾਯ ਪਟਿਕ੍ਖਿਪਤਿ, ਸਾਧਾਰਣਂ ਸਨ੍ਧਾਯ ਪਟਿਜਾਨਾਤਿ. ਪਥਵੀਸਮੁਦ੍ਦਸੂਰਿਯਚਨ੍ਦਿਮਾਦਯੋ ਹਿ ਸਬ੍ਬੇਸਂ ਸਾਧਾਰਣਕਮ੍ਮਵਿਪਾਕੋਤਿ ਤੇਸਂ ਲਦ੍ਧਿ.

੪੯੪. ਇਸ੍ਸਰਿਯਸਂਵਤ੍ਤਨਿਯਨ੍ਤਿ ਏਤ੍ਥ ਇਸ੍ਸਰਿਯਂ ਨਾਮ ਬਹੁਧਨਤਾ. ਆਧਿਪਚ੍ਚਂ ਨਾਮ ਸੇਸਜਨੇ ਅਤ੍ਤਨੋ ਵਸੇ ਵਤ੍ਤੇਤ੍ਵਾ ਤੇਹਿ ਗਰੁਕਾਤਬ੍ਬਟ੍ਠੇਨ ਅਧਿਪਤਿਭਾਵੋ. ਤਤ੍ਥ ਕਮ੍ਮਂ ਪਟਿਲਾਭਵਸੇਨ ਤਂਸਂਵਤ੍ਤਨਿਕਂ ਨਾਮ ਹੋਤਿ, ਨ ਜਨਕਵਸੇਨ. ਤਸ੍ਮਾ ਵਿਪਾਕਭਾਵੇ ਅਸਾਧਕਮੇਤਨ੍ਤਿ.

ਪਥਵੀ ਕਮ੍ਮਵਿਪਾਕੋਤਿਕਥਾਵਣ੍ਣਨਾ.