੬. ਇਤੋਦਿਨ੍ਨਕਥਾਵਣ੍ਣਨਾ

੪੮੮-੪੯੧. ਇਦਾਨਿ ਇਤੋ ਦਿਨ੍ਨਕਥਾ ਨਾਮ ਹੋਤਿ. ਤਤ੍ਥ ਯੇਸਂ ‘‘ਇਤੋ ਦਿਨ੍ਨੇਨ ਯਾਪੇਨ੍ਤਿ, ਪੇਤਾ ਕਾਲਙ੍ਕਤਾ ਤਹਿ’’ਨ੍ਤਿ (ਪੇ. ਵ. ੧੯) ਵਚਨਂ ਨਿਸ੍ਸਾਯ ‘‘ਯਂ ਇਤੋ ਚੀਵਰਾਦਿ ਦਿਨ੍ਨਂ ਤੇਨੇਵ ਯਾਪੇਨ੍ਤੀ’’ਤਿ ਲਦ੍ਧਿ, ਸੇਯ੍ਯਥਾਪਿ ਰਾਜਗਿਰਿਕਸਿਦ੍ਧਤ੍ਥਿਕਾਨਂ; ਤੇ ਸਨ੍ਧਾਯ ਇਤੋ ਦਿਨ੍ਨੇਨਾਤਿ ਪੁਚ੍ਛਾ ਸਕਵਾਦਿਸ੍ਸ, ਪਟਿਞ੍ਞਾ ਇਤਰਸ੍ਸ. ਪੁਨ ਚੀਵਰਾਦਿਵਸੇਨ ਅਨੁਯੁਤ੍ਤੋ ਪਟਿਕ੍ਖਿਪਤਿ. ਅਞ੍ਞੋ ਅਞ੍ਞਸ੍ਸ ਕਾਰਕੋਤਿ ਅਞ੍ਞਸ੍ਸ ਵਿਪਾਕਦਾਯਕਾਨਂ ਕਮ੍ਮਾਨਂ ਅਞ੍ਞੋ ਕਾਰਕੋ, ਨ ਅਤ੍ਤਨਾਵ ਅਤ੍ਤਨੋ ਕਮ੍ਮਂ ਕਰੋਤੀਤਿ ਵੁਤ੍ਤਂ ਹੋਤਿ. ਏਵਂ ਪੁਟ੍ਠੋ ਪਨ ਇਤਰੋ ਸੁਤ੍ਤਵਿਰੋਧਭਯੇਨ ਪਟਿਕ੍ਖਿਪਤਿ. ਦਾਨਂ ਦੇਨ੍ਤਨ੍ਤਿ ਦਾਨਂ ਦਦਮਾਨਂ ਦਿਸ੍ਵਾਤਿ ਅਤ੍ਥੋ. ਤਤ੍ਥ ਯਸ੍ਮਾ ਅਤ੍ਤਨੋ ਅਨੁਮੋਦਿਤਤ੍ਤਾ ਚ ਤੇਸਂ ਤਤ੍ਥ ਭੋਗਾ ਉਪ੍ਪਜ੍ਜਨ੍ਤਿ, ਤਸ੍ਮਾਸ੍ਸ ਇਮਿਨਾ ਕਾਰਣੇਨ ਲਦ੍ਧਿਂ ਪਤਿਟ੍ਠਪੇਨ੍ਤਸ੍ਸਾਪਿ ਅਪ੍ਪਤਿਟ੍ਠਿਤਾਵ ਹੋਤਿ. ਨ ਹਿ ਤੇ ਇਤੋ ਦਿਨ੍ਨੇਨੇਵ ਵਤ੍ਥੁਨਾ ਯਾਪੇਨ੍ਤਿ. ਸੇਸੇਸੁਪਿ ਸੁਤ੍ਤਸਾਧਨੇਸੁ ਏਸੇਵ ਨਯੋਤਿ.

ਇਤੋ ਦਿਨ੍ਨਕਥਾਵਣ੍ਣਨਾ.