੫. ਪਰਿਭੋਗਮਯਪੁਞ੍ਞਕਥਾਵਣ੍ਣਨਾ

੪੮੩. ਇਦਾਨਿ ਪਰਿਭੋਗਮਯਪੁਞ੍ਞਕਥਾ ਨਾਮ ਹੋਤਿ. ਤਤ੍ਥ ‘‘ਤੇਸਂ ਦਿਵਾ ਚ ਰਤ੍ਤੋ ਚ, ਸਦਾ ਪੁਞ੍ਞਂ ਪਵਡ੍ਢਤੀ’’ਤਿ (ਸਂ. ਨਿ. ੧.੪੭) ਚ ‘‘ਯਸ੍ਸ ਭਿਕ੍ਖਵੇ, ਭਿਕ੍ਖੁ ਚੀਵਰਂ ਪਰਿਭੁਞ੍ਜਮਾਨੋ’’ਤਿ (ਅ. ਨਿ. ੪.੫੧) ਚ ਏਵਮਾਦੀਨਿ ਸੁਤ੍ਤਾਨਿ ਅਯੋਨਿਸੋ ਗਹੇਤ੍ਵਾ ਯੇਸਂ ਪਰਿਭੋਗਮਯਂ ਨਾਮ ਪੁਞ੍ਞਂ ਅਤ੍ਥੀ’’ਤਿ ਲਦ੍ਧਿ, ਸੇਯ੍ਯਥਾਪਿ ਰਾਜਗਿਰਿਕਸਿਦ੍ਧਤ੍ਥਿਕਸਮ੍ਮਿਤਿਯਾਨਂ; ਤੇ ਸਨ੍ਧਾਯ ਪਰਿਭੋਗਮਯਨ੍ਤਿ ਪੁਚ੍ਛਾ ਸਕਵਾਦਿਸ੍ਸ, ਪਟਿਞ੍ਞਾ ਇਤਰਸ੍ਸ. ਅਥ ਨਂ ‘‘ਪੁਞ੍ਞਂ ਨਾਮ ਫਸ੍ਸਾਦਯੋ ਕੁਸਲਾ ਧਮ੍ਮਾ, ਨ ਤਤੋ ਪਰਂ, ਤਸ੍ਮਾ ਫਸ੍ਸਾਦੀਹਿ ਤੇ ਵਡ੍ਢਿਤਬ੍ਬ’’ਨ੍ਤਿ ਚੋਦੇਤੁਂ ਪਰਿਭੋਗਮਯੋ ਫਸ੍ਸੋਤਿਆਦਿ ਆਰਦ੍ਧਂ. ਤਂ ਸਬ੍ਬਂ ਇਤਰੇਨ ਤੇਸਂ ਅਵਡ੍ਢਨਤੋ ਪਟਿਕ੍ਖਿਤ੍ਤਂ. ਲਤਾਵਿਯਾਤਿਆਦੀਨਿ ‘‘ਕਿਰਿਯਾਯ ਵਾ ਭਾਵਨਾਯ ਵਾ ਵਿਨਾਪਿ ਯਥਾ ਲਤਾਦੀਨਿ ਸਯਮੇਵ ਵਡ੍ਢਨ੍ਤਿ, ਕਿਂ ਤੇ ਏਵਂ ਵਡ੍ਢਨ੍ਤੀ’’ਤਿ ਚੋਦਨਤ੍ਥਂ ਵੁਤ੍ਤਾਨਿ. ਤਥਾ ਪਨਸ੍ਸ ਅਵਡ੍ਢਨਤੋ ਨ ਹੇਵਾਤਿ ਪਟਿਕ੍ਖਿਤ੍ਤਂ.

੪੮੪. ਨ ਸਮਨ੍ਨਾਹਰਤੀਤਿ ਪਞ੍ਹੇ ਪਟਿਗ੍ਗਾਹਕਾਨਂ ਪਰਿਭੋਗੇਨ ਪੁਰਿਮਚੇਤਨਾ ਵਡ੍ਢਤਿ, ਏਵਂ ਤਂ ਹੋਤਿ ਪੁਞ੍ਞਨ੍ਤਿ ਲਦ੍ਧਿਵਸੇਨ ਪਟਿਜਾਨਾਤਿ. ਤਤੋ ਅਨਾਵਟ੍ਟੇਨ੍ਤਸ੍ਸਾਤਿਆਦੀਹਿ ਪੁਟ੍ਠੋ ਦਾਯਕਸ੍ਸ ਚਾਗਚੇਤਨਂ ਸਨ੍ਧਾਯ ਪਟਿਕ੍ਖਿਪਤਿ. ਤਤ੍ਥ ਅਨਾਵਟ੍ਟੇਨ੍ਤਸ੍ਸਾਤਿ ਦਾਨਚੇਤਨਾਯ ਪੁਰੇਚਾਰਿਕੇਨ ਆਵਜ੍ਜਨੇਨ ਭਵਙ੍ਗਂ ਅਨਾਵਟ੍ਟੇਨ੍ਤਸ੍ਸ ਅਪਰਿਵਟ੍ਟੇਨ੍ਤਸ੍ਸ. ਅਨਾਭੋਗਸ੍ਸਾਤਿ ਨਿਰਾਭੋਗਸ੍ਸ. ਅਸਮਨ੍ਨਾਹਰਨ੍ਤਸ੍ਸਾਤਿ ਨ ਸਮਨ੍ਨਾਹਰਨ੍ਤਸ੍ਸ. ਆਵਜ੍ਜਨਞ੍ਹਿ ਭਵਙ੍ਗਂ ਵਿਚ੍ਛਿਨ੍ਦਿਤ੍ਵਾ ਅਤ੍ਤਨੋ ਗਤਮਗ੍ਗੇ ਉਪ੍ਪਜ੍ਜਮਾਨਂ ਦਾਨਚੇਤਨਂ ਸਮਨ੍ਨਾਹਰਤਿ ਨਾਮ. ਏਵਂਕਿਚ੍ਚੇਨ ਇਮਿਨਾ ਚਿਤ੍ਤੇਨ ਅਸਮਨ੍ਨਾਹਰਨ੍ਤਸ੍ਸ ਪੁਞ੍ਞਂ ਹੋਤੀਤਿ ਪੁਚ੍ਛਤਿ. ਅਮਨਸਿਕਰੋਨ੍ਤਸ੍ਸਾਤਿ ਮਨਂ ਅਕਰੋਨ੍ਤਸ੍ਸ. ਆਵਜ੍ਜਨੇਨ ਹਿ ਤਦਨਨ੍ਤਰਂ ਉਪ੍ਪਜ੍ਜਮਾਨਂ ਮਨਂ ਕਰੋਤਿ ਨਾਮ. ਏਵਂ ਅਕਰੋਨ੍ਤਸ੍ਸਾਤਿ ਅਤ੍ਥੋ. ਉਪਯੋਗਵਚਨਸ੍ਮਿਞ੍ਹਿ ਏਤਂ ਭੁਮ੍ਮਂ. ਅਚੇਤਯਨ੍ਤਸ੍ਸਾਤਿ ਚੇਤਨਂ ਅਨੁਪ੍ਪਾਦੇਨ੍ਤਸ੍ਸ. ਅਪਤ੍ਥੇਨ੍ਤਸ੍ਸਾਤਿ ਪਤ੍ਥਨਾਸਙ੍ਖਾਤਂ ਕੁਸਲਚ੍ਛਨ੍ਦਂ ਅਕਰੋਨ੍ਤਸ੍ਸ. ਅਪ੍ਪਣਿਦਹਨ੍ਤਸ੍ਸਾਤਿ ਦਾਨਚੇਤਨਾਵਸੇਨ ਚਿਤ੍ਤਂ ਅਟ੍ਠਪੇਨ੍ਤਸ੍ਸਾਤਿ ਅਤ੍ਥੋ. ਨਨੁ ਆਵਟ੍ਟੇਨ੍ਤਸ੍ਸਾਤਿ ਵਾਰੇ ਆਭੋਗਸ੍ਸਾਤਿ ਆਭੋਗਵਤੋ. ਅਥ ਵਾ ਆਭੋਗਾ ਅਸ੍ਸ, ਆਭੋਗਸ੍ਸ ਵਾ ਅਨਨ੍ਤਰਂ ਤਂ ਪੁਞ੍ਞਂ ਹੋਤੀਤਿ ਅਤ੍ਥੋ.

੪੮੫. ਦ੍ਵਿਨ੍ਨਂ ਫਸ੍ਸਾਨਨ੍ਤਿਆਦੀਸੁਪਿ ਏਕਕ੍ਖਣੇ ਦਾਯਕਸ੍ਸ ਦ੍ਵਿਨ੍ਨਂ ਫਸ੍ਸਾਦੀਨਂ ਅਭਾਵਾ ਪਟਿਕ੍ਖਿਪਤਿ, ਦਾਯਕਸ੍ਸ ਚ ਪਰਿਭੁਞ੍ਜਨ੍ਤਸ੍ਸ ਚਾਤਿ ਉਭਿਨ੍ਨਂ ਫਸ੍ਸਾਦਯੋ ਸਨ੍ਧਾਯ ਪਟਿਜਾਨਾਤਿ. ਅਪਿਚਸ੍ਸ ਪਞ੍ਚਨ੍ਨਂ ਵਿਞ੍ਞਾਣਾਨਂ ਸਮੋਧਾਨਂ ਹੋਤੀਤਿ ਲਦ੍ਧਿ, ਤਸ੍ਸਾਪਿ ਵਸੇਨ ਪਟਿਜਾਨਾਤਿ. ਅਥ ਨਂ ਸਕਵਾਦੀ ਪਰਿਯਾਯਸ੍ਸ ਦ੍ਵਾਰਂਪਿਦਹਿਤ੍ਵਾ ਉਜੁਵਿਪਚ੍ਚਨੀਕਵਸੇਨ ਚੋਦੇਤੁਂ ਕੁਸਲਾਦਿਪਞ੍ਹਂ ਪੁਚ੍ਛਤਿ. ਤਤ੍ਰਾਪਿ ਕੁਸਲਾਕੁਸਲਾਨਂ ਏਕਸ੍ਸੇਕਕ੍ਖਣੇ ਸਮ੍ਪਯੋਗਾਭਾਵਂ ਸਨ੍ਧਾਯ ਪਟਿਕ੍ਖਿਪਤਿ. ਪਰਿਭੋਗਮਯਂ ਪਨ ਚਿਤ੍ਤਵਿਪ੍ਪਯੁਤ੍ਤਂ ਉਪ੍ਪਜ੍ਜਤੀਤਿ ਲਦ੍ਧਿਯਾ ਪਟਿਜਾਨਾਤਿ. ਅਥ ਨਂ ਸਕਵਾਦੀ ਸੁਤ੍ਤੇਨ ਨਿਗ੍ਗਣ੍ਹਾਤਿ.

੪੮੬. ਸੁਤ੍ਤਸਾਧਨੇ ਆਰਾਮਰੋਪਕਾਦੀਨਂ ਅਨੁਸ੍ਸਰਣਪਟਿਸਙ੍ਖਰਣਾਦਿਵਸੇਨ ਅਨ੍ਤਰਨ੍ਤਰਾ ਉਪ੍ਪਜ੍ਜਮਾਨਂ ਪੁਞ੍ਞਂ ਸਨ੍ਧਾਯ ਸਦਾ ਪੁਞ੍ਞਂ ਪਵਡ੍ਢਤੀਤਿ ਵੁਤ੍ਤਂ. ਅਪ੍ਪਮਾਣੋ ਤਸ੍ਸ ਪੁਞ੍ਞਾਭਿਸਨ੍ਦੋਤਿ ਇਦਂ ਅਪ੍ਪਮਾਣਵਿਹਾਰਿਨੋ ਦਿਨ੍ਨਪਚ੍ਚਯਤ੍ਤਾ ਚ ‘‘ਏਵਰੂਪੋ ਮੇ ਚੀਵਰਂ ਪਰਿਭੁਞ੍ਜਤੀ’’ਤਿ ਅਨੁਮੋਦਨਵਸੇਨ ਚ ਵੁਤ੍ਤਂ. ਤਂ ਸੋ ਪਰਿਭੋਗਮਯਨ੍ਤਿ ਸਲ੍ਲਕ੍ਖੇਤਿ. ਯਸ੍ਮਾ ਪਨ ਪਟਿਗ੍ਗਾਹਕੇਨ ਪਟਿਗ੍ਗਹੇਤ੍ਵਾ ਅਪਰਿਭੁਤ੍ਤੇਪਿ ਦੇਯ੍ਯਧਮ੍ਮੇ ਪੁਞ੍ਞਂ ਹੋਤਿਯੇਵ, ਤਸ੍ਮਾ ਸਕਵਾਦੀਵਾਦੋਵ ਬਲਵਾ, ਤਤ੍ਥ ਪਟਿਗ੍ਗਾਹਕੇਨ ਪਟਿਗ੍ਗਹਿਤੇਤਿ ਅਤ੍ਥੋ ਦਟ੍ਠਬ੍ਬੋ. ਸੇਸਂ ਉਤ੍ਤਾਨਤ੍ਥਮੇਵਾਤਿ.

ਪਰਿਭੋਗਮਯਪੁਞ੍ਞਕਥਾਵਣ੍ਣਨਾ.