੪. ਦਾਨਕਥਾਵਣ੍ਣਨਾ

੪੭੮. ਇਦਾਨਿ ਦਾਨਕਥਾ ਨਾਮ ਹੋਤਿ. ਤਤ੍ਥ ਦਾਨਂ ਨਾਮ ਤਿਵਿਧਂ – ਚਾਗਚੇਤਨਾਪਿ, ਵਿਰਤਿਪਿ, ਦੇਯ੍ਯਧਮ੍ਮੋਪਿ. ‘‘ਸਦ੍ਧਾ ਹਿਰਿਯਂ ਕੁਸਲਞ੍ਚ ਦਾਨ’’ਨ੍ਤਿ (ਅ. ਨਿ. ੮.੩੦) ਆਗਤਟ੍ਠਾਨੇ ਚਾਗਚੇਤਨਾ ਦਾਨਂ. ‘‘ਅਭਯਂ ਦੇਤੀ’’ਤਿ (ਅ. ਨਿ. ੮.੩੯) ਆਗਤਟ੍ਠਾਨੇ ਵਿਰਤਿ. ‘‘ਦਾਨਂ ਦੇਤਿ ਅਨ੍ਨਂ ਪਾਨ’’ਨ੍ਤਿ ਆਗਤਟ੍ਠਾਨੇ ਦੇਯ੍ਯਧਮ੍ਮੋ. ਤਤ੍ਥ ਚਾਗਚੇਤਨਾ ‘‘ਦੇਤਿ ਵਾ ਦੇਯ੍ਯਧਮ੍ਮਂ, ਦੇਨ੍ਤਿ ਵਾ ਏਤਾਯ ਦੇਯ੍ਯਧਮ੍ਮ’’ਨ੍ਤਿ ਦਾਨਂ. ਵਿਰਤਿ ਅਵਖਣ੍ਡਨਟ੍ਠੇਨ ਲਵਨਟ੍ਠੇਨ ਵਾ ਦਾਨਂ. ਸਾ ਹਿ ਉਪ੍ਪਜ੍ਜਮਾਨਾ ਭਯਭੇਰਵਾਦਿਸਙ੍ਖਾਤਂ ਦੁਸ੍ਸੀਲ੍ਯਚੇਤਨਂ ਦਾਤਿ ਖਣ੍ਡੇਤਿ ਲੁਨਾਤਿ ਵਾਤਿ ਦਾਨਂ. ਦੇਯ੍ਯਧਮ੍ਮੋ ਦਿਯ੍ਯਤੀਤਿ ਦਾਨਂ. ਏਵਮੇਤਂ ਤਿਵਿਧਮ੍ਪਿ ਅਤ੍ਥਤੋ ਚੇਤਸਿਕੋ ਚੇਵ ਧਮ੍ਮੋ ਦੇਯ੍ਯਧਮ੍ਮੋ ਚਾਤਿ ਦੁਵਿਧਂ ਹੋਤਿ. ਤਤ੍ਥ ਯੇਸਂ ‘‘ਚੇਤਸਿਕੋਵ ਧਮ੍ਮੋ ਦਾਨਂ, ਨ ਦੇਯ੍ਯਧਮ੍ਮੋ’’ਤਿ ਲਦ੍ਧਿ, ਸੇਯ੍ਯਥਾਪਿ ਰਾਜਗਿਰਿਕਸਿਦ੍ਧਤ੍ਥਿਕਾਨਂ; ਤੇ ਸਨ੍ਧਾਯ ਚੇਤਸਿਕੋਤਿ ਪੁਚ੍ਛਾ ਸਕਵਾਦਿਸ੍ਸ, ਪਟਿਞ੍ਞਾ ਇਤਰਸ੍ਸ. ਅਥ ਨਂ ਦੇਯ੍ਯਧਮ੍ਮਵਸੇਨ ਚੋਦੇਤੁਂ ਲਬ੍ਭਾਤਿ ਪੁਚ੍ਛਾ ਸਕਵਾਦਿਸ੍ਸ, ਅਨ੍ਨਾਦੀਨਿ ਵਿਯ ਸੋ ਨ ਸਕ੍ਕਾ ਦਾਤੁਨ੍ਤਿ ਪਟਿਕ੍ਖੇਪੋ ਇਤਰਸ੍ਸ. ਪੁਨ ਦਲ਼੍ਹਂ ਕਤ੍ਵਾ ਪੁਟ੍ਠੇ ‘‘ਅਭਯਂ ਦੇਤੀ’’ਤਿ ਸੁਤ੍ਤਵਸੇਨ ਪਟਿਞ੍ਞਾ ਤਸ੍ਸੇਵ. ਫਸ੍ਸਪਞ੍ਹਾਦੀਸੁ ਪਨ ਫਸ੍ਸਂ ਦੇਤੀਤਿਆਦਿਵੋਹਾਰਂ ਅਪਸ੍ਸਨ੍ਤੋ ਪਟਿਕ੍ਖਿਪਤੇਵ.

੪੭੯. ਅਨਿਟ੍ਠਫਲਨ੍ਤਿਆਦਿ ਅਚੇਤਸਿਕਸ੍ਸ ਧਮ੍ਮਸ੍ਸ ਦਾਨਭਾਵਦੀਪਨਤ੍ਥਂ ਵੁਤ੍ਤਂ. ਨ ਹਿ ਅਚੇਤਸਿਕੋ ਅਨ੍ਨਾਦਿਧਮ੍ਮੋ ਆਯਤਿਂ ਵਿਪਾਕਂ ਦੇਤਿ, ਇਟ੍ਠਫਲਭਾਵਨਿਯਮਨਤ੍ਥਂ ਪਨੇਤਂ ਵੁਤ੍ਤਨ੍ਤਿ ਵੇਦਿਤਬ੍ਬਂ. ਅਯਮ੍ਪਿ ਹੇਤ੍ਥ ਅਧਿਪ੍ਪਾਯੋ – ਯਦਿ ਅਚੇਤਸਿਕੋ ਅਨ੍ਨਾਦਿਧਮ੍ਮੋ ਦਾਨਂ ਭਵੇਯ੍ਯ, ਹਿਤਚਿਤ੍ਤੇਨ ਅਨਿਟ੍ਠਂ ਅਕਨ੍ਤਂ ਭੇਸਜ੍ਜਂ ਦੇਨ੍ਤਸ੍ਸ ਨਿਮ੍ਬਬੀਜਾਦੀਹਿ ਵਿਯ ਨਿਮ੍ਬਾਦਯੋ ਅਨਿਟ੍ਠਮੇਵ ਫਲਂ ਨਿਬ੍ਬਤ੍ਤੇਯ੍ਯ. ਯਸ੍ਮਾ ਪਨੇਤ੍ਥ ਹਿਤਫਰਣਚਾਗਚੇਤਨਾ ਦਾਨਂ, ਤਸ੍ਮਾ ਅਨਿਟ੍ਠੇਪਿ ਦੇਯ੍ਯਧਮ੍ਮੇ ਦਾਨਂ ਇਟ੍ਠਫਲਮੇਵ ਹੋਤੀਤਿ.

ਏਵਂ ਪਰਵਾਦਿਨਾ ਚੇਤਸਿਕਧਮ੍ਮਸ੍ਸ ਦਾਨਭਾਵੇ ਪਤਿਟ੍ਠਾਪਿਤੇ ਸਕਵਾਦੀ ਇਤਰੇਨ ਪਰਿਯਾਯੇਨ ਦੇਯ੍ਯਧਮ੍ਮਸ੍ਸ ਦਾਨਭਾਵਂ ਸਾਧੇਤੁਂ ਦਾਨਂ ਇਟ੍ਠਫਲਂ ਵੁਤ੍ਤਂ ਭਗਵਤਾਤਿਆਦਿਮਾਹ. ਪਰਵਾਦੀ ਪਨ ਚੀਵਰਾਦੀਨਂ ਇਟ੍ਠਵਿਪਾਕਤਂ ਅਪਸ੍ਸਨ੍ਤੋ ਪਟਿਕ੍ਖਿਪਤਿ. ਸੁਤ੍ਤਸਾਧਨਂ ਪਰਵਾਦੀਵਾਦੇਪਿ ਯੁਜ੍ਜਤਿ ਸਕਵਾਦੀਵਾਦੇਪਿ, ਨ ਪਨ ਏਕੇਨਤ੍ਥੇਨ. ਦੇਯ੍ਯਧਮ੍ਮੋ ਇਟ੍ਠਫਲੋਤਿ ਇਟ੍ਠਫਲਭਾਵਮਤ੍ਤਮੇਵ ਪਟਿਕ੍ਖਿਤ੍ਤਂ. ਤਸ੍ਮਾ ਤੇਨ ਹਿ ਨ ਵਤ੍ਤਬ੍ਬਨ੍ਤਿ ਇਟ੍ਠਫਲਭਾਵੇਨੇਵ ਨ ਵਤ੍ਤਬ੍ਬਤਾ ਯੁਜ੍ਜਤਿ. ਦਾਤਬ੍ਬਟ੍ਠੇਨ ਪਨ ਦੇਯ੍ਯਧਮ੍ਮੋ ਦਾਨਮੇਵ. ਦਿਨ੍ਨਞ੍ਹਿ ਦਾਨਾਨਂ ਸਙ੍ਕਰਭਾਵਮੋਚਨਤ੍ਥਮੇਵ ਅਯਂ ਕਥਾਤਿ.

ਦਾਨਕਥਾਵਣ੍ਣਨਾ.