੩. ਅਨਾਸਵਕਥਾਵਣ੍ਣਨਾ

੩੯੧. ਇਦਾਨਿ ਅਨਾਸਵਕਥਾ ਨਾਮ ਹੋਤਿ. ਤਤ੍ਥ ਯੇ ਧਮ੍ਮਾ ਅਨਾਸਵਸ੍ਸ ਅਰਹਤੋ, ਸਬ੍ਬੇ ਤੇ ਅਨਾਸਵਾਤਿ ਯੇਸਂ ਲਦ੍ਧਿ, ਸੇਯ੍ਯਥਾਪਿ ਏਤਰਹਿ ਉਤ੍ਤਰਾਪਥਕਾਨਂ; ਤੇ ਸਨ੍ਧਾਯ ਅਰਹਤੋਤਿ ਪੁਚ੍ਛਾ ਸਕਵਾਦਿਸ੍ਸ, ਪਟਿਞ੍ਞਾ ਇਤਰਸ੍ਸ. ਅਥ ਨਂ ਅਨਾਸਵਾ ਨਾਮ ਮਗ੍ਗਾਦਯੋ, ਕਿਂ ਤਸ੍ਸ ਤੇਯੇਵ ਉਪ੍ਪਜ੍ਜਨ੍ਤੀਤਿ ਚੋਦਨਤ੍ਥਂ ਮਗ੍ਗੋ ਫਲਨ੍ਤਿਆਦਿ ਆਰਦ੍ਧਂ. ਚਕ੍ਖੁ ਅਨਾਸਵਨ੍ਤਿ ਪੁਟ੍ਠੋ ਤਸ੍ਸ ਸਾਸਵਤ੍ਤਾ ਪਟਿਕ੍ਖਿਪਤਿ. ਦੁਤਿਯਂ ਪੁਟ੍ਠੋ ਅਨਾਸਵਸ੍ਸੇਤਨ੍ਤਿ ਪਟਿਜਾਨਾਤਿ.

੩੯੨. ਚੀਵਰਪਞ੍ਹੇ ਏਕੋਵ ਧਮ੍ਮੋ ਅਨਾਸਵੋ ਸਾਸਵੋ ਚ ਹੋਤੀਤਿ ਲਕ੍ਖਣਵਿਰੋਧਭਯਾ ਪਟਿਕ੍ਖਿਪਤਿ. ਦੁਤਿਯਂ ਪੁਟ੍ਠੋ ਅਨਾਸਵਸ੍ਸ ਹੁਤ੍ਵਾ ਸਾਸਵਸ੍ਸ ਹੋਤੀਤਿ ਪਟਿਜਾਨਾਤਿ. ਤਞ੍ਞੇਵ ਅਨਾਸਵਨ੍ਤਿ ਪਞ੍ਹਾਦ੍ਵਯੇਪਿ ਏਸੇਵ ਨਯੋ. ਸਕਵਾਦੀ ਪਨ ਤਞ੍ਞੇਵਾਤਿ ਅਨੁਞ੍ਞਾਤਤ੍ਤਾ ‘‘ਮਗ੍ਗੋ ਅਨਾਸਵੋ ਹੁਤ੍ਵਾ’’ਤਿਆਦੀਹਿ ਚੋਦੇਤਿ. ਇਮਿਨਾ ਉਪਾਯੇਨ ਸਬ੍ਬਤ੍ਥ ਅਤ੍ਥੋ ਵੇਦਿਤਬ੍ਬੋਤਿ.

ਅਨਾਸਵਕਥਾਵਣ੍ਣਨਾ.