੪. ਚਤੁਤ੍ਥਵਗ੍ਗੋ

੧. ਗਿਹਿਸ੍ਸ ਅਰਹਾਤਿਕਥਾਵਣ੍ਣਨਾ

੩੮੭. ਇਦਾਨਿ ਗਿਹਿਸ੍ਸ ਅਰਹਾਤਿ ਕਥਾ ਨਾਮ ਹੋਤਿ. ਤਤ੍ਥ ਯੇਸਂ ਯਸਕੁਲਪੁਤ੍ਤਾਦੀਨਂ ਗਿਹਿਬ੍ਯਞ੍ਜਨੇ ਠਿਤਾਨਂ ਅਰਹਤ੍ਤਪ੍ਪਤ੍ਤਿਂ ਦਿਸ੍ਵਾ ‘‘ਗਿਹਿ ਅਸ੍ਸ ਅਰਹਾ’’ਤਿ ਲਦ੍ਧਿ, ਸੇਯ੍ਯਥਾਪਿ ਏਤਰਹਿ ਉਤ੍ਤਰਾਪਥਕਾਨਂ; ਤੇ ਸਨ੍ਧਾਯ ਪੁਚ੍ਛਾ ਸਕਵਾਦਿਸ੍ਸ. ਤਤ੍ਥ ਗਿਹਿਸ੍ਸਾਤਿ ਯੋ ਗਿਹਿਸਂਯੋਜਨਸਮ੍ਪਯੁਤ੍ਤਤਾਯ ਗਿਹਿ, ਸੋ ਅਰਹਂ ਅਸ੍ਸਾਤਿ ਅਤ੍ਥੋ. ਪਰਵਾਦੀ ਪਨ ਅਧਿਪ੍ਪਾਯਂ ਅਸਲ੍ਲਕ੍ਖੇਤ੍ਵਾ ਗਿਹਿਬ੍ਯਞ੍ਜਨਮਤ੍ਤਮੇਵ ਪਸ੍ਸਨ੍ਤੋ ਪਟਿਜਾਨਾਤਿ. ਇਦਾਨਿਸ੍ਸ ‘‘ਗਿਹਿ ਨਾਮ ਗਿਹਿਸਂਯੋਜਨੇਨ ਹੋਤਿ, ਨ ਬ੍ਯਞ੍ਜਨਮਤ੍ਤੇਨ. ਯਥਾਹ ਭਗਵਾ –

‘ਅਲਙ੍ਕਤੋ ਚੇਪਿ ਸਮਂ ਚਰੇਯ੍ਯ,

ਸਨ੍ਤੋ ਦਨ੍ਤੋ ਨਿਯਤੋ ਬ੍ਰਹ੍ਮਚਾਰੀ;

ਸਬ੍ਬੇਸੁ ਭੂਤੇਸੁ ਨਿਧਾਯ ਦਣ੍ਡਂ,

ਸੋ ਬ੍ਰਾਹ੍ਮਣੋ ਸੋ ਸਮਣੋ ਸ ਭਿਕ੍ਖੂ’’’ਤਿ. (ਧ. ਪ. ੧੪੨);

ਇਮਂ ਨਯਂ ਦਸ੍ਸੇਤੁਂ ਅਤ੍ਥਿ ਅਰਹਤੋਤਿਆਦਿ ਆਰਦ੍ਧਂ. ਤਂ ਸਬ੍ਬਂ ਉਤ੍ਤਾਨਤ੍ਥਮੇਵਾਤਿ.

ਗਿਹਿਸ੍ਸ ਅਰਹਾਤਿਕਥਾਵਣ੍ਣਨਾ.

੨. ਉਪਪਤ੍ਤਿਕਥਾਵਣ੍ਣਨਾ

੩੮੮. ਇਦਾਨਿ ਉਪਪਤ੍ਤਿਕਥਾ ਨਾਮ ਹੋਤਿ. ਤਤ੍ਥ ਯੇਸਂ ‘‘ਓਪਪਾਤਿਕੋ ਹੋਤਿ ਤਤ੍ਥਪਰਿਨਿਬ੍ਬਾਯੀ’’ਤਿਵਚਨਾਨਿ (ਪੁ. ਪ. ੩੫-੪੦) ਅਯੋਨਿਸੋ ਗਹੇਤ੍ਵਾ ਸੁਦ੍ਧਾਵਾਸੇਸੁ ਉਪਪਤ੍ਤਿਯਾ ਅਰਹਾਤਿ ਲਦ੍ਧਿ, ‘‘ਯੇਸਂ ਵਾ ਉਪਹਚ੍ਚਪਰਿਨਿਬ੍ਬਾਯੀ’’ਤਿ ਪਦਂ ਪਰਿਵਤ੍ਤਿਤ੍ਵਾ ‘‘ਉਪਪਜ੍ਜਪਰਿਨਿਬ੍ਬਾਯੀ’’ਤਿ ਪਰਿਯਾਪੁਣਨ੍ਤਾਨਂ ਸਹ ਉਪਪਤ੍ਤਿਯਾ ਅਰਹਾ ਹੋਤੀਤਿ ਲਦ੍ਧਿ, ਸੇਯ੍ਯਥਾਪਿ ਏਤਰਹਿ ਉਤ੍ਤਰਾਪਥਕਾਨਂ; ਤੇ ਸਨ੍ਧਾਯ ਪੁਚ੍ਛਾ ਸਕਵਾਦਿਸ੍ਸ, ਪਟਿਞ੍ਞਾ ਇਤਰਸ੍ਸ. ਤਤ੍ਥ ਯਸ੍ਮਾ ਉਪਪਤ੍ਤਿਚਿਤ੍ਤਂ ਨਾਮ ਲੋਕਿਯਂ, ਤੇਨ ਸੋਤਾਪਨ੍ਨਾਦਯੋਪਿ ਨ ਹੋਨ੍ਤਿ, ਪਗੇਵ ਅਰਹਾ. ਤਸ੍ਮਾਸ੍ਸ ਇਮਂ ਨਯਂ ਦਸ੍ਸੇਤੁਂ ਸਹ ਉਪਪਤ੍ਤਿਯਾ ਸੋਤਾਪਨ੍ਨੋਤਿਆਦਿ ਆਰਦ੍ਧਂ.

੩੮੯. ਸਾਰਿਪੁਤ੍ਤੋਤਿਆਦਿ ਇਮੇਸੁ ਮਹਾਥੇਰੇਸੁ ਕੋ ਏਕੋਪਿ ਸਹ ਉਪਪਤ੍ਤਿਯਾ ਅਰਹਾ ਨਾਮਾਤਿ ਚੋਦਨਤ੍ਥਂ ਵੁਤ੍ਤਂ.

੩੯੦. ਉਪਪਤ੍ਤੇਸਿਯੇਨਾਤਿ ਪਟਿਸਨ੍ਧਿਚਿਤ੍ਤੇਨ. ਤਞ੍ਹਿ ਉਪਪਤ੍ਤਿਂ ਏਸਤਿ ਗਵੇਸਤਿ, ਤਸ੍ਮਾ ਉਪਪਤ੍ਤੇਸਿਯਨ੍ਤਿ ਵੁਚ੍ਚਤਿ. ਸੇਸਮੇਤ੍ਥ ਉਤ੍ਤਾਨਤ੍ਥਮੇਵਾਤਿ.

ਉਪਪਤ੍ਤਿਕਥਾਵਣ੍ਣਨਾ.

੩. ਅਨਾਸਵਕਥਾਵਣ੍ਣਨਾ

੩੯੧. ਇਦਾਨਿ ਅਨਾਸਵਕਥਾ ਨਾਮ ਹੋਤਿ. ਤਤ੍ਥ ਯੇ ਧਮ੍ਮਾ ਅਨਾਸਵਸ੍ਸ ਅਰਹਤੋ, ਸਬ੍ਬੇ ਤੇ ਅਨਾਸਵਾਤਿ ਯੇਸਂ ਲਦ੍ਧਿ, ਸੇਯ੍ਯਥਾਪਿ ਏਤਰਹਿ ਉਤ੍ਤਰਾਪਥਕਾਨਂ; ਤੇ ਸਨ੍ਧਾਯ ਅਰਹਤੋਤਿ ਪੁਚ੍ਛਾ ਸਕਵਾਦਿਸ੍ਸ, ਪਟਿਞ੍ਞਾ ਇਤਰਸ੍ਸ. ਅਥ ਨਂ ਅਨਾਸਵਾ ਨਾਮ ਮਗ੍ਗਾਦਯੋ, ਕਿਂ ਤਸ੍ਸ ਤੇਯੇਵ ਉਪ੍ਪਜ੍ਜਨ੍ਤੀਤਿ ਚੋਦਨਤ੍ਥਂ ਮਗ੍ਗੋ ਫਲਨ੍ਤਿਆਦਿ ਆਰਦ੍ਧਂ. ਚਕ੍ਖੁ ਅਨਾਸਵਨ੍ਤਿ ਪੁਟ੍ਠੋ ਤਸ੍ਸ ਸਾਸਵਤ੍ਤਾ ਪਟਿਕ੍ਖਿਪਤਿ. ਦੁਤਿਯਂ ਪੁਟ੍ਠੋ ਅਨਾਸਵਸ੍ਸੇਤਨ੍ਤਿ ਪਟਿਜਾਨਾਤਿ.

੩੯੨. ਚੀਵਰਪਞ੍ਹੇ ਏਕੋਵ ਧਮ੍ਮੋ ਅਨਾਸਵੋ ਸਾਸਵੋ ਚ ਹੋਤੀਤਿ ਲਕ੍ਖਣਵਿਰੋਧਭਯਾ ਪਟਿਕ੍ਖਿਪਤਿ. ਦੁਤਿਯਂ ਪੁਟ੍ਠੋ ਅਨਾਸਵਸ੍ਸ ਹੁਤ੍ਵਾ ਸਾਸਵਸ੍ਸ ਹੋਤੀਤਿ ਪਟਿਜਾਨਾਤਿ. ਤਞ੍ਞੇਵ ਅਨਾਸਵਨ੍ਤਿ ਪਞ੍ਹਾਦ੍ਵਯੇਪਿ ਏਸੇਵ ਨਯੋ. ਸਕਵਾਦੀ ਪਨ ਤਞ੍ਞੇਵਾਤਿ ਅਨੁਞ੍ਞਾਤਤ੍ਤਾ ‘‘ਮਗ੍ਗੋ ਅਨਾਸਵੋ ਹੁਤ੍ਵਾ’’ਤਿਆਦੀਹਿ ਚੋਦੇਤਿ. ਇਮਿਨਾ ਉਪਾਯੇਨ ਸਬ੍ਬਤ੍ਥ ਅਤ੍ਥੋ ਵੇਦਿਤਬ੍ਬੋਤਿ.

ਅਨਾਸਵਕਥਾਵਣ੍ਣਨਾ.

੪. ਸਮਨ੍ਨਾਗਤਕਥਾਵਣ੍ਣਨਾ

੩੯੩. ਇਦਾਨਿ ਸਮਨ੍ਨਾਗਤਕਥਾ ਨਾਮ ਹੋਤਿ. ਤਤ੍ਥ ਦ੍ਵੇ ਸਮਨ੍ਨਾਗਮਾ ਪਚ੍ਚੁਪ੍ਪਨ੍ਨਕ੍ਖਣੇ ਸਮਙ੍ਗੀਭਾਵਸਮਨ੍ਨਾਗਮੋ ਚ ਰੂਪਾਵਚਰਾਦੀਸੁ ਅਞ੍ਞਤਰਭੂਮਿਪ੍ਪਤ੍ਤਿਤੋ ਪਟਿਲਾਭਸਮਨ੍ਨਾਗਮੋ ਚ. ਸੋ ਯਾਵ ਅਧਿਗਤਵਿਸੇਸਾ ਨ ਪਰਿਹਾਯਤਿ, ਤਾਵਦੇਵ ਲਬ੍ਭਤਿ. ਯੇਸਂ ਪਨ ਠਪੇਤ੍ਵਾ ਇਮੇ ਦ੍ਵੇ ਸਮਨ੍ਨਾਗਮੇ ਅਞ੍ਞੋ ਉਪਪਤ੍ਤਿਧਮ੍ਮਵਸੇਨ ਏਕੋ ਸਮਨ੍ਨਾਗਮੋ ਨਾਮ ਹੋਤੀਤਿ ਲਦ੍ਧਿ, ਸੇਯ੍ਯਥਾਪਿ ਏਤਰਹਿ ਉਤ੍ਤਰਾਪਥਕਾਨਂ, ਤੇਸਂ ਪਤ੍ਤਿਧਮ੍ਮੋ ਨਾਮ ਕੋਚਿ ਨਤ੍ਥੀਤਿ ਅਨੁਬੋਧਨਤ੍ਥਂ ਅਰਹਾ ਚਤੂਹਿ ਫਲੇਹਿ ਸਮਨ੍ਨਾਗਤੋਤਿ ਪੁਚ੍ਛਾ ਸਕਵਾਦਿਸ੍ਸ, ਪਤ੍ਤਿਂ ਸਨ੍ਧਾਯ ਪਟਿਞ੍ਞਾ ਇਤਰਸ੍ਸ. ਅਥਸ੍ਸ ‘‘ਯਦਿ ਤੇ ਅਰਹਾ ਚਤੂਹਿ ਖਨ੍ਧੇਹਿ ਵਿਯ ਚਤੂਹਿ ਫਲੇਹਿ ਸਮਨ੍ਨਾਗਤੋ, ਏਵਂ ਸਨ੍ਤੇ ਯੇ ਚਤੂਸੁ ਫਲੇਸੁ ਚਤ੍ਤਾਰੋ ਫਸ੍ਸਾਦਯੋ, ਤੇਹਿ ਤੇ ਅਰਹਤੋ ਸਮਨ੍ਨਾਗਤਤਾ ਪਾਪੁਣਾਤੀ’’ਤਿ ਚੋਦਨਤ੍ਥਂ ਅਰਹਾ ਚਤੂਹਿ ਫਸ੍ਸੇਹੀਤਿਆਦਿ ਆਰਦ੍ਧਂ. ਤਂ ਸਬ੍ਬਂ ਪਰਵਾਦਿਨਾ ਏਕਕ੍ਖਣੇ ਚਤੁਨ੍ਨਂ ਫਸ੍ਸਾਦੀਨਂ ਅਭਾਵਾ ਪਟਿਕ੍ਖਿਤ੍ਤਂ. ਅਨਾਗਾਮਿਪਞ੍ਹਾਦੀਸੁਪਿ ਏਸੇਵ ਨਯੋ.

੩੯੫. ਸੋਤਾਪਤ੍ਤਿਫਲਂ ਵੀਤਿਵਤ੍ਤੋਤਿ ਨ ਪਠਮਜ੍ਝਾਨਂ ਵਿਯ ਦੁਤਿਯਜ੍ਝਾਨਲਾਭੀ; ਪੁਨ ਅਨੁਪ੍ਪਤ੍ਤਿਯਾ ਪਨ ਵੀਤਿਵਤ੍ਤੋਤਿ ਪੁਚ੍ਛਤਿ. ਸੋਤਾਪਤ੍ਤਿਮਗ੍ਗਨ੍ਤਿਆਦਿ ਯਂ ਵੀਤਿਵਤ੍ਤੋ, ਤੇਨਸ੍ਸ ਪੁਨ ਅਸਮਨ੍ਨਾਗਮਂ ਦਸ੍ਸੇਤੁਂ ਆਰਦ੍ਧਂ.

੩੯੬. ਤੇਹਿ ਚ ਅਪਰਿਹੀਨੋਤਿ ਪਞ੍ਹੇ ਯਸ੍ਮਾ ਯਥਾ ਪਚ੍ਚਨੀਕਸਮੁਦਾਚਾਰੇਨ ਲੋਕਿਯਜ੍ਝਾਨਧਮ੍ਮਾ ਪਰਿਹਾਯਨ੍ਤਿ, ਨ ਏਵਂ ਲੋਕੁਤ੍ਤਰਾ. ਮਗ੍ਗੇਨ ਹਿ ਯੇ ਕਿਲੇਸਾ ਪਹੀਯਨ੍ਤਿ, ਫਲੇਨ ਚ ਪਟਿਪ੍ਪਸ੍ਸਮ੍ਭਨ੍ਤਿ, ਤੇ ਤਥਾ ਪਹੀਨਾਵ ਤਥਾ ਪਟਿਪ੍ਪਸ੍ਸਦ੍ਧਾਯੇਵ ਚ ਹੋਨ੍ਤਿ, ਤਸ੍ਮਾ ਸਕਵਾਦਿਨਾ ਆਮਨ੍ਤਾਤਿ ਪਟਿਞ੍ਞਾਤਂ. ਸ੍ਵਾਯਮਤ੍ਥੋ ਪਰਤੋ ‘‘ਅਰਹਤਾ ਚਤ੍ਤਾਰੋ ਮਗ੍ਗਾ ਪਟਿਲਦ੍ਧਾ’’ਤਿਆਦੀਸੁ ਪਕਾਸਿਤੋਯੇਵ. ਸੇਸਂ ਉਤ੍ਤਾਨਤ੍ਥਮੇਵਾਤਿ.

ਸਮਨ੍ਨਾਗਤਕਥਾਵਣ੍ਣਨਾ.

੫. ਉਪੇਕ੍ਖਾਸਮਨ੍ਨਾਗਤਕਥਾਵਣ੍ਣਨਾ

੩੯੭. ਅਰਹਾ ਛਹਿ ਉਪੇਕ੍ਖਾਹੀਤਿ ਕਥਾਯਪਿ ਇਮਿਨਾਵ ਨਯੇਨ ਅਤ੍ਥੋ ਵੇਦਿਤਬ੍ਬੋ. ਅਰਹਾ ਹਿ ਛਸੁ ਦ੍ਵਾਰੇਸੁ ਉਪੇਕ੍ਖਾਨਂ ਉਪ੍ਪਤ੍ਤਿਭਬ੍ਬਤਾਯ ਤਾਹਿ ਸਮਨ੍ਨਾਗਤੋਤਿ ਵੁਚ੍ਚਤਿ, ਨ ਏਕਕ੍ਖਣੇ ਸਬ੍ਬਾਸਂ ਉਪ੍ਪਤ੍ਤਿਭਾਵੇਨਾਤਿ.

ਉਪੇਕ੍ਖਾਸਮਨ੍ਨਾਗਤਕਥਾਵਣ੍ਣਨਾ.

੬. ਬੋਧਿਯਾਬੁਦ੍ਧੋਤਿਕਥਾਵਣ੍ਣਨਾ

੩੯੮. ਇਦਾਨਿ ਬੋਧਿਯਾ ਬੁਦ੍ਧੋਤਿਕਥਾ ਨਾਮ ਹੋਤਿ. ਤਤ੍ਥ ਬੋਧੀਤਿ ਚਤੁਮਗ੍ਗਞਾਣਸ੍ਸਾਪਿ ਸਬ੍ਬਞ੍ਞੁਤਞ੍ਞਾਣਸ੍ਸਾਪਿ ਅਧਿਵਚਨਂ. ਤਸ੍ਮਾ ਯੇਸਂ ਯਥਾ ਓਦਾਤੇਨ ਵਣ੍ਣੇਨ ਓਦਾਤੋ, ਸਾਮੇਨ ਵਣ੍ਣੇਨ ਸਾਮੋ, ਏਵਂ ਬੋਧਿਯਾ ਬੁਦ੍ਧੋਤਿ ਲਦ੍ਧਿ, ਸੇਯ੍ਯਥਾਪਿ ਏਤਰਹਿ ਉਤ੍ਤਰਾਪਥਕਾਨਂਯੇਵ; ਤੇ ਸਨ੍ਧਾਯ ਪੁਚ੍ਛਾ ਚ ਅਨੁਯੋਗੋ ਚ ਸਕਵਾਦਿਸ੍ਸ, ਪਟਿਞ੍ਞਾ ਚ ਪਟਿਕ੍ਖੇਪੋ ਚ ਇਤਰਸ੍ਸ.

ਅਤੀਤਾਯਾਤਿ ਪਞ੍ਹੇ ਤਸ੍ਮਿਂ ਖਣੇ ਅਭਾਵਤੋ ਪਟਿਕ੍ਖਿਪਤਿ. ਦੁਤਿਯਂ ਪੁਟ੍ਠੋ ਪਟਿਲਾਭਂ ਸਨ੍ਧਾਯ ਪਟਿਜਾਨਾਤਿ. ਪੁਨ ਕਿਚ੍ਚਵਸੇਨ ਪੁਟ੍ਠੋ ਕਿਚ੍ਚਾਭਾਵਤੋ ਪਟਿਕ੍ਖਿਪਤਿ. ਦੁਤਿਯਂ ਪੁਟ੍ਠੋ ਯਂ ਤੇਨ ਤਾਯ ਕਰਣੀਯਂ ਕਤਂ, ਤਤ੍ਥ ਸਮ੍ਮੋਹਾਭਾਵਂ ਪਟਿਜਾਨਾਤਿ. ਲੇਸੋਕਾਸਂ ਪਨ ਅਦਤ੍ਵਾ ਦੁਕ੍ਖਂ ਪਰਿਜਾਨਾਤੀਤਿਆਦਿਨਾ ਨਯੇਨ ਪੁਟ੍ਠੋ ਤਸ੍ਸ ਕਿਚ੍ਚਸ੍ਸ ਅਭਾਵਾ ਪਟਿਕ੍ਖਿਪਤਿ.

ਅਨਾਗਤਪਞ੍ਹੇ ਤਸ੍ਮਿਂ ਖਣੇ ਮਗ੍ਗਞਾਣਸ੍ਸ ਅਭਾਵਾ ਪਟਿਕ੍ਖਿਪਤਿ. ਦੁਤਿਯਂ ਪੁਟ੍ਠੋ ‘‘ਅਗਮਾ ਰਾਜਗਹਂ ਬੁਦ੍ਧੋ’’ਤਿ (ਸੁ. ਨਿ. ੪੧੦) ਅਨਾਗਤਾਯ ਬੋਧਿਯਾ ਬੁਦ੍ਧਭਾਵਂ ਮਞ੍ਞਮਾਨੋ ਪਟਿਜਾਨਾਤਿ. ਬੋਧਿਕਰਣੀਯਂ ਕਰੋਤੀਤਿ ਪੁਟ੍ਠੋ ਤਸ੍ਮਿਂ ਖਣੇ ਕਿਚ੍ਚਾਭਾਵੇਨ ਪਟਿਕ੍ਖਿਪਤਿ. ਦੁਤਿਯਂ ਪੁਟ੍ਠੋ ਯਦਿ ਨ ਕਰੇਯ੍ਯ, ਬੁਦ੍ਧੋਤਿ ਨ ਵੁਚ੍ਚੇਯ੍ਯ. ਯਸ੍ਮਾ ਅਵਸ੍ਸਂ ਕਰਿਸ੍ਸਤਿ, ਤਸ੍ਮਾ ਕਰੋਤਿਯੇਵ ਨਾਮਾਤਿ ਪਟਿਜਾਨਾਤਿ. ਪੁਨ ਲੇਸੋਕਾਸਂ ਅਦਤ੍ਵਾ ਪੁਟ੍ਠੋ ਪਟਿਕ੍ਖਿਪਤਿ. ਪਚ੍ਚੁਪ੍ਪਨ੍ਨਪਞ੍ਹੋ ਸਦ੍ਧਿਂ ਸਂਸਨ੍ਦਨਾਯ ਉਤ੍ਤਾਨਤ੍ਥੋਵ.

੩੯੯. ਤਿਸ੍ਸੋ ਬੋਧਿਯੋ ਏਕਤੋ ਕਤ੍ਵਾ ਪੁਟ੍ਠੋ ਸਬ੍ਬਞ੍ਞੁਤਞ੍ਞਾਣਂ ਸਨ੍ਧਾਯ ਤੀਹਿਪਿ ਬੁਦ੍ਧੋਤਿ ਵਤ੍ਤਬ੍ਬਭਾਵਤੋ ਪਟਿਜਾਨਾਤਿ. ਪੁਨ ਤੀਹਿਤਿ ਪੁਟ੍ਠੋ ਸਬ੍ਬਾਸਂ ਏਕਕ੍ਖਣੇ ਅਭਾਵਾ ਪਟਿਕ੍ਖਿਪਤਿ. ਦੁਤਿਯਂ ਪੁਟ੍ਠੋ ਅਤੀਤਾਨਾਗਤਪਚ੍ਚੁਪ੍ਪਨ੍ਨਸ੍ਸ ਸਬ੍ਬਞ੍ਞੁਤਞ੍ਞਾਣਸ੍ਸ ਵਸੇਨ ਪਟਿਜਾਨਾਤਿ. ਪੁਨ ਲੇਸੋਕਾਸਂ ਅਦਤ੍ਵਾ ਸਤਤਂ ਸਮਿਤਨ੍ਤਿ ਪੁਟ੍ਠੋ ਪਟਿਕ੍ਖਿਪਤਿ.

ਨ ਬਤ੍ਤਬ੍ਬਂ ਬੋਧਿਯਾਤਿ ਪੁਚ੍ਛਾ ਪਰਵਾਦਿਸ੍ਸ, ਬੋਧਿਯਾ ਅਭਾਵਕ੍ਖਣੇ ਅਬੁਦ੍ਧਭਾਵਾਪਤ੍ਤਿਤੋ ਪਟਿਞ੍ਞਾ ਸਕਵਾਦਿਸ੍ਸ. ਨਨੁ ਬੋਧਿਪਟਿਲਾਭਾਤਿ ਪਞ੍ਹੇ ਪਨ ਯਸ੍ਮਿਂ ਸਨ੍ਤਾਨੇ ਬੋਧਿਸਙ੍ਖਾਤਂ ਮਗ੍ਗਞਾਣਂ ਉਪ੍ਪਨ੍ਨਂ, ਤਤ੍ਥ ਬੁਦ੍ਧੋਤਿ ਸਮ੍ਮੁਤਿਸਬ੍ਭਾਵਤੋ ਪਟਿਞ੍ਞਾ ਤਸ੍ਸੇਵ. ਤਸ੍ਸ ਅਧਿਪ੍ਪਾਯਂ ਅਜਾਨਿਤ੍ਵਾ ਹਞ੍ਚੀਤਿ ਲਦ੍ਧਿਟ੍ਠਪਨਾ ਪਰਵਾਦਿਸ੍ਸ. ਇਦਾਨਿਸ੍ਸ ਅਸਲ੍ਲਕ੍ਖਣਂ ਪਾਕਟਂ ਕਾਤੁਂ ਬੋਧਿਪਟਿਲਾਭਾ ਬੁਦ੍ਧੋਤਿ ਬੋਧਿਯਾ ਬੁਦ੍ਧੋਤਿ ਪੁਚ੍ਛਾ ਸਕਵਾਦਿਸ੍ਸ. ਤਸ੍ਸਤ੍ਥੋ – ‘‘ਕਿਂ ਤੇ ਯਸ੍ਮਾ ਬੋਧਿਪਟਿਲਾਭਾ ਬੁਦ੍ਧੋ, ਤਸ੍ਮਾ ਬੋਧਿਯਾ ਬੁਦ੍ਧੋ’’ਤਿ. ਇਤਰੋ ‘‘ਬੋਧਿਪਟਿਲਾਭੋ ਨਾਮ ਬੋਧਿਯਾ ਉਪ੍ਪਜ੍ਜਿਤ੍ਵਾ ਨਿਰੁਦ੍ਧਾਯਪਿ ਸਨ੍ਤਾਨੇ ਉਪ੍ਪਨ੍ਨਭਾਵੋਯੇਵ. ਬੋਧਿ ਨਾਮ ਮਗ੍ਗਕ੍ਖਣੇ ਞਾਣ’’ਨ੍ਤਿ ਇਮਂ ਵਿਭਾਗਂ ਅਸਲ੍ਲਕ੍ਖੇਨ੍ਤੋਵ ਪੁਨ ਪਟਿਜਾਨਾਤਿ. ਤਤੋ ਸਕਵਾਦਿਨਾ ਬੋਧਿਪਟਿਲਾਭਾ ਬੋਧੀਤਿ ਪੁਟ੍ਠੋ ਵਚਨੋਕਾਸਂ ਅਲਭਨ੍ਤੋ ਪਟਿਕ੍ਖਿਪਤੀਤਿ.

ਬੋਧਿਯਾਬੁਦ੍ਧੋਤਿਕਥਾਵਣ੍ਣਨਾ.

ਇਤਿ ਇਮਾ ਤਿਸ੍ਸੋਪਿ ਕਥਾ ਉਤ੍ਤਰਾਪਥਕਾਨਂਯੇਵ.

੭. ਲਕ੍ਖਣਕਥਾਵਣ੍ਣਨਾ

੪੦੦. ਇਦਾਨਿ ਲਕ੍ਖਣਕਥਾ ਨਾਮ ਹੋਤਿ. ਤਤ੍ਥ ‘‘ਯੇਹਿ ਸਮਨ੍ਨਾਗਤਸ੍ਸ ਮਹਾਪੁਰਿਸਸ੍ਸ ਦ੍ਵੇਵ ਗਤਿਯੋ ਭਵਨ੍ਤੀ’’ਤਿ (ਦੀ. ਨਿ. ੧.੨੫੮) ਇਮਂ ਸੁਤ੍ਤਂ ਅਯੋਨਿਸੋ ਗਹੇਤ੍ਵਾ ਲਕ੍ਖਣਸਮਨ੍ਨਾਗਤੋ ਬੋਧਿਸਤ੍ਤੋਵ ਹੋਤੀਤਿ ਯੇਸਂ ਲਦ੍ਧਿ, ਸੇਯ੍ਯਥਾਪਿ ਏਤਰਹਿ ਉਤ੍ਤਰਾਪਥਕਾਨਂ; ਤੇ ਸਨ੍ਧਾਯ ਪੁਚ੍ਛਾ ਸਕਵਾਦਿਸ੍ਸ, ਪਟਿਞ੍ਞਾ ਇਤਰਸ੍ਸ.

ਚਕ੍ਕਵਤ੍ਤਿਸਤ੍ਤੋਤਿ ਪਞ੍ਹੇਸੁ ਯਸ੍ਮਾ ਚਕ੍ਕਵਤ੍ਤੀ ਸਤ੍ਤੋਪਿ ਚ ਬੋਧਿਸਤ੍ਤੋਪਿ, ਤਸ੍ਮਾ ਅਬੋਧਿਸਤ੍ਤਂ ਸਨ੍ਧਾਯ ਪਟਿਕ੍ਖਿਪਤਿ. ਬੋਧਿਸਤ੍ਤਂ ਸਨ੍ਧਾਯ ਪਟਿਜਾਨਾਤਿ.

੪੦੨. ਦ੍ਵਤ੍ਤਿਂਸਿਮਾਨੀਤਿਸੁਤ੍ਤਂ ਬੋਧਿਸਤ੍ਤਮੇਵ ਸਨ੍ਧਾਯ ਵੁਤ੍ਤਂ. ਸੋ ਹਿ ਪਚ੍ਛਿਮੇ ਭਵੇ ਬੁਦ੍ਧੋ ਹੋਤਿ, ਇਤਰੇਸੁ ਚਕ੍ਕਵਤ੍ਤੀ, ਤਸ੍ਮਾ ਆਭਤਮ੍ਪਿ ਅਨਾਭਤਸਦਿਸਮੇਵਾਤਿ.

ਲਕ੍ਖਣਕਥਾਵਣ੍ਣਨਾ.

੮. ਨਿਯਾਮੋਕ੍ਕਨ੍ਤਿਕਥਾਵਣ੍ਣਨਾ

੪੦੩. ਇਦਾਨਿ ਨਿਯਾਮੋਕ੍ਕਨ੍ਤਿਕਥਾ ਨਾਮ ਹੋਤਿ. ਤਤ੍ਥ ਯੇਸਂ ਘਟਿਕਾਰਸੁਤ੍ਤੇ ਜੋਤਿਪਾਲਸ੍ਸ ਪਬ੍ਬਜ੍ਜਂ ਸਨ੍ਧਾਯ ‘‘ਬੋਧਿਸਤ੍ਤੋ ਕਸ੍ਸਪਭਗਵਤੋ ਪਾਵਚਨੇ ਓਕ੍ਕਨ੍ਤਨਿਯਾਮੋ ਚਰਿਤਬ੍ਰਹ੍ਮਚਰਿਯੋ’’ਤਿ ਲਦ੍ਧਿ, ਸੇਯ੍ਯਥਾਪਿ ਏਤਰਹਿ ਅਨ੍ਧਕਾਨਂ; ਤੇ ਸਨ੍ਧਾਯ ਬੋਧਿਸਤ੍ਤੋਤਿ ਪੁਚ੍ਛਾ ਸਕਵਾਦਿਸ੍ਸ, ਲਦ੍ਧਿਯਂ ਠਤ੍ਵਾ ਪਟਿਞ੍ਞਾ ਇਤਰਸ੍ਸ. ਤਤੋ ਯਸ੍ਮਾ ਨਿਯਾਮੋਤਿ ਵਾ ਬ੍ਰਹ੍ਮਚਰਿਯਨ੍ਤਿ ਵਾ ਅਰਿਯਮਗ੍ਗਸ੍ਸ ਨਾਮਂ, ਬੋਧਿਸਤ੍ਤਾਨਞ੍ਚ ਠਪੇਤ੍ਵਾ ਪਾਰਮੀਪੂਰਣਂ ਅਞ੍ਞਾ ਨਿਯਾਮੋਕ੍ਕਨ੍ਤਿ ਨਾਮ ਨਤ੍ਥਿ. ਯਦਿ ਭਵੇਯ੍ਯ, ਬੋਧਿਸਤ੍ਤੋ ਸੋਤਾਪਨ੍ਨੋ ਸਾਵਕੋ ਭਵੇਯ੍ਯ. ਨ ਚੇਤਮੇਵਂ. ਕੇਵਲਞ੍ਹਿ ਨਂ ਬੁਦ੍ਧਾ ਅਤ੍ਤਨੋ ਞਾਣਬਲੇ ਠਤ੍ਵਾ – ‘‘ਅਯਂ ਬੁਦ੍ਧੋ ਭਵਿਸ੍ਸਤੀ’’ਤਿ ਬ੍ਯਾਕਰੋਨ੍ਤਿ, ਤਸ੍ਮਾ ਪੁਨ ਬੋਧਿਸਤ੍ਤੋਤਿ ਅਨੁਯੋਗੋ ਸਕਵਾਦਿਸ੍ਸ. ਪਚ੍ਛਿਮਭਵਂ ਸਨ੍ਧਾਯ ਪਟਿਕ੍ਖੇਪੋ ਇਤਰਸ੍ਸ. ਦੁਤਿਯਪਞ੍ਹੇ ਜੋਤਿਪਾਲਕਾਲਂ ਸਨ੍ਧਾਯ ਪਟਿਞ੍ਞਾ ਤਸ੍ਸੇਵ. ਸਾਵਕੋ ਹੁਤ੍ਵਾਤਿਆਦੀਸੁਪਿ ਏਸੇਵ ਨਯੋ. ਅਨੁਸ੍ਸਵਿਯੋਤਿ ਅਨੁਸ੍ਸਵੇਨ ਪਟਿਵਿਦ੍ਧਧਮ੍ਮੋ. ਪਚ੍ਛਿਮਭਵਂ ਸਨ੍ਧਾਯ ਪਟਿਕ੍ਖਿਪਿਤ੍ਵਾ ਜੋਤਿਪਾਲਕਾਲੇ ਅਨੁਸ੍ਸਵਂ ਸਨ੍ਧਾਯ ਪਟਿਜਾਨਾਤਿ.

੪੦੪. ਅਞ੍ਞਂ ਸਤ੍ਥਾਰਨ੍ਤਿਆਲ਼ਾਰਞ੍ਚ ਰਾਮਪੁਤ੍ਤਞ੍ਚ ਸਨ੍ਧਾਯ ਵੁਤ੍ਤਂ. ਆਯਸ੍ਮਾ ਆਨਨ੍ਦੋਤਿਆਦਿ ‘‘ਓਕ੍ਕਨ੍ਤਨਿਯਾਮਾਵ ਸਾਵਕਾ ਹੋਨ੍ਤਿ, ਨ ਇਤਰੇ ਓਕ੍ਕਨ੍ਤਨਿਯਾਮਾ ਏਵਰੂਪਾ ਹੋਨ੍ਤੀ’’ਤਿ ਦਸ੍ਸੇਤੁਂ ਵੁਤ੍ਤਂ.

ਸਾਵਕੋ ਜਾਤਿਂ ਵੀਤਿਵਤ੍ਤੋਤਿ ਯਾਯ ਜਾਤਿਯਾ ਸਾਵਕੋ, ਤਂ ਵੀਤਿਵਤ੍ਤੋ ਅਞ੍ਞਸ੍ਮਿਂ ਭਵੇ ਅਸਾਵਕੋ ਹੋਤੀਤਿ ਪੁਚ੍ਛਤਿ. ਇਤਰੋ ਸੋਤਾਪਨ੍ਨਾਦੀਨਂ ਸੋਤਾਪਨ੍ਨਾਦਿਸਾਵਕਭਾਵਤੋ ਪਟਿਕ੍ਖਿਪਤਿ. ਸੇਸਮੇਤ੍ਥ ਉਤ੍ਤਾਨਤ੍ਥਮੇਵਾਤਿ.

ਨਿਯਾਮੋਕ੍ਕਨ੍ਤਿਕਥਾਵਣ੍ਣਨਾ.

੯. ਅਪਰਾਪਿ ਸਮਨ੍ਨਾਗਤਕਥਾਵਣ੍ਣਨਾ

੪੦੬. ਇਦਾਨਿ ਅਪਰਾਪਿ ਸਮਨ੍ਨਾਗਤਕਥਾ ਨਾਮ ਹੋਤਿ. ਤਤ੍ਥ ਯੇਸਂ ‘‘ਚਤੁਤ੍ਥਮਗ੍ਗਟ੍ਠੋ ਪੁਗ੍ਗਲੋ ਪਤ੍ਤਿਧਮ੍ਮਵਸੇਨ ਤੀਹਿ ਫਲੇਹਿ ਸਮਨ੍ਨਾਗਤੋ’’ਤਿ ਲਦ੍ਧਿ, ਸੇਯ੍ਯਥਾਪਿ ਏਤਰਹਿ ਅਨ੍ਧਕਾਨਂ; ਤੇ ਸਨ੍ਧਾਯ ਪੁਚ੍ਛਾ ਸਕਵਾਦਿਸ੍ਸ, ਪਟਿਞ੍ਞਾ ਇਤਰਸ੍ਸ. ਸੇਸਮੇਤ੍ਥ ਹੇਟ੍ਠਾ ਚਤੂਹਿ ਫਲੇਹਿ ਸਮਨ੍ਨਾਗਤਕਥਾਯਂ ਵੁਤ੍ਤਨਯੇਨੇਵ ਵੇਦਿਤਬ੍ਬਨ੍ਤਿ.

ਅਪਰਾਪਿ ਸਮਨ੍ਨਾਗਤਕਥਾਵਣ੍ਣਨਾ.

੧੦. ਸਬ੍ਬਸਂਯੋਜਨਪ੍ਪਹਾਨਕਥਾਵਣ੍ਣਨਾ

੪੧੩. ਇਦਾਨਿ ਸਂਯੋਜਨਪ੍ਪਹਾਨਕਥਾ ਨਾਮ ਹੋਤਿ. ਤਤ੍ਥ ਯੇਸਂ ‘‘ਨਿਪ੍ਪਰਿਯਾਯੇਨੇਵ ਸਬ੍ਬਸਂਯੋਜਨਪ੍ਪਹਾਨਂ ਅਰਹਤ੍ਤ’’ਨ੍ਤਿ ਲਦ੍ਧਿ, ਸੇਯ੍ਯਥਾਪਿ ਏਤਰਹਿ ਅਨ੍ਧਕਾਨਂ; ਤੇ ਸਨ੍ਧਾਯ ਪੁਚ੍ਛਾ ਸਕਵਾਦਿਸ੍ਸ, ਪਟਿਞ੍ਞਾ ਇਤਰਸ੍ਸ. ਪੁਨ ਸਬ੍ਬੇ ਸਂਯੋਜਨਾਤਿ ਪੁਟ੍ਠੋ ਹੇਟ੍ਠਾ ਵੁਤ੍ਤਮਗ੍ਗਤ੍ਤਯੇਨ ਪਹੀਨੇ ਸਨ੍ਧਾਯ ਪਟਿਕ੍ਖਿਪਤਿ. ਦੁਤਿਯਂ ਪੁਟ੍ਠੋ ਤੇਨ ਮਗ੍ਗੇਨ ਅਪ੍ਪਹੀਨਸ੍ਸ ਅਭਾਵਾ ਪਟਿਜਾਨਾਤਿ. ਸਕ੍ਕਾਯਦਿਟ੍ਠਿਆਦੀਸੁਪਿ ਪਠਮਮਗ੍ਗੇਨ ਪਹੀਨਭਾਵਂ ਸਨ੍ਧਾਯ ਪਟਿਕ੍ਖਿਪਤਿ, ਚਤੁਤ੍ਥਮਗ੍ਗੇਨ ਅਨਵਸੇਸਪ੍ਪਹਾਨਂ ਸਨ੍ਧਾਯ ਪਟਿਜਾਨਾਤਿ. ਏਸੇਵ ਨਯੋ ਸਬ੍ਬਤ੍ਥਾਤਿ.

ਸਬ੍ਬਸਂਯੋਜਨਪ੍ਪਹਾਨਕਥਾਵਣ੍ਣਨਾ.

ਚਤੁਤ੍ਥੋ ਵਗ੍ਗੋ.