੧੧. ਅਸਞ੍ਞਕਥਾਵਣ੍ਣਨਾ

੩੮੧. ਇਦਾਨਿ ਅਸਞ੍ਞਕਥਾ ਨਾਮ ਹੋਤਿ. ਤਤ੍ਥ ਯੇਸਂ ‘‘ਸਙ੍ਖਾਰਪਚ੍ਚਯਾ ਵਿਞ੍ਞਾਣ’’ਨ੍ਤਿ ਵਚਨਤੋ ਵਿਨਾ ਵਿਞ੍ਞਾਣੇਨ ਪਟਿਸਨ੍ਧਿ ਨਾਮ ਨਤ੍ਥਿ. ‘‘ਸਞ੍ਞੁਪ੍ਪਾਦਾ ਚ ਪਨ ਤੇ ਦੇਵਾ ਤਮ੍ਹਾ ਕਾਯਾ ਚਵਨ੍ਤੀ’’ਤਿ ਵਚਨਤੋ ਅਸਞ੍ਞਸਤ੍ਤਾਨਮ੍ਪਿ ਚੁਤਿਪਟਿਸਨ੍ਧਿਕ੍ਖਣੇ ਸਞ੍ਞਾ ਅਤ੍ਥੀਤਿ ਲਦ੍ਧਿ, ਸੇਯ੍ਯਥਾਪਿ ਏਤਰਹਿ ਅਨ੍ਧਕਾਨਂ; ਤੇ ਸਨ੍ਧਾਯ ਪੁਚ੍ਛਾ ਸਕਵਾਦਿਸ੍ਸ, ਪਟਿਞ੍ਞਾ ਇਤਰਸ੍ਸ. ਤਤੋ ਨਂ ਸਕਵਾਦੀ ‘‘ਕਿਂ ਤੇ ਤਂ ਠਾਨਂ ਸਞ੍ਞਾਭਵੋ’’ਤਿਆਦੀਹਿ ਚੋਦੇਤੁਂ ਸਞ੍ਞਾਭਵੋ ਸਞ੍ਞਾਗਤੀਤਿਆਦਿਮਾਹ. ਤਂ ਸਬ੍ਬਂ ਤਤੋ ਪਰਞ੍ਚ ਪਾਲ਼ਿਨਯੇਨੇਵ ਵੇਦਿਤਬ੍ਬਨ੍ਤਿ.

ਅਸਞ੍ਞਕਥਾਵਣ੍ਣਨਾ.