੫. ਵਸ੍ਸਕਾਰਸੁਤ੍ਤਵਣ੍ਣਨਾ

੩੫. ਪਞ੍ਚਮੇ ਅਨੁਸ੍ਸਰਿਤਾਤਿ ਅਨੁਗਨ੍ਤ੍ਵਾ ਸਰਿਤਾ, ਅਪਰਾਪਰਂ ਸਰਿਤੁਂ ਸਮਤ੍ਥੋਤਿ ਅਤ੍ਥੋ. ਦਕ੍ਖੋਤਿ ਛੇਕੋ. ਤਤ੍ਰੁਪਾਯਾਯਾਤਿ ‘‘ਇਮਸ੍ਮਿਂ ਕਾਲੇ ਇਮਂ ਨਾਮ ਕਤ੍ਤਬ੍ਬ’’ਨ੍ਤਿ ਏਵਂ ਤਤ੍ਥ ਤਤ੍ਥ ਉਪਾਯਭੂਤਾਯ ਪਞ੍ਞਾਯ ਸਮਨ੍ਨਾਗਤੋ. ਅਨੁਮੋਦਿਤਬ੍ਬਨ੍ਤਿ ਅਭਿਨਨ੍ਦਿਤਬ੍ਬਂ. ਪਟਿਕ੍ਕੋਸਿਤਬ੍ਬਨ੍ਤਿ ਪਟਿਕ੍ਖਿਪਿਤਬ੍ਬਂ. ਨੇਵ ਖੋ ਤ੍ਯਾਹਨ੍ਤਿ ਨੇਵ ਖੋ ਤੇ ਅਹਂ. ਕਸ੍ਮਾ ਪਨੇਤਂ ਭਗਵਾ ਨਾਭਿਨਨ੍ਦਤਿ, ਨਪ੍ਪਟਿਕ੍ਖਿਪਤੀਤਿ? ਲੋਕਿਯਤ੍ਤਾ ਨਾਭਿਨਨ੍ਦਤਿ, ਲੋਕਿਯਂ ਅਤ੍ਥਂ ਗਹੇਤ੍ਵਾ ਠਿਤਤ੍ਤਾ ਨਪ੍ਪਟਿਕ੍ਕੋਸਤਿ. ਬਹੁਸ੍ਸ ਜਨਤਾਤਿ ਬਹੁ ਅਸ੍ਸ ਜਨਤਾ. ਇਦਞ੍ਚ ਕਰਣਤ੍ਥੇ ਸਾਮਿਵਚਨਂ ਵੇਦਿਤਬ੍ਬਂ. ਅਰਿਯੇ ਞਾਯੇਤਿ ਸਹਵਿਪਸ੍ਸਨਕੇ ਮਗ੍ਗੇ. ਕਲ੍ਯਾਣਧਮ੍ਮਤਾ ਕੁਸਲਧਮ੍ਮਤਾਤਿਪਿ ਤਸ੍ਸੇਵ ਨਾਮਾਨਿ. ਯਂ ਵਿਤਕ੍ਕਨ੍ਤਿ ਨੇਕ੍ਖਮ੍ਮਵਿਤਕ੍ਕਾਦੀਸੁ ਅਞ੍ਞਤਰਂ. ਨ ਤਂ ਵਿਤਕ੍ਕਂ ਵਿਤਕ੍ਕੇਤੀਤਿ ਕਾਮਵਿਤਕ੍ਕਾਦੀਸੁ ਏਕਮ੍ਪਿ ਨ ਵਿਤਕ੍ਕੇਤਿ. ਇਤਰਂ ਤਸ੍ਸੇਵ ਵੇਵਚਨਂ. ਵਿਤਕ੍ਕਪਥੇਤਿ ਏਤ੍ਥ ਵਿਤਕ੍ਕੋਯੇਵ ਵਿਤਕ੍ਕਪਥੋ. ਅਹਞ੍ਹਿ ਬ੍ਰਾਹ੍ਮਣਾਤਿਆਦੀਸੁ ਪਠਮਨਯੇਨ ਖੀਣਾਸਵਸ੍ਸ ਸੀਲਞ੍ਚੇਵ ਬਾਹੁਸਚ੍ਚਞ੍ਚ ਕਥਿਤਂ, ਦੁਤਿਯਤਤਿਯੇਹਿ ਖੀਣਾਸਵਸ੍ਸ ਕਿਰਿਯਵਿਤਕ੍ਕਾਨਿ ਚੇਵ ਕਿਰਿਯਜ੍ਝਾਨਾਨਿ ਚ, ਚਤੁਤ੍ਥੇਨ ਖੀਣਾਸਵਭਾਵੋ ਕਥਿਤੋਤਿ ਵੇਦਿਤਬ੍ਬੋ.

ਮਚ੍ਚੁਪਾਸਪ੍ਪਮੋਚਨਨ੍ਤਿ ਮਚ੍ਚੁਪਾਸਾ ਪਮੋਚਨਕਂ ਮਗ੍ਗਂ. ਞਾਯਂ ਧਮ੍ਮਨ੍ਤਿ ਸਹਵਿਪਸ੍ਸਨਕਂ ਮਗ੍ਗਂ. ਦਿਸ੍ਵਾ ਚ ਸੁਤ੍ਵਾ ਚਾਤਿ ਞਾਣੇਨੇਵ ਪਸ੍ਸਿਤ੍ਵਾ ਚ ਸੁਣਿਤ੍ਵਾ ਚ. ਸੇਸਮੇਤ੍ਥ ਉਤ੍ਤਾਨਮੇਵ.