੧. ਪਠਮਪਣ੍ਣਾਸਕਂ
੧. ਭਣ੍ਡਗਾਮਵਗ੍ਗੋ
੧. ਅਨੁਬੁਦ੍ਧਸੁਤ੍ਤਵਣ੍ਣਨਾ
੧. ਚਤੁਕ੍ਕਨਿਪਾਤਸ੍ਸ ਪਠਮੇ ਅਨਨੁਬੋਧਾਤਿ ਅਬੁਜ੍ਝਨੇਨ ਅਜਾਨਨੇਨ. ਅਪ੍ਪਟਿਵੇਧਾਤਿ ਅਪ੍ਪਟਿਵਿਜ੍ਝਨੇਨ ਅਪਚ੍ਚਕ੍ਖਕਿਰਿਯਾਯ. ਦੀਘਮਦ੍ਧਾਨਨ੍ਤਿ ਚਿਰਕਾਲਂ. ਸਨ੍ਧਾਵਿਤਨ੍ਤਿ ਭਵਤੋ ਭਵਂ ਗਮਨਵਸੇਨ ਸਨ੍ਧਾਵਿਤਂ. ਸਂਸਰਿਤਨ੍ਤਿ ਪੁਨਪ੍ਪੁਨਂ ਗਮਨਾਗਮਨਵਸੇਨ ਸਂਸਰਿਤਂ. ਮਮਞ੍ਚੇਵ ਤੁਮ੍ਹਾਕਞ੍ਚਾਤਿ ਮਯਾ ਚ ਤੁਮ੍ਹੇਹਿ ਚ. ਅਥ ਵਾ ਸਨ੍ਧਾਵਿਤਂ ਸਂਸਰਿਤਨ੍ਤਿ ਸਨ੍ਧਾਵਨਂ ਸਂਸਰਣਂ ਮਮਞ੍ਚੇਵ ਤੁਮ੍ਹਾਕਞ੍ਚ ਅਹੋਸੀਤਿ ਏਵਮੇਤ੍ਥ ਅਤ੍ਥੋ ਵੇਦਿਤਬ੍ਬੋ. ਅਰਿਯਸ੍ਸਾਤਿ ਨਿਦ੍ਦੋਸਸ੍ਸ. ਸੀਲਂ ਸਮਾਧਿ ਪਞ੍ਞਾਤਿ ਇਮੇ ਪਨ ਤਯੋ ਧਮ੍ਮਾ ਮਗ੍ਗਫਲਸਮ੍ਪਯੁਤ੍ਤਾਵ ਵੇਦਿਤਬ੍ਬਾ, ਵਿਮੁਤ੍ਤਿਨਾਮੇਨ ਫਲਮੇਵ ਨਿਦ੍ਦਿਟ੍ਠਂ. ਭਵਤਣ੍ਹਾਤਿ ਭਵੇਸੁ ਤਣ੍ਹਾ. ਭਵਨੇਤ੍ਤੀਤਿ ਭਵਰਜ੍ਜੁ. ਤਣ੍ਹਾਯ ਏਵ ਏਤਂ ਨਾਮਂ. ਤਾਯ ਹਿ ਸਤ੍ਤਾ ਗੋਣਾ ਵਿਯ ਗੀਵਾਯ ਬਨ੍ਧਿਤ੍ਵਾ ਤਂ ਤਂ ਭਵਂ ਨੀਯਨ੍ਤਿ, ਤਸ੍ਮਾ ਭਵਨੇਤ੍ਤੀਤਿ ਵੁਚ੍ਚਤਿ.
ਅਨੁਤ੍ਤਰਾਤਿ ਲੋਕੁਤ੍ਤਰਾ. ਦੁਕ੍ਖਸ੍ਸਨ੍ਤਕਰੋਤਿ ਵਟ੍ਟਦੁਕ੍ਖਸ੍ਸ ਅਨ੍ਤਕਰੋ. ਚਕ੍ਖੁਮਾਤਿ ਪਞ੍ਚਹਿ ਚਕ੍ਖੂਹਿ ਚਕ੍ਖੁਮਾ. ਪਰਿਨਿਬ੍ਬੁਤੋਤਿ ਕਿਲੇਸਪਰਿਨਿਬ੍ਬਾਨੇਨ ਪਰਿਨਿਬ੍ਬੁਤੋ. ਇਦਮਸ੍ਸ ਬੋਧਿਮਣ੍ਡੇ ਪਠਮਪਰਿਨਿਬ੍ਬਾਨਂ, ਪਚ੍ਛਾ ਪਨ ਯਮਕਸਾਲਾਨਮਨ੍ਤਰੇ ਅਨੁਪਾਦਿਸੇਸਾਯ ਨਿਬ੍ਬਾਨਧਾਤੁਯਾ ਪਰਿਨਿਬ੍ਬੁਤੋਤਿ ਯਥਾਨੁਸਨ੍ਧਿਨਾ ਦੇਸਨਂ ਨਿਟ੍ਠਾਪੇਸਿ.
੨. ਪਪਤਿਤਸੁਤ੍ਤਵਣ੍ਣਨਾ
੨. ਦੁਤਿਯੇ ਪਪਤਿਤੋਤਿ ਪਤਿਤੋ ਚੁਤੋ. ਅਪ੍ਪਪਤਿਤੋਤਿ ਅਪਤਿਤੋ ਪਤਿਟ੍ਠਿਤੋ. ਤਤ੍ਥ ਲੋਕਿਯਮਹਾਜਨੋ ਪਤਿਤੋਯੇਵ ਨਾਮ, ਸੋਤਾਪਨ੍ਨਾਦਯੋ ਕਿਲੇਸੁਪ੍ਪਤ੍ਤਿਕ੍ਖਣੇ ਪਤਿਤਾ ਨਾਮ, ਖੀਣਾਸਵੋ ਏਕਨ੍ਤਪਤਿਟ੍ਠਿਤੋ ਨਾਮ.
ਚੁਤਾ ਪਤਨ੍ਤੀਤਿ ਯੇ ਚੁਤਾ, ਤੇ ਪਤਨ੍ਤਿ ਨਾਮ. ਪਤਿਤਾਤਿ ਯੇ ਪਤਿਤਾ, ਤੇ ਚੁਤਾ ਨਾਮ. ਚੁਤਤ੍ਤਾ ਪਤਿਤਾ, ਪਤਿਤਤ੍ਤਾ ਚੁਤਾਤਿ ਅਤ੍ਥੋ. ਗਿਦ੍ਧਾਤਿ ਰਾਗਰਤ੍ਤਾ. ਪੁਨਰਾਗਤਾਤਿ ਪੁਨ ਜਾਤਿਂ ਪੁਨ ਜਰਂ ਪੁਨ ਬ੍ਯਾਧਿਂ ਪੁਨ ਮਰਣਂ ਆਗਤਾ ਨਾਮ ਹੋਨ੍ਤਿ. ਕਤਂ ਕਿਚ੍ਚਨ੍ਤਿ ਚਤੂਹਿ ਮਗ੍ਗੇਹਿ ਕਤ੍ਤਬ੍ਬਕਿਚ੍ਚਂ ਕਤਂ. ਰਤਂ ਰਮ੍ਮਨ੍ਤਿ ਰਮਿਤਬ੍ਬਯੁਤ੍ਤਕੇ ਗੁਣਜਾਤੇ ਰਮਿਤਂ. ਸੁਖੇਨਾਨ੍ਵਾਗਤਂ ਸੁਖਨ੍ਤਿ ਸੁਖੇਨ ਸੁਖਂ ਅਨੁਆਗਤਂ ਸਮ੍ਪਤ੍ਤਂ. ਮਾਨੁਸਕਸੁਖੇਨ ਦਿਬ੍ਬਸੁਖਂ, ਝਾਨਸੁਖੇਨ ਵਿਪਸ੍ਸਨਾਸੁਖਂ, ਵਿਪਸ੍ਸਨਾਸੁਖੇਨ ਮਗ੍ਗਸੁਖਂ, ਮਗ੍ਗਸੁਖੇਨ ਫਲਸੁਖਂ, ਫਲਸੁਖੇਨ ਨਿਬ੍ਬਾਨਸੁਖਂ ਸਮ੍ਪਤ੍ਤਂ ਅਧਿਗਤਨ੍ਤਿ ਅਤ੍ਥੋ.
੩. ਪਠਮਖਤਸੁਤ੍ਤਵਣ੍ਣਨਾ
੩. ਤਤਿਯਂ ਦੁਕਨਿਪਾਤਵਣ੍ਣਨਾਯਂ ਵੁਤ੍ਤਮੇਵ. ਗਾਥਾਸੁ ਪਨ ਨਿਨ੍ਦਿਯਨ੍ਤਿ ਨਿਨ੍ਦਿਤਬ੍ਬਯੁਤ੍ਤਕਂ. ਨਿਨ੍ਦਤੀਤਿ ਗਰਹਤਿ. ਪਸਂਸਿਯੋਤਿ ਪਸਂਸਿਤਬ੍ਬਯੁਤ੍ਤੋ. ਵਿਚਿਨਾਤਿ ਮੁਖੇਨ ਸੋ ਕਲਿਨ੍ਤਿ ਯੋ ਏਵਂ ਪਵਤ੍ਤੋ, ਤੇਨ ਮੁਖੇਨ ਕਲਿਂ ਵਿਚਿਨਾਤਿ ਨਾਮ. ਕਲਿਨਾ ਤੇਨ ਸੁਖਂ ਨ ਵਿਨ੍ਦਤੀਤਿ ਤੇਨ ਚ ਕਲਿਨਾ ਸੁਖਂ ਨ ਪਟਿਲਭਤਿ. ਸਬ੍ਬਸ੍ਸਾਪਿ ਸਹਾਪਿ ਅਤ੍ਤਨਾਤਿ ਸਬ੍ਬੇਨਪਿ ਸਕੇਨ ਧਨੇਨ ਚੇਵ ਅਤ੍ਤਨਾ ਚ ਸਦ੍ਧਿਂ ਯੋ ਪਰਾਜਯੋ, ਸੋ ਅਪ੍ਪਮਤ੍ਤਕੋਵ ਕਲੀਤਿ ਅਤ੍ਥੋ. ਯੋ ਸੁਗਤੇਸੂਤਿ ਯੋ ਪਨ ਸਮ੍ਮਗ੍ਗਤੇਸੁ ਪੁਗ੍ਗਲੇਸੁ ਚਿਤ੍ਤਂ ਪਦੁਸ੍ਸੇਯ੍ਯ, ਅਯਂ ਚਿਤ੍ਤਪਦੋਸੋਵ ਤਤੋ ਕਲਿਤੋ ਮਹਨ੍ਤਤਰੋ ਕਲਿ. ਇਦਾਨਿ ਤਸ੍ਸ ਮਹਨ੍ਤਤਰਭਾਵਂ ਦਸ੍ਸੇਨ੍ਤੋ ਸਤਂ ਸਹਸ੍ਸਾਨਨ੍ਤਿਆਦਿਮਾਹ. ਤਤ੍ਥ ਸਤਂ ਸਹਸ੍ਸਾਨਨ੍ਤਿ ਨਿਰਬ੍ਬੁਦਗਣਨਾਯ ਸਤਸਹਸ੍ਸਂ. ਛਤ੍ਤਿਂਸਤੀਤਿ ਅਪਰਾਨਿ ਚ ਛਤ੍ਤਿਂਸਤਿ ਨਿਰਬ੍ਬੁਦਾਨਿ. ਪਞ੍ਚ ਚਾਤਿ ਅਬ੍ਬੁਦਗਣਨਾਯ ਚ ਪਞ੍ਚ ਅਬ੍ਬੁਦਾਨਿ. ਯਮਰਿਯਗਰਹੀਤਿ ਯਂ ਅਰਿਯੇ ਗਰਹਨ੍ਤੋ ਨਿਰਯਂ ਉਪਪਜ੍ਜਤਿ, ਤਤ੍ਥ ਏਤ੍ਤਕਂ ਆਯੁਪ੍ਪਮਾਣਨ੍ਤਿ.
੪. ਦੁਤਿਯਖਤਸੁਤ੍ਤਵਣ੍ਣਨਾ
੪. ਚਤੁਤ੍ਥੇ ਮਾਤਰਿ ਪਿਤਰਿ ਚਾਤਿਆਦੀਸੁ ਮਿਤ੍ਤਵਿਨ੍ਦਕੋ ਮਾਤਰਿ ਮਿਚ੍ਛਾਪਟਿਪਨ੍ਨੋ ਨਾਮ, ਅਜਾਤਸਤ੍ਤੁ ਪਿਤਰਿ ਮਿਚ੍ਛਾਪਟਿਪਨ੍ਨੋ ਨਾਮ, ਦੇਵਦਤ੍ਤੋ ਤਥਾਗਤੇ ਮਿਚ੍ਛਾਪਟਿਪਨ੍ਨੋ ਨਾਮ, ਕੋਕਾਲਿਕੋ ਤਥਾਗਤਸਾਵਕੇ ਮਿਚ੍ਛਾਪਟਿਪਨ੍ਨੋ ਨਾਮ. ਬਹੁਞ੍ਚਾਤਿ ਬਹੁਕਮੇਵ. ਪਸਵਤੀਤਿ ਪਟਿਲਭਤਿ. ਤਾਯਾਤਿ ਤਾਯ ਮਿਚ੍ਛਾਪਟਿਪਤ੍ਤਿਸਙ੍ਖਾਤਾਯ ਅਧਮ੍ਮਚਰਿਯਾਯ. ਪੇਚ੍ਚਾਤਿ ਇਤੋ ਗਨ੍ਤ੍ਵਾ. ਅਪਾਯਂ ਗਚ੍ਛਤੀਤਿ ਨਿਰਯਾਦੀਸੁ ਅਞ੍ਞਤਰਸ੍ਮਿਂ ਨਿਬ੍ਬਤ੍ਤਤਿ. ਸੁਕ੍ਕਪਕ੍ਖੇਪਿ ਏਸੇਵ ਨਯੋ.
੫. ਅਨੁਸੋਤਸੁਤ੍ਤਵਣ੍ਣਨਾ
੫. ਪਞ੍ਚਮੇ ਅਨੁਸੋਤਂ ਗਚ੍ਛਤੀਤਿ ਅਨੁਸੋਤਗਾਮੀ. ਕਿਲੇਸਸੋਤਸ੍ਸ ਪਚ੍ਚਨੀਕਪਟਿਪਤ੍ਤਿਯਾ ਪਟਿਸੋਤਂ ਗਚ੍ਛਤੀਤਿ ਪਟਿਸੋਤਗਾਮੀ. ਠਿਤਤ੍ਤੋਤਿ ਠਿਤਸਭਾਵੋ. ਤਿਣ੍ਣੋਤਿ ਓਘਂ ਤਰਿਤ੍ਵਾ ਠਿਤੋ. ਪਾਰਙ੍ਗਤੋਤਿ ਪਰਤੀਰਂ ਗਤੋ. ਥਲੇ ਤਿਟ੍ਠਤੀਤਿ ਨਿਬ੍ਬਾਨਥਲੇ ਤਿਟ੍ਠਤਿ. ਬ੍ਰਾਹ੍ਮਣੋਤਿ ਸੇਟ੍ਠੋ ਨਿਦ੍ਦੋਸੋ. ਇਧਾਤਿ ਇਮਸ੍ਮਿਂ ਲੋਕੇ. ਕਾਮੇ ਚ ਪਟਿਸੇਵਤੀਤਿ ਕਿਲੇਸਕਾਮੇਹਿ ਵਤ੍ਥੁਕਾਮੇ ਪਟਿਸੇਵਤਿ. ਪਾਪਞ੍ਚ ਕਮ੍ਮਂ ਕਰੋਤੀਤਿ ਪਾਪਞ੍ਚ ਪਾਣਾਤਿਪਾਤਾਦਿਕਮ੍ਮਂ ਕਰੋਤਿ. ਪਾਪਞ੍ਚ ਕਮ੍ਮਂ ਨ ਕਰੋਤੀਤਿ ਪਞ੍ਚਵੇਰਕਮ੍ਮਂ ਨ ਕਰੋਤਿ. ਅਯਂ ਵੁਚ੍ਚਤਿ, ਭਿਕ੍ਖਵੇ, ਠਿਤਤ੍ਤੋਤਿ ਅਯਂ ਅਨਾਗਾਮੀ ਪੁਗ੍ਗਲੋ ਤਸ੍ਮਾ ਲੋਕਾ ਪੁਨ ਪਟਿਸਨ੍ਧਿਵਸੇਨ ਅਨਾਗਮਨਤੋ ਠਿਤਤ੍ਤੋ ਨਾਮ.
ਤਣ੍ਹਾਧਿਪਨ੍ਨਾਤਿ ਤਣ੍ਹਾਯ ਅਧਿਪਨ੍ਨਾ ਅਜ੍ਝੋਤ੍ਥਟਾ, ਤਣ੍ਹਂ ਵਾ ਅਧਿਪਨ੍ਨਾ ਅਜ੍ਝੋਗਾਲ਼੍ਹਾ. ਪਰਿਪੁਣ੍ਣਸੇਖੋਤਿ ਸਿਕ੍ਖਾਪਾਰਿਪੂਰਿਯਾ ਠਿਤੋ. ਅਪਰਿਹਾਨਧਮ੍ਮੋਤਿ ਅਪਰਿਹੀਨਸਭਾਵੋ. ਚੇਤੋਵਸਿਪ੍ਪਤ੍ਤੋਤਿ ਚਿਤ੍ਤਵਸੀਭਾਵਂ ਪਤ੍ਤੋ. ਏਵਰੂਪੋ ਖੀਣਾਸਵੋ ਹੋਤਿ, ਇਧ ਪਨ ਅਨਾਗਾਮੀ ਕਥਿਤੋ. ਸਮਾਹਿਤਿਨ੍ਦ੍ਰਿਯੋਤਿ ਸਮਾਹਿਤਛਲ਼ਿਨ੍ਦ੍ਰਿਯੋ. ਪਰੋਪਰਾਤਿ ਪਰੋਵਰਾ ਉਤ੍ਤਮਲਾਮਕਾ, ਕੁਸਲਾਕੁਸਲਾਤਿ ਅਤ੍ਥੋ. ਸਮੇਚ੍ਚਾਤਿ ਞਾਣੇਨ ਸਮਾਗਨ੍ਤ੍ਵਾ. ਵਿਧੂਪਿਤਾਤਿ ਵਿਦ੍ਧਂਸਿਤਾ ਝਾਪਿਤਾ ਵਾ. ਵੁਸਿਤਬ੍ਰਹ੍ਮਚਰਿਯੋਤਿ ਮਗ੍ਗਬ੍ਰਹ੍ਮਚਰਿਯਂ ਵਸਿਤ੍ਵਾ ਠਿਤੋ. ਲੋਕਨ੍ਤਗੂਤਿ ਤਿਵਿਧਸ੍ਸਾਪਿ ਲੋਕਸ੍ਸ ਅਨ੍ਤਂ ਗਤੋ. ਪਾਰਗਤੋਤਿ ਛਹਾਕਾਰੇਹਿ ਪਾਰਗਤੋ. ਇਧ ਖੀਣਾਸਵੋਵ ਕਥਿਤੋ. ਇਤਿ ਸੁਤ੍ਤੇਪਿ ਗਾਥਾਸੁਪਿ ਵਟ੍ਟਵਿਵਟ੍ਟਮੇਵ ਕਥਿਤਂ.
੬. ਅਪ੍ਪਸ੍ਸੁਤਸੁਤ੍ਤਵਣ੍ਣਨਾ
੬. ਛਟ੍ਠੇ ਅਨੁਪਪਨ੍ਨੋਤਿ ਅਨੁਪਾਗਤੋ. ਸੁਤ੍ਤਨ੍ਤਿਆਦੀਸੁ ਉਭਤੋਵਿਭਙ੍ਗਨਿਦ੍ਦੇਸਖਨ੍ਧਕਪਰਿਵਾਰਸੁਤ੍ਤਨਿਪਾਤਮਙ੍ਗਲਸੁਤ੍ਤਰਤਨਸੁਤ੍ਤ- ਨਾਲ਼ਕਸੁਤ੍ਤਤੁਵਟਕਸੁਤ੍ਤਾਨਿ, ਅਞ੍ਞਮ੍ਪਿ ਚ ਸੁਤ੍ਤਨਾਮਕਂ ਤਥਾਗਤਵਚਨਂ ਸੁਤ੍ਤਨ੍ਤਿ ਵੇਦਿਤਬ੍ਬਂ. ਸਬ੍ਬਮ੍ਪਿ ਸਗਾਥਕਂ ਸੁਤ੍ਤਂ ਗੇਯ੍ਯਨ੍ਤਿ ਵੇਦਿਤਬ੍ਬਂ, ਵਿਸੇਸੇਨ ਸਂਯੁਤ੍ਤਕੇ ਸਕਲੋਪਿ ਸਗਾਥਾਵਗ੍ਗੋ. ਸਕਲਮ੍ਪਿ ਅਭਿਧਮ੍ਮਪਿਟਕਂ, ਨਿਗ੍ਗਾਥਕਸੁਤ੍ਤਂ, ਯਞ੍ਚ ਅਞ੍ਞਮ੍ਪਿ ਅਟ੍ਠਹਿ ਅਙ੍ਗੇਹਿ ਅਸਙ੍ਗਹਿਤਂ ਬੁਦ੍ਧਵਚਨਂ, ਤਂ ਵੇਯ੍ਯਾਕਰਣਨ੍ਤਿ ਵੇਦਿਤਬ੍ਬਂ. ਧਮ੍ਮਪਦ-ਥੇਰਗਾਥਾ-ਥੇਰਿਗਾਥਾ ਸੁਤ੍ਤਨਿਪਾਤੇ ਨੋਸੁਤ੍ਤਨਾਮਿਕਾ ਸੁਦ੍ਧਿਕਗਾਥਾ ਚ ਗਾਥਾਤਿ ਵੇਦਿਤਬ੍ਬਾ. ਸੋਮਨਸ੍ਸਞਾਣਮਯਿਕਗਾਥਾਪਟਿਸਂਯੁਤ੍ਤਾ ਦ੍ਵੇਅਸੀਤਿ ਸੁਤ੍ਤਨ੍ਤਾ ਉਦਾਨਨ੍ਤਿ ਵੇਦਿਤਬ੍ਬਾ. ‘‘ਵੁਤ੍ਤਞ੍ਹੇਤਂ ਭਗਵਤਾ’’ਤਿਆਦਿਨਯਪ੍ਪਵਤ੍ਤਾ ਦਸੁਤ੍ਤਰਸਤਸੁਤ੍ਤਨ੍ਤਾ ਇਤਿਵੁਤ੍ਤਕਨ੍ਤਿ ਵੇਦਿਤਬ੍ਬਾ. ਅਪਣ੍ਣਕਜਾਤਕਾਦੀਨਿ ਪਞ੍ਞਾਸਾਧਿਕਾਨਿ ਪਞ੍ਚ ਜਾਤਕਸਤਾਨਿ ਜਾਤਕਨ੍ਤਿ ਵੇਦਿਤਬ੍ਬਾਨਿ. ‘‘ਚਤ੍ਤਾਰੋਮੇ, ਭਿਕ੍ਖਵੇ, ਅਚ੍ਛਰਿਯਾ ਅਬ੍ਭੁਤਾ ਧਮ੍ਮਾ ਆਨਨ੍ਦੇ’’ਤਿਆਦਿਨਯਪ੍ਪਵਤ੍ਤਾ ਸਬ੍ਬੇਪਿ ਅਚ੍ਛਰਿਯਅਬ੍ਭੁਤਧਮ੍ਮਪਟਿਸਂਯੁਤ੍ਤਾ ਸੁਤ੍ਤਨ੍ਤਾ ਅਬ੍ਭੁਤਧਮ੍ਮਨ੍ਤਿ ਵੇਦਿਤਬ੍ਬਾ. ਚੂਲ਼ਵੇਦਲ੍ਲਮਹਾਵੇਦਲ੍ਲਸਮ੍ਮਾਦਿਟ੍ਠਿਸਕ੍ਕਪਞ੍ਹਸਙ੍ਖਾਰਭਾਜਨਿਯਮਹਾਪੁਣ੍ਣਮਸੁਤ੍ਤਾਦਯੋ ਸਬ੍ਬੇਪਿ ਵੇਦਞ੍ਚ ਤੁਟ੍ਠਿਞ੍ਚ ਲਦ੍ਧਾ ਲਦ੍ਧਾ ਪੁਚ੍ਛਿਤਾ ਸੁਤ੍ਤਨ੍ਤਾ ਵੇਦਲ੍ਲਨ੍ਤਿ ਵੇਦਿਤਬ੍ਬਾ. ਨ ਅਤ੍ਥਮਞ੍ਞਾਯ ਨ ਧਮ੍ਮਮਞ੍ਞਾਯਾਤਿ ਅਟ੍ਠਕਥਞ੍ਚ ਪਾਲ਼ਿਞ੍ਚ ਅਜਾਨਿਤ੍ਵਾ. ਧਮ੍ਮਾਨੁਧਮ੍ਮਪ੍ਪਟਿਪਨ੍ਨੋਤਿ ਨਵਲੋਕੁਤ੍ਤਰਧਮ੍ਮਸ੍ਸ ਅਨੁਰੂਪਧਮ੍ਮਂ ਸਹਸੀਲਂ ਪੁਬ੍ਬਭਾਗਪਟਿਪਦਂ ਨ ਪਟਿਪਨ੍ਨੋ ਹੋਤਿ. ਇਮਿਨਾ ਉਪਾਯੇਨ ਸਬ੍ਬਵਾਰੇਸੁ ਅਤ੍ਥੋ ਵੇਦਿਤਬ੍ਬੋ. ਪਠਮਵਾਰੇ ਪਨੇਤ੍ਥ ਅਪ੍ਪਸ੍ਸੁਤਦੁਸ੍ਸੀਲੋ ਕਥਿਤੋ, ਦੁਤਿਯੇ ਅਪ੍ਪਸ੍ਸੁਤਖੀਣਾਸਵੋ, ਤਤਿਯੇ ਬਹੁਸ੍ਸੁਤਦੁਸ੍ਸੀਲੋ, ਚਤੁਤ੍ਥੇ ਬਹੁਸ੍ਸੁਤਖੀਣਾਸਵੋ.
ਸੀਲੇਸੁ ਅਸਮਾਹਿਤੋਤਿ ਸੀਲੇਸੁ ਅਪਰਿਪੂਰਕਾਰੀ. ਸੀਲਤੋ ਚ ਸੁਤੇਨ ਚਾਤਿ ਸੀਲਭਾਗੇਨ ਚ ਸੁਤਭਾਗੇਨ ਚ ‘‘ਅਯਂ ਦੁਸ੍ਸੀਲੋ ਅਪ੍ਪਸ੍ਸੁਤੋ’’ਤਿ ਏਵਂ ਤਂ ਗਰਹਨ੍ਤੀਤਿ ਅਤ੍ਥੋ. ਤਸ੍ਸ ਸਮ੍ਪਜ੍ਜਤੇ ਸੁਤਨ੍ਤਿ ਤਸ੍ਸ ਪੁਗ੍ਗਲਸ੍ਸ ਯਸ੍ਮਾ ਤੇਨ ਸੁਤੇਨ ਸੁਤਕਿਚ੍ਚਂ ਕਤਂ, ਤਸ੍ਮਾ ਤਸ੍ਸ ਸੁਤਂ ਸਮ੍ਪਜ੍ਜਤਿ ਨਾਮ. ਨਾਸ੍ਸ ਸਮ੍ਪਜ੍ਜਤੇਤਿ ਸੁਤਕਿਚ੍ਚਸ੍ਸ ਅਕਤਤ੍ਤਾ ਨ ਸਮ੍ਪਜ੍ਜਤਿ. ਧਮ੍ਮਧਰਨ੍ਤਿ ਸੁਤਧਮ੍ਮਾਨਂ ਆਧਾਰਭੂਤਂ. ਸਪ੍ਪਞ੍ਞਨ੍ਤਿ ਸੁਪਞ੍ਞਂ. ਨੇਕ੍ਖਂ ਜਮ੍ਬੋਨਦਸ੍ਸੇਵਾਤਿ ਜਮ੍ਬੁਨਦਂ ਵੁਚ੍ਚਤਿ ਜਾਤਿਸੁਵਣ੍ਣਂ, ਤਸ੍ਸ ਜਮ੍ਬੁਨਦਸ੍ਸ ਨੇਕ੍ਖਂ ਵਿਯ, ਪਞ੍ਚਸੁਵਣ੍ਣਪਰਿਮਾਣਂ ਸੁਵਣ੍ਣਘਟਿਕਂ ਵਿਯਾਤਿ ਅਤ੍ਥੋ.
੭. ਸੋਭਨਸੁਤ੍ਤਵਣ੍ਣਨਾ
੭. ਸਤ੍ਤਮੇ ਵਿਯਤ੍ਤਾਤਿ ਪਞ੍ਞਾਵੇਯ੍ਯਤ੍ਤਿਯੇਨ ਸਮਨ੍ਨਾਗਤਾ. ਵਿਨੀਤਾਤਿ ਵਿਨਯਂ ਉਪੇਤਾ ਸੁਵਿਨੀਤਾ. ਵਿਸਾਰਦਾਤਿ ਵੇਸਾਰਜ੍ਜੇਨ ਸੋਮਨਸ੍ਸਸਹਗਤੇਨ ਞਾਣੇਨ ਸਮਨ੍ਨਾਗਤਾ. ਧਮ੍ਮਧਰਾਤਿ ਸੁਤਧਮ੍ਮਾਨਂ ਆਧਾਰਭੂਤਾ. ਭਿਕ੍ਖੁ ਚ ਸੀਲਸਮ੍ਪਨ੍ਨੋਤਿ ਗਾਥਾਯ ਕਿਞ੍ਚਾਪਿ ਏਕੇਕਸ੍ਸੇਵ ਏਕੇਕੋ ਗੁਣੋ ਕਥਿਤੋ, ਸਬ੍ਬੇਸਂ ਪਨ ਸਬ੍ਬੇਪਿ ਵਟ੍ਟਨ੍ਤੀਤਿ.
੮. ਵੇਸਾਰਜ੍ਜਸੁਤ੍ਤਵਣ੍ਣਨਾ
੮. ਅਟ੍ਠਮੇ ਵੇਸਾਰਜ੍ਜਾਨੀਤਿ ਏਤ੍ਥ ਸਾਰਜ੍ਜਪਟਿਪਕ੍ਖੋ ਵੇਸਾਰਜ੍ਜਂ, ਚਤੂਸੁ ਠਾਨੇਸੁ ਸਾਰਜ੍ਜਾਭਾਵਂ ਪਚ੍ਚਵੇਕ੍ਖਨ੍ਤਸ੍ਸ ਉਪ੍ਪਨ੍ਨਸੋਮਨਸ੍ਸਮਯਞਾਣਸ੍ਸੇਤਂ ਨਾਮਂ. ਆਸਭਂ ਠਾਨਨ੍ਤਿ ਸੇਟ੍ਠਟ੍ਠਾਨਂ ਉਤ੍ਤਮਟ੍ਠਾਨਂ. ਆਸਭਾ ਵਾ ਪੁਬ੍ਬਬੁਦ੍ਧਾ, ਤੇਸਂ ਠਾਨਨ੍ਤਿ ਅਤ੍ਥੋ. ਅਪਿਚ ਗਵਸਤਜੇਟ੍ਠਕੋ ਉਸਭੋ, ਗਵਸਹਸ੍ਸਜੇਟ੍ਠਕੋ ਵਸਭੋ. ਵਜਸਤਜੇਟ੍ਠਕੋ ਵਾ ਉਸਭੋ, ਵਜਸਹਸ੍ਸਜੇਟ੍ਠਕੋ ਵਸਭੋ, ਸਬ੍ਬਗਵਸੇਟ੍ਠੋ ਸਬ੍ਬਪਰਿਸ੍ਸਯਸਹੋ ਸੇਤੋ ਪਾਸਾਦਿਕੋ ਮਹਾਭਾਰਵਹੋ ਅਸਨਿਸਤਸਦ੍ਦੇਹਿਪਿ ਅਸਮ੍ਪਕਮ੍ਪਿਯੋ ਨਿਸਭੋ, ਸੋ ਇਧ ਉਸਭੋਤਿ ਅਧਿਪ੍ਪੇਤੋ. ਇਦਮ੍ਪਿ ਹਿ ਤਸ੍ਸ ਪਰਿਯਾਯਵਚਨਂ. ਉਸਭਸ੍ਸ ਇਦਨ੍ਤਿ ਆਸਭਂ. ਠਾਨਨ੍ਤਿ ਚਤੂਹਿ ਪਾਦੇਹਿ ਪਥਵਿਂ ਉਪ੍ਪੀਲ਼ੇਤ੍ਵਾ ਵਵਤ੍ਥਾਨਂ. ਇਦਂ ਪਨ ਆਸਭਂ ਵਿਯਾਤਿ ਆਸਭਂ. ਯਥੇਵ ਹਿ ਨਿਸਭਸਙ੍ਖਾਤੋ ਉਸਭੋ ਚਤੂਹਿ ਪਾਦੇਹਿ ਪਥਵਿਂ ਉਪ੍ਪੀਲ਼ੇਤ੍ਵਾ ਅਚਲਟ੍ਠਾਨੇਨ ਤਿਟ੍ਠਤਿ, ਏਵਂ ਤਥਾਗਤੋਪਿ ਚਤੂਹਿ ਵੇਸਾਰਜ੍ਜਪਾਦੇਹਿ ਅਟ੍ਠਪਰਿਸਪਥਵਿਂ ਉਪ੍ਪੀਲ਼ੇਤ੍ਵਾ ਸਦੇਵਕੇ ਲੋਕੇ ਕੇਨਚਿ ਪਚ੍ਚਤ੍ਥਿਕੇਨ ਪਚ੍ਚਾਮਿਤ੍ਤੇਨ ਅਕਮ੍ਪਿਯੋ ਅਚਲਟ੍ਠਾਨੇਨ ਤਿਟ੍ਠਤਿ. ਏਵਂ ਤਿਟ੍ਠਮਾਨੋਵ ਤਂ ਆਸਭਂ ਠਾਨਂ ਪਟਿਜਾਨਾਤਿ ਉਪਗਚ੍ਛਤਿ ਨ ਪਚ੍ਚਕ੍ਖਾਤਿ, ਅਤ੍ਤਨਿ ਆਰੋਪੇਤਿ. ਤੇਨ ਵੁਤ੍ਤਂ ‘‘ਆਸਭਂ ਠਾਨਂ ਪਟਿਜਾਨਾਤੀ’’ਤਿ.
ਪਰਿਸਾਸੂਤਿ ਅਟ੍ਠਸੁ ਪਰਿਸਾਸੁ. ਸੀਹਨਾਦਂ ਨਦਤੀਤਿ ਸੇਟ੍ਠਨਾਦਂ ਅਭੀਤਨਾਦਂ ਨਦਤਿ, ਸੀਹਨਾਦਸਦਿਸਂ ਵਾ ਨਾਦਂ ਨਦਤਿ. ਅਯਮਤ੍ਥੋ ਸੀਹਨਾਦਸੁਤ੍ਤੇਨ ਦਸ੍ਸੇਤਬ੍ਬੋ. ਯਥਾ ਵਾ ਸੀਹੋ ਸਹਨਤੋ ਚ ਹਨਨਤੋ ਚ ਸੀਹੋਤਿ ਵੁਚ੍ਚਤਿ, ਏਵਂ ਤਥਾਗਤੋ ਲੋਕਧਮ੍ਮਾਨਂ ਸਹਨਤੋ ਪਰਪ੍ਪਵਾਦਾਨਞ੍ਚ ਹਨਨਤੋ ਸੀਹੋਤਿ ਵੁਚ੍ਚਤਿ. ਏਵਂ ਵੁਤ੍ਤਸ੍ਸ ਸੀਹਸ੍ਸ ਨਾਦਂ ਸੀਹਨਾਦਂ. ਤਤ੍ਥ ਯਥਾ ਸੀਹੋ ਸੀਹਬਲੇਨ ਸਮਨ੍ਨਾਗਤੋ ਸਬ੍ਬਤ੍ਥ ਵਿਸਾਰਦੋ ਵਿਗਤਲੋਮਹਂਸੋ ਸੀਹਨਾਦਂ ਨਦਤਿ, ਏਵਂ ਤਥਾਗਤਸੀਹੋਪਿ ਤਥਾਗਤਬਲੇਹਿ ਸਮਨ੍ਨਾਗਤੋ ਅਟ੍ਠਸੁ ਪਰਿਸਾਸੁ ਵਿਸਾਰਦੋ ਵਿਗਤਲੋਮਹਂਸੋ ‘‘ਇਤਿ ਰੂਪ’’ਨ੍ਤਿਆਦਿਨਾ ਨਯੇਨ ਨਾਨਾਵਿਧਦੇਸਨਾਵਿਲਾਸਸਮ੍ਪਨ੍ਨਂ ਸੀਹਨਾਦਂ ਨਦਤਿ. ਤੇਨ ਵੁਤ੍ਤਂ ‘‘ਪਰਿਸਾਸੁ ਸੀਹਨਾਦਂ ਨਦਤੀ’’ਤਿ.
ਬ੍ਰਹ੍ਮਚਕ੍ਕਂ ਪਵਤ੍ਤੇਤੀਤਿ ਏਤ੍ਥ ਬ੍ਰਹ੍ਮਨ੍ਤਿ ਸੇਟ੍ਠਂ ਉਤ੍ਤਮਂ ਵਿਸੁਦ੍ਧਂ. ਚਕ੍ਕਸਦ੍ਦੋ ਪਨਾਯਂ –
‘‘ਸਮ੍ਪਤ੍ਤਿਯਂ ਲਕ੍ਖਣੇ ਚ, ਰਥਙ੍ਗੇ ਇਰਿਯਾਪਥੇ;
ਦਾਨੇ ਰਤਨਧਮ੍ਮੂਰ-ਚਕ੍ਕਾਦੀਸੁ ਚ ਦਿਸ੍ਸਤਿ;
ਧਮ੍ਮਚਕ੍ਕੇ ਇਧ ਮਤੋ, ਤਞ੍ਚ ਦ੍ਵੇਧਾ ਵਿਭਾਵਯੇ’’.
‘‘ਚਤ੍ਤਾਰਿਮਾਨਿ, ਭਿਕ੍ਖਵੇ, ਚਕ੍ਕਾਨਿ, ਯੇਹਿ ਸਮਨ੍ਨਾਗਤਾਨਂ ਦੇਵਮਨੁਸ੍ਸਾਨ’’ਨ੍ਤਿਆਦੀਸੁ (ਅ. ਨਿ. ੪.੩੧) ਹਿ ਅਯਂ ਸਮ੍ਪਤ੍ਤਿਯਂ ਦਿਸ੍ਸਤਿ. ‘‘ਪਾਦਤਲੇਸੁ ਚਕ੍ਕਾਨਿ ਜਾਤਾਨੀ’’ਤਿ (ਦੀ. ਨਿ. ੨.੩੫) ਏਤ੍ਥ ਲਕ੍ਖਣੇ. ‘‘ਚਕ੍ਕਂਵ ਵਹਤੋ ਪਦ’’ਨ੍ਤਿ (ਧ. ਪ. ੧) ਏਤ੍ਥ ਰਥਙ੍ਗੇ. ‘‘ਚਤੁਚਕ੍ਕਂ ਨਵਦ੍ਵਾਰ’’ਨ੍ਤਿ (ਸਂ. ਨਿ. ੧.੨੯) ਏਤ੍ਥ ਇਰਿਯਾਪਥੇ. ‘‘ਦਦਂ ਭੁਞ੍ਜ ਮਾ ਚ ਪਮਾਦੋ, ਚਕ੍ਕਂ ਵਤ੍ਤਯ ਸਬ੍ਬਪਾਣਿਨ’’ਨ੍ਤਿ (ਜਾ. ੧.੭.੧੪੯) ਏਤ੍ਥ ਦਾਨੇ. ‘‘ਦਿਬ੍ਬਂ ਚਕ੍ਕਰਤਨਂ ਪਾਤੁਰਹੋਸੀ’’ਤਿ (ਦੀ. ਨਿ. ੨.੨੪੩; ਮ. ਨਿ. ੩.੨੫੬) ਏਤ੍ਥ ਰਤਨਚਕ੍ਕੇ. ‘‘ਮਯਾ ਪਵਤ੍ਤਿਤਂ ਚਕ੍ਕ’’ਨ੍ਤਿ (ਸੁ. ਨਿ. ੫੬੨) ਏਤ੍ਥ ਧਮ੍ਮਚਕ੍ਕੇ. ‘‘ਇਚ੍ਛਾਹਤਸ੍ਸ ਪੋਸਸ੍ਸ, ਚਕ੍ਕਂ ਭਮਤਿ ਮਤ੍ਥਕੇ’’ਤਿ (ਜਾ. ੧.੧.੧੦੪; ੧.੫.੧੦੩) ਏਤ੍ਥ ਉਰਚਕ੍ਕੇ. ‘‘ਖੁਰਪਰਿਯਨ੍ਤੇਨ ਚੇਪਿ ਚਕ੍ਕੇਨਾ’’ਤਿ (ਦੀ. ਨਿ. ੧.੧੬੬) ਏਤ੍ਥ ਪਹਰਣਚਕ੍ਕੇ. ‘‘ਅਸਨਿਵਿਚਕ੍ਕ’’ਨ੍ਤਿ (ਦੀ. ਨਿ. ੩.੬੧; ਸਂ. ਨਿ. ੨.੧੬੨) ਏਤ੍ਥ ਅਸਨਿਮਣ੍ਡਲੇ. ਇਧ ਪਨਾਯਂ ਧਮ੍ਮਚਕ੍ਕੇ ਮਤੋ.
ਤਂ ਪਨੇਤਂ ਧਮ੍ਮਚਕ੍ਕਂ ਦੁਵਿਧਂ ਹੋਤਿ ਪਟਿਵੇਧਞਾਣਞ੍ਚ ਦੇਸਨਾਞਾਣਞ੍ਚ. ਤਤ੍ਥ ਪਞ੍ਞਾਪਭਾਵਿਤਂ ਅਤ੍ਤਨੋ ਅਰਿਯਫਲਾਵਹਂ ਪਟਿਵੇਧਞਾਣਂ, ਕਰੁਣਾਪਭਾਵਿਤਂ ਸਾਵਕਾਨਂ ਅਰਿਯਫਲਾਵਹਂ ਦੇਸਨਾਞਾਣਂ. ਤਤ੍ਥ ਪਟਿਵੇਧਞਾਣਂ ਉਪ੍ਪਜ੍ਜਮਾਨਂ ਉਪ੍ਪਨ੍ਨਨ੍ਤਿ ਦੁਵਿਧਂ. ਤਞ੍ਹਿ ਅਭਿਨਿਕ੍ਖਮਨਤੋ ਯਾਵ ਅਰਹਤ੍ਤਮਗ੍ਗਾ ਉਪ੍ਪਜ੍ਜਮਾਨਂ, ਫਲਕ੍ਖਣੇ ਉਪ੍ਪਨ੍ਨਂ ਨਾਮ. ਤੁਸਿਤਭਵਨਤੋ ਵਾ ਯਾਵ ਮਹਾਬੋਧਿਪਲ੍ਲਙ੍ਕੇ ਅਰਹਤ੍ਤਮਗ੍ਗਾ ਉਪ੍ਪਜ੍ਜਮਾਨਂ, ਫਲਕ੍ਖਣੇ ਉਪ੍ਪਨ੍ਨਂ ਨਾਮ. ਦੀਪਙ੍ਕਰਤੋ ਪਟ੍ਠਾਯ ਵਾ ਯਾਵ ਬੋਧਿਪਲ੍ਲਙ੍ਕੇ ਅਰਹਤ੍ਤਮਗ੍ਗਾ ਉਪ੍ਪਜ੍ਜਮਾਨਂ, ਫਲਕ੍ਖਣੇ ਉਪ੍ਪਨ੍ਨਂ ਨਾਮ. ਦੇਸਨਾਞਾਣਮ੍ਪਿ ਪਵਤ੍ਤਮਾਨਂ ਪਵਤ੍ਤਨ੍ਤਿ ਦੁਵਿਧਂ. ਤਞ੍ਹਿ ਯਾਵ ਅਞ੍ਞਾਸਿਕੋਣ੍ਡਞ੍ਞਸ੍ਸ ਸੋਤਾਪਤ੍ਤਿਮਗ੍ਗਾ ਪਵਤ੍ਤਮਾਨਂ, ਫਲਕ੍ਖਣੇ ਪਵਤ੍ਤਂ ਨਾਮ. ਤੇਸੁ ਪਟਿਵੇਧਞਾਣਂ ਲੋਕੁਤ੍ਤਰਂ, ਦੇਸਨਾਞਾਣਂ ਲੋਕਿਯਂ. ਉਭਯਮ੍ਪਿ ਪਨੇਤਂ ਅਞ੍ਞੇਹਿ ਅਸਾਧਾਰਣਂ, ਬੁਦ੍ਧਾਨਂਯੇਵ ਓਰਸਞਾਣਂ.
ਸਮ੍ਮਾਸਮ੍ਬੁਦ੍ਧਸ੍ਸ ਤੇ ਪਟਿਜਾਨਤੋਤਿ ‘‘ਅਹਂ ਸਮ੍ਮਾਸਮ੍ਬੁਦ੍ਧੋ, ਸਬ੍ਬੇ ਧਮ੍ਮਾ ਮਯਾ ਅਭਿਸਮ੍ਬੁਦ੍ਧਾ’’ਤਿ ਏਵਂ ਪਟਿਜਾਨਤੋ ਤਵ. ਅਨਭਿਸਮ੍ਬੁਦ੍ਧਾਤਿ ਇਮੇ ਨਾਮ ਧਮ੍ਮਾ ਤਯਾ ਅਨਭਿਸਮ੍ਬੁਦ੍ਧਾ. ਤਤ੍ਰ ਵਤਾਤਿ ਤੇਸੁ ‘‘ਅਨਭਿਸਮ੍ਬੁਦ੍ਧਾ’’ਤਿ ਏਵਂ ਦਸ੍ਸਿਤਧਮ੍ਮੇਸੁ. ਸਹਧਮ੍ਮੇਨਾਤਿ ਸਹੇਤੁਨਾ ਸਕਾਰਣੇਨ ਵਚਨੇਨ. ਨਿਮਿਤ੍ਤਮੇਤਨ੍ਤਿ ਏਤ੍ਥ ਪੁਗ੍ਗਲੋਪਿ ਧਮ੍ਮੋਪਿ ਨਿਮਿਤ੍ਤਨ੍ਤਿ ਅਧਿਪ੍ਪੇਤੋ. ਤਂ ਪੁਗ੍ਗਲਂ ਨ ਪਸ੍ਸਾਮਿ, ਯੋ ਮਂ ਪਟਿਚੋਦੇਸ੍ਸਤਿ. ਤਂ ਧਮ੍ਮਂ ਨ ਪਸ੍ਸਾਮਿ, ਯਂ ਦਸ੍ਸੇਤ੍ਵਾ ‘‘ਅਯਂ ਨਾਮ ਧਮ੍ਮੋ ਤਯਾ ਅਨਭਿਸਮ੍ਬੁਦ੍ਧੋ’’ਤਿ ਮਂ ਪਟਿਚੋਦੇਸ੍ਸਤੀਤਿ ਅਯਮੇਤ੍ਥ ਅਤ੍ਥੋ. ਖੇਮਪ੍ਪਤ੍ਤੋਤਿ ਖੇਮਂ ਪਤ੍ਤੋ. ਸੇਸਪਦਦ੍ਵਯਂ ਇਮਸ੍ਸੇਵ ਵੇਵਚਨਂ. ਸਬ੍ਬਮ੍ਪੇਤਂ ਵੇਸਾਰਜ੍ਜਞਾਣਮੇਵ ਸਨ੍ਧਾਯ ਵੁਤ੍ਤਂ. ਦਸਬਲਸ੍ਸ ਹਿ ‘‘ਅਯਂ ਨਾਮ ਧਮ੍ਮੋ ਤਯਾ ਅਨਭਿਸਮ੍ਬੁਦ੍ਧੋ’’ਤਿ ਚੋਦਕਂ ਪੁਗ੍ਗਲਂ ਵਾ ਚੋਦਨਾਕਾਰਣਂ ਅਨਭਿਸਮ੍ਬੁਦ੍ਧਧਮ੍ਮਂ ਵਾ ਅਪਸ੍ਸਤੋ ‘‘ਸਭਾਵਬੁਦ੍ਧੋਯੇਵ ਵਤ ਸਮਾਨੋ ਅਹਂ ਬੁਦ੍ਧੋਸ੍ਮੀਤਿ ਵਦਾਮੀ’’ਤਿ ਪਚ੍ਚਵੇਕ੍ਖਨ੍ਤਸ੍ਸ ਬਲਵਤਰਂ ਸੋਮਨਸ੍ਸਂ ਉਪ੍ਪਜ੍ਜਤਿ, ਤੇਨ ਸਮ੍ਪਯੁਤ੍ਤਂ ਞਾਣਂ ਵੇਸਾਰਜ੍ਜਂ ਨਾਮ. ਤਂ ਸਨ੍ਧਾਯ ‘‘ਖੇਮਪ੍ਪਤ੍ਤੋ’’ਤਿਆਦਿਮਾਹ. ਏਵਂ ਸਬ੍ਬਤ੍ਥ ਅਤ੍ਥੋ ਵੇਦਿਤਬ੍ਬੋ.
ਅਨ੍ਤਰਾਯਿਕਾ ਧਮ੍ਮਾਤਿ ਏਤ੍ਥ ਪਨ ਅਨ੍ਤਰਾਯਂ ਕਰੋਨ੍ਤੀਤਿ ਅਨ੍ਤਰਾਯਿਕਾ. ਤੇ ਅਤ੍ਥਤੋ ਸਞ੍ਚਿਚ੍ਚ ਵੀਤਿਕ੍ਕਨ੍ਤਾ ਸਤ੍ਤ ਆਪਤ੍ਤਿਕ੍ਖਨ੍ਧਾ. ਸਞ੍ਚਿਚ੍ਚ ਵੀਤਿਕ੍ਕਨ੍ਤਂ ਹਿ ਅਨ੍ਤਮਸੋ ਦੁਕ੍ਕਟਦੁਬ੍ਭਾਸਿਤਮ੍ਪਿ ਮਗ੍ਗਫਲਾਨਂ ਅਨ੍ਤਰਾਯਂ ਕਰੋਤਿ. ਇਧ ਪਨ ਮੇਥੁਨਧਮ੍ਮੋ ਅਧਿਪ੍ਪੇਤੋ. ਮੇਥੁਨਂ ਸੇਵਤੋ ਹਿ ਯਸ੍ਸ ਕਸ੍ਸਚਿ ਨਿਸ੍ਸਂਸਯਮੇਵ ਮਗ੍ਗਫਲਾਨਂ ਅਨ੍ਤਰਾਯੋ ਹੋਤਿ.
ਯਸ੍ਸ ਖੋ ਪਨ ਤੇ ਅਤ੍ਥਾਯਾਤਿ ਰਾਗਕ੍ਖਯਾਦੀਸੁ ਯਸ੍ਸ ਅਤ੍ਥਾਯ. ਧਮ੍ਮੋ ਦੇਸਿਤੋਤਿ ਅਸੁਭਭਾਵਨਾਦਿਧਮ੍ਮੋ ਕਥਿਤੋ. ਤਤ੍ਰ ਵਤ ਮਨ੍ਤਿ ਤਸ੍ਮਿਂ ਅਨਿਯ੍ਯਾਨਿਕਧਮ੍ਮੇ ਮਂ. ਸੇਸਂ ਵੁਤ੍ਤਨਯੇਨੇਵ ਵੇਦਿਤਬ੍ਬਂ.
ਵਾਦਪਥਾਤਿ ਵਾਦਾਯੇਵ. ਪੁਥੂਤਿ ਬਹੂ. ਸਿਤਾਤਿ ਉਪਨਿਬਦ੍ਧਾ ਅਭਿਸਙ੍ਖਤਾ. ਅਥ ਵਾ ਪੁਥੁਸ੍ਸਿਤਾਤਿ ਪੁਥੁਭਾਵਂ ਸਿਤਾ ਉਪਗਤਾ, ਪੁਥੂਹਿ ਵਾ ਸਿਤਾਤਿਪਿ ਪੁਥੁਸ੍ਸਿਤਾ. ਯਂ ਨਿਸ੍ਸਿਤਾਤਿ ਏਤਰਹਿਪਿ ਯਂ ਵਾਦਪਥਂ ਨਿਸ੍ਸਿਤਾ. ਨ ਤੇ ਭਵਨ੍ਤੀਤਿ ਤੇ ਵਾਦਪਥਾ ਨ ਭਵਨ੍ਤਿ ਭਿਜ੍ਜਨ੍ਤਿ ਵਿਨਸ੍ਸਨ੍ਤਿ. ਧਮ੍ਮਚਕ੍ਕਨ੍ਤਿ ਦੇਸਨਾਞਾਣਸ੍ਸਪਿ ਪਟਿਵੇਧਞਾਣਸ੍ਸਪਿ ਏਤਂ ਨਾਮਂ. ਤੇਸੁ ਦੇਸਨਾਞਾਣਂ ਲੋਕਿਯਂ, ਪਟਿਵੇਧਞਾਣਂ ਲੋਕੁਤ੍ਤਰਂ. ਕੇਵਲੀਤਿ ਸਕਲਗੁਣਸਮਨ੍ਨਾਗਤੋ. ਤਾਦਿਸਨ੍ਤਿ ਤਥਾਵਿਧਂ.
੯. ਤਣ੍ਹੁਪ੍ਪਾਦਸੁਤ੍ਤਵਣ੍ਣਨਾ
੯. ਨਵਮੇ ਉਪ੍ਪਜ੍ਜਤਿ ਏਤੇਸੂਤਿ ਉਪ੍ਪਾਦਾ. ਕਾ ਉਪ੍ਪਜ੍ਜਤਿ? ਤਣ੍ਹਾ. ਤਣ੍ਹਾਯ ਉਪ੍ਪਾਦਾ ਤਣ੍ਹੁਪ੍ਪਾਦਾ, ਤਣ੍ਹਾਵਤ੍ਥੂਨਿ ਤਣ੍ਹਾਕਾਰਣਾਨੀਤਿ ਅਤ੍ਥੋ. ਚੀਵਰਹੇਤੂਤਿ ‘‘ਕਤ੍ਥ ਮਨਾਪਂ ਚੀਵਰਂ ਲਭਿਸ੍ਸਾਮੀ’’ਤਿ ਚੀਵਰਕਾਰਣਾ ਉਪ੍ਪਜ੍ਜਤਿ. ਇਤਿਭਵਾਭਵਹੇਤੂਤਿ ਏਤ੍ਥ ਇਤੀਤਿ ਨਿਦਸ੍ਸਨਤ੍ਥੇ ਨਿਪਾਤੋ. ਯਥਾ ਚੀਵਰਾਦਿਹੇਤੁ, ਏਵਂ ਭਵਾਭਵਹੇਤੁਪੀਤਿ ਅਤ੍ਥੋ. ਭਵਾਭਵੋਤਿ ਚੇਤ੍ਥ ਪਣੀਤਤਰਾਨਿ ਸਪ੍ਪਿਨਵਨੀਤਾਦੀਨਿ ਅਧਿਪ੍ਪੇਤਾਨਿ. ਸਮ੍ਪਤ੍ਤਿਭਵੇਸੁ ਪਣੀਤਤਰਪਣੀਤਤਮਭਵੋਤਿਪਿ ਵਦਨ੍ਤਿਯੇਵ.
ਤਣ੍ਹਾਦੁਤਿਯੋਤਿ ਅਯਞ੍ਹਿ ਸਤ੍ਤੋ ਅਨਮਤਗ੍ਗੇ ਸਂਸਾਰਵਟ੍ਟੇ ਸਂਸਰਨ੍ਤੋ ਨ ਏਕਕੋਵ ਸਂਸਰਤਿ, ਤਣ੍ਹਂ ਪਨ ਦੁਤਿਯਿਕਂ ਲਭਨ੍ਤੋਵ ਸਂਸਰਤਿ. ਤੇਨ ਵੁਤ੍ਤਂ ‘‘ਤਣ੍ਹਾਦੁਤਿਯੋ’’ਤਿ. ਇਤ੍ਥਭਾਵਞ੍ਞਥਾਭਾਵਨ੍ਤਿ ਏਤ੍ਥ ਇਤ੍ਥਭਾਵੋ ਨਾਮ ਅਯਂ ਅਤ੍ਤਭਾਵੋ, ਅਞ੍ਞਥਾਭਾਵੋ ਨਾਮ ਅਨਾਗਤਤ੍ਤਭਾਵੋ. ਏਵਰੂਪੋ ਵਾ ਅਞ੍ਞੋਪਿ ਅਤ੍ਤਭਾਵੋ ਇਤ੍ਥਭਾਵੋ ਨਾਮ, ਨ ਏਵਰੂਪੋ ਅਞ੍ਞਥਾਭਾਵੋ ਨਾਮ. ਤਂ ਇਤ੍ਥਭਾਵਞ੍ਞਥਾਭਾਵਂ. ਸਂਸਾਰਨ੍ਤਿ ਖਨ੍ਧਧਾਤੁਆਯਤਨਾਨਂ ਪਟਿਪਾਟਿਂ. ਨਾਤਿਵਤ੍ਤਤੀਤਿ ਨਾਤਿਕ੍ਕਮਤਿ. ਏਵਮਾਦੀਨਵਂ ਞਤ੍ਵਾਤਿ ਏਵਂ ਅਤੀਤਾਨਾਗਤਪਚ੍ਚੁਪ੍ਪਨ੍ਨੇਸੁ ਖਨ੍ਧੇਸੁ ਆਦੀਨਵਂ ਜਾਨਿਤ੍ਵਾ. ਤਣ੍ਹਂ ਦੁਕ੍ਖਸ੍ਸ ਸਮ੍ਭਵਨ੍ਤਿ ਤਣ੍ਹਂ ਚ ‘‘ਅਯਂ ਵਟ੍ਟਦੁਕ੍ਖਸਮ੍ਭੂਤੋ ਸਭਾਵੋ ਕਾਰਣ’’ਨ੍ਤਿ ਏਵਂ ਜਾਨਿਤ੍ਵਾ. ਏਤ੍ਤਾਵਤਾ ਇਮਸ੍ਸ ਭਿਕ੍ਖੁਨੋ ਵਿਪਸ੍ਸਨਂ ਵਡ੍ਢੇਤ੍ਵਾ ਅਰਹਤ੍ਤਂ ਪਤ੍ਤਭਾਵੋ ਦਸ੍ਸਿਤੋ. ਇਦਾਨਿ ਤਂ ਖੀਣਾਸਵਂ ਥੋਮੇਨ੍ਤੋ ਵੀਤਤਣ੍ਹੋਤਿਆਦਿਮਾਹ. ਤਤ੍ਥ ਅਨਾਦਾਨੋਤਿ ਨਿਗ੍ਗਹਣੋ. ਸਤੋ ਭਿਕ੍ਖੁ ਪਰਿਬ੍ਬਜੇਤਿ ਸਤਿਸਮ੍ਪਜਞ੍ਞੇ ਵੇਪੁਲ੍ਲਪ੍ਪਤ੍ਤੋ ਖੀਣਾਸਵੋ ਭਿਕ੍ਖੁ ਸਤੋ ਸਮ੍ਪਜਾਨੋ ਚਰੇਯ੍ਯ ਵਿਹਰੇਯ੍ਯਾਤਿ ਅਤ੍ਥੋ. ਇਤਿ ਸੁਤ੍ਤਨ੍ਤੇ ਵਟ੍ਟਂ ਕਥੇਤ੍ਵਾ ਗਾਥਾਸੁ ਵਟ੍ਟਵਿਵਟ੍ਟਂ ਕਥਿਤਨ੍ਤਿ.
੧੦. ਯੋਗਸੁਤ੍ਤਵਣ੍ਣਨਾ
੧੦. ਦਸਮੇ ਵਟ੍ਟਸ੍ਮਿਂ ਯੋਜੇਨ੍ਤੀਤਿ ਯੋਗਾ. ਕਾਮਯੋਗੋਤਿਆਦੀਸੁ ਪਞ੍ਚਕਾਮਗੁਣਿਕੋ ਰਾਗੋ ਕਾਮਯੋਗੋ. ਰੂਪਾਰੂਪਭਵੇਸੁ ਛਨ੍ਦਰਾਗੋ ਭਵਯੋਗੋ, ਤਥਾ ਝਾਨਨਿਕਨ੍ਤਿ. ਸਸ੍ਸਤਦਿਟ੍ਠਿਸਹਗਤੋ ਚ ਰਾਗੋ ਦ੍ਵਾਸਟ੍ਠਿ ਦਿਟ੍ਠਿਯੋ ਚ ਦਿਟ੍ਠਿਯੋਗੋ. ਚਤੂਸੁ ਸਚ੍ਚੇਸੁ ਅਞ੍ਞਾਣਂ ਅਵਿਜ੍ਜਾਯੋਗੋ. ਕਾਮੇਸੁ ਵਾ ਯੋਜੇਤੀਤਿ ਕਾਮਯੋਗੋ. ਭਵੇਸੁ ਯੋਜੇਤੀਤਿ ਭਵਯੋਗੋ. ਦਿਟ੍ਠੀਸੁ ਯੋਜੇਤੀਤਿ ਦਿਟ੍ਠਿਯੋਗੋ. ਅਵਿਜ੍ਜਾਯ ਯੋਜੇਤੀਤਿ ਅਵਿਜ੍ਜਾਯੋਗੋਤਿ ਹੇਟ੍ਠਾ ਵੁਤ੍ਤਧਮ੍ਮਾਨਂਯੇਵੇਤਂ ਅਧਿਵਚਨਂ.
ਇਦਾਨਿ ਤੇ ਵਿਤ੍ਥਾਰੇਤ੍ਵਾ ਦਸ੍ਸੇਨ੍ਤੋ ਕਤਮੋ ਚ, ਭਿਕ੍ਖਵੇਤਿਆਦਿਮਾਹ. ਤਤ੍ਥ ਸਮੁਦਯਨ੍ਤਿ ਉਪ੍ਪਤ੍ਤਿਂ. ਅਤ੍ਥਙ੍ਗਮਨ੍ਤਿ ਭੇਦਂ. ਅਸ੍ਸਾਦਨ੍ਤਿ ਮਧੁਰਭਾਵਂ. ਆਦੀਨਵਨ੍ਤਿ ਅਮਧੁਰਭਾਵਂ ਦੋਸਂ. ਨਿਸ੍ਸਰਣਨ੍ਤਿ ਨਿਸ੍ਸਟਭਾਵਂ. ਕਾਮੇਸੂਤਿ ਵਤ੍ਥੁਕਾਮੇਸੁ. ਕਾਮਰਾਗੋਤਿ ਕਾਮੇ ਆਰਬ੍ਭ ਉਪ੍ਪਨ੍ਨਰਾਗੋ. ਸੇਸਪਦੇਸੁਪਿ ਏਸੇਵ ਨਯੋ. ਅਨੁਸੇਤੀਤਿ ਨਿਬ੍ਬਤ੍ਤਤਿ. ਅਯਂ ਵੁਚ੍ਚਤਿ, ਭਿਕ੍ਖਵੇ, ਕਾਮਯੋਗੋਤਿ, ਭਿਕ੍ਖਵੇ, ਇਦਂ ਕਾਮੇਸੁ ਯੋਜਨਕਾਰਣਂ ਬਨ੍ਧਨਕਾਰਣਂ ਵੁਚ੍ਚਤੀਤਿ ਏਵਂ ਸਬ੍ਬਤ੍ਥ ਅਤ੍ਥੋ ਵੇਦਿਤਬ੍ਬੋ.
ਫਸ੍ਸਾਯਤਨਾਨਨ੍ਤਿ ਚਕ੍ਖਾਦੀਨਂ ਚਕ੍ਖੁਸਮ੍ਫਸ੍ਸਾਦਿਕਾਰਣਾਨਂ. ਅਵਿਜ੍ਜਾ ਅਞ੍ਞਾਣਨ੍ਤਿ ਞਾਣਪਟਿਪਕ੍ਖਭਾਵੇਨ ਅਞ੍ਞਾਣਸਙ੍ਖਾਤਾ ਅਵਿਜ੍ਜਾ. ਇਤਿ ਕਾਮਯੋਗੋਤਿ ਏਤ੍ਥ ਇਤਿ ਸਦ੍ਦੋ ਚਤੂਹਿਪਿ ਯੋਗੇਹਿ ਸਦ੍ਧਿਂ ਯੋਜੇਤਬ੍ਬੋ ‘‘ਏਵਂ ਕਾਮਯੋਗੋ, ਏਵਂ ਭਵਯੋਗੋ’’ਤਿ. ਸਂਯੁਤ੍ਤੋਤਿ ਪਰਿਵਾਰਿਤੋ. ਪਾਪਕੇਹੀਤਿ ਲਾਮਕੇਹਿ. ਅਕੁਸਲੇਹੀਤਿ ਅਕੋਸਲ੍ਲਸਮ੍ਭੂਤੇਹਿ. ਸਂਕਿਲੇਸਿਕੇਹੀਤਿ ਸਂਕਿਲੇਸਨਕੇਹਿ, ਪਸਨ੍ਨਸ੍ਸ ਚਿਤ੍ਤਸ੍ਸ ਪਸਨ੍ਨਭਾਵਦੂਸਕੇਹੀਤਿ ਅਤ੍ਥੋ. ਪੋਨੋਬ੍ਭਵਿਕੇਹੀਤਿ ਪੁਨਬ੍ਭਵਨਿਬ੍ਬਤ੍ਤਕੇਹਿ. ਸਦਰੇਹੀਤਿ ਸਦਰਥੇਹਿ. ਦੁਕ੍ਖਵਿਪਾਕੇਹੀਤਿ ਵਿਪਾਕਕਾਲੇ ਦੁਕ੍ਖੁਪ੍ਪਾਦਕੇਹਿ. ਆਯਤਿਂ ਜਾਤਿਜਰਾਮਰਣਿਕੇਹੀਤਿ ਅਨਾਗਤੇ ਪੁਨਪ੍ਪੁਨਂ ਜਾਤਿਜਰਾਮਰਣਨਿਬ੍ਬਤ੍ਤਕੇਹਿ. ਤਸ੍ਮਾ ਅਯੋਗਕ੍ਖੇਮੀਤਿ ਵੁਚ੍ਚਤੀਤਿ ਯਸ੍ਮਾ ਅਪ੍ਪਹੀਨਯੋਗੋ ਪੁਗ੍ਗਲੋ ਏਤੇਹਿ ਧਮ੍ਮੇਹਿ ਸਮ੍ਪਯੁਤ੍ਤੋ ਹੋਤਿ, ਤਸ੍ਮਾ ਚਤੂਹਿ ਯੋਗੇਹਿ ਖੇਮਂ ਨਿਬ੍ਬਾਨਂ ਅਨਧਿਗਤਤ੍ਤਾ ਨ ਯੋਗਕ੍ਖੇਮੀਤਿ ਵੁਚ੍ਚਤਿ.
ਵਿਸਂਯੋਗੋਤਿ ਵਿਸਂਯੋਜਨਕਾਰਣਾਨਿ. ਕਾਮਯੋਗਵਿਸਂਯੋਗੋਤਿ ਕਾਮਯੋਗਤੋ ਵਿਸਂਯੋਜਨਕਾਰਣਂ. ਸੇਸਪਦੇਸੁਪਿ ਏਸੇਵ ਨਯੋ. ਤਤ੍ਥ ਅਸੁਭਜ੍ਝਾਨਂ ਕਾਮਯੋਗਵਿਸਂਯੋਗੋ, ਤਂ ਪਾਦਕਂ ਕਤ੍ਵਾ ਅਧਿਗਤੋ ਅਨਾਗਾਮਿਮਗ੍ਗੋ ਏਕਨ੍ਤੇਨੇਵ ਕਾਮਯੋਗਵਿਸਂਯੋਗੋ ਨਾਮ. ਅਰਹਤ੍ਤਮਗ੍ਗੋ ਭਵਯੋਗਵਿਸਂਯੋਗੋ ਨਾਮ, ਸੋਤਾਪਤ੍ਤਿਮਗ੍ਗੋ ਦਿਟ੍ਠਿਯੋਗਵਿਸਂਯੋਗੋ ਨਾਮ, ਅਰਹਤ੍ਤਮਗ੍ਗੋ ਅਵਿਜ੍ਜਾਯੋਗਵਿਸਂਯੋਗੋ ਨਾਮ. ਇਦਾਨਿ ਤੇ ਵਿਤ੍ਥਾਰਵਸੇਨ ਦਸ੍ਸੇਨ੍ਤੋ ਕਤਮੋ ਚ, ਭਿਕ੍ਖਵੇਤਿਆਦਿਮਾਹ. ਤਸ੍ਸਤ੍ਥੋ ਵੁਤ੍ਤਨਯੇਨੇਵ ਵੇਦਿਤਬ੍ਬੋ.
ਭਵਯੋਗੇਨ ਚੂਭਯਨ੍ਤਿ ਭਵਯੋਗੇਨ ਚ ਸਂਯੁਤ੍ਤਾ, ਕਿਞ੍ਚਿ ਭਿਯ੍ਯੋ ਉਭਯੇਨਾਪਿ ਸਮ੍ਪਯੁਤ੍ਤਾ, ਯੇਨ ਕੇਨਚਿ ਯੋਗੇਨ ਸਮਨ੍ਨਾਗਤਾਤਿ ਅਤ੍ਥੋ. ਪੁਰਕ੍ਖਤਾਤਿ ਪੁਰਤੋ ਕਤਾ, ਪਰਿਵਾਰਿਤਾ ਵਾ. ਕਾਮੇ ਪਰਿਞ੍ਞਾਯਾਤਿ ਦੁਵਿਧੇਪਿ ਕਾਮੇ ਪਰਿਜਾਨਿਤ੍ਵਾ. ਭਵਯੋਗਞ੍ਚ ਸਬ੍ਬਸੋਤਿ ਭਵਯੋਗਞ੍ਚ ਸਬ੍ਬਮੇਵ ਪਰਿਜਾਨਿਤ੍ਵਾ. ਸਮੂਹਚ੍ਚਾਤਿ ਸਮੂਹਨਿਤ੍ਵਾ. ਵਿਰਾਜਯਨ੍ਤਿ ਵਿਰਾਜੇਨ੍ਤੋ, ਵਿਰਾਜੇਤ੍ਵਾ ਵਾ. ‘‘ਵਿਰਾਜੇਨ੍ਤੋ’’ਤਿ ਹਿ ਵੁਤ੍ਤੇ ਮਗ੍ਗੋ ਕਥਿਤੋ ਹੋਤਿ, ‘‘ਵਿਰਾਜੇਤ੍ਵਾ’’ਤਿ ਵੁਤ੍ਤੇ ਫਲਂ. ਮੁਨੀਤਿ ਖੀਣਾਸਵਮੁਨਿ. ਇਤਿ ਇਮਸ੍ਮਿਂ ਸੁਤ੍ਤੇਪਿ ਗਾਥਾਸੁਪਿ ਵਟ੍ਟਵਿਵਟ੍ਟਮੇਵ ਕਥਿਤਨ੍ਤਿ.
ਭਣ੍ਡਗਾਮਵਗ੍ਗੋ ਪਠਮੋ.
੨. ਚਰਵਗ੍ਗੋ
੧. ਚਰਸੁਤ੍ਤਵਣ੍ਣਨਾ
੧੧. ਦੁਤਿਯਸ੍ਸ ਪਠਮੇ ਅਧਿਵਾਸੇਤੀਤਿ ਚਿਤ੍ਤਂ ਅਧਿਰੋਪੇਤ੍ਵਾ ਵਾਸੇਤਿ. ਨਪ੍ਪਜਹਤੀਤਿ ਨ ਪਰਿਚ੍ਚਜਤਿ. ਨ ਵਿਨੋਦੇਤੀਤਿ ਨ ਨੀਹਰਤਿ. ਨ ਬ੍ਯਨ੍ਤੀਕਰੋਤੀਤਿ ਨ ਵਿਗਤਨ੍ਤਂ ਪਰਿਚ੍ਛਿਨ੍ਨਪਰਿਵਟੁਮਂ ਕਰੋਤਿ. ਨ ਅਨਭਾਵਂ ਗਮੇਤੀਤਿ ਨ ਅਨੁਅਭਾਵਂ ਅਵਡ੍ਢਿਂ ਵਿਨਾਸਂ ਗਮੇਤਿ. ਚਰਮ੍ਪੀਤਿ ਚਰਨ੍ਤੋਪਿ. ਅਨਾਤਾਪੀਤਿ ਨਿਬ੍ਬੀਰਿਯੋ. ਅਨੋਤ੍ਤਾਪੀਤਿ ਉਪਵਾਦਭਯਰਹਿਤੋ. ਸਤਤਨ੍ਤਿ ਨਿਚ੍ਚਂ. ਸਮਿਤਨ੍ਤਿ ਨਿਰਨ੍ਤਰਂ. ਏਵਂ ਸਬ੍ਬਤ੍ਥ ਅਤ੍ਥਂ ਞਤ੍ਵਾ ਸੁਕ੍ਕਪਕ੍ਖੇ ਵੁਤ੍ਤਵਿਪਰਿਯਾਯੇਨ ਅਤ੍ਥੋ ਵੇਦਿਤਬ੍ਬੋ.
ਗਾਥਾਸੁ ਗੇਹਨਿਸ੍ਸਿਤਨ੍ਤਿ ਕਿਲੇਸਨਿਸ੍ਸਿਤਂ. ਮੋਹਨੇਯ੍ਯੇਸੂਤਿ ਮੋਹਜਨਕੇਸੁ ਆਰਮ੍ਮਣੇਸੁ. ਅਭਬ੍ਬੋਤਿ ਅਭਾਜਨਭੂਤੋ. ਫੁਟ੍ਠੁਂ ਸਮ੍ਬੋਧਿਮੁਤ੍ਤਮਨ੍ਤਿ ਅਰਹਤ੍ਤਮਗ੍ਗਸਙ੍ਖਾਤਂ ਉਤ੍ਤਮਞਾਣਂ ਫੁਸਿਤੁਂ.
੨. ਸੀਲਸੁਤ੍ਤਵਣ੍ਣਨਾ
੧੨. ਦੁਤਿਯੇ ਸਮ੍ਪਨ੍ਨਸੀਲਾਤਿ ਪਰਿਪੁਣ੍ਣਸੀਲਾ. ਸਮ੍ਪਨ੍ਨਪਾਤਿਮੋਕ੍ਖਾਤਿ ਪਰਿਪੁਣ੍ਣਪਾਤਿਮੋਕ੍ਖਾ. ਪਾਤਿਮੋਕ੍ਖਸਂਵਰਸਂਵੁਤਾਤਿ ਪਾਤਿਮੋਕ੍ਖਸਂਵਰਸੀਲੇਨ ਸਂਵੁਤਾ ਪਿਹਿਤਾ ਉਪੇਤਾ ਹੁਤ੍ਵਾ ਵਿਹਰਥ. ਆਚਾਰਗੋਚਰਸਮ੍ਪਨ੍ਨਾਤਿ ਆਚਾਰੇਨ ਚ ਗੋਚਰੇਨ ਚ ਸਮ੍ਪਨ੍ਨਾ ਸਮੁਪਾਗਤਾ ਭਵਥ. ਅਣੁਮਤ੍ਤੇਸੁ ਵਜ੍ਜੇਸੂਤਿ ਅਣੁਪ੍ਪਮਾਣੇਸੁ ਦੋਸੇਸੁ. ਭਯਦਸ੍ਸਾਵਿਨੋਤਿ ਤਾਨਿ ਅਣੁਮਤ੍ਤਾਨਿ ਵਜ੍ਜਾਨਿ ਭਯਤੋ ਦਸ੍ਸਨਸੀਲਾ. ਸਮਾਦਾਯ ਸਿਕ੍ਖਥ ਸਿਕ੍ਖਾਪਦੇਸੂਤਿ ਸਬ੍ਬਸਿਕ੍ਖਾਕੋਟ੍ਠਾਸੇਸੁ ਸਮਾਦਾਤਬ੍ਬਂ ਸਮਾਦਾਯ ਗਹੇਤ੍ਵਾ ਸਿਕ੍ਖਥ. ‘‘ਸਮ੍ਪਨ੍ਨਸੀਲਾਨਂ…ਪੇ… ਸਿਕ੍ਖਾਪਦੇਸੂ’’ਤਿ ਏਤ੍ਤਕੇਨ ਧਮ੍ਮਕ੍ਖਾਨੇਨ ਸਿਕ੍ਖਤ੍ਤਯੇ ਸਮਾਦਾਪੇਤ੍ਵਾ ਚੇਵ ਪਟਿਲਦ੍ਧਗੁਣੇਸੁ ਚ ਵਣ੍ਣਂ ਕਥੇਤ੍ਵਾ ਇਦਾਨਿ ਉਤ੍ਤਰਿ ਕਾਤਬ੍ਬਂ ਦਸ੍ਸੇਨ੍ਤੋ ਕਿਮਸ੍ਸਾਤਿਆਦਿਮਾਹ. ਤਤ੍ਥ ਕਿਮਸ੍ਸਾਤਿ ਕਿਂ ਭਵੇਯ੍ਯ.
ਯਤਂ ਚਰੇਤਿ ਯਥਾ ਚਰਨ੍ਤੋ ਯਤੋ ਹੋਤਿ ਸਂਯਤੋ, ਏਵਂ ਚਰੇਯ੍ਯ. ਏਸ ਨਯੋ ਸਬ੍ਬਤ੍ਥ. ਅਚ੍ਛੇਤਿ ਨਿਸੀਦੇਯ੍ਯ. ਯਤਮੇਨਂ ਪਸਾਰਯੇਤਿ ਯਂ ਅਙ੍ਗਪਚ੍ਚਙ੍ਗਂ ਪਸਾਰੇਯ੍ਯ, ਤਂ ਯਤਂ ਸਂਯਤਮੇਵ ਕਤ੍ਵਾ ਪਸਾਰੇਯ੍ਯ. ਉਦ੍ਧਨ੍ਤਿ ਉਪਰਿ. ਤਿਰਿਯਨ੍ਤਿ ਮਜ੍ਝਂ. ਅਪਾਚੀਨਨ੍ਤਿ ਅਧੋ. ਏਤ੍ਤਾਵਤਾ ਅਤੀਤਾ ਪਚ੍ਚੁਪ੍ਪਨ੍ਨਾ ਅਨਾਗਤਾ ਚ ਪਞ੍ਚਕ੍ਖਨ੍ਧਾ ਕਥਿਤਾ. ਯਾਵਤਾਤਿ ਪਰਿਚ੍ਛੇਦਵਚਨਂ. ਜਗਤੋ ਗਤੀਤਿ ਲੋਕਸ੍ਸ ਨਿਪ੍ਫਤ੍ਤਿ. ਸਮਵੇਕ੍ਖਿਤਾ ਚ ਧਮ੍ਮਾਨਂ, ਖਨ੍ਧਾਨਂ ਉਦਯਬ੍ਬਯਨ੍ਤਿ ਏਤੇਸਂ ਸਬ੍ਬਲੋਕੇ ਅਤੀਤਾਦਿਭੇਦਾਨਂ ਪਞ੍ਚਕ੍ਖਨ੍ਧਧਮ੍ਮਾਨਂ ਉਦਯਞ੍ਚ ਵਯਞ੍ਚ ਸਮਵੇਕ੍ਖਿਤਾ. ‘‘ਪਞ੍ਚਕ੍ਖਨ੍ਧਾਨਂ ਉਦਯਂ ਪਸ੍ਸਨ੍ਤੋ ਪਞ੍ਚਵੀਸਤਿ ਲਕ੍ਖਣਾਨਿ ਪਸ੍ਸਤਿ, ਵਯਂ ਪਸ੍ਸਨ੍ਤੋ ਪਞ੍ਚਵੀਸਤਿ ਲਕ੍ਖਣਾਨਿ ਪਸ੍ਸਤੀ’’ਤਿ ਵੁਤ੍ਤੇਹਿ ਸਮਪਞ੍ਞਾਸਾਯ ਲਕ੍ਖਣੇਹਿ ਸਮ੍ਮਾ ਅਵੇਕ੍ਖਿਤਾ ਹੋਤਿ. ਚੇਤੋਸਮਥਸਾਮੀਚਿਨ੍ਤਿ ਚਿਤ੍ਤਸਮਥਸ੍ਸ ਅਨੁਚ੍ਛਵਿਕਂ ਪਟਿਪਦਂ. ਸਿਕ੍ਖਮਾਨਨ੍ਤਿ ਪਟਿਪਜ੍ਜਮਾਨਂ, ਪੂਰਯਮਾਨਨ੍ਤਿ ਅਤ੍ਥੋ. ਪਹਿਤਤ੍ਤੋਤਿ ਪੇਸਿਤਤ੍ਤੋ. ਆਹੂਤਿ ਕਥਯਨ੍ਤਿ. ਸੇਸਮੇਤ੍ਥ ਉਤ੍ਤਾਨਮੇਵ. ਇਮਸ੍ਮਿਂ ਪਨ ਸੁਤ੍ਤੇ ਸੀਲਂ ਮਿਸ੍ਸਕਂ ਕਥੇਤ੍ਵਾ ਗਾਥਾਸੁ ਖੀਣਾਸਵੋ ਕਥਿਤੋ.
੩. ਪਧਾਨਸੁਤ੍ਤਵਣ੍ਣਨਾ
੧੩. ਤਤਿਯੇ ਸਮ੍ਮਪ੍ਪਧਾਨਾਨੀਤਿ ਸੁਨ੍ਦਰਪਧਾਨਾਨਿ ਉਤ੍ਤਮਵੀਰਿਯਾਨਿ. ਸਮ੍ਮਪ੍ਪਧਾਨਾਤਿ ਪਰਿਪੁਣ੍ਣਵੀਰਿਯਾ. ਮਾਰਧੇਯ੍ਯਾਭਿਭੂਤਾਤਿ ਤੇਭੂਮਕਵਟ੍ਟਸਙ੍ਖਾਤਂ ਮਾਰਧੇਯ੍ਯਂ ਅਭਿਭਵਿਤ੍ਵਾ ਸਮਤਿਕ੍ਕਮਿਤ੍ਵਾ ਠਿਤਾ. ਤੇ ਅਸਿਤਾਤਿ ਤੇ ਖੀਣਾਸਵਾ ਅਨਿਸ੍ਸਿਤਾ ਨਾਮ. ਜਾਤਿਮਰਣਭਯਸ੍ਸਾਤਿ ਜਾਤਿਞ੍ਚ ਮਰਣਞ੍ਚ ਪਟਿਚ੍ਚ ਉਪ੍ਪਜ੍ਜਨਕਭਯਸ੍ਸ, ਜਾਤਿਮਰਣਸਙ੍ਖਾਤਸ੍ਸੇਵ ਵਾ ਭਯਸ੍ਸ. ਪਾਰਗੂਤਿ ਪਾਰਙ੍ਗਤਾ. ਤੇ ਤੁਸਿਤਾਤਿ ਤੇ ਖੀਣਾਸਵਾ ਤੁਟ੍ਠਾ ਨਾਮ. ਜੇਤ੍ਵਾ ਮਾਰਂ ਸਵਾਹਿਨਿਨ੍ਤਿ ਸਸੇਨਕਂ ਮਾਰਂ ਜਿਨਿਤ੍ਵਾ ਠਿਤਾ. ਤੇ ਅਨੇਜਾਤਿ ਤੇ ਖੀਣਾਸਵਾ ਤਣ੍ਹਾਸਙ੍ਖਾਤਾਯ ਏਜਾਯ ਅਨੇਜਾ ਨਿਚ੍ਚਲਾ ਨਾਮ. ਨਮੁਚਿਬਲਨ੍ਤਿ ਮਾਰਬਲਂ. ਉਪਾਤਿਵਤ੍ਤਾਤਿ ਅਤਿਕ੍ਕਨ੍ਤਾ. ਤੇ ਸੁਖਿਤਾਤਿ ਤੇ ਖੀਣਾਸਵਾ ਲੋਕੁਤ੍ਤਰਸੁਖੇਨ ਸੁਖਿਤਾ ਨਾਮ. ਤੇਨੇਵਾਹ –
‘‘ਸੁਖਿਤਾ ਵਤ ਅਰਹਨ੍ਤੋ, ਤਣ੍ਹਾ ਨੇਸਂ ਨ ਵਿਜ੍ਜਤਿ;
ਅਸ੍ਮਿਮਾਨੋ ਸਮੁਚ੍ਛਿਨ੍ਨੋ, ਮੋਹਜਾਲਂ ਪਦਾਲਿਤ’’ਨ੍ਤਿ. (ਸਂ. ਨਿ. ੩.੭੬);
੪. ਸਂਵਰਸੁਤ੍ਤਵਣ੍ਣਨਾ
੧੪. ਚਤੁਤ੍ਥੇ ਪਧਾਨਾਨੀਤਿ ਵੀਰਿਯਾਨਿ. ਸਂਵਰਪ੍ਪਧਾਨਨ੍ਤਿ ਚਕ੍ਖਾਦੀਨਿ ਸਂਵਰਨ੍ਤਸ੍ਸ ਉਪ੍ਪਨ੍ਨਵੀਰਿਯਂ. ਪਹਾਨਪ੍ਪਧਾਨਨ੍ਤਿ ਕਾਮਵਿਤਕ੍ਕਾਦਯੋ ਪਜਹਨ੍ਤਸ੍ਸ ਉਪ੍ਪਨ੍ਨਵੀਰਿਯਂ. ਭਾਵਨਾਪ੍ਪਧਾਨਨ੍ਤਿ ਸਮ੍ਬੋਜ੍ਝਙ੍ਗੇ ਭਾਵੇਨ੍ਤਸ੍ਸ ਉਪ੍ਪਨ੍ਨਵੀਰਿਯਂ. ਅਨੁਰਕ੍ਖਣਾਪ੍ਪਧਾਨਨ੍ਤਿ ਸਮਾਧਿਨਿਮਿਤ੍ਤਂ ਅਨੁਰਕ੍ਖਨ੍ਤਸ੍ਸ ਉਪ੍ਪਨ੍ਨਵੀਰਿਯਂ.
ਵਿਵੇਕਨਿਸ੍ਸਿਤਨ੍ਤਿਆਦੀਸੁ ਵਿਵੇਕੋ, ਵਿਰਾਗੋ, ਨਿਰੋਧੋਤਿ ਤੀਣਿਪਿ ਨਿਬ੍ਬਾਨਸ੍ਸ ਨਾਮਾਨਿ. ਨਿਬ੍ਬਾਨਂ ਹਿ ਉਪਧਿਵਿਵੇਕਤ੍ਤਾ ਵਿਵੇਕੋ, ਤਂ ਆਗਮ੍ਮ ਰਾਗਾਦਯੋ ਵਿਰਜ੍ਜਨ੍ਤੀਤਿ ਵਿਰਾਗੋ, ਨਿਰੁਜ੍ਝਨ੍ਤੀਤਿ ਨਿਰੋਧੋ. ਤਸ੍ਮਾ ਵਿਵੇਕਨਿਸ੍ਸਿਤਨ੍ਤਿਆਦੀਸੁ ਆਰਮ੍ਮਣਵਸੇਨ ਵਾ ਅਧਿਗਨ੍ਤਬ੍ਬਵਸੇਨ ਵਾ ਨਿਬ੍ਬਾਨਨਿਸ੍ਸਿਤਨ੍ਤਿ ਅਤ੍ਥੋ.
ਵੋਸ੍ਸਗ੍ਗਪਰਿਣਾਮਿਨ੍ਤਿ ਏਤ੍ਥ ਦ੍ਵੇ ਵੋਸ੍ਸਗ੍ਗਾ – ਪਰਿਚ੍ਚਾਗਵੋਸ੍ਸਗ੍ਗੋ ਚ ਪਕ੍ਖਨ੍ਦਨਵੋਸ੍ਸਗ੍ਗੋ ਚ. ਤਤ੍ਥ ਵਿਪਸ੍ਸਨਾ ਤਦਙ੍ਗਵਸੇਨ ਕਿਲੇਸੇ ਚ ਖਨ੍ਧੇ ਚ ਰਾਗਂ ਪਰਿਚ੍ਚਜਤੀਤਿ ਪਰਿਚ੍ਚਾਗਵੋਸ੍ਸਗ੍ਗੋ. ਮਗ੍ਗੋ ਆਰਮ੍ਮਣਵਸੇਨ ਨਿਬ੍ਬਾਨਂ ਪਕ੍ਖਨ੍ਦਤੀਤਿ ਪਕ੍ਖਨ੍ਦਨਵੋਸ੍ਸਗ੍ਗੋ. ਤਸ੍ਮਾ ਵੋਸ੍ਸਗ੍ਗਪਰਿਣਾਮਿਨ੍ਤਿ ਯਥਾ ਭਾਵਿਯਮਾਨੋ ਸਤਿਸਮ੍ਬੋਜ੍ਝਙ੍ਗੋ ਵੋਸ੍ਸਗ੍ਗਤ੍ਥਾਯ ਪਰਿਣਮਤਿ, ਵਿਪਸ੍ਸਨਾਭਾਵਞ੍ਚ ਮਗ੍ਗਭਾਵਞ੍ਚ ਪਾਪੁਣਾਤਿ, ਏਵਂ ਤਂ ਭਾਵੇਤੀਤਿ ਅਯਮੇਤ੍ਥ ਅਤ੍ਥੋ. ਸੇਸਪਦੇਸੁਪਿ ਏਸੇਵ ਨਯੋ. ਭਦ੍ਦਕਨ੍ਤਿ ਲਦ੍ਧਕਂ. ਸਮਾਧਿਨਿਮਿਤ੍ਤਂ ਵੁਚ੍ਚਤਿ ਅਟ੍ਠਿਕਸਞ੍ਞਾਦਿਵਸੇਨ ਅਧਿਗਤੋ ਸਮਾਧਿਯੇਵ. ਅਨੁਰਕ੍ਖਤੀਤਿ ਸਮਾਧਿਪਾਰਿਪਨ੍ਥਿਕਧਮ੍ਮੇ ਰਾਗਦੋਸਮੋਹੇ ਸੋਧੇਨ੍ਤੋ ਰਕ੍ਖਤਿ. ਏਤ੍ਥ ਚ ਅਟ੍ਠਿਕਸਞ੍ਞਾਦਿਕਾ ਪਞ੍ਚੇਵ ਸਞ੍ਞਾ ਵੁਤ੍ਤਾ, ਇਮਸ੍ਮਿਂ ਪਨ ਠਾਨੇ ਦਸਪਿ ਅਸੁਭਾਨਿ ਵਿਤ੍ਥਾਰੇਤ੍ਵਾ ਕਥੇਤਬ੍ਬਾਨਿ. ਤੇਸਂ ਵਿਤ੍ਥਾਰੋ ਵਿਸੁਦ੍ਧਿਮਗ੍ਗੇ (ਵਿਸੁਦ੍ਧਿ. ੧.੧੦੨ ਆਦਯੋ) ਵੁਤ੍ਤੋਯੇਵ. ਗਾਥਾਯ ਸਂਵਰਾਦਿਨਿਪ੍ਫਾਦਕਂ ਵੀਰਿਯਮੇਵ ਵੁਤ੍ਤਂ. ਖਯਂ ਦੁਕ੍ਖਸ੍ਸ ਪਾਪੁਣੇਤਿ ਦੁਕ੍ਖਕ੍ਖਯਸਙ੍ਖਾਤਂ ਅਰਹਤ੍ਤਂ ਪਾਪੁਣੇਯ੍ਯਾਤਿ.
੫. ਪਞ੍ਞਤ੍ਤਿਸੁਤ੍ਤਵਣ੍ਣਨਾ
੧੫. ਪਞ੍ਚਮੇ ਅਗ੍ਗਪਞ੍ਞਤ੍ਤਿਯੋਤਿ ਉਤ੍ਤਮਪਞ੍ਞਤ੍ਤਿਯੋ. ਅਤ੍ਤਭਾਵੀਨਨ੍ਤਿ ਅਤ੍ਤਭਾਵਵਨ੍ਤਾਨਂ. ਯਦਿਦਂ ਰਾਹੁ ਅਸੁਰਿਨ੍ਦੋਤਿ ਯੋ ਏਸ ਰਾਹੁ ਅਸੁਰਿਨ੍ਦੋ ਅਯਂ ਅਗ੍ਗੋਤਿ. ਏਤ੍ਥ ਰਾਹੁ ਕਿਰ ਅਸੁਰਿਨ੍ਦੋ ਚਤ੍ਤਾਰਿ ਯੋਜਨਸਹਸ੍ਸਾਨਿ ਅਟ੍ਠ ਚ ਯੋਜਨਸਤਾਨਿ ਉਚ੍ਚੋ, ਬਾਹਨ੍ਤਰਮਸ੍ਸ ਦ੍ਵਾਦਸਯੋਜਨਸਤਾਨਿ, ਹਤ੍ਥਤਲਪਾਦਤਲਾਨਂ ਪੁਥੁਲਤਾ ਤੀਣਿ ਯੋਜਨਸਤਾਨਿ. ਅਙ੍ਗੁਲਿਪਬ੍ਬਾਨਿ ਪਣ੍ਣਾਸ ਯੋਜਨਾਨਿ, ਭਮੁਕਨ੍ਤਰਂ ਪਣ੍ਣਾਸਯੋਜਨਂ, ਨਲਾਟਂ ਤਿਯੋਜਨਸਤਂ, ਸੀਸਂ ਨਵਯੋਜਨਸਤਂ. ਕਾਮਭੋਗੀਨਂ ਯਦਿਦਂ ਰਾਜਾ ਮਨ੍ਧਾਤਾਤਿ ਯੋ ਏਸ ਰਾਜਾ ਮਨ੍ਧਾਤਾ ਨਾਮ, ਅਯਂ ਦਿਬ੍ਬੇਪਿ ਮਾਨੁਸਕੇਪਿ ਕਾਮੇ ਪਰਿਭੁਞ੍ਜਨਕਾਨਂ ਸਤ੍ਤਾਨਂ ਅਗ੍ਗੋ ਨਾਮ. ਏਸ ਹਿ ਅਸਙ੍ਖੇਯ੍ਯਾਯੁਕੇਸੁ ਮਨੁਸ੍ਸੇਸੁ ਨਿਬ੍ਬਤ੍ਤਿਤ੍ਵਾ ਇਚ੍ਛਿਤਿਚ੍ਛਿਤਕ੍ਖਣੇ ਹਿਰਞ੍ਞਵਸ੍ਸਂ ਵਸ੍ਸਾਪੇਨ੍ਤੋ ਮਾਨੁਸਕੇ ਕਾਮੇ ਦੀਘਰਤ੍ਤਂ ਪਰਿਭੁਞ੍ਜਿ. ਦੇਵਲੋਕੇ ਪਨ ਯਾਵ ਛਤ੍ਤਿਂਸਾਯ ਇਨ੍ਦਾਨਂ ਆਯੁਪ੍ਪਮਾਣਂ, ਤਾਵ ਪਣੀਤੇ ਕਾਮੇ ਪਰਿਭੁਞ੍ਜੀਤਿ ਕਾਮਭੋਗੀਨਂ ਅਗ੍ਗੋ ਨਾਮ ਜਾਤੋ. ਆਧਿਪਤੇਯ੍ਯਾਨਨ੍ਤਿ ਅਧਿਪਤਿਟ੍ਠਾਨਂ ਜੇਟ੍ਠਕਟ੍ਠਾਨਂ ਕਰੋਨ੍ਤਾਨਂ. ਤਥਾਗਤੋ ਅਗ੍ਗਮਕ੍ਖਾਯਤੀਤਿ ਲੋਕਿਯਲੋਕੁਤ੍ਤਰੇਹਿ ਗੁਣੇਹਿ ਤਥਾਗਤੋ ਅਗ੍ਗੋ ਸੇਟ੍ਠੋ ਉਤ੍ਤਮੋ ਅਕ੍ਖਾਯਤਿ.
ਇਦ੍ਧਿਯਾ ਯਸਸਾ ਜਲਨ੍ਤਿ ਦਿਬ੍ਬਸਮ੍ਪਤ੍ਤਿਸਮਿਦ੍ਧਿਯਾ ਚ ਪਰਿਵਾਰਸਙ੍ਖਾਤੇਨ ਯਸਸਾ ਚ ਜਲਨ੍ਤਾਨਂ. ਉਦ੍ਧਂ ਤਿਰਿਯਂ ਅਪਾਚੀਨਨ੍ਤਿ ਉਪਰਿ ਚ ਮਜ੍ਝੇ ਚ ਹੇਟ੍ਠਾ ਚ. ਯਾਵਤਾ ਜਗਤੋ ਗਤੀਤਿ ਯਤ੍ਤਕਾ ਲੋਕਨਿਪ੍ਫਤ੍ਤਿ.
੬. ਸੋਖੁਮ੍ਮਸੁਤ੍ਤਵਣ੍ਣਨਾ
੧੬. ਛਟ੍ਠੇ ਸੋਖੁਮ੍ਮਾਨੀਤਿ ਸੁਖੁਮਲਕ੍ਖਣਪਟਿਵਿਜ੍ਝਨਕਾਨਿ ਞਾਣਾਨਿ. ਰੂਪਸੋਖੁਮ੍ਮੇਨ ਸਮਨ੍ਨਾਗਤੋ ਹੋਤੀਤਿ ਰੂਪੇ ਸਣ੍ਹਸੁਖੁਮਲਕ੍ਖਣਪਰਿਗ੍ਗਾਹਕੇਨ ਞਾਣੇਨ ਸਮਨ੍ਨਾਗਤੋ ਹੋਤਿ. ਪਰਮੇਨਾਤਿ ਉਤ੍ਤਮੇਨ. ਤੇਨ ਚ ਰੂਪਸੋਖੁਮ੍ਮੇਨਾਤਿ ਤੇਨ ਯਾਵ ਅਨੁਲੋਮਭਾਵਂ ਪਤ੍ਤੇਨ ਸੁਖੁਮਲਕ੍ਖਣਪਰਿਗ੍ਗਾਹਕਞਾਣੇਨ. ਨ ਸਮਨੁਪਸ੍ਸਤੀਤਿ ਨਤ੍ਥਿਭਾਵੇਨੇਵ ਨ ਪਸ੍ਸਤਿ. ਨ ਪਤ੍ਥੇਤੀਤਿ ਨਤ੍ਥਿਭਾਵੇਨੇਵ ਨ ਪਤ੍ਥੇਤਿ. ਵੇਦਨਾਸੋਖੁਮ੍ਮਾਦੀਸੁਪਿ ਏਸੇਵ ਨਯੋ.
ਰੂਪਸੋਖੁਮ੍ਮਤਂ ਞਤ੍ਵਾਤਿ ਰੂਪਕ੍ਖਨ੍ਧਸ੍ਸ ਸਣ੍ਹਸੁਖੁਮਲਕ੍ਖਣਪਰਿਗ੍ਗਾਹਕੇਨ ਞਾਣੇਨ ਸੁਖੁਮਤਂ ਜਾਨਿਤ੍ਵਾ. ਵੇਦਨਾਨਞ੍ਚ ਸਮ੍ਭਵਨ੍ਤਿ ਵੇਦਨਾਕ੍ਖਨ੍ਧਸ੍ਸ ਚ ਪਭਵਂ ਜਾਨਿਤ੍ਵਾ. ਸਞ੍ਞਾ ਯਤੋ ਸਮੁਦੇਤੀਤਿ ਯਸ੍ਮਾ ਕਾਰਣਾ ਸਞ੍ਞਾਕ੍ਖਨ੍ਧੋ ਸਮੁਦੇਤਿ ਨਿਬ੍ਬਤ੍ਤਤਿ, ਤਞ੍ਚ ਜਾਨਿਤ੍ਵਾ. ਅਤ੍ਥਂ ਗਚ੍ਛਤਿ ਯਤ੍ਥ ਚਾਤਿ ਯਸ੍ਮਿਂ ਠਾਨੇ ਨਿਰੁਜ੍ਝਤਿ, ਤਞ੍ਚ ਜਾਨਿਤ੍ਵਾ. ਸਙ੍ਖਾਰੇ ਪਰਤੋ ਞਤ੍ਵਾਤਿ ਸਙ੍ਖਾਰਕ੍ਖਨ੍ਧਂ ਅਨਿਚ੍ਚਤਾਯ ਲੁਜ੍ਜਨਭਾਵੇਨ ਪਰਤੋ ਜਾਨਿਤ੍ਵਾ. ਇਮਿਨਾ ਹਿ ਪਦੇਨ ਅਨਿਚ੍ਚਾਨੁਪਸ੍ਸਨਾ ਕਥਿਤਾ. ਦੁਕ੍ਖਤੋ ਨੋ ਚ ਅਤ੍ਤਤੋਤਿ ਇਮਿਨਾ ਦੁਕ੍ਖਾਨਤ੍ਤਾਨੁਪਸ੍ਸਨਾ. ਸਨ੍ਤੋਤਿ ਕਿਲੇਸਸਨ੍ਤਤਾਯ ਸਨ੍ਤੋ. ਸਨ੍ਤਿਪਦੇ ਰਤੋਤਿ ਨਿਬ੍ਬਾਨੇ ਰਤੋ. ਇਤਿ ਸੁਤ੍ਤਨ੍ਤੇ ਚਤੂਸੁ ਠਾਨੇਸੁ ਵਿਪਸ੍ਸਨਾਵ ਕਥਿਤਾ, ਗਾਥਾਸੁ ਲੋਕੁਤ੍ਤਰਧਮ੍ਮੋਪੀਤਿ.
੭. ਪਠਮਅਗਤਿਸੁਤ੍ਤਵਣ੍ਣਨਾ
੧੭-੧੯. ਸਤ੍ਤਮੇ ਅਗਤਿਗਮਨਾਨੀਤਿ ਨਗਤਿਗਮਨਾਨਿ. ਛਨ੍ਦਾਗਤਿਂ ਗਚ੍ਛਤੀਤਿ ਛਨ੍ਦੇਨ ਅਗਤਿਂ ਗਚ੍ਛਤਿ, ਅਕਤ੍ਤਬ੍ਬਂ ਕਰੋਤਿ. ਸੇਸੇਸੁਪਿ ਏਸੇਵ ਨਯੋ. ਛਨ੍ਦਾ ਦੋਸਾ ਭਯਾ ਮੋਹਾਤਿ ਛਨ੍ਦੇਨ, ਦੋਸੇਨ, ਭਯੇਨ, ਮੋਹੇਨ. ਅਤਿਵਤ੍ਤਤੀਤਿ ਅਤਿਕ੍ਕਮਤਿ. ਅਟ੍ਠਮਂ ਉਤ੍ਤਾਨਮੇਵ. ਨਵਮੇ ਤਥਾਬੁਜ੍ਝਨਕਾਨਂ ਵਸੇਨ ਦ੍ਵੀਹਿਪਿ ਨਯੇਹਿ ਕਥਿਤਂ.
੧੦. ਭਤ੍ਤੁਦ੍ਦੇਸਕਸੁਤ੍ਤਵਣ੍ਣਨਾ
੨੦. ਦਸਮੇ ਭਤ੍ਤੁਦ੍ਦੇਸਕੋਤਿ ਸਲਾਕਭਤ੍ਤਾਦੀਨਂ ਉਦ੍ਦੇਸਕੋ. ਕਾਮੇਸੁ ਅਸਂਯਤਾਤਿ ਵਤ੍ਥੁਕਾਮੇਸੁ ਕਿਲੇਸਕਾਮੇਹਿ ਅਸਂਯਤਾ. ਪਰਿਸਾਕਸਟੋ ਚ ਪਨੇਸ ਵੁਚ੍ਚਤੀਤਿ ਅਯਞ੍ਚ ਪਨ ਸੋ ਏਵਰੂਪਾ ਪਰਿਸਾਕਚਵਰੋ ਨਾਮ ਵੁਚ੍ਚਤੀਤਿ ਅਤ੍ਥੋ. ਸਮਣੇਨਾਤਿ ਬੁਦ੍ਧਸਮਣੇਨ. ਪਰਿਸਾਯ ਮਣ੍ਡੋ ਚ ਪਨੇਸ ਵੁਚ੍ਚਤੀਤਿ ਅਯਂ ਏਵਰੂਪਾ ਪਰਿਸਾ ਵਿਪ੍ਪਸਨ੍ਨੇਨ ਪਰਿਸਾਮਣ੍ਡੋਤਿ ਵੁਚ੍ਚਤੀਤਿ.
ਚਰਵਗ੍ਗੋ ਦੁਤਿਯੋ.
੩. ਉਰੁਵੇਲਵਗ੍ਗੋ
੧. ਪਠਮਉਰੁਵੇਲਸੁਤ੍ਤਵਣ੍ਣਨਾ
੨੧. ਤਤਿਯਸ੍ਸ ਪਠਮੇ ਉਰੁਵੇਲਾਯਨ੍ਤਿ ਏਤ੍ਥ ਉਰੁਵੇਲਾਤਿ ਮਹਾਵੇਲਾ, ਮਹਾਵਾਲਿਕਰਾਸੀਤਿ ਅਤ੍ਥੋ. ਅਥ ਵਾ ਉਰੂਤਿ ਵਾਲੁਕਾ ਵੁਚ੍ਚਤਿ, ਵੇਲਾਤਿ ਮਰਿਯਾਦਾ. ਵੇਲਾਤਿਕ੍ਕਮਨਹੇਤੁ ਆਹਟਾ ਉਰੁ ਉਰੁਵੇਲਾਤਿ ਏਵਮੇਤ੍ਥ ਅਤ੍ਥੋ ਦਟ੍ਠਬ੍ਬੋ. ਅਤੀਤੇ ਕਿਰ ਅਨੁਪ੍ਪਨ੍ਨੇ ਬੁਦ੍ਧੇ ਦਸਸਹਸ੍ਸਾ ਕੁਲਪੁਤ੍ਤਾ ਤਾਪਸਪਬ੍ਬਜ੍ਜਂ ਪਬ੍ਬਜਿਤ੍ਵਾ ਤਸ੍ਮਿਂ ਪਦੇਸੇ ਵਿਹਰਨ੍ਤਾ ਏਕਦਿਵਸਂ ਸਨ੍ਨਿਪਤਿਤ੍ਵਾ ਕਤਿਕਵਤ੍ਤਂ ਅਕਂਸੁ – ‘‘ਕਾਯਕਮ੍ਮਵਚੀਕਮ੍ਮਾਨਿ ਨਾਮ ਪਰੇਸਮ੍ਪਿ ਪਾਕਟਾਨਿ ਹੋਨ੍ਤਿ, ਮਨੋਕਮ੍ਮਂ ਪਨ ਅਪਾਕਟਂ. ਤਸ੍ਮਾ ਯੋ ਕਾਮਵਿਤਕ੍ਕਂ ਵਾ ਬ੍ਯਾਪਾਦਵਿਤਕ੍ਕਂ ਵਾ ਵਿਹਿਂਸਾਵਿਤਕ੍ਕਂ ਵਾ ਵਿਤਕ੍ਕੇਤਿ, ਤਸ੍ਸ ਅਞ੍ਞੋ ਚੋਦਕੋ ਨਾਮ ਨਤ੍ਥਿ. ਸੋ ਅਤ੍ਤਨਾਵ ਅਤ੍ਤਾਨਂ ਚੋਦੇਤ੍ਵਾ ਪਤ੍ਤਪੁਟੇਨ ਵਾਲੁਕਂ ਆਹਰਿਤ੍ਵਾ ਇਮਸ੍ਮਿਂ ਠਾਨੇ ਆਕਿਰਤੁ, ਇਦਮਸ੍ਸ ਦਣ੍ਡਕਮ੍ਮ’’ਨ੍ਤਿ. ਤਤੋ ਪਟ੍ਠਾਯ ਯੋ ਤਾਦਿਸਂ ਵਿਤਕ੍ਕਂ ਵਿਤਕ੍ਕੇਤਿ, ਸੋ ਤਤ੍ਥ ਪਤ੍ਤਪੁਟੇਨ ਵਾਲੁਕਂ ਆਕਿਰਤਿ, ਏਵਂ ਤਤ੍ਥ ਅਨੁਕ੍ਕਮੇਨ ਮਹਾਵਾਲੁਕਰਾਸਿ ਜਾਤੋ. ਤਤੋ ਨਂ ਪਚ੍ਛਿਮਾ ਜਨਤਾ ਪਰਿਕ੍ਖਿਪਿਤ੍ਵਾ ਚੇਤਿਯਟ੍ਠਾਨਮਕਾਸਿ, ਤਂ ਸਨ੍ਧਾਯ ਵੁਤ੍ਤਂ – ‘‘ਉਰੁਵੇਲਾਤਿ ਮਹਾਵੇਲਾ, ਮਹਾਵਾਲਿਕਰਾਸੀਤਿ ਅਤ੍ਥੋ’’ਤਿ. ਤਮੇਵ ਸਨ੍ਧਾਯ ਵੁਤ੍ਤਂ – ‘‘ਅਥ ਵਾ ਉਰੂਤਿ ਵਾਲੁਕਾ ਵੁਚ੍ਚਤਿ, ਵੇਲਾਤਿ ਮਰਿਯਾਦਾ, ਵੇਲਾਤਿਕ੍ਕਮਨਹੇਤੁ ਆਹਟਾ ਉਰੁ ਉਰੁਵੇਲਾਤਿ ਏਵਮੇਤ੍ਥ ਅਤ੍ਥੋ ਦਟ੍ਠਬ੍ਬੋ’’ਤਿ.
ਨਜ੍ਜਾ ਨੇਰਞ੍ਜਰਾਯ ਤੀਰੇਤਿ ਉਰੁਵੇਲਗਾਮਂ ਨਿਸ੍ਸਾਯ ਨੇਰਞ੍ਜਰਾਨਦੀਤੀਰੇ ਵਿਹਰਾਮੀਤਿ ਦਸ੍ਸੇਤਿ. ਅਜਪਾਲਨਿਗ੍ਰੋਧੇਤਿ ਅਜਪਾਲਕਾ ਤਸ੍ਸ ਨਿਗ੍ਰੋਧਸ੍ਸ ਛਾਯਾਯ ਨਿਸੀਦਨ੍ਤਿਪਿ ਤਿਟ੍ਠਨ੍ਤਿਪਿ, ਤਸ੍ਮਾ ਸੋ ਅਜਪਾਲਨਿਗ੍ਰੋਧੋਤ੍ਵੇਵ ਸਙ੍ਖਂ ਗਤੋ, ਤਸ੍ਸ ਹੇਟ੍ਠਾਤਿ ਅਤ੍ਥੋ. ਪਠਮਾਭਿਸਮ੍ਬੁਦ੍ਧੋਤਿ ਸਮ੍ਬੁਦ੍ਧੋ ਹੁਤ੍ਵਾ ਪਠਮਮੇਵ. ਉਦਪਾਦੀਤਿ ਅਯਂ ਵਿਤਕ੍ਕੋ ਪਞ੍ਚਮੇ ਸਤ੍ਤਾਹੇ ਉਦਪਾਦਿ. ਕਸ੍ਮਾ ਉਦਪਾਦੀਤਿ? ਸਬ੍ਬਬੁਦ੍ਧਾਨਂ ਆਚਿਣ੍ਣਤ੍ਤਾ ਚੇਵ ਪੁਬ੍ਬਾਸੇਵਨਤਾਯ ਚ. ਤਤ੍ਥ ਪੁਬ੍ਬਾਸੇਵਨਾਯ ਪਕਾਸਨਤ੍ਥਂ ਤਿਤ੍ਤਿਰਜਾਤਕਂ ਆਹਰਿਤਬ੍ਬਂ. ਹਤ੍ਥਿਵਾਨਰਤਿਤ੍ਤਿਰਾ ਕਿਰ ਏਕਸ੍ਮਿਂ ਪਦੇਸੇ ਵਿਹਰਨ੍ਤਾ ‘‘ਯੋ ਅਮ੍ਹਾਕਂ ਮਹਲ੍ਲਕੋ, ਤਸ੍ਮਿਂ ਸਗਾਰਵਾ ਵਿਹਰਿਸ੍ਸਾਮਾ’’ਤਿ ਨਿਗ੍ਰੋਧਂ ਦਸ੍ਸੇਤ੍ਵਾ ‘‘ਕੋ ਨੁ ਖੋ ਅਮ੍ਹਾਕਂ ਮਹਲ੍ਲਕੋ’’ਤਿ ਵੀਮਂਸਨ੍ਤਾ ਤਿਤ੍ਤਿਰਸ੍ਸ ਮਹਲ੍ਲਕਭਾਵਂ ਞਤ੍ਵਾ ਤਸ੍ਸ ਜੇਟ੍ਠਾਪਚਾਯਨਕਮ੍ਮਂ ਕਤ੍ਵਾ ਅਞ੍ਞਮਞ੍ਞਂ ਸਮਗ੍ਗਾ ਸਮ੍ਮੋਦਮਾਨਾ ਵਿਹਰਿਤ੍ਵਾ ਸਗ੍ਗਪਰਾਯਣਾ ਅਹੇਸੁਂ. ਤਂ ਕਾਰਣਂ ਞਤ੍ਵਾ ਰੁਕ੍ਖੇ ਅਧਿਵਤ੍ਥਾ ਦੇਵਤਾ ਇਮਂ ਗਾਥਮਾਹ –
‘‘ਯੇ ਵੁਡ੍ਢਮਪਚਾਯਨ੍ਤਿ, ਨਰਾ ਧਮ੍ਮਸ੍ਸ ਕੋਵਿਦਾ;
ਦਿਟ੍ਠੇਵ ਧਮ੍ਮੇ ਪਾਸਂਸਾ, ਸਮ੍ਪਰਾਯੇ ਚ ਸੁਗ੍ਗਤੀ’’ਤਿ. (ਜਾ. ੧.੧.੩੭);
ਏਵਂ ਅਹੇਤੁਕਤਿਰਚ੍ਛਾਨਯੋਨਿਯਂ ਨਿਬ੍ਬਤ੍ਤੋਪਿ ਤਥਾਗਤੋ ਸਗਾਰਵਵਾਸਂ ਰੋਚੇਸਿ, ਇਦਾਨਿ ਕਸ੍ਮਾ ਨ ਰੋਚੇਸ੍ਸਤੀਤਿ. ਅਗਾਰਵੋਤਿ ਅਞ੍ਞਸ੍ਮਿਂ ਗਾਰਵਰਹਿਤੋ, ਕਞ੍ਚਿ ਗਰੁਟ੍ਠਾਨੇ ਅਟ੍ਠਪੇਤ੍ਵਾਤਿ ਅਤ੍ਥੋ. ਅਪ੍ਪਤਿਸ੍ਸੋਤਿ ਪਤਿਸ੍ਸਯਰਹਿਤੋ, ਕਞ੍ਚਿ ਜੇਟ੍ਠਕਟ੍ਠਾਨੇ ਅਟ੍ਠਪੇਤ੍ਵਾਤਿ ਅਤ੍ਥੋ. ਸਮਣਂ ਵਾ ਬ੍ਰਾਹ੍ਮਣਂ ਵਾਤਿ ਏਤ੍ਥ ਸਮਿਤਪਾਪਬਾਹਿਤਪਾਪਾਯੇਵ ਸਮਣਬ੍ਰਾਹ੍ਮਣਾ ਅਧਿਪ੍ਪੇਤਾ. ਸਕ੍ਕਤ੍ਵਾ ਗਰੁਂ ਕਤ੍ਵਾਤਿ ਸਕ੍ਕਾਰਞ੍ਚੇਵ ਕਤ੍ਵਾ ਗਰੁਕਾਰਞ੍ਚ ਉਪਟ੍ਠਪੇਤ੍ਵਾ.
ਸਦੇਵਕੇ ਲੋਕੇਤਿਆਦੀਸੁ ਸਦ੍ਧਿਂ ਦੇਵੇਹਿ ਸਦੇਵਕੇ. ਦੇਵਗ੍ਗਹਣੇਨ ਚੇਤ੍ਥ ਮਾਰਬ੍ਰਹ੍ਮੇਸੁ ਗਹਿਤੇਸੁਪਿ ਮਾਰੋ ਨਾਮ ਵਸਵਤ੍ਤੀ ਸਬ੍ਬੇਸਂ ਉਪਰਿ ਵਸਂ ਵਤ੍ਤੇਤਿ, ਬ੍ਰਹ੍ਮਾ ਨਾਮ ਮਹਾਨੁਭਾਵੋ, ਏਕਙ੍ਗੁਲਿਯਾ ਏਕਸ੍ਮਿਂ ਚਕ੍ਕਵਾਲ਼ਸਹਸ੍ਸੇ ਆਲੋਕਂ ਫਰਤਿ, ਦ੍ਵੀਹਿ ਦ੍ਵੀਸੁ, ਦਸਹਿ ਅਙ੍ਗੁਲੀਹਿ ਦਸਸੁ ਚਕ੍ਕਵਾਲ਼ਸਹਸ੍ਸੇਸੁ ਆਲੋਕਂ ਫਰਤਿ. ਸੋ ਇਮਿਨਾ ਸੀਲਸਮ੍ਪਨ੍ਨਤਰੋਤਿ ਵਤ੍ਤੁਂ ਮਾ ਲਭਨ੍ਤੂਤਿ ਸਮਾਰਕੇ ਸਬ੍ਰਹ੍ਮਕੇਤਿ ਵਿਸੁਂ ਵੁਤ੍ਤਂ. ਤਥਾ ਸਮਣਾ ਨਾਮ ਏਕਨਿਕਾਯਾਦਿਵਸੇਨ ਬਹੁਸ੍ਸੁਤਾ ਸੀਲਵਨ੍ਤੋ ਪਣ੍ਡਿਤਾ, ਬ੍ਰਾਹ੍ਮਣਾਪਿ ਵਤ੍ਥੁਵਿਜ੍ਜਾਦਿਵਸੇਨ ਬਹੁਸ੍ਸੁਤਾ ਪਣ੍ਡਿਤਾ. ਤੇ ਇਮਿਨਾ ਸਮ੍ਪਨ੍ਨਤਰਾਤਿ ਵਤ੍ਤੁਂ ਮਾ ਲਭਨ੍ਤੂਤਿ ਸਸ੍ਸਮਣਬ੍ਰਾਹ੍ਮਣਿਯਾ ਪਜਾਯਾਤਿ ਵੁਤ੍ਤਂ. ਸਦੇਵਮਨੁਸ੍ਸਾਯਾਤਿ ਇਦਂ ਪਨ ਨਿਪ੍ਪਦੇਸਤੋ ਦਸ੍ਸਨਤ੍ਥਂ ਗਹਿਤਮੇਵ ਗਹੇਤ੍ਵਾ ਵੁਤ੍ਤਂ. ਅਪਿਚੇਤ੍ਥ ਪੁਰਿਮਾਨਿ ਤੀਣਿ ਪਦਾਨਿ ਲੋਕਵਸੇਨ ਵੁਤ੍ਤਾਨਿ, ਪਚ੍ਛਿਮਾਨਿ ਦ੍ਵੇ ਪਜਾਵਸੇਨ. ਸੀਲਸਮ੍ਪਨ੍ਨਤਰਨ੍ਤਿ ਸੀਲੇਨ ਸਮ੍ਪਨ੍ਨਤਰਂ, ਅਧਿਕਤਰਨ੍ਤਿ ਅਤ੍ਥੋ. ਏਤ੍ਥ ਚ ਸੀਲਾਦਯੋ ਚਤ੍ਤਾਰੋ ਧਮ੍ਮਾ ਲੋਕਿਯਲੋਕੁਤ੍ਤਰਾ ਕਥਿਤਾ, ਵਿਮੁਤ੍ਤਿਞਾਣਦਸ੍ਸਨਂ ਲੋਕਿਯਮੇਵ. ਪਚ੍ਚਵੇਕ੍ਖਣਞਾਣਮੇਵ ਹੇਤਂ. ਪਾਤੁਰਹੋਸੀਤਿ ‘‘ਅਯਂ ਸਤ੍ਥਾ ਅਵੀਚਿਤੋ ਯਾਵ ਭਵਗ੍ਗਾ ਸੀਲਾਦੀਹਿ ਅਤ੍ਤਨਾ ਅਧਿਕਤਰਂ ਅਪਸ੍ਸਨ੍ਤੋ ‘ਮਯਾ ਪਟਿਵਿਦ੍ਧਨਵਲੋਕੁਤ੍ਤਰਧਮ੍ਮਮੇਵ ਸਕ੍ਕਤ੍ਵਾ ਉਪਨਿਸ੍ਸਾਯ ਵਿਹਰਿਸ੍ਸਾਮੀ’ਤਿ ਚਿਨ੍ਤੇਤਿ, ਕਾਰਣਂ ਭਗਵਾ ਚਿਨ੍ਤੇਤਿ, ਅਤ੍ਥਂ ਵੁਡ੍ਢਿਂ ਵਿਸੇਸਂ ਚਿਨ੍ਤੇਤਿ, ਗਚ੍ਛਾਮਿਸ੍ਸ ਉਸ੍ਸਾਹਂ ਜਨੇਸ੍ਸਾਮੀ’’ਤਿ ਚਿਨ੍ਤੇਤ੍ਵਾ ਪੁਰਤੋ ਪਾਕਟੋ ਅਹੋਸਿ, ਅਭਿਮੁਖੇ ਅਟ੍ਠਾਸੀਤਿ ਅਤ੍ਥੋ.
ਵਿਹਂਸੁ ਵਿਹਰਨ੍ਤਿ ਚਾਤਿ ਏਤ੍ਥ ਯੋ ਵਦੇਯ੍ਯ – ‘‘ਵਿਹਰਨ੍ਤੀਤਿ ਵਚਨਤੋ ਪਚ੍ਚੁਪ੍ਪਨ੍ਨੇਪਿ ਬਹੂ ਬੁਦ੍ਧਾ’’ਤਿ, ਸੋ ‘‘ਭਗਵਾਪਿ ਭਨ੍ਤੇ ਏਤਰਹਿ ਅਰਹਂ ਸਮ੍ਮਾਸਮ੍ਬੁਦ੍ਧੋ’’ਤਿ ਇਮਿਨਾ ਵਚਨੇਨ ਪਟਿਬਾਹਿਤਬ੍ਬੋ.
‘‘ਨ ਮੇ ਆਚਰਿਯੋ ਅਤ੍ਥਿ, ਸਦਿਸੋ ਮੇ ਨ ਵਿਜ੍ਜਤਿ;
ਸਦੇਵਕਸ੍ਮਿਂ ਲੋਕਸ੍ਮਿਂ, ਨਤ੍ਥਿ ਮੇ ਪਟਿਪੁਗ੍ਗਲੋ’’ਤਿ. (ਮਹਾਵ. ੧੧; ਮ. ਨਿ. ੨.੩੪੧) –
ਆਦੀਹਿ ਚਸ੍ਸ ਸੁਤ੍ਤੇਹਿ ਅਞ੍ਞੇਸਂ ਬੁਦ੍ਧਾਨਂ ਅਭਾਵੋ ਦੀਪੇਤਬ੍ਬੋ. ਤਸ੍ਮਾਤਿ ਯਸ੍ਮਾ ਸਬ੍ਬੇਪਿ ਬੁਦ੍ਧਾ ਸਦ੍ਧਮ੍ਮਗਰੁਨੋ, ਤਸ੍ਮਾ. ਮਹਤ੍ਤਮਭਿਕਙ੍ਖਤਾਤਿ ਮਹਨ੍ਤਭਾਵਂ ਪਤ੍ਥਯਮਾਨੇਨ. ਸਰਂ ਬੁਦ੍ਧਾਨ ਸਾਸਨਨ੍ਤਿ ਬੁਦ੍ਧਾਨਂ ਸਾਸਨਂ ਸਰਨ੍ਤੇਨ.
ਯਤੋਤਿ ਯਸ੍ਮਿਂ ਕਾਲੇ. ਮਹਤ੍ਤੇਨ ਸਮਨ੍ਨਾਗਤੋਤਿ ਰਤ੍ਤਞ੍ਞੁਮਹਤ੍ਤਂ ਵੇਪੁਲ੍ਲਮਹਤ੍ਤਂ ਬ੍ਰਹ੍ਮਚਰਿਯਮਹਤ੍ਤਂ ਲਾਭਗ੍ਗਮਹਤ੍ਤਨ੍ਤਿ ਇਮਿਨਾ ਚਤੁਬ੍ਬਿਧੇਨ ਮਹਤ੍ਤੇਨ ਸਮਨ੍ਨਾਗਤੋ. ਅਥ ਮੇ ਸਙ੍ਘੇਪਿ ਗਾਰਵੋਤਿ ਅਥ ਮਯ੍ਹਂ ਸਙ੍ਘੇਪਿ ਗਾਰਵੋ ਜਾਤੋ. ਕਿਸ੍ਮਿਂ ਪਨ ਕਾਲੇ ਭਗਵਤਾ ਸਙ੍ਘੇ ਗਾਰਵੋ ਕਤੋਤਿ? ਮਹਾਪਜਾਪਤਿਯਾ ਦੁਸ੍ਸਯੁਗਦਾਨਕਾਲੇ. ਤਦਾ ਹਿ ਭਗਵਾ ਅਤ੍ਤਨੋ ਉਪਨੀਤਂ ਦੁਸ੍ਸਯੁਗਂ ‘‘ਸਙ੍ਘੇ, ਗੋਤਮਿ, ਦੇਹਿ, ਸਙ੍ਘੇ ਤੇ ਦਿਨ੍ਨੇ ਅਹਞ੍ਚੇਵ ਪੂਜਿਤੋ ਭਵਿਸ੍ਸਾਮਿ ਸਙ੍ਘੋ ਚਾ’’ਤਿ ਵਦਨ੍ਤੋ ਸਙ੍ਘੇ ਗਾਰਵਂ ਅਕਾਸਿ ਨਾਮ.
੨. ਦੁਤਿਯਉਰੁਵੇਲਸੁਤ੍ਤਵਣ੍ਣਨਾ
੨੨. ਦੁਤਿਯੇ ਸਮ੍ਬਹੁਲਾਤਿ ਬਹੁਕਾ. ਬ੍ਰਾਹ੍ਮਣਾਤਿ ਹੁਹੁਕ੍ਕਜਾਤਿਕੇਨ ਬ੍ਰਾਹ੍ਮਣੇਨ ਸਦ੍ਧਿਂ ਆਗਤਾ ਬ੍ਰਾਹ੍ਮਣਾ. ਜਿਣ੍ਣਾਤਿ ਜਰਾਜਿਣ੍ਣਾ. ਵੁਡ੍ਢਾਤਿ ਵਯੋਵੁਦ੍ਧਾ. ਮਹਲ੍ਲਕਾਤਿ ਜਾਤਿਮਹਲ੍ਲਕਾ. ਅਦ੍ਧਗਤਾਤਿ ਤਯੋ ਵਯੇ ਅਦ੍ਧੇ ਅਤਿਕ੍ਕਨ੍ਤਾ. ਸੁਤਮੇਤਨ੍ਤਿ ਅਮ੍ਹੇਹਿ ਸੁਤਂ ਏਤਂ. ਤਯਿਦਂ ਭੋ, ਗੋਤਮ, ਤਥੇਵਾਤਿ ਭੋ, ਗੋਤਮ, ਏਤਂ ਅਮ੍ਹੇਹਿ ਸੁਤਕਾਰਣਂ ਤਥਾ ਏਵ. ਤਯਿਦਂ ਭੋ, ਗੋਤਮ, ਨ ਸਮ੍ਪਨ੍ਨਮੇਵਾਤਿ ਤਂ ਏਤਂ ਅਭਿਵਾਦਨਾਦਿਅਕਰਣਂ ਅਨਨੁਚ੍ਛਵਿਕਮੇਵ.
ਅਕਾਲਵਾਦੀਤਿਆਦੀਸੁ ਅਕਾਲੇ ਵਦਤੀਤਿ ਅਕਾਲਵਾਦੀ. ਅਸਭਾਵਂ ਵਦਤੀਤਿ ਅਭੂਤਵਾਦੀ. ਅਨਤ੍ਥਂ ਵਦਤਿ, ਨੋ ਅਤ੍ਥਨ੍ਤਿ ਅਨਤ੍ਥਵਾਦੀ. ਅਧਮ੍ਮਂ ਵਦਤਿ, ਨੋ ਧਮ੍ਮਨ੍ਤਿ ਅਧਮ੍ਮਵਾਦੀ. ਅਵਿਨਯਂ ਵਦਤਿ, ਨੋ ਵਿਨਯਨ੍ਤਿ ਅਵਿਨਯਵਾਦੀ. ਅਨਿਧਾਨਵਤਿਂ ਵਾਚਂ ਭਾਸਿਤਾਤਿ ਨ ਹਦਯੇ ਨਿਧੇਤਬ੍ਬਯੁਤ੍ਤਕਂ ਵਾਚਂ ਭਾਸਿਤਾ. ਅਕਾਲੇਨਾਤਿ ਕਥੇਤੁਂ ਅਯੁਤ੍ਤਕਾਲੇਨ. ਅਨਪਦੇਸਨ੍ਤਿ ਅਪਦੇਸਰਹਿਤਂ, ਸਾਪਦੇਸਂ ਸਕਾਰਣਂ ਕਤ੍ਵਾ ਨ ਕਥੇਤਿ. ਅਪਰਿਯਨ੍ਤਵਤਿਨ੍ਤਿ ਪਰਿਯਨ੍ਤਰਹਿਤਂ, ਨ ਪਰਿਚ੍ਛੇਦਂ ਦਸ੍ਸੇਤ੍ਵਾ ਕਥੇਤਿ. ਅਨਤ੍ਥਸਂਹਿਤਨ੍ਤਿ ਨ ਲੋਕਿਯਲੋਕੁਤ੍ਤਰਅਤ੍ਥਨਿਸ੍ਸਿਤਂ ਕਤ੍ਵਾ ਕਥੇਤਿ. ਬਾਲੋ ਥੇਰੋਤ੍ਵੇਵ ਸਙ੍ਖਂ ਗਚ੍ਛਤੀਤਿ ਅਨ੍ਧਬਾਲੋ ਥੇਰੋਤਿ ਸਙ੍ਖਂ ਗਚ੍ਛਤਿ.
ਕਾਲਵਾਦੀਤਿਆਦੀਨਿ ਵੁਤ੍ਤਪਟਿਪਕ੍ਖਵਸੇਨ ਵੇਦਿਤਬ੍ਬਾਨਿ. ਪਣ੍ਡਿਤੋ ਥੇਰੋਤ੍ਵੇਵ ਸਙ੍ਖਂ ਗਚ੍ਛਤੀਤਿ ਪਣ੍ਡਿਚ੍ਚੇਨ ਸਮਨ੍ਨਾਗਤਤ੍ਤਾ ਪਣ੍ਡਿਤੋ, ਥਿਰਭਾਵਪ੍ਪਤ੍ਤਿਯਾ ਥੇਰੋਤਿ ਸਙ੍ਖਂ ਗਚ੍ਛਤਿ.
ਬਹੁਸ੍ਸੁਤੋ ਹੋਤੀਤਿ ਬਹੁਂ ਅਸ੍ਸ ਸੁਤਂ ਹੋਤਿ, ਨਵਙ੍ਗਂ ਸਤ੍ਥੁਸਾਸਨਂ ਪਾਲ਼ਿਅਨੁਸਨ੍ਧਿਪੁਬ੍ਬਾਪਰਵਸੇਨ ਉਗ੍ਗਹਿਤਂ ਹੋਤੀਤਿ ਅਤ੍ਥੋ. ਸੁਤਧਰੋਤਿ ਸੁਤਸ੍ਸ ਆਧਾਰਭੂਤੋ. ਯਸ੍ਸ ਹਿ ਇਤੋ ਗਹਿਤਂ ਇਤੋ ਪਲਾਯਤਿ, ਛਿਦ੍ਦਘਟੇ ਉਦਕਂ ਵਿਯ ਨ ਤਿਟ੍ਠਤਿ, ਪਰਿਸਮਜ੍ਝੇ ਏਕਸੁਤ੍ਤਂ ਵਾ ਜਾਤਕਂ ਵਾ ਕਥੇਤੁਂ ਵਾ ਵਾਚੇਤੁਂ ਵਾ ਨ ਸਕ੍ਕੋਤਿ, ਅਯਂ ਨ ਸੁਤਧਰੋ ਨਾਮ. ਯਸ੍ਸ ਪਨ ਉਗ੍ਗਹਿਤਂ ਬੁਦ੍ਧਵਚਨਂ ਉਗ੍ਗਹਿਤਕਾਲਸਦਿਸਮੇਵ ਹੋਤਿ, ਦਸਪਿ ਵੀਸਤਿਪਿ ਵਸ੍ਸਾਨਿ ਸਜ੍ਝਾਯਂ ਅਕਰੋਨ੍ਤਸ੍ਸ ਨੇਵ ਨਸ੍ਸਤਿ, ਅਯਂ ਸੁਤਧਰੋ ਨਾਮ. ਸੁਤਸਨ੍ਨਿਚਯੋਤਿ ਸੁਤਸ੍ਸ ਸਨ੍ਨਿਚਯਭੂਤੋ. ਯਸ੍ਸ ਹਿ ਸੁਤਂ ਹਦਯਮਞ੍ਜੂਸਾਯ ਸਨ੍ਨਿਚਿਤਂ ਸਿਲਾਯ ਲੇਖਾ ਵਿਯ ਸੁਵਣ੍ਣਪਤ੍ਤੇ ਪਕ੍ਖਿਤ੍ਤਸੀਹਵਸਾ ਵਿਯ ਚ ਤਿਟ੍ਠਤਿ, ਅਯਂ ਸੁਤਸਨ੍ਨਿਚਯੋ ਨਾਮ. ਧਾਤਾਤਿ ਧਾਤਾ ਪਗੁਣਾ. ਏਕਚ੍ਚਸ੍ਸ ਹਿ ਉਗ੍ਗਹਿਤਬੁਦ੍ਧਵਚਨਂ ਧਾਤਂ ਪਗੁਣਂ ਨਿਚ੍ਚਲਿਕਂ ਨ ਹੋਤਿ, ‘‘ਅਸੁਕਂ ਸੁਤ੍ਤਂ ਵਾ ਜਾਤਕਂ ਵਾ ਕਥੇਹੀ’’ਤਿ ਵੁਤ੍ਤੇ ‘‘ਸਜ੍ਝਾਯਿਤ੍ਵਾ ਸਂਸਨ੍ਦਿਤ੍ਵਾ ਸਮਨੁਗ੍ਗਾਹਿਤ੍ਵਾ ਜਾਨਿਸ੍ਸਾਮੀ’’ਤਿ ਵਦਤਿ. ਏਕਚ੍ਚਸ੍ਸ ਧਾਤਂ ਪਗੁਣਂ ਭਵਙ੍ਗਸੋਤਸਦਿਸਂ ਹੋਤਿ, ‘‘ਅਸੁਕਂ ਸੁਤ੍ਤਂ ਵਾ ਜਾਤਕਂ ਵਾ ਕਥੇਹੀ’’ਤਿ ਵੁਤ੍ਤੇ ਉਦ੍ਧਰਿਤ੍ਵਾ ਤਮੇਵ ਕਥੇਤਿ. ਤਂ ਸਨ੍ਧਾਯ ਵੁਤ੍ਤਂ ‘‘ਧਾਤਾ’’ਤਿ. ਵਚਸਾ ਪਰਿਚਿਤਾਤਿ ਸੁਤ੍ਤਦਸਕ-ਵਗ੍ਗਦਸਕਪਣ੍ਣਾਸਦਸਕਵਸੇਨ ਵਾਚਾਯ ਸਜ੍ਝਾਯਿਤਾ. ਮਨਸਾਨੁਪੇਕ੍ਖਿਤਾਤਿ ਚਿਤ੍ਤੇਨ ਅਨੁਪੇਕ੍ਖਿਤਾ. ਯਸ੍ਸ ਵਾਚਾਯ ਸਜ੍ਝਾਯਿਤਂ ਬੁਦ੍ਧਵਚਨਂ ਮਨਸਾ ਚਿਨ੍ਤੇਨ੍ਤਸ੍ਸ ਤਤ੍ਥ ਤਤ੍ਥ ਪਾਕਟਂ ਹੋਤਿ, ਮਹਾਦੀਪਂ ਜਾਲੇਤ੍ਵਾ ਠਿਤਸ੍ਸ ਰੂਪਗਤਂ ਵਿਯ ਪਞ੍ਞਾਯਤਿ, ਤਂ ਸਨ੍ਧਾਯੇਤਂ ਵੁਤ੍ਤਂ. ਦਿਟ੍ਠਿਯਾ ਸੁਪ੍ਪਟਿਵਿਦ੍ਧਾਤਿ ਅਤ੍ਥਤੋ ਚ ਕਾਰਣਤੋ ਚ ਪਞ੍ਞਾਯ ਸੁਪ੍ਪਟਿਵਿਦ੍ਧਾ.
ਆਭਿਚੇਤਸਿਕਾਨਨ੍ਤਿ ਅਭਿਚੇਤੋਤਿ ਅਭਿਕ੍ਕਨ੍ਤਂ ਵਿਸੁਦ੍ਧਂ ਚਿਤ੍ਤਂ ਵੁਚ੍ਚਤਿ, ਅਧਿਚਿਤ੍ਤਂ ਵਾ, ਅਭਿਚੇਤਸਿ ਜਾਤਾਨਿ ਆਭਿਚੇਤਸਿਕਾਨਿ, ਅਭਿਚੇਤੋਸਨ੍ਨਿਸ੍ਸਿਤਾਨੀਤਿ ਵਾ ਆਭਿਚੇਤਸਿਕਾਨਿ. ਦਿਟ੍ਠਧਮ੍ਮਸੁਖਵਿਹਾਰਾਨਨ੍ਤਿ ਦਿਟ੍ਠਧਮ੍ਮੇ ਸੁਖਵਿਹਾਰਾਨਂ. ਦਿਟ੍ਠਧਮ੍ਮੋਤਿ ਪਚ੍ਚਕ੍ਖੋ ਅਤ੍ਤਭਾਵੋ ਵੁਚ੍ਚਤਿ, ਤਤ੍ਥ ਸੁਖਵਿਹਾਰਭੂਤਾਨਨ੍ਤਿ ਅਤ੍ਥੋ. ਰੂਪਾਵਚਰਜ੍ਝਾਨਾਨਮੇਤਂ ਅਧਿਵਚਨਂ. ਤਾਨਿ ਹਿ ਅਪ੍ਪੇਤ੍ਵਾ ਨਿਸਿਨ੍ਨਾ ਝਾਯਿਨੋ ਇਮਸ੍ਮਿਂਯੇਵ ਅਤ੍ਤਭਾਵੇ ਅਸਂਕਿਲਿਟ੍ਠਨੇਕ੍ਖਮ੍ਮਸੁਖਂ ਵਿਨ੍ਦਨ੍ਤਿ, ਤਸ੍ਮਾ ‘‘ਦਿਟ੍ਠਧਮ੍ਮਸੁਖਵਿਹਾਰਾਨੀ’’ਤਿ ਵੁਚ੍ਚਤਿ. ਨਿਕਾਮਲਾਭੀਤਿ ਨਿਕਾਮੇਨ ਲਾਭੀ, ਅਤ੍ਤਨੋ ਇਚ੍ਛਾਵਸੇਨ ਲਾਭੀ, ਇਚ੍ਛਿਤਿਚ੍ਛਿਤਕ੍ਖਣੇ ਸਮਾਪਜ੍ਜਿਤੁਂ ਸਮਤ੍ਥੋਤਿ ਵੁਤ੍ਤਂ ਹੋਤਿ. ਅਕਿਚ੍ਛਲਾਭੀਤਿ ਸੁਖੇਨੇਵ ਪਚ੍ਚਨੀਕਧਮ੍ਮੇ ਵਿਕ੍ਖਮ੍ਭੇਤ੍ਵਾ ਸਮਾਪਜ੍ਜਿਤੁਂ ਸਮਤ੍ਥੋਤਿ ਵੁਤ੍ਤਂ ਹੋਤਿ. ਅਕਸਿਰਲਾਭੀਤਿ ਅਕਸਿਰਾਨਂ ਲਾਭੀ ਵਿਪੁਲਾਨਂ, ਯਥਾਪਰਿਚ੍ਛੇਦੇਨ ਵੁਟ੍ਠਾਤੁਂ ਸਮਤ੍ਥੋਤਿ ਵੁਤ੍ਤਂ ਹੋਤਿ. ਏਕਚ੍ਚੋ ਹਿ ਲਾਭੀਯੇਵ ਹੋਤਿ, ਨ ਪਨ ਇਚ੍ਛਿਤਿਚ੍ਛਿਤਕ੍ਖਣੇ ਸਕ੍ਕੋਤਿ ਸਮਾਪਜ੍ਜਿਤੁਂ. ਏਕਚ੍ਚੋ ਸਕ੍ਕੋਤਿ ਤਥਾਸਮਾਪਜ੍ਜਿਤੁਂ, ਪਾਰਿਪਨ੍ਥਿਕੇ ਚ ਪਨ ਕਿਚ੍ਛੇਨ ਵਿਕ੍ਖਮ੍ਭੇਤਿ. ਏਕਚ੍ਚੋ ਤਥਾ ਚ ਸਮਾਪਜ੍ਜਤਿ, ਪਾਰਿਪਨ੍ਥਿਕੇ ਚ ਅਕਿਚ੍ਛੇਨੇਵ ਵਿਕ੍ਖਮ੍ਭੇਤਿ, ਨ ਸਕ੍ਕੋਤਿ ਨਾਲ਼ਿਕਯਨ੍ਤਂ ਵਿਯ ਯਥਾਪਰਿਚ੍ਛੇਦੇਯੇਵ ਵੁਟ੍ਠਾਤੁਂ. ਯਸ੍ਸ ਪਨ ਅਯਂ ਤਿਵਿਧਾਪਿ ਸਮ੍ਪਦਾ ਅਤ੍ਥਿ, ਸੋ ‘‘ਅਕਿਚ੍ਛਲਾਭੀ ਅਕਸਿਰਲਾਭੀ’’ਤਿ ਵੁਚ੍ਚਤਿ. ਆਸਵਾਨਂ ਖਯਾਤਿਆਦੀਨਿ ਵੁਤ੍ਤਤ੍ਥਾਨੇਵ. ਏਵਮਿਧ ਸੀਲਮ੍ਪਿ ਬਾਹੁਸਚ੍ਚਮ੍ਪਿ ਖੀਣਾਸਵਸ੍ਸੇਵ ਸੀਲਂ ਬਾਹੁਸਚ੍ਚਞ੍ਚ, ਝਾਨਾਨਿਪਿ ਖੀਣਾਸਵਸ੍ਸੇਵ ਵਲ਼ਞ੍ਜਨਕਜ੍ਝਾਨਾਨਿ ਕਥਿਤਾਨਿ. ‘‘ਆਸਵਾਨਂ ਖਯਾ’’ਤਿਆਦੀਹਿ ਪਨ ਅਰਹਤ੍ਤਂ ਕਥਿਤਂ. ਫਲੇਨ ਚੇਤ੍ਥ ਮਗ੍ਗਕਿਚ੍ਚਂ ਪਕਾਸਿਤਨ੍ਤਿ ਵੇਦਿਤਬ੍ਬਂ.
ਉਦ੍ਧਤੇਨਾਤਿ ਉਦ੍ਧਚ੍ਚਸਹਗਤੇਨ. ਸਮ੍ਫਨ੍ਤਿ ਪਲਾਪਕਥਂ. ਅਸਮਾਹਿਤਸਙ੍ਕਪ੍ਪੋਤਿ ਅਟ੍ਠਪਿਤਸਙ੍ਕਪ੍ਪੋ. ਮਗੋਤਿ ਮਗਸਦਿਸੋ. ਆਰਾਤਿ ਦੂਰੇ. ਥਾਵਰੇਯ੍ਯਮ੍ਹਾਤਿ ਥਾਵਰਭਾਵਤੋ. ਪਾਪਦਿਟ੍ਠੀਤਿ ਲਾਮਕਦਿਟ੍ਠਿ. ਅਨਾਦਰੋਤਿ ਆਦਰਰਹਿਤੋ. ਸੁਤਵਾਤਿ ਸੁਤੇਨ ਉਪਗਤੋ. ਪਟਿਭਾਨਵਾਤਿ ਦੁਵਿਧੇਨ ਪਟਿਭਾਨੇਨ ਸਮਨ੍ਨਾਗਤੋ. ਪਞ੍ਞਾਯਤ੍ਥਂ ਵਿਪਸ੍ਸਤੀਤਿ ਸਹਵਿਪਸ੍ਸਨਾਯ ਮਗ੍ਗਪਞ੍ਞਾਯ ਚਤੁਨ੍ਨਂ ਸਚ੍ਚਾਨਂ ਅਤ੍ਥਂ ਵਿਨਿਵਿਜ੍ਝਿਤ੍ਵਾ ਪਸ੍ਸਤਿ. ਪਾਰਗੂ ਸਬ੍ਬਧਮ੍ਮਾਨਨ੍ਤਿ ਸਬ੍ਬੇਸਂ ਖਨ੍ਧਾਦਿਧਮ੍ਮਾਨਂ ਪਾਰਂ ਗਤੋ, ਅਭਿਞ੍ਞਾਪਾਰਗੂ, ਪਰਿਞ੍ਞਾਪਾਰਗੂ, ਪਹਾਨਪਾਰਗੂ, ਭਾਵਨਾਪਾਰਗੂ, ਸਚ੍ਛਿਕਿਰਿਯਾਪਾਰਗੂ, ਸਮਾਪਤ੍ਤਿਪਾਰਗੂਤਿ ਏਵਂ ਛਬ੍ਬਿਧੇਨ ਪਾਰਗਮਨੇਨ ਸਬ੍ਬਧਮ੍ਮਾਨਂ ਪਾਰਂ ਪਰਿਯੋਸਾਨਂ ਗਤੋ. ਅਖਿਲੋਤਿ ਰਾਗਖਿਲਾਦਿਵਿਰਹਿਤੋ. ਪਟਿਭਾਨਵਾਤਿ ਦੁਵਿਧੇਨੇਵ ਪਟਿਭਾਨੇਨ ਸਮਨ੍ਨਾਗਤੋ. ਬ੍ਰਹ੍ਮਚਰਿਯਸ੍ਸ ਕੇਵਲੀਤਿ ਸਕਲਬ੍ਰਹ੍ਮਚਰਿਯੋ. ਸੇਸਮੇਤ੍ਥ ਉਤ੍ਤਾਨਮੇਵਾਤਿ.
੩. ਲੋਕਸੁਤ੍ਤਵਣ੍ਣਨਾ
੨੩. ਤਤਿਯੇ ਲੋਕੋਤਿ ਦੁਕ੍ਖਸਚ੍ਚਂ. ਅਭਿਸਮ੍ਬੁਦ੍ਧੋਤਿ ਞਾਤੋ ਪਚ੍ਚਕ੍ਖੋ ਕਤੋ. ਲੋਕਸ੍ਮਾਤਿ ਦੁਕ੍ਖਸਚ੍ਚਤੋ. ਪਹੀਨੋਤਿ ਮਹਾਬੋਧਿਮਣ੍ਡੇ ਅਰਹਤ੍ਤਮਗ੍ਗਞਾਣੇਨ ਪਹੀਨੋ. ਤਥਾਗਤਸ੍ਸ ਭਾਵਿਤਾਤਿ ਤਥਾਗਤੇਨ ਭਾਵਿਤਾ.
ਏਵਂ ਏਤ੍ਤਕੇਨ ਠਾਨੇਨ ਚਤੂਹਿ ਸਚ੍ਚੇਹਿ ਅਤ੍ਤਨੋ ਬੁਦ੍ਧਭਾਵਂ ਕਥੇਤ੍ਵਾ ਇਦਾਨਿ ਤਥਾਗਤਭਾਵਂ ਕਥੇਤੁਂ ਯਂ, ਭਿਕ੍ਖਵੇਤਿਆਦਿਮਾਹ. ਤਤ੍ਥ ਦਿਟ੍ਠਨ੍ਤਿ ਰੂਪਾਯਤਨਂ. ਸੁਤਨ੍ਤਿ ਸਦ੍ਦਾਯਤਨਂ. ਮੁਤਨ੍ਤਿ ਪਤ੍ਵਾ ਗਹੇਤਬ੍ਬਤੋ ਗਨ੍ਧਾਯਤਨਂ ਰਸਾਯਤਨਂ ਫੋਟ੍ਠਬ੍ਬਾਯਤਨਂ. ਵਿਞ੍ਞਾਤਨ੍ਤਿ ਸੁਖਦੁਕ੍ਖਾਦਿ ਧਮ੍ਮਾਰਮ੍ਮਣਂ. ਪਤ੍ਤਨ੍ਤਿ ਪਰਿਯੇਸਿਤ੍ਵਾ ਵਾ ਅਪਰਿਯੇਸਿਤ੍ਵਾ ਵਾ ਪਤ੍ਤਂ. ਪਰਿਯੇਸਿਤਨ੍ਤਿ ਪਤ੍ਤਂ ਵਾ ਅਪ੍ਪਤ੍ਤਂ ਵਾ ਪਰਿਯੇਸਿਤਂ. ਅਨੁਵਿਚਰਿਤਂ ਮਨਸਾਤਿ ਚਿਤ੍ਤੇਨ ਅਨੁਸਞ੍ਚਰਿਤਂ.
ਤਥਾਗਤੇਨ ਅਭਿਸਮ੍ਬੁਦ੍ਧਨ੍ਤਿ ਇਮਿਨਾ ਏਤਂ ਦਸ੍ਸੇਤਿ – ਯਂ ਅਪਰਿਮਾਣਾਸੁ ਲੋਕਧਾਤੂਸੁ ਇਮਸ੍ਸ ਸਦੇਵਕਸ੍ਸ ਲੋਕਸ੍ਸ ਨੀਲਂ ਪੀਤਕਨ੍ਤਿਆਦਿ ਰੂਪਾਰਮ੍ਮਣਂ ਚਕ੍ਖੁਦ੍ਵਾਰੇ ਆਪਾਥਂ ਆਗਚ੍ਛਤਿ, ‘‘ਅਯਂ ਸਤ੍ਤੋ ਇਮਸ੍ਮਿਂ ਖਣੇ ਇਮਂ ਨਾਮ ਰੂਪਾਰਮ੍ਮਣਂ ਦਿਸ੍ਵਾ ਸੁਮਨੋ ਵਾ ਦੁਮ੍ਮਨੋ ਵਾ ਮਜ੍ਝਤ੍ਤੋ ਵਾ ਜਾਤੋ’’ਤਿ ਸਬ੍ਬਂ ਤਥਾਗਤਸ੍ਸ ਏਵਂ ਅਭਿਸਮ੍ਬੁਦ੍ਧਂ. ਤਥਾ ਯਂ ਅਪਰਿਮਾਣਾਸੁ ਲੋਕਧਾਤੂਸੁ ਇਮਸ੍ਸ ਸਦੇਵਕਸ੍ਸ ਲੋਕਸ੍ਸ ਭੇਰਿਸਦ੍ਦੋ ਮੁਦਿਙ੍ਗਸਦ੍ਦੋਤਿਆਦਿ ਸਦ੍ਦਾਰਮ੍ਮਣਂ ਸੋਤਦ੍ਵਾਰੇ ਆਪਾਥਂ ਆਗਚ੍ਛਤਿ, ਮੂਲਗਨ੍ਧੋ ਤਚਗਨ੍ਧੋਤਿਆਦਿ ਗਨ੍ਧਾਰਮ੍ਮਣਂ ਘਾਨਦ੍ਵਾਰੇ ਆਪਾਥਂ ਆਗਚ੍ਛਤਿ, ਮੂਲਰਸੋ ਖਨ੍ਧਰਸੋਤਿਆਦਿ ਰਸਾਰਮ੍ਮਣਂ ਜਿਵ੍ਹਾਦ੍ਵਾਰੇ ਆਪਾਥਂ ਆਗਚ੍ਛਤਿ, ਕਕ੍ਖਲ਼ਂ ਮੁਦੁਕਨ੍ਤਿਆਦਿ ਪਥਵੀਧਾਤੁਤੇਜੋਧਾਤੁਵਾਯੋਧਾਤੁਭੇਦਂ ਫੋਟ੍ਠਬ੍ਬਾਰਮ੍ਮਣਂ ਕਾਯਦ੍ਵਾਰੇ ਆਪਾਥਂ ਆਗਚ੍ਛਤਿ, ‘‘ਅਯਂ ਸਤ੍ਤੋ ਇਮਸ੍ਮਿਂ ਖਣੇ ਇਮਂ ਨਾਮ ਫੋਟ੍ਠਬ੍ਬਾਰਮ੍ਮਣਂ ਫੁਸਿਤ੍ਵਾ ਸੁਮਨੋ ਵਾ ਦੁਮ੍ਮਨੋ ਵਾ ਮਜ੍ਝਤ੍ਤੋ ਵਾ ਜਾਤੋ’’ਤਿ ਸਬ੍ਬਂ ਤਥਾਗਤਸ੍ਸ ਏਵਂ ਅਭਿਸਮ੍ਬੁਦ੍ਧਂ. ਤਥਾ ਯਂ ਅਪਰਿਮਾਣਾਸੁ ਲੋਕਧਾਤੂਸੁ ਇਮਸ੍ਸ ਸਦੇਵਕਸ੍ਸ ਲੋਕਸ੍ਸ ਸੁਖਦੁਕ੍ਖਾਦਿਭੇਦਂ ਧਮ੍ਮਾਰਮ੍ਮਣਂ ਮਨੋਦ੍ਵਾਰਸ੍ਸ ਆਪਾਥਂ ਆਗਚ੍ਛਤਿ, ‘‘ਅਯਂ ਸਤ੍ਤੋ ਇਮਸ੍ਮਿਂ ਖਣੇ ਇਮਂ ਨਾਮ ਧਮ੍ਮਾਰਮ੍ਮਣਂ ਵਿਜਾਨਿਤ੍ਵਾ ਸੁਮਨੋ ਵਾ ਦੁਮ੍ਮਨੋ ਵਾ ਮਜ੍ਝਤ੍ਤੋ ਵਾ ਜਾਤੋ’’ਤਿ ਸਬ੍ਬਂ ਤਥਾਗਤਸ੍ਸ ਏਵਂ ਅਭਿਸਮ੍ਬੁਦ੍ਧਂ. ਯਞ੍ਹਿ, ਭਿਕ੍ਖਵੇ, ਇਮੇਸਂ ਸਬ੍ਬਸਤ੍ਤਾਨਂ ਦਿਟ੍ਠਂ ਸੁਤਂ ਮੁਤਂ ਵਿਞ੍ਞਾਤਂ, ਤਤ੍ਥ ਤਥਾਗਤੇਨ ਅਦਿਟ੍ਠਂ ਵਾ ਅਸੁਤਂ ਵਾ ਅਮੁਤਂ ਵਾ ਅਵਿਞ੍ਞਾਤਂ ਵਾ ਨਤ੍ਥਿ, ਇਮਸ੍ਸ ਪਨ ਮਹਾਜਨਸ੍ਸ ਪਰਿਯੇਸਿਤ੍ਵਾ ਅਪ੍ਪਤ੍ਤਮ੍ਪਿ ਅਤ੍ਥਿ, ਅਪਰਿਯੇਸਿਤ੍ਵਾ ਅਪ੍ਪਤ੍ਤਮ੍ਪਿ ਅਤ੍ਥਿ, ਪਰਿਯੇਸਿਤ੍ਵਾ ਪਤ੍ਤਮ੍ਪਿ ਅਤ੍ਥਿ, ਅਪਰਿਯੇਸਿਤ੍ਵਾ ਪਤ੍ਤਮ੍ਪਿ ਅਤ੍ਥਿ, ਸਬ੍ਬਮ੍ਪਿ ਤਥਾਗਤਸ੍ਸ ਅਪ੍ਪਤ੍ਤਂ ਨਾਮ ਨਤ੍ਥਿ ਞਾਣੇਨ ਅਸਚ੍ਛਿਕਤਂ.
ਤਸ੍ਮਾ ਤਥਾਗਤੋਤਿ ਵੁਚ੍ਚਤੀਤਿ ਯਂ ਯਥਾ ਲੋਕੇਨ ਗਤਂ, ਤਸ੍ਸ ਤਥੇਵ ਗਤਤ੍ਤਾ ਤਥਾਗਤੋਤਿ ਵੁਚ੍ਚਤਿ. ਪਾਲ਼ਿਯਂ ਪਨ ‘‘ਅਭਿਸਮ੍ਬੁਦ੍ਧ’’ਨ੍ਤਿ ਵੁਤ੍ਤਂ, ਤਂ ਗਤਸਦ੍ਦੇਨ ਏਕਤ੍ਥਂ. ਇਮਿਨਾ ਨਯੇਨ ਸਬ੍ਬਵਾਰੇਸੁ ਤਥਾਗਤੋਤਿ ਨਿਗਮਸ੍ਸ ਅਤ੍ਥੋ ਵੇਦਿਤਬ੍ਬੋ. ਤਸ੍ਸ ਯੁਤ੍ਤਿ ਏਕਪੁਗ੍ਗਲਵਣ੍ਣਨਾਯਂ ਤਥਾਗਤਸਦ੍ਦਵਿਤ੍ਥਾਰੇ ਵੁਤ੍ਤਾਯੇਵ. ਅਪਿਚੇਤ੍ਥ ਅਞ੍ਞਦਤ੍ਥੂਤਿ ਏਕਂਸਤ੍ਥੇ ਨਿਪਾਤੋ. ਦਕ੍ਖਤੀਤਿ ਦਸੋ. ਵਸਂ ਵਤ੍ਤੇਤੀਤਿ ਵਸਵਤ੍ਤੀ.
ਸਬ੍ਬਂ ਲੋਕਂ ਅਭਿਞ੍ਞਾਤਿ ਤੇਧਾਤੁਕਂ ਲੋਕਸਨ੍ਨਿਵਾਸਂ ਜਾਨਿਤ੍ਵਾ. ਸਬ੍ਬਂ ਲੋਕੇ ਯਥਾਤਥਨ੍ਤਿ ਤਸ੍ਮਿਂ ਤੇਧਾਤੁਕਲੋਕਸਨ੍ਨਿਵਾਸੇ ਯਂਕਿਞ੍ਚਿ ਨੇਯ੍ਯਂ, ਸਬ੍ਬਂ ਤਂ ਯਥਾਤਥਂ ਅਵਿਪਰੀਤਂ ਜਾਨਿਤ੍ਵਾ. ਵਿਸਂਯੁਤ੍ਤੋਤਿ ਚਤੁਨ੍ਨਂ ਯੋਗਾਨਂ ਪਹਾਨੇਨ ਵਿਸਂਯੁਤ੍ਤੋ. ਅਨੂਪਯੋਤਿ ਤਣ੍ਹਾਦਿਟ੍ਠਿਉਪਯੇਹਿ ਵਿਰਹਿਤੋ. ਸਬ੍ਬਾਭਿਭੂਤਿ ਰੂਪਾਦੀਨਿ ਸਬ੍ਬਾਰਮ੍ਮਣਾਨਿ ਅਭਿਭਵਿਤ੍ਵਾ ਠਿਤੋ. ਧੀਰੋਤਿ ਧਿਤਿਸਮ੍ਪਨ੍ਨੋ. ਸਬ੍ਬਗਨ੍ਥਪ੍ਪਮੋਚਨੋਤਿ ਸਬ੍ਬੇ ਚਤ੍ਤਾਰੋਪਿ ਗਨ੍ਥੇ ਮੋਚੇਤ੍ਵਾ ਠਿਤੋ. ਫੁਟ੍ਠਸ੍ਸਾਤਿ ਫੁਟ੍ਠਾ ਅਸ੍ਸ. ਇਦਞ੍ਚ ਕਰਣਤ੍ਥੇ ਸਾਮਿਵਚਨਂ. ਪਰਮਾ ਸਨ੍ਤੀਤਿ ਨਿਬ੍ਬਾਨਂ. ਤਞ੍ਹਿ ਤੇਨ ਞਾਣਫੁਸਨੇਨ ਫੁਟ੍ਠਂ. ਤੇਨੇਵਾਹ – ਨਿਬ੍ਬਾਨਂ ਅਕੁਤੋਭਯਨ੍ਤਿ. ਅਥ ਵਾ ਪਰਮਾਸਨ੍ਤੀਤਿ ਉਤ੍ਤਮਾ ਸਨ੍ਤਿ. ਕਤਰਾ ਸਾਤਿ? ਨਿਬ੍ਬਾਨਂ. ਯਸ੍ਮਾ ਪਨ ਨਿਬ੍ਬਾਨੇ ਕੁਤੋਚਿ ਭਯਂ ਨਤ੍ਥਿ, ਤਸ੍ਮਾ ਤਂ ਅਕੁਤੋਭਯਨ੍ਤਿ ਵੁਚ੍ਚਤਿ. ਵਿਮੁਤ੍ਤੋ ਉਪਧਿਸਙ੍ਖਯੇਤਿ ਉਪਧਿਸਙ੍ਖਯਸਙ੍ਖਾਤੇ ਨਿਬ੍ਬਾਨੇ ਤਦਾਰਮ੍ਮਣਾਯ ਫਲਵਿਮੁਤ੍ਤਿਯਾ ਵਿਮੁਤ੍ਤੋ. ਸੀਹੋ ਅਨੁਤ੍ਤਰੋਤਿ ਪਰਿਸ੍ਸਯਾਨਂ ਸਹਨਟ੍ਠੇਨ ਕਿਲੇਸਾਨਞ੍ਚ ਹਿਂਸਨਟ੍ਠੇਨ ਤਥਾਗਤੋ ਅਨੁਤ੍ਤਰੋ ਸੀਹੋ ਨਾਮ. ਬ੍ਰਹ੍ਮਨ੍ਤਿ ਸੇਟ੍ਠਂ. ਇਤੀਤਿ ਏਵਂ ਤਥਾਗਤਸ੍ਸ ਗੁਣੇ ਜਾਨਿਤ੍ਵਾ. ਸਙ੍ਗਮ੍ਮਾਤਿ ਸਮਾਗਨ੍ਤ੍ਵਾ. ਤਂ ਨਮਸ੍ਸਨ੍ਤੀਤਿ ਤਂ ਤਥਾਗਤਂ ਤੇ ਸਰਣਂ ਗਤਾ ਨਮਸ੍ਸਨ੍ਤਿ. ਇਦਾਨਿ ਯਂ ਵਦਨ੍ਤਾ ਤੇ ਨਮਸ੍ਸਨ੍ਤਿ, ਤਂ ਦਸ੍ਸੇਤੁਂ ਦਨ੍ਤੋਤਿਆਦਿ ਵੁਤ੍ਤਂ. ਤਂ ਉਤ੍ਤਾਨਤ੍ਥਮੇਵਾਤਿ.
੪. ਕਾਲ਼ਕਾਰਾਮਸੁਤ੍ਤਵਣ੍ਣਨਾ
੨੪. ਚਤੁਤ੍ਥਂ ਅਤ੍ਥੁਪ੍ਪਤ੍ਤਿਯਂ ਨਿਕ੍ਖਿਤ੍ਤਂ. ਕਤਰਾਯ ਅਤ੍ਥੁਪ੍ਪਤ੍ਤਿਯਨ੍ਤਿ? ਦਸਬਲਗੁਣਕਥਾਯ. ਅਨਾਥਪਿਣ੍ਡਿਕਸ੍ਸ ਕਿਰ ਧੀਤਾ ਚੂਲ਼ਸੁਭਦ੍ਦਾ ‘‘ਸਾਕੇਤਨਗਰੇ ਕਾਲ਼ਕਸੇਟ੍ਠਿਪੁਤ੍ਤਸ੍ਸ ਗੇਹਂ ਗਚ੍ਛਿਸ੍ਸਾਮੀ’’ਤਿ ਸਤ੍ਥਾਰਂ ਉਪਸਙ੍ਕਮਿਤ੍ਵਾ, ‘‘ਭਨ੍ਤੇ, ਅਹਂ ਮਿਚ੍ਛਾਦਿਟ੍ਠਿਕਕੁਲਂ ਗਚ੍ਛਾਮਿ. ਸਚੇ ਤਤ੍ਥ ਸਕ੍ਕਾਰਂ ਲਭਿਸ੍ਸਾਮਿ, ਏਕਸ੍ਮਿਂ ਪੁਰਿਸੇ ਪੇਸਿਯਮਾਨੇ ਪਪਞ੍ਚੋ ਭਵਿਸ੍ਸਤਿ, ਮਂ ਆਵਜ੍ਜੇਯ੍ਯਾਥ ਭਗਵਾ’’ਤਿ ਪਟਿਞ੍ਞਂ ਗਹੇਤ੍ਵਾ ਅਗਮਾਸਿ. ਸੇਟ੍ਠਿ ‘‘ਸੁਣਿਸਾ ਮੇ ਆਗਤਾ’’ਤਿ ਮਙ੍ਗਲਂ ਕਰੋਨ੍ਤੋਵ ਬਹੁਂ ਖਾਦਨੀਯਭੋਜਨੀਯਂ ਪਟਿਯਾਦੇਤ੍ਵਾ ਪਞ੍ਚ ਅਚੇਲਕਸਤਾਨਿ ਨਿਮਨ੍ਤੇਸਿ. ਸੋ ਤੇਸੁ ਨਿਸਿਨ੍ਨੇਸੁ ‘‘ਧੀਤਾ ਮੇ ਆਗਨ੍ਤ੍ਵਾ ਅਰਹਨ੍ਤੇ ਵਨ੍ਦਤੂ’’ਤਿ ਚੂਲ਼ਸੁਭਦ੍ਦਾਯ ਪੇਸੇਸਿ. ਆਗਤਫਲਾ ਅਰਿਯਸਾਵਿਕਾ ਅਰਹਨ੍ਤੇਤਿ ਵੁਤ੍ਤਮਤ੍ਤੇਯੇਵ ‘‘ਲਾਭਾ ਵਤ ਮੇ’’ਤਿ ਉਟ੍ਠਹਿਤ੍ਵਾ ਗਤਾ ਤੇ ਨਿਸ੍ਸਿਰਿਕਦਸ੍ਸਨੇ ਅਚੇਲਕੇ ਦਿਸ੍ਵਾਵ ‘‘ਸਮਣਾ ਨਾਮ ਨ ਏਵਰੂਪਾ ਹੋਨ੍ਤਿ, ਤਾਤ, ਯੇਸਂ ਨੇਵ ਅਜ੍ਝਤ੍ਤਂ ਹਿਰੀ, ਨ ਬਹਿਦ੍ਧਾ ਓਤ੍ਤਪ੍ਪਂ ਅਤ੍ਥੀ’’ਤਿ ਵਤ੍ਵਾ ‘‘ਨ ਇਮੇ ਸਮਣਾ, ਧੀਧੀ’’ਤਿ ਖੇਲ਼ਂ ਪਾਤੇਤ੍ਵਾ ਨਿਵਤ੍ਤਿਤ੍ਵਾ ਅਤ੍ਤਨੋ ਵਸਨਟ੍ਠਾਨਮੇਵ ਗਤਾ.
ਤਤੋ ਅਚੇਲਕਾ ‘‘ਮਹਾਸੇਟ੍ਠਿ ਕੁਤੋ ਤੇ ਏਵਰੂਪਾ ਕਾਲਕਣ੍ਣੀ ਲਦ੍ਧਾ, ਕਿਂ ਸਕਲਜਮ੍ਬੁਦੀਪੇ ਅਞ੍ਞਾ ਦਾਰਿਕਾ ਨਤ੍ਥੀ’’ਤਿ ਸੇਟ੍ਠਿਂ ਪਰਿਭਾਸਿਂਸੁ. ਸੋ ‘‘ਆਚਰਿਯਾ ਜਾਨਿਤ੍ਵਾ ਵਾ ਕਤਂ ਹੋਤੁ ਅਜਾਨਿਤ੍ਵਾ ਵਾ, ਅਹਮੇਤ੍ਥ ਜਾਨਿਸ੍ਸਾਮੀ’’ਤਿ ਅਚੇਲਕੇ ਉਯ੍ਯੋਜੇਤ੍ਵਾ ਸੁਭਦ੍ਦਾਯ ਸਨ੍ਤਿਕਂ ਗਨ੍ਤ੍ਵਾ ‘‘ਅਮ੍ਮ, ਕਸ੍ਮਾ ਏਵਰੂਪਂ ਅਕਾਸਿ, ਕਸ੍ਮਾ ਅਰਹਨ੍ਤੇ ਲਜ੍ਜਾਪੇਸੀ’’ਤਿ ਆਹ. ਤਾਤ, ਅਰਹਨ੍ਤਾ ਨਾਮ ਏਵਰੂਪਾ ਨ ਹੋਨ੍ਤੀਤਿ. ਅਥ ਨਂ ਸੋ ਆਹ –
‘‘ਕੀਦਿਸਾ ਸਮਣਾ ਤੁਯ੍ਹਂ, ਬਾਲ਼੍ਹਂ ਖੋ ਨੇ ਪਸਂਸਸਿ;
ਕਿਂਸੀਲਾ ਕਿਂਸਮਾਚਾਰਾ, ਤਂ ਮੇ ਅਕ੍ਖਾਹਿ ਪੁਚ੍ਛਿਤਾ’’ਤਿ.
ਸਾ ਆਹ –
‘‘ਸਨ੍ਤਿਨ੍ਦ੍ਰਿਯਾ ਸਨ੍ਤਮਨਾ, ਸਨ੍ਤਤੇਜਾ ਗੁਣਮਗ੍ਗਸਣ੍ਠਿਤਾ;
ਓਕ੍ਖਿਤ੍ਤਚਕ੍ਖੂ ਮਿਤਭਾਣੀ, ਤਾਦਿਸਾ ਸਮਣਾ ਮਮ.
‘‘ਵਸਨ੍ਤਿ ਵਨਮੋਗਯ੍ਹ, ਨਾਗੋ ਛੇਤ੍ਵਾਵ ਬਨ੍ਧਨਂ;
ਏਕਕਿਯਾ ਅਦੁਤਿਯਾ, ਤਾਦਿਸਾ ਸਮਣਾ ਮਮਾ’’ਤਿ.
ਏਵਞ੍ਚ ਪਨ ਵਤ੍ਵਾ ਸੇਟ੍ਠਿਸ੍ਸ ਪੁਰੇ ਠਤ੍ਵਾ ਤਿਣ੍ਣਂ ਰਤਨਾਨਂ ਗੁਣਂ ਕਥੇਸਿ. ਸੇਟ੍ਠਿ ਤਸ੍ਸਾ ਵਚਨਂ ਸੁਤ੍ਵਾ ‘‘ਯਦਿ ਏਵਂ, ਤਵ ਸਮਣੇ ਆਨੇਤ੍ਵਾ ਮਙ੍ਗਲਂ ਕਰੋਮਾ’’ਤਿ. ਸਾ ਪੁਚ੍ਛਿ ‘‘ਕਦਾ ਕਰਿਸ੍ਸਥ, ਤਾਤਾ’’ਤਿ. ਸੇਟ੍ਠਿ ਚਿਨ੍ਤੇਸਿ – ‘‘ਕਤਿਪਾਹਚ੍ਚਯੇਨਾਤਿ ਵੁਤ੍ਤੇ ਪੇਸੇਤ੍ਵਾ ਪਕ੍ਕੋਸਾਪੇਯ੍ਯਾ’’ਤਿ. ਅਥ ਨਂ ‘‘ਸ੍ਵੇ ਅਮ੍ਮਾ’’ਤਿ ਆਹ. ਸਾ ਸਾਯਨ੍ਹਸਮਯੇ ਉਪਰਿਪਾਸਾਦਂ ਆਰੁਯ੍ਹ ਮਹਨ੍ਤਂ ਪੁਪ੍ਫਸਮੁਗ੍ਗਂ ਗਹੇਤ੍ਵਾ ਸਤ੍ਥੁ ਗੁਣੇ ਅਨੁਸ੍ਸਰਿਤ੍ਵਾ ਅਟ੍ਠ ਪੁਪ੍ਫਮੁਟ੍ਠਿਯੋ ਦਸਬਲਸ੍ਸ ਵਿਸ੍ਸਜ੍ਜੇਤ੍ਵਾ ਅਞ੍ਜਲਿਂ ਪਗ੍ਗਯ੍ਹ ਨਮਸ੍ਸਮਾਨਾ ਅਟ੍ਠਾਸਿ. ਏਵਞ੍ਚ ਅਵਚ – ‘‘ਭਗਵਾ ਸ੍ਵੇ ਪਞ੍ਚਹਿ ਭਿਕ੍ਖੁਸਤੇਹਿ ਸਦ੍ਧਿਂ ਮਯ੍ਹਂ ਭਿਕ੍ਖਂ ਗਣ੍ਹਥਾ’’ਤਿ. ਤਾਨਿ ਪੁਪ੍ਫਾਨਿ ਗਨ੍ਤ੍ਵਾ ਦਸਬਲਸ੍ਸ ਮਤ੍ਥਕੇ ਵਿਤਾਨਂ ਹੁਤ੍ਵਾ ਅਟ੍ਠਂਸੁ. ਸਤ੍ਥਾ ਆਵਜ੍ਜੇਨ੍ਤੋ ਤਂ ਕਾਰਣਂ ਅਦ੍ਦਸ. ਧਮ੍ਮਦੇਸਨਾਪਰਿਯੋਸਾਨੇ ਅਨਾਥਪਿਣ੍ਡਿਕਮਹਾਸੇਟ੍ਠਿ ਦਸਬਲਂ ਵਨ੍ਦਿਤ੍ਵਾ ‘‘ਸ੍ਵੇ, ਭਨ੍ਤੇ, ਪਞ੍ਚਹਿ ਭਿਕ੍ਖੁਸਤੇਹਿ ਸਦ੍ਧਿਂ ਮਮ ਗੇਹੇ ਭਿਕ੍ਖਂ ਗਣ੍ਹਥਾ’’ਤਿ ਆਹ. ਚੂਲ਼ਸੁਭਦ੍ਦਾਯ ਨਿਮਨ੍ਤਿਤਮ੍ਹ ਸੇਟ੍ਠੀਤਿ. ਨ, ਭਨ੍ਤੇ, ਕਞ੍ਚਿ ਆਗਤਂ ਪਸ੍ਸਾਮਾਤਿ. ਆਮ, ਸੇਟ੍ਠਿ, ਸਦ੍ਧਾ ਪਨ ਉਪਾਸਿਕਾ ਦੂਰੇ ਯੋਜਨਸਤਮਤ੍ਥਕੇਪਿ ਯੋਜਨਸਹਸ੍ਸਮਤ੍ਥਕੇਪਿ ਠਿਤਾ ਹਿਮਵਨ੍ਤੋ ਵਿਯ ਪਞ੍ਞਾਯਤੀਤਿ ਵਤ੍ਵਾ –
‘‘ਦੂਰੇ ਸਨ੍ਤੋ ਪਕਾਸੇਨ੍ਤਿ, ਹਿਮਵਨ੍ਤੋਵ ਪਬ੍ਬਤੋ;
ਅਸਨ੍ਤੇਤ੍ਥ ਨ ਦਿਸ੍ਸਨ੍ਤਿ, ਰਤ੍ਤਿਂ ਖਿਤ੍ਤਾ ਯਥਾ ਸਰਾ’’ਤਿ. (ਧ. ਪ. ੩੦੪) –
ਇਮਂ ਗਾਥਮਾਹ. ਅਨਾਥਪਿਣ੍ਡਿਕੋ ‘‘ਭਨ੍ਤੇ, ਮਮ, ਧੀਤੁ ਸਙ੍ਗਹਂ ਕਰੋਥਾ’’ਤਿ ਵਨ੍ਦਿਤ੍ਵਾ ਪਕ੍ਕਾਮਿ.
ਸਤ੍ਥਾ ਆਨਨ੍ਦਤ੍ਥੇਰਂ ਆਮਨ੍ਤੇਸਿ – ‘‘ਅਹਂ, ਆਨਨ੍ਦ, ਸਾਕੇਤਂ ਗਮਿਸ੍ਸਾਮਿ, ਪਞ੍ਚਨ੍ਨਂ ਭਿਕ੍ਖੁਸਤਾਨਂ ਸਲਾਕਂ ਦੇਹਿ. ਦਦਨ੍ਤੋ ਚ ਛਲ਼ਭਿਞ੍ਞਾਨਂਯੇਵ ਦਦੇਯ੍ਯਾਸੀ’’ਤਿ. ਥੇਰੋ ਤਥਾ ਅਕਾਸਿ. ਚੂਲ਼ਸੁਭਦ੍ਦਾ ਰਤ੍ਤਿਭਾਗਸਮਨਨ੍ਤਰੇ ਚਿਨ੍ਤੇਸਿ – ‘‘ਬੁਦ੍ਧਾ ਨਾਮ ਬਹੁਕਿਚ੍ਚਾ ਬਹੁਕਰਣੀਯਾ, ਮਂ ਸਲ੍ਲਕ੍ਖੇਯ੍ਯ ਵਾ ਨ ਵਾ, ਕਿਂ ਨੁ ਖੋ ਕਰਿਸ੍ਸਾਮੀ’’ਤਿ. ਤਸ੍ਮਿਂ ਖਣੇ ਵੇਸ੍ਸਵਣੋ ਮਹਾਰਾਜਾ ਚੂਲ਼ਸੁਭਦ੍ਦਾਯ ਕਥੇਸਿ – ‘‘ਭਦ੍ਦੇ, ਮਾ ਖੋ ਤ੍ਵਂ ਵਿਮਨਾ ਅਹੋਸਿ, ਮਾ ਦੁਮ੍ਮਨਾ. ਅਧਿਵੁਤ੍ਥਂ ਤੇ ਭਗਵਤਾ ਸ੍ਵਾਤਨਾਯ ਭਤ੍ਤਂ ਸਦ੍ਧਿਂ ਭਿਕ੍ਖੁਸਙ੍ਘੇਨਾ’’ਤਿ. ਸਾ ਤੁਟ੍ਠਪਹਟ੍ਠਾ ਦਾਨਮੇਵ ਸਂਵਿਦਹਿ. ਸਕ੍ਕੋਪਿ ਖੋ ਦੇਵਰਾਜਾ ਵਿਸ੍ਸਕਮ੍ਮਂ ਆਮਨ੍ਤੇਸਿ – ‘‘ਤਾਤ, ਦਸਬਲੋ ਚੂਲ਼ਸੁਭਦ੍ਦਾਯ ਸਨ੍ਤਿਕਂ ਸਾਕੇਤਨਗਰਂ ਗਚ੍ਛਿਸ੍ਸਤਿ, ਪਞ੍ਚ ਕੂਟਾਗਾਰਸਤਾਨਿ ਮਾਪੇਹੀ’’ਤਿ. ਸੋ ਤਥਾ ਅਕਾਸਿ. ਸਤ੍ਥਾ ਪਞ੍ਚਹਿ ਛਲ਼ਭਿਞ੍ਞਸਤੇਹਿ ਪਰਿਵੁਤੋ ਕੂਟਾਗਾਰਯਾਨੇਨ ਮਣਿਵਣ੍ਣਂ ਆਕਾਸਂ ਵਿਲਿਖਨ੍ਤੋ ਵਿਯ ਸਾਕੇਤਨਗਰਂ ਅਗਮਾਸਿ.
ਸੁਭਦ੍ਦਾ ਬੁਦ੍ਧਪ੍ਪਮੁਖਸ੍ਸ ਭਿਕ੍ਖੁਸਙ੍ਘਸ੍ਸ ਦਾਨਂ ਦਤ੍ਵਾ ਸਤ੍ਥਾਰਂ ਵਨ੍ਦਿਤ੍ਵਾ ਆਹ – ‘‘ਭਨ੍ਤੇ, ਮਯ੍ਹਂ ਸਸੁਰਪਕ੍ਖੋ ਮਿਚ੍ਛਾਦਿਟ੍ਠਿਕੋ, ਸਾਧੁ ਤੇਸਂ ਅਨੁਚ੍ਛਵਿਕਧਮ੍ਮਂ ਕਥੇਥਾ’’ਤਿ. ਸਤ੍ਥਾ ਧਮ੍ਮਂ ਦੇਸੇਸਿ. ਕਾਲ਼ਕਸੇਟ੍ਠਿ ਸੋਤਾਪਨ੍ਨੋ ਹੁਤ੍ਵਾ ਅਤ੍ਤਨੋ ਉਯ੍ਯਾਨਂ ਦਸਬਲਸ੍ਸ ਅਦਾਸਿ. ਅਚੇਲਕਾ ‘‘ਅਮ੍ਹਾਕਂ ਪਠਮਂ ਦਿਨ੍ਨ’’ਨ੍ਤਿ ਨਿਕ੍ਖਮਿਤੁਂ ਨ ਇਚ੍ਛਨ੍ਤਿ. ‘‘ਗਚ੍ਛਥ ਨੀਹਰਿਤਬ੍ਬਨਿਯਾਮੇਨ ਤੇ ਨੀਹਰਥਾ’’ਤਿ ਸਬ੍ਬੇ ਨੀਹਰਾਪੇਤ੍ਵਾ ਤਤ੍ਥੇਵ ਸਤ੍ਥੁ ਵਿਹਾਰਂ ਕਾਰੇਤ੍ਵਾ ਬ੍ਰਹ੍ਮਦੇਯ੍ਯਂ ਕਤ੍ਵਾ ਉਦਕਂ ਪਾਤੇਸਿ. ਸੋ ਕਾਲ਼ਕੇਨ ਕਾਰਿਤਤਾਯ ਕਾਲ਼ਕਾਰਾਮੋ ਨਾਮ ਜਾਤੋ. ਭਗਵਾ ਤਸ੍ਮਿਂ ਸਮਯੇ ਤਤ੍ਥ ਵਿਹਰਤਿ. ਤੇਨ ਵੁਤ੍ਤਂ – ‘‘ਸਾਕੇਤੇ ਵਿਹਰਤਿ ਕਾਲ਼ਕਾਰਾਮੇ’’ਤਿ.
ਭਿਕ੍ਖੂ ਆਮਨ੍ਤੇਸੀਤਿ ਪਞ੍ਚਸਤੇ ਭਿਕ੍ਖੂ ਆਮਨ੍ਤੇਸਿ. ਤੇ ਕਿਰ ਸਾਕੇਤਨਗਰਵਾਸਿਨੋ ਕੁਲਪੁਤ੍ਤਾ ਸਤ੍ਥੁ ਧਮ੍ਮਦੇਸਨਂ ਸੁਤ੍ਵਾ ਸਤ੍ਥੁ ਸਨ੍ਤਿਕੇ ਪਬ੍ਬਜਿਤ੍ਵਾ ਉਪਟ੍ਠਾਨਸਾਲਾਯ ਨਿਸਿਨ੍ਨਾ ‘‘ਅਹੋ ਬੁਦ੍ਧਗੁਣਾ ਨਾਮ ਮਹਨ੍ਤਾ, ਏਵਰੂਪਂ ਨਾਮ ਮਿਚ੍ਛਾਦਿਟ੍ਠਿਕਂ ਕਾਲ਼ਕਸੇਟ੍ਠਿਂ ਦਿਟ੍ਠਿਤੋ ਮੋਚੇਤ੍ਵਾ ਸੋਤਾਪਤ੍ਤਿਫਲਂ ਪਾਪੇਤ੍ਵਾ ਸਕਲਨਗਰਂ ਸਤ੍ਥਾਰਾ ਦੇਵਲੋਕਸਦਿਸਂ ਕਤ’’ਨ੍ਤਿ ਦਸਬਲਸ੍ਸ ਗੁਣਂ ਕਥੇਨ੍ਤਿ. ਸਤ੍ਥਾ ਤੇਸਂ ਗੁਣਂ ਕਥੇਨ੍ਤਾਨਂ ਚਿਤ੍ਤਂ ਉਪਪਰਿਕ੍ਖਿਤ੍ਵਾ – ‘‘ਮਯਿ ਗਤੇ ਮਹਤੀ ਦੇਸਨਾ ਸਮੁਟ੍ਠਿਸ੍ਸਤਿ, ਦੇਸਨਾਪਰਿਯੋਸਾਨੇ ਚ ਇਮੇ ਪਞ੍ਚਸਤਾ ਭਿਕ੍ਖੂ ਅਰਹਤ੍ਤੇ ਪਤਿਟ੍ਠਹਿਸ੍ਸਨ੍ਤਿ, ਮਹਾਪਥਵੀ ਉਦਕਪਰਿਯਨ੍ਤਂ ਕਤ੍ਵਾ ਕਮ੍ਪਿਸ੍ਸਤੀ’’ਤਿ ਧਮ੍ਮਸਭਂ ਗਨ੍ਤ੍ਵਾ ਪਞ੍ਞਤ੍ਤਵਰਬੁਦ੍ਧਾਸਨੇ ਨਿਸਿਨ੍ਨੋ ਤੇ ਭਿਕ੍ਖੂ ਆਦਿਂ ਕਤ੍ਵਾ ਯਂ, ਭਿਕ੍ਖਵੇ, ਸਦੇਵਕਸ੍ਸ ਲੋਕਸ੍ਸਾਤਿ ਇਮਂ ਦੇਸਨਂ ਆਰਭਿ. ਏਵਮਿਦਂ ਸੁਤ੍ਤਂ ਗੁਣਕਥਾਯ ਨਿਕ੍ਖਿਤ੍ਤਨ੍ਤਿ ਵੇਦਿਤਬ੍ਬਂ.
ਤਤ੍ਥ ‘‘ਤਮਹਂ ਜਾਨਾਮੀ’’ਤਿ ਪਦਪਰਿਯੋਸਾਨੇ ਮਹਾਪਥਵੀ ਉਦਕਪਰਿਯਨ੍ਤਂ ਕਤ੍ਵਾ ਅਕਮ੍ਪਿਤ੍ਥ. ਅਬ੍ਭਞ੍ਞਾਸਿਨ੍ਤਿ ਅਭਿਅਞ੍ਞਾਸਿਂ, ਜਾਨਿਨ੍ਤਿ ਅਤ੍ਥੋ. ਵਿਦਿਤਨ੍ਤਿ ਪਾਕਟਂ ਕਤ੍ਵਾ ਞਾਤਂ. ਇਮਿਨਾ ਏਤਂ ਦਸ੍ਸੇਤਿ – ਅਞ੍ਞੇ ਜਾਨਨ੍ਤਿਯੇਵ, ਮਯਾ ਪਨ ਪਾਕਟਂ ਕਤ੍ਵਾ ਵਿਦਿਤਨ੍ਤਿ. ਇਮੇਹਿ ਤੀਹਿ ਪਦੇਹਿ ਸਬ੍ਬਞ੍ਞੁਤਭੂਮਿ ਨਾਮ ਕਥਿਤਾ. ਤਂ ਤਥਾਗਤੋ ਨ ਉਪਟ੍ਠਾਸੀਤਿ ਤਂ ਛਦ੍ਵਾਰਿਕਂ ਆਰਮ੍ਮਣਂ ਤਥਾਗਤੋ ਤਣ੍ਹਾਯ ਵਾ ਦਿਟ੍ਠਿਯਾ ਵਾ ਨ ਉਪਟ੍ਠਾਸਿ ਨ ਉਪਗਞ੍ਛਿ. ਅਯਞ੍ਹਿ ਪਸ੍ਸਤਿ ਭਗਵਾ ਚਕ੍ਖੁਨਾ ਰੂਪਂ, ਛਨ੍ਦਰਾਗੋ ਭਗਵਤੋ ਨਤ੍ਥਿ, ਸੁਵਿਮੁਤ੍ਤਚਿਤ੍ਤੋ ਸੋ ਭਗਵਾ. ਸੁਣਾਤਿ ਭਗਵਾ ਸੋਤੇਨ ਸਦ੍ਦਂ. ਘਾਯਤਿ ਭਗਵਾ ਘਾਨੇਨ ਗਨ੍ਧਂ. ਸਾਯਤਿ ਭਗਵਾ ਜਿਵ੍ਹਾਯ ਰਸਂ. ਫੁਸਤਿ ਭਗਵਾ ਕਾਯੇਨ ਫੋਟ੍ਠਬ੍ਬਂ. ਵਿਜਾਨਾਤਿ ਭਗਵਾ ਮਨਸਾ ਧਮ੍ਮਂ, ਛਨ੍ਦਰਾਗੋ ਭਗਵਤੋ ਨਤ੍ਥਿ, ਸੁਵਿਮੁਤ੍ਤਚਿਤ੍ਤੋ ਸੋ ਭਗਵਾ. ਤੇਨ ਵੁਤ੍ਤਂ – ‘‘ਤਂ ਤਥਾਗਤੋ ਨ ਉਪਟ੍ਠਾਸੀ’’ਤਿ. ਇਮਿਨਾ ਪਦੇਨ ਖੀਣਾਸਵਭੂਮਿ ਕਥਿਤਾਤਿ ਵੇਦਿਤਬ੍ਬਾ.
ਤਂ ਮਮਸ੍ਸ ਮੁਸਾਤਿ ਤਂ ਮੇ ਵਚਨਂ ਮੁਸਾਵਾਦੋ ਨਾਮ ਭਵੇਯ੍ਯ. ਤਂ ਪਸ੍ਸ ਤਾਦਿਸਮੇਵਾਤਿ ਤਮ੍ਪਿ ਮੁਸਾਵਾਦੋ ਭਵੇਯ੍ਯ. ਤਂ ਮਮਸ੍ਸ ਕਲੀਤਿ ਤਂ ਵਚਨਂ ਮਯ੍ਹਂ ਦੋਸੋ ਭਵੇਯ੍ਯਾਤਿ ਅਤ੍ਥੋ. ਏਤ੍ਤਾਵਤਾ ਸਚ੍ਚਭੂਮਿ ਨਾਮ ਕਥਿਤਾਤਿ ਵੇਦਿਤਬ੍ਬਾ.
ਦਟ੍ਠਾ ਦਟ੍ਠਬ੍ਬਨ੍ਤਿ ਦਿਸ੍ਵਾ ਦਟ੍ਠਬ੍ਬਂ. ਦਿਟ੍ਠਂ ਨ ਮਞ੍ਞਤੀਤਿ ਤਂ ਦਿਟ੍ਠਂ ਰੂਪਾਯਤਨਂ ‘‘ਅਹਂ ਮਹਾਜਨੇਨ ਦਿਟ੍ਠਮੇਵ ਪਸ੍ਸਾਮੀ’’ਤਿ ਤਣ੍ਹਾਮਾਨਦਿਟ੍ਠੀਹਿ ਨ ਮਞ੍ਞਤਿ. ਅਦਿਟ੍ਠਂ ਨ ਮਞ੍ਞਤੀਤਿ ‘‘ਅਹਂ ਮਹਾਜਨੇਨ ਅਦਿਟ੍ਠਮੇਵ ਏਤਂ ਪਸ੍ਸਾਮੀ’’ਤਿ ਏਵਮ੍ਪਿ ਤਣ੍ਹਾਦੀਹਿ ਮਞ੍ਞਨਾਹਿ ਨ ਮਞ੍ਞਤਿ. ਦਟ੍ਠਬ੍ਬਂ ਨ ਮਞ੍ਞਤੀਤਿ ‘‘ਮਹਾਜਨੇਨ ਦਿਟ੍ਠਂ ਪਸ੍ਸਾਮੀ’’ਤਿ ਏਵਮ੍ਪਿ ਤਾਹਿ ਮਞ੍ਞਨਾਹਿ ਨ ਮਞ੍ਞਤਿ. ਦਟ੍ਠਬ੍ਬਞ੍ਹਿ ਅਦਿਟ੍ਠਮ੍ਪਿ ਹੋਤਿਯੇਵ. ਏਵਰੂਪਾਨਿ ਹਿ ਵਚਨਾਨਿ ਤੀਸੁਪਿ ਕਾਲੇਸੁ ਲਬ੍ਭਨ੍ਤਿ, ਤੇਨਸ੍ਸ ਅਤ੍ਥੋ ਵੁਤ੍ਤੋ. ਦਟ੍ਠਾਰਂ ਨ ਮਞ੍ਞਤੀਤਿ ਪਸ੍ਸਿਤਾਰਂ ਏਕਸਤ੍ਤਂ ਨਾਮ ਤਾਹਿ ਮਞ੍ਞਨਾਹਿ ਨ ਮਞ੍ਞਤੀਤਿ ਅਤ੍ਥੋ. ਸੇਸਟ੍ਠਾਨੇਸੁਪਿ ਇਮਿਨਾਵ ਨਯੇਨ ਅਤ੍ਥੋ ਵੇਦਿਤਬ੍ਬੋ. ਇਮਿਨਾ ਏਤ੍ਤਕੇਨ ਠਾਨੇਨ ਸੁਞ੍ਞਤਾਭੂਮਿ ਨਾਮ ਕਥਿਤਾ.
ਇਤਿ ਖੋ, ਭਿਕ੍ਖਵੇਤਿ ਏਵਂ ਖੋ, ਭਿਕ੍ਖਵੇ. ਤਾਦੀਯੇਵ ਤਾਦੀਤਿ ਤਾਦਿਤਾ ਨਾਮ ਏਕਸਦਿਸਤਾ. ਤਥਾਗਤੋ ਚ ਯਾਦਿਸੋ ਲਾਭਾਦੀਸੁ, ਤਾਦਿਸੋਵ ਅਲਾਭਾਦੀਸੁ. ਤੇਨ ਵੁਤ੍ਤਂ – ‘‘ਲਾਭੇਪਿ ਤਾਦੀ, ਅਲਾਭੇਪਿ ਤਾਦੀ. ਯਸੇਪਿ ਤਾਦੀ, ਅਯਸੇਪਿ ਤਾਦੀ. ਨਿਨ੍ਦਾਯਪਿ ਤਾਦੀ, ਪਸਂਸਾਯਪਿ ਤਾਦੀ. ਸੁਖੇਪਿ ਤਾਦੀ, ਦੁਕ੍ਖੇਪਿ ਤਾਦੀ’’ਤਿ (ਮਹਾਨਿ. ੩੮, ੧੯੨). ਇਮਾਯ ਤਾਦਿਤਾਯ ਤਾਦੀ. ਤਮ੍ਹਾ ਚ ਪਨ ਤਾਦਿਮ੍ਹਾਤਿ ਤਤੋ ਤਥਾਗਤਤਾਦਿਤੋ ਅਞ੍ਞੋ ਉਤ੍ਤਰਿਤਰੋ ਵਾ ਪਣੀਤਤਰੋ ਵਾ ਤਾਦੀ ਨਤ੍ਥੀਤਿ ਏਤ੍ਤਾਵਤਾ ਤਾਦਿਭੂਮਿ ਨਾਮ ਕਥਿਤਾ. ਇਮਾਹਿ ਪਞ੍ਚਭੂਮੀਹਿ ਦੇਸਨਂ ਨਿਟ੍ਠਾਪੇਨ੍ਤਸ੍ਸ ਪਞ੍ਚਸੁਪਿ ਠਾਨੇਸੁ ਮਹਾਪਥਵੀ ਸਕ੍ਖਿਭਾਵੇਨ ਅਕਮ੍ਪਿਤ੍ਥ. ਦੇਸਨਾਪਰਿਯੋਸਾਨੇ ਤੇ ਪਞ੍ਚਸਤੇ ਅਧੁਨਾਪਬ੍ਬਜਿਤੇ ਕੁਲਪੁਤ੍ਤੇ ਆਦਿਂ ਕਤ੍ਵਾ ਤਂ ਠਾਨਂ ਪਤ੍ਤਾਨਂ ਦੇਵਮਨੁਸ੍ਸਾਨਂ ਚਤੁਰਾਸੀਤਿ ਪਾਣਸਹਸ੍ਸਾਨਿ ਅਮਤਪਾਨਂ ਪਿਵਿਂਸੁ.
ਭਗਵਾਪਿ ਸੁਤ੍ਤਂ ਨਿਟ੍ਠਾਪੇਤ੍ਵਾ ਗਾਥਾਹਿ ਕੂਟਂ ਗਣ੍ਹਨ੍ਤੋ ਯਂਕਿਞ੍ਚੀਤਿਆਦਿਮਾਹ. ਤਤ੍ਥ ਅਜ੍ਝੋਸਿਤਂ ਸਚ੍ਚਮੁਤਂ ਪਰੇਸਨ੍ਤਿ ਪਰੇਸਂ ਸਦ੍ਧਾਯ ਪਰਪਤ੍ਤਿਯਾਯਨਾਯ ਸਚ੍ਚਮੁਤਨ੍ਤਿ ਮਞ੍ਞਿਤ੍ਵਾ ਅਜ੍ਝੋਸਿਤਂ ਗਿਲਿਤ੍ਵਾ ਪਰਿਨਿਟ੍ਠਾਪੇਤ੍ਵਾ ਗਹਿਤਂ. ਸਯਸਂਵੁਤੇਸੂਤਿ ਸਯਮੇਵ ਸਂਵਰਿਤ੍ਵਾ ਪਿਯਾਯਿਤ੍ਵਾ ਗਹਿਤਗਹਣੇਸੁ, ਦਿਟ੍ਠਿਗਤਿਕੇਸੂਤਿ ਅਤ੍ਥੋ. ਦਿਟ੍ਠਿਗਤਿਕਾ ਹਿ ਸਯਂ ਸਂਵੁਤਾਤਿ ਵੁਚ੍ਚਨ੍ਤਿ. ਸਚ੍ਚਂ ਮੁਸਾ ਵਾਪਿ ਪਰਂ ਦਹੇਯ੍ਯਾਤਿ ਤੇਸੁ ਸਯਂ ਸਂਵੁਤਸਙ੍ਖਾਤੇਸੁ ਦਿਟ੍ਠਿਗਤਿਕੇਸੁ ਤਥਾਗਤੋ ਤਾਦੀ ਤੇਸਂ ਏਕਮ੍ਪਿ ਵਚਨਂ ‘‘ਇਦਮੇਵ ਸਚ੍ਚਂ ਮੋਘਮਞ੍ਞ’’ਨ੍ਤਿ ਏਵਂ ਸਚ੍ਚਂ ਮੁਸਾ ਵਾਪਿ ਪਰਂ ਉਤ੍ਤਮਂ ਕਤ੍ਵਾ ਨ ਓਦਹੇਯ੍ਯ, ਨ ਸਦ੍ਦਹੇਯ੍ਯ, ਨ ਪਤ੍ਤਿਯਾਯੇਯ੍ਯ. ਏਤਞ੍ਚ ਸਲ੍ਲਨ੍ਤਿ ਏਤਂ ਦਿਟ੍ਠਿਸਲ੍ਲਂ. ਪਟਿਕਚ੍ਚ ਦਿਸ੍ਵਾਤਿ ਪੁਰੇਤਰਂ ਬੋਧਿਮੂਲੇਯੇਵ ਦਿਸ੍ਵਾ. ਵਿਸਤ੍ਤਾਤਿ ਲਗ੍ਗਾ ਲਗਿਤਾ ਪਲਿਬੁਦ੍ਧਾ. ਜਾਨਾਮਿ ਪਸ੍ਸਾਮਿ ਤਥੇਵ ਏਤਨ੍ਤਿ ਯਥਾਯਂ ਪਜਾ ਅਜ੍ਝੋਸਿਤਾ ਗਿਲਿਤ੍ਵਾ ਪਰਿਨਿਟ੍ਠਾਪੇਤ੍ਵਾ ਵਿਸਤ੍ਤਾ ਲਗ੍ਗਾ ਲਗਿਤਾ, ਏਵਂ ਅਹਮ੍ਪਿ ਜਾਨਾਮਿ ਪਸ੍ਸਾਮਿ. ਤਥਾ ਏਵਂ ਯਥਾ ਏਤਾਯ ਪਜਾਯ ਗਹਿਤਨ੍ਤਿ ਏਵਂ ਅਜ੍ਝੋਸਿਤਂ ਨਤ੍ਥਿ ਤਥਾਗਤਾਨਨ੍ਤਿ ਅਤ੍ਥੋ.
੫. ਬ੍ਰਹ੍ਮਚਰਿਯਸੁਤ੍ਤਵਣ੍ਣਨਾ
੨੫. ਪਞ੍ਚਮੇ ਜਨਕੁਹਨਤ੍ਥਨ੍ਤਿ ਤੀਹਿ ਕੁਹਨਵਤ੍ਥੂਹਿ ਜਨਸ੍ਸ ਕੁਹਨਤ੍ਥਾਯ. ਨ ਜਨਲਪਨਤ੍ਥਨ੍ਤਿ ਨ ਜਨਸ੍ਸ ਉਪਲਾਪਨਤ੍ਥਂ. ਨ ਲਾਭਸਕ੍ਕਾਰਸਿਲੋਕਾਨਿਸਂਸਤ੍ਥਨ੍ਤਿ ਨ ਚੀਵਰਾਦਿਥੁਤਿਵਚਨਤ੍ਥਂ. ਨ ਇਤਿਵਾਦਪ੍ਪਮੋਕ੍ਖਾਨਿਸਂਸਤ੍ਥਨ੍ਤਿ ਨ ਤੇਨ ਤੇਨ ਕਾਰਣੇਨ ਕਤਵਾਦਾਨਿਸਂਸਤ੍ਥਂ, ਨ ਵਾਦਸ੍ਸ ਪਮੋਕ੍ਖਾਨਿਸਂਸਤ੍ਥਂ. ਨ ਇਤਿ ਮਂ ਜਨੋ ਜਾਨਾਤੂਤਿ ਨ ‘‘ਏਵਂ ਕਿਰ ਏਸ ਭਿਕ੍ਖੁ, ਏਵਂ ਕਿਰ ਏਸ ਭਿਕ੍ਖੂ’’ਤਿ ਜਨਸ੍ਸ ਜਾਨਨਤ੍ਥਾਯ. ਸਂਵਰਤ੍ਥਨ੍ਤਿ ਪਞ੍ਚਹਿ ਸਂਵਰੇਹਿ ਸਂਵਰਣਤ੍ਥਾਯ. ਪਹਾਨਤ੍ਥਨ੍ਤਿ ਤੀਹਿ ਪਹਾਨੇਹਿ ਪਜਹਨਤ੍ਥਾਯ. ਵਿਰਾਗਤ੍ਥਨ੍ਤਿ ਰਾਗਾਦੀਨਂ ਵਿਰਜ੍ਜਨਤ੍ਥਾਯ. ਨਿਰੋਧਤ੍ਥਨ੍ਤਿ ਤੇਸਂਯੇਵ ਨਿਰੁਜ੍ਝਨਤ੍ਥਾਯ. ਅਨੀਤਿਹਨ੍ਤਿ ਇਤਿਹਪਰਿਵਜ੍ਜਿਤਂ, ਅਪਰਪਤ੍ਤਿਯਨ੍ਤਿ ਅਤ੍ਥੋ. ਨਿਬ੍ਬਾਨੋਗਧਗਾਮਿਨਨ੍ਤਿ ਨਿਬ੍ਬਾਨਸ੍ਸ ਅਨ੍ਤੋਗਾਮਿਨਂ. ਮਗ੍ਗਬ੍ਰਹ੍ਮਚਰਿਯਞ੍ਹਿ ਨਿਬ੍ਬਾਨਂ ਆਰਮ੍ਮਣਂ ਕਰਿਤ੍ਵਾ ਨਿਬ੍ਬਾਨਸ੍ਸ ਅਨ੍ਤੋਯੇਵ ਵਤ੍ਤਤਿ ਪਵਤ੍ਤਤਿ. ਪਟਿਪਜ੍ਜਨ੍ਤੀਤਿ ਦੁਵਿਧਮ੍ਪਿ ਪਟਿਪਜ੍ਜਨ੍ਤਿ. ਇਮਸ੍ਮਿਂ ਸੁਤ੍ਤੇ ਵਟ੍ਟਵਿਵਟ੍ਟਂ ਕਥੇਤ੍ਵਾ ਗਾਥਾਸੁ ਵਿਵਟ੍ਟਮੇਵ ਕਥਿਤਂ.
੬. ਕੁਹਸੁਤ੍ਤਵਣ੍ਣਨਾ
੨੬. ਛਟ੍ਠੇ ਕੁਹਾਤਿ ਕੁਹਕਾ. ਥਦ੍ਧਾਤਿ ਕੋਧੇਨ ਚ ਮਾਨੇਨ ਚ ਥਦ੍ਧਾ. ਲਪਾਤਿ ਉਪਲਾਪਕਾ. ਸਿਙ੍ਗੀਤਿ ‘‘ਤਤ੍ਥ ਕਤਮਂ ਸਿਙ੍ਗਂ, ਯਂ ਸਿਙ੍ਗਂ ਸਿਙ੍ਗਾਰਤਾ ਚਾਤੁਰਤਾ ਚਾਤੁਰਿਯਂ ਪਰਿਕ੍ਖਤ੍ਤਤਾ ਪਾਰਿਕ੍ਖਤ੍ਤਿਯ’’ਨ੍ਤਿ (ਵਿਭ. ੮੫੨) ਏਵਂ ਵੁਤ੍ਤੇਹਿ ਸਿਙ੍ਗਸਦਿਸੇਹਿ ਪਾਕਟਕਿਲੇਸੇਹਿ ਸਮਨ੍ਨਾਗਤਾ. ਉਨ੍ਨਲ਼ਾਤਿ ਉਗ੍ਗਤਨਲ਼ਾ ਤੁਚ੍ਛਮਾਨਂ ਉਕ੍ਖਿਪਿਤ੍ਵਾ ਠਿਤਾ. ਅਸਮਾਹਿਤਾਤਿ ਚਿਤ੍ਤੇਕਗ੍ਗਮਤ੍ਤਸ੍ਸਾਪਿ ਅਲਾਭਿਨੋ. ਨ ਮੇ ਤੇ, ਭਿਕ੍ਖਵੇ, ਭਿਕ੍ਖੂ ਮਾਮਕਾਤਿ ਤੇ ਮਯ੍ਹਂ ਭਿਕ੍ਖੂ ਮਮ ਸਨ੍ਤਕਾ ਨ ਹੋਨ੍ਤਿ. ‘‘ਤੇ ਮਯ੍ਹ’’ਨ੍ਤਿ ਇਦਂ ਪਨ ਸਤ੍ਥਾਰਂ ਉਦ੍ਦਿਸ੍ਸ ਪਬ੍ਬਜਿਤਤ੍ਤਾ ਵੁਤ੍ਤਂ. ਤੇ ਖੋ ਮੇ, ਭਿਕ੍ਖਵੇ, ਭਿਕ੍ਖੂ ਮਾਮਕਾਤਿ ਇਧਾਪਿ ਮੇਤਿ ਅਤ੍ਤਾਨਂ ਉਦ੍ਦਿਸ੍ਸ ਪਬ੍ਬਜਿਤਤ੍ਤਾ ਵਦਤਿ, ਸਮ੍ਮਾਪਟਿਪਨ੍ਨਤ੍ਤਾ ਪਨ ‘‘ਮਾਮਕਾ’’ਤਿ ਆਹ. ਵੁਦ੍ਧਿਂ ਵਿਰੂਲ਼੍ਹਿਂ ਵੇਪੁਲ੍ਲਂ ਆਪਜ੍ਜਨ੍ਤੀਤਿ ਸੀਲਾਦੀਹਿ ਗੁਣੇਹਿ ਵਡ੍ਢਨਤੋ ਵੁਦ੍ਧਿਂ, ਨਿਚ੍ਚਲਭਾਵੇਨ ਵਿਰੂਲ਼੍ਹਿਂ, ਸਬ੍ਬਤ੍ਥ ਪਤ੍ਥਟਤਾਯ ਵੇਪੁਲ੍ਲਂ ਪਾਪੁਣਨ੍ਤਿ. ਤੇ ਪਨੇਤੇ ਯਾਵ ਅਰਹਤ੍ਤਮਗ੍ਗਾ ਵਿਰੁਹਨ੍ਤਿ, ਅਰਹਤ੍ਤਫਲਂ ਪਤ੍ਤੇ ਵਿਰੂਲ਼੍ਹਾ ਨਾਮ ਹੋਨ੍ਤਿ. ਇਤਿ ਇਮਸ੍ਮਿਂ ਸੁਤ੍ਤੇਪਿ ਗਾਥਾਸੁਪਿ ਵਟ੍ਟਵਿਵਟ੍ਟਮੇਵ ਕਥਿਤਂ.
੭. ਸਨ੍ਤੁਟ੍ਠਿਸੁਤ੍ਤਵਣ੍ਣਨਾ
੨੭. ਸਤ੍ਤਮੇ ਅਪ੍ਪਾਨੀਤਿ ਪਰਿਤ੍ਤਾਨਿ. ਸੁਲਭਾਨੀਤਿ ਸੁਖੇਨ ਲਦ੍ਧਬ੍ਬਾਨਿ, ਯਤ੍ਥ ਕਤ੍ਥਚਿ ਸਕ੍ਕਾ ਹੋਨ੍ਤਿ ਲਭਿਤੁਂ. ਅਨਵਜ੍ਜਾਨੀਤਿ ਨਿਦ੍ਦੋਸਾਨਿ. ਪਿਣ੍ਡਿਯਾਲੋਪਭੋਜਨਨ੍ਤਿ ਜਙ੍ਘਾਪਿਣ੍ਡਿਯਬਲੇਨ ਚਰਿਤ੍ਵਾ ਆਲੋਪਮਤ੍ਤਂ ਲਦ੍ਧਂ ਭੋਜਨਂ. ਪੂਤਿਮੁਤ੍ਤਨ੍ਤਿ ਯਂਕਿਞ੍ਚਿ ਮੁਤ੍ਤਂ. ਯਥਾ ਹਿ ਸੁਵਣ੍ਣਵਣ੍ਣੋਪਿ ਕਾਯੋ ਪੂਤਿਕਾਯੋਤਿ ਵੁਚ੍ਚਤਿ, ਏਵਂ ਅਭਿਨਵਮ੍ਪਿ ਮੁਤ੍ਤਂ ਪੂਤਿਮੁਤ੍ਤਮੇਵ.
ਵਿਘਾਤੋਤਿ ਵਿਗਤਘਾਤੋ, ਚਿਤ੍ਤਸ੍ਸ ਦੁਕ੍ਖਂ ਨ ਹੋਤੀਤਿ ਅਤ੍ਥੋ. ਦਿਸਾ ਨਪ੍ਪਟਿਹਞ੍ਞਤੀਤਿ ਯਸ੍ਸ ਹਿ ‘‘ਅਸੁਕਟ੍ਠਾਨਂ ਨਾਮ ਗਤੋ ਚੀਵਰਾਦੀਨਿ ਲਭਿਸ੍ਸਾਮੀ’’ਤਿ ਚਿਤ੍ਤਂ ਉਪ੍ਪਜ੍ਜਤਿ, ਤਸ੍ਸ ਦਿਸਾ ਪਟਿਹਞ੍ਞਤਿ ਨਾਮ. ਯਸ੍ਸ ਏਵਂ ਨ ਉਪ੍ਪਜ੍ਜਤਿ, ਤਸ੍ਸ ਨਪ੍ਪਟਿਹਞ੍ਞਤਿ ਨਾਮ. ਧਮ੍ਮਾਤਿ ਪਟਿਪਤ੍ਤਿਧਮ੍ਮਾ. ਸਾਮਞ੍ਞਸ੍ਸਾਨੁਲੋਮਿਕਾਤਿ ਸਮਣਧਮ੍ਮਸ੍ਸ ਅਨੁਲੋਮਾ. ਅਧਿਗ੍ਗਹਿਤਾਤਿ ਸਬ੍ਬੇਤੇ ਤੁਟ੍ਠਚਿਤ੍ਤਸ੍ਸ ਭਿਕ੍ਖੁਨੋ ਅਧਿਗ੍ਗਹਿਤਾ ਹੋਨ੍ਤਿ ਅਨ੍ਤੋਗਤਾ ਨ ਪਰਿਬਾਹਿਰਾਤਿ.
੮. ਅਰਿਯਵਂਸਸੁਤ੍ਤਵਣ੍ਣਨਾ
੨੮. ਅਟ੍ਠਮਸ੍ਸ ਅਜ੍ਝਾਸਯਿਕੋ ਨਿਕ੍ਖੇਪੋ. ਇਮਂ ਕਿਰ ਮਹਾਅਰਿਯਵਂਸਸੁਤ੍ਤਨ੍ਤਂ ਭਗਵਾ ਜੇਤਵਨਮਹਾਵਿਹਾਰੇ ਧਮ੍ਮਸਭਾਯਂ ਪਞ੍ਞਤ੍ਤਵਰਬੁਦ੍ਧਾਸਨੇ ਨਿਸਿਨ੍ਨੋ ਅਤ੍ਤਨੋਪਿ ਪਰਪੁਗ੍ਗਲਾਨਮ੍ਪਿ ਅਜ੍ਝਾਸਯਵਸੇਨ ਪਰਿਵਾਰੇਤ੍ਵਾ ਨਿਸਿਨ੍ਨਾਨਿ ਚਤ੍ਤਾਲੀਸ ਭਿਕ੍ਖੁਸਹਸ੍ਸਾਨਿ, ‘‘ਭਿਕ੍ਖਵੇ’’ਤਿ ਆਮਨ੍ਤੇਤ੍ਵਾ ਚਤ੍ਤਾਰੋਮੇ, ਭਿਕ੍ਖਵੇ, ਅਰਿਯਵਂਸਾਤਿ ਆਰਭਿ. ਤਤ੍ਥ ਅਰਿਯਵਂਸਾਤਿ ਅਰਿਯਾਨਂ ਵਂਸਾ. ਯਥਾ ਹਿ ਖਤ੍ਤਿਯਵਂਸੋ ਬ੍ਰਾਹ੍ਮਣਵਂਸੋ ਵੇਸ੍ਸਵਂਸੋ ਸੁਦ੍ਦਵਂਸੋ ਸਮਣਵਂਸੋ ਕੁਲਵਂਸੋ ਰਾਜਵਂਸੋ, ਏਵਂ ਅਯਮ੍ਪਿ ਅਟ੍ਠਮੋ ਅਰਿਯਵਂਸੋ ਅਰਿਯਤਨ੍ਤਿ ਅਰਿਯਪਵੇਣੀ ਨਾਮ ਹੋਤਿ. ਸੋ ਖੋ ਪਨਾਯਂ ਅਰਿਯਵਂਸੋ ਇਮੇਸਂ ਵਂਸਾਨਂ ਮੂਲਗਨ੍ਧਾਦੀਨਂ ਕਾਲ਼ਾਨੁਸਾਰਿਗਨ੍ਧਾਦਯੋ ਵਿਯ ਅਗ੍ਗਮਕ੍ਖਾਯਤਿ.
ਕੇ ਪਨ ਤੇ ਅਰਿਯਾ, ਯੇਸਂ ਏਤੇ ਵਂਸਾਤਿ? ਅਰਿਯਾ ਵੁਚ੍ਚਨ੍ਤਿ ਬੁਦ੍ਧਾ ਚ ਪਚ੍ਚੇਕਬੁਦ੍ਧਾ ਚ ਤਥਾਗਤਸਾਵਕਾ ਚ, ਏਤੇਸਂ ਅਰਿਯਾਨਂ ਵਂਸਾਤਿ ਅਰਿਯਵਂਸਾ. ਇਤੋ ਪੁਬ੍ਬੇ ਹਿ ਸਤਸਹਸ੍ਸਕਪ੍ਪਾਧਿਕਾਨਂ ਚਤੁਨ੍ਨਂ ਅਸਙ੍ਖ੍ਯੇਯ੍ਯਾਨਂ ਮਤ੍ਥਕੇ ਤਣ੍ਹਙ੍ਕਰੋ, ਮੇਧਙ੍ਕਰੋ, ਸਰਣਙ੍ਕਰੋ, ਦੀਪਙ੍ਕਰੋਤਿ ਚਤ੍ਤਾਰੋ ਬੁਦ੍ਧਾ ਉਪ੍ਪਨ੍ਨਾ, ਤੇ ਅਰਿਯਾ, ਤੇਸਂ ਅਰਿਯਾਨਂ ਵਂਸਾਤਿ ਅਰਿਯਵਂਸਾ. ਤੇਸਂ ਬੁਦ੍ਧਾਨਂ ਪਰਿਨਿਬ੍ਬਾਨਤੋ ਅਪਰਭਾਗੇ ਅਸਙ੍ਖ੍ਯੇਯ੍ਯਂ ਅਤਿਕ੍ਕਮਿਤ੍ਵਾ ਕੋਣ੍ਡਞ੍ਞੋ ਨਾਮ ਬੁਦ੍ਧੋ ਉਪ੍ਪਨ੍ਨੋ…ਪੇ… ਇਮਸ੍ਮਿਂ ਕਪ੍ਪੇ ਕਕੁਸਨ੍ਧੋ, ਕੋਣਾਗਮਨੋ, ਕਸ੍ਸਪੋ, ਅਮ੍ਹਾਕਂ ਭਗਵਾ ਗੋਤਮੋਤਿ ਚਤ੍ਤਾਰੋ ਬੁਦ੍ਧਾ ਉਪ੍ਪਨ੍ਨਾ, ਤੇਸਂ ਅਰਿਯਾਨਂ ਵਂਸਾਤਿ ਅਰਿਯਵਂਸਾ. ਅਪਿਚ ਅਤੀਤਾਨਾਗਤਪਚ੍ਚੁਪ੍ਪਨ੍ਨਾਨਂ ਸਬ੍ਬਬੁਦ੍ਧ-ਪਚ੍ਚੇਕਬੁਦ੍ਧ-ਬੁਦ੍ਧਸਾਵਕਾਨਂ ਅਰਿਯਾਨਂ ਵਂਸਾਤਿ ਅਰਿਯਵਂਸਾ.
ਤੇ ਖੋ ਪਨੇਤੇ ਅਗ੍ਗਞ੍ਞਾ ਅਗ੍ਗਾਤਿ ਜਾਨਿਤਬ੍ਬਾ, ਰਤ੍ਤਞ੍ਞਾ ਦੀਘਰਤ੍ਤਂ ਪਵਤ੍ਤਾਤਿ ਜਾਨਿਤਬ੍ਬਾ, ਵਂਸਞ੍ਞਾ ਵਂਸਾਤਿ ਜਾਨਿਤਬ੍ਬਾ. ਪੋਰਾਣਾ ਨ ਅਧੁਨੁਪ੍ਪਤ੍ਤਿਕਾ. ਅਸਂਕਿਣ੍ਣਾ ਅਵਿਕਿਣ੍ਣਾ ਅਨਪਨੀਤਾ. ਅਸਂਕਿਣ੍ਣਪੁਬ੍ਬਾ ਅਤੀਤਬੁਦ੍ਧੇਹਿਪਿ ਨ ਸਂਕਿਣ੍ਣਪੁਬ੍ਬਾ, ‘‘ਕਿ ਇਮੇਹੀ’’ਤਿ ਨ ਅਪਨੀਤਪੁਬ੍ਬਾ. ਨ ਸਂਕੀਯਨ੍ਤੀਤਿ ਇਦਾਨਿਪਿ ਨ ਅਪਨੀਯਨ੍ਤਿ. ਨ ਸਂਕੀਯਿਸ੍ਸਨ੍ਤੀਤਿ ਅਨਾਗਤਬੁਦ੍ਧੇਹਿਪਿ ਨ ਅਪਨੀਯਿਸ੍ਸਨ੍ਤਿ. ਯੇ ਲੋਕੇ ਵਿਞ੍ਞੂ ਸਮਣਬ੍ਰਾਹ੍ਮਣਾ, ਤੇਹਿ ਅਪ੍ਪਟਿਕੁਟ੍ਠਾ, ਸਮਣੇਹਿ ਬ੍ਰਾਹ੍ਮਣੇਹਿ ਵਿਞ੍ਞੂਹਿ ਅਨਿਨ੍ਦਿਤਾ ਅਗਰਹਿਤਾ.
ਸਨ੍ਤੁਟ੍ਠੋ ਹੋਤੀਤਿ ਪਚ੍ਚਯਸਨ੍ਤੋਸਵਸੇਨ ਸਨ੍ਤੁਟ੍ਠੋ ਹੋਤਿ. ਇਤਰੀਤਰੇਨਾਤਿ ਨ ਥੂਲਸੁਖੁਮਲੂਖਪਣੀਤਥਿਰਜਿਣ੍ਣਾਨਂ ਯੇਨ ਕੇਨਚਿ, ਅਥ ਖੋ ਯਥਾਲਦ੍ਧਾਦੀਨਂ ਇਤਰੀਤਰੇਨ ਯੇਨ ਕੇਨਚਿ ਸਨ੍ਤੁਟ੍ਠੋ ਹੋਤੀਤਿ ਅਤ੍ਥੋ. ਚੀਵਰਸ੍ਮਿਞ੍ਹਿ ਤਯੋ ਸਨ੍ਤੋਸਾ ਯਥਾਲਾਭਸਨ੍ਤੋਸੋ ਯਥਾਬਲਸਨ੍ਤੋਸੋ ਯਥਾਸਾਰੁਪ੍ਪਸਨ੍ਤੋਸੋਤਿ. ਪਿਣ੍ਡਪਾਤਾਦੀਸੁਪਿ ਏਸੇਵ ਨਯੋ. ਤੇਸਂ ਵਿਤ੍ਥਾਰਕਥਾ ‘‘ਸਨ੍ਤੁਟ੍ਠਸ੍ਸ, ਭਿਕ੍ਖਵੇ, ਅਨੁਪ੍ਪਨ੍ਨਾ ਚੇਵ ਕੁਸਲਾ ਧਮ੍ਮਾ ਉਪ੍ਪਜ੍ਜਨ੍ਤੀ’’ਤਿ ਇਮਸ੍ਮਿਂ ਸੁਤ੍ਤੇ ਵੁਤ੍ਤਨਯੇਨੇਵ ਵੇਦਿਤਬ੍ਬਾ. ਇਤਿ ਇਮੇ ਤਯੋ ਸਨ੍ਤੋਸੇ ਸਨ੍ਧਾਯ ‘‘ਸਨ੍ਤੁਟ੍ਠੋ ਹੋਤਿ ਇਤਰੀਤਰੇਨ ਚੀਵਰੇਨ, ਯਥਾਲਦ੍ਧਾਦੀਸੁ ਯੇਨ ਕੇਨਚਿ ਚੀਵਰੇਨ ਸਨ੍ਤੁਟ੍ਠੋ ਹੋਤੀ’’ਤਿ ਵੁਤ੍ਤਂ.
ਏਤ੍ਥ ਚ ਚੀਵਰਂ ਜਾਨਿਤਬ੍ਬਂ, ਚੀਵਰਕ੍ਖੇਤ੍ਤਂ ਜਾਨਿਤਬ੍ਬਂ, ਪਂਸੁਕੂਲਂ ਜਾਨਿਤਬ੍ਬਂ, ਚੀਵਰਸਨ੍ਤੋਸੋ ਜਾਨਿਤਬ੍ਬੋ, ਚੀਵਰਪ੍ਪਟਿਸਂਯੁਤ੍ਤਾਨਿ ਧੁਤਙ੍ਗਾਨਿ ਜਾਨਿਤਬ੍ਬਾਨਿ. ਤਤ੍ਥ ਚੀਵਰਂ ਜਾਨਿਤਬ੍ਬਨ੍ਤਿ ਖੋਮਾਦੀਨਿ ਛ ਚੀਵਰਾਨਿ ਦੁਕੂਲਾਦੀਨਿ ਛ ਅਨੁਲੋਮਚੀਵਰਾਨਿ ਜਾਨਿਤਬ੍ਬਾਨਿ. ਇਮਾਨਿ ਦ੍ਵਾਦਸ ਕਪ੍ਪਿਯਚੀਵਰਾਨਿ. ਕੁਸਚੀਰਂ, ਵਾਕਚੀਰਂ, ਫਲਕਚੀਰਂ, ਕੇਸਕਮ੍ਬਲਂ, ਵਾਲ਼ਕਮ੍ਬਲਂ, ਪੋਤ੍ਥਕੋ, ਚਮ੍ਮਂ, ਉਲੂਕਪਕ੍ਖਂ, ਰੁਕ੍ਖਦੁਸ੍ਸਂ, ਲਤਾਦੁਸ੍ਸਂ, ਏਰਕਦੁਸ੍ਸਂ, ਕਦਲਿਦੁਸ੍ਸਂ, ਵੇਲ਼ੁਦੁਸ੍ਸਨ੍ਤਿ ਏਵਮਾਦੀਨਿ ਪਨ ਅਕਪ੍ਪਿਯਚੀਵਰਾਨਿ.
ਚੀਵਰਕ੍ਖੇਤ੍ਤਨ੍ਤਿ ‘‘ਸਙ੍ਘਤੋ ਵਾ ਗਣਤੋ ਵਾ ਞਾਤਿਤੋ ਵਾ ਮਿਤ੍ਤਤੋ ਵਾ ਅਤ੍ਤਨੋ ਵਾ ਧਨੇਨ, ਪਂਸੁਕੂਲਂ ਵਾ’’ਤਿ ਏਵਂ ਉਪ੍ਪਜ੍ਜਨਤੋ ਛ ਖੇਤ੍ਤਾਨਿ, ਅਟ੍ਠਨ੍ਨਞ੍ਚ ਮਾਤਿਕਾਨਂ ਵਸੇਨ ਅਟ੍ਠ ਖੇਤ੍ਤਾਨਿ ਜਾਨਿਤਬ੍ਬਾਨਿ.
ਪਂਸੁਕੂਲਨ੍ਤਿ ਸੋਸਾਨਿਕਂ, ਪਾਪਣਿਕਂ, ਰਥਿਯਂ, ਸਙ੍ਕਾਰਕੂਟਕਂ, ਸੋਤ੍ਥਿਯਂ, ਸਿਨਾਨਂ, ਤਿਤ੍ਥਂ, ਗਤਪਚ੍ਚਾਗਤਂ, ਅਗ੍ਗਿਦਡ੍ਢਂ, ਗੋਖਾਯਿਤਂ, ਉਪਚਿਕਖਾਯਿਤਂ, ਉਨ੍ਦੂਰਖਾਯਿਤਂ, ਅਨ੍ਤਚ੍ਛਿਨ੍ਨਂ, ਦਸਚ੍ਛਿਨ੍ਨਂ, ਧਜਾਹਟਂ, ਥੂਪਂ, ਸਮਣਚੀਵਰਂ, ਸਾਮੁਦ੍ਦਿਯਂ, ਆਭਿਸੇਕਿਯਂ, ਪਨ੍ਥਿਕਂ, ਵਾਤਾਹਟਂ, ਇਦ੍ਧਿਮਯਂ, ਦੇਵਦਤ੍ਤਿਯਨ੍ਤਿ ਤੇਵੀਸਤਿ ਪਂਸੁਕੂਲਾਨਿ ਵੇਦਿਤਬ੍ਬਾਨਿ. ਏਤ੍ਥ ਚ ਸੋਤ੍ਥਿਯਨ੍ਤਿ ਗਬ੍ਭਮਲਹਰਣਂ. ਗਤਪਚ੍ਚਾਗਤਨ੍ਤਿ ਮਤਕਸਰੀਰਂ ਪਾਰੁਪਿਤ੍ਵਾ ਸੁਸਾਨਂ ਨੇਤ੍ਵਾ ਆਨੀਤਚੀਵਰਂ. ਧਜਾਹਟਨ੍ਤਿ ਧਜਂ ਉਸ੍ਸਾਪੇਤ੍ਵਾ ਤਤੋ ਆਨੀਤਂ. ਥੂਪਨ੍ਤਿ ਵਮ੍ਮਿਕੇ ਪੂਜਿਤਚੀਵਰਂ. ਸਾਮੁਦ੍ਦਿਯਨ੍ਤਿ ਸਮੁਦ੍ਦਵੀਚੀਹਿ ਥਲਂ ਪਾਪਿਤਂ. ਪਨ੍ਥਿਕਨ੍ਤਿ ਪਨ੍ਥਂ ਗਚ੍ਛਨ੍ਤੇਹਿ ਚੋਰਭਯੇਨ ਪਾਸਾਣੇਹਿ ਕੋਟ੍ਟੇਤ੍ਵਾ ਪਾਰੁਤਚੀਵਰਂ. ਇਦ੍ਧਿਮਯਨ੍ਤਿ ਏਹਿਭਿਕ੍ਖੁਚੀਵਰਂ. ਸੇਸਂ ਪਾਕਟਮੇਵਾਤਿ.
ਚੀਵਰਸਨ੍ਤੋਸੋਤਿ ਵੀਸਤਿ ਚੀਵਰਸਨ੍ਤੋਸਾ – ਚੀਵਰੇ ਵਿਤਕ੍ਕਸਨ੍ਤੋਸੋ, ਗਮਨਸਨ੍ਤੋਸੋ, ਪਰਿਯੇਸਨਸਨ੍ਤੋਸੋ, ਪਟਿਲਾਭਸਨ੍ਤੋਸੋ, ਮਤ੍ਤਪਟਿਗ੍ਗਹਣਸਨ੍ਤੋਸੋ, ਲੋਲੁਪ੍ਪਵਿਵਜ੍ਜਨਸਨ੍ਤੋਸੋ, ਯਥਾਲਾਭਸਨ੍ਤੋਸੋ, ਯਥਾਬਲਸਨ੍ਤੋਸੋ, ਯਥਾਸਾਰੁਪ੍ਪਸਨ੍ਤੋਸੋ, ਉਦਕਸਨ੍ਤੋਸੋ, ਧੋਵਨਸਨ੍ਤੋਸੋ, ਕਰਣਸਨ੍ਤੋਸੋ, ਪਰਿਮਾਣਸਨ੍ਤੋਸੋ, ਸੁਤ੍ਤਸਨ੍ਤੋਸੋ, ਸਿਬ੍ਬਨਸਨ੍ਤੋਸੋ, ਰਜਨਸਨ੍ਤੋਸੋ, ਕਪ੍ਪਸਨ੍ਤੋਸੋ, ਪਰਿਭੋਗਸਨ੍ਤੋਸੋ, ਸਨ੍ਨਿਧਿਪਰਿਵਜ੍ਜਨਸਨ੍ਤੋਸੋ, ਵਿਸ੍ਸਜ੍ਜਨਸਨ੍ਤੋਸੋਤਿ.
ਤਤ੍ਥ ਸਾਦਕਭਿਕ੍ਖੁਨਾ ਤੇਮਾਸਂ ਨਿਬਦ੍ਧਵਾਸਂ ਵਸਿਤ੍ਵਾ ਏਕਮਾਸਮਤ੍ਤਂ ਵਿਤਕ੍ਕੇਤੁਂ ਵਟ੍ਟਤਿ. ਸੋ ਹਿ ਪਵਾਰੇਤ੍ਵਾ ਚੀਵਰਮਾਸੇ ਚੀਵਰਂ ਕਰੋਤਿ, ਪਂਸੁਕੂਲਿਕੋ ਅਡ੍ਢਮਾਸੇਨੇਵ ਕਰੋਤਿ. ਇਦਂ ਮਾਸਡ੍ਢਮਾਸਮਤ੍ਤਂ ਵਿਤਕ੍ਕਨਂ ਵਿਤਕ੍ਕਸਨ੍ਤੋਸੋ ਨਾਮ. ਵਿਤਕ੍ਕਸਨ੍ਤੋਸੇਨ ਪਨ ਸਨ੍ਤੁਟ੍ਠੇਨ ਭਿਕ੍ਖੁਨਾ ਪਾਚੀਨਖਣ੍ਡਰਾਜਿਵਾਸਿਕਪਂਸੁਕੂਲਿਕਤ੍ਥੇਰਸਦਿਸੇਨ ਭਵਿਤਬ੍ਬਂ.
ਥੇਰੋ ਕਿਰ ‘‘ਚੇਤਿਯਪਬ੍ਬਤਵਿਹਾਰੇ ਚੇਤਿਯਂ ਵਨ੍ਦਿਸ੍ਸਾਮੀ’’ਤਿ ਆਗਤੋ ਚੇਤਿਯਂ ਵਨ੍ਦਿਤ੍ਵਾ ਚਿਨ੍ਤੇਸਿ – ‘‘ਮਯ੍ਹਂ ਚੀਵਰਂ ਜਿਣ੍ਣਂ, ਬਹੂਨਂ ਵਸਨਟ੍ਠਾਨੇ ਲਭਿਸ੍ਸਾਮੀ’’ਤਿ. ਸੋ ਮਹਾਵਿਹਾਰਂ ਗਨ੍ਤ੍ਵਾ ਸਙ੍ਘਤ੍ਥੇਰਂ ਦਿਸ੍ਵਾ ਵਸਨਟ੍ਠਾਨਂ ਪੁਚ੍ਛਿਤ੍ਵਾ ਤਤ੍ਥ ਵੁਤ੍ਥੋ ਪੁਨਦਿਵਸੇ ਚੀਵਰਂ ਆਦਾਯ ਆਗਨ੍ਤ੍ਵਾ ਥੇਰਂ ਵਨ੍ਦਿ. ਥੇਰੋ ‘‘ਕਿਂ, ਆਵੁਸੋ’’ਤਿ ਆਹ. ਗਾਮਦ੍ਵਾਰਂ, ਭਨ੍ਤੇ, ਗਮਿਸ੍ਸਾਮੀਤਿ. ਅਹਮ੍ਪਾਵੁਸੋ, ਗਮਿਸ੍ਸਾਮੀਤਿ. ਸਾਧੁ, ਭਨ੍ਤੇਤਿ ਗਚ੍ਛਨ੍ਤੋ ਮਹਾਬੋਧਿਦ੍ਵਾਰਕੋਟ੍ਠਕੇ ਠਤ੍ਵਾ ‘‘ਪੁਞ੍ਞਵਨ੍ਤਾਨਂ ਵਸਨਟ੍ਠਾਨੇ ਮਨਾਪਂ ਲਭਿਸ੍ਸਾਮੀ’’ਤਿ ਚਿਨ੍ਤੇਤ੍ਵਾ ‘‘ਅਪਰਿਸੁਦ੍ਧੋ ਮੇ ਵਿਤਕ੍ਕੋ’’ਤਿ ਤਤੋਵ ਪਟਿਨਿਵਤ੍ਤਿ. ਪੁਨਦਿਵਸੇ ਅਮ੍ਬਙ੍ਗਣਸਮੀਪਤੋ, ਪੁਨਦਿਵਸੇ ਮਹਾਚੇਤਿਯਸ੍ਸ ਉਤ੍ਤਰਦ੍ਵਾਰਤੋ ਤਤ੍ਥੇਵ ਪਟਿਨਿਵਤ੍ਤਿਤ੍ਵਾ ਚਤੁਤ੍ਥਦਿਵਸੇ ਥੇਰਸ੍ਸ ਸਨ੍ਤਿਕਂ ਅਗਮਾਸਿ. ਥੇਰੋ ‘‘ਇਮਸ੍ਸ ਭਿਕ੍ਖੁਨੋ ਵਿਤਕ੍ਕੋ ਨ ਪਰਿਸੁਦ੍ਧੋ ਭਵਿਸ੍ਸਤੀ’’ਤਿ ਚੀਵਰਂ ਗਹੇਤ੍ਵਾ ਤੇਨ ਸਦ੍ਧਿਂਯੇਵ ਪਞ੍ਹਂ ਪੁਚ੍ਛਮਾਨੋ ਗਾਮਂ ਪਾਵਿਸਿ. ਤਞ੍ਚ ਰਤ੍ਤਿਂ ਏਕੋ ਮਨੁਸ੍ਸੋ ਉਚ੍ਚਾਰਪਲਿਬੁਦ੍ਧੋ ਸਾਟਕੇਯੇਵ ਵਚ੍ਚਂ ਕਤ੍ਵਾ ਤਂ ਸਙ੍ਕਾਰਟ੍ਠਾਨੇ ਛਡ੍ਡੇਸਿ. ਪਂਸੁਕੂਲਿਕਤ੍ਥੇਰੋ ਤਂ ਨੀਲਮਕ੍ਖਿਕਾਹਿ ਸਮ੍ਪਰਿਕਿਣ੍ਣਂ ਦਿਸ੍ਵਾ ਅਞ੍ਜਲਿਂ ਪਗ੍ਗਹੇਸਿ. ਮਹਾਥੇਰੋ ‘‘ਕਿਂ, ਆਵੁਸੋ, ਸਙ੍ਕਾਰਟ੍ਠਾਨਸ੍ਸ ਅਞ੍ਜਲਿਂ ਪਗ੍ਗਣ੍ਹਾਸੀ’’ਤਿ. ਨਾਹਂ, ਭਨ੍ਤੇ, ਸਙ੍ਕਾਰਟ੍ਠਾਨਸ੍ਸ ਅਞ੍ਜਲਿਂ ਪਗ੍ਗਣ੍ਹਾਮਿ, ਮਯ੍ਹਂ ਪਿਤੁ ਦਸਬਲਸ੍ਸ ਪਗ੍ਗਣ੍ਹਾਮਿ, ਪੁਣ੍ਣਦਾਸਿਯਾ ਸਰੀਰਂ ਪਾਰੁਪਿਤ੍ਵਾ ਛਡ੍ਡਿਤਂ ਪਂਸੁਕੂਲਂ ਤੁਮ੍ਬਮਤ੍ਤੇ ਪਾਣਕੇ ਵਿਧੁਨਿਤ੍ਵਾ ਸੁਸਾਨਤੋ ਗਣ੍ਹਨ੍ਤੇਨ ਦੁਕ੍ਕਰਤਰਂ ਕਤਂ, ਭਨ੍ਤੇਤਿ. ਮਹਾਥੇਰੋ ‘‘ਪਰਿਸੁਦ੍ਧੋ ਵਿਤਕ੍ਕੋ ਪਂਸੁਕੂਲਿਕਸ੍ਸਾ’’ਤਿ ਚਿਨ੍ਤੇਸਿ. ਪਂਸੁਕੂਲਿਕਤ੍ਥੇਰੋਪਿ ਤਸ੍ਮਿਂਯੇਵ ਠਾਨੇ ਠਿਤੋ ਵਿਪਸ੍ਸਨਂ ਵਡ੍ਢੇਤ੍ਵਾ ਤੀਣਿ ਫਲਾਨਿ ਪਤ੍ਤੋ ਤਂ ਸਾਟਕਂ ਗਹੇਤ੍ਵਾ ਚੀਵਰਂ ਕਤ੍ਵਾ ਪਾਰੁਪਿਤ੍ਵਾ ਪਾਚੀਨਖਣ੍ਡਰਾਜਿਂ ਗਨ੍ਤ੍ਵਾ ਅਗ੍ਗਫਲਂ ਅਰਹਤ੍ਤਂ ਪਾਪੁਣਿ.
ਚੀਵਰਤ੍ਥਾਯ ਗਚ੍ਛਨ੍ਤਸ੍ਸ ਪਨ ‘‘ਕਤ੍ਥ ਲਭਿਸ੍ਸਾਮੀ’’ਤਿ ਅਚਿਨ੍ਤੇਤ੍ਵਾ ਕਮ੍ਮਟ੍ਠਾਨਸੀਸੇਨੇਵ ਗਮਨਂ ਗਮਨਸਨ੍ਤੋਸੋ ਨਾਮ. ਪਰਿਯੇਸਨ੍ਤਸ੍ਸ ਪਨ ਯੇਨ ਵਾ ਤੇਨ ਵਾ ਸਦ੍ਧਿਂ ਅਪਰਿਯੇਸਿਤ੍ਵਾ ਲਜ੍ਜਿਂ ਪੇਸਲਂ ਭਿਕ੍ਖੁਂ ਗਹੇਤ੍ਵਾ ਪਰਿਯੇਸਨਂ ਪਰਿਯੇਸਨਸਨ੍ਤੋਸੋ ਨਾਮ. ਏਵਂ ਪਰਿਯੇਸਨ੍ਤਸ੍ਸ ਆਹਰਿਯਮਾਨਂ ਚੀਵਰਂ ਦੂਰਤੋ ਦਿਸ੍ਵਾ ‘‘ਏਤਂ ਮਨਾਪਂ ਭਵਿਸ੍ਸਤਿ, ਏਤਂ ਅਮਨਾਪ’’ਨ੍ਤਿ ਏਵਂ ਅਵਿਤਕ੍ਕੇਤ੍ਵਾ ਥੂਲਸੁਖੁਮਾਦੀਸੁ ਯਥਾਲਦ੍ਧੇਨੇਵ ਸਨ੍ਤੁਸ੍ਸਨਂ ਪਟਿਲਾਭਸਨ੍ਤੋਸੋ ਨਾਮ. ਏਵਂ ਲਦ੍ਧਂ ਗਣ੍ਹਨ੍ਤਸ੍ਸਾਪਿ ‘‘ਏਤ੍ਤਕਂ ਦੁਪਟ੍ਟਸ੍ਸ ਭਵਿਸ੍ਸਤਿ, ਏਤ੍ਤਕਂ ਏਕਪਟ੍ਟਸ੍ਸਾ’’ਤਿ ਅਤ੍ਤਨੋ ਪਹੋਨਕਮਤ੍ਤੇਨੇਵ ਸਨ੍ਤੁਸ੍ਸਨਂ ਮਤ੍ਤਪਟਿਗ੍ਗਹਣਸਨ੍ਤੋਸੋ ਨਾਮ. ਚੀਵਰਂ ਪਰਿਯੇਸਨ੍ਤਸ੍ਸ ਪਨ ‘‘ਅਸੁਕਸ੍ਸ ਘਰਦ੍ਵਾਰੇ ਮਨਾਪਂ ਲਭਿਸ੍ਸਾਮੀ’’ਤਿ ਅਚਿਨ੍ਤੇਤ੍ਵਾ ਦ੍ਵਾਰਪਟਿਪਾਟਿਯਾ ਚਰਣਂ ਲੋਲੁਪ੍ਪਵਿਵਜ੍ਜਨਸਨ੍ਤੋਸੋ ਨਾਮ.
ਲੂਖਪਣੀਤੇਸੁ ਯੇਨ ਕੇਨਚਿ ਯਾਪੇਤੁਂ ਸਕ੍ਕੋਨ੍ਤਸ੍ਸ ਯਥਾਲਦ੍ਧੇਨੇਵ ਯਾਪਨਂ ਯਥਾਲਾਭਸਨ੍ਤੋਸੋ ਨਾਮ. ਅਤ੍ਤਨੋ ਥਾਮਂ ਜਾਨਿਤ੍ਵਾ ਯੇਨ ਯਾਪੇਤੁਂ ਸਕ੍ਕੋਤਿ, ਤੇਨ ਯਾਪਨਂ ਯਥਾਬਲਸਨ੍ਤੋਸੋ ਨਾਮ. ਮਨਾਪਂ ਅਞ੍ਞਸ੍ਸ ਦਤ੍ਵਾ ਅਤ੍ਤਨਾ ਯੇਨ ਕੇਨਚਿ ਯਾਪਨਂ ਯਥਾਸਾਰੁਪ੍ਪਸਨ੍ਤੋਸੋ ਨਾਮ.
‘‘ਕਤ੍ਥ ਉਦਕਂ ਮਨਾਪਂ, ਕਤ੍ਥ ਅਮਨਾਪ’’ਨ੍ਤਿ ਅਵਿਚਾਰੇਤ੍ਵਾ ਯੇਨ ਕੇਨਚਿ ਧੋਵਨੂਪਗੇਨ ਉਦਕੇਨ ਧੋਵਨਂ ਉਦਕਸਨ੍ਤੋਸੋ ਨਾਮ. ਪਣ੍ਡੁਮਤ੍ਤਿਕਗੇਰੁਕਪੂਤਿਪਣ੍ਣਰਸਕਿਲਿਟ੍ਠਾਨਿ ਪਨ ਉਦਕਾਨਿ ਵਜ੍ਜੇਤੁਂ ਵਟ੍ਟਤਿ. ਧੋਵਨ੍ਤਸ੍ਸ ਪਨ ਮੁਗ੍ਗਰਾਦੀਹਿ ਅਪਹਰਿਤ੍ਵਾ ਹਤ੍ਥੇਹਿ ਮਦ੍ਦਿਤ੍ਵਾ ਧੋਵਨਂ ਧੋਵਨਸਨ੍ਤੋਸੋ ਨਾਮ. ਤਥਾ ਅਸੁਜ੍ਝਨ੍ਤਂ ਪਣ੍ਣਾਨਿ ਪਕ੍ਖਿਪਿਤ੍ਵਾ ਤਾਪਿਤਉਦਕੇਨਾਪਿ ਧੋਵਿਤੁਂ ਵਟ੍ਟਤਿ. ਏਵਂ ਧੋਵਿਤ੍ਵਾ ਕਰੋਨ੍ਤਸ੍ਸ ‘‘ਇਦਂ ਥੂਲਂ, ਇਦਂ ਸੁਖੁਮ’’ਨ੍ਤਿ ਅਕੋਪੇਤ੍ਵਾ ਪਹੋਨਕਨੀਹਾਰੇਨੇਵ ਕਰਣਂ ਕਰਣਸਨ੍ਤੋਸੋ ਨਾਮ. ਤਿਮਣ੍ਡਲਪਤਿਚ੍ਛਾਦਨਮਤ੍ਤਸ੍ਸੇਵ ਕਰਣਂ ਪਰਿਮਾਣਸਨ੍ਤੋਸੋ ਨਾਮ. ਚੀਵਰਕਰਣਤ੍ਥਾਯ ਪਨ ਮਨਾਪਂ ਸੁਤ੍ਤਂ ਪਰਿਯੇਸਿਸ੍ਸਾਮੀਤਿ ਅਵਿਚਾਰੇਤ੍ਵਾ ਰਥਿਕਾਦੀਸੁ ਵਾ ਦੇਵਟ੍ਠਾਨੇ ਵਾ ਆਹਰਿਤ੍ਵਾ ਪਾਦਮੂਲੇ ਵਾ ਠਪਿਤਂ ਯਂਕਿਞ੍ਚਿਦੇਵ ਸੁਤ੍ਤਂ ਗਹੇਤ੍ਵਾ ਕਰਣਂ ਸੁਤ੍ਤਸਨ੍ਤੋਸੋ ਨਾਮ.
ਕੁਸਿਬਨ੍ਧਨਕਾਲੇ ਪਨ ਅਙ੍ਗੁਲਮਤ੍ਤੇ ਸਤ੍ਤ ਵਾਰੇ ਨ ਵਿਜ੍ਝਿਤਬ੍ਬਂ. ਏਵਂ ਕਰੋਨ੍ਤਸ੍ਸ ਹਿ ਯੋ ਭਿਕ੍ਖੁ ਸਹਾਯੋ ਨ ਹੋਤਿ, ਤਸ੍ਸ ਵਤ੍ਤਭੇਦੋਪਿ ਨਤ੍ਥਿ. ਤਿਵਙ੍ਗੁਲਮਤ੍ਤੇ ਪਨ ਸਤ੍ਤ ਵਾਰੇ ਵਿਜ੍ਝਿਤਬ੍ਬਂ. ਏਵਂ ਕਰੋਨ੍ਤਸ੍ਸ ਮਗ੍ਗਪ੍ਪਟਿਪਨ੍ਨੇਨਾਪਿ ਸਹਾਯੇਨ ਭਵਿਤਬ੍ਬਂ. ਯੋ ਨ ਹੋਤਿ, ਤਸ੍ਸ ਵਤ੍ਤਭੇਦੋ. ਅਯਂ ਸਿਬ੍ਬਨਸਨ੍ਤੋਸੋ ਨਾਮ. ਰਜਨ੍ਤੇਨ ਪਨ ਕਾਲ਼ਕਚ੍ਛਕਾਦੀਨਿ ਪਰਿਯੇਸਨ੍ਤੇਨ ਨ ਚਰਿਤਬ੍ਬਂ, ਸੋਮਵਕ੍ਕਲਾਦੀਸੁ ਯਂ ਲਭਤਿ, ਤੇਨ ਰਜਿਤਬ੍ਬਂ. ਅਲਭਨ੍ਤੇਨ ਪਨ ਮਨੁਸ੍ਸੇਹਿ ਅਰਞ੍ਞੇ ਵਾਕਂ ਗਹੇਤ੍ਵਾ ਛਡ੍ਡਿਤਰਜਨਂ ਵਾ ਭਿਕ੍ਖੂਹਿ ਪਚਿਤ੍ਵਾ ਛਡ੍ਡਿਤਕਸਟਂ ਵਾ ਗਹੇਤ੍ਵਾ ਰਜਿਤਬ੍ਬਂ. ਅਯਂ ਰਜਨਸਨ੍ਤੋਸੋ ਨਾਮ. ਨੀਲਕਦ੍ਦਮਕਾਲ਼ਸਾਮੇਸੁ ਯਂਕਿਞ੍ਚਿ ਗਹੇਤ੍ਵਾ ਹਤ੍ਥਿਪਿਟ੍ਠੇ ਨਿਸਿਨ੍ਨਸ੍ਸ ਪਞ੍ਞਾਯਮਾਨਕਪ੍ਪਕਰਣਂ ਕਪ੍ਪਸਨ੍ਤੋਸੋ ਨਾਮ.
ਹਿਰਿਕੋਪੀਨਪ੍ਪਟਿਚ੍ਛਾਦਨਮਤ੍ਤਵਸੇਨ ਪਰਿਭੁਞ੍ਜਨਂ ਪਰਿਭੋਗਸਨ੍ਤੋਸੋ ਨਾਮ. ਦੁਸ੍ਸਂ ਪਨ ਲਭਿਤ੍ਵਾ ਸੁਤ੍ਤਂ ਵਾ ਸੂਚਿਂ ਵਾ ਕਾਰਕਂ ਵਾ ਅਲਭਨ੍ਤੇਨ ਠਪੇਤੁਂ ਵਟ੍ਟਤਿ, ਲਭਨ੍ਤੇਨ ਨ ਵਟ੍ਟਤਿ. ਕਤਮ੍ਪਿ ਸਚੇ ਅਨ੍ਤੇਵਾਸਿਕਾਦੀਨਂ ਦਾਤੁਕਾਮੋ ਹੋਤਿ, ਤੇ ਚ ਅਸਨ੍ਨਿਹਿਤਾ, ਯਾਵ ਆਗਮਨਾ ਠਪੇਤੁਂ ਵਟ੍ਟਤਿ. ਆਗਤਮਤ੍ਤੇਸੁ ਦਾਤਬ੍ਬਂ. ਦਾਤੁਂ ਅਸਕ੍ਕੋਨ੍ਤੇਨ ਅਧਿਟ੍ਠਾਤਬ੍ਬਂ. ਅਞ੍ਞਸ੍ਮਿਂ ਚੀਵਰੇ ਸਤਿ ਪਚ੍ਚਤ੍ਥਰਣਮ੍ਪਿ ਅਧਿਟ੍ਠਾਤੁਂ ਵਟ੍ਟਤਿ. ਅਨਧਿਟ੍ਠਿਤਮੇਵ ਹਿ ਸਨ੍ਨਿਧਿ ਹੋਤਿ, ਅਧਿਟ੍ਠਿਤਂ ਨ ਹੋਤੀਤਿ ਮਹਾਸੀਵਤ੍ਥੇਰੋ ਆਹ. ਅਯਂ ਸਨ੍ਨਿਧਿਪਰਿਵਜ੍ਜਨਸਨ੍ਤੋਸੋ ਨਾਮ. ਵਿਸ੍ਸਜ੍ਜੇਨ੍ਤੇਨ ਪਨ ਨ ਮੁਖਂ ਓਲੋਕੇਤ੍ਵਾ ਦਾਤਬ੍ਬਂ, ਸਾਰਣੀਯਧਮ੍ਮੇ ਠਤ੍ਵਾ ਵਿਸ੍ਸਜ੍ਜੇਤਬ੍ਬਨ੍ਤਿ ਅਯਂ ਵਿਸ੍ਸਜ੍ਜਨਸਨ੍ਤੋਸੋ ਨਾਮ.
ਚੀਵਰਪ੍ਪਟਿਸਂਯੁਤ੍ਤਾਨਿ ਧੁਤਙ੍ਗਾਨਿ ਨਾਮ ਪਂਸੁਕੂਲਿਕਙ੍ਗਞ੍ਚੇਵ ਤੇਚੀਵਰਿਕਙ੍ਗਞ੍ਚ. ਤੇਸਂ ਵਿਤ੍ਥਾਰਕਥਾ ਵਿਸੁਦ੍ਧਿਮਗ੍ਗੇ (ਵਿਸੁਦ੍ਧਿ. ੧.੨੪-੨੫) ਵੇਦਿਤਬ੍ਬਾ. ਇਤਿ ਚੀਵਰਸਨ੍ਤੋਸਮਹਾਅਰਿਯਵਂਸਂ ਪੂਰਯਮਾਨੋ ਭਿਕ੍ਖੁ ਇਮਾਨਿ ਦ੍ਵੇ ਧੁਤਙ੍ਗਾਨਿ ਗੋਪੇਤਿ. ਇਮਾਨਿ ਗੋਪੇਨ੍ਤੋ ਚੀਵਰਸਨ੍ਤੋਸਮਹਾਅਰਿਯਵਂਸਵਸੇਨ ਸਨ੍ਤੁਟ੍ਠੋ ਹੋਤੀਤਿ.
ਵਣ੍ਣਵਾਦੀਤਿ ਏਕੋ ਸਨ੍ਤੁਟ੍ਠੋ ਹੋਤਿ, ਸਨ੍ਤੋਸਸ੍ਸ ਵਣ੍ਣਂ ਨ ਕਥੇਤਿ. ਏਕੋ ਨ ਸਨ੍ਤੁਟ੍ਠੋ ਹੋਤਿ, ਸਨ੍ਤੋਸਸ੍ਸ ਵਣ੍ਣਂ ਕਥੇਤਿ. ਏਕੋ ਨੇਵ ਸਨ੍ਤੁਟ੍ਠੋ ਹੋਤਿ, ਨ ਸਨ੍ਤੋਸਸ੍ਸ ਵਣ੍ਣਂ ਕਥੇਤਿ. ਏਕੋ ਸਨ੍ਤੁਟ੍ਠੋ ਚੇਵ ਹੋਤਿ, ਸਨ੍ਤੋਸਸ੍ਸ ਚ ਵਣ੍ਣਂ ਕਥੇਤਿ. ਤਂ ਦਸ੍ਸੇਤੁਂ ‘‘ਇਤਰੀਤਰਚੀਵਰਸਨ੍ਤੁਟ੍ਠਿਯਾ ਚ ਵਣ੍ਣਵਾਦੀ’’ਤਿ ਵੁਤ੍ਤਂ.
ਅਨੇਸਨਨ੍ਤਿ ਦੂਤੇਯ੍ਯਪਹਿਨਗਮਨਾਨੁਯੋਗਪਭੇਦਂ ਨਾਨਪ੍ਪਕਾਰਂ ਅਨੇਸਨਂ. ਅਪ੍ਪਤਿਰੂਪਨ੍ਤਿ ਅਯੁਤ੍ਤਂ. ਅਲਦ੍ਧਾ ਚਾਤਿ ਅਲਭਿਤ੍ਵਾ. ਯਥਾ ਏਕਚ੍ਚੋ ‘‘ਕਥਂ ਨੁ ਖੋ ਚੀਵਰਂ ਲਭਿਸ੍ਸਾਮੀ’’ਤਿ ਪੁਞ੍ਞਵਨ੍ਤੇਹਿ ਭਿਕ੍ਖੂਹਿ ਸਦ੍ਧਿਂ ਏਕਤੋ ਹੁਤ੍ਵਾ ਕੋਹਞ੍ਞਂ ਕਰੋਨ੍ਤੋ ਉਤ੍ਤਸਤਿ ਪਰਿਤਸ੍ਸਤਿ, ਸਨ੍ਤੁਟ੍ਠੋ ਭਿਕ੍ਖੁ ਏਵਂ ਅਲਦ੍ਧਾ ਚੀਵਰਂ ਨ ਪਰਿਤਸ੍ਸਤਿ. ਲਦ੍ਧਾ ਚਾਤਿ ਧਮ੍ਮੇਨ ਸਮੇਨ ਲਭਿਤ੍ਵਾ. ਅਗਧਿਤੋਤਿ ਵਿਗਤਲੋਭਗਿਦ੍ਧੋ. ਅਮੁਚ੍ਛਿਤੋਤਿ ਅਧਿਮਤ੍ਤਤਣ੍ਹਾਯ ਮੁਚ੍ਛਂ ਅਨਾਪਨ੍ਨੋ. ਅਨਜ੍ਝੋਪਨ੍ਨੋਤਿ ਤਣ੍ਹਾਯ ਅਨੋਤ੍ਥਤੋ ਅਪਰਿਯੋਨਦ੍ਧੋ. ਆਦੀਨਵਦਸ੍ਸਾਵੀਤਿ ਅਨੇਸਨਾਪਤ੍ਤਿਯਞ੍ਚ ਗੇਧਿਤਪਰਿਭੋਗੇ ਚ ਆਦੀਨਵਂ ਪਸ੍ਸਮਾਨੋ. ਨਿਸ੍ਸਰਣਪਞ੍ਞੋਤਿ ‘‘ਯਾਵਦੇਵ ਸੀਤਸ੍ਸ ਪਟਿਘਾਤਾਯਾ’’ਤਿ ਵੁਤ੍ਤਂ ਨਿਸ੍ਸਰਣਮੇਵ ਪਜਾਨਨ੍ਤੋ.
ਇਤਰੀਤਰਚੀਵਰਸਨ੍ਤੁਟ੍ਠਿਯਾਤਿ ਯੇਨ ਕੇਨਚਿ ਚੀਵਰੇਨ ਸਨ੍ਤੁਟ੍ਠਿਯਾ. ਨੇਵਤ੍ਤਾਨੁਕ੍ਕਂਸੇਤੀਤਿ ‘‘ਅਹਂ ਪਂਸੁਕੂਲਿਕੋ, ਮਯਾ ਉਪਸਮ੍ਪਦਮਾਲ਼ੇਯੇਵ ਪਂਸੁਕੂਲਿਕਙ੍ਗਂ ਗਹਿਤਂ, ਕੋ ਮਯਾ ਸਦਿਸੋ ਅਤ੍ਥੀ’’ਤਿ ਅਤ੍ਤੁਕ੍ਕਂਸਨਂ ਨ ਕਰੋਤਿ. ਨੋ ਪਰਂ ਵਮ੍ਭੇਤੀਤਿ ‘‘ਇਮੇ ਪਨਞ੍ਞੇ ਭਿਕ੍ਖੂ ਨ ਪਂਸੁਕੂਲਿਕਾ’’ਤਿ ਵਾ, ‘‘ਪਂਸੁਕੂਲਿਕਙ੍ਗਮਤ੍ਤਮ੍ਪਿ ਏਤੇਸਂ ਨਤ੍ਥੀ’’ਤਿ ਵਾ ਏਵਂ ਪਰਂ ਨ ਵਮ੍ਭੇਤਿ. ਯੋ ਹਿ ਤਤ੍ਥ ਦਕ੍ਖੋਤਿ ਯੋ ਤਸ੍ਮਿਂ ਚੀਵਰਸਨ੍ਤੋਸੇ ਵਣ੍ਣਵਾਦਾਦੀਸੁ ਵਾ ਦਕ੍ਖੋ ਛੇਕੋ ਬ੍ਯਤ੍ਤੋ. ਅਨਲਸੋਤਿ ਸਾਤਚ੍ਚਕਿਰਿਯਾਯ ਆਲਸਿਯਵਿਰਹਿਤੋ. ਸਮ੍ਪਜਾਨੋ ਪਟਿਸ੍ਸਤੋਤਿ ਸਮ੍ਪਜਾਨਪਞ੍ਞਾਯ ਚੇਵ ਸਤਿਯਾ ਚ ਯੁਤ੍ਤੋ. ਅਰਿਯਵਂਸੇ ਠਿਤੋਤਿ ਅਰਿਯਵਂਸੇ ਪਤਿਟ੍ਠਿਤੋ.
ਇਤਰੀਤਰੇਨ ਪਿਣ੍ਡਪਾਤੇਨਾਤਿ ਯੇਨ ਕੇਨਚਿ ਪਿਣ੍ਡਪਾਤੇਨ. ਏਤ੍ਥਾਪਿ ਪਿਣ੍ਡਪਾਤੋ ਜਾਨਿਤਬ੍ਬੋ, ਪਿਣ੍ਡਪਾਤਕ੍ਖੇਤ੍ਤਂ ਜਾਨਿਤਬ੍ਬਂ, ਪਿਣ੍ਡਪਾਤਸਨ੍ਤੋਸੋ ਜਾਨਿਤਬ੍ਬੋ, ਪਿਣ੍ਡਪਾਤਪ੍ਪਟਿਸਂਯੁਤ੍ਤਂ ਧੁਤਙ੍ਗਂ ਜਾਨਿਤਬ੍ਬਂ. ਤਤ੍ਥ ਪਿਣ੍ਡਪਾਤੋਤਿ ਓਦਨੋ ਕੁਮ੍ਮਾਸੋ ਸਤ੍ਤੁ ਮਚ੍ਛੋ ਮਂਸਂ ਖੀਰਂ ਦਧਿ ਸਪ੍ਪਿ ਨਵਨੀਤਂ ਤੇਲਂ ਮਧੁ ਫਾਣਿਤਂ ਯਾਗੁ ਖਾਦਨੀਯਂ ਸਾਯਨੀਯਂ ਲੇਹਨੀਯਨ੍ਤਿ ਸੋਲ਼ਸ ਪਿਣ੍ਡਪਾਤਾ.
ਪਿਣ੍ਡਪਾਤਕ੍ਖੇਤ੍ਤਨ੍ਤਿ ਸਙ੍ਘਭਤ੍ਤਂ ਉਦ੍ਦੇਸਭਤ੍ਤਂ ਨਿਮਨ੍ਤਨਂ ਸਲਾਕਭਤ੍ਤਂ ਪਕ੍ਖਿਕਂ ਉਪੋਸਥਿਕਂ ਪਾਟਿਪਦਿਕਭਤ੍ਤਂ ਆਗਨ੍ਤੁਕਭਤ੍ਤਂ ਗਮਿਕਭਤ੍ਤਂ ਗਿਲਾਨਭਤ੍ਤਂ ਗਿਲਾਨੁਪਟ੍ਠਾਕਭਤ੍ਤਂ ਧੁਰਭਤ੍ਤਂ ਕੁਟਿਭਤ੍ਤਂ ਵਾਰਭਤ੍ਤਂ ਵਿਹਾਰਭਤ੍ਤਨ੍ਤਿ ਪਨ੍ਨਰਸ ਪਿਣ੍ਡਪਾਤਕ੍ਖੇਤ੍ਤਾਨਿ.
ਪਿਣ੍ਡਪਾਤਸਨ੍ਤੋਸੋਤਿ ਪਿਣ੍ਡਪਾਤੇ ਵਿਤਕ੍ਕਸਨ੍ਤੋਸੋ ਗਮਨਸਨ੍ਤੋਸੋ ਪਰਿਯੇਸਨਸਨ੍ਤੋਸੋ ਪਟਿਲਾਭਸਨ੍ਤੋਸੋ ਪਟਿਗ੍ਗਹਣਸਨ੍ਤੋਸੋ ਮਤ੍ਤਪਟਿਗ੍ਗਹਣਸਨ੍ਤੋਸੋ ਲੋਲੁਪ੍ਪਵਿਵਜ੍ਜਨਸਨ੍ਤੋਸੋ ਯਥਾਲਾਭਸਨ੍ਤੋਸੋ ਯਥਾਬਲਸਨ੍ਤੋਸੋ ਯਥਾਸਾਰੁਪ੍ਪਸਨ੍ਤੋਸੋ ਉਪਕਾਰਸਨ੍ਤੋਸੋ ਪਰਿਮਾਣਸਨ੍ਤੋਸੋ ਪਰਿਭੋਗਸਨ੍ਤੋਸੋ ਸਨ੍ਨਿਧਿਪਰਿਵਜ੍ਜਨਸਨ੍ਤੋਸੋ ਵਿਸ੍ਸਜ੍ਜਨਸਨ੍ਤੋਸੋਤਿ ਪਨ੍ਨਰਸ ਸਨ੍ਤੋਸਾ.
ਤਤ੍ਥ ਸਾਦਕੋ ਭਿਕ੍ਖੁ ਮੁਖਂ ਧੋਵਿਤ੍ਵਾ ਵਿਤਕ੍ਕੇਤਿ. ਪਿਣ੍ਡਪਾਤਿਕੇਨ ਪਨ ਗਣੇਨ ਸਦ੍ਧਿਂ ਚਰਤਾ ਸਾਯਂ ਥੇਰੂਪਟ੍ਠਾਨਕਾਲੇ ‘‘ਸ੍ਵੇ ਕਤ੍ਥ ਪਿਣ੍ਡਾਯ ਚਰਿਸ੍ਸਾਮਾਤਿ? ਅਸੁਕਗਾਮੇ, ਭਨ੍ਤੇ’’ਤਿ ਏਤ੍ਤਕਂ ਚਿਨ੍ਤੇਤ੍ਵਾ ਤਤੋ ਪਟ੍ਠਾਯ ਨ ਵਿਤਕ੍ਕੇਤਬ੍ਬਂ. ਏਕਚਾਰਿਕੇਨ ਵਿਤਕ੍ਕਮਾਲ਼ਕੇ ਠਤ੍ਵਾ ਵਿਤਕ੍ਕੇਤਬ੍ਬਂ. ਤਤੋ ਪਟ੍ਠਾਯ ਵਿਤਕ੍ਕੇਨ੍ਤੋ ਅਰਿਯਵਂਸਾ ਚੁਤੋ ਹੋਤਿ ਪਰਿਬਾਹਿਰੋ. ਅਯਂ ਵਿਤਕ੍ਕਸਨ੍ਤੋਸੋ ਨਾਮ.
ਪਿਣ੍ਡਾਯ ਪਵਿਸਨ੍ਤੇਨ ‘‘ਕੁਹਿਂ ਲਭਿਸ੍ਸਾਮੀ’’ਤਿ ਅਚਿਨ੍ਤੇਤ੍ਵਾ ਕਮ੍ਮਟ੍ਠਾਨਸੀਸੇਨ ਗਨ੍ਤਬ੍ਬਂ. ਅਯਂ ਗਮਨਸਨ੍ਤੋਸੋ ਨਾਮ. ਪਰਿਯੇਸਨ੍ਤੇਨ ਯਂ ਵਾ ਤਂ ਵਾ ਅਗ੍ਗਹੇਤ੍ਵਾ ਲਜ੍ਜਿਂ ਪੇਸਲਮੇਵ ਗਹੇਤ੍ਵਾ ਪਰਿਯੇਸਿਤਬ੍ਬਂ. ਅਯਂ ਪਰਿਯੇਸਨਸਨ੍ਤੋਸੋ ਨਾਮ. ਦੂਰਤੋਵ ਆਹਰਿਯਮਾਨਂ ਦਿਸ੍ਵਾ ‘‘ਏਤਂ ਮਨਾਪਂ, ਏਤਂ ਅਮਨਾਪ’’ਨ੍ਤਿ ਚਿਤ੍ਤਂ ਨ ਉਪ੍ਪਾਦੇਤਬ੍ਬਂ. ਅਯਂ ਪਟਿਲਾਭਸਨ੍ਤੋਸੋ ਨਾਮ. ‘‘ਇਮਂ ਮਨਾਪਂ ਗਣ੍ਹਿਸ੍ਸਾਮਿ, ਇਮਂ ਅਮਨਾਪਂ ਨ ਗਣ੍ਹਿਸ੍ਸਾਮੀ’’ਤਿ ਅਚਿਨ੍ਤੇਤ੍ਵਾ ਯਂਕਿਞ੍ਚਿ ਯਾਪਨਮਤ੍ਤਂ ਗਹੇਤਬ੍ਬਮੇਵ. ਅਯਂ ਪਟਿਗ੍ਗਹਣਸਨ੍ਤੋਸੋ ਨਾਮ.
ਏਤ੍ਥ ਪਨ ਦੇਯ੍ਯਧਮ੍ਮੋ ਬਹੁ, ਦਾਯਕੋ ਅਪ੍ਪਂ ਦਾਤੁਕਾਮੋ, ਅਪ੍ਪਂ ਗਹੇਤਬ੍ਬਂ. ਦੇਯ੍ਯਧਮ੍ਮੋਪਿ ਬਹੁ, ਦਾਯਕੋਪਿ ਬਹੁਂ ਦਾਤੁਕਾਮੋ, ਪਮਾਣੇਨੇਵ ਗਹੇਤਬ੍ਬਂ. ਦੇਯ੍ਯਧਮ੍ਮੋ ਨ ਬਹੁ, ਦਾਯਕੋਪਿ ਅਪ੍ਪਂ ਦਾਤੁਕਾਮੋ, ਅਪ੍ਪਂ ਗਹੇਤਬ੍ਬਂ. ਦੇਯ੍ਯਧਮ੍ਮੋ ਨ ਬਹੁ, ਦਾਯਕੋ ਪਨ ਬਹੁਂ ਦਾਤੁਕਾਮੋ, ਪਮਾਣੇਨ ਗਹੇਤਬ੍ਬਂ. ਪਟਿਗ੍ਗਹਣਸ੍ਮਿਞ੍ਹਿ ਮਤ੍ਤਂ ਅਜਾਨਨ੍ਤੋ ਮਨੁਸ੍ਸਾਨਂ ਪਸਾਦਂ ਮਕ੍ਖੇਤਿ, ਸਦ੍ਧਾਦੇਯ੍ਯਂ ਵਿਨਿਪਾਤੇਤਿ, ਸਾਸਨਂ ਨ ਕਰੋਤਿ, ਵਿਜਾਤਮਾਤੁਯਾਪਿ ਚਿਤ੍ਤਂ ਗਹੇਤੁਂ ਨ ਸਕ੍ਕੋਤਿ. ਇਤਿ ਮਤ੍ਤਂ ਜਾਨਿਤ੍ਵਾਵ ਪਟਿਗ੍ਗਹੇਤਬ੍ਬਨ੍ਤਿ ਅਯਂ ਮਤ੍ਤਪਟਿਗ੍ਗਹਣਸਨ੍ਤੋਸੋ ਨਾਮ. ਅਡ੍ਢਕੁਲਾਨਿਯੇਵ ਅਗਨ੍ਤ੍ਵਾ ਦ੍ਵਾਰਪਟਿਪਾਟਿਯਾ ਗਨ੍ਤਬ੍ਬਂ. ਅਯਂ ਲੋਲੁਪ੍ਪਵਿਵਜ੍ਜਨਸਨ੍ਤੋਸੋ ਨਾਮ. ਯਥਾਲਾਭਸਨ੍ਤੋਸਾਦਯੋ ਚੀਵਰੇ ਵੁਤ੍ਤਨਯਾ ਏਵ.