੨. ਦੁਤਿਯਪਣ੍ਣਾਸਕਂ
(੬) ੧. ਪੁਞ੍ਞਾਭਿਸਨ੍ਦਵਗ੍ਗੋ
੧. ਪਠਮਪੁਞ੍ਞਾਭਿਸਨ੍ਦਸੁਤ੍ਤਵਣ੍ਣਨਾ
੫੧. ਦੁਤਿਯਸ੍ਸ ਪਠਮੇ ਪੁਞ੍ਞਾਭਿਸਨ੍ਦਾਤਿ ਪੁਞ੍ਞਸ੍ਸ ਅਭਿਸਨ੍ਦਾ, ਪੁਞ੍ਞਪ੍ਪਤ੍ਤਿਯੋਤਿ ਅਤ੍ਥੋ. ਕੁਸਲਾਭਿਸਨ੍ਦਾਤਿ ਤਸ੍ਸੇਵ ਵੇਵਚਨਂ. ਤੇ ਪਨੇਤੇ ਸੁਖਂ ਆਹਰਨ੍ਤੀਤਿ ਸੁਖਸ੍ਸਾਹਾਰਾ. ਸੁਟ੍ਠੁ ਅਗ੍ਗਾਨਂ ਰੂਪਾਦੀਨਂ ਦਾਯਕਾਤਿ ਸੋਵਗ੍ਗਿਕਾ. ਸੁਖੋ ਨੇਸਂ ਵਿਪਾਕੋਤਿ ਸੁਖਵਿਪਾਕਾ. ਸਗ੍ਗੇ ਉਪਪਤ੍ਤਿ ਸਗ੍ਗੋ, ਸਗ੍ਗਾਯ ਸਂਵਤ੍ਤਨ੍ਤੀਤਿ ਸਗ੍ਗਸਂਵਤ੍ਤਨਿਕਾ. ਚੀਵਰਂ ਪਰਿਭੁਞ੍ਜਮਾਨੋਤਿ ਚੀਵਰਤ੍ਥਾਯ ਵਤ੍ਥਂ ਲਭਿਤ੍ਵਾ ਸੂਚਿਸੁਤ੍ਤਾਦੀਨਂ ਅਭਾਵੇਨ ਤਂ ਨਿਕ੍ਖਿਪਨ੍ਤੋਪਿ ਕਰੋਨ੍ਤੋਪਿ ਪਾਰੁਪਨ੍ਤੋਪਿ ਜਿਣ੍ਣਕਾਲੇ ਪਚ੍ਚਤ੍ਥਰਣਂ ਕਰੋਨ੍ਤੋਪਿ ਪਚ੍ਚਤ੍ਥਰਿਤੁਮ੍ਪਿ ਅਸਕ੍ਕੁਣੇਯ੍ਯਂ ਭੂਮਤ੍ਥਰਣਂ ਕਰੋਨ੍ਤੋਪਿ ਭੂਮਤ੍ਥਰਣਸ੍ਸ ਅਨਨੁਚ੍ਛਵਿਕਂ ਫਾਲੇਤ੍ਵਾ ਪਾਦਪੁਞ੍ਛਨਂ ਕਰੋਨ੍ਤੋਪਿ ‘‘ਪਰਿਭੁਞ੍ਜਮਾਨੋ’’ਤ੍ਵੇਵ ਵੁਚ੍ਚਤਿ. ਯਦਾ ਪਨ ‘‘ਪਾਦਪੁਞ੍ਛਨਮ੍ਪਿ ਨ ਸਕ੍ਕਾ ਇਦ’’ਨ੍ਤਿ ਸਮ੍ਮਜ੍ਜਿਤ੍ਵਾ ਛਡ੍ਡਿਤਂ ਹੋਤਿ, ਤਦਾ ਪਰਿਭੁਞ੍ਜਮਾਨੋ ਨਾਮ ਨ ਹੋਤਿ. ਅਪ੍ਪਮਾਣਂ ਚੇਤੋਸਮਾਧਿਨ੍ਤਿ ਅਰਹਤ੍ਤਫਲਸਮਾਧਿਂ. ਅਪ੍ਪਮਾਣੋ ਤਸ੍ਸ ਪੁਞ੍ਞਾਭਿਸਨ੍ਦੋਤਿ ਇਮਿਨਾ ਦਾਯਕਸ੍ਸ ਪੁਞ੍ਞਚੇਤਨਾਯ ਅਪ੍ਪਮਾਣਤਂ ਕਥੇਤਿ. ਤਸ੍ਸ ਹਿ ‘‘ਖੀਣਾਸਵੋ ਮੇ ਚੀਵਰਂ ਪਰਿਭੁਞ੍ਜਤੀ’’ਤਿ ਪੁਨਪ੍ਪੁਨਂ ਅਨੁਸ੍ਸਰਣਵਸੇਨ ਪਵਤ੍ਤਾ ਪੁਞ੍ਞਚੇਤਨਾ ਅਪ੍ਪਮਾਣਾ ਹੋਤਿ. ਤਂ ਸਨ੍ਧਾਯੇਤਂ ਵੁਤ੍ਤਂ. ਪਿਣ੍ਡਪਾਤਾਦੀਸੁ ਪਨ ਯੋ ਪਿਣ੍ਡਪਾਤਂ ਪਰਿਭੁਞ੍ਜਿਤ੍ਵਾ ਸਤ੍ਤਾਹਮ੍ਪਿ ਤੇਨੇਵ ਯਾਪੇਤਿ, ਅਞ੍ਞਂ ਨ ਪਰਿਭੁਞ੍ਜਤਿ, ਸੋ ਸਤ੍ਤਾਹਮ੍ਪਿ ਤਂਯੇਵ ਪਿਣ੍ਡਪਾਤਂ ਪਰਿਭੁਞ੍ਜਮਾਨੋ ਨਾਮ ਹੋਤਿ. ਏਕਸ੍ਮਿਂ ਪਨ ਸੇਨਾਸਨੇ ਰਤ੍ਤਿਟ੍ਠਾਨਦਿਵਾਟ੍ਠਾਨਾਦੀਸੁ ਚਙ੍ਕਮਨ੍ਤੋਪਿ ਯਾਵ ਤਂ ਸੇਨਾਸਨਂ ਪਹਾਯ ਅਞ੍ਞਂ ਨ ਗਣ੍ਹਾਤਿ, ਤਾਵ ਪਰਿਭੁਞ੍ਜਮਾਨੋ ਨਾਮ ਹੋਤਿ. ਏਕੇਨ ਪਨ ਭੇਸਜ੍ਜੇਨ ਬ੍ਯਾਧਿਮ੍ਹਿ ਵੂਪਸਨ੍ਤੇ ਯਾਵ ਅਞ੍ਞਂ ਭੇਸਜ੍ਜਂ ਨ ਪਰਿਭੁਞ੍ਜਤਿ, ਤਾਵਦੇਵ ਪਰਿਭੁਞ੍ਜਮਾਨੋ ਨਾਮ ਹੋਤਿ.
ਬਹੁਭੇਰਵਨ੍ਤਿ ਬਹੂਹਿ ਭੇਰਵਾਰਮ੍ਮਣੇਹਿ ਸਮਨ੍ਨਾਗਤਂ. ਰਤਨਵਰਾਨਨ੍ਤਿ ਸਤ੍ਤਨ੍ਨਮ੍ਪਿ ਵਰਰਤਨਾਨਂ. ਆਲਯਨ੍ਤਿ ਨਿਵਾਸਟ੍ਠਾਨਂ. ਪੁਥੂ ਸਵਨ੍ਤੀਤਿ ਬਹੁਕਾ ਹੁਤ੍ਵਾ ਸਨ੍ਦਮਾਨਾ. ਸੇਸਮੇਤ੍ਥ ਉਤ੍ਤਾਨਮੇਵ.
੨. ਦੁਤਿਯਪੁਞ੍ਞਾਭਿਸਨ੍ਦਸੁਤ੍ਤਵਣ੍ਣਨਾ
੫੨. ਦੁਤਿਯੇ ਅਰਿਯਕਨ੍ਤੇਹੀਤਿ ਮਗ੍ਗਫਲਸਮ੍ਪਯੁਤ੍ਤੇਹਿ. ਤਾਨਿ ਹਿ ਅਰਿਯਾਨਂ ਕਨ੍ਤਾਨਿ ਹੋਨ੍ਤਿ ਪਿਯਾਨਿ ਮਨਾਪਾਨਿ. ਸੇਸਂ ਸੁਤ੍ਤਨ੍ਤੇ ਤਾਵ ਯਂ ਵਤ੍ਤਬ੍ਬਂ ਸਿਯਾ, ਤਂ ਵਿਸੁਦ੍ਧਿਮਗ੍ਗੇ (ਵਿਸੁਦ੍ਧਿ. ੧.੧੨੪ ਆਦਯੋ) ਵੁਤ੍ਤਮੇਵ.
ਗਾਥਾਸੁ ਪਨ ਸਦ੍ਧਾਤਿ ਸੋਤਾਪਨ੍ਨਸ੍ਸ ਸਦ੍ਧਾ ਅਧਿਪ੍ਪੇਤਾ. ਸੀਲਮ੍ਪਿ ਸੋਤਾਪਨ੍ਨਸ੍ਸ ਸੀਲਮੇਵ. ਉਜੁਭੂਤਞ੍ਚ ਦਸ੍ਸਨਨ੍ਤਿ ਕਾਯਵਙ੍ਕਾਦੀਨਂ ਅਭਾਵੇਨ ਖੀਣਾਸਵਸ੍ਸ ਦਸ੍ਸਨਂ ਉਜੁਭੂਤਦਸ੍ਸਨਂ ਨਾਮ. ਆਹੂਤਿ ਕਥਯਨ੍ਤਿ. ਪਸਾਦਨ੍ਤਿ ਬੁਦ੍ਧਧਮ੍ਮਸਙ੍ਘੇਸੁ ਪਸਾਦਂ. ਧਮ੍ਮਦਸ੍ਸਨਨ੍ਤਿ ਚਤੁਸਚ੍ਚਧਮ੍ਮਦਸ੍ਸਨਂ.
੩. ਪਠਮਸਂਵਾਸਸੁਤ੍ਤਵਣ੍ਣਨਾ
੫੩. ਤਤਿਯੇ ਸਮ੍ਬਹੁਲਾਪਿ ਖੋ ਗਹਪਤੀ ਚ ਗਹਪਤਾਨਿਯੋ ਚਾਤਿ ਬਹੁਕਾ ਗਹਪਤਯੋ ਚ ਗਹਪਤਾਨਿਯੋ ਚ ਆਵਾਹਵਿਵਾਹਕਰਣਤ੍ਥਾਯ ਗਚ੍ਛਨ੍ਤਾ ਤਮੇਵ ਮਗ੍ਗਂ ਪਟਿਪਨ੍ਨਾ ਹੋਨ੍ਤਿ. ਸਂਵਾਸਾਤਿ ਸਹਵਾਸਾ ਏਕਤੋਵਾਸਾ. ਛਵੋ ਛਵਾਯਾਤਿ ਗੁਣਮਰਣੇਨ ਮਤਤ੍ਤਾ ਛਵੋ ਗੁਣਮਰਣੇਨੇਵ ਮਤਾਯ ਛਵਾਯ ਸਦ੍ਧਿਂ. ਦੇਵਿਯਾ ਸਦ੍ਧਿਨ੍ਤਿ ਗੁਣੇਹਿ ਦੇਵਿਭੂਤਾਯ ਸਦ੍ਧਿਂ. ਦੁਸ੍ਸੀਲੋਤਿ ਨਿਸ੍ਸੀਲੋ. ਪਾਪਧਮ੍ਮੋਤਿ ਲਾਮਕਧਮ੍ਮੋ. ਅਕ੍ਕੋਸਕਪਰਿਭਾਸਕੋਤਿ ਦਸਹਿ ਅਕ੍ਕੋਸਵਤ੍ਥੂਹਿ ਅਕ੍ਕੋਸਕੋ, ਭਯਂ ਦਸ੍ਸੇਤ੍ਵਾ ਸਨ੍ਤਜ੍ਜਨੇਨ ਪਰਿਭਾਸਕੋ. ਏਵਂ ਸਬ੍ਬਤ੍ਥ ਅਤ੍ਥੋ ਵੇਦਿਤਬ੍ਬੋ.
ਕਦਰਿਯਾਤਿ ਥਦ੍ਧਮਚ੍ਛਰਿਨੋ. ਜਾਨਿਪਤਯੋਤਿ ਜਯਮ੍ਪਤਿਕਾ. ਵਦਞ੍ਞੂਤਿ ਯਾਚਕਾਨਂ ਵਚਨਸ੍ਸ ਅਤ੍ਥਂ ਜਾਨਨ੍ਤਿ. ਸਞ੍ਞਤਾਤਿ ਸੀਲਸਂਯਮੇਨ ਸਮਨ੍ਨਾਗਤਾ. ਧਮ੍ਮਜੀਵਿਨੋਤਿ ਧਮ੍ਮੇ ਠਤ੍ਵਾ ਜੀਵਿਕਂ ਕਪ੍ਪੇਨ੍ਤੀਤਿ ਧਮ੍ਮਜੀਵਿਨੋ. ਅਤ੍ਥਾਸਂ ਪਚੁਰਾ ਹੋਨ੍ਤੀਤਿ ਵਡ੍ਢਿਸਙ੍ਖਾਤਾ ਅਤ੍ਥਾ ਏਤੇਸਂ ਬਹੂ ਹੋਨ੍ਤਿ. ਫਾਸੁਕਂ ਉਪਜਾਯਤੀਤਿ ਅਞ੍ਞਮਞ੍ਞਂ ਫਾਸੁਵਿਹਾਰੋ ਜਾਯਤਿ. ਕਾਮਕਾਮਿਨੋਤਿ ਕਾਮੇ ਕਾਮਯਮਾਨਾ.
੪. ਦੁਤਿਯਸਂਵਾਸਸੁਤ੍ਤਵਣ੍ਣਨਾ
੫੪. ਚਤੁਤ੍ਥੇ ਕਮ੍ਮਪਥਵਸੇਨ ਦੇਸਨਾ ਪਵਤ੍ਤਿਤਾ. ਸੇਸਂ ਤਾਦਿਸਮੇਵ. ਇਮੇਸੁ ਪਨ ਦ੍ਵੀਸੁਪਿ ਸੁਤ੍ਤੇਸੁ ਅਗਾਰਿਕਪਟਿਪਦਾ ਕਥਿਤਾ. ਸੋਤਾਪਨ੍ਨਸਕਦਾਗਾਮੀਨਮ੍ਪਿ ਵਟ੍ਟਤਿ.
੫-੬. ਸਮਜੀਵੀਸੁਤ੍ਤਦ੍ਵਯਵਣ੍ਣਨਾ
੫੫-੫੬. ਪਞ੍ਚਮੇ ਤੇਨੁਪਸਙ੍ਕਮੀਤਿ ਕਿਮਤ੍ਥਂ ਉਪਸਙ੍ਕਮਿ? ਅਨੁਗ੍ਗਣ੍ਹਨਤ੍ਥਂ. ਤਥਾਗਤੋ ਹਿ ਤਂ ਰਟ੍ਠਂ ਪਾਪੁਣਨ੍ਤੋ ਇਮੇਸਂਯੇਵ ਦ੍ਵਿਨ੍ਨਂ ਸਙ੍ਗਣ੍ਹਨਤ੍ਥਾਯ ਪਾਪੁਣਾਤਿ. ਨਕੁਲਪਿਤਾ ਕਿਰ ਪਞ੍ਚ ਜਾਤਿਸਤਾਨਿ ਤਥਾਗਤਸ੍ਸ ਪਿਤਾ ਅਹੋਸਿ, ਪਞ੍ਚ ਜਾਤਿਸਤਾਨਿ ਮਹਾਪਿਤਾ, ਪਞ੍ਚ ਜਾਤਿਸਤਾਨਿ ਚੂਲ਼ਪਿਤਾ. ਨਕੁਲਮਾਤਾਪਿ ਪਞ੍ਚ ਜਾਤਿਸਤਾਨਿ ਤਥਾਗਤਸ੍ਸ ਮਾਤਾ ਅਹੋਸਿ, ਪਞ੍ਚ ਜਾਤਿਸਤਾਨਿ ਮਹਾਮਾਤਾ, ਪਞ੍ਚ ਜਾਤਿਸਤਾਨਿ ਚੂਲ਼ਮਾਤਾ. ਤੇ ਸਤ੍ਥੁ ਦਿਟ੍ਠਕਾਲਤੋ ਪਟ੍ਠਾਯ ਪੁਤ੍ਤਸਿਨੇਹਂ ਪਟਿਲਭਿਤ੍ਵਾ ‘‘ਹਨ੍ਤਾਤ, ਹਨ੍ਤਾਤਾ’’ਤਿ ਵਚ੍ਛਕਂ ਦਿਸ੍ਵਾ ਵਚ੍ਛਗਿਦ੍ਧਿਨੀ ਗਾਵੀ ਵਿਯ ਵਿਰਵਮਾਨਾ ਉਪਸਙ੍ਕਮਿਤ੍ਵਾ ਪਠਮਦਸ੍ਸਨੇਨੇਵ ਸੋਤਾਪਨ੍ਨਾ ਜਾਤਾ. ਨਿਵੇਸਨੇ ਪਞ੍ਚਸਤਾਨਂ ਭਿਕ੍ਖੂਨਂ ਆਸਨਾਨਿ ਸਦਾ ਪਞ੍ਞਤ੍ਤਾਨੇਵ ਹੋਨ੍ਤਿ. ਇਤਿ ਭਗਵਾ ਤੇਸਂ ਅਨੁਗ੍ਗਣ੍ਹਨਤ੍ਥਾਯ ਉਪਸਙ੍ਕਮਿ. ਅਤਿਚਰਿਤਾਤਿ ਅਤਿਕ੍ਕਮਿਤਾ. ਅਭਿਸਮ੍ਪਰਾਯਞ੍ਚਾਤਿ ਪਰਲੋਕੇ ਚ. ਸਮਸਦ੍ਧਾਤਿ ਸਦ੍ਧਾਯ ਸਮਾ ਏਕਸਦਿਸਾ. ਸੀਲਾਦੀਸੁਪਿ ਏਸੇਵ ਨਯੋ. ਛਟ੍ਠਂ ਕੇਵਲਂ ਭਿਕ੍ਖੂਨਂ ਦੇਸਿਤਂ. ਸੇਸਮੇਤ੍ਥ ਤਾਦਿਸਮੇਵ.
੭. ਸੁਪ੍ਪਵਾਸਾਸੁਤ੍ਤਵਣ੍ਣਨਾ
੫੭. ਸਤ੍ਤਮੇ ਪਜ੍ਜਨਿਕਨ੍ਤਿ ਤਸ੍ਸ ਨਿਗਮਸ੍ਸ ਨਾਮਂ. ਕੋਲਿਯਾਨਨ੍ਤਿ ਕੋਲਰਾਜਕੁਲਾਨਂ. ਆਯੁਂ ਖੋ ਪਨ ਦਤ੍ਵਾਤਿ ਆਯੁਦਾਨਂ ਦਤ੍ਵਾ. ਆਯੁਸ੍ਸ ਭਾਗਿਨੀ ਹੋਤੀਤਿ ਆਯੁਭਾਗਪਟਿਲਾਭਿਨੀ ਹੋਤਿ, ਆਯੁਂ ਵਾ ਭਜਨਿਕਾ ਹੋਤਿ, ਆਯੁਪ੍ਪਟਿਲਾਭਿਨੀਤਿ ਅਤ੍ਥੋ. ਸੇਸਪਦੇਸੁਪਿ ਏਸੇਵ ਨਯੋ.
ਰਸਸਾ ਉਪੇਤਨ੍ਤਿ ਰਸੇਨ ਉਪੇਤਂ ਰਸਸਮ੍ਪਨ੍ਨਂ. ਉਜ੍ਜੁਗਤੇਸੂਤਿ ਕਾਯਵਙ੍ਕਾਦਿਰਹਿਤਤ੍ਤਾ ਉਜੁਕਮੇਵ ਗਤੇਸੁ ਖੀਣਾਸਵੇਸੁ. ਚਰਣੂਪਪਨ੍ਨੇਸੂਤਿ ਪਞ੍ਚਦਸਹਿ ਚਰਣਧਮ੍ਮੇਹਿ ਸਮਨ੍ਨਾਗਤੇਸੁ. ਮਹਗ੍ਗਤੇਸੂਤਿ ਮਹਤ੍ਤਂ ਗਤੇਸੁ. ਖੀਣਾਸਵਾਨਞ੍ਞੇਵੇਤਂ ਨਾਮਂ. ਪੁਞ੍ਞੇਨ ਪੁਞ੍ਞਂ ਸਂਸਨ੍ਦਮਾਨਾਤਿ ਪੁਞ੍ਞੇਨ ਸਦ੍ਧਿਂ ਪੁਞ੍ਞਂ ਘਟਯਮਾਨਾ. ਮਹਪ੍ਫਲਾ ਲੋਕਵਿਦੂਨ ਵਣ੍ਣਿਤਾਤਿ ਏਵਰੂਪਾ ਦਾਨਸਙ੍ਖਾਤਾ ਦਕ੍ਖਿਣਾ ਤਿਵਿਧਲੋਕਂ ਵਿਦਿਤਂ ਕਤ੍ਵਾ ਠਿਤਤ੍ਤਾ ਲੋਕਵਿਦੂਨਂ ਬੁਦ੍ਧਾਨਂ ਵਣ੍ਣਿਤਾ, ਬੁਦ੍ਧੇਹਿ ਪਸਤ੍ਥਾਤਿ ਅਤ੍ਥੋ. ਯਞ੍ਞਮਨੁਸ੍ਸਰਨ੍ਤਾਤਿ ਯਞ੍ਞਂ ਦਾਨਂ ਅਨੁਸ੍ਸਰਨ੍ਤਾ. ਵੇਦਜਾਤਾਤਿ ਤੁਟ੍ਠਿਜਾਤਾ.
੮. ਸੁਦਤ੍ਤਸੁਤ੍ਤਵਣ੍ਣਨਾ
੫੮. ਅਟ੍ਠਮੇ ਸਞ੍ਞਤਾਨਨ੍ਤਿ ਕਾਯਵਾਚਾਹਿ ਸਂਯਤਾਨਂ. ਪਰਦਤ੍ਤਭੋਜਿਨਨ੍ਤਿ ਪਰੇਹਿ ਦਿਨ੍ਨਮੇਵ ਭੁਞ੍ਜਿਤ੍ਵਾ ਯਾਪੇਨ੍ਤਾਨਂ. ਕਾਲੇਨਾਤਿ ਯੁਤ੍ਤਪ੍ਪਤ੍ਤਕਾਲੇਨ. ਸਕ੍ਕਚ੍ਚ ਦਦਾਤੀਤਿ ਸਹਤ੍ਥਾ ਸਕ੍ਕਾਰਂ ਕਤ੍ਵਾ ਦਦਾਤਿ. ਚਤ੍ਤਾਰਿ ਠਾਨਾਨਿ ਅਨੁਪ੍ਪਵੇਚ੍ਛਤੀਤਿ ਚਤ੍ਤਾਰਿ ਕਾਰਣਾਨਿ ਅਨੁਪ੍ਪਵੇਸੇਤਿ ਦਦਾਤਿ. ਯਸਵਾ ਹੋਤੀਤਿ ਮਹਾਪਰਿਵਾਰੋ ਹੋਤਿ. ਨਵਮਂ ਕੇਵਲਂ ਭਿਕ੍ਖੂਨਂ ਕਥਿਤਂ. ਸੇਸਮੇਤ੍ਥ ਤਾਦਿਸਮੇਵ.
੧੦. ਗਿਹਿਸਾਮੀਚਿਸੁਤ੍ਤਵਣ੍ਣਨਾ
੬੦. ਦਸਮੇ ਗਿਹਿਸਾਮੀਚਿਪਟਿਪਦਨ੍ਤਿ ਗਿਹੀਨਂ ਅਨੁਚ੍ਛਵਿਕਂ ਪਟਿਪਤ੍ਤਿਂ. ਪਚ੍ਚੁਪਟ੍ਠਿਤੋ ਹੋਤੀਤਿ ਅਤਿਹਰਿਤ੍ਵਾ ਦਾਤੁਕਾਮਤਾਯ ਪਤਿਉਪਟ੍ਠਿਤੋ ਹੋਤਿ ਉਪਗਤੋ, ਭਿਕ੍ਖੁਸਙ੍ਘਸ੍ਸ ਚੀਵਰਂ ਦੇਤੀਤਿ ਅਤ੍ਥੋ.
ਉਪਟ੍ਠਿਤਾਤਿ ਉਪਟ੍ਠਾਯਕੋ. ਤੇਸਂ ਦਿਵਾ ਚ ਰਤ੍ਤੋ ਚਾਤਿ ਯੇ ਏਵਂ ਚਤੂਹਿ ਪਚ੍ਚਯੇਹਿ ਉਪਟ੍ਠਹਨ੍ਤਿ, ਤੇਸਂ ਦਿਵਾ ਚ ਰਤ੍ਤਿਞ੍ਚ ਪਰਿਚ੍ਚਾਗਵਸੇਨ ਚ ਅਨੁਸ੍ਸਰਣਵਸੇਨ ਚ ਸਦਾ ਪੁਞ੍ਞਂ ਪਵਡ੍ਢਤਿ. ਸਗ੍ਗਞ੍ਚ ਕਮਤਿਟ੍ਠਾਨਨ੍ਤਿ ਤਾਦਿਸੋ ਚ ਭਦ੍ਦਕਂ ਕਮ੍ਮਂ ਕਤ੍ਵਾ ਸਗ੍ਗਟ੍ਠਾਨਂ ਉਪਗਚ੍ਛਤਿ. ਇਮੇਸੁ ਚਤੂਸੁਪਿ ਸੁਤ੍ਤੇਸੁ ਆਗਾਰਿਯਪਟਿਪਦਾ ਕਥਿਤਾ. ਸੋਤਾਪਨ੍ਨਸਕਦਾਗਾਮੀਨਮ੍ਪਿ ਵਟ੍ਟਤਿ.
ਪੁਞ੍ਞਾਭਿਸਨ੍ਦਵਗ੍ਗੋ ਪਠਮੋ.
(੭) ੨. ਪਤ੍ਤਕਮ੍ਮਵਗ੍ਗੋ
੧. ਪਤ੍ਤਕਮ੍ਮਸੁਤ੍ਤਵਣ੍ਣਨਾ
੬੧. ਦੁਤਿਯਸ੍ਸ ਪਠਮੇ ਅਨਿਟ੍ਠਪਟਿਕ੍ਖੇਪੇਨ ਇਟ੍ਠਾ. ਮਨੇ ਕਮਨ੍ਤਿ ਪਵਿਸਨ੍ਤੀਤਿ ਕਨ੍ਤਾ. ਮਨਂ ਅਪ੍ਪਾਯਨ੍ਤਿ ਪਵਡ੍ਢੇਨ੍ਤੀਤਿ ਮਨਾਪਾ. ਦੁਲ੍ਲਭਾਤਿ ਪਰਮਦੁਲ੍ਲਭਾ. ਭੋਗਾਤਿ ਭੁਞ੍ਜਿਤਬ੍ਬਾ ਰੂਪਾਦਯੋ ਵਿਸਯਾ. ਸਹਧਮ੍ਮੇਨਾਤਿ ਧਮ੍ਮੇਨੇਵ ਸਦ੍ਧਿਂ ਉਪ੍ਪਜ੍ਜਨ੍ਤੁ, ਮਾ ਧਮ੍ਮੂਪਘਾਤਂ ਕਤ੍ਵਾ ਅਧਮ੍ਮੇਨਾਤਿ. ਅਥਵਾ ਸਹਧਮ੍ਮੇਨਾਤਿ ਸਕਾਰਣੇਨ, ਤੇਨ ਤੇਨ ਸੇਨਾਪਤਿਸੇਟ੍ਠਿਟ੍ਠਾਨਾਦਿਕਾਰਣੇਨ ਸਦ੍ਧਿਂਯੇਵ ਉਪ੍ਪਜ੍ਜਨ੍ਤੂਤਿ ਅਤ੍ਥੋ. ਯਸੋਤਿ ਪਰਿਵਾਰਸਮ੍ਪਤ੍ਤਿ. ਸਹ ਞਾਤੀਭੀਤਿ ਞਾਤਕੇਹਿ ਸਦ੍ਧਿਂ. ਸਹ ਉਪਜ੍ਝਾਯੇਹੀਤਿ ਸੁਖਦੁਕ੍ਖੇਸੁ ਉਪਨਿਜ੍ਝਾਯਿਤਬ੍ਬਤ੍ਤਾ ਉਪਜ੍ਝਾਯਸਙ੍ਖਾਤੇਹਿ ਸਨ੍ਦਿਟ੍ਠਸਮ੍ਭਤ੍ਤੇਹਿ ਸਦ੍ਧਿਂ.
ਅਕਿਚ੍ਚਂ ਕਰੋਤੀਤਿ ਅਕਾਤਬ੍ਬਂ ਕਰੋਤਿ. ਕਿਚ੍ਚਂ ਅਪਰਾਧੇਤੀਤਿ ਕਤ੍ਤਬ੍ਬਯੁਤ੍ਤਕਂ ਕਿਚ੍ਚਂ ਅਕਰੋਨ੍ਤੋ ਤਂ ਅਪਰਾਧੇਤਿ ਨਾਮ. ਧਂਸਤੀਤਿ ਪਤਤਿ ਪਰਿਹਾਯਤਿ. ਅਭਿਜ੍ਝਾਵਿਸਮਲੋਭਨ੍ਤਿ ਅਭਿਜ੍ਝਾਸਙ੍ਖਾਤਂ ਵਿਸਮਲੋਭਂ. ਪਜਹਤੀਤਿ ਨੁਦਤਿ ਨੀਹਰਤਿ. ਮਹਾਪਞ੍ਞੋਤਿ ਮਹਨ੍ਤਪਞ੍ਞੋ. ਪੁਥੁਪਞ੍ਞੋਤਿ ਪੁਥੁਲਪਞ੍ਞੋ. ਆਪਾਤਦਸੋਤਿ ਤਂ ਤਂ ਅਤ੍ਥਂ ਆਪਾਤੇਤਿ ਤਮੇਵ ਪਸ੍ਸਤਿ, ਸੁਖੁਮਮ੍ਪਿਸ੍ਸ ਅਤ੍ਥਜਾਤਂ ਆਪਾਤਂ ਆਗਚ੍ਛਤਿਯੇਵਾਤਿ ਅਤ੍ਥੋ.
ਉਟ੍ਠਾਨਵੀਰਿਯਾਧਿਗਤੇਹੀਤਿ ਉਟ੍ਠਾਨਸਙ੍ਖਾਤੇਨ ਵੀਰਿਯੇਨ ਅਧਿਗਤੇਹਿ. ਬਾਹਾਬਲਪਰਿਚਿਤੇਹੀਤਿ ਬਾਹਾਬਲੇਨ ਪਰਿਚਿਤੇਹਿ ਵਡ੍ਢਿਤੇਹਿ. ਸੇਦਾਵਕ੍ਖਿਤ੍ਤੇਹੀਤਿ ਅਵਕ੍ਖਿਤ੍ਤਸੇਦੇਹਿ, ਸੇਦਂ ਮੁਞ੍ਚਿਤ੍ਵਾ ਵਾਯਾਮੇਨ ਪਯੋਗੇਨ ਸਮਧਿਗਤੇਹੀਤਿ ਅਤ੍ਥੋ. ਧਮ੍ਮਿਕੇਹੀਤਿ ਧਮ੍ਮਯੁਤ੍ਤੇਹਿ. ਧਮ੍ਮਲਦ੍ਧੇਹੀਤਿ ਦਸਕੁਸਲਕਮ੍ਮਪਥਧਮ੍ਮੇ ਅਕੋਪੇਤ੍ਵਾ ਲਦ੍ਧੇਹਿ. ਪਤ੍ਤਕਮ੍ਮਾਨੀਤਿ ਯੁਤ੍ਤਕਮ੍ਮਾਨਿ ਅਨੁਚ੍ਛਵਿਕਕਮ੍ਮਾਨਿ. ਸੁਖੇਤੀਤਿ ਸੁਖਿਤਂ ਕਰੋਤਿ. ਪੀਣੇਤੀਤਿ ਪੀਣਿਤਂ ਬਲਸਮ੍ਪਨ੍ਨਂ ਕਰੋਤਿ. ਠਾਨਗਤਂ ਹੋਤੀਤਿ ਕਾਰਣਗਤਂ ਹੋਤਿ. ਕਿਂ ਪਨ ਤਨ੍ਤਿ? ਚਤੂਸੁ ਪਤ੍ਤਕਮ੍ਮੇਸੁ ਏਕਂ ਭੋਗੇਹਿ ਕਤ੍ਤਬ੍ਬਕਮ੍ਮਂ ਭੋਗਜਾਤਮੇਵ ਠਾਨਗਤਂ. ਪਤ੍ਤਗਤਨ੍ਤਿ ਯੁਤ੍ਤਪ੍ਪਤ੍ਤਟ੍ਠਾਨਗਤਂ. ਆਯਤਨਸੋ ਪਰਿਭੁਤ੍ਤਨ੍ਤਿ ਕਾਰਣੇਨੇਵ ਪਰਿਭੁਤ੍ਤਂ ਭੋਗਜਾਤਂ ਹੋਤਿ.
ਪਰਿਯੋਧਾਯ ਸਂਵਤ੍ਤਤੀਤਿ ਪਿਦਹਿਤ੍ਵਾ ਵਤ੍ਤਤਿ. ਯਥਾ ਅਗ੍ਗਿਆਦੀਹਿ ਉਪ੍ਪਨ੍ਨਾਸੁ ਆਪਦਾਸੁ, ਏਵਂ ਆਦਿਤ੍ਤਗੇਹਨਿਬ੍ਬਾਪਨਾਦੀਨਂ ਅਤ੍ਥਾਯ ਧਨਪਰਿਚ੍ਚਾਗਂ ਕਤ੍ਵਾ ਤਾਸਂ ਆਪਦਾਨਂ ਮਗ੍ਗਂ ਪਿਦਹਤਿ ਨਿਵਾਰੇਤਿ. ਸੋਤ੍ਥਿਂ ਅਤ੍ਤਾਨਂ ਕਰੋਤੀਤਿ ਨਿਰੁਪਦ੍ਦਵਂ ਖੇਮਂ ਅਤ੍ਤਾਨਂ ਕਰੋਤਿ. ਞਾਤਿਬਲਿਨ੍ਤਿ ਞਾਤਕਾਨਂ ਬਲਿਂ. ਅਤਿਥਿਬਲਿਨ੍ਤਿ ਆਗਨ੍ਤੁਕਾਨਂ ਬਲਿਂ. ਪੁਬ੍ਬਪੇਤਬਲਿਨ੍ਤਿ ਪਰਲੋਕਗਤਾਨਂ ਞਾਤਕਾਨਂ ਬਲਿਂ. ਰਾਜਬਲਿਨ੍ਤਿ ਰਞ੍ਞੋ ਕਤ੍ਤਬ੍ਬਯੁਤ੍ਤਕਂ ਰਾਜਬਲਿਂ. ਦੇਵਤਾਬਲਿਨ੍ਤਿ ਦੇਵਤਾਨਂ ਕਤ੍ਤਬ੍ਬਬਲਿਂ. ਸਬ੍ਬਮੇਤਂ ਤੇਸਂ ਤੇਸਂ ਯਥਾਨੁਚ੍ਛਵਿਕਵਸੇਨ ਦਾਤਬ੍ਬਦਾਨਸ੍ਸ ਅਧਿਵਚਨਂ.
ਖਨ੍ਤਿਸੋਰਚ੍ਚੇ ਨਿਵਿਟ੍ਠਾਤਿ ਅਧਿਵਾਸਨਕ੍ਖਨ੍ਤਿਯਞ੍ਚ ਸੁਸੀਲਤਾਯ ਚ ਨਿਵਿਟ੍ਠਾ. ਏਕਮਤ੍ਤਾਨਂ ਦਮੇਨ੍ਤੀਤਿ ਏਕਂ ਅਤ੍ਤਨੋਵ ਅਤ੍ਤਭਾਵਂ ਇਨ੍ਦ੍ਰਿਯਦਮੇਨ ਦਮੇਨ੍ਤਿ. ਸਮੇਨ੍ਤੀਤਿ ਅਤ੍ਤਨੋ ਚਿਤ੍ਤਂ ਕਿਲੇਸਵੂਪਸਮਨੇਨ ਸਮੇਨ੍ਤਿ. ਪਰਿਨਿਬ੍ਬਾਪੇਨ੍ਤੀਤਿ ਕਿਲੇਸਪਰਿਨਿਬ੍ਬਾਨੇਨੇਵ ਪਰਿਨਿਬ੍ਬਾਪੇਨ੍ਤਿ. ਉਦ੍ਧਗ੍ਗਿਕਨ੍ਤਿਆਦੀਸੁ ਉਪਰੂਪਰਿਭੂਮੀਸੁ ਫਲਦਾਨਵਸੇਨ ਉਦ੍ਧਮਗ੍ਗਮਸ੍ਸਾਤਿ ਉਦ੍ਧਗ੍ਗਿਕਾ. ਸਗ੍ਗਸ੍ਸ ਹਿਤਾਤਿ ਤਤ੍ਰੁਪਪਤ੍ਤਿਜਨਨਤੋ ਸੋਵਗ੍ਗਿਕਾ. ਨਿਬ੍ਬਤ੍ਤਨਿਬ੍ਬਤ੍ਤਟ੍ਠਾਨੇ ਸੁਖੋਵ ਵਿਪਾਕੋ ਅਸ੍ਸਾਤਿ ਸੁਖਵਿਪਾਕਾ. ਸੁਟ੍ਠੁ ਅਗ੍ਗਾਨਂ ਦਿਬ੍ਬਵਣ੍ਣਾਦੀਨਂ ਦਸਨ੍ਨਂ ਵਿਸੇਸਾਨਂ ਨਿਬ੍ਬਤ੍ਤਨਤੋ ਸਗ੍ਗਸਂਵਤ੍ਤਨਿਕਾ, ਏਵਰੂਪਂ ਦਕ੍ਖਿਣਂ ਪਤਿਟ੍ਠਾਪੇਤੀਤਿ ਅਤ੍ਥੋ.
ਅਰਿਯਧਮ੍ਮੇ ਠਿਤੋਤਿ ਪਞ੍ਚਸੀਲਧਮ੍ਮੇ ਪਤਿਟ੍ਠਿਤੋ. ਪੇਚ੍ਚ ਸਗ੍ਗੇ ਪਮੋਦਤੀਤਿ ਪਰਲੋਕਂ ਗਨ੍ਤ੍ਵਾ ਯਤ੍ਥ ਸਗ੍ਗੇ ਪਟਿਸਨ੍ਧਿਂ ਗਣ੍ਹਾਤਿ, ਤਤ੍ਥ ਮੋਦਤਿ. ਸੋਤਾਪਨ੍ਨਸਕਦਾਗਾਮਿਨੋ ਵਾ ਹੋਨ੍ਤੁ ਅਨਾਗਾਮੀ ਵਾ, ਸਬ੍ਬੇਸਂ ਅਯਂ ਪਟਿਪਦਾ ਲਬ੍ਭਤੇਵਾਤਿ.
੨. ਆਨਣ੍ਯਸੁਤ੍ਤਵਣ੍ਣਨਾ
੬੨. ਦੁਤਿਯੇ ਅਧਿਗਮਨੀਯਾਨੀਤਿ ਪਤ੍ਤਬ੍ਬਾਨਿ. ਕਾਮਭੋਗਿਨਾਤਿ ਵਤ੍ਥੁਕਾਮੇ ਚ ਕਿਲੇਸਕਾਮੇ ਚ ਪਰਿਭੁਞ੍ਜਨ੍ਤੇਨ. ਅਤ੍ਥਿਸੁਖਾਦੀਸੁ ਅਤ੍ਥੀਤਿ ਉਪ੍ਪਜ੍ਜਨਕਸੁਖਂ ਅਤ੍ਥਿਸੁਖਂ ਨਾਮ. ਭੋਗੇ ਪਰਿਭੁਞ੍ਜਨ੍ਤਸ੍ਸ ਉਪ੍ਪਜ੍ਜਨਕਸੁਖਂ ਭੋਗਸੁਖਂ ਨਾਮ. ਅਨਣੋਸ੍ਮੀਤਿ ਉਪ੍ਪਜ੍ਜਨਕਸੁਖਂ ਆਨਣ੍ਯਸੁਖਂ ਨਾਮ. ਨਿਦ੍ਦੋਸੋ ਅਨਵਜ੍ਜੋਸ੍ਮੀਤਿ ਉਪ੍ਪਜ੍ਜਨਕਸੁਖਂ ਅਨਵਜ੍ਜਸੁਖਂ ਨਾਮ.
ਭੁਞ੍ਜਨ੍ਤਿ ਭੁਞ੍ਜਮਾਨੋ. ਪਞ੍ਞਾ ਵਿਪਸ੍ਸਤੀਤਿ ਪਞ੍ਞਾਯ ਵਿਪਸ੍ਸਤਿ. ਉਭੋ ਭਾਗੇਤਿ ਦ੍ਵੇ ਕੋਟ੍ਠਾਸੇ, ਹੇਟ੍ਠਿਮਾਨਿ ਤੀਣਿ ਏਕਂ ਕੋਟ੍ਠਾਸਂ, ਅਨਵਜ੍ਜਸੁਖਂ ਏਕਂ ਕੋਟ੍ਠਾਸਨ੍ਤਿ ਏਵਂ ਪਞ੍ਞਾਯ ਪਸ੍ਸਮਾਨੋ ਦ੍ਵੇ ਕੋਟ੍ਠਾਸੇ ਜਾਨਾਤੀਤਿ ਅਤ੍ਥੋ. ਅਨਵਜ੍ਜਸੁਖਸ੍ਸੇਤਨ੍ਤਿ ਏਤਂ ਤਿਵਿਧਮ੍ਪਿ ਸੁਖਂ ਅਨਵਜ੍ਜਸੁਖਸ੍ਸ ਸੋਲ਼ਸਿਂ ਕਲਂ ਨਾਗ੍ਘਤੀਤਿ.
੩. ਬ੍ਰਹ੍ਮਸੁਤ੍ਤਵਣ੍ਣਨਾ
੬੩. ਤਤਿਯਂ ਤਿਕਨਿਪਾਤੇ ਵਣ੍ਣਿਤਮੇਵ. ਸਪੁਬ੍ਬਦੇਵਤਾਨੀਤਿ ਪਦਮਤ੍ਤਮੇਵ ਏਤ੍ਥ ਵਿਸੇਸੋਤਿ. ਚਤੁਤ੍ਥੇ ਸਬ੍ਬਂ ਉਤ੍ਤਾਨਤ੍ਥਮੇਵ.
੫. ਰੂਪਸੁਤ੍ਤਵਣ੍ਣਨਾ
੬੫. ਪਞ੍ਚਮੇ ਰੂਪੇ ਪਮਾਣਂ ਗਹੇਤ੍ਵਾ ਪਸਨ੍ਨੋ ਰੂਪਪ੍ਪਮਾਣੋ ਨਾਮ. ਰੂਪਪ੍ਪਸਨ੍ਨੋਤਿ ਤਸ੍ਸੇਵ ਅਤ੍ਥਵਚਨਂ. ਘੋਸੇ ਪਮਾਣਂ ਗਹੇਤ੍ਵਾ ਪਸਨ੍ਨੋ ਘੋਸਪ੍ਪਮਾਣੋ ਨਾਮ. ਚੀਵਰਲੂਖਪਤ੍ਤਲੂਖੇਸੁ ਪਮਾਣਂ ਗਹੇਤ੍ਵਾ ਪਸਨ੍ਨੋ ਲੂਖਪ੍ਪਮਾਣੋ ਨਾਮ. ਧਮ੍ਮੇ ਪਮਾਣਂ ਗਹੇਤ੍ਵਾ ਪਸਨ੍ਨੋ ਧਮ੍ਮਪ੍ਪਮਾਣੋ ਨਾਮ. ਇਤਰਾਨਿ ਤੇਸਂਯੇਵ ਅਤ੍ਥਵਚਨਾਨਿ. ਸਬ੍ਬਸਤ੍ਤੇ ਚ ਤਯੋ ਕੋਟ੍ਠਾਸੇ ਕਤ੍ਵਾ ਦ੍ਵੇ ਕੋਟ੍ਠਾਸਾ ਰੂਪਪ੍ਪਮਾਣਾ, ਏਕੋ ਨ ਰੂਪਪ੍ਪਮਾਣੋ. ਪਞ੍ਚ ਕੋਟ੍ਠਾਸੇ ਕਤ੍ਵਾ ਚਤ੍ਤਾਰੋ ਕੋਟ੍ਠਾਸਾ ਘੋਸਪ੍ਪਮਾਣਾ, ਏਕੋ ਨ ਘੋਸਪ੍ਪਮਾਣੋ. ਦਸ ਕੋਟ੍ਠਾਸੇ ਕਤ੍ਵਾ ਨਵ ਕੋਟ੍ਠਾਸਾ ਲੂਖਪ੍ਪਮਾਣਾ, ਏਕੋ ਨ ਲੂਖਪ੍ਪਮਾਣੋ. ਸਤਸਹਸ੍ਸਂ ਕੋਟ੍ਠਾਸੇ ਕਤ੍ਵਾ ਪਨ ਏਕੋ ਕੋਟ੍ਠਾਸੋਵ ਧਮ੍ਮਪ੍ਪਮਾਣੋ, ਸੇਸਾ ਨ ਧਮ੍ਮਪ੍ਪਮਾਣਾਤਿ ਵੇਦਿਤਬ੍ਬਾ.
ਰੂਪੇ ਪਮਾਣਿਂਸੂਤਿ ਯੇ ਰੂਪਂ ਦਿਸ੍ਵਾ ਪਸਨ੍ਨਾ, ਤੇ ਰੂਪੇ ਪਮਾਣਿਂਸੁ ਨਾਮ, ਪਸੀਦਿਂਸੂਤਿ ਅਤ੍ਥੋ. ਘੋਸੇਨ ਅਨ੍ਵਗੂਤਿ ਘੋਸੇਨ ਅਨੁਗਤਾ, ਘੋਸਪ੍ਪਮਾਣਂ ਗਹੇਤ੍ਵਾ ਪਸਨ੍ਨਾਤਿ ਅਤ੍ਥੋ. ਛਨ੍ਦਰਾਗਵਸੂਪੇਤਾਤਿ ਛਨ੍ਦਸ੍ਸ ਚ ਰਾਗਸ੍ਸ ਚ ਵਸਂ ਉਪੇਤਾ. ਅਜ੍ਝਤ੍ਤਞ੍ਚ ਨ ਜਾਨਾਤੀਤਿ ਨਿਯਕਜ੍ਝਤ੍ਤੇ ਤਸ੍ਸ ਗੁਣਂ ਨ ਜਾਨਾਤਿ. ਬਹਿਦ੍ਧਾ ਚ ਨ ਪਸ੍ਸਤੀਤਿ ਬਹਿਦ੍ਧਾਪਿਸ੍ਸ ਪਟਿਪਤ੍ਤਿਂ ਨ ਪਸ੍ਸਤਿ. ਸਮਨ੍ਤਾਵਰਣੋਤਿ ਸਮਨ੍ਤਤੋ ਆਵਾਰਿਤੋ, ਸਮਨ੍ਤਾ ਵਾ ਆਵਰਣਮਸ੍ਸਾਤਿ ਸਮਨ੍ਤਾਵਰਣੋ. ਘੋਸੇਨ ਵੁਯ੍ਹਤੀਤਿ ਘੋਸੇਨ ਨਿਯਤਿ, ਨ ਗੁਣੇਨ. ਅਜ੍ਝਤ੍ਤਞ੍ਚ ਨ ਜਾਨਾਤਿ, ਬਹਿਦ੍ਧਾ ਚ ਵਿਪਸ੍ਸਤੀਤਿ ਨਿਯਕਜ੍ਝਤ੍ਤੇ ਗੁਣਂ ਨ ਜਾਨਾਤਿ, ਬਹਿਦ੍ਧਾ ਪਨਸ੍ਸ ਪਟਿਪਤ੍ਤਿਂ ਪਸ੍ਸਤਿ. ਬਹਿਦ੍ਧਾ ਫਲਦਸ੍ਸਾਵੀਤਿ ਤਸ੍ਸ ਪਰੇਹਿ ਕਤਂ ਬਹਿਦ੍ਧਾ ਸਕ੍ਕਾਰਫਲਂ ਪਸ੍ਸਨ੍ਤੋ. ਵਿਨੀਵਰਣਦਸ੍ਸਾਵੀਤਿ ਵਿਵਟਦਸ੍ਸਾਵੀ. ਨ ਸੋ ਘੋਸੇਨ ਵੁਯ੍ਹਤੀਤਿ ਸੋ ਘੋਸੇਨ ਨ ਨੀਯਤਿ.
੬. ਸਰਾਗਸੁਤ੍ਤਵਣ੍ਣਨਾ
੬੬. ਛਟ੍ਠੇ ਮੋਹਜਂ ਚਾਪਵਿਦ੍ਦਸੂਤਿ ਮੋਹਜਂ ਚਾਪਿ ਅਵਿਦ੍ਦਸੂ ਅਪਣ੍ਡਿਤਾ. ਸਵਿਘਾਤਨ੍ਤਿ ਸਦੁਕ੍ਖਂ. ਦੁਖੁਦ੍ਰਯਨ੍ਤਿ ਆਯਤਿਞ੍ਚ ਦੁਕ੍ਖਵਡ੍ਢਿਦਾਯਕਂ. ਅਚਕ੍ਖੁਕਾਤਿ ਪਞ੍ਞਾਚਕ੍ਖੁਰਹਿਤਾ. ਯਥਾ ਧਮ੍ਮਾ ਤਥਾ ਸਨ੍ਤਾਤਿ ਯਥਾ ਰਾਗਾਦਯੋ ਧਮ੍ਮਾ ਠਿਤਾ, ਤਥਾ ਸਭਾਵਾਵ ਹੁਤ੍ਵਾ. ਨ ਤਸ੍ਸੇਵਨ੍ਤਿ ਮਞ੍ਞਰੇਤਿ ਮਯਂ ਏਵਂਸਨ੍ਤਾ ਏਵਂਸਭਾਵਾਤਿ ਤਸ੍ਸ ਨ ਮਞ੍ਞਰੇ, ਨ ਮਞ੍ਞਨ੍ਤੀਤਿ ਅਤ੍ਥੋ. ਇਮਸ੍ਮਿਂ ਸੁਤ੍ਤੇਪਿ ਗਾਥਾਸੁਪਿ ਵਟ੍ਟਮੇਵ ਕਥਿਤਂ.
੭. ਅਹਿਰਾਜਸੁਤ੍ਤਵਣ੍ਣਨਾ
੬੭. ਸਤ੍ਤਮੇ ਇਮਾਨਿ ਚਤ੍ਤਾਰਿ ਅਹਿਰਾਜਕੁਲਾਨੀਤਿ ਇਦਂ ਦਟ੍ਠਵਿਸਾਨੇਵ ਸਨ੍ਧਾਯ ਵੁਤ੍ਤਂ. ਯੇ ਹਿ ਕੇਚਿ ਦਟ੍ਠਵਿਸਾ, ਸਬ੍ਬੇਤੇ ਇਮੇਸਂ ਚਤੁਨ੍ਨਂ ਅਹਿਰਾਜਕੁਲਾਨਂ ਅਬ੍ਭਨ੍ਤਰਗਤਾਵ ਹੋਨ੍ਤਿ. ਅਤ੍ਤਗੁਤ੍ਤਿਯਾਤਿ ਅਤ੍ਤਨੋ ਗੁਤ੍ਤਤ੍ਥਾਯ. ਅਤ੍ਤਰਕ੍ਖਾਯਾਤਿ ਅਤ੍ਤਨੋ ਰਕ੍ਖਣਤ੍ਥਾਯ. ਅਤ੍ਤਪਰਿਤ੍ਤਾਯਾਤਿ ਅਤ੍ਤਨੋ ਪਰਿਤ੍ਤਾਣਤ੍ਥਾਯ. ਪਰਿਤ੍ਤਂ ਨਾਮ ਅਨੁਜਾਨਾਮੀਤਿ ਅਤ੍ਥੋ.
ਇਦਾਨਿ ਯਥਾ ਤਂ ਪਰਿਤ੍ਤਂ ਕਾਤਬ੍ਬਂ, ਤਂ ਦਸ੍ਸੇਨ੍ਤੋ ਵਿਰੂਪਕ੍ਖੇਹਿ ਮੇਤਿਆਦਿਮਾਹ. ਤਤ੍ਥ ਵਿਰੂਪਕ੍ਖੇਹੀਤਿ ਵਿਰੂਪਕ੍ਖਨਾਗਕੁਲੇਹਿ. ਸੇਸੇਸੁਪਿ ਏਸੇਵ ਨਯੋ. ਅਪਾਦਕੇਹੀਤਿ ਅਪਾਦਕਸਤ੍ਤੇਹਿ. ਸੇਸੇਸੁਪਿ ਏਸੇਵ ਨਯੋ. ਸਬ੍ਬੇ ਸਤ੍ਤਾਤਿ ਇਤੋ ਪੁਬ੍ਬੇ ਏਤ੍ਤਕੇਨ ਠਾਨੇਨ ਓਦਿਸ੍ਸਕਮੇਤ੍ਤਂ ਕਥੇਤ੍ਵਾ ਇਦਾਨਿ ਅਨੋਦਿਸ੍ਸਕਮੇਤ੍ਤਂ ਕਥੇਤੁਂ ਇਦਮਾਰਦ੍ਧਂ. ਤਤ੍ਥ ਸਤ੍ਤਾ ਪਾਣਾ ਭੂਤਾਤਿ ਸਬ੍ਬਾਨੇਤਾਨਿ ਪੁਗ੍ਗਲਵੇਵਚਨਾਨੇਵ. ਭਦ੍ਰਾਨਿ ਪਸ੍ਸਨ੍ਤੂਤਿ ਭਦ੍ਰਾਨਿ ਆਰਮ੍ਮਣਾਨਿ ਪਸ੍ਸਨ੍ਤੁ. ਮਾ ਕਞ੍ਚਿ ਪਾਪਮਾਗਮਾਤਿ ਕਞ੍ਚਿ ਸਤ੍ਤਂ ਪਾਪਕਂ ਲਾਮਕਂ ਮਾ ਆਗਚ੍ਛਤੁ. ਅਪ੍ਪਮਾਣੋ ਬੁਦ੍ਧੋਤਿ ਏਤ੍ਥ ਬੁਦ੍ਧੋਤਿ ਬੁਦ੍ਧਗੁਣਾ ਵੇਦਿਤਬ੍ਬਾ. ਤੇ ਹਿ ਅਪ੍ਪਮਾਣਾ ਨਾਮ. ਸੇਸਪਦਦ੍ਵਯੇਪਿ ਏਸੇਵ ਨਯੋ. ਪਮਾਣਵਨ੍ਤਾਨੀਤਿ ਗੁਣਪ੍ਪਮਾਣੇਨ ਯੁਤ੍ਤਾਨਿ. ਉਣ੍ਣਨਾਭੀਤਿ ਲੋਮਸਨਾਭਿਕੋ ਮਕ੍ਕਟਕੋ. ਸਰਬੂਤਿ ਘਰਗੋਲਿਕਾ. ਕਤਾ ਮੇ ਰਕ੍ਖਾ, ਕਤਾ ਮੇ ਪਰਿਤ੍ਤਾਤਿ ਮਯਾ ਏਤ੍ਤਕਸ੍ਸ ਜਨਸ੍ਸ ਰਕ੍ਖਾ ਚ ਪਰਿਤ੍ਤਾਣਞ੍ਚ ਕਤਂ. ਪਟਿਕ੍ਕਮਨ੍ਤੁ ਭੂਤਾਨੀਤਿ ਸਬ੍ਬੇਪਿ ਮੇ ਕਤਪਰਿਤ੍ਤਾਣਾ ਸਤ੍ਤਾ ਅਪਗਚ੍ਛਨ੍ਤੁ, ਮਾ ਮਂ ਵਿਹੇਠਯਿਂਸੂਤਿ ਅਤ੍ਥੋ.
੮. ਦੇਵਦਤ੍ਤਸੁਤ੍ਤਵਣ੍ਣਨਾ
੬੮. ਅਟ੍ਠਮੇ ਅਚਿਰਪਕ੍ਕਨ੍ਤੇ ਦੇਵਦਤ੍ਤੇਤਿ ਸਙ੍ਘਂ ਭਿਨ੍ਦਿਤ੍ਵਾ ਨਚਿਰਪਕ੍ਕਨ੍ਤੇ. ਪਰਾਭਵਾਯਾਤਿ ਅਵਡ੍ਢਿਯਾ ਵਿਨਾਸਾਯ. ਅਸ੍ਸਤਰੀਤਿ ਵਲ਼ਵਾਯ ਕੁਚ੍ਛਿਸ੍ਮਿਂ ਗਦ੍ਰਭਸ੍ਸ ਜਾਤਾ. ਅਤ੍ਤਵਧਾਯ ਗਬ੍ਭਂ ਗਣ੍ਹਾਤੀਤਿ ਤਂ ਅਸ੍ਸੇਨ ਸਦ੍ਧਿਂ ਸਮ੍ਪਯੋਜੇਨ੍ਤਿ, ਸਾ ਗਬ੍ਭਂ ਗਣ੍ਹਿਤ੍ਵਾ ਕਾਲੇ ਸਮ੍ਪਤ੍ਤੇ ਵਿਜਾਯਿਤੁਂ ਨਸਕ੍ਕੋਨ੍ਤੀ ਪਾਦੇਹਿ ਭੂਮਿਂ ਪਹਰਨ੍ਤੀ ਤਿਟ੍ਠਤਿ. ਅਥਸ੍ਸਾ ਚਤ੍ਤਾਰੋ ਪਾਦੇ ਚਤੂਸੁ ਖਾਣੂਸੁ ਬਨ੍ਧਿਤ੍ਵਾ ਕੁਚ੍ਛਿਂ ਫਾਲੇਤ੍ਵਾ ਪੋਤਕਂ ਨੀਹਰਨ੍ਤਿ. ਸਾ ਤਤ੍ਥੇਵ ਮਰਤਿ. ਤੇਨੇਤਂ ਵੁਤ੍ਤਂ.
੯. ਪਧਾਨਸੁਤ੍ਤਵਣ੍ਣਨਾ
੬੯. ਨਵਮੇ ਕਿਲੇਸਾਨਂ ਸਂਵਰਤ੍ਥਾਯ ਪਵੇਸਨਦ੍ਵਾਰਂ ਪਿਦਹਨਤ੍ਥਾਯ ਪਧਾਨਂ ਸਂਵਰਪ੍ਪਧਾਨਂ, ਪਜਹਨਤ੍ਥਾਯ ਪਧਾਨਂ ਪਹਾਨਪ੍ਪਧਾਨਂ, ਕੁਸਲਾਨਂ ਧਮ੍ਮਾਨਂ ਬ੍ਰੂਹਨਤ੍ਥਾਯ ਵਡ੍ਢਨਤ੍ਥਾਯ ਪਧਾਨਂ ਭਾਵਨਾਪ੍ਪਧਾਨਂ, ਤੇਸਂਯੇਵ ਅਨੁਰਕ੍ਖਣਤ੍ਥਾਯ ਪਧਾਨਂ ਅਨੁਰਕ੍ਖਣਾਪ੍ਪਧਾਨਂ.
੧੦. ਅਧਮ੍ਮਿਕਸੁਤ੍ਤਵਣ੍ਣਨਾ
੭੦. ਦਸਮੇ ਅਧਮ੍ਮਿਕਾ ਹੋਨ੍ਤੀਤਿ ਪੋਰਾਣਕਰਾਜੂਹਿ ਠਪਿਤਂ ਦਸਭਾਗਬਲਿਞ੍ਚੇਵ ਅਪਰਾਧਾਨੁਰੂਪਞ੍ਚ ਦਣ੍ਡਂ ਅਗ੍ਗਹੇਤ੍ਵਾ ਅਤਿਰੇਕਬਲਿਨੋ ਚੇਵ ਅਤਿਰੇਕਦਣ੍ਡਸ੍ਸ ਚ ਗਹਣੇਨ ਅਧਮ੍ਮਿਕਾ. ਰਾਜਾਯੁਤ੍ਤਾਤਿ ਰਞ੍ਞੋ ਜਨਪਦੇਸੁ ਕਿਚ੍ਚਸਂਵਿਧਾਯਕਾ ਆਯੁਤ੍ਤਕਪੁਰਿਸਾ. ਬ੍ਰਾਹ੍ਮਣਗਹਪਤਿਕਾਤਿ ਅਨ੍ਤੋਨਗਰਵਾਸਿਨੋ ਬ੍ਰਾਹ੍ਮਣਗਹਪਤਯੋ. ਨੇਗਮਜਾਨਪਦਾਤਿ ਨਿਗਮਵਾਸਿਨੋ ਚੇਵ ਜਨਪਦਵਾਸਿਨੋ ਚ. ਵਿਸਮਨ੍ਤਿ ਵਿਸਮਾ ਹੁਤ੍ਵਾ, ਅਸਮਯੇਨ ਵਾਯਨ੍ਤੀਤਿ ਅਤ੍ਥੋ. ਵਿਸਮਾਤਿ ਨ ਸਮਾ, ਅਤਿਥਦ੍ਧਾ ਵਾ ਅਤਿਮੁਦੁਕਾ ਵਾਤਿ ਅਤ੍ਥੋ. ਅਪਞ੍ਜਸਾਤਿ ਮਗ੍ਗਤੋ ਅਪਗਤਾ, ਉਮ੍ਮਗ੍ਗਗਾਮਿਨੋ ਹੁਤ੍ਵਾ ਵਾਯਨ੍ਤੀਤਿ ਅਤ੍ਥੋ. ਦੇਵਤਾ ਪਰਿਕੁਪਿਤਾ ਭਵਨ੍ਤੀਤਿ ਵਾਤੇਸੁ ਹਿ ਵਿਸਮੇਸੁ ਅਪਞ੍ਜਸੇਸੁ ਵਾਯਨ੍ਤੇਸੁ ਰੁਕ੍ਖਾ ਭਿਜ੍ਜਨ੍ਤਿ, ਵਿਮਾਨਾਨਿ ਭਿਜ੍ਜਨ੍ਤਿ. ਤਸ੍ਮਾ ਦੇਵਤਾ ਪਰਿਕੁਪਿਤਾ ਭਵਨ੍ਤਿ, ਤਾ ਦੇਵਸ੍ਸ ਸਮ੍ਮਾ ਵਸ੍ਸਿਤੁਂ ਨ ਦੇਨ੍ਤਿ. ਤੇਨ ਵੁਤ੍ਤਂ ਦੇਵੋ ਨ ਸਮ੍ਮਾ ਧਾਰਂ ਅਨੁਪ੍ਪਵੇਚ੍ਛਤੀਤਿ. ਵਿਸਮਪਾਕਾਨਿ ਸਸ੍ਸਾਨਿ ਭਵਨ੍ਤੀਤਿ ਏਕਸ੍ਮਿਂ ਠਾਨੇ ਗਬ੍ਭੀਨਿ ਹੋਨ੍ਤਿ, ਏਕਸ੍ਮਿਂ ਸਞ੍ਜਾਤਖੀਰਾਨਿ, ਏਕਂ ਠਾਨਂ ਪਚ੍ਚਤੀਤਿ ਏਵਂ ਵਿਸਮਂ ਪਾਕਾਨਿ ਸਸ੍ਸਾਨਿ ਭਵਨ੍ਤਿ.
ਸਮਂ ਨਕ੍ਖਤ੍ਤਾਨਿ ਤਾਰਕਰੂਪਾਨਿ ਪਰਿਵਤ੍ਤਨ੍ਤੀਤਿ ਯਥਾ ਕਤ੍ਤਿਕਪੁਣ੍ਣਮਾ ਕਤ੍ਤਿਕਨਕ੍ਖਤ੍ਤਮੇਵ ਲਭਤਿ, ਮਿਗਸਿਰਪੁਣ੍ਣਮਾ ਮਿਗਸਿਰਨਕ੍ਖਤ੍ਤਮੇਵਾਤਿ ਏਵਂ ਤਸ੍ਮਿਂ ਤਸ੍ਮਿਂ ਮਾਸੇ ਸਾ ਸਾ ਪੁਣ੍ਣਮਾ ਤਂ ਤਂ ਨਕ੍ਖਤ੍ਤਮੇਵ ਲਭਤਿ, ਤਥਾ ਸਮ੍ਮਾ ਪਰਿਵਤ੍ਤਨ੍ਤਿ. ਸਮਂ ਵਾਤਾ ਵਾਯਨ੍ਤੀਤਿ ਅਵਿਸਮਾ ਹੁਤ੍ਵਾ ਸਮਯਸ੍ਮਿਂਯੇਵ ਵਾਯਨ੍ਤਿ, ਛ ਮਾਸੇ ਉਤ੍ਤਰਾ ਵਾਤਾ, ਛ ਮਾਸੇਦਕ੍ਖਿਣਾਤਿ ਏਵਂ ਤੇਸਂ ਤੇਸਂ ਜਨਪਦਾਨਂ ਅਨੁਰੂਪੇ ਸਮਯੇ ਵਾਯਨ੍ਤਿ. ਸਮਾਤਿ ਸਮਪ੍ਪਵਤ੍ਤਿਨੋ ਨਾਤਿਥਦ੍ਧਾ ਨਾਤਿਮੁਦੂ. ਪਞ੍ਜਸਾਤਿ ਮਗ੍ਗਪ੍ਪਟਿਪਨ੍ਨਾ, ਮਗ੍ਗੇਨੇਵ ਵਾਯਨ੍ਤਿ, ਨੋ ਅਮਗ੍ਗੇਨਾਤਿ ਅਤ੍ਥੋ.
ਜਿਮ੍ਹਂ ਗਚ੍ਛਤੀਤਿ ਕੁਟਿਲਂ ਗਚ੍ਛਤਿ, ਅਤਿਤ੍ਥਂ ਗਣ੍ਹਾਤਿ. ਨੇਤ੍ਤੇ ਜਿਮ੍ਹਂ ਗਤੇ ਸਤੀਤਿ ਨਯਤੀਤਿ ਨੇਤ੍ਤਾ. ਤਸ੍ਮਿਂ ਨੇਤ੍ਤੇ ਜਿਮ੍ਹਂ ਗਤੇ ਕੁਟਿਲਂ ਗਨ੍ਤ੍ਵਾ ਅਤਿਤ੍ਥਂ ਗਣ੍ਹਨ੍ਤੇ ਇਤਰਾਪਿ ਅਤਿਤ੍ਥਮੇਵ ਗਣ੍ਹਨ੍ਤੀਤਿ ਅਤ੍ਥੋ. ਨੇਤੇਤਿਪਿ ਪਾਠੋ. ਦੁਕ੍ਖਂ ਸੇਤੀਤਿ ਦੁਕ੍ਖਂ ਸਯਤਿ, ਦੁਕ੍ਖਿਤਂ ਹੋਤੀਤਿ ਅਤ੍ਥੋ.
ਪਤ੍ਤਕਮ੍ਮਵਗ੍ਗੋ ਦੁਤਿਯੋ.
(੮) ੩. ਅਪਣ੍ਣਕਵਗ੍ਗੋ
੧. ਪਧਾਨਸੁਤ੍ਤਵਣ੍ਣਨਾ
੭੧. ਤਤਿਯਵਗ੍ਗਸ੍ਸ ਪਠਮੇ ਅਪਣ੍ਣਕਪ੍ਪਟਿਪਦਨ੍ਤਿ ਅਵਿਰਦ੍ਧਪ੍ਪਟਿਪਦਂ. ਯੋਨਿ ਚਸ੍ਸ ਆਰਦ੍ਧਾ ਹੋਤੀਤਿ ਕਾਰਣਞ੍ਚਸ੍ਸ ਪਰਿਪੁਣ੍ਣਂ ਹੋਤਿ. ਆਸਵਾਨਂ ਖਯਾਯਾਤਿ ਅਰਹਤ੍ਤਤ੍ਥਾਯ. ਦੁਤਿਯਂ ਉਤ੍ਤਾਨਮੇਵ.
੩. ਸਪ੍ਪੁਰਿਸਸੁਤ੍ਤਵਣ੍ਣਨਾ
੭੩. ਤਤਿਯੇ ਅਵਣ੍ਣੋਤਿ ਅਗੁਣੋ. ਪਾਤੁ ਕਰੋਤੀਤਿ ਕਥੇਤਿ, ਪਾਕਟਂ ਕਰੋਤਿ. ਪਞ੍ਹਾਭਿਨੀਤੋਤਿ ਪਞ੍ਹਤ੍ਥਾਯ ਅਭਿਨੀਤੋ. ਅਹਾਪੇਤ੍ਵਾ ਅਲਮ੍ਬਿਤ੍ਵਾਤਿ ਅਪਰਿਹੀਨਂ ਅਲਮ੍ਬਿਤਂ ਕਤ੍ਵਾ. ਏਤ੍ਥ ਚ ਅਸਪ੍ਪੁਰਿਸੋ ਪਾਪਿਚ੍ਛਤਾਯ ਅਤ੍ਤਨੋ ਅਵਣ੍ਣਂ ਛਾਦੇਤਿ, ਸਪ੍ਪੁਰਿਸੋ ਲਜ੍ਜਿਤਾਯ ਅਤ੍ਤਨੋ ਵਣ੍ਣਂ. ਇਦਾਨਿ ਯਸ੍ਮਾ ਅਸਪ੍ਪੁਰਿਸੋ ਹਿਰੋਤ੍ਤਪ੍ਪਰਹਿਤੋ ਸਂਵਾਸੇਨ ਅਵਜਾਨਾਤਿ, ਸਪ੍ਪੁਰਿਸੋ ਪਨ ਹਿਰੋਤ੍ਤਪ੍ਪਸਮਨ੍ਨਾਗਤੋ ਸਂਵਾਸੇਨਾਪਿ ਨਾਵਜਾਨਾਤਿ. ਤਸ੍ਮਾ ਅਸਪ੍ਪੁਰਿਸਭਾਵਸਾਧਕਂ ਅਧੁਨਾਗਤਵਧੁਕੋਪਮ੍ਮਂ ਦਸ੍ਸੇਤੁਂ ਸੇਯ੍ਯਥਾਪਿ, ਭਿਕ੍ਖਵੇ, ਵਧੁਕਾਤਿਆਦਿਮਾਹ. ਤਤ੍ਥ ਵਧੁਕਾਤਿ ਸੁਣਿਸਾ. ਤਿਬ੍ਬਨ੍ਤਿ ਬਹਲਂ. ਸੇਸਮੇਤ੍ਥ ਉਤ੍ਤਾਨਤ੍ਥਮੇਵਾਤਿ.
੪-੫. ਅਗ੍ਗਸੁਤ੍ਤਦ੍ਵਯਵਣ੍ਣਨਾ
੭੪-੭੫. ਚਤੁਤ੍ਥੇ ਸੀਲਗ੍ਗਨ੍ਤਿ ਅਗ੍ਗਪ੍ਪਤ੍ਤਂ ਉਤ੍ਤਮਸੀਲਂ. ਏਸੇਵ ਨਯੋ ਸਬ੍ਬਤ੍ਥ. ਪਞ੍ਚਮੇ ਰੂਪਗ੍ਗਨ੍ਤਿ ਯਂ ਰੂਪਂ ਸਮ੍ਮਸਿਤ੍ਵਾ ਅਰਹਤ੍ਤਂ ਪਾਪੁਣਾਤਿ, ਇਦਂ ਰੂਪਗ੍ਗਂ ਨਾਮ. ਸੇਸੇਸੁਪਿ ਏਸੇਵ ਨਯੋ. ਭਵਗ੍ਗਨ੍ਤਿ ਏਤ੍ਥ ਪਨ ਯਸ੍ਮਿਂ ਅਤ੍ਤਭਾਵੇ ਠਿਤੋ ਅਰਹਤ੍ਤਂ ਪਾਪੁਣਾਤਿ, ਏਤਂ ਭਵਗ੍ਗਂ ਨਾਮਾਤਿ.
੬. ਕੁਸਿਨਾਰਸੁਤ੍ਤਵਣ੍ਣਨਾ
੭੬. ਛਟ੍ਠੇ ਉਪਵਤ੍ਤਨੇਤਿ ਪਾਚੀਨਗਤਾਯ ਸਾਲਪਨ੍ਤਿਯਾ ਉਤ੍ਤਰੇਨ ਨਿਵਤ੍ਤਿਤ੍ਵਾ ਠਿਤਾਯ ਵੇਮਜ੍ਝਟ੍ਠਾਨੇ. ਅਨ੍ਤਰੇਨ ਯਮਕਸਾਲਾਨਨ੍ਤਿ ਦ੍ਵਿਨ੍ਨਂ ਸਾਲਰੁਕ੍ਖਾਨਂ ਅਨ੍ਤਰੇ. ਕਙ੍ਖਾਤਿ ਦ੍ਵੇਲ਼੍ਹਕਂ. ਵਿਮਤੀਤਿ ਵਿਨਿਚ੍ਛਿਤੁਂ ਅਸਮਤ੍ਥਤਾ. ‘‘ਬੁਦ੍ਧੋ ਨੁ ਖੋ ਨ ਬੁਦ੍ਧੋ ਨੁ ਖੋ, ਧਮ੍ਮੋ ਨੁ ਖੋ ਨ ਧਮ੍ਮੋ ਨੁ ਖੋ, ਸਙ੍ਘੋ ਨੁ ਖੋ ਨ ਸਙ੍ਘੋ ਨੁ ਖੋ, ਮਗ੍ਗੋ ਨੁ ਖੋ ਨ ਮਗ੍ਗੋ ਨੁ ਖੋ, ਪਟਿਪਦਾ ਨੁ ਖੋ ਨ ਪਟਿਪਦਾ ਨੁ ਖੋ’’ਤਿ ਯਸ੍ਸ ਸਂਸਯੋ ਉਪ੍ਪਜ੍ਜੇਯ੍ਯ, ਤਂ ਵੋ ਵਦਾਮਿ ਪੁਚ੍ਛਥ, ਭਿਕ੍ਖਵੇਤਿ ਅਯਮੇਤ੍ਥ ਸਙ੍ਖੇਪਤ੍ਥੋ. ਸਤ੍ਥੁਗਾਰਵੇਨਪਿ ਨ ਪੁਚ੍ਛੇਯ੍ਯਾਥਾਤਿ ‘‘ਮਯਂ ਸਤ੍ਥੁ ਸਨ੍ਤਿਕੇ ਪਬ੍ਬਜਿਮ੍ਹ, ਚਤ੍ਤਾਰੋ ਪਚ੍ਚਯਾਪਿ ਨੋ ਸਤ੍ਥੁ ਸਨ੍ਤਕਾਵ. ਤੇ ਮਯਂ ਏਤ੍ਤਕਂ ਕਾਲਂ ਕਙ੍ਖਂ ਅਕਤ੍ਵਾ ਨ ਅਰਹਾਮ ਅਜ੍ਜ ਪਚ੍ਛਿਮੇ ਕਾਲੇ ਕਙ੍ਖਂ ਕਾਤੁ’’ਨ੍ਤਿ ਸਚੇ ਏਵਂ ਸਤ੍ਥਰਿ ਗਾਰਵੇਨ ਨ ਪੁਚ੍ਛਥ. ਸਹਾਯਕੋਪਿ, ਭਿਕ੍ਖਵੇ, ਸਹਾਯਕਸ੍ਸ ਆਰੋਚੇਤੂਤਿ ਤੁਮ੍ਹਾਕਂ ਯੋ ਯਸ੍ਸ ਭਿਕ੍ਖੁਸ੍ਸ ਸਨ੍ਦਿਟ੍ਠੋ ਸਮ੍ਭਤ੍ਤੋ, ਸੋ ਤਸ੍ਸ ਆਰੋਚੇਤੁ, ਅਹਂ ਏਕਸ੍ਸ ਭਿਕ੍ਖੁਸ੍ਸ ਕਥੇਸ੍ਸਾਮਿ, ਤਸ੍ਸ ਕਥਂ ਸੁਤ੍ਵਾ ਸਬ੍ਬੇ ਨਿਕ੍ਕਙ੍ਖਾ ਭਵਥਾਤਿ ਦਸ੍ਸੇਤਿ. ਏਵਂ ਪਸਨ੍ਨੋਤਿ ਏਵਂ ਸਦ੍ਦਹਾਮਿ ਅਹਨ੍ਤਿ ਅਤ੍ਥੋ. ਞਾਣਮੇਵਾਤਿ ਨਿਕ੍ਕਙ੍ਖਭਾਵਪਚ੍ਚਕ੍ਖਕਰਣਞਾਣਂਯੇਵ ਏਤ੍ਥ ਤਥਾਗਤਸ੍ਸ, ਨ ਸਦ੍ਧਾਮਤ੍ਤਨ੍ਤਿ ਅਤ੍ਥੋ. ਇਮੇਸਞ੍ਹਿ, ਆਨਨ੍ਦਾਤਿ ਇਮੇਸਂ ਅਨ੍ਤੋਸਾਣਿਯਂ ਨਿਸਿਨ੍ਨਾਨਂ ਪਞ੍ਚਨ੍ਨਂ ਭਿਕ੍ਖੁਸਤਾਨਂ. ਯੋ ਪਚ੍ਛਿਮਕੋਤਿ ਯੋ ਗੁਣਵਸੇਨ ਪਚ੍ਛਿਮਕੋ, ਆਨਨ੍ਦਤ੍ਥੇਰਂਯੇਵ ਸਨ੍ਧਾਯਾਹ.
੭. ਅਚਿਨ੍ਤੇਯ੍ਯਸੁਤ੍ਤਵਣ੍ਣਨਾ
੭੭. ਸਤ੍ਤਮੇ ਅਚਿਨ੍ਤੇਯ੍ਯਾਨੀਤਿ ਚਿਨ੍ਤੇਤੁਂ ਅਯੁਤ੍ਤਾਨਿ. ਨ ਚਿਨ੍ਤੇਤਬ੍ਬਾਨੀਤਿ ਅਚਿਨ੍ਤੇਯ੍ਯਤ੍ਤਾਯੇਵ ਨ ਚਿਨ੍ਤੇਤਬ੍ਬਾਨਿ. ਯਾਨਿ ਚਿਨ੍ਤੇਨ੍ਤੋਤਿ ਯਾਨਿ ਕਾਰਣਾਨਿ ਚਿਨ੍ਤੇਨ੍ਤੋ. ਉਮ੍ਮਾਦਸ੍ਸਾਤਿ ਉਮ੍ਮਤ੍ਤਕਭਾਵਸ੍ਸ. ਵਿਘਾਤਸ੍ਸਾਤਿ ਦੁਕ੍ਖਸ੍ਸ. ਬੁਦ੍ਧਵਿਸਯੋਤਿ ਬੁਦ੍ਧਾਨਂ ਵਿਸਯੋ, ਸਬ੍ਬਞ੍ਞੁਤਞ੍ਞਾਣਾਦੀਨਂ ਬੁਦ੍ਧਗੁਣਾਨਂ ਪਵਤ੍ਤਿ ਚ ਆਨੁਭਾਵੋ ਚ. ਝਾਨਵਿਸਯੋਤਿ ਅਭਿਞ੍ਞਾਝਾਨਵਿਸਯੋ. ਕਮ੍ਮਵਿਪਾਕੋਤਿ ਦਿਟ੍ਠਧਮ੍ਮਵੇਦਨੀਯਾਦੀਨਂ ਕਮ੍ਮਾਨਂ ਵਿਪਾਕੋ. ਲੋਕਚਿਨ੍ਤਾਤਿ ‘‘ਕੇਨ ਨੁ ਖੋ ਚਨ੍ਦਿਮਸੂਰਿਯਾ ਕਤਾ, ਕੇਨ ਮਹਾਪਥਵੀ, ਕੇਨ ਮਹਾਸਮੁਦ੍ਦੋ, ਕੇਨ ਸਤ੍ਤਾ ਉਪ੍ਪਾਦਿਤਾ, ਕੇਨ ਪਬ੍ਬਤਾ, ਕੇਨ ਅਮ੍ਬਤਾਲਨਾਲ਼ਿਕੇਰਾਦਯੋ’’ਤਿ ਏਵਰੂਪਾ ਲੋਕਚਿਨ੍ਤਾ.
੮. ਦਕ੍ਖਿਣਸੁਤ੍ਤਵਣ੍ਣਨਾ
੭੮. ਅਟ੍ਠਮੇ ਦਕ੍ਖਿਣਾਵਿਸੁਦ੍ਧਿਯੋਤਿ ਦਾਨਸਙ੍ਖਾਤਾਯ ਦਕ੍ਖਿਣਾਯ ਵਿਸੁਜ੍ਝਨਕਾਰਣਾਨਿ. ਦਾਯਕਤੋ ਵਿਸੁਜ੍ਝਤੀਤਿ ਮਹਪ੍ਫਲਭਾਵੇਨ ਵਿਸੁਜ੍ਝਤਿ, ਮਹਪ੍ਫਲਾ ਹੋਤੀਤਿ ਅਤ੍ਥੋ. ਕਲ੍ਯਾਣਧਮ੍ਮੋਤਿ ਸੁਚਿਧਮ੍ਮੋ. ਪਾਪਧਮ੍ਮੋਤਿ ਲਾਮਕਧਮ੍ਮੋ. ਦਾਯਕਤੋ ਵਿਸੁਜ੍ਝਤੀਤਿ ਏਤ੍ਥ ਵੇਸ੍ਸਨ੍ਤਰਮਹਾਰਾਜਾ ਕਥੇਤਬ੍ਬੋ. ਸੋ ਹਿ ਜੂਜਕਬ੍ਰਾਹ੍ਮਣਸ੍ਸ ਦਾਰਕੇ ਦਤ੍ਵਾ ਮਹਾਪਥਵਿਂ ਕਮ੍ਪੇਸਿ. ਪਟਿਗ੍ਗਾਹਕਤੋ ਵਿਸੁਜ੍ਝਤੀਤਿ ਏਤ੍ਥ ਕਲ੍ਯਾਣੀਨਦੀਮੁਖਦ੍ਵਾਰਵਾਸੀ ਕੇਵਟ੍ਟੋ ਕਥੇਤਬ੍ਬੋ. ਸੋ ਕਿਰ ਦੀਘਸੁਮਤ੍ਥੇਰਸ੍ਸ ਤਿਕ੍ਖਤ੍ਤੁਂ ਪਿਣ੍ਡਪਾਤਂ ਦਤ੍ਵਾ ਮਰਣਮਞ੍ਚੇ ਨਿਪਨ੍ਨੋ ‘‘ਅਯ੍ਯਸ੍ਸ ਮਂ ਦੀਘਸੁਮਤ੍ਥੇਰਸ੍ਸ ਦਿਨ੍ਨਪਿਣ੍ਡਪਾਤੋ ਉਦ੍ਧਰਤੀ’’ਤਿ ਆਹ. ਨੇਵ ਦਾਯਕਤੋਤਿ ਏਤ੍ਥ ਵਡ੍ਢਮਾਨਵਾਸੀ ਲੁਦ੍ਦਕੋ ਕਥੇਤਬ੍ਬੋ. ਸੋ ਕਿਰ ਪੇਤਦਕ੍ਖਿਣਂ ਦੇਨ੍ਤੋ ਏਕਸ੍ਸ ਦੁਸ੍ਸੀਲਸ੍ਸੇਵ ਤਯੋ ਵਾਰੇ ਅਦਾਸਿ. ਤਤਿਯਵਾਰੇ ‘‘ਅਮਨੁਸ੍ਸੋ ਦੁਸ੍ਸੀਲੋ ਮਂ ਵਿਲੁਮ੍ਪਤੀ’’ਤਿ ਵਿਰਵਿ. ਏਕਸ੍ਸ ਸੀਲਵਤੋ ਭਿਕ੍ਖੁਨੋ ਦਤ੍ਵਾ ਪਾਪਿਤਕਾਲੇਯੇਵਸ੍ਸ ਪਾਪੁਣਿ. ਦਾਯਕਤੋ ਚੇਵ ਵਿਸੁਜ੍ਝਤਿ ਪਟਿਗ੍ਗਾਹਕਤੋ ਚਾਤਿ ਏਤ੍ਥ ਅਸਦਿਸਦਾਨਂ ਕਥੇਤਬ੍ਬਨ੍ਤਿ.
੯. ਵਣਿਜ੍ਜਸੁਤ੍ਤਵਣ੍ਣਨਾ
੭੯. ਨਵਮੇ ਤਾਦਿਸਾ ਵਾਤਿ ਤਂਸਦਿਸਾਵ ਤਂਸਰਿਕ੍ਖਕਾਵ. ਛੇਦਗਾਮਿਨੀ ਹੋਤੀਤਿ ਛੇਦਂ ਗਚ੍ਛਤਿ. ਯਂ ਪਤ੍ਥਿਤਂ, ਤਂ ਸਬ੍ਬਂ ਨਸ੍ਸਤੀਤਿ ਅਤ੍ਥੋ. ਨ ਯਥਾਧਿਪ੍ਪਾਯਾ ਹੋਤੀਤਿ ਯਥਾਜ੍ਝਾਸਯਾ ਨ ਹੋਤਿ. ਪਰਾਧਿਪ੍ਪਾਯਾ ਹੋਤੀਤਿ ਪਰਜ੍ਝਾਸਯਾ ਅਜ੍ਝਾਸਯਤੋ ਅਧਿਕਤਰਫਲਾ ਹੋਤਿ. ਸਮਣਂ ਵਾ ਬ੍ਰਾਹ੍ਮਣਂ ਵਾਤਿ ਏਤ੍ਥ ਸਮਿਤਪਾਪਬਾਹਿਤਪਾਪਤਾਹਿ ਸਮਣਬ੍ਰਾਹ੍ਮਣਤਾ ਵੇਦਿਤਬ੍ਬਾ. ਵਦਤੁ, ਭਨ੍ਤੇ, ਪਚ੍ਚਯੇਨਾਤਿ, ਭਨ੍ਤੇ, ਚਤੁਬ੍ਬਿਧੇਨ ਚੀਵਰਾਦਿਨਾ ਪਚ੍ਚਯੇਨ ਵਦੇਯ੍ਯਾਸੀਤਿ ਏਵਂ ਪਵਾਰੇਤਿ ਨਿਮਨ੍ਤੇਤਿ. ਯੇਨ ਪਵਾਰੇਤੀਤਿ ਪਰਿਚ੍ਛਿਨ੍ਦਿਤ੍ਵਾ ਯਤ੍ਤਕੇਨ ਪਵਾਰੇਤਿ. ਤਂ ਨ ਦੇਤੀਤਿ ਤਂ ਸਬ੍ਬਸੋਵ ਨ ਦੇਤਿ. ਨ ਯਥਾਧਿਪ੍ਪਾਯਂ ਦੇਤੀਤਿ ਯਥਾ ਤਸ੍ਸ ਅਜ੍ਝਾਸਯੋ, ਏਵਂ ਦਾਤੁਂ ਨ ਸਕ੍ਕੋਤਿ, ਹਾਪੇਤ੍ਵਾ ਅਪ੍ਪਕਂ ਦੇਤਿ. ਯਥਾਧਿਪ੍ਪਾਯਂ ਦੇਤੀਤਿ ਯਤ੍ਤਕਂ ਸੋ ਇਚ੍ਛਤਿ, ਤਤ੍ਤਕਮੇਵ ਦੇਤਿ. ਪਰਾਧਿਪ੍ਪਾਯਂ ਦੇਤੀਤਿ ਅਪ੍ਪਕਂ ਪਵਾਰੇਤ੍ਵਾ ਅਵਤ੍ਥਰਿਤ੍ਵਾ ਬਹੁਂ ਦੇਤਿ.
੧੦. ਕਮ੍ਬੋਜਸੁਤ੍ਤਵਣ੍ਣਨਾ
੮੦. ਦਸਮੇ ਨੇਵ ਸਭਾਯਂ ਨਿਸੀਦਤੀਤਿ ਵਿਨਿਚ੍ਛਯਕਰਣਤ੍ਥਂ ਵਿਨਿਚ੍ਛਯਸਭਾਯਂ ਨੇਵ ਨਿਸੀਦਤਿ. ਨ ਕਮ੍ਮਨ੍ਤਂ ਪਯੋਜੇਤੀਤਿ ਕਸਿਵਣਿਜ੍ਜਾਦਿਮਹਾਕਮ੍ਮਨ੍ਤਂ ਨਪ੍ਪਯੋਜੇਤਿ. ਨ ਕਮ੍ਬੋਜਂ ਗਚ੍ਛਤੀਤਿ ਭੋਗੇ ਸਮ੍ਭਰਣਤ੍ਥਾਯ ਕਮ੍ਬੋਜਰਟ੍ਠਂ ਨ ਗਚ੍ਛਤਿ. ਦੇਸਨਾਮਤ੍ਤਮੇਵ ਚੇਤਂ, ਯਂ ਕਿਞ੍ਚਿ ਤਿਰੋਰਟ੍ਠਂ ਨ ਗਚ੍ਛਤੀਤਿ ਅਤ੍ਥੋ. ਕੋਧਨੋਤਿਆਦੀਸੁ ਕੋਧਨਤਾਯ ਕੋਧਪਰਿਯੁਟ੍ਠਿਤੋ ਅਤ੍ਥਾਨਤ੍ਥਂ ਨ ਜਾਨਾਤਿ, ਇਸ੍ਸੁਕਿਤਾਯ ਪਰਸਮ੍ਪਤ੍ਤਿਂ ਨ ਸਹਤਿ, ਮਚ੍ਛਰਿਤਾਯ ਧਨਂ ਦਤ੍ਵਾ ਕਿਚ੍ਚਂ ਕਾਤੁਂ ਨ ਸਕ੍ਕੋਤਿ, ਨਿਪ੍ਪਞ੍ਞਤਾਯ ਕਿਚ੍ਚਂ ਸਂਵਿਧਾਤੁਂ ਨ ਸਕ੍ਕੋਤਿ. ਤਸ੍ਮਾ ਏਤਾਨਿ ਸਭਾਨਿਸੀਦਨਾਦੀਨਿ ਨ ਕਰੋਤੀਤਿ.
ਅਪਣ੍ਣਕਵਗ੍ਗੋ ਤਤਿਯੋ.
(੯) ੪. ਮਚਲਵਗ੍ਗੋ
੧-੫. ਪਾਣਾਤਿਪਾਤਾਦਿਸੁਤ੍ਤਪਞ੍ਚਕਵਣ੍ਣਨਾ
੮੧-੮੫. ਚਤੁਤ੍ਥਸ੍ਸ ਪਠਮਾਦੀਨਿ ਉਤ੍ਤਾਨਤ੍ਥਾਨੇਵ. ਪਞ੍ਚਮੇ ‘‘ਨੀਚੇ ਕੁਲੇ ਪਚ੍ਚਾਜਾਤੋ’’ਤਿਆਦਿਕੇਨ ਤਮੇਨ ਯੁਤ੍ਤੋਤਿ ਤਮੋ. ਕਾਯਦੁਚ੍ਚਰਿਤਾਦੀਹਿ ਪੁਨ ਨਿਰਯਤਮੂਪਗਮਨਤੋ ਤਮਪਰਾਯਣੋ. ਇਤਿ ਉਭਯੇਨਪਿ ਖਨ੍ਧਤਮੋਵ ਕਥਿਤੋ ਹੋਤਿ. ‘‘ਅਡ੍ਢੇ ਕੁਲੇ ਪਚ੍ਚਾਜਾਤੋ’’ਤਿਆਦਿਕੇਨ ਜੋਤਿਨਾ ਯੁਤ੍ਤਤੋ ਜੋਤਿ, ਆਲੋਕਭੂਤੋਤਿ ਵੁਤ੍ਤਂ ਹੋਤਿ. ਕਾਯਸੁਚਰਿਤਾਦੀਹਿ ਪੁਨ ਸਗ੍ਗੁਪ੍ਪਤ੍ਤਿਜੋਤਿਭਾਵੂਪਗਮਨਤੋ ਜੋਤਿਪਰਾਯਣੋ. ਇਮਿਨਾ ਨਯੇਨ ਇਤਰੇਪਿ ਦ੍ਵੇ ਵੇਦਿਤਬ੍ਬਾ.
ਵੇਨਕੁਲੇਤਿ ਵਿਲੀਵਕਾਰਕੁਲੇ. ਨੇਸਾਦਕੁਲੇਤਿ ਮਿਗਲੁਦ੍ਦਕਾਦੀਨਂ ਕੁਲੇ. ਰਥਕਾਰਕੁਲੇਤਿ ਚਮ੍ਮਕਾਰਕੁਲੇ. ਪੁਕ੍ਕੁਸਕੁਲੇਤਿ ਪੁਪ੍ਫਛਡ੍ਡਕਕੁਲੇ. ਕਸਿਰਵੁਤ੍ਤਿਕੇਤਿ ਦੁਕ੍ਖਵੁਤ੍ਤਿਕੇ. ਦੁਬ੍ਬਣ੍ਣੋਤਿ ਪਂਸੁਪਿਸਾਚਕੋ ਵਿਯ ਝਾਮਖਾਣੁਵਣ੍ਣੋ. ਦੁਦ੍ਦਸਿਕੋਤਿ ਵਿਜਾਤਮਾਤੁਯਾਪਿ ਅਮਨਾਪਦਸ੍ਸਨੋ. ਓਕੋਟਿਮਕੋਤਿ ਲਕੁਣ੍ਡਕੋ. ਕਾਣੋਤਿ ਏਕਚ੍ਛਿਕਾਣੋ ਵਾ ਉਭਯਚ੍ਛਿਕਾਣੋ ਵਾ. ਕੁਣੀਤਿ ਏਕਹਤ੍ਥਕੁਣੀ ਵਾ ਉਭਯਹਤ੍ਥਕੁਣੀ ਵਾ. ਖਞ੍ਜੋਤਿ ਏਕਪਾਦਖਞ੍ਜੋ ਵਾ ਉਭਯਪਾਦਖਞ੍ਜੋ ਵਾ. ਪਕ੍ਖਹਤੋਤਿ ਹਤਪਕ੍ਖੋ ਪੀਠਸਪ੍ਪੀ. ਪਦੀਪੇਯ੍ਯਸ੍ਸਾਤਿ ਤੇਲਕਪਲ੍ਲਾਦਿਨੋ ਦੀਪਉਪਕਰਣਸ੍ਸ. ਏਵਂ ਖੋ, ਭਿਕ੍ਖਵੇਤਿ ਏਤ੍ਥ ਏਕੋ ਪੁਗ੍ਗਲੋ ਬਹਿਦ੍ਧਾ ਆਲੋਕਂ ਅਦਿਸ੍ਵਾ ਮਾਤੁ ਕੁਚ੍ਛਿਮ੍ਹਿਯੇਵ ਕਾਲਂ ਕਤ੍ਵਾ ਅਪਾਯੇਸੁ ਨਿਬ੍ਬਤ੍ਤਨ੍ਤੋ ਸਕਲਮ੍ਪਿ ਕਪ੍ਪਂ ਸਂਸਰਤਿ. ਸੋਪਿ ਤਮੋਤਮਪਰਾਯਣੋਵ. ਸੋ ਪਨ ਕੁਹਕਪੁਗ੍ਗਲੋ ਭਵੇਯ੍ਯ. ਕੁਹਕਸ੍ਸ ਹਿ ਏਵਰੂਪਾ ਨਿਪ੍ਫਤ੍ਤਿ ਹੋਤੀਤਿ ਵੁਤ੍ਤਂ.
ਏਤ੍ਥ ਚ ‘‘ਨੀਚੇ ਕੁਲੇ’’ਤਿਆਦੀਹਿ ਆਗਮਨਵਿਪਤ੍ਤਿ ਚੇਵ ਪਚ੍ਚੁਪ੍ਪਨ੍ਨਪਚ੍ਚਯਵਿਪਤ੍ਤਿ ਚ ਦਸ੍ਸਿਤਾ. ‘‘ਦਲਿਦ੍ਦੇ’’ਤਿਆਦੀਹਿ ਪਵਤ੍ਤਪਚ੍ਚਯਵਿਪਤ੍ਤਿ, ‘‘ਕਸਿਰਵੁਤ੍ਤਿਕੇ’’ਤਿਆਦੀਹਿ ਆਜੀਵੁਪਾਯਵਿਪਤ੍ਤਿ, ‘‘ਦੁਬ੍ਬਣ੍ਣੋ’’ਤਿਆਦੀਹਿ ਅਤ੍ਤਭਾਵਵਿਪਤ੍ਤਿ, ‘‘ਬਹ੍ਵਾਬਾਧੋ’’ਤਿਆਦੀਹਿ ਦੁਕ੍ਖਕਾਰਣਸਮਾਯੋਗੋ, ‘‘ਨ ਲਾਭੀ’’ਤਿਆਦੀਹਿ ਸੁਖਕਾਰਣਵਿਪਤ੍ਤਿ ਚੇਵ ਉਪਭੋਗਵਿਪਤ੍ਤਿ ਚ, ‘‘ਕਾਯੇਨ ਦੁਚ੍ਚਰਿਤ’’ਨ੍ਤਿਆਦੀਹਿ ਤਮਪਰਾਯਣਭਾਵਸ੍ਸ ਕਾਰਣਸਮਾਯੋਗੋ, ‘‘ਕਾਯਸ੍ਸ ਭੇਦਾ’’ਤਿਆਦੀਹਿ ਸਮ੍ਪਰਾਯਿਕਤਮੂਪਗਮੋ. ਸੁਕ੍ਕਪਕ੍ਖੋ ਵੁਤ੍ਤਪਟਿਪਕ੍ਖਨਯੇਨ ਵੇਦਿਤਬ੍ਬੋ.
੬. ਓਣਤੋਣਤਸੁਤ੍ਤਵਣ੍ਣਨਾ
੮੬. ਛਟ੍ਠੇ ਓਣਤੋਣਤੋਤਿ ਇਦਾਨਿ ਨੀਚਕੋ ਆਯਤਿਮ੍ਪਿ ਨੀਚਕੋ ਭਵਿਸ੍ਸਤਿ. ਓਣਤੁਣ੍ਣਤੋਤਿ ਇਦਾਨਿ ਨੀਚੋ ਆਯਤਿਂ ਉਚ੍ਚੋ ਭਵਿਸ੍ਸਤਿ. ਉਣ੍ਣਤੋਣਤੋਤਿ ਇਦਾਨਿ ਉਚ੍ਚੋ ਆਯਤਿਂ ਨੀਚੋ ਭਵਿਸ੍ਸਤਿ. ਉਣ੍ਣਤੁਣ੍ਣਤੋਤਿ ਇਦਾਨਿ ਉਚ੍ਚੋ ਆਯਤਿਮ੍ਪਿ ਉਚ੍ਚੋ ਭਵਿਸ੍ਸਤਿ. ਵਿਤ੍ਥਾਰੋ ਪਨ ਨੇਸਂ ਪੁਰਿਮਸੁਤ੍ਤਨਯੇਨੇਵ ਵੇਦਿਤਬ੍ਬੋ.
੭. ਪੁਤ੍ਤਸੁਤ੍ਤਵਣ੍ਣਨਾ
੮੭. ਸਤ੍ਤਮੇ ਸਮਣਮਚਲੋਤਿ ਸਮਣਅਚਲੋ, ਮਕਾਰੋ ਪਦਸਨ੍ਧਿਕਰੋ, ਨਿਚ੍ਚਲਸਮਣੋਤਿ ਅਤ੍ਥੋ. ਇਮਿਨਾ ਸਤ੍ਤਵਿਧਮ੍ਪਿ ਸੇਖਂ ਦਸ੍ਸੇਤਿ. ਸੋ ਹਿ ਸਾਸਨੇ ਮੂਲਜਾਤਾਯ ਸਦ੍ਧਾਯ ਪਤਿਟ੍ਠਿਤਤ੍ਤਾ ਅਚਲੋ ਨਾਮ. ਸਮਣਪੁਣ੍ਡਰੀਕੋਤਿ ਪੁਣ੍ਡਰੀਕਸਦਿਸੋ ਸਮਣੋ. ਪੁਣ੍ਡਰੀਕਂ ਨਾਮ ਊਨਸਤਪਤ੍ਤਂ ਸਰੋਰੁਹਂ. ਇਮਿਨਾ ਸੁਕ੍ਖਵਿਪਸ੍ਸਕਖੀਣਾਸਵਂ ਦਸ੍ਸੇਤਿ. ਸੋ ਹਿ ਝਾਨਾਭਿਞ੍ਞਾਨਂ ਅਭਾਵੇਨ ਅਪਰਿਪੁਣ੍ਣਗੁਣਤ੍ਤਾ ਸਮਣਪੁਣ੍ਡਰੀਕੋ ਨਾਮ ਹੋਤਿ. ਸਮਣਪਦੁਮੋਤਿ ਪਦੁਮਸਦਿਸੋ ਸਮਣੋ. ਪਦੁਮਂ ਨਾਮ ਪਰਿਪੁਣ੍ਣਸਤਪਤ੍ਤਂ ਸਰੋਰੁਹਂ. ਇਮਿਨਾ ਉਭਤੋਭਾਗਵਿਮੁਤ੍ਤਂ ਖੀਣਾਸਵਂ ਦਸ੍ਸੇਤਿ. ਸੋ ਹਿ ਝਾਨਾਭਿਞ੍ਞਾਨਂ ਭਾਵੇਨ ਪਰਿਪੁਣ੍ਣਗੁਣਤ੍ਤਾ ਸਮਣਪਦੁਮੋ ਨਾਮ ਹੋਤਿ. ਸਮਣੇਸੁ ਸਮਣਸੁਖੁਮਾਲੋਤਿ ਸਬ੍ਬੇਸੁਪਿ ਏਤੇਸੁ ਸਮਣੇਸੁ ਸੁਖੁਮਾਲਸਮਣੋ ਮੁਦੁਚਿਤ੍ਤਸਰੀਰੋ ਕਾਯਿਕਚੇਤਸਿਕਦੁਕ੍ਖਰਹਿਤੋ ਏਕਨ੍ਤਸੁਖੀ. ਏਤੇਨ ਅਤ੍ਤਾਨਞ੍ਚੇਵ ਅਤ੍ਤਸਦਿਸੇ ਚ ਦਸ੍ਸੇਤਿ.
ਏਵਂ ਮਾਤਿਕਂ ਨਿਕ੍ਖਿਪਿਤ੍ਵਾ ਇਦਾਨਿ ਪਟਿਪਾਟਿਯਾ ਵਿਭਜਨ੍ਤੋ ਕਥਞ੍ਚ, ਭਿਕ੍ਖਵੇਤਿਆਦਿਮਾਹ. ਤਤ੍ਥ ਸੇਖੋਤਿ ਸਤ੍ਤਵਿਧੋਪਿ ਸੇਖੋ. ਪਾਟਿਪਦੋਤਿ ਪਟਿਪਨ੍ਨਕੋ. ਅਨੁਤ੍ਤਰਂ ਯੋਗਕ੍ਖੇਮਂ ਪਤ੍ਥਯਮਾਨੋ ਵਿਹਰਤੀਤਿ ਅਰਹਤ੍ਤਂ ਪਤ੍ਥਯਨ੍ਤੋ ਵਿਹਰਤਿ. ਮੁਦ੍ਧਾਵਸਿਤ੍ਤਸ੍ਸਾਤਿ ਮੁਦ੍ਧਨਿ ਅਵਸਿਤ੍ਤਸ੍ਸ, ਕਤਾਭਿਸੇਕਸ੍ਸਾਤਿ ਅਤ੍ਥੋ. ਆਭਿਸੇਕੋਤਿ ਅਭਿਸੇਕਂ ਕਾਤੁਂ ਯੁਤ੍ਤੋ. ਅਨਭਿਸਿਤ੍ਤੋਤਿ ਨ ਤਾਵ ਅਭਿਸਿਤ੍ਤੋ. ਮਚਲਪ੍ਪਤ੍ਤੋਤਿ ਰਞ੍ਞੋ ਖਤ੍ਤਿਯਸ੍ਸ ਮੁਦ੍ਧਾਵਸਿਤ੍ਤਸ੍ਸ ਪੁਤ੍ਤਭਾਵੇਨ ਚੇਵ ਪੁਤ੍ਤੇਸੁ ਜੇਟ੍ਠਕਭਾਵੇਨ ਚ ਨ ਤਾਵ ਅਭਿਸਿਤ੍ਤਭਾਵੇਨ ਚ ਅਭਿਸੇਕਪ੍ਪਤ੍ਤਿਅਤ੍ਥਾਯ ਅਚਲਪ੍ਪਤ੍ਤੋ ਨਿਚ੍ਚਲਪਤ੍ਤੋ. ਮਕਾਰੋ ਨਿਪਾਤਮਤ੍ਤਂ. ਕਾਯੇਨ ਫੁਸਿਤ੍ਵਾਤਿ ਨਾਮਕਾਯੇਨ ਫੁਸਿਤ੍ਵਾ.
ਯਾਚਿਤੋਵ ਬਹੁਲਂ ਚੀਵਰਂ ਪਰਿਭੁਞ੍ਜਤੀਤਿ ‘‘ਇਦਂ, ਭਨ੍ਤੇ, ਪਰਿਭੁਞ੍ਜਥਾ’’ਤਿ ਏਵਂ ਦਾਯਕੇਹਿ ਯਾਚਮਾਨੇਹੇਵ ਉਪਨੀਤਂ ਚੀਵਰਂ ਬਹੁਂ ਪਰਿਭੁਞ੍ਜਤਿ, ਕਿਞ੍ਚਿਦੇਵ ਅਯਾਚਿਤਂ, ਬਾਕੁਲਤ੍ਥੇਰੋ ਵਿਯ. ਪਿਣ੍ਡਪਾਤਂ ਖਦਿਰਵਨਮਗ੍ਗੇ ਸੀਵਲਿਤ੍ਥੇਰੋ ਵਿਯ. ਸੇਨਾਸਨਂ ਅਟ੍ਠਕਨਾਗਰਸੁਤ੍ਤੇ (ਮ. ਨਿ. ੨.੧੭ ਆਦਯੋ; ਅ. ਨਿ. ੧੧.੧੬ ਆਦਯੋ) ਆਨਨ੍ਦਤ੍ਥੇਰੋ ਵਿਯ. ਗਿਲਾਨਪਚ੍ਚਯਂ ਪਿਲਿਨ੍ਦਵਚ੍ਛਥੇਰੋ ਵਿਯ. ਤ੍ਯਸ੍ਸਾਤਿ ਤੇ ਅਸ੍ਸ. ਮਨਾਪੇਨੇਵਾਤਿ ਮਨਂ ਅਲ੍ਲੀਯਨਕੇਨ. ਸਮੁਦਾਚਰਨ੍ਤੀਤਿ ਕਤ੍ਤਬ੍ਬਕਿਚ੍ਚਾਨਿ ਕਰੋਨ੍ਤਿ ਪਵਤ੍ਤਨ੍ਤਿ ਵਾ. ਉਪਹਾਰਂ ਉਪਹਰਨ੍ਤੀਤਿ ਕਾਯਿਕਚੇਤਸਿਕਉਪਹਾਰਂ ਉਪਹਰਨ੍ਤਿ ਉਪਨੀਯਨ੍ਤਿ. ਸਨ੍ਨਿਪਾਤਿਕਾਨੀਤਿ ਤਿਣ੍ਣਮ੍ਪਿ ਸਨ੍ਨਿਪਾਤੇਨ ਨਿਬ੍ਬਤ੍ਤਾਨਿ. ਉਤੁਪਰਿਣਾਮਜਾਨੀਤਿ ਉਤੁਪਰਿਣਾਮਤੋ ਅਤਿਸੀਤਅਤਿਉਣ੍ਹਉਤੁਤੋ ਜਾਤਾਨਿ. ਵਿਸਮਪਰਿਹਾਰਜਾਨੀਤਿ ਅਚ੍ਚਾਸਨਅਤਿਟ੍ਠਾਨਾਦਿਕਾ ਵਿਸਮਪਰਿਹਾਰਤੋ ਜਾਤਾਨਿ. ਓਪਕ੍ਕਮਿਕਾਨੀਤਿ ਵਧਬਨ੍ਧਨਾਦਿਉਪਕ੍ਕਮੇਨ ਨਿਬ੍ਬਤ੍ਤਾਨਿ. ਕਮ੍ਮਵਿਪਾਕਜਾਨੀਤਿ ਵਿਨਾਪਿ ਇਮੇਹਿ ਕਾਰਣੇਹਿ ਕੇਵਲਂ ਪੁਬ੍ਬੇ ਕਤਕਮ੍ਮਵਿਪਾਕਵਸੇਨੇਵ ਜਾਤਾਨਿ. ਚਤੁਨ੍ਨਂ ਝਾਨਾਨਨ੍ਤਿ ਏਤ੍ਥ ਖੀਣਾਸਵਾਨਮ੍ਪਿ ਬੁਦ੍ਧਾਨਮ੍ਪਿ ਕਿਰਿਯਜ੍ਝਾਨਾਨੇਵ ਅਧਿਪ੍ਪੇਤਾਨਿ. ਸੇਸਂ ਉਤ੍ਤਾਨਤ੍ਥਮੇਵਾਤਿ.
੮. ਸਂਯੋਜਨਸੁਤ੍ਤਵਣ੍ਣਨਾ
੮੮. ਅਟ੍ਠਮੇ ਸਾਸਨੇ ਲਦ੍ਧਪ੍ਪਤਿਟ੍ਠਤ੍ਤਾ ਸੋਤਾਪਨ੍ਨੋਵ ਸਮਣਮਚਲੋਤਿ ਵੁਤ੍ਤੋ, ਨਾਤਿਬਹੁਗੁਣਤ੍ਤਾ ਨ ਬਹੁਪਤ੍ਤਂ ਵਿਯ ਸਰੋਰੁਹਂ ਸਕਦਾਗਾਮੀ ਸਮਣਪੁਣ੍ਡਰੀਕੋਤਿ, ਤਤੋ ਬਹੁਤਰਗੁਣਤ੍ਤਾ ਸਤਪਤ੍ਤਂ ਵਿਯ ਸਰੋਰੁਹਂ ਅਨਾਗਾਮੀ ਸਮਣਪਦੁਮੋਤਿ, ਥਦ੍ਧਭਾਵਕਰਾਨਂ ਕਿਲੇਸਾਨਂ ਸਬ੍ਬਸੋ ਸਮੁਚ੍ਛਿਨ੍ਨਤ੍ਤਾ ਮੁਦੁਭਾਵਪ੍ਪਤ੍ਤੋ ਖੀਣਾਸਵੋ ਸਮਣਸੁਖੁਮਾਲੋਤਿ.
੯. ਸਮ੍ਮਾਦਿਟ੍ਠਿਸੁਤ੍ਤਵਣ੍ਣਨਾ
੮੯. ਨਵਮੇ ਸਮ੍ਮਾਦਿਟ੍ਠਿਕੋਤਿਆਦੀਹਿ ਅਟ੍ਠਙ੍ਗਿਕਮਗ੍ਗਵਸੇਨ ਪਠਮਸੁਤ੍ਤੇ ਵਿਯ ਸਤ੍ਤ ਸੇਖਾ ਗਹਿਤਾ. ਦੁਤਿਯਵਾਰੇ ਦਸਙ੍ਗਿਕਮਗ੍ਗਵਸੇਨ ਵਾ ਅਰਹਤ੍ਤਫਲਞਾਣਅਰਹਤ੍ਤਫਲਵਿਮੁਤ੍ਤੀਹਿ ਸਦ੍ਧਿਂ, ਅਟ੍ਠਙ੍ਗਿਕਮਗ੍ਗਵਸੇਨ ਵਾ ਸੁਕ੍ਖਵਿਪਸ੍ਸਕਖੀਣਾਸਵੋ ਕਥਿਤੋ, ਤਤਿਯਵਾਰੇ ਉਭਤੋਭਾਗਵਿਮੁਤ੍ਤੋ, ਚਤੁਤ੍ਥਵਾਰੇ ਤਥਾਗਤੋ ਚ ਤਥਾਗਤਸਦਿਸਖੀਣਾਸਵੋ ਚਾਤਿ. ਇਤਿ ਇਦਂ ਸੁਤ੍ਤਂ ਪਠਮਸੁਤ੍ਤੇ ਕਥਿਤਪੁਗ੍ਗਲਾਨਂ ਵਸੇਨੇਵ ਕਥਿਤਂ, ਦੇਸਨਾਮਤ੍ਤਮੇਵ ਪਨੇਤ੍ਥ ਨਾਨਨ੍ਤਿ.
੧੦. ਖਨ੍ਧਸੁਤ੍ਤਵਣ੍ਣਨਾ
੯੦. ਦਸਮੇ ਪਠਮਵਾਰੇ ਅਰਹਤ੍ਤਤ੍ਥਾਯ ਪਯੋਗਂ ਅਨਾਰਭਿਤ੍ਵਾ ਠਿਤੋ ਪਮਾਦਵਿਹਾਰੀ ਸੇਖਪੁਗ੍ਗਲੋ ਕਥਿਤੋ. ਦੁਤਿਯਵਾਰੇ ਅਨੁਪ੍ਪਾਦਿਤਜ੍ਝਾਨੋ ਆਰਦ੍ਧਵਿਪਸ੍ਸਕੋ ਅਪ੍ਪਮਾਦਵਿਹਾਰੀ ਸੇਖਪੁਗ੍ਗਲੋ ਕਥਿਤੋ. ਤਤਿਯਵਾਰੇ ਆਰਦ੍ਧਵਿਪਸ੍ਸਕੋ ਅਪ੍ਪਮਾਦਵਿਹਾਰੀ ਅਟ੍ਠਵਿਮੋਕ੍ਖਲਾਭੀ ਸੇਖਪੁਗ੍ਗਲੋ ਕਥਿਤੋ, ਚਤੁਤ੍ਥਵਾਰੇ ਪਰਮਸੁਖੁਮਾਲਖੀਣਾਸਵੋਤਿ.
ਮਚਲਵਗ੍ਗੋ ਚਤੁਤ੍ਥੋ.
(੧੦) ੫. ਅਸੁਰਵਗ੍ਗੋ
੧. ਅਸੁਰਸੁਤ੍ਤਵਣ੍ਣਨਾ
੯੧. ਪਞ੍ਚਮਸ੍ਸ ਪਠਮੇ ਅਸੁਰੋਤਿ ਅਸੁਰਸਦਿਸੋ ਬੀਭਚ੍ਛੋ. ਦੇਵੋਤਿ ਦੇਵਸਦਿਸੋ ਗੁਣਵਸੇਨ ਅਭਿਰੂਪੋ ਪਾਸਾਦਿਕੋ.
੨. ਪਠਮਸਮਾਧਿਸੁਤ੍ਤਵਣ੍ਣਨਾ
੯੨. ਦੁਤਿਯੇ ਅਜ੍ਝਤ੍ਤਂ ਚੇਤੋਸਮਥਸ੍ਸਾਤਿ ਨਿਯਕਜ੍ਝਤ੍ਤੇ ਅਪ੍ਪਨਾਚਿਤ੍ਤਸਮਾਧਿਸ੍ਸ. ਅਧਿਪਞ੍ਞਾਧਮ੍ਮਵਿਪਸ੍ਸਨਾਯਾਤਿ ਸਙ੍ਖਾਰਪਰਿਗ੍ਗਾਹਕਵਿਪਸ੍ਸਨਾਞਾਣਸ੍ਸ. ਤਞ੍ਹਿ ਅਧਿਪਞ੍ਞਾਸਙ੍ਖਾਤਞ੍ਚ, ਪਞ੍ਚਕ੍ਖਨ੍ਧਸਙ੍ਖਾਤੇਸੁ ਚ ਧਮ੍ਮੇਸੁ ਵਿਪਸ੍ਸਨਾਭੂਤਂ, ਤਸ੍ਮਾ ‘‘ਅਧਿਪਞ੍ਞਾਧਮ੍ਮਵਿਪਸ੍ਸਨਾ’’ਤਿ ਵੁਚ੍ਚਤੀਤਿ.
੩. ਦੁਤਿਯਸਮਾਧਿਸੁਤ੍ਤਵਣ੍ਣਨਾ
੯੩. ਤਤਿਯੇ ਯੋਗੋ ਕਰਣੀਯੋਤਿ ਯੁਤ੍ਤਪ੍ਪਯੁਤ੍ਤਤਾ ਕਤ੍ਤਬ੍ਬਾ. ਛਨ੍ਦੋਤਿ ਕਤ੍ਤੁਕਮ੍ਯਤਾਛਨ੍ਦੋ. ਵਾਯਾਮੋਤਿ ਪਯੋਗੋ. ਉਸ੍ਸਾਹੋਤਿ ਤਤੋ ਅਧਿਮਤ੍ਤਤਰਂ ਵੀਰਿਯਂ. ਉਸ੍ਸੋਲ਼੍ਹੀਤਿ ਪਙ੍ਕਲਗ੍ਗਸਕਟਉਦ੍ਧਰਣਸਦਿਸਂ ਮਹਾਵੀਰਿਯਂ. ਅਪ੍ਪਟਿਵਾਨੀਤਿ ਅਨਿਵਤ੍ਤਨਤਾ.
੪. ਤਤਿਯਸਮਾਧਿਸੁਤ੍ਤਵਣ੍ਣਨਾ
੯੪. ਚਤੁਤ੍ਥੇ ਏਵਂ ਖੋ, ਆਵੁਸੋ, ਸਙ੍ਖਾਰਾ ਦਟ੍ਠਬ੍ਬਾਤਿਆਦੀਸੁ, ਆਵੁਸੋ, ਸਙ੍ਖਾਰਾ ਨਾਮ ਅਨਿਚ੍ਚਤੋ ਦਟ੍ਠਬ੍ਬਾ, ਅਨਿਚ੍ਚਤੋ ਸਮ੍ਮਸਿਤਬ੍ਬਾ, ਅਨਿਚ੍ਚਤੋ ਪਸ੍ਸਿਤਬ੍ਬਾ. ਤਥਾ ਦੁਕ੍ਖਤੋ, ਅਨਤ੍ਤਤੋਤਿ ਏਵਂ ਅਤ੍ਥੋ ਦਟ੍ਠਬ੍ਬੋ. ਏਵਂ ਖੋ, ਆਵੁਸੋ, ਚਿਤ੍ਤਂ ਸਣ੍ਠਪੇਤਬ੍ਬਨ੍ਤਿਆਦੀਸੁਪਿ ਪਠਮਜ੍ਝਾਨਵਸੇਨ, ਆਵੁਸੋ, ਚਿਤ੍ਤਂ ਸਣ੍ਠਪੇਤਬ੍ਬਂ ਪਠਮਜ੍ਝਾਨਵਸੇਨ ਸਨ੍ਨਿਸਾਦੇਤਬ੍ਬਂ, ਪਠਮਜ੍ਝਾਨਵਸੇਨ ਏਕੋਦਿ ਕਾਤਬ੍ਬਂ, ਪਠਮਜ੍ਝਾਨਵਸੇਨ ਸਮਾਦਹਿਤਬ੍ਬਂ. ਤਥਾ ਦੁਤਿਯਜ੍ਝਾਨਾਦਿਵਸੇਨਾਤਿ ਏਵਂ ਅਤ੍ਥੋ ਦਟ੍ਠਬ੍ਬੋ. ਇਮੇਸੁ ਤੀਸੁਪਿ ਸੁਤ੍ਤੇਸੁ ਸਮਥਵਿਪਸ੍ਸਨਾ ਲੋਕਿਯਲੋਕੁਤ੍ਤਰਾਵ ਕਥਿਤਾ.
੫. ਛਵਾਲਾਤਸੁਤ੍ਤਵਣ੍ਣਨਾ
੯੫. ਪਞ੍ਚਮੇ ਛਵਾਲਾਤਨ੍ਤਿ ਸੁਸਾਨੇ ਅਲਾਤਂ. ਮਜ੍ਝੇ ਗੂਥਗਤਨ੍ਤਿ ਮਜ੍ਝਟ੍ਠਾਨੇ ਗੂਥਮਕ੍ਖਿਤਂ. ਨੇਵ ਗਾਮੇ ਕਟ੍ਠਤ੍ਥਂ ਫਰਤੀਤਿ ਕੂਟਗੋਪਾਨਸਿਥਮ੍ਭਸੋਪਾਨਾਦੀਨਂ ਅਤ੍ਥਾਯ ਅਨੁਪਨੇਯ੍ਯਤਾਯ ਗਾਮੇ ਨ ਕਟ੍ਠਤ੍ਥਂ ਸਾਧੇਤਿ, ਖੇਤ੍ਤਕੁਟਿਪਾਦਂ ਵਾ ਮਞ੍ਚਪਾਦਂ ਵਾ ਕਾਤੁਂ ਅਨੁਪਨੇਯ੍ਯਤਾਯ ਨ ਅਰਞ੍ਞੇ ਕਟ੍ਠਤ੍ਥਂ ਸਾਧੇਤਿ. ਦ੍ਵੀਸੁ ਕੋਟੀਸੁ ਗਯ੍ਹਮਾਨਂ ਹਤ੍ਥਂ ਡਹਤਿ, ਮਜ੍ਝੇ ਗਯ੍ਹਮਾਨਂ ਗੂਥੇਨ ਮਕ੍ਖੇਤਿ. ਤਥੂਪਮਨ੍ਤਿ ਤਂਸਰਿਕ੍ਖਕਂ. ਅਭਿਕ੍ਕਨ੍ਤਤਰੋਤਿ ਸੁਨ੍ਦਰਤਰੋ. ਪਣੀਤਤਰੋਤਿ ਉਤ੍ਤਮਤਰੋ. ਗਵਾ ਖੀਰਨ੍ਤਿ ਗਾਵਿਤੋ ਖੀਰਂ. ਖੀਰਮ੍ਹਾ ਦਧੀਤਿਆਦੀਸੁ ਪਰਂ ਪਰਂ ਪੁਰਿਮਤੋ ਪੁਰਿਮਤੋ ਅਗ੍ਗਂ, ਸਪ੍ਪਿਮਣ੍ਡੋ ਪਨ ਤੇਸੁ ਸਬ੍ਬੇਸੁਪਿ ਅਗ੍ਗਮੇਵ. ਅਗ੍ਗੋਤਿਆਦੀਸੁ ਗੁਣੇਹਿ ਅਗ੍ਗੋ ਚੇਵ ਸੇਟ੍ਠੋ ਚ ਪਮੁਖੋ ਚ ਉਤ੍ਤਮੋ ਚ ਪਵਰੋ ਚਾਤਿ ਵੇਦਿਤਬ੍ਬੋ. ਛਵਾਲਾਤੂਪਮਾਯ ਨ ਦੁਸ੍ਸੀਲੋ ਪੁਗ੍ਗਲੋ ਕਥਿਤੋ, ਅਪ੍ਪਸ੍ਸੁਤੋ ਪਨ ਵਿਸ੍ਸਟ੍ਠਕਮ੍ਮਨ੍ਤੋ ਗੋਣਸਦਿਸੋ ਪੁਗ੍ਗਲੋ ਕਥਿਤੋਤਿ ਵੇਦਿਤਬ੍ਬੋ. ਛਟ੍ਠੇ ਸਬ੍ਬਂ ਉਤ੍ਤਾਨਤ੍ਥਮੇਵ.
੭. ਖਿਪ੍ਪਨਿਸਨ੍ਤਿਸੁਤ੍ਤਵਣ੍ਣਨਾ
੯੭. ਸਤ੍ਤਮੇ ਖਿਪ੍ਪਨਿਸਨ੍ਤੀਤਿ ਖਿਪ੍ਪਨਿਸਾਮਨੋ ਸੀਘਂ ਜਾਨਿਤੁਂ ਸਮਤ੍ਥੋ. ਸੁਤਾਨਞ੍ਚ ਧਮ੍ਮਾਨਨ੍ਤਿ ਸੁਤਪ੍ਪਗੁਣਾਨਂ ਤਨ੍ਤਿਧਮ੍ਮਾਨਂ. ਅਤ੍ਥੂਪਪਰਿਕ੍ਖੀਤਿ ਅਤ੍ਥਂ ਉਪਪਰਿਕ੍ਖਕੋ. ਅਤ੍ਥਮਞ੍ਞਾਯ ਧਮ੍ਮਮਞ੍ਞਾਯਾਤਿ ਅਟ੍ਠਕਥਞ੍ਚ ਪਾਲ਼ਿਞ੍ਚ ਜਾਨਿਤ੍ਵਾ. ਧਮ੍ਮਾਨੁਧਮ੍ਮਪ੍ਪਟਿਪਨ੍ਨੋ ਹੋਤੀਤਿ ਨਵਲੋਕੁਤ੍ਤਰਧਮ੍ਮਾਨਂ ਅਨੁਰੂਪਧਮ੍ਮਭੂਤਂ ਸਸੀਲਕਂ ਪੁਬ੍ਬਭਾਗਪ੍ਪਟਿਪਦਂ ਪਟਿਪਨ੍ਨੋ ਹੋਤਿ. ਨੋ ਚ ਕਲ੍ਯਾਣਵਾਚੋਤਿ ਨ ਸੁਨ੍ਦਰਵਚਨੋ. ਨ ਕਲ੍ਯਾਣਵਾਕ੍ਕਰਣੋਤਿ ਨ ਸੁਨ੍ਦਰਵਚਨਘੋਸੋ ਹੋਤਿ. ਪੋਰਿਯਾਤਿਆਦੀਹਿ ਸਦ੍ਧਿਂ ਨੋ-ਕਾਰੋ ਯੋਜੇਤਬ੍ਬੋਯੇਵ. ਗੁਣਪਰਿਪੁਣ੍ਣਾਯ ਅਪਲਿਬੁਦ੍ਧਾਯ ਅਦੋਸਾਯ ਅਗਲ਼ਿਤਪਦਬ੍ਯਞ੍ਜਨਾਯ ਅਤ੍ਥਂ ਵਿਞ੍ਞਾਪੇਤੁਂ ਸਮਤ੍ਥਾਯ ਵਾਚਾਯ ਸਮਨ੍ਨਾਗਤੋ ਨ ਹੋਤੀਤਿ ਅਤ੍ਥੋ. ਇਮਿਨਾ ਉਪਾਯੇਨ ਸਬ੍ਬਤ੍ਥ ਅਤ੍ਥੋ ਵੇਦਿਤਬ੍ਬੋ.
੮. ਅਤ੍ਤਹਿਤਸੁਤ੍ਤਵਣ੍ਣਨਾ
੯੮-੯੯. ਅਟ੍ਠਮਂ ਪੁਗ੍ਗਲਜ੍ਝਾਸਯਵਸੇਨਾਪਿ ਦਸਬਲਸ੍ਸ ਦੇਸਨਾਞਾਣਵਿਲਾਸੇਨਾਪਿ ਕਥਿਤਂ, ਨਵਮਂ ਪਞ੍ਚਵੇਰਵਸੇਨ.
੧੦. ਪੋਤਲਿਯਸੁਤ੍ਤਵਣ੍ਣਨਾ
੧੦੦. ਦਸਮੇ ਕਾਲੇਨਾਤਿ ਯੁਤ੍ਤਪ੍ਪਤ੍ਤਕਾਲੇਨ. ਖਮਤੀਤਿ ਰੁਚ੍ਚਤਿ. ਯਦਿਦਂ ਤਤ੍ਥ ਤਤ੍ਥ ਕਾਲਞ੍ਞੁਤਾਤਿ ਯਾ ਏਸਾ ਤਤ੍ਥ ਤਤ੍ਥ ਕਾਲਂ ਜਾਨਨਾ. ਤਂ ਤਂ ਕਾਲਂ ਞਤ੍ਵਾ ਹਿ ਅਵਣ੍ਣਾਰਹਸ੍ਸ ਅਵਣ੍ਣਕਥਨਂ ਵਣ੍ਣਾਰਹਸ੍ਸ ਚ ਵਣ੍ਣਕਥਨਂ ਪਣ੍ਡਿਤਾਨਂ ਪਕਤੀਤਿ ਦਸ੍ਸੇਤਿ.
ਅਸੁਰਵਗ੍ਗੋ ਪਞ੍ਚਮੋ.
ਦੁਤਿਯਪਣ੍ਣਾਸਕਂ ਨਿਟ੍ਠਿਤਂ.