੪. ਚਕ੍ਕਵਗ੍ਗੋ

੧. ਚਕ੍ਕਸੁਤ੍ਤਵਣ੍ਣਨਾ

੩੧. ਚਤੁਤ੍ਥਸ੍ਸ ਪਠਮੇ ਚਕ੍ਕਾਨੀਤਿ ਸਮ੍ਪਤ੍ਤਿਯੋ. ਚਤੁਚਕ੍ਕਂ ਵਤ੍ਤਤੀਤਿ ਚਤ੍ਤਾਰਿ ਸਮ੍ਪਤ੍ਤਿਚਕ੍ਕਾਨਿ ਵਤ੍ਤਨ੍ਤਿ ਘਟਿਯਨ੍ਤਿਯੇਵਾਤਿ ਅਤ੍ਥੋ. ਪਤਿਰੂਪਦੇਸਵਾਸੋਤਿ ਯਤ੍ਥ ਚਤਸ੍ਸੋ ਪਰਿਸਾ ਸਨ੍ਦਿਸ੍ਸਨ੍ਤਿ, ਏਵਰੂਪੇ ਅਨੁਚ੍ਛਵਿਕੇ ਦੇਸੇ ਵਾਸੋ. ਸਪ੍ਪੁਰਿਸਾਵਸ੍ਸਯੋਤਿ ਬੁਦ੍ਧਾਦੀਨਂ ਸਪ੍ਪੁਰਿਸਾਨਂ ਅਵਸ੍ਸਯਨਂ ਸੇਵਨਂ ਭਜਨਂ, ਨ ਰਾਜਾਨਂ. ਅਤ੍ਤਸਮ੍ਮਾਪਣਿਧੀਤਿ ਅਤ੍ਤਨੋ ਸਮ੍ਮਾ ਠਪਨਂ, ਸਚੇ ਪੁਬ੍ਬੇ ਅਸ੍ਸਦ੍ਧਾਦੀਹਿ ਸਮਨ੍ਨਾਗਤੋ ਹੋਤਿ, ਤਾਨਿ ਪਹਾਯ ਸਦ੍ਧਾਦੀਸੁ ਪਤਿਟ੍ਠਾਪਨਂ. ਪੁਬ੍ਬੇ ਚ ਕਤਪੁਞ੍ਞਤਾਤਿ ਪੁਬ੍ਬੇ ਉਪਚਿਤਕੁਸਲਤਾ. ਇਦਮੇਵ ਚੇਤ੍ਥ ਪਮਾਣਂ. ਯੇਨ ਹਿ ਞਾਣਸਮ੍ਪਯੁਤ੍ਤਚਿਤ੍ਤੇਨ ਕੁਸਲਕਮ੍ਮਂ ਕਤਂ ਹੋਤਿ, ਤਦੇਵ ਕੁਸਲਂ ਤਂ ਪੁਰਿਸਂ ਪਤਿਰੂਪਦੇਸੇ ਉਪਨੇਤਿ, ਸਪ੍ਪੁਰਿਸੇ ਭਜਾਪੇਤਿ, ਸੋ ਏਵ ਚ ਪੁਗ੍ਗਲੋ ਅਤ੍ਤਾਨਂ ਸਮ੍ਮਾ ਠਪੇਤਿ. ਪੁਞ੍ਞਕਤੋਤਿ ਕਤਪੁਞ੍ਞੋ. ਸੁਖਞ੍ਚੇਤਂਧਿਵਤ੍ਤਤੀਤਿ ਸੁਖਞ੍ਚ ਏਤਂ ਪੁਗ੍ਗਲਂ ਅਧਿਵਤ੍ਤਤਿ, ਅਵਤ੍ਥਰਤੀਤਿ ਅਤ੍ਥੋ.

੨. ਸਙ੍ਗਹਸੁਤ੍ਤਵਣ੍ਣਨਾ

੩੨. ਦੁਤਿਯੇ ਸਙ੍ਗਹਵਤ੍ਥੂਨੀਤਿ ਸਙ੍ਗਣ੍ਹਨਕਾਰਣਾਨਿ. ਦਾਨਞ੍ਚਾਤਿਆਦੀਸੁ ਏਕਚ੍ਚੋ ਹਿ ਦਾਨੇਨੇਵ ਸਙ੍ਗਣ੍ਹਿਤਬ੍ਬੋ ਹੋਤਿ, ਤਸ੍ਸ ਦਾਨਮੇਵ ਦਾਤਬ੍ਬਂ. ਪੇਯ੍ਯਵਜ੍ਜਨ੍ਤਿ ਪਿਯਵਚਨਂ. ਏਕਚ੍ਚੋ ਹਿ ‘‘ਅਯਂ ਦਾਤਬ੍ਬਂ ਨਾਮ ਦੇਤਿ, ਏਕੇਕੇਨ ਪਨ ਵਚਨੇਨ ਸਬ੍ਬਂ ਮਕ੍ਖੇਤ੍ਵਾ ਨਾਸੇਤਿ, ਕਿਂ ਤਸ੍ਸ ਦਾਨ’’ਨ੍ਤਿ ਵਤ੍ਤਾ ਹੋਤਿ. ਏਕਚ੍ਚੋ ‘‘ਅਯਂ ਕਿਞ੍ਚਾਪਿ ਦਾਨਂ ਨ ਦੇਤਿ, ਕਥੇਨ੍ਤੋ ਪਨ ਤੇਲੇਨ ਵਿਯ ਮਕ੍ਖੇਤਿ. ਏਸ ਦੇਤੁ ਵਾ ਮਾ ਵਾ, ਵਚਨਮੇਵਸ੍ਸ ਸਹਸ੍ਸਂ ਅਗ੍ਘਤੀ’’ਤਿ ਵਤ੍ਤਾ ਹੋਤਿ. ਏਵਰੂਪੋ ਪੁਗ੍ਗਲੋ ਦਾਨਂ ਨ ਪਚ੍ਚਾਸੀਸਤਿ, ਪਿਯਵਚਨਮੇਵ ਪਚ੍ਚਾਸੀਸਤਿ. ਤਸ੍ਸ ਪਿਯਵਚਨਮੇਵ ਵਤ੍ਤਬ੍ਬਂ. ਅਤ੍ਥਚਰਿਯਾਤਿ ਅਤ੍ਥਵਡ੍ਢਨਕਥਾ. ਏਕਚ੍ਚੋ ਹਿ ਨੇਵ ਦਾਨਂ, ਨ ਪਿਯਵਚਨਂ ਪਚ੍ਚਾਸੀਸਤਿ, ਅਤ੍ਤਨੋ ਹਿਤਕਥਂ ਵਡ੍ਢਿਕਥਮੇਵ ਪਚ੍ਚਾਸੀਸਤਿ. ਏਵਰੂਪਸ੍ਸ ਪੁਗ੍ਗਲਸ੍ਸ ‘‘ਇਦਂ ਤੇ ਕਾਤਬ੍ਬਂ, ਇਦਂ ਨ ਕਾਤਬ੍ਬਂ, ਏਵਰੂਪੋ ਪੁਗ੍ਗਲੋ ਸੇਵਿਤਬ੍ਬੋ, ਏਵਰੂਪੋ ਨ ਸੇਵਿਤਬ੍ਬੋ’’ਤਿ ਏਵਂ ਅਤ੍ਥਚਰਿਯਕਥਾਵ ਕਥੇਤਬ੍ਬਾ. ਸਮਾਨਤ੍ਤਤਾਤਿ ਸਮਾਨਸੁਖਦੁਕ੍ਖਭਾਵੋ. ਏਕਚ੍ਚੋ ਹਿ ਦਾਨਾਦੀਸੁ ਏਕਮ੍ਪਿ ਨ ਪਚ੍ਚਾਸੀਸਤਿ, ਏਕਾਸਨੇ ਨਿਸਜ੍ਜਂ, ਏਕਪਲ੍ਲਙ੍ਕੇ ਸਯਨਂ, ਏਕਤੋ ਭੋਜਨਨ੍ਤਿ ਏਵਂ ਸਮਾਨਸੁਖਦੁਕ੍ਖਤਂ ਪਚ੍ਚਾਸੀਸਤਿ. ਸੋ ਸਚੇ ਗਹਟ੍ਠਸ੍ਸ ਜਾਤਿਯਾ ਪਬ੍ਬਜਿਤਸ੍ਸ ਸੀਲੇਨ ਸਦਿਸੋ ਹੋਤਿ, ਤਸ੍ਸਾਯਂ ਸਮਾਨਤ੍ਤਤਾ ਕਾਤਬ੍ਬਾ. ਤਤ੍ਥ ਤਤ੍ਥ ਯਥਾਰਹਨ੍ਤਿ ਤੇਸੁ ਤੇਸੁ ਧਮ੍ਮੇਸੁ ਯਥਾਨੁਚ੍ਛਵਿਕਂ ਸਮਾਨਤ੍ਤਤਾਤਿ ਅਤ੍ਥੋ. ਰਥਸ੍ਸਾਣੀਵ ਯਾਯਤੋਤਿ ਯਥਾ ਰਥਸ੍ਸ ਗਚ੍ਛਤੋ ਆਣਿ ਸਙ੍ਗਹੋ ਨਾਮ ਹੋਤਿ, ਸਾ ਰਥਂ ਸਙ੍ਗਣ੍ਹਾਤਿ, ਏਵਮਿਮੇ ਸਙ੍ਗਹਾ ਲੋਕਂ ਸਙ੍ਗਣ੍ਹਨ੍ਤਿ. ਨ ਮਾਤਾ ਪੁਤ੍ਤਕਾਰਣਾਤਿ ਯਦਿ ਮਾਤਾ ਏਤੇ ਸਙ੍ਗਹੇ ਪੁਤ੍ਤਸ੍ਸ ਨ ਕਰੇਯ੍ਯ, ਪੁਤ੍ਤਕਾਰਣਾ ਮਾਨਂ ਵਾ ਪੂਜਂ ਵਾ ਨ ਲਭੇਯ੍ਯ. ਸਙ੍ਗਹਾ ਏਤੇਤਿ ਉਪਯੋਗਵਚਨੇ ਪਚ੍ਚਤ੍ਤਂ. ਸਙ੍ਗਹੇ ਏਤੇਤਿ ਵਾ ਪਾਠੋ. ਸਮਵੇਕ੍ਖਨ੍ਤੀਤਿ ਸਮ੍ਮਾ ਪੇਕ੍ਖਨ੍ਤਿ. ਪਾਸਂਸਾ ਚ ਭਵਨ੍ਤੀਤਿ ਪਸਂਸਨੀਯਾ ਚ ਭਵਨ੍ਤਿ.

੩. ਸੀਹਸੁਤ੍ਤਵਣ੍ਣਨਾ

੩੩. ਤਤਿਯੇ ਸੀਹੋਤਿ ਚਤ੍ਤਾਰੋ ਸੀਹਾ – ਤਿਣਸੀਹੋ, ਕਾਲ਼ਸੀਹੋ, ਪਣ੍ਡੁਸੀਹੋ, ਕੇਸਰਸੀਹੋਤਿ. ਤੇਸੁ ਤਿਣਸੀਹੋ ਕਪੋਤਵਣ੍ਣਗਾਵਿਸਦਿਸੋ ਤਿਣਭਕ੍ਖੋ ਚ ਹੋਤਿ. ਕਾਲ਼ਸੀਹੋ ਕਾਲ਼ਗਾਵਿਸਦਿਸੋ ਤਿਣਭਕ੍ਖੋਯੇਵ. ਪਣ੍ਡੁਸੀਹੋ ਪਣ੍ਡੁਪਲਾਸਵਣ੍ਣਗਾਵਿਸਦਿਸੋ ਮਂਸਭਕ੍ਖੋ. ਕੇਸਰਸੀਹੋ ਲਾਖਾਪਰਿਕਮ੍ਮਕਤੇਨੇਵ ਮੁਖੇਨ ਅਗ੍ਗਨਙ੍ਗੁਟ੍ਠੇਨ ਚਤੂਹਿ ਚ ਪਾਦਪਰਿਯਨ੍ਤੇਹਿ ਸਮਨ੍ਨਾਗਤੋ, ਮਤ੍ਥਕਤੋਪਿਸ੍ਸ ਪਟ੍ਠਾਯ ਲਾਖਾਤੂਲਿਕਾਯ ਕਤਾ ਵਿਯ ਤਿਸ੍ਸੋ ਰਾਜਿਯੋ ਪਿਟ੍ਠਿਮਜ੍ਝੇਨ ਗਨ੍ਤ੍ਵਾ ਅਨ੍ਤਰਸਤ੍ਥਿਮ੍ਹਿ ਦਕ੍ਖਿਣਾਵਤ੍ਤਾ ਹੁਤ੍ਵਾ ਠਿਤਾ. ਖਨ੍ਧੇ ਪਨਸ੍ਸ ਸਤਸਹਸ੍ਸਗ੍ਘਨਿਕਕਮ੍ਬਲਪਰਿਕ੍ਖੇਪੋ ਵਿਯ ਕੇਸਰਭਾਰੋ ਹੋਤਿ, ਅਵਸੇਸਟ੍ਠਾਨਂ ਪਰਿਸੁਦ੍ਧਸਾਲਿਪਿਣ੍ਡਸਙ੍ਖਚੁਣ੍ਣਪਿਣ੍ਡਵਣ੍ਣਂ ਹੋਤਿ. ਇਮੇਸੁ ਚਤੂਸੁ ਸੀਹੇਸੁ ਅਯਂ ਕੇਸਰਸੀਹੋ ਇਧ ਅਧਿਪ੍ਪੇਤੋ.

ਮਿਗਰਾਜਾਤਿ ਸਬ੍ਬਮਿਗਗਣਸ੍ਸ ਰਾਜਾ. ਆਸਯਾਤਿ ਵਸਨਟ੍ਠਾਨਤੋ, ਸੁਵਣ੍ਣਗੁਹਤੋ ਵਾ ਰਜਤਮਣਿਫਲਿਕਮਨੋਸਿਲਾਗੁਹਤੋ ਵਾ ਨਿਕ੍ਖਮਤੀਤਿ ਵੁਤ੍ਤਂ ਹੋਤਿ. ਨਿਕ੍ਖਮਮਾਨੋ ਪਨੇਸ ਚਤੂਹਿ ਕਾਰਣੇਹਿ ਨਿਕ੍ਖਮਤਿ ਅਨ੍ਧਕਾਰਪੀਲ਼ਿਤੋ ਵਾ ਆਲੋਕਤ੍ਥਾਯ, ਉਚ੍ਚਾਰਪਸ੍ਸਾਵਪੀਲ਼ਿਤੋ ਵਾ ਤੇਸਂ ਵਿਸ੍ਸਜ੍ਜਨਤ੍ਥਾਯ, ਜਿਘਚ੍ਛਾਪੀਲ਼ਿਤੋ ਵਾ ਗੋਚਰਤ੍ਥਾਯ, ਸਮ੍ਭਵਪੀਲ਼ਿਤੋ ਵਾ ਅਸ੍ਸਦ੍ਧਮ੍ਮਪਟਿਸੇਵਨਤ੍ਥਾਯ. ਇਧ ਪਨ ਗੋਚਰਤ੍ਥਾਯ ਨਿਕ੍ਖਮਨ੍ਤੋ ਅਧਿਪ੍ਪੇਤੋ.

ਵਿਜਮ੍ਭਤੀਤਿ ਸੁਵਣ੍ਣਤਲੇ ਵਾ ਰਜਤਮਣਿਫਲਿਕਮਨੋਸਿਲਾਤਲਾਨਂ ਵਾ ਅਞ੍ਞਤਰਸ੍ਮਿਂ ਦ੍ਵੇ ਪਚ੍ਛਿਮਪਾਦੇ ਸਮਂ ਪਤਿਟ੍ਠਾਪੇਤ੍ਵਾ ਪੁਰਿਮਪਾਦੇ ਪੁਰਤੋ ਪਸਾਰੇਤ੍ਵਾ ਸਰੀਰਸ੍ਸ ਪਚ੍ਛਾਭਾਗਂ ਆਕਡ੍ਢਿਤ੍ਵਾ ਪੁਰਿਮਭਾਗਂ ਅਭਿਹਰਿਤ੍ਵਾ ਪਿਟ੍ਠਿਂ ਨਾਮੇਤ੍ਵਾ ਗੀਵਂ ਉਕ੍ਖਿਪਿਤ੍ਵਾ ਅਸਨਿਸਦ੍ਦਂ ਕਰੋਨ੍ਤੋ ਵਿਯ ਨਾਸਪੁਟਾਨਿ ਪੋਥੇਤ੍ਵਾ ਸਰੀਰਲਗ੍ਗਂ ਰਜਂ ਵਿਧੁਨਨ੍ਤੋ ਵਿਜਮ੍ਭਤਿ. ਵਿਜਮ੍ਭਨਭੂਮਿਯਞ੍ਚ ਪਨ ਤਰੁਣਵਚ੍ਛਕੋ ਵਿਯ ਅਪਰਾਪਰਂ ਜਵਤਿ, ਜਵਤੋ ਪਨਸ੍ਸ ਸਰੀਰਂ ਅਨ੍ਧਕਾਰੇ ਪਰਿਬ੍ਭਮਨ੍ਤਂ ਅਲਾਤਂ ਵਿਯ ਖਾਯਤਿ.

ਅਨੁਵਿਲੋਕੇਤੀਤਿ ਕਸ੍ਮਾ ਅਨੁਵਿਲੋਕੇਤਿ? ਪਰਾਨੁਦ੍ਦਯਤਾਯ. ਤਸ੍ਮਿਂ ਕਿਰ ਸੀਹਨਾਦਂ ਨਦਨ੍ਤੇ ਪਪਾਤਾਵਾਟਾਦੀਸੁ ਵਿਸਮਟ੍ਠਾਨੇਸੁ ਚਰਨ੍ਤਾ ਹਤ੍ਥਿਗੋਕਣ੍ਣਮਹਿਂਸਾਦਯੋ ਪਾਣਾ ਪਪਾਤੇਪਿ ਆਵਾਟੇਪਿ ਪਤਨ੍ਤਿ, ਤੇਸਂ ਅਨੁਦ੍ਦਯਾਯ ਅਨੁਵਿਲੋਕੇਤਿ. ਕਿਂ ਪਨਸ੍ਸ ਲੁਦ੍ਦਸ੍ਸ ਪਰਮਂਸਖਾਦਿਨੋ ਅਨੁਦ੍ਦਯਾ ਨਾਮ ਅਤ੍ਥੀਤਿ? ਆਮ ਅਤ੍ਥਿ. ਤਥਾ ਹਿ ‘‘ਕਿਂ ਮੇ ਬਹੂਹਿ ਘਾਤਿਤੇਹੀ’’ਤਿ ਅਤ੍ਤਨੋ ਗੋਚਰਤ੍ਥਾਯਾਪਿ ਖੁਦ੍ਦਕੇ ਪਾਣੇ ਨ ਗਣ੍ਹਾਤਿ. ਏਵਂ ਅਨੁਦ੍ਦਯਂ ਕਰੋਤਿ, ਵੁਤ੍ਤਮ੍ਪਿ ਚੇਤਂ – ‘‘ਮਾਹਂ ਖੁਦ੍ਦਕੇ ਪਾਣੇ ਵਿਸਮਗਤੇ ਸਙ੍ਘਾਤਂ ਆਪਾਦੇਸਿ’’ਨ੍ਤਿ (ਅ. ਨਿ. ੧੦.੨੧).

ਸੀਹਨਾਦਂ ਨਦਤੀਤਿ ਤਿਕ੍ਖਤ੍ਤੁਂ ਤਾਵ ਅਭੀਤਨਾਦਂ ਨਦਤਿ. ਏਵਞ੍ਚ ਪਨਸ੍ਸ ਵਿਜਮ੍ਭਨਭੂਮਿਯਂ ਠਤ੍ਵਾ ਨਦਨ੍ਤਸ੍ਸ ਸਦ੍ਦੋ ਸਮਨ੍ਤਾ ਤਿਯੋਜਨਪਦੇਸਂ ਏਕਨਿਨ੍ਨਾਦਂ ਕਰੋਤਿ, ਤਮਸ੍ਸ ਨਿਨ੍ਨਾਦਂ ਸੁਤ੍ਵਾ ਤਿਯੋਜਨਬ੍ਭਨ੍ਤਰਗਤਾ ਦ੍ਵਿਪਦਚਤੁਪ੍ਪਦਗਣਾ ਯਥਾਠਾਨੇ ਠਾਤੁਂ ਨ ਸਕ੍ਕੋਨ੍ਤਿ. ਗੋਚਰਾਯ ਪਕ੍ਕਮਤੀਤਿ ਆਹਾਰਤ੍ਥਾਯ ਗਚ੍ਛਤਿ. ਕਥਂ? ਸੋ ਹਿ ਵਿਜਮ੍ਭਨਭੂਮਿਯਂ ਠਤ੍ਵਾ ਦਕ੍ਖਿਣਤੋ ਵਾ ਵਾਮਤੋ ਵਾ ਉਪ੍ਪਤਨ੍ਤੋ ਉਸਭਮਤ੍ਤਂ ਠਾਨਂ ਗਣ੍ਹਾਤਿ, ਉਦ੍ਧਂ ਉਪ੍ਪਤਨ੍ਤੋ ਚਤ੍ਤਾਰਿਪਿ ਅਟ੍ਠਪਿ ਉਸਭਟ੍ਠਾਨਾਨਿ ਉਪ੍ਪਤਤਿ, ਸਮੇ ਠਾਨੇ ਉਜੁਕਂ ਪਕ੍ਖਨ੍ਦਨ੍ਤੋ ਸੋਲ਼ਸਉਸਭਮਤ੍ਤਮ੍ਪਿ ਵੀਸਤਿਉਸਭਮਤ੍ਤਮ੍ਪਿ ਠਾਨਂ ਪਕ੍ਖਨ੍ਦਤਿ, ਥਲਾ ਵਾ ਪਬ੍ਬਤਾ ਵਾ ਪਕ੍ਖਨ੍ਦਨ੍ਤੋ ਸਟ੍ਠਿਉਸਭਮਤ੍ਤਮ੍ਪਿ ਅਸੀਤਿਉਸਭਮਤ੍ਤਮ੍ਪਿ ਠਾਨਂ ਪਕ੍ਖਨ੍ਦਤਿ, ਅਨ੍ਤਰਾਮਗ੍ਗੇ ਰੁਕ੍ਖਂ ਵਾ ਪਬ੍ਬਤਂ ਵਾ ਦਿਸ੍ਵਾ ਤਂ ਪਰਿਹਰਨ੍ਤੋ ਵਾਮਤੋ ਵਾ ਦਕ੍ਖਿਣਤੋ ਵਾ ਉਦ੍ਧਂ ਵਾ ਉਸਭਮਤ੍ਤਂ ਅਪਕ੍ਕਮਤਿ. ਤਤਿਯਂ ਪਨ ਸੀਹਨਾਦਂ ਨਦਿਤ੍ਵਾ ਤੇਨੇਵ ਸਦ੍ਧਿਂ ਤਿਯੋਜਨੇ ਠਾਨੇ ਪਞ੍ਞਾਯਤਿ, ਤਿਯੋਜਨਂ ਗਨ੍ਤ੍ਵਾ ਨਿਵਤ੍ਤਿਤ੍ਵਾ ਠਿਤੋ ਅਤ੍ਤਨੋਵ ਨਾਦਸ੍ਸ ਅਨੁਨਾਦਂ ਸੁਣਾਤਿ. ਏਵਂ ਸੀਘੇਨ ਜਵੇਨ ਪਕ੍ਕਮਤਿ.

ਯੇਭੁਯ੍ਯੇਨਾਤਿ ਪਾਯੇਨ. ਭਯਂ ਸਨ੍ਤਾਸਂ ਸਂਵੇਗਨ੍ਤਿ ਸਬ੍ਬਂ ਚਿਤ੍ਤੁਤ੍ਰਾਸਸ੍ਸੇਵ ਨਾਮਂ. ਸੀਹਸ੍ਸ ਹਿ ਸਦ੍ਦਂ ਸੁਤ੍ਵਾ ਬਹੂ ਭਾਯਨ੍ਤਿ, ਅਪ੍ਪਕਾ ਨ ਭਾਯਨ੍ਤਿ. ਕੇ ਪਨ ਤੇਤਿ? ਸਮਸੀਹੋ ਹਤ੍ਥਾਜਾਨੀਯੋ ਅਸ੍ਸਾਜਾਨੀਯੋ ਉਸਭਾਜਾਨੀਯੋ ਪੁਰਿਸਾਜਾਨੀਯੋ ਖੀਣਾਸਵੋਤਿ. ਕਸ੍ਮਾ ਪਨੇਤੇ ਨ ਭਾਯਨ੍ਤੀਤਿ? ਸਮਸੀਹੋ ਤਾਵ ‘‘ਜਾਤਿਗੋਤ੍ਤਕੁਲਸੂਰਭਾਵੇਹਿ ਸਮਾਨੋਸ੍ਮੀ’’ਤਿ ਨ ਭਾਯਤਿ, ਹਤ੍ਥਾਜਾਨੀਯਾਦਯੋ ਅਤ੍ਤਨੋ ਸਕ੍ਕਾਯਦਿਟ੍ਠਿਬਲਵਤਾਯ ਨ ਭਾਯਨ੍ਤਿ, ਖੀਣਾਸਵੋ ਸਕ੍ਕਾਯਦਿਟ੍ਠਿਯਾ ਪਹੀਨਤ੍ਤਾ ਨ ਭਾਯਤਿ.

ਬਿਲਾਸਯਾਤਿ ਬਿਲੇ ਸਯਨ੍ਤਾ ਬਿਲਵਾਸਿਨੋ ਅਹਿਨਕੁਲਗੋਧਾਦਯੋ. ਉਦਕਾਸਯਾਤਿ ਉਦਕਵਾਸਿਨੋ ਮਚ੍ਛਕਚ੍ਛਪਾਦਯੋ. ਵਨਾਸਯਾਤਿ ਵਨਵਾਸਿਨੋ ਹਤ੍ਥਿਅਸ੍ਸਗੋਕਣ੍ਣਮਿਗਾਦਯੋ. ਪਵਿਸਨ੍ਤੀਤਿ ‘‘ਇਦਾਨਿ ਆਗਨ੍ਤ੍ਵਾ ਗਣ੍ਹਿਸ੍ਸਤੀ’’ਤਿ ਮਗ੍ਗਂ ਓਲੋਕੇਤ੍ਵਾ ਪਵਿਸਨ੍ਤਿ. ਦਲ਼੍ਹੇਹੀਤਿ ਥਿਰੇਹਿ. ਵਰਤ੍ਤੇਹੀਤਿ ਚਮ੍ਮਰਜ੍ਜੂਹਿ. ਮਹਿਦ੍ਧਿਕੋਤਿਆਦੀਸੁ ਵਿਜਮ੍ਭਨਭੂਮਿਯਂ ਠਤ੍ਵਾ ਦਕ੍ਖਿਣਪਸ੍ਸਾਦੀਹਿ ਉਸਭਮਤ੍ਤਂ, ਉਜੁਂ ਵੀਸਤਿਉਸਭਮਤ੍ਤਾਦਿਲਙ੍ਘਨਵਸੇਨ ਮਹਿਦ੍ਧਿਕਤਾ, ਸੇਸਮਿਗਾਨਂ ਅਧਿਪਤਿਭਾਵੇਨ ਮਹੇਸਕ੍ਖਤਾ, ਸਮਨ੍ਤਾ ਤਿਯੋਜਨਟ੍ਠਾਨੇ ਸਦ੍ਦਂ ਸੁਤ੍ਵਾ ਪਲਾਯਨ੍ਤਾਨਂ ਵਸੇਨ ਮਹਾਨੁਭਾਵਤਾ ਵੇਦਿਤਬ੍ਬਾ.

ਏਵਮੇਵ ਖੋਤਿ ਭਗਵਾ ਤੇਸੁ ਤੇਸੁ ਸੁਤ੍ਤਨ੍ਤੇਸੁ ਤਥਾ ਤਥਾ ਅਤ੍ਤਾਨਂ ਕਥੇਸਿ. ‘‘ਸੀਹੋਤਿ ਖੋ, ਭਿਕ੍ਖਵੇ, ਤਥਾਗਤਸ੍ਸੇਤਂ ਅਧਿਵਚਨਂ ਅਰਹਤੋ ਸਮ੍ਮਾਸਮ੍ਬੁਦ੍ਧਸ੍ਸਾ’’ਤਿ (ਅ. ਨਿ. ੫.੯੯; ੧੦.੨੧) ਇਮਸ੍ਮਿਂ ਤਾਵ ਸੁਤ੍ਤੇ ਸੀਹਸਦਿਸਂ ਅਤ੍ਤਾਨਂ ਕਥੇਸਿ. ‘‘ਭਿਸਕ੍ਕੋ ਸਲ੍ਲਕਤ੍ਤੋਤਿ ਖੋ, ਸੁਨਕ੍ਖਤ੍ਤ, ਤਥਾਗਤਸ੍ਸੇਤਂ ਅਧਿਵਚਨ’’ਨ੍ਤਿ (ਮ. ਨਿ. ੩.੬੫) ਇਮਸ੍ਮਿਂ ਵੇਜ੍ਜਸਦਿਸਂ, ‘‘ਬ੍ਰਾਹ੍ਮਣੋਤਿ ਖੋ, ਭਿਕ੍ਖਵੇ, ਤਥਾਗਤਸ੍ਸੇਤਂ ਅਧਿਵਚਨ’’ਨ੍ਤਿ (ਅ. ਨਿ. ੮.੮੫) ਇਮਸ੍ਮਿਂ ਬ੍ਰਾਹ੍ਮਣਸਦਿਸਂ, ‘‘ਪੁਰਿਸੋ ਮਗ੍ਗਕੁਸਲੋਤਿ ਖੋ, ਤਿਸ੍ਸ, ਤਥਾਗਤਸ੍ਸੇਤਂ ਅਧਿਵਚਨ’’ਨ੍ਤਿ (ਸਂ. ਨਿ. ੩.੮੪) ਇਮਸ੍ਮਿਂ ਮਗ੍ਗਦੇਸਕਪੁਰਿਸਸਦਿਸਂ, ‘‘ਰਾਜਾਹਮਸ੍ਮਿ, ਸੇਲਾ’’ਤਿ (ਸੁ. ਨਿ. ੫੫੯; ਮ. ਨਿ. ੨.੩੯੯) ਇਮਸ੍ਮਿਂ ਰਾਜਸਦਿਸਂ. ਇਮਸ੍ਮਿਂ ਪਨ ਸੁਤ੍ਤੇ ਸੀਹਸਦਿਸਮੇਵ ਕਤ੍ਵਾ ਅਤ੍ਤਾਨਂ ਕਥੇਨ੍ਤੋ ਏਵਮਾਹ.

ਤਤ੍ਰਾਯਂ ਸਦਿਸਤਾ – ਸੀਹਸ੍ਸ ਕਞ੍ਚਨਗੁਹਾਦੀਸੁ ਵਸਨਕਾਲੋ ਵਿਯ ਹਿ ਤਥਾਗਤਸ੍ਸ ਦੀਪਙ੍ਕਰਪਾਦਮੂਲੇ ਕਤਾਭਿਨੀਹਾਰਸ੍ਸ ਅਪਰਿਮਿਤਕਾਲਂ ਪਾਰਮਿਯੋ ਪੂਰੇਤ੍ਵਾ ਪਚ੍ਛਿਮਭਵੇ ਪਟਿਸਨ੍ਧਿਗ੍ਗਹਣੇਨ ਚੇਵ ਮਾਤੁਕੁਚ੍ਛਿਤੋ ਨਿਕ੍ਖਮਨੇਨ ਚ ਦਸਸਹਸ੍ਸਿਲੋਕਧਾਤੁਂ ਕਮ੍ਪੇਤ੍ਵਾ ਵੁਦ੍ਧਿਮਨ੍ਵਾਯ ਦਿਬ੍ਬਸਮ੍ਪਤ੍ਤਿਸਦਿਸਂ ਸਮ੍ਪਤ੍ਤਿਂ ਅਨੁਭਵਮਾਨਸ੍ਸ ਤੀਸੁ ਪਾਸਾਦੇਸੁ ਨਿਵਾਸਕਾਲੋ ਦਟ੍ਠਬ੍ਬੋ. ਸੀਹਸ੍ਸ ਕਞ੍ਚਨਗੁਹਾਦਿਤੋ ਨਿਕ੍ਖਨ੍ਤਕਾਲੋ ਵਿਯ ਤਥਾਗਤਸ੍ਸ ਏਕੂਨਤਿਂਸਸਂਵਚ੍ਛਰੇ ਵਿਵਟੇਨ ਦ੍ਵਾਰੇਨ ਕਣ੍ਡਕਂ ਆਰੁਯ੍ਹ ਛਨ੍ਨਸਹਾਯਸ੍ਸ ਨਿਕ੍ਖਮਿਤ੍ਵਾ ਤੀਣਿ ਰਜ੍ਜਾਨਿ ਅਤਿਕ੍ਕਮਿਤ੍ਵਾ ਅਨੋਮਾਨਦੀਤੀਰੇ ਬ੍ਰਹ੍ਮੁਨਾ ਦਿਨ੍ਨਾਨਿ ਕਾਸਾਯਾਨਿ ਪਰਿਦਹਿਤ੍ਵਾ ਪਬ੍ਬਜਿਤਸ੍ਸ ਸਤ੍ਤਮੇ ਦਿਵਸੇ ਰਾਜਗਹਂ ਗਨ੍ਤ੍ਵਾ ਤਤ੍ਥ ਪਿਣ੍ਡਾਯ ਚਰਿਤ੍ਵਾ ਪਣ੍ਡਵਗਿਰਿਪਬ੍ਭਾਰੇ ਕਤਭਤ੍ਤਕਿਚ੍ਚਸ੍ਸ ਸਮ੍ਮਾਸਮ੍ਬੋਧਿਂ ਪਤ੍ਵਾ ਪਠਮਮੇਵ ਮਗਧਰਟ੍ਠਂ ਆਗਮਨਤ੍ਥਾਯ ਯਾਵ ਰਞ੍ਞੋ ਪਟਿਞ੍ਞਾਦਾਨਕਾਲੋ.

ਸੀਹਸ੍ਸ ਵਿਜਮ੍ਭਨਕਾਲੋ ਵਿਯ ਤਥਾਗਤਸ੍ਸ ਦਿਨ੍ਨਪਟਿਞ੍ਞਸ੍ਸ ਆਲ਼ਾਰਕਾਲਾਮਉਪਸਙ੍ਕਮਨਂ ਆਦਿਂ ਕਤ੍ਵਾ ਯਾਵ ਸੁਜਾਤਾਯ ਦਿਨ੍ਨਪਾਯਾਸਸ੍ਸ ਏਕੂਨਪਣ੍ਣਾਸਾਯ ਪਿਣ੍ਡੇਹਿ ਪਰਿਭੁਤ੍ਤਕਾਲੋ ਵੇਦਿਤਬ੍ਬੋ. ਸੀਹਸ੍ਸ ਸਰੀਰਵਿਧੁਨਨਂ ਵਿਯ ਸਾਯਨ੍ਹਸਮਯੇ ਸੋਤ੍ਤਿਯੇਨ ਦਿਨ੍ਨਾ ਅਟ੍ਠ ਤਿਣਮੁਟ੍ਠਿਯੋ ਗਹੇਤ੍ਵਾ ਦਸਸਹਸ੍ਸਚਕ੍ਕਵਾਲ਼ਦੇਵਤਾਹਿ ਥੋਮਿਯਮਾਨਸ੍ਸ ਗਨ੍ਧਾਦੀਹਿ ਪੂਜਿਯਮਾਨਸ੍ਸ ਤਿਕ੍ਖਤ੍ਤੁਂ ਬੋਧਿਂ ਪਦਕ੍ਖਿਣਂ ਕਤ੍ਵਾ ਬੋਧਿਮਣ੍ਡਂ ਆਰੁਯ੍ਹ ਚੁਦ੍ਦਸਹਤ੍ਥੁਬ੍ਬੇਧੇ ਠਾਨੇ ਤਿਣਸਨ੍ਥਰਂ ਅਤ੍ਥਰਿਤ੍ਵਾ ਚਤੁਰਙ੍ਗਵੀਰਿਯਂ ਅਧਿਟ੍ਠਾਯ ਨਿਸਿਨ੍ਨਸ੍ਸ ਤਂਖਣਞ੍ਞੇਵ ਮਾਰਬਲਂ ਵਿਧਮੇਤ੍ਵਾ ਤੀਸੁ ਯਾਮੇਸੁ ਤਿਸ੍ਸੋ ਵਿਜ੍ਜਾ ਵਿਸੋਧੇਤ੍ਵਾ ਅਨੁਲੋਮਪ੍ਪਟਿਲੋਮਂ ਪਟਿਚ੍ਚਸਮੁਪ੍ਪਾਦਮਹਾਸਮੁਦ੍ਦਂ ਯਮਕਞਾਣਮਨ੍ਥਨੇਨ ਮਨ੍ਥੇਨ੍ਤਸ੍ਸ ਸਬ੍ਬਞ੍ਞੁਤਞ੍ਞਾਣੇ ਪਟਿਵਿਦ੍ਧੇ ਤਦਨੁਭਾਵੇਨ ਦਸਸਹਸ੍ਸਿਲੋਕਧਾਤੁਕਮ੍ਪਨਂ ਵੇਦਿਤਬ੍ਬਂ.

ਸੀਹਸ੍ਸ ਚਤੁਦਿਸਾਵਿਲੋਕਨਂ ਵਿਯ ਪਟਿਵਿਦ੍ਧਸਬ੍ਬਞ੍ਞੁਤਞ੍ਞਾਣਸ੍ਸ ਸਤ੍ਤਸਤ੍ਤਾਹਂ ਬੋਧਿਮਣ੍ਡੇ ਵਿਹਰਿਤ੍ਵਾ ਪਰਿਭੁਤ੍ਤਮਧੁਪਿਣ੍ਡਿਕਾਹਾਰਸ੍ਸ ਅਜਪਾਲਨਿਗ੍ਰੋਧਮੂਲੇ ਮਹਾਬ੍ਰਹ੍ਮੁਨੋ ਧਮ੍ਮਦੇਸਨਾਯਾਚਨਂ ਪਟਿਗ੍ਗਹੇਤ੍ਵਾ ਤਤ੍ਥ ਵਿਹਰਨ੍ਤਸ੍ਸ ਏਕਾਦਸਮੇ ਦਿਵਸੇ ‘‘ਸ੍ਵੇ ਆਸਾਲ਼੍ਹਿਪੁਣ੍ਣਮਾ ਭਵਿਸ੍ਸਤੀ’’ਤਿ ਪਚ੍ਚੂਸਸਮਯੇ ‘‘ਕਸ੍ਸ ਨੁ ਖੋ ਅਹਂ ਪਠਮਂ ਧਮ੍ਮਂ ਦੇਸੇਯ੍ਯ’’ਨ੍ਤਿ ਆਲ਼ਾਰੁਦਕਾਨਂ ਕਾਲਕਤਭਾਵਂ ਞਤ੍ਵਾ ਧਮ੍ਮਦੇਸਨਤ੍ਥਾਯ ਪਞ੍ਚਵਗ੍ਗਿਯਾਨਂ ਓਲੋਕਨਂ ਦਟ੍ਠਬ੍ਬਂ. ਸੀਹਸ੍ਸ ਗੋਚਰਤ੍ਥਾਯ ਤਿਯੋਜਨਂ ਗਮਨਕਾਲੋ ਵਿਯ ਅਤ੍ਤਨੋ ਪਤ੍ਤਚੀਵਰਂ ਆਦਾਯ ‘‘ਪਞ੍ਚਵਗ੍ਗਿਯਾਨਂ ਧਮ੍ਮਚਕ੍ਕਂ ਪਵਤ੍ਤੇਸ੍ਸਾਮੀ’’ਤਿ ਪਚ੍ਛਾਭਤ੍ਤੇ ਅਜਪਾਲਨਿਗ੍ਰੋਧਤੋ ਵੁਟ੍ਠਿਤਸ੍ਸ ਅਟ੍ਠਾਰਸਯੋਜਨਮਗ੍ਗਂ ਗਮਨਕਾਲੋ.

ਸੀਹਸ੍ਸ ਸੀਹਨਾਦਕਾਲੋ ਵਿਯ ਤਥਾਗਤਸ੍ਸ ਅਟ੍ਠਾਰਸਯੋਜਨਮਗ੍ਗਂ ਗਨ੍ਤ੍ਵਾ ਪਞ੍ਚਵਗ੍ਗਿਯੇ ਸਞ੍ਞਾਪੇਤ੍ਵਾ ਅਚਲਪਲ੍ਲਙ੍ਕੇ ਨਿਸਿਨ੍ਨਸ੍ਸ ਦਸਹਿ ਚਕ੍ਕਵਾਲ਼ਸਹਸ੍ਸੇਹਿ ਸਨ੍ਨਿਪਤਿਤੇਨ ਦੇਵਗਣੇਨ ਪਰਿਵੁਤਸ੍ਸ ‘‘ਦ੍ਵੇਮੇ, ਭਿਕ੍ਖਵੇ, ਅਨ੍ਤਾ ਪਬ੍ਬਜਿਤੇਨ ਨ ਸੇਵਿਤਬ੍ਬਾ’’ਤਿਆਦਿਨਾ ਨਯੇਨ ਧਮ੍ਮਚਕ੍ਕਪ੍ਪਵਤ੍ਤਨਕਾਲੋ ਵੇਦਿਤਬ੍ਬੋ. ਇਮਸ੍ਮਿਂ ਚ ਪਨ ਪਦੇ ਦੇਸਿਯਮਾਨੇ ਤਥਾਗਤਸੀਹਸ੍ਸ ਧਮ੍ਮਘੋਸੋ ਹੇਟ੍ਠਾ ਅਵੀਚਿਂ ਉਪਰਿ ਭਵਗ੍ਗਂ ਗਹੇਤ੍ਵਾ ਦਸਸਹਸ੍ਸਿਲੋਕਧਾਤੁਂ ਪਟਿਚ੍ਛਾਦੇਸਿ. ਸੀਹਸ੍ਸ ਸਦ੍ਦੇਨ ਖੁਦ੍ਦਕਪਾਣਾਨਂ ਸਨ੍ਤਾਸਾਪਜ੍ਜਨਕਾਲੋ ਵਿਯ ਤਥਾਗਤਸ੍ਸ ਤੀਣਿ ਲਕ੍ਖਣਾਨਿ ਦੀਪੇਤ੍ਵਾ ਚਤ੍ਤਾਰਿ ਸਚ੍ਚਾਨਿ ਸੋਲ਼ਸਹਾਕਾਰੇਹਿ ਸਟ੍ਠਿਯਾ ਚ ਨਯਸਹਸ੍ਸੇਹਿ ਵਿਭਜਿਤ੍ਵਾ ਧਮ੍ਮਂ ਕਥੇਨ੍ਤਸ੍ਸ ਦੀਘਾਯੁਕਾਨਂ ਦੇਵਾਨਂ ਞਾਣਸਨ੍ਤਾਸਸ੍ਸ ਉਪ੍ਪਤ੍ਤਿਕਾਲੋ ਵੇਦਿਤਬ੍ਬੋ.

ਅਪਰੋ ਨਯੋ – ਸੀਹੋ ਵਿਯ ਸਬ੍ਬਞ੍ਞੁਤਂ ਪਤ੍ਤੋ ਤਥਾਗਤੋ, ਆਸਯਭੂਤਾਯ ਕਨਕਗੁਹਾਯ ਨਿਕ੍ਖਮਨਂ ਵਿਯ ਗਨ੍ਧਕੁਟਿਤੋ ਨਿਕ੍ਖਮਨਕਾਲੋ, ਵਿਜਮ੍ਭਨਂ ਵਿਯ ਧਮ੍ਮਸਭਂ ਉਪਸਙ੍ਕਮਨਕਾਲੋ, ਦਿਸਾਵਿਲੋਕਨਂ ਵਿਯ ਪਰਿਸਾਵਿਲੋਕਨਂ, ਸੀਹਨਾਦਨਦਨਂ ਵਿਯ ਧਮ੍ਮਦੇਸਨਾਕਾਲੋ, ਗੋਚਰਾਯ ਪਕ੍ਕਮਨਂ ਵਿਯ ਪਰਵਾਦਨਿਮ੍ਮਦ੍ਦਨਤ੍ਥਾਯ ਗਮਨਂ.

ਅਪਰੋ ਨਯੋ – ਸੀਹੋ ਵਿਯ ਤਥਾਗਤੋ, ਹਿਮਵਨ੍ਤਨਿਸ੍ਸਿਤਾਯ ਕਞ੍ਚਨਗੁਹਾਯ ਨਿਕ੍ਖਮਨਂ ਵਿਯ ਆਰਮ੍ਮਣਵਸੇਨ ਨਿਬ੍ਬਾਨਨਿਸ੍ਸਿਤਾਯ ਫਲਸਮਾਪਤ੍ਤਿਯਾ ਵੁਟ੍ਠਾਨਂ, ਵਿਜਮ੍ਭਨਂ ਵਿਯ ਪਚ੍ਚਵੇਕ੍ਖਣਞਾਣਂ, ਦਿਸਾਵਿਲੋਕਨਂ ਵਿਯ ਵੇਨੇਯ੍ਯਸਤ੍ਤਵਿਲੋਕਨਂ, ਸੀਹਨਾਦੋ ਵਿਯ ਸਮ੍ਪਤ੍ਤਪਰਿਸਾਯ ਧਮ੍ਮਦੇਸਨਾ, ਗੋਚਰਾਯ ਪਕ੍ਕਮਨਂ ਵਿਯ ਅਸਮ੍ਪਤ੍ਤਾਨਂ ਵੇਨੇਯ੍ਯਸਤ੍ਤਾਨਂ ਸਨ੍ਤਿਕੂਪਸਙ੍ਕਮਨਂ ਵੇਦਿਤਬ੍ਬਂ.

ਯਦਾਤਿ ਯਸ੍ਮਿਂ ਕਾਲੇ. ਤਥਾਗਤੋਤਿ ਹੇਟ੍ਠਾ ਵੁਤ੍ਤੇਹਿ ਅਟ੍ਠਹਿ ਕਾਰਣੇਹਿ ਤਥਾਗਤੋ. ਲੋਕੇਤਿ ਸਤ੍ਤਲੋਕੇ. ਉਪ੍ਪਜ੍ਜਤੀਤਿ ਅਭਿਨੀਹਾਰਤੋ ਪਟ੍ਠਾਯ ਯਾਵ ਬੋਧਿਪਲ੍ਲਙ੍ਕਾ ਵਾ ਅਰਹਤ੍ਤਮਗ੍ਗਞਾਣਾ ਵਾ ਉਪ੍ਪਜ੍ਜਤਿ ਨਾਮ, ਅਰਹਤ੍ਤਫਲੇ ਪਨ ਪਤ੍ਤੇ ਉਪ੍ਪਨ੍ਨੋ ਨਾਮ. ਅਰਹਂ ਸਮ੍ਮਾਸਮ੍ਬੁਦ੍ਧੋਤਿਆਦੀਨਿ ਵਿਸੁਦ੍ਧਿਮਗ੍ਗੇ (ਵਿਸੁਦ੍ਧਿ. ੧.੧੨੪ ਆਦਯੋ) ਬੁਦ੍ਧਾਨੁਸ੍ਸਤਿਨਿਦ੍ਦੇਸੇ ਵਿਤ੍ਥਾਰਿਤਾਨਿ.

ਇਤਿ ਸਕ੍ਕਾਯੋਤਿ ਅਯਂ ਸਕ੍ਕਾਯੋ, ਏਤ੍ਤਕੋ ਸਕ੍ਕਾਯੋ, ਨ ਇਤੋ ਭਿਯ੍ਯੋ ਸਕ੍ਕਾਯੋ ਅਤ੍ਥੀਤਿ. ਏਤ੍ਤਾਵਤਾ ਸਭਾਵਤੋ ਸਰਸਤੋ ਪਰਿਯਨ੍ਤਤੋ ਪਰਿਚ੍ਛੇਦਤੋ ਪਰਿਵਟੁਮਤੋ ਸਬ੍ਬੇਪਿ ਪਞ੍ਚੁਪਾਦਾਨਕ੍ਖਨ੍ਧਾ ਦਸ੍ਸਿਤਾ ਹੋਨ੍ਤਿ. ਇਤਿ ਸਕ੍ਕਾਯਸਮੁਦਯੋਤਿ ਅਯਂ ਸਕ੍ਕਾਯਸ੍ਸ ਸਮੁਦਯੋ ਨਾਮ. ਏਤ੍ਤਾਵਤਾ ‘‘ਆਹਾਰਸਮੁਦਯਾ ਰੂਪਸਮੁਦਯੋ’’ਤਿਆਦਿ ਸਬ੍ਬਂ ਦਸ੍ਸਿਤਂ ਹੋਤਿ. ਇਤਿ ਸਕ੍ਕਾਯਸ੍ਸ ਅਤ੍ਥਙ੍ਗਮੋਤਿ ਅਯਂ ਸਕ੍ਕਾਯਸ੍ਸ ਅਤ੍ਥਙ੍ਗਮੋ. ਇਮਿਨਾਪਿ ‘‘ਆਹਾਰਨਿਰੋਧਾ ਰੂਪਨਿਰੋਧੋ’’ਤਿਆਦਿ ਸਬ੍ਬਂ ਦਸ੍ਸਿਤਂ ਹੋਤਿ.

ਵਣ੍ਣਵਨ੍ਤੋਤਿ ਸਰੀਰਵਣ੍ਣੇਨ ਵਣ੍ਣਵਨ੍ਤੋ. ਧਮ੍ਮਦੇਸਨਂ ਸੁਤ੍ਵਾਤਿ ਪਞ੍ਚਸੁ ਖਨ੍ਧੇਸੁ ਪਣ੍ਣਾਸਲਕ੍ਖਣਪ੍ਪਟਿਮਣ੍ਡਿਤਂ ਤਥਾਗਤਸ੍ਸ ਧਮ੍ਮਦੇਸਨਂ ਸੁਤ੍ਵਾ. ਯੇਭੁਯ੍ਯੇਨਾਤਿ ਇਧ ਕੇ ਠਪੇਤਿ? ਅਰਿਯਸਾਵਕੇ ਦੇਵੇ. ਤੇਸਂ ਹਿ ਖੀਣਾਸਵਤ੍ਤਾ ਚਿਤ੍ਤੁਤ੍ਰਾਸਭਯਮ੍ਪਿ ਨ ਉਪ੍ਪਜ੍ਜਤਿ, ਸਂਵਿਗ੍ਗਸ੍ਸ ਯੋਨਿਸੋ ਪਧਾਨੇਨ ਪਤ੍ਤਬ੍ਬਂ ਪਤ੍ਤਤਾਯ ਞਾਣਸਂਵੇਗੋਪਿ. ਇਤਰਾਸਂ ਪਨ ਦੇਵਤਾਨਂ ‘‘ਤਾਸੋ ਹੇਸੋ, ਭਿਕ੍ਖਵੇ, ਅਨਿਚ੍ਚ’’ਨ੍ਤਿ ਮਨਸਿਕਰੋਨ੍ਤਾਨਂ ਚਿਤ੍ਤੁਤ੍ਰਾਸਭਯਮ੍ਪਿ, ਬਲਵਵਿਪਸ੍ਸਨਾਕਾਲੇ ਞਾਣਭਯਮ੍ਪਿ ਉਪ੍ਪਜ੍ਜਤਿ. ਭੋਤਿ ਧਮ੍ਮਾਲਪਨਮਤ੍ਤਮੇਤਂ. ਸਕ੍ਕਾਯਪਰਿਯਾਪਨ੍ਨਾਤਿ ਪਞ੍ਚਕ੍ਖਨ੍ਧਪਰਿਯਾਪਨ੍ਨਾ. ਇਤਿ ਤੇਸਂ ਸਮ੍ਮਾਸਮ੍ਬੁਦ੍ਧੇ ਵਟ੍ਟਦੋਸਂ ਦਸ੍ਸੇਤ੍ਵਾ ਤਿਲਕ੍ਖਣਾਹਤਂ ਕਤ੍ਵਾ ਧਮ੍ਮਂ ਦੇਸੇਨ੍ਤੇ ਞਾਣਭਯਂ ਨਾਮ ਓਕ੍ਕਮਤਿ.

ਅਭਿਞ੍ਞਾਯਾਤਿ ਜਾਨਿਤ੍ਵਾ. ਧਮ੍ਮਚਕ੍ਕਨ੍ਤਿ ਪਟਿਵੇਧਞਾਣਮ੍ਪਿ ਦੇਸਨਾਞਾਣਮ੍ਪਿ. ਪਟਿਵੇਧਞਾਣਂ ਨਾਮ ਯੇਨ ਞਾਣੇਨ ਬੋਧਿਪਲ੍ਲਙ੍ਕੇ ਨਿਸਿਨ੍ਨੋ ਚਤ੍ਤਾਰਿ ਸਚ੍ਚਾਨਿ ਸੋਲ਼ਸਹਾਕਾਰੇਹਿ ਸਟ੍ਠਿਯਾ ਚ ਨਯਸਹਸ੍ਸੇਹਿ ਪਟਿਵਿਜ੍ਝਿ. ਦੇਸਨਾਞਾਣਂ ਨਾਮ ਯੇਨ ਞਾਣੇਨ ਤਿਪਰਿਵਟ੍ਟਂ ਦ੍ਵਾਦਸਾਕਾਰਂ ਧਮ੍ਮਚਕ੍ਕਂ ਪਵਤ੍ਤੇਸਿ. ਉਭਯਮ੍ਪੇਤਂ ਦਸਬਲਸ੍ਸ ਉਰੇ ਜਾਤਞਾਣਮੇਵ. ਤੇਸੁ ਧਮ੍ਮਦੇਸਨਾਞਾਣਂ ਗਹੇਤਬ੍ਬਂ. ਤਂ ਪਨੇਸ ਯਾਵ ਅਟ੍ਠਾਰਸਬ੍ਰਹ੍ਮਕੋਟੀਹਿ ਸਦ੍ਧਿਂ ਅਞ੍ਞਾਕੋਣ੍ਡਞ੍ਞਤ੍ਥੇਰਸ੍ਸ ਸੋਤਾਪਤ੍ਤਿਫਲਂ ਨ ਉਪ੍ਪਜ੍ਜਤਿ, ਤਾਵ ਪਵਤ੍ਤੇਤਿ ਨਾਮ. ਤਸ੍ਮਿਂ ਉਪ੍ਪਨ੍ਨੇ ਪਵਤ੍ਤਿਤਂ ਨਾਮ ਹੋਤੀਤਿ ਵੇਦਿਤਬ੍ਬਂ. ਅਪ੍ਪਟਿਪੁਗ੍ਗਲੋਤਿ ਸਦਿਸਪੁਗ੍ਗਲਰਹਿਤੋ. ਯਸਸ੍ਸਿਨੋਤਿ ਪਰਿਵਾਰਸਮ੍ਪਨ੍ਨਾ. ਤਾਦਿਨੋਤਿ ਲਾਭਾਲਾਭਾਦੀਹਿ ਏਕਸਦਿਸਸ੍ਸ.

੪. ਪਸਾਦਸੁਤ੍ਤਵਣ੍ਣਨਾ

੩੪. ਚਤੁਤ੍ਥੇ ਅਗ੍ਗੇਸੁ ਪਸਾਦਾ, ਅਗ੍ਗਾ ਵਾ ਪਸਾਦਾਤਿ ਅਗ੍ਗਪ੍ਪਸਾਦਾ. ਯਾਵਤਾਤਿ ਯਤ੍ਤਕਾ. ਅਪਦਾਤਿ ਨਿਪ੍ਪਦਾ ਅਹਿਮਚ੍ਛਾਦਯੋ. ਦ੍ਵਿਪਦਾਤਿ ਮਨੁਸ੍ਸਪਕ੍ਖਿਆਦਯੋ. ਚਤੁਪ੍ਪਦਾਤਿ ਹਤ੍ਥਿਅਸ੍ਸਾਦਯੋ. ਬਹੁਪ੍ਪਦਾਤਿ ਸਤਪਦਿਆਦਯੋ. ਨੇਵਸਞ੍ਞਿਨਾਸਞ੍ਞਿਨੋਤਿ ਭਵਗ੍ਗੇ ਨਿਬ੍ਬਤ੍ਤਸਤ੍ਤਾ. ਅਗ੍ਗਮਕ੍ਖਾਯਤੀਤਿ ਗੁਣੇਹਿ ਅਗ੍ਗੋ ਉਤ੍ਤਮੋ ਸੇਟ੍ਠੋਤਿ ਅਕ੍ਖਾਯਤਿ. ਅਸਙ੍ਖਤਾਤਿ ਨਿਬ੍ਬਾਨਮੇਵ ਗਹੇਤ੍ਵਾ ਵੁਤ੍ਤਂ. ਵਿਰਾਗੋਤਿਆਦੀਨਿ ਨਿਬ੍ਬਾਨਸ੍ਸੇਵ ਨਾਮਾਨਿ. ਤਞ੍ਹਿ ਆਗਮ੍ਮ ਸਬ੍ਬਕਿਲੇਸਾ ਵਿਰਜ੍ਜਨ੍ਤਿ, ਸਬ੍ਬੇ ਰਾਗਮਦਾਦਯੋ ਮਦਾ ਨਿਮ੍ਮਦਾ ਹੋਨ੍ਤਿ, ਅਭਾਵਂ ਗਚ੍ਛਨ੍ਤਿ, ਸਬ੍ਬਾ ਪਿਪਾਸਾ ਵਿਨਯਂ ਉਪੇਨ੍ਤਿ, ਸਬ੍ਬੇ ਆਲਯਾ ਸਮੁਗ੍ਘਾਤਂ ਗਚ੍ਛਨ੍ਤਿ, ਵਟ੍ਟਾਨਿ ਉਪਚ੍ਛਿਜ੍ਜਨ੍ਤਿ, ਤਣ੍ਹਾ ਖੀਯਨ੍ਤਿ, ਵਟ੍ਟਦੁਕ੍ਖਾ ਨਿਰੁਜ੍ਝਨ੍ਤਿ, ਸਬ੍ਬੇ ਪਰਿਲ਼ਾਹਾ ਨਿਬ੍ਬਾਯਨ੍ਤਿ. ਤਸ੍ਮਾ ਏਤਾਨਿ ਨਾਮਾਨਿ ਲਭਤਿ. ਸੇਸਮੇਤ੍ਥ ਉਤ੍ਤਾਨਤ੍ਥਮੇਵਾਤਿ.

੫. ਵਸ੍ਸਕਾਰਸੁਤ੍ਤਵਣ੍ਣਨਾ

੩੫. ਪਞ੍ਚਮੇ ਅਨੁਸ੍ਸਰਿਤਾਤਿ ਅਨੁਗਨ੍ਤ੍ਵਾ ਸਰਿਤਾ, ਅਪਰਾਪਰਂ ਸਰਿਤੁਂ ਸਮਤ੍ਥੋਤਿ ਅਤ੍ਥੋ. ਦਕ੍ਖੋਤਿ ਛੇਕੋ. ਤਤ੍ਰੁਪਾਯਾਯਾਤਿ ‘‘ਇਮਸ੍ਮਿਂ ਕਾਲੇ ਇਮਂ ਨਾਮ ਕਤ੍ਤਬ੍ਬ’’ਨ੍ਤਿ ਏਵਂ ਤਤ੍ਥ ਤਤ੍ਥ ਉਪਾਯਭੂਤਾਯ ਪਞ੍ਞਾਯ ਸਮਨ੍ਨਾਗਤੋ. ਅਨੁਮੋਦਿਤਬ੍ਬਨ੍ਤਿ ਅਭਿਨਨ੍ਦਿਤਬ੍ਬਂ. ਪਟਿਕ੍ਕੋਸਿਤਬ੍ਬਨ੍ਤਿ ਪਟਿਕ੍ਖਿਪਿਤਬ੍ਬਂ. ਨੇਵ ਖੋ ਤ੍ਯਾਹਨ੍ਤਿ ਨੇਵ ਖੋ ਤੇ ਅਹਂ. ਕਸ੍ਮਾ ਪਨੇਤਂ ਭਗਵਾ ਨਾਭਿਨਨ੍ਦਤਿ, ਨਪ੍ਪਟਿਕ੍ਖਿਪਤੀਤਿ? ਲੋਕਿਯਤ੍ਤਾ ਨਾਭਿਨਨ੍ਦਤਿ, ਲੋਕਿਯਂ ਅਤ੍ਥਂ ਗਹੇਤ੍ਵਾ ਠਿਤਤ੍ਤਾ ਨਪ੍ਪਟਿਕ੍ਕੋਸਤਿ. ਬਹੁਸ੍ਸ ਜਨਤਾਤਿ ਬਹੁ ਅਸ੍ਸ ਜਨਤਾ. ਇਦਞ੍ਚ ਕਰਣਤ੍ਥੇ ਸਾਮਿਵਚਨਂ ਵੇਦਿਤਬ੍ਬਂ. ਅਰਿਯੇ ਞਾਯੇਤਿ ਸਹਵਿਪਸ੍ਸਨਕੇ ਮਗ੍ਗੇ. ਕਲ੍ਯਾਣਧਮ੍ਮਤਾ ਕੁਸਲਧਮ੍ਮਤਾਤਿਪਿ ਤਸ੍ਸੇਵ ਨਾਮਾਨਿ. ਯਂ ਵਿਤਕ੍ਕਨ੍ਤਿ ਨੇਕ੍ਖਮ੍ਮਵਿਤਕ੍ਕਾਦੀਸੁ ਅਞ੍ਞਤਰਂ. ਨ ਤਂ ਵਿਤਕ੍ਕਂ ਵਿਤਕ੍ਕੇਤੀਤਿ ਕਾਮਵਿਤਕ੍ਕਾਦੀਸੁ ਏਕਮ੍ਪਿ ਨ ਵਿਤਕ੍ਕੇਤਿ. ਇਤਰਂ ਤਸ੍ਸੇਵ ਵੇਵਚਨਂ. ਵਿਤਕ੍ਕਪਥੇਤਿ ਏਤ੍ਥ ਵਿਤਕ੍ਕੋਯੇਵ ਵਿਤਕ੍ਕਪਥੋ. ਅਹਞ੍ਹਿ ਬ੍ਰਾਹ੍ਮਣਾਤਿਆਦੀਸੁ ਪਠਮਨਯੇਨ ਖੀਣਾਸਵਸ੍ਸ ਸੀਲਞ੍ਚੇਵ ਬਾਹੁਸਚ੍ਚਞ੍ਚ ਕਥਿਤਂ, ਦੁਤਿਯਤਤਿਯੇਹਿ ਖੀਣਾਸਵਸ੍ਸ ਕਿਰਿਯਵਿਤਕ੍ਕਾਨਿ ਚੇਵ ਕਿਰਿਯਜ੍ਝਾਨਾਨਿ ਚ, ਚਤੁਤ੍ਥੇਨ ਖੀਣਾਸਵਭਾਵੋ ਕਥਿਤੋਤਿ ਵੇਦਿਤਬ੍ਬੋ.

ਮਚ੍ਚੁਪਾਸਪ੍ਪਮੋਚਨਨ੍ਤਿ ਮਚ੍ਚੁਪਾਸਾ ਪਮੋਚਨਕਂ ਮਗ੍ਗਂ. ਞਾਯਂ ਧਮ੍ਮਨ੍ਤਿ ਸਹਵਿਪਸ੍ਸਨਕਂ ਮਗ੍ਗਂ. ਦਿਸ੍ਵਾ ਚ ਸੁਤ੍ਵਾ ਚਾਤਿ ਞਾਣੇਨੇਵ ਪਸ੍ਸਿਤ੍ਵਾ ਚ ਸੁਣਿਤ੍ਵਾ ਚ. ਸੇਸਮੇਤ੍ਥ ਉਤ੍ਤਾਨਮੇਵ.

੬. ਦੋਣਸੁਤ੍ਤਵਣ੍ਣਨਾ

੩੬. ਛਟ੍ਠੇ ਅਨ੍ਤਰਾ ਚ ਉਕ੍ਕਟ੍ਠਂ ਅਨ੍ਤਰਾ ਚ ਸੇਤਬ੍ਯਨ੍ਤਿ ਏਤ੍ਥ ਉਕ੍ਕਟ੍ਠਾਤਿ ਉਕ੍ਕਾਹਿ ਧਾਰੀਯਮਾਨਾਹਿ ਮਾਪਿਤਤ੍ਤਾ ਏਵਂਲਦ੍ਧਵੋਹਾਰਂ ਨਗਰਂ. ਸੇਤਬ੍ਯਨ੍ਤਿ ਅਤੀਤੇ ਕਸ੍ਸਪਸਮ੍ਮਾਸਮ੍ਬੁਦ੍ਧਸ੍ਸ ਜਾਤਨਗਰਂ. ਅਨ੍ਤਰਾਸਦ੍ਦੋ ਪਨ ਕਾਰਣਖਣਚਿਤ੍ਤਵੇਮਜ੍ਝਵਿਵਰਾਦੀਸੁ ਵਤ੍ਤਤਿ. ‘‘ਤਦਨ੍ਤਰਂ ਕੋ ਜਾਨੇਯ੍ਯ ਅਞ੍ਞਤ੍ਰ ਤਥਾਗਤਾ’’ਤਿ (ਅ. ਨਿ. ੬.੪੪; ੧੦.੭੫) ਚ, ‘‘ਜਨਾ ਸਙ੍ਗਮ੍ਮ ਮਨ੍ਤੇਨ੍ਤਿ, ਮਞ੍ਚ ਤਞ੍ਚ ਕਿਮਨ੍ਤਰ’’ਨ੍ਤਿ ਚ ਆਦੀਸੁ (ਸਂ. ਨਿ. ੧.੨੨੮) ਕਾਰਣੇ. ‘‘ਅਦ੍ਦਸਾ ਮਂ, ਭਨ੍ਤੇ, ਅਞ੍ਞਤਰਾ ਇਤ੍ਥੀ ਵਿਜ੍ਜਨ੍ਤਰਿਕਾਯ ਭਾਜਨਂ ਧੋਵਨ੍ਤੀ’’ਤਿਆਦੀਸੁ (ਮ. ਨਿ. ੨.੧੪੯) ਖਣੇ. ‘‘ਯਸ੍ਸਨ੍ਤਰਤੋ ਨ ਸਨ੍ਤਿ ਕੋਪਾ’’ਤਿਆਦੀਸੁ (ਉਦਾ. ੨੦) ਚਿਤ੍ਤੇ. ‘‘ਅਨ੍ਤਰਾਵੋਸਾਨਮਾਪਾਦੀ’’ਤਿਆਦੀਸੁ ਵੇਮਜ੍ਝੇ. ‘‘ਅਪਿਚਾਯਂ ਤਪੋਦਾ ਦ੍ਵਿਨ੍ਨਂ ਮਹਾਨਿਰਯਾਨਂ ਅਨ੍ਤਰਿਕਾਯ ਆਗਚ੍ਛਤੀ’’ਤਿਆਦੀਸੁ (ਪਾਰਾ. ੨੩੧) ਵਿਵਰੇ. ਸ੍ਵਾਯਮਿਧ ਵਿਵਰੇ ਵਤ੍ਤਤਿ. ਤਸ੍ਮਾ ਉਕ੍ਕਟ੍ਠਾਯ ਚ ਸੇਤਬ੍ਯਸ੍ਸ ਚ ਵਿਵਰੇਤਿ ਏਵਮੇਤ੍ਥ ਅਤ੍ਥੋ ਦਟ੍ਠਬ੍ਬੋ. ਅਨ੍ਤਰਾਸਦ੍ਦੇਨ ਪਨ ਯੁਤ੍ਤਤ੍ਤਾ ਉਪਯੋਗਵਚਨਂ ਕਤਂ. ਈਦਿਸੇਸੁ ਚ ਠਾਨੇਸੁ ਅਕ੍ਖਰਚਿਨ੍ਤਕਾ ‘‘ਅਨ੍ਤਰਾ ਗਾਮਞ੍ਚ ਨਦਿਞ੍ਚ ਯਾਤੀ’’ਤਿ ਏਵਂ ਏਕਮੇਵ ਅਨ੍ਤਰਾਸਦ੍ਦਂ ਪਯੁਞ੍ਜਨ੍ਤਿ, ਸੋ ਦੁਤਿਯਪਦੇਨਪਿ ਯੋਜੇਤਬ੍ਬੋ ਹੋਤਿ, ਅਯੋਜਿਯਮਾਨੇ ਉਪਯੋਗਵਚਨਂ ਨ ਪਾਪੁਣਾਤਿ. ਇਧ ਪਨ ਯੋਜੇਤ੍ਵਾ ਏਵ ਵੁਤ੍ਤੋ.

ਅਦ੍ਧਾਨਮਗ੍ਗਪ੍ਪਟਿਪਨ੍ਨੋ ਹੋਤੀਤਿ ਅਦ੍ਧਾਨਸਙ੍ਖਾਤਂ ਮਗ੍ਗਂ ਪਟਿਪਨ੍ਨੋ ਹੋਤਿ, ਦੀਘਮਗ੍ਗਨ੍ਤਿ ਅਤ੍ਥੋ. ਕਸ੍ਮਾ ਪਟਿਪਨ੍ਨੋਤਿ? ਤਂ ਦਿਵਸਂ ਕਿਰ ਭਗਵਾ ਇਦਂ ਅਦ੍ਦਸ ‘‘ਮਯਿ ਤਂ ਮਗ੍ਗਂ ਪਟਿਪਨ੍ਨੇ ਦੋਣੋ ਬ੍ਰਾਹ੍ਮਣੋ ਮਮ ਪਦਚੇਤਿਯਾਨਿ ਪਸ੍ਸਿਤ੍ਵਾ ਪਦਾਨੁਪਦਿਕੋ ਹੁਤ੍ਵਾ ਮਮ ਨਿਸਿਨ੍ਨਟ੍ਠਾਨਂ ਆਗਨ੍ਤ੍ਵਾ ਪਞ੍ਹਂ ਪੁਚ੍ਛਿਸ੍ਸਤਿ. ਅਥਸ੍ਸਾਹਂ ਏਕਂ ਸਚ੍ਚਧਮ੍ਮਂ ਦੇਸੇਸ੍ਸਾਮਿ. ਬ੍ਰਾਹ੍ਮਣੋ ਤੀਣਿ ਸਾਮਞ੍ਞਫਲਾਨਿ ਪਟਿਵਿਜ੍ਝਿਤ੍ਵਾ ਦ੍ਵਾਦਸਪਦਸਹਸ੍ਸਪਰਿਮਾਣਂ ਦੋਣਗਜ੍ਜਿਤਂ ਨਾਮ ਵਣ੍ਣਂ ਵਤ੍ਵਾ ਮਯਿ ਪਰਿਨਿਬ੍ਬੁਤੇ ਸਕਲਜਮ੍ਬੁਦੀਪੇ ਉਪ੍ਪਨ੍ਨਂ ਮਹਾਕਲਹਂ ਵੂਪਸਮੇਤ੍ਵਾ ਧਾਤੁਯੋ ਭਾਜੇਸ੍ਸਤੀ’’ਤਿ. ਇਮਿਨਾ ਕਾਰਣੇਨ ਪਟਿਪਨ੍ਨੋ. ਦੋਣੋਪਿ ਸੁਦਂ ਬ੍ਰਾਹ੍ਮਣੋਤਿ ਦੋਣੋ ਬ੍ਰਾਹ੍ਮਣੋਪਿ ਤਯੋ ਵੇਦੇ ਪਗੁਣੇ ਕਤ੍ਵਾ ਪਞ੍ਚਸਤੇ ਮਾਣਵਕੇ ਸਿਪ੍ਪਂ ਵਾਚੇਨ੍ਤੋ ਤਂਦਿਵਸਂ ਪਾਤੋਵ ਉਟ੍ਠਾਯ ਸਰੀਰਪਟਿਜਗ੍ਗਨਂ ਕਤ੍ਵਾ ਸਤਗ੍ਘਨਕਂ ਨਿਵਾਸੇਤ੍ਵਾ ਪਞ੍ਚਸਤਗ੍ਘਨਕਂ ਏਕਂਸਵਰਗਤਂ ਕਤ੍ਵਾ ਆਮੁਤ੍ਤਯਞ੍ਞਸੁਤ੍ਤੋ ਰਤ੍ਤਵਟ੍ਟਿਕਾ ਉਪਾਹਨਾ ਆਰੋਹਿਤ੍ਵਾ ਪਞ੍ਚਸਤਮਾਣਵਕਪਰਿਵਾਰੋ ਤਮੇਵ ਮਗ੍ਗਂ ਪਟਿਪਜ੍ਜਿ. ਤਂ ਸਨ੍ਧਾਯੇਤਂ ਵੁਤ੍ਤਂ.

ਪਾਦੇਸੂਤਿ ਪਾਦੇਹਿ ਅਕ੍ਕਨ੍ਤਟ੍ਠਾਨੇਸੁ. ਚਕ੍ਕਾਨੀਤਿ ਲਕ੍ਖਣਚਕ੍ਕਾਨਿ. ਕਿਂ ਪਨ ਭਗਵਤੋ ਗਚ੍ਛਨ੍ਤਸ੍ਸ ਅਕ੍ਕਨ੍ਤਟ੍ਠਾਨੇ ਪਦਂ ਪਞ੍ਞਾਯਤੀਤਿ? ਨ ਪਞ੍ਞਾਯਤਿ. ਕਸ੍ਮਾ? ਸੁਖੁਮਤ੍ਤਾ ਮਹਾਬਲਤ੍ਤਾ ਮਹਾਜਨਾਨੁਗ੍ਗਹੇਨ ਚ. ਬੁਦ੍ਧਾਨਞ੍ਹਿ ਸੁਖੁਮਚ੍ਛਵਿਤਾਯ ਅਕ੍ਕਨ੍ਤਟ੍ਠਾਨਂ ਤੂਲਪਿਚੁਨੋ ਪਤਿਟ੍ਠਿਤਟ੍ਠਾਨਂ ਵਿਯ ਹੋਤਿ, ਪਦਵਲ਼ਞ੍ਜੋ ਨ ਪਞ੍ਞਾਯਤਿ. ਯਥਾ ਚ ਬਲਵਤੋ ਵਾਤਜਵਸਿਨ੍ਧਵਸ੍ਸ ਪਦੁਮਿਨਿਪਤ੍ਤੇਪਿ ਅਕ੍ਕਨ੍ਤਮਤ੍ਤਮੇਵ ਹੋਤਿ, ਏਵਂ ਮਹਾਬਲਤਾਯ ਤਥਾਗਤੇਨ ਅਕ੍ਕਨ੍ਤਟ੍ਠਾਨਂ ਅਕ੍ਕਨ੍ਤਮਤ੍ਤਮੇਵ ਹੋਤਿ, ਨ ਤਤ੍ਥ ਪਦਵਲ਼ਞ੍ਜੋ ਪਞ੍ਞਾਯਤਿ. ਬੁਦ੍ਧਾਨਞ੍ਚ ਅਨੁਪਦਂ ਮਹਾਜਨਕਾਯੋ ਗਚ੍ਛਤਿ, ਤਸ੍ਸ ਸਤ੍ਥੁ ਪਦਵਲ਼ਞ੍ਜਂ ਦਿਸ੍ਵਾ ਮਦ੍ਦਿਤੁਂ ਅਵਿਸਹਨ੍ਤਸ੍ਸ ਗਮਨਵਿਚ੍ਛੇਦੋ ਭਵੇਯ੍ਯ. ਤਸ੍ਮਾ ਅਕ੍ਕਨ੍ਤਅਕ੍ਕਨ੍ਤਟ੍ਠਾਨੇ ਯੋਪਿ ਪਦਵਲ਼ਞ੍ਜੋ ਭਵੇਯ੍ਯ, ਸੋ ਅਨ੍ਤਰਧਾਯਤੇਵ. ਦੋਣੋ ਪਨ ਬ੍ਰਾਹ੍ਮਣੋ ਤਥਾਗਤਸ੍ਸ ਅਧਿਟ੍ਠਾਨਵਸੇਨ ਪਸ੍ਸਿ. ਭਗਵਾ ਹਿ ਯਸ੍ਸ ਪਦਚੇਤਿਯਂ ਦਸ੍ਸੇਤੁਕਾਮੋ ਹੋਤਿ, ਤਂ ਆਰਬ੍ਭ ‘‘ਅਸੁਕੋ ਨਾਮ ਪਸ੍ਸਤੂ’’ਤਿ ਅਧਿਟ੍ਠਾਤਿ. ਤਸ੍ਮਾ ਮਾਗਣ੍ਡਿਯਬ੍ਰਾਹ੍ਮਣੋ ਵਿਯ ਅਯਮ੍ਪਿ ਬ੍ਰਾਹ੍ਮਣੋ ਤਥਾਗਤਸ੍ਸ ਅਧਿਟ੍ਠਾਨਵਸੇਨ ਅਦ੍ਦਸ.

ਪਾਸਾਦਿਕਨ੍ਤਿ ਪਸਾਦਜਨਕਂ. ਇਤਰਂ ਤਸ੍ਸੇਵ ਵੇਵਚਨਂ. ਉਤ੍ਤਮਦਮਥਸਮਥਮਨੁਪ੍ਪਤ੍ਤਨ੍ਤਿ ਏਤ੍ਥ ਉਤ੍ਤਮਦਮਥੋ ਨਾਮ ਅਰਹਤ੍ਤਮਗ੍ਗੋ, ਉਤ੍ਤਮਸਮਥੋ ਨਾਮ ਅਰਹਤ੍ਤਮਗ੍ਗਸਮਾਧਿ, ਤਦੁਭਯਂ ਪਤ੍ਤਨ੍ਤਿ ਅਤ੍ਥੋ. ਦਨ੍ਤਨ੍ਤਿ ਨਿਬ੍ਬਿਸੇਵਨਂ. ਗੁਤ੍ਤਨ੍ਤਿ ਗੋਪਿਤਂ. ਸਂਯਤਿਨ੍ਦ੍ਰਿਯਨ੍ਤਿ ਰਕ੍ਖਿਤਿਨ੍ਦ੍ਰਿਯਂ. ਨਾਗਨ੍ਤਿ ਛਨ੍ਦਾਦੀਹਿ ਅਗਚ੍ਛਨਤੋ, ਪਹੀਨਕਿਲੇਸੇ ਪੁਨ ਅਨਾਗਚ੍ਛਨਤੋ, ਆਗੁਂ ਅਕਰਣਤੋ, ਬਲਵਨ੍ਤਟ੍ਠੇਨਾਤਿ ਚਤੂਹਿ ਕਾਰਣੇਹਿ ਨਾਗਂ.

ਦੇਵੋ ਨੋ ਭਵਂ ਭਵਿਸ੍ਸਤੀਤਿ ਏਤ੍ਥ ‘‘ਦੇਵੋ ਨੋ ਭਵ’’ਨ੍ਤਿ ਏਤ੍ਤਾਵਤਾਪਿ ਪੁਚ੍ਛਾ ਨਿਟ੍ਠਿਤਾ ਭਵੇਯ੍ਯ, ਅਯਂ ਪਨ ਬ੍ਰਾਹ੍ਮਣੋ ‘‘ਅਨਾਗਤੇ ਮਹੇਸਕ੍ਖੋ ਏਕੋ ਦੇਵਰਾਜਾ ਭਵਿਸ੍ਸਤੀ’’ਤਿ ਅਨਾਗਤਵਸੇਨ ਪੁਚ੍ਛਾਸਭਾਗੇਨੇਵ ਕਥੇਨ੍ਤੋ ਏਵਮਾਹ. ਭਗਵਾਪਿਸ੍ਸ ਪੁਚ੍ਛਾਸਭਾਗੇਨੇਵ ਕਥੇਨ੍ਤੋ ਨ ਖੋ ਅਹਂ, ਬ੍ਰਾਹ੍ਮਣ, ਦੇਵੋ ਭਵਿਸ੍ਸਾਮੀਤਿ ਆਹ. ਏਸ ਨਯੋ ਸਬ੍ਬਤ੍ਥ. ਆਸਵਾਨਨ੍ਤਿ ਕਾਮਾਸਵਾਦੀਨਂ ਚਤੁਨ੍ਨਂ. ਪਹੀਨਾਤਿ ਬੋਧਿਪਲ੍ਲਙ੍ਕੇ ਸਬ੍ਬਞ੍ਞੁਤਞ੍ਞਾਣਾਧਿਗਮੇਨੇਵ ਪਹੀਨਾ. ਅਨੁਪਲਿਤ੍ਤੋ ਲੋਕੇਨਾਤਿ ਤਣ੍ਹਾਦਿਟ੍ਠਿਲੇਪਾਨਂ ਪਹੀਨਤ੍ਤਾ ਸਙ੍ਖਾਰਲੋਕੇਨ ਅਨੁਪਲਿਤ੍ਤੋ. ਬੁਦ੍ਧੋਤਿ ਚਤੁਨ੍ਨਂ ਸਚ੍ਚਾਨਂ ਬੁਦ੍ਧਤ੍ਤਾ ਬੁਦ੍ਧੋ ਇਤਿ ਮਂ ਧਾਰੇਹਿ.

ਯੇਨਾਤਿ ਯੇਨ ਆਸਵੇਨ. ਦੇਵੂਪਪਤ੍ਯਸ੍ਸਾਤਿ ਦੇਵੂਪਪਤ੍ਤਿ ਅਸ੍ਸ ਮਯ੍ਹਂ ਭਵੇਯ੍ਯ. ਵਿਹਙ੍ਗਮੋਤਿ ਆਕਾਸਚਰੋ ਗਨ੍ਧਬ੍ਬਕਾਯਿਕਦੇਵੋ. ਵਿਦ੍ਧਸ੍ਤਾਤਿ ਵਿਧਮਿਤਾ. ਵਿਨਲ਼ੀਕਤਾਤਿ ਵਿਗਤਨਲ਼ਾ ਵਿਗਤਬਨ੍ਧਨਾ ਕਤਾ. ਵਗ੍ਗੂਤਿ ਸੁਨ੍ਦਰਂ. ਤੋਯੇਨ ਨੁਪਲਿਪ੍ਪਤੀਤਿ ਉਦਕਤੋ ਰਤਨਮਤ੍ਤਂ ਅਚ੍ਚੁਗ੍ਗਮ੍ਮ ਠਿਤਂ ਸਰਂ ਸੋਭਯਮਾਨਂ ਭਮਰਗਣਂ ਹਾਸਯਮਾਨਂ ਤੋਯੇਨ ਨ ਲਿਪ੍ਪਤਿ. ਤਸ੍ਮਾ ਬੁਦ੍ਧੋਸ੍ਮਿ ਬ੍ਰਾਹ੍ਮਣਾਤਿ ਦੇਸਨਾਪਰਿਯੋਸਾਨੇ ਤੀਣਿ ਮਗ੍ਗਫਲਾਨਿ ਪਾਪੁਣਿਤ੍ਵਾ ਦ੍ਵਾਦਸਹਿ ਪਦਸਹਸ੍ਸੇਹਿ ਦੋਣਗਜ੍ਜਿਤਂ ਨਾਮ ਵਣ੍ਣਂ ਕਥੇਸਿ, ਤਥਾਗਤੇ ਚ ਪਰਿਨਿਬ੍ਬੁਤੇ ਜਮ੍ਬੁਦੀਪਤਲੇ ਉਪ੍ਪਨ੍ਨਂ ਮਹਾਕਲਹਂ ਵੂਪਸਮੇਤ੍ਵਾ ਧਾਤੁਯੋ ਭਾਜੇਸੀਤਿ.

੭. ਅਪਰਿਹਾਨਿਯਸੁਤ੍ਤਵਣ੍ਣਨਾ

੩੭. ਸਤ੍ਤਮੇ ਨਿਬ੍ਬਾਨਸ੍ਸੇਵ ਸਨ੍ਤਿਕੇਤਿ ਨਿਬ੍ਬਾਨਸਨ੍ਤਿਕੇਯੇਵ ਚਰਤਿ. ਸੀਲੇ ਪਤਿਟ੍ਠਿਤੋਤਿ ਪਾਤਿਮੋਕ੍ਖਸੀਲੇ ਪਤਿਟ੍ਠਿਤੋ. ਏਵਂ ਵਿਹਾਰੀਤਿ ਏਵਂ ਵਿਹਰਨ੍ਤੋ. ਆਤਾਪੀਤਿ ਆਤਾਪੇਨ ਵੀਰਿਯੇਨ ਸਮਨ੍ਨਾਗਤੋ. ਯੋਗਕ੍ਖੇਮਸ੍ਸਾਤਿ ਚਤੂਹਿ ਯੋਗੇਹਿ ਖੇਮਸ੍ਸ ਨਿਬ੍ਬਾਨਸ੍ਸ. ਪਮਾਦੇ ਭਯਦਸ੍ਸਿਵਾਤਿ ਪਮਾਦਂ ਭਯਤੋ ਪਸ੍ਸਨ੍ਤੋ.

੮. ਪਤਿਲੀਨਸੁਤ੍ਤਵਣ੍ਣਨਾ

੩੮. ਅਟ੍ਠਮੇ ਪਨੁਣ੍ਣਪਚ੍ਚੇਕਸਚ੍ਚੋਤਿ ‘‘ਇਦਮੇਵ ਦਸ੍ਸਨਂ ਸਚ੍ਚਂ, ਇਦਮੇਵ ਸਚ੍ਚ’’ਨ੍ਤਿ ਏਵਂ ਪਾਟਿਏਕ੍ਕਂ ਗਹਿਤਤ੍ਤਾ ਪਚ੍ਚੇਕਸਙ੍ਖਾਤਾਨਿ ਦਿਟ੍ਠਿਸਚ੍ਚਾਨਿ ਪਨੁਣ੍ਣਾਨਿ ਨੀਹਟਾਨਿ ਪਹੀਨਾਨਿ ਅਸ੍ਸਾਤਿ ਪਨੁਣ੍ਣਪਚ੍ਚੇਕਸਚ੍ਚੋ. ਸਮਵਯਸਟ੍ਠੇਸਨੋਤਿ ਏਤ੍ਥ ਅਵਯਾਤਿ ਅਨੂਨਾ, ਸਟ੍ਠਾਤਿ ਵਿਸ੍ਸਟ੍ਠਾ, ਸਮ੍ਮਾ ਅਵਯਾ ਸਟ੍ਠਾ ਏਸਨਾ ਅਸ੍ਸਾਤਿ ਸਮਵਯਸਟ੍ਠੇਸਨੋ, ਸਮ੍ਮਾ ਵਿਸ੍ਸਟ੍ਠਸਬ੍ਬਏਸਨੋਤਿ ਅਤ੍ਥੋ. ਪਤਿਲੀਨੋਤਿ ਨਿਲੀਨੋ ਏਕੀਭਾਵਂ ਉਪਗਤੋ. ਪੁਥੁਸਮਣਬ੍ਰਾਹ੍ਮਣਾਨਨ੍ਤਿ ਬਹੂਨਂ ਸਮਣਬ੍ਰਾਹ੍ਮਣਾਨਂ. ਏਤ੍ਥ ਚ ਸਮਣਾਤਿ ਪਬ੍ਬਜ੍ਜੂਪਗਤਾ, ਬ੍ਰਾਹ੍ਮਣਾਤਿ ਭੋਵਾਦਿਨੋ. ਪੁਥੁਪਚ੍ਚੇਕਸਚ੍ਚਾਨੀਤਿ ਬਹੂਨਿ ਪਾਟੇਕ੍ਕਸਚ੍ਚਾਨਿ. ਨੁਣ੍ਣਾਨੀਤਿ ਨੀਹਟਾਨਿ. ਪਨੁਣ੍ਣਾਨੀਤਿ ਸੁਟ੍ਠੁ ਨੀਹਟਾਨਿ. ਚਤ੍ਤਾਨੀਤਿ ਵਿਸ੍ਸਟ੍ਠਾਨਿ. ਵਨ੍ਤਾਨੀਤਿ ਵਮਿਤਾਨਿ. ਮੁਤ੍ਤਾਨੀਤਿ ਛਿਨ੍ਨਬਨ੍ਧਨਾਨਿ ਕਤਾਨਿ. ਪਹੀਨਾਨੀਤਿ ਪਜਹਿਤਾਨਿ. ਪਟਿਨਿਸ੍ਸਟ੍ਠਾਨੀਤਿ ਯਥਾ ਨ ਪੁਨ ਚਿਤ੍ਤਂ ਆਰੋਹਨ੍ਤਿ, ਏਵਂ ਪਟਿਨਿਸ੍ਸਜ੍ਜਿਤਾਨਿ. ਸਬ੍ਬਾਨੇਵੇਤਾਨਿ ਗਹਿਤਗਹਣਸ੍ਸ ਵਿਸ੍ਸਟ੍ਠਭਾਵਵੇਵਚਨਾਨਿ.

ਕਾਮੇਸਨਾ ਪਹੀਨਾ ਹੋਤੀਤਿ ਅਨਾਗਾਮਿਮਗ੍ਗੇਨ ਪਹੀਨਾ. ਭਵੇਸਨਾ ਪਨ ਅਰਹਤ੍ਤਮਗ੍ਗੇਨ ਪਹੀਯਤਿ. ‘‘ਬ੍ਰਹ੍ਮਚਰਿਯਂ ਏਸਿਸ੍ਸਾਮਿ ਗਵੇਸਿਸ੍ਸਾਮੀ’’ਤਿ ਏਵਂ ਪਵਤ੍ਤਜ੍ਝਾਸਯਸਙ੍ਖਾਤਾ ਬ੍ਰਹ੍ਮਚਰਿਯੇਸਨਾਪਿ ਅਰਹਤ੍ਤਮਗ੍ਗੇਨੇਵ ਪਟਿਪ੍ਪਸ੍ਸਦ੍ਧਿਂ ਵੂਪਸਮਂ ਗਚ੍ਛਤਿ. ਦਿਟ੍ਠਿਬ੍ਰਹ੍ਮਚਰਿਯੇਸਨਾ ਪਨ ਸੋਤਾਪਤ੍ਤਿਮਗ੍ਗੇਨੇਵ ਪਟਿਪ੍ਪਸਮ੍ਭਤੀਤਿ ਵੇਦਿਤਬ੍ਬਾ. ਏਵਂ ਖੋ, ਭਿਕ੍ਖਵੇਤਿ ਏਵਂ ਚਤੁਤ੍ਥਜ੍ਝਾਨੇਨ ਪਸ੍ਸਦ੍ਧਕਾਯਸਙ੍ਖਾਰੋ ਵੂਪਸਨ੍ਤਅਸ੍ਸਾਸਪਸ੍ਸਾਸੋ ਨਾਮ ਹੋਤਿ. ਅਸ੍ਮਿਮਾਨੋਤਿ ਅਸ੍ਮੀਤਿ ਉਪ੍ਪਜ੍ਜਨਕੋ ਨਵਵਿਧਮਾਨੋ.

ਗਾਥਾਸੁ ਕਾਮੇਸਨਾ ਭਵੇਸਨਾਤਿ ਏਤਾ ਦ੍ਵੇ ਏਸਨਾ, ਬ੍ਰਹ੍ਮਚਰਿਯੇਸਨਾ ਸਹਾਤਿ ਤਾਹਿਯੇਵ ਸਹ ਬ੍ਰਹ੍ਮਚਰਿਯੇਸਨਾਤਿ ਤਿਸ੍ਸੋਪਿ ਏਤਾ. ਇਧ ਠਤ੍ਵਾ ਏਸਨਾ ਪਟਿਨਿਸ੍ਸਟ੍ਠਾਤਿ ਇਮਿਨਾ ਪਦੇਨ ਸਦ੍ਧਿਂ ਯੋਜਨਾ ਕਾਤਬ੍ਬਾ. ਇਤਿ ਸਚ੍ਚਪਰਾਮਾਸੋ, ਦਿਟ੍ਠਿਟ੍ਠਾਨਾ ਸਮੁਸ੍ਸਯਾਤਿ ‘‘ਇਤਿ ਸਚ੍ਚਂ ਇਤਿ ਸਚ੍ਚ’’ਨ੍ਤਿ ਗਹਣਪਰਾਮਾਸੋ ਚ ਦਿਟ੍ਠਿਸਙ੍ਖਾਤਾਯੇਵ ਦਿਟ੍ਠਿਟ੍ਠਾਨਾ ਚ ਯੇ ਸਮੁਸ੍ਸਿਤਤ੍ਤਾ ਉਗ੍ਗਨ੍ਤ੍ਵਾ ਠਿਤਤ੍ਤਾ ਸਮੁਸ੍ਸਯਾਤਿ ਵੁਚ੍ਚਨ੍ਤਿ, ਤੇ ਸਬ੍ਬੇਪਿ. ਇਧ ਠਤ੍ਵਾ ਦਿਟ੍ਠਿਟ੍ਠਾਨਾ ਸਮੂਹਤਾਤਿ ਇਮਿਨਾ ਪਦੇਨ ਸਦ੍ਧਿਂ ਯੋਜਨਾ ਕਾਤਬ੍ਬਾ. ਕਸ੍ਸ ਪਨ ਏਤਾ ਏਸਨਾ ਪਟਿਨਿਸ੍ਸਟ੍ਠਾ, ਏਤੇ ਚ ਦਿਟ੍ਠਿਟ੍ਠਾਨਾ ਸਮੂਹਤਾਤਿ? ਸਬ੍ਬਰਾਗਵਿਰਤ੍ਤਸ੍ਸ ਤਣ੍ਹਾਕ੍ਖਯਵਿਮੁਤ੍ਤਿਨੋ. ਯੋ ਹਿ ਸਬ੍ਬਰਾਗੇਹਿਪਿ ਵਿਰਤ੍ਤੋ, ਤਣ੍ਹਾਕ੍ਖਯੇ ਚ ਨਿਬ੍ਬਾਨੇ ਪਵਤ੍ਤਾਯ ਅਰਹਤ੍ਤਫਲਵਿਮੁਤ੍ਤਿਯਾ ਸਮਨ੍ਨਾਗਤੋ, ਏਤਸ੍ਸ ਏਸਨਾ ਪਟਿਨਿਸ੍ਸਟ੍ਠਾ, ਦਿਟ੍ਠਿਟ੍ਠਾਨਾ ਚ ਸਮੂਹਤਾ. ਸ ਵੇ ਸਨ੍ਤੋਤਿ ਸੋ ਏਵਰੂਪੋ ਕਿਲੇਸਸਨ੍ਤਤਾਯ ਸਨ੍ਤੋ. ਪਸ੍ਸਦ੍ਧੋਤਿ ਦ੍ਵੀਹਿ ਕਾਯਚਿਤ੍ਤਪਸ੍ਸਦ੍ਧੀਹਿ ਪਸ੍ਸਦ੍ਧੋ. ਅਪਰਾਜਿਤੋਤਿ ਸਬ੍ਬਕਿਲੇਸੇ ਜਿਨਿਤ੍ਵਾ ਠਿਤਤ੍ਤਾ ਕੇਨਚਿ ਅਪਰਾਜਿਤੋ. ਮਾਨਾਭਿਸਮਯਾਤਿ ਮਾਨਸ੍ਸ ਪਹਾਨਾਭਿਸਮਯੇਨ. ਬੁਦ੍ਧੋਤਿ ਚਤ੍ਤਾਰਿ ਸਚ੍ਚਾਨਿ ਬੁਜ੍ਝਿਤ੍ਵਾ ਠਿਤੋ. ਇਤਿ ਇਮਸ੍ਮਿਂ ਸੁਤ੍ਤੇਪਿ ਗਾਥਾਸੁਪਿ ਖੀਣਾਸਵੋਵ ਕਥਿਤੋਤਿ.

੯. ਉਜ੍ਜਯਸੁਤ੍ਤਵਣ੍ਣਨਾ

੩੯. ਨਵਮੇ ਸਙ੍ਘਾਤਂ ਆਪਜ੍ਜਨ੍ਤੀਤਿ ਵਧਂ ਮਰਣਂ ਆਪਜ੍ਜਨ੍ਤਿ. ਨਿਚ੍ਚਦਾਨਨ੍ਤਿ ਸਲਾਕਭਤ੍ਤਂ. ਅਨੁਕੁਲਯਞ੍ਞਨ੍ਤਿ ਅਮ੍ਹਾਕਂ ਪਿਤੂਹਿ ਪਿਤਾਮਹੇਹਿ ਦਿਨ੍ਨਤ੍ਤਾ ਏਵਂ ਕੁਲਾਨੁਕੁਲਵਸੇਨ ਯਜਿਤਬ੍ਬਂ, ਦਾਤਬ੍ਬਨ੍ਤਿ ਅਤ੍ਥੋ. ਅਸ੍ਸਮੇਧਨ੍ਤਿਆਦੀਸੁ ਅਸ੍ਸਮੇਤ੍ਥ ਮੇਧਨ੍ਤੀਤਿ ਅਸ੍ਸਮੇਧੋ, ਦ੍ਵੀਹਿ ਪਰਿਯਞ੍ਞੇਹਿ ਯਜਿਤਬ੍ਬਸ੍ਸ ਏਕਵੀਸਤਿਯੂਪਸ੍ਸ ਠਪੇਤ੍ਵਾ ਭੂਮਿਞ੍ਚ ਪੁਰਿਸੇ ਚ ਅਵਸੇਸਸਬ੍ਬਵਿਭਵਦਕ੍ਖਿਣਸ੍ਸ ਯਞ੍ਞਸ੍ਸੇਤਂ ਅਧਿਵਚਨਂ. ਪੁਰਿਸਮੇਤ੍ਥ ਮੇਧਨ੍ਤੀਤਿ ਪੁਰਿਸਮੇਧੋ, ਚਤੂਹਿ ਪਰਿਯਞ੍ਞੇਹਿ ਯਜਿਤਬ੍ਬਸ੍ਸ ਸਦ੍ਧਿਂ ਭੂਮਿਯਾ ਅਸ੍ਸਮੇਧੇ ਵੁਤ੍ਤਵਿਭਵਦਕ੍ਖਿਣਸ੍ਸ ਯਞ੍ਞਸ੍ਸੇਤਂ ਅਧਿਵਚਨਂ. ਸਮ੍ਮਮੇਤ੍ਥ ਪਾਸਨ੍ਤੀਤਿ ਸਮ੍ਮਾਪਾਸੋ, ਦਿਵਸੇ ਦਿਵਸੇ ਸਮ੍ਮਂ ਖਿਪਿਤ੍ਵਾ ਤਸ੍ਸ ਪਤਿਤੋਕਾਸੇ ਵੇਦਿਂ ਕਤ੍ਵਾ ਸਂਹਾਰਿਮੇਹਿ ਯੂਪਾਦੀਹਿ ਸਰਸ੍ਸਤਿਨਦਿਯਾ ਨਿਮੁਗ੍ਗੋਕਾਸਤੋ ਪਭੁਤਿ ਪਟਿਲੋਮਂ ਗਚ੍ਛਨ੍ਤੇਨ ਯਜਿਤਬ੍ਬਸ੍ਸ ਸਬ੍ਬਯਾਗਸ੍ਸੇਤਂ ਅਧਿਵਚਨਂ. ਵਾਜਮੇਤ੍ਥ ਪਿਵਨ੍ਤੀਤਿ ਵਾਜਪੇਯ੍ਯਂ, ਏਕੇਨ ਪਰਿਯਞ੍ਞੇਨ ਸਤ੍ਤਰਸਹਿ ਪਸੂਹਿ ਯਜਿਤਬ੍ਬਸ੍ਸ ਬੇਲੁਵਯੂਪਸ੍ਸ ਸਤ੍ਤਰਸਕਦਕ੍ਖਿਣਸ੍ਸ ਯਞ੍ਞਸ੍ਸੇਤਂ ਅਧਿਵਚਨਂ. ਨਤ੍ਥਿ ਏਤ੍ਥ ਅਗ੍ਗਲ਼ਾਤਿ ਨਿਰਗ੍ਗਲ਼ੋ. ਨਵਹਿ ਪਰਿਯਞ੍ਞੇਹਿ ਯਜਿਤਬ੍ਬਸ੍ਸ ਸਦ੍ਧਿਂ ਭੂਮਿਯਾ ਪੁਰਿਸੇਹਿ ਚ ਅਸ੍ਸਮੇਧੇ ਵੁਤ੍ਤਵਿਭਵਦਕ੍ਖਿਣਸ੍ਸ ਸਬ੍ਬਮੇਧਪਰਿਯਾਯਨਾਮਸ੍ਸ ਅਸ੍ਸਮੇਧਵਿਕਪ੍ਪਸ੍ਸੇਤਂ ਅਧਿਵਚਨਂ. ਮਹਾਰਮ੍ਭਾਤਿ ਮਹਾਕਿਚ੍ਚਾ ਮਹਾਕਰਣੀਯਾ. ਅਪਿਚ ਪਾਣਾਤਿਪਾਤਸਮਾਰਮ੍ਭਸ੍ਸ ਮਹਨ੍ਤਤਾਯਪਿ ਮਹਾਰਮ੍ਭਾਯੇਵ. ਨ ਤੇ ਹੋਨ੍ਤਿ ਮਹਪ੍ਫਲਾਤਿ ਏਤ੍ਥ ਨਿਰਵਸੇਸਤ੍ਥੇ ਸਾਵਸੇਸਰੂਪਨਂ ਕਤਂ. ਤਸ੍ਮਾ ਇਟ੍ਠਫਲੇਨ ਨਿਪ੍ਫਲਾਵ ਹੋਨ੍ਤੀਤਿ ਅਤ੍ਥੋ. ਇਦਞ੍ਚ ਪਾਣਾਤਿਪਾਤਸਮਾਰਮ੍ਭਮੇਵ ਸਨ੍ਧਾਯ ਵੁਤ੍ਤਂ. ਯਂ ਪਨ ਤਤ੍ਥ ਅਨ੍ਤਰਨ੍ਤਰਾ ਦਾਨਂ ਦਿਯ੍ਯਤਿ, ਤਂ ਇਮਿਨਾ ਸਮਾਰਮ੍ਭੇਨ ਉਪਹਤਤ੍ਤਾ ਮਹਪ੍ਫਲਂ ਨ ਹੋਤਿ, ਮਨ੍ਦਫਲਂ ਹੋਤੀਤਿ ਅਤ੍ਥੋ. ਹਞ੍ਞਰੇਤਿ ਹਞ੍ਞਨ੍ਤਿ. ਯਜਨ੍ਤਿ ਅਨੁਕੁਲਂ ਸਦਾਤਿ ਯੇ ਅਞ੍ਞੇ ਅਨੁਕੁਲਂ ਯਜਨ੍ਤਿ, ਪੁਬ੍ਬਪੁਰਿਸੇਹਿ ਯਿਟ੍ਠਤ੍ਤਾ ਪਚ੍ਛਿਮਪੁਰਿਸਾਪਿ ਯਜਨ੍ਤੀਤਿ ਅਤ੍ਥੋ. ਸੇਯ੍ਯੋ ਹੋਤੀਤਿ ਵਿਸੇਸੋਵ ਹੋਤਿ. ਨ ਪਾਪਿਯੋਤਿ ਪਾਪਂ ਕਿਞ੍ਚਿ ਨ ਹੋਤਿ.

੧੦. ਉਦਾਯਿਸੁਤ੍ਤਵਣ੍ਣਨਾ

੪੦. ਦਸਮੇ ਅਭਿਸਙ੍ਖਤਨ੍ਤਿ ਰਾਸਿਕਤਂ. ਨਿਰਾਰਮ੍ਭਨ੍ਤਿ ਪਾਣਸਮਾਰਮ੍ਭਰਹਿਤਂ. ਯਞ੍ਞਨ੍ਤਿ ਦੇਯ੍ਯਧਮ੍ਮਂ. ਤਞ੍ਹਿ ਯਜਿਤਬ੍ਬਤ੍ਤਾ ਯਞ੍ਞਨ੍ਤਿ ਵੁਚ੍ਚਤਿ. ਕਾਲੇਨਾਤਿ ਯੁਤ੍ਤਪ੍ਪਤ੍ਤਕਾਲੇਨ. ਉਪਸਂਯਨ੍ਤੀਤਿ ਉਪਗਚ੍ਛਨ੍ਤਿ. ਕੁਲਂ ਗਤਿਨ੍ਤਿ ਵਟ੍ਟਕੁਲਞ੍ਚੇਵ ਵਟ੍ਟਗਤਿਞ੍ਚ ਅਤਿਕ੍ਕਨ੍ਤਾ. ਯਞ੍ਞਸ੍ਸ ਕੋਵਿਦਾਤਿ ਚਤੁਭੂਮਕਯਞ੍ਞੇ ਕੁਸਲਾ. ਯਞ੍ਞੇਤਿ ਪਕਤਿਦਾਨੇ. ਸਦ੍ਧੇਤਿ ਮਤਕਦਾਨੇ. ਹਬ੍ਯਂ ਕਤ੍ਵਾਤਿ ਹੁਨਿਤਬ੍ਬਂ ਦੇਯ੍ਯਧਮ੍ਮਂ ਉਪਕਪ੍ਪੇਤ੍ਵਾ. ਸੁਖੇਤ੍ਤੇ ਬ੍ਰਹ੍ਮਚਾਰਿਸੂਤਿ ਬ੍ਰਹ੍ਮਚਾਰਿਸਙ੍ਖਾਤੇ ਸੁਖੇਤ੍ਤਮ੍ਹੀਤਿ ਅਤ੍ਥੋ. ਸੁਪ੍ਪਤ੍ਤਨ੍ਤਿ ਸੁਟ੍ਠੁ ਪਤ੍ਤਂ. ਦਕ੍ਖਿਣੇਯ੍ਯੇਸੁ ਯਂ ਕਤਨ੍ਤਿ ਯਂ ਦਕ੍ਖਿਣਾਯ ਅਨੁਚ੍ਛਵਿਕੇਸੁ ਉਪਕਪ੍ਪਿਤਂ, ਤਂ ਸੁਹੁਤਂ ਸੁਯਿਟ੍ਠਂ ਸੁਪ੍ਪਤ੍ਤਨ੍ਤਿ ਅਤ੍ਥੋ. ਸਦ੍ਧੋਤਿ ਬੁਦ੍ਧਧਮ੍ਮਸਙ੍ਘਗੁਣਾਨਂ ਸਦ੍ਦਹਨਤਾਯ ਸਦ੍ਧੋ. ਮੁਤ੍ਤੇਨ ਚੇਤਸਾਤਿ ਵਿਸ੍ਸਟ੍ਠੇਨ ਚਿਤ੍ਤੇਨ. ਇਮਿਨਾਸ੍ਸ ਮੁਤ੍ਤਚਾਗਂ ਦੀਪੇਤੀਤਿ.

ਚਕ੍ਕਵਗ੍ਗੋ ਚਤੁਤ੍ਥੋ.