੫. ਰੋਹਿਤਸ੍ਸਵਗ੍ਗੋ

੧. ਸਮਾਧਿਭਾਵਨਾਸੁਤ੍ਤਵਣ੍ਣਨਾ

੪੧. ਪਞ੍ਚਮਸ੍ਸ ਪਠਮੇ ਞਾਣਦਸ੍ਸਨਪ੍ਪਟਿਲਾਭਾਯਾਤਿ ਦਿਬ੍ਬਚਕ੍ਖੁਞਾਣਦਸ੍ਸਨਸ੍ਸ ਪਟਿਲਾਭਾਯ. ਦਿਵਾਸਞ੍ਞਂ ਅਧਿਟ੍ਠਾਤੀਤਿ ਦਿਵਾਤਿ ਏਵਂ ਸਞ੍ਞਂ ਅਧਿਟ੍ਠਾਤਿ. ਯਥਾ ਦਿਵਾ ਤਥਾ ਰਤ੍ਤਿਨ੍ਤਿ ਯਥਾ ਦਿਵਾ ਆਲੋਕਸਞ੍ਞਾ ਮਨਸਿ ਕਤਾ, ਤਥੇਵ ਤਂ ਰਤ੍ਤਿਮ੍ਪਿ ਮਨਸਿ ਕਰੋਤਿ. ਦੁਤਿਯਪਦੇਪਿ ਏਸੇਵ ਨਯੋ. ਸਪ੍ਪਭਾਸਨ੍ਤਿ ਦਿਬ੍ਬਚਕ੍ਖੁਞਾਣੋਭਾਸੇਨ ਸਹੋਭਾਸਂ. ਕਿਞ੍ਚਾਪਿ ਆਲੋਕਸਦਿਸਂ ਕਤਂ, ਅਤ੍ਥੋ ਪਨੇਤ੍ਥ ਨ ਏਵਂ ਸਲ੍ਲਕ੍ਖੇਤਬ੍ਬੋ. ਦਿਬ੍ਬਚਕ੍ਖੁਞਾਣਾਲੋਕੋ ਹਿ ਇਧਾਧਿਪ੍ਪੇਤੋ.

ਵਿਦਿਤਾਤਿ ਪਾਕਟਾ ਹੁਤ੍ਵਾ. ਕਥਂ ਪਨ ਵੇਦਨਾ ਵਿਦਿਤਾ ਉਪ੍ਪਜ੍ਜਨ੍ਤਿ, ਵਿਦਿਤਾ ਅਬ੍ਭਤ੍ਥਂ ਗਚ੍ਛਨ੍ਤੀਤਿ? ਇਧ ਭਿਕ੍ਖੁ ਵਤ੍ਥੁਂ ਪਰਿਗ੍ਗਣ੍ਹਾਤਿ, ਆਰਮ੍ਮਣਂ ਪਰਿਗ੍ਗਣ੍ਹਾਤਿ. ਤਸ੍ਸ ਪਰਿਗ੍ਗਹਿਤਵਤ੍ਥਾਰਮ੍ਮਣਤਾਯ ਤਾ ਵੇਦਨਾ ‘‘ਏਵਂ ਉਪ੍ਪਜ੍ਜਿਤ੍ਵਾ ਏਵਂ ਠਤ੍ਵਾ ਏਵਂ ਨਿਰੁਜ੍ਝਨ੍ਤੀ’’ਤਿ ਵਿਦਿਤਾ ਉਪ੍ਪਜ੍ਜਨ੍ਤਿ, ਵਿਦਿਤਾ ਤਿਟ੍ਠਨ੍ਤਿ, ਵਿਦਿਤਾ ਅਬ੍ਭਤ੍ਥਂ ਗਚ੍ਛਨ੍ਤਿ ਨਾਮ. ਸਞ੍ਞਾਵਿਤਕ੍ਕੇਸੁਪਿ ਏਸੇਵ ਨਯੋ.

ਉਦਯਬ੍ਬਯਾਨੁਪਸ੍ਸੀਤਿ ਉਦਯਞ੍ਚ ਵਯਞ੍ਚ ਪਸ੍ਸਨ੍ਤੋ. ਇਤਿ ਰੂਪਨ੍ਤਿ ਏਵਂ ਰੂਪਂ ਏਤ੍ਤਕਂ ਰੂਪਂ ਨ ਇਤੋ ਪਰਂ ਰੂਪਂ ਅਤ੍ਥੀਤਿ. ਇਤਿ ਰੂਪਸ੍ਸ ਸਮੁਦਯੋਤਿ ਏਵਂ ਰੂਪਸ੍ਸ ਉਪ੍ਪਾਦੋ. ਅਤ੍ਥਙ੍ਗਮੋਤਿ ਪਨ ਭੇਦੋ ਅਧਿਪ੍ਪੇਤੋ. ਵੇਦਨਾਦੀਸੁਪਿ ਏਸੇਵ ਨਯੋ. ਇਦਞ੍ਚ ਪਨ ਮੇਤਂ, ਭਿਕ੍ਖਵੇ, ਸਨ੍ਧਾਯ ਭਾਸਿਤਨ੍ਤਿ, ਭਿਕ੍ਖਵੇ, ਯਂ ਮਯਾ ਏਤਂ ਪੁਣ੍ਣਕਪਞ੍ਹੇ ‘‘ਸਙ੍ਖਾਯ ਲੋਕਸ੍ਮਿ’’ਨ੍ਤਿਆਦਿ ਭਾਸਿਤਂ, ਤਂ ਇਦਂ ਫਲਸਮਾਪਤ੍ਤਿਂ ਸਨ੍ਧਾਯ ਭਾਸਿਤਨ੍ਤਿ ਅਤ੍ਥੋ.

ਤਤ੍ਥ ਸਙ੍ਖਾਯਾਤਿ ਞਾਣੇਨ ਜਾਨਿਤ੍ਵਾ. ਲੋਕਸ੍ਮਿਨ੍ਤਿ ਸਤ੍ਤਲੋਕੇ. ਪਰੋਪਰਾਨੀਤਿ ਉਚ੍ਚਾਵਚਾਨਿ ਉਤ੍ਤਮਾਧਮਾਨਿ. ਇਞ੍ਜਿਤਨ੍ਤਿ ਚਲਿਤਂ. ਨਤ੍ਥਿ ਕੁਹਿਞ੍ਚਿ ਲੋਕੇਤਿ ਲੋਕਸ੍ਮਿਂ ਕਤ੍ਥਚਿ ਏਕਕ੍ਖਨ੍ਧੇਪਿ ਏਕਾਯਤਨੇਪਿ ਏਕਧਾਤੁਯਾਪਿ ਏਕਾਰਮ੍ਮਣੇਪਿ ਨਤ੍ਥਿ. ਸਨ੍ਤੋਤਿ ਪਚ੍ਚਨੀਕਕਿਲੇਸਵੂਪਸਮੇਨ ਸਨ੍ਤੋ. ਵਿਧੂਮੋਤਿ ਕੋਧਧੂਮੇਨ ਵਿਗਤਧੂਮੋ. ਏਵਮੇਤ੍ਥ ਸੁਤ੍ਤਨ੍ਤੇ ਮਗ੍ਗੇਕਗ੍ਗਤਮ੍ਪਿ ਕਥੇਤ੍ਵਾ ਗਾਥਾਯ ਫਲਸਮਾਪਤ੍ਤਿਯੇਵ ਕਥਿਤਾਤਿ.

੨. ਪਞ੍ਹਬ੍ਯਾਕਰਣਸੁਤ੍ਤਵਣ੍ਣਨਾ

੪੨. ਦੁਤਿਯੇ ਯੋ ਚ ਤੇਸਂ ਤਤ੍ਥ ਤਤ੍ਥ, ਜਾਨਾਤਿ ਅਨੁਧਮ੍ਮਤਨ੍ਤਿ ਯੋ ਏਤੇਸਂ ਪਞ੍ਹਾਨਂ ਤਸ੍ਮਿਂ ਤਸ੍ਮਿਂ ਠਾਨੇ ਬ੍ਯਾਕਰਣਂ ਜਾਨਾਤਿ. ਚਤੁਪਞ੍ਹਸ੍ਸ ਕੁਸਲੋ, ਆਹੁ ਭਿਕ੍ਖੁਂ ਤਥਾਵਿਧਨ੍ਤਿ ਤਥਾਵਿਧਂ ਭਿਕ੍ਖੁਂ ਤੇਸੁ ਚਤੂਸੁ ਪਞ੍ਹੇਸੁ ਕੁਸਲੋਤਿ ਏਵਂ ਵਦਨ੍ਤਿ. ਦੁਰਾਸਦੋ ਦੁਪ੍ਪਸਹੋਤਿ ਪਰੇਹਿ ਘਟ੍ਟੇਤੁਂ ਵਾ ਅਭਿਭਵਿਤੁਂ ਵਾ ਨ ਸਕ੍ਕਾ. ਗਮ੍ਭੀਰੋਤਿ ਸਤ੍ਤਸੀਦਨ੍ਤਰਮਹਾਸਮੁਦ੍ਦੋ ਵਿਯ ਗਮ੍ਭੀਰੋ. ਦੁਪ੍ਪਧਂਸਿਯੋਤਿ ਦੁਮ੍ਮੋਚਾਪਯੋ, ਗਹਿਤਗ੍ਗਹਣਂ ਵਿਸ੍ਸਜ੍ਜਾਪੇਤੁਂ ਨ ਸਕ੍ਕਾਤਿ ਅਤ੍ਥੋ. ਅਤ੍ਥੇ ਅਨਤ੍ਥੇ ਚਾਤਿ ਵਡ੍ਢਿਯਞ੍ਚ ਅਵਡ੍ਢਿਯਞ੍ਚ. ਅਤ੍ਥਾਭਿਸਮਯਾਤਿ ਅਤ੍ਥਸਮਾਗਮੇਨ. ਧੀਰੋ ਪਣ੍ਡਿਤੋਤਿ ਪਵੁਚ੍ਚਤੀਤਿ ਧਿਤਿਸਮ੍ਪਨ੍ਨੋ ਪੁਗ੍ਗਲੋ ‘‘ਪਣ੍ਡਿਤੋ ਅਯ’’ਨ੍ਤਿ ਏਵਂ ਪਵੁਚ੍ਚਤਿ.

੩-੪. ਕੋਧਗਰੁਸੁਤ੍ਤਦ੍ਵਯਵਣ੍ਣਨਾ

੪੩-੪੪. ਤਤਿਯੇ ਕੋਧਗਰੁ ਨ ਸਦ੍ਧਮ੍ਮਗਰੂਤਿ ਕੋਧਂ ਗਾਰਵੇਨ ਗਰੁਂ ਕਤ੍ਵਾ ਗਣ੍ਹਾਤਿ, ਨ ਸਦ੍ਧਮ੍ਮਂ, ਸਦ੍ਧਮ੍ਮਂ ਪਨ ਅਗਾਰਵੇਨ ਲਾਮਕਂ ਕਤ੍ਵਾ ਗਣ੍ਹਾਤਿ. ਸੇਸਪਦੇਸੁਪਿ ਏਸੇਵ ਨਯੋ.

ਵਿਰੂਹਨ੍ਤੀਤਿ ਵਡ੍ਢਨ੍ਤਿ, ਸਞ੍ਜਾਤਮੂਲਾਯ ਵਾ ਸਦ੍ਧਾਯ ਪਤਿਟ੍ਠਹਨ੍ਤਿ ਅਚਲਾ ਭਵਨ੍ਤਿ. ਚਤੁਤ੍ਥੇ ਕੋਧਗਰੁਤਾਤਿ ਕੋਧਮ੍ਹਿ ਸਗਾਰਵਤਾ. ਏਸ ਨਯੋ ਸਬ੍ਬਤ੍ਥ.

੫. ਰੋਹਿਤਸ੍ਸਸੁਤ੍ਤਵਣ੍ਣਨਾ

੪੫. ਪਞ੍ਚਮੇ ਯਤ੍ਥਾਤਿ ਚਕ੍ਕਵਾਲ਼ਲੋਕਸ੍ਸ ਏਕੋਕਾਸੇ ਭੁਮ੍ਮਂ. ਨ ਚਵਤਿ ਨ ਉਪਪਜ੍ਜਤੀਤਿ ਇਦਂ ਅਪਰਾਪਰਂ ਚੁਤਿਪਟਿਸਨ੍ਧਿਵਸੇਨ ਗਹਿਤਂ. ਗਮਨੇਨਾਤਿ ਪਦਗਮਨੇਨ. ਲੋਕਸ੍ਸ ਅਨ੍ਤਨ੍ਤਿ ਸਤ੍ਥਾ ਸਙ੍ਖਾਰਲੋਕਸ੍ਸ ਅਨ੍ਤਂ ਸਨ੍ਧਾਯ ਵਦਤਿ. ਞਾਤੇਯ੍ਯਨ੍ਤਿਆਦੀਸੁ ਞਾਤਬ੍ਬਂ ਦਟ੍ਠਬ੍ਬਂ ਪਤ੍ਤਬ੍ਬਨ੍ਤਿ ਅਤ੍ਥੋ. ਇਤਿ ਦੇਵਪੁਤ੍ਤੇਨ ਚਕ੍ਕਵਾਲ਼ਲੋਕਸ੍ਸ ਅਨ੍ਤੋ ਪੁਚ੍ਛਿਤੋ, ਸਤ੍ਥਾਰਾ ਸਙ੍ਖਾਰਲੋਕਸ੍ਸ ਕਥਿਤੋ. ਸੋ ਪਨ ‘‘ਅਤ੍ਤਨੋ ਪਞ੍ਹੇਨ ਸਦ੍ਧਿਂ ਸਤ੍ਥੁ ਬ੍ਯਾਕਰਣਂ ਸਮੇਤੀ’’ਤਿ ਸਞ੍ਞਾਯ ਸਮ੍ਪਹਂਸਨ੍ਤੋ ਅਚ੍ਛਰਿਯਨ੍ਤਿਆਦਿਮਾਹ.

ਦਲ਼੍ਹਧਮ੍ਮਾਤਿ ਦਲ਼੍ਹਧਨੁ ਉਤ੍ਤਮਪ੍ਪਮਾਣੇਨ ਧਨੁਨਾ ਸਮਨ੍ਨਾਗਤੋ. ਧਨੁਗ੍ਗਹੋਤਿ ਧਨੁਆਚਰਿਯੋ. ਸਿਕ੍ਖਿਤੋਤਿ ਦ੍ਵਾਦਸ ਵਸ੍ਸਾਨਿ ਧਨੁਸਿਪ੍ਪਂ ਸਿਕ੍ਖਿਤੋ. ਕਤਹਤ੍ਥੋਤਿ ਉਸਭਪ੍ਪਮਾਣੇਪਿ ਵਾਲਗ੍ਗਂ ਵਿਜ੍ਝਿਤੁਂ ਸਮਤ੍ਥਭਾਵੇਨ ਕਤਹਤ੍ਥੋ. ਕਤੂਪਾਸਨੋਤਿ ਕਤਸਰਕ੍ਖੇਪੋ ਦਸ੍ਸਿਤਸਿਪ੍ਪੋ. ਅਸਨੇਨਾਤਿ ਕਣ੍ਡੇਨ. ਅਤਿਪਾਤੇਯ੍ਯਾਤਿ ਅਤਿਕ੍ਕਮੇਯ੍ਯ. ਯਾਵਤਾ ਸੋ ਤਾਲਚ੍ਛਾਦਿਂ ਅਤਿਕ੍ਕਮੇਯ੍ਯ, ਤਾਵਤਾ ਕਾਲੇਨ ਏਕਂ ਚਕ੍ਕਵਾਲ਼ਂ ਅਤਿਕ੍ਕਮਾਮੀਤਿ ਅਤ੍ਤਨੋ ਜਵਸਮ੍ਪਤ੍ਤਿਂ ਦਸ੍ਸੇਤਿ.

ਪੁਰਤ੍ਥਿਮਾ ਸਮੁਦ੍ਦਾ ਪਚ੍ਛਿਮੋਤਿ ਯਥਾ ਪੁਰਤ੍ਥਿਮਾ ਸਮੁਦ੍ਦਾ ਪਚ੍ਛਿਮਸਮੁਦ੍ਦੋ ਦੂਰੇ, ਏਵਂ ਮੇ ਦੂਰੇ ਪਦਵੀਤਿਹਾਰੋ ਅਹੋਸੀਤਿ ਵਦਤਿ. ਸੋ ਕਿਰ ਪਾਚੀਨਚਕ੍ਕਵਾਲ਼ਮੁਖਵਟ੍ਟਿਯਂ ਠਿਤੋ ਪਾਦਂ ਪਸਾਰੇਤ੍ਵਾ ਪਚ੍ਛਿਮਚਕ੍ਕਵਾਲ਼ਮੁਖਵਟ੍ਟਿਂ ਅਤਿਕ੍ਕਮਤਿ, ਪੁਨ ਦੁਤਿਯਪਾਦਂ ਪਸਾਰੇਤ੍ਵਾ ਪਰਚਕ੍ਕਵਾਲ਼ਮੁਖਵਟ੍ਟਿਂ ਅਤਿਕ੍ਕਮਤਿ. ਇਚ੍ਛਾਗਤਨ੍ਤਿ ਇਚ੍ਛਾ ਏਵ. ਅਞ੍ਞਤ੍ਰੇਵਾਤਿ ਨਿਪ੍ਪਪਞ੍ਚਤਂ ਦਸ੍ਸੇਤਿ. ਭਿਕ੍ਖਾਚਾਰਕਾਲੇ ਕਿਰੇਸ ਨਾਗਲਤਾਦਨ੍ਤਕਟ੍ਠਂ ਖਾਦਿਤ੍ਵਾ ਅਨੋਤਤ੍ਤੇ ਮੁਖਂ ਧੋਵਿਤ੍ਵਾ ਕਾਲੇ ਸਮ੍ਪਤ੍ਤੇ ਉਤ੍ਤਰਕੁਰੁਮ੍ਹਿ ਪਿਣ੍ਡਾਯ ਚਰਿਤ੍ਵਾ ਚਕ੍ਕਵਾਲ਼ਮੁਖਵਟ੍ਟਿਯਂ ਨਿਸਿਨ੍ਨੋ ਭਤ੍ਤਕਿਚ੍ਚਂ ਕਰੋਤਿ, ਤਤ੍ਥ ਮੁਹੁਤ੍ਤਂ ਵਿਸ੍ਸਮਿਤ੍ਵਾ ਪੁਨ ਜਵਤਿ. ਵਸ੍ਸਸਤਾਯੁਕੋਤਿ ਤਦਾ ਦੀਘਾਯੁਕਕਾਲੋ ਹੋਤਿ, ਅਯਂ ਪਨ ਵਸ੍ਸਸਤਾਵਸਿਟ੍ਠੇ ਆਯੁਮ੍ਹਿ ਗਮਨਂ ਆਰਭਿ. ਵਸ੍ਸਸਤਜੀਵੀਤਿ ਤਂ ਵਸ੍ਸਸਤਂ ਅਨਨ੍ਤਰਾਯੇਨ ਜੀਵਨ੍ਤੋ. ਅਨ੍ਤਰਾਯੇਵ ਕਾਲਙ੍ਕਤੋਤਿ ਚਕ੍ਕਵਾਲ਼ਲੋਕਸ੍ਸ ਅਨ੍ਤਂ ਅਪ੍ਪਤ੍ਵਾ ਅਨ੍ਤਰਾਵ ਮਤੋ. ਸੋ ਪਨ ਤਤ੍ਥ ਕਾਲਂ ਕਤ੍ਵਾਪਿ ਆਗਨ੍ਤ੍ਵਾ ਇਮਸ੍ਮਿਂਯੇਵ ਚਕ੍ਕਵਾਲ਼ੇ ਨਿਬ੍ਬਤ੍ਤਿ.

ਅਪ੍ਪਤ੍ਵਾਤਿ ਸਙ੍ਖਾਰਲੋਕਸ੍ਸ ਅਨ੍ਤਂ ਅਪ੍ਪਤ੍ਵਾ. ਦੁਕ੍ਖਸ੍ਸਾਤਿ ਵਟ੍ਟਦੁਕ੍ਖਸ੍ਸ. ਅਨ੍ਤਕਿਰਿਯਨ੍ਤਿ ਪਰਿਯਨ੍ਤਕਰਣਂ. ਕਲ਼ੇਵਰੇਤਿ ਅਤ੍ਤਭਾਵੇ. ਸਸਞ੍ਞਿਮ੍ਹਿ ਸਮਨਕੇਤਿ ਸਸਞ੍ਞੇ ਸਚਿਤ੍ਤਕੇ. ਲੋਕਨ੍ਤਿ ਦੁਕ੍ਖਸਚ੍ਚਂ. ਲੋਕਸਮੁਦਯਨ੍ਤਿ ਸਮੁਦਯਸਚ੍ਚਂ. ਲੋਕਨਿਰੋਧਨ੍ਤਿ ਨਿਰੋਧਸਚ੍ਚਂ. ਪਟਿਪਦਨ੍ਤਿ ਮਗ੍ਗਸਚ੍ਚਂ. ਇਤਿ ‘‘ਨਾਹਂ, ਆਵੁਸੋ, ਇਮਾਨਿ ਚਤ੍ਤਾਰਿ ਸਚ੍ਚਾਨਿ ਤਿਣਕਟ੍ਠਾਦੀਸੁ ਪਞ੍ਞਪੇਮਿ, ਇਮਸ੍ਮਿਂ ਪਨ ਚਤੁਮਹਾਭੂਤਿਕੇ ਕਾਯਸ੍ਮਿਂਯੇਵ ਪਞ੍ਞਪੇਮੀ’’ਤਿ ਦਸ੍ਸੇਤਿ. ਸਮਿਤਾਵੀਤਿ ਸਮਿਤਪਾਪੋ. ਨਾਸੀਸਤੀਤਿ ਨ ਪਤ੍ਥੇਤਿ. ਛਟ੍ਠਂ ਉਤ੍ਤਾਨਤ੍ਥਮੇਵਾਤਿ.

੭. ਸੁਵਿਦੂਰਸੁਤ੍ਤਵਣ੍ਣਨਾ

੪੭. ਸਤ੍ਤਮੇ ਸੁਵਿਦੂਰਵਿਦੂਰਾਨੀਤਿ ਕੇਨਚਿ ਪਰਿਯਾਯੇਨ ਅਨਾਸਨ੍ਨਾਨਿ ਹੁਤ੍ਵਾ ਸੁਵਿਦੂਰਾਨੇਵ ਵਿਦੂਰਾਨਿ. ਨਭਞ੍ਚ, ਭਿਕ੍ਖਵੇ, ਪਥਵੀ ਚਾਤਿ ਆਕਾਸਞ੍ਚ ਮਹਾਪਥਵੀ ਚ. ਤਤ੍ਥ ਕਿਞ੍ਚਾਪਿ ਪਥਵਿਤੋ ਆਕਾਸਂ ਨਾਮ ਨ ਦੂਰੇ, ਦ੍ਵਙ੍ਗੁਲਮਤ੍ਤੇਪਿ ਹੋਤਿ. ਅਞ੍ਞਮਞ੍ਞਂ ਅਲਗ੍ਗਨਟ੍ਠੇਨ ਪਨ ‘‘ਸੁਵਿਦੂਰਵਿਦੂਰੇ’’ਤਿ ਵੁਤ੍ਤਂ. ਵੇਰੋਚਨੋਤਿ ਸੂਰਿਯੋ. ਸਤਞ੍ਚ, ਭਿਕ੍ਖਵੇ, ਧਮ੍ਮੋਤਿ ਚਤੁਸਤਿਪਟ੍ਠਾਨਾਦਿਭੇਦੋ ਸਤ੍ਤਤਿਂਸਬੋਧਿਪਕ੍ਖਿਯਧਮ੍ਮੋ. ਅਸਤਞ੍ਚ ਧਮ੍ਮੋਤਿ ਦ੍ਵਾਸਟ੍ਠਿਦਿਟ੍ਠਿਗਤਭੇਦੋ ਅਸ੍ਸਦ੍ਧਮ੍ਮੋ.

ਪਭਙ੍ਕਰੋਤਿ ਆਲੋਕਕਰੋ. ਅਬ੍ਯਾਯਿਕੋ ਹੋਤੀਤਿ ਅਵਿਗਚ੍ਛਨਸਭਾਵੋ ਹੋਤਿ. ਸਤਂ ਸਮਾਗਮੋਤਿ ਪਣ੍ਡਿਤਾਨਂ ਮਿਤ੍ਤਸਨ੍ਥਵਵਸੇਨ ਸਮਾਗਮੋ. ਯਾਵਾਪਿ ਤਿਟ੍ਠੇਯ੍ਯਾਤਿ ਯਤ੍ਤਕਂ ਅਦ੍ਧਾਨਂ ਤਿਟ੍ਠੇਯ੍ਯ. ਤਥੇਵ ਹੋਤੀਤਿ ਤਾਦਿਸੋਵ ਹੋਤਿ, ਪਕਤਿਂ ਨ ਜਹਤਿ. ਖਿਪ੍ਪਂ ਹਿ ਵੇਤੀਤਿ ਸੀਘਂ ਵਿਗਚ੍ਛਤਿ.

੮. ਵਿਸਾਖਸੁਤ੍ਤਵਣ੍ਣਨਾ

੪੮. ਅਟ੍ਠਮੇ ਪਞ੍ਚਾਲਪੁਤ੍ਤੋਤਿ ਪਞ੍ਚਾਲਬ੍ਰਾਹ੍ਮਣਿਯਾ ਪੁਤ੍ਤੋ. ਪੋਰਿਯਾ ਵਾਚਾਯਾਤਿ ਪਰਿਪੁਣ੍ਣਵਾਚਾਯ. ਵਿਸ੍ਸਟ੍ਠਾਯਾਤਿ ਅਪਲਿਬੁਦ੍ਧਾਯ. ਅਨੇਲਗਲਾਯਾਤਿ ਨਿਦ੍ਦੋਸਾਯ ਚੇਵ ਅਗਲ਼ਿਤਾਯ ਚ ਅਪਤਿਤਪਦਬ੍ਯਞ੍ਜਨਾਯ. ਪਰਿਯਾਪਨ੍ਨਾਯਾਤਿ ਵਿਵਟ੍ਟਪਰਿਯਾਪਨ੍ਨਾਯ. ਅਨਿਸ੍ਸਿਤਾਯਾਤਿ ਵਟ੍ਟਂ ਅਨਿਸ੍ਸਿਤਾਯ. ਵਿਵਟ੍ਟਨਿਸ੍ਸਿਤਮੇਵ ਕਤ੍ਵਾ ਕਥੇਤਿ, ਵਟ੍ਟਨਿਸ੍ਸਿਤਂ ਕਤ੍ਵਾ ਨ ਕਥੇਤੀਤਿ ਅਯਮੇਤ੍ਥ ਅਧਿਪ੍ਪਾਯੋ.

ਨਾਭਾਸਮਾਨਨ੍ਤਿ ਨ ਅਕਥੇਨ੍ਤਂ. ਅਮਤਂ ਪਦਨ੍ਤਿ ਨਿਬ੍ਬਾਨਪਦਂ. ਭਾਸਯੇਤਿ ਓਭਾਸੇਯ੍ਯ. ਜੋਤਯੇਤਿ ਤਸ੍ਸੇਵ ਵੇਵਚਨਂ. ਪਗ੍ਗਣ੍ਹੇ ਇਸਿਨਂ ਧਜਨ੍ਤਿ ਅਬ੍ਭੁਗ੍ਗਤਟ੍ਠੇਨ ਨਵਲੋਕੁਤ੍ਤਰਧਮ੍ਮੋ ਇਸੀਨਂ ਧਜੋ ਨਾਮ ਵੁਚ੍ਚਤਿ, ਤਮੇਵ ਪਗ੍ਗਣ੍ਹੇਯ੍ਯ ਉਕ੍ਖਿਪੇਯ੍ਯ, ਉਚ੍ਚਂ ਕਤ੍ਵਾ ਕਥੇਯ੍ਯਾਤਿ ਅਤ੍ਥੋ. ਨਵਲੋਕੁਤ੍ਤਰਧਮ੍ਮਦੀਪਕਂ ਸੁਭਾਸਿਤਂ ਧਜੋ ਏਤੇਸਨ੍ਤਿ ਸੁਭਾਸਿਤਧਜਾ. ਇਸਯੋਤਿ ਬੁਦ੍ਧਾਦਯੋ ਅਰਿਯਾ. ਧਮ੍ਮੋ ਹਿ ਇਸਿਨਂ ਧਜੋਤਿ ਹੇਟ੍ਠਾ ਵੁਤ੍ਤਨਯੇਨੇਵ ਲੋਕੁਤ੍ਤਰਧਮ੍ਮੋ ਇਸੀਨਂ ਧਜੋ ਨਾਮਾਤਿ.

੯. ਵਿਪਲ੍ਲਾਸਸੁਤ੍ਤਵਣ੍ਣਨਾ

੪੯. ਨਵਮੇ ਸਞ੍ਞਾਵਿਪਲ੍ਲਾਸਾਤਿ ਸਞ੍ਞਾਯ ਵਿਪਲ੍ਲਤ੍ਥਭਾਵਾ, ਚਤਸ੍ਸੋ ਵਿਪਰੀਤਸਞ੍ਞਾਯੋਤਿ ਅਤ੍ਥੋ. ਸੇਸਪਦਦ੍ਵਯੇਪਿ ਏਸੇਵ ਨਯੋ. ਅਨਿਚ੍ਚੇ, ਭਿਕ੍ਖਵੇ, ਨਿਚ੍ਚਨ੍ਤਿ ਸਞ੍ਞਾਵਿਪਲ੍ਲਾਸੋਤਿ ਅਨਿਚ੍ਚੇ ਵਤ੍ਥੁਸ੍ਮਿਂ ‘‘ਨਿਚ੍ਚਂ ਇਦ’’ਨ੍ਤਿ ਏਵਂ ਗਹੇਤ੍ਵਾ ਉਪ੍ਪਜ੍ਜਨਕਸਞ੍ਞਾ, ਸਞ੍ਞਾਵਿਪਲ੍ਲਾਸੋਤਿ ਅਤ੍ਥੋ. ਇਮਿਨਾ ਨਯੇਨ ਸਬ੍ਬਪਦੇਸੁ ਅਤ੍ਥੋ ਵੇਦਿਤਬ੍ਬੋ.

ਅਨਤ੍ਤਨਿ ਚ ਅਤ੍ਤਾਤਿ ਅਨਤ੍ਤਨਿ ‘‘ਅਤ੍ਤਾ’’ਤਿ ਏਵਂਸਞ੍ਞਿਨੋਤਿ ਅਤ੍ਥੋ. ਮਿਚ੍ਛਾਦਿਟ੍ਠਿਹਤਾਤਿ ਨ ਕੇਵਲਂ ਸਞ੍ਞਿਨੋਵ, ਸਞ੍ਞਾਯ ਵਿਯ ਉਪ੍ਪਜ੍ਜਮਾਨਾਯ ਮਿਚ੍ਛਾਦਿਟ੍ਠਿਯਾਪਿ ਹਤਾ. ਖਿਤ੍ਤਚਿਤ੍ਤਾਤਿ ਤੇ ਸਞ੍ਞਾਦਿਟ੍ਠਿਯੋ ਵਿਯ ਉਪ੍ਪਜ੍ਜਮਾਨੇਨ ਖਿਤ੍ਤੇਨ ਚਿਤ੍ਤੇਨ ਸਮਨ੍ਨਾਗਤਾ. ਵਿਸਞ੍ਞਿਨੋਤਿ ਦੇਸਨਾਮਤ੍ਤਮੇਤਂ, ਵਿਪਰੀਤਸਞ੍ਞਾਚਿਤ੍ਤਦਿਟ੍ਠਿਨੋਤਿ ਅਤ੍ਥੋ. ਤੇ ਯੋਗਯੁਤ੍ਤਾ ਮਾਰਸ੍ਸਾਤਿ ਤੇ ਮਾਰਸ੍ਸ ਯੋਗੇ ਯੁਤ੍ਤਾ ਨਾਮ ਹੋਨ੍ਤਿ. ਅਯੋਗਕ੍ਖੇਮਿਨੋਤਿ ਚਤੂਹਿ ਯੋਗੇਹਿ ਖੇਮਂ ਨਿਬ੍ਬਾਨਂ ਅਪ੍ਪਤ੍ਤਾ. ਸਤ੍ਤਾਤਿ ਪੁਗ੍ਗਲਾ. ਬੁਦ੍ਧਾਤਿ ਚਤੁਸਚ੍ਚਬੁਦ੍ਧਾ. ਇਮਂ ਧਮ੍ਮਨ੍ਤਿ ਚਤੁਸਚ੍ਚਧਮ੍ਮਂ. ਸਚਿਤ੍ਤਂ ਪਚ੍ਚਲਦ੍ਧਾਤਿ ਸਕਂ ਚਿਤ੍ਤਂ ਪਟਿਲਭਿਤ੍ਵਾ. ਅਨਿਚ੍ਚਤੋ ਦਕ੍ਖੁਨ੍ਤਿ ਅਨਿਚ੍ਚਭਾਵੇਨ ਅਦ੍ਦਸਂਸੁ. ਅਸੁਭਤਦ੍ਦਸੁਨ੍ਤਿ ਅਸੁਭਂ ਅਸੁਭਤੋਯੇਵ ਅਦ੍ਦਸਂਸੁ. ਸਮ੍ਮਾਦਿਟ੍ਠਿਸਮਾਦਾਨਾਤਿ ਗਹਿਤਸਮ੍ਮਾਦਸ੍ਸਨਾ. ਸਬ੍ਬਂ ਦੁਕ੍ਖਂ ਉਪਚ੍ਚਗੁਨ੍ਤਿ ਸਕਲਂ ਵਟ੍ਟਦੁਕ੍ਖਂ ਸਮਤਿਕ੍ਕਨ੍ਤਾ.

੧੦. ਉਪਕ੍ਕਿਲੇਸਸੁਤ੍ਤਵਣ੍ਣਨਾ

੫੦. ਦਸਮੇ ਉਪਕ੍ਕਿਲੇਸਾਤਿ ਵਿਰੋਚਿਤੁਂ ਅਦਤ੍ਵਾ ਉਪਕ੍ਕਿਲਿਟ੍ਠਭਾਵਕਰਣੇਨ ਉਪਕ੍ਕਿਲੇਸਾ. ਮਹਿਕਾਤਿ ਹਿਮਂ. ਧੂਮੋ ਰਜੋਤਿ ਧੂਮੋ ਚ ਰਜੋ ਚ. ਰਾਹੂਤਿ ਪੁਰਿਮਾ ਤਯੋ ਅਸਮ੍ਪਤ੍ਤਉਪਕ੍ਕਿਲੇਸਾ, ਰਾਹੁ ਪਨ ਸਮ੍ਪਤ੍ਤਉਪਕ੍ਕਿਲੇਸਵਸੇਨ ਕਥਿਤੋਤਿ ਵੇਦਿਤਬ੍ਬੋ. ਸਮਣਬ੍ਰਾਹ੍ਮਣਾ ਨ ਤਪਨ੍ਤਿ ਨ ਭਾਸਨ੍ਤਿ ਨ ਵਿਰੋਚਨ੍ਤੀਤਿ ਗੁਣਪ੍ਪਤਾਪੇਨ ਨ ਤਪਨ੍ਤਿ, ਗੁਣੋਭਾਸੇਨ ਨ ਭਾਸਨ੍ਤਿ, ਗੁਣਵਿਰੋਚਨੇਨ ਨ ਵਿਰੋਚਨ੍ਤਿ. ਸੁਰਾਮੇਰਯਪਾਨਾ ਅਪ੍ਪਟਿਵਿਰਤਾਤਿ ਪਞ੍ਚਵਿਧਾਯ ਸੁਰਾਯ ਚਤੁਬ੍ਬਿਧਸ੍ਸ ਮੇਰਯਸ੍ਸ ਚ ਪਾਨਤੋ ਅਵਿਰਤਾ.

ਅਵਿਜ੍ਜਾਨਿਵੁਤਾਤਿ ਅਵਿਜ੍ਜਾਯ ਨਿਵਾਰਿਤਾ ਪਿਹਿਤਾ. ਪਿਯਰੂਪਾਭਿਨਨ੍ਦਿਨੋਤਿ ਪਿਯਰੂਪਂ ਸਾਤਰੂਪਂ ਅਭਿਨਨ੍ਦਮਾਨਾ ਤੁਸ੍ਸਮਾਨਾ. ਸਾਦਿਯਨ੍ਤੀਤਿ ਗਣ੍ਹਨ੍ਤਿ. ਅਵਿਦ੍ਦਸੂਤਿ ਅਨ੍ਧਬਾਲਾ. ਸਨੇਤ੍ਤਿਕਾਤਿ ਤਣ੍ਹਾਯੋਤ੍ਤੇਨੇਵ ਸਯੋਤ੍ਤਾ. ਕਟਸਿਨ੍ਤਿ ਅਤ੍ਤਭਾਵਂ. ਘੋਰਨ੍ਤਿ ਕਕ੍ਖਲ਼ਂ. ਇਮਸ੍ਮਿਂ ਸੁਤ੍ਤੇਪਿ ਗਾਥਾਸੁਪਿ ਵਟ੍ਟਮੇਵ ਕਥਿਤਨ੍ਤਿ.

ਰੋਹਿਤਸ੍ਸਵਗ੍ਗੋ ਪਞ੍ਚਮੋ.