੭. ਖਲੁਪਚ੍ਛਾਭਤ੍ਤਿਕਙ੍ਗਕਥਾਵਣ੍ਣਨਾ

੩੦. ਭੁਞ੍ਜਨ੍ਤਸ੍ਸ ਯਂ ਉਪਨੀਤਂ, ਤਸ੍ਸ ਪਟਿਕ੍ਖੇਪੇਨ ਤਂ ਅਤਿਰਿਤ੍ਤਂ ਭੋਜਨਨ੍ਤਿ ਅਤਿਰਿਤ੍ਤਭੋਜਨਂ. ਪੁਨ ਭੋਜਨਂ ਕਪ੍ਪਿਯਂ ਕਾਰੇਤ੍ਵਾ ਨ ਭੁਞ੍ਜਿਤਬ੍ਬਂ, ਤਬ੍ਬਿਸਯਤ੍ਤਾ ਇਮਸ੍ਸ ਧੁਤਙ੍ਗਸ੍ਸ. ਤੇਨਾਹ ‘‘ਇਦਮਸ੍ਸ ਵਿਧਾਨ’’ਨ੍ਤਿ. ਯਸ੍ਮਿਂ ਭੋਜਨੇਤਿ ਯਸ੍ਮਿਂ ਭੁਞ੍ਜਿਯਮਾਨੇ ਭੋਜਨੇ. ਤਦੇਵ ਭੁਞ੍ਜਤਿ, ਨ ਅਞ੍ਞਂ. ਅਨਤਿਰਿਤ੍ਤਭੋਜਨਪਚ੍ਚਯਾ ਆਪਤ੍ਤਿ ਅਨਤਿਰਿਤ੍ਤਭੋਜਨਾਪਤ੍ਤਿ, ਤਤੋ ਦੂਰੀਭਾਵੋ ਅਨਾਪਜ੍ਜਨਂ. ਓਦਰਿਕਤ੍ਤਂ ਘਸ੍ਮਰਭਾਵੋ ਕੁਚ੍ਛਿਪੂਰਕਤਾ, ਤਸ੍ਸ ਅਭਾਵੋ ਏਕਪਿਣ੍ਡੇਨਾਪਿ ਯਾਪਨਤੋ. ਨਿਰਾਮਿਸਸਨ੍ਨਿਧਿਤਾ ਨਿਹਿਤਸ੍ਸ ਅਭੁਞ੍ਜਨਤੋ. ਪੁਨ ਪਰਿਯੇਸਨਵਸੇਨ ਪਰਿਯੇਸਨਾਯ ਖੇਦਂ ਨ ਯਾਤਿ. ਅਭਿਸਲ੍ਲੇਖਕਾਨਂ ਸਨ੍ਤੋਸਗੁਣਾਦੀਨਂ ਵੁਦ੍ਧਿਯਾ ਸਞ੍ਜਨਨਂ ਸਨ੍ਤੋਸਗੁਣਾਦਿਵੁਡ੍ਢਿਸਞ੍ਜਨਨਂ. ਇਦਨ੍ਤਿ ਖਲੁਪਚ੍ਛਾਭਤ੍ਤਿਕਙ੍ਗਂ.

ਇਤਿ ਖਲੁਪਚ੍ਛਾਭਤ੍ਤਿਕਙ੍ਗਕਥਾਵਣ੍ਣਨਾ.