੨. ਧੁਤਙ੍ਗਨਿਦ੍ਦੇਸਵਣ੍ਣਨਾ
੨੨. ਅਪ੍ਪਾ ਇਚ੍ਛਾ ਏਤਸ੍ਸਾਤਿ ਅਪ੍ਪਿਚ੍ਛੋ, ਪਚ੍ਚਯਗੇਧਰਹਿਤੋ. ਤਸ੍ਸ ਭਾਵੋ ਅਪ੍ਪਿਚ੍ਛਤਾ, ਅਲੋਭਜ੍ਝਾਸਯਤਾਤਿ ਅਤ੍ਥੋ. ਸਮਂ ਤੁਟ੍ਠਿ, ਸਨ੍ਤੇਨ, ਸਕੇਨ ਵਾ ਤੁਟ੍ਠਿ ਸਨ੍ਤੁਟ੍ਠਿ, ਸਨ੍ਤੁਟ੍ਠਿ ਏਵ ਸਨ੍ਤੁਟ੍ਠਿਤਾ, ਅਞ੍ਞਂ ਅਪਤ੍ਥੇਤ੍ਵਾ ਯਥਾਲਦ੍ਧੇਹਿ ਇਤਰੀਤਰੇਹਿ ਪਚ੍ਚਯੇਹਿ ਪਰਿਤੁਸ੍ਸਨਾ. ਸਨ੍ਤੁਟ੍ਠਿਤਾਦੀਹੀਤਿ ਤ-ਕਾਰੋ ਵਾ ਪਦਸਨ੍ਧਿਕਰੋ. ‘‘ਸਨ੍ਤੁਟ੍ਠਿਆਦੀਹੀ’’ਤਿ ਵਾ ਪਾਠੋ. ਤੇ ਗੁਣੇਤਿ ਤੇ ਸੀਲਵੋਦਾਨਸ੍ਸ ਹੇਤੁਭੂਤੇ ਅਪ੍ਪਿਚ੍ਛਤਾਦਿਗੁਣੇ. ਸਮ੍ਪਾਦੇਤੁਨ੍ਤਿ ਸਮ੍ਪਨ੍ਨੇ ਕਾਤੁਂ. ਤੇ ਹਿ ਸੀਲਵਿਸੁਦ੍ਧਿਯਾ ਪਟਿਲਦ੍ਧਮਤ੍ਤਾ ਹੁਤ੍ਵਾ ਧੁਤਧਮ੍ਮੇਹਿ ਸਮ੍ਪਨ੍ਨਤਰਾ ਹੋਨ੍ਤਿ. ਧੁਤਙ੍ਗਸਮਾਦਾਨਨ੍ਤਿ ਕਿਲੇਸਾਨਂ ਧੁਨਨਕਅਙ੍ਗਾਨਂ ਵਿਦ੍ਧਂਸਨਕਾਰਣਾਨਂ ਸਮ੍ਮਦੇਵ ਆਦਾਨਂ. ਏਵਨ੍ਤਿ ਏਵਂ ਸਨ੍ਤੇ, ਧੁਤਙ੍ਗਸਮਾਦਾਨੇ ਕਤੇਤਿ ਅਤ੍ਥੋ. ਅਸ੍ਸ ਯੋਗਿਨੋ. ਸਲ੍ਲੇਖੋ ਕਿਲੇਸਾਨਂ ਸਮ੍ਮਦੇਵ ਲਿਖਨਾ ਛੇਦਨਾ ਤਨੁਕਰਣਂ. ਪਵਿਵੇਕੋ ਚਿਤ੍ਤਵਿਵੇਕਸ੍ਸ ਉਪਾਯਭੂਤਾ ਵਿਵੇਕਟ੍ਠਕਾਯਤਾ. ਅਪਚਯੋ ਯਥਾ ਪਟਿਪਜ੍ਜਨਤੋ ਕਿਲੇਸਾ ਨਂ ਅਪਚਿਨਨ੍ਤਿ ਨ ਆਚਿਨਨ੍ਤਿ, ਤਥਾ ਪਟਿਪਜ੍ਜਨਾ. ਵੀਰਿਯਾਰਮ੍ਭੋ ਅਨੁਪ੍ਪਨ੍ਨਾਨਂ ਪਾਪਧਮ੍ਮਾਨਂ ਅਨੁਪ੍ਪਾਦਨਾਦਿਵਸੇਨ ਆਰਦ੍ਧਵੀਰਿਯਤਾ. ਸੁਭਰਤਾ ਯਥਾਵੁਤ੍ਤਅਪ੍ਪਿਚ੍ਛਭਾਵਾਦਿਸਿਦ੍ਧਾ ਉਪਟ੍ਠਕਾਨਂ ਸੁਖਭਰਣੀਯਤਾ ਸੁਪੋਸਤਾ. ਆਦਿ-ਸਦ੍ਦੇਨ ਅਪ੍ਪਕਿਚ੍ਚਤਾਸਲ੍ਲਹੁਕਵੁਤ੍ਤਿਆਦਿਕੇ ਸਙ੍ਗਣ੍ਹਾਤਿ. ਸੀਲਞ੍ਚੇਵ ਯਥਾਸਮਾਦਿਨ੍ਨਂ ਪਟਿਪਕ੍ਖਧਮ੍ਮਾਨਂ ਦੂਰੀਭਾਵੇਨ ਸੁਪਰਿਸੁਦ੍ਧਂ ਭਵਿਸ੍ਸਤਿ. ਵਤਾਨਿ ਚ ਧੁਤਧਮ੍ਮਾ ਚ ਸਮ੍ਪਜ੍ਜਿਸ੍ਸਨ੍ਤਿ ਸਮ੍ਪਨ੍ਨਾ ਭਵਿਸ੍ਸਨ੍ਤਿ, ਨਿਪ੍ਫਜ੍ਜਿਸ੍ਸਨ੍ਤਿ ਵਾ. ਯਾ ਥਿਰਭੂਤਾ ਇਤਰੀਤਰਚੀਵਰਪਿਣ੍ਡਪਾਤਸੇਨਾਸਨਸਨ੍ਤੁਟ੍ਠਿ ਪੋਰਾਣਾਨਂ ਬੁਦ੍ਧਾਦੀਨਂ ਅਰਿਯਾਨਂ ਪਵੇਣਿਭਾਵੇਨ ਠਿਤਾ, ਤਤ੍ਥ ਪਤਿਟ੍ਠਿਤਭਾਵਂ ਸਨ੍ਧਾਯਾਹ ‘‘ਪੋਰਾਣੇ ਅਰਿਯਵਂਸਤ੍ਤਯੇ ਪਤਿਟ੍ਠਾਯਾ’’ਤਿ. ਭਾਵਨਾ ਆਰਮਿਤਬ੍ਬਟ੍ਠੇਨ ਆਰਾਮੋ ਏਤਸ੍ਸਾਤਿ ਭਾਵਨਾਰਾਮੋ, ਤਬ੍ਭਾਵੋ ਭਾਵਨਾਰਾਮਤਾ, ਸਮਥਵਿਪਸ੍ਸਨਾਭਾਵਨਾਸੁ ਯੁਤ੍ਤਪ੍ਪਯੁਤ੍ਤਤਾ. ਯਸ੍ਮਾ ਅਧਿਗਮਾਰਹੋ ਭਵਿਸ੍ਸਤਿ, ਤਸ੍ਮਾਤਿ ਸਮ੍ਬਨ੍ਧੋ.
ਲਾਭਸਕ੍ਕਾਰਾਦਿ ਤਣ੍ਹਾਯ ਆਮਸਿਤਬ੍ਬਤੋ, ਲੋਕਪਰਿਯਾਪਨ੍ਨਤਾਯ ਚ ਲੋਕਾਮਿਸਂ. ਨਿਬ੍ਬਾਨਾਧਿਗਮਸ੍ਸ ਅਨੁਲੋਮਤੋ ਅਨੁਲੋਮਪਟਿਪਦਾ ਵਿਪਸ੍ਸਨਾਭਾਵਨਾ. ਅਤ੍ਥਤੋਤਿ ਵਚਨਤ੍ਥਤੋ. ਪਭੇਦਤੋਤਿ ਵਿਭਾਗਤੋ. ਭੇਦਤੋਤਿ ਵਿਨਾਸਤੋ. ਧੁਤਾਦੀਨਨ੍ਤਿ ਧੁਤਧੁਤਵਾਦਧੁਤਧਮ੍ਮਧੁਤਙ੍ਗਾਨਂ. ਸਮਾਸਬ੍ਯਾਸਤੋਤਿ ਸਙ੍ਖੇਪਵਿਤ੍ਥਾਰਤੋ.
੨੩. ਰਥਿਕਾਤਿ ਰਚ੍ਛਾ. ਸਙ੍ਕਾਰਕੂਟਾਦੀਨਨ੍ਤਿ ਨਿਦ੍ਧਾਰਣੇ ਸਾਮਿਵਚਨਂ. ਅਬ੍ਭੁਗ੍ਗਤਟ੍ਠੇਨਾਤਿ ਉਸ੍ਸਿਤਟ੍ਠੇਨ. ‘‘ਨਦਿਯਾ ਕੂਲ’’ਨ੍ਤਿਆਦੀਸੁ ਵਿਯ ਸਮੁਸ੍ਸਯਤ੍ਥੋ ਕੂਲ-ਸਦ੍ਦੋਤਿ ਆਹ ‘‘ਪਂਸੁਕੂਲਮਿਵ ਪਂਸੁਕੂਲ’’ਨ੍ਤਿ. ਕੁ-ਸਦ੍ਦੋ ਕੁਚ੍ਛਾਯਂ ਉਲ-ਸਦ੍ਦੋ ਗਤਿਅਤ੍ਥੋਤਿ ਆਹ ‘‘ਕੁਚ੍ਛਿਤਭਾਵਂ ਗਚ੍ਛਤੀਤਿ ਵੁਤ੍ਤਂ ਹੋਤੀ’’ਤਿ, ਪਂਸੁ ਵਿਯ ਕੁਚ੍ਛਿਤਂ ਉਲਤਿ ਪਵਤ੍ਤਤੀਤਿ ਵਾ ਪਂਸੁਕੂਲਂ. ਪਂਸੁਕੂਲਸ੍ਸ ਧਾਰਣਂ ਪਂਸੁਕੂਲਂ ਉਤ੍ਤਰਪਦਲੋਪੇਨ, ਤਂ ਸੀਲਮਸ੍ਸਾਤਿ ਪਂਸੁਕੂਲਿਕੋ, ਯਥਾ ‘‘ਆਪੂਪਿਕੋ’’ਤਿ. ਅਙ੍ਗਤਿ ਅਤ੍ਤਨੋ ਫਲਂ ਪਟਿਚ੍ਚ ਹੇਤੁਭਾਵਂ ਗਚ੍ਛਤੀਤਿ ਅਙ੍ਗਂ, ਕਾਰਣਂ. ਯੇਨ ਪੁਗ੍ਗਲੋ ‘‘ਪਂਸੁਕੂਲਿਕੋ’’ਤਿ ਵੁਚ੍ਚਤਿ, ਸੋ ਸਮਾਦਾਨਚੇਤਨਾਸਙ੍ਖਾਤੋ ਧਮ੍ਮੋ ਪਂਸੁਕੂਲਿਕਸ੍ਸ ਅਙ੍ਗਨ੍ਤਿ ਪਂਸੁਕੂਲਿਕਙ੍ਗਂ. ਤੇਨਾਹ ‘‘ਪਂਸੁਕੂਲਿਕਸ੍ਸਾ’’ਤਿਆਦਿ. ਤਸ੍ਸਾਤਿ ਸਮਾਦਾਨਸ੍ਸ. ਸਮਾਦਿਯਤਿ ਏਤੇਨਾਤਿ ਸਮਾਦਾਨਂ, ਚੇਤਨਾ.
ਏਤੇਨੇਵ ਨਯੇਨਾਤਿ ਯਥਾ ਪਂਸੁਕੂਲਧਾਰਣਂ ਪਂਸੁਕੂਲਂ, ਤਂਸੀਲੋ ਪਂਸੁਕੂਲਿਕੋ, ਤਸ੍ਸ ਅਙ੍ਗਂ ਸਮਾਦਾਨਚੇਤਨਾ ‘‘ਪਂਸੁਕੂਲਿਕਙ੍ਗ’’ਨ੍ਤਿ ਵੁਤ੍ਤਂ, ਏਵਂ ਏਤੇਨੇਵ ਵਚਨਤ੍ਥਨਯੇਨ ਤਿਚੀਵਰਧਾਰਣਂ ਤਿਚੀਵਰਂ, ਤਂਸੀਲੋ ਤੇਚੀਵਰਿਕੋ, ਤਸ੍ਸ ਅਙ੍ਗਂ ਸਮਾਦਾਨਚੇਤਨਾ ‘‘ਤੇਚੀਵਰਿਕਙ੍ਗ’’ਨ੍ਤਿ ਵੇਦਿਤਬ੍ਬਂ. ਸਙ੍ਘਾਟਿਆਦੀਸੁ ਏਵ ਤੀਸੁ ਚੀਵਰੇਸੁ ਤਿਚੀਵਰਸਮਞ੍ਞਾ, ਨ ਕਣ੍ਡੁਪਟਿਚ੍ਛਾਦਿਵਸ੍ਸਿਕਸਾਟਿਕਾਦੀਸੂਤਿ ਤਾਨਿ ਸਰੂਪਤੋ ਦਸ੍ਸੇਨ੍ਤੋ ‘‘ਸਙ੍ਘਾਟਿਉਤ੍ਤਰਾਸਙ੍ਗਅਨ੍ਤਰਵਾਸਕਸਙ੍ਖਾਤ’’ਨ੍ਤਿ ਆਹ.
ਤਂ ਪਿਣ੍ਡਪਾਤਨ੍ਤਿ ਪਰੇਹਿ ਦਿਯ੍ਯਮਾਨਾਨਂ ਪਿਣ੍ਡਾਨਂ ਪਤ੍ਤੇ ਪਤਨਸਙ੍ਖਾਤਂ ਪਿਣ੍ਡਪਾਤਂ, ਤਂ ਉਞ੍ਛਤੀਤਿ ਪਿਣ੍ਡਪਾਤਿਕੋ, ਯਥਾ ਬਾਦਰਿਕੋ ਸਾਮਾਕਿਕੋ. ਪਿਣ੍ਡਪਾਤਿ ਏਵ ਪਿਣ੍ਡਪਾਤਿਕੋ, ਯਥਾ ਭਦ੍ਦੋ ਏਵ ਭਦ੍ਦਕੋ. ਅਵਖਣ੍ਡਨਂ ਵਿਚ੍ਛਿਨ੍ਦਨਂ ਨਿਰਨ੍ਤਰਮਪ੍ਪਵਤ੍ਤਿ. ਤਪ੍ਪਟਿਕ੍ਖੇਪਤੋ ਅਨਵਖਣ੍ਡਨਂ ਅਵਿਚ੍ਛਿਨ੍ਦਨਂ ਨਿਰਨ੍ਤਰਪ੍ਪਵਤ੍ਤਿ. ਸਹ ਅਪਦਾਨੇਨਾਤਿ ਸਹ ਅਨਵਖਣ੍ਡਨੇਨ. ਸਪਦਾਨਨ੍ਤਿ ਪਦਸ੍ਸ ਕਿਰਿਯਾਵਿਸੇਸਨਭਾਵਂ, ਯਤ੍ਥ ਚ ਤਂ ਅਨਵਖਣ੍ਡਨਂ, ਤਞ੍ਚ ਦਸ੍ਸੇਤੁਂ ‘‘ਅਵਖਣ੍ਡਨਰਹਿਤਂ ਅਨੁਘਰਨ੍ਤਿ ਵੁਤ੍ਤਂ ਹੋਤੀ’’ਤਿ ਵੁਤ੍ਤਂ. ਏਕਾਸਨੇਤਿ ਇਰਿਯਾਪਥਨ੍ਤਰੇਨ ਅਨਨ੍ਤਰਿਤਾਯ ਏਕਾਯਯੇਵ ਨਿਸਜ੍ਜਾਯ. ਪਤ੍ਤੇ ਪਿਣ੍ਡੋਤਿ ਏਤ੍ਥ ਵਤ੍ਥੁਭੇਦੋ ਇਧਾਧਿਪ੍ਪੇਤੋ, ਨ ਸਾਮਞ੍ਞਂ. ਏਵ-ਕਾਰੋ ਚ ਲੁਤ੍ਤਨਿਦ੍ਦਿਟ੍ਠੋਤਿ ਦਸ੍ਸੇਨ੍ਤੋ ‘‘ਕੇਵਲਂ ਏਕਸ੍ਮਿਂਯੇਵ ਪਤ੍ਤੇ’’ਤਿ ਆਹ. ਉਤ੍ਤਰਪਦਲੋਪਂ ਕਤ੍ਵਾ ਅਯਂ ਨਿਦ੍ਦੇਸੋਤਿ ਦਸ੍ਸੇਨ੍ਤੋ ‘‘ਪਤ੍ਤਪਿਣ੍ਡਗਹਣੇ ਪਤ੍ਤਪਿਣ੍ਡਸਞ੍ਞਂ ਕਤ੍ਵਾ’’ਤਿ ਆਹ. ਏਸ ਨਯੋ ਇਤੋ ਪਰੇਸੁਪਿ.
ਪਚ੍ਛਾਭਤ੍ਤਂ ਨਾਮ ਪਵਾਰਣਤੋ ਪਚ੍ਛਾ ਲਦ੍ਧਭਤ੍ਤਂ ਏਵ. ਖਲੁ-ਸਦ੍ਦਸ੍ਸ ਪਟਿਸੇਧਤ੍ਥਵਾਚਕਤ੍ਤਾ ਤੇਨ ਸਮਾਨਤ੍ਥਂ ਨ-ਕਾਰਂ ਗਹੇਤ੍ਵਾ ਆਹ ‘‘ਨ ਪਚ੍ਛਾਭਤ੍ਤਿਕੋ’’ਤਿ. ਸਿਕ੍ਖਾਪਦਸ੍ਸ ਵਿਸਯੋ ਸਿਕ੍ਖਾਪਦੇਨੇਵ ਪਟਿਕ੍ਖਿਤ੍ਤੋ. ਯੋ ਤਸ੍ਸ ਅਵਿਸਯੋ, ਸੋ ਏਵ ਸਮਾਦਾਨਸ੍ਸ ਵਿਸਯੋਤਿ ਆਹ ‘‘ਸਮਾਦਾਨਵਸੇਨ ਪਟਿਕ੍ਖਿਤ੍ਤਾਤਿਰਿਤ੍ਤਭੋਜਨਸ੍ਸਾ’’ਤਿ. ਅਬ੍ਭੋਕਾਸੇ ਨਿਵਾਸੋ ਅਬ੍ਭੋਕਾਸੋ. ਸੁਸਾਨੇ ਨਿਵਾਸੋ ਸੁਸਾਨਂ, ਤਂ ਸੀਲਂ ਅਸ੍ਸਾਤਿਆਦਿਨਾ ਸਬ੍ਬਂ ਵਤ੍ਤਬ੍ਬਨ੍ਤਿ ਆਹ ‘‘ਏਸੇਵ ਨਯੋ’’ਤਿ. ਯਥਾਸਨ੍ਥਤਂ ਵਿਯ ਯਥਾਸਨ੍ਥਤਂ, ਆਦਿਤੋ ਯਥਾਉਦ੍ਦਿਟ੍ਠਂ. ਤਂ ਹੇਸ ‘‘ਇਦਂ ਬਹੁਮਙ੍ਕੁਣਂ ਦੁਗ੍ਗਨ੍ਧਪਵਾਤ’’ਨ੍ਤਿਆਦਿਵਸੇਨ ਅਪ੍ਪਟਿਕ੍ਖਿਪਿਤ੍ਵਾਵ ਸਮ੍ਪਟਿਚ੍ਛਤਿ. ਤੇਨੇਵਾਹ ‘‘ਇਦਂ ਤੁਯ੍ਹ’’ਨ੍ਤਿਆਦਿ. ਸਯਨਨ੍ਤਿ ਨਿਪਜ੍ਜਨਮਾਹ. ਤੇਨ ਤੇਨ ਸਮਾਦਾਨੇਨਾਤਿ ਤੇਨ ਤੇਨ ਪਂਸੁਕੂਲਿਕਙ੍ਗਾਦਿਕਸ੍ਸ ਸਮਾਦਾਨੇਨ ਧੁਤਕਿਲੇਸਤ੍ਤਾਤਿ ਵਿਦ੍ਧਂਸਿਤਕਿਲੇਸਤ੍ਤਾ, ਤਦਙ੍ਗਵਸੇਨ ਪਹੀਨਤਣ੍ਹੁਪਾਦਾਨਾਦਿਪਾਪਧਮ੍ਮਤ੍ਤਾਤਿ ਅਤ੍ਥੋ. ਯੇਹਿ ਤਂ ਕਿਲੇਸਧੁਨਨਂ, ਤਾਨਿਯੇਵ ਇਧ ਧੁਤਸ੍ਸ ਭਿਕ੍ਖੁਨੋ ਅਙ੍ਗਾਨੀਤਿ ਅਧਿਪ੍ਪੇਤਾਨਿ, ਨ ਅਞ੍ਞਾਨਿ ਯਾਨਿ ਕਾਨਿਚਿ, ਅਞ੍ਞੇਨ ਵਾ ਧੁਤਸ੍ਸਾਤਿ ਅਯਮਤ੍ਥੋ ਅਤ੍ਥਤੋ ਆਪਨ੍ਨੋ. ‘‘ਞਾਣਂ ਅਙ੍ਗਂ ਏਤੇਸ’’ਨ੍ਤਿ ਇਮਿਨਾ ਞਾਣਪੁਬ੍ਬਕਤਂ ਤੇਸਂ ਸਮਾਦਾਨਸ੍ਸ ਵਿਭਾਵੇਤਿ. ਪਟਿਪਤ੍ਤਿਯਾਤਿ ਸੀਲਾਦਿਸਮ੍ਮਾਪਟਿਪਤ੍ਤਿਯਾ. ਸਮਾਦਿਯਤਿ ਏਤੇਨਾਤਿ ਸਮਾਦਾਨਂ, ਸਮਾਦਾਨਵਸੇਨ ਪਵਤ੍ਤਾ ਚੇਤਨਾ, ਤਂ ਲਕ੍ਖਣਂ ਏਤੇਸਨ੍ਤਿ ਸਮਾਦਾਨਚੇਤਨਾਲਕ੍ਖਣਾਨਿ. ਵੁਤ੍ਤਮ੍ਪਿ ਚੇਤਂ ਅਟ੍ਠਕਥਾਯਂ –
‘‘ਸਮਾਦਾਨਕਿਰਿਯਾਯ, ਸਾਧਕਤਮਭਾਵਤੋ;
ਸਮ੍ਪਯੁਤ੍ਤਧਮ੍ਮਾ ਯੇਨਾਤਿ, ਕਰਣਭਾਵੇਨ ਦਸ੍ਸਿਤਾ’’ਤਿ.
ਸਮਾਦਾਨਚੇਤਨਾਯ ਗਹਣਂ ਤਂਮੂਲਕਤ੍ਤਾ ਪਰਿਹਰਣਚੇਤਨਾਪਿ ਧੁਤਙ੍ਗਮੇਵ. ਅਤ੍ਤਨਾ, ਪਰਮ੍ਮੁਖੇਨ ਚ ਕੁਸਲਭਣ੍ਡਸ੍ਸ ਭੁਸਂ ਵਿਲੁਪ੍ਪਨਟ੍ਠੇਨ ਲੋਲੁਪ੍ਪਂ ਤਣ੍ਹਾਚਾਰੋ, ਤਸ੍ਸ ਵਿਦ੍ਧਂਸਨਕਿਚ੍ਚਤ੍ਤਾ ਲੋਲੁਪ੍ਪਵਿਦ੍ਧਂਸਨਰਸਾਨਿ. ਤਤੋ ਏਵ ਨਿਲ੍ਲੋਲੁਪ੍ਪਭਾਵੇਨ ਪਚ੍ਚੁਪਤਿਟ੍ਠਨ੍ਤਿ, ਤਂ ਵਾ ਪਚ੍ਚੁਪਟ੍ਠਾਪੇਨ੍ਤੀਤਿ ਨਿਲ੍ਲੋਲੁਪ੍ਪਭਾਵਪਚ੍ਚੁਪਟ੍ਠਾਨਾਨਿ. ਅਰਿਯਧਮ੍ਮਪਦਟ੍ਠਾਨਾਨੀਤਿ ਪਰਿਸੁਦ੍ਧਸੀਲਾਦਿਸਦ੍ਧਮ੍ਮਪਦਟ੍ਠਾਨਾਨਿ.
ਭਗਵਤੋਵ ਸਨ੍ਤਿਕੇ ਸਮਾਦਾਤਬ੍ਬਾਨੀਤਿ ਇਦਂ ਅਨ੍ਤਰਾ ਅਵਿਚ੍ਛੇਦਨਤ੍ਥਂ ਵੁਤ੍ਤਂ, ਰਞ੍ਞੋ ਸਨ੍ਤਿਕੇ ਪਟਿਞ੍ਞਾਤਾਰਹਸ੍ਸ ਅਤ੍ਥਸ੍ਸ ਤਦੁਪਜੀਵਿਨੋ ਏਕਂਸਤੋ ਅਵਿਸਂਵਾਦਨਂ ਵਿਯ. ਸੇਸਾਨਂ ਸਨ੍ਤਿਕੇ ਸਮਾਦਾਨੇਪਿ ਏਸੇਵ ਨਯੋ. ਏਕਸਙ੍ਗੀਤਿਕਸ੍ਸਾਤਿ ਪਞ੍ਚਸੁ ਦੀਘਨਿਕਾਯਾਦੀਸੁ ਨਿਕਾਯੇਸੁ ਏਕਨਿਕਾਯਿਕਸ੍ਸ. ਅਟ੍ਠਕਥਾਚਰਿਯਸ੍ਸਾਤਿ ਯਸ੍ਸ ਅਟ੍ਠਕਥਾਤਨ੍ਤਿਯੇਵ ਵਿਸੇਸਤੋ ਪਗੁਣਾ, ਤਸ੍ਸ. ਏਤ੍ਥਾਤਿ ਅਤ੍ਤਨਾਪਿ ਸਮਾਦਾਨਸ੍ਸ ਰੁਹਨੇ. ਜੇਟ੍ਠਕਭਾਤੁ ਧੁਤਙ੍ਗਪ੍ਪਿਚ੍ਛਤਾਯ ਵਤ੍ਥੂਤਿ ਸੋ ਕਿਰ ਥੇਰੋ ਨੇਸਜ੍ਜਿਕੋ, ਤਸ੍ਸ ਤਂ ਨ ਕੋਚਿ ਜਾਨਾਤਿ. ਅਥੇਕਦਿਵਸਂ ਰਤ੍ਤਿਯਾ ਸਯਨਪਿਟ੍ਠੇ ਨਿਸਿਨ੍ਨਂ ਵਿਜ੍ਜੁਲਤੋਭਾਸੇਨ ਦਿਸ੍ਵਾ ਇਤਰੋ ਪੁਚ੍ਛਿ ‘‘ਕਿਂ, ਭਨ੍ਤੇ, ਤੁਮ੍ਹੇ ਨੇਸਜ੍ਜਿਕਾ’’ਤਿ. ਥੇਰੋ ਧੁਤਙ੍ਗਪ੍ਪਿਚ੍ਛਤਾਯ ਤਾਵਦੇਵ ਨਿਪਜ੍ਜਿਤ੍ਵਾ ਪਚ੍ਛਾ ਸਮਾਦਿਯੀਤਿ ਏਵਮਾਗਤਂ ਵਤ੍ਥੁ.
੧. ਪਂਸੁਕੂਲਿਕਙ੍ਗਕਥਾਵਣ੍ਣਨਾ
੨੪. ਗਹਪਤਿਦਾਨਚੀਵਰਨ੍ਤਿ ਏਤ੍ਥ ਦਾਯਕਭਾਵੇਨ ਸਮਣਾਪਿ ਉਕ੍ਕਟ੍ਠਸ੍ਸ ਗਹਪਤਿਪਕ੍ਖਂਯੇਵ ਪਵਿਟ੍ਠਾਤਿ ਦਟ੍ਠਬ੍ਬਂ. ‘‘ਪਬ੍ਬਜਿਤੋ ਗਣ੍ਹਿਸ੍ਸਤੀ’’ਤਿ ਠਪਿਤਕਂ ਸਿਯਾ ਗਹਪਤਿਚੀਵਰਂ, ਨ ਪਨ ਗਹਪਤਿਦਾਨਚੀਵਰਨ੍ਤਿ ਤਾਦਿਸਂ ਨਿਵਤ੍ਤੇਤੁਂ ਦਾਨਗ੍ਗਹਣਂ. ਅਞ੍ਞਤਰੇਨਾਤਿ ਏਤ੍ਥ ਸਮਾਦਾਨਵਚਨੇਨ ਤਾਵ ਸਮਾਦਿਨ੍ਨਂ ਹੋਤੁ, ਪਟਿਕ੍ਖੇਪਵਚਨੇਨ ਪਨ ਕਥਨ੍ਤਿ? ਅਤ੍ਥਤੋ ਆਪਨ੍ਨਤ੍ਤਾ. ਯਥਾ ‘‘ਦੇਵਦਤ੍ਤੋ ਦਿਵਾ ਨ ਭੁਞ੍ਜਤੀ’’ਤਿ ਵੁਤ੍ਤੇ ‘‘ਰਤ੍ਤਿਯਂ ਭੁਞ੍ਜਤੀ’’ਤਿ ਅਤ੍ਥਤੋ ਆਪਨ੍ਨਮੇਵ ਹੋਤਿ, ਤਸ੍ਸ ਆਹਾਰੇਨ ਵਿਨਾ ਸਰੀਰਟ੍ਠਿਤਿ ਨਤ੍ਥੀਤਿ, ਏਵਮਿਧਾਪਿ ਭਿਕ੍ਖੁਨੋ ਗਹਪਤਿਦਾਨਚੀਵਰੇ ਪਟਿਕ੍ਖਿਤ੍ਤੇ ਤਦਞ੍ਞਚੀਵਰਪ੍ਪਟਿਗ੍ਗਹੋ ਅਤ੍ਥਤੋ ਆਪਨ੍ਨੋ ਏਵ ਹੋਤਿ, ਚੀਵਰੇਨ ਵਿਨਾ ਸਾਸਨੇ ਠਿਤਿ ਨਤ੍ਥੀਤਿ.
ਏਵਂ ਸਮਾਦਿਨ੍ਨਧੁਤਙ੍ਗੇਨਾਤਿਆਦਿਵਿਧਾਨਂ ਪਂਸੁਕੂਲਿਕਙ੍ਗੇ ਪਟਿਪਜ੍ਜਨਵਿਧਿ. ਸੁਸਾਨੇ ਲਦ੍ਧਂ ਸੋਸਾਨਿਕਂ. ਤਂ ਪਨ ਯਸ੍ਮਾ ਤਤ੍ਥ ਕੇਨਚਿ ਛਡ੍ਡਿਤਤ੍ਤਾ ਪਤਿਤਂ ਹੋਤਿ, ਤਸ੍ਮਾ ਵੁਤ੍ਤਂ ‘‘ਸੁਸਾਨੇ ਪਤਿਤਕ’’ਨ੍ਤਿ. ਏਵਂ ਪਾਪਣਿਕਮ੍ਪਿ ਦਟ੍ਠਬ੍ਬਂ. ਤਾਲਵੇਲ਼ਿਮਗ੍ਗੋ ਨਾਮ ਮਹਾਗਾਮੇ ਏਕਾ ਵੀਥਿ. ਅਨੁਰਾਧਪੁਰੇਤਿ ਚ ਵਦਨ੍ਤਿ. ਡਡ੍ਢੋ ਪਦੇਸੋ ਏਤਸ੍ਸਾਤਿ ਡਡ੍ਢਪ੍ਪਦੇਸਂ, ਵਤ੍ਥਂ. ਮਗ੍ਗੇ ਪਤਿਤਕਂ ਬਹੁਦਿਵਸਾਤਿਕ੍ਕਨ੍ਤਂ ਗਹੇਤਬ੍ਬਨ੍ਤਿ ਵਦਨ੍ਤਿ. ‘‘ਦ੍ਵਤ੍ਤਿਦਿਵਸਾਤਿਕ੍ਕਨ੍ਤ’’ਨ੍ਤਿ ਅਪਰੇ. ਥੋਕਂ ਰਕ੍ਖਿਤ੍ਵਾਤਿ ਕਤਿਪਯਂ ਕਾਲਂ ਆਗਮੇਤ੍ਵਾ. ਵਾਤਾਹਤਮ੍ਪਿ ਸਾਮਿਕਾਨਂ ਸਤਿਸਮ੍ਮੋਸੇਨ ਪਤਿਤਸਦਿਸਨ੍ਤਿ ‘‘ਸਾਮਿਕੇ ਅਪਸ੍ਸਨ੍ਤੇਨ ਗਹੇਤੁਂ ਵਟ੍ਟਤੀ’’ਤਿ ਵੁਤ੍ਤਂ. ਤਸ੍ਮਾ ਥੋਕਂ ਆਗਮੇਤ੍ਵਾ ਗਹੇਤਬ੍ਬਂ.
‘‘ਸਙ੍ਘਸ੍ਸ ਦੇਮਾ’’ਤਿ ਦਿਨ੍ਨਂ, ਚੋਲ਼ਕਭਿਕ੍ਖਾਵਸੇਨ ਲਦ੍ਧਞ੍ਚ ਲਦ੍ਧਕਾਲਤੋ ਪਟ੍ਠਾਯ ‘‘ਸਮਣਚੀਵਰਂ ਸਿਯਾ ਨੁ ਖੋ, ਨੋ’’ਤਿ ਆਸਙ੍ਕਂ ਨਿਵਤ੍ਤੇਤੁਂ ‘‘ਨ ਤਂ ਪਂਸੁਕੂਲ’’ਨ੍ਤਿ ਵੁਤ੍ਤਂ. ਨ ਹਿ ਤਂ ਤੇਵੀਸਤਿਯਾ ਉਪ੍ਪਤ੍ਤਿਟ੍ਠਾਨੇਸੁ ਕਤ੍ਥਚਿ ਪਰਿਯਾਪਨ੍ਨਂ. ਇਦਾਨਿ ਇਮਿਨਾਵ ਪਸਙ੍ਗੇਨ ਯਂ ਭਿਕ੍ਖੁਦਤ੍ਤਿਯੇ ਲਕ੍ਖਣਪਤ੍ਤਂ ਪਂਸੁਕੂਲਂ, ਤਸ੍ਸ ਚ ਉਕ੍ਕਟ੍ਠਾਨੁਕ੍ਕਟ੍ਠਵਿਭਾਗਂ ਦਸ੍ਸੇਤੁਂ ‘‘ਭਿਕ੍ਖੁਦਤ੍ਤਿਯੇਪੀ’’ਤਿਆਦਿ ਵੁਤ੍ਤਂ. ਤਤ੍ਥ ਗਾਹੇਤ੍ਵਾ ਵਾ ਦੀਯਤੀਤਿ ਸਙ੍ਘਸ੍ਸ ਵਾ ਗਣਸ੍ਸ ਵਾ ਦੇਨ੍ਤੇਹਿ ਯਂ ਚੀਵਰਂ ਵਸ੍ਸਗ੍ਗੇਨ ਪਾਪੇਤ੍ਵਾ ਭਿਕ੍ਖੂਨਂ ਦੀਯਤਿ. ਸੇਨਾਸਨਚੀਵਰਨ੍ਤਿ ਸੇਨਾਸਨਂ ਕਾਰੇਤ੍ਵਾ ‘‘ਏਤਸ੍ਮਿਂ ਸੇਨਾਸਨੇ ਵਸਨ੍ਤਾ ਪਰਿਭੁਞ੍ਜਨ੍ਤੂ’’ਤਿ ਦਿਨ੍ਨਚੀਵਰਂ. ਨ ਤਂ ਪਂਸੁਕੂਲਨ੍ਤਿ ਅਪਂਸੁਕੂਲਭਾਵੋ ਪੁਬ੍ਬੇ ਵੁਤ੍ਤਕਾਰਣਤੋ, ਗਾਹੇਤ੍ਵਾ ਦਿਨ੍ਨਤ੍ਤਾ ਚ. ਤੇਨਾਹ ‘‘ਨੋ ਗਾਹਾਪੇਤ੍ਵਾ ਦਿਨ੍ਨਮੇਵ ਪਂਸੁਕੂਲ’’ਨ੍ਤਿ. ਤਤ੍ਰਪੀਤਿ ਯਂ ਗਾਹੇਤ੍ਵਾ ਨ ਦਿਨ੍ਨਂ ਭਿਕ੍ਖੁਦਤ੍ਤਿਯਂ, ਤਤ੍ਰਪਿ ਯੇਨ ਭਿਕ੍ਖੁਨਾ ਚੀਵਰਂ ਦੀਯਤਿ, ਤਸ੍ਸ ਲਾਭੇ, ਦਾਨੇ ਚ ਵਿਸੁਂ ਵਿਸੁਂ ਉਭਯਤ੍ਥ ਆਦਰਗਾਰਵਾਨਂ ਸਬ੍ਭਾਵਤੋ, ਤਦਭਾਵਤੋ ਚ ਭਿਕ੍ਖੁਦਤ੍ਤਿਯਸ੍ਸ ਏਕਤੋਸੁਦ੍ਧਿ ਉਭਤੋਸੁਦ੍ਧਿ ਅਨੁਕ੍ਕਟ੍ਠਤਾ ਹੋਨ੍ਤੀਤਿ ਇਮਮਤ੍ਥਂ ਦਸ੍ਸੇਤੁਂ ‘‘ਯਂ ਦਾਯਕੇਹੀ’’ਤਿਆਦਿ ਵੁਤ੍ਤਂ, ਪਾਦਮੂਲੇ ਠਪੇਤ੍ਵਾ ਦਿਨ੍ਨਕਂ ਸਮਣੇਨਾਤਿ ਅਧਿਪ੍ਪਾਯੋ. ਯਸ੍ਸ ਕਸ੍ਸਚੀਤਿ ਉਕ੍ਕਟ੍ਠਾਦੀਸੁ ਯਸ੍ਸ ਕਸ੍ਸਚਿ. ਰੁਚਿਯਾਤਿ ਛਨ੍ਦੇਨ. ਖਨ੍ਤਿਯਾਤਿ ਨਿਜ੍ਝਾਨਕ੍ਖਨ੍ਤਿਯਾ.
ਨਿਸ੍ਸਯਾਨੁਰੂਪਪਟਿਪਤ੍ਤਿਸਬ੍ਭਾਵੋਤਿ ਉਪਸਮ੍ਪਨ੍ਨਸਮਨਨ੍ਤਰਂ ਆਚਰਿਯੇਨ ਵੁਤ੍ਤੇਸੁ ਚਤੂਸੁ ਨਿਸ੍ਸਯੇਸੁ ਅਤ੍ਤਨਾ ਯਥਾਪਟਿਞ੍ਞਾਤਦੁਤਿਯਨਿਸ੍ਸਯਾਨੁਰੂਪਾਯ ਪਟਿਪਤ੍ਤਿਯਾ ਵਿਜ੍ਜਮਾਨਤਾ. ਆਰਕ੍ਖਦੁਕ੍ਖਾਭਾਵੋਤਿ ਚੀਵਰਾਰਕ੍ਖਨਦੁਕ੍ਖਸ੍ਸ ਅਭਾਵੋ ਪਂਸੁਕੂਲਚੀਵਰਸ੍ਸ ਅਲੋਭਨੀਯਤ੍ਤਾ. ਪਰਿਭੋਗਤਣ੍ਹਾਯ ਅਭਾਵੋ ਸਵਿਸੇਸਲੂਖਸਭਾਵਤ੍ਤਾ. ਪਾਸਾਦਿਕਤਾਤਿ ਪਰੇਸਂ ਪਸਾਦਾਵਹਤਾ. ਅਪ੍ਪਿਚ੍ਛਤਾਦੀਨਂ ਫਲਨਿਪ੍ਫਤ੍ਤਿ ਧੁਤਙ੍ਗਪਰਿਹਰਣਸ੍ਸ ਅਪ੍ਪਿਚ੍ਛਤਾਦੀਹਿਯੇਵ ਨਿਪ੍ਫਾਦੇਤਬ੍ਬਤੋ. ਧੁਤਧਮ੍ਮੇ ਸਮਾਦਾਯ ਵਤ੍ਤਨਂ ਯਾਵਦੇਵ ਉਪਰਿ ਸਮ੍ਮਾਪਟਿਪਤ੍ਤਿਸਮ੍ਪਾਦਨਾਯਾਤਿ ਵੁਤ੍ਤਂ ‘‘ਸਮ੍ਮਾਪਟਿਪਤ੍ਤਿਯਾ ਅਨੁਬ੍ਰੂਹਨ’’ਨ੍ਤਿ. ਮਾਰਸੇਨਵਿਘਾਤਾਯਾਤਿ ਮਾਰਸ੍ਸ, ਮਾਰਸੇਨਾਯ ਚ ਵਿਹਨਨਾਯ ਵਿਦ੍ਧਂਸਨਾਯ. ਕਾਯਵਾਚਾਚਿਤ੍ਤੇਹਿ ਯਤੋ ਸਂਯਤੋਤਿ ਯਤਿ, ਭਿਕ੍ਖੁ. ਧਾਰਿਤਂ ਯਂ ਲੋਕਗਰੁਨਾ ਪਂਸੁਕੂਲਂ, ਤਂ ਕੋ ਨ ਧਾਰਯੇ, ਯਸ੍ਮਾ ਵਾ ਲੋਕਗਰੁਨਾ ਪਂਸੁਕੂਲਂ ਧਾਰਿਤਂ, ਤਸ੍ਮਾ ਕੋ ਤਂ ਨ ਧਾਰਯੇਤਿ ਯੋਜਨਾ ਯਂਤਂਸਦ੍ਦਾਨਂ ਏਕਨ੍ਤਸਮ੍ਬਨ੍ਧਿਭਾਵਤੋ. ਪਟਿਞ੍ਞਂ ਸਮਨੁਸ੍ਸਰਨ੍ਤਿ ਉਪਸਮ੍ਪਦਮਾਲ਼ੇ ‘‘ਆਮ ਭਨ੍ਤੇ’’ਤਿ ਆਚਰਿਯਪਮੁਖਸ੍ਸ ਸਙ੍ਘਸ੍ਸ ਸਮ੍ਮੁਖਾ ਦਿਨ੍ਨਂ ਪਟਿਞ੍ਞਂ ਸਮਨੁਸ੍ਸਰਨ੍ਤੋ.
ਇਤਿ ਪਂਸੁਕੂਲਿਕਙ੍ਗਕਥਾਵਣ੍ਣਨਾ.
੨. ਤੇਚੀਵਰਿਕਙ੍ਗਕਥਾਵਣ੍ਣਨਾ
੨੫. ਚਤੁਤ੍ਥਕਚੀਵਰਨ੍ਤਿ ਨਿਵਾਸਨਪਾਰੁਪਨਯੋਗ੍ਯਂ ਚਤੁਤ੍ਥਕਚੀਵਰਨ੍ਤਿ ਅਧਿਪ੍ਪਾਯੋ, ਅਂਸਕਾਸਾਵਸ੍ਸ ਅਪ੍ਪਟਿਕ੍ਖਿਪਿਤਬ੍ਬਤੋ. ਅਞ੍ਞਤਰਵਚਨੇਨਾਤਿ ਏਤ੍ਥ ਯਂ ਵਤ੍ਤਬ੍ਬਂ, ਤਂ ਹੇਟ੍ਠਾ ਵੁਤ੍ਤਨਯਮੇਵ. ਯਾਵ ਨ ਸਕ੍ਕੋਤਿ, ਯਾਵ ਨ ਲਭਤਿ, ਯਾਵ ਨ ਸਮ੍ਪਜ੍ਜਤੀਤਿ ਪਚ੍ਚੇਕਂ ਯਾਵ-ਸਦ੍ਦੋ ਸਮ੍ਬਨ੍ਧਿਤਬ੍ਬੋ. ਨ ਸਮ੍ਪਜ੍ਜਤੀਤਿ ਨ ਸਿਜ੍ਝਤਿ. ਨਿਕ੍ਖਿਤ੍ਤਪਚ੍ਚਯਾ ਦੋਸੋ ਨਤ੍ਥੀਤਿ ਨਿਚਯਸਨ੍ਨਿਧਿਧੁਤਙ੍ਗਸਂਕਿਲੇਸਦੋਸੋ ਨਤ੍ਥਿ. ਆਸਨ੍ਨੇਤਿ ਚੀਵਰਸ੍ਸ ਆਸਨ੍ਨੇ ਠਾਨੇ. ਰਜਨਕ੍ਖਣੇ ਪਰਿਭੁਞ੍ਜਨਕਾਸਾਵਂ ਰਜਨਕਾਸਾਵਂ. ਤਤ੍ਰਟ੍ਠਕਪਚ੍ਚਤ੍ਥਰਣਂ ਨਾਮ ਅਤ੍ਤਨੋ, ਪਰਸ੍ਸ ਵਾ ਸਨ੍ਤਕਂ ਸੇਨਾਸਨੇ ਪਚ੍ਚਤ੍ਥਰਣਵਸੇਨ ਅਧਿਟ੍ਠਿਤਂ. ‘‘ਅਂਸਕਾਸਾਵਂ ਪਰਿਕ੍ਖਾਰਚੋਲ਼ਂ ਹੋਤਿ, ਇਤਿ ਪਚ੍ਚਤ੍ਥਰਣਂ, ਅਂਸਕਾਸਾਵਨ੍ਤਿ ਇਮਾਨਿ ਦ੍ਵੇਪਿ ਅਤਿਰੇਕਚੀਵਰਟ੍ਠਾਨੇ ਠਿਤਾਨਿਪਿ ਧੁਤਙ੍ਗਭੇਦਂ ਨ ਕਰੋਨ੍ਤੀ’’ਤਿ ਅਟ੍ਠਕਥਾਯਂ ਵੁਤ੍ਤਨ੍ਤਿ ਵਦਨ੍ਤਿ. ਪਰਿਹਰਿਤੁਂ ਪਨ ਨ ਵਟ੍ਟਤੀਤਿ ਰਜਨਕਾਲੇ ਏਵ ਅਨੁਞ੍ਞਾਤਤ੍ਤਾ ਨਿਚ੍ਚਪਰਿਭੋਗਵਸੇਨ ਨ ਵਟ੍ਟਤਿ ਤੇਚੀਵਰਿਕਸ੍ਸ. ਅਂਸਕਾਸਾਵਨ੍ਤਿ ਖਨ੍ਧੇ ਠਪੇਤਬ੍ਬਕਾਸਾਵਂ. ਕਾਯਪਰਿਹਾਰਿਕੇਨਾਤਿ ਵਾਤਾਤਪਾਦਿਪਰਿਸ੍ਸਯਤੋ ਕਾਯਸ੍ਸ ਪਰਿਹਰਣਮਤ੍ਤੇਨ. ਸਮਾਦਾਯੇਵਾਤਿ ਗਹੇਤ੍ਵਾ ਏਵ. ਅਪ੍ਪਸਮਾਰਮ੍ਭਤਾਤਿ ਅਪ੍ਪਕਿਚ੍ਚਤਾ. ਕਪ੍ਪਿਯੇ ਮਤ੍ਤਕਾਰਿਤਾਯਾਤਿ ਨਿਸੀਦਨਾਦਿਵਸੇਨ, ਪਰਿਕ੍ਖਾਰਚੋਲ਼ਵਸੇਨ ਚ ਬਹੂਸੁ ਚੀਵਰੇਸੁ ਅਨੁਞ੍ਞਾਤੇਸੁਪਿ ਤਿਚੀਵਰਮਤ੍ਤੇ ਠਿਤਤ੍ਤਾ. ਸਹ ਪਤ੍ਤਚਰਣਾਯਾਤਿ ਸਪਤ੍ਤਚਰਣੋ. ਪਕ੍ਖੀ ਸਪਕ੍ਖਕੋ.
ਇਤਿ ਤੇਚੀਵਰਿਕਙ੍ਗਕਥਾਵਣ੍ਣਨਾ.
੩. ਪਿਣ੍ਡਪਾਤਿਕਙ੍ਗਕਥਾਵਣ੍ਣਨਾ
੨੬. ਅਤਿਰੇਕਲਾਭਨ੍ਤਿ ‘‘ਪਿਣ੍ਡਿਯਾਲੋਪਭੋਜਨਂ ਨਿਸ੍ਸਾਯਾ’’ਤਿ (ਮਹਾਵ. ੭੩, ੧੨੮) ਏਵਂ ਵੁਤ੍ਤਭਿਕ੍ਖਾਹਾਰਲਾਭਤੋ ਅਤਿਰੇਕਲਾਭਂ, ਸਙ੍ਘਭਤ੍ਤਾਦਿਨ੍ਤਿ ਅਤ੍ਥੋ. ਸਕਲਸ੍ਸ ਸਙ੍ਘਸ੍ਸ ਦਾਤਬ੍ਬਭਤ੍ਤਂ ਸਙ੍ਘਭਤ੍ਤਂ. ਕਤਿਪਯੇ ਭਿਕ੍ਖੂ ਉਦ੍ਦਿਸਿਤ੍ਵਾ ਦਾਤਬ੍ਬਭਤ੍ਤਂ ਉਦ੍ਦੇਸਭਤ੍ਤਂ. ਏਕਸ੍ਮਿਂ ਪਕ੍ਖੇ ਏਕਦਿਵਸਂ ਦਾਤਬ੍ਬਭਤ੍ਤਂ ਪਕ੍ਖਿਕਂ. ਉਪੋਸਥੇ ਉਪੋਸਥੇ ਦਾਤਬ੍ਬਭਤ੍ਤਂ ਉਪੋਸਥਿਕਂ. ਪਟਿਪਦਦਿਵਸੇ ਦਾਤਬ੍ਬਭਤ੍ਤਂ ਪਾਟਿਪਦਿਕਂ. ਵਿਹਾਰਂ ਉਦ੍ਦਿਸ੍ਸ ਦਾਤਬ੍ਬਭਤ੍ਤਂ ਵਿਹਾਰਭਤ੍ਤਂ. ਧੁਰਗੇਹੇ ਏਵ ਠਪੇਤ੍ਵਾ ਦਾਤਬ੍ਬਭਤ੍ਤਂ ਧੁਰਭਤ੍ਤਂ. ਗਾਮਵਾਸੀਆਦੀਹਿ ਵਾਰੇਨ ਦਾਤਬ੍ਬਭਤ੍ਤਂ ਵਾਰਕਭਤ੍ਤਂ. ‘‘ਸਙ੍ਘਭਤ੍ਤਂ ਗਣ੍ਹਥਾਤਿਆਦਿਨਾ’’ਤਿ ਆਦਿ-ਸਦ੍ਦੇਨ ਉਦ੍ਦੇਸਭਤ੍ਤਾਦਿਂ ਸਙ੍ਗਣ੍ਹਾਤਿ. ਸਾਦਿਤੁਂ ਵਟ੍ਟਨ੍ਤੀਤਿ ਭਿਕ੍ਖਾਪਰਿਯਾਯੇਨ ਵੁਤ੍ਤਤ੍ਤਾ. ਭੇਸਜ੍ਜਾਦਿਪਟਿਸਂਯੁਤ੍ਤਾ ਨਿਰਾਮਿਸਸਲਾਕਾ. ਯਾਵਕਾਲਿਕਵਜ੍ਜਾਤਿ ਚ ਵਦਨ੍ਤਿ. ਵਿਹਾਰੇ ਪਕ੍ਕਭਤ੍ਤਮ੍ਪੀਤਿ ਉਪਾਸਕਾ ਇਧੇਵ ਭਤ੍ਤਂ ਪਚਿਤ੍ਵਾ ‘‘ਸਬ੍ਬੇਸਂ ਅਯ੍ਯਾਨਂ ਦਸ੍ਸਾਮਾ’’ਤਿ ਵਿਹਾਰੇਯੇਵ ਭਤ੍ਤਂ ਸਮ੍ਪਾਦੇਨ੍ਤਿ, ਤਂ ਪਿਣ੍ਡਪਾਤਿਕਾਨਮ੍ਪਿ ਵਟ੍ਟਤਿ. ਆਹਰਿਤ੍ਵਾਤਿ ਪਤ੍ਤਂ ਗਹੇਤ੍ਵਾ ਗੇਹਤੋ ਆਨੇਤ੍ਵਾ. ਤਂ ਦਿਵਸਂ ਨਿਸੀਦਿਤ੍ਵਾਤਿ ‘‘ਮਾ, ਭਨ੍ਤੇ, ਪਿਣ੍ਡਾਯ ਚਰਿਤ੍ਥ, ਵਿਹਾਰੇਯੇਵ ਭਿਕ੍ਖਾ ਆਨੀਯਤੀ’’ਤਿ ਵਦਨ੍ਤਾਨਂ ਸਮ੍ਪਟਿਚ੍ਛਨੇਨ ਤਂ ਦਿਵਸਂ ਨਿਸੀਦਿਤ੍ਵਾ. ਸੇਰਿਵਿਹਾਰਸੁਖਨ੍ਤਿ ਅਪਰਾਯਤ੍ਤਵਿਹਾਰਿਤਾਸੁਖਂ. ਅਰਿਯਵਂਸੋਤਿ ਅਰਿਯਵਂਸਸੁਤ੍ਤਪਟਿਸਂਯੁਤ੍ਤਾ (ਦੀ. ਨਿ. ੩.੩੦੯; ਅ. ਨਿ. ੪.੨੮) ਧਮ੍ਮਕਥਾ. ਧਮ੍ਮਰਸਨ੍ਤਿ ਧਮ੍ਮੂਪਸਞ੍ਹਿਤਂ ਪਾਮੋਜ੍ਜਾਦਿਰਸਂ.
ਜਙ੍ਘਬਲਂ ਨਿਸ੍ਸਾਯ ਪਿਣ੍ਡਪਰਿਯੇਸਨਤੋ ਕੋਸਜ੍ਜਨਿਮ੍ਮਦ੍ਦਨਤਾ. ‘‘ਯਥਾਪਿ ਭਮਰੋ ਪੁਪ੍ਫ’’ਨ੍ਤਿਆਦਿਨਾ (ਧ. ਪ. ੪੯; ਨੇਤ੍ਤਿ. ੧੨੩) ਵੁਤ੍ਤਵਿਧਿਨਾ ਆਹਾਰਪਰਿਯੇਸਨਤੋ ਪਰਿਸੁਦ੍ਧਾਜੀਵਤਾ. ਨਿਚ੍ਚਂ ਅਨ੍ਤਰਘਰਂ ਪਵਿਸਨ੍ਤਸ੍ਸੇਵ ਸੁਪ੍ਪਟਿਚ੍ਛਨ੍ਨਗਮਨਾਦਯੋ ਸੇਖਿਯਧਮ੍ਮਾ ਸਮ੍ਪਜ੍ਜਨ੍ਤੀਤਿ ਸੇਖਿਯਪਟਿਪਤ੍ਤਿਪੂਰਣਂ. ਪਟਿਗ੍ਗਹਣੇ ਮਤ੍ਤਞ੍ਞੁਤਾਯ, ਸਂਸਟ੍ਠਵਿਹਾਰਾਭਾਵਤੋ ਚ ਅਪਰਪੋਸਿਤਾ. ਕੁਲੇ ਕੁਲੇ ਅਪ੍ਪਕਅਪ੍ਪਕਪਿਣ੍ਡਗਹਣੇਨ ਪਰਾਨੁਗ੍ਗਹਕਿਰਿਯਾ. ਅਨ੍ਤਿਮਾਯ ਜੀਵਿਕਾਯ ਅਵਟ੍ਠਾਨੇਨ ਮਾਨਪ੍ਪਹਾਨਂ. ਵੁਤ੍ਤਞ੍ਹੇਤਂ ‘‘ਅਨ੍ਤਮਿਦਂ, ਭਿਕ੍ਖਵੇ, ਜੀਵਿਕਾਨਂ, ਯਦਿਦਂ ਪਿਣ੍ਡੋਲ੍ਯ’’ਨ੍ਤਿਆਦਿ (ਇਤਿਵੁ. ੯੧; ਸਂ. ਨਿ. ੩.੮੦). ਮਿਸ੍ਸਕਭਤ੍ਤੇਨ ਯਾਪਨਤੋ ਰਸਤਣ੍ਹਾਨਿਵਾਰਣਂ. ਨਿਮਨ੍ਤਨਾਸਮ੍ਪਟਿਚ੍ਛਨਤੋ ਗਣਭੋਜਨਾਦਿਸਿਕ੍ਖਾਪਦੇਹਿ ਅਨਾਪਤ੍ਤਿਤਾ.
ਅਪ੍ਪਟਿਹਤਵੁਤ੍ਤਿਤਾਯ ਚਤੂਸੁਪਿ ਦਿਸਾਸੁ ਵਤ੍ਤਨਟ੍ਠੇਨ ਚਾਤੁਦ੍ਦਿਸੋ. ਆਜੀਵਸ੍ਸ ਵਿਸੁਜ੍ਝਤੀਤਿ ਆਜੀਵੋ ਅਸ੍ਸ ਵਿਸੁਜ੍ਝਤਿ. ਅਤ੍ਤਭਰਸ੍ਸਾਤਿ ਅਪ੍ਪਾਨਵਜ੍ਜਸੁਲਭਰੂਪੇਹਿ ਪਚ੍ਚਯੇਹਿ ਅਤ੍ਤਨੋ ਭਰਣਤੋ ਅਤ੍ਤਭਰਸ੍ਸ. ਤਤੋ ਏਵ ਏਕਵਿਹਾਰਿਤਾਯ ਸਦ੍ਧਿਵਿਹਾਰਿਕਾਦੀਨਮ੍ਪਿ ਅਞ੍ਞੇਸਂ ਅਪੋਸਨਤੋ ਅਨਞ੍ਞਪੋਸਿਨੋ. ਪਦਦ੍ਵਯੇਨਾਪਿ ਕਾਯਪਰਿਹਾਰਿਕੇਨ ਚੀਵਰੇਨ ਕੁਚ੍ਛਿਪਰਿਹਾਰਿਕੇਨ ਪਿਣ੍ਡਪਾਤੇਨ ਵਿਚਰਣਤੋ ਸਲ੍ਲਹੁਕਵੁਤ੍ਤਿਤਂ, ਸੁਭਰਤਂ, ਪਰਮਅਪ੍ਪਿਚ੍ਛਤਂ, ਸਨ੍ਤੁਟ੍ਠਿਞ੍ਚ ਦਸ੍ਸੇਤਿ. ਦੇਵਾਪਿ ਪਿਹਯਨ੍ਤਿ ਤਾਦਿਨੋਤਿ ਤਾਦਿਸਸ੍ਸ ਭੁਸਂ ਅਤਿਵਿਯ ਸਨ੍ਤਕਾਯਵਚੀਮਨੋਕਮ੍ਮਤਾਯ ਉਪਸਨ੍ਤਸ੍ਸ ਪਰਮੇਨ ਸਤਿਨੇਪਕ੍ਕੇਨ ਸਮਨ੍ਨਾਗਮਤੋ ਸਬ੍ਬਕਾਲਂ ਸਤਿਮਤੋ ਪਿਣ੍ਡਪਾਤਿਕਸ੍ਸ ਭਿਕ੍ਖੁਸ੍ਸ ਸਕ੍ਕਾਦਯੋ ਦੇਵਾਪਿ ਪਿਹਯਨ੍ਤਿ ਪਤ੍ਥੇਨ੍ਤਿ. ਤਸ੍ਸ ਸੀਲਾਦਿਗੁਣੇਸੁ ਬਹੁਮਾਨਂ ਉਪ੍ਪਾਦੇਨ੍ਤਾ ਆਦਰਂ ਜਨੇਨ੍ਤਿ, ਪਗੇਵ ਮਨੁਸ੍ਸਾ. ਸਚੇ ਸੋ ਲਾਭਸਕ੍ਕਾਰਸਿਲੋਕਸਨ੍ਨਿਸ੍ਸਿਤੋ ਨ ਹੋਤਿ, ਤਦਭਿਕਙ੍ਖੀ ਨ ਹੋਤੀਤਿ ਅਤ੍ਥੋ.
ਇਤਿ ਪਿਣ੍ਡਪਾਤਿਕਙ੍ਗਕਥਾਵਣ੍ਣਨਾ.
੪. ਸਪਦਾਨਚਾਰਿਕਙ੍ਗਕਥਾਵਣ੍ਣਨਾ
੨੭. ਇਮਿਨਾਤਿ ਸਪਦਾਨਚਾਰਿਕੇਨ. ਕਾਲਤਰਨ੍ਤਿ ਕਾਲਸ੍ਸੇਵ. ਅਫਾਸੁਕਟ੍ਠਾਨਨ੍ਤਿ ਸਪਰਿਸ੍ਸਯਾਦਿਵਸੇਨ ਦੁਪ੍ਪਵੇਸਨਟ੍ਠਾਨਂ. ਪੁਰਤੋਤਿ ਵੀਥਿਯਂ ਗਚ੍ਛਨ੍ਤਸ੍ਸ ਪੁਰਤੋ ਘਰਂ ਅਪਵਿਟ੍ਠਸ੍ਸੇਵ. ਪਤ੍ਤਵਿਸ੍ਸਟ੍ਠਟ੍ਠਾਨਨ੍ਤਿ ਪੇਸਕਾਰਵੀਥਿਯਂ ਪੇਸਕਾਰਭਾਵਂ ਨਿਮ੍ਮਿਨਿਤ੍ਵਾ ਠਿਤਸ੍ਸ ਸਕ੍ਕਸ੍ਸ ਘਰਦ੍ਵਾਰੇ ਪਤ੍ਤਵਿਸ੍ਸਟ੍ਠਟ੍ਠਾਨਂ. ਉਕ੍ਕਟ੍ਠਪਿਣ੍ਡਪਾਤਿਕੋ ਤਂ ਦਿਵਸਂ ਨ ਭਿਕ੍ਖਂ ਆਗਮਯਮਾਨੋ ਨਿਸੀਦਤਿ, ਤਸ੍ਮਾ ਤਂ ਅਨੁਲੋਮੇਤਿ. ਕਤ੍ਥਚਿਪਿ ਕੁਲੇ ਨਿਬਦ੍ਧਂ ਉਪਸਙ੍ਕਮਨਾਭਾਵਤੋ ਪਰਿਚਯਾਭਾਵੇਨ ਕੁਲੇਸੁ ਨਿਚ੍ਚਨਵਕਤਾ. ਸਬ੍ਬਤ੍ਥ ਅਲਗ੍ਗਮਾਨਸਤਾਯ ਚ ਸੋਮ੍ਮਭਾਵੇਨ ਚ ਚਨ੍ਦੂਪਮਤਾ. ਕੁਲੇਸੁ ਪਰਿਗ੍ਗਹਚਿਤ੍ਤਾਭਾਵੇਨ ਤਤ੍ਥ ਮਚ੍ਛੇਰਪ੍ਪਹਾਨਂ. ਹਿਤੇਸਿਤਾਯ ਵਿਭਾਗਾਭਾਵਤੋ ਸਮਾਨੁਕਮ੍ਪਿਤਾ. ਕੁਲਾਨਂ ਸਙ੍ਗਣ੍ਹਨਸਂਸਟ੍ਠਤਾਦਯੋ ਕੁਲੂਪਕਾਦੀਨਵਾ. ਅਵ੍ਹਾਨਾਨਭਿਨਨ੍ਦਨਾਤਿ ਨਿਮਨ੍ਤਨਵਸੇਨ ਅਵ੍ਹਾਨਸ੍ਸ ਅਸਮ੍ਪਟਿਚ੍ਛਨਾ. ਅਭਿਹਾਰੇਨਾਤਿ ਭਿਕ੍ਖਾਭਿਹਾਰੇਨ. ਸੇਰਿਚਾਰਨ੍ਤਿ ਯਥਾਰੁਚਿ ਵਿਚਰਣਂ.
ਇਤਿ ਸਪਦਾਨਚਾਰਿਕਙ੍ਗਕਥਾਵਣ੍ਣਨਾ.
੫. ਏਕਾਸਨਿਕਙ੍ਗਕਥਾਵਣ੍ਣਨਾ
੨੮. ਨਾਨਾਸਨਭੋਜਨਨ੍ਤਿ ਅਨੇਕਸ੍ਮਿਂ ਆਸਨੇ ਭੋਜਨਂ, ਏਕਨਿਸਜ੍ਜਾਯ ਏਵ ਅਭੁਞ੍ਜਿਤ੍ਵਾ ਵਿਸੁਂ ਵਿਸੁਂ ਨਿਸਜ੍ਜਾਸੁ ਆਹਾਰਪਰਿਭੋਗਨ੍ਤਿ ਅਤ੍ਥੋ. ਪਤਿਰੂਪਨ੍ਤਿ ਯੁਤ੍ਤਰੂਪਂ ਅਨੁਟ੍ਠਾਪਨੀਯਂ. ਵਤ੍ਤਂ ਕਾਤੁਂ ਵਟ੍ਟਤੀਤਿ ਵਤ੍ਤਂ ਕਾਤੁਂ ਯੁਜ੍ਜਤਿ. ਵਤ੍ਤਂ ਨਾਮ ਗਰੁਟ੍ਠਾਨੀਯੇ ਕਤ੍ਤਬ੍ਬਮੇਵ. ਤਤ੍ਥ ਪਨ ਪਟਿਪਜ੍ਜਨਵਿਧਿਂ ਦਸ੍ਸੇਤੁਂ ਯਂ ਥੇਰਵਾਦਂ ਆਹ ‘‘ਆਸਨਂ ਵਾ ਰਕ੍ਖੇਯ੍ਯ ਭੋਜਨਂ ਵਾ’’ਤਿਆਦਿ. ਤਸ੍ਸਤ੍ਥੋ – ਏਕਾਸਨਿਕਂ ਭਿਕ੍ਖੁਂ ਭੁਞ੍ਜਨ੍ਤਂ ਆਸਨਂ ਵਾ ਰਕ੍ਖੇਯ੍ਯ, ਧੁਤਙ੍ਗਭੇਦਤੋ ਯਾਵ ਭੋਜਨਪਰਿਯੋਸਾਨਾ ਨ ਵੁਟ੍ਠਾਤਬ੍ਬਨ੍ਤਿ ਵੁਤ੍ਤਂ ਹੋਤਿ. ਭੋਜਨਂ ਵਾ ਰਕ੍ਖੇਯ੍ਯ ਧੁਤਙ੍ਗਭੇਦਤੋ, ਅਭੁਞ੍ਜਿਯਮਾਨਂ ਯਾਵ ਭੁਞ੍ਜਿਤੁਂ ਨਾਰਭਤਿ, ਤਾਵ ਵੁਟ੍ਠਾਤਬ੍ਬਨ੍ਤਿ ਅਤ੍ਥੋ. ਯਸ੍ਮਾ ਤਯਿਦਂ ਦ੍ਵਯਂ ਇਧ ਨਤ੍ਥਿ, ਤਸ੍ਮਾ ਵਤ੍ਤਕਰਣਂ ਧੁਤਙ੍ਗਂ ਨ ਰਕ੍ਖਤੀਤਿ ਅਧਿਪ੍ਪਾਯੋ. ਤੇਨਾਹ ‘‘ਅਯਞ੍ਚਾ’’ਤਿਆਦਿ. ‘‘ਭੇਸਜ੍ਜਤ੍ਥਮੇਵਾ’’ਤਿ ਇਮਿਨਾ ਭੇਸਜ੍ਜਪਰਿਭੋਗਵਸੇਨੇਵ ਸਪ੍ਪਿਆਦੀਨਿਪਿ ਵਟ੍ਟਨ੍ਤੀਤਿ ਦਸ੍ਸੇਤਿ. ਅਪ੍ਪਾਬਾਧਤਾਤਿ ਅਰੋਗਤਾ. ਅਪ੍ਪਾਤਙ੍ਕਤਾਤਿ ਅਕਿਚ੍ਛਜੀਵਿਤਾ ਸਰੀਰਦੁਕ੍ਖਾਭਾਵੋ. ਲਹੁਟ੍ਠਾਨਨ੍ਤਿ ਕਾਯਸ੍ਸ ਲਹੁਪਰਿਵਤ੍ਤਿਤਾ. ਬਲਨ੍ਤਿ ਸਰੀਰਬਲਂ. ਫਾਸੁਵਿਹਾਰੋਤਿ ਸੁਖਵਿਹਾਰੋ. ਸਬ੍ਬਮੇਤਂ ਬਹੁਕ੍ਖਤ੍ਤੁਂ ਭੁਞ੍ਜਨਪਚ੍ਚਯਾ ਉਪ੍ਪਜ੍ਜਨਵਿਕਾਰਪਟਿਕ੍ਖੇਪਪਦਂ. ਰੁਜਾਤਿ ਰੋਗਾ. ਨ ਕਮ੍ਮਮਤ੍ਤਨੋਤਿ ਅਤ੍ਤਨੋ ਯੋਗਕਮ੍ਮਂ ਪੁਰੇਭਤ੍ਤਂ, ਪਚ੍ਛਾਭਤ੍ਤਞ੍ਚ ਨ ਪਰਿਹਾਪੇਤਿ, ਬਹੁਸੋ ਭੋਜਨੇ ਅਬ੍ਯਾਵਟਭਾਵਤੋ, ਅਰੋਗਭਾਵਤੋ ਚਾਤਿ ਅਧਿਪ੍ਪਾਯੋ.
ਇਤਿ ਏਕਾਸਨਿਕਙ੍ਗਕਥਾਵਣ੍ਣਨਾ.
੬. ਪਤ੍ਤਪਿਣ੍ਡਿਕਙ੍ਗਕਥਾਵਣ੍ਣਨਾ
੨੯. ਅਪ੍ਪਟਿਕੂਲਂ ਕਤ੍ਵਾ ਭੁਞ੍ਜਿਤੁਂ ਵਟ੍ਟਤਿ ਪਟਿਕੂਲਸ੍ਸ ਭੁਤ੍ਤਸ੍ਸ ਅਗਣ੍ਹਨਮ੍ਪਿ ਸਿਯਾਤਿ ਅਧਿਪ੍ਪਾਯੋ. ਪਮਾਣਯੁਤ੍ਤਮੇਵ ਗਣ੍ਹਿਤਬ੍ਬਨ੍ਤਿ ‘‘ਏਕਭਾਜਨਮੇਵ ਗਣ੍ਹਾਮੀ’’ਤਿ ਬਹੁਂ ਗਹੇਤ੍ਵਾ ਨ ਛਡ੍ਡੇਤਬ੍ਬਂ. ਨਾਨਾਰਸਤਣ੍ਹਾਵਿਨੋਦਨਨ੍ਤਿ ਨਾਨਾਰਸਭੋਜਨੇ ਤਣ੍ਹਾਯ ਵਿਨੋਦਨਂ. ਅਤ੍ਰ ਅਤ੍ਰ ਨਾਨਾਭਾਜਨੇ ਠਿਤੇ ਨਾਨਾਰਸੇ ਇਚ੍ਛਾ ਏਤਸ੍ਸਾਤਿ ਅਤ੍ਰਿਚ੍ਛੋ, ਤਸ੍ਸ ਭਾਵੋ ਅਤ੍ਰਿਚ੍ਛਤਾ, ਤਸ੍ਸਾ ਅਤ੍ਰਿਚ੍ਛਤਾਯ ਪਹਾਨਂ. ਆਹਾਰੇ ਪਯੋਜਨਮਤ੍ਤਦਸ੍ਸਿਤਾਤਿ ਅਸਮ੍ਭਿਨ੍ਨਨਾਨਾਰਸੇ ਗੇਧਂ ਅਕਤ੍ਵਾ ਆਹਾਰੇ ਸਤ੍ਥਾਰਾ ਅਨੁਞ੍ਞਾਤਪਯੋਜਨਮਤ੍ਤਦਸ੍ਸਿਤਾ. ਵਿਸੁਂ ਵਿਸੁਂ ਭਾਜਨੇਸੁ ਠਿਤਾਨਿ ਬ੍ਯਞ੍ਜਨਾਨਿ ਗਣ੍ਹਤੋ ਤਤ੍ਥ ਤਤ੍ਥ ਸਾਭੋਗਤਾਯ ਸਿਯਾ ਵਿਕ੍ਖਿਤ੍ਤਭੋਜਿਤਾ, ਨ ਤਥਾ ਇਮਸ੍ਸ ਏਕਪਤ੍ਤਗਤਸਞ੍ਞਿਨੋਤਿ ਵੁਤ੍ਤਂ ‘‘ਅਵਿਕ੍ਖਿਤ੍ਤਭੋਜਿਤਾ’’ਤਿ. ਓਕ੍ਖਿਤ੍ਤਲੋਚਨੋਤਿ ਪਤ੍ਤਸਞ੍ਞਿਤਾਯ ਹੇਟ੍ਠਾਖਿਤ੍ਤਚਕ੍ਖੁ. ਪਰਿਭੁਞ੍ਜੇਯ੍ਯਾਤਿ ਪਰਿਭੁਞ੍ਜਿਤੁਂ ਸਕ੍ਕੁਣੇਯ੍ਯ.
ਇਤਿ ਪਤ੍ਤਪਿਣ੍ਡਿਕਙ੍ਗਕਥਾਵਣ੍ਣਨਾ.
੭. ਖਲੁਪਚ੍ਛਾਭਤ੍ਤਿਕਙ੍ਗਕਥਾਵਣ੍ਣਨਾ
੩੦. ਭੁਞ੍ਜਨ੍ਤਸ੍ਸ ਯਂ ਉਪਨੀਤਂ, ਤਸ੍ਸ ਪਟਿਕ੍ਖੇਪੇਨ ਤਂ ਅਤਿਰਿਤ੍ਤਂ ਭੋਜਨਨ੍ਤਿ ਅਤਿਰਿਤ੍ਤਭੋਜਨਂ. ਪੁਨ ਭੋਜਨਂ ਕਪ੍ਪਿਯਂ ਕਾਰੇਤ੍ਵਾ ਨ ਭੁਞ੍ਜਿਤਬ੍ਬਂ, ਤਬ੍ਬਿਸਯਤ੍ਤਾ ਇਮਸ੍ਸ ਧੁਤਙ੍ਗਸ੍ਸ. ਤੇਨਾਹ ‘‘ਇਦਮਸ੍ਸ ਵਿਧਾਨ’’ਨ੍ਤਿ. ਯਸ੍ਮਿਂ ਭੋਜਨੇਤਿ ਯਸ੍ਮਿਂ ਭੁਞ੍ਜਿਯਮਾਨੇ ਭੋਜਨੇ. ਤਦੇਵ ਭੁਞ੍ਜਤਿ, ਨ ਅਞ੍ਞਂ. ਅਨਤਿਰਿਤ੍ਤਭੋਜਨਪਚ੍ਚਯਾ ਆਪਤ੍ਤਿ ਅਨਤਿਰਿਤ੍ਤਭੋਜਨਾਪਤ੍ਤਿ, ਤਤੋ ਦੂਰੀਭਾਵੋ ਅਨਾਪਜ੍ਜਨਂ. ਓਦਰਿਕਤ੍ਤਂ ਘਸ੍ਮਰਭਾਵੋ ਕੁਚ੍ਛਿਪੂਰਕਤਾ, ਤਸ੍ਸ ਅਭਾਵੋ ਏਕਪਿਣ੍ਡੇਨਾਪਿ ਯਾਪਨਤੋ. ਨਿਰਾਮਿਸਸਨ੍ਨਿਧਿਤਾ ਨਿਹਿਤਸ੍ਸ ਅਭੁਞ੍ਜਨਤੋ. ਪੁਨ ਪਰਿਯੇਸਨਵਸੇਨ ਪਰਿਯੇਸਨਾਯ ਖੇਦਂ ਨ ਯਾਤਿ. ਅਭਿਸਲ੍ਲੇਖਕਾਨਂ ਸਨ੍ਤੋਸਗੁਣਾਦੀਨਂ ਵੁਦ੍ਧਿਯਾ ਸਞ੍ਜਨਨਂ ਸਨ੍ਤੋਸਗੁਣਾਦਿਵੁਡ੍ਢਿਸਞ੍ਜਨਨਂ. ਇਦਨ੍ਤਿ ਖਲੁਪਚ੍ਛਾਭਤ੍ਤਿਕਙ੍ਗਂ.
ਇਤਿ ਖਲੁਪਚ੍ਛਾਭਤ੍ਤਿਕਙ੍ਗਕਥਾਵਣ੍ਣਨਾ.
੮. ਆਰਞ੍ਞਿਕਙ੍ਗਕਥਾਵਣ੍ਣਨਾ
੩੧. ਗਾਮਨ੍ਤਸੇਨਾਸਨਂ ਪਹਾਯ ਅਰਞ੍ਞੇ ਅਰੁਣਂ ਉਟ੍ਠਾਪੇਤਬ੍ਬਨ੍ਤਿ ਏਤ੍ਥ ਗਾਮਨ੍ਤਂ, ਅਰਞ੍ਞਞ੍ਚ ਸਰੂਪਤੋ ਦਸ੍ਸੇਤੁਂ ‘‘ਤਤ੍ਥ ਸਦ੍ਧਿਂ ਉਪਚਾਰੇਨਾ’’ਤਿਆਦਿ ਆਰਦ੍ਧਂ. ਤਤ੍ਥ ਗਾਮਪਰਿਯਾਪਨ੍ਨਤ੍ਤਾ ਗਾਮਨ੍ਤਸੇਨਾਸਨਸ੍ਸ ‘‘ਗਾਮੋਯੇਵ ਗਾਮਨ੍ਤਸੇਨਾਸਨ’’ਨ੍ਤਿ ਵੁਤ੍ਤਂ. ਯੋ ਕੋਚਿ ਸਤ੍ਥੋਪਿ ਗਾਮੋ ਨਾਮਾਤਿ ਸਮ੍ਬਨ੍ਧੋ. ਇਨ੍ਦਖੀਲਾਤਿ ਉਮ੍ਮਾਰਾ. ਤਸ੍ਸਾਤਿ ਲੇਡ੍ਡੁਪਾਤਸ੍ਸ. ਵਿਨਯਪਰਿਯਾਯੇਨ ਅਰਞ੍ਞਲਕ੍ਖਣਂ ਅਦਿਨ੍ਨਾਦਾਨਪਾਰਾਜਿਕੇ (ਪਾਰਾ. ੯੨) ਆਗਤਂ. ਤਤ੍ਥ ਹਿ ‘‘ਗਾਮਾ ਵਾ ਅਰਞ੍ਞਾ ਵਾ’’ਤਿ ਅਨਵਸੇਸਤੋ ਅਵਹਾਰਟ੍ਠਾਨਪਰਿਗ੍ਗਹੇ ਤਦੁਭਯਂ ਅਸਙ੍ਕਰਤੋ ਦਸ੍ਸੇਤੁਂ ‘‘ਠਪੇਤ੍ਵਾ ਗਾਮਞ੍ਚਾ’’ਤਿਆਦਿ ਵੁਤ੍ਤਂ. ਗਾਮੂਪਚਾਰੋ ਹਿ ਲੋਕੇ ਗਾਮਸਙ੍ਖਮੇਵ ਗਚ੍ਛਤੀਤਿ. ਨਿਪ੍ਪਰਿਯਾਯਤੋ ਪਨ ਗਾਮਵਿਨਿਮੁਤ੍ਤਂ ਠਾਨਂ ਅਰਞ੍ਞਮੇਵ ਹੋਤੀਤਿ ਅਭਿਧਮ੍ਮੇ (ਵਿਭ. ੫੨੯) ਗਾਮਾ ‘‘ਨਿਕ੍ਖਮਿਤ੍ਵਾ ਬਹਿ ਇਨ੍ਦਖੀਲਾ, ਸਬ੍ਬਮੇਤਂ ਅਰਞ੍ਞ’’ਨ੍ਤਿ ਵੁਤ੍ਤਂ. ਸੁਤ੍ਤਨ੍ਤਿਕਪਰਿਯਾਯੇਨ ਆਰਞ੍ਞਕਸਿਕ੍ਖਾਪਦੇ (ਪਾਰਾ. ੬੫੪) ‘‘ਪਞ੍ਚਧਨੁਸਤਿਕਂ ਪਚ੍ਛਿਮ’’ਨ੍ਤਿ ਆਗਤਂ ਆਰਞ੍ਞਿਕਂ ਭਿਕ੍ਖੁਂ ਸਨ੍ਧਾਯ. ਨ ਹਿ ਸੋ ਵਿਨਯਪਰਿਯਾਯਿਕੇ ‘‘ਅਰਞ੍ਞੇ ਵਸਨਤੋ ਆਰਞ੍ਞਿਕੋ ਪਨ੍ਤਸੇਨਾਸਨੋ’’ਤਿ ਸੁਤ੍ਤੇ ਵੁਤ੍ਤੋ. ਅਯਞ੍ਚ ਸੁਤ੍ਤਸਂਵਣ੍ਣਨਾਤਿ ਇਧ ਸਬ੍ਬਤ੍ਥ ਸੁਤ੍ਤਨ੍ਤਕਥਾਵ ਪਮਾਣਂ. ਤਸ੍ਮਾ ਤਤ੍ਥ ਆਗਤਮੇਵ ਲਕ੍ਖਣਂ ਗਹੇਤਬ੍ਬਨ੍ਤਿ ਦਸ੍ਸੇਨ੍ਤੋ ‘‘ਤਂ ਆਰੋਪਿਤੇਨ ਆਚਰਿਯਧਨੁਨਾ’’ਤਿਆਦਿਨਾ ਮਿਨਨਵਿਧਿਂ ਆਹ. ਤੇਨੇਵ ਹਿ ਮਜ੍ਝਿਮਟ੍ਠਕਥਾਨਯੋਵ (ਮ. ਨਿ. ਅਟ੍ਠ. ੧.੨੯੬) ਇਦਮੇਤ੍ਥ ਪਮਾਣਨ੍ਤਿ ਚ ਵੁਤ੍ਤੋ.
ਤਤੋ ਤਤੋ ਮਗ੍ਗਨ੍ਤਿ ਤਤ੍ਥ ਤਤ੍ਥ ਖੁਦ੍ਦਕਮਗ੍ਗਂ ਪਿਦਹਤਿ. ਧੁਤਙ੍ਗਸੁਦ੍ਧਿਕੇਨ ਧੁਤਙ੍ਗਸੋਧਨਪਸੁਤੇਨ. ਯਥਾਪਰਿਚ੍ਛਿਨ੍ਨੇ ਕਾਲੇਤਿ ਉਕ੍ਕਟ੍ਠਸ੍ਸ ਤਯੋਪਿ ਉਤੂ, ਮਜ੍ਝਿਮਸ੍ਸ ਦ੍ਵੇ, ਮੁਦੁਕਸ੍ਸ ਏਕੋ ਉਤੁ. ਤਤ੍ਥਪਿ ਧੁਤਙ੍ਗਂ ਨ ਭਿਜ੍ਜਤਿ ਸਉਸ੍ਸਾਹਤ੍ਤਾ. ਨਿਪਜ੍ਜਿਤ੍ਵਾ ਗਮਿਸ੍ਸਾਮਾਤਿ ਚਿਤ੍ਤਸ੍ਸ ਸਿਥਿਲਭਾਵੇਨ ਧੁਤਙ੍ਗਂ ਭਿਜ੍ਜਤੀਤਿ ਵੁਤ੍ਤਂ. ਅਰਞ੍ਞਸਞ੍ਞਂ ਮਨਸਿ ਕਰੋਨ੍ਤੋਤਿ ‘‘ਅਹਂ ਵਿਵੇਕਵਾਸਂ ਵਸਿਸ੍ਸਾਮਿ, ਯਥਾਲਦ੍ਧੋਵ ਕਾਯਵਿਵੇਕੋ ਸਾਤ੍ਥਕੋ ਕਾਤਬ੍ਬੋ’’ਤਿ ਮਨਸਿਕਾਰਸਬ੍ਭਾਵਤੋ ‘‘ਭਬ੍ਬੋ…ਪੇ… ਰਕ੍ਖਿਤੁ’’ਨ੍ਤਿ ਵੁਤ੍ਤਂ. ਅਸ੍ਸ ਆਰਞ੍ਞਿਕਸ੍ਸ ਚਿਤ੍ਤਂ ਨ ਵਿਕ੍ਖਿਪਨ੍ਤਿ ਆਪਾਥਮਨੁਪਗਮਨਤੋ. ਵਿਗਤਸਨ੍ਤਾਸੋ ਹੋਤਿ ਵਿਵੇਕਪਰਿਚਯਤੋ. ਜੀਵਿਤਨਿਕਨ੍ਤਿਂ ਜਹਤਿ ਬਹੁਪਰਿਸ੍ਸਯੇ ਅਰਞ੍ਞੇ ਨਿਵਾਸੇਨੇਵ ਮਰਣਭਯਸ੍ਸ ਦੂਰੀਕਰਣਤੋ. ਪਵਿਵੇਕਸੁਖਰਸਂ ਅਸ੍ਸਾਦੇਤਿ ਅਨੁਭਵਤਿ ਜਨਸਂਸਗ੍ਗਾਭਾਵਤੋ. ਆਰਾਧਯਨ੍ਤੋਤਿ ਅਨੁਨਯਨ੍ਤੋ. ਯਥਾਨੁਸਿਟ੍ਠਂ ਪਟਿਪਤ੍ਤਿਯਾ ਵਿਵੇਕਸ੍ਸ ਅਧਿਟ੍ਠਾਨਭਾਵਤੋ ਆਰਞ੍ਞਿਕਙ੍ਗਯੋਗਿਨੋ ਵਾਹਨਸਦਿਸਨ੍ਤਿ ਕਤ੍ਵਾ ਵੁਤ੍ਤਂ ‘‘ਅਵਸੇਸਧੁਤਾਯੁਧੋ’’ਤਿ, ਅਵਸਿਟ੍ਠਧੁਤਧਮ੍ਮਾਯੁਧੋਤਿ ਅਤ੍ਥੋ.
ਇਤਿ ਆਰਞ੍ਞਿਕਙ੍ਗਕਥਾਵਣ੍ਣਨਾ.
੯. ਰੁਕ੍ਖਮੂਲਿਕਙ੍ਗਕਥਾਵਣ੍ਣਨਾ
੩੨. ਛਨ੍ਨਨ੍ਤਿ ਇਟ੍ਠਕਾਛਦਨਾਦੀਹਿ ਛਾਦਿਤਂ, ਆਵਸਥਨ੍ਤਿ ਅਤ੍ਥੋ. ਸੀਮਨ੍ਤਰਿਕਰੁਕ੍ਖੋਤਿ ਦ੍ਵਿਨ੍ਨਂ ਰਾਜੂਨਂ ਰਜ੍ਜਸੀਮਾਯ ਠਿਤਰੁਕ੍ਖੋ. ਤਤ੍ਥ ਹਿ ਤੇਸਂ ਰਾਜੂਨਂ ਬਲਕਾਯੋ ਉਪਗਨ੍ਤ੍ਵਾ ਅਨ੍ਤਰਨ੍ਤਰਾ ਯੁਦ੍ਧਂ ਕਰੇਯ੍ਯ, ਚੋਰਾਪਿ ਪਾਰਿਪਨ੍ਥਿਕਾ ਸਮੋਸਰਨ੍ਤਾ ਭਿਕ੍ਖੁਸ੍ਸ ਸੁਖੇਨ ਨਿਸੀਦਿਤੁਂ ਨ ਦੇਨ੍ਤਿ. ਚੇਤਿਯਰੁਕ੍ਖੋ ‘‘ਦੇਵਤਾਧਿਟ੍ਠਿਤੋ’’ਤਿ ਮਨੁਸ੍ਸੇਹਿ ਸਮ੍ਮਤਰੁਕ੍ਖੋ ਪੂਜੇਤੁਂ ਉਪਗਤੇਹਿ ਮਨੁਸ੍ਸੇਹਿ ਅਵਿਵਿਤ੍ਤੋ ਹੋਤਿ. ਨਿਯ੍ਯਾਸਰੁਕ੍ਖੋ ਸਜ੍ਜਰੁਕ੍ਖਾਦਿ. ਵਗ੍ਗੁਲਿਰੁਕ੍ਖੋ ਵਗ੍ਗੁਲਿਨਿਸੇਵਿਤੋ. ਸੀਮਨ੍ਤਰਿਕਰੁਕ੍ਖਾਦਯੋ ਸਪਰਿਸ੍ਸਯਾ, ਦੁਲ੍ਲਭਵਿਵੇਕਾ ਚਾਤਿ ਆਹ ‘‘ਇਮੇ ਰੁਕ੍ਖੇ ਵਿਵਜ੍ਜੇਤ੍ਵਾ’’ਤਿ. ਪਣ੍ਣਸਟਨ੍ਤਿ ਰੁਕ੍ਖਤੋ ਪਤਿਤਪਣ੍ਣਂ. ਪਟਿਚ੍ਛਨ੍ਨੇ ਠਾਨੇ ਨਿਸੀਦਿਤਬ੍ਬਂ ਰੁਕ੍ਖਮੂਲਿਕਭਾਵਸ੍ਸ ਪਟਿਚ੍ਛਾਦਨਤ੍ਥਂ. ਛਨ੍ਨੇ ਵਾਸਕਪ੍ਪਨਾ ਧਮ੍ਮਸ੍ਸਵਨਾਦੀਨਮਤ੍ਥਾਯਪਿ ਹੋਤਿ. ਤਸ੍ਮਾ ‘‘ਜਾਨਿਤ੍ਵਾ ਅਰੁਣਂ ਉਟ੍ਠਾਪਿਤਮਤ੍ਤੇ’’ਤਿ ਵੁਤ੍ਤਂ.
ਅਭਿਣ੍ਹਂ ਤਰੁਪਣ੍ਣਵਿਕਾਰਦਸ੍ਸਨੇਨਾਤਿ ਅਭਿਕ੍ਖਣਂ ਤਰੂਸੁ, ਤਰੂਨਂ ਵਾ ਪਣ੍ਣੇਸੁ ਵਿਕਾਰਸ੍ਸ ਖਣਭਙ੍ਗਸ੍ਸ ਦਸ੍ਸਨੇਨ. ਸੇਨਾਸਨਮਚ੍ਛੇਰਕਮ੍ਮਾਰਾਮਤਾਨਨ੍ਤਿ ਆਵਾਸਮਚ੍ਛਰਿਯਨਵਕਮ੍ਮਰਤਭਾਵਾਨਂ. ਦੇਵਤਾਹੀਤਿ ਰੁਕ੍ਖਦੇਵਤਾਹਿ. ਤਾਪਿ ਹਿ ਰੁਕ੍ਖਟ੍ਠਵਿਮਾਨੇਸੁ ਵਸਨ੍ਤਿਯੋ ਰੁਕ੍ਖੇਸੁ ਵਸਨ੍ਤਿ. ਅਯਮ੍ਪਿ ਰੁਕ੍ਖੇਤਿ ਸਹਵਾਸਿਤਾ. ਵਣ੍ਣਿਤੋਤਿ ‘‘ਅਪ੍ਪਾਨਿ ਚੇਵਾ’’ਤਿਆਦਿਨਾ ਪਸਂਸਿਤੋ. ‘‘ਰੁਕ੍ਖਮੂਲਸੇਨਾਸਨਂ ਨਿਸ੍ਸਾਯ ਪਬ੍ਬਜ੍ਜਾ’’ਤਿ (ਮਹਾਵ. ੭੩, ੧੨੮) ਏਵਂ ਨਿਸ੍ਸਯੋਤਿ ਚ ਭਾਸਿਤੋ. ਅਭਿਰਤ੍ਤਾਨਿ ਤਰੁਣਕਾਲੇ, ਨੀਲਾਨਿ ਮਜ੍ਝਿਮਕਾਲੇ, ਪਣ੍ਡੂਨਿ ਜਿਣ੍ਣਕਾਲੇ. ਪਤਿਤਾਨਿ ਮਿਲਾਯਨਵਸੇਨ. ਏਵਂ ਪਸ੍ਸਨ੍ਤੋ ਤਰੁਪਣ੍ਣਾਨਿ ਪਚ੍ਚਕ੍ਖਤੋ ਏਵ ਨਿਚ੍ਚਸਞ੍ਞਂ ਪਨੂਦਤਿ ਪਜਹਤਿ, ਅਨਿਚ੍ਚਸਞ੍ਞਾ ਏਵਸ੍ਸ ਸਣ੍ਠਾਤਿ. ਯਸ੍ਮਾ ਭਗਵਤੋ ਜਾਤਿਬੋਧਿਧਮ੍ਮਚਕ੍ਕਪਵਤ੍ਤਨਪਰਿਨਿਬ੍ਬਾਨਾਨਿ ਰੁਕ੍ਖਮੂਲੇਯੇਵ ਜਾਤਾਨਿ, ਤਸ੍ਮਾ ਵੁਤ੍ਤਂ ‘‘ਬੁਦ੍ਧਦਾਯਜ੍ਜਂ ਰੁਕ੍ਖਮੂਲ’’ਨ੍ਤਿ.
ਇਤਿ ਰੁਕ੍ਖਮੂਲਿਕਙ੍ਗਕਥਾਵਣ੍ਣਨਾ.
੧੦. ਅਬ੍ਭੋਕਾਸਿਕਙ੍ਗਕਥਾਵਣ੍ਣਨਾ
੩੩. ‘‘ਰੁਕ੍ਖਮੂਲਂ ਪਟਿਕ੍ਖਿਪਾਮੀ’’ਤਿ ਏਤ੍ਤਕੇ ਵੁਤ੍ਤੇ ਛਨ੍ਨਂ ਅਪ੍ਪਟਿਕ੍ਖਿਤ੍ਤਮੇਵ ਹੋਤੀਤਿ ‘‘ਛਨ੍ਨਞ੍ਚ ਰੁਕ੍ਖਮੂਲਞ੍ਚ ਪਟਿਕ੍ਖਿਪਾਮੀ’’ਤਿ ਵੁਤ੍ਤਂ. ਧੁਤਙ੍ਗਸ੍ਸ ਸਬ੍ਬਸੋ ਪਟਿਯੋਗਿਪਟਿਕ੍ਖੇਪੇਨ ਹਿ ਸਮਾਦਾਨਂ ਇਜ੍ਝਤਿ, ਨੋ ਅਞ੍ਞਥਾਤਿ. ‘‘ਧਮ੍ਮਸ੍ਸਵਨਾਯਾ’’ਤਿ ਇਮਿਨਾਵ ਧਮ੍ਮਂ ਕਥੇਨ੍ਤੇਨਾਪਿ ਉਪੋਸਥਦਿਵਸਾਦੀਸੁ ਸੁਣਨ੍ਤਾਨਂ ਚਿਤ੍ਤਾਨੁਰਕ੍ਖਣਤ੍ਥਂ ਤੇਹਿ ਯਾਚਿਤੇਨ ਛਨ੍ਨਂ ਪਵਿਸਿਤੁਂ ਵਟ੍ਟਤਿ, ਧਮ੍ਮਂ ਪਨ ਕਥੇਤ੍ਵਾ ਅਬ੍ਭੋਕਾਸੋਵ ਗਨ੍ਤਬ੍ਬੋ. ਰੁਕ੍ਖਮੂਲਿਕਸ੍ਸਾਪਿ ਏਸੇਵ ਨਯੋ. ਉਪੋਸਥਤ੍ਥਾਯਾਤਿ ਉਪੋਸਥਕਮ੍ਮਾਯ. ਉਦ੍ਦਿਸਨ੍ਤੇਨਾਤਿ ਪਰੇਸਂ ਉਦ੍ਦੇਸਂ ਦੇਨ੍ਤੇਨ. ਉਦ੍ਦਿਸਾਪੇਨ੍ਤੇਨਾਤਿ ਸਯਂ ਉਦ੍ਦੇਸਂ ਗਣ੍ਹਨ੍ਤੇਨ. ਮਗ੍ਗਮਜ੍ਝੇ ਠਿਤਂ ਸਾਲਨ੍ਤਿ ਸੀਹਲ਼ਦੀਪੇ ਵਿਯ ਮਗ੍ਗਾ ਅਨੋਕ੍ਕਮ੍ਮ ਉਜੁਕਮੇਵ ਪਵਿਸਿਤਬ੍ਬਸਾਲਂ. ਵੇਗੇਨ ਗਨ੍ਤੁਂ ਨ ਵਟ੍ਟਤਿ ਅਸਾਰੁਪ੍ਪਤ੍ਤਾ. ਯਾਵ ਵਸ੍ਸੂਪਰਮਾ ਠਤ੍ਵਾ ਗਨ੍ਤਬ੍ਬਂ, ਨ ਤਾਵ ਧੁਤਙ੍ਗਭੇਦੋ ਹੋਤੀਤਿ ਅਧਿਪ੍ਪਾਯੋ.
ਰੁਕ੍ਖਸ੍ਸ ਅਨ੍ਤੋ ਨਾਮ ਰੁਕ੍ਖਮੂਲਂ. ਪਬ੍ਬਤਸ੍ਸ ਪਨ ਪਬ੍ਭਾਰਸਦਿਸੋ ਪਬ੍ਬਤਪਦੇਸੋ. ਅਚ੍ਛਨ੍ਨਮਰਿਯਾਦਨ੍ਤਿ ਯਥਾ ਵਸ੍ਸੋਦਕਂ ਅਨ੍ਤੋ ਨ ਪਵਿਸਤਿ, ਏਵਂ ਛਦਨਸਙ੍ਖੇਪੇਨ ਉਪਰਿ ਅਕਤਮਰਿਯਾਦਂ. ਅਨ੍ਤੋ ਪਨ ਪਬ੍ਭਾਰਸ੍ਸ ਵਸ੍ਸੋਦਕਂ ਪਵਿਸਤਿ ਚੇ, ਅਬ੍ਭੋਕਾਸਸਙ੍ਖੇਪਮੇਵਾਤਿ ਤਤ੍ਥ ਪਵਿਸਿਤੁਂ ਵਟ੍ਟਤਿ. ਸਾਖਾਮਣ੍ਡਪੋਤਿ ਰੁਕ੍ਖਸਾਖਾਹਿ ਵਿਰਲ਼ਚ੍ਛਨ੍ਨਮਣ੍ਡਪੋ. ਪੀਠਪਟੋ ਖਲਿਤ੍ਥਦ੍ਧਸਾਟਕੋ.
ਪਵਿਟ੍ਠਕ੍ਖਣੇ ਧੁਤਙ੍ਗਂ ਭਿਜ੍ਜਤਿ ਯਥਾਵੁਤ੍ਤਪਬ੍ਭਾਰਾਦਿਕੇ ਠਪੇਤ੍ਵਾਤਿ ਅਧਿਪ੍ਪਾਯੋ. ਜਾਨਿਤ੍ਵਾਤਿ ਧਮ੍ਮਸ੍ਸਵਨਾਦਿਅਤ੍ਥਂ ਛਨ੍ਨਂ ਰੁਕ੍ਖਮੂਲਂ ਪਵਿਸਿਤ੍ਵਾ ਨਿਸਿਨ੍ਨੋ ‘‘ਇਦਾਨਿ ਅਰੁਣੋ ਉਟ੍ਠਹਤੀ’’ਤਿ ਜਾਨਿਤ੍ਵਾ. ਰੁਕ੍ਖਮੂਲੇਪਿ ਕਤ੍ਥਚਿ ਅਤ੍ਥੇਵ ਨਿਵਾਸਫਾਸੁਕਤਾਤਿ ਸਿਯਾ ਤਤ੍ਥ ਆਸਙ੍ਗਪੁਬ੍ਬਕੋ ਆਵਾਸਪਲਿਬੋਧੋ, ਨ ਪਨ ਅਬ੍ਭੋਕਾਸੇਤਿ ਇਧੇਵ ਆਵਾਸਪਲਿਬੋਧੁਪਚ੍ਛੇਦੋ ਆਨਿਸਂਸੋ ਵੁਤ੍ਤੋ. ਪਸਂਸਾਯਾਨੁਰੂਪਤਾਤਿ ਅਨਿਕੇਤਾਤਿ ਵੁਤ੍ਤਪਸਂਸਾਯ ਅਨਾਲਯਭਾਵੇਨ ਅਨੁਚ੍ਛਵਿਕਤਾ. ਨਿਸ੍ਸਙ੍ਗਤਾਤਿ ਆਵਾਸਪਰਿਗ੍ਗਹਾਭਾਵੇਨੇਵ ਤਤ੍ਥ ਨਿਸ੍ਸਙ੍ਗਤਾ. ਅਸੁਕਦਿਸਾਯ ਵਸਨਟ੍ਠਾਨਂ ਨਤ੍ਥਿ, ਤਸ੍ਮਾ ਤਤ੍ਥ ਗਨ੍ਤੁਂ ਨੇਵ ਸਕ੍ਕਾਤਿ ਏਦਿਸਸ੍ਸ ਪਰਿਵਿਤਕ੍ਕਸ੍ਸ ਅਭਾਵਤੋ ਚਾਤੁਦ੍ਦਿਸੋ. ਮਿਗਭੂਤੇਨਾਤਿ ਪਰਿਗ੍ਗਹਾਭਾਵੇਨ ਮਿਗਸ੍ਸ ਵਿਯ ਭੂਤੇਨ. ਸਿਤੋਤਿ ਨਿਸ੍ਸਿਤੋ. ਵਿਨ੍ਦਤੀਤਿ ਲਭਤਿ.
ਇਤਿ ਅਬ੍ਭੋਕਾਸਿਕਙ੍ਗਕਥਾਵਣ੍ਣਨਾ.
੧੧. ਸੋਸਾਨਿਕਙ੍ਗਕਥਾਵਣ੍ਣਨਾ
੩੪. ਨ ਸੁਸਾਨਨ੍ਤਿ ਅਸੁਸਾਨਂ. ਅਞ੍ਞਤ੍ਥੋ ਨ-ਕਾਰੋ, ਸੁਸਾਨਲਕ੍ਖਣਰਹਿਤਂ ਵਸਨਟ੍ਠਾਨਨ੍ਤਿ ਅਧਿਪ੍ਪਾਯੋ. ਨ ਤਤ੍ਥਾਤਿ ‘‘ਸੁਸਾਨ’’ਨ੍ਤਿ ਵਵਤ੍ਥਪਿਤਮਤ੍ਤੇ ਠਾਨੇ ਨ ਵਸਿਤਬ੍ਬਂ. ਨ ਹਿ ਨਾਮਮਤ੍ਤੇਨ ਸੁਸਾਨਲਕ੍ਖਣਂ ਸਿਜ੍ਝਤਿ. ਤੇਨਾਹ ‘‘ਨ ਹੀ’’ਤਿਆਦਿ. ਝਾਪਿਤਕਾਲਤੋ ਪਨ ਪਟ੍ਠਾਯ…ਪੇ… ਸੁਸਾਨਮੇਵ ਛਵੇਨ ਸਯਿਤਮਤ੍ਤਾਯ ਸੁਸਾਨਲਕ੍ਖਣਪ੍ਪਤ੍ਤਿਤੋ. ਛਵਸਯਨਂ ਹਿ ‘‘ਸੁਸਾਨ’’ਨ੍ਤਿ ਵੁਚ੍ਚਤਿ.
ਸੋਸਾਨਿਕੇਨ ਨਾਮ ਅਪ੍ਪਕਿਚ੍ਚੇਨ ਸਲ੍ਲਹੁਕਵੁਤ੍ਤਿਨਾ ਭਵਿਤਬ੍ਬਨ੍ਤਿ ਦਸ੍ਸੇਤੁਂ ‘‘ਤਸ੍ਮਿਂ ਪਨ ਵਸਨ੍ਤੇਨਾ’’ਤਿਆਦਿ ਵੁਤ੍ਤਂ. ਗਰੁਕਨ੍ਤਿ ਦੁਪ੍ਪਰਿਹਾਰਂ. ਤਮੇਵ ਹਿ ਦੁਪ੍ਪਰਿਹਾਰਭਾਵਂ ਦਸ੍ਸੇਤੁਂ ‘‘ਤਸ੍ਮਾ’’ਤਿਆਦਿ ਵੁਤ੍ਤਂ. ਤਤ੍ਥ ਉਪ੍ਪਨ੍ਨਪਰਿਸ੍ਸਯਵਿਘਾਤਤ੍ਥਾਯਾਤਿ ‘‘ਸੁਸਾਨਂ ਨਾਮ ਮਨੁਸ੍ਸਰਾਹਸ੍ਸੇਯ੍ਯਕ’’ਨ੍ਤਿ ਚੋਰਾ ਕਤਕਮ੍ਮਾਪਿ ਅਕਤਕਮ੍ਮਾਪਿ ਓਸਰਨ੍ਤਿ, ਤਤ੍ਥ ਚੋਰੇਸੁ ਭਣ੍ਡਸਾਮਿਕੇ ਦਿਸ੍ਵਾ ਭਿਕ੍ਖੁਸਮੀਪੇ ਭਣ੍ਡਂ ਛਡ੍ਡੇਤ੍ਵਾ ਪਲਾਤੇਸੁ ਮਨੁਸ੍ਸਾ ਭਿਕ੍ਖੁਂ ‘‘ਚੋਰੋ’’ਤਿ ਗਹੇਤ੍ਵਾ ਪੋਥੇਯ੍ਯੁਂ, ਤਸ੍ਮਾ ਵਿਹਾਰੇ ਸਙ੍ਘਤ੍ਥੇਰਂ ਵਾ ਗੋਚਰਗਾਮੇ ਰਞ੍ਞਾ ਨਿਯੁਤ੍ਤਂ ਰਾਜਯੁਤ੍ਤਕਂ ਵਾ ਅਤ੍ਤਨੋ ਸੋਸਾਨਿਕਭਾਵਂ ਜਾਨਾਪੇਤ੍ਵਾ ਯਥਾ ਤਾਦਿਸੋ, ਅਞ੍ਞੋ ਵਾ ਪਰਿਸ੍ਸਯੋ ਨ ਹੋਤਿ, ਤਥਾ ਅਪ੍ਪਮਤ੍ਤੇਨ ਵਸਿਤਬ੍ਬਂ. ਚਙ੍ਕਮਨ੍ਤਸ੍ਸ ਯਦਾ ਆਲ਼ਹਨਂ ਅਭਿਮੁਖਂ ਨ ਹੋਤਿ, ਤਦਾਪਿ ਸਂਵੇਗਜਨਨਤ੍ਥਂ ਤਤ੍ਥ ਦਿਟ੍ਠਿ ਵਿਸ੍ਸਜ੍ਜੇਤਬ੍ਬਾਤਿ ਦਸ੍ਸੇਤੁਂ ‘‘ਅਦ੍ਧਕ੍ਖਿਕੇਨ ਆਲ਼ਹਨਂ ਓਲੋਕੇਨ੍ਤੇਨਾ’’ਤਿ ਵੁਤ੍ਤਂ.
ਉਪ੍ਪਥਮਗ੍ਗੇਨ ਗਨ੍ਤਬ੍ਬਂ ਅਤ੍ਤਨੋ ਸੋਸਾਨਿਕਭਾਵਸ੍ਸ ਅਪਾਕਟਭਾਵਤ੍ਥਂ. ਆਰਮ੍ਮਣਨ੍ਤਿ ਤਸ੍ਮਿਂ ਸੁਸਾਨੇ ‘‘ਅਯਂ ਵਮ੍ਮਿਕੋ, ਅਯਂ ਰੁਕ੍ਖੋ, ਅਯਂ ਖਾਣੁਕੋ’’ਤਿਆਦਿਨਾ ਦਿਵਾਯੇਵ ਆਰਮ੍ਮਣਂ ਵਵਤ੍ਥਪੇਤਬ੍ਬਂ. ਭਯਾਨਕਨ੍ਤਿ ਭਯਜਨਕਂ ਵਮ੍ਮਿਕਾਦਿਂ. ਕੇਨਚਿ ਲੇਡ੍ਡੁਪਾਸਾਣਾਦਿਨਾ ਆਸਨ੍ਨੇ ਵਿਚਰਨ੍ਤੀਤਿ ਨ ਪਹਰਿਤਬ੍ਬਾ. ਤਿਲਪਿਟ੍ਠਂ ਵੁਚ੍ਚਤਿ ਪਲਲਂ. ਮਾਸਮਿਸ੍ਸਂ ਭਤ੍ਤਂ ਮਾਸਭਤ੍ਤਂ. ਗੁਲ਼ਾਦੀਤਿ ਆਦਿ-ਸਦ੍ਦੇਨ ਤਿਲਸਂਗੁਲ਼ਿਕਾਦਿਘਨਪੂਵਞ੍ਚ ਸਙ੍ਗਣ੍ਹਾਤਿ. ਕੁਲਗੇਹਂ ਨ ਪਵਿਸਿਤਬ੍ਬਨ੍ਤਿ ਪੇਤਧੂਮੇਨ ਵਾਸਿਤਤ੍ਤਾ, ਪਿਸਾਚਾਨੁਬਨ੍ਧਤ੍ਤਾ ਚ ਕੁਲਗੇਹਸ੍ਸ ਅਬ੍ਭਨ੍ਤਰਂ ਨ ਪਵਿਸਿਤਬ੍ਬਂ. ਦੇਵਸਿਕਂ ਛਵਡਾਹੋ ਧੁਵਡਾਹੋ. ਮਤਞਾਤਕਾਨਂ ਤਤ੍ਥ ਗਨ੍ਤ੍ਵਾ ਦੇਵਸਿਕਂ ਰੋਦਨਂ ਧੁਵਰੋਦਨਂ. ਵੁਤ੍ਤਨਯੇਨਾਤਿ ‘‘ਝਾਪਿਤਕਾਲਤੋ ਪਨ ਪਟ੍ਠਾਯਾ’’ਤਿ ਵੁਤ੍ਤਨਯੇਨ. ‘‘ਪਚ੍ਛਿਮਯਾਮੇ ਪਟਿਕ੍ਕਮਿਤੁਂ ਵਟ੍ਟਤੀ’’ਤਿ ਇਚ੍ਛਿਤਤ੍ਤਾ ‘‘ਸੁਸਾਨਂ ਅਗਤਦਿਵਸੇ’’ਤਿ ਅਙ੍ਗੁਤ੍ਤਰਭਾਣਕਾ.
ਸੁਸਾਨੇ ਨਿਚ੍ਚਕਾਲਂ ਸਿਵਥਿਕਦਸ੍ਸਨੇਨ ਮਰਣਸ੍ਸਤਿਪਟਿਲਾਭੋ. ਤਤੋ ਏਵ ਅਪ੍ਪਮਾਦਵਿਹਾਰਿਤਾ. ਤਤ੍ਥ ਛਡ੍ਡਿਤਸ੍ਸ ਮਤਕਲ਼ੇਵਰਸ੍ਸ ਦਸ੍ਸਨੇਨ ਅਸੁਭਨਿਮਿਤ੍ਤਾਧਿਗਮੋ. ਤਤੋ ਏਵ ਕਾਮਰਾਗਵਿਨੋਦਨਂ. ਬਹੁਲਂ ਸਰੀਰਸ੍ਸ ਅਸੁਚਿਦੁਗ੍ਗਨ੍ਧਜੇਗੁਚ੍ਛਭਾਵਸਲ੍ਲਕ੍ਖਣਤੋ ਅਭਿਣ੍ਹਂ ਕਾਯਸਭਾਵਦਸ੍ਸਨਂ. ਤਤੋ ਮਰਣਸ੍ਸਤਿਪਟਿਲਾਭਤੋ ਚ ਸਂਵੇਗਬਹੁਲਤਾ. ਬ੍ਯਾਧਿਕਾਨਂ, ਜਰਾਜਿਣ੍ਣਾਨਞ੍ਚ ਮਤਾਨਂ ਤਤ੍ਥ ਦਸ੍ਸਨੇਨ ਆਰੋਗ੍ਯਯੋਬ੍ਬਨਜੀਵਿਤਮਦਪ੍ਪਹਾਨਂ. ਖੁਦ੍ਦਕਸ੍ਸ, ਮਹਤੋ ਚ ਭਯਸ੍ਸ ਅਭਿਭਵਨਤੋ ਭਯਭੇਰਵਸਹਨਤਾ. ਸਂਵਿਗ੍ਗਸ੍ਸ ਯੋਨਿਸੋ ਪਦਹਨਂ ਸਮ੍ਭਵਤੀਤਿ ਅਮਨੁਸ੍ਸਾਨਂ ਗਰੁਭਾਵਨੀਯਤਾ. ਨਿਦ੍ਦਾਗਤਮ੍ਪੀਤਿ ਸੁਤ੍ਤਮ੍ਪਿ, ਸੁਪਿਨਨ੍ਤੇਪੀਤਿ ਅਧਿਪ੍ਪਾਯੋ.
ਇਤਿ ਸੋਸਾਨਿਕਙ੍ਗਕਥਾਵਣ੍ਣਨਾ.
੧੨. ਯਥਾਸਨ੍ਥਤਿਕਙ੍ਗਕਥਾਵਣ੍ਣਨਾ
੩੫. ਸੇਨਾਸਨਗਾਹਣੇ ਪਰੇ ਉਟ੍ਠਾਪੇਤ੍ਵਾ ਗਹਣਂ, ‘‘ਇਦਂ ਸੁਨ੍ਦਰਂ, ਇਦਂ ਨ ਸੁਨ੍ਦਰ’’ਨ੍ਤਿ ਪਰਿਤੁਲਯਿਤ੍ਵਾ ਪੁਚ੍ਛਨਾ, ਓਲੋਕਨਾ ਚ ਸੇਨਾਸਨਲੋਲੁਪ੍ਪਂ. ਤੁਟ੍ਠਬ੍ਬਨ੍ਤਿ ਤੁਸ੍ਸਿਤਬ੍ਬਂ. ਵਿਹਾਰਸ੍ਸ ਪਰਿਯਨ੍ਤਭਾਵੇਨ ਦੂਰੇਤਿ ਵਾ ਬਹੂਨਂ ਸਨ੍ਨਿਪਾਤਟ੍ਠਾਨਾਦੀਨਂ ਅਚ੍ਚਾਸਨ੍ਨੇਤਿ ਵਾ ਪੁਚ੍ਛਿਤੁਂ ਨ ਲਭਤਿ, ਪੁਚ੍ਛਨੇਨਪਿਸ੍ਸ ਧੁਤਙ੍ਗਸ੍ਸ ਸਂਕਿਲਿਸ੍ਸਨਤੋ. ਓਲੋਕੇਤੁਨ੍ਤਿ ਲੋਲੁਪ੍ਪਵਸੇਨ ਪਸ੍ਸਿਤੁਂ. ਸਚਸ੍ਸ ਤਂ ਨ ਰੁਚ੍ਚਤੀਤਿ ਅਸ੍ਸ ਯਥਾਸਨ੍ਥਤਿਕਸ੍ਸ ਤਂ ਯਥਾਗਾਹਿਤਂ ਸੇਨਾਸਨਂ ਅਫਾਸੁਕਭਾਵੇਨ ਸਚੇ ਨ ਰੁਚ੍ਚਤਿ, ਮੁਦੁਕਸ੍ਸ ਅਸਤਿ ਰੋਗੇ ਯਥਾਗਾਹਿਤਂ ਪਹਾਯ ਅਞ੍ਞਸ੍ਸ ਸੇਨਾਸਨਸ੍ਸ ਗਹਣਂ ਲੋਲੁਪ੍ਪਂ, ਮਜ੍ਝਿਮਸ੍ਸ ਗਨ੍ਤ੍ਵਾ ਓਲੋਕਨਾ, ਉਕ੍ਕਟ੍ਠਸ੍ਸ ਪੁਚ੍ਛਨਾ. ਸਬ੍ਬੇਸਮ੍ਪਿ ਉਟ੍ਠਾਪੇਤ੍ਵਾ ਗਹਣੇ ਵਤ੍ਤਬ੍ਬਮੇਵ ਨਤ੍ਥਿ.
ਉਪਟ੍ਠਾਪਨੀਯਾਨਮ੍ਪਿ ਅਨੁਟ੍ਠਾਪਨੇਨ ਸਬ੍ਰਹ੍ਮਚਾਰੀਨਂ ਹਿਤੇਸਿਤਾ. ਤਾਯ ਕਰੁਣਾਵਿਹਾਰਾਨੁਗੁਣਤਾ. ਸੁਨ੍ਦਰਾਸੁਨ੍ਦਰਵਿਭਾਗਾਕਰਣਤੋ ਹੀਨਪਣੀਤਵਿਕਪ੍ਪਪਰਿਚ੍ਚਾਗੋ. ਤੇਨ ਤਾਦਿਲਕ੍ਖਣਾਨੁਗੁਣਤਾ. ਤਤੋ ਏਵ ਅਨੁਰੋਧਵਿਰੋਧਪ੍ਪਹਾਨਂ. ਦ੍ਵਾਰਪਿਦਹਨਂ ਓਕਾਸਾਦਾਨਤੋ. ਯਥਾਸਨ੍ਥਤਰਾਮਤਨ੍ਤਿ ਯਥਾਗਾਹਿਤੇ ਯਥਾਨਿਦ੍ਦਿਟ੍ਠੇ ਸੇਨਾਸਨੇ ਅਭਿਰਤਭਾਵਂ.
ਇਤਿ ਯਥਾਸਨ੍ਥਤਿਕਙ੍ਗਕਥਾਵਣ੍ਣਨਾ.
੧੩. ਨੇਸਜ੍ਜਿਕਙ੍ਗਕਥਾਵਣ੍ਣਨਾ
੩੬. ਸੇਯ੍ਯਨ੍ਤਿ ਇਰਿਯਾਪਥਲਕ੍ਖਣਂ ਸੇਯ੍ਯਂ. ਤਪ੍ਪਟਿਕ੍ਖੇਪੇਨੇਵ ਹਿ ਤਦਤ੍ਥਾ ‘‘ਮਞ੍ਚੋ ਭਿਸੀ’’ਤਿ ਏਵਮਾਦਿਕਾ (ਚੂਲ਼ਵ. ੩੨੧, ੩੨੨) ਸੇਯ੍ਯਾ ਪਟਿਕ੍ਖਿਤ੍ਤਾ ਏਵ ਹੋਨ੍ਤਿ. ‘‘ਨੇਸਜ੍ਜਿਕੋ’’ਤਿ ਚ ਸਯਨਂ ਪਟਿਕ੍ਖਿਪਿਤ੍ਵਾ ਨਿਸਜ੍ਜਾਯ ਏਵ ਵਿਹਰਿਤੁਂ ਸੀਲਮਸ੍ਸਾਤਿ ਇਮਸ੍ਸ ਅਤ੍ਥਸ੍ਸ ਇਧ ਅਧਿਪ੍ਪੇਤਤ੍ਤਾ ਸੇਯ੍ਯਾ ਏਵੇਤ੍ਥ ਪਟਿਯੋਗਿਨੀ, ਨ ਇਤਰੇ ਤਥਾ ਅਨਿਟ੍ਠਤ੍ਤਾ, ਅਸਮ੍ਭਵਤੋ ਚ. ਕੋਸਜ੍ਜਪਕ੍ਖਿਯੋ ਹਿ ਇਰਿਯਾਪਥੋ ਇਧ ਪਟਿਯੋਗਿਭਾਵੇਨ ਇਚ੍ਛਿਤੋ, ਨ ਇਤਰੇ. ਨ ਚ ਸਕ੍ਕਾ ਠਾਨਗਮਨੇਹਿ ਵਿਨਾ ਨਿਸਜ੍ਜਾਯ ਏਵ ਯਾਪੇਤੁਂ ਤਥਾ ਪਵਤ੍ਤੇਤੁਨ੍ਤਿ ਸੇਯ੍ਯਾਵੇਤ੍ਥ ਪਟਿਯੋਗਿਨੀ. ਤੇਨਾਹ ‘‘ਤੇਨ ਪਨਾ’’ਤਿਆਦਿ. ਚਙ੍ਕਮਿਤਬ੍ਬਂ ਨ ‘‘ਨੇਸਜ੍ਜਿਕੋ ਅਹ’’ਨ੍ਤਿ ਸਬ੍ਬਰਤ੍ਤਿਂ ਨਿਸੀਦਿਤਬ੍ਬਂ. ਇਰਿਯਾਪਥਨ੍ਤਰਾਨੁਗ੍ਗਹਿਤੋ ਹਿ ਕਾਯੋ ਮਨਸਿਕਾਰਕ੍ਖਮੋ ਹੋਤਿ.
ਚਤ੍ਤਾਰੋ ਪਾਦਾ, ਪਿਟ੍ਠਿਅਪਸ੍ਸਯੋ ਚਾਤਿ ਇਮੇਹਿ ਪਞ੍ਚਹਿ ਅਙ੍ਗੇਹਿ ਪਞ੍ਚਙ੍ਗੋ. ਚਤੂਹਿ ਅਟ੍ਟਨੀਹਿ, ਪਿਟ੍ਠਿਅਪਸ੍ਸਯੇਨ ਚ ਪਞ੍ਚਙ੍ਗੋਤਿ ਅਪਰੇ. ਉਭੋਸੁ ਪਸ੍ਸੇਸੁ ਪਿਟ੍ਠਿਪਸ੍ਸੇ ਚ ਯਥਾਸੁਖਂ ਅਪਸ੍ਸਾਯ ਵਿਹਰਤੋ ਨੇਸਜ੍ਜਿਕਸ੍ਸ ‘‘ਅਨੇਸਜ੍ਜਿਕਤੋ ਕੋ ਵਿਸੇਸੋ’’ਤਿ ਗਾਹਂ ਨਿਵਾਰੇਤੁਂ ਅਭਯਤ੍ਥੇਰੋ ਨਿਦਸ੍ਸਿਤੋ ‘‘ਥੇਰੋ ਅਨਾਗਾਮੀ ਹੁਤ੍ਵਾ ਪਰਿਨਿਬ੍ਬਾਯੀ’’ਤਿ.
ਉਪਚ੍ਛੇਦੀਯਤਿ ਏਤੇਨਾਤਿ ਉਪਚ੍ਛੇਦਨਨ੍ਤਿ ਵਿਨਿਬਨ੍ਧੁਪਚ੍ਛੇਦਸ੍ਸ ਸਾਧਕਤਮਭਾਵੋ ਦਟ੍ਠਬ੍ਬੋ. ਸਬ੍ਬਕਮ੍ਮਟ੍ਠਾਨਾਨੁਯੋਗਸਪ੍ਪਾਯਤਾ ਅਲੀਨਾਨੁਦ੍ਧਚ੍ਚਪਕ੍ਖਿਕਤ੍ਤਾ ਨਿਸਜ੍ਜਾਯ. ਤਤੋ ਏਵ ਪਾਸਾਦਿਕਇਰਿਯਾਪਥਤਾ. ਵੀਰਿਯਾਰਮ੍ਭਾਨੁਕੂਲਤਾ ਵੀਰਿਯਸਮਤਾਯੋਜਨਸ੍ਸ ਅਨੁਚ੍ਛਵਿਕਤਾ. ਤਤੋ ਏਵ ਸਮ੍ਮਾਪਟਿਪਤ੍ਤਿਯਾ ਅਨੁਬ੍ਰੂਹਨਤਾ. ਪਣਿਧਾਯਾਤਿ ਠਪੇਤ੍ਵਾ. ਤਨੁਨ੍ਤਿ ਉਪਰਿਮਕਾਯਂ. ਵਿਕਮ੍ਪੇਤੀਤਿ ਚਾਲੇਤਿ, ਇਚ੍ਛਾਵਿਘਾਤਂ ਕਰੋਤੀਤਿ ਅਧਿਪ੍ਪਾਯੋ. ਵਤਨ੍ਤਿ ਧੁਤਙ੍ਗਂ.
ਇਤਿ ਨੇਸਜ੍ਜਿਕਙ੍ਗਕਥਾਵਣ੍ਣਨਾ.
ਧੁਤਙ੍ਗਪਕਿਣ੍ਣਕਕਥਾਵਣ੍ਣਨਾ
੩੭. ਸੇਕ੍ਖਪੁਥੁਜ੍ਜਨਾਨਂ ਵਸੇਨ ਸਿਯਾ ਕੁਸਲਾਨਿ, ਖੀਣਾਸਵਾਨਂ ਵਸੇਨ ਸਿਯਾ ਅਬ੍ਯਾਕਤਾਨਿ. ਤਤ੍ਥ ਸੇਕ੍ਖਪੁਥੁਜ੍ਜਨਾ ਪਟਿਪਤ੍ਤਿਪੂਰਣਤ੍ਥਂ, ਖੀਣਾਸਵਾ ਫਾਸੁਵਿਹਾਰਤ੍ਥਂ ਧੁਤਙ੍ਗਾਨਿ ਪਰਿਹਰਨ੍ਤਿ. ਅਕੁਸਲਮ੍ਪਿ ਧੁਤਙ੍ਗਨ੍ਤਿ ਅਕੁਸਲਚਿਤ੍ਤੇਨਾਪਿ ਧੁਤਙ੍ਗਸੇਵਨਾ ਅਤ੍ਥੀਤਿ ਅਧਿਪ੍ਪਾਯੋ. ਤਂ ਨ ਯੁਤ੍ਤਂ, ਯੇਨ ਅਕੁਸਲਚਿਤ੍ਤੇਨ ਪਬ੍ਬਜਿਤਸ੍ਸ ਆਰਞ੍ਞਿਕਤ੍ਤਂ, ਤਂ ਧੁਤਙ੍ਗਂ ਨਾਮ ਨ ਹੋਤਿ. ਕਸ੍ਮਾ? ਲਕ੍ਖਣਾਭਾਵਤੋ. ਯਂ ਹਿਦਂ ਕਿਲੇਸਾਨਂ ਧੁਨਨਤੋ ਧੁਤਸ੍ਸ ਪੁਗ੍ਗਲਸ੍ਸ, ਞਾਣਸ੍ਸ, ਚੇਤਨਾਯ ਵਾ ਅਙ੍ਗਤ੍ਤਂ, ਨ ਤਂ ਅਕੁਸਲਧਮ੍ਮੇਸੁ ਸਮ੍ਭਵਤਿ. ਤਸ੍ਮਾ ਅਰਞ੍ਞਵਾਸਾਦਿਮਤ੍ਤੇਨ ਆਰਞ੍ਞਿਕਾਦਯੋ ਤਾਵ ਹੋਨ੍ਤੁ, ਆਰਞ੍ਞਿਕਙ੍ਗਾਦੀਨਿ ਪਨ ਨ ਹੋਨ੍ਤੀਤਿ ਇਮਮਤ੍ਥਂ ਦਸ੍ਸੇਤੁਂ ‘‘ਨ ਮਯ’’ਨ੍ਤਿਆਦਿ ਵੁਤ੍ਤਂ. ਤਤ੍ਥ ਇਮਾਨੀਤਿ ਧੁਤਙ੍ਗਾਨਿ. ਵੁਤ੍ਤਂ ਹੇਟ੍ਠਾ ਵਚਨਤ੍ਥਨਿਦ੍ਦੇਸੇ. ਨ ਚ ਅਕੁਸਲੇਨ ਕੋਚਿ ਧੁਤੋ ਨਾਮ ਹੋਤਿ, ਕਿਲੇਸਾਨਂ ਧੁਨਨਟ੍ਠੇਨਾਤਿ ਅਧਿਪ੍ਪਾਯੋ. ਯਸ੍ਸ ਭਿਕ੍ਖੁਨੋ ਏਤਾਨਿ ਸਮਾਦਾਨਾਨਿ ਅਙ੍ਗਾਨਿ, ਏਤੇਨ ਪਠਮੇਨਾਪਿ ਅਤ੍ਥਵਿਕਪ੍ਪੇਨ ‘‘ਨਤ੍ਥਿ ਅਕੁਸਲਂ ਧੁਤਙ੍ਗ’’ਨ੍ਤਿ ਦਸ੍ਸੇਤਿ. ਨ ਚ ਅਕੁਸਲਂ ਕਿਞ੍ਚਿ ਧੁਨਾਤੀਤਿ ਅਕੁਸਲਂ ਕਿਞ੍ਚਿ ਪਾਪਂ ਨ ਚ ਧੁਨਾਤਿ ਏਵ ਅਪ੍ਪਟਿਪਕ੍ਖਤੋ. ਯੇਸਂ ਸਮਾਦਾਨਾਨਂ ਤਂ ਅਕੁਸਲਂ ਞਾਣਂ ਵਿਯ ਅਙ੍ਗਨ੍ਤਿ ਕਤ੍ਵਾ ਤਾਨਿ ਧੁਤਙ੍ਗਾਨੀਤਿ ਵੁਚ੍ਚੇਯ੍ਯੁਂ. ਇਮਿਨਾ ਦੁਤਿਯੇਨਾਪਿ ਅਤ੍ਥਵਿਕਪ੍ਪੇਨ ‘‘ਨਤ੍ਥਿ ਅਕੁਸਲਂ ਧੁਤਙ੍ਗ’’ਨ੍ਤਿ ਦਸ੍ਸੇਤਿ. ਨਾਪਿ ਅਕੁਸਲਨ੍ਤਿਆਦਿ ਤਤਿਯਅਤ੍ਥਵਿਕਪ੍ਪਵਸੇਨ ਯੋਜਨਾ. ਤਸ੍ਮਾਤਿਆਦਿ ਵੁਤ੍ਤਸ੍ਸੇਵਤ੍ਥਸ੍ਸ ਨਿਗਮਨਂ.
ਯੇਸਨ੍ਤਿ ਅਭਯਗਿਰਿਵਾਸਿਕੇ ਸਨ੍ਧਾਯਾਹ. ਤੇ ਹਿ ਧੁਤਙ੍ਗਂ ਨਾਮ ਪਞ੍ਞਤ੍ਤੀਤਿ ਵਦਨ੍ਤਿ. ਤਥਾ ਸਤਿ ਤਸ੍ਸ ਪਰਮਤ੍ਥਤੋ ਅਵਿਜ੍ਜਮਾਨਤ੍ਤਾ ਕਿਲੇਸਾਨਂ ਧੁਨਨਟ੍ਠੋਪਿ ਨ ਸਿਯਾ, ਸਮਾਦਾਤਬ੍ਬਤਾ ਚਾਤਿ ਤੇਸਂ ਵਚਨਂ ਪਾਲ਼ਿਯਾ ਵਿਰੁਜ੍ਝਤੀਤਿ ਦਸ੍ਸੇਤੁਂ ‘‘ਕੁਸਲਤ੍ਤਿਕਵਿਨਿਮੁਤ੍ਤ’’ਨ੍ਤਿਆਦਿ ਵੁਤ੍ਤਂ. ਤਸ੍ਮਾਤਿ ਯਸ੍ਮਾ ਪਞ੍ਞਤ੍ਤਿਪਕ੍ਖੇ ਏਤੇ ਦੋਸਾ ਦੁਨ੍ਨਿਵਾਰਾ, ਤਸ੍ਮਾ ਤਂ ਤੇਸਂ ਵਚਨਂ ਨ ਗਹੇਤਬ੍ਬਂ, ਵੁਤ੍ਤਨਯੋ ਚੇਤਨਾਪਕ੍ਖੋਯੇਵ ਗਹੇਤਬ੍ਬੋਤਿ ਅਤ੍ਥੋ. ਯਸ੍ਮਾ ਏਤੇ ਧੁਤਗੁਣਾ ਕੁਸਲਤ੍ਤਿਕੇ ਪਠਮਤਤਿਯਪਦਸਙ੍ਗਹਿਤਾ, ਤਸ੍ਮਾ ਸਿਯਾ ਸੁਖਾਯ ਵੇਦਨਾਯ ਸਮ੍ਪਯੁਤ੍ਤਾ, ਸਿਯਾ ਅਦੁਕ੍ਖਮਸੁਖਾਯ ਵੇਦਨਾਯ ਸਮ੍ਪਯੁਤ੍ਤਾ, ਸਿਯਾ ਵਿਪਾਕਧਮ੍ਮਧਮ੍ਮਾ, ਸਿਯਾ ਨੇਵਵਿਪਾਕਨਵਿਪਾਕਧਮ੍ਮਧਮ੍ਮਾ, ਸਿਯਾ ਅਨੁਪਾਦਿਨ੍ਨੁਪਾਦਾਨਿਯਾ, ਸਿਯਾ ਅਸਂਕਿਲਿਟ੍ਠਸਂਕਿਲੇਸਿਕਾਤਿ ਏਵਂ ਸੇਸਤਿਕਦੁਕਪਦੇਹਿਪਿ ਨੇਸਂ ਯਥਾਰਹਂ ਸਙ੍ਗਹੋ ਵਿਭਾਵੇਤਬ੍ਬੋ.
ਕਾਮਂ ਸਬ੍ਬੋਪਿ ਅਰਹਾ ਧੁਤਕਿਲੇਸੋ, ਇਧ ਪਨ ਧੁਤਙ੍ਗਸੇਵਨਾਮੁਖੇਨ ਕਿਲੇਸੇ ਵਿਧੁਨਿਤ੍ਵਾ ਠਿਤੋ ਖੀਣਾਸਵੋ ‘‘ਧੁਤਕਿਲੇਸੋ ਪੁਗ੍ਗਲੋ’’ਤਿ ਅਧਿਪ੍ਪੇਤੋ. ਤਥਾ ਸਬ੍ਬੋਪਿ ਅਰਿਯਮਗ੍ਗੋ ਨਿਪ੍ਪਰਿਯਾਯੇਨ ਕਿਲੇਸਧੁਨਨੋ ਧਮ੍ਮੋ, ਵਿਸੇਸਤੋ ਅਗ੍ਗਮਗ੍ਗੋ. ਪਰਿਯਾਯੇਨ ਪਨ ਵਿਪਸ੍ਸਨਾਞਾਣਾਦਿ. ਹੇਟ੍ਠਿਮਪਰਿਚ੍ਛੇਦੇਨ ਧੁਤਙ੍ਗਚੇਤਨਾਸਮ੍ਪਯੁਤ੍ਤਞਾਣਂ ਦਟ੍ਠਬ੍ਬਂ. ਏਵਂ ਧੁਤਂ ਦਸ੍ਸੇਤ੍ਵਾ ਧੁਤਵਾਦੇ ਦਸ੍ਸੇਤਬ੍ਬੇ ਯਸ੍ਮਾ ਧੁਤਵਾਦਭੇਦੇਨ ਧੁਤੋ ਵਿਯ ਧੁਤਭੇਦੇਨ ਧੁਤਵਾਦੋਪਿ ਦੁਵਿਧੋ, ਤਸ੍ਮਾ ਤੇਸਂ, ਤਦੁਭਯਪਟਿਕ੍ਖੇਪਸ੍ਸ ਚ ਵਸੇਨ ਚਤੁਕ੍ਕਮੇਤ੍ਥ ਸਮ੍ਭਵਤੀਤਿ ਤਂ ਦਸ੍ਸੇਤੁਂ ‘‘ਅਤ੍ਥਿ ਧੁਤੋ’’ਤਿਆਦਿ ਵੁਤ੍ਤਂ.
ਤਯਿਦਨ੍ਤਿ ਨਿਪਾਤੋ, ਤਸ੍ਸ ‘‘ਸੋ ਅਯ’’ਨ੍ਤਿ ਅਤ੍ਥੋ. ਧੁਤਧਮ੍ਮਾ ਨਾਮਾਤਿ ਧੁਤਙ੍ਗਸੇਵਨਾਯ ਪਟਿਪਕ੍ਖਭੂਤਾਨਂ ਪਾਪਧਮ੍ਮਾਨਂ ਧੁਨਨਵਸੇਨ ਪਵਤ੍ਤਿਯਾ ‘‘ਧੁਤੋ’’ਤਿ ਲਦ੍ਧਨਾਮਾਯ ਧੁਤਙ੍ਗਚੇਤਨਾਯ ਉਪਕਾਰਕਾ ਧਮ੍ਮਾਤਿ ਕਤ੍ਵਾ ਧੁਤਧਮ੍ਮਾ ਨਾਮ. ਅਸਮ੍ਪਤ੍ਤਸਮ੍ਪਤ੍ਤੇਸੁ ਪਚ੍ਚਯੇਸੁ ਅਲੁਬ੍ਭਨਾਕਾਰੇਨ ਪਵਤ੍ਤਨਤੋ ਅਪ੍ਪਿਚ੍ਛਤਾ ਸਨ੍ਤੁਟ੍ਠਿਤਾ ਚ ਅਤ੍ਥਤੋ ਅਲੋਭੋ. ਪਚ੍ਚਯਗੇਧਾਦਿਹੇਤੁਕਾਨਂ ਲੋਲਤਾਦੀਨਂ ਸਂਕਿਲੇਸਾਨਂ ਸਮ੍ਮਦੇਵ ਲਿਖਨਤੋ ਛੇਦਨਤੋ ਗਣਸਙ੍ਗਣਿਕਾਦਿਭੇਦਤੋ ਸਂਸਗ੍ਗਤੋ ਚਿਤ੍ਤਸ੍ਸ ਵਿਵੇਚਨਤੋ ਸਲ੍ਲੇਖਤਾ ਪਵਿਵੇਕਤਾ ਚ ਅਲੋਭੋ ਅਮੋਹੋਤਿ ਇਮੇਸੁ ਦ੍ਵੀਸੁ ਧਮ੍ਮੇਸੁ ਅਨੁਪਤਨ੍ਤਿ ਤਦਨ੍ਤੋਗਧਾ ਤਪ੍ਪਰਿਯਾਪਨ੍ਨਾ ਹੋਨ੍ਤਿ, ਤਦੁਭਯਸ੍ਸੇਵ ਪਵਤ੍ਤਿਵਿਸੇਸਭਾਵਤੋ. ਇਮੇਹਿ ਕੁਸਲਧਮ੍ਮੇਹਿ ਅਤ੍ਥੀ ਇਦਮਤ੍ਥੀ, ਯੇਨ ਞਾਣੇਨ ਪਬ੍ਬਜਿਤੇਨ ਨਾਮ ਪਂਸੁਕੂਲਿਕਙ੍ਗਾਦੀਸੁ ਪਤਿਟ੍ਠਿਤੇਨ ਭਵਿਤਬ੍ਬਨ੍ਤਿ ਯਥਾਨੁਸਿਟ੍ਠਂ ਧੁਤਗੁਣੇ ਸਮਾਦਿਯਤਿ ਚੇਵ ਪਰਿਹਰਤਿ ਚ, ਤਂ ਞਾਣਂ ਇਦਮਤ੍ਥਿਤਾ. ਤੇਨਾਹ ‘‘ਇਦਮਤ੍ਥਿਤਾ ਞਾਣਮੇਵਾ’’ਤਿ. ਪਟਿਕ੍ਖੇਪਵਤ੍ਥੂਸੂਤਿ ਗਹਪਤਿਚੀਵਰਾਦੀਸੁ ਤੇਹਿ ਤੇਹਿ ਧੁਤਙ੍ਗੇਹਿ ਪਟਿਕ੍ਖਿਪਿਤਬ੍ਬਵਤ੍ਥੂਸੁ. ਲੋਭਨ੍ਤਿ ਤਣ੍ਹਂ. ਤੇਸ੍ਵੇਵ ਵਾਤਿ ਪਟਿਕ੍ਖੇਪਵਤ੍ਥੂਸੁ ਏਵ. ਆਦੀਨਵਪਟਿਚ੍ਛਾਦਕਨ੍ਤਿ ਆਰਕ੍ਖਦੁਕ੍ਖਪਰਾਧੀਨਵੁਤ੍ਤਿਚੋਰਭਯਾਦਿਆਦੀਨਵਪਟਿਚ੍ਛਾਦਕਂ. ਅਨੁਞ੍ਞਾਤਾਨਨ੍ਤਿ ਸਤ੍ਥਾਰਾ ਨਿਚ੍ਛਨ੍ਦਰਾਗਪਰਿਭੋਗਵਸੇਨ ਅਨੁਞ੍ਞਾਤਾਨਂ ਸੁਖਸਮ੍ਫਸ੍ਸਅਤ੍ਥਰਣਪਾਵੁਰਣਾਦੀਨਂ. ਪਟਿਸੇਵਨਮੁਖੇਨਾਤਿ ਪਟਿਸੇਵਨਦ੍ਵਾਰੇਨ, ਤੇਨ ਲੇਸੇਨਾਤਿ ਅਤ੍ਥੋ. ਅਤਿਸਲ੍ਲੇਖਮੁਖੇਨਾਤਿ ਅਤਿਵਿਯ ਸਲ੍ਲੇਖਪਟਿਪਤ੍ਤਿਮੁਖੇਨ, ਉਕ੍ਕਟ੍ਠਸ੍ਸ ਵਤ੍ਤਨਕਾਨਮ੍ਪਿ ਪਟਿਕ੍ਖਿਪਨਵਸੇਨਾਤਿ ਅਤ੍ਥੋ.
ਸੁਖੁਮਕਰਣਸਨ੍ਨਿਸ੍ਸਯੋ ਰਾਗੋ ਦੁਕ੍ਖਾਯ ਪਟਿਪਤ੍ਤਿਯਾ ਪਤਿਟ੍ਠਂ ਨ ਲਭਤੀਤਿ ਆਹ ‘‘ਦੁਕ੍ਖਾਪਟਿਪਦਞ੍ਚ ਨਿਸ੍ਸਾਯ ਰਾਗੋ ਵੂਪਸਮ੍ਮਤੀ’’ਤਿ. ਸਲ੍ਲੇਖੋ ਨਾਮ ਸਮ੍ਪਜਾਨਸ੍ਸ ਹੋਤਿ, ਸਤਿਸਮ੍ਪਜਞ੍ਞੇ ਮੋਹੋ ਅਪਤਿਟ੍ਠੋਵ ਅਪ੍ਪਮਾਦਸਮ੍ਭਵਤੋਤਿ ਵੁਤ੍ਤਂ ‘‘ਸਲ੍ਲੇਖਂ ਨਿਸ੍ਸਾਯ ਅਪ੍ਪਮਤ੍ਤਸ੍ਸ ਮੋਹੋ ਪਹੀਯਤੀ’’ਤਿ. ਏਤ੍ਥਾਤਿ ਏਤੇਸੁ ਧੁਤਙ੍ਗੇਸੁ. ਤਤ੍ਥਾਤਿ ਅਰਞ੍ਞਰੁਕ੍ਖਮੂਲੇਸੁ.
ਸੀਸਙ੍ਗਾਨੀਤਿ ਸੀਸਭੂਤਾਨਿ ਅਙ੍ਗਾਨਿ, ਪਰੇਸਮ੍ਪਿ ਕੇਸਞ੍ਚਿ ਨਾਨਨ੍ਤਰਿਕਤਾਯ, ਸੁਕਰਤਾਯ ਚ ਸਙ੍ਗਣ੍ਹਨਤੋ ਉਤ੍ਤਮਙ੍ਗਾਨੀਤਿ ਅਤ੍ਥੋ. ਅਸਮ੍ਭਿਨ੍ਨਙ੍ਗਾਨੀਤਿ ਕੇਹਿਚਿ ਸਮ੍ਭੇਦਰਹਿਤਾਨਿ, ਵਿਸੁਂਯੇਵ ਅਙ੍ਗਾਨੀਤਿ ਵੁਤ੍ਤਂ ਹੋਤਿ. ਕਮ੍ਮਟ੍ਠਾਨਂ ਵਡ੍ਢਤਿ ਰਾਗਚਰਿਤਸ੍ਸ ਮੋਹਚਰਿਤਸ੍ਸ ਦੋਸਚਰਿਤਸ੍ਸਾਪਿ, ਤਂ ਏਕਚ੍ਚਂ ਧੁਤਙ੍ਗਂ ਸੇਵਨ੍ਤਸ੍ਸਾਤਿ ਅਧਿਪ੍ਪਾਯੋ. ਹਾਯਤਿ ਕਮ੍ਮਟ੍ਠਾਨਂ ਸੁਕੁਮਾਰਭਾਵੇਨਲੂਖਪਟਿਪਤ੍ਤਿਂ ਅਸਹਨ੍ਤਸ੍ਸ. ਵਡ੍ਢਤੇਵ ਮਹਾਪੁਰਿਸਜਾਤਿਕਸ੍ਸਾਤਿ ਅਧਿਪ੍ਪਾਯੋ. ਨ ਵਡ੍ਢਤਿ ਕਮ੍ਮਟ੍ਠਾਨਂ ਉਪਨਿਸ੍ਸਯਰਹਿਤਸ੍ਸ. ਏਕਮੇਵ ਹਿ ਧੁਤਙ੍ਗਂ ਯਥਾ ਕਿਲੇਸਧੁਨਨਟ੍ਠੇਨ, ਏਵਂ ਚੇਤਨਾਸਭਾਵਤ੍ਤਾ. ਤੇਨਾਹ ‘‘ਸਮਾਦਾਨਚੇਤਨਾ’’ਤਿ.
ਤੇਰਸਾਪਿ ਧੁਤਙ੍ਗਾਨਿ ਸਮਾਦਾਯ ਪਰਿਹਰਨ੍ਤਾਨਂ ਪੁਗ੍ਗਲਾਨਂ ਵਸੇਨ ‘‘ਦ੍ਵਾਚਤ੍ਤਾਲੀਸ ਹੋਨ੍ਤੀ’’ਤਿ ਵਤ੍ਵਾ ਭਿਕ੍ਖੂਨਂ ਤੇਰਸਨ੍ਨਮ੍ਪਿ ਪਰਿਹਰਣਸ੍ਸ ਏਕਜ੍ਝਂਯੇਵ ਸਮ੍ਭਵਂ ਦਸ੍ਸੇਤੁਂ ‘‘ਸਚੇ ਹੀ’’ਤਿਆਦਿ ਵੁਤ੍ਤਂ. ਤਤ੍ਥ ‘‘ਏਕਪ੍ਪਹਾਰੇਨ ਸਬ੍ਬਧੁਤਙ੍ਗਾਨਿ ਪਰਿਭੁਞ੍ਜਿਤੁਂ ਸਕ੍ਕੋਤੀ’’ਤਿ ਵੁਤ੍ਤਂ. ਕਥਂ ਅਬ੍ਭੋਕਾਸੇ ਵਿਹਰਨ੍ਤਸ੍ਸ ਰੁਕ੍ਖਮੂਲਿਕਙ੍ਗਂ? ‘‘ਛਨ੍ਨਂ ਪਟਿਕ੍ਖਿਪਾਮਿ, ਰੁਕ੍ਖਮੂਲਿਕਙ੍ਗਂ ਸਮਾਦਿਯਾਮੀ’’ਤਿ (ਵਿਸੁਦ੍ਧਿ. ੧.੩੨) ਵਚਨਤੋ ਛਨ੍ਨੇ ਅਰੁਣਂ ਉਟ੍ਠਾਪਿਤਮਤ੍ਤੇ ਧੁਤਙ੍ਗਂ ਭਿਜ੍ਜਤਿ, ਨ ਅਬ੍ਭੋਕਾਸੇ, ਤਸ੍ਮਾ ਭੇਦਹੇਤੁਨੋ ਅਭਾਵੇਨ ਤਮ੍ਪਿ ਅਰੋਗਮੇਵ. ਤਥਾ ਸੇਨਾਸਨਲੋਲੁਪ੍ਪਸ੍ਸ ਅਭਾਵੇਨ ਯਥਾਸਨ੍ਥਤਿਕਙ੍ਗਨ੍ਤਿ ਦਟ੍ਠਬ੍ਬਂ. ਆਰਞ੍ਞਿਕਙ੍ਗਂ ਗਣਮ੍ਹਾ ਓਹੀਯਨਸਿਕ੍ਖਾਪਦੇਨ (ਪਾਚਿ. ੬੯੧-੬੯੨) ਪਟਿਕ੍ਖਿਤ੍ਤਂ, ਖਲੁਪਚ੍ਛਾਭਤ੍ਤਿਕਙ੍ਗਂ ਅਨਤਿਰਿਤ੍ਤਭੋਜਨਸਿਕ੍ਖਾਪਦੇਨ (ਪਾਚਿ. ੨੩੮-੨੪੦). ਪਵਾਰਿਤਾਯ ਹਿ ਭਿਕ੍ਖੁਨਿਯਾ ਅਤਿਰਿਤ੍ਤਂ ਕਤ੍ਵਾ ਭੁਞ੍ਜਿਤੁਂ ਨ ਲਬ੍ਭਤਿ. ਕਪ੍ਪਿਯੇ ਚ ਵਤ੍ਥੁਸ੍ਮਿਂ ਲੋਲਤਾਪਹਾਨਾਯ ਧੁਤਙ੍ਗਸਮਾਦਾਨਂ, ਨ ਅਕਪ੍ਪਿਯੇ, ਸਿਕ੍ਖਾਪਦੇਨੇਵ ਪਟਿਕ੍ਖਿਤ੍ਤਤ੍ਤਾ. ਅਟ੍ਠੇਵ ਹੋਨ੍ਤਿ ਭਿਕ੍ਖੁਨਿਯਾ ਸਂਕਚ੍ਚਿਕਚੀਵਰਾਦੀਹਿ ਸਦ੍ਧਿਂ ਪਞ੍ਚਪਿ ਤਿਚੀਵਰਸਙ੍ਖਮੇਵ ਗਚ੍ਛਨ੍ਤੀਤਿ ਕਤ੍ਵਾ. ਯਥਾਵੁਤ੍ਤੇਸੂਤਿ ਭਿਕ੍ਖੂਨਂ ਵੁਤ੍ਤੇਸੁ ਤੇਰਸਸੁ ਤਿਚੀਵਰਾਧਿਟ੍ਠਾਨਵਿਨਯਕਮ੍ਮਾਭਾਵਤੋ ਠਪੇਤ੍ਵਾ ਤੇਚੀਵਰਿਕਙ੍ਗਂ ਦ੍ਵਾਦਸ ਸਾਮਣੇਰਾਨਂ. ਸਤ੍ਤਾਤਿ ਭਿਕ੍ਖੁਨੀਨਂ ਵੁਤ੍ਤੇਸੁ ਅਟ੍ਠਸੁ ਏਕਂ ਪਹਾਯ ਸਤ੍ਤ ਤਿਚੀਵਰਾਧਿਟ੍ਠਾਨਵਿਨਯਕਮ੍ਮਾਭਾਵਤੋ. ‘‘ਠਪੇਤ੍ਵਾ ਤੇਚੀਵਰਿਕਙ੍ਗ’’ਨ੍ਤਿ ਹਿ ਇਮਂ ਅਨੁਵਤ੍ਤਮਾਨਮੇਵ ਕਤ੍ਵਾ ‘‘ਸਤ੍ਤ ਸਿਕ੍ਖਮਾਨਸਾਮਣੇਰੀਨ’’ਨ੍ਤਿ ਵੁਤ੍ਤਂ. ਪਤਿਰੂਪਾਨੀਤਿ ਉਪਾਸਕਭਾਵਸ੍ਸ ਅਨੁਚ੍ਛਵਿਕਾਨਿ.
ਧੁਤਙ੍ਗਨਿਦ੍ਦੇਸਵਣ੍ਣਨਾ ਨਿਟ੍ਠਿਤਾ.
ਇਤਿ ਦੁਤਿਯਪਰਿਚ੍ਛੇਦਵਣ੍ਣਨਾ.