੩. ਕਮ੍ਮਟ੍ਠਾਨਗ੍ਗਹਣਨਿਦ੍ਦੇਸਵਣ੍ਣਨਾ

੩੮. ਅਪ੍ਪਿਚ੍ਛਤਾਦੀਹੀਤਿ ਅਪ੍ਪਿਚ੍ਛਤਾਸਨ੍ਤੁਟ੍ਠਿਸਲ੍ਲੇਖਪਵਿਵੇਕਾਪਚਯਵੀਰਿਯਾਰਮ੍ਭਾਦੀਹਿ. ਪਰਿਯੋਦਾਤੇਤਿ ਸੁਵਿਸੁਦ੍ਧੇ ਨਿਰੁਪਕ੍ਕਿਲੇਸੇ. ਇਮਸ੍ਮਿਂ ਸੀਲੇਤਿ ਯਥਾਵੁਤ੍ਤੇ ਚਤੁਪਾਰਿਸੁਦ੍ਧਿਸੀਲੇ. ‘‘ਚਿਤ੍ਤਂ ਭਾਵਯ’’ਨ੍ਤਿ ਇਮਮੇਵ ਦੇਸਨਂ ਸਨ੍ਧਾਯਾਹ ‘‘ਅਤਿਸਙ੍ਖੇਪਦੇਸਿਤਤ੍ਤਾ’’ਤਿ. ਕੋ ਸਮਾਧੀਤਿ ਸਰੂਪਪੁਚ੍ਛਾ. ਕੇਨਟ੍ਠੇਨ ਸਮਾਧੀਤਿ ਕੇਨ ਅਤ੍ਥੇਨ ਸਮਾਧੀਤਿ ਵੁਚ੍ਚਤਿ, ‘‘ਸਮਾਧੀ’’ਤਿ ਪਦਂ ਕਂ ਅਭਿਧੇਯ੍ਯਤ੍ਥਂ ਨਿਸ੍ਸਾਯ ਪਵਤ੍ਤਨ੍ਤਿ ਅਤ੍ਥੋ. ਕਤਿਵਿਧੋਤਿ ਪਭੇਦਪੁਚ੍ਛਾ.

‘‘ਕੋ ਸਮਾਧੀ’’ਤਿ ਕਾਮਞ੍ਚਾਯਂ ਸਰੂਪਪੁਚ੍ਛਾ, ਵਿਭਾਗਵਨ੍ਤਾਨਂ ਪਨ ਸਰੂਪਵਿਭਾਵਨਂ ਵਿਭਾਗਦਸ੍ਸਨਮੁਖੇਨੇਵ ਹੋਤੀਤਿ ਵਿਭਾਗੋ ਤਾਵ ਅਨਵਸੇਸਤੋ ਦਸ੍ਸੇਤਬ੍ਬੋ. ਤਂਦਸ੍ਸਨੇ ਚ ਅਯਮਾਦੀਨਵੋਤਿ ਦਸ੍ਸੇਤੁਂ ‘‘ਸਮਾਧਿ ਬਹੁਵਿਧੋ’’ਤਿਆਦਿ ਵੁਤ੍ਤਂ. ਤਤ੍ਥ ਬਹੁਵਿਧੋਤਿ ਕੁਸਲਾਦਿਵਸੇਨ ਅਨੇਕਵਿਧੋ. ਨਾਨਪ੍ਪਕਾਰਕੋਤਿ ਆਲਮ੍ਬਨਮਨਸਿਕਾਰਛਨ੍ਦਪਣਿਧਿਅਧਿਮੋਕ੍ਖਅਭਿਨੀਹਾਰਸਞ੍ਞਾਨਾਨਤ੍ਤਾਦਿਨਾਨਪ੍ਪਕਾਰੋ. ਨ ਸਾਧੇਯ੍ਯਾਤਿ ਲੋਕਿਯਸਮਾਧਿਸ੍ਸ ਭਾਵਨਾ ਇਧ ਅਧਿਪ੍ਪੇਤਤ੍ਥੋ, ਤਞ੍ਚ ਨ ਸਾਧੇਯ੍ਯ. ਝਾਨਵਿਮੋਕ੍ਖਾਦੀਸੁ ਹਿ ਸਮਾਧਿਂ ਉਦ੍ਧਰਿਤ੍ਵਾ ਤਸ੍ਸ ਲਬ੍ਭਮਾਨੇਹਿ ਵਿਭਾਗੇਹਿ ਵਿਸ੍ਸਜ੍ਜਨੇ ਕਰਿਯਮਾਨੇ ਝਾਨਵਿਭਙ੍ਗਾਦੀਸੁ (ਵਿਭ. ੫੦੮ ਆਦਯੋ) ਆਗਤੋ ਸਬ੍ਬੋ ਸਮਾਧਿਪਭੇਦੋ ਵਿਸ੍ਸਜ੍ਜੇਤਬ੍ਬੋ ਸਿਯਾ. ਤਥਾ ਚ ਸਤਿ ਯ੍ਵਾਯਂ ਲੋਕਿਯਸਮਾਧਿਸ੍ਸ ਭਾਵਨਾਵਿਧਿ ਅਧਿਪ੍ਪੇਤੋ, ਤਸ੍ਸ ਵਿਸ੍ਸਜ੍ਜਨਾਯ ਓਕਾਸੋਵ ਨ ਭਵੇਯ੍ਯ. ਕਿਞ੍ਚ ਯੇਨਸ੍ਸ ਤਿਕਚਤੁਕ੍ਕਝਾਨਿਕੇਨ ਹੀਨਾਦਿਭੇਦਭਿਨ੍ਨੇਨ ਪਵਤ੍ਤਿਵਿਭਾਗੇਨ ਬ੍ਰਹ੍ਮਪਾਰਿਸਜ੍ਜਾਦਿਵਸੇਨ ਨਵਵਿਧੋ, ਪਞ੍ਚਮਜ੍ਝਾਨਿਕੇਨ ਵੇਹਪ੍ਫਲਾਦਿਵਸੇਨ ਦਸਵਿਧੋ ਵਾ ਏਕਾਦਸਵਿਧੋ ਵਾ ਭਵਪ੍ਪਭੇਦੋ ਨਿਪ੍ਪਜ੍ਜਤਿ. ਸ੍ਵਾਸ੍ਸ ਪਵਤ੍ਤਿਵਿਭਾਗੋ ਅਯਂ ਸੋਤਿ ਨਿਦ੍ਧਾਰੇਤ੍ਵਾ ਵੁਚ੍ਚਮਾਨੋ ਵਿਕ੍ਖੇਪਾਯ ਸਿਯਾ, ਯਥਾ ਤਂ ਅਵਿਸਯੇ. ਤੇਨਾਹ ‘‘ਉਤ੍ਤਰਿ ਚ ਵਿਕ੍ਖੇਪਾਯ ਸਂਵਤ੍ਤੇਯ੍ਯਾ’’ਤਿ. ਕੁਸਲਚਿਤ੍ਤੇਕਗ੍ਗਤਾਤਿ ਕੁਸਲਾ ਅਨਵਜ੍ਜਸੁਖਵਿਪਾਕਲਕ੍ਖਣਾ ਚਿਤ੍ਤੇਕਗ੍ਗਤਾ.

ਚਿਤ੍ਤਚੇਤਸਿਕਾਨਂ ਸਮਂ ਅਵਿਸਾਰਵਸੇਨ ਸਮ੍ਪਿਣ੍ਡੇਨ੍ਤਸ੍ਸ ਵਿਯ ਆਧਾਨਂ ਸਮਾਧਾਨਂ. ਅਵਿਸਾਰਲਕ੍ਖਣੋ ਹਿ ਸਮਾਧਿ, ਸਮ੍ਪਿਣ੍ਡਨਰਸੋ ਚ. ਸਮ੍ਮਾ ਅਵਿਕ੍ਖਿਪਨਵਸੇਨ ਆਧਾਨਂ ਸਮਾਧਾਨਂ. ਅਵਿਕ੍ਖੇਪਲਕ੍ਖਣੋ ਵਾ ਹਿ ਸਮਾਧਿ, ਵਿਕ੍ਖੇਪਵਿਦ੍ਧਂਸਨਰਸੋ ਚਾਤਿ. ਸ੍ਵਾਯਂ ਯਸ੍ਮਾ ਏਕਾਰਮ੍ਮਣੇ ਚਿਤ੍ਤਸ੍ਸ ਠਿਤਿਹੇਤੁ, ਤਸ੍ਮਾ ‘‘ਠਪਨਨ੍ਤਿ ਵੁਤ੍ਤਂ ਹੋਤੀ’’ਤਿ ਆਹ. ਤਥਾ ਹੇਸ ‘‘ਚਿਤ੍ਤਸ੍ਸ ਠਿਤਿ ਸਣ੍ਠਿਤਿ ਅਵਟ੍ਠਿਤੀ’’ਤਿ (ਧ. ਸ. ੧੫) ਨਿਦ੍ਦਿਟ੍ਠੋ. ਏਕਾਰਮ੍ਮਣਗ੍ਗਹਣਞ੍ਚੇਤ੍ਥ ਸਮਾਧਿਸ੍ਸ ਸਨ੍ਤਾਨਟ੍ਠਿਤਿਭਾਵਦਸ੍ਸਨਤ੍ਥਂ. ਤਥਾ ਹਿਸ੍ਸ ਅਟ੍ਠਕਥਾਯਂ ਦੀਪਚ੍ਚਿਟ੍ਠਿਤਿ ਨਿਦਸ੍ਸਿਤਾ. ਆਨੁਭਾਵੇਨਾਤਿ ਬਲੇਨ, ਪਚ੍ਚਯਭਾਵੇਨਾਤਿ ਅਤ੍ਥੋ. ਅਵਿਕ੍ਖਿਪਮਾਨਾਤਿ ਨ ਵਿਕ੍ਖਿਪਮਾਨਾ ਵੂਪਸਮਮਾਨਾ. ਉਪਸਮਪਚ੍ਚੁਪਟ੍ਠਾਨੋ ਹਿ ਸਮਾਧਿ. ਏਤੇਨਸ੍ਸ ਵਿਕ੍ਖੇਪਪਟਿਪਕ੍ਖਤਂ ਦਸ੍ਸੇਤਿ. ਅਵਿਪ੍ਪਕਿਣ੍ਣਾਤਿ ਅਵਿਸਟਾ. ਏਤੇਨ ਅਵਿਸਾਰਲਕ੍ਖਣਤਂ.

ਸਯਂ ਨ ਵਿਕ੍ਖਿਪਤਿ, ਸਮ੍ਪਯੁਤ੍ਤਾ ਵਾ ਨ ਵਿਕ੍ਖਿਪਨ੍ਤਿ ਏਤੇਨਾਤਿ ਅਵਿਕ੍ਖੇਪੋ, ਸੋ ਲਕ੍ਖਣਂ ਏਤਸ੍ਸਾਤਿ ਅਵਿਕ੍ਖੇਪਲਕ੍ਖਣੋ. ਵਿਕ੍ਖੇਪਂ ਵਿਦ੍ਧਂਸੇਤਿ, ਤਥਾ ਵਾ ਸਮ੍ਪਜ੍ਜਤੀਤਿ ਵਿਕ੍ਖੇਪਵਿਦ੍ਧਂਸਨਰਸੋ. ਉਦ੍ਧਚ੍ਚੇ ਅਵਿਕਮ੍ਪਨਵਸੇਨ ਪਚ੍ਚੁਪਤਿਟ੍ਠਤਿ, ਸਮ੍ਪਯੁਤ੍ਤਾਨਂ ਵਾ ਤਂ ਪਚ੍ਚੁਪਟ੍ਠਪੇਤੀਤਿ ਅਵਿਕਮ੍ਪਨਪਚ੍ਚੁਪਟ੍ਠਾਨੋ. ਸੁਖਨ੍ਤਿ ਨਿਰਾਮਿਸਂ ਸੁਖਂ ਦਟ੍ਠਬ੍ਬਂ.

੩੯. ਅਵਿਕ੍ਖੇਪਲਕ੍ਖਣਂ ਨਾਮ ਸਮਾਧਿਸ੍ਸ ਆਵੇਣਿਕੋ ਸਭਾਵੋ, ਨ ਤੇਨਸ੍ਸ ਕੋਚਿ ਵਿਭਾਗੋ ਲਬ੍ਭਤੀਤਿ ਆਹ ‘‘ਅਵਿਕ੍ਖੇਪਲਕ੍ਖਣੇਨ ਤਾਵ ਏਕਵਿਧੋ’’ਤਿ. ਸਮ੍ਪਯੁਤ੍ਤਧਮ੍ਮੇ ਆਰਮ੍ਮਣੇ ਅਪ੍ਪੇਨ੍ਤੋ ਵਿਯ ਪਵਤ੍ਤਤੀਤਿ ਵਿਤਕ੍ਕੋ ਅਪ੍ਪਨਾ. ਤਥਾ ਹਿ ਸੋ ‘‘ਅਪ੍ਪਨਾ ਬ੍ਯਪ੍ਪਨਾ’’ਤਿ (ਧ. ਸ. ੭) ਨਿਦ੍ਦਿਟ੍ਠੋ. ਤਪ੍ਪਮੁਖਤਾਵਸੇਨ ਪਨ ਸਬ੍ਬਸ੍ਮਿਂ ਮਹਗ੍ਗਤਾਨੁਤ੍ਤਰੇ ਝਾਨਧਮ੍ਮੇ ‘‘ਅਪ੍ਪਨਾ’’ਤਿ ਅਟ੍ਠਕਥਾਵੋਹਾਰੋ. ਤਥਾ ਤਸ੍ਸ ਅਨੁਪ੍ਪਤ੍ਤਿਟ੍ਠਾਨਭੂਤੇ ਪਰਿਤ੍ਤਝਾਨੇ ਉਪਚਾਰਵੋਹਾਰੋ. ਗਾਮਾਦੀਨਂ ਸਮੀਪਟ੍ਠਾਨੇ ਗਾਮੂਪਚਾਰਾਦਿਸਮਞ੍ਞਾ ਵਿਯਾਤਿ ਆਹ ‘‘ਉਪਚਾਰਪ੍ਪਨਾਵਸੇਨ ਦੁਵਿਧੋ’’ਤਿ. ਇਧ ਪਨ ਸਮਾਧਿਵਸੇਨ ਵੇਦਿਤਬ੍ਬਂ. ਲੁਜ੍ਜਨਪਲੁਜ੍ਜਨਟ੍ਠੇਨ ਲੋਕੋਤਿ ਵੁਚ੍ਚਤਿ ਵਟ੍ਟਂ, ਤਪ੍ਪਰਿਯਾਪਨ੍ਨਤਾਯ ਲੋਕੇ ਨਿਯੁਤ੍ਤੋ, ਤਤ੍ਥ ਵਾ ਵਿਦਿਤੋਤਿ ਲੋਕਿਯੋ. ਤਤ੍ਥ ਅਪਰਿਯਾਪਨ੍ਨਤਾਯ ਲੋਕਤੋ ਉਤ੍ਤਰੋ ਉਤ੍ਤਿਣ੍ਣੋਤਿ ਲੋਕੁਤ੍ਤਰੋ. ਕਾਮਞ੍ਚੇਤ੍ਥ ਲੋਕਿਯਸਮਾਧਿ ਭਾਵੇਤਬ੍ਬਭਾਵੇਨ ਗਯ੍ਹਤਿ, ਉਭਯਂ ਪਨ ਏਕਜ੍ਝਂ ਗਹੇਤ੍ਵਾ ਤਤੋ ਇਤਰਂ ਨਿਦ੍ਧਾਰੇਤੁਂ ‘‘ਲੋਕਿਯਲੋਕੁਤ੍ਤਰਵਸੇਨ ਦੁਵਿਧੋ’’ਤਿ ਵੁਤ੍ਤਂ. ਸਪ੍ਪੀਤਿਕਨਿਪ੍ਪੀਤਿਕਵਸੇਨਾਤਿ ਸਹ ਪੀਤਿਯਾ ਵਤ੍ਤਤੀਤਿ ਸਪ੍ਪੀਤਿਕੋ, ਪੀਤਿਸਮ੍ਪਯੁਤ੍ਤੋ. ਨਤ੍ਥਿ ਏਤਸ੍ਸ ਪੀਤੀਤਿ ਨਿਪ੍ਪੀਤਿਕੋ, ਪੀਤਿਵਿਪ੍ਪਯੁਤ੍ਤੋ. ਤੇਸਂ ਵਸੇਨ. ਸੁਖੇਨ ਸਹ ਏਕੁਪ੍ਪਾਦਾਦਿਭਾਵਂ ਗਤੋਤਿ ਸੁਖਸਹਗਤੋ, ਸੁਖਸਮ੍ਪਯੁਤ੍ਤੋਤਿ ਅਤ੍ਥੋ. ਉਪੇਕ੍ਖਾਸਹਗਤੇਪਿ ਏਸੇਵ ਨਯੋ. ਉਪੇਕ੍ਖਾਤਿ ਚੇਤ੍ਥ ਅਦੁਕ੍ਖਮਸੁਖਵੇਦਨਾ ਅਧਿਪ੍ਪੇਤਾ. ਸਾ ਹਿ ਸੁਖਦੁਕ੍ਖਾਕਾਰਪਵਤ੍ਤਿਂ ਉਪੇਕ੍ਖਤਿ ਮਜ੍ਝਤ੍ਤਾਕਾਰਸਣ੍ਠਿਤਤ੍ਤਾ. ਸੁਖਸਹਗਤ-ਪਦੇਨ ਚੇਤ੍ਥ ਸਪ੍ਪੀਤਿਕੋ, ਨਿਪ੍ਪੀਤਿਕੇਕਦੇਸੋ ਚ ਸਙ੍ਗਹਿਤੋ, ਉਪੇਕ੍ਖਾਸਹਗਤ-ਪਦੇਨ ਪਨ ਨਿਪ੍ਪੀਤਿਕੇਕਦੇਸੋਵਾਤਿ ਅਯਮੇਤੇਸਂ ਪਦਾਨਂ ਵਿਸੇਸੋ.

ਸਭਾਵਤੋ, ਪਚ੍ਚਯਤੋ, ਫਲਤੋ ਚ ਮਜ੍ਝਿਮਪਣੀਤੇਹਿ ਨਿਹੀਨੋ, ਤੇਸਂ ਵਾ ਗੁਣੇਹਿ ਪਰਿਹੀਨੋਤਿ ਹੀਨੋ, ਅਤ੍ਤਨੋ ਪਚ੍ਚਯੇਹਿ ਪਧਾਨਭਾਵਂ ਨੀਤੋ ਪਣੀਤੋ, ਉਭਿਨ੍ਨਂ ਮਜ੍ਝੇ ਭਵੋ ਮਜ੍ਝਿਮੋ. ਸਮ੍ਪਯੋਗਵਸੇਨ ਪਵਤ੍ਤਮਾਨੇਨ ਸਹ ਵਿਤਕ੍ਕੇਨ ਸਵਿਤਕ੍ਕੋ, ਸਹ ਵਿਚਾਰੇਨ ਸਵਿਚਾਰੋ, ਸਵਿਤਕ੍ਕੋ ਚ ਸੋ ਸਵਿਚਾਰੋ ਚਾਤਿ ਸਵਿਤਕ੍ਕਸਵਿਚਾਰੋ. ਆਦਿ-ਸਦ੍ਦੇਨ ਅਵਿਤਕ੍ਕਵਿਚਾਰਮਤ੍ਤੋ, ਅਵਿਤਕ੍ਕਾਵਿਚਾਰੋ ਚ ਗਹਿਤੋ. ਤਤ੍ਥ ਵਿਚਾਰਤੋ ਉਤ੍ਤਰਿ ਵਿਤਕ੍ਕੇਨ ਸਮ੍ਪਯੋਗਾਭਾਵਤੋ ਅਵਿਤਕ੍ਕੋ ਚ ਸੋ ਵਿਚਾਰਮਤ੍ਤੋ ਚਾਤਿ ਅਵਿਤਕ੍ਕਵਿਚਾਰਮਤ੍ਤੋ. ਵਿਸੇਸਨਿਵਤ੍ਤਿਅਤ੍ਥੋ ਵਾ ਮਤ੍ਤ-ਸਦ੍ਦੋ. ਸਵਿਤਕ੍ਕਸਵਿਚਾਰੋ ਹਿ ਸਮਾਧਿ ਵਿਤਕ੍ਕਵਿਸਿਟ੍ਠੇਨ ਵਿਚਾਰੇਨ ਸਵਿਚਾਰੋ, ਅਯਂ ਪਨ ਵਿਚਾਰਮਤ੍ਤੇਨ ਵਿਤਕ੍ਕਸਙ੍ਖਾਤਵਿਸੇਸਰਹਿਤੇਨ, ਤਸ੍ਮਾ ਅਵਿਤਕ੍ਕਵਿਚਾਰਮਤ੍ਤੋ. ਅਥ ਵਾ ਭਾਵਨਾਯ ਪਹੀਨਤ੍ਤਾ ਵਿਤਕ੍ਕਾਭਾਵੇਨਾਯਂ ਵਿਚਾਰਮਤ੍ਤੋ, ਨ ਵਿਚਾਰਤੋ ਅਞ੍ਞਸ੍ਸ ਅਤ੍ਤਨੋ ਸਮ੍ਪਯੁਤ੍ਤਧਮ੍ਮਸ੍ਸ ਕਸ੍ਸਚਿ ਅਭਾਵਾਤਿ ਦਸ੍ਸੇਤੁਂ ਅਵਿਤਕ੍ਕ-ਵਚਨੇਨ ਵਿਚਾਰਮਤ੍ਤ-ਪਦਂ ਵਿਸੇਸੇਤ੍ਵਾ ਵੁਤ੍ਤਂ. ਉਭਯਰਹਿਤੋ ਅਵਿਤਕ੍ਕਾਵਿਚਾਰੋ. ਪੀਤਿਸਹਗਤਾਦਿਵਸੇਨਾਤਿ ਪੀਤਿਸਹਗਤਸੁਖਸਹਗਤਉਪੇਕ੍ਖਾਸਹਗਤਵਸੇਨ. ਯਦੇਤ੍ਥ ਵਤ੍ਤਬ੍ਬਂ, ਤਂ ਸੁਖਸਹਗਤਦੁਕੇ ਵੁਤ੍ਤਨਯਮੇਵ. ਪਟਿਪਕ੍ਖੇਹਿ ਸਮਨ੍ਤਤੋ ਖਣ੍ਡਿਤਤ੍ਤਾ ਪਰਿਤ੍ਤੋ. ਪਰਿਤ੍ਤਨ੍ਤਿ ਵਾ ਅਪ੍ਪਮਤ੍ਤਕਂ ਵੁਚ੍ਚਤਿ, ਅਯਮ੍ਪਿ ਅਪ੍ਪਾਨੁਭਾਵਤਾਯ ਪਰਿਤ੍ਤੋ ਵਿਯਾਤਿ ਪਰਿਤ੍ਤੋ. ਕਿਲੇਸਵਿਕ੍ਖਮ੍ਭਨਤੋ, ਵਿਪੁਲਫਲਤੋ, ਦੀਘਸਨ੍ਤਾਨਤੋ ਚ ਮਹਨ੍ਤਭਾਵਂ ਗਤੋ, ਮਹਨ੍ਤੇਹਿ ਵਾ ਉਲ਼ਾਰਚ੍ਛਨ੍ਦਾਦੀਹਿ ਗਤੋ ਪਟਿਪਨ੍ਨੋਤਿ ਮਹਗ੍ਗਤੋ. ਆਰਮ੍ਮਣਕਰਣਵਸੇਨਾਪਿ ਨਤ੍ਥਿ ਏਤਸ੍ਸ ਪਮਾਣਕਰਧਮ੍ਮਾ, ਤੇਸਂ ਵਾ ਪਟਿਪਕ੍ਖੋਤਿ ਅਪ੍ਪਮਾਣੋ.

ਪਟਿਪਜ੍ਜਤਿ ਝਾਨਂ ਏਤਾਯਾਤਿ ਪਟਿਪਦਾ, ਪੁਬ੍ਬਭਾਗਭਾਵਨਾ. ਦੁਕ੍ਖਾ ਕਿਚ੍ਛਾ ਪਟਿਪਦਾ ਏਤਸ੍ਸਾਤਿ ਦੁਕ੍ਖਾਪਟਿਪਦੋ. ਪਕਤਿਪਞ੍ਞਾਯ ਅਭਿਵਿਸਿਟ੍ਠਤ੍ਤਾ ਅਭਿਞ੍ਞਾ ਨਾਮ ਅਪ੍ਪਨਾਵਹਾ ਭਾਵਨਾਪਞ੍ਞਾ, ਦਨ੍ਧਾ ਮਨ੍ਦਾ ਅਭਿਞ੍ਞਾ ਏਤਸ੍ਸਾਤਿ ਦਨ੍ਧਾਭਿਞ੍ਞੋ. ਦੁਕ੍ਖਾਪਟਿਪਦੋ ਚ ਸੋ ਦਨ੍ਧਾਭਿਞ੍ਞੋ ਚਾਤਿ ਦੁਕ੍ਖਾਪਟਿਪਦਾਦਨ੍ਧਾਭਿਞ੍ਞੋ, ਸਮਾਧਿ. ਤਦਾਦਿਵਸੇਨ. ਚਤੁਝਾਨਙ੍ਗਵਸੇਨਾਤਿ ਚਤੁਨ੍ਨਂ ਝਾਨਾਨਂ ਅਙ੍ਗਭਾਵਵਸੇਨ, ਚਤੁਕ੍ਕਨਯਵਸੇਨ ਚੇਤਂ ਵੁਤ੍ਤਂ. ਹਾਨਭਾਗਿਯਾਦਿਵਸੇਨਾਤਿ ਹਾਨਕੋਟ੍ਠਾਸਿਕਾਦਿਵਸੇਨ.

ਸਮਾਧਿਏਕਕਦੁਕਵਣ੍ਣਨਾ

ਛਨ੍ਨਂ ਅਨੁਸ੍ਸਤਿਟ੍ਠਾਨਾਨਨ੍ਤਿ ਬੁਦ੍ਧਾਨੁਸ੍ਸਤਿਆਦੀਨਂ ਛਨ੍ਨਂ ਅਨੁਸ੍ਸਤਿਕਮ੍ਮਟ੍ਠਾਨਾਨਂ. ਇਮੇਸਂ ਵਸੇਨਾਤਿ ਇਮੇਸਂ ਦਸਨ੍ਨਂ ਕਮ੍ਮਟ੍ਠਾਨਾਨਂ ਵਸੇਨ. ‘‘ਪੁਬ੍ਬਭਾਗੇ ਏਕਗ੍ਗਤਾ’’ਤਿ ਇਮਿਨਾ ਅਪ੍ਪਨਾਯ ਉਪਕਾਰਕਨਾਨਾਵਜ੍ਜਨੁਪਚਾਰਸ੍ਸਪਿ ਸਙ੍ਗਹੋ ਦਟ੍ਠਬ੍ਬੋ, ਨ ਏਕਾਵਜ੍ਜਨਸ੍ਸੇਵ. ਅਪ੍ਪਨਾਸਮਾਧੀਨਨ੍ਤਿ ਉਪਕਤ੍ਤਬ੍ਬਉਪਕਾਰਕਸਮ੍ਬਨ੍ਧੇ ਸਾਮਿਵਚਨਂ ‘‘ਪੁਰਿਸਸ੍ਸ ਅਤ੍ਥੋ’’ਤਿਆਦੀਸੁ ਵਿਯ. ਪਰਿਕਮ੍ਮਨ੍ਤਿ ਗੋਤ੍ਰਭੁ. ਅਪਰਿਤ੍ਤੋ ਸਮਾਧੀਤਿ ਦਸ੍ਸੇਤੁਂ ‘‘ਪਠਮਸ੍ਸ ਝਾਨਸ੍ਸਾ’’ਤਿਆਦਿ ਵੁਤ੍ਤਂ.

ਤੀਸੁ ਭੂਮੀਸੂਤਿ ਕਾਮਰੂਪਾਰੂਪਭੂਮੀਸੁ. ਕੁਸਲਚਿਤ੍ਤੇਕਗ੍ਗਤਾਯ ਅਧਿਪ੍ਪੇਤਤ੍ਤਾ ‘‘ਅਰਿਯਮਗ੍ਗਸਮ੍ਪਯੁਤ੍ਤਾ’’ਤਿ ਵੁਤ੍ਤਂ. ਸਿਯਾ ਸਪ੍ਪੀਤਿਕੋ, ਸਿਯਾ ਨਿਪ੍ਪੀਤਿਕੋਤਿ ਅਨਿਯਮਵਚਨਂ ਉਪਚਾਰਸਮਾਧਿਸਾਮਞ੍ਞੇਨ ਸਬ੍ਬੇਸਮ੍ਪਿ ਵਾ ਝਾਨਾਨਂ ਨਾਨਾਵਜ੍ਜਨਵੀਥਿਯਂ ਉਪਚਾਰਸਮਾਧਿ ਸਿਯਾ ਸਪ੍ਪੀਤਿਕੋ, ਸਿਯਾ ਨਿਪ੍ਪੀਤਿਕੋ. ਏਕਾਵਜ੍ਜਨਵੀਥਿਯਂ ਪਨ ਆਦਿਤੋ ਦੁਕਤਿਕਜ੍ਝਾਨਾਨਂ ਉਪਚਾਰਸਮਾਧਿ ਸਪ੍ਪੀਤਿਕੋਵ, ਇਤਰੇਸਂ ਨਿਪ੍ਪੀਤਿਕੋਵ, ਵਿਸਭਾਗਵੇਦਨਸ੍ਸ ਚਿਤ੍ਤਸ੍ਸ ਆਸੇਵਨਪਚ੍ਚਯਤਾਭਾਵਤੋ, ਏਕਵੀਥਿਯਂ ਵੇਦਨਾਪਰਿਵਤ੍ਤਨਾਭਾਵਤੋ ਚ. ਸਿਯਾ ਸੁਖਸਹਗਤੋ, ਸਿਯਾ ਉਪੇਕ੍ਖਾਸਹਗਤੋਤਿ ਏਤ੍ਥਾਪਿ ਵੁਤ੍ਤਨਯੇਨੇਵ ਅਤ੍ਥੋ ਵੇਦਿਤਬ੍ਬੋ. ਤਤ੍ਥ ਪਨ ‘‘ਦੁਕਤਿਕਜ੍ਝਾਨਾਨ’’ਨ੍ਤਿ ਵੁਤ੍ਤਂ, ਇਧ ‘‘ਤਿਕਚਤੁਕ੍ਕਜ੍ਝਾਨਾਨ’’ਨ੍ਤਿ ਵਤ੍ਤਬ੍ਬਂ.

ਸਮਾਧਿਤਿਕਵਣ੍ਣਨਾ

ਪਟਿਲਦ੍ਧਮਤ੍ਤੋਤਿ ਅਧਿਗਤਮਤ੍ਤੋ ਅਨਾਸੇਵਿਤੋ ਅਬਹੁਲੀਕਤੋ. ਸੋ ਹਿ ਪਰਿਦੁਬ੍ਬਲਭਾਵੇਨ ਹੀਨੋ ਹੋਤਿ. ਨਾਤਿਸੁਭਾਵਿਤੋਤਿ ਅਤਿਵਿਯ ਪਗੁਣਭਾਵਂ ਅਪਾਪਿਤੋ. ਸੁਭਾਵਿਤੋਤਿ ਸੁਟ੍ਠੁ ਭਾਵਿਤੋ ਸਮ੍ਮਦੇਵ ਪਗੁਣਤਂ ਉਪਨੀਤੋ. ਤੇਨਾਹ ‘‘ਵਸਿਪ੍ਪਤ੍ਤੋ’’ਤਿ. ਛਨ੍ਦਾਦੀਨਂ ਹੀਨਤਾਦਿਵਸੇਨਾਪਿ ਇਮੇਸਂ ਹੀਨਾਦਿਤਾ ਵੇਦਿਤਬ੍ਬਾ. ਤਥਾ ਹਿ ਉਲ਼ਾਰਪੁਞ੍ਞਫਲਕਾਮਤਾਵਸੇਨ ਪਵਤ੍ਤਿਤੋ ਹੀਨੋ, ਲੋਕਿਯਾਭਿਞ੍ਞਾਸਮ੍ਪਾਦਨਾਯ ਪਵਤ੍ਤਿਤੋ ਮਜ੍ਝਿਮੋ, ਵਿਵੇਕਕਾਮਤਾਯ ਅਰਿਯਭਾਵੇ ਠਿਤੇਨ ਪਵਤ੍ਤਿਤੋ ਪਣੀਤੋ. ਅਤ੍ਤਹਿਤਾਯ ਭਵਸਮ੍ਪਤ੍ਤਿਅਤ੍ਥਂ ਪਵਤ੍ਤਿਤੋ ਵਾ ਹੀਨੋ, ਕੇਵਲਂ ਅਲੋਭਜ੍ਝਾਸਯੇਨ ਪਵਤ੍ਤਿਤੋ ਮਜ੍ਝਿਮੋ, ਪਰਹਿਤਾਯ ਪਵਤ੍ਤਿਤੋ ਪਣੀਤੋ. ਵਟ੍ਟਜ੍ਝਾਸਯੇਨ ਵਾ ਪਵਤ੍ਤਿਤੋ ਹੀਨੋ, ਵਿਵੇਕਜ੍ਝਾਸਯੇਨ ਪਵਤ੍ਤਿਤੋ ਮਜ੍ਝਿਮੋ, ਵਿਵਟ੍ਟਜ੍ਝਾਸਯੇਨ ਲੋਕੁਤ੍ਤਰਪਾਦਕਤ੍ਥਂ ਪਵਤ੍ਤਿਤੋ ਪਣੀਤੋ.

ਸਦ੍ਧਿਂ ਉਪਚਾਰਸਮਾਧਿਨਾਤਿ ਸਬ੍ਬੇਸਮ੍ਪਿ ਝਾਨਾਨਂ ਉਪਚਾਰਸਮਾਧਿਨਾ ਸਹ. ਵਿਤਕ੍ਕਮਤ੍ਤੇਯੇਵ ਆਦੀਨਵਂ ਦਿਸ੍ਵਾਤਿ ਵਿਤਕ੍ਕੇਯੇਵ ਓਲ਼ਾਰਿਕਤੋ ਉਪਟ੍ਠਹਨ੍ਤੇ ‘‘ਚਿਤ੍ਤਸ੍ਸ ਖੋਭਕਰਧਮ੍ਮੋ ਅਯ’’ਨ੍ਤਿ ਆਦੀਨਵਂ ਦਿਸ੍ਵਾ ਵਿਚਾਰਞ੍ਚ ਸਨ੍ਤਤੋ ਮਨਸਿ ਕਰਿਤ੍ਵਾ. ਤੇਨਾਹ ‘‘ਵਿਚਾਰੇ ਅਦਿਸ੍ਵਾ’’ਤਿ. ਤਂ ਸਨ੍ਧਾਯਾਤਿ ਤਂ ਏਵਂ ਪਟਿਲਦ੍ਧਂ ਸਮਾਧਿਂ ਸਨ੍ਧਾਯ. ਏਤਂ ‘‘ਅਵਿਤਕ੍ਕਵਿਚਾਰਮਤ੍ਤੋ ਸਮਾਧੀ’’ਤਿ ਦੁਤਿਯਪਦਂ ਵੁਤ੍ਤਂ. ਤੀਸੂਤਿ ਆਦਿਤੋ ਤੀਸੁ.

ਤੇਸ੍ਵੇਵਾਤਿ ਤੇਸੁ ਏਵ ਚਤੁਕ੍ਕਪਞ੍ਚਕਨਯੇਸੁ. ਤਤਿਯੇ ਚਤੁਤ੍ਥੇਤਿ ਚਤੁਕ੍ਕਨਯੇ ਤਤਿਯੇ, ਪਞ੍ਚਕਨਯੇ ਚਤੁਤ੍ਥੇਤਿ ਯੋਜੇਤਬ੍ਬਂ. ਅਵਸਾਨੇਤਿ ਦ੍ਵੀਸੁਪਿ ਨਯੇਸੁ ਪਰਿਯੋਸਾਨਜ੍ਝਾਨੇ. ਯਥਾਕ੍ਕਮਂ ਚਤੁਤ੍ਥੇ, ਪਞ੍ਚਮੇ ਵਾ. ਪੀਤਿਸੁਖਸਹਗਤੋ ਵਾਤਿ ਏਤ੍ਥਾਪਿ ਹੇਟ੍ਠਾ ਵੁਤ੍ਤਨਯੇਨੇਵ ਅਤ੍ਥੋ ਵੇਦਿਤਬ੍ਬੋ. ਏਤ੍ਥ ਚ ਸਤਿਪਿ ਪੀਤਿਸਹਗਤਸ੍ਸਾਪਿ ਸਮਾਧਿਸ੍ਸ ਸੁਖਸਹਗਤਤ੍ਤੇ ਤੀਣਿਪਿ ਪਦਾਨਿ ਅਸਙ੍ਕਰਤੋ ਦਸ੍ਸੇਤੁਂ ਨਿਪ੍ਪੀਤਿਕਸੁਖਤੋ ਸਪ੍ਪੀਤਿਕਸੁਖਸ੍ਸ ਵਿਸੇਸਦਸ੍ਸਨਤ੍ਥਂ ਸਤ੍ਥੁ ਪੀਤਿਤਿਕਦੇਸਨਾਤਿ ਨਿਪ੍ਪੀਤਿਕਸ੍ਸੇਵ ਸੁਖਸ੍ਸ ਵਸੇਨ ਸੁਖਸਹਗਤੋ ਸਮਾਧਿ ਗਹਿਤੋਤਿ ਦਟ੍ਠਬ੍ਬੋ.

ਉਪਚਾਰਭੂਮਿਯਨ੍ਤਿ ਉਪਚਾਰਜ੍ਝਾਨਸਮ੍ਪਯੁਤ੍ਤਚਿਤ੍ਤੁਪ੍ਪਾਦੇ. ਚਿਤ੍ਤੁਪ੍ਪਾਦੋ ਹਿ ਸਹਜਾਤਧਮ੍ਮਾਨਂ ਉਪ੍ਪਤ੍ਤਿਟ੍ਠਾਨਤਾਯ ‘‘ਭੂਮੀ’’ਤਿ ਵੁਚ੍ਚਤਿ ‘‘ਸੁਖਭੂਮਿਯਂ ਕਾਮਾਵਚਰੇ’’ਤਿਆਦੀਸੁ (ਧ. ਸ. ੯੮੮) ਵਿਯ. ਪਰਿਤ੍ਤੋ ਸਮਾਧਿ ਕਾਮਾਵਚਰਭਾਵਤੋ.

ਸਮਾਧਿਚਤੁਕ੍ਕਵਣ੍ਣਨਾ

ਪਠਮਸਮਨ੍ਨਾਹਾਰੋ ਭਾਵਨਂ ਆਰਭਨ੍ਤਸ੍ਸ ‘‘ਪਥਵੀ ਪਥਵੀ’’ਤਿਆਦਿਨਾ ਕਮ੍ਮਟ੍ਠਾਨੇ ਪਠਮਾਭਿਨਿਵੇਸੋ. ਤਸ੍ਸ ਤਸ੍ਸ ਝਾਨਸ੍ਸ ਉਪਚਾਰਨ੍ਤਿ ਨੀਵਰਣਵਿਤਕ੍ਕਵਿਚਾਰਨਿਕਨ੍ਤਿਆਦੀਨਂ ਵੂਪਸਮੇ ਥਿਰਭੂਤਂ ਕਾਮਾਵਚਰਜ੍ਝਾਨਂ. ‘‘ਯਾਵ ਅਪ੍ਪਨਾ’’ਤਿ ਇਮਿਨਾ ਪੁਬ੍ਬਭਾਗਪਞ੍ਞਾਯ ਏਵ ਅਭਿਞ੍ਞਾਭਾਵੋ ਵੁਤ੍ਤੋ ਵਿਯ ਦਿਸ੍ਸਤੀਤਿ ਵਦਨ੍ਤਿ. ਅਪ੍ਪਨਾਪਞ੍ਞਾ ਪਨ ਅਭਿਞ੍ਞਾਵ. ਯਦਗ੍ਗੇਨ ਹਿ ਪੁਬ੍ਬਭਾਗਪਞ੍ਞਾਯ ਦਨ੍ਧਸੀਘਤਾ, ਤਦਗ੍ਗੇਨ ਅਪ੍ਪਨਾਪਞ੍ਞਾਯਪੀਤਿ. ਸਮੁਦਾਚਾਰਗਹਣਤਾਯਾਤਿ ਸਮੁਦਾਚਾਰਸ੍ਸ ਗਹਣਭਾਵੇਨ, ਪਵਤ੍ਤਿਬਾਹੁਲ੍ਲਤੋਤਿ ਅਤ੍ਥੋ. ਅਸੁਖਾਸੇਵਨਾਤਿ ਕਸਿਰਭਾਵਨਾ.

ਪਲਿਬੋਧੁਪਚ੍ਛੇਦਾਦੀਨੀਤਿ ਆਦਿ-ਸਦ੍ਦੇਨ ਭਾਵਨਾਵਿਧਾਨਾਪਰਿਹਾਪਨਾਦਿਂ ਸਙ੍ਗਣ੍ਹਾਤਿ. ਅਸਪ੍ਪਾਯਸੇਵੀਤਿ ਉਪਚਾਰਾਧਿਗਮਤੋ ਪੁਬ੍ਬੇ ਅਸਪ੍ਪਾਯਸੇਵਿਤਾਯ ਦੁਕ੍ਖਾ ਪਟਿਪਦਾ. ਪਚ੍ਛਾ ਅਸਪ੍ਪਾਯਸੇਵਿਤਾਯ ਦਨ੍ਧਾ ਅਭਿਞ੍ਞਾ ਹੋਤਿ. ਸਪ੍ਪਾਯਸੇਵਿਨੋਤਿ ਏਤ੍ਥਾਪਿ ਏਸੇਵ ਨਯੋ. ਪੁਬ੍ਬਭਾਗੇਤਿ ਉਪਚਾਰਜ੍ਝਾਨਾਧਿਗਮਤੋ ਓਰਭਾਗੇ. ਅਪਰਭਾਗੇਤਿ ਤਤੋ ਉਦ੍ਧਂ. ਤਸ੍ਸ ਵੋਮਿਸ੍ਸਕਤਾਤਿ ਯੋ ਪੁਬ੍ਬਭਾਗੇ ਅਸਪ੍ਪਾਯਂ ਸੇਵਿਤ੍ਵਾ ਅਪਰਭਾਗੇ ਸਪ੍ਪਾਯਸੇਵੀ, ਤਸ੍ਸ ਦੁਕ੍ਖਾ ਪਟਿਪਦਾ ਖਿਪ੍ਪਾਭਿਞ੍ਞਾ. ਇਤਰਸ੍ਸ ਸੁਖਾ ਪਟਿਪਦਾ ਦਨ੍ਧਾਭਿਞ੍ਞਾ ਹੋਤਿ. ਏਵਂ ਪਠਮਚਤੁਤ੍ਥਾਨਂ ਵੋਮਿਸ੍ਸਕਤਾਯ ਦੁਤਿਯਤਤਿਯਾਤਿ ਅਤ੍ਥੋ. ਅਕਤਪਲਿਬੋਧੁਪਚ੍ਛੇਦਸ੍ਸ ਸਪਰਿਪਨ੍ਥਤਾਯ ਪਟਿਪਦਾ ਦੁਕ੍ਖਾ ਹੋਤਿ, ਇਤਰਸ੍ਸ ਸੁਖਾ. ਅਸਮ੍ਪਾਦਿਤਅਪ੍ਪਨਾਕੋਸਲ੍ਲਸ੍ਸ ਞਾਣਸ੍ਸ ਅਵਿਸਦਤਾਯ ਦਨ੍ਧਾ ਅਭਿਞ੍ਞਾ ਹੋਤਿ, ਵਿਸਦਤਾਯ ਖਿਪ੍ਪਾ ਅਭਿਞ੍ਞਾ.

ਤਣ੍ਹਾਅਵਿਜ੍ਜਾਵਸੇਨਾਤਿ ਤਣ੍ਹਾਅਵਿਜ੍ਜਾਨਂ ਅਭਿਭਵਾਨਭਿਭਵਵਸੇਨ. ਸਮਥਵਿਪਸ੍ਸਨਾਧਿਕਾਰਵਸੇਨਾਤਿ ਸਮਥਵਿਪਸ੍ਸਨਾਸੁ ਅਸਤੋ, ਸਤੋ ਚ ਅਧਿਕਾਰਸ੍ਸ ਵਸੇਨ. ਤਣ੍ਹਾਯ ਸਮਾਧਿਸ੍ਸ ਉਜੁਪਟਿਪਕ੍ਖਤ੍ਤਾ ਸਾ ਸਮਥਪਟਿਪਦਾਯ ਪਰਿਪਨ੍ਥਿਨੀਤਿ ਆਹ ‘‘ਤਣ੍ਹਾਭਿਭੂਤਸ੍ਸ ਹਿ ਦੁਕ੍ਖਾ ਪਟਿਪਦਾ ਹੋਤੀ’’ਤਿ. ਅਭਿਭਵੋ ਚਸ੍ਸਾ ਇਤਰਕਿਲੇਸੇਹਿ ਅਧਿਕਤਾਯ ਅਨਭਿਭੂਤਸ੍ਸ ਤਣ੍ਹਾਯਾਤਿ ਅਧਿਕਾਰਤੋ ਵੇਦਿਤਬ੍ਬਂ. ਤਥਾ ਅਵਿਜ੍ਜਾ ਪਞ੍ਞਾਯ ਉਜੁਪਟਿਪਕ੍ਖਾਤਿ ਤਦਭਿਭੂਤਸ੍ਸ ਦਨ੍ਧਾਭਿਞ੍ਞਤਾ ਵੁਤ੍ਤਾ. ਅਕਤਾਧਿਕਾਰੋਤਿ ਭਵਨ੍ਤਰੇ ਅਕਤਪਰਿਚਯੋ ਯਥਾ ਪਗੁਣਂ ਕਤ੍ਵਾ ਵਿਸ੍ਸਟ੍ਠਗਨ੍ਥੋ ਅਪ੍ਪਮਤ੍ਤਕੇਨ ਪਯੋਗੇਨ ਸੁਪ੍ਪਵਤ੍ਤਿ ਵਾਚੁਗ੍ਗਤੋਵ ਹੋਤਿ, ਏਵਂ ਪੁਬ੍ਬੇ ਕਤਪਰਿਚਯਸ੍ਸ ਭਾਵਨਾ ਅਪ੍ਪਕਸਿਰੇਨੇਵ ਇਜ੍ਝਤੀਤਿ ਆਹ ‘‘ਕਤਾਧਿਕਾਰਸ੍ਸ ਸੁਖਾ’’ਤਿ. ਸ੍ਵਾਯਂ ਅਕਤੋ, ਕਤੋ ਚ ਅਧਿਕਾਰੋ ਸਮਥਨਿਸ੍ਸਿਤੋ ਪਟਿਪਦਾਯਂ ਵੁਤ੍ਤੋ ਸਮਾਧਿਪ੍ਪਧਾਨਤ੍ਤਾ ਪਟਿਪਦਾਯ. ਵਿਪਸ੍ਸਨਾਨਿਸ੍ਸਿਤੋ ਅਭਿਞ੍ਞਾਯਂ ਞਾਣਪ੍ਪਧਾਨਤ੍ਤਾ ਅਪ੍ਪਨਾਯ. ਕਿਲੇਸਿਨ੍ਦ੍ਰਿਯਵਸੇਨਾਤਿ ਤਿਕ੍ਖਾਤਿਕ੍ਖਾਨਂ ਕਿਲੇਸਿਨ੍ਦ੍ਰਿਯਾਨਂ ਵਸੇਨ. ਤੇਨਾਹ ‘‘ਤਿਬ੍ਬਕਿਲੇਸਸ੍ਸਾ’’ਤਿਆਦਿ. ਤਤ੍ਥ ਕਿਲੇਸਾ ਕਾਮਚ੍ਛਨ੍ਦਾਦਯੋ, ਇਨ੍ਦ੍ਰਿਯਾਨਿ ਸਦ੍ਧਾਦੀਨਿ.

ਯਥਾਵੁਤ੍ਤਾ ਪਟਿਪਦਾਭਿਞ੍ਞਾ ਪੁਗ੍ਗਲਾਧਿਟ੍ਠਾਨਾਤਿ ਧਮ੍ਮਨਿਦ੍ਦੇਸਮ੍ਪਿ ਪੁਗ੍ਗਲਾਧਿਟ੍ਠਾਨਮੁਖੇਨ ਦਸ੍ਸੇਤੁਂ ‘‘ਯੋ ਪੁਗ੍ਗਲੋ’’ਤਿਆਦਿ ਵੁਤ੍ਤਂ. ਅਪ੍ਪਗੁਣੋਤਿ ਨ ਸੁਭਾਵਿਤੋ ਵਸੀਭਾਵਂ ਅਪਾਪਿਤੋ. ਤੇਨਾਹ ‘‘ਉਪਰਿਝਾਨਸ੍ਸ ਪਚ੍ਚਯੋ ਭਵਿਤੁਂ ਨ ਸਕ੍ਕੋਤੀ’’ਤਿ. ਅਯਂ ਪਰਿਤ੍ਤੋਤਿ ਅਯਂ ਸਮਾਧਿ ਅਪ੍ਪਾਨੁਭਾਵਤਾਯ ਪਰਿਤ੍ਤੋ. ਅਵਡ੍ਢਿਤੇਤਿ ਏਕਙ੍ਗੁਲਦ੍ਵਙ੍ਗੁਲਮਤ੍ਤਮ੍ਪਿ ਨ ਵਡ੍ਢਿਤੇ ਯਥਾਉਪਟ੍ਠਿਤੇ ਆਰਮ੍ਮਣੇ. ਏਕਙ੍ਗੁਲਮਤ੍ਤਮ੍ਪਿ ਹਿ ਵਡ੍ਢਿਤਂ ਅਪ੍ਪਮਾਣਮੇਵਾਤਿ ਵਦਨ੍ਤਿ. ‘‘ਪਗੁਣੋ ਸੁਭਾਵਿਤੋ’’ਤਿ ਵਤ੍ਵਾ ‘‘ਉਪਰਿਝਾਨਸ੍ਸ ਪਚ੍ਚਯੋ ਭਵਿਤੁਂ ਸਕ੍ਕੋਤੀ’’ਤਿ ਇਮਿਨਾ ਯਥਾ ਪਗੁਣੋਪਿ ਉਪਰਿਝਾਨਸ੍ਸ ਪਚ੍ਚਯੋ ਭਵਿਤੁਂ ਅਸਕ੍ਕੋਨ੍ਤੋ ਸਮਾਧਿ ਪਰਿਤ੍ਤੋਯੇਵ ਹੋਤਿ, ਨ ਅਪ੍ਪਮਾਣੋ, ਏਵਂ ਞਾਣੁਤ੍ਤਰਸ੍ਸ ਏਕਾਸਨੇਨੇਵ ਉਪਰਿਝਾਨਨਿਬ੍ਬਤ੍ਤਨੇਨਾਤਿ ਸੁਭਾਵਿਤੋਪਿ ਉਪਰਿਝਾਨਸ੍ਸ ਪਚ੍ਚਯਭਾਵਸਙ੍ਖਾਤਾਯ ਸੁਭਾਵਿਤਕਿਚ੍ਚਸਿਦ੍ਧਿਯਾ ‘‘ਅਪ੍ਪਮਾਣੋ’’ਤ੍ਵੇਵ ਵੁਚ੍ਚਤਿ. ਅਪਰੇ ਪਨ ਸਚੇ ਸੁਭਾਵਿਤੋ ਪਗੁਣੋ ਵਸੀਭਾਵਂ ਪਤ੍ਤੋ ਉਪਰਿਝਾਨਸ੍ਸ ਪਚ੍ਚਯੋ ਅਹੋਨ੍ਤੋਪਿ ਅਪ੍ਪਮਾਣੋ ਏਵ, ਪਮਾਣਕਰਾਨਂ ਰਾਗਾਦਿਪਟਿਪਕ੍ਖਾਨਂ ਸੁਵਿਦੂਰਭਾਵਤੋਤਿ ਵਦਨ੍ਤਿ. ਵੁਤ੍ਤਲਕ੍ਖਣਵੋਮਿਸ੍ਸਤਾਯਾਤਿ ਯੋ ਅਪ੍ਪਗੁਣੋ ਉਪਰਿਝਾਨਸ੍ਸ ਪਚ੍ਚਯੋ ਭਵਿਤੁਂ ਨ ਸਕ੍ਕੋਤਿ, ਵਡ੍ਢਿਤੇ ਆਰਮ੍ਮਣੇ ਪਵਤ੍ਤੋ, ਅਯਂ ਪਰਿਤ੍ਤੋ ਅਪ੍ਪਮਾਣਾਰਮ੍ਮਣੋ. ਯੋ ਪਨ ਪਗੁਣੋ ਉਪਰਿਝਾਨਸ੍ਸ ਪਚ੍ਚਯੋ ਭਵਿਤੁਂ ਸਕ੍ਕੋਤਿ, ਅਵਡ੍ਢਿਤੇ ਆਰਮ੍ਮਣੇ ਪਵਤ੍ਤੋ, ਅਯਂ ਅਪ੍ਪਮਾਣੋ ਪਰਿਤ੍ਤਾਰਮ੍ਮਣੋਤਿ ਏਵਂ ਪਠਮਚਤੁਤ੍ਥਸਮਾਧੀਨਂ ਵੁਤ੍ਤਲਕ੍ਖਣਸ੍ਸ ਵੋਮਿਸ੍ਸਕਭਾਵੇਨ ਦੁਤਿਯਤਤਿਯਸਮਾਧਿਸਙ੍ਗਾਹਕੋ ਵੋਮਿਸ੍ਸਕਨਯੋ ਵੇਦਿਤਬ੍ਬੋ.

ਤਤੋਤਿ ਤਤੋ ਪਠਮਜ੍ਝਾਨਤੋ ਉਦ੍ਧਂ. ਵਿਰਤ੍ਤਪੀਤਿਕਨ੍ਤਿ ਅਤਿਕ੍ਕਨ੍ਤਪੀਤਿਕਂ ਵਾ ਜਿਗੁਚ੍ਛਿਤਪੀਤਿਕਂ ਵਾ. ਅਵਯਵੋ ਸਮੁਦਾਯਸ੍ਸ ਅਙ੍ਗਨ੍ਤਿ ਵੁਚ੍ਚਤਿ, ‘‘ਸੇਨਙ੍ਗਂ ਰਥਙ੍ਗ’’ਨ੍ਤਿਆਦੀਸੁ ਵਿਯਾਤਿ ਆਹ ‘‘ਚਤੁਨ੍ਨਂ ਝਾਨਾਨਂ ਅਙ੍ਗਭੂਤਾ ਚਤ੍ਤਾਰੋ ਸਮਾਧੀ’’ਤਿ.

ਹਾਨਂ ਭਜਤੀਤਿ ਹਾਨਭਾਗਿਯੋ, ਹਾਨਭਾਗੋ ਵਾ ਏਤਸ੍ਸ ਅਤ੍ਥੀਤਿ ਹਾਨਭਾਗਿਯੋ, ਪਰਿਹਾਨਕੋਟ੍ਠਾਸਿਕੋਤਿ ਅਤ੍ਥੋ. ਆਲਯਸ੍ਸ ਅਪੇਕ੍ਖਾਯ ਅਪਰਿਚ੍ਚਜਨਤੋ ਠਿਤਿਂ ਭਜਤੀਤਿ ਠਿਤਿਭਾਗਿਯੋ. ਵਿਸੇਸਂ ਭਜਤੀਤਿ ਵਿਸੇਸਭਾਗਿਯੋ. ਪਚ੍ਚਨੀਕਸਮੁਦਾਚਾਰਵਸੇਨਾਤਿ ਤਸ੍ਸ ਤਸ੍ਸ ਝਾਨਸ੍ਸ ਪਚ੍ਚਨੀਕਾਨਂ ਨੀਵਰਣਵਿਤਕ੍ਕਵਿਚਾਰਾਦੀਨਂ ਪਵਤ੍ਤਿਵਸੇਨ. ਤਦਨੁਧਮ੍ਮਤਾਯਾਤਿ ਤਦਨੁਰੂਪਭੂਤਾਯ ਸਤਿਯਾ. ਸਣ੍ਠਾਨਵਸੇਨਾਤਿ ਸਣ੍ਠਹਨਵਸੇਨ ਪਤਿਟ੍ਠਾਨਵਸੇਨ. ‘‘ਸਾ ਪਨ ਤਦਸ੍ਸਾਦਸਙ੍ਖਾਤਾ, ਤਦਸ੍ਸਾਦਸਮ੍ਪਯੁਤ੍ਤਕ੍ਖਨ੍ਧਸਙ੍ਖਾਤਾ ਵਾ ਮਿਚ੍ਛਾਸਤੀ’’ਤਿ ਸਮ੍ਮੋਹਵਿਨੋਦਨਿਯਂ (ਵਿਭ. ਅਟ੍ਠ. ੭੯੯) ਵੁਤ੍ਤਂ. ਤਤ੍ਥ ਸਾਪੇਕ੍ਖਸ੍ਸ ਉਪਰਿ ਵਿਸੇਸਂ ਨਿਬ੍ਬਤ੍ਤੇਤੁਂ ਅਸਕ੍ਕੁਣੇਯ੍ਯਤ੍ਤਾ ਅਵਿਗਤਨਿਕਨ੍ਤਿਕਾ ਤਂਤਂਪਰਿਹਰਣਸਤੀਤਿਪਿ ਵਤ੍ਤੁਂ ਵਟ੍ਟਤਿ. ਏਵਞ੍ਚ ਕਤ੍ਵਾ ‘‘ਸਤਿਯਾ ਵਾ ਨਿਕਨ੍ਤਿਯਾ ਵਾ’’ਤਿ ਵਿਕਪ੍ਪਵਚਨਞ੍ਚ ਯੁਤ੍ਤਂ ਹੋਤਿ. ਵਿਸੇਸਾਧਿਗਮਵਸੇਨਾਤਿ ਵਿਸੇਸਾਧਿਗਮਸ੍ਸ ਪਚ੍ਚਯਭਾਵਵਸੇਨ, ਵਿਸੇਸਂ ਵਾ ਅਧਿਗਚ੍ਛਤਿ ਏਤੇਨਾਤਿ ਵਿਸੇਸਾਧਿਗਮੋ, ਤਸ੍ਸ ਵਸੇਨ. ਨਿਬ੍ਬਿਦਾਸਹਗਤਸਞ੍ਞਾਮਨਸਿਕਾਰਸਮੁਦਾਚਾਰਵਸੇਨਾਤਿ ਆਦੀਨਵਦਸ੍ਸਨਪੁਬ੍ਬਙ੍ਗਮਨਿਬ੍ਬਿਨ੍ਦਨਞਾਣਸਮ੍ਪਯੁਤ੍ਤਸਞ੍ਞਾਯ ਚ ਆਭੋਗਸ੍ਸ ਚ ਪਵਤ੍ਤਿਵਸੇਨ. ਨਿਬ੍ਬੇਧਭਾਗਿਯਤਾਤਿ ਸਚ੍ਚਾਨਂ ਨਿਬ੍ਬਿਜ੍ਝਨਪਕ੍ਖਿਕਤਾ ਵਿਪਸ੍ਸਨਾਯ ਸਂਵਤ੍ਤਤੀਤਿ ਅਤ੍ਥੋ.

ਕਾਮਸਹਗਤਾਤਿ ਕਾਮਾਰਮ੍ਮਣਾ, ਕਾਮਸਞ੍ਞਾਹਿ ਵਾ ਵੋਕਿਣ੍ਣਾ. ਅਵਿਤਕ੍ਕਸਹਗਤਾਤਿ ‘‘ਕਥਂ ਨੁ ਖੋ ਮੇ ਅਵਿਤਕ੍ਕਂ ਝਾਨਂ ਭਵੇਯ੍ਯਾ’’ਤਿ ਏਵਂ ਅਵਿਤਕ੍ਕਾਰਮ੍ਮਣਾ ਅਵਿਤਕ੍ਕਵਿਸਯਾ. ਕਾਮਞ੍ਚਾਯਂ ‘‘ਪਠਮਸ੍ਸ ਝਾਨਸ੍ਸਾ’’ਤਿਆਦਿਕੋ ਪਾਠੋ ਪਞ੍ਞਾਵਸੇਨ ਆਗਤੋ, ਸਮਾਧਿਸ੍ਸਾਪਿ ਪਨੇਤ੍ਥ ਸਙ੍ਗਹੋ ਅਤ੍ਥੇਵਾਤਿ ਉਦਾਹਰਣਸ੍ਸ ਸਾਤ੍ਥਕਤਂ ਦਸ੍ਸੇਤੁਂ ‘‘ਤਾਯ ਪਨ ਪਞ੍ਞਾਯ ਸਮ੍ਪਯੁਤ੍ਤਾ ਸਮਾਧੀਪਿ ਚਤ੍ਤਾਰੋ ਹੋਨ੍ਤੀ’’ਤਿ ਤੇਸਂ ਵਸੇਨ ਏਵਂ ਵੁਤ੍ਤਨ੍ਤਿ ਅਤ੍ਥੋ.

ਭਾਵਨਾਮਯਸ੍ਸ ਸਮਾਧਿਸ੍ਸ ਇਧਾਧਿਪ੍ਪੇਤਤ੍ਤਾ ਉਪਚਾਰੇਕਗ੍ਗਤਾ ‘‘ਕਾਮਾਵਚਰੋ ਸਮਾਧੀ’’ਤਿ ਵੁਤ੍ਤਂ. ਅਧਿਪਤਿਂ ਕਰਿਤ੍ਵਾਤਿ ‘‘ਛਨ੍ਦਵਤੋ ਚੇ ਸਮਾਧਿ ਹੋਤਿ, ਮਯ੍ਹਮ੍ਪਿ ਏਵਂ ਹੋਤੀ’’ਤਿ ਛਨ੍ਦਂ ਅਧਿਪਤਿਂ, ਛਨ੍ਦਂ ਧੁਰਂ ਜੇਟ੍ਠਕਂ ਪੁਬ੍ਬਙ੍ਗਮਂ ਕਤ੍ਵਾ. ਲਭਤਿ ਸਮਾਧਿਨ੍ਤਿ ਏਵਂ ਯਂ ਸਮਾਧਿਂ ਲਭਤਿ, ਅਯਂ ਵੁਚ੍ਚਤਿ ਛਨ੍ਦਸਮਾਧਿ, ਛਨ੍ਦਾਧਿਪਤਿਸਮਾਧੀਤਿ ਅਤ੍ਥੋ. ਏਵਂ ਵੀਰਿਯਸਮਾਧਿਆਦਯੋਪਿ ਵੇਦਿਤਬ੍ਬਾ.

ਚਤੁਕ੍ਕਭੇਦੇਤਿ ਚਤੁਕ੍ਕਵਸੇਨ ਸਮਾਧਿਪ੍ਪਭੇਦਨਿਦ੍ਦੇਸੇ. ਅਞ੍ਞਤ੍ਥ ਸਮ੍ਪਯੋਗਵਸੇਨ ਵਿਚਾਰੇਨ ਸਹ ਵਤ੍ਤਮਾਨੋ ਵਿਤਕ੍ਕੋ ਪਞ੍ਚਕਨਯੇ ਦੁਤਿਯਜ੍ਝਾਨੇ ਵਿਯੋਜਿਤੋਪਿ ਨ ਸੁਟ੍ਠੁ ਵਿਯੋਜਿਤੋਤਿ, ਤੇਨ ਸਦ੍ਧਿਂਯੇਵ ਵਿਚਾਰਸਮਤਿਕ੍ਕਮਂ ਦਸ੍ਸੇਤੁਂ ਵੁਤ੍ਤਂ ‘‘ਵਿਤਕ੍ਕਵਿਚਾਰਾਤਿਕ੍ਕਮੇਨ ਤਤਿਯ’’ਨ੍ਤਿ. ਦ੍ਵਿਧਾ ਭਿਨ੍ਦਿਤ੍ਵਾ ਚਤੁਕ੍ਕਭੇਦੇ ਵੁਤ੍ਤਂ ਦੁਤਿਯਂ ਝਾਨਨ੍ਤਿ ਯੋਜਨਾ. ਪਞ੍ਚਝਾਨਙ੍ਗਵਸੇਨਾਤਿ ਪਞ੍ਚਨ੍ਨਂ ਝਾਨਾਨਂ ਅਙ੍ਗਭਾਵਵਸੇਨ ਸਮਾਧਿਸ੍ਸ ਪਞ੍ਚਵਿਧਤਾ ਵੇਦਿਤਬ੍ਬਾ.

੪੦. ਵਿਭਙ੍ਗੇਤਿ ਞਾਣਵਿਭਙ੍ਗੇ. ਤਤ੍ਥ ਹਿ ‘‘ਝਾਨਵਿਮੋਕ੍ਖਸਮਾਧਿਸਮਾਪਤ੍ਤੀਨਂ ਸਂਕਿਲੇਸਵੋਦਾਨ’’ਨ੍ਤਿ, ਏਤ੍ਥ ‘‘ਸਂਕਿਲੇਸ’’ਨ੍ਤਿਆਦਿ ਵੁਤ੍ਤਂ. ਤਤ੍ਥ ਹਾਨਭਾਗਿਯੋ ਧਮ੍ਮੋਤਿ ਅਪਗੁਣੇਹਿ ਪਠਮਜ੍ਝਾਨਾਦੀਹਿ ਵੁਟ੍ਠਿਤਸ੍ਸ ਸਞ੍ਞਾਮਨਸਿਕਾਰਾਨਂ ਕਾਮਾਦਿਅਨੁਪਕ੍ਖਨ੍ਦਨਂ. ਵਿਸੇਸਭਾਗਿਯੋ ਧਮ੍ਮੋਤਿ ਪਗੁਣੇਹਿ ਪਠਮਜ੍ਝਾਨਾਦੀਹਿ ਵੁਟ੍ਠਿਤਸ੍ਸ ਸਞ੍ਞਾਮਨਸਿਕਾਰਾਨਂ ਦੁਤਿਯਜ੍ਝਾਨਾਦਿਅਨੁਪਕ੍ਖਨ੍ਦਨਂ. ਤੇਨਾਹ ‘‘ਪਠਮਸ੍ਸ ਝਾਨਸ੍ਸ ਲਾਭਿ’’ਨ੍ਤਿਆਦਿ. ਤਸ੍ਸਤ੍ਥੋ (ਵਿਭ. ਅਟ੍ਠ. ੮੨੮) – ਅਪਗੁਣਸ੍ਸ ਪਠਮਸ੍ਸ ਝਾਨਸ੍ਸ ਲਾਭੀਨਂ ਤਤੋ ਵੁਟ੍ਠਿਤਂ ਆਰਮ੍ਮਣਵਸੇਨ ਕਾਮਸਹਗਤਾ ਹੁਤ੍ਵਾ ਸਞ੍ਞਾਮਨਸਿਕਾਰਾ ਸਮੁਦਾਚਰਨ੍ਤਿ ਚੋਦੇਨ੍ਤਿ ਤੁਦਨ੍ਤਿ, ਤਸ੍ਸ ਕਾਮਾਨੁਪਕ੍ਖਨ੍ਦਾਨਂ ਸਞ੍ਞਾਮਨਸਿਕਾਰਾਨਂ ਵਸੇਨ ਸਾ ਪਠਮਜ੍ਝਾਨਪਞ੍ਞਾ ਹਾਯਤਿ, ਤਸ੍ਮਾ ਹਾਨਭਾਗਿਨੀ ਪਞ੍ਞਾ. ਅਵਿਤਕ੍ਕਸਹਗਤਾਤਿ ਅਵਿਤਕ੍ਕਂ ਦੁਤਿਯਂ ਝਾਨਂ ਸਨ੍ਤਤੋ ਪਣੀਤਤੋ ਮਨਸਿ ਕਰੋਤੋ ਆਰਮ੍ਮਣਵਸੇਨ ਅਵਿਤਕ੍ਕਸਹਗਤਾ ਸਮੁਦਾਚਰਨ੍ਤਿ ਪਗੁਣਪਠਮਜ੍ਝਾਨਤੋ ਵੁਟ੍ਠਿਤਂ ਦੁਤਿਯਜ੍ਝਾਨਾਧਿਗਮਤ੍ਥਾਯ ਚੋਦੇਨ੍ਤਿ ਤੁਦਨ੍ਤਿ, ਤਸ੍ਸ ਦੁਤਿਯਜ੍ਝਾਨਾਨੁਪਕ੍ਖਨ੍ਦਾਨਂ ਸਞ੍ਞਾਮਨਸਿਕਾਰਾਨਂ ਵਸੇਨ ਪਠਮਜ੍ਝਾਨਪਞ੍ਞਾ ਵਿਸੇਸਭੂਤਸ੍ਸ ਦੁਤਿਯਜ੍ਝਾਨਸ੍ਸ ਉਪ੍ਪਤ੍ਤਿਯਾ ਪਦਟ੍ਠਾਨਤਾਯ ਵਿਸੇਸਭਾਗਿਨੀ ਪਞ੍ਞਾ. ਤਂਸਮ੍ਪਯੁਤ੍ਤੋ ਸਮਾਧਿ ਇਧਾਧਿਪ੍ਪੇਤੋ. ਇਮਿਨਾ ਨਯੇਨਾਤਿ ਇਮਿਨਾ ਪਠਮਜ੍ਝਾਨੇ ਵੁਤ੍ਤੇਨ ਵਿਧਿਨਾ ਦੁਤਿਯਜ੍ਝਾਨਾਦੀਸੁਪਿ ਹਾਨਭਾਗਿਯਧਮ੍ਮੋ, ਵਿਸੇਸਭਾਗਿਯਧਮ੍ਮੋ ਚ ਵੇਦਿਤਬ੍ਬੋ.

ਦਸਪਲਿਬੋਧਵਣ੍ਣਨਾ

੪੧. ਅਰਿਯਮਗ੍ਗਸਮ੍ਪਯੁਤ੍ਤੋਤਿ ਲੋਕੁਤ੍ਤਰਅਪ੍ਪਮਾਣਅਪਰਿਯਾਪਨ੍ਨਗ੍ਗਹਣੇਨ ਲੋਕਿਯੇਹਿ ਅਸਾਧਾਰਣਤੋ, ਸਪ੍ਪੀਤਿਕਾਦਿਗ੍ਗਹਣੇਨ ਸਾਧਾਰਣਤੋ ਚ ਅਰਿਯਮਗ੍ਗਸਮ੍ਪਯੁਤ੍ਤੋ ਸਮਾਧਿ ਵੁਤ੍ਤੋ. ਭਾਵਿਤੋ ਹੋਤਿ ਸਞ੍ਞਾਯ ਸਮ੍ਪਯੁਤ੍ਤਤ੍ਤਾ. ਤਨ੍ਤਿ ਅਰਿਯਮਗ੍ਗਸਮਾਧਿਂ. ਵਿਸੁਨ੍ਤਿ ਪਞ੍ਞਾਭਾਵਨਾਯ ਵਿਸੁਂ ਕਤ੍ਵਾ ਨ ਵਦਾਮ.

ਕਮ੍ਮਟ੍ਠਾਨਭਾਵਨਂ ਪਰਿਬੁਨ੍ਧੇਤਿ ਉਪਰੋਧੇਤਿ ਪਵਤ੍ਤਿਤੁਂ ਨ ਦੇਤੀਤਿ ਪਲਿਬੋਧੋ ਰ-ਕਾਰਸ੍ਸ ਲ-ਕਾਰਂ ਕਤ੍ਵਾ, ਪਰਿਪਨ੍ਥੋਤਿ ਅਤ੍ਥੋ. ਉਪਚ੍ਛਿਨ੍ਦਿਤ੍ਵਾਤਿ ਸਮਾਪਨੇਨ, ਸਙ੍ਗਹਣੇਨ ਵਾ ਉਪਰੁਨ੍ਧਿਤ੍ਵਾ, ਅਪਲਿਬੋਧਂ ਕਤ੍ਵਾਤਿ ਅਤ੍ਥੋ.

ਆਵਸਨ੍ਤਿ ਏਤ੍ਥਾਤਿ ਆਵਾਸੋ. ਪਰਿਚ੍ਛੇਦਵਸੇਨ ਵੇਣਿਯਤਿ ਦਿਸ੍ਸਤੀਤਿ ਪਰਿਵੇਣਂ. ਵਿਹਾਰੇ ਭਿਕ੍ਖੂਨਂ ਤਂ ਤਂ ਵਸਨਟ੍ਠਾਨਂ. ਸ੍ਵਾਯਂ ਆਵਾਸੋ. ਨਵਕਮ੍ਮਾਦੀਸੂਤਿ ਆਦਿ-ਸਦ੍ਦੇਨ ਆਵਾਸਸ੍ਸ ਤਦਞ੍ਞਂ ਅਭਿਵੁਦ੍ਧਿਕਾਰਣਂ ਸਙ੍ਗਣ੍ਹਾਤਿ. ਕਾਰਣੇਨਾਤਿ ‘‘ਛਾਯੂਦਕਸਮ੍ਪਨ੍ਨਂ ਸੁਲਭਭਿਕ੍ਖ’’ਨ੍ਤਿਆਦਿਨਾ ਕਾਰਣੇਨ. ਅਪੇਕ੍ਖਵਾਤਿ ਸਾਲਯੋ.

ਤਤ੍ਰਾਤਿ ਤਸ੍ਮਿਂ ਪਲਿਬੋਧਾਭਾਵੇ. ਪਾਚੀਨਖਣ੍ਡਰਾਜਿਨ੍ਤਿ ਪੁਰਤ੍ਥਿਮਦਿਸਾਯਂ ਪਬ੍ਬਤਖਣ੍ਡਾਨਂ ਅਨ੍ਤਰੇ ਵਨਰਾਜਿਟ੍ਠਾਨਂ. ‘‘ਨਾਮਾ’’ਤਿ ਇਮਿਨਾ ਤਸ੍ਸ ਪਦੇਸਸ੍ਸ ਅਯਂ ਸਮਞ੍ਞਾਤਿ ਦਸ੍ਸੇਤਿ. ਪਟਿਸਾਮਿਤਮੇਵਾਤਿ ਨਿਚ੍ਚਕਾਲਂ ਪਟਿਸਾਮੇਤ੍ਵਾਵ ਵਿਹਾਰਤੋ ਨਿਕ੍ਖਮਾਮੀਤਿ ਦਸ੍ਸੇਤਿ. ਧਾਤੁਨਿਧਾਨਟ੍ਠਾਨਨ੍ਤਿ ਕਾਯਬਨ੍ਧਨਧਮ੍ਮਕਰਣਨ੍ਹਾਨਸਾਟਿਕਅਕ੍ਖਕਧਾਤੁਸਙ੍ਖਾਤਾਨਂ ਪਰਿਭੋਗਸਰੀਰਧਾਤੂਨਂ ਨਿਦਹਿਤਟ੍ਠਾਨਂ. ਈਦਿਸਸ੍ਸ ਅਯਂ ਥੇਰੋ ਵਿਯ ਅਲਗ੍ਗਚਿਤ੍ਤਸ੍ਸ. ਏਤੇਨ ‘‘ਭਿਕ੍ਖੁਨਾ ਨਾਮ ਆਵਾਸੇ ਏਵਰੂਪੇਨ ਭਵਿਤਬ੍ਬ’’ਨ੍ਤਿ ਓਵਾਦੋ ਦਿਨ੍ਨੋ ਹੋਤਿ. ਇਤੋ ਪਰੇਸੁਪਿ ਵਤ੍ਥੂਸੁ ਏਸੇਵ ਨਯੋ.

ਕੁਲਨ੍ਤਿ ਕੁਲਗ੍ਗਹਣੇਨ ਕੁਲਮਨੁਸ੍ਸਾਨਂ ਗਹਣਂ ਗਾਮਗ੍ਗਹਣੇਨ ਗਾਮਵਾਸੀਨਂ ਵਿਯ. ਉਪਟ੍ਠਾਕਕੁਲਮ੍ਪੀਤਿ ਪਿ-ਸਦ੍ਦੇਨ ਪਗੇਵ ਞਾਤਿਕੁਲਨ੍ਤਿ ਦਸ੍ਸੇਤਿ. ਉਦ੍ਦੇਸਤ੍ਥਨ੍ਤਿ ਉਦ੍ਦਿਸਾਪਨਤ੍ਥਂ, ਪਾਠਂ ਉਦ੍ਦਿਸਾਪੇਤ੍ਵਾ ਸਜ੍ਝਾਯਿਤੁਨ੍ਤਿ ਅਤ੍ਥੋ. ਇਧੇਵਾਤਿ ਇਮਸ੍ਮਿਂਯੇਵ ਪਦੇਸੇ, ਯਤ੍ਥ ਕਤ੍ਥਚਿ ਵਿਹਾਰੇਤਿ ਅਤ੍ਥੋ. ਤਂ ਵਿਹਾਰਨ੍ਤਿ ਤਂ ਕੋਰਣ੍ਡਕਵਿਹਾਰਂ.

ਉਪਗਤੋਤਿ ਵਸ੍ਸਂ ਉਪਗਤੋ. ਸਦਾਤਿ ਗਤਕਾਲਤੋ ਪਭੁਤਿ ਵਿਸੇਸਤੋ ਪਵਾਰਿਤਦਿਵਸਤੋ ਪਟ੍ਠਾਯ ਸਬ੍ਬਦਾ ਦਿਵਸੇ ਦਿਵਸੇ. ਪਰਿਦੇਵਮਾਨਾਤਿ ਤਂਤਂਵਿਲਪਨਵਸੇਨ ਵਿਵਿਧਂ ਪਰਿਦੇਵਨ੍ਤੀ. ਸਬ੍ਬਂ ਪਵਤ੍ਤਿਨ੍ਤਿ ਅਤ੍ਤਨਾ ਤਤ੍ਥ ਦਿਟ੍ਠਕਾਲਤੋ ਪਟ੍ਠਾਯ ਪਚ੍ਛਾ ਸਮਾਗਮਪਰਿਯੋਸਾਨਂ ਦਹਰਸ੍ਸ ਸਬ੍ਬਂ ਪਵਤ੍ਤਿਂ.

ਕਾਯਸਕ੍ਖਿਨ੍ਤਿ ‘‘ਪਸ੍ਸ ਇਮ’’ਨ੍ਤਿ ਮੁਖਪਟਿਗ੍ਗਾਹਕਂ ਕਤ੍ਵਾ. ਰਥਵਿਨੀਤਪਟਿਪਦਨ੍ਤਿ ਦਸਕਥਾਵਤ੍ਥੁਕਿਤ੍ਤਨਪੁਬ੍ਬਿਕਂ ਰਥਵਿਨੀਤੂਪਮਾਹਿ ਵਿਭਾਵਿਤਂ ਰਥਵਿਨੀਤਸੁਤ੍ਤੇ (ਮ. ਨਿ. ੧.੨੫੨) ਆਗਤਂ ਸਤ੍ਤਵਿਸੁਦ੍ਧਿਪਟਿਪਦਂ. ਨਾਲਕਪਟਿਪਦਨ੍ਤਿ ‘‘ਮੋਨੇਯ੍ਯਂ ਤੇ ਉਪਞ੍ਞਿਸ੍ਸ’’ਨ੍ਤਿਆਦਿਨਾ (ਸੁ. ਨਿ. ੭੦੬) ਸਤ੍ਥਾਰਾ ਨਾਲਕਤ੍ਥੇਰਸ੍ਸ ਦੇਸਿਤਪਟਿਪਦਂ. ਤੁਵਟਕਪਟਿਪਦਨ੍ਤਿ ‘‘ਮੂਲਂ ਪਪਞ੍ਚਸਙ੍ਖਾਯਾ’’ਤਿਆਦਿਨਾ (ਸੁ. ਨਿ. ੯੨੨) ਭਗਵਤਾ ਦੇਸਿਤਪਟਿਪਦਂ. ਤਤ੍ਥ ਹਿ ਯਥਾਕ੍ਕਮਂ –

‘‘ਨ ਮੁਨੀ ਗਾਮਮਾਗਮ੍ਮ, ਕੁਲੇਸੁ ਸਹਸਾ ਚਰੇ;

ਘਾਸੇਸਨਂ ਛਿਨ੍ਨਕਥੋ, ਨ ਵਾਚਂ ਪਯੁਤਂ ਭਣੇ’’. (ਸੁ. ਨਿ. ੭੧੬);

‘‘ਗਾਮੇ ਚ ਨਾਭਿਸਜ੍ਜੇਯ੍ਯ, ਲਾਭਕਮ੍ਯਾ ਜਨਂ ਨ ਲਪਯੇਯ੍ਯਾ’’ਤਿ. (ਸੁ. ਨਿ. ੯੩੫) –

ਏਵਮਾਦਿਕਾ ਪਰਮਪ੍ਪਿਚ੍ਛਕਥਾ ਆਗਤਾ. ਚਤੁਪਚ੍ਚਯਸਨ੍ਤੋਸਭਾਵਨਾਰਾਮਤਾਦੀਪਕਨ੍ਤਿ ਚੀਵਰਾਦੀਸੁ ਚਤੂਸੁ ਪਚ੍ਚਯੇਸੁ ਸਨ੍ਤੋਸਸ੍ਸ, ਭਾਵਨਾਰਾਮਤਾਯ ਚ ਪਕਾਸਕਂ.

ਲਬ੍ਭਤੀਤਿ ਲਾਭੋ. ਤੇਨਾਹ ‘‘ਚਤ੍ਤਾਰੋ ਪਚ੍ਚਯਾ’’ਤਿ. ਮਹਾਪਰਿਵਾਰੇਤਿ ਵਿਪੁਲਪਰਿਵਾਰੇ. ਪਿਣ੍ਡਪਾਤਂ ਤਾਵ ਦੇਨ੍ਤਾ ਬੁਦ੍ਧਪੂਜਾਪਤ੍ਤਚੀਵਰਾਦੀਨਿ ਤਸ੍ਸ ਪਰਿਵਾਰਾਨਿ ਕਤ੍ਵਾ ਦੇਨ੍ਤਿ, ਤਥਾ ਚੀਵਰਾਦਿਦਾਨੇਪਿ. ਬਾਹੁਲ੍ਲਿਕਪਿਣ੍ਡਪਾਤਿਕਾਤਿ ਪਿਣ੍ਡਪਾਤਿਕਾ ਹੁਤ੍ਵਾ ਪਚ੍ਚਯਬਾਹੁਲ੍ਲਿਕਾ. ਵਦਨ੍ਤੀਤਿ ਪੁਰਿਮਦਿਵਸੇ ਭਿਕ੍ਖਾਯ ਆਹਿਣ੍ਡਨਕਾਲੇ ਯਥਾਸੁਤਂ ਵਦਨ੍ਤਿ. ਨਿਚ੍ਚਬ੍ਯਾਵਟੋ ਉਪਾਸਕਾਦੀਨਂ ਸਙ੍ਗਣ੍ਹਨੇ.

ਤਸ੍ਸਾਤਿ ਗਣਸ੍ਸ. ਸੋਤਿ ਗਣਪਲਿਬੋਧੋ. ਏਵਨ੍ਤਿ ਇਦਾਨਿ ਵੁਚ੍ਚਮਾਨਾਕਾਰੇਨ ਗਣਵਾਚਕਸ੍ਸ ਪਰਿਯੇਸਨਮ੍ਪਿ ਲਹੁਕਮੇਵ ਇਚ੍ਛਿਤਬ੍ਬਨ੍ਤਿ ਆਹ ‘‘ਯੋਜਨਤੋ ਪਰਂ ਅਗਨ੍ਤ੍ਵਾ’’ਤਿ. ਅਤ੍ਤਨੋ ਕਮ੍ਮਨ੍ਤਿ ਸਮਣਧਮ੍ਮਮਾਹ.

ਕਤਾਕਤੇਤਿ ਕਤੇ ਚ ਅਕਤੇ ਚ ਕਮ੍ਮੇ ਜਾਨਨਵਸੇਨ ਉਸ੍ਸੁਕ੍ਕਂ ਆਪਜ੍ਜਿਤਬ੍ਬਂ, ਕਤਾਕਤੇਤਿ ਵਾ ਅਪ੍ਪਕੇ ਚ ਮਹਨ੍ਤੇ ਚ ਕਤੇ, ਯਥਾ ‘‘ਫਲਾਫਲੇ’’ਤਿ. ਸਚੇ ਬਹੁਂ ਅਵਸਿਟ੍ਠਨ੍ਤਿ ਸਮ੍ਬਨ੍ਧੋ. ਭਾਰਹਾਰਾ ਸਙ੍ਘਕਿਚ੍ਚਪਰਿਣਾਯਕਾ.

ਪਬ੍ਬਜ੍ਜਾਪੇਕ੍ਖੋਤਿ ਸੀਹਲ਼ਦੀਪੇ ਕਿਰ ਕੁਲਦਾਰਕਾਨਂ ਪਬ੍ਬਜ੍ਜਾ ਆਵਾਹਵਿਵਾਹਸਦਿਸਾ, ਤਸ੍ਮਾ ਤਂ ਪਰਿਚ੍ਛਿਨ੍ਨਦਿਵਸਂ ਅਤਿਕ੍ਕਮੇਤੁਂ ਨ ਸਕ੍ਕਾ. ‘‘ਸਚੇ ਤਂ ਅਲਭਨ੍ਤੋ ਨ ਸਕ੍ਕੋਤਿ ਅਧਿਵਾਸੇਤੁ’’ਨ੍ਤਿਆਦਿਨਾ ਸਮਾਪਨੇਨ ਪਲਿਬੋਧੁਪਚ੍ਛੇਦੋ ਵੁਤ੍ਤੋ, ਬ੍ਯਤਿਰੇਕਤੋ ਪਨ ‘‘ਸਚੇ ਤਂ ਅਲਭਨ੍ਤੋ ਸਕ੍ਕੋਤਿ ਅਧਿਵਾਸੇਤੁਂ, ਅਰਞ੍ਞਂ ਪਵਿਸਿਤ੍ਵਾ ਸਮਣਧਮ੍ਮੋਵ ਕਾਤਬ੍ਬੋ’’ਤਿ ਅਯਮਤ੍ਥੋ ਦਸ੍ਸਿਤੋਤਿ ਸਙ੍ਗਹਣੇਨ ਪਲਿਬੋਧੁਪਚ੍ਛੇਦੋ ਵੇਦਿਤਬ੍ਬੋ. ਏਸ ਨਯੋ ਸੇਸੇਸੁਪਿ.

ਤਥਾਤਿ ਯਥਾ ਉਪਜ੍ਝਾਯੋ ਗਿਲਾਨੋ ਯਾਵਜੀਵਂ ਉਪਟ੍ਠਾਤਬ੍ਬੋ, ਤਥਾ ਉਪਸਮ੍ਪਾਦਿਤਅਨ੍ਤੇਵਾਸਿਕੋ ਅਤ੍ਤਨੋ ਕਮ੍ਮਵਾਚਂ ਵਤ੍ਵਾ ਉਪਸਮ੍ਪਾਦਿਤੋ.

ਯੋ ਕੋਚਿ ਰੋਗੋਤਿ ਮੂਲਭੂਤੋ, ਅਨੁਬਨ੍ਧੋ ਵਾ ਅਤ੍ਤਨੋ ਉਪ੍ਪਨ੍ਨੋ. ਅਨਮਤਗ੍ਗੇਤਿ ਅਨੁ ਅਨੁ ਅਮਤਗ੍ਗੇ ਅਨਾਦਿਮਤਿ.

‘‘ਗਨ੍ਥੋ’’ਤਿ ਇਮਿਨਾ ਗਨ੍ਥਪਲਿਬੋਧੋ ਇਧ ਵੁਤ੍ਤੋਤਿ ਆਹ ‘‘ਪਰਿਯਤ੍ਤਿਹਰਣ’’ਨ੍ਤਿ. ਸਜ੍ਝਾਯਾਦੀਹੀਤਿ ਸਜ੍ਝਾਯਧਾਰਣਪਰਿਚਯਪੁਚ੍ਛਾਦੀਹਿ. ਇਤਰਸ੍ਸਾਤਿ ਅਬ੍ਯਾਵਟਸ੍ਸ. ਯਸ੍ਸ ਗਨ੍ਥਧੁਰਂ ਵਿਸ੍ਸਜ੍ਜੇਤ੍ਵਾ ਠਿਤਸ੍ਸਾਪਿ ਗਨ੍ਥੋ ਵਤ੍ਤਤੇਵ, ਨ ਤਸ੍ਸ ਗਨ੍ਥੋ ਪਲਿਬੋਧੋ. ਯਥਾ ਤਮ੍ਹਿ ਤਮ੍ਹਿ ਵਤ੍ਥੁਮ੍ਹਿ ਆਗਤਤ੍ਥੇਰਾਨਂ, ਨਾਪਿ ਸਬ੍ਬੇਨ ਸਬ੍ਬਂ ਅਗਨ੍ਥਪਸੁਤਸ੍ਸ. ਮਜ੍ਝਿਮਪਣ੍ਣਾਸਕੋ ਆਗਚ੍ਛਤਿ, ਸੁਤ੍ਤਪਦੇਸਾਨਂ ਵਾਰਾਨਞ੍ਚ ਸਦਿਸਤਾਯ ਬ੍ਯਾਮੁਯ੍ਹਨਤੋ. ਪੁਨ ਨ ਓਲੋਕੇਸ੍ਸਾਮੀਤਿ ਕਮ੍ਮਟ੍ਠਾਨਂ ਗਹੇਤ੍ਵਾ ਗਨ੍ਥਧੁਰਂ ਵਿਸ੍ਸਜ੍ਜੇਮੀਤਿ ਅਤ੍ਥੋ.

ਗਾਮਵਾਸਿਕਤ੍ਥੇਰੇਹੀਤਿ ਅਨੁਰਾਧਪੁਰਵਾਸੀਹਿ. ਅਨੁਗ੍ਗਹੇਤ੍ਵਾਤਿ ਅਗ੍ਗਹੇਤ੍ਵਾ ਤਤ੍ਥ ਪਰਿਚਯਂ ਅਕਤ੍ਵਾ. ਪਞ੍ਚਨਿਕਾਯਮਣ੍ਡਲੇਤਿ ਦੀਘਾਗਮਾਦਿਕੇ ਪਞ੍ਚਪਿ ਨਿਕਾਯੇ ਸਿਕ੍ਖਿਤਪਰਿਸਾਯ. ਪਰਿਵਤ੍ਤੇਸ੍ਸਾਮੀਤਿ ਵਣ੍ਣਯਿਸ੍ਸਾਮਿ. ਸੁਵਣ੍ਣਭੇਰਿਨ੍ਤਿ ਸੇਟ੍ਠਭੇਰਿਂ. ਕਤਮਾਚਰਿਯਾਨਂ ਉਗ੍ਗਹੋਤਿ ਕਤਮੇਸਂ ਆਚਰਿਯਾਨਂ ਉਗ੍ਗਹੋ, ਕੇਨ ਪਰਿਵਤ੍ਤੀਯਤੀਤਿ ਅਧਿਪ੍ਪਾਯੋ. ਆਚਰਿਯਮਗ੍ਗੋਤਿ ਆਚਰਿਯਾਨਂ ਕਥਾਮਗ੍ਗੋ. ਅਤ੍ਤਨੋ ਆਚਰਿਯਾਨਨ੍ਤਿ ਅਤ੍ਤਨੋ ਕਥੇਤੁਂ ਯੁਤ੍ਤਾਨਂ ਆਚਰਿਯਾਨਂ. ਸੁਵਿਨਿਚ੍ਛਿਤਾ ਸਬ੍ਬਾ ਤਿਪਿਟਕਪਰਿਯਤ੍ਤਿ ਏਤਸ੍ਮਿਂ ਅਤ੍ਥੀਤਿ ਸਬ੍ਬਪਰਿਯਤ੍ਤਿਕੋ, ਤੇਪਿਟਕੋਤਿ ਅਤ੍ਥੋ. ਪੀਠੇ ਨਿਸਿਨ੍ਨੋ ਤਤੋ ਓਤਰਿਤ੍ਵਾ ਭੂਮਿਯਂ ਤਟ੍ਟਿਕਾਯ ਨਿਸੀਦਿਤ੍ਵਾ. ਗਤਕਸ੍ਸਾਤਿ ਪਟਿਪਤ੍ਤਿਗਮਨੇਨ ਗਤਸ੍ਸ ਦਿਟ੍ਠਸਚ੍ਚਸ੍ਸ. ਚੀਵਰਂ ਪਾਰੁਪਿਤ੍ਵਾਤਿ ਆਚਰਿਯਸ੍ਸ ਅਪਚਿਤਿਦਸ੍ਸਨਤ੍ਥਂ ਪਰਿਮਣ੍ਡਲਂ ਚੀਵਰਂ ਪਾਰੁਪਿਤ੍ਵਾ. ਸਾਠੇਯ੍ਯਾਭਾਵਤੋ ਉਜੁ. ਕਾਰਣਾਕਾਰਣਸ੍ਸ ਆਜਾਨਨਤੋ ਆਜਾਨੀਯੋ.

ਪੋਥੁਜ੍ਜਨਿਕਾਤਿ ਪੁਥੁਜ੍ਜਨੇ ਭਵਾ. ਦੁਪ੍ਪਰਿਹਾਰਾ ਬਹੁਪਰਿਸ੍ਸਯਤਾਯ. ਤਥਾ ਹਿਸ੍ਸਾ ਉਤ੍ਤਾਨਸੇਯ੍ਯਕਦਾਰਕੋ, ਤਰੁਣਸਸ੍ਸਞ੍ਚ ਨਿਦਸ੍ਸਿਤਂ. ਵਿਪਸ੍ਸਨਾਯ ਪਲਿਬੋਧੋ ਸਮਥਯਾਨਿਕਸ੍ਸ, ਨ ਵਿਪਸ੍ਸਨਾਯਾਨਿਕਸ੍ਸ. ਯੇਭੁਯ੍ਯੇਨ ਹਿ ਝਾਨਲਾਭੀ ਸਮਥਯਾਨਿਕੋਵ ਹੋਤਿ ਵਿਪਸ੍ਸਨਾਸੁਖਤੋ. ਇਤਰੇਨਾਤਿ ਸਮਥਤ੍ਥਿਕੇਨ. ਅਵਸੇਸਾ ਨਵ ਪਲਿਬੋਧਾ.

ਕਮ੍ਮਟ੍ਠਾਨਦਾਯਕਵਣ੍ਣਨਾ

੪੨. ਕਮ੍ਮਟ੍ਠਾਨੇ ਨਿਯੁਤ੍ਤੋ ਕਮ੍ਮਟ੍ਠਾਨਿਕੋ, ਭਾਵਨਮਨੁਯੁਞ੍ਜਨ੍ਤੋ. ਤੇਨ ਕਮ੍ਮਟ੍ਠਾਨਿਕੇਨ. ਪਰਿਚ੍ਛਿਨ੍ਦਿਤ੍ਵਾਤਿ ‘‘ਇਮਸ੍ਮਿਂ ਵਿਹਾਰੇ ਸਬ੍ਬੇ ਭਿਕ੍ਖੂ’’ਤਿ ਏਵਂ ਪਰਿਚ੍ਛਿਨ੍ਦਿਤ੍ਵਾ. ਸਹਵਾਸੀਨਂ ਭਿਕ੍ਖੂਨਂ. ਮੁਦੁਚਿਤ੍ਤਤਨ੍ਤਿ ਅਤ੍ਤਨਿ ਮੁਦੁਚਿਤ੍ਤਤਂ ਜਨੇਤਿ, ਅਯਞ੍ਚ ਸਹਵਾਸੀਨਂ ਚਿਤ੍ਤਮਦ੍ਦਵਜਨਨਾਦਿਅਤ੍ਥੋ ‘‘ਮਨੁਸ੍ਸਾਨਂ ਪਿਯੋ ਹੋਤੀ’’ਤਿਆਦਿਨਯਪ੍ਪਵਤ੍ਤੇਨ ਮੇਤ੍ਤਾਨਿਸਂਸਸੁਤ੍ਤੇਨ (ਅ. ਨਿ. ੧੧.੧੫; ਪਟਿ. ਮ. ੨.੨੨; ਮਿ. ਪ. ੪.੪.੬) ਦੀਪੇਤਬ੍ਬੋ. ਅਨੋਲੀਨਵੁਤ੍ਤਿਕੋ ਹੋਤਿ ਸਮ੍ਮਾਪਟਿਪਤ੍ਤਿਯਂ. ਦਿਬ੍ਬਾਨਿਪਿ ਆਰਮ੍ਮਣਾਨਿ ਪਗੇਵ ਇਤਰਾਨਿ. ਸਬ੍ਬਤ੍ਥ ਸਬ੍ਬਸ੍ਮਿਂ ਸਮਣਕਰਣੀਯੇ, ਸਬ੍ਬਸ੍ਮਿਂ ਵਾ ਕਮ੍ਮਟ੍ਠਾਨਾਨੁਯੋਗੇ. ਪੁਬ੍ਬਾਸੇਵਨਵਸੇਨ ਅਤ੍ਥਯਿਤਬ੍ਬਂ. ਯੋਗਸ੍ਸ ਭਾਵਨਾਯ ਅਨੁਯੁਞ੍ਜਨਂ ਯੋਗਾਨੁਯੋਗੋ, ਤਦੇਵ ਕਰਣੀਯਟ੍ਠੇਨ ਕਮ੍ਮਂ, ਤਸ੍ਸ ਯੋਗਾਨੁਯੋਗਕਮ੍ਮਸ੍ਸ ਠਾਨਂ ਨਿਪ੍ਫਤ੍ਤਿਹੇਤੁ.

ਨਿਚ੍ਚਂ ਪਰਿਹਰਿਤਬ੍ਬਤ੍ਤਾਤਿ ਸਬ੍ਬਤ੍ਥਕਕਮ੍ਮਟ੍ਠਾਨਂ ਵਿਯ ਏਕਦਾਵ ਅਨਨੁਯੁਞ੍ਜਿਤ੍ਵਾ ਸਬ੍ਬਕਾਲਂ ਪਰਿਹਰਣੀਯਤ੍ਤਾ ਅਨੁਯੁਞ੍ਜਿਤਬ੍ਬਤ੍ਤਾ. ਏਵਮਾਦਿਗੁਣਸਮਨ੍ਨਾਗਤਨ੍ਤਿ ਪਿਯਭਾਵਾਦੀਹਿ ਗੁਣੇਹਿ ਸਮ੍ਪਨ੍ਨਂ. ਕਲ੍ਯਾਣਮਿਤ੍ਤੋ ਹਿ ਸਦ੍ਧਾਸਮ੍ਪਨ੍ਨੋ ਹੋਤਿ ਸੀਲਸਮ੍ਪਨ੍ਨੋ ਸੁਤਸਮ੍ਪਨ੍ਨੋ ਚਾਗਸਮ੍ਪਨ੍ਨੋ ਵੀਰਿਯਸਮ੍ਪਨ੍ਨੋ ਸਤਿਸਮ੍ਪਨ੍ਨੋ ਸਮਾਧਿਸਮ੍ਪਨ੍ਨੋ ਪਞ੍ਞਾਸਮ੍ਪਨ੍ਨੋ. ਤਤ੍ਥ ਸਦ੍ਧਾਸਮ੍ਪਤ੍ਤਿਯਾ ਸਦ੍ਦਹਤਿ ਤਥਾਗਤਸ੍ਸ ਬੋਧਿਂ, ਕਮ੍ਮਫਲਞ੍ਚ, ਤੇਨ ਸਮ੍ਮਾਸਮ੍ਬੋਧਿਯਾ ਹੇਤੁਭੂਤਂ ਸਤ੍ਤੇਸੁ ਹਿਤੇਸਿਤਂ ਨ ਪਰਿਚ੍ਚਜਤਿ. ਸੀਲਸਮ੍ਪਤ੍ਤਿਯਾ ਸਤ੍ਤਾਨਂ ਪਿਯੋ ਹੋਤਿ ਗਰੁ ਭਾਵਨੀਯੋ ਚੋਦਕੋ ਪਾਪਗਰਹੀ ਵਤ੍ਤਾ ਵਚਨਕ੍ਖਮੋ, ਸੁਤਸਮ੍ਪਤ੍ਤਿਯਾ ਸਚ੍ਚਪਟਿਚ੍ਚਸਮੁਪ੍ਪਾਦਾਦਿਪਟਿਸਂਯੁਤ੍ਤਾਨਂ ਗਮ੍ਭੀਰਾਨਂ ਕਥਾਨਂ ਕਤ੍ਤਾ ਹੋਤਿ, ਚਾਗਸਮ੍ਪਤ੍ਤਿਯਾ ਅਪ੍ਪਿਚ੍ਛੋ ਹੋਤਿ ਸਨ੍ਤੁਟ੍ਠੋ ਪਵਿਵਿਤ੍ਤੋ ਅਸਂਸਟ੍ਠੋ, ਵੀਰਿਯਸਮ੍ਪਤ੍ਤਿਯਾ ਆਰਦ੍ਧਵੀਰਿਯੋ ਹੋਤਿ ਅਤ੍ਤਹਿਤਪਰਹਿਤਪਟਿਪਤ੍ਤਿਯਂ, ਸਤਿਸਮ੍ਪਤ੍ਤਿਯਾ ਉਪਟ੍ਠਿਤਸ੍ਸਤਿ ਹੋਤਿ, ਸਮਾਧਿਸਮ੍ਪਤ੍ਤਿਯਾ ਅਵਿਕ੍ਖਿਤ੍ਤੋ ਸਮਾਹਿਤਚਿਤ੍ਤੋ, ਪਞ੍ਞਾਸਮ੍ਪਤ੍ਤਿਯਾ ਅਵਿਪਰੀਤਂ ਪਜਾਨਾਤਿ. ਸੋ ਸਤਿਯਾ ਕੁਸਲਾਕੁਸਲਾਨਂ ਧਮ੍ਮਾਨਂ ਗਤਿਯੋ ਸਮਨ੍ਨੇਸਮਾਨੋ ਪਞ੍ਞਾਯ ਸਤ੍ਤਾਨਂ ਹਿਤਾਹਿਤਂ ਯਥਾਭੂਤਂ ਜਾਨਿਤ੍ਵਾ ਸਮਾਧਿਨਾ ਤਤ੍ਥ ਏਕਗ੍ਗਚਿਤ੍ਤੋ ਹੁਤ੍ਵਾ ਵੀਰਿਯੇਨ ਸਤ੍ਤੇ ਅਹਿਤਂ ਨਿਸੇਧੇਤ੍ਵਾ ਹਿਤੇ ਨਿਯੋਜੇਤਿ. ਤੇਨ ਵੁਤ੍ਤਂ ‘‘ਪਿਯੋ…ਪੇ… ਨਿਯੋਜਕੋਤਿ ਏਵਮਾਦਿਗੁਣਸਮਨ੍ਨਾਗਤ’’ਨ੍ਤਿ.

ਤਂ ਪਨ ਕਲ੍ਯਾਣਮਿਤ੍ਤਂ ਪਰਮੁਕ੍ਕਂਸਗਤਂ ਦਸ੍ਸੇਤੁਂ ‘‘ਮਮਂ ਹੀ’’ਤਿਆਦਿ ਵੁਤ੍ਤਂ. ਕਾਰਕਭਾਵਂ ਯੋਗਕਮ੍ਮਸ੍ਸ. ਪਕਾਸੇਤਿ ਅਤ੍ਤਾਨਂ ਪਟਿਪਤ੍ਤਿਯਾ ਅਮੋਘਭਾਵਦਸ੍ਸਨੇਨ ਸਮੁਤ੍ਤੇਜਨਾਯ, ਸਮ੍ਪਹਂਸਨਾਯ ਚ, ਨਨੁ ਕਥੇਸਿ ਪਵੇਣਿਪਾਲਨਤ੍ਥਨ੍ਤਿ ਅਧਿਪ੍ਪਾਯੋ. ਏਵਰੂਪੋਤਿ ਪੇਸਲੋ ਹੁਤ੍ਵਾ ਬਹੁਸ੍ਸੁਤੋ. ਤਨ੍ਤਿਧਰੋਤਿ ਸੁਤ੍ਤਧਰੋ ਤਤ੍ਥ ਕੇਹਿਚਿਪਿ ਅਸਂਹੀਰੋ. ਵਂਸਾਨੁਰਕ੍ਖਕੋਤਿ ਬੁਦ੍ਧਾਨੁਬੁਦ੍ਧਵਂਸਸ੍ਸ ਅਨੁਰਕ੍ਖਕੋ. ਪਵੇਣਿਪਾਲਕੋਤਿ ਪਵੇਣਿਯਾ ਆਚਰਿਯੁਗ੍ਗਹਣਸ੍ਸ ਅਨੁਪਾਲਕੋ. ਆਚਰਿਯਮਤਿਕੋਤਿ ਆਚਰਿਯਮਤਿਯਂ ਨਿਯੁਤ੍ਤੋ ਤਸ੍ਸਾ ਅਨਤਿਵਤ੍ਤਨਤੋ. ਨ ਅਤ੍ਤਨੋਮਤਿਂ ਪਕਾਸੇਤਿ ਕਥੇਤੀਤਿ ਨ ਅਤ੍ਤਨੋਮਤਿਕੋ, ਅਤ੍ਤਨੋ ਮਤਿਂ ਪਗ੍ਗਯ੍ਹ ਵਤ੍ਤਾ ਨ ਹੋਤੀਤਿ ਅਤ੍ਥੋ.

‘‘ਪੁਬ੍ਬੇ ਵੁਤ੍ਤਖੀਣਾਸਵਾਦਯੋ’’ਤਿਆਦਿ ਏਕਚ੍ਚਖੀਣਾਸਵਤੋ ਬਹੁਸ੍ਸੁਤੋਵ ਕਮ੍ਮਟ੍ਠਾਨਦਾਨੇ ਸੇਯ੍ਯੋਤਿ ਦਸ੍ਸਨਤ੍ਥਂ ਆਰਦ੍ਧਂ. ਤਤ੍ਥ ਪੁਬ੍ਬੇ ਵੁਤ੍ਤਖੀਣਾਸਵਾਦਯੋਤਿ ‘‘ਯਂ ਕਮ੍ਮਟ੍ਠਾਨਂ ਗਹੇਤੁਕਾਮੋ’’ਤਿਆਦਿਨਾ ਵੁਤ੍ਤਖੀਣਾਸਵਾਦਿਕਾ. ਉਗ੍ਗਹਪਰਿਪੁਚ੍ਛਾਨਂ ਵਿਸੋਧਿਤਤ੍ਤਾਤਿ ਉਗ੍ਗਹੇਤਬ੍ਬਤੋ ‘‘ਉਗ੍ਗਹੋ’’ਤਿ ਲਦ੍ਧਨਾਮਾਯ ਕਮ੍ਮਟ੍ਠਾਨੁਪਕਾਰਾਯ ਪਾਲ਼ਿਯਾ, ਤਦਤ੍ਥਂ ਪਰਿਪੁਚ੍ਛਨਤੋ ‘‘ਪਰਿਪੁਚ੍ਛਾ’’ਤਿ ਲਦ੍ਧਸਮਞ੍ਞਾਯ ਅਤ੍ਥਸਂਵਣ੍ਣਨਾਯ ਚ ਵਿਸੇਸਤੋ ਸੋਧਿਤਤ੍ਤਾ ਨਿਗ੍ਗੁਮ੍ਬਂ ਨਿਜ੍ਜਟਂ ਕਤ੍ਵਾ ਗਹਿਤਤ੍ਤਾ. ਇਤੋ ਚਿਤੋ ਚ ਸੁਤ੍ਤਞ੍ਚ ਕਾਰਣਞ੍ਚ ਸਲ੍ਲਕ੍ਖੇਤ੍ਵਾਤਿ ਪਞ੍ਚਸੁਪਿ ਨਿਕਾਯੇਸੁ ਇਤੋ ਚਿਤੋ ਚ ਤਸ੍ਸ ਤਸ੍ਸ ਕਮ੍ਮਟ੍ਠਾਨਸ੍ਸ ਅਨੁਰੂਪਂ ਸੁਤ੍ਤਪਦਞ੍ਚੇਵ ਸੁਤ੍ਤਾਨੁਗਤਂ ਯੁਤ੍ਤਿਞ੍ਚ ਸੁਟ੍ਠੁ ਉਪਲਕ੍ਖੇਤ੍ਵਾ. ਸਪ੍ਪਾਯਾਸਪ੍ਪਾਯਂ ਯੋਜੇਤ੍ਵਾਤਿ ਯਸ੍ਸ ਕਮ੍ਮਟ੍ਠਾਨਂ ਆਚਿਕ੍ਖਤਿ, ਤਸ੍ਸ ਉਪਕਾਰਾਨੁਪਕਾਰਂ ਯੁਤ੍ਤਿਂ ਮਗ੍ਗਨੇਨ ਯੋਜੇਤ੍ਵਾ, ਸਮਾਦਾਯ ਵਾ ਸਮ੍ਮਦੇਵ ਹਦਯੇ ਠਪੇਤ੍ਵਾਤਿ ਅਤ੍ਥੋ. ਮਹਾਮਗ੍ਗਂ ਦਸ੍ਸੇਨ੍ਤੋਤਿ ਕਮ੍ਮਟ੍ਠਾਨਵਿਧਿਂ ਮਹਾਮਗ੍ਗਂ ਕਤ੍ਵਾ ਦਸ੍ਸੇਨ੍ਤੋ.

ਸਬ੍ਬਤ੍ਥਾਤਿ ਤਤ੍ਥ ਤਤ੍ਥ ਵਿਹਾਰੇ. ਵਤ੍ਤਪਟਿਪਤ੍ਤਿਂ ਕੁਰੁਮਾਨੇਨਾਤਿ ਪਵਿਟ੍ਠਕਾਲੇ ਆਗਨ੍ਤੁਕਵਤ੍ਤਂ, ਨਿਕ੍ਖਮਨਕਾਲੇ ਗਮਿਕਵਤ੍ਤਨ੍ਤਿ ਯਥਾਰਹਂ ਤਂ ਤਂ ਵਤ੍ਤਂ ਪੂਰੇਨ੍ਤੇਨ. ਸਬ੍ਬਪਾਰਿਹਾਰਿਯਤੇਲਨ੍ਤਿ ਸਬ੍ਬੇਸਂ ਅਙ੍ਗਾਨਂ, ਸਬ੍ਬੇਸਂ ਵਾ ਭਿਕ੍ਖੂਨਂ ਅਤ੍ਥਾਯ ਪਰਿਹਰਿਤਬ੍ਬਤੇਲਂ. ਠਪੇਮੀਤਿ ਅਨੁਜਾਨਾਪਨਂ. ਯਂ ਤਂ ਸਮ੍ਮਾਵਤ੍ਤਂ ਪਞ੍ਞਤ੍ਤਨ੍ਤਿ ਸਮ੍ਬਨ੍ਧੋ. ਏਕਦਿਵਸਂ ਸਾਯਂ ਵਿਸ੍ਸਜ੍ਜਿਤੇਨਾਪੀਤਿ ਯੋਜਨਾ. ਆਰੋਚੇਤਬ੍ਬਂ ਆਗਮਨਕਾਰਣਂ. ਸਪ੍ਪਾਯਵੇਲਾ ਸਰੀਰਚਿਤ੍ਤਾਨਂ ਕਲ੍ਲਸਮਯੋ.

ਚਰਿਯਾਵਣ੍ਣਨਾ

੪੩. ਸਨ੍ਤਾਨੇ ਰਾਗਸ੍ਸ ਉਸ੍ਸਨ੍ਨਭਾਵੇਨ ਚਰਣਂ ਪਵਤ੍ਤਿ ਰਾਗਚਰਿਯਾ, ਸਾ ਸਸ੍ਸਤਾਸਯਾਦਯੋ ਵਿਯ ਦਟ੍ਠਬ੍ਬਾ. ਤਥਾ ਦੋਸਚਰਿਯਾਦਯੋ. ਸਂਸਗ੍ਗੋ ਸਮ੍ਪਯੋਗਾਰਹਵਸੇਨ ਵੇਦਿਤਬ੍ਬੋ, ਯਥਾ ‘‘ਰਾਗਮੋਹਚਰਿਯਾ ਦੋਸਮੋਹਚਰਿਯਾ’’ਤਿਆਦਿ. ਸਨ੍ਨਿਪਾਤੋ ਏਕਸਨ੍ਤਤਿਪਰਿਯਾਪਨ੍ਨਤਾਵਸੇਨ, ਯਥਾ ‘‘ਰਾਗਦੋਸਚਰਿਯਾ ਰਾਗਦੋਸਮੋਹਚਰਿਯਾ’’ਤਿਆਦਿ. ਇਮਾ ਏਵ ਹਿ ਸਨ੍ਧਾਯ ‘‘ਅਪਰਾਪਿ ਚਤਸ੍ਸੋ’’ਤਿ ਵੁਤ੍ਤਂ. ਤਥਾਤਿ ਯਥਾ ਰਾਗਾਦੀਨਂ, ਤਥਾ ਸਦ੍ਧਾਦੀਨਂ ਸਂਸਗ੍ਗਸਨ੍ਨਿਪਾਤਵਸੇਨ ਸਦ੍ਧਾਬੁਦ੍ਧਿਚਰਿਯਾ ਸਦ੍ਧਾਵਿਤਕ੍ਕਚਰਿਯਾ ਬੁਦ੍ਧਿਵਿਤਕ੍ਕਚਰਿਯਾ ਸਦ੍ਧਾਬੁਦ੍ਧਿਵਿਤਕ੍ਕਚਰਿਯਾਤਿ. ਇਮਾ ਅਪਰਾਪਿ ਚਤਸ੍ਸੋ. ਏਵਨ੍ਤਿ ਸਂਸਗ੍ਗਸਨ੍ਨਿਪਾਤਵਸੇਨ. ਸਂਸਗ੍ਗਨ੍ਤਿ ਸਂਸਜ੍ਜਨਂ ਮਿਸ੍ਸੀਕਰਣਂ ‘‘ਰਾਗਸਦ੍ਧਾਚਰਿਯਾ ਦੋਸਸਦ੍ਧਾਚਰਿਯਾ’’ਤਿਆਦਿਨਾ. ਅਨੇਕਾਤਿ ਤੇਸਟ੍ਠਿ, ਤਤੋ ਅਤਿਰੇਕਾਪਿ ਵਾ, ਤਾ ਪਨ ਅਸਮ੍ਮੋਹਨ੍ਤੇਨ ਸਂਯੁਤ੍ਤਸੁਤ੍ਤਟੀਕਾਯਂ ਵਿਤ੍ਥਾਰਤੋ ਦਸ੍ਸਿਤਾਤਿ ਤਤ੍ਥ ਵੁਤ੍ਤਨਯੇਨ ਵੇਦਿਤਬ੍ਬਾ. ‘‘ਪਕਤੀ’’ਤਿ ਇਮਿਨਾ ਅਸਤਿ ਪਟਿਪਕ੍ਖਭਾਵਨਾਯਂ ਤਤ੍ਥ ਤਤ੍ਥ ਸਨ੍ਤਾਨੇ ਚਰਿਯਾਯ ਸਭਾਵਭੂਤਤਂ ਦਸ੍ਸੇਤਿ. ਉਸ੍ਸਨ੍ਨਤਾ ਅਞ੍ਞਧਮ੍ਮੇਹਿ ਰਾਗਾਦੀਨਂ ਅਧਿਕਤਾ, ਯਤੋ ਰਾਗਚਰਿਯਾਦੀਨਂ ਪਚ੍ਚਯਸਮਵਾਯੇ ਰਾਗਾਦਯੋ ਬਲਵਨ੍ਤੋ ਹੋਨ੍ਤਿ, ਅਭਿਣ੍ਹਞ੍ਚ ਪਵਤ੍ਤਨ੍ਤਿ. ਤਾਸਂ ਵਸੇਨਾਤਿ ਛਨ੍ਨਂ ਮੂਲਚਰਿਯਾਨਂ ਵਸੇਨ ਛਲ਼ੇਵ ਪੁਗ੍ਗਲਾ ਹੋਨ੍ਤਿ. ਅਞ੍ਞਥਾ ਅਨੇਕਪੁਗ੍ਗਲਾ ਸਿਯੁਂ, ਤਥਾ ਚ ਸਤਿ ਅਧਿਪ੍ਪੇਤਤ੍ਥਸਿਦ੍ਧਿ ਚ ਨ ਸਿਯਾਤਿ ਅਧਿਪ੍ਪਾਯੋ.

ਸਦ੍ਧਾ ਬਲਵਤੀ ਹੋਤਿ ਰਾਗੁਸ੍ਸਨ੍ਨੇ ਸਨ੍ਤਾਨੇ ਤਦਨੁਗੁਣਸ੍ਸ ਧਮ੍ਮਸ੍ਸ ਨਿਯੋਗਤੋ ਅਧਿਕਭਾਵਸਮ੍ਭਵਤੋ. ਤੇਨਾਹ ‘‘ਰਾਗਸ੍ਸ ਆਸਨ੍ਨਗੁਣਤ੍ਤਾ’’ਤਿ, ਸਿਨੇਹਪਰਿਯੇਸਨਾਪਰਿਚ੍ਚਜਨੇਹਿ ਸਭਾਗਧਮ੍ਮਤ੍ਤਾਤਿ ਅਤ੍ਥੋ. ਸਭਾਗੋ ਹਿ ਦੂਰੇਪਿ ਆਸਨ੍ਨੇਯੇਵਾਤਿ ਸਭਾਗਤਾਲਕ੍ਖਣਮਿਧ ਆਸਨ੍ਨਗ੍ਗਹਣਂ. ਤਤ੍ਥ ਸਦ੍ਧਾਯ ਸਿਨਿਯ੍ਹਨਂ ਪਸਾਦਵਸੇਨ ਅਕਾਲੁਸ੍ਸਿਯਂ ਅਲੂਖਤਾ, ਰਾਗਸ੍ਸ ਪਨ ਰਞ੍ਜਨਵਸੇਨ. ਸਦ੍ਧਾਯ ਪਰਿਯੇਸਨਂ ਅਧਿਮੁਚ੍ਚਨਵਸੇਨ ਤਨ੍ਨਿਨ੍ਨਤਾ, ਰਾਗਸ੍ਸ ਤਣ੍ਹਾਯਨਵਸੇਨ. ਸਦ੍ਧਾਯ ਅਪਰਿਚ੍ਚਜਨਂ ਓਕਪ੍ਪਨਵਸੇਨ ਅਨੁਪਕ੍ਖਨ੍ਦਨਂ, ਰਾਗਸ੍ਸ ਅਭਿਸਙ੍ਗਵਸੇਨਾਤਿ ਏਵਂ ਭਿਨ੍ਨਸਭਾਵਾਨਮ੍ਪਿ ਤੇਸਂ ਯਥਾ ਅਲੂਖਤਾਦਿਸਾਮਞ੍ਞੇਨ ਸਭਾਗਤਾ, ਏਵਂ ਤਂਸਮਙ੍ਗੀਨਮ੍ਪਿ ਪੁਗ੍ਗਲਾਨਨ੍ਤਿ ਆਹ ‘‘ਰਾਗਚਰਿਤਸ੍ਸ ਸਦ੍ਧਾਚਰਿਤੋ ਸਭਾਗੋ’’ਤਿ.

ਪਞ੍ਞਾ ਬਲਵਤੀ ਹੋਤਿ ਦੋਸੁਸ੍ਸਨ੍ਨੇ ਸਨ੍ਤਾਨੇ ਤਦਨੁਗੁਣਸ੍ਸ ਧਮ੍ਮਸ੍ਸ ਨਿਯੋਗਤੋ ਅਧਿਕਭਾਵਸਮ੍ਭਵਤੋ. ਤੇਨਾਹ ‘‘ਦੋਸਸ੍ਸ ਆਸਨ੍ਨਗੁਣਤ੍ਤਾ’’ਤਿ, ਅਨਲ੍ਲੀਯਨਪਰਿਯੇਸਨਪਰਿਵਜ੍ਜਨੇਹਿ ਸਭਾਗਧਮ੍ਮਤ੍ਤਾਤਿ ਅਤ੍ਥੋ. ਤਤ੍ਥ ਪਞ੍ਞਾਯ ਆਰਮ੍ਮਣਸ੍ਸ ਅਨਲ੍ਲੀਯਨਂ ਤਸ੍ਸ ਯਥਾਸਭਾਵਾਵਬੋਧਵਸੇਨ ਵਿਸਂਸਟ੍ਠਤਾ, ਦੋਸਸ੍ਸ ਪਨ ਬ੍ਯਾਪਜ੍ਜਨਵਸੇਨ. ਪਞ੍ਞਾਯ ਪਰਿਯੇਸਨਂ ਯਥਾਭੂਤਦੋਸਪਵਿਚਯੋ, ਦੋਸਸ੍ਸ ਅਭੂਤਦੋਸਨਿਜਿਗੀਸਾ. ਪਞ੍ਞਾਯ ਪਰਿਵਜ੍ਜਨਂ ਨਿਬ੍ਬਿਨ੍ਦਨਾਦਿਵਸੇਨ ਞਾਣੁਤ੍ਰਾਸੋ, ਦੋਸਸ੍ਸ ਅਹਿਤਾਧਾਨਵਸੇਨ ਛਡ੍ਡਨਨ੍ਤਿ ਏਵਂ ਭਿਨ੍ਨਸਭਾਵਾਨਮ੍ਪਿ ਤੇਸਂ ਯਥਾ ਅਨਲ੍ਲੀਯਨਾਦਿਸਾਮਞ੍ਞੇਨ ਸਭਾਗਤਾ, ਏਵਂ ਤਂਸਮਙ੍ਗੀਨਮ੍ਪਿ ਪੁਗ੍ਗਲਾਨਨ੍ਤਿ ਆਹ ‘‘ਦੋਸਚਰਿਤਸ੍ਸ ਬੁਦ੍ਧਿਚਰਿਤੋ ਸਭਾਗੋ’’ਤਿ.

ਅਨ੍ਤਰਾਯਕਰਾ ਵਿਤਕ੍ਕਾਤਿ ਮਿਚ੍ਛਾਵਿਤਕ੍ਕਾ ਮਿਚ੍ਛਾਸਙ੍ਕਪ੍ਪਾ ਉਪ੍ਪਜ੍ਜਨ੍ਤਿ ਮੋਹੁਸ੍ਸਨ੍ਨੇ ਸਨ੍ਤਾਨੇ ਤਦਨੁਗੁਣਸ੍ਸ ਧਮ੍ਮਸ੍ਸ ਯੇਭੁਯ੍ਯੇਨ ਪਵਤ੍ਤਿਸਬ੍ਭਾਵਤੋ. ਤੇਨਾਹ ‘‘ਮੋਹਸ੍ਸ ਆਸਨ੍ਨਲਕ੍ਖਣਤ੍ਤਾ’’ਤਿ, ਅਨਵਟ੍ਠਾਨਚਞ੍ਚਲਭਾਵੇਹਿ ਸਭਾਗਧਮ੍ਮਤ੍ਤਾਤਿ ਅਤ੍ਥੋ. ਤਤ੍ਥ ਵਿਤਕ੍ਕਸ੍ਸ ਅਨਵਟ੍ਠਾਨਂ ਪਰਿਕਪ੍ਪਵਸੇਨ ਸਵਿਪ੍ਫਾਰਤਾਯ, ਮੋਹਸ੍ਸ ਸਮ੍ਮੂਲ਼੍ਹਤਾਵਸੇਨ ਬ੍ਯਾਕੁਲਤਾਯ. ਤਥਾ ਵਿਤਕ੍ਕਸ੍ਸ ਲਹੁਪਰਿਵਿਤਕ੍ਕਨੇਨ ਤਦਙ੍ਗਚਲਤਾਯ ਚਞ੍ਚਲਤਾ, ਮੋਹਸ੍ਸ ਅਨੋਗਾਲ਼੍ਹਤਾਯਾਤਿ ਏਵਂ ਭਿਨ੍ਨਸਭਾਵਾਨਮ੍ਪਿ ਤੇਸਂ ਯਥਾ ਅਨਵਟ੍ਠਾਨਾਦਿਸਾਮਞ੍ਞੇਨ ਸਭਾਗਤਾ, ਏਵਂ ਤਂਸਮਙ੍ਗੀਨਮ੍ਪਿ ਪੁਗ੍ਗਲਾਨਨ੍ਤਿ ਆਹ ‘‘ਮੋਹਚਰਿਤਸ੍ਸ ਵਿਤਕ੍ਕਚਰਿਤੋ ਸਭਾਗੋ’’ਤਿ.

ਤਣ੍ਹਾ ਰਾਗੋਯੇਵ ਸਭਾਵਤੋ, ਤਸ੍ਮਾ ਰਾਗਚਰਿਯਾਵਿਨਿਮੁਤ੍ਤਾ ਤਣ੍ਹਾਚਰਿਯਾ ਨਤ੍ਥੀਤਿ ਅਤ੍ਥੋ. ਤਂਸਮ੍ਪਯੁਤ੍ਤੋਤਿ ਤੇਨ ਰਾਗੇਨ ਸਮ੍ਪਯੁਤ੍ਤੋ, ਦੋਸਾਦਯੋ ਵਿਯ ਤੇਨ ਵਿਪ੍ਪਯੁਤ੍ਤੋ ਨਤ੍ਥੀਤਿ ਅਧਿਪ੍ਪਾਯੋ. ਤਦੁਭਯਨ੍ਤਿ ਤਣ੍ਹਾਮਾਨਦ੍ਵਯਂ. ਨਾਤਿਵਤ੍ਤਤੀਤਿ ਸਭਾਵਤੋ, ਸਮ੍ਪਯੋਗਵਸੇਨ ਚ ਨ ਅਤਿਕ੍ਕਮਿਤ੍ਵਾ ਵਟ੍ਟਤਿ. ਕਾਮਞ੍ਚੇਤ੍ਥ ਯਥਾ ਰਾਗਦੋਸੇਹਿ ਸਮ੍ਪਯੋਗਵਸੇਨ ਸਹ ਵਤ੍ਤਮਾਨਸ੍ਸਪਿ ਮੋਹਸ੍ਸ ਉਸ੍ਸਨ੍ਨਤਾਵਸੇਨ ਵਿਸੁਂ ਚਰਿਯਾਭਾਵੋ, ਨ ਕੇਵਲਂ ਮੋਹਸ੍ਸੇਵ, ਤਥਾ ਸਦ੍ਧਾਬੁਦ੍ਧਿਵਿਤਕ੍ਕਾਨਂ. ਏਵਂ ਰਾਗੇਨ ਸਤਿਪਿ ਸਮ੍ਪਯੋਗੇ ਮਾਨਸ੍ਸਾਪਿ ਵਿਸੁਂ ਚਰਿਯਾਭਾਵੋ ਯੁਤ੍ਤੋ ਸਿਯਾ, ਏਵਂ ਸਨ੍ਤੇਪਿ ਰਾਗਪਟਿਘਮਾਨਦਿਟ੍ਠਿਵਿਚਿਕਿਚ੍ਛਾਵਿਜ੍ਜਾਨਂ ਵਿਯ ਅਨੁਸਯਟ੍ਠੋ ਇਮੇਸਂ ਰਾਗਾਦੀਨਂਯੇਵ ਆਵੇਣਿਕੋ ਚਰਿਯਟ੍ਠੋਤਿ, ਨਤ੍ਥੇਵ ਮਾਨਚਰਿਯਾ. ਯਤੋ ਚਰਿਯਾ ‘‘ਪਕਤੀ’’ਤਿ ਵੁਤ੍ਤਾ. ਪਕਤਿ ਚ ਸਭਾਵੋਤਿ. ਏਤੇਨੇਵ ਦਿਟ੍ਠਿਯਾਪਿ ਵਿਸੁਂ ਚਰਿਯਾਭਾਵਾਭਾਵੋ ਸਂਵਣ੍ਣਿਤੋਤਿ ਦਟ੍ਠਬ੍ਬੋ. ਅਟ੍ਠਕਥਾਯਂ ਪਨ ਮੋਹਚਰਿਯਨ੍ਤੋਗਧਾਵ ਦਿਟ੍ਠਿਚਰਿਯਾਤਿ ਦਸ੍ਸੇਤੁਂ ‘‘ਮੋਹਨਿਦਾਨਤ੍ਤਾ ਚਾ’’ਤਿਆਦਿ ਵੁਤ੍ਤਂ. ਤਤ੍ਥ ਚ-ਸਦ੍ਦੇਨ ਸਮ੍ਪਯੋਗਂ ਸਮੁਚ੍ਚਿਨੋਤਿ ਮੋਹਨਿਦਾਨਤ੍ਤਾ, ਮੋਹਸਮ੍ਪਯੁਤ੍ਤਤ੍ਤਾ ਚਾਤਿ.

੪੪. ਕਿਂ ਸਪ੍ਪਾਯਨ੍ਤਿ ਕੀਦਿਸਂ ਸੇਨਾਸਨਾਦਿਸਪ੍ਪਾਯਂ. ਪੁਬ੍ਬਾਚਿਣ੍ਣਂ ਪੁਰਿਮਜਾਤੀਸੁ ਆਚਰਿਤਂ. ਏਕਚ੍ਚੇਤਿ ਉਪਤਿਸ੍ਸਤ੍ਥੇਰਂ ਸਨ੍ਧਾਯਾਹ. ਤੇਨ ਹਿ ਵਿਮੁਤ੍ਤਿਮਗ੍ਗੇ ਤਥਾ ਵੁਤ੍ਤਂ. ਪੁਬ੍ਬੇ ਕਿਰਾਤਿ ਕਿਰ-ਸਦ੍ਦੋ ਅਰੁਚਿਸੂਚਨਤ੍ਥੋ. ਇਟ੍ਠਪ੍ਪਯੋਗੋ ਮਨਾਪਕਿਰਿਯਾ. ਸੁਭਕਮ੍ਮਬਹੁਲੋ ਯੇਭੁਯ੍ਯੇਨ ਸੋਭਨਕਮ੍ਮਕਾਰੀ. ਨ ਸਬ੍ਬੇ ਰਾਗਚਰਿਤਾ ਏਵ ਹੋਨ੍ਤਿ, ਅਲੁਦ੍ਧਾਨਮ੍ਪਿ ਪੁਬ੍ਬੇ ਇਟ੍ਠਪ੍ਪਯੋਗਸੁਭਕਮ੍ਮਬਹੁਲਤਾਸਮ੍ਭਵਤੋ, ਸਗ੍ਗਾ ਚਵਿਤ੍ਵਾ ਇਧੂਪਪਤ੍ਤਿਸਮ੍ਭਵਤੋ ਚ. ਏਤੇਨ ਅਸਤਿ ਪੁਬ੍ਬਹੇਤੁਨਿਯਾਮੇ ਯਥਾਵੁਤ੍ਤਕਾਰਣਮਤ੍ਤੇਨ ਨ ਤੇਸਂ ਲੁਦ੍ਧਤਾ, ਲੁਦ੍ਧਭਾਵਹੇਤੁਕਾ ਚ ਰਾਗਚਰਿਯਾਤਿ ਇਮਮਤ੍ਥਂ ਦਸ੍ਸੇਤਿ.

ਇਤਰੇਤਿ ਛੇਦਨਾਦਿਕਮ੍ਮਬਹੁਲਾ ਨਿਰਯਾਦਿਤੋ ਇਧੂਪਪਨ੍ਨਾ ਚ ਨ ਸਬ੍ਬੇ ਦੋਸਮੋਹਚਰਿਤਾ ਏਵ ਹੋਨ੍ਤੀਤਿ ਯੋਜਨਾ. ਇਧਾਪਿ ਯਥਾਵੁਤ੍ਤਕਾਰਣਸ੍ਸ ਕੋਧਨਭਾਵੇ, ਮੂਲ਼੍ਹਭਾਵੇ ਚ ਅਨੇਕਨ੍ਤਿਕਤ੍ਤਾ ਦੋਸਮੋਹਚਰਿਤਤਾਯਪਿ ਅਨੇਕਂਸਿਕਤਾ ਵੇਦਿਤਬ੍ਬਾ. ਧਾਤੂਨਂ ਉਸ੍ਸਦਨਿਯਮੋ ਯਦਿ ਪਮਾਣਤੋ, ਸੋ ਨਤ੍ਥਿ, ਅਥ ਸਾਮਤ੍ਥਿਯਤੋ, ਸੋਪਿ ਏਕਂਸਿਕੋ ਨ ਉਪਲਬ੍ਭਤੀਤਿ ਦਸ੍ਸੇਨ੍ਤੋ ਆਹ ‘‘ਯਥਾਵੁਤ੍ਤੇਨੇਵ ਨਯੇਨ ਉਸ੍ਸਦਨਿਯਮੋ ਨਾਮ ਨਤ੍ਥੀ’’ਤਿ. ਤਤ੍ਥ ਯਥਾਵੁਤ੍ਤੇਨੇਵਾਤਿ ‘‘ਦ੍ਵਿਨ੍ਨਂ ਪਨ ਧਾਤੂਨ’’ਨ੍ਤਿਆਦਿਨਾ ਵੁਤ੍ਤਪ੍ਪਕਾਰੇਨੇਵ. ਦੋਸਨਿਯਮੇਤਿ ਸੇਮ੍ਹਾਦਿਦੋਸਾਧਿਕਤਾਯ ਰਾਗਾਦਿਚਰਿਤੋ ਹੋਤੀਤਿ ਦੋਸਵਸੇਨ ਚਰਿਯਾਨਿਯਮੇ ‘‘ਸੇਮ੍ਹਾਧਿਕੋ ਰਾਗਚਰਿਤੋ’’ਤਿ ਵਤ੍ਵਾ ਪੁਨ ‘‘ਸੇਮ੍ਹਾਧਿਕੋ ਮੋਹਚਰਿਤੋ’’ਤਿ, ‘‘ਵਾਤਾਧਿਕੋ ਮੋਹਚਰਿਤੋ’’ਤਿ ਵਤ੍ਵਾ ਪੁਨ ‘‘ਵਾਤਾਧਿਕੋ ਰਾਗਚਰਿਤੋ’’ਤਿ ਚ ਵੁਤ੍ਤਤ੍ਤਾ ਤਮ੍ਪਿ ਦੋਸਵਸੇਨ ਨਿਯਮਵਚਨਂ ਪੁਬ੍ਬਾਪਰਵਿਰੁਦ੍ਧਮੇਵ. ਅਪਰਿਚ੍ਛਿਨ੍ਨਵਚਨਨ੍ਤਿ ਪਰਿਚ੍ਛੇਦਕਾਰਿਕਾਯ ਪਞ੍ਞਾਯ ਨ ਪਰਿਚ੍ਛਿਨ੍ਦਿਤ੍ਵਾ ਵੁਤ੍ਤਵਚਨਂ, ਅਨੁਪਪਰਿਕ੍ਖਿਤਵਚਨਨ੍ਤਿ ਅਤ੍ਥੋ.

ਉਸ੍ਸਦਕਿਤ੍ਤਨੇਤਿ ਵਿਪਾਕਕਥਾਯਂ ਗਹਿਤਉਸ੍ਸਦਕਿਤ੍ਤਨੇ. ਪੁਬ੍ਬਹੇਤੁਨਿਯਾਮੇਨਾਤਿ ਪੁਰਿਮਭਵੇ ਪਵਤ੍ਤਲੋਭਾਦਿਹੇਤੁਨਿਯਾਮੇਨ. ਨਿਯਾਮੋਤਿ ਚ ਤੇਸਂਯੇਵ ਲੋਭਾਦੀਨਂ ਪਟਿਨਿਯਤੋ ਲੁਬ੍ਭਨਾਦਿਸਭਾਵੋ ਦਟ੍ਠਬ੍ਬੋ. ਲੋਭੋ ਉਸ੍ਸਦੋ ਏਤੇਸਨ੍ਤਿ ਲੋਭੁਸ੍ਸਦਾ, ਉਸ੍ਸਨ੍ਨਲੋਭਾ, ਲੋਭਾਧਿਕਾਤਿ ਅਤ੍ਥੋ. ਅਮੋਹੁਸ੍ਸਦਾ ਚਾਤਿ ਏਤ੍ਥ ਚ-ਸਦ੍ਦੋ ਸਮ੍ਪਿਣ੍ਡਨਤ੍ਥੋ. ਤੇਨ ਯੇ ਇਮੇ ਲੋਭੁਸ੍ਸਦਤਾਦੀਨਂ ਪਚ੍ਚੇਕਂ ਵੋਮਿਸ੍ਸਤੋ ਚ ਚੁਦ੍ਦਸ ਪਭੇਦਾ ਇਚ੍ਛਿਤਾ, ਤੇ ਅਨਵਸੇਸਤੋ ਸਮ੍ਪਿਣ੍ਡੇਤਿ ਯਥਾਵੁਤ੍ਤੇਸੁ ਛਸ੍ਵੇਵ ਤੇਸਂ ਅਨ੍ਤੋਗਧਤ੍ਤਾ. ਫਲਭੂਤਾ ਚੇਤ੍ਥ ਲੋਭੁਸ੍ਸਦਤਾਦਯੋ ਦਟ੍ਠਬ੍ਬਾ.

ਇਦਾਨਿ ਤਂ ਨੇਸਂ ਲੋਭੁਸ੍ਸਦਤਾਦੀਨਂ ਪਚ੍ਚੇਕਂ ਵੋਮਿਸ੍ਸਕਤਾਦਿਂ ਵਿਭਾਗੇਨ ਦਸ੍ਸੇਤੁਂ ‘‘ਯਸ੍ਸ ਹੀ’’ਤਿਆਦਿ ਆਰਦ੍ਧਂ. ਕਮ੍ਮਾਯੂਹਨਕ੍ਖਣੇਤਿ ਕਮ੍ਮਕਰਣਵੇਲਾਯਂ. ਲੋਭੋ ਬਲਵਾਤਿ ਲੋਭੋ ਤਜ੍ਜਾਯ ਪਚ੍ਚਯਸਾਮਗ੍ਗਿਯਾ ਸਾਮਤ੍ਥਿਯਤੋ ਅਧਿਕੋ ਹੋਤਿ. ਅਲੋਭੋ ਮਨ੍ਦੋਤਿ ਤਪ੍ਪਟਿਪਕ੍ਖੋ ਅਲੋਭੋ ਦੁਬ੍ਬਲੋ. ਕਥਂ ਪਨੇਤੇ ਲੋਭਾਲੋਭਾ ਅਞ੍ਞਮਞ੍ਞਂ ਉਜੁਵਿਪਚ੍ਚਨੀਕਭੂਤਾ ਏਕਕ੍ਖਣੇ ਪਵਤ੍ਤਨ੍ਤੀਤਿ? ਨ ਖੋ ਪਨੇਤਂ ਏਵਂ ਦਟ੍ਠਬ੍ਬਂ ‘‘ਏਕਕ੍ਖਣੇ ਪਵਤ੍ਤਨ੍ਤੀ’’ਤਿ. ਨਿਕਨ੍ਤਿਕ੍ਖਣਂ ਪਨ ਆਯੂਹਨਪਕ੍ਖਿਯਮੇਵ ਕਤ੍ਵਾ ਏਵਂ ਵੁਤ੍ਤਂ. ਏਸੇਵ ਨਯੋ ਸੇਸੇਸੁਪਿ. ਪਰਿਯਾਦਾਤੁਨ੍ਤਿ ਅਭਿਭਵਿਤੁਂ ਨ ਸਕ੍ਕੋਤਿ. ਯੋ ਹਿ ‘‘ਏਵਂਸੁਨ੍ਦਰਂ ਏਵਂਵਿਪੁਲਂ ਏਵਂਮਹਗ੍ਘਞ੍ਚ ਨ ਸਕ੍ਕਾ ਦਾਤੁ’’ਨ੍ਤਿਆਦਿਨਾ ਅਮੁਤ੍ਤਚਾਗਤਾਦਿਵਸੇਨ ਪਵਤ੍ਤਾਯ ਚੇਤਨਾਯ ਸਮ੍ਪਯੁਤ੍ਤੋ ਅਲੋਭੋ, ਸੋ ਸਮ੍ਮਦੇਵ ਲੋਭਂ ਪਰਿਯਾਦਾਤੁਂ ਨ ਸਕ੍ਕੋਤਿ. ਦੋਸਮੋਹਾਨਂ ਅਨੁਪ੍ਪਤ੍ਤਿਯਾ, ਤਾਦਿਸਪਚ੍ਚਯਲਾਭੇਨ ਚ ਅਦੋਸਾਮੋਹਾ ਬਲਵਨ੍ਤੋ. ਤਸ੍ਮਾਤਿ ਲੋਭਾਦੋਸਾਮੋਹਾਨਂ ਬਲਵਭਾਵਤੋ, ਅਲੋਭਦੋਸਮੋਹਾਨਞ੍ਚ ਦੁਬ੍ਬਲਭਾਵਤੋਤਿ ਵੁਤ੍ਤਮੇਵ ਕਾਰਣਂ ਪਚ੍ਚਾਮਸਤਿ. ਸੋਤਿ ਤਂਸਮਙ੍ਗੀਪੁਗ੍ਗਲੋ. ਤੇਨ ਕਮ੍ਮੇਨਾਤਿ ਤੇਨ ਲੋਭਾਦਿਉਪਨਿਸ੍ਸਯਵਤਾ ਕੁਸਲਕਮ੍ਮੁਨਾ. ਸੁਖਸੀਲੋਤਿ ਸਖਿਲੋ. ਤਮੇਵਤ੍ਥਂ ‘‘ਅਕ੍ਕੋਧਨੋ’’ਤਿ ਪਰਿਯਾਯੇਨ ਵਦਤਿ.

ਪੁਰਿਮਨਯੇਨੇਵਾਤਿ ਪੁਬ੍ਬੇ ਵੁਤ੍ਤਨਯਾਨੁਸਾਰੇਨ ਮਨ੍ਦਾ ਅਲੋਭਾਦੋਸਾ ਲੋਭਦੋਸੇ ਪਰਿਯਾਦਾਤੁਂ ਨ ਸਕ੍ਕੋਨ੍ਤਿ, ਅਮੋਹੋ ਪਨ ਬਲਵਾ ਮੋਹਂ ਪਰਿਯਾਦਾਤੁਂ ਸਕ੍ਕੋਤੀਤਿ ਏਵਂ ਤਤ੍ਥ ਤਤ੍ਥ ਵਾਰੇ ਯਥਾਰਹਂ ਅਤਿਦੇਸਤ੍ਥੋ ਵੇਦਿਤਬ੍ਬੋ. ਦੁਟ੍ਠੋਤਿ ਕੋਧਨੋ. ਦਨ੍ਧੋਤਿ ਮਨ੍ਦਪਞ੍ਞੋ. ਸੀਲਕੋਤਿ ਸੁਖਸੀਲੋ.

ਏਤ੍ਥ ਚ ਲੋਭਵਸੇਨ, ਦੋਸਮੋਹਲੋਭਦੋਸਲੋਭਮੋਹਦੋਸਮੋਹਲੋਭਦੋਸਮੋਹਵਸੇਨਾਤਿ ਤਯੋ ਏਕਕਾ, ਤਯੋ ਦੁਕਾ, ਏਕੋ ਤਿਕੋਤਿ ਲੋਭਾਦਿਉਸ੍ਸਦਵਸੇਨ ਅਕੁਸਲਪਕ੍ਖੇਯੇਵ ਸਤ੍ਤ ਵਾਰਾ, ਤਥਾ ਕੁਸਲਪਕ੍ਖੇ ਅਲੋਭਾਦਿਉਸ੍ਸਦਵਸੇਨਾਤਿ ਚੁਦ੍ਦਸ ਵਾਰਾ ਲਬ੍ਭਨ੍ਤਿ. ਤਤ੍ਥ ਅਲੋਭਦੋਸਾਮੋਹਾ, ਅਲੋਭਾਦੋਸਮੋਹਾ, ਅਲੋਭਦੋਸਮੋਹਾ ਬਲਵਨ੍ਤੋਤਿ ਆਗਤੇਹਿ ਕੁਸਲਪਕ੍ਖੇ ਤਤਿਯਦੁਤਿਯਪਠਮਵਾਰੇਹਿ ਦੋਸੁਸ੍ਸਦਮੋਹੁਸ੍ਸਦਦੋਸਮੋਹੁਸ੍ਸਦਵਾਰਾ ਗਹਿਤਾ ਏਵ ਹੋਨ੍ਤਿ, ਤਥਾ ਅਕੁਸਲਪਕ੍ਖੇ ਲੋਭਾਦੋਸਮੋਹਾ, ਲੋਭਦੋਸਾਮੋਹਾ, ਲੋਭਾਦੋਸਾਮੋਹਾ ਬਲਵਨ੍ਤੋਤਿ ਆਗਤੇਹਿ ਤਤਿਯਦੁਤਿਯਪਠਮਵਾਰੇਹਿ ਅਦੋਸੁਸ੍ਸਦਅਮੋਹੁਸ੍ਸਦਅਦੋਸਾਮੋਹੁਸ੍ਸਦਵਾਰਾ ਗਹਿਤਾ ਏਵਾਤਿ ਅਕੁਸਲਕੁਸਲਪਕ੍ਖੇਸੁ ਤਯੋ ਤਯੋ ਵਾਰੇ ਅਨ੍ਤੋਗਧੇ ਕਤ੍ਵਾ ਅਟ੍ਠੇਵ ਵਾਰਾ ਦਸ੍ਸਿਤਾ. ਯੇ ਪਨ ਉਭਯੇਸਂ ਮਿਸ੍ਸਤਾਵਸੇਨ ਲੋਭਾਲੋਭੁਸ੍ਸਦਵਾਰਾਦਯੋ ਅਪਰੇ ਏਕੂਨਪਞ੍ਞਾਸ ਵਾਰਾ ਦਸ੍ਸੇਤਬ੍ਬਾ, ਤੇ ਅਲਬ੍ਭਨਤੋ ਏਵ ਨ ਦਸ੍ਸਿਤਾ. ਨ ਹਿ ਏਕਸ੍ਮਿਂ ਸਨ੍ਤਾਨੇ ਅਨ੍ਤਰੇਨ ਅਵਤ੍ਥਨ੍ਤਰਂ ‘‘ਲੋਭੋ ਚ ਬਲਵਾ, ਅਲੋਭੋ ਚਾ’’ਤਿਆਦਿ ਯੁਜ੍ਜਤੀਤਿ, ਪਟਿਪਕ੍ਖਵਸੇਨ ਵਾ ਹਿ ਏਤੇਸਂ ਬਲਵਦੁਬ੍ਬਲਭਾਵੋ, ਸਹਜਾਤਧਮ੍ਮਵਸੇਨ ਵਾ. ਤਤ੍ਥ ਲੋਭਸ੍ਸ ਤਾਵ ਪਟਿਪਕ੍ਖਵਸੇਨ ਅਲੋਭੇਨ ਅਨਧਿਭੂਤਤਾਯ ਬਲਵਭਾਵੋ, ਤਥਾ ਦੋਸਮੋਹਾਨਂ ਅਦੋਸਾਮੋਹੇਹਿ. ਅਲੋਭਾਦੀਨਂ ਪਨ ਲੋਭਾਦਿਅਭਿਭਵਨਤੋ, ਸਬ੍ਬੇਸਞ੍ਚ ਸਮਾਨਜਾਤਿਯਮਭਿਭੁਯ੍ਯ ਪਵਤ੍ਤਿਵਸੇਨ ਸਹਜਾਤਧਮ੍ਮਤੋ ਬਲਵਭਾਵੋ. ਤੇਨ ਵੁਤ੍ਤਂ ਅਟ੍ਠਕਥਾਯਂ ‘‘ਲੋਭੋ ਬਲਵਾ ਅਲੋਭੋ ਮਨ੍ਦੋ, ਅਦੋਸਾਮੋਹਾ ਬਲਵਨ੍ਤੋ ਦੋਸਮੋਹਾ ਮਨ੍ਦਾ’’ਤਿ. ਸੋ ਚ ਨੇਸਂ ਮਨ੍ਦਬਲਵਭਾਵੋ ਪੁਰਿਮੂਪਨਿਸ੍ਸਯਤੋ ਤਥਾ ਆਸਯਸ੍ਸ ਪਰਿਭਾਵਿਤਤਾਯ ਵੇਦਿਤਬ੍ਬੋ.

ਯੋ ਲੁਦ੍ਧੋਤਿ ਵੁਤ੍ਤੋਤਿ ਯੋ ਉਸ੍ਸਦਕਿਤ੍ਤਨੇ ‘‘ਲੁਦ੍ਧੋ’’ਤਿ ਵੁਤ੍ਤੋ, ਅਯਂ ਇਧ ਚਰਿਯਾਵਿਚਾਰੇ ‘‘ਰਾਗਚਰਿਤੋ’’ਤਿ ਵੇਦਿਤਬ੍ਬੋ. ਦੁਟ੍ਠਦਨ੍ਧਾਤਿ ‘‘ਦੁਟ੍ਠੋ, ਦਨ੍ਧੋ’’ਤਿ ਚ ਵੁਤ੍ਤਾ ਯਥਾਕ੍ਕਮਂ ਦੋਸਮੋਹਚਰਿਤਾ. ਪਞ੍ਞਵਾਤਿ ਸਾਤਿਸਯਂ ਸਪ੍ਪਞ੍ਞੋ. ਯਤੋ ਸਦ੍ਧਾਵਿਤਕ੍ਕੇਸੁ ਵਿਜ੍ਜਮਾਨੇਸੁਪਿ ਬੁਦ੍ਧਿਚਰਿਤੋਤਿ ਵੁਚ੍ਚਤਿ. ਅਲੋਭਾਦੋਸਾਨਂ ਬਲਵਭਾਵੋ ਸਦ੍ਧੂਪਨਿਸ੍ਸਯਤਾਯ ਵਿਨਾ ਨ ਹੋਤੀਤਿ ਆਹ ‘‘ਅਲੁਦ੍ਧਅਦੁਟ੍ਠਾ ਪਸਨ੍ਨਪਕਤਿਤਾਯ ਸਦ੍ਧਾਚਰਿਤਾ’’ਤਿ.

ਅਯਞ੍ਚ ਨਯੋ ਸਾਧਾਰਣਤੋ ਵੁਤ੍ਤੋਤਿ ਨਿਬ੍ਬਤ੍ਤਿਤਪੁਬ੍ਬਹੇਤੁਨਿਯਾਮਵਸੇਨੇਵ ਬੁਦ੍ਧਿਚਰਿਤਾਦਿਕੇਪਿ ਦਸ੍ਸੇਤੁਂ ‘‘ਯਥਾ ਵਾ’’ਤਿਆਦਿ ਵੁਤ੍ਤਂ. ਤਤ੍ਥ ਅਮੋਹਪਰਿਵਾਰੇਨਾਤਿ ਅਮੋਹਪਰਿਕ੍ਖਿਤ੍ਤੇਨ, ਉਪਨਿਸ੍ਸਯਤੋ ਸਮ੍ਪਯੋਗਤੋ ਚ ਪਞ੍ਞਾਯ ਅਭਿਸਙ੍ਖਤੇਨਾਤਿ ਅਤ੍ਥੋ. ਸੇਸਪਦਤ੍ਤਯੇਪਿ ਏਸੇਵ ਨਯੋ. ਲੋਭਾਦਿਨਾ ਵੋਮਿਸ੍ਸਪਰਿਵਾਰੇਨਾਤਿ ਏਤ੍ਥ ਲੋਭਮੋਹਾਦਿਨਾ ਅਞ੍ਞਮਞ੍ਞਅਵਿਰੁਦ੍ਧਵੋਮਿਸ੍ਸਪਰਿਵਾਰੇਨਾਤਿ ਅਤ੍ਥੋ. ਅਵਿਰੋਧੋ ਚ ਯੁਗਗ੍ਗਾਹਵਸੇਨ ਅਪ੍ਪਵਤ੍ਤਿਯਾ ਵੇਦਿਤਬ੍ਬੋ. ਤਥਾ ਹਿ ਸਦ੍ਧਾਨੁਸਾਰਿਧਮ੍ਮਾਨੁਸਾਰਿਗੋਤ੍ਤਾਨਿ ਅਞ੍ਞਮਞ੍ਞਮ੍ਪਿ ਭਿਨ੍ਨਸਭਾਵਾਨੇਵ. ਏਕਂਸੇਨ ਚ ਮਿਸ੍ਸਕਚਰਿਯਾਪਿ ਸਮ੍ਪਟਿਚ੍ਛਿਤਬ੍ਬਾ ਪੁਬ੍ਬਹੇਤੁਨਿਯਾਮੇਨ ਚਰਿਯਾਸਿਦ੍ਧਿਤੋ. ਤਥਾ ਚੇਵ ਉਸ੍ਸਦਕਿਤ੍ਤਨਂ ਪਵਤ੍ਤਂ ਯਥਾਰਹਂ ਲੋਭਾਲੋਭਾਦੀਨਂ ਵਿਪਾਕਸ੍ਸ ਪਚ੍ਚਯਭਾਵਤੋ. ਤੇਨਾਹ ਪਟਿਸਮ੍ਭਿਦਾਮਗ੍ਗੇ (ਪਟਿ. ਮ. ੧.੨੩੨) –

‘‘ਗਤਿਸਮ੍ਪਤ੍ਤਿਯਾ ਞਾਣਸਮ੍ਪਯੁਤ੍ਤੇ ਕਤਮੇਸਂ ਅਟ੍ਠਨ੍ਨਂ ਹੇਤੂਨਂ ਪਚ੍ਚਯਾ ਉਪਪਤ੍ਤਿ ਹੋਤਿ? ਕੁਸਲਕਮ੍ਮਸ੍ਸ ਜਵਨਕ੍ਖਣੇ ਤਯੋ ਹੇਤੂ ਕੁਸਲਾ ਤਸ੍ਮਿਂ ਖਣੇ ਜਾਤਚੇਤਨਾਯ ਸਹਜਾਤਪਚ੍ਚਯਾ ਹੋਨ੍ਤਿ, ਤੇਨ ਵੁਚ੍ਚਤਿ ਕੁਸਲਮੂਲਪਚ੍ਚਯਾਪਿ ਸਙ੍ਖਾਰਾ. ਨਿਕਨ੍ਤਿਕ੍ਖਣੇ ਦ੍ਵੇ ਹੇਤੂ ਅਕੁਸਲਾ ਤਸ੍ਮਿਂ ਖਣੇ ਜਾਤਚੇਤਨਾਯ ਸਹਜਾਤਪਚ੍ਚਯਾ ਹੋਨ੍ਤਿ, ਤੇਨ ਵੁਚ੍ਚਤਿ ਅਕੁਸਲਮੂਲਪਚ੍ਚਯਾਪਿ ਸਙ੍ਖਾਰਾ. ਪਟਿਸਨ੍ਧਿਕ੍ਖਣੇ ਤਯੋ ਹੇਤੂ ਅਬ੍ਯਾਕਤਾ ਤਸ੍ਮਿਂ ਖਣੇ ਜਾਤਚੇਤਨਾਯ ਸਹਜਾਤਪਚ੍ਚਯਾ ਹੋਨ੍ਤਿ, ਤੇਨ ਵੁਚ੍ਚਤਿ ਨਾਮਰੂਪਪਚ੍ਚਯਾਪਿ ਵਿਞ੍ਞਾਣਂ, ਵਿਞ੍ਞਾਣਪਚ੍ਚਯਾਪਿ ਨਾਮਰੂਪ’’ਨ੍ਤਿ –

ਆਦਿ. ਪੁਬ੍ਬਹੇਤੁਨਿਯਾਮੇਨ ਚ ਯਥਾ ਤਿਹੇਤੁਕਸ੍ਸ ਪਞ੍ਞਾਵੇਯ੍ਯਤ੍ਤਿਯਂ, ਨ ਤਥਾ ਦੁਹੇਤੁਕਸ੍ਸ. ਯਥਾ ਚ ਦੁਹੇਤੁਕਸ੍ਸ ਇਤਿਕਤ੍ਤਬ੍ਬਤਾ ਨੇਪਕ੍ਕਂ, ਨ ਤਥਾ ਅਹੇਤੁਕਸ੍ਸ. ਏਵਂ ਲੋਭੁਸ੍ਸਦਾਦਯੋ ਪੁਗ੍ਗਲਾ ਰਾਗਚਰਿਤਾਦਯੋ ਹੋਨ੍ਤੀਤਿ ਨਿਟ੍ਠਮੇਤ੍ਥ ਗਨ੍ਤਬ੍ਬਨ੍ਤਿ. ਯਥਾਵੁਤ੍ਤਮਤ੍ਥਂ ਨਿਗਮਵਸੇਨ ਦਸ੍ਸੇਤੁਂ ‘‘ਏਵਂ ਲੋਭਾਦੀਸੂ’’ਤਿਆਦਿ ਵੁਤ੍ਤਂ.

੪੫. ਤਤ੍ਰਾਤਿ ਤਸ੍ਮਿਂ ਪੁਚ੍ਛਾਵਚਨੇ. ਨਯੋਤਿ ਜਾਨਨਨਯੋ. ਪੁਗ੍ਗਲਾਧਿਟ੍ਠਾਨੇਨ ਵੁਤ੍ਤੋਪਿ ਅਤ੍ਥੋ ਧਮ੍ਮਮੁਖੇਨੇਵ ਪਞ੍ਞਾਯਤੀਤਿ ਧਮ੍ਮਾਧਿਟ੍ਠਾਨੇਨਾਹ ‘‘ਚਰਿਯਾਯੋ ਵਿਭਾਵਯੇ’’ਤਿ. ਪਕਤਿਗਮਨੇਨਾਤਿ ਅਕਿਤ੍ਤਿਮੇਨ ਸਭਾਵਗਮਨੇਨ. ਚਾਤੁਰਿਯੇਨਾਤਿ ਚਾਤੁਰਭਾਵੇਨ ਸਿਙ੍ਗਾਰੇਨ. ਉਕ੍ਕੁਟਿਕਨ੍ਤਿ ਅਸਮ੍ਫੁਟ੍ਠਮਜ੍ਝਂ. ਖਣਨ੍ਤੋ ਵਿਯਾਤਿ ਭੂਮਿਂ ਖਣਨ੍ਤੋ ਵਿਯ. ਅਨੁਕਡ੍ਢਿਤਨ੍ਤਿ ਪਾਦਨਿਕ੍ਖੇਪਸਮਯੇ ਕਡ੍ਢਨ੍ਤੋ ਵਿਯ ਪਾਦਂ ਨਿਕ੍ਖਿਪਤਿ. ਤੇਨਸ੍ਸ ਪਦਂ ਅਨੁਕਡ੍ਢਿਤਂ ਪਚ੍ਛਤੋ ਅਞ੍ਛਿਤਂ ਹੋਤਿ. ਪਰਿਬ੍ਯਾਕੁਲਾਯਾਤਿ ਪਰਿਤੋ ਆਲੁਲ਼ਿਤਾਯ. ਛਮ੍ਭਿਤੋ ਵਿਯਾਤਿ ਵਿਤ੍ਥਾਯਨ੍ਤੋ ਵਿਯ. ਭੀਤੋ ਵਿਯਾਤਿ ਕੇਚਿ. ਸਹਸਾਨੁਪੀਲ਼ਿਤਨ੍ਤਿ ਅਗ੍ਗਪਾਦੇਨ, ਪਣ੍ਹਿਯਾ ਚ ਸਹਸਾਵ ਸਨ੍ਨਿਰੁਜ੍ਝਿਤਂ. ਵਿਵਟ੍ਟਚ੍ਛਦਸ੍ਸਾਤਿ ਵਿਨਿਵਟ੍ਟਚ੍ਛਦਨਸ੍ਸ ਪਹੀਨਕਿਲੇਸਸ੍ਸ. ਇਦਮੀਦਿਸਂ ਪਦਨ੍ਤਿ ਭਗਵਤੋ ਪਦਂ ਦਿਸ੍ਵਾ ਵਦਤਿ.

ਪਾਸਾਦਿਕਨ੍ਤਿ ਪਸਾਦਾਵਹਂ. ਮਧੁਰਾਕਾਰਨ੍ਤਿ ਇਟ੍ਠਾਕਾਰਂ. ਥਦ੍ਧਾਕਾਰਨ੍ਤਿ ਥਮ੍ਭਿਤਾਕਾਰਂ. ਅਤਰਮਾਨੋਤਿ ਨਤਰਮਾਨੋ, ਸਣਿਕਨ੍ਤਿ ਅਤ੍ਥੋ. ਸਮੋਧਾਯਾਤਿ ਸਮ੍ਮਦੇਵ ਓਧਾਯ ਅਵਿਕ੍ਖਿਪਿਤ੍ਵਾ. ਨਿਪਜ੍ਜਿਤ੍ਵਾਤਿ ਕਾਯਪਸਾਰਣਲਕ੍ਖਣਾਯ ਨਿਪਜ੍ਜਾਯ ਸੇਯ੍ਯਾਯ ਨਿਪਜ੍ਜਿਤ੍ਵਾ ਸਯਤਿ ਨਿਦ੍ਦਾਯਤਿ. ਪਕ੍ਖਿਤ੍ਤਕਾਯੋਤਿ ਅਵਕ੍ਖਿਤ੍ਤਕਾਯੋ ਅਵਸੋ ਵਿਯ ਸਹਸਾ ਪਤਿਤਕਾਯੋ. ਦੁਸ੍ਸਣ੍ਠਾਨਨ੍ਤਿ ਵਿਰੂਪਸਨ੍ਨਿਵੇਸਂ. ਵਿਕ੍ਖਿਤ੍ਤਕਾਯੋਤਿ ਇਤੋ ਚਿਤੋ ਚ ਖਿਤ੍ਤਅਙ੍ਗਪਚ੍ਚਙ੍ਗੋ.

ਸਮ੍ਪਰਿਵਤ੍ਤਕਨ੍ਤਿ ਸਮ੍ਪਰਿਵਤ੍ਤਿਤ੍ਵਾ. ਆਲੋਲ਼ਯਮਾਨੋ ਵਾਲਿਕਾਕਚਵਰਾਨਿ ਆਕੁਲਯਨ੍ਤੋ.

ਨਿਪੁਣਮਧੁਰਸਮਸਕ੍ਕਚ੍ਚਕਾਰੀਤਿ ਸੁਕੋਸਲ੍ਲਂ ਸੁਨ੍ਦਰਂ ਅਵਿਸਮਂ ਸਾਭਿਸਙ੍ਖਾਰਞ੍ਚ ਕਰਣਸੀਲੋ. ਗਾਲ਼੍ਹਥਦ੍ਧਵਿਸਮਕਾਰੀਤਿ ਥਿਰਂ ਅਸਿਥਿਲਂ ਵਿਸਮਞ੍ਚ ਕਰਣਸੀਲੋ. ਅਪਰਿਚ੍ਛਿਨ੍ਨਂ ਅਪਰਿਨਿਟ੍ਠਿਤਂ.

ਮੁਖਪੂਰਕਨ੍ਤਿ ਮੁਖਸ੍ਸ ਪੂਰਣਂ ਮਹਨ੍ਤਂ. ਅਰਸਪਟਿਸਂਵੇਦੀਤਿ ਨਰਸਪਟਿਸਂਵੇਦੀ. ਭਾਜਨੇ ਛਡ੍ਡੇਨ੍ਤੋਤਿ ਭੋਜਨਭਾਜਨੇ ਸਿਤ੍ਥਾਨਿ ਛਡ੍ਡੇਨ੍ਤੋ. ਮੁਖਂ ਮਕ੍ਖੇਨ੍ਤੋਤਿ ਬਹਿਮੁਖਂ ਮਕ੍ਖੇਨ੍ਤੋ.

ਕਿਲਨ੍ਤਰੂਪੋ ਵਿਯਾਤਿ ਤਸ੍ਸ ਅਸਹਨੇਨ ਖੇਦਪ੍ਪਤ੍ਤੋ ਵਿਯ. ਅਞ੍ਞਾਣੁਪੇਕ੍ਖਾਯਾਤਿ ਅਞ੍ਞਾਣਭੂਤਾਯ ਉਪੇਕ੍ਖਾਯ. ਅਞ੍ਞਾਣਸਙ੍ਖਾਤਾਯ ਉਪੇਕ੍ਖਾਯਾਤਿ ਕੇਚਿ.

ਮਾਯਾਦੀਸੁ ਸਨ੍ਤਦੋਸਪਟਿਚ੍ਛਦਨਲਕ੍ਖਣਾ ਮਾਯਾ. ਅਸਨ੍ਤਗੁਣਪਕਾਸਨਲਕ੍ਖਣਂ ਸਾਠੇਯ੍ਯਂ. ਉਨ੍ਨਤਿਲਕ੍ਖਣੋ ਮਾਨੋ. ਅਸਨ੍ਤਗੁਣਸਮ੍ਭਾਵਨਾਮੁਖੇਨ ਪਟਿਗ੍ਗਹਣੇ ਅਮਤ੍ਤਞ੍ਞੁਤਾਲਕ੍ਖਣਾ ਪਾਪਿਚ੍ਛਤਾ. ਸਨ੍ਤਗੁਣਸਮ੍ਭਾਵਨਾਮੁਖੇਨ ਪਟਿਗ੍ਗਹਣੇ ਅਮਤ੍ਤਞ੍ਞੁਤਾਲਕ੍ਖਣਾ ਮਹਿਚ੍ਛਤਾ. ਸਕਲਾਭੇਨ ਅਸਨ੍ਤੁਸ੍ਸਨਲਕ੍ਖਣਾ ਅਸਨ੍ਤੁਟ੍ਠਿਤਾ. ਵਿਜ੍ਝਨਟ੍ਠੇਨ ਸਿਙ੍ਗਂ, ਸਿਙ੍ਗਾਰਤਾਨਾਗਰਿਕਭਾਵਸਙ੍ਖਾਤਂ ਕਿਲੇਸਸਿਙ੍ਗਂ. ਅਤ੍ਤਨੋ ਸਰੀਰਸ੍ਸ, ਚੀਵਰਾਦਿਪਰਿਕ੍ਖਾਰਸ੍ਸ ਚ ਮਣ੍ਡਨਵਸੇਨ ਪਵਤ੍ਤਂ ਲੋਲੁਪ੍ਪਂ ਚਾਪਲ੍ਯਂ. ਏਵਮਾਦਯੋਤਿ ਏਤ੍ਥ ਆਦਿ-ਸਦ੍ਦੇਨ ਅਹਿਰਿਕਾਨੋਤ੍ਤਪ੍ਪਮਦਪ੍ਪਮਾਦਾਦਯੋ ਸਙ੍ਗਯ੍ਹਨ੍ਤਿ.

ਪਰਾਪਰਾਧਸ੍ਸ ਉਪਨਯ੍ਹਨਲਕ੍ਖਣੋ ਉਪਨਾਹੋ. ਪਰੇਸਂ ਗੁਣਮਕ੍ਖਣਲਕ੍ਖਣੋ ਮਕ੍ਖੋ. ਪਰਸ੍ਸ ਗੁਣੇ ਡਂਸਿਤ੍ਵਾ ਅਪਨੇਨ੍ਤੋ ਵਿਯ ਯੁਗਗ੍ਗਾਹਲਕ੍ਖਣੋ ਪਲ਼ਾਸੋ. ਪਰਸਮ੍ਪਤ੍ਤਿਉਸੂਯਨਲਕ੍ਖਣਾ ਇਸ੍ਸਾ. ਅਤ੍ਤਸਮ੍ਪਤ੍ਤਿਨਿਗੂਹਨਲਕ੍ਖਣਂ ਮਚ੍ਛਰਿਯਂ. ਇਧ ਆਦਿ-ਸਦ੍ਦੇਨ ਦੋਵਚਸ੍ਸਤਾਪਾਪਮਿਤ੍ਤਤਾਦੀਨਂ ਸਙ੍ਗਹੋ ਦਟ੍ਠਬ੍ਬੋ.

ਅਨੁਸ੍ਸਾਹਨਂ ਥਿਨਂ. ਅਸਤ੍ਤਿਵਿਘਾਤੋ ਮਿਦ੍ਧਂ. ਚੇਤਸੋ ਅਵੂਪਸਮੋ ਉਦ੍ਧਚ੍ਚਂ. ਵਿਪ੍ਪਟਿਸਾਰੋ ਕੁਕ੍ਕੁਚ੍ਚਂ. ਸਂਸਯੋ ਵਿਚਿਕਿਚ੍ਛਾ. ਅਯੋਨਿਸੋ ਦਲ਼੍ਹਗ੍ਗਾਹੋ ਆਧਾਨਗ੍ਗਾਹਿਤਾ. ਯਥਾਗਹਿਤਸ੍ਸ ਮਿਚ੍ਛਾਗਾਹਸ੍ਸ ਦੁਬ੍ਬਿਵੇਠਿਯਤਾ ਦੁਪ੍ਪਟਿਨਿਸ੍ਸਗ੍ਗਿਯਤਾ. ਇਧ ਆਦਿ-ਸਦ੍ਦੇਨ ਮੁਟ੍ਠਸਚ੍ਚਅਸਮ੍ਪਜਞ੍ਞਾਦੀਨਂ ਸਙ੍ਗਹੋ ਦਟ੍ਠਬ੍ਬੋ.

ਮੁਤ੍ਤਚਾਗਤਾਤਿ ਵਿਸ੍ਸਟ੍ਠਚਾਗਤਾ ਨਿਸ੍ਸਙ੍ਗਪਰਿਚ੍ਚਾਗੋ. ਯਥਾ ਮਾਯਾਦਯੋ, ਤਥਾ ਪਵਤ੍ਤਾ ਅਕੁਸਲਕ੍ਖਨ੍ਧਾ, ਯਥਾ ਅਰਿਯਾਨਂ ਦਸ੍ਸਨਕਾਮਤਾਦਯੋ, ਤਥਾ ਪਵਤ੍ਤਾ ਕੁਸਲਕ੍ਖਨ੍ਧਾ ਵੇਦਿਤਬ੍ਬਾ.

ਪਸਾਦਨੀਯਟ੍ਠਾਨਂ ਨਾਮ ਵਤ੍ਥੁਤ੍ਤਯਂ. ਸਂਵੇਜਨੀਯਟ੍ਠਾਨਾਨਿ ਜਾਤਿਆਦੀਨਿ. ਕੁਸਲਾਨੁਯੋਗੇਤਿ ਕੁਸਲਧਮ੍ਮਭਾਵਨਾਯਂ. ‘‘ਏਵਞ੍ਚ ਏਵਞ੍ਚ ਕਰਿਸ੍ਸਾਮੀ’’ਤਿ ਕਿਚ੍ਚਾਨਂ ਰਤ੍ਤਿਭਾਗੇ ਪਰਿਵਿਤਕ੍ਕਨਂ ਰਤ੍ਤਿਂ ਧੂਮਾਯਨਾ. ਤਥਾਵਿਤਕ੍ਕਿਤਾਨਂ ਤੇਸਂ ਦਿਵਸਭਾਗੇ ਅਨੁਟ੍ਠਾਨਂ ਦਿਵਾ ਪਜ੍ਜਲਨਾ. ਹੁਰਾਹੁਰਂ ਧਾਵਨਾਤਿ ਇਤੋ ਚਿਤੋ ਚ ਤਤ੍ਥ ਤਤ੍ਥ ਆਰਮ੍ਮਣੇ ਚਿਤ੍ਤਵੋਸਗ੍ਗੋ. ਤੇਨੇਵਾਹ ‘‘ਇਦਂ ਪੁਰੇ ਚਿਤ੍ਤਮਚਾਰਿ ਚਾਰਿਕਂ, ਯੇਨਿਚ੍ਛਕਂ ਯਤ੍ਥਕਾਮਂ ਯਥਾਸੁਖ’’ਨ੍ਤਿ (ਧ. ਪ. ੩੨੬), ‘‘ਚਿਤ੍ਤਮਸ੍ਸ ਵਿਧਾਵਤੀ’’ਤਿ (ਸਂ. ਨਿ. ੧.੫੫) ਚ.

ਧਮ੍ਮਪ੍ਪਵਤ੍ਤਿਦਸ੍ਸਨਾਦਿ ਚ ਪਾਲ਼ਿਯਂ, ਅਟ੍ਠਕਥਾਯਞ੍ਚ ਅਨਾਗਤਮੇਵਾਤਿ ਨ ਸਕ੍ਕਾ ਵਤ੍ਤੁਨ੍ਤਿ ‘‘ਸਬ੍ਬਾਕਾਰੇਨਾ’’ਤਿ ਵੁਤ੍ਤਂ. ਕਿਞ੍ਚਿ ਕਿਞ੍ਚਿ ਆਗਤਮ੍ਪਿ ਅਤ੍ਥੇਵਾਤਿ ਹਿ ਅਧਿਪ੍ਪਾਯੋ. ‘‘ਨ ਸਾਰਤੋ ਪਚ੍ਚੇਤਬ੍ਬ’’ਨ੍ਤਿ ਵਤ੍ਵਾ ਤਤ੍ਥ ਕਾਰਣਂ ਦਸ੍ਸੇਨ੍ਤੋ ‘‘ਰਾਗਚਰਿਤਸ੍ਸ ਹੀ’’ਤਿਆਦਿਮਾਹ. ਅਪ੍ਪਮਾਦਵਿਹਾਰਿਨੋਤਿ ਤਤ੍ਥ ਵਿਨਿਧਾਯ ਭਾਵਂ ਪਟਿਪਜ੍ਜਨੇਨ ਅਪ੍ਪਮਾਦਕਾਰਿਨੋ. ਭਿਨ੍ਨਲਕ੍ਖਣਾ ਇਰਿਯਾਪਥਾਦਯੋਤਿ ਚਾਤੁਰਿਯੇਨ ਅਚਾਤੁਰਿਯੇਨ ਸਣਿਕਂ, ਸਹਸਾ ਚ ਗਮਨਾਦਯੋ. ਨ ਉਪਪਜ੍ਜਨ੍ਤੀਤਿ ਨ ਯੁਜ੍ਜਨ੍ਤਿ. ਪੁਚ੍ਛਿਤ੍ਵਾ ਜਾਨਿਤਬ੍ਬਨ੍ਤਿ ਧਮ੍ਮਪ੍ਪਵਤ੍ਤਿਆਦਿਂ ਪੁਚ੍ਛਿਤ੍ਵਾ ਜਾਨਿਤਬ੍ਬਂ.

੪੬. ਸਪ੍ਪਾਯਂ ਹਿਤਂ, ਕਿਲੇਸਵਿਘਾਤੀਤਿ ਅਤ੍ਥੋ. ਅਧੋਤਵੇਦਿਕਨ੍ਤਿ ਅਪਰਿਸੁਦ੍ਧਪਰਿਕ੍ਖੇਪਵੇਦਿਕਂ. ਭੂਮਟ੍ਠਕਨ੍ਤਿ ਭੂਮਿਤਲੇਯੇਵ ਉਟ੍ਠਾਪਿਤਂ ਉਪਰਿਮਤਲਰਹਿਤਂ. ਏਕਤੋ ਓਨਤਸ੍ਸ ਪਬ੍ਬਤਪਾਦਸ੍ਸ ਹੇਟ੍ਠਾਭਾਗੋ ਅਕਤਭਿਤ੍ਤਿਭੂਮਿਪਰਿਕਮ੍ਮੋ ਅਕਤਪਬ੍ਭਾਰੋ. ਜਤੁਕਾਭਰਿਤਨ੍ਤਿ ਅਧੋਮੁਖਾਹਿ ਓਲਮ੍ਬਮਾਨਮੁਖਾਹਿ ਖੁਦ੍ਦਕਵਗ੍ਗੁਲੀਹਿ ਪਰਿਪੁਣ੍ਣਂ. ਓਲੁਗ੍ਗਵਿਲੁਗ੍ਗਨ੍ਤਿ ਛਿਨ੍ਨਭਿਨ੍ਨਂ. ਉਜ੍ਜਙ੍ਗਲਂ ਲੂਖਧੂਸਰਂ ਛਾਯੂਦਕਰਹਿਤਂ. ਸੀਹਬ੍ਯਗ੍ਘਾਦਿਭਯੇਨ ਸਾਸਙ੍ਕਂ. ਦੁਰੂਪਨ੍ਤਿ ਵਿਰੂਪਂ. ਦੁਬ੍ਬਣ੍ਣਨ੍ਤਿ ਅਸੁਨ੍ਦਰਵਣ੍ਣਂ, ਦੁਸ੍ਸਣ੍ਠਾਨਂ ਵਾ. ਜਾਲਾਕਾਰੇਨ ਕਤਪੂਵਂ ਜਾਲਪੂਵਂ. ਸਾਣਿ ਵਿਯ ਖਰਸਮ੍ਫਸ੍ਸਨ੍ਤਿ ਸਾਣਿਫਲਕੋ ਵਿਯ ਦੁਕ੍ਖਸਮ੍ਫਸ੍ਸਂ. ਭਾਰਿਕਭਾਵੇਨ, ਅਨ੍ਤਰਨ੍ਤਰਾ ਤੁਨ੍ਨਕਰਣੇਨ ਚ ਕਿਚ੍ਛਪਰਿਹਰਣਂ. ਆਣਿਗਣ੍ਠਿਕਾਹਤੋਤਿ ਆਣਿਨਾ, ਗਣ੍ਠਿਯਾ ਚ ਹਤਸੋਭੋ. ਇਦਂ ਰਾਗਚਰਿਤਸ੍ਸ ਸਪ੍ਪਾਯਂ, ਏਵਮਸ੍ਸ ਕਿਲੇਸਸਮੁਦਾਚਾਰੋ ਨ ਹੋਤੀਤਿ ਅਧਿਪ੍ਪਾਯੋ. ਏਸੇਵ ਨਯੋ ਸੇਸੇਸੁਪਿ.

ਦਿਸਾਮੁਖਨ੍ਤਿ ਦਿਸਾਭਿਮੁਖਂ, ਅਬ੍ਭੋਕਾਸਾਭਿਮੁਖਨ੍ਤਿ ਅਧਿਪ੍ਪਾਯੋ. ਮਹਾਕਸਿਣਨ੍ਤਿ ਮਹਨ੍ਤਂ ਕਸਿਣਮਣ੍ਡਲਂ. ਸੇਸਂ ਸੇਨਾਸਨਾਦੀਸੁ ਯਂ ਵਤ੍ਤਬ੍ਬਂ ਮੋਹਚਰਿਤਸ੍ਸ, ਤਂ ਦੋਸਚਰਿਤਸ੍ਸ ਵੁਤ੍ਤਸਦਿਸਮੇਵ.

ਵਿਤਕ੍ਕਵਿਧਾਵਨਸ੍ਸੇਵ ਪਚ੍ਚਯੋ ਹੋਤਿ ਯਥਾ ਤਂ ਆਯਸ੍ਮਤੋ ਮੇਘਿਯਤ੍ਥੇਰਸ੍ਸ. ਦਰੀਮੁਖੇਤਿ ਪਬ੍ਬਤਵਿਵਰੇ. ਪਰਿਤ੍ਤਨ੍ਤਿ ਸੁਪ੍ਪਸਰਾਵਮਤ੍ਤਂ.

ਪਭੇਦਪਰਿਚ੍ਛੇਦਤੋ ਨਿਦਾਨਪਰਿਚ੍ਛੇਦਤੋ ਵਿਭਾਵਨਪਰਿਚ੍ਛੇਦਤੋ ਸਪ੍ਪਾਯਪਰਿਚ੍ਛੇਦਤੋਤਿ ਪਚ੍ਚੇਕਂ ਪਰਿਚ੍ਛੇਦ-ਸਦ੍ਦੋ ਯੋਜੇਤਬ੍ਬੋ. ਵਿਭਾਵਨਾਤਿ ‘‘ਅਯਂ ਰਾਗਚਰਿਤੋ’’ਤਿਆਦਿਨਾ ਜਾਨਨਵਿਭਾਵਨਾ. ਏਕਚ੍ਚਕਸਿਣਾਨੁਸ੍ਸਤਿਟ੍ਠਾਨਮਤ੍ਤਸ੍ਸ ਪਸਙ੍ਗੇਨ ਕਥਿਤਤ੍ਤਾ ਵੁਤ੍ਤਂ ‘‘ਨ ਚ ਤਾਵ ਚਰਿਯਾਨੁਕੂਲਂ ਕਮ੍ਮਟ੍ਠਾਨਂ ਸਬ੍ਬਾਕਾਰੇਨ ਆਵਿਕਤ’’ਨ੍ਤਿ.

ਚਤ੍ਤਾਲੀਸਕਮ੍ਮਟ੍ਠਾਨਵਣ੍ਣਨਾ

੪੭. ਸਙ੍ਖਾਤਨਿਦ੍ਦੇਸਤੋਤਿ ਸਙ੍ਖਾਤਾਨਂ ‘‘ਚਤ੍ਤਾਲੀਸਾਯਾ’’ਤਿ ਸਙ੍ਖ੍ਯਾਵਸੇਨ ਗਹਿਤਾਨਂ ਉਦ੍ਦਿਟ੍ਠਾਨਂ ਨਿਦ੍ਦੇਸਤੋ. ‘‘ਏਤ੍ਥ ਏਤ੍ਤਕਾਨਿ ਉਪਚਾਰਜ੍ਝਾਨਾਵਹਾਨਿ, ਏਤ੍ਤਕਾਨਿ ਅਪ੍ਪਨਾਜ੍ਝਾਨਾਵਹਾਨੀ’’ਤਿ ਉਪਚਾਰਪ੍ਪਨਾਵਹਤੋ. ‘‘ਏਤ੍ਤਕਾਨਿ ਏਕਜ੍ਝਾਨਿਕਾਨਿ, ਏਤ੍ਤਕਾਨਿ ਦੁਕਤਿਕਜ੍ਝਾਨਿਕਾਨਿ, ਏਤ੍ਤਕਾਨਿ ਸਕਲਜ੍ਝਾਨਿਕਾਨੀ’’ਤਿ ਝਾਨਪ੍ਪਭੇਦਤੋ. ‘‘ਏਤੇਸੁ ਅਙ੍ਗਸਮਤਿਕ੍ਕਮੋ, ਏਤੇਸੁ ਆਰਮ੍ਮਣਸਮਤਿਕ੍ਕਮੋ’’ਤਿ ਏਵਂ ਸਮਤਿਕ੍ਕਮਤੋ. ‘‘ਏਤ੍ਤਕਾਨੇਤ੍ਥ ਵਡ੍ਢੇਤਬ੍ਬਾਨਿ, ਏਤ੍ਤਕਾਨਿ ਨ ਵਡ੍ਢੇਤਬ੍ਬਾਨੀ’’ਤਿ ਵਡ੍ਢਨਾਵਡ੍ਢਨਤੋ. ਆਰਮ੍ਮਣਤੋਤਿ ਸਭਾਵਧਮ੍ਮਨਿਮਿਤ੍ਤਨਵਤ੍ਤਬ੍ਬਵਸੇਨ, ਚਲਿਤਾਚਲਿਤਵਸੇਨ ਚ ਆਰਮ੍ਮਣਵਿਭਾਗਤੋ. ਭੂਮਿਤੋਤਿ ਕਾਮਾਵਚਰਾਦਿਭੂਮਿਵਿਭਾਗਤੋ. ਗਹਣਤੋਤਿ ਦਿਟ੍ਠਾਦਿਵਸੇਨ ਗਹਣਵਿਭਾਗਤੋ. ਪਚ੍ਚਯਤੋਤਿ ਆਰੁਪ੍ਪਾਦੀਨਂ ਯਥਾਰਹਂ ਪਚ੍ਚਯਭਾਵਤੋ. ਚਰਿਯਾਨੁਕੂਲਤੋਤਿ ਰਾਗਚਰਿਯਾਦੀਨਂ ਅਨੁਕੂਲਭਾਵਤੋ.

ਕਮ੍ਮਟ੍ਠਾਨਾਨੀਤਿ ਆਰਮ੍ਮਣਭਾਵੇਨ ਯੋਗਕਮ੍ਮਸ੍ਸ ਪਵਤ੍ਤਿਟ੍ਠਾਨਾਨਿ. ਚਤੁਕ੍ਕਜ੍ਝਾਨਿਕਾਤਿ ਚਤੁਬ੍ਬਿਧਰੂਪਾਵਚਰਜ੍ਝਾਨਵਨ੍ਤੋ, ਤੇਸਂ ਆਰਮ੍ਮਣਭੂਤਾਤਿ ਅਤ੍ਥੋ. ਚਤੁਕ੍ਕਨਯਵਸੇਨ ਚੇਤਂ ਵੁਤ੍ਤਂ. ਤਿਕਚਤੁਕ੍ਕਜ੍ਝਾਨਿਕੇਸੂਤਿ ਤਿਕਜ੍ਝਾਨਿਕੇਸੁ ਪੁਰਿਮੇਸੁ ਬ੍ਰਹ੍ਮਵਿਹਾਰੇਸੁ, ਚਤੁਕ੍ਕਜ੍ਝਾਨਿਕੇਸੁ ਆਨਾਪਾਨਕਸਿਣੇਸੁ. ਸੇਸੇਸੂਤਿ ਵੁਤ੍ਤਾਵਸੇਸੇਸੁ ਏਕਵੀਸਤਿਯਾ ਕਮ੍ਮਟ੍ਠਾਨੇਸੁ.

ਦਿਬ੍ਬਚਕ੍ਖੁਨਾ ਦਿਟ੍ਠਹਦਯਰੂਪਸ੍ਸ ਸਤ੍ਤਸ੍ਸ ਚਿਤ੍ਤਂ ਆਦਿਕਮ੍ਮਿਕੋ ਚੇਤੋਪਰਿਯਞਾਣੇਨ ਪਰਿਚ੍ਛਿਨ੍ਦਿਤੁਂ ਸਕ੍ਕੋਤਿ, ਨ ਇਤਰਸ੍ਸਾਤਿ ਕਸਿਣਫਰਣਂ ਚੇਤੋਪਰਿਯਞਾਣਸ੍ਸ ਪਚ੍ਚਯੋ ਹੋਤਿ. ਤੇਨ ਵੁਤ੍ਤਂ ‘‘ਪਰਸਤ੍ਤਾਨਞ੍ਚ ਚੇਤਸਾ ਚਿਤ੍ਤਮਞ੍ਞਾਤੁਂ ਸਮਤ੍ਥੋ ਹੋਤੀ’’ਤਿ. ਓਕਾਸੇਨ ਪਰਿਚ੍ਛਿਨ੍ਨਤ੍ਤਾਤਿ ਅਤ੍ਤਨੋ ਠਿਤੋਕਾਸੇਨ ਪਰਿਚ੍ਛਿਨ੍ਨਤ੍ਤਾ. ਤਥਾ ਉਗ੍ਗਹਕੋਸਲ੍ਲਸ੍ਸ ਸਮ੍ਪਾਦਿਤਤ੍ਤਾ ਪਰਿਚ੍ਛਿਨ੍ਨਾਕਾਰੇਨੇਵ ਤਾਨਿ ਉਪਤਿਟ੍ਠਨ੍ਤਿ, ਤਸ੍ਮਾ ਨ ਤਤ੍ਥ ਵਡ੍ਢਨਾਤਿ ਅਧਿਪ੍ਪਾਯੋ. ਸਚੇ ਪਨ ਕੋਚਿ ਵਡ੍ਢੇਯ੍ਯ, ਨ ਤੇਨ ਕੋਚਿ ਗੁਣੋਤਿ ਦਸ੍ਸੇਨ੍ਤੋ ਆਹ ‘‘ਆਨਿਸਂਸਾਭਾਵਾ ਚਾ’’ਤਿ. ‘‘ਤੇਸੁ ਪਨਾ’’ਤਿਆਦਿਨਾ ਤਮੇਵ ਆਨਿਸਂਸਾਭਾਵਂ ਵਿਵਰਤਿ. ਯਸ੍ਮਾ ਵਡ੍ਢਿਤੇਸੁ ਕੁਣਪਰਾਸਿਯੇਵ ਵਡ੍ਢਤਿ, ਅਵਡ੍ਢਿਤੇਪਿ ਕਾਮਰਾਗਵਿਕ੍ਖਮ੍ਭਨਾ ਹੋਤਿਯੇਵ, ਤਸ੍ਮਾ ਆਨਿਸਂਸਾਭਾਵੋ. ਵਿਭੂਤਾਤਿ ਵਿਪੁਲਾਰਮ੍ਮਣਤਾਯ ਸੁਪਾਕਟਾ, ਵਡ੍ਢਿਤਨਿਮਿਤ੍ਤਤਾਯ ਅਪ੍ਪਮਾਣਾਰਮ੍ਮਣਭਾਵੇਨ ਪਰਿਬ੍ਯਤ੍ਤਾਤਿ ਅਤ੍ਥੋ.

ਕੇਵਲਨ੍ਤਿ ਸਕਲਂ ਅਨਵਸੇਸਂ. ‘‘ਪਥਵਿਂ ਇਮ’’ਨ੍ਤਿ ਵਚਨਂ ਉਪਟ੍ਠਾਨਾਕਾਰੇਨ ਵੁਤ੍ਤਂ, ਨ ਨਿਮਿਤ੍ਤਸ੍ਸ ਵਡ੍ਢਨੇਨਾਤਿ ਅਧਿਪ੍ਪਾਯੋ. ਲਾਭਿਤ੍ਤਾਤਿ ਸਾਤਿਸਯਂ ਲਾਭਿਤਾਯ, ਉਕ੍ਕਂਸਗਤਵਸਿਭਾਵਤੋਤਿ ਅਤ੍ਥੋ. ਥੇਰੋ ਹਿ ਪਰਮਾਯ ਵਸਿਪਤ੍ਤਿਯਾ ਅਸ੍ਸਮਣ੍ਡਲੇ ਅਸ੍ਸਂ ਸਾਰੇਨ੍ਤੋ ਵਿਯ ਯਤ੍ਥ ਤਤ੍ਥ ਨਿਸਿਨ੍ਨੋਪਿ ਠਿਤੋਪਿ ਤਂ ਝਾਨਂ ਸਮਾਪਜ੍ਜਤੇਵ. ਤੇਨਸ੍ਸ ਸਮਨ੍ਤਤੋ ਨਿਮਿਤ੍ਤਂ ਵਡ੍ਢਿਤਂ ਵਿਯ ਉਪਟ੍ਠਾਸਿ. ਤੇਨ ਵੁਤ੍ਤਂ ‘‘ਸਬ੍ਬਦਿਸਾਸੂ’’ਤਿਆਦਿ.

ਵੁਤ੍ਤਾਤਿ ਧਮ੍ਮਸਙ੍ਗਹੇ ਵੁਤ੍ਤਾ. ਮਹਨ੍ਤੇਤਿ ਵਿਪੁਲੇ. ਨਿਨ੍ਨਥਲਾਦਿਵਸੇਨ ਹਿ ਏਕਦੇਸੇ ਅਟ੍ਠਤ੍ਵਾ ਸਮਨ੍ਤਤੋ ਗਹਣਵਸੇਨ ਸਕਲਸਰੀਰੇ ਨਿਮਿਤ੍ਤਂ ਗਣ੍ਹਨ੍ਤਸ੍ਸ ਤਂ ਮਹਨ੍ਤਂ ਹੋਤਿ. ਮਹਨ੍ਤੇ ਵਾ ਸਰੀਰੇ. ਅਪ੍ਪਕੇਤਿ ਸਰੀਰਸ੍ਸ ਏਕਦੇਸੇ ਨਿਮਿਤ੍ਤਂ ਗਣ੍ਹਾਤੀਤਿ ਯੋਜਨਾ. ਅਪ੍ਪਕੇ ਵਾ ਖੁਦ੍ਦਕੇ ਦਾਰਕਸਰੀਰੇ. ਏਤਨ੍ਤਿ ਅਸੁਭਨਿਮਿਤ੍ਤਂ. ਆਦੀਨਵਨ੍ਤਿ ‘‘ਅਸੁਭਰਾਸਿ ਏਵ ਵਡ੍ਢਤਿ, ਨ ਚ ਕੋਚਿ ਆਨਿਸਂਸੋ’’ਤਿ ਵੁਤ੍ਤਂ ਆਦੀਨਵਂ.

ਸੇਸਾਨਿਪਿ ਨ ਵਡ੍ਢੇਤਬ੍ਬਾਨੀਤਿ ਸਙ੍ਖੇਪਤੋ ਵੁਤ੍ਤਮਤ੍ਥਂ ਉਪਪਤ੍ਤਿਤੋ ਵਿਵਰਿਤੁਂ ‘‘ਕਸ੍ਮਾ’’ਤਿਆਦਿ ਵੁਤ੍ਤਂ. ਪਿਚੁਪਿਣ੍ਡਾਦਿਵਸੇਨ ਉਪਟ੍ਠਹਨ੍ਤਮ੍ਪਿ ਨਿਮਿਤ੍ਤਂ ਵਾਤਸਙ੍ਘਾਤਸਨ੍ਨਿਸ੍ਸਯਨ੍ਤਿ ਕਤ੍ਵਾ ਵੁਤ੍ਤਂ ‘‘ਵਾਤਰਾਸਿਯੇਵ ਵਡ੍ਢਤੀ’’ਤਿ. ਓਕਾਸੇਨ ਪਰਿਚ੍ਛਿਨ੍ਨਨ੍ਤਿ ਨਾਸਿਕਗ੍ਗਮੁਖਨਿਮਿਤ੍ਤਾਦਿਓਕਾਸੇਨ ਸਪਰਿਚ੍ਛੇਦਂ. ਵਾਯੋਕਸਿਣਵਡ੍ਢਨੇ ਵਿਯ ਨ ਏਤ੍ਥ ਕੋਚਿ ਗੁਣੋ, ਕੇਵਲਂ ਵਾਤਵਡ੍ਢਨਮੇਵਾਤਿ ਆਹ ‘‘ਸਾਦੀਨਵਤ੍ਤਾ’’ਤਿ. ਤੇਸਨ੍ਤਿ ਬ੍ਰਹ੍ਮਵਿਹਾਰਾਨਂ. ਨਿਮਿਤ੍ਤਨ੍ਤਿ ਆਰਮ੍ਮਣਂ. ਨ ਚ ਤੇਨ ਅਤ੍ਥੋ ਅਤ੍ਥੀਤਿ ਤੇਨ ਸਤ੍ਤਰਾਸਿਵਡ੍ਢਨੇਨ ਪਥਵੀਕਸਿਣਾਦਿਵਡ੍ਢਨੇ ਵਿਯ ਕਿਞ੍ਚਿ ਪਯੋਜਨਂ ਨਤ੍ਥਿ. ਪਰਿਗ੍ਗਹਵਸੇਨਾਤਿ ਅਪਰਿਗ੍ਗਹਿਤਸ੍ਸ ਭਾਵਨਾਵਿਸਯਸ੍ਸ ਪਰਿਗ੍ਗਹਵਸੇਨ, ਨ ਨਿਮਿਤ੍ਤਵਡ੍ਢਨਵਸੇਨ. ਤੇਨਾਹ ‘‘ਏਕਾਵਾਸਦ੍ਵਿਆਵਾਸਾਦਿਨਾ’’ਤਿਆਦਿ. ਏਤ੍ਥਾਤਿ ਬ੍ਰਹ੍ਮਵਿਹਾਰਭਾਵਨਾਯਂ. ਯਦਯਨ੍ਤਿ ਯਂ ਪਟਿਭਾਗਨਿਮਿਤ੍ਤਂ ਅਯਂ ਯੋਗੀ. ਸੀਮਾਸਮ੍ਭੇਦੇਨੇਵ ਹੇਤ੍ਥ ਉਪਚਾਰਜ੍ਝਾਨੁਪ੍ਪਤ੍ਤਿ, ਨ ਨਿਮਿਤ੍ਤੁਪ੍ਪਤ੍ਤਿਯਾ. ਯਦਿ ਏਵਂ ਕਥਂ ਪਰਿਤ੍ਤਾਦਿਆਰਮ੍ਮਣਤਾ ਝਾਨਸ੍ਸਾਤਿ ਆਹ ‘‘ਪਰਿਤ੍ਤਅਪ੍ਪਮਾਣਾਰਮ੍ਮਣਤਾਪੇਤ੍ਥ ਪਰਿਗ੍ਗਹਵਸੇਨਾ’’ਤਿ, ਕਤਿਪਯੇ ਸਤ੍ਤੇ ਪਰਿਗ੍ਗਹੇਤ੍ਵਾ ਪਵਤ੍ਤਾ ਮੇਤ੍ਤਾਦਯੋ ਪਰਿਤ੍ਤਾਰਮ੍ਮਣਾ, ਬਹੁਕੇ ਅਪ੍ਪਮਾਣਾਰਮ੍ਮਣਾਤਿ ਅਤ੍ਥੋ. ਆਕਾਸਂ ਕਸਿਣੁਗ੍ਘਾਟਿਮਤ੍ਤਾ ਨ ਵਡ੍ਢੇਤਬ੍ਬਨ੍ਤਿ ਯੋਜਨਾ. ਵਕ੍ਖਤਿ ਵਾ ਯਂ ਤੇਨ ਸਮ੍ਬਨ੍ਧਿਤਬ੍ਬਂ. ਪਰਿਕਪ੍ਪਜਮੇਵ ਆਰਮ੍ਮਣਂ ਵਡ੍ਢੇਤੁਂ ਸਕ੍ਕਾ, ਨ ਇਤਰਨ੍ਤਿ ਆਹ ‘‘ਨ ਹਿ ਸਕ੍ਕਾ ਸਭਾਵਧਮ੍ਮਂ ਵਡ੍ਢੇਤੁ’’ਨ੍ਤਿ. ਆਰੁਪ੍ਪਾਨਂ ਪਰਿਤ੍ਤਅਪ੍ਪਮਾਣਾਰਮ੍ਮਣਤਾ ਪਰਿਤ੍ਤਕਸਿਣੁਗ੍ਘਾਟਿਮਾਕਾਸੇ, ਵਿਪੁਲਕਸਿਣੁਗ੍ਘਾਟਿਮਾਕਾਸੇ ਚ ਪਵਤ੍ਤਿਯਾ ਵੇਦਿਤਬ੍ਬਾ. ਸੇਸਾਨਿ ਬੁਦ੍ਧਾਨੁਸ੍ਸਤਿਆਦੀਨਿ ਦਸ ਕਮ੍ਮਟ੍ਠਾਨਾਨਿ. ਅਨਿਮਿਤ੍ਤਤ੍ਤਾਤਿ ਪਟਿਭਾਗਨਿਮਿਤ੍ਤਾਭਾਵਾ.

ਪਟਿਭਾਗਨਿਮਿਤ੍ਤਾਰਮ੍ਮਣਾਨੀਤਿ ਪਟਿਭਾਗਨਿਮਿਤ੍ਤਭੂਤਾਨਿ ਆਰਮ੍ਮਣਾਨਿ. ਸੇਸਾਨਿ ਅਟ੍ਠਾਰਸ. ਸੇਸਾਨਿ ਛਾਤਿ ਚਤ੍ਤਾਰੋ ਬ੍ਰਹ੍ਮਵਿਹਾਰਾ, ਆਕਾਸਾਨਞ੍ਚਾਯਤਨਂ, ਆਕਿਞ੍ਚਞ੍ਞਾਯਤਨਨ੍ਤਿ ਇਮਾਨਿ ਸੇਸਾਨਿ ਛ. ਵਿਸ੍ਸਨ੍ਦਮਾਨਪੁਬ੍ਬਤਾਯ ਵਿਪੁਬ੍ਬਕਂ. ਪਗ੍ਘਰਮਾਨਲੋਹਿਤਤਾਯ ਲੋਹਿਤਕਂ. ਕਿਮੀਨਂ ਪਚਲਨੇਨ ਪੁਲ਼ੁਵਕਂ, ਚਲਿਤਾਰਮ੍ਮਣਂ ਵੁਤ੍ਤਂ. ਵਾਤਪਾਨਵਿਵਰਾਦੀਹਿ ਅਨ੍ਤੋਪਵਿਟ੍ਠਸ੍ਸ ਸੂਰਿਯਾਲੋਕਾਦਿਕਸ੍ਸ ਚਲਨਾਕਾਰੋ ਪਞ੍ਞਾਯਤੀਤਿ ਓਭਾਸਮਣ੍ਡਲਾਰਮ੍ਮਣਮ੍ਪਿ ਚਲਿਤਾਰਮ੍ਮਣਂ ਵੁਤ੍ਤਂ. ਪੁਬ੍ਬਭਾਗੇਤਿ ਪਟਿਭਾਗਨਿਮਿਤ੍ਤਪ੍ਪਵਤ੍ਤਿਯਾ ਪੁਬ੍ਬਭਾਗੇ. ਸਨ੍ਨਿਸਿਨ੍ਨਮੇਵਾਤਿ ਸਨ੍ਤਂ ਨਿਚ੍ਚਲਮੇਵ.

ਦੇਵੇਸੂਤਿ ਕਾਮਾਵਚਰਦੇਵੇਸੁ, ਤਤ੍ਥ ਅਸੁਭਾਨਂ ਪਟਿਕੂਲਸ੍ਸ ਚ ਆਹਾਰਸ੍ਸ ਅਭਾਵਤੋ. ਅਸ੍ਸਾਸਪਸ੍ਸਾਸਾਨਂ ਬ੍ਰਹ੍ਮਲੋਕੇ ਅਭਾਵਤੋ ‘‘ਆਨਾਪਾਨਸ੍ਸਤਿ ਚਾ’’ਤਿ ਵੁਤ੍ਤਂ.

ਦਿਟ੍ਠੇਨਾਤਿ ਦਿਟ੍ਠੇਨ ਵਤ੍ਥੁਨਾ ਕਾਰਣਭੂਤੇਨ. ਗਹੇਤਬ੍ਬਾਨੀਤਿ ਉਗ੍ਗਹੇਤਬ੍ਬਾਨਿ, ਉਪ੍ਪਾਦੇਤਬ੍ਬਉਗ੍ਗਹਨਿਮਿਤ੍ਤਾਨੀਤਿ ਅਤ੍ਥੋ. ਤੇਨਾਹ ‘‘ਪੁਬ੍ਬਭਾਗੇ’’ਤਿਆਦਿ. ਤਸ੍ਸਾਤਿ ਕਾਯਗਤਾਸਤਿਯਾ. ਉਚ੍ਛੁਸਸ੍ਸਾਦੀਨਂ ਪਤ੍ਤੇਸੁ ਪਚਲਮਾਨਵਣ੍ਣਗ੍ਗਹਣਮੁਖੇਨ ਵਾ ਤਸ੍ਸ ਗਹੇਤਬ੍ਬਤ੍ਤਾ ਵੁਤ੍ਤਂ ‘‘ਵਾਯੋਕਸਿਣਂ ਦਿਟ੍ਠਫੁਟ੍ਠੇਨਾ’’ਤਿ. ਨ ਆਦਿਕਮ੍ਮਿਕੇਨ ਗਹੇਤਬ੍ਬਾਨੀਤਿ ਆਦਿਕਮ੍ਮਿਕੇਨ ਨ ਗਹੇਤਬ੍ਬਾਨਿ, ਭਾਵਨਾਰਮ੍ਭਵਸੇਨ ਨ ਪਟ੍ਠਪੇਤਬ੍ਬਾਨਿ, ਹੇਟ੍ਠਿਮੇ ਤਯੋ ਬ੍ਰਹ੍ਮਵਿਹਾਰੇ, ਕਸਿਣੇਸੁ ਰੂਪਾਵਚਰਚਤੁਤ੍ਥਜ੍ਝਾਨਞ੍ਚ ਅਨਧਿਗਨ੍ਤ੍ਵਾ ਸਮ੍ਪਾਦੇਤੁਂ ਅਸਕ੍ਕੁਣੇਯ੍ਯਤ੍ਤਾ.

ਇਮੇਸੁ ਪਨ ਕਮ੍ਮਟ੍ਠਾਨੇਸੂਤਿ ਏਤ੍ਥ ਕਮ੍ਮਟ੍ਠਾਨਗ੍ਗਹਣੇਨ ਯਥਾਰਹਂ ਆਰਮ੍ਮਣਾਨਂ, ਝਾਨਾਨਞ੍ਚ ਗਹਣਂ ਵੇਦਿਤਬ੍ਬਂ. ਸੁਖਵਿਹਾਰਸ੍ਸਾਤਿ ਦਿਟ੍ਠਧਮ੍ਮਸੁਖਵਿਹਾਰਸ੍ਸ.

‘‘ਏਕਾਦਸ ਕਮ੍ਮਟ੍ਠਾਨਾਨਿ ਅਨੁਕੂਲਾਨੀ’’ਤਿ ਉਜੁਵਿਪਚ੍ਚਨੀਕਵਸੇਨ ਚੇਤਂ ਵੁਤ੍ਤਂ. ਏਵਂ ਸੇਸੇਸੁਪਿ. ਵਕ੍ਖਤਿ ਹਿ ‘‘ਸਬ੍ਬਞ੍ਚੇਤ’’ਨ੍ਤਿਆਦਿ. ਅਨੁਕੂਲਾਨਿ ਰਾਗਵਿਕ੍ਖਮ੍ਭਨਸ੍ਸ ਉਪਾਯਭਾਵਤੋ. ਅਟ੍ਠ ਅਨੁਕੂਲਾਨੀਤਿ ਯੋਜਨਾ. ਏਵਂ ਸੇਸੇਸੁ. ਏਕਨ੍ਤਿ ਇਦਂ ਅਨੁਸ੍ਸਤਿਅਪੇਕ੍ਖਂ ਅਨੁਸ੍ਸਤੀਸੁ ਏਕਨ੍ਤਿ, ਨ ਮੋਹਚਰਿਤਵਿਤਕ੍ਕਚਰਿਤਾਪੇਕ੍ਖਂ ਤੇਸਂ ਅਞ੍ਞਸ੍ਸਾਪਿ ਅਨੁਕੂਲਸ੍ਸ ਅਲਬ੍ਭਨਤੋ. ‘‘ਸਦ੍ਧਾਚਰਿਤਸ੍ਸ ਪੁਰਿਮਾ ਛ ਅਨੁਸ੍ਸਤਿਯੋ’’ਤਿ ਇਦਂ ਅਤਿਸਪ੍ਪਾਯਵਸੇਨ ਵੁਤ੍ਤਂ. ਇਮਸ੍ਸੇਵ ਉਜੁਵਿਪਚ੍ਚਨੀਕਂ ਇਮਸ੍ਸ ਅਤਿਸਪ੍ਪਾਯਨ੍ਤਿ ਗਹੇਤਬ੍ਬਸ੍ਸ ਵਿਸੇਸਸ੍ਸ ਅਭਾਵਤੋ ਸਬ੍ਬਚਰਿਤਾਨਂ ਅਨੁਕੂਲਾਨਿ. ਪਰਿਤ੍ਤਨ੍ਤਿ ਸਰਾਵਮਤ੍ਤਂ, ਅਪ੍ਪਮਾਣਨ੍ਤਿ ਤਤੋ ਅਧਿਕਪਮਾਣਂ. ਪਰਿਤ੍ਤਂ ਵਾ ਸੁਪ੍ਪਸਰਾਵਮਤ੍ਤਂ, ਅਪ੍ਪਮਾਣਂ ਅਧਿਕਪਮਾਣਂ ਖਲਮਣ੍ਡਲਾਦਿਕਸਿਣਭਾਵੇਨ ਪਰਿਗ੍ਗਹਿਤਂ.

ਚਤ੍ਤਾਰੋ ਧਮ੍ਮਾਤਿ ਚਤ੍ਤਾਰੋ ਮਨਸਿਕਰਣੀਯਾ ਧਮ੍ਮਾ. ਉਤ੍ਤਰੀਤਿ ਸੀਲਸਮ੍ਪਦਾ, ਕਲ੍ਯਾਣਮਿਤ੍ਤਤਾ, ਸਪ੍ਪਾਯਧਮ੍ਮਸ੍ਸਵਨਂ, ਵੀਰਿਯਂ; ਪਞ੍ਞਾਤਿ ਇਮੇਸੁ ਪਞ੍ਚਸੁ ਧਮ੍ਮੇਸੁ ਪਤਿਟ੍ਠਾਨਤੋ ਉਪਰਿ. ਅਸੁਭਾਤਿ ਅਸੁਭਭਾਵਨਾ ਏਕਾਦਸਸੁ ਅਸੁਭਕਮ੍ਮਟ੍ਠਾਨੇਸੁ ਭਾਵਨਾਨੁਯੋਗਾ. ਮੇਤ੍ਤਾਤਿ ਅਨੋਧਿਸੋ, ਓਧਿਸੋ ਵਾ ਪਵਤ੍ਤਾ ਮੇਤ੍ਤਾਭਾਵਨਾ. ਆਨਾਪਾਨਸ੍ਸਤੀਤਿ ਸੋਲ਼ਸਵਤ੍ਥੁਕਾ ਆਨਾਪਾਨਸ੍ਸਤਿਸਮਾਧਿਭਾਵਨਾ. ਵਿਤਕ੍ਕੁਪਚ੍ਛੇਦਾਯਾਤਿ ਮਿਚ੍ਛਾਵਿਤਕ੍ਕਾਨਂ ਉਪਚ੍ਛਿਨ੍ਦਨਤ੍ਥਾਯ. ਅਨਿਚ੍ਚਸਞ੍ਞਾਤਿ ‘‘ਸਬ੍ਬੇ ਸਙ੍ਖਾਰਾ ਅਨਿਚ੍ਚਾ’’ਤਿ (ਅ. ਨਿ. ੩.੧੩੭; ਧ. ਪ. ੨੭੭; ਮਹਾਨਿ. ੨੭) ਏਵਂ ਪਵਤ੍ਤਾ ਅਨਿਚ੍ਚਾਨੁਪਸ੍ਸਨਾ. ਅਸ੍ਮਿਮਾਨਸਮੁਗ੍ਘਾਤਾਯਾਤਿ ‘‘ਅਸ੍ਮੀ’’ਤਿ ਉਪ੍ਪਜ੍ਜਨਕਸ੍ਸ ਨਵਵਿਧਸ੍ਸਾਪਿ ਮਾਨਸ੍ਸ ਸਮੁਚ੍ਛਿਨ੍ਦਨਾਯ. ਏਤ੍ਥ ਹਿ ਏਕਸ੍ਸੇਵ ਚਤ੍ਤਾਰੋ ਧਮ੍ਮਾ ਭਾਵੇਤਬ੍ਬਾ ਵੁਤ੍ਤਾ, ਨ ਏਕਸ੍ਸ ਚਤੁਚਰਿਯਤਾਯ. ਤੇਨ ਵਿਞ੍ਞਾਯਤਿ ‘‘ਸਬ੍ਬਾਨਿਪਿ ਕਮ੍ਮਟ੍ਠਾਨਾਨਿ ਸਬ੍ਬਾਕੁਸਲਵਿਕ੍ਖਮ੍ਭਨਾਨਿ ਸਬ੍ਬਕੁਸਲਪਰਿਬ੍ਰੂਹਨਾਨੀ’’ਤਿ.

ਏਕਸ੍ਸੇਵ ਸਤ੍ਤ ਕਮ੍ਮਟ੍ਠਾਨਾਨਿ ਵੁਤ੍ਤਾਨਿ, ਨ ਚਾਯਸ੍ਮਾ ਰਾਹੁਲੋ ਸਬ੍ਬਚਰਿਤੋਤਿ ਅਧਿਪ੍ਪਾਯੋ. ਵਚਨਮਤ੍ਤੇਤਿ ‘‘ਅਸੁਕਕਮ੍ਮਟ੍ਠਾਨਂ ਅਸੁਕਚਰਿਤਸ੍ਸ ਅਨੁਕੂਲ’’ਨ੍ਤਿ ਏਵਂ ਵੁਤ੍ਤਵਚਨਮਤ੍ਤੇ. ਅਧਿਪ੍ਪਾਯੋਤਿ ਤਥਾਵਚਨਸ੍ਸ ਅਧਿਪ੍ਪਾਯੋ. ਸੋ ਪਨ ‘‘ਸਬ੍ਬਞ੍ਚੇਤ’’ਨ੍ਤਿਆਦਿਨਾ ਵਿਭਾਵਿਤੋ ਏਵ.

੪੮. ‘‘ਪਿਯੋ ਗਰੂ’’ਤਿਆਦਿਨਾ (ਅ. ਨਿ. ੭.੩੭) ਵੁਤ੍ਤਪ੍ਪਕਾਰਂ ਕਲ੍ਯਾਣਮਿਤ੍ਤਂ. ‘‘ਅਤ੍ਤਨੋ ਪਤ੍ਤਚੀਵਰਂ ਸਯਮੇਵ ਗਹੇਤ੍ਵਾ’’ਤਿਆਦਿਨਾ ਵੁਤ੍ਤਨਯੇਨ ਉਪਸਙ੍ਕਮਿਤ੍ਵਾ. ਸੋਮਨਸ੍ਸਮੇਵ ਉਪ੍ਪਜ੍ਜਤਿ ‘‘ਏਵਂ ਬਹੁਪਰਿਸ੍ਸਯੋਯਂ ਅਤ੍ਤਭਾਵੋ ਠਾਨੇਯੇਵ ਮਯਾ ਨਿਯ੍ਯਾਤਿਤੋ’’ਤਿ. ਤੇਨਾਹ ‘‘ਯਥਾ ਹੀ’’ਤਿਆਦਿ.

ਅਤਜ੍ਜਨੀਯੋਤਿ ਨ ਤਜ੍ਜੇਤਬ੍ਬੋ ਨ ਨਿਗ੍ਗਹੇਤਬ੍ਬੋ. ਸ੍ਵਾਯਂ ਅਤਜ੍ਜਨੀਯਭਾਵੋ ਦੋਵਚਸ੍ਸਤਾਯ ਵਾ ਸਿਯਾ, ਆਚਰਿਯੇ ਅਨਿਵਿਟ੍ਠਪੇਮਤਾਯ ਵਾਤਿ ਤਦੁਭਯਂ ਦਸ੍ਸੇਤੁਂ ‘‘ਦੁਬ੍ਬਚੋ ਵਾ’’ਤਿਆਦਿ ਵੁਤ੍ਤਂ. ਯੋ ਹਿ ਆਚਰਿਯੇਨ ਤਜ੍ਜਿਯਮਾਨੋ ਕੋਪਞ੍ਚ ਦੋਸਞ੍ਚ ਅਪਚ੍ਚਯਞ੍ਚ ਪਾਤੁਕਰੋਤਿ, ਯੋ ਵਾ ‘‘ਕਿਮਸ੍ਸ ਸਨ੍ਤਿਕੇ ਵਾਸੇਨਾ’’ਤਿ ਪਕ੍ਕਮਤਿ, ਅਯਂ ਦੁਵਿਧੋਪਿ ਅਤਜ੍ਜਨੀਯੋ. ਧਮ੍ਮੇਨਾਤਿ ਓਵਾਦਾਨੁਸਾਸਨਿਧਮ੍ਮੇਨ. ਗੂਲ਼੍ਹਂ ਗਨ੍ਥਨ੍ਤਿ ਕਮ੍ਮਟ੍ਠਾਨਗਨ੍ਥਂ, ਸਚ੍ਚਪਟਿਚ੍ਚਸਮੁਪ੍ਪਾਦਾਦਿਸਹਿਤਂ ਗਮ੍ਭੀਰਂ ਸੁਞ੍ਞਤਾਪਟਿਸਂਯੁਤ੍ਤਞ੍ਚ.

ਤੁਮ੍ਹਾਕਮਤ੍ਥਾਯਾਤਿ ਵੁਤ੍ਤੇਤਿ ‘‘ਸਤਪੋਰਿਸੇ ਪਪਾਤੇ ਪਤਨੇਨ ਤੁਮ੍ਹਾਕਂ ਕੋਚਿ ਅਤ੍ਥੋ ਹੋਤੀ’’ਤਿ ਕੇਨਚਿ ਵੁਤ੍ਤੇ. ਘਂਸੇਨ੍ਤੋਤਿ ‘‘ਮਨੁਸ੍ਸਕਕ੍ਕੇਨ ਤੁਮ੍ਹਾਕਂ ਕੋਚਿ ਅਤ੍ਥੋ’’ਤਿ ਵੁਤ੍ਤੇ ਘਂਸੇਨ੍ਤੋ ਨਿਰਵਸੇਸਂ ਅਤ੍ਤਭਾਵਂ ਖੇਪੇਤੁਂ ਉਸ੍ਸਹੇਯ੍ਯਂ. ‘‘ਮਮ ਅਸ੍ਸਾਸਪਸ੍ਸਾਸਨਿਰੁਨ੍ਧਨੇਨ ਤੁਮ੍ਹਾਕਂ ਕੋਚਿ ਰੋਗਵੂਪਸਮਾਦਿਕੋ ਅਤ੍ਥੋ ਅਤ੍ਥੀ’’ਤਿ ਕੇਨਚਿ ਵੁਤ੍ਤੇ. ਤੀਹਿਪਿ ਭਿਕ੍ਖੂਹਿ ਆਚਰਿਯੇ ਭਤ੍ਤਿਪਵੇਦਨਮੁਖੇਨ ਵੀਰਿਯਾਰਮ੍ਭੋ ਏਵ ਪਵੇਦਿਤੋ.

੪੯. ਅਞ੍ਞਤ੍ਥ ਪਵਤ੍ਤਿਤ੍ਵਾਪਿ ਚਿਤ੍ਤਂ ਆਗਮ੍ਮ ਯਤ੍ਥ ਸੇਤਿ, ਸੋ ਤਸ੍ਸ ਆਸਯੋ ‘‘ਮਿਗਾਸਯੋ’’ ਵਿਯ, ਆਸਯੋ ਏਵ ਅਜ੍ਝਾਸਯੋ. ਸੋ ਦੁਵਿਧੋ ਵਿਪਨ੍ਨੋ, ਸਮ੍ਪਨ੍ਨੋਤਿ. ਤਤ੍ਥ ਵਿਪਨ੍ਨੋ ਸਸ੍ਸਤਾਦਿਮਿਚ੍ਛਾਭਿਨਿਵੇਸਨਿਸ੍ਸਿਤੋ. ਸਮ੍ਪਨ੍ਨੋ ਦੁਵਿਧੋ ਵਟ੍ਟਨਿਸ੍ਸਿਤੋ, ਵਿਵਟ੍ਟਨਿਸ੍ਸਿਤੋਤਿ. ਤੇਸੁ ਵਿਵਟ੍ਟਨਿਸ੍ਸਿਤੋ ਅਜ੍ਝਾਸਯੋ ‘‘ਸਮ੍ਪਨ੍ਨਜ੍ਝਾਸਯੇਨਾ’’ਤਿ ਇਧਾਧਿਪ੍ਪੇਤੋ. ਇਦਾਨਿ ਨਂ ਵਿਭਾਗੇਨ ਦਸ੍ਸੇਤੁਂ ‘‘ਅਲੋਭਾਦੀਨਂ ਵਸੇਨਾ’’ਤਿਆਦਿ ਵੁਤ੍ਤਂ. ਤਤ੍ਥ ਛਹਾਕਾਰੇਹੀਤਿ ਅਲੁਬ੍ਭਨਾਦੀਹਿ ਛਹਿ ਆਕਾਰੇਹਿ. ਸਮ੍ਪਨ੍ਨਜ੍ਝਾਸਯੇਨਾਤਿ ਪੁਬ੍ਬਭਾਗਿਯਾਨਂ ਸੀਲਸਮ੍ਪਦਾਦੀਨਂ ਸਾਧਨਵਸੇਨ, ਲੋਕੁਤ੍ਤਰਾਨਂ ਉਪਨਿਸ੍ਸਯਭਾਵੇਨ ਚ ਸਮ੍ਪਨ੍ਨੋ ਅਜ੍ਝਾਸਯੋ ਏਤਸ੍ਸਾਤਿ ਸਮ੍ਪਨ੍ਨਜ੍ਝਾਸਯੋ, ਤੇਨ. ਅਲੋਭਾਦਯੋ ਹਿ ਅਨੇਕਦੋਸਵਿਧਮਨਤੋ, ਅਨੇਕਗੁਣਾਵਹਤੋ ਚ ਸਤ੍ਤਾਨਂ ਬਹੁਕਾਰਾ ਵਿਸੇਸਤੋ ਯੋਗਿਨੋ. ਤਥਾ ਹਿ ਅਲੋਭਾਦਯੋ ਮਚ੍ਛੇਰਮਲਾਦੀਨਂ ਪਟਿਪਕ੍ਖਭਾਵੇਨ ਪਵਤ੍ਤਨ੍ਤਿ. ਵੁਤ੍ਤਂ ਹੇਤਂ (ਧ. ਸ. ਅਟ੍ਠ. ੧ ਮੂਲਰਾਸੀਵਣ੍ਣਨਾ) –

‘‘ਅਲੋਭੋ ਮਚ੍ਛੇਰਮਲਸ੍ਸ ਪਟਿਪਕ੍ਖੋ, ਅਦੋਸੋ ਦੁਸ੍ਸੀਲ੍ਯਮਲਸ੍ਸ, ਅਮੋਹੋ ਕੁਸਲੇਸੁ ਧਮ੍ਮੇਸੁ ਅਭਾਵਨਾਯ. ਅਲੋਭੋ ਚੇਤ੍ਥ ਦਾਨਹੇਤੁ, ਅਦੋਸੋ ਸੀਲਹੇਤੁ, ਅਮੋਹੋ ਭਾਵਨਾਹੇਤੁ. ਤੇਸੁ ਚ ਅਲੋਭੇਨ ਅਨਧਿਕਂ ਗਣ੍ਹਾਤਿ ਲੁਦ੍ਧਸ੍ਸ ਅਧਿਕਗ੍ਗਹਣਤੋ, ਅਦੋਸੇਨ ਅਨੂਨਂ ਦੁਟ੍ਠਸ੍ਸ ਊਨਗ੍ਗਹਣਤੋ, ਅਮੋਹੇਨ ਅਵਿਪਰੀਤਂ ਮੂਲ਼੍ਹਸ੍ਸ ਵਿਪਰੀਤਗ੍ਗਹਣਤੋ.

‘‘ਅਲੋਭੇਨ ਚੇਤ੍ਥ ਵਿਜ੍ਜਮਾਨਂ ਦੋਸਂ ਦੋਸਤੋ ਧਾਰੇਨ੍ਤੋ ਦੋਸੇ ਪਵਤ੍ਤਤਿ, ਲੁਦ੍ਧੋ ਹਿ ਦੋਸਂ ਪਟਿਚ੍ਛਾਦੇਤਿ. ਅਦੋਸੇਨ ਵਿਜ੍ਜਮਾਨਂ ਗੁਣਂ ਗੁਣਤੋ ਧਾਰੇਨ੍ਤੋ ਗੁਣੇ ਪਵਤ੍ਤਤਿ, ਦੁਟ੍ਠੋ ਹਿ ਗੁਣਂ ਮਕ੍ਖੇਤਿ. ਅਮੋਹੇਨ ਯਾਥਾਵਸਭਾਵਂ ਯਾਥਾਵਸਭਾਵਤੋ ਧਾਰੇਨ੍ਤੋ ਯਾਥਾਵਸਭਾਵੇ ਪਵਤ੍ਤਤਿ, ਮੂਲ਼੍ਹੋ ਹਿ ਤਚ੍ਛਂ ‘ਅਤਚ੍ਛ’ਨ੍ਤਿ, ਅਤਚ੍ਛਞ੍ਚ ‘ਤਚ੍ਛ’ਨ੍ਤਿ ਗਣ੍ਹਾਤਿ. ਅਲੋਭੇਨ ਚ ਪਿਯਵਿਪ੍ਪਯੋਗਦੁਕ੍ਖਂ ਨ ਹੋਤਿ ਲੁਦ੍ਧਸ੍ਸ ਪਿਯਸਬ੍ਭਾਵਤੋ, ਪਿਯਵਿਪ੍ਪਯੋਗਾਸਹਨਤੋ ਚ, ਅਦੋਸੇਨ ਅਪ੍ਪਿਯਸਮ੍ਪਯੋਗਦੁਕ੍ਖਂ ਨ ਹੋਤਿ ਦੁਟ੍ਠਸ੍ਸ ਅਪ੍ਪਿਯਸਬ੍ਭਾਵਤੋ, ਅਪ੍ਪਿਯਸਮ੍ਪਯੋਗਾਸਹਨਤੋ ਚ, ਅਮੋਹੇਨ ਇਚ੍ਛਿਤਾਲਾਭਦੁਕ੍ਖਂ ਨ ਹੋਤਿ, ਅਮੂਲ਼੍ਹਸ੍ਸ ਹਿ ‘ਤਂ ਕੁਤੇਤ੍ਥ ਲਬ੍ਭਾ’ਤਿ ਏਵਮਾਦਿਪਚ੍ਚਵੇਕ੍ਖਣਸਬ੍ਭਾਵਤੋ.

‘‘ਅਲੋਭੇਨ ਚੇਤ੍ਥ ਜਾਤਿਦੁਕ੍ਖਂ ਨ ਹੋਤਿ ਅਲੋਭਸ੍ਸ ਤਣ੍ਹਾਪਟਿਪਕ੍ਖਤੋ, ਤਣ੍ਹਾਮੂਲਕਤ੍ਤਾ ਚ ਜਾਤਿਦੁਕ੍ਖਸ੍ਸ, ਅਦੋਸੇਨ ਜਰਾਦੁਕ੍ਖਂ ਨ ਹੋਤਿ ਤਿਕ੍ਖਦੋਸਸ੍ਸ ਖਿਪ੍ਪਂ ਜਰਾਸਮ੍ਭਵਤੋ, ਅਮੋਹੇਨ ਮਰਣਦੁਕ੍ਖਂ ਨ ਹੋਤਿ, ਸਮ੍ਮੋਹਮਰਣਞ੍ਹਿ ਦੁਕ੍ਖਂ, ਨ ਚ ਤਂ ਅਮੂਲ਼੍ਹਸ੍ਸ ਹੋਤਿ. ਅਲੋਭੇਨ ਚ ਗਹਟ੍ਠਾਨਂ, ਅਮੋਹੇਨ ਪਬ੍ਬਜਿਤਾਨਂ, ਅਦੋਸੇਨ ਪਨ ਸਬ੍ਬੇਸਮ੍ਪਿ ਸੁਖਸਂਵਾਸਤਾ ਹੋਤਿ.

‘‘ਵਿਸੇਸਤੋ ਚੇਤ੍ਥ ਅਲੋਭੇਨ ਪੇਤ੍ਤਿਵਿਸਯੇ ਉਪਪਤ੍ਤਿ ਨ ਹੋਤਿ, ਯੇਭੁਯ੍ਯੇਨ ਹਿ ਸਤ੍ਤਾ ਤਣ੍ਹਾਯ ਪੇਤ੍ਤਿਵਿਸਯਂ ਉਪਪਜ੍ਜਨ੍ਤਿ, ਤਣ੍ਹਾਯ ਚ ਪਟਿਪਕ੍ਖੋ ਅਲੋਭੋ. ਅਦੋਸੇਨ ਨਿਰਯੇ ਉਪਪਤ੍ਤਿ ਨ ਹੋਤਿ, ਦੋਸੇਨ ਹਿ ਚਣ੍ਡਜਾਤਿਤਾਯ ਦੋਸਸਦਿਸਂ ਨਿਰਯਂ ਉਪਪਜ੍ਜਨ੍ਤਿ, ਦੋਸਸ੍ਸ ਚ ਪਟਿਪਕ੍ਖੋ ਅਦੋਸੋ. ਅਮੋਹੇਨ ਤਿਰਚ੍ਛਾਨਯੋਨਿਯਂ ਨਿਬ੍ਬਤ੍ਤਿ ਨ ਹੋਤਿ, ਮੋਹੇਨ ਹਿ ਨਿਚ੍ਚਸਮ੍ਮੂਲ਼੍ਹਂ ਤਿਰਚ੍ਛਾਨਯੋਨਿਂ ਉਪਪਜ੍ਜਨ੍ਤਿ, ਮੋਹਪਟਿਪਕ੍ਖੋ ਚ ਅਮੋਹੋ. ਏਤੇਸੁ ਚ ਅਲੋਭੋ ਰਾਗਵਸੇਨ ਉਪਗਮਨਸ੍ਸ ਅਭਾਵਕਰੋ, ਅਦੋਸੋ ਦੋਸਵਸੇਨ ਅਪਗਮਨਸ੍ਸ, ਅਮੋਹੋ ਮੋਹਵਸੇਨ ਅਮਜ੍ਝਤ੍ਤਭਾਵਸ੍ਸ.

‘‘ਤੀਹਿਪਿ ਚੇਤੇਹਿ ਯਥਾਪਟਿਪਾਟਿਯਾ ਨੇਕ੍ਖਮ੍ਮਸਞ੍ਞਾ ਅਬ੍ਯਾਪਾਦਸਞ੍ਞਾ ਅਵਿਹਿਂਸਾਸਞ੍ਞਾਤਿ ਇਮਾ ਤਿਸ੍ਸੋ, ਅਸੁਭਸਞ੍ਞਾ ਅਪ੍ਪਮਾਣਸਞ੍ਞਾ ਧਾਤੁਸਞ੍ਞਾਤਿ ਇਮਾ ਚ ਤਿਸ੍ਸੋ ਸਞ੍ਞਾਯੋ ਹੋਨ੍ਤਿ. ਅਲੋਭੇਨ ਪਨ ਕਾਮਸੁਖਲ੍ਲਿਕਾਨੁਯੋਗਅਨ੍ਤਸ੍ਸ, ਅਦੋਸੇਨ ਅਤ੍ਤਕਿਲਮਥਾਨੁਯੋਗਅਨ੍ਤਸ੍ਸ ਪਰਿਵਜ੍ਜਨਂ ਹੋਤਿ, ਅਮੋਹੇਨ ਮਜ੍ਝਿਮਾਯ ਪਟਿਪਤ੍ਤਿਯਾ ਪਟਿਪਜ੍ਜਨਂ. ਤਥਾ ਅਲੋਭੇਨ ਅਭਿਜ੍ਝਾਕਾਯਗਨ੍ਥਸ੍ਸ ਪਭੇਦਨਂ ਹੋਤਿ, ਅਦੋਸੇਨ ਬ੍ਯਾਪਾਦਕਾਯਗਨ੍ਥਸ੍ਸ, ਅਮੋਹੇਨ ਸੇਸਗਨ੍ਥਦ੍ਵਯਸ੍ਸ. ਪੁਰਿਮਾਨਿ ਚ ਦ੍ਵੇ ਸਤਿਪਟ੍ਠਾਨਾਨਿ ਪੁਰਿਮਾਨਂ ਦ੍ਵਿਨ੍ਨਂ ਆਨੁਭਾਵੇਨ, ਪਚ੍ਛਿਮਾਨਿ ਪਚ੍ਛਿਮਸ੍ਸੇਵ ਆਨੁਭਾਵੇਨ ਇਜ੍ਝਨ੍ਤਿ.

‘‘ਅਲੋਭੋ ਚੇਤ੍ਥ ਆਰੋਗ੍ਯਸ੍ਸ ਪਚ੍ਚਯੋ ਹੋਤਿ, ਅਲੁਦ੍ਧੋ ਹਿ ਲੋਭਨੀਯਮ੍ਪਿ ਅਸਪ੍ਪਾਯਂ ਨ ਸੇਵਤਿ, ਤੇਨ ਅਰੋਗੋ ਹੋਤਿ. ਅਦੋਸੋ ਯੋਬ੍ਬਨਸ੍ਸ, ਅਦੁਟ੍ਠੋ ਹਿ ਵਲਿਤਪਲਿਤਾਵਹੇਨ ਦੋਸਗ੍ਗਿਨਾ ਅਡਯ੍ਹਮਾਨੋ ਦੀਘਰਤ੍ਤਂ ਯੁਵਾ ਹੋਤਿ. ਅਮੋਹੋ ਦੀਘਾਯੁਕਤਾਯ, ਅਮੂਲ਼੍ਹੋ ਹਿ ਹਿਤਾਹਿਤਂ ਞਤ੍ਵਾ ਅਹਿਤਂ ਪਰਿਵਜ੍ਜੇਨ੍ਤੋ, ਹਿਤਞ੍ਚ ਪਟਿਸੇਵਮਾਨੋ ਦੀਘਾਯੁਕੋ ਹੋਤਿ.

‘‘ਅਲੋਭੋ ਚੇਤ੍ਥ ਭੋਗਸਮ੍ਪਤ੍ਤਿਯਾ ਪਚ੍ਚਯੋ ਚਾਗੇਨ ਭੋਗਪਟਿਲਾਭਤੋ, ਅਦੋਸੋ ਮਿਤ੍ਤਸਮ੍ਪਤ੍ਤਿਯਾ ਮੇਤ੍ਤਾਯ ਮਿਤ੍ਤਾਨਂ ਪਟਿਲਾਭਤੋ, ਅਪਰਿਹਾਨਤੋ ਚ, ਅਮੋਹੋ ਅਤ੍ਤਸਮ੍ਪਤ੍ਤਿਯਾ, ਅਮੂਲ਼੍ਹੋ ਹਿ ਅਤ੍ਤਨੋ ਹਿਤਮੇਵ ਕਰੋਨ੍ਤੋ ਅਤ੍ਤਾਨਂ ਸਮ੍ਪਾਦੇਤਿ. ਅਲੋਭੋ ਚ ਦਿਬ੍ਬਵਿਹਾਰਸ੍ਸ ਪਚ੍ਚਯੋ ਹੋਤਿ, ਅਦੋਸੋ ਬ੍ਰਹ੍ਮਵਿਹਾਰਸ੍ਸ, ਅਮੋਹੋ ਅਰਿਯਵਿਹਾਰਸ੍ਸ.

‘‘ਅਲੋਭੇਨ ਚੇਤ੍ਥ ਸਕਪਕ੍ਖੇਸੁ ਸਤ੍ਤਸਙ੍ਖਾਰੇਸੁ ਨਿਬ੍ਬੁਤੋ ਹੋਤਿ ਤੇਸਂ ਵਿਨਾਸੇਨ ਅਭਿਸਙ੍ਗਹੇਤੁਕਸ੍ਸ ਦੁਕ੍ਖਸ੍ਸ ਅਭਾਵਾ, ਅਦੋਸੇਨ ਪਰਪਕ੍ਖੇਸੁ, ਅਦੁਟ੍ਠਸ੍ਸ ਹਿ ਵੇਰੀਸੁਪਿ ਵੇਰਿਸਞ੍ਞਾਯ ਅਭਾਵਤੋ, ਅਮੋਹੇਨ ਉਦਾਸੀਨਪਕ੍ਖੇਸੁ ਅਮੂਲ਼੍ਹਸ੍ਸ ਸਬ੍ਬਾਭਿਸਙ੍ਗਤਾਯ ਅਭਾਵਤੋ.

‘‘ਅਲੋਭੇਨ ਚ ਅਨਿਚ੍ਚਦਸ੍ਸਨਂ ਹੋਤਿ, ਲੁਦ੍ਧੋ ਹਿ ਉਪਭੋਗਾਸਾਯ ਅਨਿਚ੍ਚੇਪਿ ਸਙ੍ਖਾਰੇ ਅਨਿਚ੍ਚਤੋ ਨ ਪਸ੍ਸਤਿ. ਅਦੋਸੇਨ ਦੁਕ੍ਖਦਸ੍ਸਨਂ, ਅਦੋਸਜ੍ਝਾਸਯੋ ਹਿ ਪਰਿਚ੍ਚਤ੍ਤਆਘਾਤਵਤ੍ਥੁਪਰਿਗ੍ਗਹੋ ਸਙ੍ਖਾਰੇਯੇਵ ਦੁਕ੍ਖਤੋ ਪਸ੍ਸਤਿ. ਅਮੋਹੇਨ ਅਨਤ੍ਤਦਸ੍ਸਨਂ, ਅਮੂਲ਼੍ਹੋ ਹਿ ਯਾਥਾਵਗਹਣਕੁਸਲੋ ਅਪਰਿਣਾਯਕਂ ਖਨ੍ਧਪਞ੍ਚਕਂ ਅਪਰਿਣਾਯਕਤੋ ਬੁਜ੍ਝਤਿ. ਯਥਾ ਚ ਏਤੇਹਿ ਅਨਿਚ੍ਚਦਸ੍ਸਨਾਦੀਨਿ, ਏਵਂ ਏਤੇਪਿ ਅਨਿਚ੍ਚਦਸ੍ਸਨਾਦੀਹਿ ਹੋਨ੍ਤਿ. ਅਨਿਚ੍ਚਦਸ੍ਸਨੇਨ ਹਿ ਅਲੋਭੋ ਹੋਤਿ, ਦੁਕ੍ਖਦਸ੍ਸਨੇਨ ਅਦੋਸੋ, ਅਨਤ੍ਤਦਸ੍ਸਨੇਨ ਅਮੋਹੋ. ਕੋ ਹਿ ਨਾਮ ‘ਅਨਿਚ੍ਚਮਿਦ’ਨ੍ਤਿ ਸਮ੍ਮਾ ਞਤ੍ਵਾ ਤਸ੍ਸਤ੍ਥਾਯ ਪਿਹਂ ਉਪ੍ਪਾਦੇਯ੍ਯ, ਸਙ੍ਖਾਰੇ ਵਾ ‘ਦੁਕ੍ਖ’ਨ੍ਤਿ ਜਾਨਨ੍ਤੋ ਅਪਰਮ੍ਪਿ ਅਚ੍ਚਨ੍ਤਤਿਖਿਣਂ ਕੋਧਦੁਕ੍ਖਂ ਉਪ੍ਪਾਦੇਯ੍ਯ, ਅਤ੍ਤਸੁਞ੍ਞਤਞ੍ਚ ਬੁਜ੍ਝਿਤ੍ਵਾ ਪੁਨ ਸਮ੍ਮੋਹਂ ਆਪਜ੍ਜੇਯ੍ਯਾ’’ਤਿ.

ਤੇਨ ਵੁਤ੍ਤਂ ‘‘ਪੁਬ੍ਬਭਾਗਿਯਾਨਂ ਸੀਲਸਮ੍ਪਦਾਦੀਨਂ ਸਾਧਨਵਸੇਨ ਲੋਕੁਤ੍ਤਰਾਨਂ, ਉਪਨਿਸ੍ਸਯਭਾਵੇਨ ਚ ਸਮ੍ਪਨ੍ਨੋ ਅਜ੍ਝਾਸਯੋ ਏਤਸ੍ਸਾਤਿ ਸਮ੍ਪਨ੍ਨਜ੍ਝਾਸਯੋ’’ਤਿ. ਤੇਨਾਹ ‘‘ਏਵਂ ਤਿਸ੍ਸਨ੍ਨਂ ਬੋਧੀਨਂ ਅਞ੍ਞਤਰਂ ਪਾਪੁਣਾਤੀ’’ਤਿ.

ਇਦਾਨਿ ਤੇ ਅਜ੍ਝਾਸਯੇ ਪਾਲ਼ਿਯਾਵ ਵਿਭਾਵੇਤੁਂ ‘‘ਯਥਾਹਾ’’ਤਿਆਦਿ ਵੁਤ੍ਤਂ. ਤਤ੍ਥ ਛਾਤਿ ਗਣਨਪਰਿਚ੍ਛੇਦੋ. ਅਜ੍ਝਾਸਯਾਤਿ ਪਰਿਚ੍ਛਿਨ੍ਨਧਮ੍ਮਨਿਦਸ੍ਸਨਂ. ਉਭਯਂ ਪਨ ਏਕਜ੍ਝਂ ਕਤ੍ਵਾ ਛਬ੍ਬਿਧਾ ਅਜ੍ਝਾਸਯਾਤਿ ਅਤ੍ਥੋ. ਬੋਧਿਸਤ੍ਤਾਤਿ ਬੁਜ੍ਝਨਕਸਤ੍ਤਾ, ਬੋਧਿਯਾ ਵਾ ਨਿਯਤਭਾਵੇਨ ਸਤ੍ਤਾ ਲਗ੍ਗਾ, ਅਧਿਮੁਤ੍ਤਾ ਤਨ੍ਨਿਨ੍ਨਾ ਤਪ੍ਪੋਣਾਤਿ ਅਤ੍ਥੋ. ਬੋਧਿਪਰਿਪਾਕਾਯ ਸਂਵਤ੍ਤਨ੍ਤੀਤਿ ਯਥਾਭਿਨੀਹਾਰਂ ਅਤ੍ਤਨਾ ਪਤ੍ਤਬ੍ਬਬੋਧਿਯਾ ਪਰਿਪਾਚਨਾਯ ਭਵਨ੍ਤਿ. ਅਲੋਭਜ੍ਝਾਸਯਾਤਿ ਅਲੁਬ੍ਭਨਾਕਾਰੇਨ ਪਵਤ੍ਤਅਜ੍ਝਾਸਯਾ, ਆਦਿਤੋ ‘‘ਕਥਂ ਨੁ ਖੋ ਮਯਂ ਸਬ੍ਬਤ੍ਥ, ਸਬ੍ਬਦਾ ਚ ਅਲੁਦ੍ਧਾ ਏਵ ਹੇਸ੍ਸਾਮਾ’’ਤਿ, ਮਜ੍ਝੇ ਚ ਅਲੁਬ੍ਭਨਵਸੇਨੇਵ, ਪਚ੍ਛਾ ਚ ਤਸ੍ਸੇਵ ਰੋਚਨਵਸੇਨ ਪਵਤ੍ਤਅਜ੍ਝਾਸਯਾ. ਲੋਭੇ ਦੋਸਦਸ੍ਸਾਵਿਨੋਤਿ ਲੁਬ੍ਭਨਲਕ੍ਖਣੇ ਲੋਭੇ ਸਬ੍ਬਪ੍ਪਕਾਰੇਨ ਆਦੀਨਵਦਸ੍ਸਾਵਿਨੋ. ਇਦਂ ਤਸ੍ਸ ਅਜ੍ਝਾਸਯਸ੍ਸ ਏਕਦੇਸਤੋ ਬ੍ਰੂਹਨਾਕਾਰਦਸ੍ਸਨਂ. ਲੋਭੇ ਹਿ ਆਦੀਨਵਂ, ਅਲੋਭੇ ਚ ਆਨਿਸਂਸਂ ਪਸ੍ਸਨ੍ਤਸ੍ਸ ਅਲੋਭਜ੍ਝਾਸਯੋ ਪਰਿਵਡ੍ਢਤਿ, ਸ੍ਵਾਯਂ ਤਤ੍ਥ ਆਦੀਨਵਾਨਿਸਂਸਦਸ੍ਸਨਵਿਧਿ ਵਿਭਾਵਿਤੋਯੇਵ. ਸੇਸਪਦੇਸੁਪਿ ਇਮਿਨਾ ਨਯੇਨ ਅਤ੍ਥੋ ਵੇਦਿਤਬ੍ਬੋ. ਅਯਂ ਪਨ ਵਿਸੇਸੋ – ਨੇਕ੍ਖਮ੍ਮਨ੍ਤਿ ਇਧ ਪਬ੍ਬਜ੍ਜਾ. ਪਵਿਵੇਕੋ ਤਦਙ੍ਗਵਿਵੇਕੋ, ਵਿਕ੍ਖਮ੍ਭਨਵਿਵੇਕੋ, ਕਾਯਵਿਵੇਕੋ, ਚਿਤ੍ਤਵਿਵੇਕੋ ਚ. ਨਿਸ੍ਸਰਣਂ ਨਿਬ੍ਬਾਨਂ. ਸਬ੍ਬਭਵਗਤੀਸੂਤਿ ਸਬ੍ਬੇਸੁ ਭਵੇਸੁ, ਸਬ੍ਬਾਸੁ ਚ ਗਤੀਸੁ. ਤਦਧਿਮੁਤ੍ਤਤਾਯਾਤਿ ਯਦਤ੍ਥਂ ਭਾਵਨਾਨੁਯੋਗੋ, ਯਦਤ੍ਥਾ ਚ ਪਬ੍ਬਜ੍ਜਾ, ਤਦਧਿਮੁਤ੍ਤੇਨ. ਤੇਨੇਵਾਹ ‘‘ਸਮਾਧਾਧਿਮੁਤ੍ਤੇਨਾ’’ਤਿਆਦਿ.

੫੦. ‘‘ਕਿਂ ਚਰਿਤੋਸੀ’’ਤਿ ਪੁਚ੍ਛਿਤੋ ਸਚੇ ‘‘ਨ ਜਾਨਾਮੀ’’ਤਿ ਵਦੇਯ੍ਯ, ‘‘ਕੇ ਵਾ ਤੇ ਧਮ੍ਮਾ ਬਹੁਲਂ ਸਮੁਦਾਚਰਨ੍ਤੀ’’ਤਿ ਪੁਚ੍ਛਿਤਬ੍ਬੋ. ਕਿਂ ਵਾਤਿ ਕਿਂ ਅਸੁਭਂ ਵਾ ਅਨੁਸ੍ਸਤਿਟ੍ਠਾਨਂ ਵਾ ਅਞ੍ਞਂ ਵਾ. ਕਿਂ ਤੇ ਮਨਸਿ ਕਰੋਤੋ ਫਾਸੁ ਹੋਤੀਤਿ ਚਿਤ੍ਤਸ੍ਸ ਏਕਗ੍ਗਭਾਵੇਨ ਸੁਖਂ ਹੋਤਿ. ਚਿਤ੍ਤਂ ਨਮਤੀਤਿ ਪਕਤਿਯਾਵ ਅਭਿਰਤਿਵਸੇਨ ਨਮਤਿ. ਏਵਮਾਦੀਹੀਤਿ ਆਦਿ-ਸਦ੍ਦੇਨ ਇਰਿਯਾਪਥਾਦੀਨਂ ਸਙ੍ਗਹੋ ਦਟ੍ਠਬ੍ਬੋ. ਤੇਪਿ ਹਿ ਨ ਸਬ੍ਬਸ੍ਸ ਏਕਂਸਤੋ ਬ੍ਯਭਿਚਾਰਿਨੋ ਏਵ. ਤਥਾ ਹਿ ਸਮੁਦਾਚਾਰੋ ਪੁਚ੍ਛਿਤਬ੍ਬੋ ਵੁਤ੍ਤੋ. ‘‘ਅਸੁਕਞ੍ਚ ਅਸੁਕਞ੍ਚ ਮਨਸਿਕਾਰਵਿਧਿਂ ਕਤਿਪਯਦਿਵਸਂ ਅਨੁਯੁਞ੍ਜਾਹੀ’’ਤਿ ਚ ਵਤ੍ਤਬ੍ਬੋ.

‘‘ਪਕਤਿਯਾ ਉਗ੍ਗਹਿਤਕਮ੍ਮਟ੍ਠਾਨਸ੍ਸਾ’’ਤਿ ਇਦਂ ਯਂ ਕਮ੍ਮਟ੍ਠਾਨਂ ਗਹੇਤੁਕਾਮੋ, ਤਤ੍ਥ ਸਜ੍ਝਾਯਵਸੇਨ ਵਾ ਮਨਸਿਕਾਰਵਸੇਨ ਵਾ ਕਤਪਰਿਚਯਂ ਸਨ੍ਧਾਯ ਵੁਤ੍ਤਂ. ਏਕਂ ਦ੍ਵੇ ਨਿਸਜ੍ਜਾਨੀਤਿ ਏਕਂ ਵਾ ਦ੍ਵੇ ਵਾ ਉਣ੍ਹਾਸਨਾਨਿ. ਸਜ੍ਝਾਯਂ ਕਾਰੇਤ੍ਵਾ ਅਤ੍ਤਨੋ ਸਮ੍ਮੁਖਾਵ ਅਧੀਯਾਪੇਤ੍ਵਾ ਦਾਤਬ੍ਬਂ, ਸੋ ਚੇ ਅਞ੍ਞਤ੍ਥ ਗਨ੍ਤੁਕਾਮੋਤਿ ਅਧਿਪ੍ਪਾਯੋ. ਤੇਨਾਹ ‘‘ਸਨ੍ਤਿਕੇ ਵਸਨ੍ਤਸ੍ਸਾ’’ਤਿ. ਆਗਤਾਗਤਕ੍ਖਣੇ ਕਥੇਤਬ੍ਬਂ, ਪਵਤ੍ਤਿਂ ਸੁਤ੍ਵਾਤਿ ਅਧਿਪ੍ਪਾਯੋ.

ਪਥਵੀਕਸਿਣਨ੍ਤਿ ਪਥਵੀਕਸਿਣਕਮ੍ਮਟ੍ਠਾਨਂ. ਕਤਸ੍ਸਾਤਿ ਕਤਸ੍ਸ ਕਸਿਣਸ੍ਸ. ਤਂ ਤਂ ਆਕਾਰਨ੍ਤਿ ਆਚਰਿਯੇਨ ਕਮ੍ਮਟ੍ਠਾਨੇ ਵੁਚ੍ਚਮਾਨੇ ਪਦਪਦਤ੍ਥਾਧਿਪ੍ਪਾਯਓਪਮ੍ਮਾਦਿਕਂ ਅਤ੍ਤਨੋ ਞਾਣਸ੍ਸ ਪਚ੍ਚੁਪਟ੍ਠਿਤਂ ਤਂ ਤਂ ਆਕਾਰਂ, ਯਂ ਯਂ ਨਿਮਿਤ੍ਤਨ੍ਤਿ ਵੁਤ੍ਤਂ. ਉਪਨਿਬਨ੍ਧਿਤ੍ਵਾਤਿ ਉਪਨੇਤ੍ਵਾ ਨਿਬਦ੍ਧਂ ਵਿਯ ਕਤ੍ਵਾ, ਹਦਯੇ ਠਪੇਤ੍ਵਾ ਅਪਮੁਸ੍ਸਨ੍ਤਂ ਕਤ੍ਵਾਤਿ ਅਤ੍ਥੋ. ਏਵਂ ਸੁਟ੍ਠੁ ਉਪਟ੍ਠਿਤਸ੍ਸਤਿਤਾਯ ਨਿਮਿਤ੍ਤਂ ਗਹੇਤ੍ਵਾ ਤਤ੍ਥ ਸਮ੍ਪਜਾਨਕਾਰਿਤਾਯ ਸਕ੍ਕਚ੍ਚਂ ਸੁਣਨ੍ਤੇਨ. ਤਨ੍ਤਿ ਤਂ ਯਥਾਵੁਤ੍ਤਂ ਸੁਗ੍ਗਹਿਤਂ ਨਿਸ੍ਸਾਯ. ਇਤਰਸ੍ਸਾਤਿ ਤਥਾ ਅਗਣ੍ਹਨ੍ਤਸ੍ਸ. ਸਬ੍ਬਾਕਾਰੇਨਾਤਿ ਕਸ੍ਸਚਿਪਿ ਪਕਾਰਸ੍ਸ ਤਤ੍ਥ ਅਸੇਸਿਤਤ੍ਤਾ ਵੁਤ੍ਤਂ.

ਕਮ੍ਮਟ੍ਠਾਨਗ੍ਗਹਣਨਿਦ੍ਦੇਸਵਣ੍ਣਨਾ ਨਿਟ੍ਠਿਤਾ.

ਇਤਿ ਤਤਿਯਪਰਿਚ੍ਛੇਦਵਣ੍ਣਨਾ.