੪. ਪਥਵੀਕਸਿਣਨਿਦ੍ਦੇਸਵਣ੍ਣਨਾ
੫੧. ਫਾਸੁ ਹੋਤੀਤਿ ਆਵਾਸਸਪ੍ਪਾਯਾਦਿਲਾਭੇਨ ਮਨਸਿਕਾਰਫਾਸੁਤਾ ਭਾਵਨਾਨੁਕੂਲਤਾ ਹੋਤਿ. ਪਰਿਸੋਧੇਨ੍ਤੇਨਾਤਿ ਤੇਸਂ ਤੇਸਂ ਗਣ੍ਠਿਟ੍ਠਾਨਾਨਂ ਛਿਨ੍ਦਨਵਸੇਨ ਵਿਸੋਧੇਨ੍ਤੇਨ. ਅਕਿਲਮਨ੍ਤੋਯੇਵਾਤਿ ਅਕਿਲਨ੍ਤਕਾਯੋ ਏਵ. ਸਤਿ ਹਿ ਕਾਯਕਿਲਮਥੇ ਸਿਯਾ ਕਮ੍ਮਟ੍ਠਾਨਮਨਸਿਕਾਰਸ੍ਸ ਅਨ੍ਤਰਾਯੋਤਿ ਅਧਿਪ੍ਪਾਯੋ. ਗਣ੍ਠਿਟ੍ਠਾਨਨ੍ਤਿ ਅਤ੍ਥਤੋ, ਅਧਿਪ੍ਪਾਯਤੋ ਚ ਦੁਬ੍ਬਿਨਿਵੇਧਤਾਯ ਗਣ੍ਠਿਭੂਤਂ ਠਾਨਂ. ਛਿਨ੍ਦਿਤ੍ਵਾਤਿ ਯਾਥਾਵਤੋ ਅਤ੍ਥਸ੍ਸ, ਅਧਿਪ੍ਪਾਯਸ੍ਸ ਚ ਵਿਭਾਵਨੇਨ ਛਿਨ੍ਦਿਤ੍ਵਾ, ਵਿਭੂਤਂ ਸੁਪਾਕਟਂ ਕਤ੍ਵਾਤਿ ਅਧਿਪ੍ਪਾਯੋ. ਸੁਵਿਸੁਦ੍ਧਨ੍ਤਿ ਸੁਟ੍ਠੁ ਵਿਸੁਦ੍ਧਂ, ਨਿਗੁਮ੍ਬਂ ਨਿਜ੍ਜਟਨ੍ਤਿ ਅਤ੍ਥੋ.
ਅਨਨੁਰੂਪਵਿਹਾਰਵਣ੍ਣਨਾ
੫੨. ਅਞ੍ਞਤਰੇਨਾਤਿ ਅਞ੍ਞਤਰੇਨਾਪਿ, ਪਗੇਵ ਅਨੇਕੇਹੀਤਿ ਅਧਿਪ੍ਪਾਯੋ. ਮਹਨ੍ਤਭਾਵੋ ਮਹਤ੍ਤਂ. ਤਥਾ ਸੇਸੇਸੁ. ਸੋਣ੍ਡਵਾ ਸੋਣ੍ਡੀ. ਤਥਾ ਪਣ੍ਣਨ੍ਤਿਆਦੀਸੁ. ਬੋਧਿਅਙ੍ਗਣਾਦੀਸੁ ਕਾਤਬ੍ਬਂ ਇਧ ‘‘ਵਤ੍ਤ’’ਨ੍ਤਿ ਅਧਿਪ੍ਪੇਤਨ੍ਤਿ ਆਹ ‘‘ਪਾਨੀਯਘਟਂ ਵਾ ਰਿਤ੍ਤ’’ਨ੍ਤਿ. ਨਿਟ੍ਠਿਤਾਯਾਤਿ ਪਵਿਟ੍ਠਪਵਿਟ੍ਠਾਨਂ ਦਾਨੇਨ ਪਰਿਕ੍ਖੀਣਾਯ. ਜਿਣ੍ਣਵਿਹਾਰੇਪਿ ਯਤ੍ਰ ਭਿਕ੍ਖੂ ਏਵਂ ਵਦਨ੍ਤਿ ‘‘ਆਯਸ੍ਮਾ, ਯਥਾਸੁਖਂ ਸਮਣਧਮ੍ਮਂ ਕਰੋਤੁ, ਮਯਂ ਪਟਿਜਗ੍ਗਿਸ੍ਸਾਮਾ’’ਤਿ. ਏਵਰੂਪੇ ਵਿਹਾਤਬ੍ਬਨ੍ਤਿ ਅਯਮ੍ਪਿ ਨਯੋ ਲਬ੍ਭਤਿ, ਵੁਤ੍ਤਨਯਤ੍ਤਾ ਪਨ ਨ ਵੁਤ੍ਤੋ.
ਮਹਾਪਥਵਿਹਾਰੇਤਿ ਮਹਾਪਥਸਮੀਪੇ ਵਿਹਾਰੇ. ਭਾਜਨਦਾਰੁਦੋਣਿਕਾਦੀਨੀਤਿ ਰਜਨਭਾਜਨਾਨਿ, ਰਜਨਤ੍ਥਾਯ ਦਾਰੁ, ਦਾਰੁਮਯਦੋਣਿਕਾ, ਰਜਨਪਚਨਟ੍ਠਾਨਂ, ਧੋਵਨਫਲਕਨ੍ਤਿ ਏਵਮਾਦੀਨਿ. ਸਾਕਹਾਰਿਕਾਤਿ ਸਾਕਹਾਰਿਨਿਯੋ ਇਤ੍ਥਿਯੋ. ਵਿਸਭਾਗਸਦ੍ਦੋ ਕਾਮਗੁਣੂਪਸਂਹਿਤੋ ਗੀਤਸਦ੍ਦੋਤਿ ਵਦਨ੍ਤਿ, ਕੇਵਲੋਪਿ ਇਤ੍ਥਿਸਦ੍ਦੋ ਵਿਸਭਾਗਸਦ੍ਦੋ ਏਵ. ਤਤ੍ਰਾਤਿ ਪੁਪ੍ਫਵਨ੍ਤੇ ਵਿਹਾਰੇ. ਤਾਦਿਸੋਯੇਵਾਤਿ ‘‘ਤਤ੍ਥਸ੍ਸ ਕਮ੍ਮਟ੍ਠਾਨਂ ਗਹੇਤ੍ਵਾ’’ਤਿਆਦਿਨਾ ਯਾਦਿਸੋ ਪਣ੍ਣਵਨ੍ਤੇ ਵਿਹਾਰੇ ਉਪਦ੍ਦਵੋ ਵੁਤ੍ਤੋ, ਤਾਦਿਸੋਯੇਵ. ‘‘ਪੁਪ੍ਫਹਾਰਿਕਾਯੋ ਪੁਪ੍ਫਂ ਓਚਿਨਨ੍ਤਿਯੋ’’ਤਿ ਪਨ ਵਤ੍ਤਬ੍ਬਂ. ਅਯਮਿਧ ਵਿਸੇਸੋ.
ਪਤ੍ਥਨੀਯੇਤਿ ਤਤ੍ਥ ਵਸਨ੍ਤੇਸੁ ਸਮ੍ਭਾਵਨਾਵਸੇਨ ਉਪਸਙ੍ਕਮਨਾਦਿਨਾ ਪਤ੍ਥੇਤਬ੍ਬੇ. ਤੇਨਾਹ ‘‘ਲੇਣਸਮ੍ਮਤੇ’’ਤਿ. ਦਕ੍ਖਿਣਾਗਿਰੀਤਿ ਮਗਧਵਿਸਯੇ ਦਕ੍ਖਿਣਾਗਿਰੀਤਿ ਵਦਨ੍ਤਿ.
ਵਿਸਭਾਗਾਰਮ੍ਮਣਾਨਿ ਇਟ੍ਠਾਨਿ, ਅਨਿਟ੍ਠਾਨਿ ਚ. ਅਨਿਟ੍ਠਾਨਂ ਹਿ ਦਸ੍ਸਨਤ੍ਥਂ ‘‘ਘਟੇਹਿ ਨਿਘਂਸਨ੍ਤਿਯੋ’’ਤਿਆਦਿ ਵੁਤ੍ਤਂ. ਦਬ੍ਬੂਪਕਰਣਯੋਗ੍ਗਾ ਰੁਕ੍ਖਾ ਦਬ੍ਬੂਪਕਰਣਰੁਕ੍ਖਾ.
ਯੋ ਪਨ ਵਿਹਾਰੋ. ਖਲਨ੍ਤਿ ਧਞ੍ਞਕਰਣਟ੍ਠਾਨਂ. ਗਾਵੋ ਰੁਨ੍ਧਨ੍ਤਿ ‘‘ਸਸ੍ਸਂ ਖਾਦਿਂਸੂ’’ਤਿ. ਉਦਕਵਾਰਨ੍ਤਿ ਕੇਦਾਰੇਸੁ ਸਸ੍ਸਾਨਂ ਦਾਤਬ੍ਬਉਦਕਵਾਰਂ. ਅਯਮ੍ਪੀਤਿ ਮਹਾਸਙ੍ਘਭੋਗੋਪਿ ਵਿਹਾਰੋ. ਵਾਰਿਯਮਾਨਾ ਕਮ੍ਮਟ੍ਠਾਨਿਕੇਨ ਭਿਕ੍ਖੁਨਾ.
ਸਮੁਦ੍ਦਸਾਮੁਦ੍ਦਿਕਨਦੀਨਿਸ੍ਸਿਤਂ ਉਦਕਪਟ੍ਟਨਂ. ਮਹਾਨਗਰਾਨਂ ਆਯਦ੍ਵਾਰਭੂਤਂ ਅਟਵਿਮੁਖਾਦਿਨਿਸ੍ਸਿਤਂ ਥਲਪਟ੍ਟਨਂ. ਅਪ੍ਪਸਨ੍ਨਾ ਹੋਨ੍ਤਿ. ਤੇਨਸ੍ਸ ਤਤ੍ਥ ਫਾਸੁਵਿਹਾਰੋ ਨ ਹੋਤੀਤਿ ਅਧਿਪ੍ਪਾਯੋ. ਮਞ੍ਞਮਾਨਾ ਰਾਜਮਨੁਸ੍ਸਾ.
ਸਮੋਸਰਣੇਨਾਤਿ ਇਤੋ ਚਿਤੋ ਸਞ੍ਚਰਣੇਨ. ਪਪਾਤੇਤਿ ਪਪਾਤਸੀਸੇ ਠਤ੍ਵਾ ਗਾਯਿ ‘‘ਗੀਤਸਦ੍ਦੇਨ ਇਧਾਗਤਂ ਪਪਾਤੇ ਪਾਤੇਤ੍ਵਾ ਖਾਦਿਸ੍ਸਾਮੀ’’ਤਿ. ਵੇਗੇਨ ਗਹੇਤ੍ਵਾਤਿ ਵੇਗੇਨਾਗਨ੍ਤ੍ਵਾ ‘‘ਕੁਹਿਂ ਯਾਸੀ’’ਤਿ ਖਨ੍ਧੇ ਗਹੇਤ੍ਵਾ.
ਯਤ੍ਥਾਤਿ ਯਸ੍ਮਿਂ ਵਿਹਾਰੇ, ਵਿਹਾਰਸਾਮਨ੍ਤਾ ਵਾ ਨ ਸਕ੍ਕਾ ਹੋਤਿ ਕਲ੍ਯਾਣਮਿਤ੍ਤਂ ਲਦ੍ਧੁਂ, ਤਤ੍ਥ ਵਿਹਾਰੇ ਸੋ ਅਲਾਭੋ ਮਹਾਦੋਸੋਤਿ ਯੋਜਨਾ.
ਪਨ੍ਥਨਿਨ੍ਤਿ ਪਨ੍ਥੇ ਨੀਤੋ ਪਵਤ੍ਤਿਤੋਤਿ ਪਨ੍ਥਨੀ, ਮਗ੍ਗਨਿਸ੍ਸਿਤੋ ਵਿਹਾਰੋ. ਤਂ ਪਨ੍ਥਨਿਂ. ਸੋਣ੍ਡਿਨ੍ਤਿ ਸੋਣ੍ਡਿਸਹਿਤੋ ਵਿਹਾਰੋ ਸੋਣ੍ਡੀ, ਤਂ ਸੋਣ੍ਡਿਂ. ਤਥਾ ਪਣ੍ਣਨ੍ਤਿਆਦੀਸੁ. ਨਗਰਨਿਸ੍ਸਿਤਂ ਨਗਰਨ੍ਤਿ ਵੁਤ੍ਤਂ ਉਤ੍ਤਰਪਦਲੋਪੇਨ ਯਥਾ ‘‘ਭੀਮਸੇਨੋ ਭੀਮੋ’’ਤਿ. ਦਾਰੁਨਾਤਿ ਦਾਰੁਨਿਸ੍ਸਿਤੇਨ ਸਹ. ਵਿਸਭਾਗੇਨਾਤਿ ਯੋ ਵਿਸਭਾਗੇਹਿ ਵੁਸੀਯਤਿ, ਵਿਸਭਾਗਾਨਂ ਵਾ ਨਿਵਾਸੋ, ਸੋ ਵਿਹਾਰੋ ਵਿਸਭਾਗੋ. ਤੇਨ ਵਿਸਭਾਗੇਨ ਸਦ੍ਧਿਂ. ਪਚ੍ਚਨ੍ਤਨਿਸ੍ਸਿਤਞ੍ਚ ਸੀਮਾਨਿਸ੍ਸਿਤਞ੍ਚ ਅਸਪ੍ਪਾਯਞ੍ਚ ਪਚ੍ਚਨ੍ਤਸੀਮਾਸਪ੍ਪਾਯਂ. ਯਤ੍ਥ ਮਿਤ੍ਤੋ ਨ ਲਬ੍ਭਤਿ, ਤਮ੍ਪੀਤਿ ਸਬ੍ਬਤ੍ਥ ਠਾਨ-ਸਦ੍ਦਾਪੇਕ੍ਖਾਯ ਨਪੁਂਸਕਨਿਦ੍ਦੇਸੋ. ਇਤਿ ਵਿਞ੍ਞਾਯਾਤਿ ‘‘ਭਾਵਨਾਯ ਅਨਨੁਰੂਪਾਨੀ’’ਤਿ ਏਵਂ ਵਿਜਾਨਿਤ੍ਵਾ.
ਅਨੁਰੂਪਵਿਹਾਰਵਣ੍ਣਨਾ
੫੩. ਅਯਂ ਅਨੁਰੂਪੋ ਨਾਮਾਤਿ ਅਯਂ ਵਿਹਾਰੋ ਭਾਵਨਾਯ ਅਨੁਰੂਪੋ ਨਾਮ. ਨਾਤਿਦੂਰਨ੍ਤਿ ਗੋਚਰਟ੍ਠਾਨਤੋ ਅਡ੍ਢਗਾਵੁਤਤੋ ਓਰਭਾਗਤਾਯ ਨ ਅਤਿਦੂਰਂ. ਨਾਚ੍ਚਾਸਨ੍ਨਨ੍ਤਿ ਪਚ੍ਛਿਮੇਨ ਪਮਾਣੇਨ ਗੋਚਰਟ੍ਠਾਨਤੋ ਪਞ੍ਚਧਨੁਸਤਿਕਤਾਯ ਨ ਅਤਿਆਸਨ੍ਨਂ. ਤਾਯ ਚ ਪਨ ਨਾਤਿਦੂਰਨਾਚ੍ਚਾਸਨ੍ਨਤਾਯ, ਗੋਚਰਟ੍ਠਾਨਂ ਪਰਿਸ੍ਸਯਾਦਿਰਹਿਤਮਗ੍ਗਤਾਯ ਚ ਗਮਨਸ੍ਸ ਚ ਆਗਮਨਸ੍ਸ ਚ ਯੁਤ੍ਤਰੂਪਤ੍ਤਾ ਗਮਨਾਗਮਨਸਮ੍ਪਨ੍ਨਂ. ਦਿਵਸਭਾਗੇ ਮਹਾਜਨਸਂਕਿਣ੍ਣਤਾਭਾਵੇਨ ਦਿਵਾ ਅਪ੍ਪਾਕਿਣ੍ਣਂ. ਅਭਾਵਤ੍ਥੋ ਹਿ ਅਯਂ ਅਪ੍ਪ-ਸਦ੍ਦੋ ‘‘ਅਪ੍ਪਿਚ੍ਛੋ’’ਤਿਆਦੀਸੁ (ਮ. ਨਿ. ੧.੩੩੬) ਵਿਯ. ਰਤ੍ਤਿਯਂ ਜਨਾਲਾਪਸਦ੍ਦਾਭਾਵੇਨ ਰਤ੍ਤਿਂ ਅਪ੍ਪਸਦ੍ਦਂ. ਸਬ੍ਬਦਾਪਿ ਜਨਸਨ੍ਨਿਪਾਤਨਿਗ੍ਘੋਸਾਭਾਵੇਨ ਅਪ੍ਪਨਿਗ੍ਘੋਸਂ. ਅਪ੍ਪਕਸਿਰੇਨਾਤਿ ਅਕਸਿਰੇਨ ਸੁਖੇਨੇਵ. ਸੀਲਾਦਿਗੁਣਾਨਂ ਥਿਰਭਾਵਪ੍ਪਤ੍ਤਿਯਾ ਥੇਰਾ. ਸੁਤ੍ਤਗੇਯ੍ਯਾਦਿ ਬਹੁ ਸੁਤਂ ਏਤੇਸਨ੍ਤਿ ਬਹੁਸ੍ਸੁਤਾ. ਵਾਚੁਗ੍ਗਤਕਰਣੇਨ, ਸਮ੍ਮਦੇਵ ਗਰੂਨਂ ਸਨ੍ਤਿਕੇ ਆਗਮਿਤਭਾਵੇਨ ਚ ਆਗਤੋ ਪਰਿਯਤ੍ਤਿਧਮ੍ਮਸਙ੍ਖਾਤੋ ਆਗਮੋ ਏਤੇਸਨ੍ਤਿ ਆਗਤਾਗਮਾ. ਸੁਤ੍ਤਾਭਿਧਮ੍ਮਸਙ੍ਖਾਤਸ੍ਸ ਧਮ੍ਮਸ੍ਸ ਧਾਰਣੇਨ ਧਮ੍ਮਧਰਾ. ਵਿਨਯਸ੍ਸ ਧਾਰਣੇਨ ਵਿਨਯਧਰਾ. ਤੇਸਂਯੇਵ ਧਮ੍ਮਵਿਨਯਾਨਂ ਮਾਤਿਕਾਯ ਧਾਰਣੇਨ ਮਾਤਿਕਾਧਰਾ. ਤਤ੍ਥ ਤਤ੍ਥ ਧਮ੍ਮਪਰਿਪੁਚ੍ਛਾਯ ਪਰਿਪੁਚ੍ਛਤਿ. ਅਤ੍ਥਪਰਿਪੁਚ੍ਛਾਯ ਪਰਿਪਞ੍ਹਤਿ ਵੀਮਂਸਤਿ ਵਿਚਾਰੇਤਿ. ਇਦਂ, ਭਨ੍ਤੇ, ਕਥਂ ਇਮਸ੍ਸ ਕੋ ਅਤ੍ਥੋਤਿ ਪਰਿਪੁਚ੍ਛਨਪਰਿਪਞ੍ਹਾਕਾਰਦਸ੍ਸਨਂ. ਅਵਿਵਟਞ੍ਚੇਵ ਪਾਲ਼ਿਯਾ ਅਤ੍ਥਂ ਪਦੇਸਨ੍ਤਰਪਾਲ਼ਿਦਸ੍ਸਨੇਨ ਆਗਮਤੋ ਵਿਵਰਨ੍ਤਿ. ਅਨੁਤ੍ਤਾਨੀਕਤਞ੍ਚ ਯੁਤ੍ਤਿਵਿਭਾਵਨੇਨ ਉਤ੍ਤਾਨੀਕਰੋਨ੍ਤਿ. ਕਙ੍ਖਟ੍ਠਾਨਿਯੇਸੁ ਧਮ੍ਮੇਸੁ ਸਂਸਯੁਪ੍ਪਤ੍ਤਿਯਾ ਹੇਤੁਤਾਯ ਗਣ੍ਠਿਟ੍ਠਾਨਭੂਤੇਸੁ ਪਾਲ਼ਿਪਦੇਸੇਸੁ ਯਾਥਾਵਤੋ ਵਿਨਿਚ੍ਛਯਦਾਨੇਨ ਕਙ੍ਖਂ ਪਟਿਵਿਨੋਦੇਨ੍ਤਿ. ਏਤ੍ਥ ਚ ‘‘ਨਾਤਿਦੂਰਂ, ਨਾਚ੍ਚਾਸਨ੍ਨਂ, ਗਮਨਾਗਮਨਸਮ੍ਪਨ੍ਨ’’ਨ੍ਤਿ ਏਕਂ ਅਙ੍ਗਂ, ‘‘ਦਿਵਾ ਅਪ੍ਪਾਕਿਣ੍ਣਂ, ਰਤ੍ਤਿਂ ਅਪ੍ਪਸਦ੍ਦਂ ਅਪ੍ਪਨਿਗ੍ਘੋਸ’’ਨ੍ਤਿ ਏਕਂ, ‘‘ਅਪ੍ਪਡਂਸਮਕਸਵਾਤਾਤਪਸਰੀਸਪਸਮ੍ਫਸ੍ਸ’’ਨ੍ਤਿ ਏਕਂ, ‘‘ਤਸ੍ਮਿਂ ਖੋ ਪਨ ਸੇਨਾਸਨੇ ਵਿਹਰਨ੍ਤਸ੍ਸ…ਪੇ… ਪਰਿਕ੍ਖਾਰਾ’’ਤਿ ਏਕਂ, ‘‘ਤਸ੍ਮਿਂ ਖੋ ਪਨ ਸੇਨਾਸਨੇ ਥੇਰਾ…ਪੇ… ਕਙ੍ਖਂ ਪਟਿਵਿਨੋਦੇਨ੍ਤੀ’’ਤਿ ਏਕਂ. ਏਵਂ ਪਞ੍ਚ ਅਙ੍ਗਾਨਿ ਵੇਦਿਤਬ੍ਬਾਨਿ.
ਖੁਦ੍ਦਕਪਲਿਬੋਧਵਣ੍ਣਨਾ
੫੪. ਖੁਦ੍ਦਕਪਲਿਬੋਧੁਪਚ੍ਛੇਦੇ ਪਯੋਜਨਂ ਪਰਤੋ ਆਗਮਿਸ੍ਸਤਿ. ਅਗ੍ਗਲ਼ਅਨੁਵਾਤਪਰਿਭਣ੍ਡਦਾਨਾਦਿਨਾ ਦਲ਼੍ਹੀਕਮ੍ਮਂ ਵਾ. ਤਨ੍ਤਚ੍ਛੇਦਾਦੀਸੁ ਤੁਨ੍ਨਕਮ੍ਮਂ ਵਾ ਕਾਤਬ੍ਬਂ.
ਭਾਵਨਾਵਿਧਾਨਵਣ੍ਣਨਾ
੫੫. ਸਬ੍ਬਕਮ੍ਮਟ੍ਠਾਨਵਸੇਨਾਤਿ ਅਨੁਕ੍ਕਮੇਨ ਨਿਦ੍ਦਿਸਿਯਮਾਨਸ੍ਸ ਚਤ੍ਤਾਲੀਸਵਿਧਸ੍ਸ ਸਬ੍ਬਸ੍ਸ ਕਮ੍ਮਟ੍ਠਾਨਸ੍ਸ ਵਸੇਨ. ਪਿਣ੍ਡਪਾਤਪਟਿਕ੍ਕਨ੍ਤੇਨਾਤਿ ਪਿਣ੍ਡਪਾਤਪਰਿਭੋਗਤੋ ਪਟਿਨਿਵਤ੍ਤੇਨ, ਪਿਣ੍ਡਪਾਤਭੁਤ੍ਤਾਵਿਨਾ ਓਨੀਤਪਤ੍ਤਪਾਣਿਨਾਤਿ ਅਤ੍ਥੋ. ਭਤ੍ਤਸਮ੍ਮਦਂ ਪਟਿਵਿਨੋਦੇਤ੍ਵਾਤਿ ਭੋਜਨਨਿਮਿਤ੍ਤਂ ਪਰਿਸ੍ਸਮਂ ਵਿਨੋਦੇਤ੍ਵਾ. ਆਹਾਰੇ ਹਿ ਆਸਯਂ ਪਵਿਟ੍ਠਮਤ੍ਤੇ ਤਸ੍ਸ ਆਗਨ੍ਤੁਕਤਾਯ ਯੇਭੁਯ੍ਯੇਨ ਸਿਯਾ ਸਰੀਰਸ੍ਸ ਕੋਚਿ ਪਰਿਸ੍ਸਮੋ, ਤਂ ਵੂਪਸਮੇਤ੍ਵਾ. ਤਸ੍ਮਿਂ ਹਿ ਅਵੂਪਸਨ੍ਤੇ ਸਰੀਰਖੇਦੇਨ ਚਿਤ੍ਤਂ ਏਕਗ੍ਗਤਂ ਨ ਲਭੇਯ੍ਯਾਤਿ. ਪਵਿਵਿਤ੍ਤੇਤਿ ਜਨਵਿਵਿਤ੍ਤੇ. ਸੁਖਨਿਸਿਨ੍ਨੇਨਾਤਿ ਪਲ੍ਲਙ੍ਕਂ ਆਭੁਜਿਤ੍ਵਾ ਉਜੁਂ ਕਾਯਂ ਪਣਿਧਾਯ ਨਿਸਜ੍ਜਾਯ ਸੁਖਨਿਸਿਨ੍ਨੇਨ. ਵੁਤ੍ਤਞ੍ਹੇਤਨ੍ਤਿ ਯਂ ‘‘ਕਤਾਯ ਵਾ’’ਤਿਆਦਿਨਾ ਪਥਵਿਯਾ ਨਿਮਿਤ੍ਤਗ੍ਗਹਣਂ ਇਧ ਵੁਚ੍ਚਤਿ, ਵੁਤ੍ਤਂ ਹੇਤਂ ਪੋਰਾਣਟ੍ਠਕਥਾਯਂ.
ਇਦਾਨਿ ਤਂ ਅਟ੍ਠਕਥਾਪਾਲ਼ਿਂ ਦਸ੍ਸੇਨ੍ਤੋ ‘‘ਪਥਵੀਕਸਿਣਂ ਉਗ੍ਗਣ੍ਹਨ੍ਤੋ’’ਤਿਆਦਿਮਾਹ. ਤਤ੍ਥਾਯਂ ਸਙ੍ਖੇਪਤ੍ਥੋ – ਪਥਵੀਕਸਿਣਂ ਉਗ੍ਗਣ੍ਹਨ੍ਤੋਤਿ ਉਗ੍ਗਹਨਿਮਿਤ੍ਤਭਾਵੇਨ ਪਥਵੀਕਸਿਣਂ ਗਣ੍ਹਨ੍ਤੋ ਆਦਿਯਨ੍ਤੋ, ਉਗ੍ਗਹਨਿਮਿਤ੍ਤਭੂਤਂ ਪਥਵੀਕਸਿਣਂ ਉਪ੍ਪਾਦੇਨ੍ਤੋਤਿ ਅਤ੍ਥੋ. ਉਪ੍ਪਾਦਨਞ੍ਚੇਤ੍ਥ ਤਥਾਨਿਮਿਤ੍ਤਸ੍ਸ ਉਪਟ੍ਠਾਪਨਂ ਦਟ੍ਠਬ੍ਬਂ. ਪਥਵਿਯਨ੍ਤਿ ਵਕ੍ਖਮਾਨਵਿਸੇਸੇ ਪਥਵੀਮਣ੍ਡਲੇ. ਨਿਮਿਤ੍ਤਂ ਗਣ੍ਹਾਤੀਤਿ ਤਤ੍ਥ ਚਕ੍ਖੁਨਾ ਆਦਾਸਤਲੇ ਮੁਖਨਿਮਿਤ੍ਤਂ ਵਿਯ ਭਾਵਨਾਞਾਣੇਨ ਵਕ੍ਖਮਾਨਵਿਸੇਸਂ ਪਥਵੀਨਿਮਿਤ੍ਤਂ ਗਣ੍ਹਾਤਿ. ‘‘ਪਥਵਿਯ’’ਨ੍ਤਿ ਵਤ੍ਵਾਪਿ ਮਣ੍ਡਲਾਪੇਕ੍ਖਾਯ ਨਪੁਂਸਕਨਿਦ੍ਦੇਸੋ. ਕਤੇਤਿ ਵਕ੍ਖਮਾਨਵਿਧਿਨਾ ਅਭਿਸਙ੍ਖਤੇਤਿ ਅਤ੍ਥੋ. ਵਾ-ਸਦ੍ਦੋ ਅਨਿਯਮਤ੍ਥੋ. ਅਕਤੇਤਿ ਪਾਕਤਿਕੇ ਖਲਮਣ੍ਡਲਾਦਿਕੇ ਪਥਵੀਮਣ੍ਡਲੇ. ਸਾਨ੍ਤਕੇਤਿ ਸਅਨ੍ਤਕੇ ਏਵ, ਸਪਰਿਚ੍ਛੇਦੇ ਏਵਾਤਿ ਅਤ੍ਥੋ. ਸਾਵਧਾਰਣਞ੍ਹੇਤਂ ਵਚਨਂ. ਤਥਾ ਹਿ ਤੇਨ ਨਿਵਤ੍ਤਿਤਂ ਦਸ੍ਸੇਤੁਂ ‘‘ਨੋ ਅਨਨ੍ਤਕੇ’’ਤਿ ਵੁਤ੍ਤਂ. ਸਕੋਟਿਯੇਤਿਆਦੀਨਿਪਿ ਤਸ੍ਸੇਵ ਵੇਵਚਨਾਨਿ. ਸੁਪ੍ਪਮਤ੍ਤੇ ਵਾਤਿਆਦੀਸੁ ਸੁਪ੍ਪਸਰਾਵਾਨਿ ਸਮਪ੍ਪਮਾਣਾਨਿ ਇਚ੍ਛਿਤਾਨਿ. ਕੇਚਿ ਪਨ ਵਦਨ੍ਤਿ ‘‘ਸਰਾਵਮਤ੍ਤਂ ਵਿਦਤ੍ਥਿਚਤੁਰਙ੍ਗੁਲਂ ਹੋਤਿ, ਸੁਪ੍ਪਮਤ੍ਤਂ ਤਤੋ ਅਧਿਕਪ੍ਪਮਾਣਨ੍ਤਿ. ਕਿਤ੍ਤਿਮਂ ਕਸਿਣਮਣ੍ਡਲਂ ਹੇਟ੍ਠਿਮਪਰਿਚ੍ਛੇਦੇਨ ਸਰਾਵਮਤ੍ਤਂ, ਉਪਰਿਮਪਰਿਚ੍ਛੇਦੇਨ ਸੁਪ੍ਪਮਤ੍ਤਂ, ਨ ਤਤੋ ਅਧੋ, ਉਦ੍ਧਂ ਵਾਤਿ ਪਰਿਤ੍ਤਪ੍ਪਮਾਣਭੇਦਸਙ੍ਗਣ੍ਹਨਤ੍ਥਂ ‘ਸੁਪ੍ਪਮਤ੍ਤੇ ਵਾ ਸਰਾਵਮਤ੍ਤੇ ਵਾ’ਤਿ ਵੁਤ੍ਤ’’ਨ੍ਤਿ. ਯਥਾਉਪਟ੍ਠਿਤੇ ਆਰਮ੍ਮਣੇ ਏਕਙ੍ਗੁਲਮਤ੍ਤਮ੍ਪਿ ਵਡ੍ਢਿਤਂ ਅਪ੍ਪਮਾਣਮੇਵਾਤਿ ਵੁਤ੍ਤੋਵਾਯਮਤ੍ਥੋ. ਕੇਚਿ ਪਨ ‘‘ਛਤ੍ਤਮਤ੍ਤਮ੍ਪਿ ਕਸਿਣਮਣ੍ਡਲਂ ਕਾਤਬ੍ਬ’’ਨ੍ਤਿ ਵਦਨ੍ਤਿ.
ਸੋ ਤਂ ਨਿਮਿਤ੍ਤਂ ਸੁਗ੍ਗਹਿਤਂ ਕਰੋਤੀਤਿ ਸੋ ਯੋਗਾਵਚਰੋ ਤਂ ਪਥਵੀਮਣ੍ਡਲਂ ਸੁਗ੍ਗਹਿਤਂ ਨਿਮਿਤ੍ਤਂ ਕਰੋਤਿ. ਯਦਾ ਚਕ੍ਖੁਂ ਉਮ੍ਮੀਲੇਤ੍ਵਾ ਓਲੋਕੇਤ੍ਵਾ ਤਤ੍ਥ ਨਿਮਿਤ੍ਤਂ ਗਹੇਤ੍ਵਾ ਨਿਮ੍ਮੀਲੇਤ੍ਵਾ ਆਵਜ੍ਜੇਨ੍ਤਸ੍ਸ ਉਮ੍ਮੀਲੇਤ੍ਵਾ ਓਲੋਕਿਤਕ੍ਖਣੇ ਵਿਯ ਉਪਟ੍ਠਾਤਿ, ਤਦਾ ਸੁਗ੍ਗਹਿਤਂ ਕਰੋਤਿ ਨਾਮ. ਅਥੇਤ੍ਥ ਸਤਿਂ ਸੂਪਟ੍ਠਿਤਂ ਕਤ੍ਵਾ ਅਬਹਿਗਤੇਨ ਮਾਨਸੇਨ ਪੁਨਪ੍ਪੁਨਂ ਸਲ੍ਲਕ੍ਖੇਨ੍ਤੋ ਸੂਪਧਾਰਿਤਂ ਉਪਧਾਰੇਤਿ ਨਾਮ. ਏਵਂ ਉਪਧਾਰਿਤਂ ਪਨ ਨਂ ਪੁਨਪ੍ਪੁਨਂ ਆਵਜ੍ਜੇਨ੍ਤੋ ਮਨਸਿ ਕਰੋਨ੍ਤੋ ਤਮੇਵਾਰਬ੍ਭ ਆਸੇਵਨਂ ਭਾਵਨਂ ਬਹੁਲਂ ਪਵਤ੍ਤੇਨ੍ਤੋ ਸੁਵਵਤ੍ਥਿਤਂ ਵਵਤ੍ਥਪੇਤਿ ਨਾਮ. ਤਸ੍ਮਿਂ ਆਰਮ੍ਮਣੇਤਿ ਏਵਂ ਸੁਗ੍ਗਹਿਤਕਰਣਾਦਿਨਾ ਸਮ੍ਮਦੇਵ ਉਪਟ੍ਠਿਤੇ ਤਸ੍ਮਿਂ ਪਥਵੀਕਸਿਣਸਞ੍ਞਿਤੇ ਆਰਮ੍ਮਣੇ. ਚਿਤ੍ਤਂ ਉਪਨਿਬਨ੍ਧਤੀਤਿ ਅਤ੍ਤਨੋ ਚਿਤ੍ਤਂ ਉਪਚਾਰਜ੍ਝਾਨਂ ਉਪਨੇਤ੍ਵਾ ਨਿਬਨ੍ਧਤਿ ਅਞ੍ਞਾਰਮ੍ਮਣਤੋ ਵਿਨਿਵਤ੍ਤਂ ਕਰੋਤਿ. ਅਦ੍ਧਾ ਇਮਾਯਾਤਿਆਦਿ ਆਨਿਸਂਸਦਸ੍ਸਾਵਿਤਾਦਸ੍ਸਨਂ.
ਇਦਾਨਿ ਯਥਾਦਸ੍ਸਿਤਸ੍ਸ ਅਟ੍ਠਕਥਾਪਾਠਸ੍ਸ ਅਤ੍ਥਪ੍ਪਕਾਸਨੇਨ ਸਦ੍ਧਿਂ ਭਾਵਨਾਵਿਧਿਂ ਵਿਭਾਵੇਤੁਕਾਮੋ ਅਕਤੇ ਤਾਵ ਨਿਮਿਤ੍ਤਗ੍ਗਹਣਂ ਦਸ੍ਸੇਨ੍ਤੋ ‘‘ਤਤ੍ਥ ਯੇਨ ਅਤੀਤਭਵੇਪੀ’’ਤਿਆਦਿਮਾਹ. ਤਤ੍ਥ ਤਤ੍ਥਾਤਿ ਤਸ੍ਮਿਂ ਅਟ੍ਠਕਥਾਪਾਠੇ. ਚਤੁਕ੍ਕਪਞ੍ਚਕਜ੍ਝਾਨਾਨੀਤਿ ਚਤੁਕ੍ਕਪਞ੍ਚਕਨਯਵਸੇਨ ਵਦਤਿ. ਪੁਞ੍ਞਵਤੋਤਿ ਭਾਵਨਾਮਯਪੁਞ੍ਞਵਤੋ. ਉਪਨਿਸ੍ਸਯਸਮ੍ਪਨ੍ਨਸ੍ਸਾਤਿ ਤਾਦਿਸੇਨੇਵ ਉਪਨਿਸ੍ਸਯੇਨ ਸਮਨ੍ਨਾਗਤਸ੍ਸ. ਖਲਮਣ੍ਡਲੇਤਿ ਮਣ੍ਡਲਾਕਾਰੇ ਧਞ੍ਞਕਰਣਟ੍ਠਾਨੇ. ਤਂਠਾਨਪ੍ਪਮਾਣਮੇਵਾਤਿ ਓਲੋਕਿਤਟ੍ਠਾਨਪ੍ਪਮਾਣਮੇਵ.
ਅਵਿਰਾਧੇਤ੍ਵਾਤਿ ਅਵਿਰਜ੍ਝਿਤ੍ਵਾ ਵੁਤ੍ਤਵਿਧਿਨਾ ਏਵ. ਨੀਲਪੀਤਲੋਹਿਤਓਦਾਤਸਮ੍ਭੇਦਵਸੇਨਾਤਿ ਨੀਲਾਦਿਵਣ੍ਣਾਹਿ ਮਤ੍ਤਿਕਾਹਿ ਪਚ੍ਚੇਕਂ, ਏਕਜ੍ਝਞ੍ਚ ਸਂਸਗ੍ਗਵਸੇਨ. ਗਙ੍ਗਾਵਹੇਤਿ ਗਙ੍ਗਾਸੋਤੇ. ਸੀਹਲ਼ਦੀਪੇ ਕਿਰ ਰਾਵਣਗਙ੍ਗਾ ਨਾਮ ਨਦੀ, ਤਸ੍ਸਾ ਸੋਤੇਨ ਛਿਨ੍ਨਤਟਟ੍ਠਾਨੇ ਮਤ੍ਤਿਕਾ ਅਰੁਣਵਣ੍ਣਾ. ਤਂ ਸਨ੍ਧਾਯ ਵੁਤ੍ਤਂ ‘‘ਗਙ੍ਗਾਵਹੇ ਮਤ੍ਤਿਕਾਸਦਿਸਾਯ ਅਰੁਣਵਣ੍ਣਾਯਾ’’ਤਿ. ਅਰੁਣਵਣ੍ਣਾਯ ਅਰੁਣਨਿਭਾਯ, ਅਰੁਣਪ੍ਪਭਾਵਣ੍ਣਾਯਾਤਿ ਅਤ੍ਥੋ.
ਏਵਂ ਕਸਿਣਦੋਸੇ ਦਸ੍ਸੇਤ੍ਵਾ ਇਦਾਨਿ ਕਸਿਣਕਰਣਾਦਿਕੇ ਸੇਸਾਕਾਰੇ ਦਸ੍ਸੇਤੁਂ ‘‘ਤਞ੍ਚ ਖੋ’’ਤਿਆਦਿ ਵੁਤ੍ਤਂ. ਸਂਹਾਰਿਮਨ੍ਤਿ ਸਂਹਰਿਤਬ੍ਬਂ ਗਹੇਤ੍ਵਾ ਚਰਣਯੋਗ੍ਗਂ. ਤਤ੍ਰਟ੍ਠਕਨ੍ਤਿ ਯਤ੍ਰ ਕਤਂ, ਤਤ੍ਥੇਵ ਤਿਟ੍ਠਨਕਂ. ਵੁਤ੍ਤਪ੍ਪਮਾਣਨ੍ਤਿ ‘‘ਸੁਪ੍ਪਮਤ੍ਤੇ ਵਾ ਸਰਾਵਮਤ੍ਤੇ ਵਾ’’ਤਿ ਵੁਤ੍ਤਪ੍ਪਮਾਣਂ. ਵਟ੍ਟਨ੍ਤਿ ਮਣ੍ਡਲਸਣ੍ਠਾਨਂ. ਪਰਿਕਮ੍ਮਕਾਲੇਤਿ ਨਿਮਿਤ੍ਤੁਗ੍ਗਹਣਾਯ ਭਾਵਨਾਕਾਲੇ. ਏਤਦੇਵਾਤਿ ਯਂ ਵਿਦਤ੍ਥਿਚਤੁਰਙ੍ਗੁਲਵਿਤ੍ਥਾਰਂ, ਏਤਦੇਵ ਪਮਾਣਂ ਸਨ੍ਧਾਯ ‘‘ਸੁਪ੍ਪਮਤ੍ਤਂ ਵਾ ਸਰਾਵਮਤ੍ਤਂ ਵਾ’’ਤਿ ਵੁਤ੍ਤਂ. ਸੁਪ੍ਪਂ ਹਿ ਨਾਤਿਮਹਨ੍ਤਂ, ਸਰਾਵਞ੍ਚ ਮਹਨ੍ਤਂ ਚਾਟਿਪਿਧਾਨਪ੍ਪਹੋਨਕਨ੍ਤਿ ਸਮਪ੍ਪਮਾਣਂ ਹੋਤਿ.
੫੬. ਤਸ੍ਮਾਤਿ ਪਰਿਚ੍ਛੇਦਤ੍ਥਾਯ ਵੁਤ੍ਤਤ੍ਤਾ. ਏਵਂ ਵੁਤ੍ਤਪਮਾਣਂ ਪਰਿਚ੍ਛੇਦਨ੍ਤਿ ਯਥਾਵੁਤ੍ਤਪ੍ਪਮਾਣਂ ਵਿਦਤ੍ਥਿਚਤੁਰਙ੍ਗੁਲਵਿਤ੍ਥਾਰਂ ਪਰਿਚ੍ਛੇਦਂ ਕਤ੍ਵਾ, ਏਵਂ ਵੁਤ੍ਤਪ੍ਪਮਾਣਂ ਵਾ ਕਸਿਣਮਣ੍ਡਲਂ ਵਿਸਭਾਗਵਣ੍ਣੇਨ ਪਰਿਚ੍ਛੇਦਂ ਕਤ੍ਵਾ. ਰੁਕ੍ਖਪਾਣਿਕਾਤਿ ਕੁਚਨ੍ਦਨਾਦਿਰੁਕ੍ਖਪਾਣਿਕਾ ਅਰੁਣਵਣ੍ਣਸ੍ਸ ਵਿਸਭਾਗਵਣ੍ਣਂ ਸਮੁਟ੍ਠਪੇਤਿ. ਤਸ੍ਮਾ ਤਂ ਅਗ੍ਗਹੇਤ੍ਵਾਤਿ ਵੁਤ੍ਤਂ. ਪਕਤਿਰੁਕ੍ਖਪਾਣਿਕਾ ਪਨ ਪਾਸਾਣਪਾਣਿਕਾਗਤਿਕਾਵ. ਨਿਨ੍ਨੁਨ੍ਨਤਟ੍ਠਾਨਾਭਾਵੇਨ ਭੇਰੀਤਲਸਦਿਸਂ ਕਤ੍ਵਾ. ਤਤੋ ਦੂਰਤਰੇਤਿਆਦਿ ਯਥਾਵੁਤ੍ਤਤੋ ਪਦੇਸਤੋ, ਪੀਠਤੋ ਚ ਅਞ੍ਞਸ੍ਮਿਂ ਆਦੀਨਵਦਸ੍ਸਨਂ. ਕਸਿਣਦੋਸਾਤਿ ਹਤ੍ਥਪਾਣਿਪਦਾਦਯੋ ਇਧ ਕਸਿਣਦੋਸਾ.
ਵੁਤ੍ਤਨਯੇਨੇਵਾਤਿ ‘‘ਅਡ੍ਢਤੇਯ੍ਯਹਤ੍ਥਨ੍ਤਰੇ ਪਦੇਸੇ, ਵਿਦਤ੍ਥਿਚਤੁਰਙ੍ਗੁਲਪਾਦਕੇ ਪੀਠੇ’’ਤਿ ਚ ਵੁਤ੍ਤਵਿਧਿਨਾਵ. ਕਾਮੇਸੁ ਆਦੀਨਵਨ੍ਤਿ ‘‘ਕਾਮਾ ਨਾਮੇਤੇ ਅਟ੍ਠਿਕਙ੍ਕਲੂਪਮਾ ਨਿਰਸ੍ਸਾਦਟ੍ਠੇਨ, ਤਿਣੁਕ੍ਕੂਪਮਾ ਅਨੁਦਹਨਟ੍ਠੇਨ, ਅਙ੍ਗਾਰਕਾਸੂਪਮਾ ਮਹਾਭਿਤਾਪਟ੍ਠੇਨ, ਸੁਪਿਨਕੂਪਮਾ ਇਤ੍ਤਰਪਚ੍ਚੁਪਟ੍ਠਾਨਟ੍ਠੇਨ, ਯਾਚਿਤਕੂਪਮਾ ਤਾਵਕਾਲਿਕਟ੍ਠੇਨ, ਰੁਕ੍ਖਫਲੂਪਮਾ ਸਬ੍ਬਙ੍ਗਪਚ੍ਚਙ੍ਗਪਲਿਭਞ੍ਜਨਟ੍ਠੇਨ, ਅਸਿਸੂਨੂਪਮਾ ਅਧਿਕੁਟ੍ਟਨਟ੍ਠੇਨ, ਸਤ੍ਤਿਸੂਲੂਪਮਾ ਵਿਨਿਵਿਜ੍ਝਨਟ੍ਠੇਨ, ਸਪ੍ਪਸਿਰੂਪਮਾ ਸਪਟਿਭਯਟ੍ਠੇਨਾ’’ਤਿਆਦਿਨਾ (ਪਾਚਿ. ਅਟ੍ਠ. ੪੧੭; ਮ. ਨਿ. ਅਟ੍ਠ. ੧.੨੩੪) ‘‘ਅਪ੍ਪਸ੍ਸਾਦਾ ਕਾਮਾ ਬਹੁਦੁਕ੍ਖਾ ਬਹੁਪਾਯਾਸਾ’’ਤਿਆਦਿਨਾ (ਪਾਚਿ. ੪੧੭; ਮ. ਨਿ. ੧.੨੩੪; ੨.੪੨) ‘‘ਕਾਮਸੁਖਞ੍ਚ ਨਾਮੇਤਂ ਬਹੁਪਰਿਸ੍ਸਯਂ, ਸਾਸਙ੍ਕਂ, ਸਭਯਂ, ਸਂਕਿਲਿਟ੍ਠਂ, ਮੀਲ਼੍ਹਪਰਿਭੋਗਸਦਿਸਂ, ਹੀਨਂ, ਗਮ੍ਮਂ, ਪੋਥੁਜ੍ਜਨਿਕਂ, ਅਨਰਿਯਂ, ਅਨਤ੍ਥਸਂਹਿਤ’’ਨ੍ਤਿਆਦਿਨਾ ਚ ਅਨੇਕਾਕਾਰਵੋਕਾਰਂ ਵਤ੍ਥੁਕਾਮਕਿਲੇਸਕਾਮੇਸੁ ਆਦੀਨਵਂ ਦੋਸਂ ਪਚ੍ਚਵੇਕ੍ਖਿਤ੍ਵਾ. ਕਾਮਨਿਸ੍ਸਰਣੇਤਿ ਕਾਮਾਨਂ ਨਿਸ੍ਸਰਣਭੂਤੇ, ਤੇਹਿ ਵਾ ਨਿਸ੍ਸਟੇ. ਅਗ੍ਗਮਗ੍ਗਸ੍ਸ ਪਾਦਕਭਾਵੇਨ ਸਬ੍ਬਦੁਕ੍ਖਸਮਤਿਕ੍ਕਮਸ੍ਸ ਉਪਾਯਭੂਤੇ. ਨੇਕ੍ਖਮ੍ਮੇਤਿ ਝਾਨੇ. ਜਾਤਾਭਿਲਾਸੇਨ ਸਞ੍ਜਾਤਚ੍ਛਨ੍ਦੇਨ. ‘‘ਸਮ੍ਮਾਸਮ੍ਬੁਦ੍ਧੋ ਵਤ ਭਗਵਾ ਅਵਿਪਰੀਤਧਮ੍ਮਦੇਸਨਤ੍ਤਾ, ਸ੍ਵਾਕ੍ਖਾਤੋ ਧਮ੍ਮੋ ਏਕਨ੍ਤਨਿਯ੍ਯਾਨਿਕਤ੍ਤਾ, ਸੁਪ੍ਪਟਿਪਨ੍ਨੋ ਸਙ੍ਘੋ ਯਥਾਨੁਸਿਟ੍ਠਂ ਪਟਿਪਜ੍ਜਨਤੋ’’ਤਿ ਏਵਂ ਬੁਦ੍ਧਧਮ੍ਮਸਙ੍ਘਗੁਣਾਨੁਸ੍ਸਰਣੇਨ ਰਤਨਤ੍ਤਯਵਿਸਯਂ ਪੀਤਿਪਾਮੋਜ੍ਜਂ ਜਨਯਿਤ੍ਵਾ. ਨੇਕ੍ਖਮ੍ਮਂ ਪਟਿਪਜ੍ਜਤਿ ਏਤਾਯਾਤਿ ਨੇਕ੍ਖਮ੍ਮਪਟਿਪਦਾ, ਸਉਪਚਾਰਸ੍ਸ ਝਾਨਸ੍ਸ, ਵਿਪਸ੍ਸਨਾਯ, ਮਗ੍ਗਸ੍ਸ, ਨਿਬ੍ਬਾਨਸ੍ਸ ਚ ਅਧਿਗਮਕਾਰਣਨ੍ਤਿ ਅਤ੍ਥੋ. ਪੁਬ੍ਬੇ ਪਨ ਪਠਮਜ੍ਝਾਨਮੇਵ ਨੇਕ੍ਖਮ੍ਮਨ੍ਤਿ ਵੁਤ੍ਤਤ੍ਤਾ ਵੁਤ੍ਤਾਵਸੇਸਾ ਸਬ੍ਬੇਪਿ ਨੇਕ੍ਖਮ੍ਮਧਮ੍ਮਾ. ਯਥਾਹ –
‘‘ਪਬ੍ਬਜ੍ਜਾ ਪਠਮਂ ਝਾਨਂ, ਨਿਬ੍ਬਾਨਂ ਚ ਵਿਪਸ੍ਸਨਾ;
ਸਬ੍ਬੇਪਿ ਕੁਸਲਾ ਧਮ੍ਮਾ, ‘ਨੇਕ੍ਖਮ੍ਮ’ਨ੍ਤਿ ਪਵੁਚ੍ਚਰੇ’’ਤਿ. (ਇਤਿਵੁ. ਅਟ੍ਠ. ੧੦੯);
ਪਵਿਵੇਕਸੁਖਰਸਸ੍ਸਾਤਿ ਚਿਤ੍ਤਵਿਵੇਕਾਦਿਵਿਵੇਕਜਸ੍ਸ ਸੁਖਰਸਸ੍ਸ. ਏਵਮੇਤੇਹਿ ਪਞ੍ਚਹਿ ਪਦੇਹਿ ‘‘ਆਨਿਸਂਸਦਸ੍ਸਾਵੀ’’ਤਿਆਦੀਨਂ ਪਦਾਨਂ ਅਤ੍ਥੋ ਦਸ੍ਸਿਤੋਤਿ ਦਟ੍ਠਬ੍ਬਂ. ਸਮੇਨ ਆਕਾਰੇਨਾਤਿ ਅਤਿਉਮ੍ਮੀਲਨਅਤਿਮਨ੍ਦਾਲੋਚਨਾਨਿ ਵਜ੍ਜੇਤ੍ਵਾ ਨਾਤਿਉਮ੍ਮੀਲਨਨਾਤਿਮਨ੍ਦਾਲੋਚਨਸਙ੍ਖਾਤੇਨ ਸਮੇਨ ਆਲੋਚਨਾਕਾਰੇਨ. ਨਿਮਿਤ੍ਤਂ ਗਣ੍ਹਨ੍ਤੇਨਾਤਿ ਪਥਵੀਕਸਿਣੇ ਚਕ੍ਖੁਨਾ ਗਹਿਤਨਿਮਿਤ੍ਤਂ ਮਨਸਾ ਗਣ੍ਹਨ੍ਤੇਨ. ਭਾਵੇਤਬ੍ਬਨ੍ਤਿ ਤਥਾਪਵਤ੍ਤਂ ਨਿਮਿਤ੍ਤਗ੍ਗਹਣਂ ਵਡ੍ਢੇਤਬ੍ਬਂ ਆਸੇਵਿਤਬ੍ਬਂ ਬਹੁਲੀਕਾਤਬ੍ਬਂ.
ਚਕ੍ਖੁ ਕਿਲਮਤਿ ਅਤਿਸੁਖੁਮਂ, ਅਤਿਭਾਸੁਰਞ੍ਚ ਰੂਪਗਤਂ ਉਪਨਿਜ੍ਝਾਯਤੋ ਵਿਯ. ਅਤਿਵਿਭੂਤਂ ਹੋਤਿ ਅਤ੍ਤਨੋ ਸਭਾਵਾਵਿਭਾਵਤੋ. ਤਥਾ ਚ ਵਣ੍ਣਤੋ ਵਾ ਲਕ੍ਖਣਤੋ ਵਾ ਉਪਤਿਟ੍ਠੇਯ੍ਯ. ਤੇਨ ਵੁਤ੍ਤਂ ‘‘ਤੇਨਸ੍ਸ ਨਿਮਿਤ੍ਤਂ ਨੁਪ੍ਪਜ੍ਜਤੀ’’ਤਿ. ਅਵਿਭੂਤਂ ਹੋਤਿ ਗਜਨਿਮ੍ਮੀਲਨੇਨ ਪੇਕ੍ਖਨ੍ਤਸ੍ਸ ਰੂਪਗਤਂ ਵਿਯ. ਚਿਤ੍ਤਞ੍ਚ ਲੀਨਂ ਹੋਤਿ ਦਸ੍ਸਨੇ ਮਨ੍ਦਬ੍ਯਾਪਾਰਤਾਯ ਕੋਸਜ੍ਜਪਾਤਤੋ. ਤੇਨਾਹ ‘‘ਏਵਮ੍ਪਿ ਨਿਮਿਤ੍ਤਂ ਨੁਪ੍ਪਜ੍ਜਤੀ’’ਤਿ. ਆਦਾਸਤਲੇ ਮੁਖਨਿਮਿਤ੍ਤਦਸ੍ਸਿਨਾ ਵਿਯਾਤਿ ਯਥਾ ਆਦਾਸਤਲੇ ਮੁਖਨਿਮਿਤ੍ਤਦਸ੍ਸੀ ਪੁਰਿਸੋ ਨ ਤਤ੍ਥ ਅਤਿਗਾਲ਼੍ਹਂ ਉਮ੍ਮੀਲਤਿ, ਨਾਪਿ ਅਤਿਮਨ੍ਦਂ, ਨ ਆਦਾਸਤਲਸ੍ਸ ਵਣ੍ਣਂ ਪਚ੍ਚਵੇਕ੍ਖਤਿ, ਨਾਪਿ ਲਕ੍ਖਣਂ ਮਨਸਿ ਕਰੋਤਿ. ਅਥ ਖੋ ਸਮੇਨ ਆਕਾਰੇਨ ਓਲੋਕੇਨ੍ਤੋ ਅਤ੍ਤਨੋ ਮੁਖਨਿਮਿਤ੍ਤਮੇਵ ਪਸ੍ਸਤਿ, ਏਵਮੇਵ ਅਯਮ੍ਪਿ ਪਥਵੀਕਸਿਣਂ ਸਮੇਨ ਆਕਾਰੇਨ ਓਲੋਕੇਨ੍ਤੋ ਨਿਮਿਤ੍ਤਗ੍ਗਹਣਪ੍ਪਸੁਤੋਯੇਵ ਹੋਤਿ, ਤੇਨ ਵੁਤ੍ਤਂ ‘‘ਸਮੇਨ ਆਕਾਰੇਨਾ’’ਤਿਆਦਿ. ਨ ਵਣ੍ਣੋ ਪਚ੍ਚਵੇਕ੍ਖਿਤਬ੍ਬੋਤਿ ਯੋ ਤਤ੍ਥ ਪਥਵੀਕਸਿਣੇ ਅਰੁਣਵਣ੍ਣੋ, ਸੋ ਨ ਚਿਨ੍ਤੇਤਬ੍ਬੋ. ਚਕ੍ਖੁਵਿਞ੍ਞਾਣੇਨ ਪਨ ਗਹਣਂ ਨ ਸਕ੍ਕਾ ਨਿਵਾਰੇਤੁਂ. ਤੇਨੇਵੇਤ੍ਥ ‘‘ਨ ਓਲੋਕੇਤਬ੍ਬੋ’’ਤਿ ਅਵਤ੍ਵਾ ਪਚ੍ਚਵੇਕ੍ਖਣਗ੍ਗਹਣਂ ਕਤਂ. ਨ ਲਕ੍ਖਣਂ ਮਨਸਿ ਕਾਤਬ੍ਬਨ੍ਤਿ ਯਂ ਤਤ੍ਥ ਪਥਵੀਧਾਤੁਯਾ ਥਦ੍ਧਲਕ੍ਖਣਂ, ਤਂ ਨ ਮਨਸਿ ਕਾਤਬ੍ਬਂ.
ਦਿਸ੍ਵਾ ਗਹੇਤਬ੍ਬਤ੍ਤਾ ‘‘ਵਣ੍ਣਂ ਅਮੁਞ੍ਚਿਤ੍ਵਾ’’ਤਿ ਵਤ੍ਵਾਪਿ ਵਣ੍ਣਵਸੇਨੇਤ੍ਥ ਆਭੋਗੋ ਨ ਕਾਤਬ੍ਬੋ, ਸੋ ਪਨ ਵਣ੍ਣੋ ਨਿਸ੍ਸਯਗਤਿਕੋ ਕਾਤਬ੍ਬੋਤਿ ਦਸ੍ਸੇਨ੍ਤੋ ਆਹ ‘‘ਨਿਸ੍ਸਯਸਵਣ੍ਣਂ ਕਤ੍ਵਾ’’ਤਿ. ਨਿਸ੍ਸਯੇਨ ਸਮਾਨਾਕਾਰਸਨ੍ਨਿਸ੍ਸਿਤੋ ਸੋ ਵਣ੍ਣੋ ਤਾਯ ਪਥਵਿਯਾ ਸਮਾਨਗਤਿਕਂ ਕਤ੍ਵਾ, ਵਣ੍ਣੇਨ ਸਹੇਵ ‘‘ਪਥਵੀ’’ਤਿ ਮਨਸਿ ਕਾਤਬ੍ਬਨ੍ਤਿ ਅਤ੍ਥੋ. ਉਸ੍ਸਦਵਸੇਨ ਪਣ੍ਣਤ੍ਤਿਧਮ੍ਮੇਤਿ ਪਥਵੀਧਾਤੁਯਾ ਉਸ੍ਸਨ੍ਨਭਾਵੇਨ ਸਤ੍ਤਿਤੋ ਅਧਿਕਭਾਵੇਨ ਸਸਮ੍ਭਾਰਪਥਵਿਯਂ ‘‘ਪਥਵੀ’’ਤਿ ਯੋ ਲੋਕਵੋਹਾਰੋ, ਤਸ੍ਮਿਂ ਪਣ੍ਣਤ੍ਤਿਧਮ੍ਮੇ ਚਿਤ੍ਤਂ ਪਟ੍ਠਪੇਤ੍ਵਾ ‘‘ਪਥਵੀ, ਪਥਵੀ’’ਤਿ ਮਨਸਿ ਕਾਤਬ੍ਬਂ. ਯਦਿ ਲੋਕਵੋਹਾਰੇਨ ਪਣ੍ਣਤ੍ਤਿਮਤ੍ਤੇ ਚਿਤ੍ਤਂ ਠਪੇਤਬ੍ਬਂ, ਨਾਮਨ੍ਤਰਵਸੇਨਪਿ ਪਥਵੀ ਮਨਸਿ ਕਾਤਬ੍ਬਾ ਭਵੇਯ੍ਯਾਤਿ, ਹੋਤੁ, ਕੋ ਦੋਸੋਤਿ ਦਸ੍ਸੇਨ੍ਤੋ ‘‘ਮਹੀ ਮੇਦਿਨੀ’’ਤਿਆਦਿਮਾਹ. ਤਤ੍ਥ ਯਮਿਚ੍ਛਤੀਤਿ ਯਂ ਨਾਮਂ ਵਤ੍ਤੁਂ ਇਚ੍ਛਤਿ, ਤਂ ਵਤ੍ਤਬ੍ਬਂ. ਤਞ੍ਚ ਖੋ ਯਦਸ੍ਸ ਸਞ੍ਞਾਨੁਕੂਲਂ ਹੋਤਿ ਯਂ ਨਾਮਂ ਅਸ੍ਸ ਯੋਗਿਨੋ ਪੁਬ੍ਬੇ ਤਤ੍ਥ ਗਹਿਤਸਞ੍ਞਾਵਸੇਨ ਅਨੁਕੂਲਂ ਪਚੁਰਤਾਯ, ਪਗੁਣਤਾਯ ਵਾ ਆਗਚ੍ਛਤਿ, ਤਂ ਵਤ੍ਤਬ੍ਬਂ. ਵਤ੍ਤਬ੍ਬਨ੍ਤਿ ਚ ਪਠਮਸਮਨ੍ਨਾਹਾਰੇ ਕਸ੍ਸਚਿ ਵਚੀਭੇਦੋਪਿ ਹੋਤੀਤਿ ਕਤ੍ਵਾ ਵੁਤ੍ਤਂ, ਆਚਰਿਯੇਨ ਵਾ ਵਤ੍ਤਬ੍ਬਤਂ ਸਨ੍ਧਾਯ. ਕਿਂ ਵਾ ਬਹੁਨਾ, ਪਾਕਟਭਾਵੋਯੇਵੇਤ੍ਥ ਪਮਾਣਨ੍ਤਿ ਦਸ੍ਸੇਤੁਂ ‘‘ਅਪਿਚਾ’’ਤਿਆਦਿ ਵੁਤ੍ਤਂ. ਕਾਲੇਨ ਉਮ੍ਮੀਲੇਤ੍ਵਾ ਕਾਲੇਨ ਨਿਮ੍ਮੀਲੇਤ੍ਵਾਤਿ ਕਿਞ੍ਚਿ ਕਾਲਂ ਚਕ੍ਖੁਂ ਉਮ੍ਮੀਲੇਤ੍ਵਾ ਨਿਮਿਤ੍ਤਗ੍ਗਹਣਵਸੇਨ ਪਥਵੀਮਣ੍ਡਲਂ ਓਲੋਕੇਤ੍ਵਾ ਪੁਨ ਕਿਞ੍ਚਿ ਕਾਲਂ ਚਕ੍ਖੁਂ ਨਿਮ੍ਮੀਲੇਤ੍ਵਾ ਆਵਜ੍ਜਿਤਬ੍ਬਂ. ਯੇਨਾਕਾਰੇਨ ਓਲੋਕੇਤ੍ਵਾ ਗਹਿਤਂ, ਤੇਨਾਕਾਰੇਨ ਪੁਨ ਤਂ ਸਮਨ੍ਨਾਹਰਿਤਬ੍ਬਂ.
੫੭. ਆਪਾਥਮਾਗਚ੍ਛਤੀਤਿ ਮਨੋਦ੍ਵਾਰਿਕਜਵਨਾਨਂ ਗੋਚਰਭਾਵਂ ਉਪਗਚ੍ਛਤਿ. ਤਸ੍ਸ ਉਗ੍ਗਹਨਿਮਿਤ੍ਤਸ੍ਸ. ਨ ਤਸ੍ਮਿਂ ਠਾਨੇ ਨਿਸੀਦਿਤਬ੍ਬਂ. ਕਸ੍ਮਾ? ਯਦਿ ਉਗ੍ਗਹਨਿਮਿਤ੍ਤੇ ਜਾਤੇਪਿ ਪਥਵੀਮਣ੍ਡਲਂ ਓਲੋਕੇਤ੍ਵਾ ਭਾਵੇਤਿ, ਪਟਿਭਾਗਨਿਮਿਤ੍ਤੁਪ੍ਪਤ੍ਤਿ ਨ ਸਿਯਾ. ਸਮੀਪਟ੍ਠੇਨ ਚ ਨ ਓਲੋਕੇਤੁਂ ਨ ਸਕ੍ਕਾ. ਤੇਨ ਵੁਤ੍ਤਂ ‘‘ਅਤ੍ਤਨੋ ਵਸਨਟ੍ਠਾਨਂ ਪਵਿਸਿਤ੍ਵਾ’’ਤਿਆਦਿ. ਨਿਸ੍ਸਦ੍ਦਭਾਵਾਯ ਏਕਪਟਲਿਕੂਪਾਹਨਾਗਹਣਂ, ਪਰਿਸ੍ਸਯਵਿਨੋਦਨਤ੍ਥਂ ਕਤ੍ਤਰਦਣ੍ਡਗ੍ਗਹਣਂ. ਸਚੇ ਨਸ੍ਸਤਿ, ਅਥਾਨੇਨ ਭਾਵੇਤਬ੍ਬਨ੍ਤਿ ਸਮ੍ਬਨ੍ਧੋ. ਵਕ੍ਖਮਾਨੇਸੁ ਅਸਪ੍ਪਾਯੇਸੁ ਕੇਨਚਿਦੇਵ ਅਸਪ੍ਪਾਯੇਨ ਕਾਰਣਭੂਤੇਨ. ਨਿਮਿਤ੍ਤਂ ਆਦਾਯਾਤਿ ਯਥਾਜਾਤਂ ਉਗ੍ਗਹਨਿਮਿਤ੍ਤਂ ਗਹੇਤ੍ਵਾ. ਸਮਨ੍ਨਾਹਰਿਤਬ੍ਬਨ੍ਤਿ ਆਵਜ੍ਜਿਤਬ੍ਬਂ ਨਿਮਿਤ੍ਤਨ੍ਤਿ ਅਧਿਪ੍ਪਾਯੋ, ਸਮ੍ਮਾ ਵਾ ਅਨੁ ਅਨੁ ਆਹਰਿਤਬ੍ਬਂ ਕਮ੍ਮਟ੍ਠਾਨਨ੍ਤਿ ਅਤ੍ਥੋ. ਤਕ੍ਕਾਹਤਂ ਵਿਤਕ੍ਕਾਹਤਨ੍ਤਿ ਤਕ੍ਕਨਤੋ, ਸਵਿਸੇਸਂ ਤਕ੍ਕਨਤੋ ਚ ‘‘ਤਕ੍ਕੋ, ਵਿਤਕ੍ਕੋ’’ਤਿ ਚ ਏਵਂ ਲਦ੍ਧਨਾਮੇਨ ਭਾਵਨਾਚਿਤ੍ਤਸਮ੍ਪਯੁਤ੍ਤੇਨ ਸਮ੍ਮਾਸਙ੍ਕਪ੍ਪੇਨ ਆਹਨਨਪਰਿਯਾਹਨਨਕਿਚ੍ਚੇਨ ਅਪਰਾਪਰਂ ਵਤ੍ਤਮਾਨੇਨ ਕਮ੍ਮਟ੍ਠਾਨਂ ਆਹਤਂ, ਪਰਿਯਾਹਤਞ੍ਚ ਕਾਤਬ੍ਬਂ, ਬਲਪ੍ਪਤ੍ਤਵਿਤਕ੍ਕੋ ਮਨਸਿਕਾਰੋ ਬਹੁਲਂ ਪਵਤ੍ਤੇਤਬ੍ਬੋਤਿ ਅਤ੍ਥੋ. ਏਵਂ ਕਰੋਨ੍ਤਸ੍ਸਾਤਿ ਏਵਂ ਕਮ੍ਮਟ੍ਠਾਨਂ ਤਕ੍ਕਾਹਤਂ ਵਿਤਕ੍ਕਾਹਤਂ ਕਰੋਨ੍ਤਸ੍ਸ. ਯਥਾ ਭਾਵਨਾ ਪੁਬ੍ਬੇਨਾਪਰਂ ਵਿਸੇਸਂ ਆਵਹਤਿ, ਏਵਂ ਅਨੁਯੁਞ੍ਜਨ੍ਤਸ੍ਸ. ਅਨੁਕ੍ਕਮੇਨਾਤਿ ਭਾਵਨਾਨੁਕ੍ਕਮੇਨ. ਯਦਾ ਸਦ੍ਧਾਦੀਨਿ ਇਨ੍ਦ੍ਰਿਯਾਨਿ ਸੁਵਿਸਦਾਨਿ ਤਿਕ੍ਖਾਨਿ ਪਵਤ੍ਤਨ੍ਤਿ, ਤਦਾ ਅਸ੍ਸਦ੍ਧਿਯਾਦੀਨਂ ਦੂਰੀਭਾਵੇਨ ਸਾਤਿਸਯਥਾਮਪ੍ਪਤ੍ਤੇਹਿ ਸਤ੍ਤਹਿ ਬਲੇਹਿ ਲਦ੍ਧੂਪਤ੍ਥਮ੍ਭਾਨਿ ਵਿਤਕ੍ਕਾਦੀਨਿ ਕਾਮਾਵਚਰਾਨੇਵ ਝਾਨਙ੍ਗਾਨਿ ਬਹੂਨਿ ਹੁਤ੍ਵਾ ਪਾਤੁਭਵਨ੍ਤਿ. ਤਤੋ ਏਵ ਤੇਸਂ ਉਜੁਵਿਪਚ੍ਚਨੀਕਭੂਤਾ ਕਾਮਚ੍ਛਨ੍ਦਾਦਯੋ ਸਦ੍ਧਿਂ ਤਦੇਕਟ੍ਠੇਹਿ ਪਾਪਧਮ੍ਮੇਹਿ ਵਿਦੂਰੀ ਭਵਨ੍ਤਿ, ਪਟਿਭਾਗਨਿਮਿਤ੍ਤੁਪ੍ਪਤ੍ਤਿਯਾ ਸਦ੍ਧਿਂ ਤਂ ਆਰਬ੍ਭ ਉਪਚਾਰਜ੍ਝਾਨਂ ਉਪ੍ਪਜ੍ਜਤਿ. ਤੇਨ ਵੁਤ੍ਤਂ ‘‘ਨੀਵਰਣਾਨਿ ਵਿਕ੍ਖਮ੍ਭਨ੍ਤੀ’’ਤਿਆਦਿ. ਤਤ੍ਥ ਸਨ੍ਨਿਸੀਦਨ੍ਤੀਤਿ ਸਮ੍ਮਦੇਵ ਸੀਦਨ੍ਤਿ, ਉਪਸਮਨ੍ਤੀਤਿ ਅਤ੍ਥੋ.
ਇਮਸ੍ਸਾਤਿ ਪਟਿਭਾਗਨਿਮਿਤ੍ਤਸ੍ਸ. ਅਙ੍ਗੁਲਿਪਦਪਾਣਿਪਦਾਦਿਕੋ ਕਸਿਣਦੋਸੋ. ਆਦਾਸਮਣ੍ਡਲੂਪਮਾਦੀਹਿ ਉਗ੍ਗਹਨਿਮਿਤ੍ਤਤੋ ਪਟਿਭਾਗਨਿਮਿਤ੍ਤਸ੍ਸ ਸੁਪਰਿਸੁਦ੍ਧਤਂ, ਸਣ੍ਹਸੁਖੁਮਤਞ੍ਚ ਦਸ੍ਸੇਤਿ. ਤਞ੍ਚ ਖੋ ਪਟਿਭਾਗਨਿਮਿਤ੍ਤਂ ਨੇਵ ਵਣ੍ਣਵਨ੍ਤਂ ਨ ਸਣ੍ਠਾਨਵਨ੍ਤਂ ਅਪਰਮਤ੍ਥਸਭਾਵਤ੍ਤਾ. ਈਦਿਸਨ੍ਤਿ ਵਣ੍ਣਸਣ੍ਠਾਨਵਨ੍ਤਂ. ਤਿਲਕ੍ਖਣਬ੍ਭਾਹਤਨ੍ਤਿ ਉਪ੍ਪਾਦਾਦਿਲਕ੍ਖਣਤ੍ਤਯਾਨੁਪਵਿਟ੍ਠਂ, ਅਨਿਚ੍ਚਤਾਦਿਲਕ੍ਖਣਤ੍ਤਯਙ੍ਕਿਤਂ ਵਾ. ਯਦਿ ਨ ਪਨੇਤਂ ਤਾਦਿਸਂ ਵਣ੍ਣਾਦਿਵਨ੍ਤਂ, ਕਥਂ ਝਾਨਸ੍ਸ ਆਰਮ੍ਮਣਭਾਵੋਤਿ ਆਹ ‘‘ਕੇਵਲਞ੍ਹੀ’’ਤਿਆਦਿ. ਸਞ੍ਞਜਨ੍ਤਿ ਭਾਵਨਾਸਞ੍ਞਾਜਨਿਤਂ, ਭਾਵਨਾਸਞ੍ਞਾਯ ਸਞ੍ਜਾਤਮਤ੍ਤਂ. ਨ ਹਿ ਅਸਭਾਵਸ੍ਸ ਕੁਤੋਚਿ ਸਮੁਟ੍ਠਾਨਂ ਅਤ੍ਥਿ. ਤੇਨਾਹ ‘‘ਉਪਟ੍ਠਾਨਾਕਾਰਮਤ੍ਤ’’ਨ੍ਤਿ.
੫੮. ਵਿਕ੍ਖਮ੍ਭਿਤਾਨੇਵ ਸਨ੍ਨਿਸਿਨ੍ਨਾਵ, ਨ ਪਨ ਤਦਤ੍ਥਂ ਉਸ੍ਸਾਹੋ ਕਾਤਬ੍ਬੋਤਿ ਅਧਿਪ੍ਪਾਯੋ. ‘‘ਉਪਚਾਰਸਮਾਧਿਨਾ’’ਤਿ ਵੁਤ੍ਤੇ ਇਤਰੋਪਿ ਸਮਾਧਿ ਅਤ੍ਥੀਤਿ ਅਤ੍ਥਤੋ ਆਪਨ੍ਨਨ੍ਤਿ ਤਮ੍ਪਿ ਦਸ੍ਸੇਤੁਂ ‘‘ਦੁਵਿਧੋ ਹਿ ਸਮਾਧੀ’’ਤਿਆਦਿ ਆਰਦ੍ਧਂ. ਦ੍ਵੀਹਾਕਾਰੇਹੀਤਿ ਝਾਨਧਮ੍ਮਾਨਂ ਪਟਿਪਕ੍ਖਦੂਰੀਭਾਵੋ, ਥਿਰਭਾਵਪ੍ਪਤ੍ਤਿ ਚਾਤਿ ਇਮੇਹਿ ਦ੍ਵੀਹਿ ਕਾਰਣੇਹਿ. ਇਦਾਨਿ ਤਾਨਿ ਕਾਰਣਾਨਿ ਅਵਤ੍ਥਾਮੁਖੇਨ ਦਸ੍ਸੇਤੁਂ ‘‘ਉਪਚਾਰਭੂਮਿਯਂ ਵਾ’’ਤਿਆਦਿ ਵੁਤ੍ਤਂ. ਉਪਚਾਰਭੂਮਿਯਨ੍ਤਿ ਉਪਚਾਰਾਵਤ੍ਥਾਯਂ. ਯਦਿਪਿ ਤਦਾ ਝਾਨਙ੍ਗਾਨਿ ਪਟੁਤਰਾਨਿ ਮਹਗ੍ਗਤਭਾਵਪ੍ਪਤ੍ਤਾਨਿ ਨ ਉਪ੍ਪਜ੍ਜਨ੍ਤਿ, ਤੇਸਂ ਪਨ ਪਟਿਪਕ੍ਖਧਮ੍ਮਾਨਂ ਵਿਕ੍ਖਮ੍ਭਨੇਨ ਚਿਤ੍ਤਂ ਸਮਾਧਿਯਤਿ. ਤੇਨਾਹ ‘‘ਨੀਵਰਣਪ੍ਪਹਾਨੇਨ ਚਿਤ੍ਤਂ ਸਮਾਹਿਤਂ ਹੋਤੀ’’ਤਿ. ਪਟਿਲਾਭਭੂਮਿਯਨ੍ਤਿ ਝਾਨਸ੍ਸ ਅਧਿਗਮਾਵਤ੍ਥਾਯਂ. ਤਦਾ ਹਿ ਅਪ੍ਪਨਾਪਤ੍ਤਾਨਂ ਝਾਨਧਮ੍ਮਾਨਂ ਉਪ੍ਪਤ੍ਤਿਯਾ ਚਿਤ੍ਤਂ ਸਮਾਧਿਯਤਿ. ਤੇਨਾਹ ‘‘ਅਙ੍ਗਪਾਤੁਭਾਵੇਨਾ’’ਤਿ. ਚਿਤ੍ਤਂ ਸਮਾਹਿਤਂ ਹੋਤੀਤਿ ਸਮ੍ਬਨ੍ਧੋ.
ਨ ਥਾਮਜਾਤਾਨੀਤਿ ਨ ਜਾਤਥਾਮਾਨਿ, ਨ ਭਾਵਨਾਬਲਂ ਪਤ੍ਤਾਨੀਤਿ ਅਤ੍ਥੋ. ਚਿਤ੍ਤਨ੍ਤਿ ਝਾਨਚਿਤ੍ਤਂ. ਕੇਵਲਮ੍ਪਿ ਰਤ੍ਤਿਂ ਕੇਵਲਮ੍ਪਿ ਦਿਵਸਂ ਤਿਟ੍ਠਤੀਤਿ ਸਮਾਪਤ੍ਤਿਵੇਲਂ ਸਨ੍ਧਾਯਾਹ. ਉਪਚਾਰਭੂਮਿਯਂ ਨਿਮਿਤ੍ਤਵਡ੍ਢਨਂ ਯੁਤ੍ਤਨ੍ਤਿ ਕਤ੍ਵਾ ਵੁਤ੍ਤਂ ‘‘ਨਿਮਿਤ੍ਤਂ ਵਡ੍ਢੇਤ੍ਵਾ’’ਤਿ. ਲਦ੍ਧਪਰਿਹਾਨੀਤਿ ਲਦ੍ਧਉਪਚਾਰਜ੍ਝਾਨਪਰਿਹਾਨਿ. ਨਿਮਿਤ੍ਤੇ ਅਵਿਨਸ੍ਸਨ੍ਤੇ ਤਦਾਰਮ੍ਮਣਝਾਨਮ੍ਪਿ ਅਪਰਿਹੀਨਮੇਵ ਹੋਤਿ, ਨਿਮਿਤ੍ਤੇ ਪਨ ਆਰਕ੍ਖਾਭਾਵੇਨ ਵਿਨਟ੍ਠੇ ਲਦ੍ਧਂ ਲਦ੍ਧਂ ਝਾਨਮ੍ਪਿ ਵਿਨਸ੍ਸਤਿ ਤਦਾਯਤ੍ਤਵੁਤ੍ਤਿਤੋ. ਤੇਨਾਹ ‘‘ਆਰਕ੍ਖਮ੍ਹੀ’’ਤਿਆਦਿ.
ਸਤ੍ਤਸਪ੍ਪਾਯਵਣ੍ਣਨਾ
੫੯. ‘‘ਥਾਵਰਞ੍ਚ ਹੋਤੀ’’ਤਿ ਵਤ੍ਵਾ ਯਥਾ ਥਾਵਰਂ ਹੋਤਿ, ਤਂ ਦਸ੍ਸੇਤੁਂ ‘‘ਸਤਿ ਉਪਟ੍ਠਾਤਿ, ਚਿਤ੍ਤਂ ਸਮਾਧਿਯਤੀ’’ਤਿ ਵੁਤ੍ਤਂ. ਯਥਾਲਦ੍ਧਞ੍ਹਿ ਨਿਮਿਤ੍ਤਂ ਤਤ੍ਥ ਸਤਿਂ ਸੂਪਟ੍ਠਿਤਂ ਕਤ੍ਵਾ ਏਕਗ੍ਗਤਂ ਵਿਨ੍ਦਨ੍ਤਸ੍ਸ ਥਿਰਂ ਨਾਮ ਹੋਤਿ, ਸੁਰਕ੍ਖਿਤਞ੍ਚ. ਸਤਿ-ਗ੍ਗਹਣੇਨ ਚੇਤ੍ਥ ਸਮ੍ਪਜਞ੍ਞਂ, ਸਮਾਧਿਗ੍ਗਹਣੇਨ ਵੀਰਿਯਞ੍ਚ ਸਙ੍ਗਹਿਤਂ ਹੋਤਿ ਨਾਨਨ੍ਤਰਿਯਭਾਵਤੋ. ਤਤ੍ਥਾਤਿ ਤੇਸੁ ਆਵਾਸੇਸੁ. ਤੀਣਿ ਤੀਣੀਤਿ ਏਕੇਕਸ੍ਮਿਂ ਆਵਾਸੇ ਅਵੁਤ੍ਥਅਵੁਤ੍ਥਟ੍ਠਾਨੇ ਵਸਨਨਿਯਾਮੇਨ ਤਯੋ ਤਯੋ ਦਿਵਸੇ ਵਸਿਤ੍ਵਾ.
ਉਤ੍ਤਰੇਨ ਵਾ ਦਕ੍ਖਿਣੇਨ ਵਾਤਿ ਵੁਤ੍ਤਂ ਗਮਨਾਗਮਨੇ ਸੂਰਿਯਾਭਿਮੁਖਭਾਵਨਿਵਾਰਣਤ੍ਥਨ੍ਤਿ. ਸਹਸ੍ਸਧਨੁਪ੍ਪਮਾਣਂ ਦਿਯਡ੍ਢਕੋਸਂ.
ਦ੍ਵਤ੍ਤਿਂਸ ਤਿਰਚ੍ਛਾਨਕਥਾਤਿ ਰਾਜਕਥਾਦਿਕੇ (ਦੀ. ਨਿ. ੧.੧੭; ਮ. ਨਿ. ੨.੨੨੩; ਸਂ. ਨਿ. ੫.੧੦੮੦; ਅ. ਨਿ. ੧੦.੬੯; ਪਾਚਿ. ੫੦੮) ਸਨ੍ਧਾਯਾਹ. ਤਾ ਹਿ ਪਾਲ਼ਿਯਂ ਸਰੂਪਤੋ ਅਨਾਗਤਾਪਿ ਅਰਞ੍ਞਪਬ੍ਬਤਨਦੀਦੀਪਕਥਾ ਇਤਿ-ਸਦ੍ਦੇਨ ਸਙ੍ਗਹੇਤ੍ਵਾ ਸਗ੍ਗਮੋਕ੍ਖਾਨਂ ਤਿਰਚ੍ਛਾਨਭਾਵਤੋ ‘‘ਦ੍ਵਤ੍ਤਿਂਸ ਤਿਰਚ੍ਛਾਨਕਥਾ’’ਤਿ ਵੁਤ੍ਤਾ. ਦਸਕਥਾਵਤ੍ਥੁਨਿਸ੍ਸਿਤਨ੍ਤਿ ‘‘ਅਪ੍ਪਿਚ੍ਛਤਾ, ਸਨ੍ਤੁਟ੍ਠਿ, ਪਵਿਵੇਕੋ, ਅਸਂਸਗ੍ਗੋ, ਵੀਰਿਯਾਰਮ੍ਭੋ, ਸੀਲ, ਸਮਾਧਿ, ਪਞ੍ਞਾ, ਵਿਮੁਤ੍ਤਿ, ਵਿਮੁਤ੍ਤਿਞਾਣਦਸ੍ਸਨ’’ਨ੍ਤਿ ਇਮਾਨਿ ਅਪ੍ਪਿਚ੍ਛਕਥਾਦੀਨਂ ਵਤ੍ਥੂਨਿ, ਤਨ੍ਨਿਸ੍ਸਿਤਂ ਭਸ੍ਸਂ ਸਪ੍ਪਾਯਂ.
ਅਤਿਰਚ੍ਛਾਨਕਥਿਕੋਤਿ ਨਤਿਰਚ੍ਛਾਨਕਥਿਕੋ, ਤਿਰਚ੍ਛਾਨਕਥਾ ਵਿਧੁਰਂ ਧਮ੍ਮਿਕਂ ਕਮ੍ਮਟ੍ਠਾਨਪਟਿਸਂਯੁਤ੍ਤਮੇਵ ਕਥਂ ਕਥੇਤੀਤਿ ਅਧਿਪ੍ਪਾਯੋ. ਸੀਲਾਦਿਗੁਣਸਮ੍ਪਨ੍ਨੋਤਿ ਸੀਲਸਮਾਧਿਆਦਿਗੁਣਸਮ੍ਪਨ੍ਨੋ. ਯੋ ਹਿ ਸਮਾਧਿਕਮ੍ਮਟ੍ਠਾਨਿਕੋ, ਸਮਾਧਿਕਮ੍ਮਟ੍ਠਾਨਸ੍ਸ ਵਾ ਪਾਰਂ ਪਤ੍ਤੋ, ਸੋ ਇਮਸ੍ਸ ਯੋਗਿਨੋ ਸਪ੍ਪਾਯੋ. ਤੇਨਾਹ ‘‘ਯਂ ਨਿਸ੍ਸਾਯਾ’’ਤਿਆਦਿ. ਕਾਯਦਲ਼੍ਹੀਬਹੁਲੋਤਿ ਕਾਯਸ੍ਸ ਸਨ੍ਤਪ੍ਪਨਪੋਸਨਪ੍ਪਸੁਤੋ. ਯਂ ਸਨ੍ਧਾਯ ਵੁਤ੍ਤਂ ‘‘ਯਾਵਦਤ੍ਥਂ ਉਦਰਾਵਦੇਹਕਂ ਭੁਞ੍ਜਿਤ੍ਵਾ ਸੇਯ੍ਯਸੁਖਂ ਪਸ੍ਸਸੁਖਂ ਮਿਦ੍ਧਸੁਖਂ ਅਨੁਯੁਤ੍ਤੋ ਵਿਹਰਤੀ’’ਤਿ (ਦੀ. ਨਿ. ੩.੩੨੦; ਮ. ਨਿ. ੧.੧੮੬; ਅ. ਨਿ. ੫.੨੦੬).
ਭੋਜਨਂ ਯੇਭੁਯ੍ਯੇਨ ਮਧੁਰਮ੍ਬਿਲਰਸਵਸੇਨ ਸਤ੍ਤਾਨਂ ਉਪਯੋਗਂ ਗਚ੍ਛਤਿ ਦਧਿਆਦੀਸੁ ਤਥਾ ਦਸ੍ਸਨਤੋ. ਕਟੁਕਾਦਿਰਸਾ ਪਨ ਕੇਵਲਂ ਅਭਿਸਙ੍ਖਾਰਕਾ ਏਵਾਤਿ ਆਹ ‘‘ਕਸ੍ਸਚਿ ਮਧੁਰਂ, ਕਸ੍ਸਚਿ ਅਮ੍ਬਿਲਂ ਸਪ੍ਪਾਯਂ ਹੋਤੀ’’ਤਿ.
ਯਸ੍ਮਿਂ ਇਰਿਯਾਪਥੇ ਆਧਾਰਭੂਤੇ, ਵਤ੍ਤਮਾਨੇ ਵਾ, ਯਸ੍ਮਿਂ ਵਾ ਇਰਿਯਾਪਥੇ ਪਵਤ੍ਤਮਾਨਸ੍ਸ. ਨਿਮਿਤ੍ਤਾਸੇਵਨਬਹੁਲਸ੍ਸਾਤਿ ਨਿਮਿਤ੍ਤੇ ਆਸੇਵਨਾਬਹੁਲਸ੍ਸ ਪਟਿਭਾਗਨਿਮਿਤ੍ਤੇ ਵਿਸਯਭੂਤੇ ਭਾਵਨਾਮਨਸਿਕਾਰਂ ਬਹੁਲਂ ਆਸੇਵਨ੍ਤਸ੍ਸ, ਨਿਮਿਤ੍ਤਸ੍ਸ ਵਾ ਗੋਚਰਾਸੇਵਨਵਸੇਨ ਆਸੇਵਨਾਬਹੁਲਸ੍ਸ. ਯੇਨ ਹਿ ਭਾਵੇਨ੍ਤਸ੍ਸ ਭਾਵਨਾਸੇਵਨਾ, ਤੇਨ ਗੋਚਰਾਸੇਵਨਾਪਿ ਇਚ੍ਛਿਤਬ੍ਬਾਤਿ.
ਦਸਵਿਧਅਪ੍ਪਨਾਕੋਸਲ੍ਲਵਣ੍ਣਨਾ
੬੦. ਨ ਹੋਤਿ ਅਪ੍ਪਨਾ. ਯੇਨ ਵਿਧਿਨਾ ਅਪ੍ਪਨਾਯਂ ਕੁਸਲੋ ਹੋਤਿ, ਸੋ ਦਸਵਿਧੋ ਵਿਧਿ ਅਪ੍ਪਨਾਕੋਸਲ੍ਲਂ, ਤਨ੍ਨਿਬ੍ਬਤ੍ਤਂ ਵਾ ਞਾਣਂ. ਵਤ੍ਥੁਵਿਸਦਕਿਰਿਯਤੋਤਿ ਵਤ੍ਥੂਨਂ ਵਿਸਦਭਾਵਕਰਣਤੋ ਅਪ੍ਪਨਾਕੋਸਲ੍ਲਂ ਇਚ੍ਛਿਤਬ੍ਬਨ੍ਤਿ ਸਮ੍ਬਨ੍ਧੋ. ਏਵਂ ਸੇਸੇਸੁਪਿ.
੬੧. ਚਿਤ੍ਤਚੇਤਸਿਕਾਨਂ ਹਿ ਪਵਤ੍ਤਿਟ੍ਠਾਨਭਾਵਤੋ ਸਰੀਰਂ, ਤਪ੍ਪਟਿਬਦ੍ਧਾਨਿ ਚੀਵਰਾਦੀਨਿ ਚ ਇਧ ‘‘ਵਤ੍ਥੂਨੀ’’ਤਿ ਅਧਿਪ੍ਪੇਤਾਨਿ. ਤਾਨਿ ਯਥਾ ਚਿਤ੍ਤਸ੍ਸ ਸੁਖਾਵਹਾਨਿ ਹੋਨ੍ਤਿ, ਤਥਾ ਕਰਣਂ ਤੇਸਂ ਵਿਸਦਭਾਵਕਰਣਂ. ਤੇਨ ਵੁਤ੍ਤਂ ‘‘ਅਜ੍ਝਤ੍ਤਿਕਬਾਹਿਰਾਨ’’ਨ੍ਤਿਆਦਿ. ਸਰੀਰਂ ਵਾਤਿ ਵਾ-ਸਦ੍ਦੋ ਅਟ੍ਠਾਨਪ੍ਪਯੁਤ੍ਤੋ, ਸਰੀਰਂ ਸੇਦਮਲਗ੍ਗਹਿਤਂ ਵਾ ਅਞ੍ਞੇਨ ਵਾ ਅਵਸ੍ਸੁਤਕਿਚ੍ਚੇਨ ਵਿਬਾਧਿਤਨ੍ਤਿ ਅਧਿਪ੍ਪਾਯੋ. ਸੇਨਾਸਨਂ ਵਾਤਿ ਵਾ-ਸਦ੍ਦੇਨ ਪਤ੍ਤਾਦੀਨਮ੍ਪਿ ਸਙ੍ਗਹੋ ਦਟ੍ਠਬ੍ਬੋ. ਨਨੁ ਚਾਯਂ ਨਯੋ ਖੁਦ੍ਦਕਪਲਿਬੋਧੁਪਚ੍ਛੇਦੇਨ ਸਙ੍ਗਹਿਤੋ, ਪੁਨ ਕਸ੍ਮਾ ਵੁਤ੍ਤੋਤਿ? ਸਚ੍ਚਂ ਸਙ੍ਗਹਿਤੋ, ਸੋ ਚ ਖੋ ਭਾਵਨਾਯ ਆਰਮ੍ਭਕਾਲੇ. ਇਧ ਪਨ ਆਰਦ੍ਧਕਮ੍ਮਟ੍ਠਾਨਸ੍ਸ ਉਪਚਾਰਜ੍ਝਾਨੇ ਠਤ੍ਵਾ ਅਪ੍ਪਨਾਪਰਿਵਾਸਂ ਵਸਨ੍ਤਸ੍ਸ ਕਾਲਨ੍ਤਰੇ ਜਾਤੇ ਤਥਾਪਟਿਪਤ੍ਤਿ ਅਪ੍ਪਨਾਕੋਸਲ੍ਲਾਯ ਵੁਤ੍ਤਾ. ਅਵਿਸਦੇ ਸਤਿ, ਵਿਸਯਭੂਤੇ ਵਾ. ਕਥਂ ਭਾਵਨਮਨੁਯੁਞ੍ਜਨ੍ਤਸ੍ਸ ਤਾਨਿ ਵਿਸਯੋ? ਅਨ੍ਤਰਨ੍ਤਰਾ ਪਵਤ੍ਤਨਕਚਿਤ੍ਤੁਪ੍ਪਾਦਵਸੇਨੇਵਂ ਵੁਤ੍ਤਂ. ਤੇ ਹਿ ਚਿਤ੍ਤੁਪ੍ਪਾਦਾ ਚਿਤ੍ਤੇਕਗ੍ਗਤਾਯ ਅਪਰਿਸੁਦ੍ਧਭਾਵਾਯ ਸਂਵਤ੍ਤਨ੍ਤਿ. ਚਿਤ੍ਤਚੇਤਸਿਕੇਸੁ ਨਿਸ੍ਸਯਾਦਿਪਚ੍ਚਯਭੂਤੇਸੁ. ਞਾਣਮ੍ਪੀਤਿ ਪਿ-ਸਦ੍ਦੋ ਸਮ੍ਪਿਣ੍ਡਨੇ. ਤੇਨ ‘‘ਨ ਕੇਵਲਂ ਤਂ ਵਤ੍ਥੁਯੇਵ, ਅਥ ਖੋ ਤਸ੍ਮਿਂ ਅਪਰਿਸੁਦ੍ਧੇ ਞਾਣਮ੍ਪਿ ਅਪਰਿਸੁਦ੍ਧਂ ਹੋਤੀ’’ਤਿ ਦਸ੍ਸਿਤਂ. ਤਂਸਮ੍ਪਯੁਤ੍ਤਾਨਂ ਪਨ ਅਪਰਿਸੁਦ੍ਧਤਾ ਅਵੁਤ੍ਤਸਿਦ੍ਧਾ, ਞਾਣਸ੍ਸ ਚ ਵਿਸੁਂ ਗਹਣਂ ਅਪ੍ਪਨਾਯ ਬਹੁਕਾਰਤ੍ਤਾ. ਤਥਾ ਹਿ ਝਾਨਂ ‘‘ਦਨ੍ਧਾਭਿਞ੍ਞਂ, ਖਿਪ੍ਪਾਭਿਞ੍ਞ’’ਨ੍ਤਿ ਞਾਣਮੁਖੇਨ ਨਿਦ੍ਦਿਟ੍ਠਂ. ਨਿਸ੍ਸਯਨਿਸ੍ਸਯੋਪਿ ਨਿਸ੍ਸਯੋਤ੍ਵੇਵ ਵੁਚ੍ਚਤੀਤਿ ਆਹ ‘‘ਦੀਪਕਪਲ੍ਲਿਕਵਟ੍ਟਿਤੇਲਾਨਿ ਨਿਸ੍ਸਾਯਾ’’ਤਿ. ਞਾਣੇ ਅਵਿਸਦੇ ਵਿਪਸ੍ਸਨਾਭਾਵਨਾ ਵਿਯ ਸਮਾਧਿਭਾਵਨਾਪਿ ਪਰਿਦੁਬ੍ਬਲਾ ਹੋਤੀਤਿ ਦਸ੍ਸੇਤੁਂ ‘‘ਅਪਰਿਸੁਦ੍ਧੇਨ ਞਾਣੇਨਾ’’ਤਿਆਦਿ ਵੁਤ੍ਤਂ. ਤਤ੍ਥ ਕਮ੍ਮਟ੍ਠਾਨਨ੍ਤਿ ਸਮਥਕਮ੍ਮਟ੍ਠਾਨਂ ਆਹ. ਵੁਡ੍ਢਿਂ ਅਙ੍ਗਪਾਤੁਭਾਵੇਨ, ਵਿਰੂਲ਼੍ਹਿਂ ਗੁਣਭਾਵੇਨ, ਵੇਪੁਲ੍ਲਂ ਸਬ੍ਬਸੋ ਵਸਿਭਾਵਪ੍ਪਤ੍ਤਿਯਾ ਵੇਦਿਤਬ੍ਬਂ. ਵਿਸਦੇ ਪਨਾਤਿ ਸੁਕ੍ਕਪਕ੍ਖੋ, ਤਸ੍ਸ ਵੁਤ੍ਤਵਿਪਰਿਯਾਯੇਨ ਅਤ੍ਥੋ ਵੇਦਿਤਬ੍ਬੋ.
੬੨. ਸਮਭਾਵਕਰਣਨ੍ਤਿ ਕਿਚ੍ਚਤੋ ਅਨੂਨਾਧਿਕਭਾਵਕਰਣਂ. ਯਥਾਪਚ੍ਚਯਂ ਸਦ੍ਧੇਯ੍ਯਵਤ੍ਥੁਸ੍ਮਿਂ ਅਧਿਮੋਕ੍ਖਕਿਚ੍ਚਸ੍ਸ ਪਟੁਤਰਭਾਵੇਨ, ਪਞ੍ਞਾਯ ਅਵਿਸਦਤਾਯ, ਵੀਰਿਯਾਦੀਨਂ ਚ ਸਿਥਿਲਤਾਦਿਨਾ ਸਦ੍ਧਿਨ੍ਦ੍ਰਿਯਂ ਬਲਵਂ ਹੋਤਿ. ਤੇਨਾਹ ‘‘ਇਤਰਾਨਿ ਮਨ੍ਦਾਨੀ’’ਤਿ. ਤਤੋਤਿ ਤਸ੍ਮਾ ਸਦ੍ਧਿਨ੍ਦ੍ਰਿਯਸ੍ਸ ਬਲਵਭਾਵਤੋ, ਇਤਰੇਸਞ੍ਚ ਮਨ੍ਦਤ੍ਤਾ. ਕੋਸਜ੍ਜਪਕ੍ਖੇ ਪਤਿਤੁਂ ਅਦਤ੍ਵਾ ਸਮ੍ਪਯੁਤ੍ਤਧਮ੍ਮਾਨਂ ਪਗ੍ਗਣ੍ਹਨਂ ਅਨੁਬਲਪ੍ਪਦਾਨਂ ਪਗ੍ਗਹੋ, ਪਗ੍ਗਹੋਵ ਕਿਚ੍ਚਂ, ਪਗ੍ਗਹਕਿਚ੍ਚਂ ਕਾਤੁਂ ਨ ਸਕ੍ਕੋਤੀਤਿ ਸਮ੍ਬਨ੍ਧਿਤਬ੍ਬਂ. ਆਰਮ੍ਮਣਂ ਉਪਗਨ੍ਤ੍ਵਾ ਠਾਨਂ, ਅਨਿਸ੍ਸਜ੍ਜਨਂ ਵਾ ਉਪਟ੍ਠਾਨਂ, ਵਿਕ੍ਖੇਪਪਟਿਪਕ੍ਖੋ. ਯੇਨ ਵਾ ਸਮ੍ਪਯੁਤ੍ਤਾ ਅਵਿਕ੍ਖਿਤ੍ਤਾ ਹੋਨ੍ਤਿ, ਸੋ ਅਵਿਕ੍ਖੇਪੋ. ਰੂਪਗਤਂ ਵਿਯ ਚਕ੍ਖੁਨਾ ਯੇਨ ਯਾਥਾਵਤੋ ਵਿਸਯਸਭਾਵਂ ਪਸ੍ਸਤਿ, ਤਂ ਦਸ੍ਸਨਕਿਚ੍ਚਂ ਕਾਤੁਂ ਨ ਸਕ੍ਕੋਤਿ ਬਲਵਤਾ ਸਦ੍ਧਿਨ੍ਦ੍ਰਿਯੇਨ ਅਭਿਭੂਤਤ੍ਤਾ. ਸਹਜਾਤਧਮ੍ਮੇਸੁ ਹਿ ਇਨ੍ਦਟ੍ਠਂ ਕਾਰੇਨ੍ਤਾਨਂ ਸਹਪਵਤ੍ਤਮਾਨਾਨਂ ਧਮ੍ਮਾਨਂ ਏਕਰਸਤਾਵਸੇਨੇਵ ਅਤ੍ਥਸਿਦ੍ਧਿ, ਨ ਅਞ੍ਞਥਾ. ਤਸ੍ਮਾਤਿ ਵੁਤ੍ਤਮੇਵਤ੍ਥਂ ਕਾਰਣਭਾਵੇਨ ਪਚ੍ਚਾਮਸਤਿ. ਤਨ੍ਤਿ ਸਦ੍ਧਿਨ੍ਦ੍ਰਿਯਂ. ਧਮ੍ਮਸਭਾਵਪਚ੍ਚਵੇਕ੍ਖਣੇਨਾਤਿ ਯਸ੍ਸ ਸਦ੍ਧੇਯ੍ਯਵਤ੍ਥੁਨੋ ਉਲ਼ਾਰਤਾਦਿਗੁਣੇ ਅਧਿਮੁਚ੍ਚਨਸ੍ਸ ਸਾਤਿਸਯਪ੍ਪਵਤ੍ਤਿਯਾ ਸਦ੍ਧਿਨ੍ਦ੍ਰਿਯਂ ਬਲਵਂ ਜਾਤਂ, ਤਸ੍ਸ ਪਚ੍ਚਯਪਚ੍ਚਯੁਪ੍ਪਨ੍ਨਾਦਿਵਿਭਾਗਤੋ ਯਾਥਾਵਤੋ ਵੀਮਂਸਨੇਨ. ਏਵਞ੍ਹਿ ਏਵਂਧਮ੍ਮਤਾਨਯੇਨ ਸਭਾਵਰਸਤੋ ਪਰਿਗ੍ਗਯ੍ਹਮਾਨੇ ਸਵਿਪ੍ਫਾਰੋ ਅਧਿਮੋਕ੍ਖੋ ਨ ਹੋਤਿ, ‘‘ਅਯਂ ਇਮੇਸਂ ਧਮ੍ਮਾਨਂ ਸਭਾਵੋ’’ਤਿ ਪਰਿਜਾਨਨਵਸੇਨ ਪਞ੍ਞਾਬ੍ਯਾਪਾਰਸ੍ਸ ਸਾਤਿਸਯਤ੍ਤਾ. ਧੁਰਿਯਧਮ੍ਮੇਸੁ ਹਿ ਯਥਾ ਸਦ੍ਧਾਯ ਬਲਵਭਾਵੇ ਪਞ੍ਞਾਯ ਮਨ੍ਦਭਾਵੋ ਹੋਤਿ, ਏਵਂ ਪਞ੍ਞਾਯ ਬਲਵਭਾਵੇ ਸਦ੍ਧਾਯ ਮਨ੍ਦਭਾਵੋ ਹੋਤੀਤਿ. ਤੇਨ ਵੁਤ੍ਤਂ ‘‘ਤਂ ਧਮ੍ਮਸਭਾਵਪਚ੍ਚਵੇਕ੍ਖਣੇਨ ਹਾਪੇਤਬ੍ਬ’’ਨ੍ਤਿ.
ਤਥਾ ਅਮਨਸਿਕਾਰੇਨਾਤਿ ਯੇਨਾਕਾਰੇਨ ਭਾਵਨਮਨੁਯੁਞ੍ਜਨ੍ਤਸ੍ਸ ਸਦ੍ਧਿਨ੍ਦ੍ਰਿਯਂ ਬਲਵਂ ਹੋਤਿ, ਤੇਨਾਕਾਰੇਨ ਭਾਵਨਾਯ ਅਨਨੁਯੁਞ੍ਜਨਤੋਤਿ ਵੁਤ੍ਤਂ ਹੋਤਿ. ਇਧ ਦੁਵਿਧੇਨ ਸਦ੍ਧਿਨ੍ਦ੍ਰਿਯਸ੍ਸ ਬਲਵਭਾਵੋ, ਅਤ੍ਤਨੋ ਵਾ ਪਚ੍ਚਯਵਿਸੇਸਤੋ ਕਿਚ੍ਚੁਤ੍ਤਰਿਯੇਨ, ਵੀਰਿਯਾਦੀਨਂ ਵਾ ਮਨ੍ਦਕਿਚ੍ਚਤਾਯ. ਤਤ੍ਥ ਪਠਮਵਿਕਪ੍ਪੇ ਹਾਪਨਵਿਧਿ ਦਸ੍ਸਿਤੋ, ਦੁਤਿਯਵਿਕਪ੍ਪੇ ਪਨ ਯਥਾ ਮਨਸਿ ਕਰੋਤੋ ਵੀਰਿਯਾਦੀਨਂ ਮਨ੍ਦਕਿਚ੍ਚਤਾਯ ਸਦ੍ਧਿਨ੍ਦ੍ਰਿਯਂ ਬਲਵਂ ਜਾਤਂ, ਤਥਾ ਅਮਨਸਿਕਾਰੇਨ ਵੀਰਿਯਾਦੀਨਂ ਪਟੁਕਿਚ੍ਚਭਾਵਾਵਹੇਨ ਮਨਸਿਕਾਰੇਨ ਸਦ੍ਧਿਨ੍ਦ੍ਰਿਯਂ ਤੇਹਿ ਸਮਰਸਂ ਕਰੋਨ੍ਤੇਨ ਹਾਪੇਤਬ੍ਬਂ. ਇਮਿਨਾ ਨਯੇਨ ਸੇਸਿਨ੍ਦ੍ਰਿਯੇਸੁਪਿ ਹਾਪਨਵਿਧਿ ਵੇਦਿਤਬ੍ਬੋ.
ਵਕ੍ਕਲਿਤ੍ਥੇਰਵਤ੍ਥੂਤਿ ਸੋ ਹਿ ਆਯਸ੍ਮਾ ਸਦ੍ਧਾਧਿਮੁਤ੍ਤਤਾਯ ਕਤਾਧਿਕਾਰੋ ਸਤ੍ਥੁ ਰੂਪਕਾਯਦਸ੍ਸਨਪ੍ਪਸੁਤੋ ਏਵ ਹੁਤ੍ਵਾ ਵਿਹਰਨ੍ਤੋ ਸਤ੍ਥਾਰਾ ‘‘ਕਿਂ ਤੇ, ਵਕ੍ਕਲਿ, ਇਮਿਨਾ ਪੂਤਿਕਾਯੇਨ ਦਿਟ੍ਠੇਨ? ਯੋ ਖੋ, ਵਕ੍ਕਲਿ, ਧਮ੍ਮਂ ਪਸ੍ਸਤਿ, ਸੋ ਮਂ ਪਸ੍ਸਤੀ’’ਤਿਆਦਿਨਾ (ਸਂ. ਨਿ. ੩.੮੭) ਓਵਦਿਤ੍ਵਾ ਕਮ੍ਮਟ੍ਠਾਨੇ ਨਿਯੋਜਿਤੋਪਿ ਤਂ ਅਨਨੁਯੁਞ੍ਜਨ੍ਤੋ ਪਣਾਮਿਤੋ ਅਤ੍ਤਾਨਂ ਵਿਨਿਪਾਤੇਤੁਂ ਪਪਾਤਟ੍ਠਾਨਂ ਅਭਿਰੁਹਿ. ਅਥ ਨਂ ਸਤ੍ਥਾ ਯਥਾਨਿਸਿਨ੍ਨੋਵ ਓਭਾਸਂ ਵਿਸਜ੍ਜੇਨ੍ਤੋ ਅਤ੍ਤਾਨਂ ਦਸ੍ਸੇਤ੍ਵਾ –
‘‘ਪਾਮੋਜ੍ਜਬਹੁਲੋ ਭਿਕ੍ਖੁ, ਪਸਨ੍ਨੋ ਬੁਦ੍ਧਸਾਸਨੇ;
ਅਧਿਗਚ੍ਛੇ ਪਦਂ ਸਨ੍ਤਂ, ਸਙ੍ਖਾਰੂਪਸਮਂ ਸੁਖ’’ਨ੍ਤਿ. (ਧ. ਪ. ੩੮੧) –
ਗਾਥਂ ਵਤ੍ਵਾ ‘‘ਏਹਿ ਵਕ੍ਕਲੀ’’ਤਿ ਆਹ. ਸੋ ਤੇਨ ਅਮਤੇਨੇਵ ਅਭਿਸਿਤ੍ਤੋ ਹਟ੍ਠਤੁਟ੍ਠੋ ਹੁਤ੍ਵਾ ਵਿਪਸ੍ਸਨਂ ਪਟ੍ਠਪੇਸਿ. ਸਦ੍ਧਾਯ ਪਨ ਬਲਵਭਾਵਤੋ ਵਿਪਸ੍ਸਨਾਵੀਥਿਂ ਨ ਓਤਰਿ. ਤਂ ਞਤ੍ਵਾ ਭਗਵਾ ਇਨ੍ਦ੍ਰਿਯਸਮਤਂ ਪਟਿਪਾਦੇਨ੍ਤੋ ਕਮ੍ਮਟ੍ਠਾਨਂ ਸੋਧੇਤ੍ਵਾ ਅਦਾਸਿ. ਸੋ ਸਤ੍ਥਾਰਾ ਦਿਨ੍ਨਨਯੇਨ ਵਿਪਸ੍ਸਨਂ ਉਸ੍ਸੁਕ੍ਕਾਪੇਤ੍ਵਾ ਮਗ੍ਗਪਟਿਪਾਟਿਯਾ ਅਰਹਤ੍ਤਂ ਪਾਪੁਣਿ. ਤੇਨ ਵੁਤ੍ਤਂ ‘‘ਵਕ੍ਕਲਿਤ੍ਥੇਰਵਤ੍ਥੁ ਚੇਤ੍ਥ ਨਿਦਸ੍ਸਨ’’ਨ੍ਤਿ.
ਇਤਰਕਿਚ੍ਚਭੇਦਨ੍ਤਿ ਉਪਟ੍ਠਾਨਾਦਿਕਿਚ੍ਚਵਿਸੇਸਂ. ਪਸ੍ਸਦ੍ਧਾਦੀਤਿ ਆਦਿ-ਸਦ੍ਦੇਨ ਸਮਾਧਿਉਪੇਕ੍ਖਾਸਮ੍ਬੋਜ੍ਝਙ੍ਗਾਨਂ ਸਙ੍ਗਹੋ ਦਟ੍ਠਬ੍ਬੋ. ਹਾਪੇਤਬ੍ਬਨ੍ਤਿ ਯਥਾ ਸਦ੍ਧਿਨ੍ਦ੍ਰਿਯਸ੍ਸ ਬਲਵਭਾਵੋ ਧਮ੍ਮਸਭਾਵਪਚ੍ਚਵੇਕ੍ਖਣੇਨ ਹਾਯਤਿ, ਏਵਂ ਵੀਰਿਯਿਨ੍ਦ੍ਰਿਯਸ੍ਸ ਅਧਿਮਤ੍ਤਤਾ ਪਸ੍ਸਦ੍ਧਿਆਦਿਭਾਵਨਾਯ ਹਾਯਤਿ, ਸਮਾਧਿਪਕ੍ਖਿਯਤ੍ਤਾ ਤਸ੍ਸਾ. ਤਥਾ ਹਿ ਸਾ ਸਮਾਧਿਨ੍ਦ੍ਰਿਯਸ੍ਸ ਅਧਿਮਤ੍ਤਤਂ ਕੋਸਜ੍ਜਪਾਤਤੋ ਰਕ੍ਖਨ੍ਤੀ ਵੀਰਿਯਾਦਿਭਾਵਨਾ ਵਿਯ ਵੀਰਿਯਿਨ੍ਦ੍ਰਿਯਸ੍ਸ ਅਧਿਮਤ੍ਤਤਂ ਉਦ੍ਧਚ੍ਚਪਾਤਤੋ ਰਕ੍ਖਨ੍ਤੀ ਏਕਂਸਤੋ ਹਾਪੇਤਿ. ਤੇਨ ਵੁਤ੍ਤਂ ‘‘ਪਸ੍ਸਦ੍ਧਾਦਿਭਾਵਨਾਯ ਹਾਪੇਤਬ੍ਬ’’ਨ੍ਤਿ.
ਸੋਣਤ੍ਥੇਰਸ੍ਸ ਵਤ੍ਥੂਤਿ (ਮਹਾਵ. ੨੪੩) ਸੁਕੁਮਾਰਸ੍ਸ ਸੋਣਤ੍ਥੇਰਸ੍ਸ ਵਤ੍ਥੁ. ਸੋ ਹਿ ਆਯਸ੍ਮਾ ਸਤ੍ਥੁ ਸਨ੍ਤਿਕੇ ਕਮ੍ਮਟ੍ਠਾਨਂ ਗਹੇਤ੍ਵਾ ਸੀਤਵਨੇ ਵਿਹਰਨ੍ਤੋ ‘‘ਮਮ ਸਰੀਰਂ ਸੁਖੁਮਾਲਂ, ਨ ਚ ਸਕ੍ਕਾ ਸੁਖੇਨੇਵ ਸੁਖਂ ਅਧਿਗਨ੍ਤੁਂ, ਕਾਯਂ ਕਿਲਮੇਤ੍ਵਾਪਿ ਸਮਣਧਮ੍ਮੋ ਕਾਤਬ੍ਬੋ’’ਤਿ ਠਾਨਚਙ੍ਕਮਮੇਵ ਅਧਿਟ੍ਠਾਯ ਪਧਾਨਮਨੁਯੁਞ੍ਜਨ੍ਤੋ ਪਾਦਤਲੇਸੁ ਫੋਟੇਸੁ ਉਟ੍ਠਿਤੇਸੁਪਿ ਵੇਦਨਂ ਅਜ੍ਝੁਪੇਕ੍ਖਿਤ੍ਵਾ ਦਲ਼੍ਹਂ ਵੀਰਿਯਂ ਕਰੋਨ੍ਤੋ ਅਚ੍ਚਾਰਦ੍ਧਵੀਰਿਯਤਾਯ ਵਿਸੇਸਂ ਨਿਬ੍ਬਤ੍ਤੇਤੁਂ ਨਾਸਕ੍ਖਿ. ਸਤ੍ਥਾ ਤਤ੍ਥ ਗਨ੍ਤ੍ਵਾ ਵੀਣੋਵਾਦੇਨ ਓਵਦਿਤ੍ਵਾ ਵੀਰਿਯਸਮਤਾਯੋਜਨਵਿਧਿਂ ਦਸ੍ਸੇਨ੍ਤੋ ਕਮ੍ਮਟ੍ਠਾਨਂ ਸੋਧੇਤ੍ਵਾ ਗਿਜ੍ਝਕੂਟਂ ਗਤੋ. ਥੇਰੋਪਿ ਸਤ੍ਥਾਰਾ ਦਿਨ੍ਨਨਯੇਨ ਵੀਰਿਯਸਮਤਂ ਯੋਜੇਨ੍ਤੋ ਵਿਪਸ੍ਸਨਂ ਉਸ੍ਸੁਕ੍ਕਾਪੇਤ੍ਵਾ ਅਰਹਤ੍ਤੇ ਪਤਿਟ੍ਠਾਸਿ. ਤੇਨ ਵੁਤ੍ਤਂ ‘‘ਸੋਣਤ੍ਥੇਰਸ੍ਸ ਵਤ੍ਥੁ ਦਸ੍ਸੇਤਬ੍ਬ’’ਨ੍ਤਿ.
ਸੇਸੇਸੁਪੀਤਿ ਸਤਿਸਮਾਧਿਪਞ੍ਞਿਨ੍ਦ੍ਰਿਯੇਸੁਪਿ. ਏਕਸ੍ਸਾਤਿ ਏਕੇਕਸ੍ਸ. ਸਾਮਞ੍ਞਨਿਦ੍ਦੇਸੋਵਾਯਂ ਦਟ੍ਠਬ੍ਬੋ. ਏਵਂ ਪਞ੍ਚਨ੍ਨਂ ਇਨ੍ਦ੍ਰਿਯਾਨਂ ਪਚ੍ਚੇਕਂ ਅਧਿਮਤ੍ਤਤਾਯ ਪਨ ਹਾਪਨਵਸੇਨ ਸਮਤਂ ਦਸ੍ਸੇਤ੍ਵਾ ਇਦਾਨਿ ਤਤ੍ਥ ਯੇਸਂ ਵਿਸੇਸਤੋ ਅਸਾਧਾਰਣਤੋ, ਸਾਧਾਰਣਤੋ ਚ ਸਮਤਾ ਇਚ੍ਛਿਤਬ੍ਬਾ, ਤਂ ਦਸ੍ਸੇਤੁਂ ‘‘ਵਿਸੇਸਤੋ ਪਨਾ’’ਤਿਆਦਿ ਵੁਤ੍ਤਂ. ਏਤ੍ਥਾਤਿ ਏਤੇਸੁ ਪਞ੍ਚਸੁ ਇਨ੍ਦ੍ਰਿਯੇਸੁ. ਸਮਤਨ੍ਤਿ ਸਦ੍ਧਾਪਞ੍ਞਾਨਂ ਅਞ੍ਞਮਞ੍ਞਂ ਅਨੂਨਾਨਧਿਕਭਾਵਂ. ਤਥਾ ਸਮਾਧਿਵੀਰਿਯਾਨਂ. ਯਥਾ ਹਿ ਸਦ੍ਧਾਪਞ੍ਞਾਨਂ ਵਿਸੁਂ ਵਿਸੁਂ ਧੁਰਿਯਧਮ੍ਮਭੂਤਾਨਂ ਕਿਚ੍ਚਤੋ ਅਞ੍ਞਮਞ੍ਞਾਨਤਿਵਤ੍ਤਨਂ ਵਿਸੇਸਤੋ ਇਚ੍ਛਿਤਬ੍ਬਮੇਵ, ਯਤੋ ਨੇਸਂ ਸਮਧੁਰਤਾਯ ਅਪ੍ਪਨਾ ਸਮ੍ਪਜ੍ਜਤੀਤਿ, ਏਵਂ ਸਮਾਧਿਵੀਰਿਯਾਨਂ ਕੋਸਜ੍ਜਉਦ੍ਧਚ੍ਚਪਕ੍ਖਿਕਾਨਂ ਸਮਰਸਤਾਯ ਸਤਿ ਅਞ੍ਞਮਞ੍ਞੂਪਤ੍ਥਮ੍ਭਨਤੋ ਸਮ੍ਪਯੁਤ੍ਤਧਮ੍ਮਾਨਂ ਅਨ੍ਤਦ੍ਵਯਪਾਤਾਭਾਵੇਨ ਸਮ੍ਮਦੇਵ ਅਪ੍ਪਨਾ ਇਜ੍ਝਤਿ.
‘‘ਬਲਵਸਦ੍ਧੋ ਹੀ’’ਤਿਆਦਿ ਨਿਦਸ੍ਸਨਵਸੇਨ ਵੁਤ੍ਤਂ. ਤਸ੍ਸਤ੍ਥੋ – ਯੋ ਬਲਵਤਿਯਾ ਸਦ੍ਧਾਯ ਸਮਨ੍ਨਾਗਤੋ ਅਵਿਸਦਞਾਣੋ, ਸੋ ਮੁਦ੍ਧਪ੍ਪਸਨ੍ਨੋ ਹੋਤਿ, ਨ ਅਵੇਚ੍ਚਪ੍ਪਸਨ੍ਨੋ. ਤਥਾ ਹਿ ਸੋ ਅਵਤ੍ਥੁਸ੍ਮਿਂ ਪਸੀਦਤਿ ਸੇਯ੍ਯਥਾਪਿ ਤਿਤ੍ਥਿਯਸਾਵਕਾ. ਕੇਰਾਟਿਕਪਕ੍ਖਨ੍ਤਿ ਸਾਠੇਯ੍ਯਪਕ੍ਖਂ ਭਜਤਿ. ਸਦ੍ਧਾਹੀਨਾਯ ਪਞ੍ਞਾਯ ਅਤਿਧਾਵਨ੍ਤੋ ‘‘ਦੇਯ੍ਯਵਤ੍ਥੁਪਰਿਚ੍ਚਾਗੇਨ ਵਿਨਾ ਚਿਤ੍ਤੁਪ੍ਪਾਦਮਤ੍ਤੇਨਪਿ ਦਾਨਮਯਂ ਪੁਞ੍ਞਂ ਹੋਤੀ’’ਤਿਆਦੀਨਿ ਪਰਿਕਪ੍ਪੇਤਿ ਹੇਤੁਪਟਿਰੂਪਕੇਹਿ ਵਞ੍ਚਿਤੋ. ਏਵਂਭੂਤੋ ਪਨ ਸੁਕ੍ਖਤਕ੍ਕਵਿਲੁਤ੍ਤਚਿਤ੍ਤੋ ਪਣ੍ਡਿਤਾਨਂ ਵਚਨਂ ਨਾਦਿਯਤਿ, ਸਞ੍ਞਤ੍ਤਿਂ ਨ ਗਚ੍ਛਤਿ. ਤੇਨਾਹ ‘‘ਭੇਸਜ੍ਜਸਮੁਟ੍ਠਿਤੋ ਵਿਯ ਰੋਗੋ ਅਤੇਕਿਚ੍ਛੋ ਹੋਤੀ’’ਤਿ. ਯਥਾ ਚੇਤ੍ਥ ਸਦ੍ਧਾਪਞ੍ਞਾਨਂ ਅਞ੍ਞਮਞ੍ਞਵਿਰਹੋ ਨ ਅਤ੍ਥਾਵਹੋ ਅਨਤ੍ਥਾਵਹੋ ਚ, ਏਵਮਿਧਾਪਿ ਸਮਾਧਿਵੀਰਿਯਾਨਂ ਅਞ੍ਞਮਞ੍ਞਵਿਰਹੋ ਨ ਅਵਿਕ੍ਖੇਪਾਵਹੋ ਵਿਕ੍ਖੇਪਾਵਹੋ ਚਾਤਿ ਵੇਦਿਤਬ੍ਬਂ. ਕੋਸਜ੍ਜਂ ਅਭਿਭਵਤਿ, ਤੇਨ ਅਪ੍ਪਨਂ ਨ ਪਾਪੁਣਾਤੀਤਿ ਅਧਿਪ੍ਪਾਯੋ. ਉਦ੍ਧਚ੍ਚਂ ਅਭਿਭਵਤੀਤਿ ਏਤ੍ਥਾਪਿ ਏਸੇਵ ਨਯੋ. ਤਦੁਭਯਨ੍ਤਿ ਤਂ ਸਦ੍ਧਾਪਞ੍ਞਾਦ੍ਵਯਂ, ਸਮਾਧਿਵੀਰਿਯਦ੍ਵਯਞ੍ਚ. ਸਮਂ ਕਾਤਬ੍ਬਨ੍ਤਿ ਸਮਰਸਂ ਕਾਤਬ੍ਬਂ.
ਸਮਾਧਿਕਮ੍ਮਿਕਸ੍ਸਾਤਿ ਸਮਥਕਮ੍ਮਟ੍ਠਾਨਿਕਸ੍ਸ. ਏਵਨ੍ਤਿ ਏਵਂ ਸਨ੍ਤੇ, ਸਦ੍ਧਾਯ ਤੇਸਂ ਬਲਵਭਾਵੇ ਸਤੀਤਿ ਅਤ੍ਥੋ. ਸਦ੍ਦਹਨ੍ਤੋਤਿ ‘‘ਪਥਵੀ ਪਥਵੀ’’ਤਿ ਮਨਸਿਕਰਣਮਤ੍ਤੇਨ ਕਥਂ ਝਾਨੁਪ੍ਪਤ੍ਤੀਤਿ ਅਚਿਨ੍ਤੇਤ੍ਵਾ ‘‘ਅਦ੍ਧਾ ਸਮ੍ਮਾਸਮ੍ਬੁਦ੍ਧੇਨ ਵੁਤ੍ਤਵਿਧਿ ਇਜ੍ਝਿਸ੍ਸਤੀ’’ਤਿ ਸਦ੍ਦਹਨ੍ਤੋ ਸਦ੍ਧਂ ਜਨੇਨ੍ਤੋ. ਓਕਪ੍ਪੇਨ੍ਤੋਤਿ ਆਰਮ੍ਮਣਂ ਅਨੁਪਵਿਸਿਤ੍ਵਾ ਵਿਯ ਅਧਿਮੁਚ੍ਚਨਵਸੇਨ ਓਕਪ੍ਪੇਨ੍ਤੋ ਪਕ੍ਖਨ੍ਦਨ੍ਤੋ. ਏਕਗ੍ਗਤਾ ਬਲਵਤੀ ਵਟ੍ਟਤਿ ਸਮਾਧਿਪਧਾਨਤ੍ਤਾ ਝਾਨਸ੍ਸ. ਉਭਿਨ੍ਨਨ੍ਤਿ ਸਮਾਧਿਪਞ੍ਞਾਨਂ, ਸਮਾਧਿਕਮ੍ਮਿਕਸ੍ਸ ਸਮਾਧਿਨੋ ਅਧਿਮਤ੍ਤਤਾਪਿ ਇਚ੍ਛਿਤਬ੍ਬਾਤਿ ਆਹ ‘‘ਸਮਤਾਯਪੀ’’ਤਿ, ਸਮਭਾਵੇਨਾਪੀਤਿ ਅਤ੍ਥੋ. ਅਪ੍ਪਨਾਤਿ ਇਧਾਧਿਪ੍ਪੇਤਅਪ੍ਪਨਾ. ਤਥਾ ਹਿ ‘‘ਹੋਤਿਯੇਵਾ’’ਤਿ ਸਾਸਙ੍ਕਂ ਵਦਤਿ, ਲੋਕੁਤ੍ਤਰਪ੍ਪਨਾ ਪਨ ਤੇਸਂ ਸਮਭਾਵੇਨੇਵ ਇਚ੍ਛਿਤਾ. ਯਥਾਹ – ‘‘ਸਮਥਵਿਪਸ੍ਸਨਂ ਯੁਗਨਦ੍ਧਂ ਭਾਵੇਤੀ’’ਤਿ (ਪਟਿ. ਮ. ੨.੧, ੫).
ਯਦਿ ਵਿਸੇਸਤੋ ਸਦ੍ਧਾਪਞ੍ਞਾਨਂ, ਸਮਾਧਿਵੀਰਿਯਾਨਞ੍ਚ ਸਮਤਾ ਇਚ੍ਛਿਤਾ, ਕਥਂ ਸਤੀਤਿ ਆਹ ‘‘ਸਤਿ ਪਨ ਸਬ੍ਬਤ੍ਥ ਬਲਵਤੀ ਵਟ੍ਟਤੀ’’ਤਿ. ਸਬ੍ਬਤ੍ਥਾਤਿ ਲੀਨੁਦ੍ਧਚ੍ਚਪਕ੍ਖੇਸੁ ਪਞ੍ਚਸੁ ਇਨ੍ਦ੍ਰਿਯੇਸੁ. ਉਦ੍ਧਚ੍ਚਪਕ੍ਖਿਯੇ ਗਣ੍ਹਨ੍ਤੋ ‘‘ਸਦ੍ਧਾਵੀਰਿਯਪਞ੍ਞਾਨ’’ਨ੍ਤਿ ਆਹ. ਅਞ੍ਞਥਾਪੀਤਿ ਚ ਗਹੇਤਬ੍ਬਾ ਸਿਯਾ. ਤਥਾ ਹਿ ‘‘ਕੋਸਜ੍ਜਪਕ੍ਖੇਨ ਸਮਾਧਿਨਾ’’ ਇਚ੍ਚੇਵ ਵੁਤ੍ਤਂ, ਨ ‘‘ਪਸ੍ਸਦ੍ਧਿਸਮਾਧਿਉਪੇਕ੍ਖਾਹੀ’’ਤਿ. ਸਾ ਸਤਿ. ਸਬ੍ਬੇਸੁ ਰਾਜਕਮ੍ਮੇਸੁ ਨਿਯੁਤ੍ਤੋ ਸਬ੍ਬਕਮ੍ਮਿਕੋ. ਤੇਨ ਕਾਰਣੇਨ ਸਬ੍ਬਤ੍ਥ ਇਚ੍ਛਿਤਬ੍ਬਤ੍ਥੇਨ. ਆਹ ਅਟ੍ਠਕਥਾਯਂ. ਸਬ੍ਬਤ੍ਥ ਨਿਯੁਤ੍ਤਾ ਸਬ੍ਬਤ੍ਥਿਕਾ, ਸਬ੍ਬੇਨ ਵਾ ਲੀਨੁਦ੍ਧਚ੍ਚਪਕ੍ਖਿਯੇਨ ਬੋਜ੍ਝਙ੍ਗਗ੍ਗਹਣੇਨ ਅਤ੍ਥੇਤਬ੍ਬਾ ਸਬ੍ਬਤ੍ਥਿਯਾ, ਸਬ੍ਬਤ੍ਥਿਯਾਵ ਸਬ੍ਬਤ੍ਥਿਕਾ. ਚਿਤ੍ਤਨ੍ਤਿ ਕੁਸਲਚਿਤ੍ਤਂ. ਤਸ੍ਸ ਹਿ ਸਤਿ ਪਟਿਸਰਣਂ ਪਰਾਯਣਂ ਅਪ੍ਪਤ੍ਤਸ੍ਸ ਪਤ੍ਤਿਯਾ ਅਨਧਿਗਤਸ੍ਸ ਅਧਿਗਮਾਯ. ਤੇਨਾਹ ‘‘ਆਰਕ੍ਖਪਚ੍ਚੁਪਟ੍ਠਾਨਾ’’ਤਿਆਦਿ.
੬੩. ਚਿਤ੍ਤੇਕਗ੍ਗਤਾਨਿਮਿਤ੍ਤਸ੍ਸਾਤਿ ਚਿਤ੍ਤੇਕਗ੍ਗਤਾਯ ਨਿਮਿਤ੍ਤਸ੍ਸ, ਚਿਤ੍ਤੇਕਗ੍ਗਤਾਸਙ੍ਖਾਤਸ੍ਸ ਚ ਨਿਮਿਤ੍ਤਸ੍ਸ. ਚਿਤ੍ਤਸ੍ਸ ਹਿ ਸਮਾਹਿਤਾਕਾਰਂ ਸਲ੍ਲਕ੍ਖੇਤ੍ਵਾ ਸਮਥਨਿਮਿਤ੍ਤਂ ਰਕ੍ਖਨ੍ਤੋਯੇਵ ਕਸਿਣਨਿਮਿਤ੍ਤਂ ਰਕ੍ਖਤਿ. ਤਸ੍ਮਾ ਪਥਵੀਕਸਿਣਾਦਿਕਸ੍ਸਾਤਿ ਆਦਿ-ਸਦ੍ਦੇਨ ਨ ਕੇਵਲਂ ਪਟਿਭਾਗਨਿਮਿਤ੍ਤਸ੍ਸੇਵ, ਅਥ ਖੋ ਸਮਥਨਿਮਿਤ੍ਤਸ੍ਸਾਪਿ ਗਹਣਂ ਦਟ੍ਠਬ੍ਬਂ. ਤਨ੍ਤਿ ਰਕ੍ਖਣਕੋਸਲ੍ਲਂ. ਇਧ ਅਪ੍ਪਨਾਕੋਸਲ੍ਲਕਥਾਯਂ ‘‘ਨਿਮਿਤ੍ਤਕੋਸਲ੍ਲ’’ਨ੍ਤਿ ਅਧਿਪ੍ਪੇਤਂ, ਕਰਣਭਾਵਨਾਕੋਸਲ੍ਲਾਨਂ ਪਗੇਵ ਸਿਦ੍ਧਤ੍ਤਾਤਿ ਅਧਿਪ੍ਪਾਯੋ.
੬੪. ਅਤਿਸਿਥਿਲਵੀਰਿਯਤਾਦੀਹੀਤਿ ਆਦਿ-ਸਦ੍ਦੇਨ ਪਮੋਦਨਸਂਵੇਜਨਵਿਪਰਿਯਾਯੇ ਸਙ੍ਗਣ੍ਹਾਤਿ. ਲੀਨਨ੍ਤਿ ਸਙ੍ਕੁਚਿਤਂ ਕੋਸਜ੍ਜਪਕ੍ਖਪਤਿਤਂ. ਚਿਤ੍ਤਨ੍ਤਿ ਭਾਵਨਾਚਿਤ੍ਤਂ. ਧਮ੍ਮਵਿਚਯਸਮ੍ਬੋਜ੍ਝਙ੍ਗਾਦਯੋ ਭਾਵੇਤੀਤਿ ਏਤ੍ਥ ‘‘ਤਯੋ’’ਤਿ ਪਦਂ ਆਨੇਤ੍ਵਾ ਸਮ੍ਬਨ੍ਧਿਤਬ੍ਬਂ. ਯਥਾ ਪਨ ਤੇ ਭਾਵੇਤਬ੍ਬਾ, ਤਂ ਸਯਮੇਵ ਵਕ੍ਖਤਿ.
ਪਰਿਤ੍ਤਨ੍ਤਿ ਅਪ੍ਪਕਂ. ਉਜ੍ਜਾਲੇਤੁਕਾਮੋਤਿ ਪਦੀਪੇਤੁਕਾਮੋ. ਉਦਕਵਾਤਂ ਦਦੇਯ੍ਯਾਤਿ ਉਦਕਮਿਸ੍ਸਂ ਵਾਤਂ ਉਪਨੇਯ੍ਯ. ਅਕਾਲੋਤਿ ਨਕਾਲੋ, ਅਯੁਤ੍ਤਕਾਲੋ ਵਾ. ਸਤਿਆਦਿਧਮ੍ਮਸਾਮਗ੍ਗਿਸਙ੍ਖਾਤਾਯ ਬੋਧਿਯਾ ਬੁਜ੍ਝਤਿ ਏਤਾਯਾਤਿ ਕਤ੍ਵਾ, ਤਂਸਮਙ੍ਗਿਨੋ ਵਾ ਬੁਜ੍ਝਤੀਤਿ ਬੋਧਿਨੋ ਯੋਗਿਨੋ ਅਙ੍ਗਨ੍ਤਿ ਬੋਜ੍ਝਙ੍ਗੋ, ਪਸਤ੍ਥੋ, ਸੁਨ੍ਦਰੋ ਵਾ ਬੋਜ੍ਝਙ੍ਗੋ ਸਮ੍ਬੋਜ੍ਝਙ੍ਗੋ. ਕਾਯਚਿਤ੍ਤਦਰਥਵੂਪਸਮਲਕ੍ਖਣਾ ਪਸ੍ਸਦ੍ਧਿਯੇਵ ਸਮ੍ਬੋਜ੍ਝਙ੍ਗੋ ਪਸ੍ਸਦ੍ਧਿਸਮ੍ਬੋਜ੍ਝਙ੍ਗੋ, ਤਸ੍ਸ ਪਸ੍ਸਦ੍ਧਿਸਮ੍ਬੋਜ੍ਝਙ੍ਗਸ੍ਸ. ਸਮਾਧਿਸਮ੍ਬੋਜ੍ਝਙ੍ਗਾਦੀਸੁਪਿ ਏਸੇਵ ਨਯੋ. ਅਯਂ ਪਨ ਵਿਸੇਸੋ – ਸਮਾਧਿਸ੍ਸ ਤਾਵ ਪਦਤ੍ਥਲਕ੍ਖਣਾਨਿ ਹੇਟ੍ਠਾ ਆਗਤਾਨੇਵ. ਉਪਪਤ੍ਤਿਤੋ ਇਕ੍ਖਤੀਤਿ ਉਪੇਕ੍ਖਾ. ਸਾ ਪਨਾਯਂ ਅਤ੍ਥਤੋ ਤਤ੍ਰਮਜ੍ਝਤ੍ਤੁਪੇਕ੍ਖਾਵ ਇਧ ਬੋਜ੍ਝਙ੍ਗੁਪੇਕ੍ਖਾ ਵੇਦਿਤਬ੍ਬਾ. ਦੁਸਮੁਟ੍ਠਾਪਯਨ੍ਤਿ ਸਮੁਟ੍ਠਾਪੇਤੁਂ ਉਪ੍ਪਾਦੇਤੁਂ ਅਸਕ੍ਕੁਣੇਯ੍ਯਂ. ਧਮ੍ਮਾਨਂ, ਧਮ੍ਮੇਸੁ ਵਾ ਵਿਚਯੋ ਧਮ੍ਮਵਿਚਯੋ, ਪਞ੍ਞਾਤਿ ਅਤ੍ਥੋ. ਵੀਰਸ੍ਸ ਭਾਵੋ, ਕਮ੍ਮਂ ਵਾ, ਵਿਧਿਨਾ ਵਾ ਈਰੇਤਬ੍ਬਂ ਪਵਤ੍ਤੇਤਬ੍ਬਨ੍ਤਿ ਵੀਰਿਯਂ, ਉਸ੍ਸਾਹੋ. ਪੀਣੇਤਿ ਕਾਯਂ, ਚਿਤ੍ਤਂ ਚ ਸਨ੍ਤਪ੍ਪੇਤੀਤਿ ਪੀਤਿ.
ਯਂ ਯਂ ਸਕਂ ਯਥਾਸਕਂ, ਅਤ੍ਤਨੋ ਅਤ੍ਤਨੋਤਿ ਅਤ੍ਥੋ. ਆਹਾਰਵਸੇਨਾਤਿ ਪਚ੍ਚਯਵਸੇਨ. ਭਾਵਨਾਤਿ ਉਪ੍ਪਾਦਨਾ, ਵਡ੍ਢਨਾ ਚ. ਕੁਸਲਾਕੁਸਲਾਤਿ ਕੋਸਲ੍ਲਸਮ੍ਭੂਤਟ੍ਠੇਨ ਕੁਸਲਾ, ਤਪ੍ਪਟਿਪਕ੍ਖਤੋ ਅਕੁਸਲਾ. ਯੇ ਅਕੁਸਲਾ, ਤੇ ਸਾਵਜ੍ਜਾ. ਯੇ ਕੁਸਲਾ, ਤੇ ਅਨਵਜ੍ਜਾ. ਅਕੁਸਲਾ ਹੀਨਾ, ਇਤਰੇ ਪਣੀਤਾ. ਕੁਸਲਾਪਿ ਵਾ ਹੀਨੇਹਿ ਛਨ੍ਦਾਦੀਹਿ ਆਰਦ੍ਧਾ ਹੀਨਾ, ਇਤਰੇ ਪਣੀਤਾ. ਕਣ੍ਹਾਤਿ ਕਾਲ਼ਕਾ ਚਿਤ੍ਤਸ੍ਸ ਅਪਭਸ੍ਸਰਭਾਵਕਰਣਾ, ਸੁਕ੍ਕਾਤਿ ਓਦਾਤਾ ਚਿਤ੍ਤਸ੍ਸ ਪਭਸ੍ਸਰਭਾਵਕਰਣਾ. ਕਣ੍ਹਾਭਿਜਾਤਿਹੇਤੁਤੋ ਵਾ ਕਣ੍ਹਾ, ਸੁਕ੍ਕਾਭਿਜਾਤਿਹੇਤੁਤੋ ਸੁਕ੍ਕਾ. ਤੇ ਏਵ ਸਪ੍ਪਟਿਭਾਗਾ. ਕਣ੍ਹਾ ਹਿ ਉਜੁਵਿਪਚ੍ਚਨੀਕਤਾਯ ਸੁਕ੍ਕੇਹਿ ਸਪ੍ਪਟਿਭਾਗਾ. ਤਥਾ ਸੁਕ੍ਕਾਪਿ ਇਤਰੇਹਿ. ਅਥ ਵਾ ਕਣ੍ਹਾ ਚ ਸੁਕ੍ਕਾ ਚ ਸਪ੍ਪਟਿਭਾਗਾ ਚ ਕਣ੍ਹਸੁਕ੍ਕਸਪ੍ਪਟਿਭਾਗਾ. ਸੁਖਾ ਹਿ ਵੇਦਨਾ ਦੁਕ੍ਖਾਯ ਵੇਦਨਾਯ ਸਪ੍ਪਟਿਭਾਗਾ, ਦੁਕ੍ਖਾ ਚ ਵੇਦਨਾ ਸੁਖਾਯ ਸਪ੍ਪਟਿਭਾਗਾਤਿ. ਅਨੁਪ੍ਪਨ੍ਨਸ੍ਸਾਤਿ ਅਨਿਬ੍ਬਤ੍ਤਸ੍ਸ. ਉਪ੍ਪਾਦਾਯਾਤਿ ਉਪ੍ਪਾਦਨਤ੍ਥਾਯ. ਉਪ੍ਪਨ੍ਨਸ੍ਸਾਤਿ ਨਿਬ੍ਬਤ੍ਤਸ੍ਸ. ਭਿਯ੍ਯੋਭਾਵਾਯਾਤਿ ਪੁਨਪ੍ਪੁਨਭਾਵਾਯ. ਵੇਪੁਲ੍ਲਾਯਾਤਿ ਵਿਪੁਲਭਾਵਾਯ. ਭਾਵਨਾਯਾਤਿ ਵਡ੍ਢਿਯਾ. ਪਾਰਿਪੂਰਿਯਾਤਿ ਪਰਿਪੂਰਣਤ੍ਥਾਯ.
ਤਤ੍ਥਾਤਿ ‘‘ਅਤ੍ਥਿ ਭਿਕ੍ਖਵੇ’’ਤਿਆਦਿਨਾ ਦਸ੍ਸਿਤਪਾਠੇ. ਸਭਾਵਸਾਮਞ੍ਞਲਕ੍ਖਣਪਟਿਵੇਧਵਸੇਨਾਤਿ ਏਕਜ੍ਝਂ ਕਤ੍ਵਾ ਗਹਣੇ ਅਨਵਜ੍ਜਸੁਖਵਿਪਾਕਾਦਿਕਸ੍ਸ ਵਿਸੁਂ ਵਿਸੁਂ ਪਨ ਫੁਸਨਾਦਿਕਸ੍ਸ ਸਭਾਵਲਕ੍ਖਣਸ੍ਸ, ਅਨਿਚ੍ਚਾਦਿਕਸ੍ਸ ਸਾਮਞ੍ਞਲਕ੍ਖਣਸ੍ਸ ਚ ਪਟਿਵਿਜ੍ਝਨਵਸੇਨ. ਪਵਤ੍ਤਮਨਸਿਕਾਰੋਤਿ ਕੁਸਲਾਦੀਨਂ ਤਂਤਂਸਭਾਵਲਕ੍ਖਣਾਦਿਕਸ੍ਸ ਯਾਥਾਵਤੋ ਅਵਬੁਜ੍ਝਨਵਸੇਨ ਉਪ੍ਪਨ੍ਨਜਵਨਚਿਤ੍ਤੁਪ੍ਪਾਦੋ. ਸੋ ਹਿ ਅਵਿਪਰੀਤਮਨਸਿਕਾਰਤਾਯ ‘‘ਯੋਨਿਸੋਮਨਸਿਕਾਰੋ’’ਤਿ ਵੁਤ੍ਤੋ. ਤਦਾਭੋਗਤਾਯ ਆਵਜ੍ਜਨਾਪਿ ਤਗ੍ਗਤਿਕਾਵ. ਰੁਪ੍ਪਨਲਕ੍ਖਣਾਦਿਕਮ੍ਪਿ ਇਧ ਸਾਮਞ੍ਞਲਕ੍ਖਣੇਨੇਵ ਸਙ੍ਗਹਿਤਨ੍ਤਿ ਦਟ੍ਠਬ੍ਬਂ. ਕੁਸਲਕਿਰਿਯਾਯ ਆਦਿਆਰਮ੍ਭਵਸੇਨ ਪਵਤ੍ਤਵੀਰਿਯਂ ਧਿਤਿਸਭਾਵਤਾਯ ‘‘ਧਾਤੂ’’ਤਿ ਵੁਤ੍ਤਨ੍ਤਿ ਆਹ ‘‘ਆਰਮ੍ਭਧਾਤੂਤਿ ਪਠਮਵੀਰਿਯਂ ਵੁਚ੍ਚਤੀ’’ਤਿ. ਲਦ੍ਧਾਸੇਵਨਂ ਵੀਰਿਯਂ ਬਲਪ੍ਪਤ੍ਤਂ ਹੁਤ੍ਵਾ ਪਟਿਪਕ੍ਖਂ ਵਿਧਮਤੀਤਿ ਆਹ ‘‘ਕੋਸਜ੍ਜਤੋ ਨਿਕ੍ਖਨ੍ਤਤ੍ਤਾ ਤਤੋ ਬਲਵਤਰ’’ਨ੍ਤਿ. ਅਧਿਮਤ੍ਤਾਧਿਮਤ੍ਤਤਰਾਨਂ ਪਟਿਪਕ੍ਖਧਮ੍ਮਾਨਂ ਵਿਧਮਨਸਮਤ੍ਥਂ ਪਟੁਪਟੁਤਰਾਦਿਭਾਵਪ੍ਪਤ੍ਤਂ ਹੋਤੀਤਿ ਵੁਤ੍ਤਂ ‘‘ਪਰਂ ਪਰਂ ਠਾਨਂ ਅਕ੍ਕਮਨਤੋ ਤਤੋਪਿ ਬਲਵਤਰ’’ਨ੍ਤਿ. ਤਿਟ੍ਠਤਿ ਪਵਤ੍ਤਤਿ ਏਤ੍ਥਾਤਿ ਠਾਨਿਯਾ, ਪੀਤਿਸਮ੍ਬੋਜ੍ਝਙ੍ਗਸ੍ਸ ਠਾਨਿਯਾ ਪੀਤਿਸਮ੍ਬੋਜ੍ਝਙ੍ਗਟ੍ਠਾਨਿਯਾ. ਠਾਤਬ੍ਬੋ ਵਾ ਠਾਨਿਯੋ, ਪੀਤਿਸਮ੍ਬੋਜ੍ਝਙ੍ਗੋ ਠਾਨਿਯੋ ਏਤੇਸੂਤਿ ਪੀਤਿਸਮ੍ਬੋਜ੍ਝਙ੍ਗਟ੍ਠਾਨਿਯਾ, ਅਪਰਾਪਰਂ ਵਤ੍ਤਮਾਨਾ ਪੀਤਿਸਮ੍ਬੋਜ੍ਝਙ੍ਗਸਮ੍ਪਯੁਤ੍ਤਾ ਧਮ੍ਮਾ. ਯਸ੍ਮਾ ਪਨ ਤੇਸੁ ਪੀਤਿਯੇਵ ਪੀਤਿਸਮ੍ਬੋਜ੍ਝਙ੍ਗਸ੍ਸ ਵਿਸੇਸਕਾਰਣਂ, ਤਸ੍ਮਾ ਵੁਤ੍ਤਂ ‘‘ਪੀਤਿਯਾ ਏਵ ਏਤਂ ਨਾਮ’’ਨ੍ਤਿ. ਉਪ੍ਪਾਦਕਮਨਸਿਕਾਰੋਤਿ ਯਥਾ ਮਨਸਿ ਕਰੋਤੋ ਅਨੁਪ੍ਪਨ੍ਨੋ ਪੀਤਿਸਮ੍ਬੋਜ੍ਝਙ੍ਗੋ ਉਪ੍ਪਜ੍ਜਤਿ, ਉਪ੍ਪਨ੍ਨੋ ਚ ਵਡ੍ਢਤਿ, ਤਥਾ ਪਵਤ੍ਤਮਨਸਿਕਾਰੋ.
ਪਰਿਪੁਚ੍ਛਕਤਾਤਿ ਪਰਿਯੋਗਾਹੇਤ੍ਵਾ ਪੁਚ੍ਛਕਭਾਵੋ. ਪਞ੍ਚਪਿ ਹਿ ਨਿਕਾਯੇ ਉਗ੍ਗਹੇਤ੍ਵਾ ਆਚਰਿਯੇ ਪਰਿਯੁਪਾਸਿਤ੍ਵਾ ਤਸ੍ਸ ਤਸ੍ਸ ਅਤ੍ਥਂ ਪਰਿਪੁਚ੍ਛਨ੍ਤਸ੍ਸ, ਤੇ ਵਾ ਸਹ ਅਟ੍ਠਕਥਾਯ ਪਰਿਯੋਗਾਹੇਤ੍ਵਾ ਯਂ ਯਂ ਤਤ੍ਥ ਗਣ੍ਠਿਟ੍ਠਾਨਂ, ਤਂ ਤਂ ‘‘ਇਦਂ, ਭਨ੍ਤੇ, ਕਥਂ, ਇਮਸ੍ਸ ਕੋ ਅਤ੍ਥੋ’’ਤਿ ਪੁਚ੍ਛਨ੍ਤਸ੍ਸ ਧਮ੍ਮਵਿਚਯਸਮ੍ਬੋਜ੍ਝਙ੍ਗੋ ਉਪ੍ਪਜ੍ਜਤੀਤਿ. ਵਤ੍ਥੁਵਿਸਦਕਿਰਿਯਾ ਇਨ੍ਦ੍ਰਿਯਸਮਤ੍ਤਪਟਿਪਾਦਨਾ ਸਙ੍ਖੇਪਤੋ, ਵਿਤ੍ਥਾਰਤੋ ਚ ਪਕਾਸਿਤਾ ਏਵ. ਤਤ੍ਥ ਪਨ ਸਮਾਧਿਸਂਵਤ੍ਤਨਿਯਭਾਵੇਨ ਆਗਤਾ, ਇਧ ਪਞ੍ਞਾਸਂਵਤ੍ਤਨਿਯਭਾਵੇਨ. ਯਦਗ੍ਗੇਨ ਹਿ ਸਮਾਧਿਸਂਵਤ੍ਤਨਿਕਾ, ਤਦਗ੍ਗੇਨ ਪਞ੍ਞਾਸਂਵਤ੍ਤਨਿਕਾ ਸਮਾਧਿਸ੍ਸ ਞਾਣਪਚ੍ਚੁਪਟ੍ਠਾਨਤੋ. ‘‘ਸਮਾਹਿਤੋ ਯਥਾਭੂਤਂ ਪਜਾਨਾਤੀ’’ਤਿ (ਸਂ. ਨਿ. ੪.੯੯; ੫.੧੦੭੧) ਵੁਤ੍ਤਂ. ਦੁਪ੍ਪਞ੍ਞਪੁਗ੍ਗਲਪਰਿਵਜ੍ਜਨਾ ਨਾਮ ਦੁਪ੍ਪਞ੍ਞਾਨਂ ਮਨ੍ਦਬੁਦ੍ਧੀਨਂ ਭਤ੍ਤਨਿਕ੍ਖਿਤ੍ਤਕਾਕਮਂਸਨਿਕ੍ਖਿਤ੍ਤਸੁਨਖਸਦਿਸਾਨਂ ਮੋਮੂਹਪੁਗ੍ਗਲਾਨਂ ਦੂਰਤੋ ਪਰਿਚ੍ਚਜਨਾ. ਪਞ੍ਞਵਨ੍ਤਪੁਗ੍ਗਲਸੇਵਨਾ ਨਾਮ ਪਞ੍ਞਾਯ ਕਤਾਧਿਕਾਰਾਨਂ ਸਚ੍ਚਪਟਿਚ੍ਚਸਮੁਪ੍ਪਾਦਾਦੀਸੁ ਕੁਸਲਾਨਂ ਅਰਿਯਾਨਂ, ਵਿਪਸ੍ਸਨਾਕਮ੍ਮਿਕਾਨਂ ਵਾ ਮਹਾਪਞ੍ਞਾਨਂ ਕਾਲੇਨ ਕਾਲਂ ਉਪਸਙ੍ਕਮਨਂ. ਗਮ੍ਭੀਰਞਾਣਚਰਿਯਪਚ੍ਚਵੇਕ੍ਖਣਾਤਿ ਗਮ੍ਭੀਰਞਾਣੇਹਿ ਚਰਿਤਬ੍ਬਾਨਂ ਖਨ੍ਧਾਯਤਨਧਾਤਾਦੀਨਂ, ਸਚ੍ਚਪਚ੍ਚਯਾਕਾਰਾਦਿਦੀਪਨਾਨਂ ਵਾ ਸੁਞ੍ਞਤਾਪਟਿਸਂਯੁਤ੍ਤਾਨਂ ਸੁਤ੍ਤਨ੍ਤਾਨਂ ਪਚ੍ਚਵੇਕ੍ਖਣਾ. ਤਦਧਿਮੁਤ੍ਤਤਾਤਿ ਪਞ੍ਞਾਧਿਮੁਤ੍ਤਤਾ, ਪਞ੍ਞਾਯ ਨਿਨ੍ਨਪੋਣਪਬ੍ਭਾਰਤਾਤਿ ਅਤ੍ਥੋ.
ਅਪਾਯਾਦੀਤਿ ਆਦਿ-ਸਦ੍ਦੇਨ ਜਾਤਿਆਦਿਂ ਅਤੀਤੇ ਵਟ੍ਟਮੂਲਕਂ ਦੁਕ੍ਖਂ, ਅਨਾਗਤੇ ਵਟ੍ਟਮੂਲਕਂ ਦੁਕ੍ਖਂ, ਪਚ੍ਚੁਪ੍ਪਨ੍ਨੇ ਆਹਾਰਪਰਿਯੇਟ੍ਠਿਮੂਲਕਞ੍ਚ ਦੁਕ੍ਖਂ ਸਙ੍ਗਣ੍ਹਾਤਿ. ਵੀਰਿਯਾਯਤ੍ਤਸ੍ਸ ਲੋਕਿਯਲੋਕੁਤ੍ਤਰਵਿਸੇਸਸ੍ਸ ਅਧਿਗਮੋ ਏਵ ਆਨਿਸਂਸੋ, ਤਸ੍ਸ ਦਸ੍ਸਨਸੀਲਤਾ ਵੀਰਿਯਾਯਤ੍ਤ…ਪੇ… ਦਸ੍ਸਿਤਾ. ਸਪੁਬ੍ਬਭਾਗੋ ਨਿਬ੍ਬਾਨਗਾਮਿਮਗ੍ਗੋ ਗਮਨਵੀਥਿ ਗਨ੍ਤਬ੍ਬਾ ਪਟਿਪਜ੍ਜਿਤਬ੍ਬਾ ਪਟਿਪਦਾਤਿ ਕਤ੍ਵਾ. ਦਾਯਕਾਨਂ ਮਹਪ੍ਫਲਭਾਵਕਰਣੇਨ ਪਿਣ੍ਡਾਪਚਾਯਨਤਾਤਿ ਪਚ੍ਚਯਦਾਯਕਾਨਂ ਅਤ੍ਤਨਿ ਕਾਰਸ੍ਸ ਅਤ੍ਤਨੋ ਸਮ੍ਮਾਪਟਿਪਤ੍ਤਿਯਾ ਮਹਪ੍ਫਲਕਾਰਭਾਵਸ੍ਸ ਕਰਣੇਨ ਪਿਣ੍ਡਸ੍ਸ ਭਿਕ੍ਖਾਯ ਪਟਿਪੂਜਨਾ. ਇਤਰਥਾਤਿ ਆਮਿਸਪੂਜਾਯ. ਕੁਸੀਤਪੁਗ੍ਗਲਪਰਿਵਜ੍ਜਨਤਾਤਿ ਅਲਸਾਨਂ ਭਾਵਨਾਯ ਨਾਮਮਤ੍ਤਮ੍ਪਿ ਅਜਾਨਨ੍ਤਾਨਂ ਕਾਯਦਲ਼੍ਹੀਬਹੁਲਾਨਂ ਯਾਵਦਤ੍ਥਂ ਭੁਞ੍ਜਿਤ੍ਵਾ ਸੇਯ੍ਯਸੁਖਾਦਿਅਨੁਯੁਞ੍ਜਨਕਾਨਂ ਤਿਰਚ੍ਛਾਨਕਥਿਕਾਨਂ ਪੁਗ੍ਗਲਾਨਂ ਦੂਰਤੋ ਪਰਿਚ੍ਚਜਨਾ. ਆਰਦ੍ਧਵੀਰਿਯਪੁਗ੍ਗਲਸੇਵਨਤਾਤਿ ‘‘ਦਿਵਸਂ ਚਙ੍ਕਮੇਨ ਨਿਸਜ੍ਜਾਯਾ’’ਤਿਆਦਿਨਾ (ਵਿਭ. ੫੧੯; ਅ. ਨਿ. ੩.੧੬) ਭਾਵਨਾਰਮ੍ਭਵਸੇਨ ਆਰਦ੍ਧਵੀਰਿਯਾਨਂ ਦਲ਼੍ਹਪਰਕ੍ਕਮਾਨਂ ਪੁਗ੍ਗਲਾਨਂ ਕਾਲੇਨ ਕਾਲਂ ਉਪਸਙ੍ਕਮਨਾ. ਸਮ੍ਮਪ੍ਪਧਾਨਪਚ੍ਚਵੇਕ੍ਖਣਤਾਤਿ ਚਤੁਬ੍ਬਿਧਸਮ੍ਮਪ੍ਪਧਾਨਾਨੁਭਾਵਸ੍ਸ ਪਚ੍ਚਵੇਕ੍ਖਣਤਾ. ਤਦਧਿਮੁਤ੍ਤਤਾਤਿ ਤਸ੍ਮਿਂ ਵੀਰਿਯਸਮ੍ਬੋਜ੍ਝਙ੍ਗੇ ਅਧਿਮੁਤ੍ਤਿ ਸਬ੍ਬਿਰਿਯਾਪਥੇਸੁ ਨਿਨ੍ਨਪੋਣਪਬ੍ਭਾਰਤਾ. ਏਤ੍ਥ ਚ ਥਿਨਮਿਦ੍ਧਵਿਨੋਦਨਕੁਸੀਤਪੁਗ੍ਗਲਪਰਿਵਜ੍ਜਨਆਰਦ੍ਧਵੀਰਿਯਪੁਗ੍ਗਲਸੇਵਨਤਦਧਿਮੁਤ੍ਤਤਾ ਪਟਿਪਕ੍ਖਵਿਧਮਨਪਚ੍ਚਯੂਪਸਂਹਾਰਵਸੇਨ, ਅਪਾਯਾਦਿਭਯਪਚ੍ਚਵੇਕ੍ਖਣਾਦਯੋ ਸਮੁਤ੍ਤੇਜਨਵਸੇਨ ਵੀਰਿਯਸਮ੍ਬੋਜ੍ਝਙ੍ਗਸ੍ਸ ਉਪ੍ਪਾਦਕਾ ਦਟ੍ਠਬ੍ਬਾ.
ਬੁਦ੍ਧਾਦੀਸੁ ਪਸਾਦਸਿਨੇਹਾਭਾਵੇਨ ਥੁਸਖਰਹਦਯਾ ਲੂਖਪੁਗ੍ਗਲਾ, ਤਬ੍ਬਿਪਰਿਯਾਯੇਨ ਸਿਨਿਦ੍ਧਪੁਗ੍ਗਲਾ ਵੇਦਿਤਬ੍ਬਾ. ਬੁਦ੍ਧਾਦੀਨਂ ਗੁਣਪਰਿਦੀਪਨਾ ਸਮ੍ਪਸਾਦਨੀਯਸੁਤ੍ਤਾਦਯੋ (ਦੀ. ਨਿ. ੩.੧੪੧ ਆਦਯੋ) ਪਸਾਦਨੀਯਸੁਤ੍ਤਨ੍ਤਾ. ਇਮੇਹਿ ਆਕਾਰੇਹੀਤਿ ਯਥਾਵੁਤ੍ਤੇਹਿ ਕੁਸਲਾਦੀਨਂ ਸਭਾਵਸਾਮਞ੍ਞਲਕ੍ਖਣਪਟਿਵਿਜ੍ਝਨਾਦਿਆਕਾਰੇਹਿ ਚੇਵ ਪਰਿਪੁਚ੍ਛਕਤਾਦਿਆਕਾਰੇਹਿ ਚ. ਏਤੇ ਧਮ੍ਮੇਤਿ ਏਤੇ ਕੁਸਲਾਦੀਸੁ ਯੋਨਿਸੋਮਨਸਿਕਾਰਾਦਿਕੇ ਚੇਵ ਧਮ੍ਮਤ੍ਥਞ੍ਞੁਤਾਦਿਕੇ ਚ.
੬੫. ਅਚ੍ਚਾਰਦ੍ਧਵੀਰਿਯਤਾਦੀਹੀਤਿ ਅਤਿਵਿਯ ਪਗ੍ਗਹਿਤਵੀਰਿਯਤਾਦੀਹਿ. ਆਦਿ-ਸਦ੍ਦੇਨ ਸਂਵੇਜਨਪਮੋਦਨਾਦਿਂ ਸਙ੍ਗਣ੍ਹਾਤਿ. ਉਦ੍ਧਤਨ੍ਤਿ ਸਮਾਧਿਆਦੀਨਂ ਮਨ੍ਦਤਾਯ ਅਵੂਪਸਨ੍ਤਂ. ਦੁਵੂਪਸਮਯਨ੍ਤਿ ਵੂਪਸਮੇਤੁਂ ਸਮਾਧਾਤੁਂ ਅਸਕ੍ਕੁਣੇਯ੍ਯਂ.
ਤਂ ਆਕਾਰਂ ਸਲ੍ਲਕ੍ਖੇਤ੍ਵਾਤਿ ਯੇਨਾਕਾਰੇਨ ਅਸ੍ਸ ਯੋਗਿਨੋ ਪਸ੍ਸਦ੍ਧਿ ਸਮਾਧਿ ਉਪੇਕ੍ਖਾਤਿ ਇਮੇ ਪਸ੍ਸਦ੍ਧਿਆਦਯੋ ਧਮ੍ਮਾ ਪੁਬ੍ਬੇ ਯਥਾਰਹਂ ਤਸ੍ਮਿਂ ਤਸ੍ਮਿਂ ਕਾਲੇ ਉਪ੍ਪਨ੍ਨਪੁਬ੍ਬਾ, ਤਂ ਚਿਤ੍ਤਤਂਸਮ੍ਪਯੁਤ੍ਤਧਮ੍ਮਾਨਂ ਪਸ੍ਸਦ੍ਧਾਕਾਰਂ, ਸਮਾਹਿਤਾਕਾਰਂ, ਅਜ੍ਝੁਪੇਕ੍ਖਿਤਾਕਾਰਞ੍ਚ ਉਪਲਕ੍ਖੇਤ੍ਵਾ ਉਪਧਾਰੇਤ੍ਵਾ. ਤੀਸੁਪਿ ਪਦੇਸੂਤਿ ‘‘ਅਤ੍ਥਿ, ਭਿਕ੍ਖਵੇ, ਕਾਯਪ੍ਪਸ੍ਸਦ੍ਧੀ’’ਤਿਆਦਿਨਾ ਆਗਤੇਸੁ ਤੀਸੁਪਿ ਵਾਕ੍ਯੇਸੁ, ਤੇਹਿ ਵਾ ਪਕਾਸਿਤੇਸੁ ਤੀਸੁ ਧਮ੍ਮਕੋਟ੍ਠਾਸੇਸੁ. ਯਥਾਸਮਾਹਿਤਾਕਾਰਂ ਸਲ੍ਲਕ੍ਖੇਤ੍ਵਾ ਗਯ੍ਹਮਾਨੋ ਸਮਥੋ ਏਵ ਸਮਥਨਿਮਿਤ੍ਤਨ੍ਤਿ ਆਹ ‘‘ਸਮਥਨਿਮਿਤ੍ਤਨ੍ਤਿ ਚ ਸਮਥਸ੍ਸੇਵੇਤਮਧਿਵਚਨ’’ਨ੍ਤਿ. ਨਾਨਾਰਮ੍ਮਣੇ ਪਰਿਬ੍ਭਮਨੇਨ ਵਿਵਿਧਂ ਅਗ੍ਗਂ ਏਤਸ੍ਸਾਤਿ ਬ੍ਯਗ੍ਗੋ, ਵਿਕ੍ਖੇਪੋ. ਤਥਾ ਹਿ ਸੋ ਅਨਵਟ੍ਠਾਨਰਸੋ, ਭਨ੍ਤਤਾਪਚ੍ਚੁਪਟ੍ਠਾਨੋ ਚ ਵੁਤ੍ਤੋ. ਏਕਗ੍ਗਤਾਭਾਵਤੋ ਬ੍ਯਗ੍ਗਪਟਿਪਕ੍ਖੋਤਿ ਅਬ੍ਯਗ੍ਗੋ, ਸਮਾਧਿ. ਸੋ ਏਵ ਨਿਮਿਤ੍ਤਨ੍ਤਿ ਪੁਬ੍ਬੇ ਵਿਯ ਵਤ੍ਤਬ੍ਬਂ. ਤੇਨਾਹ ‘‘ਅਵਿਕ੍ਖੇਪਟ੍ਠੇਨ ਚ ਤਸ੍ਸੇਵ ਅਬ੍ਯਗ੍ਗਨਿਮਿਤ੍ਤਨ੍ਤਿ ਅਧਿਵਚਨ’’ਨ੍ਤਿ.
ਸਰੀਰਾਵਤ੍ਥਂ ਞਤ੍ਵਾ ਮਤ੍ਤਸੋ ਪਰਿਭੁਤ੍ਤੋ ਪਣੀਤਾਹਾਰੋ ਕਾਯਲਹੁਤਾਦੀਨਂ ਸਮੁਟ੍ਠਾਪਨੇਨ ਪਸ੍ਸਦ੍ਧਿਯਾ ਪਚ੍ਚਯੋ ਹੋਤਿ, ਤਥਾ ਉਤੁਸਪ੍ਪਾਯਂ, ਇਰਿਯਾਪਥਸਪ੍ਪਾਯਞ੍ਚ ਸੇਵਿਤਂ, ਪਯੋਗੋ ਚ ਕਾਯਿਕੋ ਪਵਤ੍ਤਿਤੋਤਿ ਆਹ ‘‘ਪਣੀਤਭੋਜਨਸੇਵਨਤਾ’’ਤਿਆਦਿ. ਪਯੋਗਸਮਤਾਦੀਨਂ ਅਭਾਵੇਨ ਸਦਰਥਕਾਯਚਿਤ੍ਤਾ ਪੁਗ੍ਗਲਾ ਸਾਰਦ੍ਧਪੁਗ੍ਗਲਾ. ਵੁਤ੍ਤਵਿਪਰਿਯਾਯੇਨ ਪਸ੍ਸਦ੍ਧਕਾਯਾ ਪੁਗ੍ਗਲਾ ਵੇਦਿਤਬ੍ਬਾ.
ਨਿਰਸ੍ਸਾਦਸ੍ਸਾਤਿ ਭਾਵਨਸ੍ਸਾਦਰਹਿਤਸ੍ਸ. ਭਾਵਨਾ ਹਿ ਵੀਥਿਪਟਿਪਨ੍ਨਾ ਪੁਬ੍ਬੇਨਾਪਰਂ ਵਿਸੇਸਵਤੀ ਪਵਤ੍ਤਮਾਨਾ ਚਿਤ੍ਤਸ੍ਸ ਅਸ੍ਸਾਦਂ ਉਪਸਮਸੁਖਂ ਆਵਹਤਿ, ਤਦਭਾਵਤੋ ਨਿਰਸ੍ਸਾਦਂ ਚਿਤ੍ਤਂ ਹੋਤਿ. ਸਦ੍ਧਾਸਂਵੇਗਵਸੇਨਾਤਿ ਸਦ੍ਧਾਵਸੇਨ, ਸਂਵੇਗਵਸੇਨ ਚ. ਸਮ੍ਪਹਂਸਨਤਾਤਿ ਸਮ੍ਮਦੇਵ ਪਹਂਸਨਤਾ ਸਂਵੇਜਨਪੁਬ੍ਬਕਪਸਾਦੁਪ੍ਪਾਦਨੇਨ ਭਾਵਨਾ ਚਿਤ੍ਤਸ੍ਸ ਤੋਸਨਾ. ਸਮ੍ਮਾਪਵਤ੍ਤਸ੍ਸਾਤਿ ਲੀਨੁਦ੍ਧਚ੍ਚਵਿਰਹੇਨ, ਸਮਥਵੀਥਿਪਟਿਪਤ੍ਤਿਯਾ ਚ ਸਮਂ, ਸਵਿਸੇਸਞ੍ਚ ਪਵਤ੍ਤਿਯਾ ਸਮ੍ਮਦੇਵ ਪਵਤ੍ਤਸ੍ਸ ਭਾਵਨਾਚਿਤ੍ਤਸ੍ਸ. ਅਜ੍ਝੁਪੇਕ੍ਖਨਤਾਤਿ ਪਗ੍ਗਹਨਿਗ੍ਗਹਸਮ੍ਪਹਂਸਨੇਸੁ ਅਬ੍ਯਾਵਟਤਾ. ਝਾਨਵਿਮੋਕ੍ਖਪਚ੍ਚਵੇਕ੍ਖਣਤਾਤਿ ਪਠਮਾਦੀਨਿ ਝਾਨਾਨਿ ਪਚ੍ਚਨੀਕਧਮ੍ਮੇਹਿ ਸੁਟ੍ਠੁ ਵਿਮੁਤ੍ਤਤਾਦਿਨਾ ਤੇਯੇਵ ਵਿਮੋਕ੍ਖਾ ਤੇਸਂ ‘‘ਏਵਂ ਭਾਵਨਾ, ਏਵਂ ਸਮਾਪਜ੍ਜਨਾ, ਏਵਂ ਅਧਿਟ੍ਠਾਨਂ, ਏਵਂ ਵੁਟ੍ਠਾਨਂ, ਏਵਂ ਸਂਕਿਲੇਸੋ, ਏਵਂ ਵੋਦਾਨ’’ਨ੍ਤਿ ਪਤਿ ਪਤਿ ਅਵੇਕ੍ਖਣਾ.
ਸਤ੍ਤਮਜ੍ਝਤ੍ਤਤਾਤਿ ਸਤ੍ਤੇਸੁ ਪਿਯਟ੍ਠਾਨਿਯੇਸੁਪਿ ਗਹਟ੍ਠਪਬ੍ਬਜਿਤੇਸੁ ਮਜ੍ਝਤ੍ਤਾਕਾਰੋ ਅਜ੍ਝੁਪੇਕ੍ਖਨਾ. ਸਙ੍ਖਾਰਮਜ੍ਝਤ੍ਤਤਾਤਿ ਅਜ੍ਝਤ੍ਤਿਕੇਸੁ ਚਕ੍ਖਾਦੀਸੁ, ਬਾਹਿਰੇਸੁ ਪਤ੍ਤਚੀਵਰਾਦੀਸੁ ਮਜ੍ਝਤ੍ਤਾਕਾਰੋ ਅਜ੍ਝੁਪੇਕ੍ਖਨਾ. ਸਤ੍ਤਸਙ੍ਖਾਰਾਨਂ ਮਮਾਯਨਂ ਸਤ੍ਤਸਙ੍ਖਾਰਕੇਲਾਯਨਂ. ਇਮੇਹਾਕਾਰੇਹੀਤਿ ਇਮੇਹਿ ਯਥਾਵੁਤ੍ਤੇਹਿ ਕਾਯਚਿਤ੍ਤਾਨਂ ਪਸ੍ਸਦ੍ਧਾਕਾਰਸਲ੍ਲਕ੍ਖਣਾਦਿਆਕਾਰੇਹਿ ਚੇਵ ਸਪ੍ਪਾਯਾਹਾਰਸੇਵਨਾਦਿਆਕਾਰੇਹਿ ਚ. ਏਤੇ ਧਮ੍ਮੇਤਿ ਏਤੇ ਪਸ੍ਸਦ੍ਧਿਆਦਿਧਮ੍ਮੇ.
੬੬. ਪਞ੍ਞਾਪਯੋਗਮਨ੍ਦਤਾਯਾਤਿ ਪਞ੍ਞਾਬ੍ਯਾਪਾਰਸ੍ਸ ਅਪ੍ਪਭਾਵੇਨ. ਯਥਾ ਹਿ ਦਾਨਸੀਲਾਨਿ ਅਲੋਭਾਦੋਸਪ੍ਪਧਾਨਾਨਿ, ਏਵਂ ਭਾਵਨਾ ਅਮੋਹਪ੍ਪਧਾਨਾ ਵਿਸੇਸਤੋ ਅਪ੍ਪਨਾਵਹਾ. ਤਤ੍ਥ ਯਦਾ ਪਞ੍ਞਾ ਨ ਬਲਵਤੀ ਹੋਤਿ, ਤਦਾ ਭਾਵਨਾਚਿਤ੍ਤਸ੍ਸ ਅਨਭਿਸਙ੍ਖਤੋ ਵਿਯ ਆਹਾਰੋ ਪੁਰਿਸਸ੍ਸ ਅਭਿਰੁਚਿਂ ਨ ਜਨੇਤਿ, ਤੇਨ ਤਂ ਨਿਰਸ੍ਸਾਦਂ ਹੋਤਿ. ਯਦਾ ਚ ਭਾਵਨਾ ਪੁਬ੍ਬੇਨਾਪਰਂ ਵਿਸੇਸਾਵਹਾ ਨ ਹੋਤਿ ਸਮ੍ਮਦੇਵ ਅਵੀਥਿਪਟਿਪਤ੍ਤਿਯਾ, ਤਦਾ ਉਪਸਮਸੁਖਸ੍ਸ ਅਲਾਭੇਨ ਚਿਤ੍ਤਂ ਨਿਰਸ੍ਸਾਦਂ ਹੋਤਿ. ਤਦੁਭਯਂ ਸਨ੍ਧਾਯਾਹ ‘‘ਪਞ੍ਞਾਪਯੋਗਮਨ੍ਦਤਾਯਾ’’ਤਿਆਦਿ. ਨਨ੍ਤਿ ਚਿਤ੍ਤਂ. ਜਾਤਿਜਰਾਬ੍ਯਾਧਿਮਰਣਾਨਿ ਯਥਾਰਹਂ ਸੁਗਤਿਯਂ, ਦੁਗ੍ਗਤਿਯਞ੍ਚ ਹੋਨ੍ਤੀਤਿ ਤਦਞ੍ਞਮੇਵ ਪਞ੍ਚਵਿਧਬਨ੍ਧਨਾਦਿਖੁਪ੍ਪਿਪਾਸਾਦਿਅਞ੍ਞਮਞ੍ਞਵਿਬਾਧਨਾਦਿਹੇਤੁਕਂ ਅਪਾਯਦੁਕ੍ਖਂ ਦਟ੍ਠਬ੍ਬਂ. ਤਯਿਦਂ ਸਬ੍ਬਂ ਤੇਸਂ ਤੇਸਂ ਸਤ੍ਤਾਨਂ ਪਚ੍ਚੁਪ੍ਪਨ੍ਨਭਵਨਿਸ੍ਸਿਤਂ ਗਹਿਤਨ੍ਤਿ ਅਤੀਤੇ, ਅਨਾਗਤੇ ਚ ਕਾਲੇ ਵਟ੍ਟਮੂਲਕਦੁਕ੍ਖਾਨਿ ਵਿਸੁਂ ਗਹਿਤਾਨਿ. ਯੇ ਪਨ ਸਤ੍ਤਾ ਆਹਾਰੂਪਜੀਵਿਨੋ, ਤਤ੍ਥ ਚ ਉਟ੍ਠਾਨਫਲੂਪਜੀਵਿਨੋ, ਤੇਸਂ ਅਞ੍ਞੇਹਿ ਅਸਾਧਾਰਣਂ ਜੀਵਿਤਦੁਕ੍ਖਂ ਅਟ੍ਠਮਂ ਸਂਵੇਗਵਤ੍ਥੁ ਵੁਤ੍ਤਨ੍ਤਿ ਦਟ੍ਠਬ੍ਬਂ.
ਅਸ੍ਸਾਤਿ ਚਿਤ੍ਤਸ੍ਸ. ਅਲੀਨਨ੍ਤਿਆਦੀਸੁ ਕੋਸਜ੍ਜਪਕ੍ਖਿਯਾਨਂ ਧਮ੍ਮਾਨਂ ਅਨਧਿਮਤ੍ਤਤਾਯ ਅਲੀਨਂ. ਉਦ੍ਧਚ੍ਚਪਕ੍ਖਿਕਾਨਂ ਧਮ੍ਮਾਨਂ ਅਨਧਿਮਤ੍ਤਤਾਯ ਅਨੁਦ੍ਧਤਂ. ਪਞ੍ਞਾਪਯੋਗਸਮ੍ਪਤ੍ਤਿਯਾ, ਉਪਸਮਸੁਖਾਧਿਗਮੇਨ ਚ ਅਨਿਰਸ੍ਸਾਦਂ. ਪੁਬ੍ਬੇਨਾਪਰਂ ਸਵਿਸੇਸਂ ਤਤੋ ਏਵ ਆਰਮ੍ਮਣੇ ਸਮਪ੍ਪਵਤ੍ਤਂ, ਸਮਥਵੀਥਿਪਟਿਪਨ੍ਨਞ੍ਚ. ਤਤ੍ਥ ਅਲੀਨਤਾਯ ਪਗ੍ਗਹੇ, ਅਨੁਦ੍ਧਤਤਾਯ ਨਿਗ੍ਗਹੇ, ਅਨਿਰਸ੍ਸਾਦਤਾਯ ਸਮ੍ਪਹਂਸਨੇ ਨ ਬ੍ਯਾਪਾਰਂ ਆਪਜ੍ਜਤਿ. ਅਲੀਨਾਨੁਦ੍ਧਤਤਾਯ ਹਿ ਆਰਮ੍ਮਣੇ ਸਮਪ੍ਪਵਤ੍ਤਂ ਅਨਿਰਸ੍ਸਾਦਤਾਯ ਸਮਥਵੀਥਿਪਟਿਪਨ੍ਨਂ. ਸਮਪ੍ਪਵਤ੍ਤਿਯਾ ਵਾ ਅਲੀਨਂ ਅਨੁਦ੍ਧਤਂ, ਸਮਥਵੀਥਿਪਟਿਪਤ੍ਤਿਯਾ ਅਨਿਰਸ੍ਸਾਦਨ੍ਤਿ ਦਟ੍ਠਬ੍ਬਂ.
ਨੇਕ੍ਖਮ੍ਮਪਟਿਪਦਨ੍ਤਿ ਝਾਨਪਟਿਪਤ੍ਤਿਂ. ਸਮਾਧਿਅਧਿਮੁਤ੍ਤਤਾਤਿ ਸਮਾਧਿਨਿਬ੍ਬਤ੍ਤਨੇ ਝਾਨਾਧਿਗਮੇ ਯੁਤ੍ਤਪ੍ਪਯੁਤ੍ਤਤਾ. ਸਾ ਪਨ ਯਸ੍ਮਾ ਸਮਾਧਿਂ ਗਰੁਂ ਕਤ੍ਵਾ ਤਤ੍ਥ ਨਿਨ੍ਨਪੋਣਪਬ੍ਭਾਰਭਾਵੇਨ ਪਵਤ੍ਤਿਯਾ ਹੋਤਿ, ਤਸ੍ਮਾ ‘‘ਸਮਾਧਿਗਰੂ’’ਤਿਆਦਿ ਵੁਤ੍ਤਂ.
੬੭. ਪਟਿਲਦ੍ਧੇ ਨਿਮਿਤ੍ਤਸ੍ਮਿਂ ਏਵਂ ਹਿ ਸਮ੍ਪਾਦਯਤੋ ਅਪ੍ਪਨਾਕੋਸਲ੍ਲਂ ਇਮਂ ਅਪ੍ਪਨਾ ਸਮ੍ਪਵਤ੍ਤਤੀਤਿ ਸਮ੍ਬਨ੍ਧੋ. ਸਾਤਿ ਅਪ੍ਪਨਾ. ਹਿਤ੍ਵਾ ਹੀਤਿ ਹਿ-ਸਦ੍ਦੋ ਹੇਤੁਅਤ੍ਥੋ. ਯਸ੍ਮਾ ਠਾਨਮੇਤਂ ਨ ਵਿਜ੍ਜਤਿ, ਤਸ੍ਮਾ ਚਿਤ੍ਤਪ੍ਪਵਤ੍ਤਿਆਕਾਰਂ ਭਾਵਨਾਚਿਤ੍ਤਸ੍ਸ ਲੀਨੁਦ੍ਧਤਾਦਿਵਸੇਨ ਪਵਤ੍ਤਿਆਕਾਰਂ ਸਲ੍ਲਕ੍ਖਯਂ ਉਪਧਾਰੇਨ੍ਤੋ. ਸਮਤਂ ਵੀਰਿਯਸ੍ਸੇਵ ਵੀਰਿਯਸ੍ਸ ਸਮਾਧਿਨਾ ਸਮਰਸਤਂਯੇਵ ਯੋਜਯੇਥ. ਕਥਂ ਪਨ ਯੋਜਯੇਥਾਤਿ ਆਹ ‘‘ਈਸਕਮ੍ਪੀ’’ਤਿਆਦਿ. ਤਤ੍ਥ ਲਯਨ੍ਤਿ ਲੀਨਭਾਵਂ, ਸਙ੍ਕੋਚਨ੍ਤਿ ਅਤ੍ਥੋ. ਯਨ੍ਤਨ੍ਤਿ ਗਚ੍ਛਨ੍ਤਂ, ਪਗ੍ਗਣ੍ਹੇਥੇਵ ਸਮਭਾਵਾਯਾਤਿ ਅਧਿਪ੍ਪਾਯੋ. ਤੇਨਾਹ ‘‘ਅਚ੍ਚਾਰਦ੍ਧਂ ਨਿਸੇਧੇਤ੍ਵਾ ਸਮਮੇਵ ਪਵਤ੍ਤਯੇ’’ਤਿ. ਕਥਂ ਪਨ ਸਮਮੇਵ ਪਵਤ੍ਤਯੇਤਿ ਆਹ ‘‘ਰੇਣੁਮ੍ਹੀ’’ਤਿਆਦਿ. ਯਥਾਤਿ ਰੇਣੁਆਦੀਸੁ ਯਥਾ ਮਧੁਕਰਾਦੀਨਂ ਪਵਤ੍ਤਿ ਉਪਮਾਭਾਵੇਨ ਅਟ੍ਠਕਥਾਯਂ ਸਮ੍ਮਵਣ੍ਣਿਤਾ, ਏਵਂ ਲੀਨੁਦ੍ਧਤਭਾਵੇਹਿ ਮੋਚਯਿਤ੍ਵਾ ਵੀਰਿਯਸਮਤਾਯੋਜਨੇਨ ਨਿਮਿਤ੍ਤਾਭਿਮੁਖਂ ਮਾਨਸਂ ਪਟਿਪਾਦਯੇ ਪਟਿਭਾਗਨਿਮਿਤ੍ਤਾਭਿਮੁਖਂ ਭਾਵਨਾਚਿਤ੍ਤਂ ਸਮ੍ਪਾਦੇਯ੍ਯਾਤਿ ਅਤ੍ਥੋ.
ਨਿਮਿਤ੍ਤਾਭਿਮੁਖਪਟਿਪਾਦਨਵਣ੍ਣਨਾ
੬੮. ਤਤ੍ਰਾਤਿ ਤਸ੍ਮਿਂ ‘‘ਰੇਣੁਮ੍ਹੀ’’ਤਿਆਦਿਨਾ ਵੁਤ੍ਤਗਾਥਾਦ੍ਵਯੇ. ਅਤ੍ਥਦੀਪਨਾ ਉਪਮੂਪਮੇਯ੍ਯਤ੍ਥਵਿਭਾਵਨਾ. ਅਛੇਕੋਤਿ ਅਕੁਸਲੋ. ਪਕ੍ਖਨ੍ਦੋਤਿ ਧਾਵਿਤੁਂ ਆਰਦ੍ਧੋ. ਵਿਕਸਨਕ੍ਖਣੇਯੇਵ ਸਰਸਂ ਕੁਸੁਮਪਰਾਗਂ ਹੋਤਿ, ਪਚ੍ਛਾ ਵਾਤਾਦੀਹਿ ਪਰਿਪਤਤਿ, ਵਿਰਸਂ ਵਾ ਹੋਤਿ. ਤਸ੍ਮਾ ਨਿਵਤ੍ਤਨੇ ਰੇਣੁ ਖੀਯਤੀਤਿ ਆਹ ‘‘ਖੀਣੇ ਰੇਣੁਮ੍ਹਿ ਸਮ੍ਪਾਪੁਣਾਤੀ’’ਤਿ. ਪੁਪ੍ਫਰਾਸਿਨ੍ਤਿ ਰੁਕ੍ਖਸਾਖਾਸੁ ਨਿਸ੍ਸਿਤਂ ਪੁਪ੍ਫਸਞ੍ਚਯਂ.
ਸਲ੍ਲਕਤ੍ਤਅਨ੍ਤੇਵਾਸਿਕੇਸੂਤਿ ਸਲ੍ਲਕਤ੍ਤਆਚਰਿਯਸ੍ਸ ਅਨ੍ਤੇਵਾਸਿਕੇਸੁ. ਉਦਕਥਾਲਗਤੇਤਿ ਉਦਕਥਾਲਿਯਂ ਠਪਿਤੇ. ਸਤ੍ਥਕਮ੍ਮਨ੍ਤਿ ਸਿਰਾਵੇਧਨਾਦਿਸਤ੍ਥਕਮ੍ਮਂ. ਫੁਸਿਤੁਮ੍ਪਿ ਉਪ੍ਪਲਪਤ੍ਤਨ੍ਤਿ ਸਮ੍ਬਨ੍ਧੋ. ਸਮੇਨਾਤਿ ਪੁਰਿਮਕਾ ਵਿਯ ਗਰੁਂ, ਮਨ੍ਦਞ੍ਚ ਪਯੋਗਂ ਅਕਤ੍ਵਾ ਸਮਪ੍ਪਮਾਣੇਨ ਪਯੋਗੇਨ. ਤਤ੍ਥਾਤਿ ਉਪ੍ਪਲਪਤ੍ਤੇ. ਪਰਿਯੋਦਾਤਸਿਪ੍ਪੋਤਿ ਸੁਵਿਸੁਦ੍ਧਸਿਪ੍ਪੋ ਨਿਪ੍ਫਨ੍ਨਸਿਪ੍ਪੋ.
ਮਕ੍ਕਟਕਸੁਤ੍ਤਨ੍ਤਿ ਲੂਤਸੁਤ੍ਤਂ. ਨਿਯਾਮਕੋ ਨਾਵਾਸਾਰਥੀ. ਲਙ੍ਕਾਰਨ੍ਤਿ ਕਿਲਞ੍ਜਾਦਿਮਯਂ ਨਾਵਾਕਟਸਾਰਕਂ. ਤੇਲੇਨ ਅਛਡ੍ਡੇਨ੍ਤੋ ਨਾਲ਼ਿਂ ਪੂਰੇਤੀਤਿ ਸਰਾਵਾਦਿਗਤੇਨ ਤੇਲੇਨ ਅਛਡ੍ਡੇਨ੍ਤੋ ਸੁਖੁਮਚ੍ਛਿਦ੍ਦਕਂ ਤੇਲਨਾਲ਼ਿਂ ਪੂਰੇਤਿ. ਏਵਮੇਵਾਤਿ ਯਥਾ ਤੇ ਆਦਿਤੋ ਵੁਤ੍ਤਮਧੁਕਰਸਲ੍ਲਕਤ੍ਤਅਨ੍ਤੇਵਾਸਿਸੁਤ੍ਤਾਕਡ੍ਢਕਨਿਯਾਮਕਤੇਲਪੂਰਕਾ ਵੇਗੇਨ ਪਯੋਗਂ ਕਰੋਨ੍ਤਿ, ਏਵਮੇਵ ਯੋ ਭਿਕ੍ਖੁ ‘‘ਸੀਘਂ ਅਪ੍ਪਨਂ ਪਾਪੁਣਿਸ੍ਸਾਮੀ’’ਤਿ ਗਾਲ਼੍ਹਂ ਵੀਰਿਯਂ ਕਰੋਤਿ, ਯੋ ਮਜ੍ਝੇ ਵੁਤ੍ਤਮਧੁਕਰਾਦਯੋ ਵਿਯ ਵੀਰਿਯਂ ਨ ਕਰੋਤਿ, ਇਮੇ ਦ੍ਵੇਪਿ ਵੀਰਿਯਸਮਤਾਭਾਵੇਨ ਅਪ੍ਪਨਂ ਪਾਪੁਣਿਤੁਂ ਨ ਸਕ੍ਕੋਨ੍ਤਿ. ਯੋ ਪਨ ਅਵਸਾਨੇ ਵੁਤ੍ਤਮਧੁਕਰਾਦਯੋ ਵਿਯ ਸਮਪ੍ਪਯੋਗੋ, ਅਯਂ ਅਪ੍ਪਨਂ ਪਾਪੁਣਿਤੁਂ ਸਕ੍ਕੋਤਿ ਵੀਰਿਯਸਮਤਾਯੋਗਤੋਤਿ ਉਪਮਾਸਂਸਨ੍ਦਨਂ ਵੇਦਿਤਬ੍ਬਂ. ਤੇਨ ਵੁਤ੍ਤਂ ‘‘ਏਕੋ ਭਿਕ੍ਖੂ’’ਤਿਆਦਿ. ਲੀਨਂ ਭਾਵਨਾਚਿਤ੍ਤਨ੍ਤਿ ਅਧਿਪ੍ਪਾਯੋ.
ਪਠਮਜ੍ਝਾਨਕਥਾਵਣ੍ਣਨਾ
੬੯. ਏਵਨ੍ਤਿ ਵੁਤ੍ਤਪ੍ਪਕਾਰੇਨ. ਵੀਰਿਯਸਮਤਾਯੋਜਨਵਸੇਨ ਵੀਥਿਪਟਿਪਨ੍ਨਂ ਭਾਵਨਾਮਾਨਸਂ ਪਟਿਭਾਗਨਿਮਿਤ੍ਤੇਯੇਵ ਠਪਨਵਸੇਨ ਨਿਮਿਤ੍ਤਾਭਿਮੁਖਂ ਪਟਿਪਾਦਯਤੋ ਅਸ੍ਸ ਯੋਗਿਨੋ. ਇਜ੍ਝਿਸ੍ਸਤੀਤਿ ਸਮਿਜ੍ਝਿਸ੍ਸਤਿ, ਉਪ੍ਪਜ੍ਜਿਸ੍ਸਤੀਤਿ ਅਤ੍ਥੋ. ਅਨੁਯੋਗਵਸੇਨਾਤਿ ਭਾਵਨਾਵਸੇਨ. ਸੇਸਾਨੀਤਿ ਸੇਸਾਨਿ ਤੀਣਿ, ਚਤ੍ਤਾਰਿ ਵਾ. ਪਕਤਿਚਿਤ੍ਤੇਹੀਤਿ ਪਾਕਤਿਕੇਹਿ ਕਾਮਾਵਚਰਚਿਤ੍ਤੇਹਿ. ਬਲਵ…ਪੇ… ਚਿਤ੍ਤੇਕਗ੍ਗਤਾਨਿ ਭਾਵਨਾਬਲੇਨ ਪਟੁਤਰਸਭਾਵਪ੍ਪਤ੍ਤਿਯਾ. ਪਰਿਕਮ੍ਮਤ੍ਤਾਤਿ ਪਟਿਸਙ੍ਖਾਰਕਤ੍ਤਾ. ਯਦਿ ਆਸਨ੍ਨਤ੍ਤਾ ਉਪਚਾਰਤਾ, ਗੋਤ੍ਰਭੁਨੋ ਏਵ ਉਪਚਾਰਸਮਞ੍ਞਾ ਸਿਯਾਤਿ ਆਹ ‘‘ਸਮੀਪਚਾਰਿਤ੍ਤਾ ਵਾ’’ਤਿ. ਅਨਚ੍ਚਾਸਨ੍ਨੋਪਿ ਹਿ ਨਾਤਿਦੂਰਪਵਤ੍ਤੀ ਸਮੀਪਚਾਰੀ ਨਾਮ ਹੋਤਿ. ਅਪ੍ਪਨਂ ਉਪੇਚ੍ਚ ਚਰਨ੍ਤੀਤਿ ਉਪਚਾਰਾਨਿ. ਇਤੋ ਪੁਬ੍ਬੇ ਪਰਿਕਮ੍ਮਾਨਨ੍ਤਿ ਨਾਨਾਵਜ੍ਜਨਵੀਥਿਯਂ ਪਰਿਕਮ੍ਮਾਨਂ. ਏਤ੍ਥਾਤਿ ਏਤੇਸੁ ਪਰਿਕਮ੍ਮੁਪਚਾਰਾਨੁਲੋਮਸਞ੍ਞਿਤੇਸੁ. ਸਬ੍ਬਨ੍ਤਿਮਨ੍ਤਿ ਤਤਿਯਂ, ਚਤੁਤ੍ਥਂ ਵਾ. ਪਰਿਤ੍ਤਗੋਤ੍ਤਾਭਿਭਵਨਤੋਤਿ ਪਰਿਤ੍ਤਸ੍ਸ ਗੋਤ੍ਤਸ੍ਸ ਅਭਿਭਵਨਤੋ. ਗਂਤਾਯਤੀਤਿ ਹਿ ਗੋਤ੍ਤਂ, ‘‘ਪਰਿਤ੍ਤ’’ਨ੍ਤਿ ਪਵਤ੍ਤਮਾਨਂ ਅਭਿਧਾਨਂ, ਬੁਦ੍ਧਿਞ੍ਚ ਏਕਂਸਿਕਵਿਸਯਤਾਯ ਰਕ੍ਖਤੀਤਿ ਪਰਿਤ੍ਤਗੋਤ੍ਤਂ. ਯਥਾ ਹਿ ਬੁਦ੍ਧਿ ਆਰਮ੍ਮਣਭੂਤੇਨ ਅਤ੍ਥੇਨ ਵਿਨਾ ਨ ਪਵਤ੍ਤਤਿ, ਏਵਂ ਅਭਿਧਾਨਂ ਅਭਿਧੇਯ੍ਯਭੂਤੇਨ. ਤਸ੍ਮਾ ਸੋ ਤਾਨਿ ਤਾਯਤਿ ਰਕ੍ਖਤੀਤਿ ਵੁਚ੍ਚਤਿ. ਤਂ ਪਨ ਮਹਗ੍ਗਤਾਨੁਤ੍ਤਰਵਿਧੁਰਂ ਕਾਮਤਣ੍ਹਾਯ ਗੋਚਰਭੂਤਂ ਕਾਮਾਵਚਰਧਮ੍ਮਾਨਂ ਆਵੇਣਿਕਰੂਪਂ ਦਟ੍ਠਬ੍ਬਂ. ਮਹਗ੍ਗਤਗੋਤ੍ਤੇਪਿ ਇਮਿਨਾ ਨਯੇਨ ਅਤ੍ਥੋ ਵੇਦਿਤਬ੍ਬੋ. ਭਾਵਨਤੋਤਿ ਉਪ੍ਪਾਦਨਤੋ.
ਅਵਿਸੇਸੇਨ ਸਬ੍ਬੇਸਂ ਸਬ੍ਬਾ ਸਮਞ੍ਞਾਤਿ ਪਠਮਨਯੋ ਗਹਿਤਗ੍ਗਹਣਂ ਹੋਤੀਤਿ ਆਹ ‘‘ਅਗ੍ਗਹਿਤਗ੍ਗਹਣੇਨਾ’’ਤਿਆਦਿ. ਨਾਨਾਵਜ੍ਜਨਪਰਿਕਮ੍ਮਮੇਵ ਪਰਿਕਮ੍ਮਨ੍ਤਿ ਅਧਿਪ੍ਪਾਯੇਨ ‘‘ਪਠਮਂ ਵਾ ਉਪਚਾਰ’’ਨ੍ਤਿਆਦਿ ਵੁਤ੍ਤਂ. ਚਤੁਤ੍ਥਂ ਅਪ੍ਪਨਾਚਿਤ੍ਤਂ, ਪਞ੍ਚਮਂ ਵਾ ਅਪ੍ਪਨਾਚਿਤ੍ਤਂ ਪੁਬ੍ਬੇ ਵੁਤ੍ਤਨਯੇਨ ਸਚੇ ਚਤੁਤ੍ਥਂ ਗੋਤ੍ਰਭੁ ਹੋਤੀਤਿ ਅਤ੍ਥੋ. ਪਞ੍ਚਮਂ ਵਾਤਿ ਵਾ-ਸਦ੍ਦੋ ਅਨਿਯਮੇ. ਸ੍ਵਾਯਂ ਅਨਿਯਮੋ ਇਮਿਨਾ ਕਾਰਣੇਨਾਤਿ ਦਸ੍ਸੇਤੁਂ ‘‘ਤਞ੍ਚ ਖੋ ਖਿਪ੍ਪਾਭਿਞ੍ਞਦਨ੍ਧਾਭਿਞ੍ਞਵਸੇਨਾ’’ਤਿ ਵੁਤ੍ਤਂ. ਤਤ੍ਥ ਖਿਪ੍ਪਾਭਿਞ੍ਞਸ੍ਸ ਚਤੁਤ੍ਥਂ ਅਪ੍ਪੇਤਿ, ਦਨ੍ਧਾਭਿਞ੍ਞਸ੍ਸ ਪਞ੍ਚਮਂ. ਕਸ੍ਮਾ ਪਨ ਚਤੁਤ੍ਥਂ, ਪਞ੍ਚਮਂ ਵਾ ਅਪ੍ਪੇਤਿ, ਨ ਤਤੋ ਪਰਨ੍ਤਿ ਆਹ ‘‘ਤਤੋ ਪਰਂ ਜਵਨਂ ਪਤਤੀ’’ਤਿ. ਤਤੋ ਪਞ੍ਚਮਤੋ ਪਰਂ ਛਟ੍ਠਂ, ਸਤ੍ਤਮਞ੍ਚ ਜਵਨਂ ਪਤਨ੍ਤਂ ਵਿਯ ਹੋਤਿ ਪਰਿਕ੍ਖੀਣਜਵਤ੍ਤਾਤਿ ਅਧਿਪ੍ਪਾਯੋ.
ਯਥਾ ਅਲਦ੍ਧਾਸੇਵਨਂ ਪਠਮਜਵਨਂ ਦੁਬ੍ਬਲਤ੍ਤਾ ਗੋਤ੍ਰਭੁਂ ਨ ਉਪ੍ਪਾਦੇਤਿ, ਲਦ੍ਧਾਸੇਵਨਂ ਪਨ ਬਲਵਭਾਵਤੋ ਦੁਤਿਯਂ, ਤਤਿਯਂ ਵਾ ਗੋਤ੍ਰਭੁਂ ਉਪ੍ਪਾਦੇਤਿ, ਏਵਂ ਲਦ੍ਧਾਸੇਵਨਤਾਯ ਬਲਵਭਾਵਤੋ ਛਟ੍ਠਂ, ਸਤ੍ਤਮਮ੍ਪਿ ਅਪ੍ਪੇਤੀਤਿ ਥੇਰਸ੍ਸ ਅਧਿਪ੍ਪਾਯੋ. ਤੇਨਾਹ ‘‘ਤਸ੍ਮਾ ਛਟ੍ਠੇਪਿ ਸਤ੍ਤਮੇਪਿ ਅਪ੍ਪਨਾ ਹੋਤੀ’’ਤਿ. ਤਨ੍ਤਿ ਥੇਰਸ੍ਸ ਵਚਨਂ. ਸੁਤ੍ਤਸੁਤ੍ਤਾਨੁਲੋਮਆਚਰਿਯਵਾਦੇਹਿ ਅਨੁਪਤ੍ਥਮ੍ਭਿਤਤ੍ਤਾ ਵੁਤ੍ਤਂ ‘‘ਅਤ੍ਤਨੋਮਤਿਮਤ੍ਤ’’ਨ੍ਤਿ. ‘‘ਪੁਰਿਮਾ ਪੁਰਿਮਾ ਕੁਸਲਾ ਧਮ੍ਮਾ’’ਤਿ (ਪਟ੍ਠਾ. ੧.੧.੧੨) ਪਨ ਸੁਤ੍ਤਪਦਮਕਾਰਣਂ ਆਸੇਵਨਪਚ੍ਚਯਲਾਭਸ੍ਸ ਬਲਵਭਾਵੇ ਅਨੇਕਨ੍ਤਿਕਤ੍ਤਾ. ਤਥਾ ਹਿ ਅਲਦ੍ਧਾਸੇਵਨਾਪਿ ਪਠਮਚੇਤਨਾ ਦਿਟ੍ਠਧਮ੍ਮਵੇਦਨੀਯਾ ਹੋਤਿ, ਲਦ੍ਧਾਸੇਵਨਾ ਦੁਤਿਯਚੇਤਨਾ ਯਾਵ ਛਟ੍ਠਚੇਤਨਾ ਅਪਰਾਪਰਿਯਵੇਦਨੀਯਾ. ਚਤੁਤ੍ਥਪਞ੍ਚਮੇਸੁਯੇਵਾਤਿਆਦਿ ਵੁਤ੍ਤਸ੍ਸੇਵਤ੍ਥਸ੍ਸ ਯੁਤ੍ਤਿਦਸ੍ਸਨਮੁਖੇਨ ਨਿਗਮਨਤ੍ਥਂ ਵੁਤ੍ਤਂ. ਤਤ੍ਥ ਯਦਿ ਛਟ੍ਠਸਤ੍ਤਮਂ ਜਵਨਂ ਪਤਿਤਂ ਨਾਮ ਹੋਤਿ ਪਰਿਕ੍ਖੀਣਜਵਤ੍ਤਾ, ਕਥਂ ਸਤ੍ਤਮਜਵਨਚੇਤਨਾ ਉਪਪਜ੍ਜਵੇਦਨੀਯਾ, ਆਨਨ੍ਤਰਿਯਾ ਚ ਹੋਤੀਤਿ? ਨਾਯਂ ਵਿਸੇਸੋ ਆਸੇਵਨਪਚ੍ਚਯਲਾਭੇਨ ਬਲਪ੍ਪਤ੍ਤਿਯਾ. ਕਿਞ੍ਚਰਹਿ ਕਿਰਿਯਾਵਤ੍ਥਾਵਿਸੇਸਤੋ. ਕਿਰਿਯਾਵਤ੍ਥਾ ਹਿ ਆਰਮ੍ਭਮਜ੍ਝਪਰਿਯੋਸਾਨਵਸੇਨ ਤਿਵਿਧਾ. ਤਤ੍ਥ ਚ ਪਰਿਯੋਸਾਨਾਵਤ੍ਥਾਯ ਸਨ੍ਨਿਟ੍ਠਾਪਕਚੇਤਨਾਭਾਵੇਨ ਉਪਪਜ੍ਜਵੇਦਨੀਯਾਦਿਤਾ ਹੋਤਿ, ਨ ਬਲਵਭਾਵੇਨਾਤਿ ਦਟ੍ਠਬ੍ਬਂ. ਪਟਿਸਨ੍ਧਿਯਾ ਅਨਨ੍ਤਰਪਚ੍ਚਯਭਾਵਿਨੋ ਵਿਪਾਕਸਨ੍ਤਾਨਸ੍ਸ ਅਨਨ੍ਤਰਪਚ੍ਚਯਭਾਵੇਨ ਤਥਾ ਅਭਿਸਙ੍ਖਤਤ੍ਤਾਤਿ ਚ ਵਦਨ੍ਤਿ. ਤਸ੍ਮਾ ਛਟ੍ਠਸਤ੍ਤਮਾਨਂ ਪਪਾਤਾਭਿਮੁਖਤਾਯ ਪਰਿਕ੍ਖੀਣਜਵਤਾ ਨ ਸਕ੍ਕਾ ਨਿਵਾਰੇਤੁਂ. ਤਥਾ ਹਿ ‘‘ਯਥਾ ਹਿ ਪੁਰਿਸੋ’’ਤਿਆਦਿ ਵੁਤ੍ਤਂ.
ਸਾ ਚ ਪਨ ਅਪ੍ਪਨਾ. ਅਦ੍ਧਾਨਪਰਿਚ੍ਛੇਦੋਤਿ ਕਾਲਪਰਿਚ੍ਛੇਦੋ. ਸੋ ਪਨੇਤ੍ਥ ਸਤ੍ਤਸੁ ਠਾਨੇਸੁ ਕਤ੍ਥਚਿ ਅਪਰਿਮਾਣਚਿਤ੍ਤਕ੍ਖਣਤਾਯ, ਕਤ੍ਥਚਿ ਅਤਿਇਤ੍ਤਰਖਣਤਾਯ ਨਤ੍ਥੀਤਿ ਵੁਤ੍ਤੋ. ਨ ਹੇਤ੍ਥ ਸਮ੍ਪੁਣ੍ਣਜਵਨਵੀਥਿ ਅਦ੍ਧਾ ਲਬ੍ਭਤਿ. ਤੇਨੇਵਾਹ ‘‘ਏਤ੍ਥ ਮਗ੍ਗਾਨਨ੍ਤਰਫਲ’’ਨ੍ਤਿਆਦਿ. ਸੇਸਟ੍ਠਾਨੇਸੂਤਿ ਪਠਮਪ੍ਪਨਾ, ਲੋਕਿਯਾਭਿਞ੍ਞਾ, ਮਗ੍ਗਕ੍ਖਣੋ, ਨਿਰੋਧਾ ਵੁਟ੍ਠਹਨ੍ਤਸ੍ਸ ਫਲਕ੍ਖਣੋਤਿ ਏਤੇਸੁ ਚਤੂਸੁ ਠਾਨੇਸੁ.
ਏਤ੍ਤਾਵਤਾਤਿ ਏਤ੍ਤਕੇਨ ਭਾਵਨਾਕ੍ਕਮੇਨ ਏਸ ਯੋਗਾਵਚਰੋ ਪਠਮਂ ਝਾਨਂ ਉਪਸਮ੍ਪਜ੍ਜ ਵਿਹਰਤਿ. ਏਵਂ ਵਿਹਰਤਾ ਚ ਅਨੇਨ ਤਦੇਵ ਪਠਮਂ ਝਾਨਂ ਅਧਿਗਤਂ ਹੋਤਿ ਪਥਵੀਕਸਿਣਨ੍ਤਿ ਸਮ੍ਬਨ੍ਧੋ.
੭੦. ਤਤ੍ਥਾਤਿ ਤਸ੍ਮਿਂ ਝਾਨਪਾਠੇ. ਵਿਵਿਚ੍ਚਿਤ੍ਵਾਤਿ ਵਿਸੁਂ ਹੁਤ੍ਵਾ. ਤੇਨਾਹ ‘‘ਵਿਨਾ ਹੁਤ੍ਵਾ ਅਪਕ੍ਕਮਿਤ੍ਵਾ’’ਤਿ, ਪਜਹਨਵਸੇਨ ਅਪਸਕ੍ਕਿਤ੍ਵਾਤਿ ਅਤ੍ਥੋ. ਵਿਵਿਚ੍ਚੇਵ ਕਾਮੇਹੀਤਿ ਏਤ੍ਥ ‘‘ਵਿਵਿਚ੍ਚਾ’’ਤਿ ਇਮਿਨਾ ਵਿਵੇਚਨਂ ਝਾਨਕ੍ਖਣੇ ਕਾਮਾਨਂ ਅਭਾਵਮਤ੍ਤਂ ਵੁਤ੍ਤਂ. ‘‘ਵਿਵਿਚ੍ਚੇਵਾ’’ਤਿ ਪਨ ਇਮਿਨਾ ਏਕਂਸਤੋ ਕਾਮਾਨਂ ਵਿਵੇਚੇਤਬ੍ਬਤਾਦੀਪਨੇਨ ਤਪ੍ਪਟਿਪਕ੍ਖਤਾ ਝਾਨਸ੍ਸ, ਕਾਮਵਿਵੇਕਸ੍ਸ ਚ ਝਾਨਾਧਿਗਮੂਪਾਯਤਾ ਦਸ੍ਸਿਤਾ ਹੋਤੀਤਿ ਇਮਮਤ੍ਥਂ ਦਸ੍ਸੇਤੁਂ ‘‘ਪਠਮਂ ਝਾਨ’’ਨ੍ਤਿਆਦਿਂ ਵਤ੍ਵਾ ਤਮੇਵਤ੍ਥਂ ਪਾਕਟਤਰਂ ਕਾਤੁਂ ‘‘ਕਥ’’ਨ੍ਤਿਆਦਿ ਵੁਤ੍ਤਂ. ‘‘ਅਨ੍ਧਕਾਰੇ ਸਤਿ ਪਦੀਪੋਭਾਸੋ ਵਿਯਾ’’ਤਿ ਏਤੇਨ ਯਥਾ ਪਦੀਪੋਭਾਸਾਭਾਵੇਨ ਰਤ੍ਤਿਯਂ ਅਨ੍ਧਕਾਰਾਭਿਭਵੋ, ਏਵਂ ਝਾਨਾਭਾਵੇਨ ਸਤ੍ਤਸਨ੍ਤਤਿਯਂ ਕਾਮਾਭਿਭਵੋਤਿ ਦਸ੍ਸੇਤਿ.
ਏਤਨ੍ਤਿ ਪੁਬ੍ਬਪਦੇਯੇਵ ਅਵਧਾਰਣਵਚਨਂ. ਨ ਖੋ ਪਨ ਏਵਂ ਦਟ੍ਠਬ੍ਬਂ ‘‘ਕਾਮੇਹਿ ਏਵਾ’’ਤਿ ਅਵਧਾਰਣਸ੍ਸ ਅਕਤਤ੍ਤਾ. ਨਿਸ੍ਸਰਨ੍ਤਿ ਨਿਗ੍ਗਚ੍ਛਨ੍ਤਿ ਏਤੇਨ, ਏਤ੍ਥ ਵਾਤਿ ਨਿਸ੍ਸਰਣਂ. ਕੇ ਨਿਗ੍ਗਚ੍ਛਨ੍ਤਿ? ਕਾਮਾ, ਤੇਸਂ ਕਾਮਾਨਂ ਨਿਸ੍ਸਰਣਂ ਪਹਾਨਂ ਤਨ੍ਨਿਸ੍ਸਰਣਂ, ਤਤੋ. ਕਥਂ ਪਨ ਸਮਾਨੇ ਵਿਕ੍ਖਮ੍ਭਨੇ ਕਾਮਾਨਮੇਵੇਤਂ ਨਿਸ੍ਸਰਣਂ, ਨ ਬ੍ਯਾਪਾਦਾਦੀਨਨ੍ਤਿ ਚੋਦਨਂ ਯੁਤ੍ਤਿਤੋ, ਆਗਮਤੋ ਚ ਸੋਧੇਤੁਂ ‘‘ਕਾਮਧਾਤੂ’’ਤਿਆਦਿ ਵੁਤ੍ਤਂ. ਤਤ੍ਥ ਕਾਮਧਾਤੁਸਮਤਿਕ੍ਕਮਨਤੋਤਿ ਸਕਲਸ੍ਸਪਿ ਕਾਮਭਵਸ੍ਸ ਸਮਤਿਕ੍ਕਮਪਟਿਪਦਾਭਾਵਤੋ. ਤੇਨ ਇਮਸ੍ਸ ਝਾਨਸ੍ਸ ਕਾਮਪਰਿਞ੍ਞਾਭਾਵਮਾਹ. ਕਾਮਰਾਗਪਟਿਪਕ੍ਖਤੋਤਿ ਵਕ੍ਖਮਾਨਵਿਭਾਗਸ੍ਸ ਕਿਲੇਸਕਾਮਸ੍ਸ ਪਚ੍ਚਤ੍ਥਿਕਭਾਵਤੋ. ਤੇਨ ਯਥਾ ਮੇਤ੍ਤਾ ਬ੍ਯਾਪਾਦਸ੍ਸ, ਕਰੁਣਾ ਵਿਹਿਂਸਾਯ, ਏਵਮਿਦਂ ਝਾਨਂ ਕਾਮਰਾਗਸ੍ਸ ਉਜੁਵਿਪਚ੍ਚਨੀਕਭੂਤਨ੍ਤਿ ਦਸ੍ਸੇਤਿ. ਏਵਮਤ੍ਤਨੋ ਪਵਤ੍ਤਿਯਾ, ਵਿਪਾਕਪ੍ਪਵਤ੍ਤਿਯਾ ਚ ਕਾਮਰਾਗਤੋ, ਕਾਮਧਾਤੁਤੋ ਚ ਵਿਨਿਵਤ੍ਤਸਭਾਵਤ੍ਤਾ ਇਦਂ ਝਾਨਂ ਵਿਸੇਸਤੋ ਕਾਮਾਨਮੇਵ ਨਿਸ੍ਸਰਣਂ. ਸ੍ਵਾਯਮਤ੍ਥੋ ਪਾਠਗਤੋ ਏਵਾਤਿ ਆਹ ‘‘ਯਥਾਹਾ’’ਤਿਆਦਿ. ਕਾਮਞ੍ਚੇਤਮਤ੍ਥਂ ਦੀਪੇਤੁਂ ਪੁਰਿਮਪਦੇਯੇਵ ਅਵਧਾਰਣਂ ਗਹਿਤਂ, ਉਤ੍ਤਰਪਦੇਪਿ ਪਨ ਤਂ ਗਹੇਤਬ੍ਬਮੇਵ ਤਥਾ ਅਤ੍ਥਸਮ੍ਭਵਤੋਤਿ ਦਸ੍ਸੇਤੁਂ ‘‘ਉਤ੍ਤਰਪਦੇਪੀ’’ਤਿਆਦਿ ਵੁਤ੍ਤਂ. ਇਤੋਤਿ ਕਾਮਚ੍ਛਨ੍ਦਤੋ. ਏਸ ਨਿਯਮੋ. ਸਾਧਾਰਣਵਚਨੇਨਾਤਿ ਅਵਿਸੇਸਵਚਨੇਨ. ਤਦਙ੍ਗਵਿਕ੍ਖਮ੍ਭਨਸਮੁਚ੍ਛੇਦਪ੍ਪਟਿਪਸ੍ਸਦ੍ਧਿਨਿਸ੍ਸਰਣਵਿਵੇਕਾ ਤਦਙ੍ਗਵਿਵੇਕਾਦਯੋ. ਚਿਤ੍ਤਕਾਯਉਪਧਿਵਿਵੇਕਾ ਚਿਤ੍ਤਵਿਵੇਕਾਦਯੋ. ਤਯੋ ਏਵ ਇਧ ਝਾਨਕਥਾਯਂ ਦਟ੍ਠਬ੍ਬਾ ਸਮੁਚ੍ਛੇਦਵਿਵੇਕਾਦੀਨਂ ਅਸਮ੍ਭਵਤੋ.
ਨਿਦ੍ਦੇਸੇਤਿ ਮਹਾਨਿਦ੍ਦੇਸੇ (ਮਹਾਨਿ. ੧, ੭). ਤਤ੍ਥ ਹਿ ‘‘ਉਦ੍ਦਾਨਤੋ ਦ੍ਵੇ ਕਾਮਾ – ਵਤ੍ਥੁਕਾਮਾ ਕਿਲੇਸਕਾਮਾ ਚਾ’’ਤਿ ਉਦ੍ਦਿਸਿਤ੍ਵਾ ‘‘ਤਤ੍ਥ ਕਤਮੇ ਵਤ੍ਥੁਕਾਮਾ? ਮਨਾਪਿਯਾ ਰੂਪਾ…ਪੇ… ਮਨਾਪਿਯਾ ਫੋਟ੍ਠਬ੍ਬਾ’’ਤਿਆਦਿਨਾ ਵਤ੍ਥੁਕਾਮਾ ਨਿਦ੍ਦਿਟ੍ਠਾ. ਤੇ ਪਨ ਕਾਮੀਯਨ੍ਤੀਤਿ ਕਾਮਾਤਿ ਵੇਦਿਤਬ੍ਬਾ. ਤਤ੍ਥੇਵਾਤਿ ਨਿਦ੍ਦੇਸੇ ਏਵ. ਵਿਭਙ੍ਗੇਤਿ ਝਾਨਵਿਭਙ੍ਗੇ (ਵਿਭ. ੫੬੪). ਪਤ੍ਥਨਾਕਾਰੇਨ ਪਵਤ੍ਤੋ ਦੁਬ੍ਬਲੋ ਲੋਭੋ ਛਨ੍ਦਨਟ੍ਠੇਨ ਛਨ੍ਦੋ, ਤਤੋ ਬਲਵਾ ਰਞ੍ਜਨਟ੍ਠੇਨ ਰਾਗੋ, ਤਤੋਪਿ ਬਲਵਤਰੋ ਬਹਲਰਾਗੋ ਛਨ੍ਦਰਾਗੋ. ਨਿਮਿਤ੍ਤਾਨੁਬ੍ਯਞ੍ਜਨਾਨਿ ਸਙ੍ਕਪ੍ਪੇਤਿ ਏਤੇਨਾਤਿ ਸਙ੍ਕਪ੍ਪੋ, ਤਥਾਪਵਤ੍ਤੋ ਲੋਭੋ, ਤਤੋ ਬਲਵਾ ਰਞ੍ਜਨਟ੍ਠੇਨ ਰਾਗੋ, ਸਙ੍ਕਪ੍ਪਨਵਸੇਨੇਵ ਪਵਤ੍ਤੋ ਤਤੋਪਿ ਬਲਵਤਰੋ ਸਙ੍ਕਪ੍ਪਰਾਗੋਤਿ. ਸ੍ਵਾਯਂ ਪਭੇਦੋ ਏਕਸ੍ਸੇਵ ਲੋਭਸ੍ਸ ਪਵਤ੍ਤਿਆਕਾਰਵਸੇਨ, ਅਵਤ੍ਥਾਭੇਦਵਸੇਨ ਚ ਵੇਦਿਤਬ੍ਬੋ ਯਥਾ ‘‘ਵਚ੍ਛੋ ਦਮ੍ਮੋ ਬਲੀਬਦ੍ਦੋ’’ਤਿ. ਇਮੇ ਕਿਲੇਸਕਾਮਾ. ਕਾਮੇਨ੍ਤੀਤਿ ਕਾਮਾ, ਕਾਮੇਨ੍ਤਿ ਏਤੇਹੀਤਿ ਵਾ.
ਏਵਞ੍ਹਿ ਸਤੀਤਿ ਏਵਂ ਉਭਯੇਸਮ੍ਪਿ ਕਾਮਾਨਂ ਸਙ੍ਗਹੇ ਸਤਿ. ਵਤ੍ਥੁਕਾਮੇਹਿਪੀਤਿ ‘‘ਵਤ੍ਥੁਕਾਮੇਹਿ ਵਿਵਿਚ੍ਚੇਵਾ’’ਤਿਪਿ ਅਤ੍ਥੋ ਯੁਜ੍ਜਤੀਤਿ ਏਵਂ ਯੁਜ੍ਜਮਾਨਤ੍ਥਨ੍ਤਰਸਮੁਚ੍ਚਯਤ੍ਥੋ ਪਿ-ਸਦ੍ਦੋ, ਨ ਕਿਲੇਸਕਾਮਸਮੁਚ੍ਚਯਤ੍ਥੋ. ਕਸ੍ਮਾ? ਇਮਸ੍ਮਿਂ ਅਤ੍ਥੇ ਕਿਲੇਸਕਾਮੇਹਿ ਵਿਵੇਕਸ੍ਸ ਦੁਤਿਯਪਦੇਨ ਵੁਤ੍ਤਤ੍ਤਾ. ਤੇਨਾਤਿ ਵਤ੍ਥੁਕਾਮਵਿਵੇਕੇਨ. ਕਾਯਵਿਵੇਕੋ ਵੁਤ੍ਤੋ ਹੋਤਿ ਪੁਤ੍ਤਦਾਰਾਦਿਪਰਿਗ੍ਗਹਵਿਵੇਕਦੀਪਨਤੋ. ਪੁਰਿਮੇਨਾਤਿ ਕਾਯਵਿਵੇਕੇਨ. ਏਤ੍ਥਾਤਿ ‘‘ਵਿਵਿਚ੍ਚੇਵ ਕਾਮੇਹਿ, ਵਿਵਿਚ੍ਚ ਅਕੁਸਲੇਹਿ ਧਮ੍ਮੇਹੀ’’ਤਿ ਏਤਸ੍ਮਿਂ ਪਦਦ੍ਵਯੇ, ਇਤੋ ਵਾ ਨਿਦ੍ਧਾਰਿਤੇ ਵਿਵੇਕਦ੍ਵਯੇ. ਅਕੁਸਲ-ਸਦ੍ਦੇਨ ਯਦਿਪਿ ਕਿਲੇਸਕਾਮਾ, ਸਬ੍ਬਾਕੁਸਲਾਪਿ ਵਾ ਗਹਿਤਾ, ਸਬ੍ਬਥਾ ਪਨ ਕਿਲੇਸਕਾਮੇਹਿ ਵਿਵੇਕੋ ਵੁਤ੍ਤੋਤਿ ਆਹ ‘‘ਦੁਤਿਯੇਨ ਕਿਲੇਸਕਾਮੇਹਿ ਵਿਵੇਕਵਚਨਤੋ’’ਤਿ. ਦੁਤਿਯੇਨਾਤਿ ਚ ਚਿਤ੍ਤਵਿਵੇਕੇਨਾਤਿ ਅਤ੍ਥੋ. ਏਤੇਸਨ੍ਤਿ ਯਥਾਵੁਤ੍ਤਾਨਂ ਦ੍ਵਿਨ੍ਨਂ ਪਦਾਨਂ, ਨਿਦ੍ਧਾਰਣੇ ਚੇਤਂ ਸਾਮਿਵਚਨਂ. ਤਣ੍ਹਾਦਿਸਂਕਿਲੇਸਾਨਂ ਵਤ੍ਥੁਨੋ ਪਹਾਨਂ ਸਂਕਿਲੇਸਵਤ੍ਥੁਪ੍ਪਹਾਨਂ. ਲੋਲਭਾਵੋ ਨਾਮ ਤਤ੍ਥ ਤਤ੍ਥ ਰੂਪਾਦੀਸੁ ਤਣ੍ਹੁਪ੍ਪਾਦੋ, ਤਸ੍ਸ ਹੇਤੁ ਵਤ੍ਥੁਕਾਮਾ ਏਵ ਵੇਦਿਤਬ੍ਬਾ. ਬਾਲਭਾਵੋ ਅਵਿਜ੍ਜਾ, ਦੁਚ੍ਚਿਨ੍ਤਿਤਚਿਨ੍ਤਿਤਾਦਿ ਵਾ, ਤਸ੍ਸ ਅਯੋਨਿਸੋਮਨਸਿਕਾਰੋ, ਸਬ੍ਬੇਪਿ ਵਾ ਅਕੁਸਲਾ ਧਮ੍ਮਾ ਹੇਤੁ. ਕਾਮਗੁਣਾਧਿਗਮਹੇਤੁਪਿ ਪਾਣਾਤਿਪਾਤਾਦਿਅਸੁਦ੍ਧਪਯੋਗੋ ਹੋਤੀਤਿ ਤਬ੍ਬਿਵੇਕੇਨ ਪਯੋਗਸੁਦ੍ਧਿ ਵਿਭਾਵਿਤਾ. ਤਣ੍ਹਾਸਂਕਿਲੇਸਸੋਧਨੇਨ, ਵਿਵਟ੍ਟੂਪਨਿਸ੍ਸਯਸਂਵਡ੍ਢਨੇਨ ਚ ਅਜ੍ਝਾਸਯਵਿਸੋਧਨਂ ਆਸਯਪੋਸਨਂ. ਕਾਮੇਸੂਤਿ ਨਿਦ੍ਧਾਰਣੇ ਭੁਮ੍ਮਂ.
ਅਨੇਕਭੇਦੋਤਿ ਕਾਮਾਸਵਕਾਮਰਾਗਸਂਯੋਜਨਾਦਿਵਸੇਨ, ਰੂਪਤਣ੍ਹਾਦਿਵਸੇਨ ਚ ਅਨੇਕਪ੍ਪਭੇਦੋ. ਕਾਮਚ੍ਛਨ੍ਦੋਯੇਵਾਤਿ ਕਾਮਸਭਾਵੋਯੇਵ ਛਨ੍ਦੋ, ਨ ਕਤ੍ਤੁਕਮ੍ਯਤਾਛਨ੍ਦੋ, ਨਾਪਿ ਕੁਸਲਚ੍ਛਨ੍ਦੋਤਿ ਅਧਿਪ੍ਪਾਯੋ. ਝਾਨਪਟਿਪਕ੍ਖਤੋਤਿ ਝਾਨਸ੍ਸ ਪਟਿਪਕ੍ਖਭਾਵਤੋ ਤਂਹੇਤੁ ਤਨ੍ਨਿਮਿਤ੍ਤਂ ਵਿਸੁਂ ਵੁਤ੍ਤੋ. ਅਕੁਸਲਭਾਵਸਾਮਞ੍ਞੇਨ ਅਗ੍ਗਹੇਤ੍ਵਾ ਵਿਸੁਂ ਸਰੂਪੇਨ ਗਹਿਤੋ. ਯਦਿ ਕਿਲੇਸਕਾਮੋਵ ਪੁਰਿਮਪਦੇ ਵੁਤ੍ਤੋ, ਕਥਂ ਬਹੁਵਚਨਨ੍ਤਿ ਆਹ ‘‘ਅਨੇਕਭੇਦਤੋ’’ਤਿਆਦਿ.
ਅਞ੍ਞੇਸਮ੍ਪਿ ਦਿਟ੍ਠਿਮਾਨਅਹਿਰਿਕਾਨੋਤ੍ਤਪ੍ਪਾਦੀਨਂ, ਤਂਸਹਿਤਫਸ੍ਸਾਦੀਨਞ੍ਚ. ਉਪਰਿ ਵੁਚ੍ਚਮਾਨਾਨਿ ਝਾਨਙ੍ਗਾਨਿ ਉਪਰਿਝਾਨਙ੍ਗਾਨਿ, ਤੇਸਂ ਅਤ੍ਤਨੋ ਪਚ੍ਚਨੀਕਾਨਂ ਪਟਿਪਕ੍ਖਭਾਵਦਸ੍ਸਨਤੋ ਤਪ੍ਪਚ੍ਚਨੀਕਨੀਵਰਣਵਚਨਂ. ਨੀਵਰਣਾਨਿ ਹਿ ਝਾਨਙ੍ਗਪਚ੍ਚਨੀਕਾਨਿ ਤੇਸਂ ਪਵਤ੍ਤਿਨਿਵਾਰਣਤੋ. ਸਮਾਧਿ ਕਾਮਚ੍ਛਨ੍ਦਸ੍ਸ ਪਟਿਪਕ੍ਖੋ ਰਾਗਪ੍ਪਣਿਧਿਯਾ ਉਜੁਵਿਪਚ੍ਚਨੀਕਭਾਵਤੋ, ਨਾਨਾਰਮ੍ਮਣੇਹਿ ਪਲੋਭਿਤਸ੍ਸ ਪਰਿਬ੍ਭਮਨ੍ਤਸ੍ਸ ਚਿਤ੍ਤਸ੍ਸ ਸਮਾਧਾਨਤੋ ਚ. ਪੀਤਿ ਬ੍ਯਾਪਾਦਸ੍ਸ ਪਟਿਪਕ੍ਖਾ ਪਾਮੋਜ੍ਜੇਨ ਸਮਾਨਯੋਗਕ੍ਖੇਮਤ੍ਤਾ. ਵਿਤਕ੍ਕੋ ਥਿਨਮਿਦ੍ਧਸ੍ਸ ਪਟਿਪਕ੍ਖੋ ਯੋਨਿਸੋ ਸਙ੍ਕਪ੍ਪਨਵਸੇਨ ਸਵਿਪ੍ਫਾਰਪਵਤ੍ਤਿਤੋ. ਸੁਖਂ ਅਵੂਪਸਮਾਨੁਤਾਪਸਭਾਵਸ੍ਸ ਉਦ੍ਧਚ੍ਚਕੁਕ੍ਕੁਚ੍ਚਸ੍ਸ ਪਟਿਪਕ੍ਖਂ ਵੂਪਸਨ੍ਤਸੀਤਲਸਭਾਵਤ੍ਤਾ. ਵਿਚਾਰੋ ਵਿਚਿਕਿਚ੍ਛਾਯ ਪਟਿਪਕ੍ਖੋ ਆਰਮ੍ਮਣੇ ਅਨੁਮਜ੍ਜਨਵਸੇਨ ਪਞ੍ਞਾਪਟਿਰੂਪਸਭਾਵਤ੍ਤਾ. ਮਹਾਕਚ੍ਚਾਨਤ੍ਥੇਰੇਨ ਦੇਸਿਤਂ ਪਿਟਕਾਨਂ ਸਂਵਣ੍ਣਨਾ ਪੇਟਕਂ, ਤਸ੍ਮਿਂ ਪੇਟਕੇ.
ਪਞ੍ਚਕਾਮਗੁਣਭੇਦਵਿਸਯਸ੍ਸਾਤਿ ਰੂਪਾਦਿਪਞ੍ਚਕਾਮਗੁਣਵਿਸੇਸਵਿਸਯਸ੍ਸ. ਆਘਾਤਵਤ੍ਥੁਭੇਦਾਦਿਵਿਸਯਾਨਨ੍ਤਿ ਬ੍ਯਾਪਾਦਵਿਵੇਕਵਚਨੇਨ ‘‘ਅਨਤ੍ਥਂ ਮੇ ਅਚਰੀ’’ਤਿ (ਦੀ. ਨਿ. ੩.੩੪੦; ਅ. ਨਿ. ੯.੨੯; ਵਿਭ. ੯੬੦) ਆਦਿਆਘਾਤਵਤ੍ਥੁਭੇਦਵਿਸਯਸ੍ਸ ਦੋਸਸ੍ਸ, ਮੋਹਾਧਿਕੇਹਿ ਥਿਨਮਿਦ੍ਧਾਦੀਹਿ ਵਿਵੇਕਵਚਨੇਨ ਪਟਿਚ੍ਛਾਦਨਵਸੇਨ ਦੁਕ੍ਖਾਦਿਪੁਬ੍ਬਨ੍ਤਾਦਿਭੇਦਵਿਸਯਸ੍ਸ ਮੋਹਸ੍ਸ ਵਿਕ੍ਖਮ੍ਭਨਵਿਵੇਕੋ ਵੁਤ੍ਤੋ. ਕਾਮਰਾਗਬ੍ਯਾਪਾਦਤਦੇਕਟ੍ਠਥਿਨਮਿਦ੍ਧਾਦਿਵਿਕ੍ਖਮ੍ਭਕਞ੍ਚੇਤਂ ਸਬ੍ਬਾਕੁਸਲਪਟਿਪਕ੍ਖਸਭਾਵਤ੍ਤਾ. ਸਬ੍ਬਕੁਸਲਾਨਂ ਤੇਨ ਸਭਾਵੇਨ ਸਬ੍ਬਾਕੁਸਲਪ੍ਪਹਾਯਕਂ ਹੋਤਿ, ਹੋਨ੍ਤਮ੍ਪਿ ਕਾਮਰਾਗਾਦਿਵਿਕ੍ਖਮ੍ਭਨਸਭਾਵਮੇਵ ਹੋਤਿ ਤਂਸਭਾਵਤ੍ਤਾਤਿ ਅਵਿਸੇਸੇਤ੍ਵਾ ਨੀਵਰਣਾਕੁਸਲਮੂਲਾਦੀਨਂ ‘‘ਵਿਕ੍ਖਮ੍ਭਨਵਿਵੇਕੋ ਵੁਤ੍ਤੋ ਹੋਤੀ’’ਤਿ ਆਹ.
੭੧. ਯਥਾਪਚ੍ਚਯਂ ਪਵਤ੍ਤਮਾਨਾਨਂ ਸਭਾਵਧਮ੍ਮਾਨਂ ਨਤ੍ਥਿ ਕਾਚਿ ਵਸਵਤ੍ਤਿਤਾਤਿ ਵਸਵਤ੍ਤਿਭਾਵਨਿਵਾਰਣਤ੍ਥਂ ‘‘ਵਿਤਕ੍ਕਨਂ ਵਿਤਕ੍ਕੋ’’ਤਿ ਵੁਤ੍ਤਂ. ਤਯਿਦਂ ‘‘ਵਿਤਕ੍ਕਨਂ ਈਦਿਸਮਿਦ’’ਨ੍ਤਿ ਆਰਮ੍ਮਣਸ੍ਸ ਪਰਿਕਪ੍ਪਨਨ੍ਤਿ ਆਹ ‘‘ਊਹਨਨ੍ਤਿ ਵੁਤ੍ਤਂ ਹੋਤੀ’’ਤਿ. ਯਸ੍ਮਾ ਚਿਤ੍ਤਂ ਵਿਤਕ੍ਕਬਲੇਨ ਆਰਮ੍ਮਣਂ ਅਭਿਨਿਰੁਲ਼੍ਹਂ ਵਿਯ ਹੋਤਿ, ਤਸ੍ਮਾ ਸੋ ਆਰਮ੍ਮਣਾਭਿਨਿਰੋਪਨਲਕ੍ਖਣੋ ਵੁਤ੍ਤੋ. ਯਥਾ ਹਿ ਕੋਚਿ ਰਾਜਵਲ੍ਲਭਂ, ਤਂਸਮ੍ਬਨ੍ਧਿਨਂ ਮਿਤ੍ਤਂ ਵਾ ਨਿਸ੍ਸਾਯ ਰਾਜਗੇਹਂ ਆਰੋਹਤਿ ਅਨੁਪਵਿਸਤਿ, ਏਵਂ ਵਿਤਕ੍ਕਂ ਨਿਸ੍ਸਾਯ ਚਿਤ੍ਤਂ ਆਰਮ੍ਮਣਂ ਆਰੋਹਤਿ. ਯਦਿ ਏਵਂ, ਕਥਂ ਅਵਿਤਕ੍ਕਂ ਚਿਤ੍ਤਂ ਆਰਮ੍ਮਣਂ ਆਰੋਹਤੀਤਿ? ਵਿਤਕ੍ਕਬਲੇਨੇਵ. ਯਥਾ ਹਿ ਸੋ ਪੁਰਿਸੋ ਪਰਿਚਯੇਨ ਤੇਨ ਵਿਨਾਪਿ ਨਿਰਾਸਙ੍ਕੋ ਰਾਜਗੇਹਂ ਪਵਿਸਤਿ, ਏਵਂ ਪਰਿਚਯੇਨ ਵਿਤਕ੍ਕੇਨ ਵਿਨਾਪਿ ਅਵਿਤਕ੍ਕਂ ਚਿਤ੍ਤਂ ਆਰਮ੍ਮਣਂ ਆਰੋਹਤਿ. ਪਰਿਚਯੇਨਾਤਿ ਚ ਸਨ੍ਤਾਨੇ ਪਵਤ੍ਤਵਿਤਕ੍ਕਭਾਵਨਾਸਙ੍ਖਾਤੇਨ ਪਰਿਚਯੇਨ. ਵਿਤਕ੍ਕਸ੍ਸ ਹਿ ਸਨ੍ਤਾਨੇ ਅਭਿਣ੍ਹਂ ਪਵਤ੍ਤਸ੍ਸ ਵਸੇਨ ਚਿਤ੍ਤਸ੍ਸ ਆਰਮ੍ਮਣਾਭਿਰੁਹਣਂ ਚਿਰਪਰਿਚਿਤਂ. ਤੇਨ ਤਂ ਕਦਾਚਿ ਵਿਤਕ੍ਕੇਨ ਵਿਨਾਪਿ ਤਤ੍ਥ ਪਵਤ੍ਤਤੇਵ. ਯਥਾ ਤਂ ਞਾਣਸਹਿਤਂ ਹੁਤ੍ਵਾ ਸਮ੍ਮਸਨਵਸੇਨ ਚਿਰਪਰਿਚਿਤਂ ਕਦਾਚਿ ਞਾਣਵਿਰਹਿਤਮ੍ਪਿ ਸਮ੍ਮਸਨਵਸੇਨ ਪਵਤ੍ਤਤਿ, ਯਥਾ ਵਾ ਕਿਲੇਸਸਹਿਤਂ ਹੁਤ੍ਵਾ ਪਵਤ੍ਤਂ ਸਬ੍ਬਸੋ ਕਿਲੇਸਰਹਿਤਮ੍ਪਿ ਪਰਿਚਯੇਨ ਕਿਲੇਸਵਾਸਨਾਵਸੇਨ ਪਵਤ੍ਤਤਿ, ਏਵਂਸਮ੍ਪਦਮਿਦਂ ਦਟ੍ਠਬ੍ਬਂ. ਆਦਿਤੋ, ਅਭਿਮੁਖਂ ਵਾ ਹਨਨਂ ਆਹਨਨਂ. ਪਰਿਤੋ, ਪਰਿਵਤ੍ਤੇਤ੍ਵਾ ਵਾ ਆਹਨਨਂ ਪਰਿਯਾਹਨਨਂ. ‘‘ਰੂਪਂ ਰੂਪਂ, ਪਥਵੀ ਪਥਵੀ’’ਤਿ ਆਕੋਟੇਨ੍ਤਸ੍ਸ ਵਿਯ ਪਵਤ੍ਤਿ ‘‘ਆਹਨਨਂ, ਪਰਿਯਾਹਨਨ’’ਨ੍ਤਿ ਚ ਵੇਦਿਤਬ੍ਬਂ. ਆਨਯਨਂ ਚਿਤ੍ਤਸ੍ਸ ਆਰਮ੍ਮਣੇ ਉਪਨਯਨਂ, ਆਕਡ੍ਢਨਂ ਵਾ.
ਅਨੁਸਞ੍ਚਰਣਂ ਅਨੁਪਰਿਬ੍ਭਮਨਂ. ਸ੍ਵਾਯਂ ਵਿਸੇਸੋ ਸਨ੍ਤਾਨਮ੍ਹਿ ਲਬ੍ਭਮਾਨੋ ਏਵ ਸਨ੍ਤਾਨੇ ਪਾਕਟੋ ਹੋਤੀਤਿ ਦਟ੍ਠਬ੍ਬੋ. ਸੇਸੇਸੁਪਿ ਏਸੇਵ ਨਯੋ. ਅਨੁਮਜ੍ਜਨਂ ਆਰਮ੍ਮਣੇ ਚਿਤ੍ਤਸ੍ਸ ਅਨੁਮਸਨਂ, ਪਰਿਮਜ੍ਜਨਨ੍ਤਿ ਅਤ੍ਥੋ. ਤਥਾ ਹਿ ਵਿਚਾਰੋ ‘‘ਪਰਿਮਜ੍ਜਨਹਤ੍ਥੋ ਵਿਯ, ਸਞ੍ਚਰਣਹਤ੍ਥੋ ਵਿਯਾ’’ਤਿ ਚ ਵੁਤ੍ਤੋ. ਤਤ੍ਥਾਤਿ ਆਰਮ੍ਮਣੇ. ਸਹਜਾਤਾਨਂ ਅਨੁਯੋਜਨਂ ਆਰਮ੍ਮਣੇ ਅਨੁਵਿਚਾਰਣਸਙ੍ਖਾਤਅਨੁਮਜ੍ਜਨਵਸੇਨੇਵ ਵੇਦਿਤਬ੍ਬਂ. ਅਨੁਪ੍ਪਬਨ੍ਧਨਂ ਆਰਮ੍ਮਣੇ ਚਿਤ੍ਤਸ੍ਸ ਅਵਿਚ੍ਛਿਨ੍ਨਸ੍ਸ ਵਿਯ ਪਵਤ੍ਤਿ. ਤਥਾ ਹਿ ਸੋ ‘‘ਅਨੁਸਨ੍ਧਾਨਤਾ’’ਤਿ (ਧ. ਸ. ੮) ਨਿਦ੍ਦਿਟ੍ਠੋ. ਤੇਨੇਵ ਚ ‘‘ਘਣ੍ਡਾਨੁਰਵੋ ਵਿਯ, ਪਰਿਬ੍ਭਮਨਂ ਵਿਯਾ’’ਤਿ ਚ ਵੁਤ੍ਤੋ.
ਕਤ੍ਥਚੀਤਿ ਪਠਮਜ੍ਝਾਨੇ, ਪਰਿਤ੍ਤਚਿਤ੍ਤੁਪ੍ਪਾਦੇਸੁ ਚ. ਵਿਚਾਰਤੋ ਓਲ਼ਾਰਿਕਟ੍ਠੇਨ, ਵਿਚਾਰਸ੍ਸੇਵ ਚ ਪੁਬ੍ਬਙ੍ਗਮਟ੍ਠੇਨ ਅਨੁਰਵਤੋ ਓਲ਼ਾਰਿਕੋ, ਤਸ੍ਸ ਚ ਪੁਬ੍ਬਙ੍ਗਮੋ ਘਣ੍ਡਾਭਿਘਾਤੋ ਵਿਯ ਵਿਤਕ੍ਕੋ. ਯਥਾ ਹਿ ਘਣ੍ਡਾਭਿਘਾਤੋ ਪਠਮਾਭਿਨਿਪਾਤੋ ਹੋਤਿ, ਏਵਂ ਆਰਮ੍ਮਣਾਭਿਮੁਖਨਿਰੋਪਨਟ੍ਠੇਨ ਵਿਤਕ੍ਕੋ ਚੇਤਸੋ ਪਠਮਾਭਿਨਿਪਾਤੋ ਹੋਤਿ. ਅਭਿਘਾਤ-ਗ੍ਗਹਣੇਨ ਚੇਤ੍ਥ ਅਭਿਘਾਤਜੋ ਸਦ੍ਦੋ ਗਹਿਤੋਤਿ ਵੇਦਿਤਬ੍ਬੋ. ਵਿਪ੍ਫਾਰਵਾਤਿ ਵਿਚਲਨਯੁਤ੍ਤੋ ਸਪਰਿਪ੍ਫਨ੍ਦੋ. ਪਰਿਬ੍ਭਮਨਂ ਵਿਯ ਪਰਿਸ੍ਸਯਾਭਾਵਵੀਮਂਸਨਤ੍ਥਂ. ਅਨੁਪ੍ਪਬਨ੍ਧੇਨ ਪਵਤ੍ਤਿਯਨ੍ਤਿ ਉਪਚਾਰੇ ਵਾ ਅਪ੍ਪਨਾਯਂ ਵਾ ਸਨ੍ਤਾਨੇਨ ਪਵਤ੍ਤਿਯਂ. ਤਤ੍ਥ ਹਿ ਵਿਤਕ੍ਕੋ ਨਿਚ੍ਚਲੋ ਹੁਤ੍ਵਾ ਆਰਮ੍ਮਣਂ ਅਨੁਪਵਿਸਿਤ੍ਵਾ ਵਿਯ ਪਵਤ੍ਤਤਿ, ਨ ਪਠਮਾਭਿਨਿਪਾਤੇ. ਪਾਕਟੋ ਹੋਤੀਤਿ ਵਿਤਕ੍ਕਸ੍ਸ ਵਿਸੇਸੋ ਅਭਿਨਿਰੋਪਨਾਕਾਰੋ ਓਲ਼ਾਰਿਕਤ੍ਤਾ ਪਠਮਜ੍ਝਾਨੇ ਪਾਕਟੋ ਹੋਤਿ, ਤਦਭਾਵਤੋ ਪਞ੍ਚਕਨਯੇ ਦੁਤਿਯਜ੍ਝਾਨੇ ਵਿਚਾਰਸ੍ਸ ਵਿਸੇਸੋ ਅਨੁਮਜ੍ਜਨਾਕਾਰੋ ਪਾਕਟੋ ਹੋਤਿ.
ਵਾਲਣ੍ਡੁਪਕਂ ਏਲ਼ਕਲੋਮਾਦੀਹਿ ਕਤਚੁਮ੍ਬਟਕਂ. ਉਪ੍ਪੀਲ਼ਨਹਤ੍ਥੋਤਿ ਪਿਣ੍ਡਸ੍ਸ ਉਪ੍ਪੀਲ਼ਨਹਤ੍ਥੋ. ਤਸ੍ਸੇਵ ਇਤੋ ਚਿਤੋ ਚ ਸਞ੍ਚਰਣਹਤ੍ਥੋ. ਮਣ੍ਡਲਨ੍ਤਿ ਕਂਸਭਾਜਨਾਦੀਸੁ ਕਿਞ੍ਚਿ ਮਣ੍ਡਲਂ ਵਟ੍ਟਲੇਖਂ ਕਰੋਨ੍ਤਸ੍ਸ. ਯਥਾ ਪੁਪ੍ਫਫਲਸਾਖਾਦਿਅਵਯਵਵਿਨਿਮੁਤ੍ਤੋ ਅਵਿਜ੍ਜਮਾਨੋਪਿ ਰੁਕ੍ਖੋ ‘‘ਸਪੁਪ੍ਫੋ ਸਫਲੋ’’ਤਿ ਵੋਹਰੀਯਤਿ, ਏਵਂ ਵਿਤਕ੍ਕਾਦਿਅਙ੍ਗਵਿਨਿਮੁਤ੍ਤਂ ਅਵਿਜ੍ਜਮਾਨਮ੍ਪਿ ਝਾਨਂ ‘‘ਸਵਿਤਕ੍ਕਂ ਸਵਿਚਾਰ’’ਨ੍ਤਿ ਵੋਹਰੀਯਤੀਤਿ ਦਸ੍ਸੇਤੁਂ ‘‘ਰੁਕ੍ਖੋ ਵਿਯਾ’’ਤਿਆਦਿ ਵੁਤ੍ਤਂ. ਝਾਨਭਾਵਨਾਯ ਪੁਗ੍ਗਲਵਸੇਨ ਦੇਸੇਤਬ੍ਬਤ੍ਤਾ ‘‘ਇਧ ਭਿਕ੍ਖੁ ਵਿਵਿਚ੍ਚੇਵ ਕਾਮੇਹੀ’’ਤਿਆਦਿਨਾ ਪੁਗ੍ਗਲਾਧਿਟ੍ਠਾਨੇਨ ਝਾਨਾਨਿ ਉਦ੍ਦਿਟ੍ਠਾਨੀਤਿ. ਯਦਿਪਿ ਵਿਭਙ੍ਗੇ ਪੁਗ੍ਗਲਾਧਿਟ੍ਠਾਨਾ ਦੇਸਨਾ ਕਤਾ, ਅਤ੍ਥੋ ਪਨ ਤਤ੍ਰਾਪਿ ਵਿਭਙ੍ਗੇਪਿ ਯਥਾ ਇਧ ‘‘ਇਮਿਨਾ ਚ ਵਿਤਕ੍ਕੇਨਾ’’ਤਿਆਦਿਨਾ ਧਮ੍ਮਵਸੇਨ ਵੁਤ੍ਤੋ, ਏਵਮੇਵ ਦਟ੍ਠਬ੍ਬੋ, ਪਰਮਤ੍ਥਤੋ ਪੁਗ੍ਗਲਸ੍ਸੇਵ ਅਭਾਵਤੋਤਿ ਅਧਿਪ੍ਪਾਯੋ. ਅਤ੍ਥੋ…ਪੇ… ਦਟ੍ਠਬ੍ਬੋ ਝਾਨਸਮਙ੍ਗਿਨੋ ਵਿਤਕ੍ਕਵਿਚਾਰਸਮਙ੍ਗਿਤਾਦਸ੍ਸਨੇਨ, ਝਾਨਸ੍ਸੇਵ ਚ ਸਵਿਤਕ੍ਕਸਵਿਚਾਰਤਾਯ ਵੁਤ੍ਤਤ੍ਤਾਤਿ ਏਵਂ ਵਾ ਏਤ੍ਥ ਅਤ੍ਥੋ ਦਟ੍ਠਬ੍ਬੋ.
ਵਿਵੇਕਾਤਿ ਵਿਵੇਕਾ ਹੇਤੁਭੂਤਾਤਿ ਵਿਵੇਕ-ਸਦ੍ਦਸ੍ਸ ਭਾਵਸਾਧਨਤਂ ਸਨ੍ਧਾਯਾਹ. ਵਿਵੇਕੇਤਿ ਕਤ੍ਤੁਸਾਧਨਤਂ, ਕਮ੍ਮਸਾਧਨਤਂ ਵਾ. ‘‘ਵਿਵਿਤ੍ਤੋ’’ਤਿ ਹਿ ਇਮਿਨਾ ਨੀਵਰਣੇਹਿ ਵਿਨਾਭੂਤੋ ਤੇਹਿ ਵਿਵੇਚਿਤੋਤਿ ਚ ਸਾਧਨਦ੍ਵਯਮ੍ਪਿ ਸਙ੍ਗਹਿਤਮੇਵਾਤਿ.
੭੨. ਪੀਣਯਤੀਤਿ ਤਪ੍ਪੇਤਿ, ਵਡ੍ਢੇਤਿ ਵਾ. ਸਮ੍ਪਿਯਾਯਨਲਕ੍ਖਣਾਤਿ ਪਰਿਤੁਸ੍ਸਨਲਕ੍ਖਣਾ. ਪੀਣਨਰਸਾਤਿ ਪਰਿਬ੍ਰੂਹਨਰਸਾ. ਫਰਣਰਸਾਤਿ ਪਣੀਤਰੂਪੇਹਿ ਕਾਯਸ੍ਸ ਬ੍ਯਾਪਨਰਸਾ. ਉਦਗ੍ਗਭਾਵੋ ਓਦਗ੍ਯਂ. ਖੁਦ੍ਦਿਕਾ ਲਹੁਂ ਲੋਮਹਂਸਨਮਤ੍ਤਂ ਕਤ੍ਵਾ ਭਿਨ੍ਨਾ ਨ ਪੁਨ ਉਪ੍ਪਜ੍ਜਤਿ. ਖਣਿਕਾ ਬਹੁਲਂ ਉਪ੍ਪਜ੍ਜਤਿ. ਉਬ੍ਬੇਗਤੋ ਫਰਣਾ ਨਿਚ੍ਚਲਤ੍ਤਾ, ਚਿਰਟ੍ਠਿਤਿਕਤ੍ਤਾ ਚ ਪਣੀਤਤਰਾ. ਚੇਤਿਯਙ੍ਗਣਂ ਗਨ੍ਤ੍ਵਾਤਿ ਪੁਣ੍ਣਵਲ੍ਲਿਕਵਿਹਾਰੇ ਚੇਤਿਯਙ੍ਗਣਂ ਗਨ੍ਤ੍ਵਾ. ਪਕਤਿਯਾ ਦਿਟ੍ਠਾਰਮ੍ਮਣਵਸੇਨਾਤਿ ਪੁਬ੍ਬੇ ਮਹਾਚੇਤਿਯਂ ਗਹਿਤਾਰਮ੍ਮਣਵਸੇਨ. ਚਿਤ੍ਰਗੇਣ੍ਡੁਕੋ ਵਿਚਿਤ੍ਰਾਕਾਰੇਨ ਕਤਗੇਣ੍ਡੁਕੋ. ਉਪਨਿਸ੍ਸਯੇਤਿ ਸਮੀਪੇ, ਤਸ੍ਸ ਵਾ ਵਿਹਾਰਸ੍ਸ ਨਿਸ੍ਸਯਭੂਤੇ, ਗੋਚਰਟ੍ਠਾਨਭੂਤੇਤਿ ਅਤ੍ਥੋ.
ਘਰਾਜਿਰੇਤਿ ਗੇਹਙ੍ਗਣੇ. ਪਬ੍ਬਤਸਿਖਰੇ ਕਤਚੇਤਿਯਂ ‘‘ਆਕਾਸਚੇਤਿਯ’’ਨ੍ਤਿ ਵੁਤ੍ਤਂ. ਗਹਿਤਨਿਮਿਤ੍ਤੇਨੇਵਾਤਿ ਚੇਤਿਯਵਨ੍ਦਨਂ, ਧਮ੍ਮਸ੍ਸਵਨਞ੍ਚ ਉਦ੍ਦਿਸ੍ਸ ‘‘ਧਞ੍ਞਾ ਵਤਿਮੇ’’ਤਿਆਦਿਨਾ ਗਹਿਤਕੁਸਲਨਿਮਿਤ੍ਤੇਨੇਵ ਕਾਰਣਭੂਤੇਨ. ਗਹਿਤਂ ਵਾ ਨਿਮਿਤ੍ਤਂ ਏਤੇਨਾਤਿ ਗਹਿਤਨਿਮਿਤ੍ਤਂ, ਵੁਤ੍ਤਾਕਾਰੇਨ ਪਵਤ੍ਤਚਿਤ੍ਤਂ, ਤੇਨ ਗਹਿਤਨਿਮਿਤ੍ਤੇਨੇਵ ਚਿਤ੍ਤੇਨ ਸਹ. ਪਕ੍ਖਨ੍ਦਨ੍ਤਿ ਅਨੁਪਵਿਟ੍ਠਂ. ਅਨੁਪਰਿਪ੍ਫੁਟਨ੍ਤਿ ਅਨੁ ਅਨੁ ਸਮਨ੍ਤਤੋ ਫੁਟਂ, ਸਬ੍ਬਸੋ ਅਨੁਵਿਸਟਨ੍ਤਿ ਅਤ੍ਥੋ.
ਪਸ੍ਸਦ੍ਧਿਯਾ ਨਿਮਿਤ੍ਤਭਾਵੇਨ ਗਬ੍ਭਂ ਗਣ੍ਹਨ੍ਤੀ. ਪਰਿਪਾਚਨਵਸੇਨ ਪਰਿਪਾਕਂ ਗਚ੍ਛਨ੍ਤੀ. ਅਪ੍ਪਨਾਸਮ੍ਪਯੁਤ੍ਤਾਵ ਪੀਤਿ ਅਪ੍ਪਨਾਸਮਾਧਿਪੂਰਿਕਾ. ਖਣਿਕਸਮਾਧਿਪੂਰਿਕਾ ਚ ਉਪਚਾਰਸਮਾਧਿਪੂਰਿਕਾ ਚ ਅਪ੍ਪਨਾਸਮਾਧਿਸ੍ਸ ਵਿਦੂਰਤਰਾਤਿ ਤਦੁਭਯਂ ਅਨਾਮਸਨ੍ਤੋ ‘‘ਤਾਸੁ ਯਾ ਅਪ੍ਪਨਾਸਮਾਧਿਸ੍ਸਾ’’ਤਿਆਦਿਮਾਹ. ਸਮਾਧਿਸਮ੍ਪਯੋਗਂ ਗਤਾਤਿ ਪੁਬ੍ਬੇ ਉਪਚਾਰਸਮਾਧਿਨਾ ਸਮ੍ਪਯੁਤ੍ਤਾ ਹੁਤ੍ਵਾ ਅਨੁਕ੍ਕਮੇਨ ਵਡ੍ਢਿਤ੍ਵਾ ਅਪ੍ਪਨਾਸਮਾਧਿਨਾ ਸਮ੍ਪਯੋਗਂ ਗਤਾ.
੭੩. ਸੁਖਯਤੀਤਿ ਸੁਖਂ, ਅਤ੍ਤਨਾ ਸਮ੍ਪਯੁਤ੍ਤਧਮ੍ਮੇ ਲਦ੍ਧਸ੍ਸਾਦੇ ਕਰੋਤੀਤਿ ਅਤ੍ਥੋ. ਸ੍ਵਾਯਂ ਕਤ੍ਤੁਨਿਦ੍ਦੇਸੋ ਪਰਿਯਾਯਲਦ੍ਧੋ ਧਮ੍ਮਤੋ ਅਞ੍ਞਸ੍ਸ ਕਤ੍ਤੁ ਨਿਵਤ੍ਤਨਤ੍ਥੋ, ਨਿਪ੍ਪਰਿਯਾਯੇਨ ਪਨ ਭਾਵਸਾਧਨਮੇਵ ਲਬ੍ਭਤੀਤਿ ‘‘ਸੁਖਨਂ ਸੁਖ’’ਨ੍ਤਿ ਵੁਤ੍ਤਂ. ਇਟ੍ਠਸਭਾਵਤ੍ਤਾ ਤਂਸਮਙ੍ਗੀਪੁਗ੍ਗਲਂ, ਸਮ੍ਪਯੁਤ੍ਤਧਮ੍ਮੇ ਵਾ ਅਤ੍ਤਨਿ ਸਾਦਯਤੀਤਿ ਸਾਤਂ ਦ-ਕਾਰਸ੍ਸ ਤ-ਕਾਰਂ ਕਤ੍ਵਾ. ਸਾਤਂ ‘‘ਮਧੁਰ’’ਨ੍ਤਿ ਵਦਨ੍ਤਿ. ਸਾਤਂ ਲਕ੍ਖਣਂ ਏਤਸ੍ਸਾਤਿ ਸਾਤਲਕ੍ਖਣਂ. ਉਪਬ੍ਰੂਹਨਂ ਸਮ੍ਪਯੁਤ੍ਤਧਮ੍ਮਾਨਂ ਸਂਵਡ੍ਢਨਂ. ਦੁਕ੍ਖਂ ਵਿਯ ਅਵਿਸ੍ਸਜ੍ਜੇਤ੍ਵਾ ਅਦੁਕ੍ਖਮਸੁਖਾ ਵਿਯ ਅਨਜ੍ਝੁਪੇਕ੍ਖਿਤ੍ਵਾ ਅਨੁ ਅਨੁ ਗਣ੍ਹਨਂ, ਉਪਕਾਰਿਤਾ ਵਾ ਅਨੁਗ੍ਗਹੋ. ਕਤ੍ਥਚਿ ਪਠਮਜ੍ਝਾਨਾਦਿਕੇ. ਪਟਿਲਾਭਤੁਟ੍ਠੀਤਿ ਪਟਿਲਾਭਵਸੇਨ ਉਪ੍ਪਜ੍ਜਨਕਤੁਟ੍ਠਿ. ਪਟਿਲਦ੍ਧਰਸਾਨੁਭਵਨਨ੍ਤਿ ਪਟਿਲਦ੍ਧਸ੍ਸ ਆਰਮ੍ਮਣਰਸਸ੍ਸ ਅਨੁਭਵਨਨ੍ਤਿ ਸਭਾਵਤੋ ਪੀਤਿਸੁਖਾਨਿ ਵਿਭਜਿਤ੍ਵਾ ਦਸ੍ਸੇਤਿ. ਯਤ੍ਥ ਪੀਤਿ, ਤਤ੍ਥ ਸੁਖਨ੍ਤਿ ਵਿਤਕ੍ਕਸ੍ਸ ਵਿਯ ਇਤਰੇਨ ਪੀਤਿਯਾ ਸੁਖੇਨ ਅਚ੍ਚਨ੍ਤਸਂਯੋਗਮਾਹ. ‘‘ਯਤ੍ਥ ਸੁਖਂ, ਤਤ੍ਥ ਨ ਨਿਯਮਤੋ ਪੀਤੀ’’ਤਿ ਵਿਚਾਰਸ੍ਸ ਵਿਯ ਵਿਤਕ੍ਕੇਨ ਸੁਖਸ੍ਸ ਪੀਤਿਯਾ ਅਨਚ੍ਚਨ੍ਤਸਂਯੋਗਂ. ਤੇਨ ਅਚ੍ਚਨ੍ਤਾਨਚ੍ਚਨ੍ਤਸਂਯੋਗਿਤਾਯ ਪੀਤਿਸੁਖਾਨਂ ਵਿਸੇਸਂ ਦਸ੍ਸੇਤਿ. ਕਂ ਤਾਰੇਨ੍ਤਿ ਏਤ੍ਥਾਤਿ ਕਨ੍ਤਾਰਂ, ਨਿਰੁਦਕਮਰੁਟ੍ਠਾਨਂ. ਵਨਮੇਵ ਵਨਨ੍ਤਂ. ਤਸ੍ਮਿਂ ਤਸ੍ਮਿਂ ਸਮਯੇਤਿ ਇਟ੍ਠਾਰਮ੍ਮਣਸ੍ਸ ਪਟਿਲਾਭਸਮਯੇ, ਪਟਿਲਦ੍ਧਸ੍ਸ ਰਸਾਨੁਭਵਨਸਮਯੇ, ਵਨਚ੍ਛਾਯਾਦੀਨਂ ਸਵਨਦਸ੍ਸਨਸਮਯੇ, ਪਵੇਸਪਰਿਭੋਗਸਮਯੇ ਚ. ਪਾਕਟਭਾਵਤੋਤਿ ਯਥਾਕ੍ਕਮਂ ਪੀਤਿਸੁਖਾਨਂ ਵਿਭੂਤਭਾਵਤੋ.
ਵਿਵੇਕਜਂ ਪੀਤਿਸੁਖਨ੍ਤਿ ਏਤ੍ਥ ਪੁਰਿਮਸ੍ਮਿਂ ਅਤ੍ਥੇ ਵਿਵੇਕਜਨ੍ਤਿ ਝਾਨਂ ਵੁਤ੍ਤਂ. ਪੀਤਿਸੁਖਸਦ੍ਦਤੋ ਚ ਅਤ੍ਥਿਅਤ੍ਥਵਿਸੇਸਤੋ ‘‘ਅਸ੍ਸ ਝਾਨਸ੍ਸ, ਅਸ੍ਮਿਂ ਵਾ ਝਾਨੇ’’ਤਿ ਏਤ੍ਥ ਅ-ਕਾਰੋ ਦਟ੍ਠਬ੍ਬੋ. ਦੁਤਿਯੇ ਪੀਤਿਸੁਖਮੇਵ ਵਿਵੇਕਜਂ. ‘‘ਵਿਵੇਕਜਂਪੀਤਿਸੁਖ’’ਨ੍ਤਿ ਚ ਅਞ੍ਞਪਦਤ੍ਥਸਮਾਸੋ, ਪਚ੍ਚਤ੍ਤਨਿਦ੍ਦੇਸਸ੍ਸ ਚ ਅਲੋਪੋ ਕਤੋ. ਲੋਪੇ ਵਾ ਸਤਿ ‘‘ਵਿਵੇਕਜਪੀਤਿਸੁਖ’’ਨ੍ਤਿ ਪਾਠੋਤਿ ਅਯਂ ਵਿਸੇਸੋ.
ਉਪਸਮ੍ਪਜ੍ਜਾਤਿ ਏਤ੍ਥ ਉਪ-ਸਂ-ਸਦ੍ਦਾ ‘‘ਉਪਲਬ੍ਭਤਿ, ਸਂਭੁਞ੍ਜਤੀ’’ਤਿਆਦੀਸੁ ਵਿਯ ਨਿਰਤ੍ਥਕਾਤਿ ਦਸ੍ਸੇਤੁਂ ‘‘ਉਪਗਨ੍ਤ੍ਵਾ’’ਤਿਆਦਿਂ ਵਤ੍ਵਾ ਪੁਨ ਤੇਸਂ ਸਾਤ੍ਥਕਭਾਵਂ ਦਸ੍ਸੇਤੁਂ ‘‘ਉਪਸਮ੍ਪਾਦਯਿਤ੍ਵਾ’’ਤਿਆਦਿ ਵੁਤ੍ਤਂ, ਤਸ੍ਮਾ ਪਤ੍ਵਾ, ਸਾਧੇਤ੍ਵਾਤਿ ਵਾ ਅਤ੍ਥੋ. ਇਰਿਯਨ੍ਤਿ ਕਿਰਿਯਂ. ਵੁਤ੍ਤਿਆਦੀਨਿ ਤਸ੍ਸੇਵ ਵੇਵਚਨਾਨਿ. ਪਾਲਨਾਤਿ ਹਿ ਏਕਂ ਇਰਿਯਾਪਥਬਾਧਨਂ ਇਰਿਯਾਪਥਨ੍ਤਰੇਹਿ ਰਕ੍ਖਣਾ.
ਪਞ੍ਚਙ੍ਗਵਿਪ੍ਪਹੀਨਾਦਿਵਣ੍ਣਨਾ
੭੪. ਪਞ੍ਚ ਅਙ੍ਗਾਨਿ ਵਿਕ੍ਖਮ੍ਭਨਵਸੇਨ ਪਹੀਨਾਨਿ ਏਤਸ੍ਸਾਤਿ ਪਞ੍ਚਙ੍ਗਵਿਪ੍ਪਹੀਨਂ. ‘‘ਅਗ੍ਯਾਹਿਤੋ’’ਤਿ ਏਤ੍ਥ ਆਹਿਤ-ਸਦ੍ਦਸ੍ਸ ਵਿਯ ਵਿਪ੍ਪਹੀਨ-ਸਦ੍ਦਸ੍ਸੇਤ੍ਥ ਪਰਵਚਨਂ ਦਟ੍ਠਬ੍ਬਂ, ਪਞ੍ਚਹਿ ਅਙ੍ਗੇਹਿ ਵਿਪ੍ਪਹੀਨਨ੍ਤਿ ਵਾ ਪਞ੍ਚਙ੍ਗਵਿਪ੍ਪਹੀਨਂ. ਨਨੁ ਅਞ੍ਞੇਪਿ ਅਕੁਸਲਾ ਧਮ੍ਮਾ ਇਮਿਨਾ ਝਾਨੇਨ ਪਹੀਯਨ੍ਤਿ, ਅਥ ਕਸ੍ਮਾ ਪਞ੍ਚਙ੍ਗਵਿਪ੍ਪਹੀਨਤਾਵ ਵੁਚ੍ਚਤੀਤਿ ਆਹ ‘‘ਕਿਞ੍ਚਾਪੀ’’ਤਿਆਦਿ. ਝਾਨਲਾਭਿਨੋਪਿ ਅਝਾਨਸਮਙ੍ਗਿਕਾਲੇ ਝਾਨਪਟਿਪਕ੍ਖਲੋਭਚਿਤ੍ਤਾਦੀਨਂ ਪਵਤ੍ਤਿਸਬ੍ਭਾਵਤੋ ‘‘ਝਾਨਕ੍ਖਣੇ’’ਤਿ ਵੁਤ੍ਤਂ. ਪਹੀਯਨ੍ਤੀਤਿ ਵਿਗਚ੍ਛਨ੍ਤਿ, ਨਪ੍ਪਵਤ੍ਤਨ੍ਤੀਤਿ ਅਤ੍ਥੋ. ਏਕਤ੍ਤਾਰਮ੍ਮਣੇਤਿ ਪਥਵੀਕਸਿਣਾਦਿਵਸੇਨ ਏਕਸਭਾਵੇ, ਏਕਗ੍ਗਤਾਸਙ੍ਖਾਤੇ ਏਕਤ੍ਤਾਵਹੇ ਵਾ ਆਰਮ੍ਮਣੇ. ਤਨ੍ਤਿ ਤਂ ਨਾਨਾਵਿਸਯਪਲੋਭਿਤਂ ਚਿਤ੍ਤਂ. ਕਾਮਧਾਤੁਪ੍ਪਹਾਨਾਯਾਤਿ ਨਾਨਾਵਿਸਯਸਮੂਪਬ੍ਯੂਲ਼੍ਹਾਯ ਕਾਮਧਾਤੁਯਾ ਪਹਾਨਾਯ ਸਮਤਿਕ੍ਕਮਾਯ ਪਟਿਪਦਂ ਝਾਨਂ ਨਪ੍ਪਟਿਪਜ੍ਜਤਿ. ਨਿਰਨ੍ਤਰਨ੍ਤਿ ਵਿਕ੍ਖੇਪੇਨ ਅਨਨ੍ਤਰਿਤਂ, ਸਹਿਤਨ੍ਤਿ ਅਤ੍ਥੋ. ਅਕਮ੍ਮਞ੍ਞਨ੍ਤਿ ਅਕਮ੍ਮਨੀਯਂ, ਭਾਵਨਾਕਮ੍ਮਸ੍ਸ ਅਯੋਗ੍ਯਨ੍ਤਿ ਅਤ੍ਥੋ. ਉਦ੍ਧਚ੍ਚਕੁਕ੍ਕੁਚ੍ਚਪਰੇਤਨ੍ਤਿ ਉਦ੍ਧਚ੍ਚਕੁਕ੍ਕੁਚ੍ਚੇਨ ਅਭਿਭੂਤਂ. ਪਰਿਬ੍ਭਮਤਿ ਅਨਵਟ੍ਠਾਨਤੋ, ਅਵਟ੍ਠਾਨਸ੍ਸ ਸਮਾਧਾਨਸ੍ਸ ਅਭਾਵਤੋਤਿ ਅਤ੍ਥੋ. ਵਿਚਿਕਿਚ੍ਛਾਯ ਉਪਹਤਨ੍ਤਿ ਸਾਤਿਸਯਸ੍ਸ ਵਿਚਾਰਸ੍ਸ ਅਭਾਵਤੋ ‘‘ਸਮ੍ਮਾਸਮ੍ਬੁਦ੍ਧੋ ਨੁ ਖੋ ਭਗਵਾ, ਨ ਨੁ ਖੋ’’ਤਿ, ‘‘ਪਥਵੀ ਪਥਵੀ’’ਤਿਆਦਿਨਾ ਮਨਸਿਕਾਰੇਨ, ‘‘ਝਾਨਂ ਸਿਯਾ ਨੁ ਖੋ, ਨ ਨੁ ਖੋ’’ਤਿਆਦਿਨਾ ਚ ਪਵਤ੍ਤਾਯ ਵਿਚਿਕਿਚ੍ਛਾਯ ਉਪਹਤਂ. ਨਾਰੋਹਤਿ ਅਪ੍ਪਟਿਪਤ੍ਤਿਨਿਮਿਤ੍ਤਤ੍ਤਾ. ਵਿਸੇਸੇਨ ਝਾਨਨ੍ਤਰਾਯਕਰਤ੍ਤਾਤਿ ਸਮਾਧਿਆਦੀਨਂ ਉਜੁਵਿਪਚ੍ਚਨੀਕਭਾਵੇਨ ਝਾਨਾਧਿਗਮਸ੍ਸ ਅਨ੍ਤਰਾਯਕਰਣਤੋ.
ਤੇਹੀਤਿ ਝਾਨਾਧਿਗਮਸ੍ਸ ਪਚ੍ਚਯਭੂਤੇਹਿ ਵਿਤਕ੍ਕਵਿਚਾਰੇਹਿ. ਅਵਿਕ੍ਖੇਪਾਯ ਸਮ੍ਪਾਦਿਤਪ੍ਪਯੋਗਸ੍ਸਾਤਿ ਤਤੋ ਏਵਂ ਸਮਾਧਾਨਾਯ ਨਿਪ੍ਫਾਦਿਤਭਾਵਨਾਪਯੋਗਸ੍ਸ. ਚੇਤਸੋ ਪਯੋਗਸਮ੍ਪਤ੍ਤਿਸਮ੍ਭਵਾਤਿ ਯਥਾਵੁਤ੍ਤਭਾਵਨਾਪਯੋਗਸਮ੍ਪਤ੍ਤਿਸਮੁਟ੍ਠਾਨਾ. ਪੀਤਿ ਪੀਣਨਂ ਭਾਵਨਾਵਸੇਨ ਤਪ੍ਪਨਂ. ਉਪਬ੍ਰੂਹਨਂ ਭਾਵਨਾਵਸੇਨ ਪਰਿਵੁਦ੍ਧਿਂ ਚੇਤਸੋ ਕਰੋਤੀਤਿ ਸਮ੍ਬਨ੍ਧੋ. ਨਨ੍ਤਿ ਚਿਤ੍ਤਂ. ਸਸੇਸਸਮ੍ਪਯੁਤ੍ਤਧਮ੍ਮਨ੍ਤਿ ਅਵਸਿਟ੍ਠਫਸ੍ਸਾਦਿਧਮ੍ਮਸਹਿਤਂ, ਸਮਂ ਸਮ੍ਮਾ ਚ ਆਧਿਯਤੀਤਿ ਸਮ੍ਬਨ੍ਧੋ. ਇਨ੍ਦ੍ਰਿਯਸਮਤਾਵਸੇਨ ਸਮਂ, ਪਟਿਪਕ੍ਖਧਮ੍ਮਾਨਂ. ਦੂਰੀਭਾਵੇ ਲੀਨੁਦ੍ਧਚ੍ਚਾਭਾਵੇਨ ਸਮ੍ਮਾ ਚ ਠਪੇਤੀਤਿ ਅਤ੍ਥੋ. ਏਕਗ੍ਗਤਾ ਹਿ ਸਮਾਧਾਨਕਿਚ੍ਚੇਨ ਚਿਤ੍ਤਂ, ਸਮ੍ਪਯੁਤ੍ਤਧਮ੍ਮੇ ਚ ਅਤ੍ਤਾਨਂ ਅਨੁਵਤ੍ਤਾਪੇਨ੍ਤੀ ਝਾਨਕ੍ਖਣੇ ਸਾਤਿਸਯਂ ਸਮਾਹਿਤੇ ਕਰੋਤੀਤਿ. ਉਪ੍ਪਤ੍ਤਿਵਸੇਨਾਤਿ ਯਥਾਪਚ੍ਚਯਂ ਉਪ੍ਪਜ੍ਜਨਵਸੇਨ. ਏਤੇਸੁ ਵਿਤਕ੍ਕਾਦੀਸੁ ਝਾਨਂ ਉਪ੍ਪਨ੍ਨਂ ਨਾਮ ਹੋਤਿ ਤਤ੍ਥੇਵ ਝਾਨਵੋਹਾਰਤੋ. ਤੇਨਾਹ ‘‘ਤਸ੍ਮਾ’’ਤਿਆਦਿ. ‘‘ਯਥਾ ਪਨਾ’’ਤਿਆਦਿਨਾਪਿ ਉਪਮਾਵਸੇਨ ਤਮੇਵਤ੍ਥਂ ਪਾਕਟਤਰਂ ਕਰੋਤਿ.
ਪਕਤਿਚਿਤ੍ਤਤੋਤਿ ਪਾਕਤਿਕਕਾਮਾਵਚਰਚਿਤ੍ਤਤੋ. ਸੁਵਿਸਦੇਨਾਤਿ ਸੁਟ੍ਠੁ ਵਿਸਦੇਨ, ਪਟੁਤਰੇਨਾਤਿ ਅਤ੍ਥੋ. ਸਬ੍ਬਾਵਨ੍ਤਨ੍ਤਿ ਸਬ੍ਬਾਵਯਵਵਨ੍ਤਂ, ਅਨਵਸੇਸਨ੍ਤਿ ਅਤ੍ਥੋ. ਅਪ੍ਫੁਟਨ੍ਤਿ ਅਸਮ੍ਫੁਟ੍ਠਂ. ਆਰਮ੍ਮਣੇਸੁ ਫੁਸਿਤਾਤਿ ਅਪ੍ਪਨਾਵਸੇਨ ਪਵਤ੍ਤਮਾਨਾ ਚਿਤ੍ਤੇਕਗ੍ਗਤਾ ਸਮਨ੍ਤਤੋ ਆਰਮ੍ਮਣਂ ਫਰਨ੍ਤੀ ਵਿਯ ਹੋਤੀਤਿ ਕਤ੍ਵਾ ਵੁਤ੍ਤਂ. ਕਸ੍ਮਾ ਪਨੇਤ੍ਥ ਝਾਨਪਾਠੇ ਅਗ੍ਗਹਿਤਾ ਚਿਤ੍ਤੇਕਗ੍ਗਤਾ ਗਹਿਤਾਤਿ ਅਨੁਯੋਗਂ ਸਨ੍ਧਾਯ ‘‘ਤਤ੍ਥ ਚਿਤ੍ਤੇਕਗ੍ਗਤਾ’’ਤਿਆਦਿ ਵੁਤ੍ਤਂ. ਤਤ੍ਥਾਤਿ ਤੇਸੁ ਝਾਨਙ੍ਗੇਸੁ. ਨ ਨਿਦ੍ਦਿਟ੍ਠਾਤਿ ਸਰੂਪਤੋ ਨ ਨਿਦ੍ਦਿਟ੍ਠਾ, ਸਾਮਞ੍ਞਤੋ ਪਨ ਝਾਨਗ੍ਗਹਣੇਨ ਗਹਿਤਾ. ਏਵਂ ਵੁਤ੍ਤਤ੍ਤਾਤਿ ਸਰੂਪੇਨੇਵ ਵੁਤ੍ਤਤ੍ਤਾ, ਅਙ੍ਗਮੇਵ ਚਿਤ੍ਤੇਕਗ੍ਗਤਾਤਿ ਸਮ੍ਬਨ੍ਧੋ. ਯੇਨ ਅਧਿਪ੍ਪਾਯੇਨਾਤਿ ਯੇਨ ਵਿਤਕ੍ਕਾਦੀਹਿ ਸਹ ਵਤ੍ਤਨ੍ਤਂ ਧਮ੍ਮਂ ਦੀਪੇਤੁਂ ਤਸ੍ਸ ਪਕਾਸਨਾਧਿਪ੍ਪਾਯੇਨ ‘‘ਸਵਿਤਕ੍ਕਂ ਸਵਿਚਾਰ’’ਨ੍ਤਿਆਦਿਨਾ ਉਦ੍ਦੇਸੋ ਕਤੋ. ਸੋ ਏਵ ਅਧਿਪ੍ਪਾਯੋ ਤੇਨ ਭਗਵਤਾ ਵਿਭਙ੍ਗੇ ‘‘ਚਿਤ੍ਤੇਕਗ੍ਗਤਾ’’ਤਿ ਨਿਦ੍ਦਿਸਨ੍ਤੇਨ ਪਕਾਸਿਤੋ. ਤਸ੍ਮਾ ਸਾ ਝਾਨਪਾਠੇ ਅਗ੍ਗਹਿਤਾਤਿ ਨ ਚਿਨ੍ਤੇਤਬ੍ਬਂ.
ਤਿਵਿਧਕਲ੍ਯਾਣਵਣ੍ਣਨਾ
੭੫. ਆਦਿਮਜ੍ਝਪਰਿਯੋਸਾਨਵਸੇਨਾਤਿ ਝਾਨਸ੍ਸ ਆਦਿਮਜ੍ਝਪਰਿਯੋਸਾਨਵਸੇਨ. ਲਕ੍ਖਣਵਸੇਨਾਤਿ ਤੇਸਂਯੇਵ ਅਪ੍ਪਨਾਯਂ ਲਕ੍ਖਿਤਬ੍ਬਭਾਵਵਸੇਨ.
ਤਤ੍ਰਾਤਿ ਤਸ੍ਮਿਂ ਕਲ੍ਯਾਣਤਾਲਕ੍ਖਣਾਨਂ ਵਿਭਾਵਨੇ. ਪਟਿਪਦਾਵਿਸੁਦ੍ਧੀਤਿ ਪਟਿਪਜ੍ਜਤਿ ਝਾਨਂ ਏਤਾਯਾਤਿ ਪਟਿਪਦਾ, ਗੋਤ੍ਰਭੁਪਰਿਯੋਸਾਨੋ ਪੁਬ੍ਬਭਾਗਿਯੋ ਭਾਵਨਾਨਯੋ. ਪਰਿਪਨ੍ਥਤੋ ਵਿਸੁਜ੍ਝਨਂ ਵਿਸੁਦ੍ਧਿ, ਪਟਿਪਦਾਯ ਵਿਸੁਦ੍ਧਿ ਪਟਿਪਦਾਵਿਸੁਦ੍ਧਿ. ਸਾ ਪਨਾਯਂ ਯਸ੍ਮਾ ਝਾਨਸ੍ਸ ਉਪ੍ਪਾਦਕ੍ਖਣੇ ਲਬ੍ਭਤਿ, ਤਸ੍ਮਾ ਵੁਤ੍ਤਂ ‘‘ਪਟਿਪਦਾਵਿਸੁਦ੍ਧਿ ਆਦੀ’’ਤਿ. ਉਪੇਕ੍ਖਾਨੁਬ੍ਰੂਹਨਾਤਿ ਵਿਸੋਧੇਤਬ੍ਬਤਾਦੀਨਂ ਅਭਾਵਤੋ ਝਾਨਪਰਿਯਾਪਨ੍ਨਾਯ ਤਤ੍ਰਮਜ੍ਝਤ੍ਤੁਪੇਕ੍ਖਾਯ ਕਿਚ੍ਚਨਿਪ੍ਫਤ੍ਤਿਯਾ ਅਨੁਬ੍ਰੂਹਨਾ. ਸਾ ਪਨਾਯਂ ਵਿਸੇਸਤੋ ਝਾਨਸ੍ਸ ਠਿਤਿਕ੍ਖਣੇ ਲਬ੍ਭਤਿ. ਤੇਨ ਵੁਤ੍ਤਂ ‘‘ਉਪੇਕ੍ਖਾਨੁਬ੍ਰੂਹਨਾ ਮਜ੍ਝੇ’’ਤਿ. ਸਮ੍ਪਹਂਸਨਾਤਿ ਤਤ੍ਥ ਧਮ੍ਮਾਨਂ ਅਨਤਿਵਤ੍ਤਨਾਦਿਸਾਧਕਸ੍ਸ ਞਾਣਸ੍ਸ ਕਿਚ੍ਚਨਿਪ੍ਫਤ੍ਤਿਵਸੇਨ ਪਰਿਯੋਦਪਨਾ. ਸਾ ਪਨ ਯਸ੍ਮਾ ਝਾਨਸ੍ਸ ਓਸਾਨਕ੍ਖਣੇ ਪਾਕਟਾ ਹੋਤਿ, ਤਸ੍ਮਾ ਵੁਤ੍ਤਂ ‘‘ਸਮ੍ਪਹਂਸਨਾ ਪਰਿਯੋਸਾਨ’’ਨ੍ਤਿ. ਇਮਾਨਿ ਤੀਣਿ ਲਕ੍ਖਣਾਨੀਤਿ ਪਰਿਪਨ੍ਥਤੋ ਚਿਤ੍ਤਸ੍ਸ ਵਿਸੁਜ੍ਝਨਾਕਾਰੋ, ਮਜ੍ਝਿਮਸ੍ਸ ਸਮਥਨਿਮਿਤ੍ਤਸ੍ਸ ਪਟਿਪਜ੍ਜਨਾਕਾਰੋ, ਤਤ੍ਥ ਪਕ੍ਖਨ੍ਦਨਾਕਾਰੋਤਿ ਇਮਾਨਿ ਤੀਣਿ ਝਾਨਸ੍ਸ ਆਦਿਤੋ ਉਪ੍ਪਾਦਕ੍ਖਣੇ ਅਪ੍ਪਨਾਪਤ੍ਤਿਲਕ੍ਖਣਾਨਿ ਤੇਹਿ ਆਕਾਰੇਹਿ ਵਿਨਾ ਅਪ੍ਪਨਾਪਤ੍ਤਿਯਾ ਅਭਾਵਤੋ, ਅਸਤਿ ਚ ਅਪ੍ਪਨਾਯ ਤਦਭਾਵਤੋ. ਆਦਿਕਲ੍ਯਾਣਞ੍ਚੇਵ ਵਿਸੁਦ੍ਧਿਪਟਿਪਦਤ੍ਤਾ. ਯਥਾਵੁਤ੍ਤੇਹਿ ਲਕ੍ਖਣੇਹਿ ਸਮਨ੍ਨਾਗਤਤ੍ਤਾ, ਸਮ੍ਪਨ੍ਨਲਕ੍ਖਣਤ੍ਤਾ ਚ ਤਿਲਕ੍ਖਣਸਮ੍ਪਨ੍ਨਞ੍ਚ. ਇਮਿਨਾ ਨਯੇਨ ਮਜ੍ਝਪਰਿਯੋਸਾਨਲਕ੍ਖਣਾਨਞ੍ਚ ਯੋਜਨਾ ਵੇਦਿਤਬ੍ਬਾ.
ਸਮ੍ਭਰੀਯਤਿ ਝਾਨਂ ਏਤੇਨਾਤਿ ਸਮ੍ਭਾਰੋ, ਨਾਨਾਵਜ੍ਜਨਪਰਿਕਮ੍ਮਂ. ਸਹ ਸਮ੍ਭਾਰੇਨਾਤਿ ਸਸਮ੍ਭਾਰੋ, ਸੋ ਏਵ ਸਸਮ੍ਭਾਰਿਕੋ. ਉਪਚਾਰੋਤਿ ਏਕਾਵਜ੍ਜਨੂਪਚਾਰਮਾਹ. ਪਗ੍ਗਹਾਦਿਕਿਚ੍ਚਸ੍ਸ ਪੁਬ੍ਬਭਾਗੇ ਭਾਵਨਾਯ ਏਵ ਸਾਧਿਤਤ੍ਤਾ ਯਾ ਤਤ੍ਥ ਏਕਾਵਜ੍ਜਨੂਪਚਾਰੇ ਸਿਦ੍ਧਾ ਅਜ੍ਝੁਪੇਕ੍ਖਨਾ, ਸਾ ਝਾਨਕ੍ਖਣੇ ਪਰਿਬ੍ਰੂਹਿਤਾ ਨਾਮ ਹੋਤੀਤਿ ਵੁਤ੍ਤਂ ‘‘ਉਪੇਕ੍ਖਾਨੁਬ੍ਰੂਹਨਾ ਨਾਮ ਅਪ੍ਪਨਾ’’ਤਿ. ਯਥਾਧਿਗਤਂ ਝਾਨਂ ਨਿਸ੍ਸਾਯ ਯੋ ਪਹਟ੍ਠਾਕਾਰੋ ਚਿਤ੍ਤਸ੍ਸ ਪਰਿਤੋਸੋ, ਤਂ ਪਚ੍ਚਵੇਕ੍ਖਣਾਵਸੇਨ ਪਵਤ੍ਤਂ ਸਨ੍ਧਾਯਾਹ ‘‘ਸਮ੍ਪਹਂਸਨਾ ਨਾਮ ਪਚ੍ਚਵੇਕ੍ਖਣਾ’’ਤਿ. ਏਕੇਤਿ ਅਭਯਗਿਰਿਵਾਸਿਨੋ. ਤੇ ਹਿ ਏਵਂ ਪਟਿਪਦਾਵਿਸੁਦ੍ਧਿਆਦਿਕੇ ਵਣ੍ਣਯਨ੍ਤਿ, ਤਦਯੁਤ੍ਤਂ. ਤਥਾ ਹਿ ਸਤਿ ਅਜ੍ਝਾਨਧਮ੍ਮੇਹਿ ਝਾਨਸ੍ਸ ਗੁਣਸਂਕਿਤ੍ਤਨਂ ਨਾਮ ਕਤਂ ਹੋਤਿ. ਨ ਹਿ ਭੂਮਨ੍ਤਰਂ ਭੂਮਨ੍ਤਰਪਰਿਯਾਪਨ੍ਨਂ ਹੋਤਿ. ਪਾਲ਼ਿਯਾ ਚੇਤਂ ਵਿਰੁਦ੍ਧਨ੍ਤਿ ਦਸ੍ਸੇਤੁਂ ‘‘ਯਸ੍ਮਾ ਪਨਾ’’ਤਿਆਦਿ ਵੁਤ੍ਤਂ. ਤਤ੍ਥ ਏਕਤ੍ਤਗਤਂ ਚਿਤ੍ਤਨ੍ਤਿ ਇਨ੍ਦ੍ਰਿਯਾਨਂ ਏਕਰਸਭਾਵੇਨ, ਏਕਗ੍ਗਤਾਯ ਚ ਸਿਖਾਪ੍ਪਤ੍ਤਿਯਾ ਤਦਨੁਗੁਣਂ ਏਕਤ੍ਤਂ ਗਤਨ੍ਤਿ ਏਕਤ੍ਤਗਤਂ, ਸਸਮ੍ਪਯੁਤ੍ਤਂ ਅਪ੍ਪਨਾਪਤ੍ਤਚਿਤ੍ਤਂ. ਤਸ੍ਸੇਵ ਪਟਿਪਦਾਵਿਸੁਦ੍ਧਿਪਕ੍ਖਨ੍ਦਤਾਦਿ ਅਨਨ੍ਤਰਮੇਵ ਵੁਚ੍ਚਤਿ. ਤਸ੍ਮਾਤਿ ਯਸ੍ਮਾ ਏਕਸ੍ਮਿਂਯੇਵ ਅਪ੍ਪਨਾਚਿਤ੍ਤਕ੍ਖਣੇ ਪਟਿਪਦਾਵਿਸੁਦ੍ਧਿਆਦਿ ਪਾਲ਼ਿਯਂ ਵੁਤ੍ਤਂ, ਤਸ੍ਮਾ ਆਗਮਨਵਸੇਨਾਤਿ ਪਰਿਕਮ੍ਮਾਗਮਨਵਸੇਨ. ਅਨਤਿਵਤ੍ਤਨਾਦੀਤਿ ਆਦਿ-ਸਦ੍ਦੇਨ ਇਨ੍ਦ੍ਰਿਯੇਕਰਸਤਾਤਦੁਪਗਵੀਰਿਯਵਾਹਨਾਸੇਵਨਾਨਿ ਸਙ੍ਗਣ੍ਹਾਤਿ. ਪਰਿਯੋਦਾਪਕਸ੍ਸਾਤਿ ਪਰਿਸੋਧਕਸ੍ਸ ਪਭਸ੍ਸਰਭਾਵਕਰਸ੍ਸ. ਅਨਤਿਵਤ੍ਤਨਾਦਿਭਾਵਸਾਧਨਮੇਵ ਚੇਤ੍ਥ ਞਾਣਸ੍ਸ ਕਿਚ੍ਚਨਿਪ੍ਫਤ੍ਤਿ ਵੇਦਿਤਬ੍ਬਾ.
ਤਸ੍ਮਿਨ੍ਤਿ ਤਸ੍ਮਿਂ ਵਾਰੇ, ਚਤੁਪਞ੍ਚਚਿਤ੍ਤਪਰਿਮਾਣਾਯ ਅਪ੍ਪਨਾਵੀਥਿਯਨ੍ਤਿ ਅਤ੍ਥੋ. ਤਤੋ ਪਰਿਪਨ੍ਥਤੋ. ਚਿਤ੍ਤਂ ਵਿਸੁਜ੍ਝਤੀਤਿ ਯਦਿਪਿ ਆਗਮਨਂ ਗਹੇਤੁਂ ਅਵਿਸੇਸੇਨ ਵਿਯ ਵੁਤ੍ਤਂ, ਪਰਿਕਮ੍ਮਵਿਸੁਦ੍ਧਿਤੋ ਪਨ ਅਪ੍ਪਨਾਵਿਸੁਦ੍ਧਿ ਸਾਤਿਸਯਾਵ. ਤੇਨਾਹ ‘‘ਵਿਸੁਦ੍ਧਤ੍ਤਾ’’ਤਿਆਦਿ. ਆਵਰਣਵਿਰਹਿਤਂ ਹੁਤ੍ਵਾਤਿ ਯੇਨਾਵਰਣੇਨ ਆਵਟਤ੍ਤਾ ਚਿਤ੍ਤਂ ਤਤੋ ਪੁਬ੍ਬੇ ਮਜ੍ਝਿਮਂ ਸਮਥਨਿਮਿਤ੍ਤਂ ਪਟਿਪਜ੍ਜਿਤੁਂ ਨ ਸਕ੍ਕੋਤਿ, ਤੇਨ ਵਿਵਿਤ੍ਤਂ ਹੁਤ੍ਵਾ, ਤਂ ਵਿਕ੍ਖਮ੍ਭੇਤ੍ਵਾਤਿ ਅਤ੍ਥੋ. ਲੀਨੁਦ੍ਧਚ੍ਚਸਙ੍ਖਾਤਾਨਂ ਉਭਿਨ੍ਨਂ ਅਨ੍ਤਾਨਂ ਅਨੁਪਗਮਨੇਨ ਮਜ੍ਝਿਮੋ, ਸਵਿਸੇਸਂ ਪਚ੍ਚਨੀਕਧਮ੍ਮਾਨਂ ਵੂਪਸਮਨਤੋ ਸਮਥੋ, ਯੋਗਿਨੋ ਸੁਖਵਿਸੇਸਾਨਂ ਕਾਰਣਭਾਵਤੋ ਨਿਮਿਤ੍ਤਞ੍ਚਾਤਿ ਮਜ੍ਝਿਮਂ ਸਮਥਨਿਮਿਤ੍ਤਂ. ਤੇਨਾਹ ‘‘ਸਮਪ੍ਪਵਤ੍ਤੋ ਅਪ੍ਪਨਾਸਮਾਧਿਯੇਵਾ’’ਤਿ. ਤਦਨਨ੍ਤਰਂ ਪਨ ਪੁਰਿਮਚਿਤ੍ਤਨ੍ਤਿ ਤਸ੍ਸ ਅਪ੍ਪਨਾਚਿਤ੍ਤਸ੍ਸ ਅਨਨ੍ਤਰਪਚ੍ਚਯਭੂਤਂ ਪੁਰਿਮਂ ਚਿਤ੍ਤਂ, ਗੋਤ੍ਰਭੁਚਿਤ੍ਤਨ੍ਤਿ ਅਤ੍ਥੋ. ਏਕਸਨ੍ਤਤਿਪਰਿਣਾਮਨਯੇਨਾਤਿ ਯਥਾ ‘‘ਤਦੇਵ ਖੀਰਂ ਦਧਿਸਮ੍ਪਨ੍ਨ’’ਨ੍ਤਿ, ਏਵਂ ਸਤਿਪਿ ਪਰਿਤ੍ਤਮਹਗ੍ਗਤਭਾਵਭੇਦੇ, ਪਚ੍ਚਯਪਚ੍ਚਯੁਪ੍ਪਨ੍ਨਭਾਵਭੇਦੇ ਚ ਏਕਿਸ੍ਸਾ ਏਵ ਸਨ੍ਤਤਿਯਾ ਪਰਿਣਾਮੂਪਗਮਨਨਯੇਨ ਏਕਤ੍ਤਨਯਵਸੇਨ. ਤਥਤ੍ਤਨ੍ਤਿ ਤਥਭਾਵਂ ਅਪ੍ਪਨਾਸਮਾਧਿਵਸੇਨ ਸਮਾਹਿਤਭਾਵਂ. ਏਵਂ ਪਟਿਪਨ੍ਨਤ੍ਤਾਤਿ ਵੁਤ੍ਤਾਕਾਰੇਨ ਪਟਿਪਜ੍ਜਮਾਨਤ੍ਤਾ. ਯਸ੍ਮਿਞ੍ਹਿ ਖਣੇ ਤਥਤ੍ਤਂ ਮਜ੍ਝਿਮਂ ਸਮਥਨਿਮਿਤ੍ਤਂ ਪਟਿਪਜ੍ਜਤਿ, ਤਸ੍ਮਿਂਯੇਵ ਖਣੇ ਤਥਤ੍ਤੁਪਗਮਨੇਨ ਅਪ੍ਪਨਾਸਮਾਧਿਨਾ ਸਮਾਹਿਤਭਾਵੂਪਗਮਨੇਨ ਤਤ੍ਥ ਪਕ੍ਖਨ੍ਦਤਿ ਨਾਮ. ਪੁਰਿਮਚਿਤ੍ਤੇਤਿ ਅਪ੍ਪਨਾਚਿਤ੍ਤਸ੍ਸ ਪੁਰਿਮਸ੍ਮਿਂ ਚਿਤ੍ਤੇ ਗੋਤ੍ਰਭੁਚਿਤ੍ਤੇ. ਵਿਜ੍ਜਮਾਨਾਕਾਰਨਿਪ੍ਫਾਦਿਕਾਤਿ ਤਸ੍ਮਿਂ ਚਿਤ੍ਤੇ ਵਿਜ੍ਜਮਾਨਾਨਂ ਪਰਿਪਨ੍ਥਵਿਸੁਦ੍ਧਿਮਜ੍ਝਿਮਸਮਥਪਟਿਪਤ੍ਤਿਪਕ੍ਖਨ੍ਦਨਾਕਾਰਾਨਂ ਨਿਪ੍ਫਾਦਿਕਾ, ਤੇਨਾਕਾਰੇਨ ਨਿਪ੍ਫਜ੍ਜਮਾਨਾਤਿ ਅਤ੍ਥੋ. ਤੇਯੇਵ ਹਿ ਆਕਾਰਾ ਪਚ੍ਚਯਵਿਸੇਸਤੋ ਝਾਨਕ੍ਖਣੇ ਨਿਪ੍ਫਜ੍ਜਮਾਨਾ ‘‘ਪਟਿਪਦਾਵਿਸੁਦ੍ਧੀ’’ਤਿ ਲਦ੍ਧਸਮਞ੍ਞਾ ਝਾਨਸ੍ਸ ਤਂ ਵਿਸੇਸਂ ਨਿਪ੍ਫਾਦੇਨ੍ਤਾ ਵਿਯ ਵੁਤ੍ਤਾ. ਉਪ੍ਪਾਦਕ੍ਖਣੇਯੇਵਾਤਿ ਅਤ੍ਤਲਾਭਵੇਲਾਯਮੇਵ. ਯਦਿ ਏਵਂ, ਕਥਂ ਤੇ ਆਕਾਰਾ ਨਿਪ੍ਫਜ੍ਜਨ੍ਤੀਤਿ ਆਹ ‘‘ਆਗਮਨਵਸੇਨਾ’’ਤਿ.
ਤਸ੍ਸਾਤਿ ਚਿਤ੍ਤਸ੍ਸ. ‘‘ਵਿਸੁਦ੍ਧਂ ਚਿਤ੍ਤਂ ਅਜ੍ਝੁਪੇਕ੍ਖਤੀ’’ਤਿ ਪਾਲ਼ਿਯਂ (ਪਟਿ. ਮ. ੧.੧੫੮) ਪੁਗ੍ਗਲਾਧਿਟ੍ਠਾਨੇਨ ਆਗਤਾਤਿ ‘‘ਬ੍ਯਾਪਾਰਂ ਅਕਰੋਨ੍ਤੋ’’ਤਿ ਆਹ. ਸਮਥਪਟਿਪਤ੍ਤਿਤਥਤ੍ਤੁਪਗਮਨਞ੍ਚ ਇਧ ਸਮਥਭਾਵਾਪਤ੍ਤਿਯੇਵਾਤਿ ਆਹ ‘‘ਸਮਥਭਾਵੂਪਗਮਨੇਨਾ’’ਤਿ. ਕਿਲੇਸਸਂਸਗ੍ਗਂ ਪਹਾਯ ਏਕਤ੍ਤੇਨ ਉਪਟ੍ਠਿਤਸ੍ਸਾਤਿ ਪੁਬ੍ਬੇ ‘‘ਕਥਂ ਨੁ ਖੋ ਕਿਲੇਸਸਂਸਗ੍ਗਂ ਪਜਹੇਯ੍ਯ’’ਨ੍ਤਿ ਪਟਿਪਨ੍ਨਸ੍ਸ ਇਦਾਨਿ ਸਮਥਪਟਿਪਤ੍ਤਿਯਾ ਤਸ੍ਸ ਪਹੀਨਤ੍ਤਾ ਕਿਲੇਸਸਙ੍ਗਣਿਕਾਭਾਵੇਨ ਏਕਤ੍ਤੇਨ ਉਪਟ੍ਠਿਤਸ੍ਸ ਝਾਨਚਿਤ੍ਤਸ੍ਸ. ਪਰਿਪਨ੍ਥਵਿਸੁਦ੍ਧਿਮਜ੍ਝਿਮਸਮਥਪਟਿਪਤ੍ਤਿਪਕ੍ਖਨ੍ਦਨੇਹਿ ਵੁਦ੍ਧਿਪ੍ਪਤ੍ਤਿਯਾ ਅਨੁਬ੍ਰੂਹਿਤੇ ਝਾਨਚਿਤ੍ਤੇ ਲਦ੍ਧੋਕਾਸਾ ਤਤ੍ਰਮਜ੍ਝਤ੍ਤੁਪੇਕ੍ਖਾ ਸਮ੍ਪਯੁਤ੍ਤੇਸੁ ਸਮਵਾਹਿਤਭਾਵੇਨ ਪਵਤ੍ਤਮਾਨਾ ਤੇ ਅਨੁਬ੍ਰੂਹੇਨ੍ਤੀ ਵਿਯ ਹੋਤੀਤਿ ਆਹ ‘‘ਤਤ੍ਰਮਜ੍ਝਤ੍ਤੁਪੇਕ੍ਖਾਯ ਕਿਚ੍ਚਵਸੇਨ ਉਪੇਕ੍ਖਾਨੁਬ੍ਰੂਹਨਾ ਵੇਦਿਤਬ੍ਬਾ’’ਤਿ.
ਯੇ ਪਨੇਤੇ ਯੁਗਨਦ੍ਧਧਮ੍ਮਾਤਿ ਸਮ੍ਬਨ੍ਧੋ. ਤਤ੍ਥਾਤਿ ਤਸ੍ਮਿਂ ਝਾਨਚਿਤ੍ਤੇ. ਅਞ੍ਞਮਞ੍ਞਾਨਤਿਵਤ੍ਤਨਵਸੇਨ ਕਿਚ੍ਚਕਰਣਤੋ ਯੁਗੇ ਨਦ੍ਧਾ ਬਦ੍ਧਾ ਵਿਯ ਯੁਗਨਦ੍ਧਾ. ਵਿਮੁਤ੍ਤਿਰਸੇਨਾਤਿ ਵਿਮੁਚ੍ਚਨਕਿਚ੍ਚੇਨ, ਵਿਮੁਚ੍ਚਨਸਮ੍ਪਤ੍ਤਿਯਾ ਵਾ. ਏਸ ਯੋਗੀ. ਵਾਹਯਤੀਤਿ ਪਵਤ੍ਤੇਤਿ. ਅਸ੍ਸਾਤਿ ਝਾਨਚਿਤ੍ਤਸ੍ਸ. ਤਸ੍ਮਿਂ ਖਣੇਤਿ ਭਙ੍ਗਕ੍ਖਣੇ. ਉਪ੍ਪਾਦਕ੍ਖਣੇ ਅਤੀਤੇ ਹਿ ਠਿਤਿਕ੍ਖਣਤੋ ਪਟ੍ਠਾਯ ਆਸੇਵਨਾ ਪਵਤ੍ਤਤਿ ਨਾਮ. ਤੇ ਆਕਾਰਾਤਿ ਅਞ੍ਞਮਞ੍ਞਾਨਤਿਵਤ੍ਤਨਾਦਯੋ ਤਤ੍ਥ ਧਮ੍ਮਾਨਂ ਪਵਤ੍ਤਿਆਕਾਰਾ. ਆਸੇਵਨਾਪਿ ਹਿ ਆਸੇਵਨਪਚ੍ਚਯਭਾਵੀਨਂ ਧਮ੍ਮਾਨਂ ਪਵਤ੍ਤਿਆਕਾਰੋਯੇਵ. ਸਂਕਿਲੇਸਵੋਦਾਨੇਸੂਤਿ ਸਮਾਧਿਪਞ੍ਞਾਨਂ ਸਮਰਸਤਾਯ ਅਕਰਣਂ ਭਾਵਨਾਯ ਸਂਕਿਲੇਸੋ, ਕਰਣਂ ਵੋਦਾਨਂ. ਤਥਾ ਸੇਸੇਸੁਪਿ. ਏਵਮੇਤੇਸੁ ਸਂਕਿਲੇਸਵੋਦਾਨੇਸੁ ਤਂ ਤਂ ਆਦੀਨਵਂ ਦੋਸਂ ਆਨਿਸਂਸਂ ਗੁਣਂ ਪੁਰੇਤਰਂ ਪਾਟਿਹਾਰਿਯਞਾਣੇਨ ਦਿਸ੍ਵਾ ਯਥਾ ਅਞ੍ਞਮਞ੍ਞਾਨਤਿਵਤ੍ਤਨਾਦਯੋ ਹੋਨ੍ਤਿ, ਤਥਾ ਭਾਵਨਾਯ ਸਮ੍ਪਹਂਸਿਤਤ੍ਤਾ ਤੇਨੇਵ ਞਾਣੇਨ ਵਿਸੋਧਿਤਤ੍ਤਾ. ਵਿਸੋਧਨਂ ਹੇਤ੍ਥ ਸਮ੍ਪਹਂਸਨਂ. ਤੇ ਆਕਾਰਾ ਯਸ੍ਮਾ ਨਿਪ੍ਫਨ੍ਨਾ, ਤਸ੍ਮਾ ‘‘ਧਮ੍ਮਾਨਂ…ਪੇ… ਵੇਦਿਤਬ੍ਬਾਤਿ ਵੁਤ੍ਤ’’ਨ੍ਤਿ ਲਕ੍ਖਣਸਂਵਣ੍ਣਨਾਯ ਆਦਿਮ੍ਹਿ ਵੁਤ੍ਤਂ ਨਿਗਮਨਵਸੇਨ ਦਸ੍ਸੇਤਿ.
‘‘ਯਸ੍ਮਾ ਉਪੇਕ੍ਖਾਵਸੇਨ ਞਾਣਂ ਪਾਕਟਂ ਹੋਤੀ’’ਤਿ ਕੋ ਸਮ੍ਬਨ੍ਧੋ. ਕਸ੍ਮਾ ਸਮ੍ਪਹਂਸਨਾਵ ਪਰਿਯੋਸਾਨਨ੍ਤਿ ਵੁਤ੍ਤਾ, ਨ ਉਪੇਕ੍ਖਾਨੁਬ੍ਰੂਹਨਾਤਿ ਚੋਦਨਂ ਸਨ੍ਧਾਯ ‘‘ਤਤ੍ਥ ਯਸ੍ਮਾ ਉਪੇਕ੍ਖਾਵਸੇਨ ਞਾਣਂ ਪਾਕਟਂ ਹੋਤੀ’’ਤਿ ਵੁਤ੍ਤਂ. ਤਤ੍ਥਾਤਿ ਤਸ੍ਮਿਂ ਭਾਵਨਾਚਿਤ੍ਤੇ. ਉਪੇਕ੍ਖਾਵਸੇਨ ਞਾਣਂ ਪਾਕਟਂ ਹੋਤੀਤਿ ਅਪ੍ਪਨਾਕਾਲੇ ਭਾਵਨਾਯ ਸਮਪ੍ਪਵਤ੍ਤਿਯਾ, ਪਟਿਪਕ੍ਖਸ੍ਸ ਚ ਪਹਾਨਤੋ ਪਗ੍ਗਹਾਦੀਸੁ ਬ੍ਯਾਪਾਰਸ੍ਸ ਅਕਾਤਬ੍ਬਤੋ ਅਜ੍ਝੁਪੇਕ੍ਖਨਾਵ ਹੋਤਿ. ਯਂ ਸਨ੍ਧਾਯ ਵੁਤ੍ਤਂ ‘‘ਸਮਯੇ ਚਿਤ੍ਤਸ੍ਸ ਅਜ੍ਝੁਪੇਕ੍ਖਨਾ, ਵਿਸੁਦ੍ਧਂ ਚਿਤ੍ਤਂ ਅਜ੍ਝੁਪੇਕ੍ਖਤੀ’’ਤਿ ਚ ਆਦਿ. ਸਾ ਪਨਾਯਂ ਅਜ੍ਝੁਪੇਕ੍ਖਨਾ ਞਾਣਸ੍ਸ ਕਿਚ੍ਚਸਿਦ੍ਧਿਯਾ ਹੋਤਿ, ਵਿਸੇਸਤੋ ਞਾਣਸਾਧਨਤ੍ਤਾ ਅਪ੍ਪਨਾਬ੍ਯਾਪਾਰਸ੍ਸਾਤਿ ਫਲੇਨ ਕਾਰਣਾਨੁਮਾਨਞਾਯੇਨ. ਯਸ੍ਮਾ ਉਪੇਕ੍ਖਾਵਸੇਨ ਞਾਣਂ ਪਾਕਟਂ ਹੋਤਿ, ਤਸ੍ਮਾ ਞਾਣਕਿਚ੍ਚਭੂਤਾ ਸਮ੍ਪਹਂਸਨਾ ਪਰਿਯੋਸਾਨਨ੍ਤਿ ਵੁਤ੍ਤਾਤਿ ਸਮ੍ਬਨ੍ਧੋ.
ਇਦਾਨਿ ਯਥਾਵੁਤ੍ਤਮਤ੍ਥਂ ਪਾਲ਼ਿਯਾ ਸਮਤ੍ਥੇਤੁਂ ‘‘ਯਥਾਹਾ’’ਤਿਆਦਿ ਵੁਤ੍ਤਂ. ਤਥਾਪਗ੍ਗਹਿਤਂ ਚਿਤ੍ਤਨ੍ਤਿ ਯਥਾ ਭਾਵਨਾਚਿਤ੍ਤਂ ਕੋਸਜ੍ਜਪਕ੍ਖੇ ਨ ਪਤਤਿ, ਤਥਾ ਵੀਰਿਯਸਮ੍ਬੋਜ੍ਝਙ੍ਗਟ੍ਠਾਨਿਯਾਨਂ ਧਮ੍ਮਾਨਂ ਬਹੁਲੀਕਾਰਵਸੇਨ ਪਗ੍ਗਹਿਤਂ. ਸਾਧੁਕਂ ਅਜ੍ਝੁਪੇਕ੍ਖਤੀਤਿ ਪਗ੍ਗਣ੍ਹਨ੍ਤੇਨਾਪਿ ਸਮਾਧਿਸ੍ਸ ਵੀਰਿਯਸਮਤਾਯੋਜਨਵਸੇਨ ਪਗ੍ਗਹਿਤਤ੍ਤਾ ਸਕ੍ਕਚ੍ਚਂ ਅਜ੍ਝੁਪੇਕ੍ਖਤਿ, ਤਤ੍ਰਮਜ੍ਝਤ੍ਤੁਪੇਕ੍ਖਾ ਓਕਾਸਂ ਲਭਤਿ. ਤਂ ਪਨ ਅਜ੍ਝੁਪੇਕ੍ਖਨਂ ਉਪੇਕ੍ਖਾਵਸੇਨ ਪੁਬ੍ਬੇ ਪਵਤ੍ਤਪਾਰਿਹਾਰਿਯਪਞ੍ਞਾਵਸੇਨ ਅਪ੍ਪਨਾਪਞ੍ਞਾਯ ਕਿਚ੍ਚਾਧਿਕਤਾਤਿ ਆਹ ‘‘ਪਞ੍ਞਾਵਸੇਨ ਪਞ੍ਞਿਨ੍ਦ੍ਰਿਯਂ ਅਧਿਮਤ੍ਤਂ ਹੋਤੀ’’ਤਿ. ਤਸ੍ਸ ਅਧਿਮਤ੍ਤਤ੍ਤਾ ਏਵ ਅਜ੍ਝੁਪੇਕ੍ਖਨ੍ਤਸ੍ਸੇਵ ਨਾਨਾਸਭਾਵੇਹਿ ਨੀਵਰਣਪਮੁਖੇਹਿ ਕਿਲੇਸੇਹਿ ਅਪ੍ਪਨਾਚਿਤ੍ਤਂ ਵਿਮੁਚ੍ਚਤਿ. ਵਿਮੋਕ੍ਖਵਸੇਨ ਵਿਮੁਚ੍ਚਨਵਸੇਨ. ਪਞ੍ਞਾਵਸੇਨਾਤਿ ਪੁਬ੍ਬੇ ਪਵਤ੍ਤਪਾਰਿਹਾਰਿਯਪਞ੍ਞਾਵਸੇਨ. ਵਿਮੁਤ੍ਤਤ੍ਤਾਤਿ ਨਾਨਾਕਿਲੇਸੇਹਿ ਵਿਮੁਤ੍ਤਤ੍ਤਾ ਏਵ. ਤੇ ਧਮ੍ਮਾ ਸਦ੍ਧਾਦਯੋ, ਵਿਸੇਸਤੋ ਸਦ੍ਧਾਪਞ੍ਞਾਵੀਰਿਯਸਮਾਧਯੋ ਚ ਏਕਰਸਾ ਸਮਾਨਕਿਚ੍ਚਾ ਹੋਨ੍ਤਿ. ਏਵਮਯਂ ਇਨ੍ਦ੍ਰਿਯਾਨਂ ਏਕਰਸਟ੍ਠੇਨ ਭਾਵਨਾ ਨਿਪ੍ਫਜ੍ਜਮਾਨਾ ਞਾਣਬ੍ਯਾਪਾਰੋਤਿ ਆਹ ‘‘ਞਾਣਕਿਚ੍ਚਭੂਤਾ ਸਮ੍ਪਹਂਸਨਾ ਪਰਿਯੋਸਾਨ’’ਨ੍ਤਿ. ਏਵਂ ਤਿਵਿਧਾਯ ਪਟਿਪਦਾਵਿਸੁਦ੍ਧਿਯਾ ਲਦ੍ਧਵਿਸੇਸਾਯ ਤਿਵਿਧਾਯ ਉਪੇਕ੍ਖਾਨੁਬ੍ਰੂਹਨਾਯ ਸਾਤਿਸਯਂ ਪਞ੍ਞਿਨ੍ਦ੍ਰਿਯਸ੍ਸ ਅਧਿਮੁਤ੍ਤਭਾਵੇਨ ਚਤੁਬ੍ਬਿਧਾਪਿ ਸਮ੍ਪਹਂਸਨਾ ਸਿਜ੍ਝਤੀਤਿ ਆਗਮਨੁਪੇਕ੍ਖਾ ਞਾਣਕਿਚ੍ਚਵਸੇਨ ਦਸਪਿ ਆਕਾਰਾ ਝਾਨੇ ਏਵ ਵੇਦਿਤਬ੍ਬਾ.
ਗਣਨਾਨੁਪੁਬ੍ਬਤਾਤਿ ਗਣਨਾਨੁਪੁਬ੍ਬਤਾਯ, ਗਣਨਾਨੁਪੁਬ੍ਬਤਾਮਤ੍ਤਂ ਵਾ ਪਠਮਨ੍ਤਿ ਇਦਨ੍ਤਿ ਅਤ੍ਥੋ. ਤੇਨ ਦੇਸਨਾਕ੍ਕਮਂ ਉਲ੍ਲਿਙ੍ਗੇਤਿ. ‘‘ਪਠਮਂ ਉਪ੍ਪਨ੍ਨਨ੍ਤਿ ਪਠਮ’’ਨ੍ਤਿ ਇਮਿਨਾ ਪਟਿਪਤ੍ਤਿਕ੍ਕਮਂ, ਉਪ੍ਪਨ੍ਨਨ੍ਤਿ ਹਿ ਅਧਿਗਤਨ੍ਤਿ ਅਤ੍ਥੋ. ‘‘ਪਠਮਂ ਸਮਾਪਜ੍ਜਿਤਬ੍ਬਨ੍ਤਿ ਪਠਮ’’ਨ੍ਤਿ ਇਦਂ ਪਨ ਨ ਏਕਨ੍ਤਲਕ੍ਖਣਨ੍ਤਿ ਅਟ੍ਠਕਥਾਯਂ (ਧ. ਸ. ਅਟ੍ਠ. ੧੬੦) ਪਟਿਸਿਦ੍ਧਤ੍ਤਾ ਇਧ ਨ ਗਹਿਤਂ. ਆਰਮ੍ਮਣੂਪਨਿਜ੍ਝਾਨਂ ਲਕ੍ਖਣੂਪਨਿਜ੍ਝਾਨਨ੍ਤਿ ਦੁਵਿਧੇ ਝਾਨੇ ਇਧਾਧਿਪ੍ਪੇਤਜ੍ਝਾਨਮੇਵ ਦਸ੍ਸੇਤੁਂ ‘‘ਆਰਮ੍ਮਣੂਪਨਿਜ੍ਝਾਨਤੋ’’ਤਿ ਵੁਤ੍ਤਂ. ਪਥਵੀਕਸਿਣਸਙ੍ਖਾਤਸ੍ਸ ਅਤ੍ਤਨੋ ਅਤ੍ਤਨੋ ਆਰਮ੍ਮਣਸ੍ਸ ਰੂਪਂ ਵਿਯ ਚਕ੍ਖੁਨਾ ਉਪਨਿਜ੍ਝਾਯਨਤੋ. ਪਚ੍ਚਨੀਕਝਾਪਨਤੋਤਿ ਨੀਵਰਣਾਦੀਨਂ ਪਚ੍ਚਨੀਕਧਮ੍ਮਾਨਂ ਦਹਨਤੋ ਵਿਕ੍ਖਮ੍ਭਨਵਸੇਨ ਪਜਹਨਤੋ. ਸਕਲਟ੍ਠੇਨਾਤਿ ਹੇਟ੍ਠਾ ਵੁਤ੍ਤਨਯੇਨ ਕਤੇ ਵਾ ਅਕਤੇ ਵਾ ਪਰਿਚ੍ਛਿਜ੍ਜ ਗਹਿਤੇ ਪਥਵੀਭਾਗੇ ਪਥਵੀਮਣ੍ਡਲੇ ਸਕਲਾਰਮ੍ਮਣਕਰਣਟ੍ਠੇਨ. ਨ ਹਿ ਤਸ੍ਸ ਏਕਦੇਸਮਾਰਮ੍ਮਣਂ ਕਰੀਯਤਿ. ਪਥਵੀਕਸਿਣਸਨ੍ਨਿਸ੍ਸਯਤਾਯ ਨਿਮਿਤ੍ਤਂ ਪਥਵੀਕਸਿਣਂ ਯਥਾ ‘‘ਮਞ੍ਚਾ ਉਕ੍ਕੁਟ੍ਠਿਂ ਕਰੋਨ੍ਤੀ’’ਤਿ. ਤਂਸਹਚਰਣਤੋ ਝਾਨਂ ਪਥਵੀਕਸਿਣਂ ਯਥਾ ‘‘ਕੁਨ੍ਤਾ ਪਚਰਨ੍ਤੀ’’ਤਿ.
ਚਿਰਟ੍ਠਿਤਿਸਮ੍ਪਾਦਨਵਣ੍ਣਨਾ
੭੬. ਲਕ੍ਖਟ੍ਠਾਨੇ ਠਿਤਂ ਸਰੇਨ ਵਾਲਂ ਵਿਜ੍ਝਤੀਤਿ ਵਾਲਵੇਧੀ. ਇਧ ਪਨ ਅਨੇਕਧਾ ਭਿਨ੍ਨਸ੍ਸ ਵਾਲਸ੍ਸ ਅਂਸੁਂ ਵਿਜ੍ਝਨ੍ਤੋ ‘‘ਵਾਲਵੇਧੀ’’ਤਿ ਅਧਿਪ੍ਪੇਤੋ. ਤੇਨ ਵਾਲਵੇਧਿਨਾ. ਸੂਦੇਨਾਤਿ ਭਤ੍ਤਕਾਰੇਨ. ‘‘ਆਕਾਰਾ ਪਰਿਗ੍ਗਹੇਤਬ੍ਬਾ’’ਤਿ ਸਙ੍ਖੇਪਤੋ ਵੁਤ੍ਤਮਤ੍ਥਂ ਵਿਵਰਿਤੁਂ ‘‘ਯਥਾ ਹੀ’’ਤਿਆਦਿ ਵੁਤ੍ਤਂ. ਤਤ੍ਥ ਸੁਕੁਸਲੋਤਿ ਸੁਟ੍ਠੁ ਛੇਕੋ. ਧਨੁਗ੍ਗਹੋਤਿ ਇਸ੍ਸਾਸੋ. ਕਮ੍ਮਨ੍ਤਿ ਯੋਗ੍ਯਂ. ਅਕ੍ਕਨ੍ਤਪਦਾਨਨ੍ਤਿ ਵਿਜ੍ਝਨਕਾਲੇ ਅਕ੍ਕਮਨਵਸੇਨ ਪਵਤ੍ਤਪਦਾਨਂ. ਆਕਾਰਨ੍ਤਿ ਧਨੁਜਿਯਾਸਰਾਨਂ ਗਹਿਤਾਕਾਰਂ. ਪਰਿਗ੍ਗਣ੍ਹੇਯ੍ਯਾਤਿ ਉਪਧਾਰੇਯ੍ਯ. ਭੋਜਨਸਪ੍ਪਾਯਾਦਯੋਤਿ ਆਦਿ-ਸਦ੍ਦੋ ਅਵੁਤ੍ਤਾਕਾਰਾਨਮ੍ਪਿ ਸਙ੍ਗਾਹਕੋ ਦਟ੍ਠਬ੍ਬੋ. ਤੇਨ ਉਤੁਭਾਵਨਾਨਿਮਿਤ੍ਤਾਦੀਨਮ੍ਪਿ ਪਰਿਗ੍ਗਣ੍ਹਨਂ ਵੁਤ੍ਤਂ ਹੋਤਿ. ਤਸ੍ਮਿਨ੍ਤਿ ਤਸ੍ਮਿਂ ਤਰੁਣਸਮਾਧਿਮ੍ਹਿ.
ਭਤ੍ਤਾਰਨ੍ਤਿ ਸਾਮਿਨਂ, ਭਤ੍ਤਵੇਤਨਾਦੀਹਿ ਪੋਸਕਨ੍ਤਿ ਅਤ੍ਥੋ. ਪਰਿਵਿਸਨ੍ਤੋਤਿ ਭੋਜੇਨ੍ਤੋ. ਤਸ੍ਸ ਰੁਚ੍ਚਿਤ੍ਵਾ ਭੁਞ੍ਜਨਾਕਾਰਂ ਸਲ੍ਲਕ੍ਖੇਤ੍ਵਾ ਤਸ੍ਸ ਉਪਨਾਮੇਨ੍ਤੋਤਿ ਯੋਜਨਾ. ਅਯਮ੍ਪਿ ਯੋਗੀ. ਅਧਿਗਤਕ੍ਖਣੇ ਭੋਜਨਾਦਯੋ ਆਕਾਰੇਤਿ ਪੁਬ੍ਬੇ ਝਾਨਸ੍ਸ ਅਧਿਗਤਕ੍ਖਣੇ ਕਿਚ੍ਚਸਾਧਕੇ ਭੋਜਨਾਦਿਗਤੇ ਆਕਾਰੇ. ਗਹੇਤ੍ਵਾਤਿ ਪਰਿਗ੍ਗਹੇਤ੍ਵਾ ਸਲ੍ਲਕ੍ਖੇਤ੍ਵਾ. ਨਟ੍ਠੇ ਨਟ੍ਠੇ ਸਮਾਧਿਮ੍ਹਿ ਪੁਨਪ੍ਪੁਨਂ ਅਪ੍ਪਨਾਯ.
ਮਹਾਨਸਵਿਜ੍ਜਾਪਰਿਚਯੇਨ ਪਣ੍ਡਿਤੋ. ਤਤ੍ਥ ਵਿਸਦਞਾਣਤਾਯ ਬ੍ਯਤ੍ਤੋ. ਠਾਨੁਪ੍ਪਤ੍ਤਿਕਕਓਸਲ੍ਲਯੋਗੇਨ ਕੁਸਲੋ. ਨਾਨਚ੍ਚਯੇਹੀਤਿ ਨਾਨਚ੍ਚਯੇਹਿ ਨਾਨਾਸਭਾਵੇਹਿ, ਨਾਨਾਰਸੇਹੀਤਿ ਅਤ੍ਥੋ. ਤੇਨਾਹ ‘‘ਅਮ੍ਬਿਲਗ੍ਗੇਹੀ’’ਤਿਆਦਿ. ਸੂਪੇਹੀਤਿ ਬ੍ਯਞ੍ਜਨੇਹਿ. ਅਮ੍ਬਿਲਗ੍ਗੇਹੀਤਿ ਅਮ੍ਬਿਲਕੋਟ੍ਠਾਸੇਹਿ, ਯੇ ਵਾ ਅਮ੍ਬਿਲਰਸਾ ਹੁਤ੍ਵਾ ਅਗ੍ਗਭੂਤਾ, ਤੇਹਿ ਚਤੁਰਮ੍ਬਿਲਾਦਿਮਿਸ੍ਸੇਹਿ. ਏਸ ਨਯੋ ਤਿਤ੍ਤਕਗ੍ਗਾਦੀਸੁਪਿ. ਖਾਰਿਕੇਹੀਤਿ ਵਾਤਿਙ੍ਗਣਕਲ਼ੀਰਾਦਿਮਿਸ੍ਸੇਹਿ. ਨਿਮਿਤ੍ਤਨ੍ਤਿ ਆਕਾਰਂ ਰੁਚ੍ਚਨਵਸੇਨ ਭੁਞ੍ਜਨਾਕਾਰਂ. ਉਗ੍ਗਣ੍ਹਾਤੀਤਿ ਉਪਰੂਪਰਿ ਗਣ੍ਹਾਤਿ ਉਪਧਾਰੇਤਿ. ਇਮਸ੍ਸ ਵਾ ਸੂਪੇਯ੍ਯਸ੍ਸ ਅਤ੍ਥਾਯ ਹਤ੍ਥਂ ਅਭਿਹਰਤਿ. ਅਭਿਹਾਰਾਨਨ੍ਤਿ ਅਭਿਮੁਖੇਨ ਹਰਿਤਬ੍ਬਾਨਂ ਪਣ੍ਣਾਕਾਰਾਨਂ, ਪੂਜਾਭਿਹਾਰਾਨਂ ਵਾ. ਨਿਮਿਤ੍ਤਂ ਉਗ੍ਗਣ੍ਹਾਤੀਤਿ ‘‘ਏਵਂ ਮੇ ਚਿਤ੍ਤਂ ਸਮਾਹਿਤਂ ਅਹੋਸੀ’’ਤਿ ਨਿਮਿਤ੍ਤਂ ਗਣ੍ਹਾਤਿ ਸਲ੍ਲਕ੍ਖੇਤਿ.
ਸਮਾਧਿਪਰਿਪਨ੍ਥਾਨਨ੍ਤਿ ਸਮਾਧਿਸ੍ਸ ਪਰਿਪਨ੍ਥਭੂਤਾਨਂ. ਧਮ੍ਮਾਨਨ੍ਤਿ ਕਾਮਚ੍ਛਨ੍ਦਾਦਿਨੀਵਰਣਧਮ੍ਮਾਨਂ. ਸੁਵਿਸੋਧਿਤਤ੍ਤਾਤਿ ਸੁਟ੍ਠੁ ਵਿਸੋਧਿਤਤ੍ਤਾ, ਵਿਕ੍ਖਮ੍ਭਨਵਸੇਨੇਵ ਸਮ੍ਮਦੇਵ ਪਹੀਨਤ੍ਤਾਤਿ ਅਤ੍ਥੋ. ਕਾਮਾਦੀਨਵਪਚ੍ਚਵੇਕ੍ਖਣਾਦੀਹੀਤਿ ਆਦਿ-ਸਦ੍ਦੇਨ ਅਸੁਭਮਨਸਿਕਾਰਨੇਕ੍ਖਮ੍ਮਾਨਿਸਂਸਪਚ੍ਚਵੇਕ੍ਖਣਾਦੀਨਿ ਸਙ੍ਗਣ੍ਹਾਤਿ. ਨੇਕ੍ਖਮ੍ਮਗੁਣਦਸ੍ਸਨੇਨਾਪਿ ਹਿ ਤਸ੍ਸ ਵਿਬਨ੍ਧਭੂਤੇ ਕਾਮਚ੍ਛਨ੍ਦੇ ਆਦੀਨਵੋ ਵਿਸੇਸਤੋ ਪਾਕਟੋ ਹੋਤੀਤਿ. ਕਾਯਦੁਟ੍ਠੁਲ੍ਲਨ੍ਤਿ ਕਾਯਦਰਥਂ ਸਾਰਦ੍ਧਕਾਯਤਂ. ਤੇਨ ਕਾਯਚਿਤ੍ਤਾਨਂ ਸਾਰਮ੍ਭਨਿਮਿਤ੍ਤਸ੍ਸ ਬ੍ਯਾਪਾਦਨੀਵਰਣਸ੍ਸ ਨ ਵਿਸੋਧਨਮਾਹ. ਆਰਮ੍ਭਧਾਤੁਮਨਸਿਕਾਰਾਦੀਤਿ ਆਦਿ-ਸਦ੍ਦੇਨ ਵੀਰਿਯਸਮ੍ਬੋਜ੍ਝਙ੍ਗਨਿਮਿਤ੍ਤਾਨਂ, ਆਲੋਕਸਞ੍ਞਾਦੀਨਞ੍ਚ ਸਙ੍ਗਹੋ ਦਟ੍ਠਬ੍ਬੋ. ਸਮਥਨਿਮਿਤ੍ਤਮਨਸਿਕਾਰਾਦੀਤਿ ਆਦਿ-ਸਦ੍ਦੇਨ ਸਮਾਧਿਸਮ੍ਬੋਜ੍ਝਙ੍ਗਟ੍ਠਾਨਿਯਾਨਂ ਧਮ੍ਮਾਨਂ ਸਙ੍ਗਹੋ ਦਟ੍ਠਬ੍ਬੋ. ਅਞ੍ਞੇਪਿ ਸਮਾਧਿਪਰਿਪਨ੍ਥੇਤਿ ਵਿਚਿਕਿਚ੍ਛਾਟ੍ਠਾਨਿਯੇ, ਮਦਮਾਨਾਦਿਕੇ ਚ ਸਨ੍ਧਾਯਾਹ. ਆਸਯਨ੍ਤਿ ਵਸਨਕਸੁਸਿਰਂ. ਸੁਪਰਿਸੁਦ੍ਧਨ੍ਤਿ ਆਸਙ੍ਕਨੀਯਤ੍ਤਾਭਾਵੇਨ ਸੁਟ੍ਠੁ ਪਰਿਸੁਦ੍ਧਂ. ਏਤ੍ਥਾਹ – ਨਨੁ ਚਾਯਂ ਪਗੇਵ ਕਾਮਾਦੀਨਵਂ ਪਚ੍ਚਵੇਕ੍ਖਿਤ੍ਵਾ ਸਮਥਪਟਿਪਦਂ ਪਟਿਪਨ੍ਨੋ ਉਪਚਾਰਕ੍ਖਣੇਯੇਵ ਝਾਨੇਨ ਨੀਵਰਣਾਨਿ ਵਿਕ੍ਖਮ੍ਭਿਤਾਨਿ, ਅਥ ਕਸ੍ਮਾ ਪੁਨ ਕਾਮਾਦੀਨਵਪਚ੍ਚਵੇਕ੍ਖਣਾਦਿ ਗਹਿਤਨ੍ਤਿ? ਸਚ੍ਚਮੇਤਂ. ਤਂ ਪਨ ਪਹਾਨਮਤ੍ਤਨ੍ਤਿ ਝਾਨਸ੍ਸ ਚਿਰਟ੍ਠਿਤਿਯਾ ਅਤਿਸਯਪਹਾਨਤ੍ਥਂ ਪੁਨ ਗਹਿਤਂ.
ਉਦ੍ਧਚ੍ਚ ਮਿਦ੍ਧਨ੍ਤਿ ਕੁਕ੍ਕੁਚ੍ਚਂ, ਥਿਨਞ੍ਚ ਤਦੇਕਟ੍ਠਤਾਯ ਗਹਿਤਮੇਵਾਤਿ ਕਤ੍ਵਾ ਵੁਤ੍ਤਂ. ਸੁਦ੍ਧਨ੍ਤਗਤੋਤਿ ਸੁਪਰਿਸੁਦ੍ਧਪਰਿਯਨ੍ਤਂ ਸਬ੍ਬਸੋ ਵਿਸੋਧਿਤਕੋਣਪਰਿਯਨ੍ਤਂ ਉਯ੍ਯਾਨਂ ਗਤੋ. ਤਹਿਂ ਰਮੇਤਿ ਤਸ੍ਮਿਂ ਝਾਨੇ ਰਮੇਯ੍ਯ ਦਿਵਸਭਾਗਮ੍ਪਿ ਝਾਨਸਮਙ੍ਗੀ ਏਵ ਭਵੇਯ੍ਯ.
ਚਿਤ੍ਤਭਾਵਨਾਵੇਪੁਲ੍ਲਤ੍ਥਨ੍ਤਿ ਸਮਾਧਿਭਾਵਨਾਯ ਵਿਪੁਲਭਾਵਾਯ. ਯਥਾ ਹਿ ਭਾਵਨਾਵਸੇਨ ਨਿਮਿਤ੍ਤਸ੍ਸ ਉਪ੍ਪਤ੍ਤਿ, ਏਵਮਸ੍ਸ ਭਾਵਨਾਵਸੇਨੇਵ ਵਡ੍ਢਨਮ੍ਪਿ. ਤਸ੍ਮਾ ਏਕਙ੍ਗੁਲਾਦਿਵਸੇਨ ਨਿਮਿਤ੍ਤਂ ਵਡ੍ਢੇਨ੍ਤਸ੍ਸ ਪੁਨਪ੍ਪੁਨਂ ਬਹੁਲੀਕਾਰੇਨ ਝਾਨਂ ਭਾਵਨਾਪਿ ਵੁਦ੍ਧਿਂ ਵਿਰੁਲ਼੍ਹਿਂ ਵੇਪੁਲ੍ਲਂ ਆਪਜ੍ਜਤਿ. ਤੇਨ ਵੁਤ੍ਤਂ ‘‘ਚਿਤ੍ਤਭਾਵਨਾਵੇਪੁਲ੍ਲਤ੍ਥਞ੍ਚ ਯਥਾਲਦ੍ਧਂ ਪਟਿਭਾਗਨਿਮਿਤ੍ਤਂ ਵਡ੍ਢੇਤਬ੍ਬ’’ਨ੍ਤਿ. ਤਸ੍ਸਾਤਿ ਪਟਿਭਾਗਨਿਮਿਤ੍ਤਸ੍ਸ.
ਨਿਮਿਤ੍ਤਵਡ੍ਢਨਨਯਵਣ੍ਣਨਾ
੭੭. ਤਤ੍ਰਾਤਿ ਸਾਮਿਅਤ੍ਥੇ ਭੁਮ੍ਮਵਚਨਂ, ਤਸ੍ਸਾਤਿ ਅਤ੍ਥੋ. ਅਵਡ੍ਢੇਤ੍ਵਾਤਿ ਯਥਾ ਕੁਮ੍ਭਕਾਰੋ ਮਤ੍ਤਿਕਾਯ ਪਤ੍ਤਂ ਕਰੋਨ੍ਤੋ ਪਠਮਂ ਅਪਰਿਚ੍ਛਿਨ੍ਦਿਤ੍ਵਾਵ ਪਤ੍ਤਂ ਵਡ੍ਢੇਤਿ, ਏਵਂ ਪਤ੍ਤਵਡ੍ਢਨਯੋਗੇਨ ਪਤ੍ਤਵਡ੍ਢਨਯੁਤ੍ਤਿਯਾ ਅਵਡ੍ਢੇਤ੍ਵਾ ਪੂਵਿਕਸ੍ਸ ਪੂਵਵਡ੍ਢਨਂ. ਭਤ੍ਤਸ੍ਸ ਉਪਰਿ ਭਤ੍ਤਪਕ੍ਖਿਪਨਂ ਭਤ੍ਤਵਡ੍ਢਨਂ. ਵਤ੍ਥਸ੍ਸ ਤਿਨ੍ਤਸ੍ਸ ਅਞ੍ਛਨਾਦਿ ਦੁਸ੍ਸਵਡ੍ਢਨਂ. ਪਚ੍ਚੇਕਂ ਯੋਗ-ਸਦ੍ਦੋ ਯੋਜੇਤਬ੍ਬੋ. ਅਪਰਿਚ੍ਛਿਨ੍ਦਿਤ੍ਵਾ ਨ ਵਡ੍ਢੇਤਬ੍ਬਂ ਸਪਰਿਚ੍ਛੇਦੇ ਏਵ ਭਾਵਨਾਪਵਤ੍ਤਿਤੋ. ਤਥਾ ਹਿ ਵੁਤ੍ਤਂ ‘‘ਸਾਨ੍ਤਕੇ ਨੋ ਅਨਨ੍ਤਕੇ’’ਤਿ (ਵਿਸੁਦ੍ਧਿ. ੧.੫੫).
ਹਂਸਪੋਤਕਾਤਿ ਜਵਨਹਂਸਪੋਤਕਾ. ਉਕ੍ਕੂਲਂ ਉਨ੍ਨਤਟ੍ਠਾਨਂ. ਵਿਕੂਲਂ ਨਿਨ੍ਨਟ੍ਠਾਨਂ. ਨਦੀਸੋਤੇਨ ਕਤਂ ਵਿਦੁਗ੍ਗਂ ਨਦੀਵਿਦੁਗ੍ਗਂ. ਵਿਸਮਾਕਾਰੇਨ ਠਿਤੋ ਪਬ੍ਬਤਪਦੇਸੋ ਪਬ੍ਬਤਵਿਸਮੋ.
ਥੂਲਾਨਿ ਹੁਤ੍ਵਾ ਉਪਟ੍ਠਹਨ੍ਤਿ ਪਚ੍ਚਵੇਕ੍ਖਣਾਬਾਹੁਲ੍ਲੇਨ ਵਿਭੂਤਭਾਵਤੋ. ਦੁਬ੍ਬਲਾਨਿ ਹੁਤ੍ਵਾ ਉਪਟ੍ਠਹਨ੍ਤਿ ਪਗੁਣਬਲਵਭਾਵਸ੍ਸ ਅਨਾਪਾਦਿਕਤ੍ਤਾ. ਉਪਰਿ ਉਸ੍ਸੁਕ੍ਕਨਾਯਾਤਿ ਭਾਵਨਾਯ ਉਪਰਿ ਆਰੋਹਨਾਯ, ਦੁਤਿਯਜ੍ਝਾਨਾਧਿਗਮਾਯਾਤਿ ਅਤ੍ਥੋ.
ਪਬ੍ਬਤੇਯ੍ਯਾਤਿ ਪਬ੍ਬਤੇ ਬਹੁਲਚਾਰਿਨੀ. ਅਖੇਤ੍ਤਞ੍ਞੂਤਿ ਅਗੋਚਰਞ੍ਞੂ. ਸਮਾਧਿਪਰਿਪਨ੍ਥਾਨਂ ਵਿਸੋਧਨਾਨਭਿਞ੍ਞਾਤਾਯ ਬਾਲੋ. ਝਾਨਸ੍ਸ ਪਗੁਣਭਾਵਾਪਾਦਨਵੇਯ੍ਯਤ੍ਤਿਯਸ੍ਸ ਅਭਾਵੇਨ ਅਬ੍ਯਤ੍ਤੋ. ਉਪਰਿਝਾਨਸ੍ਸ ਪਦਟ੍ਠਾਨਭਾਵਾਨਵਬੋਧੇਨ ਅਖੇਤ੍ਤਞ੍ਞੂ. ਸਬ੍ਬਥਾਪਿ ਸਮਾਪਤ੍ਤਿਕੋਸਲ੍ਲਾਭਾਵੇਨ ਅਕੁਸਲੋ. ਸਮਾਧਿਨਿਮਿਤ੍ਤਸ੍ਸ ਵਾ ਅਨਾਸੇਵਨਾਯ ਬਾਲੋ. ਅਭਾਵਨਾਯ ਅਬ੍ਯਤ੍ਤੋ. ਅਬਹੁਲੀਕਾਰੇਨ ਅਖੇਤ੍ਤਞ੍ਞੂ. ਸਮ੍ਮਦੇਵ ਅਨਧਿਟ੍ਠਾਨਤੋ ਅਕੁਸਲੋਤਿ ਯੋਜੇਤਬ੍ਬਂ. ਉਭਤੋ ਭਟ੍ਠੋਤਿ ਉਭਯਤੋ ਝਾਨਤੋ ਭਟ੍ਠੋ. ਸੋ ਹਿ ਅਪ੍ਪਗੁਣਤਾਯ ਨ ਸੁਪ੍ਪਤਿਟ੍ਠਿਤਤਾਯ ਸਉਸ੍ਸਾਹੋਪਿ ਵਿਨਾਸਤੋ, ਅਸਾਮਤ੍ਥਿਯਤੋ ਚ ਝਾਨਦ੍ਵਯਤੋ ਪਰਿਹੀਨੋ. ਚਿਣ੍ਣਵਸਿਨਾਤਿ ਆਸੇਵਿਤਵਸਿਨਾ.
ਪਞ੍ਚਵਸੀਕਥਾਵਣ੍ਣਨਾ
੭੮. ਵਸਨਂ ਵਸੀਤਿ ਧਾਤੁਨਿਦ੍ਦੇਸਤਾਯ ਕਿਰਿਯਾਨਿਦ੍ਦੇਸੋਤਿ ਅਧਿਪ੍ਪਾਯੇਨਾਹ ‘‘ਵਸਿਯੋ’’ਤਿ, ਯਥਾਰੁਚਿ ਪਵਤ੍ਤਿਯੋਤਿ ਅਤ੍ਥੋ. ਆਵਜ੍ਜਨਾਯ ਵਸੀ, ਆਵਜ੍ਜਨਾਵਸੇਨ ਵਾ ਵਸੀ ਆਵਜ੍ਜਨਵਸੀ. ਝਾਨਂ ਆਵਜ੍ਜਿਤੁਂ ਯਤ੍ਥ ਯਤ੍ਥ ਪਦੇਸੇ ਇਚ੍ਛਾ ਯਤ੍ਥਿਚ੍ਛਕਂ. ਯਦਾ ਯਦਾ, ਯਸ੍ਮਿਂ ਯਸ੍ਮਿਂ ਵਾ ਝਾਨਙ੍ਗੇ ਇਚ੍ਛਾ ਯਦਿਚ੍ਛਕਂ. ਯਾਵ ਯਾਵ ਇਚ੍ਛਾ ਯਾਵਦਿਚ੍ਛਕਂ, ਦ-ਕਾਰੋ ਪਦਸਨ੍ਧਿਕਰੋ. ‘‘ਯਾਵਾ’’ਤਿ ਚ ਇਦਂ ਬਹੂਨਂ ਜਵਨਵਾਰਾਨਂ ਨਿਰਨ੍ਤਰਂ ਵਿਯ ਤਥਾਪਵਤ੍ਤਨਂ ਸਨ੍ਧਾਯ ਵੁਤ੍ਤਂ, ਨ ਏਕਮੇਵ. ਸੋ ਹਿ ਪਰਿਚ੍ਛਿਨ੍ਨਚਿਤ੍ਤਕ੍ਖਣੋਤਿ. ਆਵਜ੍ਜਨਾਯ ਦਨ੍ਧਾਯਿਤਤ੍ਤਂ ਨਤ੍ਥੀਤਿ ਵੁਤ੍ਤਨਯੇਨ ਯਤ੍ਥ ਕਤ੍ਥਚਿ ਠਾਨੇ ਯਦਾ ਯਦਾ ਯਂ ਕਿਞ੍ਚਿ ਝਾਨਙ੍ਗਂ ਆਵਜ੍ਜੇਨ੍ਤਸ੍ਸ ਯਥਿਚ੍ਛਿਤਂ ਕਾਲਂ ਆਵਜ੍ਜਨਾਯ ਆਵਜ੍ਜਨਪ੍ਪਵਤ੍ਤਿਯਾ ਦਨ੍ਧਾਯਿਤਤ੍ਤਂ ਵਿਤ੍ਥਾਯਿਤਤ੍ਤਂ, ਚਿਰਾਯਿਤਤ੍ਤਂ ਵਾ ਨਤ੍ਥਿ. ਏਵਂ ਆਵਜ੍ਜਨਵਸੀ ਸਿਦ੍ਧਾ ਨਾਮ ਹੋਤੀਤਿ ਅਤ੍ਥੋ. ਸੇਸਾਤਿ ਵੁਟ੍ਠਾਨਅਧਿਟ੍ਠਾਨਪਚ੍ਚਵੇਕ੍ਖਣਾਵਸਿਯੋ.
ਅਙ੍ਗਸਮੁਦਾਯਭਾਵਤੋ ਝਾਨਸ੍ਸ ਝਾਨੇ ਆਵਜ੍ਜਨਵਸਿਂ ਨਿਪ੍ਫਾਦੇਤੁਕਾਮੇਨ ਪਟਿਪਾਟਿਯਾ ਝਾਨਙ੍ਗਾਨਿ ਆਵਜ੍ਜੇਤਬ੍ਬਾਨੀਤਿ ਆਹ ‘‘ਪਠਮਂ ਵਿਤਕ੍ਕਂ ਆਵਜ੍ਜਯਤੋ’’ਤਿ. ਯਦਿਪਿ ਆਵਜ੍ਜਨਮੇਵੇਤ੍ਥ ਇਚ੍ਛਿਤਂ ਆਵਜ੍ਜਨਵਸਿਯਾ ਅਧਿਪ੍ਪੇਤਤ੍ਤਾ, ਆਵਜ੍ਜਨਾਯ ਪਨ ਉਪ੍ਪਨ੍ਨਾਯ ਜਵਨੇਹਿ ਭਵਿਤਬ੍ਬਂ. ਤਾਨਿ ਚ ਖੋ ਆਵਜ੍ਜਨਤਪ੍ਪਰਤਾਯ ਚਿਤ੍ਤਾਭਿਨੀਹਾਰਸ੍ਸ ਯਥਾਵਜ੍ਜਿਤਝਾਨਙ੍ਗਾਰਮ੍ਮਣਾਨਿ ਕਤਿਪਯਾਨੇਵ ਹੋਨ੍ਤਿ, ਨ ਪਰਿਪੁਣ੍ਣਾਨੀਤਿ ਵੁਤ੍ਤਂ ‘‘ਵਿਤਕ੍ਕਾਰਮ੍ਮਣਾਨੇਵ ਚਤ੍ਤਾਰਿ ਪਞ੍ਚ ਵਾ ਜਵਨਾਨਿ ਜਵਨ੍ਤੀ’’ਤਿ. ਚਤ੍ਤਾਰਿ ਤਿਕ੍ਖਿਨ੍ਦ੍ਰਿਯਸ੍ਸ. ਪਞ੍ਚ ਨਾਤਿਤਿਕ੍ਖਿਨ੍ਦ੍ਰਿਯਸ੍ਸਾਤਿ ਦਟ੍ਠਬ੍ਬਂ. ਨਿਰਨ੍ਤਰਨ੍ਤਿ ਵਿਸਭਾਗੇਹਿ ਨਿਰਨ੍ਤਰਂ. ਅਯਂ ਪਨਾਤਿ ਭਵਙ੍ਗਦ੍ਵਯਨ੍ਤਰਿਤਾ ਚਤੁਜਵਨਚਿਤ੍ਤਾ ਯਥਾਵੁਤ੍ਤਾ ਆਵਜ੍ਜਨਵਸੀ. ਅਞ੍ਞੇਸਂ ਵਾ ਧਮ੍ਮਸੇਨਾਪਤਿਆਦੀਨਂ. ਏਵਰੂਪੇ ਕਾਲੇਤਿ ਉਟ੍ਠਾਯ ਸਮੁਟ੍ਠਾਯ ਲਹੁਤਰਂ ਆਵਜ੍ਜਨਵਸੀਨਿਬ੍ਬਤ੍ਤਨਕਾਲੇ. ਸਾ ਚ ਖੋ ਇਤ੍ਤਰਾ ਪਰਿਤ੍ਤਕਾਲਾ, ਨ ਸਤ੍ਥੁ ਯਮਕਮਹਾਪਾਟਿਹਾਰਿਯੇ ਵਿਯ ਚਿਰਤਰਪ੍ਪਬਨ੍ਧਵਤੀ. ਤਥਾ ਹਿ ਤਂ ਸਾਵਕੇਹਿ ਅਸਾਧਾਰਣਂ ਵੁਤ੍ਤਂ. ਅਧਿਗਮੇਨ ਸਮਂ ਸਸਮ੍ਪਯੁਤ੍ਤਸ੍ਸ ਝਾਨਸ੍ਸ ਸਮ੍ਮਾ ਆਪਜ੍ਜਨਂ ਪਟਿਪਜ੍ਜਨਂ ਸਮਾਪਜ੍ਜਨਂ, ਝਾਨਸਮਙ੍ਗਿਤਾ.
ਸੀਘਨ੍ਤਿ ਏਤ੍ਥ ਸਮਾਪਜ੍ਜਿਤੁਕਾਮਤਾਨਨ੍ਤਰਂ ਦ੍ਵੀਸੁ ਭਵਙ੍ਗੇਸੁ ਉਪ੍ਪਨ੍ਨੇਸੁ ਭਵਙ੍ਗਂ ਉਪਚ੍ਛਿਨ੍ਦਿਤ੍ਵਾ ਉਪ੍ਪਨ੍ਨਾਵਜ੍ਜਨਾਨਨ੍ਤਰਂ ਸਮਾਪਜ੍ਜਨਂ ਸੀਘਂ ਸਮਾਪਜ੍ਜਨਸਮਤ੍ਥਤਾ. ਅਯਞ੍ਚ ਮਤ੍ਥਕਪ੍ਪਤ੍ਤਾ ਸਮਾਪਜ੍ਜਨਵਸੀ ਸਤ੍ਥੁ ਧਮ੍ਮਦੇਸਨਾਯਂ ਲਬ੍ਭਤਿ. ਯਂ ਸਨ੍ਧਾਯ ਵੁਤ੍ਤਂ ‘‘ਸੋ ਖੋ ਅਹਂ, ਅਗ੍ਗਿਵੇਸ੍ਸਨ, ਤਸ੍ਸਾ ਏਵ ਕਥਾਯ ਪਰਿਯੋਸਾਨੇ ਤਸ੍ਮਿਂਯੇਵ ਪੁਰਿਮਸ੍ਮਿਂ ਸਮਾਧਿਨਿਮਿਤ੍ਤੇ ਅਜ੍ਝਤ੍ਤਮੇਵ ਚਿਤ੍ਤਂ ਸਣ੍ਠਪੇਮਿ ਸਨ੍ਨਿਸਾਦੇਮਿ ਏਕੋਦਿਂ ਕਰੋਮਿ ਸਮਾਦਹਾਮਿ ਯੇਨਸ੍ਸੁਦਂ ਨਿਚ੍ਚਕਪ੍ਪਂ ਵਿਹਰਾਮੀ’’ਤਿ (ਮ. ਨਿ. ੧.੩੮੭). ਇਤੋ ਸੀਘਤਰਾ ਹਿ ਸਮਾਪਜ੍ਜਨਵਸੀ ਨਾਮ ਨਤ੍ਥਿ. ਜੁਣ੍ਹਾਯ ਰਤ੍ਤਿਯਾ ਨਵੋਰੋਪਿਤੇਹਿ ਕੇਸੇਹਿ ਕਪੋਤਕਨ੍ਦਰਾਯਂ ਵਿਹਰਨ੍ਤਸ੍ਸ ਆਯਸ੍ਮਤੋ ਸਾਰਿਪੁਤ੍ਤਸ੍ਸ ਯਕ੍ਖੇਨ ਮਹਨ੍ਤਮ੍ਪਿ ਪਬ੍ਬਤਕੂਟਂ ਪਦਾਲੇਤੁਂ ਸਮਤ੍ਥੇ ਪਹਾਰੇ ਸੀਸੇ ਦਿਨ੍ਨੇ ਸਮਾਪਜ੍ਜਨਮ੍ਪੇਤ੍ਥ ਨਿਦਸ੍ਸੇਤਬ੍ਬਂ. ਤਥਾ ਹਿ ਵਕ੍ਖਤਿ ‘‘ਤਦਾ ਥੇਰੋ ਤਸ੍ਸ ਪਹਰਣਸਮਯੇ ਸਮਾਪਤ੍ਤਿਂ ਅਪ੍ਪੇਸੀ’’ਤਿ (ਵਿਸੁਦ੍ਧਿ. ੨.੩੭੪). ਪਾਲ਼ਿਯਂ ਪਨ ‘‘ਅਞ੍ਞਤਰਂ ਸਮਾਧਿਂ ਸਮਾਪਜ੍ਜਿਤ੍ਵਾ ਨਿਸਿਨ੍ਨੋ’’ਤਿ (ਉਦਾ. ੩੪) ਵੁਤ੍ਤਂ. ਇਮੇ ਪਨ ਥੇਰਾ ‘‘ਸਮਾਪਤ੍ਤਿਤੋ ਵੁਟ੍ਠਾਨਸਮਕਾਲਂ ਤੇਨ ਪਹਾਰੋ ਦਿਨ੍ਨੋ’’ਤਿ ਵਦਨ੍ਤਿ.
ਅਚ੍ਛਰਾਮਤ੍ਤਨ੍ਤਿ ਅਙ੍ਗੁਲਿਫੋਟਮਤ੍ਤਂ ਖਣਂ. ਠਪੇਤੁਨ੍ਤਿ ਸੇਤੁ ਵਿਯ ਸੀਘਸੋਤਾਯ ਨਦਿਯਾ ਓਘਂ ਵੇਗੇਨ ਪਵਤ੍ਤਿਤੁਂ ਅਦਤ੍ਵਾ ਯਥਾਵੁਤ੍ਤਕ੍ਖਣਂ ਝਾਨਂ ਠਪੇਤੁਂ ਸਮਤ੍ਥਤਾ. ਅਭਿਭੁਯ੍ਯ ਠਪਨਂ, ਅਧਿਟ੍ਠਾਨਂ ਵਿਯਾਤਿ ਵਾ ਅਧਿਟ੍ਠਾਨਂ. ਤਤ੍ਥ ਵਸੀ ਅਧਿਟ੍ਠਾਨਵਸੀ. ਤਥੇਵ ਲਹੁਂ ਵੁਟ੍ਠਾਤੁਨ੍ਤਿ ਅਚ੍ਛਰਾਮਤ੍ਤਂ ਵਾ ਦਸਚ੍ਛਰਾਮਤ੍ਤਂ ਵਾ ਲਹੁਂ ਖਣਂ ਝਾਨਸਮਙ੍ਗੀ ਹੁਤ੍ਵਾ ਝਾਨਤੋ ਵੁਟ੍ਠਾਤੁਂ ਸਮਤ੍ਥਤਾ. ਭਵਙ੍ਗਚਿਤ੍ਤੁਪ੍ਪਤ੍ਤਿਯੇਵ ਹੇਤ੍ਥ ਝਾਨਤੋ ਵੁਟ੍ਠਾਨਂ ਨਾਮ. ਏਤ੍ਥ ਚ ਯਥਾ ‘‘ਏਤ੍ਤਕਮੇਵ ਖਣਂ ਝਾਨਂ ਠਪੇਸ੍ਸਾਮੀ’’ਤਿ ਪੁਬ੍ਬਪਰਿਕਮ੍ਮਵਸੇਨ ਅਧਿਟ੍ਠਾਨਸਮਤ੍ਥਤਾ ਅਧਿਟ੍ਠਾਨਵਸੀ, ਏਵਂ ‘‘ਏਤ੍ਤਕਮੇਵ ਖਣਂ ਝਾਨਸਮਙ੍ਗੀ ਹੁਤ੍ਵਾ ਝਾਨਤੋ ਵੁਟ੍ਠਹਿਸ੍ਸਾਮੀ’’ਤਿ ਪੁਬ੍ਬਪਰਿਕਮ੍ਮਵਸੇਨ ਵੁਟ੍ਠਾਨਸਮਤ੍ਥਤਾ ਵੁਟ੍ਠਾਨਵਸੀ ਵੇਦਿਤਬ੍ਬਾ, ਯਾ ਸਮਾਪਤ੍ਤਿ ‘‘ਵੁਟ੍ਠਾਨਕੁਸਲਤਾ’’ਤਿ ਵੁਚ੍ਚਤਿ. ਤਦੁਭਯਦਸ੍ਸਨਤ੍ਥਨ੍ਤਿ ਅਧਿਟ੍ਠਾਨਵੁਟ੍ਠਾਨਵਸੀਦਸ੍ਸਨਤ੍ਥਂ.
ਤਤ੍ਥਾਤਿ ਤਸ੍ਮਿਂ ਨਿਮ੍ਮਿਤਪਬ੍ਬਤੇ ਤਸ੍ਸ ਵਿਵਰੇ. ਕਿਞ੍ਚਾਪਿ ਏਕਂਯੇਵ ਤਂ ਅਭਿਞ੍ਞਾਚਿਤ੍ਤਂ ਯੇਨ ਪਬ੍ਬਤਂ ਨਿਮ੍ਮਿਨੇਯ੍ਯ, ਅਭਿਞ੍ਞਾਪਾਦਕਸ੍ਸ ਪਨ ਝਾਨਸ੍ਸ ਲਹੁਤਰਂ ਠਪਨਂ, ਵੁਟ੍ਠਾਨਞ੍ਚ ਇਧ ਨਿਦਸ੍ਸਿਤਨ੍ਤਿ ਦਟ੍ਠਬ੍ਬਂ. ‘‘ਏਤ੍ਤਕਾ ਇਦ੍ਧਿਮਨ੍ਤਾ ਏਕਂ ਉਪਟ੍ਠਾਕਂ ਗਰੁਲ਼ਤੋ ਰਕ੍ਖਿਤੁਂ ਨ ਸਕ੍ਖਿਂਸੂ’’ਤਿ ਗਾਰਯ੍ਹਾ ਅਸ੍ਸਾਮ.
ਆਵਜ੍ਜਨਾਨਨ੍ਤਰਾਨੀਤਿ ਆਵਜ੍ਜਨਵਸੀਭਾਵਾਯ ਯਥਾਕ੍ਕਮਂ ਵਿਤਕ੍ਕਾਦੀਨਂ ਝਾਨਙ੍ਗਾਨਂ ਆਵਜ੍ਜਨਾਯ ਪਰਤੋ ਯਾਨਿ ਜਵਨਾਨਿ ਪਵਤ੍ਤਾਨਿ, ਤਾਨਿ ਤੇਸਂ ਪਚ੍ਚਵੇਕ੍ਖਣਾਨਿ. ਯਦਗ੍ਗੇਨ ਆਵਜ੍ਜਨਵਸੀਸਿਦ੍ਧਿ, ਤਦਗ੍ਗੇਨ ਪਚ੍ਚਵੇਕ੍ਖਣਾਵਸੀਸਿਦ੍ਧਿ ਵੇਦਿਤਬ੍ਬਾ.
ਦੁਤਿਯਜ੍ਝਾਨਕਥਾਵਣ੍ਣਨਾ
੭੯. ਨੀਵਰਣਪ੍ਪਹਾਨਸ੍ਸ ਤਪ੍ਪਠਮਤਾਯ ਆਸਨ੍ਨਨੀਵਰਣਪਚ੍ਚਤ੍ਥਿਕਾ. ਥੂਲਂ ਨਾਮ ਵਿਪੁਲਮ੍ਪਿ ਫੇਗ੍ਗੁ ਵਿਯ ਸੁਖਭਞ੍ਜਨੀਯਨ੍ਤਿ ਆਹ ‘‘ਓਲ਼ਾਰਿਕਤ੍ਤਾ ਅਙ੍ਗਦੁਬ੍ਬਲਾ’’ਤਿ. ਸਨ੍ਤਤੋ ਮਨਸਿ ਕਰਿਤ੍ਵਾਤਿ ਪਠਮਜ੍ਝਾਨਂ ਵਿਯ ਅਨੋਲ਼ਾਰਿਕਙ੍ਗਤ੍ਤਾ, ਸਨ੍ਤਧਮ੍ਮਸਮਙ੍ਗਿਤਾਯ ਚ ‘‘ਸਨ੍ਤ’’ਨ੍ਤਿ ਮਨਸਿ ਕਤ੍ਵਾ. ਯੇ ਹਿ ਧਮ੍ਮਾ ਦੁਤਿਯਜ੍ਝਾਨੇ ਪੀਤਿਸੁਖਾਦਯੋ, ਕਾਮਂ ਤੇ ਪਠਮਜ੍ਝਾਨੇਪਿ ਸਨ੍ਤਿ, ਤੇਹਿ ਪਨ ਤੇ ਸਨ੍ਤਤਰਾ ਚੇਵ ਪਣੀਤਤਰਾ ਚ ਭਵਨ੍ਤੀਤਿ. ਨਿਕਨ੍ਤਿਨ੍ਤਿ ਨਿਕਾਮਨਂ, ਅਪੇਕ੍ਖਨ੍ਤਿ ਅਤ੍ਥੋ. ਪਰਿਯਾਦਾਯਾਤਿ ਖੇਪੇਤ੍ਵਾ. ਚਤ੍ਤਾਰਿ ਪਞ੍ਚਾਤਿ ਵਾ-ਸਦ੍ਦੋ ਲੁਤ੍ਤਨਿਦ੍ਦਿਟ੍ਠੋ. ਦੁਤਿਯਜ੍ਝਾਨਂ ਏਤਸ੍ਸ ਅਤ੍ਥੀਤਿ ਦੁਤਿਯਜ੍ਝਾਨਿਕਂ. ਵੁਤ੍ਤਪ੍ਪਕਾਰਾਨੇਵਾਤਿ ਪਠਮਜ੍ਝਾਨੇ ਵੁਤ੍ਤਪ੍ਪਕਾਰਾਨਿਯੇਵ, ਪਰਿਕਮ੍ਮਾਦਿਨਾਮਕਾਨੀਤਿ ਅਤ੍ਥੋ.
੮੦. ਵੂਪਸਮਾਤਿ ਵੂਪਸਮਹੇਤੁ, ਵੂਪਸਮੋਤਿ ਚੇਤ੍ਥ ਪਹਾਨਂ ਅਧਿਪ੍ਪੇਤਂ, ਤਞ੍ਚ ਵਿਤਕ੍ਕਵਿਚਾਰਾਨਂ. ਅਤਿਕ੍ਕਮੋ ਅਤ੍ਥਤੋ ਦੁਤਿਯਜ੍ਝਾਨਕ੍ਖਣੇ ਅਨੁਪ੍ਪਾਦੋਤਿ ਆਹ ‘‘ਸਮਤਿਕ੍ਕਮਾ’’ਤਿਆਦਿ. ਕਤਮੇਸਂ ਪਨੇਤ੍ਥ ਵਿਤਕ੍ਕਵਿਚਾਰਾਨਂ ਵੂਪਸਮੋ ਅਧਿਪ੍ਪੇਤੋ, ਕਿਂ ਪਠਮਜ੍ਝਾਨਿਕਾਨਂ, ਉਦਾਹੁ ਦੁਤਿਯਜ੍ਝਾਨਿਕਾਨਨ੍ਤਿ. ਕਿਞ੍ਚੇਤ੍ਥ ਯਦਿ ਪਠਮਜ੍ਝਾਨਿਕਾਨਂ, ਨਤ੍ਥਿ ਤੇਸਂ ਵੂਪਸਮੋ. ਨ ਹਿ ਕਦਾਚਿ ਪਠਮਜ੍ਝਾਨਂ ਵਿਤਕ੍ਕਵਿਚਾਰਰਹਿਤਂ ਅਤ੍ਥਿ. ਅਥ ਦੁਤਿਯਜ੍ਝਾਨਿਕਾਨਂ, ਏਵਮ੍ਪਿ ਨਤ੍ਥੇਵ ਵੂਪਸਮੋ, ਸਬ੍ਬੇਨ ਸਬ੍ਬਂ ਤੇਸਂ ਤਤ੍ਥ ਅਭਾਵਤੋਤਿ? ਵੁਚ੍ਚਤੇ – ਯੇਹਿ ਵਿਤਕ੍ਕਵਿਚਾਰੇਹਿ ਪਠਮਜ੍ਝਾਨਸ੍ਸ ਓਲ਼ਾਰਿਕਤਾ, ਤੇਸਂ ਸਮਤਿਕ੍ਕਮਾ ਦੁਤਿਯਸ੍ਸ ਝਾਨਸ੍ਸ ਸਮਧਿਗਮੋ, ਨ ਸਭਾਵਤੋ ਅਨੋਲ਼ਾਰਿਕਾਨਂ ਫਸ੍ਸਾਦੀਨਂ ਸਮਤਿਕ੍ਕਮਾਤਿ ਅਯਮਤ੍ਥੋ ‘‘ਵਿਤਕ੍ਕਵਿਚਾਰਾਨਂ ਵੂਪਸਮਾ’’ਤਿ ਏਤੇਨ ਦੀਪਿਤੋ. ਤਸ੍ਮਾ ‘‘ਕਿਂ ਪਠਮਜ੍ਝਾਨਿਕਾਨਂ ਵਿਤਕ੍ਕਵਿਚਾਰਾਨਂ ਵੂਪਸਮੋ ਇਧਾਧਿਪ੍ਪੇਤੋ, ਉਦਾਹੁ ਦੁਤਿਯਜ੍ਝਾਨਿਕਾਨ’’ਨ੍ਤਿ ਏਦਿਸੀ ਚੋਦਨਾ ਅਨੋਕਾਸਾਵ. ਯਸ੍ਮਾ ਦਿਟ੍ਠਾਦੀਨਵਸ੍ਸ ਤਂਤਂਝਾਨਕ੍ਖਣੇ ਅਨੁਪ੍ਪਤ੍ਤਿਧਮ੍ਮਤਾਪਾਦਨਂ ਵੂਪਸਮਨਂ ਅਧਿਪ੍ਪੇਤਂ. ਵਿਤਕ੍ਕਾਦਯੋ ਏਵ ਝਾਨਙ੍ਗਭੂਤਾ ਤਥਾ ਕਰੀਯਨ੍ਤਿ, ਨ ਤਂਸਮ੍ਪਯੁਤ੍ਤਾ ਫਸ੍ਸਾਦਯੋ, ਤਸ੍ਮਾ ਵਿਤਕ੍ਕਾਦੀਨਂਯੇਵ ਵੂਪਸਮਾਦਿਵਚਨਂ ਞਾਯਾਗਤਂ. ਯਸ੍ਮਾ ਪਨ ਵਿਤਕ੍ਕਾਦੀਨਂ ਵਿਯ ਤਂਸਮ੍ਪਯੁਤ੍ਤਧਮ੍ਮਾਨਮ੍ਪਿ ਏਤੇਨ ‘‘ਏਤਂ ਓਲ਼ਾਰਿਕ’’ਨ੍ਤਿ ਆਦੀਨਵਦਸ੍ਸਨਂ ਸੁਤ੍ਤੇ ਆਗਤਂ, ਤਸ੍ਮਾ ਅਵਿਸੇਸੇਨ ਵਿਤਕ੍ਕਾਦੀਨਂ, ਤਂਸਹਗਤਾਨਞ੍ਚ ਵੂਪਸਮਾਦਿਕੇ ਵਤ੍ਤਬ੍ਬੇ ਵਿਤਕ੍ਕਾਦੀਨਂਯੇਵ ਵੂਪਸਮੋ ਵੁਚ੍ਚਮਾਨੋ ਅਧਿਕਵਚਨਂ ਅਞ੍ਞਂ ਅਤ੍ਥਂ ਬੋਧੇਤੀਤਿ ਕਤ੍ਵਾ ਕਿਞ੍ਚਿ ਵਿਸੇਸਂ ਦੀਪੇਤੀਤਿ ਦਸ੍ਸੇਤੁਂ ਅਟ੍ਠਕਥਾਯਂ ‘‘ਓਲ਼ਾਰਿਕਸ੍ਸ ਪਨਾ’’ਤਿਆਦਿ ਗਹਿਤਨ੍ਤਿ ਇਧ ‘‘ਯੇਹਿ ਵਿਤਕ੍ਕਵਿਚਾਰੇਹੀ’’ਤਿਆਦਿ ਵੁਤ੍ਤਨ੍ਤਿ ਦਟ੍ਠਬ੍ਬਂ. ‘‘ਪੀਤਿਯਾ ਚ ਵਿਰਾਗਾ’’ਤਿਆਦੀਸੁਪਿ ਏਸੇਵ ਨਯੋ. ਤਸ੍ਮਾ ਵਿਤਕ੍ਕਵਿਚਾਰਪੀਤਿਸੁਖਸਮਤਿਕ੍ਕਮਵਚਨਾਨਿ ਓਲ਼ਾਰਿਕੋਲ਼ਾਰਿਕਙ੍ਗਸਮਤਿਕ੍ਕਮਾ ਦੁਤਿਯਾਦਿਅਧਿਗਮਦੀਪਕਾਨੀਤਿ ਤੇਸਂ ਏਕਦੇਸਭੂਤਂ ਵਿਤਕ੍ਕਵਿਚਾਰਸਮਤਿਕ੍ਕਮਵਚਨਂ ਤਂਦੀਪਕਂ ਵੁਤ੍ਤਂ. ਵਿਸੁਂ ਵਿਸੁਂ ਠਿਤੇਪਿ ਹਿ ਵਿਤਕ੍ਕਵਿਚਾਰਸਮਤਿਕ੍ਕਮਵਚਨਾਦਿਕੇ ਪਹੇਯ੍ਯਙ੍ਗਨਿਦ੍ਦੇਸਤਾਸਾਮਞ੍ਞੇਨ ਚਿਤ੍ਤੇਨ ਸਮੂਹਤੋ ਗਹਿਤੇ ਵਿਤਕ੍ਕਵਿਚਾਰਵੂਪਸਮਵਚਨਸ੍ਸ ਤਦੇਕਦੇਸਤਾ ਦਟ੍ਠਬ੍ਬਾ. ਅਯਞ੍ਚ ਅਤ੍ਥੋ ਅਵਯਵੇਨ ਸਮੁਦਾਯੋਪਲਕ੍ਖਣਨਯੇਨ ਵੁਤ੍ਤੋ. ਅਥ ਵਾ ਵਿਤਕ੍ਕਵਿਚਾਰਵੂਪਸਮਵਚਨੇਨੇਵ ਤਂਸਮਤਿਕ੍ਕਮਾ ਦੁਤਿਯਾਧਿਗਮਦੀਪਕੇਨ ਪੀਤਿਵਿਰਾਗਾਦਿਵਚਨਾਨਂ ਪੀਤਿਆਦਿਸਮਤਿਕ੍ਕਮਾ ਤਤਿਯਾਦਿਅਧਿਗਮਦੀਪਕਤਾ ਦੀਪਿਤਾ ਹੋਤੀਤਿ ਤਸ੍ਸ ਤਂਦੀਪਕਤਾ ਵੁਤ੍ਤਾ.
ਨਿਯਕਜ੍ਝਤ੍ਤਮਧਿਪ੍ਪੇਤਂ ਨ ਅਜ੍ਝਤ੍ਤਜ੍ਝਤ੍ਤਾਦਿ. ਤਤ੍ਥ ਕਾਰਣਮਾਹ ‘‘ਵਿਭਙ੍ਗੇ ਪਨਾ’’ਤਿਆਦਿ. ਨੀਲਵਣ੍ਣਯੋਗਤੋ ਨੀਲਵਤ੍ਥਂ ਵਿਯਾਤਿ ਨੀਲਯੋਗਤੋ ਵਤ੍ਥਂ ਨੀਲਂ ਵਿਯਾਤਿ ਅਧਿਪ੍ਪਾਯੋ. ਯੇਨ ਸਮ੍ਪਸਾਦਨੇਨ ਯੋਗਾ ਝਾਨਂ ਸਮ੍ਪਸਾਦਨਂ. ਤਸ੍ਮਿਂ ਦਸ੍ਸਿਤੇ ‘‘ਸਮ੍ਪਸਾਦਨਂ ਝਾਨ’’ਨ੍ਤਿ ਸਮਾਨਾਧਿਕਰਣਨਿਦ੍ਦੇਸੇਨੇਵ ਤਂਯੋਗਾ ਝਾਨੇ ਤਂਸਦ੍ਦਪ੍ਪਵਤ੍ਤਿ ਦਸ੍ਸਿਤਾਤਿ ਅਵਿਰੋਧੋ ਯੁਤ੍ਤੋ. ਏਕੋਦਿਭਾਵੇ ਕਥਨ੍ਤਿ ਏਕੋਦਿਮ੍ਹਿ ਦਸ੍ਸਿਤੇ ਏਕੋਦਿਭਾਵਂ ਝਾਨਨ੍ਤਿ ਸਮਾਨਾਧਿਕਰਣਨਿਦ੍ਦੇਸੇਨੇਵ ਝਾਨਸ੍ਸ ਏਕੋਦਿਵਡ੍ਢਨਤਾ ਵੁਤ੍ਤਾ ਹੋਤੀਤਿ ਚੇ? ‘‘ਏਕੋਦਿਭਾਵ’’ਨ੍ਤਿ ਪਦਂ ਉਦ੍ਧਰਿਤ੍ਵਾ ਏਕੋਦਿਸ੍ਸ ਨਿਦ੍ਦੇਸੋ ਨ ਕਾਤਬ੍ਬੋ ਸਿਯਾਤਿ ਏਕੋਦਿਭਾਵਸਦ੍ਦੋ ਏਵ ਸਮਾਧਿਮ੍ਹਿ ਪਵਤ੍ਤੋ ਸਮ੍ਪਸਾਦਨਸਦ੍ਦੋ ਵਿਯ ਝਾਨੇ ਪਵਤ੍ਤਤੀਤਿ ਯੁਤ੍ਤਂ. ਇਮਸ੍ਮਿਞ੍ਚ ਅਤ੍ਥਵਿਕਪ੍ਪੇਤਿ ‘‘ਚੇਤਸੋ ਸਮ੍ਪਸਾਦਯਤੀ’’ਤਿ ਏਤਸ੍ਮਿਂ ਪਕ੍ਖੇ ‘‘ਚੇਤਸੋ’’ਤਿ ਚ ਉਪਯੋਗਤ੍ਥੇ ਸਾਮਿਵਚਨਂ. ਪੁਰਿਮਸ੍ਮਿਨ੍ਤਿ ‘‘ਸਮ੍ਪਸਾਦਨਯੋਗਤੋ ਝਾਨਂ ਸਮ੍ਪਸਾਦਨ’’ਨ੍ਤਿ ਵੁਤ੍ਤਪਕ੍ਖੇ. ਚੇਤਸੋਤਿ ਸਮ੍ਬਨ੍ਧੇ ਸਾਮਿਵਚਨਂ.
ਸੇਟ੍ਠੋਪਿ ਲੋਕੇ ‘‘ਏਕੋ’’ਤਿ ਵੁਚ੍ਚਤਿ ‘‘ਯਾਵ ਪਰੇ ਏਕਾਹਂ ਤੇ ਕਰੋਮੀ’’ਤਿਆਦੀਸੁ. ਏਕੋ ਅਦੁਤਿਯੋ ‘‘ਏਕਾਕੀਭਿ ਖੁਦ੍ਦਕੇਹਿ ਜਿਤ’’ਨ੍ਤਿਆਦੀਸੁ ਅਸਹਾਯਤ੍ਥੋਪਿ ਏਕ-ਸਦ੍ਦੋ ਦਿਟ੍ਠੋਤਿ ਆਹ ‘‘ਏਕੋ ਅਸਹਾਯੋ ਹੁਤ੍ਵਾ’’ਤਿ. ਸਦ੍ਧਾਦਯੋਪਿ ਕਾਮਂ ਸਮ੍ਪਯੁਤ੍ਤਧਮ੍ਮਾਨਂ ਸਾਧਾਰਣਤੋ, ਅਸਾਧਾਰਣਤੋ ਚ ਪਚ੍ਚਯਾ ਹੋਨ੍ਤਿਯੇਵ, ਸਮਾਧਿ ਪਨ ਝਾਨਕ੍ਖਣੇ ਸਮ੍ਪਯੁਤ੍ਤਧਮ੍ਮਾਨਂ ਅਵਿਕ੍ਖੇਪਲਕ੍ਖਣੇ ਇਨ੍ਦਟ੍ਠਕਰਣੇਨ ਸਾਤਿਸਯਂ ਪਚ੍ਚਯੋ ਹੋਤੀਤਿ ਦਸ੍ਸੇਨ੍ਤੋ ‘‘ਸਮ੍ਪਯੁਤ੍ਤਧਮ੍ਮੇ…ਪੇ… ਅਧਿਵਚਨ’’ਨ੍ਤਿ ਆਹ.
‘‘ਸਮ੍ਪਸਾਦਨਂ, ਚੇਤਸੋ ਏਕੋਦਿਭਾਵ’’ਨ੍ਤਿ ਵਿਸੇਸਨਦ੍ਵਯਂ ਝਾਨਸ੍ਸ ਅਤਿਸਯਵਚਨਿਚ੍ਛਾਵਸੇਨ ਗਹਿਤਂ. ਸ੍ਵਾਯਮਤਿਸਯੋ ਯਥਾ ਇਮਸ੍ਮਿਂ ਝਾਨੇ ਲਬ੍ਭਤਿ, ਨ ਤਥਾ ਪਠਮਜ੍ਝਾਨੇਤਿ ਇਮਂ ਵਿਸੇਸਂ ਦਸ੍ਸੇਤੁਂ ‘‘ਨਨੁ ਚਾ’’ਤਿਆਦਿ ਵੁਤ੍ਤਂ. ਆਰਮ੍ਮਣੇ ਆਹਨਨਪਰਿਯਾਹਨਨਵਸੇਨ, ਅਨੁਮਜ੍ਜਨਅਨੁਯੋਜਨਵਸੇਨ ਚ ਪਵਤ੍ਤਮਾਨਾ ਧਮ੍ਮਾ ਸਤਿਪਿ ਨੀਵਰਣਪ੍ਪਹਾਨੇਨ ਕਿਲੇਸਕਾਲੁਸ੍ਸਿਯਾਪਗਮੇ ਸਮ੍ਪਯੁਤ੍ਤਾਨਂ ਕਞ੍ਚਿ ਖੋਭਂ ਕਰੋਨ੍ਤਾ ਵਿਯ ਤੇਹਿ ਚ ਤੇ ਨ ਸਨ੍ਨਿਸਿਨ੍ਨਾ ਹੋਨ੍ਤੀਤਿ ਵੁਤ੍ਤਂ ‘‘ਵਿਤਕ੍ਕਵਿਚਾਰਕ੍ਖੋਭੇਨ ਨ ਸੁਪ੍ਪਸਨ੍ਨ’’ਨ੍ਤਿ. ਖੁਦ੍ਦਿਕਾ ਊਮਿਯੋ ਵੀਚਿਯੋ. ਮਹਤਿਯੋ ਤਰਙ੍ਗਾ. ਸਤਿਪਿ ਇਨ੍ਦ੍ਰਿਯਸਮਤ੍ਤੇ, ਵੀਰਿਯਸਮਤਾਯ ਚ ਤੇਨੇਵ ਖੋਭੇਨ, ਸਮ੍ਪਸਾਦਾਭਾਵੇਨ ਚ ਸਮਾਧਿਪਿ ਨ ਸੁਟ੍ਠੁ ਪਾਕਟੋ ਬਹਲੇ ਵਿਯ ਜਲੇ ਮਚ੍ਛੋ. ਯਥਾਵੁਤ੍ਤਕ੍ਖੋਭੋ ਏਵ ਪਲਿਬੋਧੋ. ਏਵਂ ਵੁਤ੍ਤੇਨਾਤਿ ਯਸ੍ਸਾ ਸਦ੍ਧਾਯ ਵਸੇਨ ਸਮ੍ਪਸਾਦਨਂ, ਯਸ੍ਸਾ ਚ ਚਿਤ੍ਤੇਕਗ੍ਗਤਾਯ ਵਸੇਨ ਏਕੋਦਿਭਾਵਨ੍ਤਿ ਚ ਝਾਨਂ ਵੁਤ੍ਤਂ. ਤਾਸਂ ਏਵ ‘‘ਸਦ੍ਦਹਨਾ’’ਤਿਆਦਿਨਾ ਪਵਤ੍ਤਿਆਕਾਰਸ੍ਸ ਵਿਸੇਸਵਿਭਾਵਨਾਵਸੇਨ ਵੁਤ੍ਤੇਨ. ਤੇਨ ਵਿਭਙ੍ਗਪਾਠੇਨ. ‘‘ਸਮ੍ਪਸਾਦਨਯੋਗਤੋ, ਸਮ੍ਪਸਾਦਨਤੋ ਵਾ ਸਮ੍ਪਸਾਦਨਂ, ਏਕੋਦਿਂ ਭਾਵੇਤੀਤਿ ਏਕੋਦਿਭਾਵਨ੍ਤਿ ਝਾਨਂ ਵੁਤ੍ਤ’’ਨ੍ਤਿ ਏਵਂ ਪਵਤ੍ਤਾ ਅਯਂ ਅਤ੍ਥਵਣ੍ਣਨਾ ਨ ਵਿਰੁਜ੍ਝਤਿ. ਯਥਾ ਪਨ ਅਵਿਰੋਧੋ, ਸੋ ਵੁਤ੍ਤੋ ਏਵ.
੮੧. ਸਨ੍ਤਾਤਿ ਸਮਂ ਨਿਰੋਧਂ ਗਤਾ. ਸਮਿਤਾਤਿ ਭਾਵਨਾਯ ਸਮਂ ਗਮਿਤਾ ਨਿਰੋਧਿਤਾ. ਵੂਪਸਨ੍ਤਾਤਿ ਤਤੋ ਏਵ ਸੁਟ੍ਠੁ ਉਪਸਨ੍ਤਾ. ਅਤ੍ਥਙ੍ਗਤਾਤਿ ਅਤ੍ਥਂ ਵਿਨਾਸਂ ਗਤਾ. ਅਬ੍ਭਤ੍ਥਙ੍ਗਤਾਤਿ ਉਪਸਗ੍ਗੇਨ ਪਦਂ ਵਡ੍ਢੇਤ੍ਵਾ ਵੁਤ੍ਤਂ. ਅਪ੍ਪਿਤਾਤਿ ਵਿਨਾਸਂ ਗਮਿਤਾ. ਸੋਸਿਤਾਤਿ ਪਵਤ੍ਤਿਸਙ੍ਖਾਤਸ੍ਸ ਸਨ੍ਤਾਨਸ੍ਸ ਅਭਾਵੇਨ ਸੋਸਂ ਸੁਕ੍ਖਭਾਵਂ ਇਤਾ. ਬ੍ਯਨ੍ਤਿਕਤਾਤਿ ਵਿਗਤਨ੍ਤਕਤਾ.
ਅਯਮਤ੍ਥੋਤਿ ਭਾਵਨਾਯ ਪਹੀਨਤ੍ਤਾ ਵਿਤਕ੍ਕਵਿਚਾਰਾਨਂ ਅਭਾਵੋ. ਚੋਦਕੇਨ ਵੁਤ੍ਤਮਤ੍ਥਂ ਸਮ੍ਪਟਿਚ੍ਛਿਤ੍ਵਾ ਪਰਿਹਰਿਤੁਂ ‘‘ਏਵਮੇਤਂ ਸਿਦ੍ਧੋਵਾਯਮਤ੍ਥੋ’’ਤਿ ਵਤ੍ਵਾ ‘‘ਨ ਪਨੇਤ’’ਨ੍ਤਿਆਦਿ ਵੁਤ੍ਤਂ. ਤਤ੍ਥ ਏਤਨ੍ਤਿ ‘‘ਵਿਤਕ੍ਕਵਿਚਾਰਾਨਂ ਵੂਪਸਮਾ’’ਤਿ ਏਤਂ ਵਚਨਂ. ਤਦਤ੍ਥਦੀਪਕਨ੍ਤਿ ਤਸ੍ਸ ਵਿਤਕ੍ਕਵਿਚਾਰਾਭਾਵਮਤ੍ਤਸਙ੍ਖਾਤਸ੍ਸ ਅਤ੍ਥਸ੍ਸ ਦੀਪਕਂ. ਅਯਞ੍ਹੇਤ੍ਥ ਅਤ੍ਥੋ – ਦੁਤਿਯਜ੍ਝਾਨਾਦਿਅਧਿਗਮੂਪਾਯਦੀਪਕੇਨ ਅਜ੍ਝਤ੍ਤਸਮ੍ਪਸਾਦਨਤਾਯ, ਚੇਤਸੋ ਏਕੋਦਿਭਾਵਤਾਯ ਚ ਹੇਤੁਦੀਪਕੇਨ, ਅਵਿਤਕ੍ਕਅਵਿਚਾਰਭਾਵਹੇਤੁਦੀਪਕੇਨ ਚ ਵਿਤਕ੍ਕਵਿਚਾਰਵੂਪਸਮਵਚਨੇਨੇਵ ਵਿਤਕ੍ਕਵਿਚਾਰਾਭਾਵੋ ਦੀਪਿਤੋਤਿ ਕਿਂ ਪੁਨ ਅਵਿਤਕ੍ਕਅਵਿਚਾਰਵਚਨੇਨ ਕਤੇਨਾਤਿ? ਨ, ਅਦੀਪਿਤਤ੍ਤਾ. ਨ ਹਿ ਵਿਤਕ੍ਕਵਿਚਾਰਵੂਪਸਮਵਚਨੇਨ ਵਿਤਕ੍ਕਵਿਚਾਰਾਨਂ ਅਪ੍ਪਵਤ੍ਤਿ ਵੁਤ੍ਤਾ ਹੋਤਿ. ਵਿਤਕ੍ਕਵਿਚਾਰੇਸੁ ਹਿ ਤਣ੍ਹਾਪ੍ਪਹਾਨਂ ਏਤੇਸਂ ਵੂਪਸਮਨਂ, ਯੇ ਚ ਸਙ੍ਖਾਰੇਸੁ ਤਣ੍ਹਾਪ੍ਪਹਾਨਂ ਕਰੋਨ੍ਤਿ, ਤੇਸੁ ਮਗ੍ਗੇਸੁ, ਪਹੀਨਤਣ੍ਹੇਸੁ ਚ ਫਲੇਸੁ ਸਙ੍ਖਾਰਪਵਤ੍ਤਿ ਹੋਤਿ ਏਵ, ਏਵਮੇਵਿਧਾਪਿ ਵਿਕ੍ਖਮ੍ਭਿਤਵਿਤਕ੍ਕਵਿਚਾਰਤਣ੍ਹਸ੍ਸ ਦੁਤਿਯਜ੍ਝਾਨਸ੍ਸ ਵਿਤਕ੍ਕਵਿਚਾਰਸਮ੍ਪਯੋਗੋ ਪੁਰਿਮੇਨ ਨ ਨਿਵਾਰਿਤੋ ਸਿਯਾਤਿ ਤਂਨਿਵਾਰਣਤ੍ਥਂ, ਆਵਜ੍ਜਿਤੁਕਾਮਤਾਦਿਅਤਿਕ੍ਕਮੋਵ ਤੇਸਂ ਵੂਪਸਮੋਤਿ ਦਸ੍ਸਨਤ੍ਥਞ੍ਚ ‘‘ਅਵਿਤਕ੍ਕਂ ਅਵਿਚਾਰ’’ਨ੍ਤਿ ਵੁਤ੍ਤਂ. ਪਠਮਮ੍ਪੀਤਿ ਪਠਮਂ ਝਾਨਮ੍ਪਿ.
‘‘ਦੁਤਿਯਂ ਉਪ੍ਪਨ੍ਨਨ੍ਤਿਪਿ ਦੁਤਿਯ’’ਨ੍ਤਿ ਵਤ੍ਤੁਂ ਵਟ੍ਟਤਿਯੇਵ. ਨ ਤਥਾ ਇਮਸ੍ਸ ਵਿਤਕ੍ਕਵਿਚਾਰਾਤਿ ਯਥਾ ਪਠਮਜ੍ਝਾਨਸ੍ਸ ਉਪਚਾਰਕ੍ਖਣੇ ਨੀਵਰਣਾਨਿ ਪਹੀਯਨ੍ਤਿ, ਤਥਾ ਇਮਸ੍ਸ ਦੁਤਿਯਜ੍ਝਾਨਸ੍ਸ ਉਪਚਾਰਕ੍ਖਣੇ ਵਿਤਕ੍ਕਵਿਚਾਰਾ ਨ ਪਹੀਯਨ੍ਤਿ ਅਸਂਕਿਲਿਟ੍ਠਸਭਾਵਤ੍ਤਾ, ਉਪਚਾਰਭਾਵਨਾਯ ਚ ਤੇ ਪਹਾਤੁਂ ਅਸਮਤ੍ਥਭਾਵਤੋ. ਯਦਿਪਿ ਤਾਯ ਤੇਸੁ ਤਣ੍ਹਾ ਪਹੀਯਤਿ, ਨ ਪਨ ਸਵਿਸੇਸਂ. ਸਵਿਸੇਸਞ੍ਹਿ ਤਤ੍ਥ ਤਣ੍ਹਾਪ੍ਪਹਾਨਂ ਅਪ੍ਪਨਾਯ ਏਵ ਹੋਤਿ. ਤੇਨ ਵੁਤ੍ਤਂ ‘‘ਅਪ੍ਪਨਾਕ੍ਖਣੇਯੇਵਾ’’ਤਿਆਦਿ. ਪਹਾਨਙ੍ਗਤਾਪਿ ਅਤਿਸਯਪ੍ਪਹਾਨਵਸੇਨੇਵ ਵੇਦਿਤਬ੍ਬਾ ਯਥਾ ਨੀਵਰਣਾਨਂ ਪਠਮਜ੍ਝਾਨਸ੍ਸ. ਤਸ੍ਮਾਤਿ ਯਸ੍ਮਾ ਤਿਵਙ੍ਗਮੇਵੇਤਂ ਝਾਨਂ, ਤਸ੍ਮਾ. ਤਨ੍ਤਿ ਵਿਭਙ੍ਗੇ ਵਚਨਂ. ਰਥਸ੍ਸ ਪਣ੍ਡੁਕਮ੍ਬਲਂ ਵਿਯ ਸਮ੍ਪਸਾਦੋ ਝਾਨਸ੍ਸ ਪਰਿਕ੍ਖਾਰੋ, ਨ ਝਾਨਙ੍ਗਨ੍ਤਿ ਆਹ ‘‘ਸਪਰਿਕ੍ਖਾਰਂ ਝਾਨਂ ਦਸ੍ਸੇਤੁ’’ਨ੍ਤਿ.
ਤਤਿਯਜ੍ਝਾਨਕਥਾਵਣ੍ਣਨਾ
੮੨. ਉਪ੍ਪਿਲਾਵਿਤਨ੍ਤਿ ਕਾਮਞ੍ਚਾਯਂ ਪਰਿਗ੍ਗਹੇਸੁ ਅਪਰਿਚ੍ਚਤ੍ਤਪੇਮਸ੍ਸ ਅਨਾਦੀਨਵਦਸ੍ਸਿਨੋ ਤਣ੍ਹਾਸਹਗਤਾਯ ਪੀਤਿਯਾ ਪਵਤ੍ਤਿਆਕਾਰੋ, ਇਧ ਪਨ ਦੁਤਿਯਜ੍ਝਾਨਪੀਤਿ ਅਧਿਪ੍ਪੇਤਾ. ਤਥਾਪਿ ਸਬ੍ਬਸੋ ਪੀਤਿਯਂ ਅਵਿਰਤ੍ਤਂ, ਸਾਪਿ ਅਨੁਬਨ੍ਧੇਯ੍ਯਾਤਿ ਵੁਤ੍ਤਂ. ਉਪ੍ਪਿਲਾਵਿਤਂ ਵਿਯਾਤਿ ਵਾ ਉਪ੍ਪਿਲਾਵਿਤਂ. ਆਦੀਨਵਂ ਹਿ ਤਤ੍ਥ ਪਾਕਟਤਰਂ ਕਤ੍ਵਾ ਦਸ੍ਸੇਤੁਂ ਏਵਂ ਵੁਤ੍ਤਨ੍ਤਿ ਦਟ੍ਠਬ੍ਬਂ.
੮੩. ਵਿਰਜ੍ਜਨਂ ਵਿਰਾਗੋ. ਤਂ ਪਨ ਵਿਰਜ੍ਜਨਂ ਨਿਬ੍ਬਿਨ੍ਦਨਮੁਖੇਨ ਹੀਲ਼ਨਂ ਵਾ ਤਪ੍ਪਟਿਬਦ੍ਧਰਾਗਪ੍ਪਹਾਨਂ ਵਾਤਿ ਤਦੁਭਯਂ ਦਸ੍ਸੇਤੁਂ ‘‘ਵੁਤ੍ਤਪ੍ਪਕਾਰਾਯ ਪੀਤਿਯਾ ਜਿਗੁਚ੍ਛਨਂ ਵਾ ਸਮਤਿਕ੍ਕਮੋ ਵਾ’’ਤਿ ਆਹ. ਵੁਤ੍ਤਪ੍ਪਕਾਰਾਯਾਤਿ ‘‘ਯਦੇਵ ਤਤ੍ਥ ਪੀਤੀ’’ਤਿਆਦਿਨਾ ਵੁਤ੍ਤਪ੍ਪਕਾਰਾਯ. ਸਮ੍ਪਿਣ੍ਡਨਂ ਸਮੁਚ੍ਚਯੋ.
ਮਗ੍ਗੋਤਿ ਉਪਾਯੋ. ਤਦਧਿਗਮਾਯਾਤਿ ਤਤਿਯਮਗ੍ਗਾਧਿਗਮਾਯ.
੮੪. ਉਪਪਤ੍ਤਿਤੋਤਿ ਸਮਵਾਹਿਤਭਾਵੇਨ ਪਤਿਰੂਪਤੋ. ਝਾਨੁਪੇਕ੍ਖਾਪਿ ਸਮਵਾਹਿਤਮੇਵ ਅਨ੍ਤੋਨੀਤਂ ਕਤ੍ਵਾ ਪਵਤ੍ਤਤੀਤਿ ਆਹ ‘‘ਸਮਂ ਪਸ੍ਸਤੀ’’ਤਿ. ਵਿਸਦਾਯਾਤਿ ਪਰਿਬ੍ਯਤ੍ਤਾਯ ਸਂਕਿਲੇਸਵਿਗਮੇਨ. ਵਿਪੁਲਾਯਾਤਿ ਮਹਤਿਯਾ ਸਾਤਿਸਯਂ ਮਹਗ੍ਗਤਭਾਵਪ੍ਪਤ੍ਤਿਯਾ. ਥਾਮਗਤਾਯਾਤਿ ਪੀਤਿਵਿਗਮੇਨ ਥਿਰਭਾਵਪ੍ਪਤ੍ਤਾਯ.
ਪਰਿਸੁਦ੍ਧਪਕਤਿ ਖੀਣਾਸਵਪਕਤਿ ਨਿਕ੍ਕਿਲੇਸਤਾ. ਸਤ੍ਤੇਸੁ ਕਮ੍ਮਸ੍ਸਕਤਾਦਸ੍ਸਨਹੇਤੁਕੋ ਸਮਭਾਵਦਸ੍ਸਨਾਕਾਰੋ ਮਜ੍ਝਤ੍ਤਾਕਾਰੋ ਬ੍ਰਹ੍ਮਵਿਹਾਰੁਪੇਕ੍ਖਾ.
ਸਹਜਾਤਧਮ੍ਮਾਨਨ੍ਤਿ ਨਿਦ੍ਧਾਰਣੇ ਸਾਮਿਵਚਨਂ. ਸਮਪ੍ਪਵਤ੍ਤਿਯਾ ਭਾਵਨਾਯ ਵੀਥਿਪਟਿਪਨ੍ਨਾਯ ਅਲੀਨਾਨੁਦ੍ਧਤਾ ਨਿਰਸ੍ਸਾਦਤਾਯ ਪਗ੍ਗਹਨਿਗ੍ਗਹਸਮ੍ਪਹਂਸਨੇਸੁ ਬ੍ਯਾਪਾਰਾਭਾਵਤੋ ਸਮ੍ਪਯੁਤ੍ਤਧਮ੍ਮੇਸੁ ਮਜ੍ਝਤ੍ਤਾਕਾਰਭੂਤਾ ਬੋਜ੍ਝਙ੍ਗੁਪੇਕ੍ਖਾ.